ᠡᠷᠡ ᠡᠮᠡ ᠶᠢᠨ ᠶᠣᠰᠣᠨ – ᠳ ᠂ ᠪᠤᠯᠤᠳᠴᠡᠷᠢᠩ <ᠨᠢᠭᠡᠳᠦᠭᠡᠷ ᠪᠦᠯᠦᠭ>– ᠬᠣᠶᠠᠷ᠂ ᠡᠷᠡ ᠡᠮᠡ ᠪᠣᠯᠵᠤ ᠲᠥᠷᠥᠬᠦ ᠶ᠋ᠢᠨ ᠵᠠᠶᠠᠭᠠ ᠲᠠᠪᠢᠯᠠᠩ Эр эмийн ёсон – Д᠂ Болдцэрэн <Нэгдүгээр бүлэг>– Ххоёр ᠂ Эр эм болж төрөхийн заяа
339ᠬᠣᠶᠠᠷ᠂ ᠡᠷᠡ ᠡᠮᠡ ᠪᠣᠯᠵᠤ ᠲᠥᠷᠥᠬᠦ ᠶ᠋ᠢᠨ ᠵᠠᠶᠠᠭᠠ ᠲᠠᠪᠢᠯᠠᠩ
ᠪᠡᠯᠭᠡ ᠠᠮᠢᠳᠤᠷᠠᠯ ᠤ᠋ᠨ ᠦᠨᠳᠦᠰᠦᠨ ᠬᠡᠯᠪᠡᠷᠢ ᠨᠢ ᠬᠤᠷᠢᠴᠠᠯ ᠪᠢᠯᠡ᠃ ᠡᠨᠡ ᠨᠢ ᠡᠰᠡᠷᠭᠦ ᠲᠡᠰᠡᠷᠭᠦ ᠬᠣᠶᠠᠷ ᠬᠦᠢᠰᠦ ᠶ᠋ᠢᠨ ᠢᠳᠡᠪᠬᠢᠲᠡᠢ ᠣᠷᠣᠯᠴᠠᠭᠠ ᠲᠠᠢ ᠶᠠᠪᠤᠭᠳᠠᠳᠠᠭ ᠴᠣᠷ ᠤ᠋ᠨ ᠭᠠᠭᠴᠠ ᠹᠢᠽᠢᠣᠯᠣᠭᠢ ᠶ᠋ᠢᠨ ᠦᠢᠯᠡᠳᠦᠯ ᠤᠴᠢᠷ ᠠ᠋ᠴᠠ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠥᠮᠦᠨ ᠲᠤᠰ ᠪᠦᠷᠢ ᠳ᠋ᠦ᠍《ᠡᠭᠦᠯᠡ ᠪᠣᠷᠣᠭᠠᠨ ᠤ᠋ ᠶᠠᠪᠤᠳᠠᠯ》 ᠶᠠᠮᠠᠷ ᠣᠨᠴᠠᠯᠢᠭ ᠲᠠᠢ ᠶᠠᠪᠤᠭᠳᠠᠳᠠᠭ ᠢ᠋ ᠨᠢᠭᠡᠨ ᠵᠡᠷᠭᠡ ᠠᠪᠴᠤ᠃ ᠦᠵᠡᠬᠦ ᠨᠢ ᠵᠦᠢᠲᠡᠢ᠃ ᠡᠬᠢᠯᠡᠭᠡᠳ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠤ᠋ᠨ ᠣᠨᠴᠠᠯᠢᠭ ᠤ᠋ᠨ ᠲᠤᠬᠠᠢ ᠥᠭᠦᠯᠡᠶᠡ᠃ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠶᠡᠬᠡ ᠪᠡᠶᠡ ᠶ᠋ᠢᠨ ᠪᠠ ᠰᠡᠳᠬᠢᠯ ᠦ᠋ᠨ ᠭᠡᠰᠡᠨ ᠬᠣᠶᠠᠷ ᠡᠬᠢ ᠡᠭᠦᠰᠪᠦᠷᠢ ᠲᠡᠢ ᠪᠠᠢᠨᠠ᠃ ᠡᠬᠢᠨ ᠬᠢᠨᠢ ᠥᠰᠪᠥᠷᠢ ᠨᠠᠰᠤᠨ ᠠ᠋ᠴᠠ(13-16 ᠨᠠᠰᠤ)᠂ ᠥᠲᠡᠯᠬᠦ(67-80 ᠨᠠᠰᠤ) ᠬᠦᠷᠲᠡᠯᠡ ᠡᠷᠡ ᠬᠥᠮᠦᠨ ᠤ ᠪᠡᠶᠡ ᠳ᠋ᠦ᠍ ᠳᠥᠷᠪᠡᠨ ᠴᠠᠭ ᠤ᠋ᠨ ᠡᠷᠭᠢᠯᠲᠡ ᠳ᠋ᠦ᠍ ᠲᠤᠵᠢ ᠪᠣᠯᠪᠠᠰᠤᠷᠠᠵᠤ ᠪᠠᠢᠳᠠᠭ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠶᠦᠮ᠃ ᠡᠨᠡ ᠨᠢ ᠲᠥᠮᠥᠰᠥ ᠶ᠋ᠢᠨ ᠲᠠᠬᠢᠷ ᠰᠣᠪᠠᠭᠠᠨᠴᠢᠷ ᠲᠤ᠌ ᠪᠣᠯᠪᠠᠰᠤᠷᠠᠳᠠᠭ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ᠂ ᠦᠷᠡ ᠶ᠋ᠢᠨ ᠴᠥᠪᠥᠷᠢᠭᠦᠦ ᠶ᠋ᠢᠨ ᠱᠦᠭᠦᠷᠡᠯ᠂ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠱᠦᠭᠦᠰᠦ ᠵᠡᠷᠭᠡ ᠡᠴᠡ ᠪᠦᠲᠦᠭᠰᠡᠨ ᠬᠣᠯᠢᠮᠠᠭ ᠰᠢᠩᠭᠡᠨ ᠪᠢᠯᠡ᠃ ᠬᠡᠳᠦᠢᠪᠡᠷ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠡᠷᠡᠭᠲᠡᠢ ᠬᠥᠮᠦᠨ ᠤ ᠪᠡᠶᠡ ᠳ᠋ᠦ᠍ ᠲᠠᠰᠤᠷᠠᠯᠲᠠ ᠦᠭᠡᠢ ᠪᠣᠯᠪᠠᠰᠤᠷᠠᠵᠤ ᠪᠠᠢᠳᠠᠭ ᠴᠦ᠍ ᠭᠡᠰᠡᠨ ᠲᠡᠷᠡ ᠨᠢ ᠡᠮᠡᠭᠲᠡᠢ ᠬᠥᠮᠦᠨ ᠲᠡᠢ ᠡᠩᠭᠡᠷ ᠵᠥᠷᠢᠭᠦᠯᠬᠦ ᠲᠣᠭᠠᠯᠠᠭᠠᠨ ᠢ᠋ᠶ᠋ᠠᠷ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠪᠡᠯᠡᠨ ᠪᠣᠯᠴᠢᠬᠠᠳᠠᠭ ᠦᠭᠡᠢ᠃ ᠲᠡᠭᠦᠨ ᠢ᠋ ᠪᠦᠲᠦᠭᠡᠬᠦ ᠳ᠋ᠦ᠍ ᠣᠢᠷᠠᠯᠴᠠᠭᠠ ᠪᠠᠷ ᠬᠣᠶᠠᠷ ᠬᠣᠨᠣᠭ ᠱᠠᠭᠠᠷᠳᠠᠯᠭᠠ ᠲᠠᠢ ᠪᠥᠭᠡᠳ ᠪᠡᠯᠡᠨ ᠪᠣᠯᠤᠭᠰᠠᠨ《ᠪᠦᠲᠦᠭᠡᠭᠳᠡᠬᠦᠨ》 ᠨᠢ ᠦᠷᠡ ᠳᠠᠮᠵᠢᠭᠤᠯᠬᠤ᠂ ᠴᠠᠴᠤᠬᠤ ᠴᠣᠷᠭᠣ᠂ ᠰᠢᠭᠡᠰᠦᠨ ᠦ᠌ ᠰᠦᠪᠡ ᠵᠡᠷᠭᠡ ᠶ᠋ᠢ ᠳᠠᠭᠠᠷᠢᠨ ᠭᠠᠳᠠᠭᠰᠢ ᠪᠠᠨ ᠢᠯᠭᠠᠷᠠᠨ ᠭᠠᠷᠬᠤ ᠬᠦᠷᠲᠡᠯᠡ ᠪᠠᠷᠤᠭ ᠨᠠᠢ᠍ᠮᠠᠨ ᠠᠯᠲᠠ ᠤᠷᠲᠤ ᠵᠠᠮ ᠢ᠋ ᠲᠤᠭᠤᠯᠳᠠᠭ ᠠᠵᠠᠢ᠃ ᠡᠨᠡ ᠨᠢ ᠦᠨᠡᠬᠡᠷ ᠬᠡᠨ ᠦ᠌ ᠴᠦ᠍ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠤᠮᠠᠷ ᠦᠭᠡᠢ ᠪᠢᠣᠯᠣᠭᠢ ᠶ᠋ᠢᠨ ᠦᠵᠡᠭᠳᠡᠯ ᠶᠦᠮ᠃ ᠡᠷᠡ ᠪᠡᠯᠭᠡ ᠶ᠋ᠢᠨ ᠡᠰ— ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠪᠦᠷᠢᠨ ᠪᠣᠯᠪᠠᠰᠤᠷᠠᠵᠤ ᠭᠦᠢᠴᠡᠳᠡᠭ ᠦ᠋ᠨ ᠤᠴᠢᠷ ᠠ᠋ᠴᠠ ᠠᠵᠢᠯ᠂ ᠠᠮᠢᠳᠤᠷᠠᠯ ᠤ᠋ᠨ ᠠᠷᠭᠠ ᠦᠭᠡᠢ ᠪᠠᠢᠳᠠᠯ ᠤ᠋ᠨ ᠤᠯᠠᠮ ᠠ᠋ᠴᠠ ᠡᠷᠡᠭᠲᠡᠢ ᠬᠥᠮᠦᠨ ᠣᠯᠠᠨ ᠬᠣᠨᠣᠭ᠂ ᠰᠠᠷᠠ《ᠰᠣᠢᠭᠳᠠᠬᠤ》 ᠳ᠋ᠤ᠌ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠨᠢ ᠪᠠᠢᠬᠤ 《ᠰᠠᠪᠠᠨ ᠳ᠋ᠠᠭᠠᠨ》 ᠬᠤᠷᠠᠮᠳᠠᠭᠤᠯᠤᠭᠳᠠᠨ ᠳᠦᠭᠦᠷᠴᠦ᠂ ᠲᠡᠭᠦᠨ ᠢ᠋ ᠪᠡᠶᠡ ᠡᠴᠡ ᠭᠠᠳᠠᠭᠰᠢᠯᠠᠭᠤᠯᠬᠤ ᠶ᠋ᠢ ᠵᠦᠢ ᠶᠣᠰᠣᠭᠠᠷ ᠱᠠᠭᠠᠷᠳᠠᠨᠠ᠃ ᠡᠨᠡ ᠨᠢ ᠳᠠᠪᠤᠰᠠᠩ ᠰᠢᠭᠡᠰᠦ ᠪᠡᠷ ᠳᠦᠭᠦᠷᠴᠦ ᠴᠢᠨᠦᠷᠡᠵᠦ ᠰᠢᠭᠡᠬᠦ ᠰᠠᠷᠠᠯ ᠡᠭᠦᠰᠬᠡᠳᠡᠭ ᠲᠡᠢ ᠬᠤᠪᠢ ᠠᠳᠠᠯᠢ ᠶᠤᠮ᠃ ᠡᠢᠮᠦ ᠳ᠋ᠦ᠍ ᠥᠰᠪᠥᠷᠢ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠲᠡᠳᠦᠢ ᠦᠭᠡᠢ᠂ ᠨᠠᠰᠤ᠂ ᠪᠡᠶᠡ ᠭᠦᠢᠴᠡᠭᠰᠡᠨ ᠡᠷᠡ ᠬᠥᠮᠦᠨ ᠡᠬᠡᠨᠡᠷ ᠡᠴᠡ ᠪᠡᠨ ᠣᠯᠠᠨ ᠬᠣᠨᠣᠭ ᠰᠠᠷᠠ ᠬᠣᠯᠠ ᠪᠠᠢᠬᠤ ᠳ᠋ᠤ᠌ ᠳᠤᠷᠠ ᠬᠦᠷᠬᠦ ᠵᠡᠭᠦᠳᠦ ᠵᠡᠭᠦᠳᠦᠯᠡᠵᠦ᠂ ᠤᠯᠠᠮ ᠢ᠋ᠶ᠋ᠠᠷ ᠵᠡᠭᠦᠳᠦ ᠨᠣᠢᠷ ᠲᠠᠭᠠᠨ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠭᠠᠷᠭᠠᠴᠢᠬᠠᠬᠤ(ᠡᠮᠨᠡᠯᠭᠡ ᠶ᠋ᠢᠨ ᠬᠡᠯᠡ ᠪᠡᠷ ᠫᠤᠯᠶᠥ᠋ᠽᠢ ᠭᠡᠳᠡᠭ) ᠶᠠᠪᠤᠳᠠᠯ ᠶᠤᠮ᠃ ᠡᠨᠡ ᠨᠢ ᠡᠪᠡᠳᠴᠢᠨ ᠪᠢᠰᠢ᠂ ᠬᠡᠪ ᠦ᠋ᠨ ᠹᠢᠽᠢᠣᠯᠣᠭᠢ ᠶ᠋ᠢᠨ ᠦᠵᠡᠭᠳᠡᠯ ᠪᠥᠭᠡᠳ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠶᠡ ᠮᠠᠬᠠᠪᠣᠳ ᠰᠢᠩᠭᠡᠨ ᠦ᠌ ᠪᠡᠶᠡ ᠶ᠋ᠢᠨ ᠢᠯᠡᠭᠦᠳᠡᠯ ᠢ᠋ᠶ᠋ᠡᠨ ᠵᠡᠭᠦᠳᠦ ᠨᠣᠢᠷ ᠲᠠᠭᠠᠨ ᠠᠯᠳᠠᠬᠤ ᠵᠠᠮ ᠢ᠋ᠶ᠋ᠠᠷ ᠪᠡᠶᠡ ᠡᠴᠡ ᠪᠡᠨ ᠭᠠᠳᠠᠭᠰᠢᠯᠠᠭᠤᠯᠤᠨ ᠰᠤᠯᠠᠯᠠᠵᠤ᠂ ᠪᠡᠯᠭᠡ ᠶ᠋ᠢᠨ ᠲᠡᠩᠴᠡᠪᠦᠷᠢᠲᠦ ᠪᠠᠢᠳᠠᠯ ᠢ᠋ᠶ᠋ᠠᠨ ᠬᠡᠪ ᠢ᠋ᠶ᠋ᠡᠷ ᠬᠠᠳᠠᠭᠠᠯᠠᠵᠤ ᠪᠣᠢ ᠡᠭᠡᠨᠡᠭᠰᠢᠨ ᠳᠠᠰᠤᠨ ᠵᠣᠬᠢᠴᠠᠬᠤ ᠬᠠᠷᠢᠭᠤ ᠤᠷᠪᠠᠯ ᠶᠤᠮ᠃ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠱᠦᠭᠦᠰᠦ ᠴᠢᠰᠤᠨ ᠳ᠋ᠤ᠌ ᠬᠡᠳᠦᠢ ᠴᠠᠭ ᠪᠠᠭᠠ ᠪᠠᠢᠪᠠᠯ᠂ ᠲᠡᠳᠦᠢ ᠴᠢᠨᠡᠭᠡ ᠪᠡᠯᠭᠡ ᠶ᠋ᠢᠨ ᠪᠤᠯᠴᠢᠷᠬᠠᠢ ᠶ᠋ᠢᠨ ᠦᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᠰᠡᠷᠭᠦᠭᠡᠳᠡᠭ᠃ ᠬᠡᠷᠪᠡ ᠲᠦᠷᠦᠭᠦᠦ ᠪᠤᠯᠴᠢᠷᠬᠠᠢ ᠶ᠋ᠢᠨ ᠱᠦᠭᠦᠰᠦ ᠶᠡᠬᠡᠳᠪᠡᠯ ᠪᠡᠯᠭᠡ ᠶ᠋ᠢᠨ ᠪᠤᠯᠴᠢᠷᠬᠠᠢ ᠶ᠋ᠢᠨ ᠦᠢᠯᠡ ᠠᠵᠢᠯᠯᠠᠭᠠ ᠳᠠᠷᠤᠭᠳᠠᠳᠠᠭ ᠪᠢᠯᠡ᠃ ᠡᠢᠮᠦ ᠡᠴᠡ ᠬᠤᠷᠢᠴᠠᠯ ᠤ᠋ᠨ ᠲᠣᠭᠠ ᠴᠥᠭᠡᠷᠡᠵᠦ ᠬᠤᠷᠢᠴᠠᠯ ᠦᠢᠯᠡᠳᠬᠦ ᠵᠠᠢ ᠬᠣᠯᠠᠳᠠᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠡᠷᠬᠡᠲᠡᠨ ᠬᠥᠪᠴᠢᠷᠡᠬᠦ ᠨᠢ ᠮᠠᠭᠤᠳᠠᠵᠤ᠂《 ᠡᠩᠭᠡᠷ ᠵᠥᠷᠢᠭᠦᠯᠬᠦ》 ᠳᠤᠷᠠ ᠬᠦᠰᠡᠯ ᠨᠢ ᠤᠯᠠᠮ ᠪᠠᠭᠠᠰᠤᠨᠠ᠃ ᠡᠭᠦᠨ ᠢ᠋ ᠡᠮᠡᠭᠲᠡᠢ ᠬᠥᠮᠦᠨ ᠰᠠᠢᠨ ᠤᠬᠠᠭᠠᠷᠠᠵᠤ ᠡᠷᠡ ᠨᠥᠬᠥᠷ ᠴᠢᠨᠢ ᠥᠪᠡᠷ ᠢ᠋ ᠴᠢᠨᠢ ᠬᠦᠰᠡᠭᠡᠳ ᠢᠷᠡᠭᠰᠡᠨ ᠦᠶᠡ ᠳ᠋ᠦ᠍ᠨᠢ ᠪᠢᠲᠡᠭᠡᠢ ᠭᠣᠮᠣᠳᠠᠭᠠᠭᠠᠷᠠᠢ ᠭᠡᠵᠦ ᠵᠥᠪᠯᠡᠵᠦ ᠪᠠᠢᠨᠠ᠃ ᠣᠯᠠᠨ ᠰᠠᠷᠠ ᠬᠣᠨᠣᠭ ᠰᠤᠭᠳᠠᠢᠭᠰᠠᠨ ᠲᠡᠷᠡ ᠡᠷᠡ ᠬᠥᠮᠦᠨ ᠦ᠌ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠬᠣᠷᠮᠳᠠᠭᠤᠯᠤᠭᠳᠤᠵᠤ ᠪᠠᠢᠬᠤ ᠰᠠᠪᠠᠨ ᠢ᠋ᠶ᠋ᠠᠨ ᠳᠦᠭᠦᠷᠦᠭᠰᠡᠨ ᠡᠴᠡ ᠦᠷᠡ ᠶ᠋ᠢᠨ ᠰᠢᠩᠭᠡᠨ ᠨᠦ᠍ᠭᠦᠳ ᠲᠦᠷᠭᠡᠨ ᠠᠯᠳᠠᠵᠤ ᠳᠤᠷᠠ ᠨᠢ ᠬᠤᠷᠳᠤᠨ ᠬᠠᠨᠳᠠᠭ᠃ ᠡᠭᠦᠨ ᠦ᠌ ᠤᠴᠢᠷ ᠢ᠋ ᠵᠠᠷᠢᠮ ᠡᠷᠡᠴᠦᠳ ᠪᠤᠷᠤᠭᠤ ᠣᠢᠯᠭᠠᠨ ᠠᠶᠤᠬᠤ᠂ ᠭᠠᠢᠬᠠᠬᠤ᠂ ᠡᠷᠡᠭᠡᠯᠵᠡᠨ ᠲᠡᠭᠡᠨᠡᠭᠡᠯᠵᠡᠬᠦ ᠲᠡᠳᠦᠢ ᠦᠭᠡᠢ ᠪᠡᠯᠭᠡ ᠶ᠋ᠢᠨ ᠰᠤᠯᠠᠷᠠᠯ ᠲᠠᠢ ᠪᠣᠯᠴᠢᠬᠠᠭᠰᠠᠨ ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠷ ᠰᠢᠨᠠᠯᠤᠨ ᠵᠣᠪᠠᠬᠤ ᠨᠢ ᠪᠣᠢ᠃
ᠡᠷᠡᠭᠲᠡᠢ ᠬᠥᠮᠦᠨ ᠲᠡᠢ ᠨᠢᠭᠡᠯᠡ ᠠᠳᠠᠯᠢ ᠡᠮᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠴᠦ᠍ ᠪᠠᠰᠠ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ᠂ ᠪᠡᠯᠭᠡ ᠶ᠋ᠢᠨ ᠰᠠᠷᠠᠯ᠂ ᠳᠤᠷᠠ ᠬᠠᠩᠬᠤ ᠮᠡᠳᠡᠷᠡᠮᠵᠢ ᠪᠠᠢᠳᠠᠭ ᠪᠥᠭᠡᠳ ᠡᠨᠡ ᠨᠢ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠠᠯᠢ ᠡᠬᠡ ᠬᠠᠢᠷᠠᠯᠠᠭᠰᠠᠨ《 ᠬᠡᠰᠢᠭ》 ᠶᠦᠮ᠃ ᠭᠡᠪᠡᠴᠦ ᠡᠮᠡᠭᠲᠡᠢ ᠬᠥᠮᠦᠨ ᠪᠣᠯᠭᠠᠨ ᠳ᠋ᠤ᠌ ᠪᠠᠢᠭᠠᠯᠢ ᠶ᠋ᠢᠨ ᠡᠨᠡ ᠬᠡᠰᠢᠭ ᠬᠠᠷᠢᠯᠴᠠᠨ ᠠᠳᠠᠯᠢ ᠦᠭᠡᠢ ᠵᠠᠶᠠᠭᠠᠵᠠᠢ᠃ ᠰᠸᠺᠰᠤᠯᠤᠬᠢᠴᠢᠳ ᠤ᠋ᠨ ᠪᠢᠴᠢᠭᠰᠡᠨ ᠢ᠋ᠶ᠋ᠡᠷ᠂ ᠲᠡᠳᠡᠨ ᠦ᠌20 ᠬᠤᠪᠢ ᠵᠠᠶᠠᠭᠠ ᠨᠡᠯᠢᠶᠡᠳ ᠲᠠᠴᠢᠶᠠᠩᠭᠤᠢ᠂ ᠮᠡᠳᠡᠷᠡᠮᠡᠲᠡᠭᠡᠢ ᠪᠠᠢᠳᠠᠭ ᠪᠣᠯ30 ᠬᠤᠪᠢ ᠨᠢ ᠬᠤᠷᠢᠴᠠᠯ ᠳ᠋ᠤ᠌ ᠶᠠᠮᠠᠷ ᠴᠦ᠍ ᠳᠤᠷᠠ ᠰᠣᠨᠢᠷᠬᠠᠯ ᠦᠭᠡᠢ ᠪᠠᠢᠳᠠᠭ ᠠᠵᠠᠢ᠃ ᠦᠯᠡᠳᠡᠭᠰᠡᠨ50 ᠬᠤᠪᠢ ᠨᠢ《ᠡᠬᠡ ᠶ᠋ᠢ ᠨᠢ ᠡᠴᠡᠭᠡᠵᠦ᠂ ᠲᠤᠭᠤᠯ ᠢ᠋ ᠨᠢ ᠲᠣᠷᠭᠠᠬᠤ ᠦᠭᠡᠢ》 ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠠᠶᠠᠯᠳᠤᠨ ᠳᠠᠭᠠᠳᠠᠭ ᠪᠠᠢᠨᠠ᠃ ᠲᠡᠭᠦᠨᠴᠢᠯᠡᠨ ᠠᠷᠪᠠᠨ ᠡᠮᠡᠭᠲᠡᠢ ᠳᠣᠳᠣᠮ ᠬᠣᠶᠠᠷ ᠨᠢ ᠡᠷᠡ ᠨᠥᠬᠥᠷ ᠡᠴᠡ ᠪᠡᠨ ᠢᠯᠡᠭᠦᠦ ᠲᠠᠴᠢᠶᠠᠩᠭᠤᠢ ᠳᠤᠷᠠ ᠰᠣᠨᠢᠷᠬᠠᠯ ᠪᠠᠢᠳᠠᠭ ᠪᠠᠢᠨᠠ᠃ ᠡᠢᠨᠬᠦ ᠡᠮᠡᠭᠲᠡᠢ ᠬᠥᠮᠦᠨ ᠪᠦᠬᠦᠨ ᠥᠨᠳᠥᠷ ᠨᠠᠮ᠂ ᠥᠷᠭᠡᠨ ᠨᠠᠷᠢᠨ᠂ ᠵᠢᠰᠦ ᠴᠢᠷᠠᠢ᠂ ᠵᠠᠩ ᠠᠭᠠᠰᠢ ᠪᠠᠷ ᠢ᠋ᠶ᠋ᠠᠨ ᠢᠯᠭᠠᠭᠠ ᠲᠠᠢ ᠪᠠᠢᠳᠠᠭ ᠰᠢᠭ᠋ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠨᠢ ᠴᠦ᠍ ᠪᠠᠰᠠ ᠶᠡᠬᠡ᠂ ᠪᠠᠭᠠ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠪᠠᠢᠳᠠᠭ ᠠᠵᠠᠢ᠃ ᠡᠷᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠡᠬᠢᠨ ᠦ᠌ ᠦᠶᠡ ᠳ᠋ᠦ᠍ ᠪᠦᠰᠡᠭᠦᠢ ᠬᠥᠮᠦᠨ ᠪᠡᠯᠭᠡ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠲᠠᠯᠠ ᠪᠠᠷ ᠲᠡᠷᠡ ᠪᠦᠷᠢ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦᠪ᠂ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠠᠶᠠ ᠶ᠋ᠢ ᠳᠠᠭᠠᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠬᠤᠷᠢᠴᠠᠯ ᠤ᠋ᠨ ᠲᠣᠭᠠ᠂ ᠲᠡᠭᠦᠨ ᠢ᠋ ᠦᠢᠯᠡᠳᠬᠦ ᠬᠡᠯᠪᠡᠷᠢ᠂ ᠪᠠᠢᠷᠢᠯᠠᠯ᠂ ᠴᠠᠭ ᠬᠤᠭᠤᠴᠠᠭᠠ ᠵᠡᠷᠭᠡ ᠨᠢ ᠴᠥᠮ ᠨᠥᠬᠥᠷ ᠡᠴᠡ ᠪᠡᠨ ᠰᠢᠯᠲᠠᠭᠠᠯᠠᠬᠤ ᠠ᠋ᠴᠠ ᠪᠢᠰᠢ ᠪᠦᠰᠡᠭᠦᠢ ᠬᠥᠮᠦᠨ ᠳ᠋ᠦ᠍ ᠵᠢᠭᠠᠵᠤ ᠰᠤᠷᠭᠠᠭᠠᠳ ᠪᠠᠢᠬᠤ ᠶᠠᠭᠤᠮᠠ ᠬᠣᠪᠣᠷ᠃ ᠭᠡᠪᠡᠴᠦ ᠳᠡᠷᠡ ᠨᠡᠢᠯᠡᠭᠦᠯᠦᠭᠰᠡᠨ ᠬᠣᠨᠣᠭ ᠬᠤᠭᠤᠴᠠᠭᠠ ᠥᠩᠭᠡᠷᠡᠬᠦ ᠲᠣᠰᠤᠮ ᠪᠦᠰᠡᠭᠦᠢ ᠬᠥᠮᠦᠨ ᠡᠷᠡ ᠡᠮᠡ ᠶ᠋ᠢᠨ ᠢᠯᠪᠢ ᠤᠬᠠᠭᠠᠨ ᠢ᠋ ᠣᠯᠵᠤ ᠲᠡᠭᠦᠨ ᠦ᠌《ᠴᠠᠭᠠᠨ ᠲᠣᠯᠣᠭᠠᠢ》 ᠶ᠋ᠢ ᠳᠡᠢᠯᠦᠨᠡ᠃ ᠲᠡᠢᠮᠦ ᠡᠴᠡ ᠠᠢᠯ ᠭᠡᠷ ᠪᠣᠯᠤᠭᠠᠳ ᠠᠷᠪᠠ ᠭᠠᠷᠤᠢ ᠵᠢᠯ ᠪᠣᠯᠵᠤ ᠪᠠᠢᠭᠠ ᠠᠢᠯ ᠤ᠋ᠨ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠠᠮᠢᠳᠤᠷᠠᠯ ᠳ᠋ᠤ᠌ ᠬᠥᠯ ᠢ᠋ᠶ᠋ᠡᠨ ᠳᠥᠩᠭᠡᠵᠢ ᠣᠯᠵᠤ ᠪᠠᠢᠭᠠ ᠵᠠᠯᠠᠭᠤᠬᠠᠨ ᠪᠦᠰᠡᠭᠦᠢ ᠶ᠋ᠢᠨ ᠳᠡᠷᠭᠡᠳᠡ ᠬᠠᠪᠢ ᠦᠭᠡᠢ ᠬᠠᠰᠢᠷ ᠰᠠᠭᠤᠵᠤ ᠨᠡᠯᠢᠶᠡᠳ《ᠮᠡᠷᠭᠡᠰᠢᠭᠰᠡᠨ》 ᠪᠠᠢᠨᠠ᠃ ᠲᠡᠳᠡ ᠡᠷᠡ ᠨᠥᠬᠥᠷ ᠡᠴᠡ ᠪᠡᠨ ᠠᠪᠬᠤ ᠶ᠋ᠢ ᠨᠢ ᠠᠪᠴᠤ ᠥᠭᠬᠦ ᠶ᠋ᠢ ᠨᠢ ᠥᠭᠴᠦ ᠴᠢᠳᠠᠳᠠᠭ ᠪᠣᠯᠬᠤ ᠲᠡᠳᠦᠢ ᠦᠭᠡᠢ ᠰᠠᠢᠨ ᠮᠠᠭᠤ ᠶ᠋ᠢ ᠬᠠᠷᠢᠴᠠᠭᠤᠯᠵᠤ ᠦᠵᠡᠬᠦ ᠲᠡᠢ ᠪᠡᠨ ᠪᠣᠯᠴᠢᠬᠠᠭᠰᠠᠨ ᠪᠠᠢᠨᠠ᠃ ᠡᠢᠨᠬᠦ ᠠᠮᠠᠷᠠᠭ ᠬᠣᠣᠰ ᠤ᠋ᠳ ᠠᠮᠢᠳᠤᠷᠠᠯ ᠤ᠋ᠨ ᠶᠠᠪᠤᠴᠠ ᠳ᠋ᠤ᠌ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠤ᠋ ᠡᠷᠳᠡᠮ ᠤᠬᠠᠭᠠᠨ ᠳ᠋ᠤ᠌ ᠰᠤᠷᠤᠯᠴᠠᠵᠤ ᠨᠢᠭᠡ ᠦᠭᠡ ᠪᠡᠷ ᠬᠡᠯᠡᠬᠦ ᠳ᠋ᠦ᠍《ᠠᠯᠪᠠᠨ ᠶᠣᠰᠣᠨ ᠤ᠋ ᠪᠢᠰᠢ》 ᠪᠠᠰᠠ ᠨᠢᠭᠡ《ᠮᠡᠷᠭᠡᠰᠢᠯ》 ᠲᠡᠢ ᠪᠣᠯᠤᠨᠠ᠃
ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠦᠨᠳᠦᠰᠦᠨ ᠳ᠋ᠡᠭᠡᠨ ᠬᠣᠶᠠᠷ ᠦᠶᠡ ᠱᠠᠲᠤ ᠶ᠋ᠢ ᠳᠠᠮᠵᠢᠨ ᠢᠯᠡᠷᠡᠳᠡᠭ᠃ ᠲᠡᠭᠦᠨ ᠦ᠌ ᠡᠬᠢᠨ ᠦ᠌ ᠦᠶᠡ ᠱᠠᠲᠤ ᠨᠢ ᠡᠷᠡ ᠨᠥᠬᠥᠷ ᠲᠡᠭᠡᠨ ᠡᠷᠬᠡᠯᠡᠨ ᠳᠠᠭᠠᠯᠠᠭᠤᠯᠬᠤ ᠬᠦᠰᠡᠯ ᠶᠦᠮ᠃ ᠡᠨᠡ ᠨᠢ ᠪᠠᠷᠤᠭ ᠪᠦᠬᠦ ᠡᠮᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠪᠠᠢᠳᠠᠭ ᠰᠡᠳᠬᠢᠯ ᠵᠦᠢ ᠶ᠋ᠢᠨ ᠨᠢᠭᠡ ᠣᠨᠴᠠᠯᠢᠭ ᠶᠤᠮ᠃ ᠲᠡᠳᠡᠨ ᠦ᠌ ᠵᠥᠪᠬᠡᠨ ᠨᠢᠭᠡ ᠬᠤᠪᠢ ᠣᠷᠴᠢᠮ ᠨᠢ ᠡᠢᠮᠦ ᠬᠦᠰᠡᠯ ᠦᠭᠡᠢ ᠪᠠᠢᠳᠠᠭ᠃ ᠡᠢᠮᠦ ᠪᠠᠢᠳᠠᠭ ᠨᠢ ᠰᠡᠳᠬᠢᠯ ᠵᠦᠢ ᠶ᠋ᠢᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠡᠪᠡᠳᠴᠢᠨ ᠡᠮᠭᠡᠭ ᠲᠡᠢ ᠬᠣᠯᠪᠣᠭᠠᠲᠠᠢ ᠪᠠᠢᠵᠤ ᠮᠡᠳᠡᠨᠡ᠃ ᠲᠤᠬᠠᠢᠯᠠᠪᠠᠯ᠂ ᠰᠢᠽᠦᠹᠸᠷ ᠦ᠋ᠨ ᠡᠪᠡᠳᠴᠢᠨ ᠦ᠌ ᠦᠶᠡ ᠳ᠋ᠦ᠍ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠲᠤᠩ ᠪᠠᠭᠠ ᠪᠠᠢᠨᠠ᠃ ᠡᠷᠡᠭᠦᠯ ᠰᠠᠷᠠᠭᠤᠯ ᠡᠮᠡᠭᠲᠡᠢ ᠬᠥᠮᠦᠨ ᠪᠦᠬᠦᠨ ᠯᠡ ᠠᠮᠢᠳᠤᠷᠠᠯ ᠤ᠋ᠨ ᠲᠤᠷᠰᠢ ᠪᠠᠨ ᠯᠠ ᠡᠷᠡ ᠨᠥᠬᠥᠷ ᠲᠡᠭᠡᠨ ᠡᠷᠬᠡᠯᠡᠬᠦ ᠬᠦᠰᠡᠯᠡᠩ ᠲᠡᠢ ᠪᠠᠢᠳᠠᠭ ᠪᠥᠭᠡᠳ ᠡᠨᠡ ᠨᠢ ᠴᠢᠰᠤᠨ ᠳ᠋ᠠᠬᠢ ᠪᠡᠯᠭᠡ ᠶ᠋ᠢᠨ ᠳᠠᠭᠠᠭᠠᠪᠤᠷᠢ ᠶ᠋ᠢᠨ ᠬᠡᠮᠵᠢᠶᠡᠨ ᠡᠴᠡ ᠨᠡᠯᠢᠶᠡᠳ ᠨᠥᠯᠥᠭᠡᠯᠡᠳᠡᠭ᠃ ᠡᠷᠬᠡᠯᠡᠬᠦ ᠬᠦᠰᠡᠯ ᠭᠣᠣᠯ ᠲᠥᠯᠥᠪ ᠰᠠᠷᠠ ᠶ᠋ᠢᠨ ᠲᠡᠮᠳᠡᠭ ᠠᠩᠬᠠ ᠦᠵᠡᠭᠰᠡᠨ ᠡᠴᠡ ᠬᠣᠢᠰᠢ ᠪᠣᠢ ᠪᠣᠯᠳᠠᠭ᠃ ᠡᠢᠨᠬᠦ ᠨᠥᠬᠥᠷ ᠲᠦ᠍ ᠭᠠᠷᠤᠭᠰᠠᠨ ᠡᠬᠢᠨ ᠦ᠌ ᠦᠶᠡ ᠡᠷᠡ ᠨᠥᠬᠥᠷ ᠲᠡᠭᠡᠨ ᠬᠡᠴᠢᠨᠡᠨ ᠬᠠᠢᠷᠠᠲᠠᠢ ᠪᠠᠢᠯᠠ ᠴᠦ᠍ ᠭᠡᠰᠡᠨ ᠬᠠᠪᠢᠳᠠᠵᠤ ᠣᠢᠷᠠᠳᠬᠤ ᠶ᠋ᠢ ᠰᠢᠨᠤᠨ ᠲᠡᠮᠡᠦᠯᠳᠡᠭ ᠦᠭᠡᠢ᠃ ᠬᠠᠷᠢᠨ ᠡᠷᠬᠡᠯᠡᠨ ᠨᠠᠭᠠᠳᠴᠤ᠂ ᠦᠨᠦᠰᠦᠨ ᠳᠠᠭᠠᠯᠠᠭᠤᠯᠵᠤ᠂ ᠡᠩᠬᠦᠷᠡᠢᠯᠡᠨ ᠬᠠᠢᠷᠠᠯᠠᠭᠰᠠᠨ ᠦᠭᠡ ᠰᠣᠨᠣᠰᠴᠤ ᠰᠠᠭᠤᠬᠤ ᠨᠢ ᠲᠡᠭᠦᠨ ᠦ᠌ ᠴᠢᠬᠢᠨ ᠳ᠋ᠦ᠍ ᠶᠠᠭᠤᠲᠠᠢ ᠴᠢᠮᠡᠭ ᠪᠣᠯᠳᠠᠭ ᠭᠡᠭᠴᠢ ᠨᠢ! ᠢᠨᠠᠭ ᠬᠠᠢᠷᠠ ᠶ᠋ᠢᠨ ᠰᠢᠪᠡᠨᠡᠭᠡ ᠦᠭᠡ ᠨᠢ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠱᠦᠷᠭᠦᠭᠡᠨ ᠬᠦᠷᠦᠯᠴᠡᠬᠦ ᠡᠴᠡ ᠢᠯᠡᠭᠦᠦ ᠬᠦᠴᠦᠲᠡᠢ ᠨᠥᠯᠥᠭᠡᠯᠡᠳᠡᠭ ᠪᠢᠯᠡ᠃ ᠳᠡᠷᠡ ᠨᠡᠢᠯᠡᠭᠦᠯᠦᠭᠰᠡᠨ ᠴᠠᠭ ᠠ᠋ᠴᠠ ᠬᠣᠢᠰᠢ ᠡᠷᠬᠡᠯᠡᠨ ᠳᠠᠭᠠᠯᠠᠭᠤᠯᠬᠤ ᠬᠦᠰᠡᠯ ᠦ᠋ᠨ ᠦᠨᠳᠦᠰᠦᠨ ᠳᠡᠭᠡᠷᠡ ᠪᠡᠯᠭᠡ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠶᠠᠪᠤᠴᠠ ᠳ᠋ᠤ᠌ ᠠᠭᠠᠵᠢᠮ ᠢ᠋ᠶ᠋ᠠᠷ ᠣᠢᠷᠠᠳᠬᠤ ᠬᠦᠰᠡᠯ ᠲᠡᠢ ᠪᠣᠯᠤᠨᠠ᠃ ᠡᠨᠡ ᠨᠢ ᠳᠤᠷᠠ ᠬᠠᠩᠬᠤ ᠶ᠋ᠢ ᠮᠡᠳᠡᠷᠡᠭᠰᠡᠨ ᠲᠡᠢ ᠬᠣᠯᠪᠣᠭᠠ ᠲᠠᠢ ᠮᠥᠷᠲᠡᠭᠡᠨ ᠲᠡᠭᠦᠨ ᠢ᠋ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠤ᠋ᠨ ᠳᠡᠭᠡᠳᠦ ᠴᠠᠭ ᠲᠤᠢᠯ ᠭᠡᠵᠦ ᠬᠡᠯᠡᠵᠦ ᠪᠣᠯᠤᠨᠠ᠃ ᠭᠡᠪᠡᠴᠦ ᠡᠷᠬᠡᠯᠡᠬᠦ ᠡᠴᠡ ᠥᠭᠡᠷᠡ ᠣᠢᠷᠠᠳᠬᠤ ᠬᠦᠰᠡᠯ ᠭᠡᠭᠴᠢ ᠡᠮᠡᠭᠲᠡᠢ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠪᠠᠢᠬᠤ ᠠᠯᠪᠠ ᠦᠭᠡᠢ᠃ ᠤᠴᠢᠷ ᠨᠢ ᠵᠠᠷᠢᠮ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠨᠢ ᠵᠥᠪᠬᠡᠨ ᠡᠷᠬᠡᠯᠡᠬᠦ ᠬᠦᠰᠡᠯ ᠢ᠋ᠶ᠋ᠡᠷ ᠬᠢᠵᠠᠭᠠᠷᠯᠠᠭᠳᠠᠬᠤ ᠪᠣᠯᠤᠨᠠ᠃ ᠬᠡᠳᠦᠢ ᠲᠡᠢᠮᠦ ᠴᠦ᠍ ᠡᠷᠬᠡᠯᠡᠬᠦ ᠡᠴᠡ ᠣᠢᠷᠠᠳᠬᠤ ᠬᠦᠰᠡᠯ ᠤᠷᠭᠤᠨ ᠭᠠᠷᠬᠤ ᠳ᠋ᠤ᠌ ᠡᠷᠡ ᠨᠥᠬᠥᠷ ᠦ᠋ᠨ ᠡᠪ ᠲᠦᠢ᠂ ᠬᠠᠢᠷᠠ ᠬᠠᠯᠠᠮᠵᠢ ᠨᠡᠩ ᠴᠢᠬᠤᠯᠠ ᠶᠤᠮ᠃ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠣᠢᠷᠠᠯᠴᠠᠭᠠ ᠪᠠᠷ30-35 ᠨᠠᠰᠤᠨ ᠳ᠋ᠤ᠌ ᠳᠡᠭᠡᠳᠦ ᠴᠠᠭ ᠲᠠᠭᠠᠨ ᠬᠦᠷᠴᠦ ᠴᠢᠨᠠᠭᠰᠢᠳᠠ ᠲᠣᠭᠲᠠᠪᠤᠷᠢᠲᠠᠢ ᠪᠣᠯᠳᠠᠭ᠃ ᠲᠡᠢᠮᠦ ᠡᠴᠡ ᠤᠷᠢᠳᠤ ᠨᠢ ᠳᠤᠷᠠ ᠬᠦᠰᠡᠯ ᠦᠭᠡᠢ ᠮᠡᠲᠦ ᠪᠠᠢᠭᠰᠠᠨ ᠡᠮᠡᠭᠲᠡᠢ39 ᠨᠠᠰᠤ ᠬᠦᠷᠦᠭᠡᠳ ᠢᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠨᠡᠯᠢᠶᠡᠳ ᠲᠠᠴᠢᠶᠠᠩᠭᠤᠢ ᠪᠣᠯᠬᠤ ᠨᠢ ᠪᠣᠢ᠃ ᠭᠡᠲᠡᠯᠡ ᠡᠷᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠠᠵᠢᠯᠯᠠᠭᠠᠨ ᠤ᠋ ᠡᠷᠴᠢᠮ ᠨᠢ ᠪᠡᠯᠭᠡ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠡᠬᠢᠨ ᠦ᠌ ᠦᠶᠡ ᠳ᠋ᠦ᠍ ᠶᠡᠬᠡ ᠪᠠᠢᠭᠰᠠᠨ ᠢ᠋ᠶ᠋ᠠᠨ35 ᠨᠠᠰᠤᠨ ᠠ᠋ᠴᠠ ᠴᠠᠰᠢ ᠠᠭᠠᠵᠢᠮ ᠪᠠᠭᠤᠷᠠᠨᠠ᠃ ᠵᠠᠷᠢᠮ ᠡᠷᠡᠴᠦᠳ ᠵᠠᠯᠠᠭᠤᠬᠠᠨ ᠡᠮᠡᠭᠲᠡᠢ ᠶ᠋ᠢᠨ ᠪᠡᠯᠭᠡ ᠶ᠋ᠢᠨ ᠬᠡᠷᠡᠭᠴᠡᠭᠡ ᠶ᠋ᠢ ᠬᠡᠳᠦ ᠦᠨᠡᠯᠡᠳᠡᠭ ᠮᠥᠷᠲᠡᠭᠡᠨ ᠨᠠᠰᠤ ᠠᠬᠢᠭᠰᠠᠨ ᠤ᠋ ᠬᠣᠢᠨᠠ ᠲᠡᠭᠦᠨ ᠢ᠋ ᠣᠭᠣᠷᠬᠤ ᠨᠢ ᠪᠣᠢ᠃ ᠭᠡᠲᠡᠯᠡ ᠦᠨᠡᠨ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠶᠡᠬᠡᠩᠬᠢ ᠡᠮᠡᠭᠲᠡᠢ30 ᠨᠠᠰᠤ ᠬᠦᠷᠲᠡᠯᠡ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠳᠡᠩᠳᠡᠭᠦᠦ《ᠳᠤᠷᠠᠲᠠᠢ》 ᠭᠡᠵᠦ ᠵᠢᠮᠡᠯᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠥᠪᠡᠷ ᠢ᠋ᠶ᠋ᠡᠨ ᠭᠤᠴᠢᠨ ᠨᠠᠰᠤ ᠥᠩᠭᠡᠷᠡᠬᠦ ᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠦ᠌ ᠠᠮᠠᠨ ᠥᠴᠢᠭ ᠢ᠋ ᠠᠰᠠᠭᠤᠵᠤ ᠭᠣᠮᠣᠳᠠᠯ ᠭᠠᠷᠭᠠᠬᠤ ᠨᠢ ᠶᠡᠬᠡᠰᠳᠡᠭ ᠠᠵᠠᠢ᠃ ᠲᠡᠢᠮᠦ ᠡᠴᠡ ᠮᠠᠨᠠᠢᠬᠢᠨ ᠡᠮᠡᠭᠲᠡᠢ ᠬᠥᠮᠦᠨ ᠭᠤᠴᠢ ᠭᠠᠷᠤᠭᠠᠳ ᠢᠷᠡᠬᠦ ᠪᠡᠷ ᠢ᠋ᠶ᠋ᠡᠨ《ᠪᠣᠯᠬᠤ ᠪᠠᠨ ᠪᠠᠢᠴᠢᠬᠠᠳᠠᠭ》 ᠭᠡᠮᠡᠨ ᠬᠣᠱᠣᠩᠨᠠᠳᠠᠭ ᠨᠢ ᠦᠨᠡᠨ ᠦ᠌ ᠬᠤᠪᠢ ᠲᠠᠢ᠃ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠶᠡᠬᠡ᠂ ᠪᠠᠭᠠ ᠪᠠᠢᠬᠤ ᠨᠢ ᠣᠯᠠᠨ ᠬᠦᠴᠦᠨ ᠵᠦᠢᠯ ᠡᠴᠡ ᠰᠢᠯᠲᠠᠭᠠᠯᠠᠨᠠ᠃ ᠨᠡᠢᠲᠡᠴᠢ ᠵᠠᠩ ᠲᠠᠢ᠂ ᠢᠮᠠᠭᠲᠠ ᠢᠨᠢᠶᠡᠨ ᠪᠡᠶᠡᠰᠴᠦ ᠶᠠᠪᠤᠳᠠᠭ ᠡᠮᠡᠭᠲᠡᠢ᠂ ᠵᠣᠵᠢᠭ ᠵᠠᠩ ᠲᠠᠢ ᠡᠮᠡᠭᠲᠡᠢ ᠡᠴᠡ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠤ᠋ᠨ ᠬᠤᠪᠢ ᠳ᠋ᠤ᠌ ᠢᠯᠡᠭᠦᠦ ᠪᠠᠢᠨᠠ᠃ ᠣᠯᠠᠨ ᠳᠠᠬᠢᠨ ᠲᠥᠷᠥᠭᠰᠡᠨ ᠡᠮᠡᠭᠲᠡᠢ ᠶ᠋ᠢᠨ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠨᠢ ᠣᠭᠲᠣ ᠳᠥᠷᠥᠭᠡ ᠦᠭᠡᠢ ᠪᠤᠶᠤ ᠴᠥᠭᠡᠨ ᠲᠥᠷᠥᠭᠰᠡᠨ ᠡᠮᠡᠭᠲᠡᠢ ᠡᠴᠡ ᠨᠡᠯᠢᠶᠡᠳ ᠤᠳᠠᠭᠠᠨ ᠬᠠᠳᠠᠭᠠᠯᠠᠭᠳᠠᠨᠠ᠃ ᠲᠡᠭᠦᠨᠴᠢᠯᠡᠨ ᠬᠠᠷᠠ ᠦᠰᠦ ᠲᠡᠢ ᠡᠮᠡᠭᠲᠡᠢ ᠡᠴᠡ ᠰᠢᠷᠠ ᠦᠰᠦ ᠲᠡᠢ ᠡᠮᠡᠭᠲᠡᠢ ᠡᠴᠡ ᠪᠡᠯᠭᠡ ᠶ᠋ᠢᠨ ᠳᠤᠷᠠ ᠲᠠᠴᠢᠶᠠᠯ ᠶᠡᠬᠡᠲᠡᠢ᠂ ᠨᠠᠮᠬᠠᠨ ᠬᠥᠮᠦᠨ ᠥᠨᠳᠥᠷ ᠭᠤᠷᠵᠠᠭᠠᠷ ᠬᠥᠮᠦᠨ ᠡᠴᠡ ᠠᠷᠠᠢ ᠢᠯᠡᠭᠦᠦ ᠲᠤᠷᠠᠩᠬᠠᠢ ᠬᠥᠮᠦᠨ ᠲᠠᠷᠭᠤᠨ ᠬᠥᠮᠦᠨ ᠢ᠋ ᠪᠣᠳᠣᠪᠠᠯ ᠳᠤᠷᠠ ᠶᠡᠬᠡᠲᠡᠢ ᠪᠠᠢᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠲᠥᠷᠥᠯᠬᠢ ᠲᠠᠷᠭᠤᠨ ᠬᠥᠮᠦᠨ ᠬᠣᠵᠢᠭᠤ ᠲᠠᠷᠭᠤᠯᠠᠭᠰᠠᠨ ᠬᠥᠮᠦᠨ ᠡᠴᠡ ᠠᠷᠠᠢ ᠢᠳᠡᠪᠬᠢ ᠰᠤᠯᠠᠲᠠᠢ ᠪᠠᠢᠳᠠᠭ ᠢ᠋ ᠡᠷᠡ ᠡᠮᠡ ᠶ᠋ᠢᠨ ᠶᠣᠰᠣᠨ ᠤ᠋ ᠰᠤᠳᠤᠯᠤᠭᠴᠢᠳ ᠲᠣᠭᠲᠠᠭᠠᠭᠰᠠᠨ ᠪᠠᠢᠨᠠ᠃ ᠭᠡᠪᠡᠴᠦ ᠬᠣᠷᠸᠠ ᠶ᠋ᠢᠨ ᠬᠣᠶᠠᠷ ᠲᠠᠷᠭᠤᠨ ᠬᠥᠮᠦᠨ ᠲᠠᠭᠠᠷᠠᠬᠤ ᠨᠢ ᠲᠤᠩ ᠬᠣᠪᠣᠷ᠃ ᠲᠠᠷᠭᠤᠨ ᠡᠮᠡᠭᠲᠡᠢᠴᠦᠳ ᠭᠣᠣᠯᠴᠠᠭᠤ ᠲᠤᠷᠠᠩᠬᠠᠢ ᠨᠥᠬᠥᠷ ᠲᠡᠢ ᠪᠠᠢᠬᠤ ᠳ᠋ᠤ᠌ ᠲᠤᠷᠠᠩᠬᠠᠢ ᠡᠷᠡᠴᠦᠳ ᠶᠡᠬᠡᠪᠴᠢᠯᠡᠨ ᠲᠠᠷᠭᠤᠨ ᠡᠬᠡᠨᠡᠷ ᠲᠡᠢ ᠪᠠᠢᠳᠠᠭ᠃ ᠬᠥᠮᠦᠰ ᠦ᠋ᠨ ᠶᠠᠷᠢᠳᠠᠭ ᠢ᠋ᠶ᠋ᠠᠷ《ᠬᠣᠶᠠᠷ ᠲᠠᠷᠭᠤᠨ ᠬᠣᠯᠪᠣᠷᠢᠬᠤ ᠶ᠋ᠢᠨ ᠵᠣᠪᠠᠯᠠᠩ ᠲᠠᠷᠭᠤᠨ᠂ ᠲᠤᠷᠠᠩᠬᠠᠢ ᠲᠠᠭᠠᠷᠠᠬᠤ ᠶ᠋ᠢᠨ ᠵᠢᠷᠭᠠᠯ》 ᠭᠡᠳᠡᠭ ᠨᠢ ᠬᠣᠱᠣᠩᠨᠠᠯ ᠴᠦ᠍ ᠦᠨᠡᠨ ᠦ᠌ ᠬᠤᠪᠢ ᠲᠠᠢ᠃