ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ – (ᠨᠠᠢ᠍ᠮᠠ) Монгол эм эмнэлэг (8)
484ᠬᠠᠷᠠ ᠵᠢᠷᠤᠬᠠᠢ ᠶ᠋ᠢᠨ ᠬᠠᠷᠠᠭᠠᠰᠤ ᠠ᠋ᠴᠠ ᠢᠯᠡᠷᠡᠭᠡᠳᠦᠢ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠢ᠋ ᠰᠢᠨᠵᠢᠯᠡᠬᠦᠢ
【ᠲᠣᠪᠴᠢ ᠠᠭᠤᠯᠭᠠ 】ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠪᠣᠯ ᠳᠡᠭᠡᠷᠡ ᠵᠠᠭᠤᠨ ᠤ᠋ ᠰᠡᠭᠦᠯᠴᠢ ᠪᠤᠶᠤ ᠲᠤᠰ ᠵᠠᠭᠤᠨ ᠤ᠋ ᠡᠬᠢᠨ ᠡᠴᠡ ᠮᠠᠨ ᠤ᠋ ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠳᠡᠯᠭᠡᠷᠡᠵᠦ ᠡᠬᠢᠯᠡᠭᠰᠡᠨ ᠬᠥᠨᠥᠭᠡᠯ ᠶᠡᠬᠡᠲᠡᠢ ᠡᠪᠡᠳᠴᠢᠨ ᠪᠣᠯᠤᠨᠠ᠃ ᠣᠷᠴᠢᠨ ᠦᠶᠡ ᠶ᠋ᠢᠨ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠨᠣᠮ ᠰᠡᠳᠬᠦᠯ ᠳ᠋ᠦ᠍ ᠡᠨᠡ ᠲᠤᠬᠠᠢ ᠨᠡᠯᠢᠶᠡᠳ ᠨᠠᠷᠢᠯᠢᠭ ᠲᠡᠮᠳᠡᠭᠯᠡᠵᠦ᠂ ᠥᠷᠭᠡᠨ ᠣᠯᠠᠨ ᠮᠣᠩᠭᠣᠯ ᠡᠮᠴᠢ ᠨᠠᠷ ᠴᠤ᠌ ᠰᠤᠳᠤᠯᠤᠨ ᠡᠮᠴᠢᠯᠡᠵᠦ ᠡᠳᠡᠭᠡᠷᠡᠭᠦᠯᠦᠭᠰᠡᠭᠡᠷ ᠢᠷᠡᠵᠡᠢ᠃ ᠭᠡᠲᠡᠯᠡ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠤᠯᠠᠷᠢᠨ ᠬᠤᠪᠢᠷᠠᠬᠤ ᠵᠢᠮᠡ ᠶ᠋ᠢ ᠮᠥᠷᠳᠡᠵᠦ᠂ ᠬᠠᠷᠠᠭᠠᠰᠤ ᠪᠠᠨ ᠤᠯᠠᠮ ᠥᠷᠭᠡᠳᠬᠡᠨ᠂ ᠤᠯᠠᠮᠵᠢᠯᠠᠯᠲᠤ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠲᠠᠰᠤᠷᠠᠨ ᠣᠷᠬᠢᠭᠳᠠᠵᠤ ᠵᠠᠭᠤᠨ ᠵᠢᠯ ᠪᠣᠯᠵᠤ ᠪᠠᠢᠭᠠ ᠬᠠᠷᠠ ᠵᠢᠷᠤᠬᠠᠢ ᠶ᠋ᠢᠨ ᠡᠬᠡ ᠬᠥᠪᠡᠭᠦᠨ ᠨᠥᠬᠥᠷ ᠳᠠᠢᠰᠤᠨ ᠤ᠋ ᠬᠠᠷᠢᠴᠠᠭᠠ ᠶ᠋ᠢ ᠠᠰᠢᠭᠯᠠᠨ ᠢᠯᠡᠷᠡᠭᠡᠳᠦᠢ ᠡᠪᠡᠳᠴᠢᠨ ᠦ᠌ ᠡᠭᠦᠳᠡᠨ ᠡᠴᠡ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠢ᠋ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ᠂ ᠴᠢᠨᠠᠭᠰᠢᠯᠠᠨ ᠬᠡᠳᠦᠨ ᠠᠷᠪᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠤᠷᠢᠳᠴᠢᠯᠠᠨ ᠪᠡᠯᠭᠡᠳᠡᠨ ᠣᠨᠣᠰᠢᠯᠠᠵᠤ ᠪᠣᠯᠤᠨᠠ᠃ ᠭᠠᠭᠴᠠ ᠬᠦ᠌ ᠡᠪᠡᠳᠴᠢᠨ ᠢ᠋ ᠢᠯᠡᠷᠡᠬᠦ ᠡᠴᠡ ᠡᠮᠦᠨᠡ ᠵᠠᠪᠳᠤᠵᠤ ᠡᠷᠡᠭᠦᠯ ᠢ᠋ ᠰᠠᠬᠢᠵᠤ ᠴᠢᠳᠠᠪᠠᠯ ᠰᠠᠶᠢ ᠡᠪᠡᠳᠴᠢᠨ ᠢ᠋ ᠰᠡᠷᠭᠡᠢᠯᠡᠬᠦ᠂ ᠤᠷᠲᠤ ᠨᠠᠰᠤᠯᠠᠬᠤ ᠵᠣᠷᠢᠯᠭᠠ ᠳ᠋ᠤ᠌ ᠪᠠᠨ ᠬᠦᠷᠴᠦ ᠴᠢᠳᠠᠳᠠᠭ᠃
【ᠲᠦᠯᠬᠢᠭᠦᠷ ᠦᠭᠡ 】 ᠬᠠᠷᠠ ᠵᠢᠷᠤᠬᠠᠢ ; ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ; ᠢᠯᠡᠷᠡᠭᠡᠳᠦᠢ ᠡᠪᠡᠳᠴᠢᠨ;
ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠦ᠌ ᠰᠢᠯᠲᠠᠭᠠᠨ ᠢ᠋ ᠡᠳᠦᠢ ᠪᠣᠯᠲᠠᠯᠠ ᠲᠣᠳᠣᠯᠠᠵᠤ ᠴᠢᠳᠠᠭᠠᠳᠤᠢ ᠪᠠᠢᠭᠰᠠᠭᠠᠷ ᠪᠥᠭᠡᠳ ᠢᠯᠠᠩᠭᠤᠶᠠ ᠢᠯᠡᠷᠡᠭᠡᠳᠦᠢ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠢ᠋ ᠤᠷᠢᠳᠴᠢᠯᠠᠨ ᠣᠨᠣᠰᠢᠯᠠᠬᠤ ᠠᠷᠭᠠ ᠨᠢ ᠰᠢᠨᠡ ᠡᠷᠢᠨ ᠦ᠌ ᠣᠳᠣᠬᠢᠴᠢᠯᠠᠭᠰᠠᠨ ᠡᠮᠴᠢᠯᠡᠭᠡ ᠳ᠋ᠦ᠍ ᠪᠠᠢᠳᠠᠭ ᠦᠭᠡᠢ ᠵᠦᠢᠯ ᠶᠦ᠍ᠮ᠃ ᠡᠷᠳᠡᠮᠲᠡᠳ ᠦ᠋ᠨ ᠰᠤᠳᠤᠯᠭᠠᠨ ᠢ᠋ᠶ᠋ᠠᠷ ᠲᠤᠰ ᠡᠪᠡᠳᠴᠢᠨ ᠨᠢ ᠣᠯᠠᠨ ᠵᠦᠢᠯ ᠦ᠋ᠨ ᠰᠢᠯᠲᠠᠭᠠᠨ ᠠ᠋ᠴᠠ ᠪᠣᠢ ᠪᠣᠯᠳᠠᠭ᠂ ᠤᠳᠤᠮᠰᠢᠯ᠂ ᠳᠠᠷᠬᠠᠯᠠᠭᠠ᠂ ᠠᠮᠢᠳᠤᠷᠠᠯ ᠤ᠋ᠨ ᠵᠠᠩ ᠳᠠᠳᠬᠠᠯ ᠪᠠ ᠣᠷᠴᠢᠨ ᠲᠣᠭᠣᠷᠢᠨ ᠵᠡᠷᠭᠡ ᠣᠯᠠᠨ ᠵᠦᠢᠯ ᠲᠡᠢ ᠬᠠᠮᠢᠶᠠ ᠲᠠᠢ᠃ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠡᠷᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠠᠨᠠᠭᠠᠬᠤ ᠤᠬᠠᠭᠠᠨ ᠬᠢᠲᠠᠳ ᠡᠮᠨᠡᠯᠭᠡ ᠨᠢ ᠲᠤᠰ ᠡᠪᠡᠳᠴᠢᠨ ᠢ᠋ 《ᠤᠮᠳᠠᠭᠠᠰᠬᠤ ᠡᠪᠡᠳᠴᠢᠨ》 ᠭᠡᠵᠦ ᠲᠠᠨᠢᠵᠤ ᠪᠠᠢᠪᠠ᠂ ᠬᠣᠶᠠᠳᠤᠭᠠᠷ ᠵᠠᠭᠤᠨ ᠤ᠋ ᠦᠶᠡ ᠳ᠋ᠦ᠍ ᠪᠢᠴᠢᠭᠳᠡᠭᠰᠡᠨ 《ᠬᠤᠸᠠᠩᠳᠢ ᠨᠧᠢ ᠵᠢᠩ》 ᠳ᠋ᠦ᠍ ᠡᠨᠡ ᠲᠤᠬᠠᠢ ᠲᠡᠮᠳᠡᠭᠯᠡᠭᠰᠡᠨ ᠪᠣᠢ᠃ 1997 ᠣᠨ ᠳ᠋ᠤ᠌ ᠳᠡᠯᠡᠬᠡᠢ ᠶ᠋ᠢᠨ ᠡᠷᠡᠭᠦᠯ ᠬᠠᠮᠠᠭᠠᠯᠠᠯ ᠤ᠋ᠨ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ (WHO) ᠶ᠋ᠢᠨ ᠪᠠᠢᠴᠠᠭᠠᠯᠲᠠ ᠳ᠋ᠤ᠌ 1.35 ᠳ᠋ᠦᠩᠰᠢᠭᠤᠷ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠲᠡᠨ ᠪᠠᠢᠵᠤ᠂ ᠪᠠᠷᠤᠭᠴᠠᠭᠠᠯᠠᠬᠤ ᠪᠠᠷ 2025 ᠣᠨ ᠪᠣᠯᠬᠤ ᠳ᠋ᠤ᠌ 3 ᠳ᠋ᠦᠩᠰᠢᠭᠤᠷ ᠲᠤ᠌ ᠬᠦᠷᠦᠨᠡ ᠭᠡᠵᠦ ᠮᠠᠭᠠᠳᠯᠠᠪᠠ [1] ᠃ ᠡᠭᠦᠨ ᠳ᠋ᠦ᠍᠂ ᠬᠠᠷᠠ ᠵᠢᠷᠤᠬᠠᠢ ᠶ᠋ᠢᠨ ᠠᠷᠭᠠ ᠪᠢᠯᠢᠭ᠂ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠡᠬᠡ ᠬᠥᠪᠡᠭᠦᠨ ᠨᠥᠬᠥᠷ ᠳᠠᠢᠰᠤᠨ ᠤ᠋ ᠬᠠᠷᠢᠴᠠᠭᠠ ᠶ᠋ᠢ ᠠᠰᠢᠭᠯᠠᠵᠤ᠂ ᠢᠯᠡᠷᠡᠭᠡᠳᠦᠢ ᠡᠪᠡᠳᠴᠢᠨ ᠦ᠌ ᠡᠭᠦᠳᠡᠨ ᠡᠴᠡ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠢ᠋ ᠰᠤᠳᠤᠯᠪᠠᠯ᠂ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢᠨ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠭᠣᠣᠯᠳᠠᠭᠤ ᠲᠡᠮᠦᠷ᠂ ᠭᠠᠯ᠂ ᠤᠰᠤ᠂ ᠰᠢᠷᠣᠢ ᠶ᠋ᠢᠨ ᠮᠠᠬᠠᠪᠣᠳ ᠤ᠋ᠨ ᠠᠷᠪᠢᠳᠠᠵᠤ᠂ ᠬᠣᠷᠣᠭᠳᠠᠬᠤ ᠤᠷᠪᠠᠯᠲᠠ ᠲᠠᠢ ᠨᠢᠭᠲᠠ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠳᠠᠭ᠃
1᠂ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠪᠠ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠬᠠᠷᠢᠴᠠᠭᠠ
1.1 ᠬᠥᠮᠦᠨ ᠦ᠌ ᠪᠡᠶᠡ ᠭᠡᠳᠡᠭ ᠡᠨᠡ ᠬᠦ᠌ 《ᠵᠢᠵᠢᠭ ᠬᠣᠷᠸᠠ》 ᠶ᠋ᠢᠨ ᠲᠥᠷᠥᠭᠰᠡᠨ ᠣᠨ ᠰᠠᠷᠠ ᠡᠳᠦᠷ ᠴᠠᠭ ᠢ᠋ ᠲᠡᠮᠳᠡᠭᠯᠡᠭᠰᠡᠨ ᠨᠠᠢ᠍ᠮᠠᠨ ᠦᠰᠦᠭ ᠲᠦ᠍ ᠴᠠᠭᠠᠨ ᠴᠠᠭᠠᠭᠴᠢᠨ ( ᠲᠡᠮᠦᠷ ᠮᠠᠬᠠᠪᠣᠳ ) ᠬᠢᠭᠡᠳ ᠤᠯᠠᠭᠠᠨ ᠤᠯᠠᠭᠴᠢᠨ ( ᠭᠠᠯ ᠮᠠᠬᠠᠪᠣᠳ ) ᠬᠠᠷᠢᠯᠴᠠᠨ ᠬᠣᠣᠷᠯᠠᠯᠴᠠᠬᠤ᠂ ᠰᠢᠷᠣᠢ ᠮᠠᠬᠠᠪᠣᠳ ᠨᠢ ᠲᠡᠮᠦᠷ ᠮᠠᠬᠠᠪᠣᠳ ᠢ᠋ ᠪᠤᠯᠠᠰᠢᠯᠠᠬᠤ ᠳ᠋ᠤ᠌ ᠤᠰᠤ ᠰᠢᠷᠭᠢᠵᠦ ᠪᠠᠷᠠᠭᠳᠠᠬᠤ ᠪᠦᠲᠦᠴᠡ ᠲᠡᠢ ᠦᠶᠡ᠂ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠦ᠌ ᠡᠭᠦᠰᠬᠦ ᠨᠣᠷᠮᠠ ᠨᠢ 90% ᠠ᠋ᠴᠠ ᠳᠡᠭᠡᠭᠰᠢ ᠪᠠᠢᠳᠠᠭ᠃
1.2 ᠬᠥᠮᠦᠨ ᠭᠡᠳᠡᠭ ᠡᠨᠡ ᠬᠦ᠌ 《ᠵᠢᠵᠢᠭ ᠬᠣᠷᠸᠠ》 ᠶ᠋ᠢᠨ ᠲᠥᠷᠥᠭᠰᠡᠨ ᠰᠠᠷᠠ ᠨᠢ ᠭᠠᠯ ᠮᠠᠬᠠᠪᠣᠳ᠂ ᠲᠥᠷᠥᠭᠰᠡᠨ ᠡᠳᠦᠷ ᠨᠢ ᠭᠠᠯ ᠮᠠᠬᠠᠪᠣᠳ᠂ ᠲᠥᠷᠥᠭᠰᠡᠨ ᠴᠠᠭ ᠨᠢ ᠭᠠᠯ ᠮᠠᠬᠠᠪᠣᠳ ᠲᠣᠬᠢᠶᠠᠯᠳᠤᠨ ᠲᠡᠮᠦᠷ ᠬᠣᠣᠷᠯᠠᠭᠳᠠᠵᠤ ᠤᠰᠤ ᠰᠢᠷᠭᠢᠬᠦ (ᠪᠠᠷᠠᠭᠳᠠᠬᠤ) ᠪᠦᠲᠦᠴᠡ ᠲᠡᠢ ᠦᠶᠡ ᠳ᠋ᠦ᠍ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠦ᠌ ᠡᠭᠦᠰᠬᠦ ᠨᠣᠷᠮᠠ ᠨᠢ 95% ᠠ᠋ᠴᠠ ᠳᠡᠭᠡᠭᠰᠢ ᠪᠠᠢᠳᠠᠭ᠃
1.3 ᠬᠥᠮᠦᠨ ᠭᠡᠳᠡᠭ ᠡᠨᠡ ᠬᠦ᠌ 《ᠵᠢᠵᠢᠭ ᠬᠣᠷᠸᠠ》 ᠶ᠋ᠢᠨ ᠲᠥᠷᠥᠭᠰᠡᠨ ᠨᠠᠢ᠍ᠮᠠᠨ ᠦᠰᠦᠭ ᠲᠦ᠍᠂ ᠴᠠᠭᠠᠨ ᠮᠣᠷᠢ᠂ ᠴᠠᠭᠠᠭᠴᠢᠨ ᠮᠣᠭᠠᠢ᠂ ᠴᠠᠭᠠᠨ ᠨᠣᠬᠠᠢ᠂ ᠤᠯᠠᠭᠠᠨ ᠨᠣᠬᠠᠢ᠂ ᠰᠢᠷᠠ ᠮᠣᠷᠢ᠂ ᠰᠢᠷᠠ ᠬᠤᠯᠤᠭᠠᠨᠠ᠂ ᠰᠢᠷᠠᠭᠴᠢᠨ ᠭᠠᠬᠠᠢ᠂ ᠮᠣᠭᠠᠢ ᠨᠣᠬᠠᠢ᠂ ᠮᠣᠷᠢ ᠨᠣᠬᠠᠢ᠂ ᠨᠣᠬᠠᠢ ᠬᠣᠨᠢ ᠵᠡᠷᠭᠡ ᠦᠰᠦᠭ ᠪᠠᠢᠵᠤ᠂ ᠬᠠᠷᠠ ᠬᠠᠷᠠᠭᠴᠢᠨ (ᠤᠰᠤᠨ ᠮᠠᠬᠠᠪᠣᠳ) ᠢ᠋ ᠬᠣᠣᠷᠯᠠᠵᠤ ᠪᠠᠢᠬᠤ ᠪᠦᠲᠦᠴᠡ ᠲᠡᠢ ᠦᠶᠡ ᠳ᠋ᠦ᠍ ᠲᠤᠰ ᠡᠪᠡᠳᠴᠢᠨ ᠡᠭᠦᠰᠬᠦ ᠨᠣᠷᠮᠠ ᠨᠢ 85% ᠠ᠋ᠴᠠ ᠳᠡᠭᠡᠭᠰᠢ ᠪᠠᠢᠳᠠᠭ᠃
2᠂ ᠬᠣᠯᠪᠣᠭᠳᠠᠬᠤ ᠬᠠᠷᠠ ᠵᠢᠷᠤᠬᠠᠢ ᠶ᠋ᠢᠨ ᠦᠨᠳᠦᠰᠦᠨ ᠮᠡᠳᠡᠯᠭᠡ
ᠡᠷᠲᠡᠨ ᠦ᠌ ᠮᠡᠷᠭᠡᠳ ᠢ᠋ᠶ᠋ᠡᠷ ᠬᠣᠷᠸᠠ ᠶᠢᠷᠲᠢᠨᠴᠦ ᠶ᠋ᠢᠨ ᠪᠠᠢᠭᠠᠯᠢᠯᠢᠭ ᠦᠵᠡᠭᠳᠡᠯ ᠢ᠋ ᠪᠣᠷᠣᠭᠵᠢᠭᠤᠨ ᠪᠣᠳᠠᠰᠴᠢ ᠦᠵᠡᠯᠲᠡ ᠪᠡᠷ ᠬᠤᠷᠢᠶᠠᠩᠭᠤᠢᠯᠠᠨ᠂ ᠵᠢᠷᠤᠬᠠᠢ ᠶ᠋ᠢᠨ ᠶᠣᠰᠣᠨ ᠤ᠋ ᠲᠡᠭᠷᠢ ᠶ᠋ᠢᠨ ᠡᠰᠢ ᠶ᠋ᠢᠨ ᠠᠷᠪᠠᠨ ᠥᠩᠭᠡ ᠶ᠋ᠢ ᠲᠠᠪᠤᠨ ᠮᠠᠬᠠᠪᠣᠳ ᠢ᠋ᠶ᠋ᠠᠷ ᠲᠥᠷᠦᠯᠵᠢᠭᠦᠯᠵᠦ᠂ ᠬᠥᠬᠡᠷᠡᠨ ᠨᠣᠭᠣᠭᠠᠷᠠᠵᠤ᠂ ᠤᠷᠭᠤᠵᠤ ᠳᠡᠯᠭᠡᠷᠡᠬᠦ ᠦᠵᠡᠭᠳᠡᠯ ᠢ᠋ ᠬᠥᠬᠡ ᠬᠥᠬᠡᠭᠴᠢᠨ ᠥᠩᠭᠡ ᠪᠡᠷ ᠲᠥᠯᠥᠭᠡᠯᠡᠨ᠂ ᠳᠣᠷᠣᠨᠠ ᠵᠦᠭ ᠦ᠋ᠨ ᠮᠣᠳᠣᠨ ᠮᠠᠬᠠᠪᠣᠳ ᠭᠡᠮᠡᠨ ᠠᠩᠭᠢᠯᠠᠵᠤ᠂ ᠤᠯᠠᠢᠵᠤ ᠳᠦᠷᠡᠯᠵᠡᠨ ᠭᠡᠷᠡᠯ ᠢᠯᠴᠢ ᠡᠭᠦᠰᠬᠦ ᠡᠷᠳᠡᠮ ᠢ᠋ ᠤᠯᠠᠭᠠᠨ ᠤᠯᠠᠭᠴᠢᠨ ᠢ᠋ᠶ᠋ᠠᠷ ᠲᠥᠯᠥᠭᠡᠯᠡᠨ᠂ ᠡᠮᠦᠨᠡ ᠵᠦᠭ ᠦ᠋ᠨ ᠭᠠᠯ ᠤ᠋ᠨ ᠮᠠᠬᠠᠪᠣᠳ ᠭᠡᠮᠡᠨ ᠠᠩᠭᠢᠯᠠᠵᠤ᠂ ᠰᠢᠷᠠ ᠪᠣᠷᠣ ᠬᠥᠷᠥᠰᠥ ᠪᠡᠷ ᠰᠢᠮᠡᠵᠢᠭᠦᠯᠵᠦ ᠤᠷᠭᠤᠭᠤᠯᠬᠤ ᠡᠷᠳᠡᠮ ᠢ᠋ ᠰᠢᠷᠠ ᠰᠢᠷᠠᠭᠴᠢᠨ ᠢ᠋ᠶ᠋ᠠᠷ ᠲᠥᠯᠥᠭᠡᠯᠡᠨ᠂ ᠳᠥᠷᠪᠡᠨ ᠵᠣᠪᠬᠢᠰ ᠤ᠋ᠨ ᠰᠢᠷᠣᠢ ᠶ᠋ᠢᠨ ᠮᠠᠬᠠᠪᠣᠳ ᠢ᠋ᠶ᠋ᠠᠷ ᠠᠩᠭᠢᠯᠠᠵᠤ᠂ ᠴᠠᠢᠪᠤᠷ ᠴᠠᠭᠠᠨ ᠭᠢᠯᠲᠠᠭᠠᠨᠠᠬᠤ ᠣᠭᠲᠣᠯᠵᠤ ᠲᠠᠰᠤᠯᠬᠤ ᠡᠷᠳᠡᠮ ᠢ᠋ ᠴᠠᠭᠠᠨ ᠴᠠᠭᠠᠭᠴᠢᠨ ᠢ᠋ᠶ᠋ᠠᠷ ᠲᠥᠯᠥᠭᠡᠯᠡᠨ᠂ ᠪᠠᠷᠠᠭᠤᠨ ᠵᠦᠭ ᠦ᠋ᠨ ᠲᠡᠮᠦᠷ ᠦ᠋ᠨ ᠮᠠᠬᠠᠪᠣᠳ ᠲᠤ᠌ ᠠᠩᠭᠢᠯᠠᠵᠤ᠂ ᠮᠤᠷᠤᠢ ᠰᠠᠷᠤᠢ ᠪᠠᠷ ᠬᠠᠯᠠᠰᠢᠷᠠᠵᠤ ᠴᠥᠬᠥᠷᠡᠬᠦ ᠦᠭᠡᠢ ᠪᠡᠷ ᠬᠠᠷᠠᠯᠠᠵᠤ ᠤᠷᠤᠰᠬᠤ ᠡᠷᠳᠡᠮ ᠢ᠋ ᠬᠠᠷᠠ ᠬᠠᠷᠠᠭᠴᠢᠨ ᠢ᠋ᠶ᠋ᠠᠷ ᠲᠥᠯᠥᠭᠡᠯᠡᠨ᠂ ᠤᠮᠠᠷᠠ ᠵᠦᠭ ᠦ᠋ᠨ ᠤᠰᠤᠨ ᠮᠠᠬᠠᠪᠣᠳ ᠲᠤ᠌ ᠠᠩᠭᠢᠯᠠᠵᠤ ᠪᠠᠢᠭᠰᠠᠨ ᠢ᠋ ᠮᠡᠳᠡᠵᠦ ᠪᠣᠯᠤᠨᠠ᠃
ᠵᠢᠷᠤᠬᠠᠢ ᠶ᠋ᠢᠨ ᠶᠣᠰᠣᠨ ᠤ᠋ ᠭᠠᠵᠠᠷ ᠤ᠋ᠨ ᠡᠷᠬᠡᠲᠡᠨ ᠦ᠌ ᠠᠷᠪᠠᠨ ᠬᠣᠶᠠᠷ ᠵᠢᠯ ᠢ᠋ ᠣᠷᠣᠰᠢᠬᠤ ᠣᠷᠣᠨ ᠪᠠᠢᠷᠢ ᠪᠠ ᠰᠠᠷᠠ ᠶ᠋ᠢᠨ ᠡᠵᠡᠯᠡᠭᠴᠢ ᠶ᠋ᠢᠨ ᠶᠣᠰᠣᠭᠠᠷ ᠠᠩᠭᠢᠯᠠᠵᠤ᠂ ᠵᠡᠭᠦᠨ ᠵᠦᠭ ᠲᠦ᠍ ᠣᠷᠣᠰᠢᠭᠰᠠᠨ ᠪᠠᠷᠰ (ᠴᠠᠭᠠᠨ ᠰᠠᠷᠠ) ᠲᠠᠤᠯᠠᠢ (ᠬᠣᠶᠠᠷ ᠰᠠᠷᠠ) ᠶ᠋ᠢ ᠮᠣᠳᠣᠨ ᠮᠠᠬᠠᠪᠣᠳ ᠭᠡᠮᠡᠨ᠂ ᠡᠮᠦᠨᠡ ᠵᠦᠭ ᠲᠦ᠍ ᠣᠷᠣᠰᠢᠭᠰᠠᠨ ᠮᠣᠭᠠᠢ (ᠳᠥᠷᠪᠡᠨ ᠰᠠᠷᠠ) ᠮᠣᠷᠢ (ᠲᠠᠪᠤᠨ ᠰᠠᠷᠠ) ᠶ᠋ᠢ ᠭᠠᠯ ᠮᠠᠬᠠᠪᠣᠳ ᠭᠡᠮᠡᠨ᠂ ᠪᠠᠷᠠᠭᠤᠨ ᠵᠦᠭ ᠲᠦ᠍ ᠣᠷᠣᠰᠢᠭᠰᠠᠨ ᠪᠡᠴᠢ (ᠳᠣᠯᠣᠭᠠᠨ ᠰᠠᠷᠠ) ᠲᠠᠬᠢᠶᠠ (ᠨᠠᠢ᠍ᠮᠠᠨ ᠰᠠᠷᠠ) ᠶ᠋ᠢ ᠲᠡᠮᠦᠷ ᠮᠠᠬᠠᠪᠣᠳ ᠭᠡᠮᠡᠨ᠂ ᠤᠮᠠᠷᠠ ᠵᠦᠭ ᠲᠦ᠍ ᠪᠠᠢᠷᠢᠰᠢᠭᠰᠠᠨ ᠭᠠᠬᠠᠢ (ᠠᠷᠪᠠᠨ ᠰᠠᠷᠠ) ᠬᠤᠯᠤᠭᠠᠨᠠ (ᠠᠷᠪᠠᠨ ᠨᠢᠭᠡᠨ ᠰᠠᠷᠠ) ᠶ᠋ᠢ ᠤᠰᠤᠨ ᠮᠠᠬᠠᠪᠣᠳ ᠭᠡᠮᠡᠨ᠂ ᠳᠥᠷᠪᠡᠨ ᠵᠣᠪᠬᠢᠰ ᠲᠤ᠌ ᠣᠷᠣᠰᠢᠭᠰᠠᠨ ᠯᠤᠤ (ᠭᠤᠷᠪᠠᠨ ᠰᠠᠷᠠ) ᠬᠣᠨᠢ (ᠵᠢᠷᠭᠤᠭᠠᠨ ᠰᠠᠷᠠ) ᠨᠣᠬᠠᠢ (ᠶᠢᠰᠦᠨ ᠰᠠᠷᠠ) ᠦᠬᠡᠷ (ᠠᠷᠪᠠᠨ ᠬᠣᠶᠠᠷ ᠰᠠᠷᠠ) ᠶ᠋ᠢ ᠰᠢᠷᠣᠢ ᠶ᠋ᠢᠨ ᠮᠠᠬᠠᠪᠣᠳ ᠭᠡᠮᠡᠨ ᠬᠠᠷᠢᠶᠠᠯᠠᠭᠳᠠᠭᠤᠯᠤᠭᠰᠠᠨ ᠪᠢᠯᠡ᠃
ᠬᠥᠮᠦᠨ ᠦ᠌ ᠠᠩᠬᠠ ᠮᠡᠨᠳᠦᠯᠡᠭᠰᠡᠨ ᠲᠡᠷᠡ ᠭᠱᠠᠨ ᠤ᠋ ᠳᠥᠷᠪᠡᠨ ᠴᠠᠭ᠂ ᠳᠠᠷᠤᠢ ᠵᠢᠯ᠂ ᠰᠠᠷᠠ᠂ ᠡᠳᠦᠷ᠂ ᠴᠠᠭ ᠢ᠋ ᠲᠡᠭᠷᠢ ᠶ᠋ᠢᠨ ᠡᠰᠢ᠂ ᠭᠠᠵᠠᠷ ᠤ᠋ᠨ ᠡᠷᠬᠡᠲᠡᠨ ᠡᠴᠡ ᠲᠤᠰ ᠲᠤᠰ ᠨᠢᠭᠡ ᠡᠰᠢ ᠡᠷᠬᠡᠲᠡᠨ ᠢ᠋ ᠠᠪᠴᠤ ᠲᠡᠮᠳᠡᠭᠯᠡᠳᠡᠭ᠂ ᠡᠭᠦᠨ ᠢ᠋ ᠳᠠᠷᠤᠢ ᠵᠢᠷᠠᠨ ᠵᠢᠰᠦ ᠶ᠋ᠢᠨ ᠲᠡᠮᠳᠡᠭᠯᠡᠯ ᠭᠡᠳᠡᠭ᠃ ᠡᠢᠮᠦ ᠡᠴᠡ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠨᠠᠢ᠍ᠮᠠᠨ ᠲᠡᠮᠳᠡᠭ ᠦᠰᠦᠭ ᠢ᠋ᠶ᠋ᠡᠷ ᠪᠦᠷᠢᠯᠳᠦᠭᠰᠡᠨ ᠲᠥᠷᠥᠭᠰᠡᠨ ᠴᠠᠭ ᠤ᠋ᠨ ᠨᠠᠢ᠍ᠮᠠᠨ ᠦᠰᠦᠭ (生辰八字 ) ᠪᠠᠢᠳᠠᠭ᠃ ᠡᠭᠦᠨ ᠢ᠋ ᠲᠦᠮᠡᠨ ᠣᠨ ᠤ᠋ ᠬᠤᠸᠠᠩᠯᠢ ᠪᠤᠶᠤ ᠣᠯᠠᠨ ᠵᠢᠯ ᠦ᠋ᠨ ᠴᠠᠭ ᠤᠯᠠᠷᠢᠯ ᠤ᠋ᠨ ᠪᠢᠴᠢᠭ (万年历 ) ᠡᠴᠡ ᠡᠷᠢᠨ ᠲᠡᠮᠳᠡᠭᠯᠡᠵᠦ᠂ ᠡᠨᠡ ᠬᠦ᠌ ᠨᠠᠢ᠍ᠮᠠᠨ ᠦᠰᠦᠭ ᠦ᠋ᠨ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠬᠠᠷᠢᠴᠠᠭᠠ ᠪᠠᠷ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢᠨ ᠦᠬᠦᠵᠦ ᠲᠥᠷᠥᠨ ᠡᠪᠡᠳᠴᠢᠯᠡᠵᠦ ᠡᠳᠡᠭᠡᠷᠡᠬᠦ᠂ ᠢᠯᠡᠷᠡᠭᠡᠳᠦᠢ ᠡᠪᠡᠳᠴᠢᠨ (ᠬᠤᠷᠠᠵᠤ ᠪᠠᠢᠭᠠ ᠱᠠᠲᠤ ) ᠶ᠋ᠢ ᠣᠨᠣᠰᠢᠯᠠᠬᠤ᠂ ᠤᠭᠲᠤᠵᠤ ᠵᠠᠰᠠᠬᠤ ᠵᠡᠷᠭᠡ ᠶ᠋ᠢ 《ᠲᠣᠭᠠ ᠪᠣᠳᠣᠯᠭᠠ ᠶ᠋ᠢᠨ ᠲᠣᠮᠢᠶᠠ ᠮᠡᠲᠦ》 ᠪᠡᠷ ᠪᠣᠳᠣᠵᠤ ᠪᠡᠯᠭᠡᠳᠡᠵᠦ ᠰᠤᠪᠢᠵᠤ ᠲᠣᠭᠠᠴᠠᠳᠠᠭ [2]᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠪᠢᠯᠢᠭ ᠦ᠋ᠨ ᠤᠯᠠᠷᠢᠯ ᠤ᠋ᠨ 2024 ᠣᠨ ᠤ᠋ 8 ᠳ᠋ᠤᠭᠠᠷ ᠰᠠᠷᠠ ᠶ᠋ᠢᠨ 17 ᠤ᠋ ᠡᠳᠦᠷ ᠦ᠋ᠨ 4 ᠴᠠᠭ ᠢ᠋ ᠡᠰᠢ ᠡᠷᠬᠡᠲᠡᠨ ᠢ᠋ᠶ᠋ᠡᠷ ᠲᠥᠷᠦᠯᠵᠢᠭᠦᠯᠪᠡᠯ ᠳᠠᠷᠤᠢ ᠬᠥᠬᠡ ᠯᠤᠤ ᠵᠢᠯ ᠦ᠋ᠨ ᠬᠠᠷᠠᠭᠴᠢᠨ ᠲᠠᠬᠢᠶᠠ ᠰᠠᠷᠠ ᠶ᠋ᠢᠨ ᠤᠯᠠᠭᠠᠨ ᠨᠣᠬᠠᠢ ᠡᠳᠦᠷ ᠦ᠋ᠨ ᠤᠯᠠᠭᠠᠨ ᠪᠡᠴᠢ ᠴᠠᠭ ᠪᠣᠯᠤᠨᠠ᠃
3᠂ ᠪᠣᠳᠠᠲᠤ ᠵᠢᠱ᠌ᠢᠶᠡ
ᠵᠢᠱ᠌ᠢᠶᠡ 1᠄ ᠯᠢ ᠵᠣ᠌ ᠂ ᠡᠷᠡᠭᠲᠡᠢ ᠂ ᠺᠠᠳ᠋ᠷ ᠂ ᠪᠢᠯᠢᠭ ᠦ᠋ᠨ ᠤᠯᠠᠷᠢᠯ ᠤ᠋ᠨ 1948 ᠣᠨ ᠤ᠋ 10 ᠰᠠᠷᠠ ᠶ᠋ᠢᠨ 20 ᠤ᠋ ᠬᠤᠯᠤᠭᠠᠨᠠ ᠴᠠᠭ ᠲᠤ᠌ ᠲᠥᠷᠥᠪᠡ᠃
ᠡᠰᠢ ᠡᠷᠬᠡᠲᠡᠨ ᠢ᠋ᠶ᠋ᠡᠷ ᠲᠥᠷᠥᠯᠵᠢᠭᠦᠯᠪᠡᠯ
ᠰᠢᠷᠠ ᠬᠤᠯᠤᠭᠠᠨᠠ
ᠬᠠᠷᠠᠭᠴᠢᠨ ᠭᠠᠬᠠᠢ
ᠰᠢᠷᠠᠭᠴᠢᠨ ᠲᠠᠬᠢᠶᠠ
ᠬᠥᠬᠡ ᠬᠤᠯᠤᠭᠠᠨᠠ
ᠡᠨᠡ ᠬᠦ᠌ 《ᠵᠢᠵᠢᠭ ᠬᠣᠷᠸᠠ》 ᠳ᠋ᠤ᠌ ᠰᠢᠷᠠ ᠬᠤᠯᠤᠭᠠᠨᠠ᠂ ᠬᠠᠷᠠᠭᠴᠢᠨ ᠭᠠᠬᠠᠢ ᠪᠦᠷᠢᠳᠦᠭᠰᠡᠨ ᠢ᠋ᠶ᠋ᠡᠷ ᠰᠢᠷᠣᠢ ᠮᠠᠬᠠᠪᠣᠳ ᠨᠢ ᠤᠰᠤᠨ ᠮᠠᠬᠠᠪᠣᠳ ᠢ᠋ ᠬᠣᠣᠷᠯᠠᠵᠤ ᠪᠠᠢᠬᠤ ᠨᠢ《ᠢᠯᠡᠷᠡᠭᠡᠳᠦᠢ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ》 ᠦ᠌ ᠲᠡᠮᠳᠡᠭ ᠪᠠᠢᠪᠠᠴᠤ᠂ ᠤᠤᠯ《ᠬᠣᠷᠸᠠ》 ᠳ᠋ᠤ᠌ ᠪᠠᠨ ᠪᠣᠯ ᠬᠠᠷᠢᠴᠠᠩᠭᠤᠢ ᠲᠡᠩᠴᠡᠭᠦᠷᠢ ᠲᠡᠢ ᠪᠠᠢᠳᠠᠭ᠃ ᠨᠥᠬᠥᠷ ᠳᠠᠢᠰᠤᠨ ᠤ᠋ ᠲᠥᠯᠥᠵᠢᠭᠦᠯᠵᠦ ᠬᠣᠣᠷᠯᠠᠬᠤ ᠦᠢᠯᠡᠳᠦᠯ ᠢ᠋ ᠮᠥᠷᠳᠡᠪᠡᠯ᠂ ᠲᠡᠭᠷᠢ ᠶ᠋ᠢᠨ ᠡᠰᠢ ᠶ᠋ᠢᠨ ᠰᠢᠷᠠ ᠰᠢᠷᠠᠭᠴᠢᠨ (ᠰᠢᠷᠣᠢ ᠮᠠᠬᠠᠪᠣᠳ) ᠨᠢ ᠰᠢᠭᠤᠳ ᠭᠠᠬᠠᠢ ᠬᠤᠯᠤᠭᠠᠨᠠ (ᠤᠰᠤᠨ ᠮᠠᠬᠠᠪᠣᠳ) ᠢ᠋ ᠬᠣᠣᠷᠯᠠᠵᠤ ᠪᠠᠢᠬᠤ ᠪᠦᠲᠦᠴᠡ ᠲᠡᠢ᠃ ᠲᠠᠪᠤᠨ ᠮᠠᠬᠠᠪᠣᠳ ᠡᠬᠡ ᠬᠥᠪᠡᠭᠦᠨ ᠨᠥᠬᠥᠷ ᠳᠠᠢᠰᠤᠨ ᠤ᠋ ᠬᠠᠷᠢᠴᠠᠭᠠ ᠪᠠᠷ ᠤᠯᠠᠷᠢᠭᠤᠯᠵᠤ ᠪᠣᠳᠣᠬᠤ ᠳ᠋ᠤ᠌᠂ ᠲᠡᠭᠷᠢ ᠶ᠋ᠢᠨ ᠡᠰᠢ ᠨᠢ ᠤᠯᠠᠭᠴᠢᠨ (ᠭᠠᠯ ᠮᠠᠬᠠᠪᠣᠳ) ᠢᠷᠡᠵᠦ ᠂ ᠰᠢᠷᠠ ᠰᠢᠷᠠᠭᠴᠢᠨ ᠢ᠋ ᠲᠥᠯᠥᠵᠢᠭᠦᠯᠦᠨ ᠰᠢᠷᠣᠢ ᠶ᠋ᠢᠨ ᠬᠦᠴᠦᠨ ᠨᠡᠮᠡᠭᠳᠡᠵᠦ᠂ ᠡᠨᠡ ᠦᠶᠡ ᠳ᠋ᠦ᠍ ᠭᠠᠵᠠᠷ ᠤ᠋ᠨ ᠡᠷᠬᠡᠲᠡᠨ ᠳ᠋ᠦ᠍ ᠦᠬᠡᠷ (ᠰᠢᠷᠣᠢ ᠮᠠᠬᠠᠪᠣᠳ ) ᠢᠷᠡᠵᠦ᠂ ᠰᠢᠷᠣᠢ ᠮᠠᠬᠠᠪᠣᠳ ᠤ᠋ᠨ ᠬᠦᠴᠦᠨ ᠨᠡᠮᠡᠭᠳᠡᠬᠦ ᠦᠶᠡ ᠳ᠋ᠦ᠍《ᠵᠢᠵᠢᠭ ᠬᠣᠷᠸᠠ》 ᠶ᠋ᠢᠨ ᠬᠠᠷᠢᠴᠠᠩᠭᠤᠢ ᠲᠡᠩᠴᠡᠭᠦᠷᠢ ᠡᠪᠳᠡᠭᠳᠡᠨ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠪᠡᠶᠡ ᠳ᠋ᠦ᠍ ᠨᠢ ᠢᠯᠡᠷᠡᠵᠦ ᠮᠡᠳᠡᠭᠳᠡᠳᠡᠭ᠃
ᠡᠢᠮᠦᠷᠬᠦᠦ 1997 ᠣᠨ ᠤ᠋ ᠤᠯᠠᠭᠴᠢᠨ ᠦᠬᠡᠷ ᠵᠢᠯ ᠦ᠋ᠨ 6 ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌᠂ ᠶᠡᠬᠡ 《ᠬᠣᠷᠸᠠ》 ᠶ᠋ᠢᠨ ᠤᠯᠠᠭᠴᠢᠨ (ᠭᠠᠯ ᠮᠠᠬᠠᠪᠣᠳ) ᠪᠠ ᠦᠬᠡᠷ (ᠰᠢᠷᠣᠢ ᠮᠠᠬᠠᠪᠣᠳ) ᠨᠢ 《ᠵᠢᠵᠢᠭ ᠬᠣᠷᠸᠠ》 ᠶ᠋ᠢᠨ ᠰᠢᠷᠠ ᠰᠢᠷᠠᠭᠴᠢᠨ (ᠰᠢᠷᠣᠢ ᠮᠠᠬᠠᠪᠣᠳ) ᠤ᠋ᠨ ᠬᠦᠴᠦᠨ ᠢ᠋ ᠨᠡᠮᠡᠭᠳᠡᠭᠦᠯᠦᠨ᠂ ᠬᠠᠷᠠᠭᠴᠢᠨ ᠭᠠᠬᠠᠢ ᠬᠤᠯᠤᠭᠠᠨᠠ (ᠤᠰᠤᠨ ᠮᠠᠬᠠᠪᠣᠳ ) ᠢ᠋ ᠬᠣᠣᠷᠯᠠᠬᠤ ᠳ᠋ᠤ᠌᠂ ᠤᠰᠤᠨ ᠮᠠᠬᠠᠪᠣᠳ ᠬᠠᠷᠢᠴᠠᠩᠭᠤᠢ ᠪᠠᠷ ᠪᠠᠭᠠᠰᠴᠤ᠂ ᠪᠡᠶᠡ ᠲᠤᠷᠠᠬᠤ᠂ ᠤᠮᠳᠠᠭᠠᠰᠬᠤ ᠭᠡᠬᠦ ᠮᠡᠲᠦ 《ᠭᠤᠷᠪᠠ ᠠᠷᠪᠢᠳᠠᠨ ᠨᠢᠭᠡ ᠪᠠᠭᠠᠰᠬᠤ》 ᠰᠢᠨᠵᠢ ᠢᠯᠡᠷᠡᠵᠦ᠂ ᠵᠢᠷᠢᠮ ᠠᠢᠮᠠᠭ ᠤ᠋ᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠪᠠᠢᠴᠠᠭᠠᠯᠭᠠᠬᠤ ᠳ᠋ᠤ᠌ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠭᠡᠵᠦ ᠲᠣᠳᠣᠯᠠᠪᠠ᠃
ᠵᠢᠱ᠌ᠢᠶᠡ 2᠄ ᠠᠮᠤᠭᠤᠯᠠᠩ᠂ ᠡᠷᠡᠭᠲᠡᠢ᠂ ᠺᠠᠳ᠋ᠷ᠂ ᠪᠢᠯᠢᠭ ᠦ᠋ᠨ ᠤᠯᠠᠷᠢᠯ ᠤ᠋ᠨ 1959 ᠣᠨ ᠤ᠋ 12 ᠰᠠᠷᠠ ᠶ᠋ᠢᠨ 2 ᠤ᠋ ᠡᠳᠦᠷ ᠨᠣᠬᠠᠢ ᠴᠠᠭ ᠲᠤ᠌ ᠲᠥᠷᠥᠪᠡ᠃
ᠡᠰᠢ ᠡᠷᠬᠡᠲᠡᠨ ᠢ᠋ᠶ᠋ᠡᠷ ᠲᠥᠷᠥᠯᠵᠢᠭᠦᠯᠪᠡᠯ᠄
ᠰᠢᠷᠠᠭᠴᠢᠨ ᠭᠠᠬᠠᠢ
ᠤᠯᠠᠭᠠᠨ ᠬᠤᠯᠤᠭᠠᠨᠠ
ᠤᠯᠠᠭᠴᠢᠨ ᠭᠠᠬᠠᠢ
ᠴᠠᠭᠠᠨ ᠨᠣᠬᠠᠢ
ᠡᠨᠡ ᠬᠦ᠌ 《ᠵᠢᠵᠢᠭ ᠬᠣᠷᠸᠠ》 ᠳ᠋ᠤ᠌ ᠰᠢᠷᠠᠭᠴᠢᠨ ᠭᠠᠬᠠᠢ᠂ ᠴᠠᠭᠠᠨ ᠨᠣᠬᠠᠢ ᠪᠦᠷᠢᠳᠦᠭᠰᠡᠨ ᠢ᠋ᠶ᠋ᠡᠷ ᠰᠢᠷᠣᠢ ᠮᠠᠬᠠᠪᠣᠳ ᠨᠢ ᠤᠰᠤᠨ ᠮᠠᠬᠠᠪᠣᠳ ᠢ᠋ ᠬᠣᠣᠷᠯᠠᠵᠤ ᠪᠠᠢᠬᠤ ᠨᠢ 《ᠢᠯᠡᠷᠡᠭᠡᠳᠦᠢ ᠰᠢᠬᠢᠷ ᠰᠢᠵᠢᠩ》 ᠡᠪᠡᠳᠴᠢᠨ ᠦ᠌ ᠲᠡᠮᠳᠡᠭ ᠪᠠᠢᠵᠤ᠂ ᠤᠤᠯ《ᠬᠣᠷᠸᠠ》 ᠳᠣᠲᠣᠷᠠ ᠪᠠᠨ ᠬᠠᠷᠢᠴᠠᠩᠭᠤᠢ ᠲᠡᠩᠴᠡᠭᠦᠷᠢ ᠲᠡᠢ ᠪᠠᠢᠳᠠᠭ᠃ ᠨᠥᠬᠥᠷ ᠳᠠᠢᠰᠤᠨ ᠤ᠋ ᠲᠥᠯᠥᠵᠢᠭᠦᠯᠵᠦ ᠬᠣᠣᠷᠯᠠᠬᠤ ᠦᠢᠯᠡᠳᠦᠯ ᠢ᠋ ᠮᠥᠷᠳᠡᠪᠡᠯ᠂ ᠲᠡᠭᠷᠢ ᠶ᠋ᠢᠨ ᠡᠰᠢ ᠳᠡᠭᠡᠷᠡ ᠤᠯᠠᠭᠠᠨ (ᠭᠠᠯ ᠮᠠᠬᠠᠪᠣᠳ) ᠢᠷᠡᠵᠦ᠂ ᠭᠠᠯ ᠰᠢᠷᠣᠢ ᠶ᠋ᠢᠨ ᠬᠦᠴᠦᠨ ᠢ᠋ ᠨᠡᠮᠡᠭᠳᠡᠭᠦᠯᠦᠨ᠂ ᠭᠠᠵᠠᠷ ᠤ᠋ᠨ ᠡᠷᠬᠡᠲᠡᠨ ᠳ᠋ᠦ᠍ ᠨᠣᠬᠠᠢ (ᠰᠢᠷᠣᠢ ᠮᠠᠬᠠᠪᠣᠳ) ᠢᠷᠡᠵᠦ᠂ ᠰᠢᠷᠣᠢ ᠮᠠᠬᠠᠪᠣᠳ ᠤ᠋ᠨ ᠬᠦᠴᠦᠨ ᠨᠡᠮᠡᠭᠳᠡᠨ᠂ ᠭᠠᠬᠠᠢ ᠬᠤᠯᠤᠭᠠᠨᠠ (ᠤᠰᠤᠨ ᠮᠠᠬᠠᠪᠣᠳ ) ᠢ᠋ ᠬᠣᠣᠷᠯᠠᠬᠤ ᠦᠶᠡ ᠳ᠋ᠦ᠍ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠪᠡᠶᠡ ᠳ᠋ᠦ᠍ ᠨᠢ ᠮᠡᠳᠡᠷᠡᠭᠳᠡᠨ ᠡᠪᠡᠳᠴᠢᠯᠡᠳᠡᠭ᠃
ᠡᠢᠮᠦᠷᠬᠦᠦ᠂ 2006 ᠣᠨ ᠤ᠋ ᠤᠯᠠᠭᠠᠨ ᠨᠣᠬᠠᠢ ᠵᠢᠯ ᠦ᠋ᠨ 9 ᠳ᠋ᠦ᠍ᠭᠡᠷ ᠰᠠᠷᠠ ᠳ᠋ᠤ᠌᠂ 《ᠶᠡᠬᠡ ᠬᠣᠷᠸᠠ》 ᠶ᠋ᠢᠨ ᠭᠠᠯ ᠰᠢᠷᠣᠢ ᠶ᠋ᠢᠨ ᠬᠦᠴᠦᠨ ᠨᠡᠮᠡᠭᠳᠡᠬᠦ ᠭᠠᠳᠠᠭᠠᠳᠤ ᠨᠥᠬᠥᠴᠡᠯ ᠨᠢ ᠪᠠᠭᠠ《ᠬᠣᠷᠸᠠ》 ᠶ᠋ᠢᠨ ᠪᠡᠶᠡ ᠮᠠᠬᠠᠪᠣᠳ ᠤ᠋ᠨ ᠭᠠᠯ ᠰᠢᠷᠣᠢ ᠶ᠋ᠢᠨ ᠬᠦᠴᠦᠨ ᠢ᠋ ᠥᠳᠥᠭᠡᠨ ᠳᠡᠯᠭᠡᠷᠡᠭᠦᠯᠵᠦ᠂ ᠭᠠᠬᠠᠢ ᠬᠤᠯᠤᠭᠠᠨᠠ ᠮᠡᠲᠦ ᠤᠰᠤᠨ ᠮᠠᠬᠠᠪᠣᠳ ᠢ᠋ ᠬᠣᠣᠷᠯᠠᠨ ᠤᠰᠤᠨ ᠮᠠᠬᠠᠪᠣᠳ ᠪᠠᠷᠠᠭᠳᠠᠵᠤ᠂ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠬᠠᠷᠢᠴᠠᠩᠭᠤᠢ ᠲᠡᠩᠴᠡᠭᠦᠷᠢ ᠠᠯᠳᠠᠭᠳᠠᠨ᠂ ᠢᠳᠡᠵᠦ ᠤᠤᠭᠤᠬᠤ ᠬᠡᠮᠵᠢᠶᠡ ᠠᠷᠪᠢᠳᠠᠵᠤ᠂ ᠰᠢᠭᠡᠬᠦ ᠲᠣᠭᠠ ᠣᠯᠠᠰᠢᠷᠠᠨ᠂ ᠮᠠᠷᠢᠶᠠ ᠰᠢᠭᠤᠷᠠᠵᠤ᠂ ᠶᠠᠳᠠᠷᠠᠵᠤ ᠬᠥᠯᠥᠷᠡᠬᠦ ᠪᠠᠢᠳᠠᠯ ᠬᠡᠴᠡᠭᠦᠳᠡᠭᠰᠡᠨ ᠡᠴᠡ ᠮᠦᠭᠳᠡᠨ ᠬᠣᠲᠠ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠪᠠᠢᠴᠠᠭᠠᠯᠭᠠᠬᠤ ᠳ᠋ᠤ᠌ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠭᠡᠵᠦ ᠲᠣᠳᠣᠯᠠᠪᠠ᠃
ᠵᠢᠱ᠌ᠢᠶᠡ 3᠄ ᠱᠤᠸᠠᠩᠰᠢ᠂ ᠡᠷᠡᠭᠲᠡᠢ᠂ ᠲᠠᠷᠢᠶᠠᠴᠢᠨ᠂ ᠪᠢᠯᠢᠭ ᠦ᠋ᠨ ᠤᠯᠠᠷᠢᠯ ᠤ᠋ᠨ 1963 ᠣᠨ ᠤ᠋ 5 ᠳ᠋ᠤᠭᠠᠷ ᠰᠠᠷᠠ ᠶ᠋ᠢᠨ 1 ᠳ᠋ᠦ᠍ ᠨᠣᠬᠠᠢ ᠴᠠᠭ ᠲᠤ᠌ ᠲᠥᠷᠥᠪᠡ᠃
ᠡᠰᠢ ᠡᠷᠬᠡᠲᠡᠨ ᠢ᠋ᠶ᠋ᠡᠷ ᠲᠥᠷᠥᠯᠵᠢᠭᠦᠯᠪᠡᠯ᠄
ᠬᠠᠷᠠᠭᠴᠢᠨ ᠲᠠᠤᠯᠠᠢ
ᠰᠢᠷᠠ ᠮᠣᠷᠢ
ᠬᠥᠬᠡᠭᠴᠢᠨ ᠬᠣᠨᠢ
ᠤᠯᠠᠭᠠᠨ ᠨᠣᠬᠠᠢ
ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠡᠨᠡ ᠬᠦ᠌ 《ᠵᠢᠵᠢᠭ ᠬᠣᠷᠸᠠ》 ᠳ᠋ᠤ᠌ ᠰᠢᠷᠠ ᠮᠣᠷᠢ᠂ ᠤᠯᠠᠭᠠᠨ ᠨᠣᠬᠠᠢ ᠮᠡᠲᠦ ᠪᠦᠷᠢᠳᠦᠭᠰᠡᠨ ᠢ᠋ᠶ᠋ᠡᠷ ᠰᠢᠷᠣᠢ ᠮᠠᠬᠠᠪᠣᠳ ᠨᠢ ᠤᠰᠤᠨ ᠮᠠᠬᠠᠪᠣᠳ ᠢ᠋ ᠬᠣᠣᠷᠯᠠᠵᠤ 《ᠢᠯᠡᠷᠡᠭᠡᠳᠦᠢ ᠰᠢᠬᠢᠷ ᠰᠢᠵᠢᠩ》 ᠡᠪᠡᠳᠴᠢᠨ ᠦ᠌ ᠲᠡᠮᠳᠡᠭ ᠪᠣᠢ᠃ ᠲᠥᠯᠥᠵᠢᠭᠦᠯᠬᠦ ᠬᠣᠣᠷᠯᠠᠬᠤ ᠦᠢᠯᠡᠳᠦᠯ ᠢ᠋ ᠰᠢᠨᠵᠢᠪᠡᠯ᠄ ᠬᠥᠬᠡᠭᠴᠢᠨ ᠮᠣᠳᠣ ᠨᠢ ᠤᠯᠠᠭᠠᠨ᠂ ᠮᠣᠷᠢ ᠮᠡᠲᠦ ᠭᠠᠯ ᠮᠠᠬᠠᠪᠣᠳ ᠢ᠋ ᠲᠥᠯᠥᠵᠢᠭᠦᠯᠬᠦ᠂ ᠡᠳᠡᠭᠡᠷ ᠭᠠᠯ ᠨᠢ ᠳᠠᠬᠢᠨ ᠰᠢᠷᠠ᠂ ᠨᠣᠬᠠᠢ᠂ ᠬᠣᠨᠢ ᠮᠡᠲᠦ ᠰᠢᠷᠣᠢ ᠮᠠᠬᠠᠪᠣᠳ ᠢ᠋ ᠲᠥᠯᠥᠵᠢᠭᠦᠯᠦᠭᠰᠡᠨ ᠢ᠋ᠶ᠋ᠡᠷ ᠰᠢᠷᠣᠢ ᠶ᠋ᠢᠨ ᠬᠦᠴᠦᠨ ᠪᠠᠳᠠᠷᠠᠵᠤ᠂ ᠬᠠᠷᠠᠭᠴᠢᠨ (ᠤᠰᠤᠨ ᠮᠠᠬᠠᠪᠣᠳ) ᠢ᠋ ᠬᠣᠣᠷᠯᠠᠳᠠᠭ ᠪᠣᠯᠪᠠᠴᠤ ᠲᠥᠷᠥᠯᠬᠢ ᠡᠨᠡ ᠬᠦ᠌《ᠬᠣᠷᠸᠠ》 ᠳ᠋ᠤ᠌ ᠪᠠᠨ ᠬᠠᠷᠢᠴᠠᠩᠭᠤᠢ ᠲᠡᠩᠴᠡᠭᠦᠷᠢ ᠲᠡᠢ ᠶᠦᠮ᠃ ᠠᠯᠢ ᠨᠢᠭᠡ ᠦᠶᠡ ᠳ᠋ᠦ᠍ ᠲᠡᠭᠷᠢ ᠶ᠋ᠢᠨ ᠡᠰᠢ ᠳ᠋ᠦ᠍ ᠴᠠᠭᠠᠭᠴᠢᠨ (ᠲᠡᠮᠦᠷ ᠮᠠᠬᠠᠪᠣᠳ) ᠨᠢ ᠤᠯᠠᠭᠠᠨ (ᠭᠠᠯ ᠮᠠᠬᠠᠪᠣᠳ) ᠲᠤ᠌ ᠬᠣᠣᠷᠯᠠᠭᠳᠠᠵᠤ᠂ ᠭᠠᠵᠠᠷ ᠤ᠋ᠨ ᠡᠷᠬᠡᠲᠡᠨ ᠳ᠋ᠦ᠍ ᠮᠣᠭᠠᠢ ᠭᠠᠯ ᠢᠷᠡᠵᠦ᠂ ᠮᠣᠭᠠᠢ ᠮᠣᠷᠢ ᠬᠣᠨᠢ ᠶ᠋ᠢᠨ ᠭᠠᠯ ᠤ᠋ᠨ ᠢᠪᠡᠭᠡᠯ ᠡᠭᠦᠰᠦᠨ᠂ ᠭᠠᠯ ᠤ᠋ᠨ ᠬᠦᠴᠦᠨ ᠠᠷᠪᠢᠳᠠᠨ ᠬᠡᠲᠦᠷᠡᠵᠦ᠂ ᠤᠰᠤ ᠶ᠋ᠢ ᠰᠢᠷᠭᠢᠭᠡᠬᠦ (ᠪᠠᠷᠠᠭᠳᠠᠬᠤ) ᠦᠶᠡ ᠳ᠋ᠦ᠍ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠨᠢ ᠪᠡᠶᠡ ᠳ᠋ᠦ᠍ ᠨᠢ ᠮᠡᠳᠡᠷᠡᠭᠳᠡᠨ ᠡᠪᠡᠳᠴᠢᠯᠡᠳᠡᠭ᠃
ᠡᠢᠮᠦᠷᠬᠦᠦ᠂ 2001 ᠣᠨ ᠤ᠋ ᠴᠠᠭᠠᠭᠴᠢᠨ ᠮᠣᠭᠠᠢ ᠵᠢᠯ ᠦ᠋ᠨ 7 ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌᠂ ᠴᠠᠭᠠᠭᠴᠢᠨ (ᠲᠡᠮᠦᠷ ᠮᠠᠬᠠᠪᠣᠳ) ᠨᠢ ᠭᠠᠯ ᠳ᠋ᠤ᠌ ᠬᠣᠣᠷᠯᠠᠭᠳᠠᠬᠤ᠂ ᠮᠣᠭᠠᠢ ᠮᠣᠷᠢ ᠬᠣᠨᠢ ᠶ᠋ᠢᠨ ᠭᠠᠯ ᠤ᠋ᠨ ᠢᠪᠡᠭᠡᠯ ᠡᠭᠦᠰᠬᠦ ᠨᠥᠬᠥᠴᠡᠯ ᠢ᠋ ᠬᠠᠩᠭᠠᠭᠰᠠᠨ ᠢ᠋ᠶ᠋ᠠᠷ ᠵᠢᠷᠦᠬᠡ ᠰᠠᠪᠠᠭᠠᠨᠠᠬᠤ᠂ ᠬᠥᠯᠥᠷᠡᠬᠦ᠂ ᠶᠠᠳᠠᠷᠠᠬᠤ᠂ ᠮᠠᠷᠢᠶᠠ ᠰᠢᠭᠤᠷᠠᠬᠤ᠂ ᠤᠮᠳᠠᠭᠠᠰᠬᠤ ᠪᠠ ᠰᠢᠭᠡᠬᠦ ᠲᠣᠭᠠ ᠣᠯᠠᠰᠢᠷᠠᠬᠤ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠭᠰᠡᠨ ᠳ᠋ᠦ᠍ ᠪᠡᠭᠡᠵᠢᠩ ᠦ᠋ᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠪᠠᠢᠴᠠᠭᠠᠯᠭᠠᠬᠤ ᠳ᠋ᠤ᠌ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠭᠡᠵᠦ ᠲᠣᠳᠣᠯᠠᠪᠠ᠃
ᠵᠢᠱ᠌ᠢᠶᠡ 4᠄ ᠦ᠌ ᠳ᠋ᠠᠨ᠂ ᠡᠷᠡᠭᠲᠡᠢ᠂ ᠲᠠᠮᠢᠷᠴᠢᠨ᠂ ᠪᠢᠯᠢᠭ ᠦ᠋ᠨ ᠤᠯᠠᠷᠢᠯ ᠤ᠋ᠨ 1957 ᠣᠨ ᠤ᠋ 2 ᠰᠠᠷᠠ ᠶ᠋ᠢᠨ 21 ᠦ᠌ ᠨᠣᠬᠠᠢ ᠴᠠᠭ ᠲᠤ᠌ ᠲᠥᠷᠥᠪᠡ᠃
ᠡᠰᠢ ᠡᠷᠬᠡᠲᠡᠨ ᠢ᠋ᠶ᠋ᠡᠷ ᠲᠥᠷᠦᠯᠵᠢᠭᠦᠯᠪᠡᠯ᠄
ᠤᠯᠠᠭᠴᠢᠨ ᠲᠠᠬᠢᠶᠠ
ᠬᠠᠷᠠᠭᠴᠢᠨ ᠲᠠᠤᠯᠠᠢ
ᠬᠠᠷᠠᠭᠴᠢᠨ ᠮᠣᠭᠠᠢ
ᠬᠠᠷᠠ ᠨᠣᠬᠠᠢ
ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠡᠨᠡ ᠬᠦ᠌ 《ᠬᠣᠷᠸᠠ》 ᠳ᠋ᠤ᠌ ᠮᠣᠭᠠᠢ᠂ ᠨᠣᠬᠠᠢ ᠭᠡᠬᠦ ᠦᠰᠦᠭ ᠵᠡᠷᠭᠡᠯᠡᠳᠡᠭᠡ ᠪᠡᠷ ᠢᠯᠡᠷᠡᠭᠰᠡᠨ ᠨᠢ 《ᠢᠯᠡᠷᠡᠭᠡᠳᠦᠢ ᠰᠢᠬᠢᠷ ᠰᠢᠵᠢᠩ》 ᠡᠪᠡᠳᠴᠢᠨ ᠦ᠌ ᠲᠡᠮᠳᠡᠭ ᠲᠡᠢ᠃ ᠨᠥᠬᠥᠷ ᠳᠠᠢᠰᠤᠨ ᠤ᠋ ᠲᠥᠯᠥᠵᠢᠭᠦᠯᠬᠦ ᠬᠣᠣᠷᠯᠠᠬᠤ ᠦᠢᠯᠡᠳᠦᠯ ᠢ᠋ ᠮᠥᠷᠳᠡᠨ ᠪᠣᠳᠣᠪᠠᠯ᠂ ᠤᠯᠠᠭᠴᠢᠨ᠂ ᠮᠣᠭᠠᠢ (ᠭᠠᠯ ᠮᠠᠬᠠᠪᠣᠳ) ᠨᠢ ᠨᠣᠬᠠᠢ (ᠰᠢᠷᠣᠢ ᠮᠠᠬᠠᠪᠣᠳ) ᠢ᠋ ᠲᠥᠯᠥᠵᠢᠭᠦᠯᠵᠦ᠂ ᠬᠠᠷᠠ ᠬᠠᠷᠠᠭᠴᠢᠨ (ᠤᠰᠤᠨ ᠮᠠᠬᠠᠪᠣᠳ) ᠢ᠋ ᠬᠣᠣᠷᠯᠠᠳᠠᠭ᠃ ᠤᠰᠤᠨ ᠤ᠋ ᠡᠬᠡ ᠲᠡᠮᠦᠷ ᠮᠠᠬᠠᠪᠣᠳ (ᠲᠠᠬᠢᠶᠠ) ᠨᠢ ᠤᠰᠤᠨ ᠤ᠋ ᠬᠥᠪᠡᠭᠦᠨ ᠮᠣᠳᠣᠨ ᠮᠠᠬᠠᠪᠣᠳ (ᠲᠠᠤᠯᠠᠢ) ᠶ᠋ᠢ ᠬᠣᠣᠷᠯᠠᠳᠠᠭ᠃ ᠡᠳᠡᠭᠡᠷ ᠳᠠᠢᠰᠤᠨ ᠪᠣᠯᠬᠤ ᠬᠠᠷᠢᠴᠠᠭᠠ ᠨᠢ ᠪᠡᠶᠡ ᠮᠠᠬᠠᠪᠣᠳ ᠢ᠋ ᠬᠢᠯᠪᠠᠷ ᠭᠡᠮᠲᠦᠭᠡᠵᠦ ᠲᠤᠩᠭᠠᠯᠠᠭ ᠴᠥᠪ ᠦ᠋ᠨ ᠢᠯᠭᠠᠷᠠᠯᠲᠠ ᠶ᠋ᠢ ᠰᠠᠮᠠᠭᠤᠷᠠᠭᠤᠯᠤᠨ᠂ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠢ᠋ ᠡᠭᠦᠰᠬᠡᠳᠡᠭ᠃ ᠠᠯᠢ ᠨᠢᠭᠡ ᠦᠶᠡ ᠳ᠋ᠦ᠍ ᠲᠡᠭᠷᠢ ᠶ᠋ᠢᠨ ᠡᠰᠢ ᠳ᠋ᠦ᠍ ᠬᠠᠷᠠ (ᠤᠰᠤᠨ ᠮᠠᠬᠠᠪᠣᠳ) ᠢᠯᠡᠷᠡᠨ᠂ ᠤᠯᠠᠭᠴᠢᠨ (ᠭᠠᠯ ᠮᠠᠬᠠᠪᠣᠳ) ᠢ᠋ ᠬᠣᠣᠷᠯᠠᠵᠤ᠂ ᠭᠠᠵᠠᠷ ᠤ᠋ᠨ ᠡᠷᠬᠡᠲᠡᠨ ᠳ᠋ᠦ᠍ ᠪᠡᠴᠢ (ᠲᠡᠮᠦᠷ ᠮᠠᠬᠠᠪᠣᠳ) ᠢᠷᠡᠵᠦ᠂ ᠪᠠᠴᠢ ᠲᠠᠬᠢᠶᠠ ᠨᠣᠬᠠᠢ ᠶ᠋ᠢᠨ ᠲᠡᠮᠦᠷ ᠦ᠋ᠨ ᠢᠪᠡᠭᠡᠯ ᠡᠭᠦᠰᠦᠨ᠂ ᠤᠰᠤᠨ ᠮᠠᠬᠠᠪᠣᠳ ᠢ᠋ ᠲᠥᠯᠥᠵᠢᠭᠦᠯᠵᠦ᠂ 《ᠵᠢᠵᠢᠭ ᠬᠣᠷᠸᠠ》 ᠠᠷᠭᠠ ᠪᠢᠯᠢᠭ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠬᠠᠷᠢᠴᠠᠩᠭᠤᠢ ᠲᠡᠩᠴᠡᠭᠦᠷᠢ ᠡᠪᠳᠡᠭᠳᠡᠪᠡᠯ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠪᠡᠶᠡ ᠳ᠋ᠦ᠍ ᠨᠢ ᠮᠡᠳᠡᠷᠡᠭᠳᠡᠨ ᠡᠪᠡᠳᠴᠢᠯᠡᠳᠡᠭ᠃
ᠡᠢᠮᠦᠷᠬᠦᠦ᠂ 1992 ᠣᠨ ᠤ᠋ ᠬᠠᠷᠠ ᠪᠠᠴᠢ ᠵᠢᠯ ᠦ᠋ᠨ 4 ᠳ᠋ᠦ᠍ᠭᠡᠷ ᠰᠠᠷᠠ ᠳ᠋ᠤ᠌᠂ ᠡᠨᠡ ᠬᠦ᠌ ᠨᠥᠬᠥᠴᠡᠯ ᠪᠦᠷᠢᠳᠦᠭᠰᠡᠨ ᠢ᠋ᠶ᠋ᠡᠷ 《ᠭᠤᠷᠪᠠ ᠠᠷᠪᠢᠳᠠᠨ ᠨᠢᠭᠡ ᠪᠠᠭᠠᠰᠬᠤ》 ᠰᠢᠨᠵᠢ ᠢᠯᠡᠷᠡᠵᠦ᠂ ᠲᠠᠮᠢᠷ ᠠᠯᠳᠠᠭᠳᠠᠨ᠂ ᠪᠡᠶᠡ ᠮᠠᠭᠤᠵᠢᠷᠠᠵᠤ᠂ ᠲᠠᠮᠢᠷ ᠤ᠋ᠨ ᠪᠣᠯᠪᠠᠰᠤᠷᠠᠯ ᠳ᠋ᠤ᠌ ᠣᠷᠣᠯᠴᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠠ᠋ᠴᠠ ᠮᠦᠭᠳᠡᠨ ᠬᠣᠲᠠ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠪᠠᠢᠴᠠᠭᠠᠯᠭᠠᠬᠤ ᠳ᠋ᠤ᠌ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠭᠡᠵᠦ ᠲᠣᠳᠣᠯᠠᠪᠠ᠃
ᠵᠢᠱ᠌ᠢᠶᠡ 5᠄ ᠯᠢ ᠱᠤᠸᠠᠩ ᠶᠤᠸᠠᠢ᠂ ᠠᠵᠢᠯ ᠠ᠋ᠴᠠ ᠪᠠᠨ ᠠᠮᠠᠷᠠᠭᠰᠠᠨ ᠠᠵᠢᠯᠴᠢᠨ᠂ ᠪᠢᠯᠢᠭ ᠦ᠋ᠨ ᠤᠯᠠᠷᠢᠯ ᠤ᠋ᠨ 1942 ᠣᠨ ᠤ᠋ 11 ᠳ᠋ᠦ᠍ᠭᠡᠷ ᠰᠠᠷᠠ ᠶ᠋ᠢᠨ 13 ᠤ᠋ ᠨᠣᠬᠠᠢ ᠴᠠᠭ ᠲᠤ᠌ ᠲᠥᠷᠥᠪᠡ᠃
ᠡᠰᠢ ᠡᠷᠬᠡᠲᠡᠨ ᠢ᠋ᠶ᠋ᠡᠷ ᠲᠥᠷᠥᠯᠵᠢᠭᠦᠯᠪᠡᠯ᠄
ᠬᠠᠷᠠ ᠮᠣᠷᠢ
ᠬᠠᠷᠠ ᠬᠤᠯᠤᠭᠠᠨᠠ
ᠤᠯᠠᠭᠴᠢᠨ ᠬᠣᠨᠢ
ᠴᠠᠭᠠᠨ ᠨᠣᠬᠠᠢ
ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠡᠨᠡ ᠬᠦ᠌ 《ᠬᠣᠷᠸᠠ》 ᠳ᠋ᠤ᠌ ᠴᠠᠭᠠᠨ ᠨᠣᠬᠠᠢ᠂ ᠬᠣᠨᠢ ᠭᠡᠬᠦ ᠦᠰᠦᠭ ᠵᠡᠷᠭᠡᠯᠡᠳᠡᠭᠡ ᠢᠯᠡᠷᠡᠵᠦ《ᠢᠯᠡᠷᠡᠭᠡᠳᠦᠢ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ》 ᠦ᠌ ᠲᠡᠮᠳᠡᠭ ᠲᠡᠢ᠃ ᠨᠥᠬᠥᠷ ᠳᠠᠢᠰᠤᠨ ᠤ᠋ ᠲᠥᠯᠥᠵᠢᠭᠦᠯᠵᠦ ᠬᠣᠣᠷᠯᠠᠬᠤ ᠦᠢᠯᠡᠳᠦᠯ ᠢ᠋ ᠮᠥᠷᠳᠡᠪᠡᠯ ᠤᠯᠠᠭᠴᠢᠨ (ᠭᠠᠯ ᠮᠠᠬᠠᠪᠣᠳ) ᠨᠢ ᠤᠰᠤᠨ ᠤ᠋ ᠡᠬᠡ ᠲᠡᠮᠦᠷ ᠮᠠᠬᠠᠪᠣᠳ (ᠴᠠᠭᠠᠨ) ᠢ᠋ ᠬᠣᠣᠷᠯᠠᠵᠤ᠂ ᠤᠯᠠᠭᠴᠢᠨ᠂ ᠮᠣᠷᠢ (ᠭᠠᠯ ᠮᠠᠬᠠᠪᠣᠳ) ᠨᠢ ᠬᠣᠨᠢ᠂ ᠨᠣᠬᠠᠢ (ᠰᠢᠷᠣᠢ ᠮᠠᠬᠠᠪᠣᠳ) ᠢ᠋ ᠲᠥᠯᠥᠵᠢᠭᠦᠯᠦᠨ᠂ ᠬᠠᠷᠠ ᠬᠤᠯᠤᠭᠠᠨᠠ (ᠤᠰᠤᠨ ᠮᠠᠬᠠᠪᠣᠳ) ᠢ᠋ ᠬᠣᠣᠷᠯᠠᠵᠤ ᠪᠠᠢᠬᠤ ᠳᠠᠢᠰᠤᠩᠨᠠᠬᠤ ᠬᠠᠷᠢᠴᠠᠭᠠ ᠨᠢ ᠮᠠᠬᠠᠪᠣᠳ ᠢ᠋ ᠬᠢᠯᠪᠠᠷ ᠭᠡᠮᠲᠦᠭᠡᠵᠦ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠢ᠋ ᠡᠭᠦᠰᠬᠡᠳᠡᠭ᠃ ᠠᠯᠢ ᠴᠠᠭ ᠦᠶᠡ ᠳ᠋ᠦ᠍ ᠲᠡᠭᠷᠢ ᠶ᠋ᠢᠨ ᠡᠰᠢ ᠳ᠋ᠦ᠍ ᠰᠢᠷᠠᠭᠴᠢᠨ (ᠰᠢᠷᠣᠢ ᠮᠠᠬᠠᠪᠣᠳ) ᠢᠯᠡᠷᠡᠵᠦ᠂ ᠬᠠᠷᠠ (ᠤᠰᠤᠨ ᠮᠠᠬᠠᠪᠣᠳ) ᠢ᠋ ᠬᠣᠣᠷᠯᠠᠬᠤ ᠦᠶᠡ ᠳ᠋ᠦ᠍᠂ ᠭᠠᠵᠠᠷ ᠤ᠋ᠨ ᠡᠷᠬᠡᠲᠡᠨ ᠳ᠋ᠦ᠍ ᠮᠣᠭᠠᠢ ᠭᠠᠯ ᠢᠷᠡᠵᠦ᠂ ᠮᠣᠭᠠᠢ ᠮᠣᠷᠢ ᠬᠣᠨᠢ ᠶ᠋ᠢᠨ ᠭᠠᠯ ᠤ᠋ᠨ ᠢᠪᠡᠭᠡᠯ ᠡᠭᠦᠰᠦᠨ᠂ ᠡᠬᠡ ᠮᠠᠬᠠᠪᠣᠳ ᠲᠡᠮᠦᠷ (ᠴᠠᠭᠠᠨ) ᠢ᠋ ᠬᠣᠣᠷᠯᠠᠬᠤ ᠦᠶᠡ ᠳ᠋ᠦ᠍᠂ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠨᠢ ᠪᠡᠶᠡ ᠳ᠋ᠦ᠍ ᠨᠢ ᠮᠡᠳᠡᠷᠡᠭᠳᠡᠨ ᠡᠪᠡᠳᠴᠢᠯᠡᠳᠡᠭ᠃
ᠡᠢᠮᠦᠷᠬᠦᠦ᠂ 1989 ᠣᠨ ᠤ᠋ ᠰᠢᠷᠠᠭᠴᠢᠨ ᠮᠣᠭᠠᠢ ᠵᠢᠯ ᠦ᠋ᠨ 5 ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌ ᠵᠢᠷᠦᠬᠡ ᠰᠠᠪᠠᠭᠠᠨᠠᠨ᠂ ᠬᠥᠯᠥᠷᠡᠵᠦ᠂ ᠢᠳᠡᠵᠦ ᠤᠤᠭᠤᠬᠤ ᠠᠷᠪᠢᠳᠠᠵᠤ᠂ ᠪᠡᠶᠡ ᠰᠤᠯᠠᠷᠠᠨ᠂ ᠮᠠᠷᠢᠶᠠ ᠰᠢᠭᠤᠷᠠᠬᠤ ᠪᠠᠢᠳᠠᠯ ᠬᠡᠴᠡᠭᠦᠳᠡᠭᠰᠡᠨ ᠡᠴᠡ ᠲᠢᠶᠠᠨᠵᠢᠨ ᠬᠣᠲᠠ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠪᠠᠢᠴᠠᠭᠠᠯᠭᠠᠬᠤ ᠳ᠋ᠤ᠌ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠭᠡᠵᠦ ᠲᠣᠳᠣᠯᠠᠪᠠ᠃
4᠂ ᠶᠠᠷᠢᠯᠴᠠᠭᠠ
ᠣᠷᠴᠢᠨ ᠦᠶᠡ ᠶ᠋ᠢᠨ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠡᠷᠳᠡᠮᠲᠡᠳ ᠡᠴᠡ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠢ᠋ 《ᠤᠮᠳᠠᠭᠠᠰᠬᠤ ᠡᠪᠡᠳᠴᠢᠨ》 ᠦ᠌ ᠬᠡᠪᠴᠢᠶᠡᠨ ᠳ᠋ᠦ᠍ ᠪᠠᠭᠲᠠᠭᠠᠨ ᠰᠤᠳᠤᠯᠵᠤ ᠪᠣᠢ᠃《ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠣᠲᠣᠷ ᠡᠪᠡᠳᠴᠢᠨ ᠦ᠌ ᠰᠤᠳᠤᠯᠤᠯ》 ᠤ᠋ᠨ ᠤᠮᠳᠠᠭᠠᠰᠬᠤ ᠡᠪᠡᠳᠴᠢᠨ ᠦ᠌ ᠲᠤᠬᠠᠢ᠄《ᠳᠡᠭᠡᠭᠰᠢ ᠭᠦᠶᠦᠬᠦ ᠬᠡᠢ᠂ ᠰᠢᠷᠠ ᠲᠠᠢ ᠬᠢᠮᠤᠷᠠᠵᠤ᠂ ᠪᠠᠳᠬᠠᠨ ᠢ᠋ ᠬᠠᠲᠠᠭᠠᠭᠰᠠᠨ ᠠ᠋ᠴᠠ ᠪᠣᠯᠤᠨᠠ᠃ ᠨᠥᠬᠥᠴᠡᠯ ᠨᠢ᠄ ᠠᠷᠢᠬᠢ᠂ ᠳᠠᠪᠤᠰᠤᠯᠢᠭ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ᠶ᠋ᠠᠷ ᠪᠠᠳᠬᠠᠨ ᠰᠢᠷᠠ ᠶ᠋ᠢ ᠡᠭᠦᠰᠬᠡᠭᠰᠡᠨ ᠵᠡᠷᠭᠡ ᠪᠡᠷ ᠰᠢᠷᠠ ᠶ᠋ᠢᠨ ᠬᠠᠯᠠᠭᠤᠨ ᠢ᠋ ᠬᠤᠷᠠᠭᠤᠯᠤᠭᠰᠠᠨ ᠵᠡᠷᠭᠡ ᠡᠴᠡ ᠪᠣᠯᠳᠠᠭ᠃ ᠢᠯᠭᠠᠯ ᠳ᠋ᠤ᠌ ᠨᠢ ᠬᠡᠢ᠂ ᠰᠢᠷᠠ᠂ ᠪᠠᠳᠬᠠᠨ᠂ ᠪᠣᠷᠣ᠂ ᠰᠢᠮᠡ ᠪᠠᠷᠠᠭᠳᠠᠬᠤ》[3] ᠭᠡᠵᠦ ᠲᠡᠮᠳᠡᠭᠯᠡᠵᠡᠢ᠃ ᠭᠡᠪᠡᠴᠦ᠂ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠤᠯᠠᠷᠢᠨ ᠬᠤᠪᠢᠷᠠᠬᠤ ᠵᠢᠮᠡ ᠶ᠋ᠢ ᠮᠥᠷᠳᠡᠵᠦ᠂ ᠬᠠᠷᠠᠭᠠᠰᠤ ᠪᠠᠨ ᠤᠯᠠᠮ ᠥᠷᠭᠡᠳᠬᠡᠨ᠂ ᠤᠯᠠᠮᠵᠢᠯᠠᠯᠲᠤ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠲᠠᠰᠤᠷᠠᠨ ᠣᠷᠬᠢᠭᠳᠠᠵᠤ ᠵᠠᠭᠤᠨ ᠵᠢᠯ ᠪᠣᠯᠵᠤ ᠪᠠᠢᠭᠠ ᠬᠠᠷᠠ ᠵᠢᠷᠤᠬᠠᠢ ᠶ᠋ᠢᠨ ᠡᠬᠡ ᠬᠥᠪᠡᠭᠦᠨ ᠨᠥᠬᠥᠷ ᠳᠠᠢᠰᠤᠨ ᠤ᠋ ᠬᠠᠷᠢᠴᠠᠭᠠ ᠶ᠋ᠢ ᠠᠰᠢᠭᠯᠠᠨ ᠢᠯᠡᠷᠡᠭᠡᠳᠦᠢ ᠡᠪᠡᠳᠴᠢᠨ ᠦ᠌ ᠡᠭᠦᠳᠡᠨ ᠡᠴᠡ ᠰᠢᠬᠢᠷ ᠰᠢᠵᠢᠩ ᠡᠪᠡᠳᠴᠢᠨ ᠢ᠋ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ᠂ ᠴᠢᠨᠠᠭᠰᠢᠯᠠᠨ ᠬᠡᠳᠦᠨ ᠠᠷᠪᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠤᠷᠢᠳᠴᠢᠯᠠᠨ ᠪᠡᠯᠭᠡᠳᠡᠨ ᠣᠨᠣᠰᠢᠯᠠᠵᠤ ᠪᠣᠯᠤᠨᠠ᠃ ᠭᠠᠭᠴᠠ ᠬᠦ᠌ ᠡᠪᠡᠳᠴᠢᠨ ᠢ᠋ ᠢᠯᠡᠷᠡᠬᠦ ᠡᠴᠡ ᠡᠮᠦᠨᠡ ᠵᠠᠪᠳᠤᠵᠤ ᠡᠷᠡᠭᠦᠯ ᠢ᠋ ᠰᠠᠬᠢᠵᠤ ᠴᠢᠳᠠᠪᠠᠯ ᠰᠠᠶᠢ ᠡᠪᠡᠳᠴᠢᠨ ᠢ᠋ ᠰᠡᠷᠭᠡᠢᠯᠡᠬᠦ᠂ ᠤᠷᠲᠤ ᠨᠠᠰᠤᠯᠠᠬᠤ ᠵᠣᠷᠢᠯᠭᠠ ᠳ᠋ᠤ᠌ ᠪᠠᠨ ᠬᠦᠷᠴᠦ ᠴᠢᠳᠠᠳᠠᠭ᠃
ᠳᠡᠭᠡᠷᠡᠬᠢ ᠪᠣᠳᠠᠲᠤ ᠵᠢᠱ᠌ᠢᠶᠡ ᠡᠴᠡ ᠮᠡᠳᠡᠵᠦ ᠠᠪᠬᠤ ᠵᠦᠢᠯ ᠪᠣᠯ᠄
ᠨᠢᠭᠡ ᠳ᠋ᠦ᠍᠂ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠦᠯᠡᠳᠡᠭᠡᠭᠰᠡᠨ ᠠᠷᠭᠠ ᠪᠢᠯᠢᠭ ᠲᠠᠪᠤᠨ ᠮᠠᠬᠠᠪᠣᠳ ᠵᠢᠷᠤᠬᠠᠢ ᠶ᠋ᠢᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠢᠯᠡᠷᠡᠭᠡᠳᠦᠢ ᠡᠪᠡᠳᠴᠢᠨ ᠢ᠋ ᠰᠢᠨᠵᠢᠯᠡᠬᠦ ᠮᠡᠷᠭᠡᠵᠢᠯ ᠪᠣᠯ ᠣᠳᠣ ᠦᠶᠡ ᠶ᠋ᠢᠨ ᠲᠣᠨᠣᠭ ᠲᠥᠬᠥᠭᠡᠷᠦᠮᠵᠢ ᠲᠡᠢ ᠰᠢᠨᠡ ᠡᠮᠨᠡᠯᠭᠡ ᠶ᠋ᠢᠨ ᠤᠬᠠᠭᠠᠨ ᠴᠤ᠌ ᠠᠳᠠᠯᠢᠳᠬᠠᠵᠤ ᠳᠡᠢᠯᠬᠦ ᠦᠭᠡᠢ ᠳᠠᠪᠠᠭᠤᠯᠢᠭ ᠲᠠᠯᠠ ᠲᠠᠢ᠃
ᠬᠣᠶᠠᠷ ᠲᠤ᠂ ᠭᠠᠳᠠᠭᠠᠳᠤ ᠣᠷᠴᠢᠨ ᠤ᠋ 《ᠶᠡᠬᠡ ᠬᠣᠷᠸᠠ》 ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠠᠷᠪᠢᠳᠠᠬᠤ ᠪᠠᠷᠠᠭᠳᠠᠬᠤ ᠬᠤᠪᠢᠷᠠᠯᠲᠠ ᠨᠢ ᠬᠥᠮᠦᠨ ᠦ᠌ ᠪᠡᠶᠡ ᠭᠡᠬᠦ ᠡᠨᠡ ᠬᠦ᠌ 《ᠵᠢᠵᠢᠭ ᠬᠣᠷᠸᠠ》 ᠶ᠋ᠢᠨ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠠᠷᠪᠢᠳᠠᠬᠤ ᠪᠠᠷᠠᠭᠳᠠᠬᠤ ᠬᠤᠪᠢᠰᠤᠯᠲᠠ ᠤᠷᠪᠠᠯᠲᠠ ᠶ᠋ᠢ ᠥᠳᠥᠭᠡᠨ ᠰᠠᠮᠠᠭᠤᠷᠠᠭᠤᠯᠵᠤ᠂ ᠮᠠᠬᠠᠪᠣᠳ ᠤ᠋ᠨ ᠠᠷᠭᠠ ᠪᠢᠯᠢᠭ ᠦ᠋ᠨ ᠲᠡᠩᠴᠡᠭᠡᠷᠢ ᠶ᠋ᠢ ᠠᠯᠳᠠᠭᠤᠯᠵᠤ ᠡᠪᠡᠳᠴᠢᠯᠡᠭᠦᠯᠳᠡᠭ ᠶᠦ᠍ᠮ᠃
ᠵᠡᠭᠦᠯᠲᠡ
[1] 叶任高 ，内科学，人民卫生出版社，2001. 789
[2] ᠪᠣᠷᠵᠢᠭᠢᠨ ᠡᠷᠳᠡᠨᠢᠴᠤᠭᠲᠤ᠂ ᠸᠠᠩ ᠵᠢᠶᠦ᠋ᠨ ᠹᠸ᠋ᠩ᠄ 《ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠡᠷᠲᠡᠨ ᠦ᠌ ᠰᠣᠩᠭᠣᠳᠠᠭ ᠵᠣᠬᠢᠶᠠᠯ ᠤ᠋ᠨ ᠵᠢᠷᠤᠬᠠᠢ ᠶ᠋ᠢᠨ ᠤᠬᠠᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠪᠣᠯᠤᠨ ᠡᠮᠴᠢᠯᠡᠭᠡᠨ ᠳ᠋ᠡᠬᠢ ᠬᠡᠷᠡᠭᠯᠡᠯᠲᠡ》 ᠂ 《ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ》 ᠂ 2023 ᠣᠨ ᠤ᠋ 4 ᠳ᠋ᠦ᠍ᠭᠡᠷ ᠬᠤᠭᠤᠴᠠᠭᠠ᠃
[3] ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠣᠲᠣᠷ ᠡᠪᠡᠳᠴᠢᠨ ᠦ᠌ ᠰᠤᠳᠤᠯᠤᠯ ᠢ᠋ ᠨᠠᠢᠷᠠᠭᠤᠯᠬᠤ ᠳᠤᠭᠤᠢᠯᠠᠩ᠄ 《ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠣᠲᠣᠷ ᠡᠪᠡᠳᠴᠢᠨ ᠦ᠌ ᠰᠤᠳᠤᠯᠤᠯ》 ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠂ 1976 ᠣᠨ ᠂ 507 ᠨᠢᠭᠤᠷ᠃
ᠢᠷᠡᠯᠲᠡ᠄
ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ 2025 ᠣᠨ ᠤ᠋ 1 ᠳ᠋ᠦ᠍ᠭᠡᠷ ᠬᠤᠭᠤᠴᠠᠭᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠭᠠᠸᠠ
ᠦᠰᠦᠭ ᠬᠢᠨᠠᠭᠴᠢ ᠄ ᠲᠤᠭᠴᠢ ᠰᠠᠷᠠᠨᠠ