ᠵᠤᠯᠠ-ᠷ ∙ ᠴᠣᠢᠨᠣᠮЗул-Р.Чойном Zul-R.Choinom
1654ᠵᠤᠯᠠ
ᠵᠣᠬᠢᠶᠠᠭᠴᠢ᠄ ᠮᠣᠩᠭᠣᠯ ᠤᠯᠤᠰ ᠤ᠋ᠨ
ᠨᠡᠷᠡᠲᠦ ᠢᠷᠠᠭᠤ ᠨᠠᠢᠷᠠᠭᠴᠢ ᠷ᠂ ᠴᠣᠢᠨᠣᠮ
ᠨᠠᠮᠳᠠᠭᠤ ᠵᠥᠭᠡᠯᠡᠨ ᠭᠡᠭᠡ ᠲᠡᠢ
ᠶᠡᠬᠡᠰ ᠪᠤᠭᠤᠷᠤᠯ ᠤ᠋ᠨ ᠢ᠋ᠶ᠋ᠠᠨ ᠵᠤᠯᠠ ᠡᠴᠡ
ᠨᠠᠰᠤᠨ ᠪᠠᠭᠠ ᠳ᠋ᠠᠭᠠᠨ ᠴᠢ ᠪᠢᠳᠡ
ᠠᠶᠤᠳᠠᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠨᠠ ᠤᠤ᠁
ᠠᠯᠲᠠᠩᠬᠠᠨ ᠲᠠᠯᠠ ᠶ᠋ᠢᠨ ᠬᠢᠷᠢ ᠪᠡᠷ
ᠠᠮᠢᠳᠤᠷᠠᠯ ᠤ᠋ᠨ ᠤᠷᠠᠨ ᠪᠢᠷ ᠢ᠋ᠶ᠋ᠡᠷ
ᠠᠮᠢᠯᠠᠭᠤᠯᠤᠩᠬᠠᠨ ᠵᠢᠷᠤᠭᠰᠠᠨ
ᠠᠭᠤᠤ ᠪᠠᠢᠭᠠᠯᠢ ᠶ᠋ᠢᠨ ᠵᠢᠷᠤᠭ
ᠦᠯᠦ ᠨᠡᠪᠲᠡᠷᠡᠬᠦ ᠬᠥᠰᠢᠭᠡ ᠪᠡᠷ
ᠬᠠᠭᠠᠬᠤ ᠠᠳᠠᠯᠢ ᠳᠠᠯᠳᠢᠷᠠᠪᠠ ᠂
ᠦᠳᠡᠰᠢ ᠬᠡᠮᠡᠬᠦ ᠲᠠᠩᠭᠢᠰ ᠲᠤ᠌
ᠦᠢᠬᠦ ᠠᠳᠠᠯᠢ ᠵᠠᠮᠬᠠᠷᠠᠪᠠ᠃
ᠠᠮᠲᠠᠲᠤ ᠪᠣᠳᠣᠯ ᠢ᠋ ᠤᠨᠳᠤᠷᠤᠭᠤᠯᠤᠭᠰᠠᠨ
ᠠᠨᠢᠷ ᠴᠢᠮᠡᠭᠡ ᠦᠭᠡᠢ ᠰᠥᠨᠢ
ᠠᠮᠠᠷᠠᠭ ᠬᠣᠣᠰ ᠢ᠋ ᠤᠴᠠᠷᠠᠭᠤᠯᠤᠭᠰᠠᠨ
ᠠᠮᠤᠷ ᠲᠠᠢᠪᠤᠩ ᠬᠠᠷᠠᠩᠭᠤᠢ
ᠪᠢᠷ ᠯᠡ ᠶᠠᠨᠳᠠᠢ ᠢ᠋ ᠨᠡᠢᠯᠡᠭᠦᠯᠦᠭᠰᠡᠨ
ᠪᠡᠬᠡ ᠶ᠋ᠢᠨ ᠰᠠᠩ ᠬᠥᠮᠥᠷᠭᠡ ᠰᠢᠭ
ᠪᠢᠯᠢᠭᠦᠨ ᠣᠳᠣᠨ ᠰᠢᠭᠢᠳᠬᠡᠭᠡ ᠲᠡᠢ
ᠪᠢᠲᠡᠭᠦᠦ ᠬᠢᠯᠢᠩ ᠨᠥᠮᠥᠷᠭᠡ ᠰᠢᠭ
ᠰᠢᠷᠬᠡᠭ ᠨᠡᠢᠯᠡᠭᠦᠯᠵᠦ ᠰᠠᠮᠨᠠᠭᠰᠠᠨ
ᠰᠢᠩᠭᠡᠨ ᠬᠠᠷᠠᠬᠠᠨ ᠭᠡᠵᠢᠭᠡ ᠰᠢᠭ
ᠰᠢᠢᠳᠴᠦ ᠶᠠᠳᠠᠨ ᠲᠤᠨᠢᠶᠠᠷᠲᠤᠭᠰᠠᠨ
ᠰᠢᠨᠡᠬᠡᠨ ᠪᠡᠷᠢ ᠶ᠋ᠢᠨ ᠬᠠᠷᠠᠴᠠ ᠰᠢᠭ᠋
ᠶᠡᠬᠡ ᠲᠠᠯᠠ ᠶ᠋ᠢ ᠰᠢᠷᠲᠡᠭᠰᠡᠭᠡᠷ
ᠶᠢᠯᠸᠢ ᠶ᠋ᠢᠨ ᠨᠣᠢᠷ ᠢ᠋ᠶ᠋ᠡᠷ ᠤᠨᠲᠠᠭᠤᠯᠪᠠ᠂
ᠢᠵᠢᠢ- ᠳᠠᠭᠢᠨᠢ ᠶ᠋ᠢᠨ ᠰᠢᠳᠢ ᠪᠡᠷ
ᠢᠯᠪᠢᠨ ᠬᠠᠢᠷᠠᠯᠠᠨ ᠪᠦᠪᠡᠢᠯᠡᠪᠡ᠃
ᠬᠣᠨᠢ ᠮᠠᠯ ᠢ᠋ᠶ᠋ᠠᠨ ᠬᠤᠷᠢᠶᠠᠭᠰᠠᠨ
ᠬᠣᠲᠠ ᠠᠢᠯ ᠰᠦᠮᠡᠢᠭᠰᠡᠭᠡᠷ
ᠬᠣᠲᠠᠴᠢ ᠬᠠᠯᠲᠠᠷ ᠨᠢ ᠬᠠᠶᠠ
ᠬᠣᠩᠰᠢᠶᠠᠷ ᠭᠤᠳᠤᠴᠢᠨ ᠵᠡᠭᠦᠳᠦᠯᠡᠭᠰᠡᠭᠡᠷ
ᠬᠥᠯ ᠦᠭᠡᠢ ᠳᠠᠯᠠᠢ ᠳ᠋ᠤ᠌ ᠵᠢᠪᠬᠦ
ᠬᠥᠯᠭᠡ ᠣᠩᠭᠣᠴᠠ ᠰᠢᠭ᠋ ᠳᠠᠯᠳᠢᠷᠠᠪᠠ ᠂
ᠬᠥᠨᠳᠡᠢ ᠶ᠋ᠢᠨ ᠲᠡᠷᠲᠡᠭᠡ ᠡᠬᠢᠨ ᠳ᠋ᠦ᠍
ᠥᠨᠥᠴᠢᠨ ᠭᠡᠷᠡᠯ ᠨᠢ ᠰᠦᠮᠡᠯᠵᠡᠪᠡ᠃
ᠥᠨᠥᠴᠢᠨ ᠲᠡᠷᠡ ᠭᠡᠷᠡᠯ
ᠡᠷᠦᠬᠡᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠠᠷᠠᠭᠳᠠᠭᠰᠠᠨ
ᠽᠤᠩᠺᠠᠸ᠋ᠠ ᠶ᠋ᠢᠨ ᠬᠥᠷᠥᠭ ᠦ᠋ᠨ ᠡᠮᠦᠨᠡᠬᠢ
ᠵᠤᠯᠠ ᠶ᠋ᠢᠨ ᠪᠢᠴᠢᠬᠠᠨ ᠭᠡᠷᠡᠯ!
ᠭᠤᠷᠪᠠᠨ ᠪᠦᠲᠦᠨ ᠵᠠᠭᠤᠨ ᠤ᠋
ᠭᠤᠨᠢᠭ ᠪᠠᠶᠠᠷ ᠢ᠋ ᠨᠢᠭᠡᠳᠦᠭᠦᠯᠵᠦ
ᠭᠤᠲᠤᠯ ᠤ᠋ᠨ ᠰᠠᠷᠢᠰᠤᠨ ᠥᠯᠮᠡᠢ ᠳᠡᠭᠡᠷᠡ
ᠭᠤᠶᠤᠭᠰᠠᠨ ᠣᠯᠠᠨ ᠢ᠋ ᠰᠥᠭᠦᠳᠦᠭᠦᠯᠵᠦ
ᠢᠲᠡᠭᠡᠵᠦ ᠶᠠᠳᠠᠭᠰᠠᠨ ᠭᠣᠷᠢᠳᠠᠯ ᠰᠢᠭ᠋
ᠢᠯᠴᠢ ᠨᠢ ᠦᠭᠡᠢ ᠲᠤᠶᠠᠭᠠᠷᠠᠵᠤ
ᠰᠦᠷᠳᠡᠵᠦ ᠠᠶᠤᠭᠰᠠᠨ ᠬᠥᠪᠡᠭᠦᠨ ᠰᠢᠭ
ᠰᠦᠮᠡᠢᠵᠦ ᠢᠷᠡᠭᠰᠡᠨ ᠵᠤᠯᠠ
ᠠᠨᠢᠷ ᠦᠭᠡᠢ ᠡᠨᠡᠬᠡᠨ ᠰᠥᠨᠢ ᠪᠡᠷ
ᠠᠷᠪᠠᠨ ᠨᠠᠢ᠍ᠮᠠ ᠲᠠᠢ ᠬᠣᠷᠯᠣ ᠶ᠋ᠢᠨ
ᠠᠪᠤ ᠶ᠋ᠢᠨ ᠭᠡᠷ ᠦ᠋ᠨ ᠬᠣᠢᠮᠣᠷ ᠲᠤ᠌
ᠠᠪᠳᠠᠷᠠ ᠶ᠋ᠢᠨ ᠳᠡᠭᠡᠷᠡ ᠨᠢ ᠭᠡᠢᠵᠦ ᠪᠠᠢᠨᠠ!
ᠪᠣᠭᠣᠨᠢᠬᠠᠨ ᠡᠨᠡ ᠨᠠᠰᠤ ᠪᠠᠨ
ᠪᠤᠭᠤᠴᠠᠭᠠᠨ ᠳ᠋ᠤ᠌ ᠲᠠᠯᠪᠢᠭᠰᠠᠨ ᠶᠤᠮ ᠰᠢᠭ᠋
ᠪᠣᠷᠣᠭᠠᠨ ᠤ᠋ ᠪᠣᠷᠣ ᠡᠷᠪᠡᠬᠡᠢ
ᠪᠣᠰᠤᠨ ᠰᠠᠭᠤᠨ ᠡᠷᠭᠢᠵᠦ ᠪᠠᠢᠨᠠ᠃
ᠲᠠᠪᠤᠨ ᠬᠠᠨᠠᠲᠤ ᠶ᠋ᠢᠨ ᠳᠣᠲᠣᠷᠠ
ᠲᠠᠭ ᠴᠢᠮᠡᠭᠡ ᠦᠭᠡᠢ ᠨᠣᠢᠷᠰᠤᠪᠠᠴᠤ
ᠲᠠᠰᠢᠶᠠᠯᠳᠠᠵᠤ ᠨᠥᠮᠥᠷᠦᠭᠰᠡᠨ ᠳᠡᠪᠡᠯ ᠳᠣᠣᠷᠠ
ᠪᠢᠴᠢᠬᠠᠨ ᠵᠢᠷᠦᠬᠡ ᠳᠣᠭᠳᠣᠯᠤᠨᠠ᠃
《ᠪᠠᠯᠭᠤ ᠬᠦᠷᠬᠦ ᠦᠭᠡᠢ ᠲᠣᠰᠣᠨ ᠨᠢ
ᠪᠠᠷᠠᠭᠳᠠᠬᠤ ᠪᠠᠨ ᠶᠠᠭᠠᠬᠢᠭᠰᠠᠨ ᠵᠤᠯᠠ ᠪᠣᠢ !
ᠪᠠᠳᠮᠠᠯᠠᠵᠤ ᠪᠠᠢᠭᠠ ᠭᠣᠣᠯ ᠳ᠋ᠠᠭᠠᠨ
ᠳᠠᠷᠤᠭᠳᠠᠬᠤ ᠪᠠᠨ ᠶᠠᠭᠠᠬᠢᠭᠰᠠᠨ ᠵᠤᠯᠠ ᠪᠣᠢ!
ᠳᠡᠷᠪᠡᠭᠡᠷ ᠬᠣᠶᠠᠷ ᠳᠠᠯᠠᠪᠴᠢ ᠪᠠᠷ ᠢ᠋ᠶ᠋ᠠᠨ
ᠳᠡᠪᠢᠴᠢᠬᠡᠬᠦ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠡᠷᠪᠡᠬᠡᠢ ᠪᠣᠢ!
ᠳᠡᠮᠡᠢ ᠳᠠᠪᠬᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌
ᠰᠢᠲᠠᠴᠢᠬᠠᠬᠤ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠡᠷᠪᠡᠬᠡᠢ ᠪᠣᠢ !》 ᠭᠡᠵᠦ
ᠬᠣᠶᠠᠷ ᠥᠭᠡᠷᠡ ᠭᠤᠲᠤᠰᠤᠨ ᠳᠡᠭᠡᠷᠡ
《ᠬᠣᠶᠠᠷ ᠰᠡᠳᠬᠢᠯ》ᠳᠡᠪᠡᠯᠵᠡᠬᠦ ᠳ᠋ᠦ᠍
ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠬᠤᠷᠴᠠ ᠴᠤ᠌ ᠶᠤᠮ ᠰᠢᠭ᠋
ᠵᠤᠨ ᠤ᠋ ᠰᠥᠨᠢ ᠤᠷᠲᠤ ᠴᠤ᠌ ᠶᠤᠮ ᠰᠢᠭ᠋ ᠁
ᠤᠶᠠᠩᠭᠠᠯᠠᠭ᠍ᠴᠢ᠄ ᠬᠠᠢᠷᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭ᠍ᠴᠢ᠄ ᠠᠵᠠᠵᠠᠶᠠᠭᠠ
ᠦᠰᠦᠭ ᠬᠠᠳᠠᠭ᠍ᠴᠢ᠄ ᠠᠵᠠᠵᠠᠶᠠᠭᠠ
ᠬᠢᠨᠠᠭ᠍ᠴᠢ᠄ ᠨᠡᠭᠦᠳᠡᠯ᠂ ᠮᠤᠩᠭᠤᠯᠵᠠᠶᠠᠭᠠ