ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ – (ᠲᠠᠪᠤ) Монгол эм эмнэлэг (5)
229ᠬᠡᠯᠡᠨ ᠦ᠌ ᠰᠤᠳᠠᠯ ᠢ᠋ ᠬᠠᠨᠠᠵᠤ ᠠᠮᠠᠨ ᠰᠢᠷᠬᠠᠯᠠᠭᠠ ᠶ᠋ᠢ ᠵᠠᠰᠠᠭᠰᠠᠨ ᠨᠢ
ᠬᠥᠬᠡᠬᠣᠲᠠ ᠶ᠋ᠢᠨ ᠮᠣᠩᠭᠣᠯ ᠬᠢᠲᠠᠳ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ ( 010010 )
【ᠵᠠᠩᠭᠢᠯᠠᠭᠠ ᠶ᠋ᠢᠨ ᠦᠭᠡᠰ 】[1] ᠬᠡᠯᠡᠨ ᠦ᠌ ᠰᠤᠳᠠᠯ ᠢ᠋ ᠬᠠᠨᠠᠬᠤ ᠮᠣᠩᠭᠣᠯ ᠡᠮ ; ᠠᠮᠠᠨ ᠤ᠋ ᠰᠢᠷᠬᠠᠯᠠᠭᠠ
ᠠᠮᠠᠨ ᠬᠥᠨᠳᠡᠢ ᠶ᠋ᠢᠨ ᠰᠢᠷᠬᠠᠯᠠᠭᠠ ᠪᠣᠯ ᠠᠮᠠᠨ ᠬᠥᠨᠳᠡᠢ ᠶ᠋ᠢᠨ ᠰᠠᠯᠢᠰᠤᠯᠢᠭ ᠪᠦᠷᠬᠦᠪᠴᠢ ᠳ᠋ᠦ᠍ ᠵᠢᠵᠢᠭ ᠪᠥᠭᠡᠳ ᠭᠦᠶᠦᠬᠡᠨ ᠰᠢᠷᠬᠠᠯᠠᠭᠠ ᠡᠭᠦᠰᠴᠦ ᠡᠪᠡᠷᠰᠢᠶᠡᠨ ᠡᠪᠡᠳᠬᠦ ᠰᠢᠨᠵᠢ ᠪᠦᠬᠦᠢ ᠡᠪᠡᠳᠴᠢᠨ ᠪᠣᠯᠤᠨᠠ᠃ ᠤᠷᠤᠭᠤᠯ᠂ ᠬᠣᠭᠣᠯᠠᠢ᠂ ᠬᠡᠯᠡ᠂ ᠪᠤᠢᠯᠠ᠂ ᠲᠠᠩᠨᠠᠢ ᠵᠡᠷᠭᠡ ᠡᠳ᠋ ᠡᠷᠬᠡᠲᠡᠨ ᠦ᠌ ᠰᠠᠯᠢᠰᠤᠯᠢᠭ ᠪᠦᠷᠬᠦᠪᠴᠢ ᠶ᠋ᠢᠨ ᠠᠯᠢᠨ ᠳ᠋ᠤ᠌ ᠴᠤ᠌ ᠡᠭᠦᠰᠴᠦ ᠮᠡᠳᠡᠨᠡ᠃ ᠲᠤᠰ ᠡᠪᠡᠳᠴᠢᠨ ᠨᠢ ᠡᠮᠴᠢᠯᠡᠭᠡ ᠳᠡᠭᠡᠷᠡ ᠦᠷᠭᠦᠯᠵᠢ ᠲᠣᠬᠢᠶᠠᠯᠳᠤᠬᠤ ᠪᠥᠭᠡᠳ 20 ᠨᠠᠰᠤᠨ ᠠ᠋ᠴᠠ 35 ᠨᠠᠰᠤᠨ ᠤ᠋ ᠢᠳᠡᠷᠴᠦᠳ ᠦ᠋ᠨ ᠡᠪᠡᠳᠴᠢᠯᠡᠬᠦ ᠨᠢ ᠣᠯᠠᠨ ᠪᠠᠢᠳᠠᠭ᠃
1. ᠰᠢᠯᠲᠠᠭᠠᠨ ᠨᠥᠬᠥᠴᠡᠯ
ᠲᠤᠰ ᠡᠪᠡᠳᠴᠢᠨ ᠦ᠌ ᠰᠢᠯᠲᠠᠭᠠᠨ ᠪᠣᠯ ᠴᠢᠰᠤ᠂ ᠰᠢᠷᠠ ᠤᠰᠤ᠂ ᠨᠢᠶᠠᠨ ᠪᠣᠯᠤᠨᠠ᠃ ᠬᠠᠯᠠᠭᠤᠨ ᠬᠤᠷᠴᠠ ᠴᠢᠨᠠᠷ ᠲᠠᠢ᠂ ᠢᠰᠬᠦᠯᠡᠩ ᠲᠣᠰᠣᠯᠢᠭ ᠵᠦᠢᠯ ᠦ᠋ᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ ᠬᠡᠲᠦᠷᠡᠭᠦᠯᠬᠦ᠂ ᠭᠠᠯ ᠨᠠᠷᠠᠨ ᠳ᠋ᠤ᠌ ᠬᠠᠯᠠᠭᠤᠴᠠᠬᠤ᠂ ᠬᠠᠯᠠᠭᠤᠨ ᠬᠠᠨᠵᠤᠨ ᠳᠡᠭᠡᠷᠡ ᠪᠤᠶᠤ ᠵᠤᠨ ᠤ᠋ ᠦᠳᠡ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠤᠷᠲᠤ ᠴᠠᠭ ᠢ᠋ᠶ᠋ᠠᠷ ᠤᠨᠲᠠᠬᠤ᠂ ᠰᠡᠳᠬᠢᠯ ᠰᠠᠨᠠᠭᠠ ᠪᠠᠴᠢᠮᠳᠠᠬᠤ ᠡᠰᠡᠬᠦᠯᠡ ᠬᠠᠯᠠᠭᠤᠨ ᠡᠪᠡᠳᠴᠢᠨ ᠦ᠌ ᠤᠷᠬᠠᠨ ᠭᠡᠮ ᠪᠣᠯᠤᠨ ᠬᠣᠳᠣᠭᠣᠳᠣ᠂ ᠳᠡᠯᠢᠭᠦᠦ ᠵᠡᠷᠭᠡ ᠴᠤᠯᠤ ᠰᠠᠪᠠ ᠶ᠋ᠢᠨ ᠬᠠᠯᠠᠭᠤᠨ ᠤ᠋ ᠭᠡᠮ ᠳᠡᠭᠡᠭᠰᠢ ᠪᠠᠳᠠᠷᠠᠭᠰᠠᠨ ᠵᠡᠷᠭᠡ ᠪᠡᠷ ᠴᠢᠰᠤ ᠰᠢᠷᠠ ᠶ᠋ᠢᠨ ᠬᠠᠯᠠᠭᠤᠨ ᠨᠢ ᠨᠢᠶᠠᠨ ᠰᠢᠷᠠ ᠤᠰᠤ ᠲᠠᠢ ᠬᠠᠪᠰᠤᠷᠴᠤ᠂ ᠠᠮᠠᠨ ᠬᠥᠨᠳᠡᠢ ᠶ᠋ᠢᠨ ᠰᠠᠯᠢᠰᠤᠯᠢᠭ ᠪᠦᠷᠬᠦᠪᠴᠢ ᠶ᠋ᠢ ᠨᠥᠯᠥᠭᠡᠯᠡᠭᠰᠡᠨ ᠡᠴᠡ ᠲᠤᠰ ᠡᠪᠡᠳᠴᠢᠨ ᠢ᠋ ᠡᠭᠦᠰᠬᠡᠨᠡ᠃
2. ᠡᠪᠡᠳᠴᠢᠨ ᠦ᠌ ᠵᠦᠢ
ᠲᠤᠰ ᠡᠪᠡᠳᠴᠢᠨ ᠪᠣᠯ ᠶᠠᠮᠠᠷ ᠨᠢᠭᠡᠨ ᠨᠥᠬᠥᠴᠡᠯ ᠢ᠋ᠶ᠋ᠡᠷ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠡᠬᠢ ᠮᠠᠬᠠᠪᠣᠳ ᠲᠠᠮᠢᠷ ᠤ᠋ᠨ ᠬᠠᠷᠢᠴᠠᠩᠭᠤᠢ ᠲᠡᠩᠴᠡᠭᠦᠷᠢ ᠶ᠋ᠢ ᠨᠥᠯᠥᠭᠡᠯᠡᠨ᠂ ᠴᠢᠰᠤ ᠰᠢᠷᠠ᠂ ᠰᠢᠷᠠ ᠤᠰᠤ ᠠᠷᠪᠢᠳᠠᠨ ᠲᠤᠰ ᠡᠪᠡᠳᠴᠢᠨ ᠢ᠋ ᠡᠭᠦᠰᠬᠡᠨᠡ᠃
3. ᠰᠢᠨᠵᠢ ᠢᠯᠡᠷᠡᠯ
ᠡᠪᠡᠳᠴᠢᠨ ᠦ᠌ ᠡᠬᠢᠨ ᠳ᠋ᠦ᠍ ᠪᠡᠨ ᠠᠮᠠᠨ ᠬᠥᠨᠳᠡᠢ ᠶ᠋ᠢᠨ ᠰᠠᠯᠢᠰᠤᠯᠢᠭ ᠪᠦᠷᠬᠦᠪᠴᠢ ᠶ᠋ᠢᠨ ᠳᠡᠭᠡᠷᠡ ᠵᠢᠵᠢᠭ ᠰᠢᠭ ᠨᠢ ᠨᠢᠭᠡ ᠪᠤᠭᠤᠳᠠᠢ ᠶ᠋ᠢᠨ ᠲᠡᠳᠦᠢ᠂ ᠲᠣᠮᠣ ᠰᠢᠭ᠋ ᠨᠢ ᠰᠢᠭᠡᠵᠡᠢ ᠬᠤᠷᠤᠭᠤᠨ ᠤ᠋ ᠬᠢᠮᠤᠰᠤ ᠶ᠋ᠢᠨ ᠬᠢᠷᠢ ᠰᠢᠷᠠ ᠣᠷᠣᠢᠲᠤ ᠵᠢᠵᠢᠭ ᠭᠦᠪᠳᠦᠷᠦᠦ ᠭᠠᠷᠴᠤ ᠤᠳᠠᠯ ᠦᠭᠡᠢ ᠢᠯᠪᠤᠷᠠᠨ᠂ ᠭᠣᠣᠯ ᠢ᠋ᠶ᠋ᠠᠷ ᠨᠢ ᠴᠠᠢᠪᠤᠷ ᠬᠣᠲᠣᠭᠣᠷ ᠪᠠᠢᠵᠤ᠂ ᠬᠠᠵᠠᠭᠤ ᠬᠠᠪᠢ ᠪᠠᠷ ᠨᠢ ᠤᠯᠠᠢᠵᠤ ᠬᠠᠪᠤᠳᠴᠤ᠂ ᠲᠣᠭᠣᠷᠢᠭ ᠬᠡᠯᠪᠡᠷᠢᠲᠡᠢ ᠪᠤᠶᠤ ᠵᠤᠤᠪᠠᠩ ᠬᠡᠯᠪᠡᠷᠢᠲᠡᠢ ᠰᠢᠷᠬᠠᠯᠠᠭᠠ ᠡᠭᠦᠰᠦᠨᠡ ᠃ ᠰᠢᠷᠬᠠᠯᠠᠭᠠ ᠨᠢ ᠭᠦᠨ ᠪᠥᠭᠡᠳ ᠶᠡᠬᠡ ᠪᠠᠢᠵᠤ᠂ ᠳᠡᠭᠡᠭᠦᠷ ᠨᠢ ᠴᠠᠢᠪᠤᠷ ᠬᠠᠯᠢᠰᠤ ᠪᠦᠷᠬᠦᠵᠦ᠂ ᠠᠮᠠ ᠠ᠋ᠴᠠ ᠨᠢ ᠦᠮᠡᠬᠡᠢ ᠦᠨᠦᠷ ᠭᠠᠷᠬᠤ᠂ ᠰᠢᠯᠦᠰᠦ ᠠᠰᠬᠠᠷᠠᠭᠤᠯᠬᠤ ᠪᠥᠭᠡᠳ ᠬᠣᠷᠣᠰᠴᠤ ᠡᠪᠡᠳᠦᠨ᠂ ᠳᠠᠪᠤᠰᠤ ᠬᠠᠯᠠᠭᠤᠨ ᠨᠣᠭᠣᠭᠠ ᠵᠡᠷᠭᠡ ᠰᠡᠳᠦᠯᠲᠡ ᠲᠡᠢ ᠵᠦᠢᠯ ᠬᠦᠷᠦᠯᠴᠡᠪᠡᠯ ᠡᠪᠡᠷᠰᠢᠶᠡᠯ ᠨᠢ ᠬᠡᠴᠡᠭᠦᠳᠡᠵᠦ᠂ ᠡᠪᠡᠳᠴᠢᠲᠡᠨ ᠦ᠌ ᠢᠳᠡᠵᠦ ᠤᠤᠭᠤᠬᠤ᠂ ᠦᠭᠡ ᠶᠠᠷᠢᠬᠤ ᠶ᠋ᠢ ᠬᠠᠷᠰᠢᠯᠠᠬᠤ᠂ ᠠᠮᠠ ᠬᠠᠲᠠᠵᠤ᠂ ᠬᠠᠯᠠᠭᠤᠨ ᠣᠷᠬᠢᠬᠤ ᠮᠡᠲᠦ ᠶ᠋ᠢᠨ ᠰᠢᠨᠵᠢ ᠢᠯᠡᠷᠡᠨᠡ᠃ ᠪᠠᠭᠠᠴᠤᠳ ᠬᠡᠦᠬᠡᠳ ᠪᠣᠯ ᠪᠠᠴᠢᠮᠳᠠᠨ ᠤᠬᠢᠯᠠᠬᠤ᠂ ᠬᠠᠯᠠᠭᠤᠷᠠᠬᠤ ᠪᠥᠭᠡᠳ ᠢᠳᠡᠭᠡᠨ ᠦ᠌ ᠳᠤᠷᠠᠰᠢᠯ ᠮᠠᠭᠤᠳᠠᠨᠠ᠃ ᠡᠩ ᠦ᠋ᠨ ᠪᠠᠢᠳᠠᠯ ᠳ᠋ᠤ᠌ ᠪᠦᠬᠦ ᠪᠡᠶᠡ ᠶ᠋ᠢᠨ ᠰᠢᠨᠵᠢ ᠲᠡᠮᠳᠡᠭ ᠢᠯᠡᠷᠡᠬᠦ ᠦᠭᠡᠢ᠂ 7 —10 ᠬᠣᠨᠣᠭ ᠲᠤ᠌ ᠠᠶᠠᠨᠳᠠᠭᠠᠨ ᠰᠠᠢᠵᠢᠷᠠᠵᠤ᠂ ᠰᠣᠷᠪᠢ ᠦᠯᠡᠳᠡᠬᠦ ᠦᠭᠡᠢ ᠪᠠᠢᠳᠠᠭ᠃ ᠵᠠᠷᠢᠮ ᠬᠥᠮᠦᠨ ᠦ᠌ ᠮᠠᠬᠠᠪᠣᠳ ᠲᠠᠮᠢᠷ ᠠ᠋ᠴᠠ ᠪᠣᠯᠵᠤ ᠲᠤᠰ ᠡᠪᠡᠳᠴᠢᠨ ᠨᠢ ᠠᠬᠢᠨ ᠳᠠᠬᠢᠨ ᠬᠥᠳᠡᠯᠬᠦ ᠣᠨᠴᠠᠯᠢᠭ ᠲᠠᠢ ᠪᠥᠭᠡᠳ ᠣᠵᠢᠭᠰᠢᠷᠠᠬᠤ ᠴᠢᠨᠠᠷ ᠲᠠᠢ ᠪᠣᠯᠬᠣᠷ ᠵᠣᠬᠢᠰᠲᠠᠢ ᠡᠮᠴᠢᠯᠡᠭᠡ ᠬᠢᠬᠦ ᠴᠢᠬᠤᠯᠠᠲᠠᠢ᠃
4. ᠡᠮᠴᠢᠯᠡᠭᠡ
4᠂1 ᠡᠩ ᠦ᠋ᠨ ᠡᠮᠴᠢᠯᠡᠭᠡ
(1) ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠲᠠᠯᠠ ᠪᠠᠷ ᠰᠡᠷᠢᠭᠦᠨ ᠵᠥᠭᠡᠯᠡᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠬᠢᠭᠡᠳ ᠰᠢᠨᠡ ᠰᠣᠷᠭᠣᠭ ᠵᠢᠮᠢᠰ ᠨᠣᠭᠣᠭᠠ ᠶ᠋ᠢ ᠰᠢᠲᠦᠭᠦᠯᠵᠦ᠂ ᠬᠠᠯᠭᠤᠨ ᠬᠤᠷᠴᠠ ᠢᠰᠬᠦᠯᠡᠩ ᠲᠣᠰᠣᠯᠢᠭ ᠵᠦᠢᠯ ᠪᠤᠶᠤ ᠬᠠᠭᠤᠴᠢᠷᠠᠵᠤ ᠢᠯᠵᠢᠷᠡᠵᠦ ᠨᠢᠭᠰᠢᠵᠦ ᠡᠪᠳᠡᠷᠡᠭᠰᠡᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ ᠴᠡᠭᠡᠷᠯᠡᠨᠡ᠃
(2) ᠶᠠᠪᠤᠳᠠᠯ ᠮᠥᠷ ᠦ᠋ᠨ ᠲᠠᠯᠠ ᠪᠠᠷ ᠰᠢᠨᠡ ᠰᠣᠷᠭᠣᠭ ᠴᠡᠪᠡᠷ ᠲᠤᠩᠭᠠᠯᠠᠭ ᠣᠷᠴᠢᠨ ᠳ᠋ᠤ᠌ ᠰᠤᠪᠢᠯᠠᠵᠤ᠂ ᠠᠮᠠᠨ ᠬᠥᠨᠳᠡᠢ ᠶ᠋ᠢᠨ ᠠᠷᠢᠭᠤᠨ ᠴᠡᠪᠡᠷ ᠢ᠋ ᠬᠠᠮᠠᠭᠠᠯᠠᠵᠤ᠂ ᠭᠠᠯ ᠨᠠᠷᠠᠨ ᠳ᠋ᠤ᠌ ᠬᠠᠯᠠᠭᠤᠴᠠᠬᠤ᠂ ᠬᠠᠲᠠᠭᠤ ᠬᠦᠴᠦᠯᠡᠬᠦ᠂ ᠬᠡᠲᠦᠷᠬᠡᠢ ᠠᠭᠤᠷᠯᠠᠬᠤ ᠵᠡᠷᠭᠡ ᠴᠢᠰᠤ᠂ ᠰᠢᠷᠠ ᠤᠰᠤ ᠶ᠋ᠢ ᠠᠷᠪᠢᠵᠢᠭᠤᠯᠬᠤ ᠶᠠᠪᠤᠳᠠᠯ ᠮᠥᠷ ᠢ᠋ ᠲᠡᠪᠴᠢᠨᠡ᠃ 4᠂2 ᠡᠮ᠄ ᠴᠢᠨᠣᠠ ᠶ᠋ᠢᠨ ᠬᠡᠯᠡ — 13 ᠬᠣᠩᠭᠣᠯᠵᠠᠭᠤᠷ —15 ᠂ ᠪᠠᠭᠠᠲᠤᠷ — 7 ᠂ ᠴᠢᠰᠤᠨ ᠬᠢᠮᠤᠷᠠᠭᠠ ᠶ᠋ᠢᠨ ᠲᠠᠯᠬᠠ ᠵᠡᠷᠭᠡ ᠶ᠋ᠢ ᠭᠤᠷᠪᠠᠨ ᠦᠷᠡ ᠶ᠋ᠢᠨ ᠳᠠᠩ ᠢ᠋ᠶ᠋ᠠᠷ ᠳᠠᠷᠤᠭᠤᠯᠤᠨ ᠥᠭᠴᠦ᠂ ᠢᠯᠪᠤᠷᠠᠭᠰᠠᠨ ᠰᠢᠷᠬᠠᠯᠠᠭᠠ ᠳ᠋ᠤᠨᠢ ᠬᠠᠲᠠᠭᠠᠭᠴᠢ —7 ᠶ᠋ᠢ ᠬᠠᠭᠤᠷᠠᠢ ᠪᠠᠷ ᠲᠦᠷᠬᠢᠬᠦ ᠪᠥᠭᠡᠳ ᠬᠠᠷᠠ ᠪᠠᠢᠪᠠᠩ — 3 ᠤ᠋ ᠳᠠᠩ ᠢ᠋ᠶ᠋ᠠᠷ ᠠᠮᠠ ᠶ᠋ᠢ ᠨᠢ ᠳᠠᠬᠢᠨ ᠳᠠᠪᠲᠠᠨ ᠵᠠᠢᠯᠠᠭᠤᠯᠤᠨᠠ᠃
4᠂3 ᠵᠠᠰᠠᠯ ᠄ 7 ᠡᠳᠦᠷ ᠢ᠋ᠶ᠋ᠡᠷ ᠨᠢᠭᠡ ᠦᠶᠡᠯᠡᠯ ᠦ᠋ᠨ ᠬᠤᠭᠤᠴᠠᠭᠠ ᠪᠣᠯᠭᠠᠵᠤ᠂ ᠬᠡᠯᠡᠨ ᠦ᠌ ᠰᠤᠳᠠᠯ ᠢ᠋ ᠬᠠᠨᠠᠨᠠ᠃
5. ᠡᠪᠡᠳᠴᠢᠨ ᠦ᠌ ᠵᠢᠱ᠌ᠢᠶᠡ
ᠡᠪᠡᠳᠴᠢᠲᠡᠨ ᠪᠤᠤ **᠂ 35 ᠨᠠᠰᠤᠲᠠᠢ᠂ ᠡᠷᠡᠭᠲᠡᠢ᠂ ᠮᠠᠯᠴᠢᠨ᠂ ᠰᠢᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠬᠥᠮᠦᠨ᠃
2016 ᠣᠨ ᠤ᠋ 3 ᠰᠠᠷᠠ ᠶ᠋ᠢᠨ 15 ᠳ᠋ᠤ᠌ ᠠᠮᠠᠨ ᠬᠥᠨᠳᠡᠢ ᠶ᠋ᠢᠨ ᠰᠢᠷᠬᠠᠯᠠᠭᠠ ᠣᠯᠵᠤ᠂ ᠳᠠᠬᠢᠨ ᠳᠠᠪᠲᠠᠨ ᠬᠥᠳᠡᠯᠵᠦ ᠰᠠᠢᠵᠢᠷᠠᠯᠲᠠ ᠦᠭᠡᠢ ᠮᠥᠷᠲᠡᠭᠡᠨ ᠰᠢᠷᠬᠠᠯᠠᠭᠠ ᠨᠢ ᠬᠦᠨᠳᠦᠷᠡᠵᠦ ᠬᠣᠭᠣᠯᠠ ᠪᠤᠳᠠᠭᠠ ᠢᠳᠡᠬᠦ᠂ ᠦᠭᠡ ᠶᠠᠷᠢᠬᠤ ᠶ᠋ᠢ ᠬᠠᠷᠰᠢᠯᠠᠬᠤ ᠪᠣᠯᠪᠠ᠃ ᠲᠤᠰ ᠰᠠᠷᠠ ᠶ᠋ᠢᠨ 20 ᠤ᠋ ᠡᠳᠦᠷ᠂ ᠡᠪᠡᠳᠴᠢᠲᠡᠨ ᠰᠢᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠮᠣᠩᠭᠣᠯ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠢᠷᠡᠵᠦ ᠨᠢᠭᠡ ᠭᠠᠷᠠᠭ ᠡᠮᠴᠢᠯᠡᠭᠦᠯᠦᠭᠡᠳ ᠢᠯᠡᠷᠬᠡᠢ ᠦᠢᠯᠡᠳᠦᠯ ᠭᠠᠷᠤᠭᠰᠠᠨ ᠦᠭᠡᠢ᠃ ᠡᠪᠡᠳᠴᠢᠲᠡᠨ ᠳᠠᠬᠢᠨ ᠪᠡᠭᠡᠵᠢᠩ ᠦ᠋ᠨ 301 ᠡᠮᠨᠡᠯᠭᠡ ᠡᠴᠡ 10 ᠡᠳᠦᠷ ᠦ᠋ᠨ ᠬᠢᠲᠠᠳ ᠡᠮ ᠤᠤᠭᠤᠭᠠᠳ ᠡᠪᠡᠳᠴᠢᠨ ᠦ᠌ ᠪᠠᠢᠳᠠᠯ ᠳᠡᠮᠡᠢ ᠰᠠᠢᠵᠢᠷᠠᠭᠰᠠᠨ ᠦᠭᠡᠢ᠃ 4 ᠰᠠᠷᠠ ᠶ᠋ᠢᠨ 9 ᠦ᠌ ᠡᠳᠦᠷ ᠮᠠᠨ ᠤ᠋ ᠰᠠᠯᠠᠭᠠᠨ ᠳ᠋ᠤ᠌ ᠢᠷᠡᠵᠦ ᠡᠮᠴᠢᠯᠡᠭᠦᠯᠪᠡ᠃ ᠡᠪᠡᠳᠴᠢᠲᠡᠨ ᠬᠠᠪᠤᠷ ᠴᠠᠭ ᠤ᠋ᠨ ᠴᠢᠰᠤ ᠬᠥᠭᠡᠷᠦᠭᠰᠡᠨ ᠡᠴᠡ ᠡᠭᠦᠰᠦᠭᠰᠡᠨ ᠠᠮᠠᠨ ᠰᠢᠷᠬᠠᠯᠠᠭᠠ ᠭᠡᠵᠦ ᠣᠨᠣᠰᠢᠯᠠᠨ ᠴᠢᠰᠤ ᠰᠢᠷᠠ ᠶ᠋ᠢᠨ ᠬᠠᠯᠠᠭᠤᠨ ᠢ᠋ ᠠᠷᠢᠯᠭᠠᠵᠤ ᠰᠢᠷᠠ ᠤᠰᠤ ᠶ᠋ᠢ ᠬᠠᠲᠠᠭᠠᠨ᠂ ᠮᠢᠬᠠ ᠲᠥᠷᠥᠭᠦᠯᠵᠦ ᠵᠠᠰᠠᠬᠤ ᠪᠠᠷ ᠵᠠᠷᠴᠢᠮ ᠪᠣᠯᠭᠠᠨ ᠵᠠᠰᠠᠪᠠ᠃ ᠡᠷᠲᠡ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠ ᠴᠠᠭᠠᠨ ᠦᠷᠢᠯ᠂ ᠠᠮᠤᠷ — 6 ᠶ᠋ᠢ ᠥᠭᠴᠦ᠂ ᠦᠳᠡ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠ ᠴᠢᠰᠤᠨ ᠬᠢᠮᠤᠷᠠᠭᠠ — 8 ᠂ ᠣᠷᠣᠢ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠ ᠮᠥᠩᠭᠥᠨ ᠤᠰᠤ — 18 ᠂ ᠬᠠᠲᠠᠭᠠᠭᠴᠢ —7 ᠶ᠋ᠢ ᠢᠯᠪᠤᠷᠠᠭᠰᠠᠨ ᠰᠢᠷᠬᠠᠯᠠᠭᠠ ᠳ᠋ᠤ᠌ ᠲᠦᠷᠬᠢᠨᠡ᠃ ᠡᠭᠦᠨ ᠦ᠌ ᠬᠠᠮᠲᠤ ᠨᠢᠭᠡ ᠤᠳᠠᠭᠠ ᠶ᠋ᠢᠨ ᠬᠡᠯᠡᠨ ᠦ᠌ ᠰᠤᠳᠠᠯ ᠢ᠋ ᠬᠠᠨᠠᠬᠤ ᠵᠠᠰᠠᠯ ᠬᠢᠪᠡ᠃ ᠵᠠᠰᠠᠯ ᠬᠢᠵᠦ ᠪᠠᠷᠠᠭᠰᠠᠨ ᠲᠡᠷᠡ ᠳᠠᠷᠤᠢ ᠳ᠋ᠤᠨᠢ ᠡᠪᠡᠳᠴᠢᠲᠡᠨ ᠦ᠌ ᠡᠪᠡᠷᠰᠢᠶᠡᠯ ᠬᠠᠳᠬᠤᠯᠠᠭᠠ ᠨᠢ ᠨᠠᠮᠵᠢᠭᠰᠠᠨ ᠪᠠᠢᠨᠠ᠃ ᠡᠪᠡᠳᠴᠢᠲᠡᠨ 10 ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠳᠠᠬᠢᠨᠲᠠ ᠮᠠᠨ ᠤ᠋ ᠰᠠᠯᠠᠭᠠᠨ ᠳ᠋ᠤ᠌ ᠢᠷᠡᠵᠦ ᠪᠠᠢᠴᠠᠭᠠᠯᠭᠠᠭᠠᠳ ᠡᠪᠡᠳᠴᠢᠨ ᠨᠡᠯᠢᠶᠡᠳ ᠰᠠᠢᠵᠢᠷᠠᠪᠠ᠃ ᠲᠡᠭᠡᠭᠡᠳ ᠪᠠᠰᠠ ᠨᠢᠭᠡ ᠤᠳᠠᠭᠠ ᠶ᠋ᠢᠨ ᠵᠠᠰᠠᠯ ᠬᠢᠵᠦ 1 ᠰᠠᠷᠠ ᠶ᠋ᠢᠨ ᠡᠮ ᠠᠪᠤᠭᠠᠳ ᠠᠨᠠᠭᠠᠮᠵᠢ ᠶ᠋ᠢ ᠪᠠᠲᠤᠳᠬᠠᠪᠠ᠃ 2016 ᠣᠨ ᠤ᠋ 6 ᠰᠠᠷᠠ ᠶ᠋ᠢᠨ 18 ᠳ᠋ᠤ᠌ ᠳᠠᠬᠢᠨ ᠰᠤᠷᠪᠤᠯᠵᠢᠯᠠᠬᠤ ᠳ᠋ᠤ᠌ ᠪᠦᠷᠢᠮᠦᠰᠦᠨ ᠡᠳᠡᠭᠡᠷᠡᠭᠰᠡᠨ ᠪᠥᠭᠡᠳ ᠳᠠᠬᠢᠭᠰᠠᠨ ᠦᠭᠡᠢ᠃
6. ᠣᠢᠯᠠᠭᠠᠯᠲᠠ
ᠲᠤᠰ ᠡᠪᠡᠳᠴᠢᠨ ᠪᠣᠯ ᠬᠠᠪᠤᠷ ᠴᠠᠭ ᠲᠤ᠌ ᠦᠷᠭᠦᠯᠵᠢ ᠲᠣᠬᠢᠶᠠᠯᠳᠤᠳᠠᠭ ᠢᠳᠡᠷ ᠵᠠᠯᠠᠭᠤ ᠨᠠᠰᠤᠨ ᠤ᠋ ᠬᠥᠮᠦᠨ ᠳ᠋ᠦ᠍ ᠣᠯᠠᠨ ᠨᠡᠷᠪᠡᠭᠳᠡᠬᠦ ᠡᠪᠡᠳᠴᠢᠨ ᠪᠣᠯᠤᠨᠠ᠃ ᠭᠣᠣᠯᠳᠠᠭᠤ ᠬᠠᠪᠤᠷ ᠴᠠᠭ ᠤ᠋ᠨ ᠮᠣᠳᠣᠨ ᠮᠠᠬᠠᠪᠣᠳ ᠳᠡᠯᠭᠡᠷᠡᠵᠦ ᠴᠢᠰᠤ ᠬᠥᠭᠡᠷᠬᠦ ᠪᠤᠶᠤ ᠬᠤᠷᠴᠠ ᠬᠠᠯᠠᠭᠤᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ ᠦᠷᠭᠦᠯᠵᠢ ᠢᠳᠡᠵᠦ ᠤᠤᠭᠤᠭᠰᠠᠨ ᠠ᠋ᠴᠠ ᠴᠢᠰᠤ ᠰᠢᠷᠠ ᠶ᠋ᠢᠨ ᠬᠠᠯᠠᠭᠤᠨ ᠢ᠋ ᠡᠭᠦᠰᠬᠡᠵᠦ᠂ ᠬᠠᠯᠠᠭᠤᠨ ᠨᠢ ᠳᠡᠭᠡᠭᠰᠢ ᠪᠠᠳᠠᠷᠠᠵᠤ ᠡᠪᠡᠳᠴᠢᠯᠡᠭᠦᠯᠳᠡᠭ ᠲᠤᠯᠠ ᠬᠡᠯᠡᠨ ᠦ᠌ ᠰᠤᠳᠠᠯ ᠢ᠋ ᠬᠠᠨᠠᠵᠤ ᠬᠥᠭᠡᠷᠦᠭᠰᠡᠨ ᠮᠠᠭᠤ ᠴᠢᠰᠤ ᠶ᠋ᠢ ᠭᠠᠳᠠᠭᠰᠢ ᠤᠳᠤᠷᠢᠳᠤᠨ ᠭᠠᠷᠭᠠᠵᠤ ᠴᠢᠰᠤ ᠰᠢᠷᠠ ᠶ᠋ᠢᠨ ᠬᠠᠯᠠᠭᠤᠨ ᠢ᠋ ᠠᠷᠢᠯᠭᠠᠵᠤ ᠲᠤᠰ ᠡᠪᠡᠳᠴᠢᠨ ᠢ᠋ ᠠᠨᠠᠭᠠᠳᠠᠭ᠃ ᠬᠡᠯᠡ ᠪᠣᠯ ᠵᠢᠷᠦᠬᠡᠨ ᠦ᠌ ᠴᠡᠴᠡᠭ ᠪᠥᠭᠡᠳ ᠠᠮᠠᠨ ᠬᠥᠨᠳᠡᠢ ᠶ᠋ᠢᠨ ᠳᠣᠲᠣᠷᠠ ᠬᠠᠮᠤᠭ ᠶᠡᠬᠡ ᠡᠷᠬᠡᠲᠡᠨ ᠪᠣᠯᠤᠨᠠ᠃ ᠬᠡᠯᠡᠨ ᠦ᠌ ᠰᠤᠳᠠᠯ ᠢ᠋ ᠬᠠᠨᠠᠬᠤ ᠪᠣᠯ ᠠᠮᠠᠨ ᠬᠥᠨᠳᠡᠢ ᠶ᠋ᠢᠨ ᠴᠢᠰᠤᠨ ᠡᠷᠭᠢᠯᠲᠡ ᠶ᠋ᠢ ᠰᠠᠢᠵᠢᠷᠠᠭᠤᠯᠵᠤ᠂ ᠡᠪᠡᠳᠴᠢᠨ ᠦ᠌ ᠤᠷᠬᠠᠨ ᠢ᠋ ᠰᠢᠭᠤᠳ ᠭᠠᠳᠠᠭᠰᠢ ᠤᠳᠤᠷᠢᠳᠤᠨ ᠭᠠᠷᠭᠠᠬᠤ ᠪᠥᠭᠡᠳ ᠰᠢᠨᠡ ᠮᠢᠬᠠ ᠲᠥᠷᠥᠭᠦᠯᠬᠦ ᠶ᠋ᠢ ᠠᠬᠢᠭᠤᠯᠵᠤ ᠡᠪᠡᠳᠴᠢᠨ ᠢ᠋ ᠤᠭ ᠠ᠋ᠴᠠ ᠨᠢ ᠠᠷᠢᠯᠭᠠᠨᠠ᠃
ᠢᠷᠡᠯᠲᠡ᠄ 《 ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ 》 ᠰᠡᠳᠬᠦᠯ ᠦ᠋ᠨ2017 ᠣᠨ ᠤ᠋ 10 ᠳ᠋ᠤᠭᠠᠷ ᠬᠤᠭᠤᠴᠠᠭᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠠᠸᠠ ᠦᠰᠦᠭ
ᠬᠢᠨᠠᠭᠴᠢ᠄ ᠲᠤᠭᠴᠢ ᠰᠠᠷᠠᠨᠠ