ᠵᠠᠯᠠᠭᠤ ᠨᠠᠰᠤ07-ᠷ ∙ ᠴᠣᠢᠨᠣᠮ-ᠨᠠᠢᠷᠠᠭᠯᠠᠯЗалуу нас-Р.Чойном Zaluu nas-R.Choinom
1052ᠵᠠᠯᠠᠭᠤ ᠨᠠᠰᠤ07
ᠷ᠂ ᠴᠤᠢᠨᠥᠮ
ᠳᠣᠯᠣᠳᠤᠭᠠᠷ ᠪᠦᠯᠦᠭ
1
ᠡᠷᠡᠰᠯᠡᠵᠦ ᠨᠢᠭᠡ ᠰᠡᠳᠬᠢᠭᠡᠳ
ᠡᠷᠭᠢ ᠶ᠋ᠢᠨ ᠢᠷᠮᠡᠭ ᠲᠦ᠍ ᠣᠴᠢᠭᠰᠠᠨ
ᠡᠪᠡᠢ ᠲᠡᠭᠦᠨ ᠦ᠌ ᠪᠡᠨ ᠲᠤᠬᠠᠢ
ᠡᠷᠭᠢᠵᠦ ᠣᠳᠣ ᠬᠠᠷᠠᠬᠤ ᠤᠤ ᠳᠠ᠃
ᠬᠣᠷᠢᠨ ᠨᠢᠭᠡᠬᠡᠨ ᠵᠢᠯ ᠳ᠋ᠡᠭᠡᠨ
ᠬᠣᠷᠸᠠ ᠳᠡᠭᠡᠭᠦᠷ ᠭᠢᠰᠬᠢᠵᠦ
ᠢᠳᠡ ᠭᠢᠯᠠᠯᠵᠠᠬᠤ ᠴᠠᠭ ᠲᠠᠭᠠᠨ
ᠢᠩᠭᠢᠵᠦ ᠨᠥᠭᠴᠢᠯᠡ ᠭᠡᠵᠦ ᠤᠤ?
ᠬᠠᠮᠢᠭᠠ ᠨᠢᠭᠡᠲᠡᠢ ᠭᠠᠵᠠᠷ ᠤ᠋ᠨ
ᠬᠠᠲᠠᠭᠤ ᠬᠦᠢᠲᠡᠨ ᠬᠥᠷᠥᠰᠥᠨ ᠳ᠋ᠦ᠍
ᠬᠠᠢᠷᠠᠨ ᠰᠠᠢᠬᠠᠨ ᠴᠣᠭᠴᠠᠰ ᠨᠢ
ᠬᠠᠪ ᠬᠠᠷᠠᠩᠭᠤᠢ ᠳ᠋ᠤ᠌ ᠬᠡᠪᠲᠡᠨᠡ ᠤᠤ?
ᠶᠢᠷᠲᠢᠨᠴᠦ ᠶ᠋ᠢᠨ ᠲᠡᠷᠡᠬᠡᠨ ᠬᠡᠰᠡᠭ ᠲᠦ᠍
ᠪᠢᠲᠡᠭᠦᠬᠡᠨ ᠭᠤᠨᠢᠭ ᠣᠨᠳᠣᠷᠣᠭᠰᠠᠭᠠᠷ
ᠶᠡᠷᠦ ᠶ᠋ᠢᠨ ᠨᠢᠭᠡᠨ ᠪᠦᠰᠡᠭᠦᠢ ᠦᠷᠡ
ᠪᠢᠳᠡᠨ ᠡᠴᠡ ᠲᠡᠭᠡᠵᠦ ᠬᠠᠭᠠᠴᠠᠭᠰᠠᠨ ᠪᠣᠯ
ᠭᠤᠸᠠ ᠪᠡᠶᠡ ᠶ᠋ᠢᠨ ᠬᠢᠨᠢ ᠳᠤᠷᠠᠰᠬᠠᠯ ᠪᠣᠯᠭᠠᠵᠤ
ᠭᠤᠷᠪᠠᠨ ᠲᠣᠬᠣᠢ ᠴᠢᠯᠠᠭᠤ ᠪᠤᠰᠬᠠᠬᠤ ᠰᠠᠨ
ᠭᠠᠷ ᠢ᠋ᠶ᠋ᠠᠨ ᠬᠠᠢᠷᠠᠯᠠᠯ ᠦᠭᠡᠢ᠂ ᠡᠷᠬᠢᠮ ᠨᠡᠷᠡ ᠶ᠋ᠢ ᠨᠢ
ᠭᠠᠩ ᠴᠦᠴᠡ ᠪᠡᠷ ᠰᠡᠢᠯᠬᠦ ᠶᠤᠮᠰᠠᠨ᠃
ᠬᠥᠭᠡᠷᠦᠬᠦᠢ ᠪᠦᠰᠡᠭᠦᠢ ᠂ ᠭᠡᠪᠡᠴᠦ
ᠬᠥᠰᠢᠶᠡ ᠳᠤᠷᠠᠰᠬᠠᠯ ᠪᠤᠰᠬᠠᠭᠤᠯᠬᠤ
ᠪᠡᠶᠡᠲᠡᠢ ᠴᠣᠬᠣᠮ ᠶᠠᠭᠤ ᠬᠢᠪᠡ?
ᠪᠢᠳᠡᠨ ᠳ᠋ᠦ᠍ ᠦᠯᠡᠳᠡᠭᠡᠭᠰᠡᠨ ᠶᠠᠭᠤ ᠪᠠᠢᠨᠠ?
ᠠᠮᠢᠳᠤᠷᠠᠨ ᠰᠠᠭᠤᠭᠰᠠᠨ ᠭᠠᠵᠠᠷ ᠲᠠᠭᠠᠨ
ᠠᠵᠤ ᠲᠥᠷᠥᠭᠰᠡᠨ ᠨᠡᠢᠭᠡᠮ ᠳ᠋ᠡᠭᠡᠨ
ᠪᠦᠲᠦᠭᠡᠭᠰᠡᠨ ᠪᠦᠲᠦᠭᠡᠯ ᠦᠯᠡᠳᠡᠭᠡᠬᠦ ᠨᠢ
ᠪᠦᠭᠦᠳᠡ ᠬᠥᠮᠦᠨ ᠦ᠌ ᠡᠭᠦᠷᠭᠡ ᠪᠠᠢᠨᠠ᠃
ᠡᠷᠬᠢᠮ ᠤᠩᠰᠢᠭᠴᠢ ᠲᠠ ᠴᠦ᠍
ᠡᠭᠡᠯ ᠰᠢᠯᠦᠭᠴᠢ ᠪᠢ ᠴᠦ᠍
ᠡᠷᠲᠡ ᠣᠷᠣᠢ ᠬᠡᠵᠢᠶᠡ ᠴᠦ᠍
ᠡᠨᠡ ᠳᠡᠯᠡᠬᠡᠢ ᠶ᠋ᠢ ᠣᠷᠬᠢᠬᠤ ᠪᠠᠢᠨᠠ᠃
ᠦᠬᠦᠨᠡ ᠭᠡᠳᠡᠭ ᠶᠢᠷᠲᠢᠨᠴᠦ ᠶ᠋ᠢᠨ
ᠦᠨᠡᠨ ᠡᠴᠡ ᠦᠨᠡᠨ ᠬᠠᠤᠯᠢ ᠶᠤᠮ᠂
ᠦᠯᠡᠳᠡᠭᠡᠨᠡ ᠭᠡᠳᠡᠭ᠂ ᠬᠥᠮᠦᠨ ᠦ᠌
ᠦᠬᠦᠯ ᠡᠴᠡ ᠬᠦᠴᠦᠲᠡᠢ ᠵᠦᠢᠯ ᠶᠤᠮ!
ᠡᠪᠦᠭᠡ ᠳᠡᠭᠡᠳᠦᠰ ᠪᠢᠳᠡᠨ ᠳ᠋ᠦ᠍
ᠡᠴᠢᠨᠡᠭᠡᠨ ᠵᠦᠢᠯ ᠢ᠋ ᠦᠯᠡᠳᠡᠭᠡᠵᠦ
ᠥᠨᠥ ᠦᠶᠡ ᠶ᠋ᠢᠨ ᠬᠥᠭᠵᠢᠯ ᠦ᠋ᠨ
ᠥᠷᠭᠡᠨ ᠳᠣᠪᠵᠢᠶᠠ ᠶ᠋ᠢ ᠪᠣᠰᠬᠠᠵᠤ
ᠡᠨᠡ ᠦᠶᠡ ᠶ᠋ᠢᠨ ᠬᠡᠦᠬᠡᠳ ᠢ᠋ᠶ᠋ᠡᠨ
ᠡᠷᠬᠡ ᠴᠢᠯᠥᠭᠡᠲᠡᠢ ᠶᠠᠪᠤᠭ ᠭᠡᠵᠦ
ᠤᠳᠠᠭᠠᠨ ᠲᠡᠮᠡᠴᠡᠯ ᠦ᠋ᠨ ᠲᠡᠦᠬᠡ ᠪᠡᠨ
ᠤᠯᠠᠭᠠᠨ ᠴᠢᠰᠤ ᠪᠠᠷ ᠢ᠋ᠶ᠋ᠠᠨ ᠪᠢᠴᠢᠭᠰᠡᠨ!
ᠬᠣᠵᠢᠮ ᠬᠡᠦᠬᠡᠳ ᠲᠡᠭᠡᠨ ᠪᠢᠳᠡ ᠴᠦ᠍
ᠬᠣᠣᠰ ᠦᠭᠡᠢ ᠶᠡᠬᠡ ᠥᠷᠢᠲᠡᠢ ᠪᠠᠢᠨᠠ
ᠬᠣᠲᠠᠯᠠ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠢᠭᠡᠳᠦᠭᠡᠳ
ᠠᠰᠢᠭᠦᠢ ᠶᠡᠬᠡ ᠪᠠᠶᠠᠷᠲᠠᠢ ᠪᠠᠢᠨᠠ᠃
ᠡᠢᠮᠦ ᠴᠠᠭ ᠲᠤ᠌ ᠬᠥᠳᠡᠯᠮᠦᠷᠢᠯᠡᠭᠡ ᠦᠭᠡᠢ
ᠢᠳᠡᠷ ᠨᠠᠰᠤ ᠪᠠᠷ ᠶᠠᠭᠤ ᠪᠠᠨ ᠬᠢᠬᠦ ᠪᠣᠢ⁈
ᠢᠳᠡᠵᠦ ᠤᠨᠲᠠᠭᠰᠠᠭᠠᠷ ᠨᠠᠰᠤ ᠶ᠋ᠢ ᠪᠠᠷᠠᠬᠤ
ᠢᠯᠡᠭᠦᠳᠡᠯ ᠬᠥᠮᠦᠨ ᠢ᠋ᠶ᠋ᠡᠷ ᠶᠠᠭᠤ ᠪᠠᠨ ᠬᠢᠬᠦ ᠪᠣᠢ!᠁
ᠪᠢ ᠨᠢᠭᠡ ᠶᠠᠷᠢᠬᠤ ᠪᠠᠷ ᠢ᠋ᠶ᠋ᠠᠨ
ᠪᠢᠴᠢᠬᠦ ᠵᠦᠢᠯ ᠡᠴᠡ ᠪᠡᠨ ᠬᠠᠳᠤᠤᠷᠠᠬᠤ ᠶᠤᠮ᠃
ᠲᠦᠷᠭᠡᠬᠡᠨ ᠶᠠᠷᠢᠶᠠᠨ ᠳ᠋ᠠᠭᠠᠨ ᠣᠷᠣᠶᠠ
ᠲᠦᠷᠦᠭᠦᠦ ᠶᠠᠭᠤ ᠭᠡᠳ ᠣᠷᠬᠢᠯᠠ ᠳᠠ?
ᠠᠯᠠᠭ ᠨᠢᠳᠦᠨ ᠦ᠌ ᠵᠣᠪᠬᠢ
ᠠᠭᠠᠵᠢᠮ ᠰᠤᠯᠠᠬᠠᠨ ᠨᠡᠬᠡᠬᠡᠬᠳᠡᠪᠡ᠂
ᠠᠶᠤᠵᠤ ᠭᠠᠢᠬᠠᠭᠰᠠᠨ ᠬᠠᠷᠠᠴᠠ
ᠠᠵᠢᠨ ᠳᠥᠵᠢᠨ ᠭᠥᠯᠢᠷᠡᠪᠡ᠁
ᠲᠦᠨᠡᠷ ᠬᠠᠷᠠᠯᠠᠬᠤ ᠡᠭᠦᠯᠡᠰ
ᠲᠦᠷᠭᠡᠨ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ
ᠵᠢᠬᠡᠭᠦᠨ ᠢ᠋ᠶ᠋ᠡᠷ ᠦᠯᠢᠶᠡᠬᠦ ᠰᠠᠯᠬᠢ
ᠵᠢᠭᠲᠡᠢ ᠲᠦᠷᠭᠡᠨ ᠨᠠᠮᠳᠠᠬᠤ ᠰᠢᠭ᠋
ᠠᠨᠢᠷ ᠲᠠᠢᠪᠤᠩ ᠪᠠᠢᠳᠠᠯ ᠳ᠋ᠤ᠌
ᠠᠩᠬᠢᠯ ᠪᠦᠰᠡᠭᠦᠢ ᠰᠡᠷᠭᠦᠵᠦ᠂
ᠠᠶᠤᠮᠠᠷ ᠵᠢᠭᠠᠬᠠᠨ ᠵᠢᠷᠦᠬᠡ ᠨᠢ
ᠠᠮᠢᠳᠤᠷᠠᠯ ᠢ᠋ ᠮᠡᠳᠡᠷᠡᠨ ᠴᠣᠬᠢᠯᠠᠪᠠ᠃
ᠲᠡᠭᠡᠵᠦ ᠵᠠᠮᠪᠠᠭᠠ ᠶᠢᠷᠲᠢᠨᠴᠦ ᠶ᠋ᠢᠨ
ᠲᠡᠨᠢᠭᠦᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠡᠷᠭᠢᠵᠦ
ᠲᠡᠭᠰᠢ ᠬᠦᠦ ᠶ᠋ᠢᠨ ᠨᠢᠭᠤᠷ ᠢ᠋
ᠲᠡᠪᠡᠳᠡᠨ ᠬᠠᠷᠠᠨ ᠲᠠᠨᠢᠯᠠ᠃
ᠰᠠᠢᠨ ᠰᠠᠢᠬᠠᠨ ᠪᠦᠬᠦᠨ ᠢ᠋ᠶ᠋ᠡᠷ
ᠰᠠᠭᠠᠳᠤᠨ ᠰᠠᠭᠤᠭᠰᠠᠨ ᠥᠷᠥᠭᠡᠨ ᠳ᠋ᠡᠭᠡᠨ
ᠳᠠᠰᠤᠯ ᠪᠣᠯᠤᠭᠰᠠᠨ ᠣᠷᠣ ᠳᠡᠭᠡᠷᠡ ᠪᠡᠨ
ᠳᠠᠩᠴᠤ ᠲᠠᠢᠪᠤᠩ ᠬᠡᠪᠲᠡᠵᠦ
ᠡᠵᠢ ᠨᠢ ᠮᠠᠩᠨᠠᠢ ᠳᠡᠭᠡᠷᠡ ᠨᠢ
ᠡᠩᠬᠦᠷᠡᠢ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠵᠤ
ᠡᠷᠲᠡᠨ ᠦ᠌ ᠲᠠᠨᠢᠯ ᠲᠡᠭᠰᠢ
ᠡᠨᠳᠡ ᠪᠠᠰᠠ ᠰᠠᠭᠤᠬᠤ ᠳ᠋ᠤᠨᠢ
ᠬᠡᠷᠬᠢᠨ ᠶᠠᠭᠤ ᠰᠡᠳᠦᠭᠡᠳ
ᠬᠡᠵᠢᠶᠡ ᠭᠠᠷᠴᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ
ᠬᠡᠳᠦᠨ ᠬᠣᠷᠣᠮ ᠳ᠋ᠤ᠌ ᠪᠣᠳᠣᠭᠠᠳ
ᠬᠡᠮᠵᠢᠶᠡ ᠦᠭᠡᠢ ᠶᠡᠬᠡ ᠭᠠᠢᠬᠠᠯᠠ᠁
ᠡᠮᠡᠭᠡᠨ ᠬᠣᠩᠭᠣᠷ ᠡᠵᠢ ᠨᠢ
ᠡᠷᠡᠰᠯᠡᠵᠦ ᠲᠡᠭᠦᠨ ᠢ᠋ ᠰᠢᠷᠳᠡᠭᠡᠳ
ᠳᠣᠭᠣᠯᠠᠩ ᠨᠢᠯᠪᠤᠰᠤ ᠭᠠᠷᠭᠠᠵᠤ
ᠳᠣᠲᠣᠨᠣ ᠵᠥᠭᠡᠯᠡᠨ ᠳᠠᠭᠤ ᠪᠠᠷ
|《ᠲᠠᠢᠪᠤᠰᠢᠷᠠ᠂ ᠮᠢᠨᠦ ᠥᠬᠢᠨ
ᠲᠠᠢᠯᠪᠤᠷᠢᠯᠠᠵᠤ ᠣᠢᠯᠠᠭᠠᠵᠤ ᠠᠪ
ᠲᠠᠩᠬᠢᠯ ᠵᠠᠯᠠᠭᠤ ᠬᠥᠮᠦᠨ ᠢ᠋
ᠲᠠᠨᠢᠨ ᠮᠡᠳᠡᠵᠦ ᠶᠠᠪᠤ!
ᠡᠨᠡ ᠰᠠᠢᠬᠠᠨ ᠪᠡᠶᠡ ᠶ᠋ᠢ ᠴᠢᠨᠢ
ᠡᠵᠢ ᠨᠢ ᠵᠦᠭᠡᠷ ᠣᠯᠭᠣᠭᠠ ᠦᠭᠡᠢ ᠶᠤᠮ᠂
ᠡᠬᠡ ᠰᠠᠢᠬᠠᠨ ᠣᠷᠣᠨ ᠳ᠋ᠠᠭᠠᠨ
ᠢᠷᠭᠡᠨ ᠪᠣᠯᠭᠠᠵᠤ ᠥᠰᠬᠡᠭᠰᠡᠨ ᠶᠤᠮ!᠁
ᠠᠮᠢᠳᠤᠷᠠᠯ ᠭᠡᠳᠡᠭ ᠡᠴᠡ ᠬᠥᠮᠦᠨ
ᠠᠶᠤᠵᠤ ᠤᠬᠤᠷᠢᠵᠤ ᠪᠣᠯᠳᠠᠭ ᠦᠭᠡᠢ ᠶᠤᠮ
ᠦᠨᠡᠨᠴᠢ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠬᠥᠮᠦᠨ
ᠦᠬᠦᠵᠦ ᠬᠣᠬᠢᠷᠠᠵᠤ ᠬᠠᠷᠠᠭᠤᠯᠳᠠᠭ ᠦᠭᠡᠢ ᠶᠤᠮ᠃
ᠬᠦᠢᠲᠡᠨ ᠰᠠᠨᠠᠭᠠᠲᠠᠨ ᠤ᠋ ᠥᠭᠡᠳᠡ ᠡᠴᠡ
ᠬᠠᠯᠠᠭᠤᠨ ᠠᠵᠢᠯ ᠢ᠋ᠶ᠋ᠠᠨ ᠬᠠᠷᠠᠭᠤᠯᠬᠤ ᠶ᠋ᠢ
ᠬᠦᠨᠳᠦ ᠪᠡᠷᠬᠡ ᠶ᠋ᠢᠨ ᠤᠷᠢᠳᠤ ᠡᠴᠡ
ᠬᠠᠨᠴᠤᠢ ᠰᠢᠮᠠᠯᠠᠨ ᠣᠷᠣᠬᠤ ᠶ᠋ᠢ
ᠰᠤᠤᠲᠤ ᠬᠥᠮᠦᠰ ᠰᠤᠷᠭᠠᠳᠠᠭ ᠪᠢᠰᠢ ᠤᠤ?
ᠰᠤᠳᠤᠷ ᠨᠣᠮ ᠴᠤ᠌ ᠭᠡᠷᠡᠴᠢᠯᠡᠳᠡᠭ ᠪᠢᠰᠢ ᠤᠤ?
ᠡᠴᠢᠭᠡ ᠴᠢᠨᠢ ᠬᠠᠯᠬᠠ ᠶ᠋ᠢᠨ ᠭᠣᠣᠯ ᠳ᠋ᠤ᠌
ᠡᠨᠡ ᠶ᠋ᠢᠨ ᠲᠥᠯᠥᠭᠡ ᠨᠥᠭᠴᠢᠭᠰᠡᠨ ᠪᠢᠰᠢ ᠤᠤ?
ᠬᠢᠯᠢ ᠪᠡᠨ ᠬᠠᠮᠠᠭᠠᠯᠠᠵᠤ ᠮᠣᠷᠳᠠᠬᠤ ᠳ᠋ᠤᠨᠢ
ᠬᠡᠪᠡᠯᠢ ᠳ᠋ᠦ᠍ ᠦᠯᠡᠳᠡᠭᠰᠡᠨ ᠦᠷᠡ ᠨᠢ ᠴᠢ
ᠨᠥᠭᠴᠢᠭᠰᠡᠨ ᠴᠡᠷᠢᠭ ᠦ᠋ᠨ ᠠᠮᠢᠳᠤᠷᠠᠯ ᠢ᠋
ᠨᠥᠬᠥᠨ ᠪᠦᠲᠦᠭᠡᠬᠦ ᠶᠣᠰᠣᠲᠠᠢ!᠁》
ᠵᠠᠩᠭᠢᠷᠠᠨ ᠭᠠᠷᠤᠭᠰᠠᠨ ᠨᠢᠯᠪᠤᠰᠤ ᠨᠢ
ᠵᠠᠮᠪᠠᠭᠠ ᠶ᠋ᠢᠨ ᠳᠤᠬᠤᠨ ᠳᠡᠭᠡᠷᠡ ᠲᠤᠰᠪᠠ᠂
《ᠵᠠ ᠡᠵᠢ ᠮᠢᠨᠢ 》ᠭᠡᠳ
ᠵᠠᠮᠪᠠᠭᠠ ᠴᠤ᠌ ᠪᠠᠰᠠ ᠤᠬᠢᠯᠠᠴᠢᠬᠠᠪᠠ᠃
ᠡᠬᠡ ᠥᠬᠢᠨ ᠬᠣᠶᠠᠷ ᠢ᠋
ᠡᠪᠲᠡᠢ ᠵᠥᠭᠡᠯᠡᠨ ᠲᠠᠢᠪᠤᠰᠢᠷᠠᠭᠤᠯᠵᠤ
ᠪᠠᠶᠠᠷᠲᠠᠢ ᠭᠡᠳ ᠲᠡᠭᠰᠢ
ᠪᠠᠢᠰᠢᠩ ᠡᠴᠡ ᠠᠯᠭᠤᠷ ᠭᠠᠷᠤᠯᠠ᠁
ᠪᠦᠬᠦᠯᠢ ᠠᠮᠢᠳᠤᠷᠠᠯ ᠢ᠋ ᠨᠢ ᠠᠪᠤᠷᠠᠭᠰᠠᠨ
ᠪᠦᠷᠦᠭ ᠲᠣᠮᠣᠭᠠᠲᠠᠢ ᠵᠠᠯᠠᠭᠤ ᠳ᠋ᠤ᠌
ᠵᠠᠮᠪᠠᠭᠠ ᠲᠠᠯᠠᠷᠬᠠᠬᠤ ᠭᠡᠪᠡᠴᠦ
ᠵᠠᠩᠭᠢᠷᠠᠨ ᠤᠬᠢᠯᠠᠭᠠᠳ ᠴᠢᠳᠠᠭᠰᠠᠨ ᠦᠭᠡᠢ᠁
ᠬᠥᠭᠡᠷᠦᠬᠦᠢ ᠵᠠᠮᠪᠠᠭᠠ ᠬᠡᠦᠬᠡᠨ ᠦ᠌
ᠬᠥᠨᠳᠡᠭᠦᠷ ᠪᠣᠯᠤᠭᠰᠠᠨ ᠰᠡᠳᠬᠢᠯ ᠳ᠋ᠦ᠍
ᠵᠤᠷᠪᠤᠰ ᠪᠢᠴᠢᠭ ᠢ᠋ ᠨᠢ ᠤᠩᠰᠢᠭᠰᠠᠨ
ᠵᠤᠨ ᠤ᠋ ᠦᠳᠡᠰᠢ ᠰᠠᠨᠠᠭᠳᠠᠵᠠᠢ᠁
ᠲᠡᠷᠡ ᠦᠳᠡᠰᠢ ᠡᠴᠡ ᠬᠣᠢᠰᠢ
ᠡᠪᠦᠯ ᠵᠤᠨ ᠰᠣᠯᠢᠭᠳᠠᠪᠠᠴᠤ
ᠲᠡᠭᠰᠢ ᠬᠦᠦ ᠶ᠋ᠢᠨ ᠰᠡᠳᠬᠢᠯ
ᠥᠨᠥ ᠪᠣᠯᠲᠠᠯᠠ ᠬᠤᠪᠢᠷᠠᠭᠠ ᠦᠭᠡᠢ᠂
ᠴᠣᠩᠬᠣ ᠪᠠᠷ ᠬᠠᠶᠠ ᠬᠠᠷᠠᠭᠰᠠᠭᠠᠷ
ᠴᠣᠮᠣᠷᠯᠢᠭ ᠰᠡᠳᠬᠦᠯ ᠢ᠋ᠶ᠋ᠡᠨ ᠤᠩᠰᠢᠭᠰᠠᠭᠠᠷ
ᠵᠠᠮᠪᠠᠭᠠ ᠶ᠋ᠢᠨ ᠶᠠᠪᠤᠴᠢᠬᠠᠬᠤ ᠶ᠋ᠢ ᠬᠠᠷᠠᠭᠠᠳ
ᠵᠠᠶᠠᠭᠠ ᠵᠣᠯ ᠢ᠋ ᠨᠢ ᠠᠪᠤᠷᠠᠵᠠᠢ᠁
2
ᠮᠠᠷᠭᠠᠰᠢ ᠥᠷᠯᠥᠭᠡᠨ ᠦ᠌ ᠨᠠᠷᠠᠨ
ᠮᠠᠨᠳᠤᠵᠤ ᠭᠡᠢᠭᠦᠯᠬᠦ ᠦᠶᠡ ᠳ᠋ᠦ᠍
ᠲᠩᠷᠢ ᠴᠡᠯᠮᠡᠬᠦ ᠶᠠᠩᠵᠤ ᠲᠠᠢ
ᠲᠡᠨᠳᠡ ᠡᠨᠳᠡ ᠪᠡᠨ ᠡᠭᠦᠯᠡ ᠲᠡᠢ
ᠰᠠᠯᠬᠢ ᠴᠤ᠌ ᠠᠷᠠᠢ ᠵᠥᠭᠡᠯᠡᠨ ᠢ᠋ᠶ᠋ᠡᠷ
ᠰᠠᠨᠠᠭᠠ ᠠᠯᠳᠠᠬᠤ ᠰᠢᠭ᠋ ᠦᠯᠢᠶᠡᠵᠦ
ᠠᠯᠤᠰ ᠡᠴᠡ ᠭᠣᠣᠯ ᠤ᠋ᠨ ᠤᠰᠤ
ᠠᠢᠬᠤᠪᠲᠤᠷ ᠬᠠᠷᠠᠯᠠᠨ ᠭᠢᠯᠠᠯᠵᠠᠨᠠ᠁
ᠬᠦᠨᠳᠦ ᠨᠣᠢᠷ ᠳᠣᠣᠷᠠ ᠡᠴᠡ ᠪᠠᠨ
ᠬᠡᠦᠬᠡᠨ ᠵᠠᠮᠪᠠᠭᠠ ᠰᠡᠷᠢᠭᠡᠳ
ᠱᠦᠩᠭᠢᠨᠡᠬᠦ ᠰᠠᠯᠬᠢ ᠶ᠋ᠢ ᠴᠢᠩᠨᠠᠵᠤ
ᠰᠡᠭᠦᠷᠡᠰᠦ ᠠᠯᠲᠠᠨ ᠥᠨᠳᠡᠢᠪᠡ᠃
ᠭᠡᠭᠡᠨ ᠨᠠᠷᠠᠨ ᠤ᠋ ᠲᠤᠶᠠᠭᠠ
ᠭᠡᠭᠡᠪᠴᠢ ᠴᠣᠩᠬᠣ ᠪᠠᠷ ᠱᠠᠭᠠᠢᠨᠠ᠂
ᠭᠡᠨᠡᠨ ᠵᠠᠯᠠᠭᠤ ᠪᠦᠰᠡᠭᠦᠢ ᠳ᠋ᠦ᠍
ᠣᠷᠴᠢᠯᠠᠩ ᠤ᠋ᠨ ᠮᠡᠨᠳᠦ ᠶ᠋ᠢ ᠬᠦᠷᠭᠡᠨᠡ᠃
ᠪᠣᠰᠬᠤ ᠮᠥᠷᠲᠡᠭᠡᠨ ᠵᠠᠮᠪᠠᠭᠠ
ᠴᠣᠩᠬᠣ ᠪᠠᠷ ᠶᠠᠭᠠᠷᠠᠨ ᠱᠠᠭᠠᠢᠨᠠ᠂
ᠪᠣᠳᠣᠯᠭᠠ ᠶᠡᠬᠡᠲᠡᠢ ᠨᠢᠳᠦᠨ ᠳ᠋ᠦ᠍ᠨᠢ
ᠴᠣᠭ ᠵᠢᠪᠬᠤᠭᠠ ᠮᠡᠳᠡᠭᠳᠡᠨᠡ᠁
ᠳᠤᠷᠠ ᠪᠤᠯᠢᠶᠠᠮᠠ ᠠᠮᠢᠳᠤᠷᠠᠯ ᠤ᠋ᠨ
ᠵᠢᠷ ᠦ᠋ᠨ ᠡᠳᠦᠷ ᠡᠬᠢᠯᠡᠬᠦ ᠳ᠋ᠦ᠍
ᠳᠤᠭᠤᠢ ᠴᠠᠭᠠᠷᠢᠭ ᠥᠩᠬᠥᠷᠢᠭᠦᠯᠵᠦ
ᠵᠢᠵᠢᠭᠬᠡᠨ ᠬᠡᠦᠬᠡᠳ ᠦ᠋ᠳ ᠨᠠᠭᠠᠳᠤᠨᠠ᠃
ᠰᠣᠷᠭᠣᠭ ᠰᠠᠢᠬᠠᠨ ᠬᠥᠪᠴᠢ ᠡᠴᠡ
ᠰᠣᠨᠢᠨ ᠴᠤᠤᠷᠢᠶᠠ ᠳᠡᠭᠳᠡᠵᠦ᠂
ᠠᠯᠤᠰ ᠬᠥᠨᠳᠡᠢ ᠶ᠋ᠢᠨ ᠵᠡᠷᠭᠡᠯᠭᠡᠨ ᠳ᠋ᠦ᠍
ᠠᠳᠤᠭᠤ ᠮᠠᠯ ᠲᠣᠷᠣᠯᠵᠠᠨᠠ᠃
ᠨᠠᠷᠠ ᠬᠥᠭᠡᠷᠬᠦ ᠳ᠋ᠦ᠍᠂ ᠲᠩᠷᠢ
ᠨᠠᠮᠳᠠᠭᠤᠨ ᠰᠠᠢᠬᠠᠨ ᠪᠣᠯᠤᠯᠠ᠂
ᠰᠢᠯᠢ ᠭᠠᠵᠠᠷ ᠤ᠋ᠨ ᠠᠯᠤᠰ ᠲᠤ᠌
ᠰᠢᠩᠭᠡᠨ ᠮᠠᠨᠠᠨ ᠲᠠᠲᠠᠯᠠ᠃
ᠤᠯᠠᠭᠠᠨ ᠲᠤᠤᠵᠠ ᠲᠠᠢ ᠥᠬᠢᠨ
ᠤᠷᠲᠤ ᠬᠥᠯ ᠢ᠋ᠶ᠋ᠡᠷ ᠠᠯᠬᠤᠨᠠ᠂
ᠬᠦᠯᠢᠶᠡᠵᠦ ᠪᠠᠢ ᠯᠠ ᠳᠠ ᠭᠡᠵᠦ
ᠬᠡᠦᠬᠡᠳ ᠨᠠᠢᠵᠠ ᠨᠢ ᠬᠠᠰᠬᠢᠷᠤᠨᠠ.᠃
ᠥᠷᠭᠡᠨ ᠴᠡᠯᠡᠭᠡᠷ ᠭᠤᠳᠤᠮᠵᠢᠨ ᠤ᠋
ᠥᠨᠴᠥᠭ ᠪᠤᠯᠤᠩ ᠤ᠋ᠨ ᠣᠷᠴᠢᠮ ᠳ᠋ᠤ᠌
ᠢᠳᠡᠷᠬᠡᠨ ᠬᠣᠶᠠᠷ ᠠᠭᠤᠯᠵᠠᠭᠠᠳ
ᠢᠨᠢᠶᠡᠵᠦ ᠪᠠᠢᠭᠠ ᠬᠠᠷᠠᠭᠳᠠᠨᠠ᠁
ᠬᠣᠷᠸᠠ ᠭᠡᠳᠡᠭ ᠡᠨᠡ ᠳᠡ ᠭᠡᠵᠦ
ᠬᠣᠩᠭᠣᠷ ᠵᠠᠮᠪᠠᠭᠠ ᠰᠡᠳᠬᠢᠨᠡ᠂
ᠬᠣᠭᠣᠰᠣᠨ ᠴᠤ᠌ ᠶᠠᠭᠤᠮᠠ ᠪᠢᠰᠢ ᠳᠡ ᠭᠡᠵᠦ
ᠬᠣᠶᠠᠷ ᠭᠤᠷᠪᠠ ᠳᠠᠪᠲᠠᠨᠠ᠃
ᠣᠷᠣᠢ ᠪᠣᠯᠬᠤ ᠳ᠋ᠤ᠌ ᠵᠠᠮᠪᠠᠭᠠ
ᠣᠳᠣᠨ ᠤ᠋ ᠲᠦᠷᠦᠭᠦᠴᠢ ᠶ᠋ᠢ ᠰᠢᠷᠲᠡᠭᠰᠡᠭᠡᠷ
ᠣᠯᠠᠨ ᠵᠦᠢᠯ ᠢ᠋ ᠪᠣᠳᠣᠵᠤ
ᠣᠷᠣ ᠪᠠᠨ ᠳᠥᠰᠢᠨ ᠵᠣᠭᠰᠣᠬᠤ ᠳ᠋ᠠᠭᠠᠨ
《ᠵᠠᠮᠪᠠᠯ ᠡᠳᠦᠢ ᠳ᠋ᠦ᠍ ᠨᠡᠢᠰᠯᠡᠯ ᠳ᠋ᠦ᠍
ᠵᠢᠷᠭᠠᠵᠤ ᠰᠠᠭᠤᠭᠠ ᠪᠠᠢᠬᠠ ᠳᠠ
ᠨᠠᠮᠠᠶ᠋ᠢ ᠡᠳᠦᠢ ᠳ᠋ᠦ᠍ ᠮᠠᠷᠲᠠᠭᠠᠳ
ᠨᠠᠷᠭᠢᠵᠤ ᠪᠠᠢᠭᠠ ᠪᠢᠵᠡ ᠳᠡ 》
ᠭᠡᠵᠦ ᠪᠢᠲᠡᠭᠦᠬᠡᠨ ᠭᠤᠨᠢᠬᠠᠷᠠᠬᠤ ᠳ᠋ᠤ᠌
ᠭᠡᠨᠡᠳᠲᠡ ᠶ᠋ᠢᠨ ᠠᠶᠤᠳᠠᠰᠤ ᠲᠥᠷᠥᠨᠡ
ᠶᠠᠪᠤᠭᠤᠯᠤᠭᠰᠠᠨ ᠵᠠᠬᠢᠳᠠᠯ ᠢ᠋ᠶ᠋ᠠᠨ ᠪᠣᠳᠣᠭᠠᠳ
ᠶᠠᠩᠭᠢᠨᠠᠵᠤ ᠵᠢᠷᠦᠬᠡ ᠨᠢ ᠡᠪᠡᠳᠦᠨᠡ᠁
《ᠬᠡᠳᠦ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠮᠡᠳᠡᠭᠡ ᠦᠭᠡᠢ
ᠬᠡᠲᠦᠷᠬᠡᠢ ᠲᠡᠨᠡᠭ ᠰᠡᠳᠬᠢᠯ ᠮᠢᠨᠢ
ᠬᠡᠷᠡᠭ ᠦᠭᠡᠢ ᠭᠡᠰᠡᠨ ᠬᠥᠮᠦᠨ ᠢ
ᠬᠡᠵᠢᠶᠡ ᠪᠣᠯᠲᠠᠯᠠ ᠮᠥᠷᠥᠭᠡᠳᠬᠦ ᠨᠢ ᠪᠣᠢ⁈ 》
ᠵᠠᠷᠢᠮ ᠳ᠋ᠠᠭᠠᠨ ᠢᠩᠭᠢᠵᠦ ᠪᠣᠳᠣᠭᠠᠳ
ᠵᠠᠮᠪᠠᠭᠠ ᠥᠪᠡᠷ ᠢ᠋ ᠪᠡᠨ ᠵᠢᠮᠡᠯᠡᠨᠡ᠂
ᠢᠨᠠᠭᠯᠠᠨ ᠳᠠᠰᠤᠭᠰᠠᠨ ᠶᠠᠭᠤᠮᠠ ᠶ᠋ᠢ ᠴᠢᠨᠢ
ᠶᠠᠭᠠᠬᠢᠶᠠ ᠭᠡᠬᠦᠪ ᠭᠡᠵᠦ ᠴᠤ᠌ ᠪᠣᠳᠣᠨᠠ.᠁
3
ᠲᠡᠰᠦᠨᠡ ᠭᠡᠳᠡᠭ ᠡᠴᠡ ᠢᠯᠡᠭᠦᠦ ᠶᠠᠭᠤᠮᠠ
ᠳᠠᠶᠠᠩ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠢᠭᠠ ᠦᠭᠡᠢ ᠴᠦ᠍
ᠬᠦᠰᠡᠨᠡ ᠭᠡᠳᠡᠭ ᠡᠴᠡ ᠬᠦᠴᠦᠲᠡᠢ ᠶᠠᠭᠤᠮᠠ
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠪᠠᠢᠳᠠᠭ ᠦᠭᠡᠢ ᠭᠡᠨᠡ᠃
《᠁ ᠬᠢᠯᠢ ᠪᠡᠨ ᠬᠠᠮᠠᠭᠠᠯᠠᠵᠤ ᠮᠣᠷᠳᠠᠬᠤ ᠳ᠋ᠤᠨᠢ
ᠬᠡᠪᠡᠯᠢ ᠳ᠋ᠦ᠍ ᠦᠯᠡᠳᠡᠭᠰᠡᠨ ᠥᠬᠢᠨ ᠨᠢ
ᠨᠥᠭᠴᠢᠭᠰᠡᠨ ᠴᠡᠷᠢᠭ ᠦ᠋ᠨ ᠠᠮᠢᠳᠤᠷᠠᠯ ᠢ᠋
ᠨᠥᠬᠥᠵᠦ ᠪᠦᠲᠦᠭᠡᠬᠦ ᠶᠣᠰᠣᠲᠠᠢ! 》
ᠬᠠᠯᠠᠭᠤᠨ ᠵᠠᠯᠠᠭᠤ ᠰᠡᠳᠬᠢᠯ ᠦ᠋ᠨ
ᠬᠠᠯᠭᠢᠨ ᠴᠣᠬᠢᠯᠠᠬᠤ ᠵᠢᠷᠦᠬᠡᠨ ᠦ
ᠬᠠᠮᠢᠭᠠ ᠬᠡᠵᠢᠶᠡ ᠴᠦ᠍ ᠰᠠᠭᠠᠲᠠᠰᠢ ᠦᠭᠡᠢ
ᠬᠠᠮᠤᠭ ᠤ᠋ᠨ ᠨᠠᠨᠳᠢᠨ ᠮᠥᠷᠥᠭᠡᠳᠦᠯ
ᠠᠮᠢᠳᠤᠷᠠᠯ ᠤ᠋ᠨ ᠣᠯᠠᠨ ᠨᠤᠭᠤᠯᠤᠭᠠ ᠶ᠋ᠢ
ᠠᠮᠰᠠᠨ ᠲᠤᠭᠤᠯᠵᠤ ᠭᠠᠷᠬᠤ ᠶ᠋ᠢ
ᠠᠵᠢᠯ ᠤ᠋ᠨ ᠵᠣᠷᠢᠮᠠᠭ ᠠᠯᠬᠤᠭᠠ ᠪᠠᠷ
ᠠᠯᠳᠠᠭᠠᠳ ᠤᠨᠤᠵᠤ ᠰᠤᠷᠬᠤ ᠶ᠋ᠢ
ᠵᠠᠬᠠ ᠦᠭᠡᠢ ᠳᠠᠯᠠᠢ ᠰᠢᠭ ᠬᠦᠰᠡᠯ ᠢ᠋ᠶ᠋ᠡᠷ
ᠵᠠᠮᠪᠠᠭᠠ ᠣᠳᠣ ᠬᠦᠰᠡᠵᠦ ᠪᠠᠢᠨᠠ
ᠵᠠᠯᠠᠭᠤ ᠴᠣᠭᠲᠠᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ
ᠵᠠᠶᠠᠭᠠ ᠵᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠷᠠᠵᠤ ᠪᠠᠢᠨᠠ᠃
ᠠᠯᠠᠭ ᠴᠡᠴᠡᠭ ᠲᠡᠢ ᠲᠠᠯᠠ ᠰᠢᠭ᠋
ᠠᠯᠤᠰ ᠤ᠋ᠨ ᠴᠡᠩᠬᠡᠷ ᠠᠭᠤᠯᠠᠰ ᠰᠢᠭ᠋
ᠠᠮᠤᠭᠤᠯᠠᠩ ᠲᠡᠭᠷᠢ ᠶ᠋ᠢᠨ ᠣᠳᠣ ᠰᠢᠭ᠋
ᠢᠷᠡᠭᠡᠳᠦᠢ ᠨᠢ ᠲᠡᠭᠡᠵᠦ ᠬᠠᠷᠠᠭᠳᠠᠨᠠ᠃
ᠣᠳᠣᠨ ᠡᠴᠡ ᠲᠣᠳᠣᠬᠠᠨ ᠭᠢᠯᠠᠯᠵᠠᠬᠤ
ᠦᠦᠷ ᠦ᠋ᠨ ᠴᠠᠭᠠᠨ ᠴᠣᠯᠮᠣᠨ ᠰᠢᠭ᠋
ᠮᠣᠳᠣᠨ ᠡᠴᠡ ᠲᠣᠳᠣᠬᠠᠨ ᠬᠠᠷᠠᠭᠳᠠᠬᠤ
ᠵᠠᠭᠤᠨ ᠨᠠᠰᠤᠲᠤ ᠴᠠᠷᠠᠰᠤ ᠰᠢᠭ᠋
ᠪᠦᠰᠡᠭᠦᠢ ᠲᠡᠭᠦᠨ ᠦ᠌ ᠮᠡᠷᠭᠡᠵᠢᠯ
ᠪᠦᠲᠦᠭᠡᠵᠦ ᠦᠯᠡᠳᠡᠭᠡᠬᠦ ᠠᠵᠢᠯ
ᠳᠤᠷᠠᠯᠠᠯ ᠤ᠋ᠨ ᠢᠯᠳᠠᠮ ᠢᠷᠮᠡᠯᠲᠡ ᠰᠢᠭ
ᠳᠠᠭᠤᠳᠠᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠯᠡ᠃
ᠠᠯᠳᠠᠷᠲᠤ ᠴᠤᠤᠲᠤ ᠬᠥᠳᠡᠯᠮᠦᠷᠢ ᠶ᠋ᠢᠨ ᠬᠢᠨᠢ
ᠠᠩᠬᠠᠨ ᠤ᠋ ᠬᠡᠴᠡᠭᠦᠦ ᠠᠯᠬᠤᠮ
ᠠᠶᠠ ᠳᠠᠭᠤᠤ ᠶ᠋ᠢᠨ ᠲᠡᠮᠳᠡᠭ ᠦ᠋ᠳ
ᠠᠷᠤ ᠥᠪᠥᠷ ᠦᠭᠡᠢ ᠪᠢᠴᠢᠭᠰᠡᠨ
ᠵᠤᠵᠠᠭᠠᠨ ᠡᠴᠡ ᠵᠤᠵᠠᠭᠠᠨ ᠳᠡᠪᠲᠡᠷ
ᠵᠠᠮᠪᠠᠭᠠ ᠶ᠋ᠢᠨ ᠤᠷᠢᠳᠤ ᠲᠠᠯᠪᠢᠭᠠᠰᠤᠲᠠᠢ
ᠤᠳᠠᠭᠠᠨ ᠡᠴᠡ ᠤᠳᠠᠭᠠᠨ ᠰᠢᠷᠳᠡᠭᠡᠳ
ᠵᠠᠮᠪᠠᠭᠠ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠨᠠ᠃
《ᠶᠡᠷᠦ ᠶ᠋ᠢᠨ ᠪᠣᠯᠪᠠᠴᠤ ᠪᠢ
ᠶᠢᠷᠲᠢᠨᠴᠦ ᠶ᠋ᠢᠨ ᠨᠢᠭᠡ ᠢᠷᠭᠡᠨ!
ᠳᠠᠷᠬᠠᠨ ᠠᠮᠢᠳᠤᠷᠠᠯ ᠤ᠋ᠨ ᠬᠠᠤᠯᠢ ᠶ᠋ᠢ
ᠳᠠᠭᠠᠬᠤ ᠭᠡᠵᠦ ᠲᠥᠷᠥᠭᠰᠡᠨ ᠥᠬᠢᠨ!
ᠡᠷᠢᠨ ᠭᠠᠯᠪᠠ ᠶ᠋ᠢ ᠨᠥᠭᠴᠢᠭᠡᠭᠰᠡᠨ
ᠡᠬᠡ ᠰᠠᠢᠬᠠᠨ ᠳᠡᠯᠡᠬᠡᠢ ᠮᠢᠨᠢ
ᠡᠷᠡᠮᠡᠬᠡᠢ ᠲᠡᠮᠡᠴᠡᠯ ᠢ᠋ ᠲᠤᠭᠤᠯᠤᠭᠰᠠᠨ
ᠡᠨᠡ ᠮᠣᠩᠭᠣᠯ ᠣᠷᠣᠨ ᠮᠢᠨᠢ
ᠬᠥᠮᠦᠨ ᠦ᠌ ᠬᠠᠯᠠᠭᠤᠨ ᠬᠥᠳᠡᠯᠮᠦᠷᠢ ᠪᠡᠷ
ᠬᠦᠷᠳᠦᠨ ᠳᠤᠭᠤᠢ ᠪᠠᠨ ᠡᠷᠭᠢᠭᠦᠯᠦᠭᠰᠡᠨ
ᠬᠦᠰᠡᠯ ᠵᠣᠷᠢᠭ ᠤ᠋ᠨ ᠲᠡᠮᠡᠦᠯᠦᠯ ᠢ᠋ᠶ᠋ᠡᠷ
ᠬᠦᠨᠳᠦᠲᠦ ᠲᠡᠦᠬᠡ ᠪᠡᠨ ᠪᠢᠴᠢᠭᠦᠯᠦᠭᠰᠡᠨ
ᠥᠨᠢᠷ ᠪᠠᠶᠠᠨ ᠬᠥᠷᠥᠰᠥ ᠶ᠋ᠢ ᠨᠢ
ᠥᠯᠮᠡᠢ ᠳᠣᠣᠷᠠ ᠪᠠᠨ ᠭᠢᠰᠬᠢᠵᠦ
ᠡᠳᠦᠢ ᠬᠦᠷᠦᠭᠰᠡᠨ ᠦ᠌ ᠭᠠᠪᠢᠶᠠ
ᠥᠴᠦᠬᠡᠨ ᠨᠡᠮᠡᠷᠢ ᠪᠡᠨ ᠦᠯᠡᠳᠡᠭᠡᠬᠦ!
ᠭᠠᠭᠴᠠᠬᠠᠨ ᠡᠭᠦᠨ ᠦ᠌ ᠲᠥᠯᠥᠭᠡ
ᠭᠠᠷ ᠢ᠋ᠶ᠋ᠠᠨ ᠬᠣᠮᠬᠢᠯ ᠦᠭᠡᠢ ᠵᠢᠳᠬᠦᠶᠡ
ᠡᠷᠡᠮᠳᠡᠭ ᠭᠡᠭᠳᠡᠭᠰᠡᠨ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ
ᠡᠷᠴᠢ ᠴᠢᠳᠠᠯ ᠢ᠋ ᠨᠢ ᠬᠠᠷᠠᠭᠤᠯᠤᠶᠠ
ᠡᠨᠡ ᠰᠠᠢᠬᠠᠨ ᠪᠡᠶᠡ ᠶ᠋ᠢ
ᠡᠵᠢ ᠮᠢᠨᠢ ᠵᠦᠭᠡᠷ ᠣᠯᠭᠣᠭᠠ ᠦᠭᠡᠢ
ᠡᠬᠡ ᠰᠠᠢᠬᠠᠨ ᠣᠷᠣᠨ ᠳ᠋ᠠᠭᠠᠨ
ᠢᠷᠭᠡᠨ ᠪᠣᠯᠭᠠᠵᠤ ᠥᠭᠭᠦᠭᠰᠡᠨ ᠶᠤᠮ!》
ᠢᠩᠭᠢᠵᠦ ᠵᠠᠮᠪᠠᠭᠠ ᠰᠡᠳᠬᠢᠭᠡᠳ
ᠢᠲᠡᠭᠡᠯ ᠳᠦᠭᠦᠷᠡᠩ ᠣᠷᠣᠯᠳᠣᠯᠠ
ᠢᠳᠡᠷ ᠪᠠᠭᠠᠬᠠᠨ ᠵᠢᠷᠦᠬᠡᠨ ᠳ᠋ᠦ᠍ᠨᠢ
ᠬᠤᠪᠢ ᠶ᠋ᠢᠨ ᠬᠤᠪᠢᠰᠬᠠᠯ ᠮᠠᠨᠳᠤᠯᠠ
ᠬᠠᠪᠤᠷ ᠤ᠋ᠨ ᠰᠠᠢᠬᠠᠨ ᠳᠡᠯᠡᠬᠡᠢ ᠶ᠋ᠢ
ᠬᠠᠷᠠᠨ ᠬᠠᠷᠠᠨ ᠪᠡᠶᠡᠰᠴᠦ
ᠭᠠᠷ ᠲᠠᠭᠠᠨ ᠨᠣᠮ ᠪᠠᠷᠢᠭᠠᠳ
ᠭᠠᠳᠠᠭᠠ ᠰᠠᠭᠤᠳᠠᠭ ᠪᠣᠯᠤᠯᠠ᠁
4
ᠵᠠᠮᠪᠠᠭᠠ ᠶ᠋ᠢᠨ ᠵᠢᠷᠦᠬᠡᠨ ᠳᠣᠲᠣᠷᠠ
ᠵᠠᠮᠪᠠᠯ ᠲᠡᠭᠰᠢ ᠬᠣᠶᠠᠷ ᠤ᠋ᠨ
ᠠᠯᠢ ᠨᠢ ᠥᠨᠥᠳᠥᠷ ᠦ᠋ᠨ ᠬᠤᠪᠢ ᠳ᠋ᠤ᠌
ᠠᠷᠠᠢ ᠢᠯᠡᠭᠦᠦ ᠰᠠᠨᠠᠭᠳᠠᠨᠠ ᠪᠣᠢ⁈
ᠶᠠᠮᠠᠷ ᠴᠤ᠌ ᠭᠡᠰᠡᠨ᠂ ᠰᠡᠳᠬᠢᠯ
ᠢᠨᠠᠭᠯᠠᠵᠤ ᠨᠢᠭᠡ ᠶ᠋ᠢ ᠳᠤᠷᠠᠰᠬᠤ ᠳ᠋ᠤ᠌
ᠳᠠᠰᠤᠭᠰᠠᠨ ᠠᠮᠠᠷᠠᠭ ᠡᠴᠡ ᠢᠯᠡᠭᠦᠦ ᠶᠠᠭᠤᠮᠠ
ᠳᠠᠶᠠᠩ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠢᠳᠠᠭ ᠦᠭᠡᠢ ᠶᠤᠮ᠁
ᠭᠡᠳ ᠠᠮᠢᠳᠤᠷᠠᠯ ᠤ᠋ᠨ ᠤᠷᠲᠤ ᠳ᠋ᠤ᠌
ᠭᠡᠨᠡᠳᠲᠡ ᠶ᠋ᠢᠨ ᠶᠠᠪᠤᠳᠠᠯ ᠤᠴᠠᠷᠠᠬᠤ ᠶ᠋ᠢ
ᠠᠭᠠᠵᠢᠮ ᠪᠣᠯᠪᠠᠴᠤ ᠳᠠᠰᠬᠤ ᠶ᠋ᠢ
ᠠᠯᠢ ᠶ᠋ᠢ ᠲᠡᠷᠡ ᠭᠡᠬᠦ ᠪᠣᠢ⁈
ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠭᠡᠳᠡᠭ
ᠡᠷᠭᠢ ᠦᠭᠡᠢ ᠲᠠᠩᠭᠢᠰ ᠶᠤᠮ
ᠬᠦᠰᠡᠯ ᠮᠥᠷᠥᠭᠡᠳᠦᠯ ᠭᠡᠳᠡᠭ
ᠡᠪᠳᠡᠷᠡᠯ ᠦᠭᠡᠢ ᠣᠩᠭᠣᠴᠠ ᠶᠤᠮ
ᠲᠠᠩᠭᠢᠰ ᠳᠣᠭᠰᠢᠷᠠᠨ ᠦᠢᠮᠡᠵᠦ
ᠲᠡᠷᠡ ᠣᠩᠭᠣᠴᠠ ᠶ᠋ᠢ ᠭᠡᠮᠲᠦᠭᠡᠪᠡᠴᠦ
ᠰᠢᠨᠡᠬᠡᠨ ᠰᠢᠷᠤᠭ ᠮᠣᠳᠣ ᠶ᠋ᠢ
ᠰᠢᠢᠳᠪᠦᠷᠢ ᠵᠣᠷᠢᠭ ᠢ᠋ᠶ᠋ᠠᠷ ᠪᠤᠰᠬᠠᠳᠠᠭ ᠶᠤᠮ᠃
ᠥᠨᠥᠳᠥᠷ ᠲᠡᠭᠰᠢ ᠢᠷᠡᠬᠦ ᠪᠣᠯ ᠤᠤ ᠭᠡᠵᠦ
ᠥᠷᠯᠥᠭᠡ ᠨᠢ ᠵᠠᠮᠪᠠᠭᠠ ᠰᠡᠳᠬᠢᠨᠡ
ᠤᠷᠢᠳᠤ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠪᠣᠳᠣᠬᠤ ᠡᠴᠡ
ᠤᠶᠠᠬᠠᠨ ᠵᠢᠷᠦᠬᠡᠨ ᠳ᠋ᠡᠭᠡᠨ ᠭᠡᠮᠰᠢᠨᠡ᠃
ᠲᠡᠭᠡᠪᠡᠴᠦ ᠲᠡᠭᠦᠨ ᠦ᠌ ᠪᠣᠳᠣᠭᠰᠠᠨ ᠢ᠋ᠶ᠋ᠠᠷ
ᠲᠡᠭᠰᠢ ᠢᠷᠡᠬᠦ ᠦᠭᠡᠢ ᠯᠡ ᠪᠠᠢᠯᠠ᠂
ᠲᠡᠭᠡᠬᠦ ᠲᠣᠰᠤᠮ ᠯᠠ ᠵᠠᠮᠪᠠᠭᠠ
ᠤᠢᠳᠬᠠᠷ ᠰᠡᠮᠬᠡᠨ ᠲᠥᠷᠥᠭᠰᠡᠭᠡᠷ᠁
《ᠢᠷᠡᠬᠦ ᠦᠭᠡᠢ ᠠ᠋᠁ ᠲᠡᠷᠡ ᠢᠷᠡᠬᠦ ᠦᠭᠡᠢ
ᠡᠢᠮᠦ ᠬᠥᠮᠦᠨ ᠳ᠋ᠦ᠍ ᠬᠡᠨ ᠢᠷᠡᠬᠦ ᠪᠣᠢ》ᠭᠡᠵᠦ
ᠬᠠᠯᠠ ᠦᠵᠡᠭᠰᠡᠨ ᠵᠢᠷᠦᠬᠡ ᠨᠢ
ᠬᠠᠯᠠᠭᠤ ᠣᠷᠬᠢᠨ ᠰᠢᠮᠰᠢᠷᠡᠨᠡ᠁
ᠦᠶᠡᠯᠵᠡᠭᠦᠷ ᠭᠣᠣᠯ ᠤ᠋ᠨ ᠵᠠᠬᠠ ᠡᠴᠡ
ᠦᠳᠡᠰᠢ ᠶ᠋ᠢᠨ ᠰᠠᠢᠬᠠᠨ ᠳ᠋ᠤ᠌ ᠳᠠᠭᠤᠯᠠᠭᠰᠠᠨ
ᠦᠨᠡᠨ ᠳᠤᠷᠠᠯᠠᠯ ᠤ᠋ᠨ ᠳᠠᠭᠤᠤ ᠪᠣᠯ
ᠴᠠᠭ ᠦᠶᠡ ᠶ᠋ᠢᠨ ᠳᠠᠭᠤᠯᠠᠯ ᠪᠠᠢᠭᠰᠠᠨ᠁
ᠴᠠᠭ᠂ ᠨᠠᠰᠤ ᠬᠣᠶᠠᠷ ᠢ᠋
ᠴᠠᠭᠳᠠᠵᠤ ᠵᠣᠭᠰᠣᠭᠠᠵᠤ ᠪᠣᠯᠳᠠᠭ ᠦᠭᠡᠢ᠂
ᠴᠠᠭᠠᠰᠢ ᠪᠠᠨ ᠥᠩᠭᠡᠷᠡᠭᠰᠡᠨ ᠮᠥᠴᠡ ᠶ᠋ᠢ
ᠡᠷᠭᠢᠭᠦᠯᠵᠦ ᠠᠪᠴᠢᠷᠠᠵᠤ ᠪᠣᠯᠳᠠᠭ ᠦᠭᠡᠢ᠃
ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠬᠥᠮᠦᠨ ᠲᠡᠭᠡᠵᠦ
ᠠᠩᠵᠠᠭᠠᠷᠠᠰᠢ ᠦᠭᠡᠢ ᠪᠠᠭᠠ ᠶᠠᠭᠤᠮᠠᠨ ᠡᠴᠡ
ᠠᠢᠬᠤᠪᠲᠤᠷ ᠶᠡᠬᠡ ᠠᠯᠳᠠᠳᠠᠭ ᠪᠠᠢᠨᠠ ᠭᠡᠵᠦ
ᠠᠩᠬᠢᠯ ᠵᠠᠮᠪᠠᠭᠠ ᠰᠡᠳᠬᠢᠪᠡ᠁
ᠲᠡᠭᠡᠲᠡᠯᠡ ᠨᠢᠭᠡ ᠣᠷᠣᠢ
ᠲᠡᠭᠰᠢ ᠣᠷᠣᠭᠠᠳ ᠢᠷᠡᠯᠡ᠁
ᠲᠡᠪᠡᠳᠡᠭᠰᠡᠨ ᠳᠥᠷᠪᠡᠨ ᠨᠢᠳᠦ
ᠲᠡᠩᠬᠡᠭᠡ ᠮᠡᠳᠡᠨ ᠰᠢᠷᠲᠡᠯᠴᠡᠯᠡ᠁
ᠡᠷᠢᠶᠡᠨ ᠬᠤᠯᠳᠠᠭᠠᠰᠤ ᠪᠦᠲᠡᠭᠡᠯᠭᠡ ᠲᠡᠢ
ᠡᠩ ᠦ᠋ᠨ ᠵᠢᠵᠢᠭ ᠰᠢᠷᠡᠭᠡᠨ ᠳ᠋ᠦ᠍
ᠴᠠᠢ᠂ ᠲᠠᠯᠬᠠ ᠲᠠᠯᠪᠢᠵᠤ
ᠴᠠᠭᠠᠨᠠ ᠨᠠᠭᠠᠨᠠ ᠨᠢ ᠰᠠᠭᠤᠵᠠᠭᠠᠪᠠ᠃
ᠬᠥᠭᠵᠢᠮ ᠢ᠋ᠶ᠋ᠡᠨ ᠨᠢᠭᠡ ᠳᠤᠤᠭᠠᠷᠭᠠᠭᠠᠴᠢ ᠭᠡᠵᠦ
ᠵᠠᠮᠪᠠᠭᠠ ᠡᠴᠡ ᠲᠡᠭᠰᠢ ᠬᠦᠰᠡᠯᠡ
ᠬᠥᠭᠵᠢᠯᠲᠡᠢ ᠴᠢᠷᠠᠢ ᠭᠠᠷᠭᠠᠭᠠᠳ
| ᠵᠠ ᠭᠡᠯᠡ ᠵᠠᠮᠪᠠᠭᠠ᠂
ᠣᠢᠷᠠ ᠳᠤ ᠪᠠᠨ ᠶᠡᠷᠦ ᠳ᠋ᠡᠭᠡᠨ ᠳᠤᠤᠭᠠᠷᠭᠠᠯ ᠦᠭᠡᠢ
ᠣᠷᠣ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍ ᠬᠡᠪᠲᠡᠭᠰᠡᠨ
ᠡᠷᠢᠶᠡᠨ ᠴᠢᠮᠡᠭ ᠲᠡᠢ ᠬᠤᠭᠤᠷ ᠢ᠋ ᠨᠢ
ᠡᠵᠢ ᠨᠢ ᠠᠪᠤᠭᠠᠳ ᠥᠭᠭᠦᠯᠡ᠁
ᠬᠠᠭᠤᠴᠢᠨ ᠰᠠᠢᠬᠠᠨ ᠲᠠᠨᠢᠯ ᠰᠢᠭ᠋
ᠬᠤᠭᠤᠷ ᠶ᠋ᠢᠠᠨ ᠵᠠᠮᠪᠠᠭᠠ ᠢᠯᠪᠢᠪᠡ
ᠣᠭᠣᠰᠣᠷ ᠢ ᠨᠢ ᠮᠥᠷᠥᠨ ᠳᠡᠬᠡᠨ ᠤᠭᠯᠠᠵᠤ
ᠣᠴᠢᠲᠠᠢ ᠨᠢᠳᠦ ᠨᠢ ᠭᠢᠯᠠᠯᠵᠠᠪᠠ᠁
ᠨᠠᠷᠢᠨ ᠴᠠᠭᠠᠨ ᠬᠤᠷᠤᠭᠤ ᠨᠤᠭᠤᠳ ᠨᠢ
ᠪᠠᠶ᠋ᠢᠷᠢ ᠪᠠᠨ ᠡᠵᠡᠯᠡᠨ ᠵᠡᠭᠡᠵᠦ
ᠨᠠᠢᠷᠠᠭ ᠬᠥᠭ ᠢ ᠨᠢ ᠰᠢᠯᠭᠠᠵᠤ
ᠪᠠᠭᠠ ᠵᠡᠷᠭᠡ ᠳᠤᠤᠭᠠᠷᠭᠠᠭᠠᠳ
ᠰᠡᠭᠦᠯ ᠦᠨ ᠬᠡᠳᠦᠨ ᠬᠣᠨᠣᠭ ᠤᠨ
ᠰᠦᠷᠡᠬᠡᠢ ᠶᠠᠪᠤᠳᠠᠯ ᠤᠳ ᠮᠠᠷᠲᠠᠭᠳᠠᠵᠤ
ᠰᠦᠷᠯᠢᠭ ᠵᠠᠯᠠᠭᠤ ᠨᠠᠰᠤᠨ ᠤ ᠬᠢᠨᠢ
ᠰᠦᠯᠳᠡ ᠳᠠᠭᠤᠤ ᠨᠤᠭᠤᠳ ᠬᠠᠩᠭᠢᠨᠠᠯᠠ᠁
ᠲᠡᠭᠦᠰᠬᠡᠯ
ᠬᠠᠶ᠋ᠢᠷᠠᠲᠤ ᠴᠢᠮᠠ ᠳᠤ ᠮᠢᠨᠢ ᠬᠦᠷᠲᠡᠭᠡᠯ ᠪᠣᠯᠤᠭ
ᠬᠠᠯᠠᠭᠤᠨ ᠵᠠᠯᠠᠭᠤᠰ ᠲᠤ ᠰᠤᠷᠭᠠᠮᠵᠢ ᠪᠣᠯᠣᠭ
ᠭᠡᠵᠦ ᠡᠭᠦᠨ ᠊ᠢ ᠣᠷᠣᠯᠳᠤᠨ ᠪᠢᠴᠢᠯᠡ᠂
ᠭᠡᠨᠡᠨ ᠵᠠᠮᠪᠠᠭᠠ ᠶ᠋ᠢ ᠰᠠᠨᠠᠵᠤ ᠶᠠᠪᠤᠭᠠᠷᠠᠢ!
ᠶᠠᠭ ᠡᠶ᠋ᠢᠮᠦᠷᠬᠦ ᠤᠴᠠᠷᠠᠯ
ᠶᠠᠪ ᠴᠠᠪ ᠲᠣᠬᠢᠶᠠᠯᠳᠤᠬᠤ ᠦᠭᠡᠢ ᠴᠦ᠍
ᠢᠨᠠᠭ ᠤᠨ ᠬᠣᠷᠸᠠ ᠪᠠᠶᠠᠨ ᠲᠤᠯᠠ
ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠨᠥᠬᠥᠳ ᠮᠢᠨᠢ!
ᠡᠭᠡᠯ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠢ᠋
ᠡᠯᠢᠭᠡ ᠵᠢᠷᠦᠬᠡᠨ ᠦ᠌ ᠵᠣᠪᠠᠯᠠᠩ ᠢ᠋
ᠡᠬᠢᠨ ᠡᠴᠡ ᠨᠢ ᠠᠪᠤᠭᠠᠳ ᠬᠤᠪᠢᠶᠠᠯᠴᠠᠭᠰᠠᠨ
ᠡᠷᠬᠢᠮ ᠤᠩᠰᠢᠭᠴᠢ ᠮᠢᠨᠢ ᠪᠠᠶᠠᠷᠲᠠᠢ!
ᠵᠠᠯᠠᠭᠤ ᠨᠠᠰᠤᠨ ᠤ᠋ ᠲᠤᠬᠠᠢ
ᠬᠥᠭᠵᠢᠮ ᠦ᠋ᠨ ᠵᠣᠬᠢᠶᠠᠯ ᠢ᠋ᠶ᠋ᠠᠨ ᠳᠠᠭᠤᠰᠬᠤ ᠳ᠋ᠤᠨᠢ
ᠵᠠᠮᠪᠠᠭᠠ ᠬᠡᠨ ᠬᠣᠶᠠᠷ ᠤ᠋ᠨ ᠢ᠋ᠶ᠋ᠠᠨ
ᠬᠤᠷᠢᠮ ᠳᠡᠭᠡᠷᠡ ᠨᠢ ᠠᠭᠤᠯᠵᠠᠵᠠᠭᠠᠶᠠ!
ᠬᠠᠷᠢᠨ ᠬᠡᠨ ᠲᠡᠢ ᠭᠡᠷᠯᠡᠬᠦ ᠶ᠋ᠢ ᠨᠢ
ᠬᠠᠢᠷᠠᠲᠤ ᠤᠩᠰᠢᠭᠴᠢ ᠮᠢᠨᠢ ᠳᠠᠭᠠ ᠯᠠ ᠳᠠ
ᠳᠠᠭᠠᠭᠰᠠᠨ ᠲᠡᠷᠡ ᠴᠢᠨᠢ ᠦᠨᠡᠨ ᠪᠠᠢᠨᠠ
ᠲᠠ ᠪᠢᠳᠡᠨ ᠦ᠌ ᠪᠣᠳᠣᠯ ᠨᠢᠭᠡ ᠰᠢᠦ ᠳᠡ!
ᠬᠠᠲᠠᠭᠤ ᠰᠡᠳᠬᠢᠯᠲᠦ ᠵᠠᠮᠪᠠᠯ
ᠬᠠᠮᠢᠭᠠ ᠴᠤ᠌ ᠶᠠᠪᠤᠵᠤ ᠮᠠᠭᠠᠳ ᠦᠭᠡᠢ᠂
ᠬᠠᠷᠠᠬᠠᠨ ᠨᠢᠳᠦ ᠲᠡᠢ ᠬᠡᠦᠬᠡᠨ ᠨᠦ᠍ᠭᠦᠳ ᠮᠢᠨᠢ
ᠬᠠᠷᠠᠭᠰᠠᠨ ᠳᠣᠣᠷᠠ ᠪᠠᠨ ᠲᠠᠨᠢᠭᠠᠷᠠᠢ᠁
1960 ᠣᠨ
ᠬᠣᠶᠠᠳᠠᠬᠢ ᠬᠡᠪᠯᠡᠯ ᠳ᠋ᠦ᠍ ᠪᠡᠯᠡᠳᠬᠡᠭᠰᠡᠨ ᠨᠢ ᠢᠷᠠᠭᠤ ᠨᠠᠢᠷᠠᠭᠴᠢ ᠪᠡᠭᠽᠠ ᠶ᠋ᠢᠨ
ᠲᠦᠪᠰᠢᠨᠵᠢᠷᠭᠠᠯ᠂ ᠷᠧᠳᠠᠺᠲ᠋ᠣᠷ ᠵ ·ᠪᠠᠲᠤᠳᠤᠯᠭᠠ ᠪᠥᠭᠡᠳ ᠲᠤᠰ ᠨᠣᠮ ᠢ᠋1997 ᠣᠨ ᠳ᠋ᠤ᠌ ᠴᠤᠢᠪᠯᠰᠠᠩ
ᠬᠣᠲᠠ ᠡᠴᠡ ᠠᠪᠴᠤ᠂ 1998 ᠣᠨ ᠳ᠋ᠤ᠌ ᠤᠰᠤᠨ ᠪᠢᠷ ᠢ᠋ᠶ᠋ᠡᠷ ᠬᠠᠭᠤᠯᠤᠨ ᠪᠠᠭᠤᠯᠭᠠᠵᠠᠢ᠃ 2000 ᠣᠨ ᠳ᠋ᠤ᠌
ᠣᠶᠤᠲᠤ ᠰᠣᠹᠲ ᠢ᠋ᠶ᠋ᠠᠷ ᠺᠣᠮᠫᠢᠦ᠋ᠲ᠋ᠧᠷᠯᠠᠨ ᠥᠷᠥᠵᠦ᠂ ᠠᠩᠬᠠᠨ ᠤ᠋ ᠬᠠᠷᠭᠤᠭᠤᠯᠭᠠ ᠬᠢᠵᠦ᠂ 2009 ᠣᠨ ᠤ᠋
12 ᠰᠠᠷᠠ ᠶ᠋ᠢᠨ28 ᠤ᠋ ᠰᠥᠨᠢ ᠡᠴᠦᠰ ᠦ᠋ᠨ ᠬᠠᠷᠭᠤᠭᠤᠯᠭᠠ ᠶ᠋ᠢ ᠬᠢᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ᠄ ᠭᠡᠷᠡᠯᠲᠦ ᠂ᠮᠥᠩᠭᠥᠨ᠂ᠠᠯᠲᠠᠨᠪᠠᠭᠠᠲᠤᠷ᠂ ᠰᠡᠴᠡᠨᠴᠢᠮᠡᠭ᠂ ᠭᠤᠸᠠ᠂ ᠪᠣᠳᠢᠰᠥ᠋ᠷᠦᠩ᠂ ᠨᠠᠪᠴᠢ᠂ ᠨᠠᠰᠤᠨᠮᠥ᠋ᠩᠬᠡ᠂ᠳᠡᠯᠡᠬᠡᠢ᠂ᠲᠠᠯᠠᠢᠨᠵᠠᠶᠠᠭᠠ᠂ᠨᠠᠷᠠᠨ᠂ᠴᠦᠨᠬᠤᠸᠠ᠂ᠰᠡᠴᠡᠨ᠂ᠨᠣᠨᠠ᠂ᠳᠠᠯᠠᠨᠪᠠᠶᠠᠷ᠂ ᠤᠷᠠᠨᠪᠢᠯᠢᠭ᠌᠂
ᠰᠡᠴᠡᠨᠮᠠᠨᠳᠤᠯᠠ᠂ ᠠᠳᠢᠶᠠ᠂ ᠷᠦᠩ ᠰᠢ᠂ ᠵᠣᠭᠰᠣᠭᠠᠯ᠂ ᠠᠮᠤ᠂ᠡᠷᠳᠡᠨᠢᠴᠡᠴᠡᠭ᠂ᠲᠤᠶᠠᠭᠠ᠂ ᠵᠢᠪᠵᠡᠨ᠂ ᠪᠠᠢ ᠰᠠᠷᠠᠨᠠ᠂ ᠰᠣᠨᠢᠨᠪᠠᠶᠠᠷ᠂ᠤᠶᠤᠨᠭᠡᠷᠡᠯ᠂ ᠵᠠᠮᠤᠬᠠ᠂ ᠴᠠᠭᠠᠨᠯᠢᠩᠬᠤᠡ᠂ᠠᠯᠠᠭᠦᠢ ᠡᠩᠬᠡᠪᠠᠲᠤ᠂ ᠣᠶ᠋ᠢᠮᠠᠳ ᠊ᠤᠨ ᠠᠯᠢᠶᠠᠬᠥᠤ᠂ ᠰᠠᠷᠠᠨᠠ᠂ ᠠᠯᠲᠠalata᠂ᠠᠯᠲᠠᠨᠴᠢᠮᠡᠭ᠂ᠲᠦᠮᠡᠨ
ᠺᠣᠮᠫᠢᠦ᠋ᠲ᠋ᠧᠷ ᠦ᠋ᠨ ᠬᠢᠨᠠᠭᠴᠢ᠄ ᠬᠠᠢ ᠵᠢᠶᠦ᠋ᠨ᠂ ᠠᠵᠠᠵᠠᠶᠠᠭᠠ᠂ ᠰ᠂ ᠳᠣᠷᠣᠨᠠ