ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ – (ᠠᠷᠪᠠ) Монгол эм эмнэлэг (10)
466ᠡᠮᠡᠭᠲᠡᠢ ᠶ᠋ᠢᠨ ᠬᠡᠢ ᠴᠢᠰᠤ ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ ᠢ᠋ ᠬᠡᠦᠬᠡᠨ ᠬᠡᠪᠲᠡᠰᠢᠨ ᠳᠣᠲᠣᠷ ᠪᠦᠷᠬᠦᠪᠴᠢ ᠰᠢᠯᠵᠢᠬᠦ ᠭᠡᠮ ᠲᠡᠢ ᠬᠠᠷᠢᠴᠠᠭᠤᠯᠤᠭᠰᠠᠨ ᠨᠢ
ᠮᠣᠩᠭᠣᠯ ᠧᠦ᠋ᠷᠣᠫᠠ ᠡᠮᠨᠡᠯᠭᠡ ᠨᠢ ᠲᠤᠰ ᠲᠤᠰ ᠪᠡᠶᠡ ᠪᠡᠨ ᠳᠠᠭᠠᠭᠠᠭᠰᠠᠨ ᠥᠪᠡᠷᠮᠢᠴᠡ ᠣᠨᠴᠠᠯᠢᠭ ᠲᠠᠢ᠂ ᠠᠳᠠᠯᠢ ᠪᠤᠰᠤ ᠴᠠᠭ ᠦᠶᠡ ᠳ᠋ᠦ᠍ ᠪᠣᠢ ᠪᠣᠯᠤᠭᠰᠠᠨ᠂ ᠠᠳᠠᠯᠢ ᠪᠤᠰᠤ ᠬᠣᠶᠠᠷ ᠰᠢᠰᠲ᠋ᠧᠮ ᠲᠡᠢ ᠠᠨᠠᠭᠠᠬᠤ ᠤᠬᠠᠭᠠᠨ ᠶᠤᠮ᠃ ᠲᠡᠷᠡ ᠨᠢ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢ 《ᠡᠷᠡᠭᠦᠯ ᠪᠡᠶᠡ ᠶ᠋ᠢᠨ ᠵᠦᠢ》《ᠡᠪᠡᠳᠴᠢᠲᠡᠢ ᠪᠡᠶᠡ ᠶ᠋ᠢᠨ ᠵᠦᠢ》 ᠭᠡᠵᠦ ᠬᠤᠪᠢᠶᠠᠬᠤ ᠪᠠ ᠡᠪᠡᠳᠴᠢᠨ ᠡᠮᠭᠡᠭ ᠢ᠋ ᠡᠮᠨᠡᠨ ᠵᠠᠰᠠᠬᠤ ᠳ᠋ᠠᠭᠠᠨ ᠪᠠᠰᠠ ᠡᠪᠡᠳᠴᠢᠨ ᠦ᠌ ᠰᠢᠯᠲᠠᠭᠠᠨ᠂ ᠨᠥᠬᠥᠴᠡᠯ᠂ ᠰᠢᠨᠵᠢ᠂ ᠪᠠᠢᠴᠠᠭᠠᠯᠲᠠ᠂ ᠣᠨᠣᠰᠢ᠂ ᠡᠮᠨᠡᠨ ᠵᠠᠰᠠᠬᠤ ᠠᠷᠭᠠ ᠭᠡᠬᠦ ᠮᠡᠲᠦ ᠪᠡᠷ ᠨᠢᠭᠡᠳᠦᠮᠡᠯ ᠲᠡᠢ ᠲᠣᠭᠲᠠᠭᠰᠠᠨ ᠵᠢᠮᠡ ᠬᠠᠤᠯᠢ ᠪᠠᠢᠳᠠᠭ ᠪᠠᠢᠨᠠ᠃ ᠪᠢ ᠡᠨᠡᠬᠦ ᠵᠢᠮᠡ ᠬᠠᠤᠯᠢ ᠶ᠋ᠢ ᠦᠨᠳᠦᠰᠦᠯᠡᠨ᠂ ᠮᠣᠩᠭᠣᠯ ᠡᠮᠨᠡᠯᠭᠡ ᠶ᠋ᠢᠨ 《ᠬᠡᠢ ᠴᠢᠰᠤ ᠪᠦᠷᠢᠯᠳᠦᠭᠰᠡᠨ》 ᠢ᠋ (ᠳᠣᠷᠣᠭᠰᠢ《ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ》 ᠭᠡᠵᠦ ᠳᠥᠭᠥᠮᠴᠢᠯᠡᠪᠡ) ᠧᠦ᠋ᠷᠣᠫᠠ ᠡᠮᠨᠡᠯᠭᠡ ᠳ᠋ᠦ᠍ ᠶᠠᠮᠠᠷ ᠡᠪᠡᠳᠴᠢᠨ ᠪᠣᠯᠬᠤ ᠲᠤᠬᠠᠢ ᠠᠳᠠᠯᠢᠳᠬᠠᠨ ᠦᠵᠡᠭᠡᠳ ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ ᠨᠢ ᠧᠦ᠋ᠷᠣᠫᠠ ᠡᠮᠨᠡᠯᠭᠡ ᠶ᠋ᠢᠨ ᠬᠡᠦᠬᠡᠨ ᠬᠡᠪᠲᠡᠰᠢᠨ ᠳᠣᠲᠣᠷ ᠪᠦᠷᠬᠦᠪᠴᠢ ᠰᠢᠯᠵᠢᠭᠰᠡᠨ ᠭᠡᠮ ᠲᠡᠢ ᠠᠳᠠᠯᠢᠪᠲᠤᠷ ᠭᠡᠵᠦ ᠦᠵᠡᠵᠡᠢ᠃
ᠨᠢᠭᠡ᠂ ᠰᠢᠯᠲᠠᠭᠠᠨ ᠨᠥᠬᠥᠴᠡᠯ᠄
ᠡᠪᠡᠳᠴᠢᠨ ᠦ᠌ ᠶᠡᠷᠦᠩᠬᠡᠢ ᠰᠢᠯᠲᠠᠭᠠᠨ ᠨᠢ ᠡᠬᠢᠯᠡᠬᠦ ᠳ᠋ᠡᠭᠡᠨ ᠰᠠᠷᠠ ᠶ᠋ᠢᠨ ᠭᠬᠢᠷ ᠡᠴᠡ ᠪᠣᠯᠬᠤ ᠲᠤᠯᠠ᠂ ᠰᠢᠨᠡ ᠳᠡᠭᠡᠷᠡ ᠨᠢ ᠴᠢᠰᠤ ᠪᠦᠷᠢᠯᠳᠦᠬᠦ ᠭᠡᠵᠦ᠂ ᠬᠠᠭᠤᠴᠢᠷᠠᠭᠠᠳ ᠬᠡᠢ ᠲᠡᠢ ᠨᠡᠢᠯᠡᠪᠡᠯ ᠬᠡᠢ ᠪᠦᠷᠢᠯᠳᠦᠭᠰᠡᠨ ᠭᠡᠨᠡ᠃ ᠰᠢᠯᠵᠢᠭᠰᠡᠨ ᠭᠡᠮ ᠪᠣᠯ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢᠨ ᠳᠣᠲᠣᠷ ᠪᠦᠷᠬᠦᠪᠴᠢ ᠨᠢ ᠪᠡᠶᠡ ᠶ᠋ᠢᠨ ᠠᠯᠢ ᠨᠢᠭᠡᠨ ᠡᠳ᠋ ᠡᠷᠬᠡᠲᠡᠨ ᠳ᠋ᠦ᠍ ᠪᠣᠢ ᠪᠣᠯᠵᠤ ᠢᠯᠡᠷᠡᠨ ᠡᠯᠳᠡᠪ ᠵᠦᠢᠯ ᠦ᠋ᠨ ᠡᠪᠡᠳᠴᠢᠨ ᠦ᠌ ᠰᠢᠨᠵᠢ ᠶ᠋ᠢ ᠡᠭᠦᠰᠬᠡᠬᠦ ᠡᠴᠡ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢᠨ ᠳᠣᠲᠣᠷ ᠪᠦᠷᠬᠦᠪᠴᠢ ᠰᠢᠯᠵᠢᠭᠰᠡᠨ ᠭᠡᠮ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠠᠢᠨᠠ᠃ ᠡᠢᠮᠦ ᠡᠴᠡ ᠡᠨᠡ ᠬᠣᠶᠠᠷ ᠡᠪᠡᠳᠴᠢᠨ ᠦ᠌ ᠰᠢᠯᠲᠠᠭᠠᠨ ᠪᠠ ᠨᠡᠷᠡ ᠨᠢ ᠪᠦᠷ ᠯᠡ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢᠨ ᠳᠣᠲᠣᠷ ᠪᠦᠷᠬᠦᠪᠴᠢ᠂ ᠰᠠᠷᠠ ᠶ᠋ᠢᠨ ᠭᠬᠢᠷ ᠡᠴᠡ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢᠨ ᠳᠣᠲᠣᠷ ᠪᠦᠷᠬᠦᠪᠴᠢ ᠨᠢ ᠰᠠᠷᠠ ᠪᠦᠷᠢ ᠨᠢᠭᠡ ᠤᠳᠠᠭᠠ ᠬᠣᠪᠬᠣᠷᠠᠨ ᠰᠠᠷᠠ ᠶ᠋ᠢᠨ ᠭᠬᠢᠷ ᠪᠣᠯᠳᠠᠭ᠃
ᠬᠣᠶᠠᠷ᠂ ᠡᠪᠡᠳᠴᠢᠨ ᠦ᠌ ᠪᠦᠷᠢᠯᠳᠦᠬᠦ ᠣᠷᠣᠰᠢᠬᠤ ᠣᠷᠣᠨ᠄
ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ ᠢ᠋ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠴᠢᠰᠤ ᠪᠦᠷᠢᠯᠳᠦᠬᠦ᠂ ᠬᠡᠢ ᠪᠦᠷᠢᠯᠳᠦᠬᠦ ᠭᠡᠵᠦ ᠬᠤᠪᠢᠶᠠᠨ ᠲᠣᠰᠪᠣᠷᠢ ᠳ᠋ᠤᠨᠢ ᠡᠯᠢᠭᠡ᠂ ᠳᠡᠯᠢᠭᠦᠦ᠂ ᠠᠭᠤᠰᠬᠢ᠂ ᠪᠥᠭᠡᠷᠡ᠂ ᠰᠥᠰᠥ᠂ ᠭᠡᠳᠡᠰᠦ᠂ ᠬᠥᠬᠥ᠂ ᠴᠢᠰᠤ᠂ ᠰᠦ ᠪᠦᠷᠢᠯᠳᠦᠬᠦ ᠵᠡᠷᠭᠡ 10᠃ ᠲᠣᠯᠣᠭᠠᠢ᠂ ᠶᠠᠰᠤ᠂ ᠵᠢᠷᠦᠬᠡ᠂ ᠪᠥᠭᠡᠷᠡ᠂ ᠬᠣᠳᠣᠭᠣᠳᠣ᠂ ᠭᠡᠳᠡᠰᠦ ᠵᠡᠷᠭᠡ ᠬᠡᠢ ᠪᠦᠷᠢᠯᠳᠦᠬᠦ 8᠃ ᠨᠡᠢᠯᠡᠭᠡᠳ 16 ᠪᠠᠢᠨᠠ᠃ ᠰᠢᠯᠵᠢᠭᠰᠡᠨ ᠭᠡᠮ ᠨᠢ ᠵᠢᠷᠦᠬᠡᠨ ᠦ᠌ ᠦᠩᠬᠦᠯᠴᠡᠭ᠂ ᠠᠭᠤᠰᠬᠢ ᠮᠥᠭᠡᠷᠰᠦᠨ ᠬᠣᠭᠣᠯᠠᠢ᠂ ᠡᠯᠢᠭᠡ᠂ ᠳᠡᠯᠢᠭᠦᠦ᠂ ᠪᠥᠭᠡᠷᠡ᠂ ᠳᠠᠪᠤᠰᠠᠩ᠂ ᠰᠢᠭᠡᠰᠦ ᠳᠠᠮᠵᠢᠭᠤᠯᠬᠤ ᠴᠣᠷᠭᠣ᠂ ᠴᠡᠭᠡᠵᠢᠨ ᠬᠠᠯᠢᠰᠤ᠂ ᠲᠠᠷᠢᠬᠢᠨ ᠪᠦᠷᠬᠦᠪᠴᠢ᠂ ᠬᠡᠪᠡᠯᠢ ᠶ᠋ᠢᠨ ᠬᠠᠯᠢᠰᠤ᠂ ᠭᠡᠳᠡᠰᠦ᠂ ᠠᠭᠠᠷᠴᠠᠭ ᠤ᠋ᠨ ᠬᠥᠨᠳᠡᠢ ᠶ᠋ᠢᠨ ᠬᠡᠪᠡᠯᠢ ᠶ᠋ᠢᠨ ᠬᠠᠯᠢᠰᠤ᠂ ᠰᠠᠪᠠ ᠶ᠋ᠢᠨ ᠡᠬᠡᠳᠡᠮᠦᠭ ᠪᠦᠷᠬᠦᠪᠴᠢ᠂ ᠥᠨᠳᠡᠭᠡᠪᠴᠢ᠂ ᠥᠨᠳᠡᠭᠡ ᠳᠠᠮᠵᠢᠭᠤᠯᠬᠤ ᠴᠣᠷᠭᠣ᠂ ᠰᠠᠪᠠ ᠶ᠋ᠢᠨ ᠬᠣᠯᠪᠣᠭᠠᠰᠤ᠂ ᠰᠠᠪᠠ ᠶ᠋ᠢᠨ ᠬᠦᠵᠦᠭᠦᠦ᠂ ᠤᠮᠠᠢ᠂ ᠭᠠᠳᠠᠷ ᠪᠡᠯᠭᠡ᠂ ᠰᠠᠪᠠ᠂ ᠰᠢᠯᠤᠭᠤᠨ ᠭᠡᠳᠡᠰᠦᠨ ᠦ᠌ ᠬᠣᠲᠣᠩᠬᠣᠷ᠂ ᠬᠦᠢᠰᠦ᠂ ᠴᠠᠪᠢ᠂ ᠬᠡᠪᠡᠯᠢ ᠶ᠋ᠢᠨ ᠮᠡᠰᠡ ᠵᠠᠰᠠᠯ ᠤ᠋ᠨ ᠰᠣᠷᠪᠢ᠂ ᠯᠢᠮᠪᠠ ᠶ᠋ᠢᠨ ᠵᠠᠩᠭᠢᠯᠠᠭᠠ᠂ ᠠᠷᠠᠰᠤ ᠭᠠᠷ ᠬᠥᠯ ᠦ᠋ᠨ ᠤᠷᠲᠤ ᠶᠠᠰᠤ ᠵᠡᠷᠭᠡ ᠳ᠋ᠦ᠍ ᠣᠷᠣᠰᠢᠨ ᠡᠯᠳᠡᠪ ᠡᠪᠡᠳᠴᠢᠨ ᠦ᠌ ᠰᠢᠨᠵᠢ ᠶ᠋ᠢ ᠢᠯᠡᠷᠡᠭᠦᠯᠦᠨᠡ᠃
ᠳᠡᠭᠡᠷᠡᠬᠢ ᠡᠴᠡ ᠦᠵᠡᠪᠡᠯ ᠰᠢᠯᠵᠢᠭᠰᠡᠨ ᠭᠡᠮ ᠨᠢ ᠳᠡᠯᠭᠡᠷᠡᠩᠭᠦᠢ ᠥᠭᠦᠯᠡᠭᠰᠡᠨ ᠪᠣᠯᠪᠠᠴᠤ ᠬᠣᠳᠣᠭᠣᠳᠣ ᠰᠥᠰᠥᠨ ᠳ᠋ᠦ᠍ ᠣᠷᠣᠰᠢᠨᠠ ᠭᠡᠰᠡᠨ ᠦᠭᠡᠢ᠂ ᠭᠡᠪᠡᠴᠦ ᠰᠢᠯᠵᠢᠭᠰᠡᠨ ᠭᠡᠮ ᠨᠢ ᠪᠡᠶᠡ ᠶ᠋ᠢᠨ ᠬᠠᠮᠢᠭᠠ ᠴᠤ᠌ ᠢᠯᠡᠷᠡᠬᠦ ᠮᠠᠭᠠᠳ ᠭᠡᠵᠦ ᠦᠵᠡᠳᠡᠭ᠃ ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ ᠨᠢ ᠦᠷᠡᠵᠢᠯ ᠦ᠋ᠨ ᠡᠷᠬᠡᠲᠡᠨ᠂ ᠥᠨᠳᠡᠭᠡᠪᠴᠢ ᠰᠠᠪᠠ ᠶ᠋ᠢᠨ ᠬᠦᠵᠦᠭᠦᠦ ᠤᠮᠠᠢ ᠠᠭᠠᠷᠴᠠᠭ ᠤ᠋ᠨ ᠬᠥᠨᠳᠡᠢ ᠭᠡᠵᠦ ᠦᠷᠡᠵᠢᠯ ᠦ᠋ᠨ ᠡᠷᠬᠡᠲᠡᠨ᠂ ᠳᠠᠭᠠᠯᠲᠠ ᠡᠷᠬᠡᠲᠡᠨ ᠳ᠋ᠦ᠍ ᠲᠤᠰ ᠲᠤᠰ ᠪᠦᠷᠢᠯᠳᠦᠨᠡ ᠭᠡᠵᠦ ᠣᠨᠴᠠ ᠲᠣᠳᠣᠷᠬᠠᠢᠯᠠᠭᠰᠠᠨ ᠦᠭᠡᠢ᠃ ᠡᠨᠡ ᠨᠢ ᠮᠢᠨᠦ ᠦᠵᠡᠬᠦ ᠪᠡᠷ ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ ᠨᠢ ᠭᠣᠣᠯᠳᠠᠭᠤ ᠠᠭᠠᠷᠴᠠᠭ ᠤ᠋ᠨ ᠬᠥᠨᠳᠡᠢ ᠦᠷᠡᠵᠢᠯ ᠦ᠋ᠨ ᠡᠷᠬᠡᠲᠡᠨ ᠲᠡᠭᠦᠨ ᠦ᠌ ᠣᠢᠷᠠᠯᠴᠠᠭᠠᠬᠢ ᠡᠳ᠋ ᠨᠡᠬᠡᠳᠡᠰᠦ ᠳ᠋ᠦ᠍ ᠪᠦᠷᠢᠯᠳᠦᠵᠦ ᠡᠪᠡᠳᠴᠢᠯᠡᠬᠦ ᠨᠢ ᠣᠯᠠᠨ ᠲᠤᠯᠠ ᠡᠮᠡᠭᠲᠡᠢ ᠶ᠋ᠢᠨ ᠪᠦᠷᠢᠯᠳᠦᠬᠦ ᠶᠡᠷᠦᠩᠬᠡᠢ ᠡᠪᠡᠳᠴᠢᠨ ᠭᠡᠵᠦ᠂ ᠰᠢᠨᠵᠢ ᠲᠡᠮᠳᠡᠭ ᠢ᠋ᠶ᠋ᠡᠷ ᠨᠢ ᠴᠢᠰᠤ ᠪᠦᠷᠢᠯᠳᠦᠬᠦ᠂ ᠬᠡᠢ ᠪᠦᠷᠢᠯᠳᠦᠬᠦ ᠭᠡᠵᠦ ᠶᠡᠷᠦᠩᠬᠡᠢᠯᠡᠨ ᠬᠤᠪᠢᠶᠠᠨᠠ᠃
ᠴᠢᠰᠤ ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ ᠦ᠌ ᠶᠡᠷᠦᠩᠬᠡᠢ ᠰᠢᠨᠵᠢ᠄ ᠪᠡᠯᠬᠡᠭᠦᠰᠦ ᠳᠠᠪᠤᠰᠠᠩ ᠠ᠋ᠴᠠ ᠳᠣᠷᠣᠭᠰᠢ ᠶᠠᠰᠤ ᠨᠢ ᠱᠠᠷᠬᠢᠷᠠᠨ ᠡᠪᠡᠳᠬᠦ᠂ ᠭᠡᠳᠡᠰᠦᠨ ᠦ᠌ ᠳᠣᠣᠷᠠ ᠨᠢ ᠬᠠᠯᠠᠭᠤᠨ ᠣᠷᠬᠢᠨᠠ᠃
ᠰᠢᠯᠵᠢᠭᠰᠡᠨ ᠭᠡᠮ ᠦ᠋ᠨ ᠡᠪᠡᠳᠬᠦ ᠣᠷᠣᠨ ᠨᠢ᠄ ᠬᠡᠪᠡᠯᠢ᠂ ᠤᠭᠤᠴᠠ᠂ ᠣᠬᠣᠷ ᠰᠡᠭᠦᠯ᠂ ᠨᠢᠭᠤᠴᠠ᠂ ᠬᠣᠰᠬᠢᠨᠠᠭ᠂ ᠪᠦᠳᠦᠭᠦᠨ ᠭᠤᠶᠠ ᠪᠠᠷ ᠰᠠᠴᠤᠷᠠᠯᠲᠠ ᠶ᠋ᠢᠨ ᠴᠢᠨᠠᠷᠲᠠᠢ ᠡᠪᠡᠳᠬᠦ᠂ ᠵᠠᠷᠢᠮ ᠨᠢ ᠳᠦᠯᠢᠭᠦᠯᠬᠦ᠂ ᠡᠪᠡᠷᠰᠢᠶᠡᠯ ᠨᠢ ᠲᠡᠰᠬᠦᠶᠡ ᠪᠡᠷᠬᠡ ᠪᠠᠢᠳᠠᠭ᠃ ᠪᠦᠷᠢᠯᠳᠦᠭᠰᠡᠨ ᠳ᠋ᠦ᠍ ᠠᠷᠤ ᠪᠡᠶᠡ ᠥᠷᠥᠴᠡ ᠪᠡᠷ ᠨᠢ ᠬᠠᠳᠬᠤᠯᠠᠬᠤ ᠰᠤᠳᠠᠯ ᠤ᠋ᠳ ᠨᠢ ᠪᠣᠯᠭᠢᠯᠵᠢᠨ ᠯᠤᠭᠰᠢᠨᠠ᠃ ᠰᠢᠯᠵᠢᠭᠰᠡᠨ ᠭᠡᠮ ᠳ᠋ᠦ᠍ ᠪᠠᠭᠠ ᠬᠡᠮᠵᠢᠶᠡᠨ ᠦ᠌ ᠬᠠᠯᠠᠭᠤᠷᠠᠬᠤ ᠪᠥᠭᠡᠳ ᠴᠢᠰᠤᠨ ᠲᠤᠨᠤᠳᠠᠰᠤ ᠳᠡᠭᠡᠭᠰᠢᠯᠡᠬᠦ ᠦᠵᠡᠭᠳᠡᠯ ᠲᠡᠢ᠃ ᠪᠥᠭᠡᠷᠡ᠂ ᠳᠠᠪᠤᠰᠠᠩ᠂ ᠰᠢᠭᠡᠰᠦ ᠳᠠᠮᠵᠢᠭᠤᠯᠬᠤ ᠴᠣᠷᠭᠣ ᠳ᠋ᠤ᠌ ᠣᠷᠣᠰᠢᠭᠰᠠᠨ ᠢ᠋ᠶ᠋ᠠᠷ ᠪᠡᠶᠡ ᠳᠠᠭᠠᠷᠠᠳᠠᠰᠤ ᠬᠦᠷᠴᠦ ᠬᠠᠯᠠᠭᠤᠷᠠᠬᠤ ᠰᠢᠨᠵᠢ ᠳᠠᠬᠢᠨ ᠳᠠᠪᠲᠠᠨ ᠢᠯᠡᠷᠡᠳᠡᠭ ᠪᠥᠭᠡᠳ ᠬᠠᠪᠢᠷᠭᠠ ᠬᠠᠵᠠᠭᠤ ᠪᠠᠷ ᠬᠠᠳᠬᠤᠯᠠᠵᠤ ᠡᠪᠡᠳᠦᠨᠡ᠃ ᠦᠷᠪᠢᠰᠦᠯ ᠳᠠᠪᠬᠤᠷᠯᠠᠪᠠᠯ ᠰᠢᠨᠵᠢ ᠨᠢ ᠢᠯᠡᠭᠦᠦ ᠪᠥᠭᠡᠳ ᠢᠯᠭᠠᠨ ᠣᠨᠣᠰᠢᠯᠠᠬᠤ ᠳ᠋ᠤ᠌ ᠬᠦᠴᠢᠷᠲᠡᠢ᠃ ᠪᠦᠷᠢᠯᠳᠦᠭᠰᠡᠨ ᠨᠢᠰᠤᠭᠤ ᠪᠠ ᠵᠢᠵᠢᠭ ᠭᠦᠪᠳᠦᠷᠦᠦ ᠭᠠᠷᠬᠤ᠂ ᠤᠮᠠᠢ ᠶ᠋ᠢᠨ ᠴᠢᠰᠤ ᠨᠢ ᠴᠤᠭᠯᠠᠷᠠᠬᠤ ᠪᠠ ᠴᠤᠪᠤᠷᠠᠬᠤ ᠡᠰᠡᠬᠦᠯᠡ ᠥᠭᠡᠷᠢ ᠪᠣᠯᠤᠨᠠ᠃ ᠰᠢᠯᠵᠢᠭᠰᠡᠨ ᠭᠡᠮ ᠨᠢ ᠬᠦᠢᠰᠦ᠂ ᠮᠡᠰᠡ ᠵᠠᠰᠠᠯ ᠤ᠋ᠨ ᠰᠣᠷᠪᠢ᠂ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢᠨ ᠬᠦᠵᠦᠭᠦᠦ᠂ ᠤᠮᠠᠢ ᠶ᠋ᠢᠨ ᠬᠣᠢᠲᠤ ᠬᠤᠳᠤᠩᠬᠣᠷ ᠲᠤ᠌ ᠪᠣᠷᠣᠪᠲᠤᠷ ᠬᠥᠬᠡ ᠵᠢᠵᠢᠭ ᠭᠦᠪᠳᠦᠷᠦᠦ ᠭᠠᠷᠴᠤ ᠬᠦᠷᠦᠯᠴᠡᠪᠡᠯ ᠴᠢᠰᠤ ᠭᠠᠷᠤᠨᠠ᠃ ᠰᠠᠷᠠ ᠶ᠋ᠢᠨ ᠭᠬᠢᠷ ᠲᠡᠭᠰᠢ ᠦᠭᠡᠢ ᠪᠣᠯᠤᠨᠠ᠃ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢᠨ ᠪᠤᠯᠴᠢᠩ ᠤ᠋ᠨ ᠬᠠᠪᠤᠳᠠᠷ ᠳᠠᠪᠬᠤᠷᠯᠠᠪᠠᠯ ᠰᠠᠷᠠ ᠶ᠋ᠢᠨ ᠭᠬᠢᠷ ᠦ᠋ᠨ ᠬᠡᠮᠵᠢᠶᠡ ᠡᠯᠪᠡᠭᠰᠢᠬᠦ ᠪᠠ ᠬᠤᠭᠤᠴᠠᠭᠠ ᠨᠢ ᠤᠷᠲᠤᠳᠬᠤ ᠪᠣᠯᠤᠨᠠ᠃ ᠬᠠᠯᠳᠠᠪᠤᠷᠢ ᠭᠡᠮ ᠳᠠᠪᠬᠤᠷᠯᠠᠪᠠᠯ ᠥᠭᠡᠷᠢ ᠢᠳᠡᠭᠡ ᠪᠣᠯᠵᠤ ᠴᠤᠪᠤᠷᠠᠨᠠ᠃
ᠬᠡᠢ ᠪᠦᠷᠢᠯᠳᠦᠭᠰᠡᠨ ᠦ᠌ ᠰᠢᠨᠵᠢ᠄ ᠶᠠᠰᠤ ᠨᠢ ᠱᠠᠷᠬᠢᠷᠠᠨ᠂ ᠵᠢᠷᠦᠬᠡ ᠨᠢ ᠠᠮᠤᠷ ᠦᠭᠡᠢ ᠪᠣᠯᠬᠤ᠂ ᠲᠣᠯᠣᠭᠠᠢ ᠨᠢ ᠡᠷᠭᠢᠬᠦ᠂ ᠲᠣᠯᠣᠭᠠᠢ ᠶᠠᠰᠤ ᠨᠢ ᠬᠦᠢᠲᠡᠨ ᠣᠷᠬᠢᠬᠤ ᠪᠤᠶᠤ ᠰᠡᠷᠢᠭᠦᠨ ᠪᠣᠯᠬᠤ᠂ ᠮᠢᠬᠠ ᠠᠷᠠᠰᠤᠨ ᠤ᠋ ᠵᠠᠪᠰᠠᠷ ᠲᠤ᠌ ᠡᠪᠡᠳᠬᠦ᠂ ᠮᠢᠬᠠ ᠨᠢ ᠰᠡᠯᠬᠦᠷᠡᠵᠦ ᠬᠥᠭᠡᠬᠦ᠂ ᠦᠶᠡ ᠭᠡᠰᠢᠭᠦᠦ ᠤᠨᠲᠠᠷᠠᠬᠤ᠂ ᠨᠢᠳᠦ ᠨᠢ ᠪᠦᠷᠦᠭᠡᠯᠵᠡᠬᠦ ᠰᠣᠯᠢᠶᠠᠷᠠᠬᠤ ᠪᠤᠶᠤ ᠦᠬᠦᠳᠬᠡᠬᠦ ᠪᠠ ᠮᠠᠷᠲᠠᠮᠠᠲᠠᠭᠠᠢ ᠪᠣᠯᠬᠤ᠂ ᠳᠠᠪᠤᠰᠠᠩ ᠪᠠ ᠭᠡᠳᠡᠰᠦᠨ ᠦ᠌ ᠳᠣᠣᠷᠠ ᠨᠢ ᠪᠣᠭᠣᠭᠳᠠᠬᠤ ᠪᠣᠯᠯᠠᠩᠬᠢᠷ ᠰᠢᠭᠦᠰᠦ ᠪᠠᠭᠤᠬᠤ᠂ ᠰᠠᠷᠠ ᠶ᠋ᠢᠨ ᠭᠬᠢᠷ ᠨᠢ ᠲᠠᠰᠤᠷᠠᠯ ᠦᠭᠡᠢ ᠴᠤᠪᠤᠷᠠᠨᠠ᠃ ᠰᠢᠯᠵᠢᠭᠰᠡᠨ ᠭᠡᠮ ᠨᠢ ᠰᠠᠷᠠ ᠶ᠋ᠢᠨ ᠭᠬᠢᠷ ᠲᠡᠭᠰᠢ ᠦᠭᠡᠢ᠂ ᠣᠯᠠᠨ ᠳᠠᠬᠢᠨ ᠪᠠᠭᠤᠯᠭᠠᠬᠤ ᠠ᠋ᠴᠠ ᠴᠢᠰᠤ ᠳᠤᠲᠠᠭᠳᠠᠵᠤ᠂ ᠲᠣᠯᠣᠭᠠᠢ ᠡᠷᠭᠢᠬᠦ᠂ ᠵᠢᠷᠦᠬᠡ ᠴᠡᠴᠡᠷᠡᠬᠦ᠂ ᠨᠢᠳᠦ ᠡᠷᠢᠶᠡᠯᠵᠢᠬᠦ ᠵᠡᠷᠭᠡ ᠰᠢᠨᠵᠢ ᠲᠡᠮᠳᠡᠭ ᠢᠯᠡᠷᠡᠬᠦ ᠪᠥᠭᠡᠳ ᠰᠢᠯᠵᠢᠭᠰᠡᠨ ᠭᠡᠮ ᠨᠢ ᠥᠨᠳᠡᠭᠡᠪᠴᠢ ᠪᠠ ᠠᠭᠠᠷᠴᠠᠭ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠤᠭᠤᠲᠠᠯᠢᠭ ᠬᠠᠪᠤᠳᠠᠷ ᠪᠣᠯᠤᠨ ᠪᠦᠷᠢᠯᠳᠦᠬᠦ ᠡᠴᠡ ᠲᠦᠷᠭᠡᠨ ᠴᠢᠨᠠᠷᠲᠠᠢ ᠬᠡᠪᠡᠯᠢ ᠡᠪᠡᠳᠬᠦ ᠪᠣᠯᠤᠨᠠ᠃ ᠲᠣᠰᠪᠣᠷᠢ ᠶ᠋ᠢᠨ ᠰᠢᠨᠵᠢ ᠶ᠋ᠢ ᠬᠠᠷᠢᠴᠠᠭᠤᠯᠤᠭᠰᠠᠨ ᠠᠭᠤᠯᠭᠠ ᠶ᠋ᠢ ᠠᠳᠠ ᠳᠥᠭᠥᠮᠴᠢᠯᠡᠪᠡ᠃ ᠰᠢᠯᠵᠢᠭᠰᠡᠨ ᠭᠡᠮ ᠨᠢ 30 — 50 ᠨᠠᠰᠤᠨ ᠤ᠋ ᠬᠣᠭᠣᠷᠣᠨᠳᠣᠬᠢ ᠬᠥᠩᠭᠡᠵᠢᠬᠦ ᠨᠠᠰᠤᠨ ᠤ᠋ ᠡᠮᠡᠭᠲᠡᠢ ᠳ᠋ᠦ᠍ ᠲᠣᠬᠢᠶᠠᠯᠳᠤᠨᠠ᠃ ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ ᠨᠢ ᠨᠠᠰᠤᠨ ᠤ᠋ ᠬᠢᠵᠠᠭᠠᠷ ᠢ᠋ᠶ᠋ᠠᠷ ᠲᠣᠳᠣᠷᠬᠠᠢᠯᠠᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ᠂ ᠰᠠᠷᠠ ᠶ᠋ᠢᠨ ᠭᠬᠢᠷ ᠡᠴᠡ ᠰᠢᠯᠲᠠᠭᠠᠯᠠᠨ ᠡᠪᠡᠳᠴᠢᠯᠡᠬᠦ ᠲᠤᠯᠠ ᠰᠠᠷᠠ ᠶ᠋ᠢᠨ ᠭᠬᠢᠷ ᠪᠣᠢ ᠪᠣᠯᠵᠤ ᠢᠷᠡᠭᠰᠡᠨ ᠡᠮᠡᠭᠲᠡᠢᠴᠦᠳ ᠨᠡᠷᠪᠡᠭᠳᠡᠬᠦ ᠶᠦ᠍ᠮ ᠪᠠᠢᠨᠠ᠃
ᠡᠮᠨᠡᠨ ᠵᠠᠰᠠᠬᠤ᠄ ᠧᠦ᠋ᠷᠣᠫᠠ ᠡᠮᠨᠡᠯᠭᠡ ᠶ᠋ᠢᠨ ᠬᠢᠨ ᠠᠭᠠᠷᠴᠠᠭ ᠤ᠋ᠨ ᠬᠥᠨᠳᠡᠢ ᠶ᠋ᠢᠨ ᠦᠷᠪᠢᠰᠦᠯ ᠢ᠋ ᠶᠡᠬᠡ ᠬᠡᠮᠵᠢᠶᠡᠨ ᠦ᠌ ᠪᠠᠺᠲ᠋ᠧᠷᠢ ᠶ᠋ᠢ ᠳᠠᠷᠤᠬᠤ ᠡᠮ ᠢ᠋ ᠬᠡᠷᠡᠭᠯᠡᠳᠡᠭ᠃ ᠬᠠᠯᠠᠭᠤᠨ ᠡᠪᠡᠳᠴᠢᠨ ᠢ᠋ ᠡᠮᠨᠡᠨ ᠵᠠᠰᠠᠬᠤ ᠳ᠋ᠠᠭᠠᠨ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠶᠡᠷᠦᠨᠳᠡᠭ ᠢ᠋ ᠡᠪᠡᠳᠴᠢᠨ ᠳ᠋ᠦ᠍ᠨᠢ ᠲᠣᠬᠢᠷᠠᠭᠤᠯᠬᠤ᠂ ᠵᠠᠩᠭᠢᠯᠠᠭᠠ ᠶ᠋ᠢᠨ ᠴᠠᠭ ᠢ᠋ ᠪᠠᠷᠢᠮᠲᠠᠯᠠᠬᠤ᠂ ᠬᠠᠯᠠᠭᠤᠨ ᠢ᠋ ᠳᠠᠷᠤᠬᠤ ᠶᠡᠷᠦᠨᠳᠡᠭ ᠭᠡᠮᠡᠨ ᠭᠤᠷᠪᠠᠨ ᠵᠦᠢᠯ ᠳ᠋ᠦ᠍ ᠬᠤᠷᠢᠶᠠᠩᠭᠤᠢᠯᠠᠨ ᠡᠪᠡᠳᠴᠢᠲᠡᠨ ᠦ᠌ ᠪᠠᠢᠳᠠᠯ ᠳ᠋ᠤᠨᠢ ᠵᠣᠬᠢᠴᠠᠭᠤᠯᠤᠨ ᠡᠮᠨᠡᠳᠡᠭ᠃ ᠠᠭᠠᠷᠴᠠᠭ ᠤ᠋ᠨ ᠬᠥᠨᠳᠡᠢ ᠶ᠋ᠢᠨ ᠦᠷᠪᠢᠰᠦᠯ ᠢ᠋ ᠴᠦ᠍ ᠬᠠᠯᠠᠭᠤᠨ ᠡᠪᠡᠳᠴᠢᠨ ᠳ᠋ᠦ᠍ ᠬᠤᠪᠢᠶᠠᠷᠢᠯᠠᠨ ᠡᠮᠨᠡᠪᠡᠯ ᠡᠳᠡᠭᠡᠷᠡᠳᠡᠭ᠃
ᠳ᠋ᠦᠩᠨᠡᠯᠲᠡ᠄ ᠧᠦ᠋ᠷᠣᠫᠠ ᠡᠮᠨᠡᠯᠭᠡ ᠶ᠋ᠢᠨ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢᠨ ᠳᠣᠲᠣᠷ ᠪᠦᠷᠬᠦᠪᠴᠢ ᠰᠢᠯᠵᠢᠭᠰᠡᠨ ᠭᠡᠮ ᠨᠢ ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ ᠲᠡᠢ ᠡᠪᠡᠳᠴᠢᠨ ᠦ᠌ ᠰᠢᠯᠲᠠᠭᠠᠨ ᠨᠥᠬᠥᠴᠡᠯ᠂ ᠡᠪᠡᠳᠴᠢᠯᠡᠬᠦ ᠣᠷᠣᠨ᠂ ᠡᠪᠡᠳᠴᠢᠨ ᠦ᠌ ᠰᠢᠨᠵᠢ ᠵᠡᠷᠭᠡ ᠲᠠᠯᠠ ᠪᠠᠷ ᠠᠳᠠᠯᠢᠪᠲᠤᠷ ᠪᠠᠢᠳᠠᠭ᠃ ᠰᠢᠯᠵᠢᠭᠰᠡᠨ ᠭᠡᠮ ᠳ᠋ᠦ᠍ ᠠᠭᠠᠷᠴᠠᠭ ᠤ᠋ᠨ ᠬᠥᠨᠳᠡᠢ ᠶ᠋ᠢᠨ ᠦᠷᠪᠢᠰᠦᠯ ᠪᠠ ᠪᠤᠰᠤ ᠦᠷᠪᠢᠰᠦᠯ ᠬᠠᠯᠳᠠᠪᠤᠷᠢ ᠭᠡᠮ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢᠨ ᠪᠤᠯᠴᠢᠩ ᠤ᠋ᠨ ᠬᠠᠪᠤᠳᠠᠷ ᠵᠡᠷᠭᠡ ᠡᠪᠡᠳᠴᠢᠨ ᠬᠠᠪᠰᠤᠷᠤᠨ ᠢᠯᠡᠷᠡᠳᠡᠭ᠃ ᠲᠦᠷᠭᠡᠨ ᠴᠢᠨᠠᠷᠲᠠᠢ ᠠᠭᠠᠷᠴᠠᠭ ᠤ᠋ᠨ ᠬᠥᠨᠳᠡᠢ ᠶ᠋ᠢᠨ ᠦᠷᠪᠢᠰᠦᠯ ᠨᠢ ᠪᠦᠬᠦ ᠪᠡᠶᠡ ᠶ᠋ᠢᠨ ᠡᠪᠡᠳᠴᠢᠨ ᠦ᠌ ᠰᠢᠨᠵᠢ ᠶ᠋ᠢ ᠢᠯᠡᠷᠡᠭᠦᠯᠬᠦ ᠪᠡᠷ ᠢ᠋ᠶ᠋ᠡᠨ ᠨᠢᠶᠠᠨ ᠬᠠᠯᠠᠭᠤᠨ ᠡᠪᠡᠨᠴᠢᠨ ᠲᠡᠢ ᠠᠳᠠᠯᠢ ᠪᠠᠢᠳᠠᠭ᠃ ᠤᠳᠠᠭᠠᠨ ᠴᠢᠨᠠᠷᠲᠠᠢ ᠠᠭᠠᠷᠴᠠᠭ ᠤ᠋ᠨ ᠬᠥᠨᠳᠡᠢ ᠶ᠋ᠢᠨ ᠦᠷᠪᠢᠰᠦᠯ ᠢ᠋ ᠬᠠᠭᠤᠴᠢᠷᠷᠠᠭᠰᠠᠨ᠂ ᠪᠤᠯᠠᠩᠭᠢᠷᠲᠤᠭᠰᠠᠨ᠂ ᠬᠣᠭᠣᠰᠣᠷᠠᠭᠰᠠᠨ ᠬᠠᠯᠠᠭᠤᠨ ᠡᠪᠡᠳᠴᠢᠨ ᠦ᠌ ᠬᠦᠷᠢᠶᠡ ᠬᠡᠪᠴᠢᠶᠡᠨ ᠳ᠋ᠦ᠍ ᠪᠠᠭᠲᠠᠭᠠᠨ ᠡᠮᠴᠢᠯᠡᠵᠦ ᠪᠣᠯᠤᠨᠠ᠃ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠨᠢ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢ ᠨᠢᠭᠡᠳᠦᠮᠡᠯ ᠴᠣᠭᠴᠠ ᠪᠠᠷ ᠦᠵᠡᠵᠦ᠂ ᠡᠪᠡᠳᠴᠢᠨ ᠡᠮᠭᠡᠭ ᠨᠢ ᠳ᠋ᠠᠩ ᠭᠠᠭᠴᠠ ᠪᠠᠷ ᠣᠷᠣᠰᠢᠬᠤ ᠦᠭᠡᠢ ᠬᠠᠷᠢᠯᠴᠠᠨ ᠨᠥᠯᠥᠭᠡᠯᠡᠨᠡ ᠭᠡᠵᠦ ᠦᠵᠡᠳᠡᠭ᠃ ᠢᠯᠠᠩᠭᠤᠶᠠ ᠰᠠᠮᠰᠸ (ᠥᠨᠳᠡᠭᠡᠪᠴᠢ)ᠨᠢ ᠬᠤᠷᠠᠮᠠᠯ ᠤ᠋ᠨ ᠴᠢᠨᠠᠷᠲᠠᠢ ᠲᠤᠯᠠ ᠳ᠋ᠠᠩ ᠡᠪᠡᠳᠴᠢᠨ ᠢᠯᠡᠷᠡᠬᠦ ᠨᠢ ᠴᠥᠭᠡᠨ᠂ ᠡᠢᠮᠦ ᠡᠴᠡ ᠪᠦᠷᠢᠯᠳᠦᠭᠰᠡᠨ ᠡᠪᠡᠳᠴᠢᠨ ᠴᠦ᠍ ᠳ᠋ᠠᠩ ᠭᠠᠭᠴᠠ ᠪᠠᠷ ᠣᠷᠣᠰᠢᠬᠤ ᠦᠭᠡᠢ ᠬᠠᠯᠠᠭᠤᠨ ᠬᠦᠢᠲᠡᠨ ᠡᠪᠡᠳᠴᠢᠨ ᠠᠯᠢᠨ ᠴᠤ᠌ ᠳᠠᠪᠬᠤᠷᠯᠠᠵᠤ ᠮᠡᠳᠡᠨᠡ᠃ ᠡᠢᠮᠦ ᠡᠴᠡ ᠡᠷᠲᠡᠨ ᠡᠴᠡ ᠪᠡᠨ ᠠᠪᠤᠭᠠᠳ ᠬᠦᠴᠢᠷ ᠪᠤᠳᠤᠯᠢᠶᠠᠨᠲᠠᠢ ᠡᠪᠡᠳᠴᠢᠨ ᠭᠡᠵᠦ ᠨᠡᠷᠡᠯᠡᠭᠰᠡᠭᠡᠷ ᠢᠷᠡᠭᠰᠡᠨ ᠶᠦ᠍ᠮ᠃
— — — —
ᠬᠢᠨᠠᠯᠲᠠ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ ᠄
《ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠥᠷᠪᠡᠨ ᠦᠨᠳᠦᠰᠦ》 (ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂ 1977. 8)
ᠢᠷᠡᠯᠲᠡ᠄ ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ ᠰᠡᠳᠬᠦᠯ -1996 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠠᠸᠠ ᠦᠰᠦᠭ ᠵᠠᠰᠠᠬᠤ ᠵᠠᠰᠠᠯᠲᠠ ᠶ᠋ᠢᠨ ᠰᠢᠰᠲ᠋ᠧᠮ ᠢ᠋ᠶ᠋ᠡᠷ ᠬᠢᠨᠠᠪᠠ᠃