ᠵᠠᠯᠠᠭᠤ ᠨᠠᠰᠤ06-ᠷ ∙ ᠴᠣᠢᠨᠣᠮ-ᠨᠠᠢᠷᠠᠭᠯᠠᠯЗалуу нас-Р.Чойном Zaluu nas-R.Choinom
616ᠵᠠᠯᠠᠭᠤ ᠨᠠᠰᠤ06
ᠷ᠂ ᠴᠤᠢᠨᠥᠮ
ᠵᠢᠷᠭᠤᠳᠤᠭᠠᠷ ᠪᠦᠯᠦᠭ
1
ᠵᠠᠮᠪᠠᠭᠠ ᠡᠴᠡ ᠵᠠᠮᠪᠠᠯ ᠳ᠋ᠤ᠌ ᠪᠢᠴᠢᠭᠰᠡᠨ ᠵᠠᠬᠢᠳᠠᠯ
ᠲᠠᠨ ᠳ᠋ᠤ᠌ ᠬᠡᠷᠡᠭ ᠦᠭᠡᠢ ᠴᠦ᠍ ᠭᠡᠰᠡᠨ
ᠲᠠᠨ ᠢ᠋ ᠬᠦᠨᠳᠦᠯᠡᠨ ᠬᠠᠢᠷᠠᠯᠠᠬᠤ
ᠲᠠᠩᠰᠤᠭ ᠶᠡᠬᠡ ᠬᠠᠢᠷᠠ ᠮᠢᠨᠢ
ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠭᠠ ᠰᠡᠳᠬᠢᠯ ᠡᠴᠡ
ᠡᠴᠦᠰ ᠦ᠋ᠨ ᠮᠡᠨᠳᠦ ᠶ᠋ᠢ ᠬᠦᠷᠭᠡᠵᠦ
ᠵᠠᠮᠪᠠᠭᠠ ᠪᠢ ᠴᠢᠨᠢ ᠪᠢᠴᠢᠵᠦ ᠪᠠᠢᠨᠠ
ᠡᠨᠡ ᠨᠢᠭᠡᠨ ᠨᠠᠰᠤᠨ ᠤ᠋ ᠪᠠᠨ
ᠵᠠᠬᠢᠳᠠᠯ ᠭᠡᠷᠢᠶᠡᠰ ᠢ᠋ ᠦᠯᠡᠳᠡᠭᠡᠵᠦ ᠪᠠᠢᠨᠠ᠃
ᠲᠣᠭᠠ ᠬᠡᠮᠵᠢᠶᠡ ᠲᠣᠭᠲᠠᠭᠠᠰᠢ ᠦᠭᠡᠢ
ᠢᠲᠡᠭᠡᠯ ᠮᠥᠷᠥᠭᠡᠳᠦᠯ ᠪᠦᠬᠦᠨ ᠦ᠌ ᠮᠢᠨᠢ
ᠲᠣᠭᠣᠵᠤ ᠨᠢᠭᠡᠨᠲᠡ ᠦᠵᠡᠭᠡ ᠦᠭᠡᠢ
ᠬᠠᠢᠷᠠᠲᠠᠢ ᠬᠥᠮᠦᠨ ᠴᠢᠮᠠ ᠡᠴᠡ ᠪᠠᠨ
ᠲᠣᠰᠬᠣᠨ ᠠᠢᠯ ᠤ᠋ᠨ ᠵᠡᠯᠢᠭᠦᠳ ᠲᠦ᠍
ᠬᠠᠶᠠᠭᠳᠠᠵᠤ ᠪᠢ ᠥᠨᠥᠴᠢᠷᠡᠬᠦ ᠳ᠋ᠡᠭᠡᠨ
ᠲᠣᠯᠣᠭᠠᠢ ᠭᠣᠳᠣᠢᠨ ᠤᠬᠢᠯᠠᠵᠤ
ᠬᠠᠢᠷᠠ ᠡᠨᠡᠷᠢᠯ ᠭᠤᠶᠤᠬᠤ ᠦᠭᠡᠢ!
ᠭᠡᠨᠡᠨ ᠬᠣᠩᠭᠣᠷ ᠪᠣᠯᠪᠠᠴᠤ
ᠵᠠᠯᠠᠭᠤ ᠬᠠᠯᠠᠭᠤᠨ ᠨᠠᠰᠤᠨ ᠤ᠋ ᠪᠠᠨ
ᠬᠡᠨ ᠦ᠌ ᠴᠦ᠍ ᠡᠮᠦᠨᠡ ᠪᠥᠬᠥᠢᠰᠢ ᠦᠭᠡᠢ
ᠣᠮᠣᠭ ᠵᠣᠷᠢᠭ ᠤ᠋ᠨ ᠡᠷᠴᠢ ᠪᠡᠷ
ᠪᠦᠲᠦᠯ ᠦᠭᠡᠢ ᠬᠤᠪᠢ ᠵᠠᠶᠠᠭᠠ ᠪᠠᠨ ᠪᠢ
ᠳᠡᠭᠡᠳᠦ ᠬᠡᠮᠵᠢᠶᠡ ᠪᠡᠷ ᠰᠢᠳᠬᠡᠪᠡᠴᠦ
ᠪᠦᠰᠡᠭᠦᠢ ᠬᠥᠮᠦᠨ ᠬᠡᠴᠡᠭᠦᠦ ᠶᠤᠮ᠁
ᠵᠠᠮᠪᠠᠯ ᠴᠢᠮᠠ ᠳ᠋ᠠᠭᠠᠨ ᠭᠣᠮᠣᠳᠠᠵᠤ ᠪᠠᠢᠨᠠ᠃
ᠤᠴᠠᠷᠠᠨ ᠳᠠᠰᠤᠭᠰᠠᠨ ᠬᠠᠢᠷᠠ ᠶ᠋ᠢ ᠮᠢᠨᠢ
ᠴᠢ ᠢᠩᠭᠢᠵᠦ ᠨᠢᠷᠭᠡᠭᠰᠡᠨ ᠴᠦ᠍
ᠠᠭᠤᠯᠠᠨ ᠡᠴᠡ ᠴᠦ᠍ ᠥᠨᠳᠥᠷ ᠭᠣᠮᠣᠳᠠᠯ ᠢ᠋ ᠮᠢᠨᠢ
ᠬᠦᠯᠢᠴᠡᠨ ᠰᠣᠨᠣᠰᠬᠤ ᠶᠣᠰᠣᠲᠠᠢ!
ᠲᠠᠶᠠᠭ ᠲᠤᠯᠤᠭᠰᠠᠨ ᠪᠡᠶᠡ ᠶ᠋ᠢᠨ ᠮᠢᠨᠢ
ᠲᠠᠷᠲᠠᠭ ᠢ᠋ ᠴᠢ ᠪᠠᠷᠠᠭᠰᠠᠨ ᠴᠦ᠍
ᠲᠠᠩᠬᠢᠯ ᠵᠥᠭᠡᠯᠡᠨ ᠠᠭᠠᠰᠢ ᠶ᠋ᠢ ᠮᠢᠨᠢ
ᠰᠠᠨᠠᠵᠤ ᠶᠠᠪᠤᠬᠤ ᠶᠣᠰᠣᠲᠠᠢ !
ᠬᠡᠦᠬᠡᠳ ᠦ᠋ᠨ ᠠᠭᠠᠯᠢ ᠰᠢᠭ᠋ ᠬᠥᠩᠭᠡᠨ
ᠵᠥᠭᠡᠯᠡᠨ ᠲᠡᠷᠡ ᠠᠭᠠᠰᠢᠨ ᠳ᠋ᠤ᠌
ᠬᠡᠦᠬᠡᠨ ᠵᠠᠮᠪᠠᠭᠠ ᠮᠢᠨᠦ
ᠪᠠᠯᠴᠢᠷ ᠨᠢᠯᠬᠠ ᠳᠤᠷᠠᠯᠠᠯ
ᠬᠦᠰᠡᠯ ᠮᠥᠷᠥᠭᠡᠳᠦᠯ ᠦ᠋ᠨ
ᠰᠠᠢᠬᠠᠨ ᠪᠦᠬᠦᠨ ᠪᠠᠭᠲᠠᠭᠰᠠᠨ ᠢ᠋
ᠬᠥᠮᠦᠨ ᠦ᠌ ᠬᠦᠷᠡᠩ ᠪᠥᠭᠡᠷᠡ ᠲᠡᠢ
ᠵᠠᠮᠪᠠᠯ ᠴᠢ ᠮᠢᠨᠢ ᠣᠢᠯᠠᠭᠠᠭᠠ ᠦᠭᠡᠢ!
ᠠᠩᠬᠠᠨ ᠲᠠᠨ ᠢ᠋ ᠦᠵᠡᠭᠰᠡᠨ
ᠡᠭᠦᠷᠢᠳᠡ ᠶ᠋ᠢᠨ ᠳᠤᠷᠠᠰᠬᠠᠯᠲᠤ ᠣᠷᠣᠢ ᠡᠴᠡ
ᠠᠬᠢᠭᠠᠳ ᠬᠣᠢᠰᠢ ᠨᠢ ᠦᠷᠭᠦᠯᠵᠢᠯᠡᠭᠰᠡᠨ
ᠬᠠᠯᠠᠭᠤᠨ᠂ ᠬᠦᠢᠲᠡᠨ ᠤᠯᠠᠷᠢᠯ ᠤ᠋ᠳ ᠲᠤ᠌
ᠠᠮᠠᠷᠠᠭ ᠴᠢᠮᠠᠶ᠋ᠢ ᠪᠠᠨ ᠭᠡᠭᠰᠡᠭᠡᠷ
ᠠᠰᠬᠠᠷᠠᠭᠤᠯᠵᠤ ᠰᠡᠮᠬᠡᠨ ᠤᠬᠢᠯᠠᠭᠰᠠᠭᠠᠷ
ᠠᠶᠤᠯᠲᠤ ᠰᠢᠷᠬᠠᠨ ᠤ᠋ ᠬᠠᠯᠠᠭᠤᠨ ᠢ᠋ᠶ᠋ᠠᠷ
ᠨᠡᠷᠡ ᠶ᠋ᠢ ᠴᠢᠨᠢ ᠳᠠᠭᠤᠳᠠᠨ ᠬᠦᠯᠢᠶᠡᠭᠰᠡᠨ᠂
ᠬᠦᠯᠢᠶᠡᠬᠦ ᠳ᠋ᠡᠭᠡᠨ ᠪᠢ᠂
ᠵᠡᠭᠦᠳᠦ ᠵᠦᠩ᠂ ᠵᠢᠳᠬᠦᠯ ᠪᠦᠲᠦᠭᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ
ᠬᠡᠦᠬᠡᠨ ᠦ᠌ ᠵᠥᠭᠡᠯᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ᠁
ᠢᠷᠡᠭᠡᠳᠦᠢ ᠶ᠋ᠢᠨ ᠡᠬᠡ ᠶ᠋ᠢᠨ ᠢᠲᠡᠭᠡᠯ ᠢ᠋ᠶ᠋ᠡᠷ
ᠨᠠᠮᠠᠶ᠋ᠢ ᠡᠢᠮᠦ ᠪᠣᠯᠭᠠᠭᠰᠠᠨ ᠭᠡᠯ ᠦᠭᠡᠢ
ᠴᠢᠮᠠᠶ᠋ᠢ ᠪᠢ ᠠᠭᠤᠴᠢᠯᠠᠭᠰᠠᠨ ᠶᠤᠮ
ᠨᠠᠳᠠ ᠡᠴᠡ ᠥᠭᠡᠷᠡ ᠬᠥᠮᠦᠨ ᠪᠣᠯ᠁
ᠴᠢᠮᠠ ᠳ᠋ᠤ᠌ ᠥᠰᠢᠷᠡᠵᠦ ᠴᠦ᠍ ᠮᠠᠭᠠᠳ ᠦᠭᠡᠢ ᠰᠠᠨ᠁
| ᠠᠢ ᠵᠠᠮᠪᠠᠯ ᠮᠢᠨᠢ᠁
ᠪᠢ ᠬᠡᠵᠢᠶᠡ ᠴᠦ᠍ ᠭᠡᠰᠡᠨ
ᠠᠩᠬᠠᠨ ᠤ᠋ ᠢᠨᠠᠭ ᠤ᠋ᠨ ᠬᠤᠪᠢ ᠪᠠᠷ
ᠴᠢᠮᠠ ᠳ᠋ᠠᠭᠠᠨ ᠥᠰᠢᠷᠡᠵᠦ ᠴᠢᠳᠠᠬᠤ ᠦᠭᠡᠢ ᠨᠢ!
ᠠᠷᠢᠭᠤᠨ ᠦᠨᠡᠨ ᠬᠠᠢᠷᠠ ᠮᠢᠨᠢ
ᠴᠢᠨᠦ ᠬᠣᠢᠨᠠ ᠡᠴᠡ ᠲᠡᠮᠡᠦᠯᠦᠭᠰᠡᠭᠡᠷ
ᠠᠯᠠᠬᠠᠬᠠᠨ ᠵᠢᠷᠦᠬᠡᠨ ᠦ᠌ ᠮᠢᠨᠢ ᠬᠠᠮᠲᠤ
ᠴᠢᠭᠢᠭᠲᠦ ᠭᠠᠵᠠᠷ ᠪᠤᠯᠠᠭᠳᠠᠬᠤ ᠨᠢ!
ᠦᠵᠡᠭᠡᠷᠡᠢ᠂ ᠵᠠᠮᠪᠠᠯ ᠮᠢᠨᠢ
ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌
ᠦᠷᠡᠵᠢᠯ ᠰᠢᠮᠡᠲᠡᠢ ᠭᠠᠵᠠᠷ ᠡᠴᠡ
ᠴᠡᠴᠡᠭ ᠦ᠋ᠨ ᠰᠠᠢᠬᠠᠨ ᠤᠷᠭᠤᠬᠤ ᠶ᠋ᠢ
ᠬᠠᠷᠠᠭᠠᠷᠠᠢ᠂ ᠬᠣᠩᠭᠣᠷ ᠮᠢᠨᠢ
ᠬᠠᠮᠢᠭᠠ ᠭᠠᠵᠠᠷ ᠢᠯᠭᠠᠭᠠ ᠦᠭᠡᠢ
ᠬᠠᠢᠷᠠᠲᠠᠢ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠡᠴᠡ
ᠬᠥᠮᠦᠨ ᠦ᠌ ᠦᠷᠡ ᠲᠥᠷᠥᠬᠦ ᠶ᠋ᠢ!
ᠳᠡᠯᠭᠡᠷᠡᠭᠰᠡᠨ ᠲᠡᠢᠮᠦ ᠴᠡᠴᠡᠭ ᠢ᠋
ᠭᠠᠷᠳᠠᠵᠤ ᠴᠢ ᠠᠪᠤᠭᠠᠳ
ᠳᠡᠯᠪᠢ ᠶᠦ᠍ᠭᠡᠨ ᠢ᠋ ᠨᠢ ᠲᠠᠰᠤᠴᠢᠵᠤ
ᠰᠢᠷᠣᠢ ᠳ᠋ᠤ᠌ ᠴᠢ ᠪᠤᠯᠠᠯᠠ!
ᠰᠢᠩᠭᠡᠭᠰᠡᠨ ᠨᠢᠯᠪᠤᠰᠤ᠂ ᠪᠡᠶᠡ ᠶ᠋ᠢ
ᠬᠠᠳᠠᠭᠠᠯᠠᠬᠤ ᠰᠢᠷᠣᠢ ᠳᠡᠭᠡᠭᠦᠷ
ᠰᠢᠪ ᠰᠢᠨᠡᠬᠡᠨ ᠢᠨᠠᠭ ᠲᠠᠢ ᠪᠠᠨ
ᠴᠢ ᠨᠠᠷᠭᠢᠨ ᠵᠤᠭᠠᠯᠠᠬᠤ ᠪᠢᠵᠡ᠁
ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ ᠵᠠᠮᠪᠠᠯ ᠮᠢᠨᠢ᠁
ᠪᠢ ᠡᠷᠡᠮᠳᠡᠭ ᠪᠣᠯᠤᠭᠠᠳ
ᠶᠠᠪᠤᠨ ᠳᠠᠰᠤᠭᠠ ᠦᠭᠡᠢ
ᠬᠠᠷᠠᠨ ᠳᠤᠷᠠᠯᠠᠭᠰᠠᠨ ᠤ᠋ ᠮᠢᠨᠢ ᠠᠯᠳᠠᠭᠠ ᠪᠣᠯᠵᠤ
ᠢᠨᠠᠭ ᠰᠠᠢᠬᠠᠨ ᠰᠡᠳᠬᠢᠯ ᠴᠢᠨᠢ
ᠥᠭᠡᠷᠡ ᠰᠠᠢᠬᠠᠨ ᠳ᠋ᠤ᠌ ᠴᠢᠭᠯᠡᠭᠰᠡᠨ ᠬᠣᠢᠨᠠ
ᠢᠷᠠᠭᠤ ᠰᠠᠢᠬᠠᠨ ᠠᠯᠳᠠᠷ ᠴᠢᠨᠢ
ᠥᠨᠢᠳᠡ ᠮᠠᠨᠳᠤᠵᠤ ᠶᠠᠪᠤᠭ ᠳᠠ᠁
ᠦᠬᠦᠲᠡᠯᠡ ᠪᠡᠨ ᠬᠠᠭᠤᠷᠲᠠᠭᠰᠠᠨ
ᠬᠠᠨᠲᠠᠯᠠ ᠪᠠᠨ ᠵᠢᠷᠭᠠᠭᠰᠠᠨ ᠬᠣᠶᠠᠷ ᠬᠥᠮᠦᠨ ᠦ᠌
ᠦᠵᠡᠯ ᠰᠠᠨᠠᠭᠠ
ᠬᠥᠮᠦᠨ ᠴᠢᠨᠠᠷ ᠤ᠋ᠨ ᠪᠤᠷᠤᠭᠤ ᠵᠥᠪ ᠢ᠋
ᠦᠶᠡ ᠶ᠋ᠢᠨ ᠣᠯᠠᠨ ᠵᠠᠯᠠᠭᠤᠰ
ᠦᠵᠡᠨ ᠬᠠᠷᠠᠨ ᠢᠯᠭᠠᠨᠠ
ᠦᠢ ᠲᠦᠮᠡᠨ ᠰᠡᠳᠬᠢᠬᠦᠢ
ᠦᠨᠡᠨ ᠬᠤᠳᠠᠯ ᠢ᠋ ᠨᠢ ᠰᠢᠯᠭᠠᠨᠠ᠃
ᠵᠠᠮᠪᠠᠭᠠ ᠭᠡᠳᠡᠭ᠂ ᠡᠢᠮᠦ
ᠨᠢᠭᠡᠨ ᠲᠡᠨᠡᠭ ᠬᠡᠦᠬᠡᠨ ᠦ᠌
ᠵᠠᠯᠠᠭᠤ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ
ᠱᠤᠤᠭᠢᠵᠤ ᠶᠠᠪᠤᠭᠰᠠᠨ ᠨᠡᠢᠭᠡᠮ ᠪᠣᠯ
ᠠᠵᠢᠯ᠂ ᠳᠤᠷᠠᠯᠠᠯ ᠬᠣᠶᠠᠷ ᠢ᠋
ᠮᠥᠷᠥ ᠵᠡᠷᠭᠡ ᠠᠯᠬᠤᠭᠤᠯᠤᠭᠰᠠᠨ
ᠠᠷᠢᠭᠤᠨ ᠰᠢᠳᠤᠷᠭᠤ ᠬᠥᠮᠦᠰ ᠦ᠋ᠨ
ᠠᠪᠤᠷᠭᠤ ᠲᠣᠮᠣ ᠰᠢᠭᠦᠬᠦ ᠶᠤᠮ ᠰᠢᠦ!
ᠨᠢᠮᠭᠡᠨ ᠴᠠᠭᠠᠰᠤ ᠲᠠᠢ᠂
ᠰᠢᠩᠭᠡᠨ ᠪᠡᠬᠡ ᠲᠡᠢ ᠪᠣᠯᠪᠠᠴᠤ
ᠨᠢᠩᠵᠢᠨ ᠰᠡᠳᠬᠢᠯ ᠦ᠋ᠨ ᠭᠣᠮᠣᠳᠠᠯ ᠢ᠋
ᠨᠡᠬᠡᠬᠦ ᠡᠨᠡ ᠵᠠᠬᠢᠳᠠᠯ
ᠨᠡᠢᠲᠡ ᠶ᠋ᠢᠨ ᠰᠢᠭᠦᠬᠦ ᠳ᠋ᠦ᠍
ᠮᠢᠨᠦ ᠭᠠᠷᠭᠠᠬᠤ ᠡᠷᠭᠦᠳᠡᠯ ᠶᠤᠮ᠂
ᠨᠢ ᠨᠣ ᠦᠭᠡᠢ
ᠦᠯᠡᠳᠡᠭᠡᠵᠦ ᠣᠷᠬᠢᠬᠤ ᠭᠡᠷᠢᠶᠡᠰᠦᠯᠡᠯ ᠶᠤᠮ ᠁
ᠥᠨᠥ ᠶ᠋ᠢᠨ ᠡᠨᠡ ᠵᠠᠬᠢᠶᠠ᠂
ᠮᠠᠷᠭᠠᠰᠢ ᠴᠢᠮᠠ ᠳ᠋ᠤ᠌ ᠬᠦᠷᠪᠡᠴᠦ
ᠥᠩᠭᠡᠴᠡ ᠬᠤᠷᠳᠤᠨ ᠤᠩᠰᠢᠭᠠᠳ
ᠮᠠᠷᠲᠠᠭᠠᠳ ᠴᠢ ᠬᠠᠶᠠᠪᠠᠴᠤ
ᠪᠤᠭᠤᠷᠤᠯ ᠪᠣᠯᠤᠭᠰᠠᠨ ᠬᠣᠢᠨᠠ ᠯᠠ
ᠮᠠᠷᠲᠠᠭᠰᠠᠨ ᠶᠠᠭᠤᠮᠠᠰ ᠰᠠᠨᠠᠭᠳᠠᠵᠤ
ᠪᠤᠯᠲᠤ ᠪᠠᠷ ᠢ᠋ᠶ᠋ᠠᠨ ᠦᠨᠡᠲᠡᠢ ᠪᠠᠢᠭᠰᠠᠨ ᠨᠢ
ᠨᠢᠭᠡ ᠯᠡ ᠮᠡᠳᠡᠭᠳᠡᠬᠦ ᠪᠠᠢᠬᠠ ᠳᠠ᠁
ᠬᠠᠷᠢᠨ ᠲᠡᠭᠦᠨ ᠡᠴᠡ ᠨᠠᠭᠠᠨᠠ᠂
ᠠᠮᠠᠷᠠᠭ ᠴᠢᠨᠢ(ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ )
ᠬᠠᠯᠠᠮᠵᠢ ᠬᠠᠢᠷᠠ ᠪᠠᠷ ᠨᠠᠳᠠ ᠡᠴᠡ
ᠠᠷᠠᠢ ᠳᠤᠲᠠᠭᠤ ᠪᠠᠢᠪᠠᠯ
ᠵᠠᠷᠢᠮ ᠳᠣᠬᠢ ᠦᠭᠡᠢ ᠦᠶᠡ ᠳ᠋ᠡᠭᠡᠨ ᠴᠢ ᠮᠢᠨᠢ
ᠨᠠᠮᠠᠢ ᠪᠠᠨ ᠰᠡᠳᠬᠢᠬᠦ ᠪᠣᠯ ᠤᠤ ᠳᠠ
ᠵᠠᠮᠪᠠᠭᠠ ᠴᠢᠨᠢ ᠲᠡᠭᠡᠬᠦ ᠳ᠋ᠦ᠍
ᠪᠠᠷᠠ ᠰᠤᠷᠠᠭ ᠦᠭᠡᠢ ᠯᠡ ᠪᠠᠢᠬᠤ ᠪᠣᠯᠪᠠ ᠤᠤ ᠳᠠ
ᠣᠳᠣ ᠪᠢ᠂
ᠵᠠᠮᠪᠠᠯ ᠴᠢᠮᠠ ᠳ᠋ᠠᠭᠠᠨ ᠡᠴᠦᠰ ᠦ᠋ᠨ ᠤᠳᠠᠭᠠ
ᠣᠷᠴᠢᠯᠠᠩ ᠤ᠋ᠨ ᠶᠣᠰᠣ᠂
ᠬᠥᠮᠦᠨ ᠦ᠌ ᠬᠤᠪᠢ ᠪᠠᠷ 《ᠪᠠᠶᠠᠷᠲᠠᠢ》ᠭᠡᠳ
ᠣᠯᠳᠠᠭᠰᠠᠨ ᠪᠡᠶᠡ᠂
ᠣᠨᠣᠭᠳᠠᠭᠰᠠᠨ ᠲᠠᠪᠢᠯᠠᠩ ᠢ᠋ᠶ᠋ᠠᠨ ᠤᠰᠠᠳᠬᠠᠶᠠ ᠳᠠ ᠁
ᠣᠷᠣᠰᠢᠭᠤᠯᠤᠭᠰᠠᠨ ᠭᠠᠵᠠᠷ ᠮᠢᠨᠢ
ᠣᠴᠢᠨᠠ ᠤᠤ᠂ ᠪᠠᠢᠨᠠ ᠤᠤ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠭᠡᠷᠡᠢ᠃
2
ᠡᠵᠢ ᠠ᠋᠁ ᠲᠠ ᠣᠳᠣᠬᠠᠨ
ᠡᠨᠡ ᠵᠠᠬᠢᠶᠠ ᠶ᠋ᠢ᠁ ᠭᠡᠳ
ᠮᠥᠭᠡᠷᠰᠦ ᠨᠢᠮᠭᠡᠨ ᠬᠣᠭᠣᠯᠠᠢ ᠨᠢ
ᠮᠥᠴᠡ ᠶ᠋ᠢᠨ ᠲᠡᠳᠦᠢ ᠵᠠᠩᠭᠢᠷᠠᠵᠤ
ᠰᠢᠤᠳᠠᠨ ᠤ᠋ ᠭᠠᠵᠠᠷ ᠠᠪᠠᠴᠢᠭᠠᠳ
ᠰᠢᠭᠤᠷᠬᠠᠢ ᠲᠡᠮᠳᠡᠭ ᠳᠠᠷᠤᠭᠤᠯᠤᠭᠠᠳ
ᠭᠠᠢᠭᠤᠢ ᠪᠠᠲᠤᠯᠠᠭᠠᠲᠠᠢ ᠶᠠᠪᠤᠭᠤᠯᠤᠭᠠᠷᠠᠢ ᠭᠡᠵᠦ
ᠭᠠᠷᠳᠠᠭᠤᠯᠵᠤ ᠵᠠᠮᠪᠠᠭᠠ ᠥᠭᠭᠦᠯᠡ᠃
ᠵᠠ ᠬᠦᠦ ᠮᠢᠨᠢ ᠭᠡᠳ
ᠵᠠᠢᠯᠠᠭᠤᠯ᠂ ᠡᠵᠢ ᠨᠢ ᠶᠠᠪᠤᠯᠠ᠂
ᠵᠠᠩᠭᠢᠷᠠᠭᠰᠠᠨ ᠨᠢᠯᠪᠤᠰᠤᠨ ᠳᠤᠮᠳᠠᠭᠤᠷ ᠢ᠋ᠶ᠋ᠠᠨ
ᠵᠠᠮᠪᠠᠭᠠ ᠠᠷᠤ ᠡᠴᠡ ᠨᠢ ᠰᠢᠷᠳᠡᠯᠡ᠃
ᠨᠠᠮᠬᠠᠨ ᠮᠣᠳᠣᠨ ᠪᠣᠱᠣᠭᠠ ᠶ᠋ᠢ
ᠨᠠᠮᠪᠠᠲᠠᠢ ᠠᠯᠬᠤᠨ ᠭᠠᠷᠴᠤ ᠶᠠᠪᠤᠭᠠ
ᠨᠠᠰᠤᠲᠠᠢ ᠡᠨᠡ ᠬᠥᠮᠦᠨ ᠦ᠌ ᠳᠦᠷᠢ
ᠨᠠᠷᠠ ᠲᠠᠢ ᠡᠨᠡ ᠬᠣᠷᠸᠠ ᠳᠡᠭᠡᠷᠡ
ᠦᠷᠡ ᠨᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠳ᠋ᠦ᠍
ᠭᠠᠭᠴᠠᠬᠠᠨ ᠤᠳᠠᠭᠠ ᠣᠯᠳᠠᠳᠠᠭ
ᠡᠭᠦᠷᠢᠳᠡ ᠬᠠᠷᠢᠭᠤᠯᠵᠤ ᠪᠠᠷᠠᠰᠢ ᠦᠭᠡᠢ
ᠭᠠᠪᠢᠶᠠᠲᠤ ᠡᠬᠡ ᠶ᠋ᠢᠨ ᠳᠦᠷᠢ ᠶᠤᠮ᠃
ᠴᠠᠭᠠᠰᠤᠨ ᠲᠣᠭᠳᠣᠢ ᠨᠢᠮᠭᠡᠨ ᠴᠦ᠍
ᠴᠠᠭᠠᠨᠠ ᠨᠢ ᠪᠠᠢᠭᠠ ᠵᠠᠬᠢᠳᠠᠯ ᠢ᠋
ᠴᠡᠯ ᠪᠤᠭᠤᠷᠤᠯ ᠠᠪᠠᠭᠠᠢ
ᠳᠠᠭᠠᠵᠤ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠣᠢ?
ᠦᠷᠡ ᠪᠡᠨ ᠭᠡᠰᠡᠨ ᠡᠬᠡ ᠶ᠋ᠢᠨ
ᠦᠨᠡᠨ ᠬᠠᠯᠠᠭᠤᠨ ᠰᠡᠳᠬᠢᠯ ᠢ᠋ᠶ᠋ᠡᠷ
ᠦᠳᠡᠰᠢ ᠪᠣᠯᠬᠤ ᠡᠴᠡ ᠨᠠᠭᠠᠨᠠ
ᠵᠠᠬᠢᠳᠠᠯ ᠢ᠋ ᠨᠢ ᠬᠦᠷᠭᠡᠬᠦ ᠪᠡᠷ ᠶᠠᠭᠠᠷᠠᠬᠤ ᠳ᠋ᠠᠭᠠᠨ
ᠰᠡᠪᠡᠯᠭᠡ ᠦᠰᠦᠲᠡᠢ ᠨᠢᠯᠬᠠ ᠡᠴᠡ ᠨᠢ
ᠰᠡᠭᠡᠭᠡ ᠣᠷᠣᠲᠠᠯᠠ ᠨᠢ ᠪᠥᠭᠡᠴᠡᠢᠯᠡᠭᠰᠡᠨ
ᠰᠡᠷᠭᠦᠯᠡᠩ ᠵᠢᠭᠠᠬᠠᠨ ᠥᠬᠢᠨ ᠦ᠌ ᠪᠡᠨ
ᠰᠡᠳᠬᠢᠯ ᠦ᠋ᠨ ᠳᠣᠲᠣᠷᠠᠬᠢ ᠶ᠋ᠢ ᠮᠡᠳᠡᠭᠰᠡᠨ ᠦᠭᠡᠢ᠁
ᠪᠠᠷᠠᠭᠠᠨ ᠡᠭᠦᠯᠡᠰ ᠦ᠋ᠨ ᠵᠠᠬᠠ
ᠪᠠᠷᠠᠭᠤᠨ ᠲᠠᠯᠠ ᠡᠴᠡ ᠤᠯᠠᠢᠨᠠ
ᠪᠠᠷᠤᠢ ᠪᠦᠷᠦᠢ ᠴᠦ᠍ ᠪᠣᠯᠤᠯᠠ
ᠪᠠᠢᠰᠢᠩ ᠡᠴᠡ ᠵᠠᠮᠪᠠᠭᠠ ᠴᠤ᠌ ᠭᠠᠷᠤᠯᠠ᠃
ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡ
ᠬᠣᠲᠠ ᠡᠴᠡ ᠳᠥᠩᠭᠡᠵᠦ ᠢᠷᠡᠭᠡᠳ
ᠡᠨᠡ ᠪᠠᠢᠰᠢᠩ ᠤ᠋ᠨ ᠪᠣᠱᠣᠭᠠ ᠶ᠋ᠢ
ᠡᠬᠢᠯᠡᠨ ᠠᠯᠬᠤᠵᠤ ᠪᠠᠢᠬᠤ ᠳ᠋ᠠᠭᠠᠨ
ᠤᠶᠠᠨ ᠰᠠᠢᠬᠠᠨ ᠨᠢᠷᠤᠭᠤᠨ ᠳ᠋ᠤᠨᠢ
ᠬᠥᠮᠦᠨ ᠦ᠌ ᠵᠢᠪᠬᠤᠯᠠᠩ ᠪᠦᠷᠢᠳᠦᠭᠰᠡᠨ
ᠤᠷᠠᠨ ᠴᠠᠭᠠᠨ ᠬᠤᠷᠤᠭᠤᠨ ᠳ᠋ᠤᠨᠢ
ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠦᠲᠦᠭᠡᠯ ᠭᠡᠷᠡᠯᠲᠦᠭᠰᠡᠨ
ᠢᠳᠡ ᠵᠠᠯᠠᠭᠤᠬᠠᠨ ᠪᠦᠰᠡᠭᠦᠢ
ᠢᠨᠢᠶᠡᠵᠦ ᠨᠠᠷᠭᠢᠵᠤ ᠶᠠᠪᠤᠭᠰᠠᠨ
ᠡᠢᠮᠦ ᠦᠳᠡᠰᠢ ᠶ᠋ᠢᠨ ᠲᠤᠬᠠᠢ
ᠵᠡᠭᠦᠳᠦᠯᠡᠭᠡ ᠴᠦ᠍ ᠦᠭᠡᠢ ᠶᠤᠮᠰᠠᠨ᠃
ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠣᠬᠢᠶᠠᠯᠳᠤᠬᠤ
ᠬᠦᠨᠳᠦ ᠮᠥᠴᠡ ᠨᠦ᠍ᠭᠦᠳ ᠦ᠋ᠨ ᠨᠢᠭᠡ ᠶ᠋ᠢ
ᠬᠦᠯᠢᠶᠡᠵᠦ ᠲᠡᠰᠴᠦ ᠴᠢᠳᠠᠭᠠ ᠦᠭᠡᠢ
ᠬᠥᠭᠡᠷᠦᠬᠦᠢ ᠵᠠᠮᠪᠠᠭᠠ ᠶᠠᠪᠤᠴᠢᠬᠠᠯᠠ᠁
ᠠᠮᠢᠳᠤᠷᠠᠯ ᠢ᠋ᠶ᠋ᠠᠷ ᠡᠨᠡ ᠥᠷᠥᠭᠡ ᠶ᠋ᠢ
ᠠᠮᠢᠰᠬᠤᠯᠯᠠᠭᠤᠯᠵᠤ ᠪᠠᠢᠭᠰᠠᠨ ᠬᠥᠮᠦᠨ
ᠠᠬᠢᠭᠠᠳ ᠡᠷᠭᠢᠵᠦ ᠢᠷᠠᠰᠢ ᠦᠭᠡᠢ
ᠲᠠᠶᠠᠭ ᠢ᠋ᠶ᠋ᠠᠨ ᠲᠤᠯᠤᠭᠠᠳ ᠶᠠᠪᠤᠴᠢᠬᠠᠯᠠ᠁
ᠦᠶᠡᠯᠵᠡᠬᠦ ᠲᠡᠷᠲᠡᠭᠡ ᠬᠣᠯᠠ ᠡᠴᠡ
ᠡᠭᠦᠯᠡᠰ ᠦ᠋ᠨ ᠰᠤᠭᠤᠨ ᠳᠣᠣᠭᠤᠷ
ᠴᠢᠭᠢᠭᠲᠡᠢ ᠬᠦᠢᠲᠡᠨ ᠰᠠᠯᠬᠢ
ᠴᠢᠮᠡᠭᠡ ᠭᠠᠷᠲᠠᠯᠠ ᠦᠯᠢᠶᠡᠨᠡ᠃
ᠵᠢᠭᠠᠬᠠᠨ ᠭᠣᠣᠯ ᠤ᠋ᠨ ᠡᠷᠭᠢ
ᠴᠠᠰᠤᠨ ᠤ᠋ ᠤᠰᠤ ᠪᠠᠷ ᠪᠢᠯᠬᠠᠨᠠ᠂
ᠵᠠᠬᠠ ᠬᠥᠪᠡᠭᠡ ᠣᠷᠴᠢᠮ ᠢ᠋ᠶ᠋ᠠᠷ ᠨᠢ
ᠴᠠᠭᠠᠨ ᠬᠥᠭᠡᠰᠦ ᠰᠠᠬᠠᠷᠠᠨᠠ᠃
ᠲᠦᠭᠰᠢᠭᠦᠷᠢ ᠳᠦᠭᠦᠷᠡᠩ ᠰᠡᠳᠬᠢᠯ ᠰᠢᠭ
ᠲᠦᠷᠢᠯᠭᠡ ᠳᠣᠯᠭᠢᠶᠠ ᠣᠪᠣᠯᠵᠠᠨᠠ᠂
ᠮᠡᠬᠦᠰ ᠳᠠᠭᠤ ᠪᠠᠷ ᠶᠣᠣᠯᠠᠬᠤ ᠰᠢᠭ᠋
ᠮᠥᠰᠥᠨ ᠰᠥᠩ ᠮᠥᠷᠭᠥᠯᠳᠦᠨᠡ᠁᠂
ᠬᠣᠶᠠᠷ ᠲᠠᠶᠠᠭ ᠢ᠋ᠶ᠋ᠠᠨ ᠲᠤᠯᠤᠭᠠᠳ
ᠬᠣᠩᠭᠣᠷ ᠵᠢᠭᠠᠬᠠᠨ ᠪᠦᠰᠡᠭᠦᠢ
ᠡᠷᠡᠰᠯᠡᠵᠦ ᠨᠢᠭᠡ ᠶ᠋ᠢ ᠰᠡᠳᠬᠢᠭᠰᠡᠭᠡᠷ
ᠡᠷᠭᠢ ᠳᠡᠭᠡᠷᠡ ᠢᠷᠡᠯᠡ!
ᠰᠠᠨᠴᠢᠭ ᠤ᠋ᠨ ᠬᠢᠨᠢ ᠭᠠᠷᠠᠬᠠᠨ ᠦᠰᠦ ᠶ᠋ᠢ
ᠰᠠᠯᠬᠢ ᠠᠭᠤᠷᠲᠠᠢ ᠢᠯᠪᠢᠨᠡ᠂
ᠰᠠᠷᠢᠳᠠᠭ ᠠᠭᠤᠯᠠᠰ ᠠᠯᠤᠰ ᠡᠴᠡ
ᠰᠠᠯᠵᠤ ᠶᠠᠳᠠᠨ ᠰᠢᠷᠳᠡᠨᠡ᠁
《ᠵᠠ ᠁ ᠠᠭᠤᠯᠠᠰ ᠮᠢᠨᠢ ᠁ ᠶᠢᠷᠲᠢᠨᠴᠦ ᠮᠢᠨᠢ᠂
ᠵᠠᠮᠪᠠᠭᠠ ᠴᠢᠨᠢ ᠣᠳᠣ᠂
᠁ ᠁ ᠁
᠁ ᠁ ᠁》
ᠨᠠᠰᠤ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠴᠢᠭᠢᠷᠠᠭ ᠲᠤ᠌
ᠨᠠᠢ᠌ᠮᠠᠨ ᠰᠠᠷᠠ ᠶ᠋ᠢᠨ ᠳᠤᠮᠳᠠᠭᠤᠷ
ᠨᠠᠷᠭᠢᠨ ᠴᠡᠩᠭᠡᠵᠦ ᠶᠠᠪᠤᠬᠤ ᠳ᠋ᠠᠭᠠᠨ
ᠵᠠᠮᠪᠠᠯ ᠲᠠᠢ ᠠᠩᠬᠠ ᠠᠭᠤᠯᠵᠠᠭᠰᠠᠨ
ᠡᠷᠭᠢ ᠶ᠋ᠢᠨ ᠨᠥᠭᠦᠭᠡ ᠲᠠᠯᠠ ᠳ᠋ᠠᠬᠢ
ᠡᠭᠡᠯ ᠨᠢᠭᠡᠨ ᠳᠣᠪᠣᠴᠠᠭ ᠢ᠋
ᠤᠯᠢᠶᠠᠰᠤ ᠬᠤᠰᠤᠨ ᠤ᠋ ᠲᠥᠭᠦᠯ ᠢ᠋
ᠤᠯᠪᠠᠭᠠ ᠵᠠᠮ ᠤ᠋ᠨ ᠲᠣᠬᠣᠢ ᠶ᠋ᠢ
ᠡᠴᠦᠰ ᠦ᠋ᠨ ᠤᠳᠠᠭᠠ ᠵᠠᠮᠪᠠᠭᠠ
ᠡᠭᠴᠡᠯᠡᠵᠦ ᠤᠳᠠᠭᠠᠨ ᠬᠠᠷᠠᠯᠠ᠁
ᠡᠷᠴᠢᠯᠡᠭᠰᠡᠨ ᠤᠰᠤ ᠱᠤᠤᠭᠢᠵᠤ
ᠡᠷᠭᠢ ᠶ᠋ᠢᠨ ᠢᠷᠮᠡᠭ ᠴᠦ᠍ ᠲᠤᠯᠤᠯᠠ᠁
ᠥᠨᠢᠷ ᠳᠡᠯᠡᠬᠡᠢ ᠶ᠋ᠢᠨ ᠬᠥᠷᠥᠰᠥᠨ ᠳ᠋ᠦ᠍
ᠠᠮᠢᠳᠤᠷᠠᠯ ᠵᠢᠷᠭᠠᠯ ᠭᠡᠳᠡᠭ
ᠥᠷᠥᠵᠦ ᠲᠠᠯᠪᠢᠭᠰᠠᠨ ᠶᠠᠭᠤᠮᠠ ᠰᠢᠭ᠋
ᠠᠳᠠᠯᠢ ᠲᠡᠭᠰᠢ ᠪᠠᠢᠳᠠᠭ ᠦᠭᠡᠢ
ᠲᠡᠷᠡ ᠡᠷᠭᠢ ᠳᠡᠭᠡᠷᠡ ᠡᠴᠡ
ᠲᠡᠭᠰᠢ ᠱᠤᠭᠤᠮ ᠢ᠋ᠶ᠋ᠠᠷ ᠬᠡᠮᠵᠢᠪᠡᠯ
ᠬᠣᠶᠠᠷ ᠥᠷᠲᠡᠭᠡ ᠴᠦ᠍ ᠬᠦᠷᠬᠦ ᠦᠭᠡᠢ
ᠬᠣᠲᠠ ᠶ᠋ᠢᠨ ᠨᠢᠭᠡᠨ ᠪᠠᠢᠰᠢᠩ ᠳ᠋ᠤ᠌
ᠠᠶᠤᠮᠰᠢᠭᠲᠤ ᠡᠨᠡ ᠮᠥᠴᠡ ᠳ᠋ᠦ᠍
ᠠᠮᠢᠳᠤᠷᠠᠯ ᠶᠠᠮᠠᠷ ᠪᠠᠢᠭᠠ ᠶ᠋ᠢ
ᠣᠴᠢᠵᠤ ᠬᠠᠷᠠᠶᠠ ᠤᠩᠰᠢᠭᠴᠢ ᠮᠢᠨᠢ
ᠣᠢᠯᠠᠭᠠᠵᠤ ᠥᠪᠡᠷ ᠢ᠋ᠶ᠋ᠡᠨ ᠳ᠋ᠦᠩᠨᠡᠭᠡᠷᠡᠢ᠁
ᠴᠠᠴᠤᠭ ᠲᠠᠢ ᠪᠦᠷᠬᠦᠭᠦᠯ ᠳᠣᠣᠷᠠ ᠡᠴᠡ
ᠴᠠᠬᠢᠯᠭᠠᠨ ᠳ᠋ᠧᠩ ᠭᠡᠢᠭᠦᠯᠵᠦ
ᠴᠠᠭᠠᠨ ᠲᠣᠯᠣᠭᠠᠢ ᠲᠠᠢ ᠣᠷᠣ ᠨᠢ
ᠬᠠᠭᠠᠨ ᠤ᠋ ᠰᠠᠭᠤᠳᠠᠯ ᠰᠢᠭ᠋ ᠬᠠᠷᠠᠭᠳᠠᠨᠠ᠃
ᠤᠭᠠᠯᠵᠠ ᠬᠡ ᠲᠡᠢ ᠠᠪᠳᠠᠷᠠ
ᠤᠭᠰᠠᠷᠠᠵᠤ ᠲᠠᠯᠪᠢᠭᠰᠠᠨ ᠴᠧᠮᠣᠳᠠᠨ
ᠲᠣᠯᠢᠨ ᠤ᠋ ᠡᠮᠦᠨᠡ ᠥᠷᠥᠭᠡᠰᠦᠲᠡᠢ
ᠲᠣᠭᠯᠠᠭᠠᠮ ᠬᠦᠷᠲᠡᠯᠡ ᠭᠢᠯᠠᠯᠵᠠᠨᠠ᠃
ᠳᠣᠯᠭᠢᠶᠠ ᠲᠠᠲᠠᠭᠰᠠᠨ ᠳᠠᠩᠨᠠᠭᠠᠰᠤᠲᠠᠢ
ᠳᠣᠷᠣᠨᠠ ᠵᠦᠭ ᠦ᠋ᠨ ᠬᠡᠪᠢᠰ
ᠳᠣᠪᠣᠭᠣᠷ ᠵᠢᠶᠠᠵᠠᠨ ᠳ᠋ᠤ᠌ ᠬᠢᠭᠡᠰᠦᠲᠡᠢ
ᠲᠣᠰᠣᠨ ᠪᠣᠳᠣᠭ ᠤ᠋ᠨ ᠵᠢᠷᠤᠭ
ᠡᠨᠡ ᠪᠦᠬᠦᠨ ᠦ᠌ ᠳᠤᠮᠳᠠ
ᠡᠵᠡᠨ ᠬᠥᠮᠦᠨ ᠦ᠌ ᠪᠠᠢᠳᠠᠯ ᠢ᠋ᠶ᠋ᠠᠷ
ᠡᠷᠢᠶᠡᠨ ᠵᠠᠩᠭᠢᠶᠠ ᠪᠠᠨ ᠵᠡᠭᠦᠭᠰᠡᠭᠡᠷ
ᠡᠷᠬᠢᠮ ᠵᠢᠷᠤᠭᠠᠴᠢ ᠰᠠᠭᠤᠵᠤ ᠪᠠᠢᠨᠠ᠃
ᠡᠮᠦᠨᠡᠬᠢ ᠰᠢᠷᠡᠭᠡ ᠶ᠋ᠢ ᠨᠢ ᠲᠣᠬᠣᠢᠯᠠᠵᠤ
ᠥᠨᠳᠥᠷ ᠭᠤᠸᠠᠯᠢᠭ ᠨᠢᠷᠤᠭᠤ ᠲᠠᠢ
ᠥᠳᠬᠡᠨ ᠬᠠᠷᠠ ᠭᠡᠵᠢᠭᠡ ᠲᠡᠢ
ᠥᠯᠵᠡᠢ ᠭᠡᠳᠡᠭ ᠬᠡᠦᠬᠡᠨ
ᠵᠢᠷᠦᠬᠡᠨ ᠦ᠌ ᠠᠮᠠᠷᠠᠭ ᠵᠠᠮᠪᠠᠯ ᠢ᠋ᠶ᠋ᠠᠨ
ᠢᠲᠡᠭᠡᠯ ᠲᠡᠭᠦᠰ ᠰᠢᠷᠲᠡᠵᠦ
ᠵᠦᠢᠯ ᠦ᠋ᠨ ᠬᠥᠭᠡᠷᠦᠬᠦᠨ ᠳᠠᠭᠤ ᠪᠠᠷ ᠢ᠋ᠶ᠋ᠠᠨ
ᠢᠨᠢᠶᠡᠳᠦ ᠠᠯᠳᠠᠵᠤ ᠰᠠᠭᠤᠨᠠ᠃
ᠭᠠᠷᠠᠬᠠᠨ ᠮᠤᠰᠬᠢᠶᠡ ᠭᠠᠷᠭᠠᠭᠰᠠᠨ
ᠭᠠᠩᠭᠠᠩ ᠬᠠᠷᠠ ᠦᠰᠦᠨ ᠡᠴᠡ ᠨᠢ
ᠲᠠᠩᠰᠤᠭ ᠰᠠᠢᠬᠠᠨ ᠦᠨᠦᠷᠲᠡᠨ
ᠲᠠᠰᠤᠯᠭᠠ ᠳᠦᠭᠦᠷᠡᠩ ᠬᠠᠩᠬᠤᠯᠤᠨᠠ᠃
ᠴᠢᠳᠠᠯ ᠶᠡᠬᠡᠲᠡᠢ ᠪᠠᠢᠮᠠᠷ
ᠴᠢᠭᠢᠷᠠᠭ ᠴᠠᠭᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠰᠢᠬᠢᠷ ᠦ᠋ᠨ ᠨᠢᠮᠭᠡᠨ ᠴᠠᠭᠠᠰᠤ ᠶ᠋ᠢ
ᠴᠢᠮᠡᠭᠡ ᠶᠡᠬᠡᠲᠡᠢ ᠵᠠᠳᠠᠯᠤᠨᠠ᠃
ᠡᠷᠡᠰᠢᠭᠦᠳ ᠴᠢᠭᠢᠷᠠᠭ ᠪᠡᠶᠡ ᠲᠡᠢ ᠴᠦ᠍
ᠡᠪᠯᠢᠭ ᠬᠥᠭᠡᠷᠦᠬᠦᠨ ᠴᠢᠷᠠᠢ ᠲᠠᠢ
ᠡᠨᠡ ᠬᠡᠦᠬᠡᠨ ᠦ᠌ ᠲᠤᠬᠠᠢ
ᠡᠷᠬᠢᠮ ᠨᠥᠬᠥᠳ ᠰᠣᠨᠢᠷᠬᠠᠪᠠᠯ
ᠴᠠᠭᠠᠰᠤ ᠲᠠᠢ ᠰᠢᠬᠢᠷ ᠬᠦᠯᠬᠦᠵᠦ
ᠲᠣᠭᠣᠰᠣ ᠲᠠᠢ ᠭᠠᠵᠠᠷ ᠮᠥᠯᠬᠥᠵᠦ
ᠬᠥᠭᠰᠢᠨ ᠡᠵᠢ ᠶ᠋ᠢᠨ ᠭᠠᠷ ᠳᠡᠭᠡᠷᠡ
ᠬᠥᠯ ᠳ᠋ᠦ᠍ ᠠᠩᠬᠠ ᠣᠷᠣᠭᠠᠳ
ᠠᠯᠠᠭ ᠪᠥᠮᠪᠥᠭᠡ ᠥᠩᠬᠥᠷᠢᠭᠦᠯᠵᠦ
ᠠᠢᠯ ᠤ᠋ᠨ ᠵᠢᠭᠠᠯ ᠲᠠᠢ ᠱᠤᠤᠭᠢᠵᠤ
ᠠᠯᠢ ᠳᠤᠷᠠᠲᠠᠢ ᠪᠠᠨ ᠬᠡᠷᠡᠭᠯᠡᠭᠰᠡᠭᠡᠷ
ᠠᠷᠪᠠᠨ ᠬᠡᠳᠦᠲᠡᠢ ᠪᠣᠯᠤᠭᠠᠳ
ᠤᠷᠤᠭᠤᠯ᠂ ᠬᠢᠮᠤᠰᠤ ᠪᠠᠨ ᠪᠣᠳᠣᠵᠤ
ᠤᠶᠠᠬᠠᠨ ᠦᠰᠦ ᠪᠡᠨ ᠪᠤᠷᠵᠢᠢᠯᠭᠠᠵᠤ
ᠪᠦᠳᠦᠭᠦᠨ ᠪᠤᠯᠴᠢᠩ ᠭᠠᠷᠭᠠᠭᠰᠠᠭᠠᠷ
ᠪᠥᠵᠢᠭ ᠦ᠋ᠨ ᠬᠦᠷᠢᠶᠡᠯᠡᠩ ᠳ᠋ᠦ᠍ ᠣᠷᠣᠵᠠᠢ᠃
ᠬᠠᠭᠠᠰ ᠥᠨᠳᠥᠷ ᠦᠰᠦᠭᠡᠢᠲᠦ ᠪᠡᠷ
ᠠᠷᠪᠠᠨ ᠵᠢᠷᠭᠤᠭᠠᠲᠤ ᠭᠢᠰᠬᠢᠵᠦ
ᠬᠠᠷᠠᠴᠤᠤᠯ ᠵᠠᠯᠠᠭᠤᠰ ᠤ᠋ᠨ ᠮᠡᠨᠳᠦ ᠶ᠋ᠢ
ᠠᠶᠠᠲᠠᠢ ᠬᠠᠷᠢᠭᠤᠯᠵᠤ ᠰᠤᠷᠴᠠᠢ᠃
ᠨᠠᠭᠤᠷ ᠤ᠋ᠨ ᠴᠡᠯᠮᠡᠭ ᠮᠠᠨᠳᠠᠯ ᠰᠢᠭ᠋
ᠨᠤᠲᠤᠭ ᠤ᠋ᠨ ᠵᠥᠭᠡᠯᠡᠨ ᠵᠢᠮᠢᠰ ᠰᠢᠭ
ᠢᠳᠡᠲᠡᠢ ᠬᠥᠭᠡᠷᠦᠬᠦᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ
ᠢᠷᠮᠡᠵᠦ᠂ ᠰᠢᠷᠪᠢᠵᠦ ᠴᠦ᠍ ᠰᠤᠷᠤᠭᠰᠠᠨ ᠭᠡᠨᠡ᠃
ᠠᠢᠯ ᠤ᠋ᠨ ᠭᠠᠭᠴᠠ ᠥᠬᠢᠨ ᠦ᠌
ᠠᠬᠤᠢ ᠪᠠᠢᠳᠠᠯ ᠨᠢ ᠡᠢᠮᠦ ᠭᠡᠨᠡ᠂
ᠠᠷᠪᠠᠨ ᠬᠡᠳᠦ ᠶ᠋ᠢ ᠥᠩᠭᠡᠷᠡᠪᠡᠴᠦ
ᠠᠶ᠋ᠢᠭ ᠮᠠᠶ᠋ᠢᠭ ᠨᠢ ᠬᠡᠪ ᠢ᠋ᠶ᠋ᠡᠷ ᠭᠡᠨᠡ᠃
ᠠᠢᠬᠤᠪᠲᠤᠷ ᠲᠢᠭ ᠦᠭᠡᠢ ᠥᠰᠦᠭᠰᠡᠨ ᠴᠦ᠍
ᠠᠵᠢᠯ ᠲᠥᠷᠥᠯ ᠳ᠋ᠦ᠍ ᠰᠦᠷᠡᠬᠡᠢ ᠭᠡᠨᠡ᠂
ᠬᠥᠷᠥᠩᠭᠡ ᠵᠣᠭᠣᠷᠢ ᠡᠯᠪᠡᠭ ᠲᠡᠢ ᠴᠦ᠍
ᠬᠥᠩᠭᠡᠨ ᠲᠡᠷᠭᠡ ᠵᠢᠯᠣᠭᠣᠳᠴᠠᠢ ᠭᠡᠨᠡ᠃
ᠰᠢ᠂ ᠵᠦᠴᠦᠭᠡ᠂ ᠨᠣᠮ
ᠰᠢᠨᠡ ᠺᠢᠨᠣ᠋᠂ ᠲᠠᠨᠼ
ᠠᠯᠢ ᠠᠯᠢᠨ ᠢ᠋ ᠨᠢ ᠦᠯᠡᠳᠡᠭᠡᠯ ᠦᠭᠡᠢ
ᠠᠮᠵᠢᠭᠠᠳ ᠴᠥᠮ ᠢ᠋ ᠦᠵᠡᠴᠢᠬᠡᠳᠡᠭ᠃
ᠠᠵᠤ ᠲᠥᠷᠥᠬᠦ ᠶ᠋ᠢᠨ ᠬᠤᠪᠢ ᠪᠠᠷ
ᠬᠠᠢᠩᠭᠤ ᠪᠣᠯᠪᠠᠴᠤ ᠰᠢᠳᠮᠭ᠂
ᠠᠮᠠᠷᠠᠭ ᠰᠡᠳᠬᠢᠯ ᠦ᠋ᠨ ᠲᠠᠯᠠ ᠪᠠᠷ
ᠬᠠᠲᠠᠭᠤ ᠪᠣᠯᠪᠠᠴᠤ ᠲᠣᠭᠯᠠᠭᠠᠮ ᠲᠠᠢ᠃
ᠣᠯᠠᠨ ᠬᠥᠮᠦᠨ ᠲᠡᠢ ᠳᠠᠰᠤᠭᠰᠠᠨ ᠴᠦ᠍
ᠣᠢᠷᠠᠳᠴᠤ ᠨᠡᠢᠯᠡᠭᠰᠡᠨ ᠶᠠᠭᠤᠮᠠ ᠦᠭᠡᠢ
ᠣᠳᠣ ᠵᠠᠮᠪᠠᠯ ᠲᠠᠢ ᠰᠠᠴᠠᠭᠤ
ᠣᠪᠣᠭᠠ ᠯᠠ ᠬᠡᠦᠬᠡᠨ ᠭᠡᠳᠡᠭ ᠶᠤᠮ᠃
4
ᠬᠡᠳᠦᠬᠡᠨ ᠬᠠᠭᠤᠳᠠᠰᠤᠨ ᠡᠴᠡ ᠡᠮᠦᠨᠡ
ᠬᠡᠷᠡᠭ ᠶᠠᠪᠤᠳᠠᠯ ᠡᠴᠡ ᠤᠷᠢᠳᠤᠬᠠᠨ
ᠪᠢᠲᠡᠭᠦᠬᠡᠨ ᠨᠢᠭᠡ ᠴᠤᠬᠤᠢᠯᠭᠠᠭᠠᠳ
ᠪᠢᠴᠢᠵᠦ ᠠᠮᠵᠢᠯ ᠦᠭᠡᠢ ᠢᠷᠡᠭᠰᠡᠨ
ᠰᠠᠯᠬᠢᠪᠴᠢ ᠴᠣᠩᠬᠣ ᠪᠠᠨ ᠲᠦᠰᠢᠭᠡᠳ
ᠰᠠᠨᠠᠭᠠ ᠠᠯᠳᠠᠵᠤ ᠰᠠᠭᠤᠭᠰᠠᠨ
ᠰᠠᠢᠬᠠᠨ ᠵᠠᠯᠠᠭᠤ ᠬᠡᠦᠬᠡᠨ ᠮᠠᠨᠢ
ᠡᠨᠡ ᠥᠯᠵᠡᠢ ᠶᠤᠮ ᠰᠢᠦ ᠳᠡ
ᠬᠦᠵᠢ ᠳᠡᠯᠡᠬᠡᠢ ᠶ᠋ᠢᠨ ᠠᠭᠤᠳᠠᠮ ᠳ᠋ᠤ᠌
ᠬᠥᠮᠦᠨ ᠬᠠᠮᠢᠭᠠ ᠠᠮᠢᠳᠤᠷᠠᠨᠠ ᠪᠣᠢ
ᠲᠡᠮᠡᠴᠡᠯ ᠵᠥᠷᠢᠴᠡᠯ ᠭᠡᠳᠡᠭ
ᠲᠡᠨᠳᠡ ᠵᠠᠪᠠᠯ ᠡᠯᠪᠡᠭ᠃
※※※
ᠥᠯᠵᠡᠢ ᠨᠢᠭᠡ ᠣᠷᠣᠢ
ᠠᠵᠢᠯ ᠡᠴᠡ ᠡᠷᠲᠡᠬᠡᠨ ᠪᠠᠭᠤᠭᠠᠳ
ᠥᠪᠡᠷ ᠦ᠋ᠨ ᠬᠠᠷᠢᠭᠤᠴᠠᠭᠰᠠᠨ ᠲᠡᠷᠭᠡ ᠪᠡᠨ
ᠠᠷᠴᠢᠵᠤ ᠶᠠᠩᠵᠤᠯᠠᠵᠤ ᠳᠠᠭᠤᠰᠤᠭᠠᠳ
ᠰᠢᠯᠤᠭᠤᠨ ᠰᠠᠢᠬᠠᠨ ᠭᠤᠳᠤᠮᠵᠢ ᠪᠠᠷ
ᠬᠠᠷᠢᠵᠤ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ
ᠰᠢᠤᠳᠠᠨ ᠤ᠋ ᠭᠠᠵᠠᠷ ᠢ᠋ᠶ᠋ᠠᠷ ᠣᠷᠣᠵᠤ
ᠬᠠᠢᠷᠴᠠᠭ ᠢ᠋ᠶ᠋ᠠᠨ ᠨᠡᠭᠡᠭᠡᠵᠦ ᠦᠵᠡᠯᠡ᠁
ᠵᠠᠮᠪᠠᠯ ᠳ᠋ᠤ᠌ ᠭᠡᠰᠡᠨ ᠬᠠᠶᠢᠭ᠋ ᠲᠠᠢ
ᠵᠢᠷᠠᠨ ᠮᠥᠩᠭᠥᠨ ᠦ᠌ ᠮᠠᠷᠺ ᠲᠠᠢ
ᠣᠪᠣᠭᠠ ᠵᠤᠵᠠᠭᠠᠨ ᠵᠠᠬᠢᠳᠠᠯ ᠢ᠋
ᠣᠯᠵᠤ ᠠᠪᠤᠯᠠ ᠥᠯᠵᠡᠢ᠃
《ᠬᠡᠨ ᠵᠠᠮᠪᠠᠯ ᠳ᠋ᠤ᠌ ᠪᠢᠴᠢᠭᠡ ᠪᠣᠢ ?》ᠭᠡᠵᠦ
ᠬᠡᠰᠡᠭ ᠵᠠᠭᠤᠷᠠ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ
《ᠵᠠᠮᠪᠠᠭᠠ ᠡᠴᠡ》ᠭᠡᠰᠡᠨ ᠢ᠋ ᠨᠢ ᠬᠠᠷᠠᠭᠠᠳ
ᠵᠠᠳᠠᠯᠤᠶᠠ ᠭᠡᠵᠦ ᠰᠢᠢᠳᠦᠯᠡ᠃
ᠭᠡᠪᠡᠴᠦ ᠶᠠᠭᠠᠬᠢᠭᠠᠳ ᠴᠦ᠍ ᠶᠤᠮ ᠪᠣᠢ
ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠪᠣᠯᠤᠶᠠ ᠭᠡᠳ
ᠥᠯᠵᠡᠢ ᠶᠠᠭᠠᠷᠠᠨ ᠠᠯᠬᠤᠭᠰᠠᠭᠠᠷ
ᠥᠷᠥᠭᠡᠨ ᠳ᠋ᠡᠭᠡᠨ ᠶᠠᠪᠤᠭᠠᠳ ᠣᠷᠣᠯᠠ᠃
ᠤᠭ ᠨᠢ ᠡᠨᠡ ᠬᠡᠦᠬᠡᠨ
ᠠᠭᠤᠷᠲᠠᠢ ᠴᠦ᠍ ᠭᠡᠰᠡᠨ ᠤᠬᠠᠭᠠᠨ ᠲᠠᠢ
ᠤᠷᠢᠳᠤ ᠨᠢ ᠭᠡᠷᠯᠡᠵᠦ ᠦᠵᠡᠭᠡ ᠦᠭᠡᠢ
ᠤᠶᠠᠨ ᠴᠠᠭᠠᠨ ᠰᠠᠨᠠᠭᠠ ᠲᠠᠢ᠁
ᠭᠡᠳ ᠡᠨᠡ ᠤᠳᠠᠭᠠ ᠴᠦ᠍
ᠭᠡᠷᠭᠡᠢ ᠬᠥᠮᠦᠨ ᠦ᠌ ᠵᠠᠩ ᠢ᠋ᠶ᠋ᠠᠷ
ᠪᠠᠢᠨ ᠪᠠᠢᠭᠰᠠᠭᠠᠷ ᠵᠠᠮᠪᠠᠯ ᠢ᠋
ᠪᠠᠭᠠ ᠪᠣᠯᠪᠠᠴᠤ ᠬᠠᠷᠠᠳᠠᠪᠠ᠁
ᠤᠮᠳᠠ ᠬᠣᠭᠣᠯᠠ ᠪᠠᠨ ᠪᠡᠯᠡᠳᠬᠡᠭᠡᠳ
ᠤᠬᠢᠶᠠᠵᠤ ᠠᠷᠴᠢᠵᠤ ᠳᠠᠭᠤᠰᠤᠭᠠᠳ
ᠵᠠᠮᠪᠠᠯ ᠢ᠋ ᠬᠦᠯᠢᠶᠡᠵᠦ ᠰᠠᠭᠤᠬᠤ ᠳ᠋ᠠᠭᠠᠨ
ᠵᠠᠮᠪᠠᠭᠠ ᠶ᠋ᠢᠨ ᠵᠠᠬᠢᠶᠠ ᠶ᠋ᠢ ᠵᠠᠳᠠᠯᠤᠯᠠ᠃
ᠲᠠᠰᠢᠭᠤ ᠱᠤᠭᠤᠮ ᠲᠠᠢ ᠴᠠᠭᠠᠰᠤᠨ ᠳ᠋ᠤ᠌
ᠲᠠᠲᠠᠯᠠᠯ ᠦᠭᠡᠢ ᠪᠢᠴᠢᠭᠰᠡᠨ
ᠪᠦᠰᠡᠭᠦᠢ ᠶ᠋ᠢᠨ ᠴᠡᠪᠡᠷᠬᠡᠨ ᠪᠢᠴᠢᠭ ᠢ᠋
ᠪᠦᠭᠦᠳᠡ ᠶ᠋ᠢ ᠨᠢ ᠲᠡᠷᠡ ᠤᠩᠰᠢᠯᠠ᠁
ᠡᠯᠢᠭᠡ ᠵᠢᠷᠦᠬᠡᠨ ᠦ᠌ ᠤᠭ ᠡᠴᠡ
ᠡᠨᠡᠯᠦᠨ ᠪᠠᠢᠵᠤ ᠪᠢᠴᠢᠭᠰᠡᠨ
ᠡᠨᠡ ᠵᠠᠬᠢᠳᠠᠯ ᠤ᠋ᠨ ᠲᠤᠷᠰᠢ
ᠡᠷᠬᠢᠮ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢᠨ
ᠪᠥᠭᠡᠮ ᠪᠥᠭᠡᠮ ᠨᠢᠯᠪᠤᠰᠤ
ᠪᠥᠮᠪᠥᠷᠢᠨ ᠤᠨᠠᠭᠰᠠᠨ ᠪᠣᠯᠤᠯᠲᠠᠢ
ᠴᠡᠩᠬᠡᠷ ᠪᠡᠬᠡ ᠨᠢ ᠨᠡᠭᠦᠵᠦ
ᠴᠡᠪᠡᠷ ᠴᠠᠭᠠᠰᠤ ᠨᠢ ᠬᠠᠯᠲᠠᠷᠲᠤᠵᠠᠢ᠃
ᠤᠩᠰᠢᠵᠤ ᠳᠠᠭᠤᠰᠤᠭᠠᠳ ᠥᠯᠵᠡᠢ
ᠤᠳᠠᠭᠠᠨ ᠪᠣᠯᠲᠠᠯᠠ ᠪᠣᠳᠣᠯᠠ᠂
ᠬᠠᠷᠠᠳᠠᠵᠤ ᠲᠡᠮᠡᠴᠡᠬᠦ ᠰᠡᠳᠬᠢᠯ ᠨᠢ
ᠬᠠᠴᠢᠨ ᠭᠤᠨᠢᠭ ᠢ᠋ᠶ᠋ᠠᠷ ᠰᠣᠯᠢᠭᠳᠠᠯᠠ᠁
ᠠᠮᠠᠷᠠᠭ ᠳᠤᠷᠠᠯᠠᠯ ᠤ᠋ᠨ ᠲᠤᠬᠠᠢ
ᠠᠩᠬᠠ ᠤᠳᠠᠭᠠ ᠪᠠᠨ ᠡᠷᠭᠢᠴᠡᠭᠦᠯᠵᠦ
ᠲᠤᠭᠤᠯᠵᠤ ᠢᠷᠡᠭᠰᠡᠨ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ
ᠲᠤᠩᠭᠠᠵᠤ ᠪᠠᠰᠠ ᠪᠤᠳᠤᠯᠴᠠᠯᠠ᠁
《ᠢᠴᠢᠮᠡᠷ ᠁ ᠠᠶᠤᠮᠠᠷ ᠶᠤᠮ
ᠶᠡᠬᠡᠩᠬᠢ ᠳ᠋ᠡᠭᠡᠨ ᠨᠠᠳᠠ ᠡᠴᠡ ᠪᠣᠯᠤᠭᠠᠳ
ᠬᠣᠷᠢᠨ ᠨᠢᠭᠡᠲᠡᠢ ᠪᠦᠰᠡᠭᠦᠢ
ᠬᠣᠷᠸᠠ ᠡᠴᠡ ᠬᠠᠭᠠᠴᠠᠯᠠ ᠭᠡᠵᠦ ᠤᠤ?᠁
ᠶᠠᠭᠠᠬᠢᠨᠠ ᠡ! ᠬᠥᠭᠡᠷᠦᠬᠦᠢ ᠲᠡᠭᠦᠨ ᠦ᠌
ᠶᠠᠳᠠᠭᠤ ᠵᠢᠭᠠᠬᠠᠨ ᠲᠣᠯᠣᠭᠠᠢ ᠳ᠋ᠤ᠌
ᠡᠨᠡ ᠨᠠᠰᠤ ᠪᠠᠨ ᠳᠠᠭᠤᠰᠬᠠᠬᠤ
ᠡᠴᠦᠰ ᠦ᠋ᠨ ᠲᠡᠷᠡᠬᠡᠨ ᠮᠥᠴᠡ ᠳ᠋ᠦ᠍
ᠮᠢᠨᠦ ᠲᠤᠬᠠᠢ ᠮᠠᠭᠠᠳ
ᠮᠡᠳᠡᠵᠦ ᠪᠠᠢᠭᠰᠠᠨ ᠪᠣᠯ
ᠳᠠᠯᠠᠢ ᠲᠠᠩᠭᠢᠰ ᠡᠴᠡ ᠴᠦ᠍ ᠢᠯᠡᠭᠦᠦ
ᠳᠠᠩᠴᠤ ᠶᠡᠬᠡ ᠭᠣᠮᠣᠳᠠᠭᠠ ᠳᠠ!᠁
ᠬᠠᠯᠠᠭᠤᠨ ᠵᠢᠰᠦ ᠪᠡᠷ ᠠᠭᠤᠯᠵᠠᠭᠠ ᠦᠭᠡᠢ ᠴᠦ᠍
ᠬᠠᠷᠠᠴᠤᠤᠯ᠂ ᠵᠠᠪᠬᠠᠢ ᠶ᠋ᠢᠨ ᠭᠠᠢ ᠪᠠᠷ
ᠬᠠᠮᠢᠶᠠᠲᠠᠢ ᠪᠣᠯᠵᠤ ᠨᠥᠭᠴᠢᠭᠰᠡᠨ
ᠬᠠᠢᠷᠠᠨ ᠰᠠᠢᠬᠠᠨ ᠠᠮᠢᠲᠠᠨ ᠮᠢᠨᠢ
ᠲᠡᠨᠡᠭ ᠪᠢ ᠴᠢᠨᠢ ᠣᠳᠣ ᠶᠠᠭᠠᠬᠢᠵᠤ
ᠲᠡᠷᠡ ᠨᠢᠭᠦᠯ ᠢ᠋ᠶ᠋ᠡᠨ ᠠᠷᠢᠯᠭᠠᠬᠤ ᠪᠢᠯᠡ?
ᠶᠠᠭᠠᠬᠢᠵᠤ ᠪᠢ ᠵᠠᠮᠪᠠᠭᠠ ᠴᠢᠨᠦ ᠪᠡᠨ
ᠢᠨᠠᠭ ᠤ᠋ᠨ ᠬᠣᠬᠢᠷᠠᠯ ᠢ᠋ ᠲᠥᠯᠥᠬᠦ ᠪᠢᠯᠡ?
ᠨᠢᠭᠡᠨᠲᠡ ᠴᠠᠭ ᠨᠢ ᠥᠩᠭᠡᠷᠡᠭᠰᠡᠨ ᠴᠦ᠍ ᠭᠡᠰᠡᠨ
ᠨᠡᠷᠡᠲᠡᠢ ᠬᠥᠮᠦᠨ ᠦ᠌ ᠵᠢᠰᠦᠲᠡᠢ ᠬᠡᠦᠬᠡᠨ ᠠ᠋ ᠪᠢ!
ᠢᠵᠢᠯᠬᠡᠨ ᠪᠦᠰᠡᠭᠦᠢ ᠴᠢᠨᠦ ᠪᠡᠨ ᠭᠡᠷᠢᠶᠡᠰ ᠢ᠋
ᠢᠩᠭᠢᠵᠦ ᠵᠦᠭᠡᠷ ᠰᠣᠨᠣᠰᠴᠤ ᠴᠢᠳᠠᠬᠤ ᠦᠭᠡᠢ ᠠ᠋!
ᠵᠢᠷᠭᠠᠯ ᠴᠡᠩᠭᠡᠯ ᠭᠡᠳᠡᠭ ᠴᠢᠨᠢ
ᠡᠢᠮᠦ ᠰᠣᠬᠣᠷ ᠡᠳ᠋ ᠶᠤᠮ ᠪᠣᠢ
ᠵᠠᠮᠪᠠᠯ ᠭᠡᠳᠡᠭ ᠬᠥᠮᠦᠨ ᠴᠢᠨᠢ
ᠢᠩᠭᠢᠬᠦ ᠳ᠋ᠦ᠍ ᠶᠠᠮᠠᠷ ᠪᠣᠢ?
ᠡᠪᠦᠯ ᠠᠩᠬᠠ ᠲᠠᠨᠢᠯᠴᠠᠬᠤ ᠳ᠋ᠤ᠌
ᠥᠪᠡᠷ ᠦ᠋ᠨ ᠮᠡᠷᠭᠡᠵᠢᠯ ᠢ᠋ᠶ᠋ᠡᠨ ᠬᠥᠭᠡᠭᠡᠭᠰᠡᠭᠡᠷ
ᠡᠳᠦᠢ ᠪᠣᠯᠲᠠᠯᠠ ᠭᠡᠷᠯᠡᠭᠡ ᠦᠭᠡᠢ ᠭᠡᠵᠦ
ᠥᠩᠭᠡ ᠶ᠋ᠢᠨ ᠦᠭᠡ ᠪᠡᠷ ᠬᠠᠭᠤᠷᠴᠠᠢ!
ᠤᠶᠠᠷᠠᠨ ᠬᠠᠢᠷᠠᠯᠠᠬᠤ ᠪᠦᠬᠦᠨ ᠳ᠋ᠦ᠍ ᠮᠢᠨᠢ
ᠤᠷᠢᠳ ᠨᠢ ᠢᠩᠭᠢᠭᠦᠯᠵᠦ ᠦᠵᠡᠭᠡ ᠦᠭᠡᠢ ᠭᠡᠵᠦ
ᠪᠠᠯᠠᠢ ᠬᠤᠳᠠᠯ ᠦᠭᠡ ᠪᠡᠷ ᠢ᠋ᠶ᠋ᠡᠨ
ᠪᠠᠰᠠ ᠨᠠᠮᠠᠶ᠋ᠢ ᠮᠡᠬᠡᠯᠡᠵᠡᠢ!᠁》
ᠥᠯᠵᠡᠢ ᠢᠩᠭᠢᠵᠦ ᠪᠣᠳᠣᠭᠰᠠᠭᠠᠷ
ᠥᠪᠡᠷ ᠢ᠋ ᠪᠡᠨ ᠵᠢᠮᠡᠯᠡᠵᠦ᠂ ᠵᠠᠮᠪᠠᠭᠠ ᠶ᠋ᠢ
ᠥᠷᠥᠪᠳᠦᠨ ᠥᠷᠥᠪᠳᠦᠨ ᠤᠬᠢᠯᠠᠯᠠ᠂
ᠥᠷᠥᠭᠡᠨ ᠦ᠌ ᠬᠠᠭᠠᠯᠭᠠ ᠴᠦ᠍ ᠳᠤᠤᠭᠠᠷᠤᠯᠠ᠁
ᠡᠩᠭᠡ ᠶ᠋ᠢᠨ ᠲᠠᠢᠪᠤᠩ ᠴᠢᠷᠠᠢᠯᠠᠭᠰᠠᠭᠠᠷ
ᠣᠷᠣᠭᠠᠳ ᠢᠷᠡᠯᠡ ᠵᠠᠮᠪᠠᠯ᠁
ᠥᠨᠥᠬᠢ ᠵᠠᠬᠢᠳᠠᠯ ᠢ᠋ᠶ᠋ᠠᠨ ᠨᠢᠭᠤᠭᠠᠳ
ᠥᠯᠵᠡᠢ ᠨᠢᠭᠤᠷ ᠢ᠋ᠶ᠋ᠠᠨ ᠪᠤᠷᠤᠭᠤᠯᠠᠭᠠᠳ
ᠢᠨᠠᠭ ᠵᠥᠭᠡᠯᠡᠨ ᠳᠠᠭᠤ ᠪᠠᠷ ᠢ᠋ᠶ᠋ᠠᠨ
| ᠶᠠᠳᠠᠷᠠᠪᠠ ᠤᠤ ᠭᠡᠵᠦ ᠠᠰᠠᠭᠤᠭᠠᠳ
ᠶᠠᠭᠠᠨ ᠫᠠᠩᠰᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ
ᠨᠢᠳᠦ ᠪᠡᠨ ᠪᠤᠰᠢᠭᠤᠬᠠᠨ ᠠᠷᠴᠢᠯᠠ᠃
| ᠠᠵᠢᠯ ᠴᠦ᠍ ᠬᠦᠨᠳᠦ ᠯᠡ ᠪᠠᠢᠨᠠ ᠭᠡᠵᠦ
ᠠᠵᠢᠭ ᠦᠭᠡᠢ ᠵᠠᠮᠪᠠᠯ ᠬᠠᠷᠢᠭᠤᠯᠤᠨᠠ᠂
ᠬᠠᠪᠢ ᠶ᠋ᠢᠨ ᠭᠠᠵᠠᠷ ᠢ᠋ᠶ᠋ᠠᠷ ᠦᠰᠦᠴᠢᠭᠦᠯᠵᠦ
ᠬᠠᠮᠠᠷ ᠳᠤᠬᠤ ᠪᠠᠨ ᠤᠬᠢᠶᠠᠨᠠ᠃
ᠦᠳᠡᠰᠢ ᠶ᠋ᠢᠨ ᠴᠠᠢ ᠪᠠᠨ ᠤᠤᠭᠤᠵᠤ
ᠦᠭᠡ ᠶᠠᠷᠢᠶᠠ ᠳᠡᠯᠭᠡᠭᠰᠡᠭᠡᠷ
ᠵᠠᠮᠪᠠᠯ ᠢ᠋ ᠢᠨᠢᠶᠡᠵᠦ ᠰᠠᠭᠤᠬᠤ ᠳ᠋ᠤᠨᠢ
ᠵᠠᠬᠢᠳᠠᠯ ᠢ᠋ ᠭᠡᠨᠡᠳᠲᠡ ᠥᠭᠭᠦᠯᠡ᠁
ᠠᠪᠤᠭᠠᠳ ᠵᠠᠮᠪᠠᠯ ᠲᠡᠨᠢᠢᠯᠭᠡᠪᠡ᠁
ᠠᠶᠠᠲᠠᠢ ᠴᠢᠷᠠᠢ ᠨᠢ ᠪᠠᠷᠤᠰ ᠬᠢᠪᠡ
ᠠᠶᠠᠭᠠᠲᠠᠢ ᠴᠠᠢ ᠪᠠᠨ ᠲᠠᠯᠪᠢᠵᠠᠨᠠᠪᠠ ᠁
ᠠᠬᠢᠭᠠᠳ ᠬᠡᠰᠡᠭ ᠪᠣᠳᠣᠵᠠᠨᠠᠪᠠ᠁
ᠬᠥᠮᠦᠨ ᠪᠣᠯᠬᠤ ᠪᠠᠷ ᠰᠠᠨᠳᠤᠷᠤᠭᠠ ᠯᠠ ᠪᠢᠵᠡ
ᠬᠦᠢᠲᠡᠨ ᠭᠤᠨᠢᠭ ᠣᠨᠳᠣᠷᠣᠭᠠ ᠯᠠ ᠪᠢᠵᠡ
ᠤᠭ ᠨᠢ ᠥᠯᠵᠡᠢ ᠵᠠᠮᠪᠠᠯ ᠢ᠋
ᠠᠭᠤᠴᠢᠯᠠᠵᠤ ᠮᠠᠭᠠᠳ ᠦᠭᠡᠢ ᠪᠠᠢᠭᠰᠠᠨ ᠶᠤᠮ᠂
ᠤᠢᠳᠬᠠᠷᠲᠤ ᠵᠠᠬᠢᠳᠠᠯ ᠤ᠋ᠨ ᠲᠤᠬᠠᠢ ᠳ᠋ᠤ᠌
ᠤᠬᠢᠯᠠᠭᠠᠳ ᠥᠩᠭᠡᠷᠡᠵᠦ ᠴᠦ᠍ ᠮᠡᠳᠡᠬᠦ ᠪᠠᠢᠭᠰᠠᠨ ᠶᠤᠮ
ᠭᠡᠲᠡᠯᠡ ᠡᠨᠡ ᠵᠠᠬᠢᠳᠠᠯ ᠢ᠋
ᠭᠡᠮᠲᠦ ᠬᠥᠮᠦᠨ ᠨᠢ ᠤᠩᠰᠢᠬᠤ ᠳ᠋ᠠᠭᠠᠨ
ᠥᠷᠦᠪᠳᠦᠬᠦ ᠰᠡᠳᠬᠢᠯ ᠦ᠋ᠨ ᠳᠡᠭᠡᠳᠦ ᠪᠡᠷ
ᠥᠯᠵᠡᠢ ᠶ᠋ᠢᠨ ᠠᠳᠠᠯᠢ ᠴᠦ᠍ ᠡᠬᠢᠯᠡᠭᠰᠡᠨ ᠦᠭᠡᠢ
ᠵᠢᠷ ᠦ᠋ᠨ ᠨᠢᠭᠡᠨ ᠵᠠᠬᠢᠳᠠᠯ ᠰᠢᠭ᠋
ᠵᠢᠭᠳᠡ ᠲᠠᠢᠪᠤᠩ ᠤᠩᠰᠢᠭᠠᠳ
ᠵᠢᠱᠢᠮ ᠴᠦ᠍ ᠦᠭᠡᠢ ᠴᠢᠷᠠᠢᠯᠠᠭᠠᠳ
ᠰᠢᠷᠡᠭᠡᠨ ᠳᠡᠭᠡᠷᠡ ᠪᠡᠨ ᠬᠠᠶᠠᠴᠢᠬᠠᠪᠠ᠂
ᠪᠡᠶᠡ᠂ ᠰᠡᠳᠬᠢᠯ ᠦ᠋ᠨ ᠬᠢᠨᠢ ᠪᠠᠢᠳᠠᠯ ᠢ᠋
ᠪᠢᠲᠡᠭᠦᠬᠡᠨ ᠠᠵᠢᠵᠤ ᠰᠠᠭᠤᠬᠤ ᠳ᠋ᠠᠭᠠᠨ
《ᠪᠢ ᠢᠩᠭᠢᠵᠦ ᠪᠢᠴᠢᠭᠰᠡᠨ ᠪᠣᠯ
ᠪᠠᠰᠠ ᠯᠠ ᠢᠩᠭᠢᠵᠦ ᠤᠩᠰᠢᠬᠤ ᠨᠢ ᠠ᠋ ?》
ᠭᠡᠵᠦ ᠳᠣᠲᠣᠷᠠ ᠪᠠᠨ ᠰᠡᠳᠬᠢᠭᠡᠳ
ᠭᠡᠨᠡᠳᠲᠡ ᠶ᠋ᠢᠨ ᠠᠭᠤᠷ ᠨᠢ ᠬᠦᠷᠦᠯᠡ᠂
ᠡᠷᠬᠡ ᠲᠠᠩᠬᠢᠯ ᠤ᠋ᠨ ᠠᠭᠤᠷ ᠢ᠋ᠶ᠋ᠠᠨ ᠥᠯᠵᠡᠢ
ᠡᠨᠳᠡ ᠭᠠᠷᠭᠠᠬᠤ ᠪᠠᠷ ᠰᠢᠢᠳᠦᠯᠡ᠃
ᠬᠡᠦᠬᠡᠨ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠡᠴᠡ
ᠬᠦᠰᠡᠯ ᠬᠠᠢᠷᠠ ᠨᠢ ᠠᠷᠢᠯᠵᠤ
ᠬᠦᠢᠲᠡᠨ ᠭᠤᠨᠢᠭ ᠤ᠋ᠨ ᠤᠶᠠᠷᠠᠯ ᠨᠢ
ᠬᠦᠴᠦ ᠪᠡᠨ ᠠᠪᠤᠨ ᠳᠦᠷᠡᠯᠵᠡᠵᠦ
ᠳᠥᠯᠭᠡᠨ ᠬᠠᠷᠠᠭᠠᠲᠤ ᠨᠢᠳᠦ ᠨᠢ
ᠳᠥᠯᠥ ᠪᠠᠳᠠᠷᠠᠨ ᠭᠢᠯᠠᠯᠵᠠᠵᠤ
ᠡᠮᠦᠨᠡᠬᠢ ᠰᠢᠷᠡᠭᠡ ᠪᠡᠨ ᠲᠦᠯᠬᠢᠴᠢᠬᠡᠭᠡᠳ
ᠥᠭᠡᠳᠡ ᠡᠴᠡ ᠨᠢ ᠡᠷᠡᠰᠯᠡᠨ ᠵᠣᠭᠰᠣᠪᠠ᠁
ᠰᠢᠯ ᠱᠠᠵᠠᠩ ᠥᠩᠬᠥᠷᠢᠯᠳᠦᠵᠦ
ᠰᠢᠩᠭᠡᠨ ᠳᠠᠭᠤ ᠪᠠᠷ ᠬᠠᠭᠠᠷᠠᠯᠠ
| ᠵᠠ ᠶᠠᠭᠠᠬᠢᠴᠢᠬᠠᠪᠠ ᠭᠡᠵᠦ
ᠵᠠᠮᠪᠠᠯ ᠲᠡᠪᠡᠳᠡᠨ ᠠᠰᠠᠭᠤᠯᠠ
《ᠢᠴᠢᠨᠡ ᠭᠡᠳᠡᠭ ᠢ᠋ᠶ᠋ᠡᠨ ᠮᠠᠷᠲᠠᠭᠰᠠᠨ
ᠢᠯᠭᠢ ᠨᠠᠭᠠᠭᠰᠠᠨ ᠨᠢᠭᠤᠷ ᠪᠣᠢ?
ᠵᠠ ᠶᠠᠭᠠᠬᠢᠴᠢᠬᠠᠪᠠ ᠭᠡᠨᠡ ᠠ᠋?
ᠵᠠᠮᠪᠠᠭᠠ! ᠵᠠᠮᠪᠠᠭᠠ᠁ ᠮᠡᠳᠡᠪᠡ ᠤᠤ?
ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠵᠢᠷᠦᠬᠡᠨ ᠡᠴᠡ
ᠡᠴᠦᠰ ᠦ᠋ᠨ ᠭᠣᠮᠣᠳᠠᠯ ᠢ᠋ ᠨᠢ ᠰᠣᠨᠣᠰᠤᠭᠠᠳ
ᠬᠠᠢᠷᠠᠨ ᠰᠠᠢᠬᠠᠨ ᠠᠮᠢ ᠶ᠋ᠢ ᠨᠢ
ᠬᠠᠷᠠ ᠰᠠᠪᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠰᠤᠯᠤᠭᠠᠳ
ᠡᠳ᠋ᠯᠡᠭᠰᠡᠨ ᠬᠠᠮᠤᠭ ᠵᠣᠪᠠᠯᠠᠩ ᠢ᠋ ᠨᠢ
ᠡᠨᠡᠯᠦᠨ ᠤᠷᠤᠰᠤᠭᠰᠠᠨ ᠨᠢᠯᠪᠤᠰᠤ ᠶ᠋ᠢ ᠨᠢ
ᠲᠠᠯᠬᠠ ᠰᠢᠬᠢᠷ ᠲᠡᠢ ᠬᠣᠯᠢᠭᠠᠳ
ᠲᠠᠮᠰᠢᠶᠠᠯᠠᠵᠤ ᠢᠨᠢᠶᠡᠵᠦ ᠰᠠᠭᠤᠨᠠ ᠡ᠂ ᠴᠢ?》
ᠥᠯᠵᠡᠢ ᠶ᠋ᠢᠨ ᠡᠨᠡ ᠦᠭᠡᠰ
ᠥᠷᠥᠭᠡᠨ ᠳᠣᠲᠣᠷᠠ ᠴᠤᠤᠷᠢᠶᠠᠯᠠᠵᠤ᠂
ᠠᠬᠢᠭᠠᠳ ᠪᠠᠰᠠ ᠦᠷᠭᠦᠯᠵᠢᠯᠡᠵᠦ
ᠠᠯᠠᠭᠠᠨ ᠤ᠋ ᠳᠠᠭᠤ ᠰᠣᠨᠣᠰᠲᠠᠯᠠ᠃
ᠠᠮᠠᠨ ᠳ᠋ᠠᠭᠠᠨ ᠲᠠᠮᠠᠬᠢ ᠵᠠᠭᠤᠭᠠᠳ
ᠠᠵᠢᠭ ᠦᠭᠡᠢ ᠰᠠᠭᠤᠭᠰᠠᠨ ᠵᠠᠮᠪᠠᠯ ᠤ᠋ᠨ
ᠠᠷᠢᠭ ᠬᠣᠶᠠᠷ ᠰᠢᠨᠡ ᠳ᠋ᠦ᠍ᠨᠢ
ᠠᠷᠪᠠᠨ ᠬᠤᠷᠤᠭᠤᠨ ᠤ᠋ ᠮᠥᠷ
ᠤᠯᠠᠢᠰ ᠭᠡᠵᠦ ᠲᠣᠳᠣᠷᠠᠭᠠᠳ
ᠤᠯᠠᠮ ᠤᠯᠠᠮ ᠬᠣᠷᠣᠰᠪᠠ
ᠠᠭᠤᠷ ᠨᠢ ᠬᠦᠷᠦᠭᠰᠡᠨ ᠵᠠᠮᠪᠠᠯ
ᠤᠬᠤᠰᠬᠢᠵᠦ ᠪᠣᠰᠪᠠ᠃
| ᠬᠡᠦᠬᠡᠨ ᠵᠠᠮᠪᠠᠭᠠ ᠶ᠋ᠢᠨ ᠬᠣᠭᠣᠯᠠᠢ ᠶ᠋ᠢ
ᠪᠢ ᠣᠴᠢᠵᠤ ᠣᠭᠲᠣᠯᠤᠭᠠ ᠶᠣ?
ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠬᠠᠯᠳᠠᠬᠤ
ᠴᠢ ᠶᠠᠭᠤ ᠶᠤᠮ ᠪᠣᠢ? ᠭᠡᠵᠦ
ᠥᠨᠳᠥᠷ ᠳᠠᠭᠤ ᠪᠠᠷ ᠵᠠᠩᠳᠤᠷᠴᠤ
ᠥᠷᠥᠭᠡᠰᠦᠨ ᠭᠠᠷ ᠢ᠋ᠶ᠋ᠠᠨ ᠳᠠᠯᠠᠢᠵᠤ
ᠡᠮᠦᠨᠡ ᠪᠡᠨ ᠵᠣᠭᠰᠣᠭᠰᠠᠨ ᠬᠡᠦᠬᠡᠨ ᠢ᠋
ᠥᠩᠬᠥᠷᠢᠵᠦ ᠤᠨᠠᠮᠠᠷ ᠳᠡᠯᠡᠰᠪᠡ᠃
ᠭᠡᠪᠡᠴᠦ᠂ ᠥᠯᠵᠡᠢ ᠣᠢᠴᠢᠭᠰᠠᠨ ᠦᠭᠡᠢ
ᠭᠡᠳᠡᠷᠭᠦ ᠪᠡᠨ ᠬᠣᠶᠠᠷ ᠠᠯᠬᠤᠵᠤ
ᠲᠡᠩᠴᠡᠭᠦᠷᠢ ᠪᠡᠨ ᠣᠯᠵᠤ ᠵᠣᠭᠰᠣᠭᠠᠳ
ᠲᠡᠨᠳᠡ ᠪᠡᠨ ᠲᠠᠯᠪᠢᠭᠠᠰᠤᠲᠠᠢ ᠪᠠᠢᠭᠰᠠᠨ
ᠬᠣᠷᠢᠨ ᠳᠣᠯᠣᠭᠠ ᠶ᠋ᠢᠨ ᠲᠦᠯᠬᠢᠭᠦᠷ ᠢ᠋
ᠬᠣᠷᠣᠮ ᠤ᠋ᠨ ᠲᠡᠳᠦᠢ ᠰᠢᠭᠦᠷᠦᠯᠡ
《ᠭᠠᠬᠠᠢ》ᠴᠢᠯᠠᠭᠤᠳᠠᠵᠤ ᠲᠣᠭᠯᠠᠳᠠᠭ
ᠭᠠᠷ ᠤ᠋ᠨ ᠲᠦᠢ ᠪᠡᠨ ᠭᠠᠷᠭᠠᠯᠠ᠃
ᠴᠢᠳᠠᠮᠠᠭ ᠲᠦᠷᠭᠡᠨ ᠭᠠᠷ ᠡᠴᠡ ᠨᠢ
ᠴᠢᠪᠬᠠᠳᠠᠵᠤ ᠮᠤᠯᠲᠤᠷᠠᠭᠰᠠᠨ ᠲᠦᠯᠬᠢᠭᠦᠷ
ᠵᠠᠢᠯᠠᠵᠤ ᠮᠡᠨᠳᠦ ᠭᠠᠷᠬᠤ ᠶ᠋ᠢᠨ
ᠵᠠᠪᠳᠤᠯ ᠥᠭᠭᠦᠯ ᠦᠭᠡᠢ ᠲᠤᠰᠬᠤ ᠳ᠋ᠤ᠌
ᠲᠦᠯᠬᠢᠭᠦᠷ᠂ ᠵᠠᠮᠪᠠᠯ ᠬᠣᠶᠠᠷ
ᠲᠦᠷᠭᠡᠨ ᠭᠡᠭᠴᠢ ᠤᠨᠠᠯᠠ᠂
ᠲᠡᠭᠦᠨ ᠢ᠋ ᠬᠠᠷᠠᠭᠠᠳ ᠥᠯᠵᠡᠢ
ᠬᠡᠪ ᠭᠡᠨᠡᠳᠲᠡ ᠠᠶᠤᠯᠠ᠃
ᠠᠭᠤᠷ ᠨᠢ ᠬᠡᠳᠦᠢ ᠰᠢᠲᠠᠭᠰᠠᠨ ᠴᠦ᠍
ᠤᠶᠠᠬᠠᠨ ᠵᠢᠷᠦᠬᠡ ᠨᠢ ᠴᠡᠴᠡᠷᠡᠨᠡ᠂
《ᠠᠢ ᠶᠠᠭᠠᠬᠢᠨᠠ ᠡ!》ᠭᠡᠵᠦ
ᠠᠮᠠᠨ ᠳᠣᠲᠣᠷᠠ ᠪᠠᠨ ᠰᠢᠪᠡᠨᠡᠨᠡ᠃
ᠰᠢᠳᠡᠭᠰᠡᠨ ᠲᠦᠯᠬᠢᠭᠦᠷ ᠢ᠋ᠶ᠋ᠡᠨ ᠠᠪᠤᠭᠠᠳ
ᠰᠢᠷᠪᠢᠵᠦ ᠨᠢᠭᠡ ᠬᠠᠷᠠᠪᠠᠯ
ᠨᠣᠢᠲᠠᠨ ᠪᠣᠯᠤᠭᠰᠠᠨ ᠶᠠᠭᠤᠮᠠ ᠦᠭᠡᠢ ᠰᠢᠭ
ᠨᠠᠭᠠᠯᠳᠤᠭᠰᠠᠨ ᠪᠠᠷᠢᠭᠰᠠᠨ ᠴᠢᠰᠤ ᠦᠭᠡᠢ ᠰᠢᠭ᠁
ᠲᠡᠭᠡᠲᠡᠯᠡ ᠴᠦ᠍ ᠵᠠᠮᠪᠠᠯ ᠥᠨᠳᠡᠢᠯᠡ
ᠲᠡᠨᠳᠡ ᠪᠡᠨ ᠪᠣᠰᠤᠭᠠᠳ ᠰᠠᠭᠤᠴᠢᠬᠠᠯᠠ᠃
ᠪᠠᠷᠢᠭᠰᠠᠨ ᠲᠦᠯᠬᠢᠭᠦᠷ ᠢ᠋ ᠨᠢ ᠬᠠᠷᠠᠮᠠᠭᠴᠠ
ᠪᠠᠰᠠ ᠳᠠᠬᠢᠨ ᠳᠠᠯᠳᠢᠷᠠᠯᠠ᠃
《ᠠᠶᠤᠬᠤ ᠶᠠᠭᠤᠮᠠ ᠦᠭᠡᠢ ᠵᠠᠮᠪᠠᠯ!
ᠠᠬᠢᠭᠠᠳ ᠪᠢ ᠴᠣᠬᠢᠬᠤ ᠦᠭᠡᠢ
ᠣᠷᠣᠢ ᠦᠳᠡᠰᠢ ᠴᠦ᠍ ᠪᠣᠯᠤᠯᠠ
ᠣᠳᠣ ᠲᠠ ᠶᠠᠪᠤ ᠳᠠ᠃
ᠡᠢᠮᠦ ᠬᠥᠮᠦᠨ ᠢ᠋ ᠤᠨᠲᠠᠭᠤᠯᠬᠤ ᠡᠴᠡ ᠪᠠᠨ
ᠢᠴᠢᠵᠦ ᠪᠠᠢᠨᠠ᠂ ᠠᠶᠤᠵᠤ ᠴᠦ᠍ ᠪᠠᠢᠨᠠ᠂
ᠨᠢᠭᠡ ᠶ᠋ᠢ ᠠᠯᠠᠭᠰᠠᠨ ᠬᠥᠮᠦᠨ ᠲᠠ
ᠨᠡᠮᠡᠵᠦ ᠪᠠᠰᠠ ᠢᠲᠡᠭᠡᠯ ᠦᠭᠡᠢ ᠪᠠᠢᠨᠠ᠃
ᠴᠥᠬᠥᠷᠡᠯ᠂ ᠭᠤᠨᠢᠭ ᠤ᠋ᠨ ᠦᠨᠡ ᠪᠡᠷ
ᠬᠤᠯᠠᠭᠠᠢᠯᠠᠵᠤ ᠬᠢᠮᠤᠰᠤᠯᠠᠵᠤ ᠠᠪᠴᠢᠷᠠᠭᠰᠠᠨ
ᠴᠥᠭᠡᠬᠡᠨ ᠬᠣᠨᠣᠭ ᠤ᠋ᠨ ᠵᠢᠷᠭᠠᠯ ᠳ᠋ᠤ᠌
ᠬᠤᠷᠤᠭᠤ ᠲᠥᠷᠥᠭᠰᠡᠨ ᠳ᠋ᠡᠭᠡᠨ ᠢᠴᠢᠵᠦ ᠪᠠᠢᠨᠠ》
ᠥᠯᠵᠡᠢ ᠢᠩᠭᠢᠵᠦ ᠬᠡᠯᠡᠭᠡᠳ
ᠥᠷᠥᠭᠡᠨ ᠳᠣᠲᠣᠷᠠᠬᠢ ᠪᠠᠨ ᠶᠠᠩᠵᠤᠯᠠᠪᠠ᠂
| ᠪᠢ ᠴᠦ᠍ ᠭᠠᠢᠭᠤᠢ᠂ ᠴᠢ ᠯᠡ ᠠᠯᠠᠬᠤ ᠨᠢ ᠭᠡᠵᠦ
ᠪᠡᠶᠡ ᠪᠡᠨ ᠥᠮᠥᠭᠡᠷᠡᠵᠦ ᠵᠠᠮᠪᠠᠯ ᠳᠤᠤᠭᠠᠷᠪᠠ᠃
| ᠠᠮᠢᠳᠤᠷᠠᠯ ᠰᠡᠳᠬᠢᠯ ᠦ᠋ᠨ ᠣᠨᠴᠠᠯᠢᠭ ᠢ᠋ᠶ᠋ᠠᠷ
ᠠᠳᠠᠯᠢᠬᠠᠨ ᠲᠥᠷᠥᠭᠰᠡᠨ ᠦ᠌ ᠬᠤᠪᠢ ᠳ᠋ᠤ᠌
ᠠᠩᠬᠢᠯ ᠵᠠᠮᠪᠠᠭᠠ ᠶ᠋ᠢᠨ ᠣᠷᠣᠨ ᠡᠴᠡ
ᠠᠯᠠᠮᠠᠷ ᠶᠤᠮ᠂ ᠴᠢᠮᠠᠶ᠋ᠢ!
ᠲᠡᠭᠡᠪᠡᠴᠦ ᠪᠦᠰᠡᠭᠦᠢ ᠬᠥᠮᠦᠨ ᠳ᠋ᠦ᠍
ᠲᠡᠢᠮᠦ ᠵᠢᠷᠦᠬᠡ ᠪᠠᠢᠳᠠᠭ ᠦᠭᠡᠢ ᠶᠤᠮ
ᠲᠡᠭᠡᠭᠡᠵᠦ ᠭᠠᠷᠭᠠᠭᠠᠳ ᠲᠡᠪᠡᠷᠢᠵᠦ ᠥᠰᠬᠡᠬᠦ
ᠲᠡᠢᠮᠦ ᠯᠡ ᠬᠦᠰᠡᠯᠡᠩ ᠪᠠᠢᠳᠠᠭ ᠶᠤᠮ
ᠭᠡᠵᠦ ᠥᠯᠵᠡᠢ ᠵᠠᠩᠨᠠᠭᠰᠠᠭᠠᠷ
ᠭᠡᠷ ᠡᠴᠡ ᠪᠡᠨ ᠲᠡᠭᠦᠨ ᠢ᠋ ᠬᠥᠭᠡᠭᠡᠭᠰᠡᠭᠡᠷ
ᠬᠡᠯᠡᠭᠰᠡᠨ ᠪᠦᠬᠦᠨ ᠢ᠋ ᠨᠢ ᠪᠤᠷᠤᠭᠤᠳᠬᠠᠵᠤ
ᠬᠡᠳᠦᠨ ᠴᠠᠭ ᠭᠡᠷᠡᠯᠲᠦᠵᠡᠢ᠃
ᠲᠡᠭᠡᠭᠡᠳ ᠶᠠᠭᠤ ᠪᠣᠯᠤᠭᠰᠠᠨ ᠢ᠋
ᠲᠡᠮᠡᠴᠡᠵᠦ ᠬᠡᠴᠢᠨᠡᠭᠡᠨ ᠭᠡᠷᠡᠯᠲᠦᠭᠰᠡᠨ ᠢ᠋
ᠲᠡᠷᠢᠭᠦᠨ ᠵᠡᠷᠭᠡ ᠶ᠋ᠢᠨ ᠬᠣᠪᠴᠢᠨ ᠪᠢᠰᠢ
ᠲᠡᠮᠳᠡᠭᠯᠡᠵᠦ ᠪᠢᠴᠢᠭᠡᠳ ᠶᠠᠭᠠᠬᠢᠬᠤᠪ᠃
ᠮᠡᠳᠡᠬᠦ ᠡᠴᠡ᠂ ᠲᠡᠷᠡ ᠰᠥᠨᠢ
ᠮᠡᠴᠢᠳ ᠰᠢᠩᠭᠡᠵᠦ ᠪᠠᠢᠬᠤ ᠳ᠋ᠤ᠌
ᠮᠠᠯ ᠭᠠᠢᠬᠠᠭᠰᠠᠨ ᠵᠠᠮᠪᠠᠯ
ᠭᠤᠳᠤᠮᠵᠢᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠭᠰᠠᠨ ᠳ᠋ᠠᠭ᠁