ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ – (ᠭᠤᠷᠪᠠ) Монгол эм эмнэлэг (3)
243《ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ 》᠂ 《ᠤᠯᠠᠭᠠᠨ ᠳᠤᠰᠤᠯ 》᠂ 《 ᠰᠠᠷᠠ ᠶ᠋ᠢᠨ ᠭᠬᠢᠷ 》 ᠦ᠋ᠨ ᠲᠤᠬᠠᠢ ᠥᠭᠦᠯᠡᠬᠦ ᠨᠢ
《ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠥᠷᠪᠡᠨ ᠦᠨᠳᠦᠰᠦ》 ᠳ᠋ᠦ᠍ 《ᠳᠤᠰᠤᠯ ᠨᠢ ᠰᠠᠮᠰᠧ ᠳ᠋ᠦ᠍ ᠬᠤᠷᠠᠵᠤ ᠲᠤᠩᠭᠠᠯᠠᠭ ᠴᠥᠪ ᠢᠯᠭᠠᠷᠠᠨᠠ᠂ ᠴᠥᠪ ᠨᠢ ᠦᠷᠡ ᠶ᠋ᠢᠨ ᠬᠥᠷᠥᠩᠭᠡ ᠪᠣᠯᠵᠤ᠂ ᠲᠤᠩᠭᠠᠯᠠᠭ ᠨᠢ ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ ᠪᠣᠯᠵᠤ ᠭᠣᠣᠯᠳᠠᠭᠤ ᠵᠢᠷᠦᠬᠡᠨ ᠳ᠋ᠦ᠍ ᠣᠷᠣᠰᠢᠪᠠᠴᠤ ᠴᠢᠳᠠᠯ ᠨᠢ ᠪᠦᠬᠦ ᠪᠡᠶᠡ ᠳ᠋ᠦ᠍ ᠲᠦᠭᠡᠵᠦ᠂ ᠨᠠᠰᠤ ᠶ᠋ᠢ ᠤᠷᠲᠤᠳᠬᠠᠨ ᠥᠩᠭᠡ ᠵᠢᠪᠬᠤᠯᠠᠩ ᠢ᠋ ᠲᠡᠭᠦᠯᠳᠡᠷᠵᠢᠭᠦᠯᠦᠨᠡ》ᠭᠡᠵᠦ ᠥᠭᠦᠯᠡᠵᠡᠢ᠃ ᠡᠭᠦᠨ ᠡᠴᠡ ᠦᠵᠡᠪᠡᠯ 《ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ》ᠨᠢ ᠨᠢᠯᠬᠠᠰ ᠠ᠋ᠴᠠ ᠬᠥᠭᠰᠢᠳ ᠬᠦᠷᠲᠡᠯᠡ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠪᠠᠢᠵᠤ᠂ ᠠᠮᠢ ᠨᠠᠰᠤ ᠶ᠋ᠢ ᠤᠷᠲᠤᠳᠬᠠᠵᠤ ᠲᠤᠰ ᠲᠤᠰ ᠤ᠋ᠨ ᠣᠨᠴᠠᠯᠢᠭ ᠬᠠᠳᠠᠭᠠᠯᠠᠭᠰᠠᠨ ᠥᠩᠭᠡ ᠵᠢᠪᠬᠤᠯᠠᠩ ᠢ᠋ ᠪᠣᠢ ᠪᠣᠯᠭᠠᠬᠤ ᠶᠤᠮ ᠪᠠᠢᠨᠠ᠃ ᠳᠤᠰᠤᠯ ᠤ᠋ᠨ ᠴᠥᠪ ᠨᠢ ᠦᠷᠡ ᠶ᠋ᠢᠨ ᠬᠥᠷᠥᠩᠭᠡ ᠪᠣᠯᠵᠤ ᠰᠡᠮᠰᠧ ᠳ᠋ᠦ᠍ ᠦᠯᠡᠳᠡᠨᠡ᠃ ᠡᠨᠳᠡ ᠪᠢᠳᠡ 《ᠬᠥᠷᠥᠩᠭᠡ》ᠭᠡᠳᠡᠭ ᠦᠭᠡ ᠶ᠋ᠢᠨ ᠤᠳᠬᠠ ᠶ᠋ᠢ ᠰᠢᠨᠵᠢᠯᠡᠪᠡᠯ ᠳᠠᠷᠤᠢ ᠦᠨᠳᠦᠰᠦ ᠰᠤᠷᠪᠤᠯᠵᠢ ᠲᠡᠳᠦᠢ᠂ ᠵᠢᠩᠬᠢᠨᠢ ᠦᠷᠡ ᠪᠣᠯᠪᠠᠰᠤᠷᠠᠭᠠᠳᠤᠢ᠂ ᠴᠢᠨᠠᠭᠰᠢᠳᠠ ᠪᠠᠰᠠ ᠦᠷᠡ ᠪᠣᠯᠤᠨ ᠪᠣᠯᠪᠠᠰᠤᠷᠠᠬᠤ ᠴᠢᠬᠤᠯᠠ ᠲᠠᠢ᠃ ᠡᠢᠮᠦ ᠡᠴᠡ ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠰᠡᠮᠰᠧ ᠨᠢ ᠪᠣᠢᠵᠢᠵᠤ ᠭᠦᠢᠴᠡᠭᠡ ᠦᠭᠡᠢ ᠲᠤᠯᠠ ᠴᠢᠨᠠᠭᠰᠢᠳᠠ ᠴᠠᠭᠠᠨ ᠳᠤᠰᠤᠯ᠂ ᠤᠯᠠᠭᠠᠨ ᠳᠤᠰᠤᠯ ᠪᠣᠯᠤᠨ ᠪᠣᠯᠪᠠᠰᠤᠷᠠᠬᠤ ᠦᠭᠡᠢ᠃ ᠳᠥᠷᠪᠡᠨ ᠦᠨᠳᠦᠰᠦ ᠳ᠋ᠦ᠍《ᠰᠡᠮᠰᠧ ᠨᠢ ᠡᠳ᠋ ᠦ᠋ᠨ ᠰᠠᠩ ᠮᠡᠲᠦ ᠰᠠᠪᠠ》ᠭᠡᠰᠡᠨ ᠨᠢ ᠤᠳᠤᠮ ᠤᠭᠰᠠᠭᠠ ᠶ᠋ᠢ ᠤᠯᠠᠮᠵᠢᠯᠠᠬᠤ ᠦᠷᠡ ᠶ᠋ᠢᠨ ᠬᠥᠷᠥᠩᠭᠡ ᠬᠠᠳᠠᠭᠠᠯᠠᠬᠤ ᠪᠠ ᠪᠣᠯᠪᠠᠰᠤᠷᠠᠭᠤᠯᠬᠤ ᠶ᠋ᠢ ᠳᠦᠷᠰᠦᠯᠡᠭᠰᠡᠨ ᠪᠠᠢᠵᠤ ᠮᠡᠳᠡᠨᠡ᠂ ᠬᠥᠮᠦᠰ ᠦᠳᠡᠯᠦᠭᠡ ᠨᠠᠰᠤᠨ ᠳ᠋ᠤ᠌ ᠬᠦᠷᠴᠦ ᠰᠡᠮᠰᠧ ᠶ᠋ᠢᠨ ᠠᠵᠢᠯᠯᠠᠭᠠ ᠪᠠᠭᠤᠷᠠᠭᠰᠠᠨ ᠦᠶᠡᠰ ᠳᠤᠰᠤᠯ ᠤ᠋ᠨ ᠲᠤᠩᠭᠠᠯᠠᠭ 《ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ》 ᠨᠢ ᠦᠳᠡᠯᠦᠭᠡ ᠨᠠᠰᠤᠨ ᠤ᠋ ᠥᠩᠭᠡ ᠵᠢᠪᠬᠤᠯᠠᠩ ᠢ᠋ ᠲᠡᠭᠦᠯᠳᠡᠷᠵᠢᠭᠦᠯᠦᠨᠡ᠃ ᠴᠥᠪ ᠨᠢ ᠴᠢᠨᠠᠭᠰᠢ ᠪᠣᠯᠪᠠᠰᠤᠷᠠᠵᠤ ᠳᠡᠢᠯᠬᠦ ᠦᠭᠡᠢ ᠲᠤᠯᠠ ᠰᠡᠮᠰᠧ ᠳ᠋ᠡᠭᠡᠨ ᠦᠯᠡᠳᠡᠨᠡ᠃ ᠬᠥᠮᠦᠨ ᠦ᠌ ᠦᠷᠡᠵᠢᠯ ᠦ᠋ᠨ ᠡᠷᠬᠡᠲᠡᠨ ᠪᠣᠢᠵᠢᠨ ᠭᠦᠢᠴᠡᠭᠰᠡᠨ ᠦ᠌ ᠳᠠᠷᠠᠭᠠ ᠰᠡᠮᠰᠧ ᠶ᠋ᠢᠨ ᠠᠵᠢᠯᠯᠠᠭᠠ ᠨᠢ ᠡᠬᠢᠯᠡᠵᠦ᠂ ᠦᠷᠡ ᠶ᠋ᠢᠨ ᠬᠥᠷᠥᠩᠭᠡ ᠨᠢ ᠡᠷᠡᠭᠲᠡᠢ ᠶ᠋ᠢᠨ ᠴᠠᠭᠠᠨ ᠳᠤᠰᠤᠯ᠂ ᠡᠮᠡᠭᠲᠡᠢ ᠶ᠋ᠢᠨ ᠤᠯᠠᠭᠠᠨ ᠳᠤᠰᠤᠯ ᠪᠣᠯᠵᠤ ᠪᠣᠯᠪᠠᠰᠤᠷᠠᠨᠠ᠃ ᠡᠭᠦᠨ ᠳ᠋ᠦ᠍ ᠵᠢᠷᠦᠬᠡᠨ ᠳ᠋ᠦ᠍ ᠣᠷᠣᠰᠢᠭᠰᠠᠨ《ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ》ᠨᠢ ᠰᠡᠮᠰᠧ ᠶ᠋ᠢᠨ ᠠᠵᠢᠯᠯᠠᠭᠠ ᠳ᠋ᠤ᠌ ᠣᠷᠣᠯᠴᠠᠵᠤ᠂ ᠡᠮᠡᠭᠲᠡᠢ ᠶ᠋ᠢᠨ ᠰᠠᠷᠠ ᠶ᠋ᠢᠨ ᠭᠬᠢᠷ ᠢ᠋ ᠢᠷᠡᠭᠦᠯᠬᠦ᠂ ᠳᠠᠭᠤ ᠶ᠋ᠢ ᠨᠠᠷᠢᠰᠬᠠᠨ ᠥᠨᠳᠥᠷᠵᠢᠭᠦᠯᠬᠦ᠂ ᠬᠥᠬᠥ ᠶ᠋ᠢ ᠥᠰᠬᠡᠬᠦ᠂ ᠮᠠᠷᠢᠶᠠᠯᠠᠭᠤᠯᠬᠤ ᠪᠠ ᠡᠷᠡᠭᠲᠡᠢ ᠶ᠋ᠢᠨ ᠰᠠᠬᠠᠯ᠂ ᠬᠤᠤᠵᠠ ᠶ᠋ᠢ ᠤᠷᠭᠤᠭᠤᠯᠤᠨ᠂ ᠳᠠᠭᠤ ᠶ᠋ᠢ ᠨᠢ ᠪᠦᠳᠦᠭᠦᠷᠡᠭᠦᠯᠬᠦ ᠵᠡᠷᠭᠡ ᠲᠤᠰ ᠲᠤᠰ ᠤ᠋ᠨ ᠥᠩᠭᠡ ᠵᠢᠪᠬᠤᠯᠠᠩ ᠣᠨᠴᠠᠯᠢᠭ ᠳᠦᠷᠢ ᠶ᠋ᠢ ᠢᠯᠡᠷᠡᠭᠦᠯᠦᠨᠡ᠃ ᠳᠠᠷᠤᠢ ᠡᠸᠦ᠋ᠷᠣᠫ ᠡᠮᠨᠡᠯᠭᠡ ᠶ᠋ᠢᠨ 《ᠬᠣᠶᠠᠳᠠᠭᠴᠢ ᠰᠢᠨᠵᠢ ᠲᠡᠮᠳᠡᠭ》 ᠢ᠋ ᠢᠯᠡᠷᠡᠭᠦᠯᠦᠨᠡ᠃ ᠡᠷᠡᠭᠲᠡᠢ ᠶ᠋ᠢᠨ ᠰᠡᠮᠰᠧ ᠶ᠋ᠢ ᠲᠥᠮᠥᠰᠥ ᠭᠡᠵᠦ ᠦᠵᠡᠳᠡᠭ᠃ ᠳᠤᠰᠤᠯ ᠳ᠋ᠤ᠌ 《ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ᠂ ᠦᠷᠡ ᠶ᠋ᠢᠨ ᠬᠥᠷᠥᠩᠭᠡ》 ᠶ᠋ᠢᠨ ᠪᠦᠷᠢᠯᠳᠦᠬᠦᠨ ᠪᠠᠢᠵᠤ ᠪᠡᠶᠡ ᠶ᠋ᠢᠨ ᠵᠤᠬᠢᠴᠭᠤᠯᠬᠤ ᠴᠢᠳᠠᠪᠤᠷᠢ ᠳ᠋ᠤ᠌ ᠲᠦᠰᠢᠭᠯᠡᠨ ᠦᠢᠯᠡᠳᠦᠯ ᠢ᠋ᠶ᠋ᠡᠨ ᠪᠠᠳᠠᠷᠠᠭᠤᠯᠳᠠᠭ ᠲᠤᠯᠠ ᠠᠮᠢ ᠨᠠᠰᠤᠨ ᠳ᠋ᠤ᠌ ᠬᠠᠷᠰᠢ ᠪᠣᠯᠬᠤ ᠦᠭᠡᠢ᠂ ᠬᠠᠷᠢᠨ ᠬᠥᠮᠦᠨ ᠦ᠌ ᠬᠡᠯᠪᠡᠷᠢ ᠳᠦᠷᠰᠦ ᠥᠩᠭᠡ ᠵᠢᠪᠬᠤᠯᠠᠩ ᠳ᠋ᠤ᠌ ᠬᠤᠪᠢᠷᠠᠯᠲᠠ ᠭᠠᠷᠭᠠᠳᠠᠭ ᠪᠠᠢᠨᠠ᠃ ᠡᠨᠡᠬᠦ 《ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ》ᠨᠢ ᠣᠳᠣᠬᠢ ᠡᠸᠦ᠋ᠷᠣᠫ ᠡᠮᠨᠡᠯᠭᠡ ᠶ᠋ᠢᠨ 《ᠬᠣᠷᠮᠣᠨ》 ᠤ᠋ ᠦᠢᠯᠡᠳᠦᠯ ᠲᠡᠢ ᠶᠡᠬᠡ ᠲᠥᠰᠦᠭᠡᠲᠡᠢ ᠪᠠᠢᠨᠠ᠃《ᠬᠣᠷᠮᠣᠨ》ᠪᠣᠯ ᠳᠣᠲᠣᠭᠠᠳᠤ ᠱᠦᠭᠦᠷᠡᠯ ᠦ᠋ᠨ ᠰᠢᠰᠲ᠋ᠧᠮ ᠪᠣᠯᠬᠤ ᠪᠠᠮᠪᠠᠢ ᠪᠤᠯᠴᠢᠷᠬᠠᠢ᠂ ᠪᠠᠮᠪᠠᠢ ᠶ᠋ᠢᠨ ᠬᠠᠵᠠᠭᠤ ᠶ᠋ᠢᠨ ᠪᠤᠯᠴᠢᠷᠬᠠᠢ᠂ ᠪᠥᠭᠡᠷᠡ ᠶ᠋ᠢᠨ ᠳᠡᠭᠡᠳᠦ ᠪᠤᠯᠴᠢᠷᠬᠠᠢ᠂ ᠨᠣᠢᠷ ᠤ᠋ᠨ ᠰᠠᠷᠠᠯ᠂ ᠥᠨᠥᠴᠢᠨ ᠲᠠᠷᠢᠬᠢ᠂ ᠪᠡᠯᠭᠡ ᠶ᠋ᠢᠨ ᠪᠤᠯᠴᠢᠷᠬᠠᠢ (ᠰᠡᠮᠰᠧ) ᠵᠡᠷᠭᠡ ᠭᠤᠤᠷᠰᠤ ᠦᠭᠡᠢ ᠪᠤᠯᠴᠢᠷᠬᠠᠢ ᠠ᠋ᠴᠠ ᠱᠦᠭᠦᠷᠡᠭᠦᠯᠬᠦ ᠬᠢᠮᠢ ᠶ᠋ᠢᠨ ᠪᠣᠳᠠᠰ ᠪᠣᠯᠤᠨᠠ᠃ 《ᠬᠣᠷᠮᠣᠨ》ᠨᠢ ᠳᠠᠮᠵᠢᠭᠤᠯᠬᠤ ᠭᠤᠤᠷᠰᠤ ᠪᠠᠷ ᠳᠠᠮᠵᠢᠬᠤ ᠦᠭᠡᠢ ᠪᠡᠷ ᠰᠢᠭᠤᠳ ᠴᠢᠰᠤᠨ ᠳ᠋ᠤ᠌ ᠣᠷᠣᠵᠤ ᠪᠦᠬᠦ ᠪᠡᠶᠡ ᠶ᠋ᠢᠨ ᠵᠣᠬᠢᠬᠤ ᠡᠳ᠋ ᠨᠡᠬᠡᠳᠡᠰᠦᠨ ᠳ᠋ᠦ᠍ ᠬᠦᠷᠭᠡᠭᠳᠡᠨ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢᠨ ᠳᠣᠲᠣᠭᠠᠳᠤᠬᠢ ᠪᠣᠳᠠᠰ ᠤ᠋ᠨ ᠰᠣᠯᠢᠯᠴᠠᠭᠠᠨ ᠤ᠋ ᠶᠠᠪᠤᠴᠠ᠂ ᠪᠡᠶᠡ ᠶ᠋ᠢᠨ ᠥᠰᠦᠯᠲᠡ ᠪᠣᠢᠵᠢᠯᠲᠠ᠂ ᠲᠥᠷᠥᠵᠦ ᠥᠰᠬᠦ᠂ ᠥᠲᠡᠯᠬᠦ ᠵᠡᠷᠭᠡ ᠠᠮᠢᠳᠤᠷᠠᠬᠤ ᠵᠦᠢ ᠪᠠ ᠠᠮᠢ ᠨᠠᠰᠤᠨ ᠤ᠋ ᠬᠥᠳᠡᠯᠭᠡᠭᠡᠨ ᠢ᠋ ᠵᠣᠬᠢᠴᠠᠭᠤᠯᠤᠨ ᠪᠡᠶᠡ ᠶ᠋ᠢᠨ ᠳᠣᠲᠣᠭᠠᠳᠤᠬᠢ ᠬᠠᠷᠢᠴᠠᠩᠭᠤᠢ ᠲᠣᠭᠲᠠᠩᠭᠤᠢ ᠪᠠᠢᠳᠠᠯ ᠢ᠋ ᠪᠠᠲᠤᠯᠠᠳᠠᠭ᠃ ᠬᠣᠷᠮᠣᠨ ᠤ᠋ ᠱᠦᠭᠦᠷᠡᠯᠲᠡ ᠲᠡᠩᠴᠡᠭᠦᠷᠢ ᠪᠡᠨ ᠠᠯᠳᠠᠪᠠᠯ ᠰᠢᠭᠤᠳ ᠵᠢᠷᠦᠬᠡᠨ ᠳ᠋ᠦ᠍ ᠨᠥᠯᠥᠭᠡ ᠦᠵᠡᠭᠦᠯᠦᠨᠡ᠃ ᠵᠢᠱ᠌ᠢᠶᠡᠯᠡᠪᠡᠯ᠄ ᠪᠠᠮᠪᠠᠢ ᠪᠤᠯᠴᠢᠷᠬᠠᠢ ᠶ᠋ᠢᠨ ᠠᠵᠢᠯᠯᠠᠭᠠ ᠴᠢᠩᠭᠠᠷᠠᠭᠰᠠᠨ ᠠ᠋ᠴᠠ ᠰᠡᠳᠬᠢᠯ ᠰᠠᠨᠠᠭᠠ ᠲᠣᠭᠲᠠᠪᠤᠷᠢ ᠦᠭᠡᠢ ᠪᠣᠯᠬᠤ᠂ ᠵᠢᠷᠦᠬᠡ ᠲᠦᠭᠰᠢᠬᠦ᠂ ᠨᠣᠢᠷ ᠬᠤᠯᠵᠢᠬᠤ᠂ ᠠᠮᠢᠰᠬᠤᠯ ᠴᠢᠬᠤᠯᠳᠠᠬᠤ ᠵᠡᠷᠭᠡ ᠡᠪᠡᠳᠴᠢᠨ ᠦ᠌ ᠰᠢᠨᠵᠢ ᠶ᠋ᠢ ᠢᠯᠡᠷᠡᠭᠦᠯᠦᠨᠡ᠃ ᠥᠨᠥᠴᠢᠨ ᠲᠠᠷᠢᠬᠢᠨ ᠤ᠋ ᠥᠰᠦᠯᠲᠡ ᠶ᠋ᠢᠨ 《ᠬᠣᠷᠮᠣᠨ》ᠬᠡᠲᠦᠷᠡᠭᠰᠡᠨ ᠡᠴᠡ ᠪᠡᠶᠡ ᠶ᠋ᠢᠨ ᠶᠠᠰᠤ ᠪᠦᠳᠦᠭᠦᠷᠡᠬᠦ᠂ ᠪᠠᠭᠠᠰᠪᠠᠯ ᠪᠡᠶᠡ ᠨᠢ ᠣᠳᠣᠢ ᠪᠠᠭᠠ ᠵᠡᠷᠭᠡ ᠪᠡᠷ ᠪᠡᠶᠡ ᠶ᠋ᠢᠨ ᠬᠡᠯᠪᠡᠷᠢ ᠳᠦᠷᠰᠦ ᠶ᠋ᠢ ᠰᠢᠭᠤᠳ ᠨᠥᠯᠥᠭᠡᠯᠡᠨᠡ᠃《ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ》ᠨᠢ ᠵᠢᠷᠦᠬᠡᠨ ᠳ᠋ᠦ᠍ ᠣᠷᠣᠰᠢᠨᠠ᠃ ᠵᠢᠷᠦᠬᠡ ᠨᠢ ᠴᠢᠰᠤᠨ ᠡᠷᠭᠢᠯᠲᠡ ᠶ᠋ᠢᠨ ᠲᠥᠪ ᠪᠣᠯᠬᠤ ᠪᠥᠭᠡᠳ ᠪᠠᠰᠠ ᠮᠡᠳᠡᠷᠡᠬᠦᠢ ᠰᠡᠳᠬᠢᠬᠦᠢ ᠣᠶᠤᠨ ᠤᠬᠠᠭᠠᠨ ᠲᠠᠢ ᠬᠣᠯᠪᠣᠭᠳᠠᠯ ᠲᠠᠢ ᠪᠠᠢᠳᠠᠭ᠃ 《ᠬᠣᠷᠮᠣᠨ》ᠨᠢ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢᠨ ᠠᠮᠢᠳᠤᠷᠠᠬᠤ ᠵᠦᠢ ᠶ᠋ᠢᠨ ᠠᠵᠢᠯᠯᠠᠭᠠ ᠳ᠋ᠤ᠌ ᠴᠢᠬᠤᠯᠠ ᠦᠢᠯᠡᠳᠦᠯ ᠦᠵᠡᠭᠦᠯᠵᠦ ᠠᠮᠢ ᠨᠠᠰᠤᠨ ᠤ᠋ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠶ᠋ᠢ ᠪᠠᠲᠤᠯᠠᠳᠠᠭ᠃ 《ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ》 ᠨᠢ ᠨᠠᠰᠤ ᠶ᠋ᠢ ᠤᠷᠲᠤᠳᠬᠠᠨ᠂ ᠥᠩᠭᠡ ᠵᠢᠪᠬᠤᠯᠠᠩ ᠢ᠋ ᠲᠡᠭᠦᠯᠳᠡᠷᠵᠢᠭᠦᠯᠦᠨᠡ᠃ 《ᠬᠣᠷᠮᠣᠨ》ᠪᠠ 《ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ》ᠨᠢ ᠣᠨᠳᠣᠣ ᠬᠣᠶᠠᠷ ᠡᠮᠨᠡᠯᠭᠡ ᠶ᠋ᠢᠨ ᠬᠣᠶᠠᠷ ᠣᠨᠳᠣᠣ ᠣᠨᠣᠯ ᠪᠣᠯᠪᠠᠴᠤ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠦᠵᠡᠭᠦᠯᠬᠦ ᠦᠢᠯᠡᠳᠦᠯ ᠨᠢ ᠠᠳᠠᠯᠢ ᠰᠢᠭ᠋ ᠪᠠᠢᠨᠠ᠃ 《ᠤᠯᠠᠭᠠᠨ ᠳᠤᠰᠤᠯ》᠂ 《ᠰᠠᠷᠠ ᠶ᠋ᠢᠨ ᠭᠬᠢᠷ》 ᠢ᠋ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠨᠡᠪᠲᠡᠷᠬᠡᠢ ᠲᠣᠯᠢ ᠳ᠋ᠤ᠌ 《ᠳᠤᠰᠤᠯ ᠤ᠋ᠨ ᠴᠥᠪ ᠨᠢ ᠤᠯᠠᠭᠠᠨ ᠦᠷᠡ ᠪᠣᠯᠤᠨ ᠢᠯᠭᠠᠷᠠᠵᠤ᠂ ᠴᠠᠭᠠᠨ ᠳᠤᠰᠤᠯ ᠲᠠᠢ ᠤᠴᠠᠷᠠᠪᠠᠯ ᠵᠢᠷᠮᠦᠰᠦᠯᠡᠭᠰᠡᠨ ᠦᠷᠡ ᠪᠣᠯᠵᠤ ᠬᠡᠦᠬᠡᠨ ᠬᠡᠪᠲᠡᠰᠢᠨ ᠳ᠋ᠦ᠍ ᠲᠣᠭᠲᠠᠵᠤ ᠬᠥᠪᠦᠷᠡᠯ ᠪᠦᠲᠦᠨᠡ᠃ ᠡᠰᠡ ᠲᠡᠢᠮᠦ ᠪᠣᠯ ᠳᠠᠷᠤᠢ ᠰᠠᠷᠠ ᠶ᠋ᠢᠨ ᠭᠬᠢᠷ ᠪᠣᠯᠵᠤ ᠪᠠᠭᠤᠳᠠᠭ ᠪᠠᠢᠨᠠ》ᠭᠡᠵᠡᠢ᠃ ᠡᠨᠡ ᠨᠢ ᠤᠯᠠᠭᠠᠨ ᠦᠷᠡ ᠨᠢ ᠰᠠᠷᠠ ᠶ᠋ᠢᠨ ᠭᠬᠢᠷ᠂ ᠰᠠᠷᠠ ᠶ᠋ᠢᠨ ᠭᠬᠢᠷ ᠨᠢ ᠤᠯᠠᠭᠠᠨ ᠦᠷᠡ ᠭᠡᠵᠦ ᠣᠢᠯᠭᠠᠭᠳᠠᠬᠤ ᠲᠤᠯᠠ ᠣᠳᠣ ᠦᠶᠡ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠰᠠᠷᠠ ᠶ᠋ᠢᠨ ᠭᠬᠢᠷ ᠦ᠋ᠨ ᠣᠨᠣᠯ ᠲᠠᠢ ᠵᠥᠷᠢᠶᠡ ᠲᠡᠢ ᠪᠠᠢᠨᠠ᠃ ᠡᠮᠡᠭᠲᠡᠢ ᠶ᠋ᠢᠨ ᠥᠨᠳᠡᠭᠡ ᠳᠠᠮᠵᠢᠭᠤᠯᠬᠤ ᠭᠤᠤᠷᠰᠤ ᠶ᠋ᠢ ᠲᠠᠰᠤᠯᠬᠤ ᠮᠡᠰᠡ ᠵᠠᠰᠠᠯ ᠬᠢᠭᠰᠡᠨ ᠦ᠌ ᠳᠠᠷᠠᠭᠠ ᠤᠯᠠᠭᠠᠨ ᠦᠷᠡ (ᠥᠨᠳᠡᠭᠡ) ᠨᠢ ᠬᠡᠦᠬᠡᠨ ᠬᠡᠪᠲᠡᠰᠢᠨ ᠳ᠋ᠦ᠍ ᠣᠷᠣᠵᠤ ᠳᠡᠢᠯᠬᠦ ᠦᠭᠡᠢ᠂ ᠭᠡᠲᠡᠯᠡ ᠰᠠᠷᠠ ᠭᠬᠢᠷ ᠦ᠋ᠨ ᠡᠷᠭᠢᠯᠲᠡ ᠳ᠋ᠦ᠍ ᠶᠠᠮᠠᠷᠴᠤ ᠬᠤᠪᠢᠷᠠᠯᠲᠠ ᠦᠭᠡᠢ ᠪᠠᠢᠳᠠᠭ᠃ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠥᠷᠪᠡᠨ ᠦᠨᠳᠦᠰᠦ ᠳ᠋ᠦ᠍ 《ᠤᠯᠠᠭᠠᠨ ᠳᠤᠰᠤᠯ ᠤ᠋ᠨ ᠪᠣᠢ ᠪᠣᠯᠬᠤ ᠶᠣᠰᠣ ᠨᠢ ᠢᠳᠡᠭᠡᠨ ᠦ᠌ ᠲᠤᠩᠭᠠᠯᠠᠭ ᠤ᠋ᠳ ᠠ᠋ᠴᠠ ᠳᠡᠰ ᠳᠠᠷᠠᠭᠠᠯᠠᠨ ᠬᠤᠪᠢᠷᠠᠭᠰᠠᠭᠠᠷ ᠰᠠᠷᠠ ᠪᠦᠷᠢ ᠨᠢᠭᠡ ᠤᠳᠠᠭᠠ ᠰᠡᠮᠰᠧ ᠳ᠋ᠦ᠍ ᠬᠤᠷᠠᠵᠤ᠂ ᠡᠨᠡᠬᠦ ᠤᠯᠠᠭᠠᠨ ᠳᠤᠰᠤᠯ ᠨᠢ ᠰᠡᠮᠰᠧ ᠡᠴᠡ ᠪᠡᠨ ᠬᠡᠦᠬᠡᠨ ᠬᠡᠪᠲᠡᠰᠢᠨ ᠦ᠌ ᠪᠠᠷᠠᠭᠤᠨ ᠵᠡᠭᠦᠨ ᠬᠣᠶᠠᠷ ᠶᠡᠬᠡ ᠰᠤᠳᠠᠰᠤ ᠪᠠᠷ ᠳᠡᠮᠵᠢᠵᠦ ᠬᠡᠦᠬᠡᠨ ᠬᠡᠪᠲᠡᠰᠢᠨ ᠳ᠋ᠦ᠍ ᠣᠷᠣᠨᠠ》ᠭᠡᠵᠡᠢ᠃ ᠡᠨᠡ ᠨᠢ ᠡᠮᠡᠭᠲᠡᠢ ᠶ᠋ᠢᠨ ᠤᠯᠠᠭᠠᠨ ᠳᠤᠰᠤᠯ (ᠦᠷᠡ) ᠤᠨ ᠪᠣᠢ ᠪᠣᠯᠬᠤ ᠶᠣᠰᠣ ᠶ᠋ᠢ ᠥᠭᠦᠯᠡᠭᠰᠡᠨ ᠡᠴᠡ ᠪᠢᠰᠢ ᠰᠠᠷᠠ ᠶ᠋ᠢᠨ ᠭᠬᠢᠷ ᠦ᠋ᠨ ᠲᠤᠬᠠᠢ ᠶᠠᠷᠢᠭᠰᠠᠨ ᠦᠭᠡᠢ᠃ ᠪᠢᠳᠡ ᠤᠯᠠᠭᠠᠨ ᠳᠤᠰᠤᠯ᠂ ᠰᠠᠷᠠ ᠶ᠋ᠢᠨ ᠭᠬᠢᠷ ᠨᠢ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠬᠤᠪᠢᠷᠠᠯᠲᠠ ᠠ᠋ᠴᠠ ᠪᠣᠢ ᠪᠣᠯᠵᠠᠢ ᠭᠡᠵᠢ ᠦᠵᠡᠪᠡᠯ ᠪᠠᠰᠠ ᠬᠠᠨᠤᠮᠵᠢ ᠦᠭᠡᠢ ᠰᠢᠭ ᠪᠠᠢᠨᠠ᠃ ᠤᠴᠢᠷ ᠨᠢ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢᠨ ᠠᠯᠢ ᠴᠤ᠌ ᠡᠳ᠋ ᠡᠷᠬᠡᠲᠡᠨ ᠨᠢ ᠪᠦᠷ ᠯᠡ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠬᠤᠪᠢᠷᠠᠯᠲᠠ ᠳ᠋ᠤ᠌ ᠲᠦᠰᠢᠭᠯᠡᠨ ᠪᠣᠢ ᠪᠣᠯᠵᠤ ᠪᠠᠢᠭᠠ ᠶᠤᠮ ᠴᠢᠨᠢ ᠲᠤᠩ ᠳᠥᠭᠥᠮ ᠪᠠᠯᠠᠷᠬᠠᠢ ᠪᠤᠯᠴᠢᠨᠠ᠃ ᠡᠮᠡᠭᠲᠡᠢ ᠶ᠋ᠢᠨ ᠤᠯᠠᠭᠠᠨ ᠳᠤᠰᠤᠯ ᠭᠡᠪᠡᠯ᠂ ᠡᠨᠡ ᠨᠢ ᠳᠤᠰᠤᠯ ᠤ᠋ᠨ ᠴᠥᠪ ᠪᠣᠯᠬᠤ ᠦᠶᠡ ᠶ᠋ᠢᠨ ᠬᠥᠷᠥᠩᠭᠡ ᠨᠢ ᠰᠡᠮᠰᠧ ᠳ᠋ᠦ᠍ ᠵᠢᠩᠬᠢᠨᠢ ᠦᠷᠡ ᠪᠣᠯᠤᠨ ᠪᠣᠯᠪᠠᠰᠤᠷᠠᠵᠤ ᠢᠯᠭᠠᠷᠠᠬᠤ ᠶ᠋ᠢ ᠬᠡᠯᠡᠵᠦ ᠪᠠᠢᠨᠠ᠃ ᠮᠢᠨᠦ ᠦᠵᠡᠬᠦ ᠪᠡᠷ ᠬᠥᠮᠦᠰ ᠦ᠋ᠨ ᠰᠡᠮᠰᠧ ᠵᠡᠷᠭᠡ ᠦᠷᠡᠵᠢᠯ ᠦ᠋ᠨ ᠡᠷᠬᠡᠲᠡᠨ ᠪᠣᠢᠵᠢᠵᠤ ᠭᠦᠢᠴᠡᠭᠰᠡᠨ ᠦ᠌ ᠳᠠᠷᠠᠭᠠ᠂ ᠳᠤᠰᠤᠯ ᠤ᠋ᠨ ᠴᠥᠪ ᠦᠷᠡ ᠶ᠋ᠢᠨ ᠬᠥᠷᠥᠩᠭᠡ ᠪᠡᠨ ᠡᠷᠡᠭᠲᠡᠢ ᠶ᠋ᠢᠨ ᠴᠭᠠᠨ ᠳᠤᠰᠤᠯ᠂ ᠡᠮᠡᠭᠲᠡᠢ ᠶ᠋ᠢᠨ ᠤᠯᠠᠭᠠᠨ ᠳᠤᠰᠤᠯ ᠪᠣᠯᠭᠠᠨ ᠪᠣᠯᠪᠠᠰᠤᠷᠠᠭᠤᠯᠤᠨᠠ᠃ ᠡᠮᠡᠭᠲᠡᠢ ᠶ᠋ᠢᠨ ᠤᠯᠠᠭᠠᠨ ᠳᠤᠰᠤᠯ ᠢ᠋ ᠪᠣᠯᠪᠠᠰᠤᠷᠠᠭᠤᠯᠬᠤ ᠳ᠋ᠤ᠌ ᠵᠣᠬᠢᠬᠤ ᠬᠡᠮᠵᠢᠶᠡᠨ ᠦ᠌ ᠴᠥᠪ ᠢᠯᠭᠠᠷᠠᠨᠠ᠃ ᠡᠨᠡᠬᠦ ᠴᠥᠪ ᠨᠢ ᠬᠡᠦᠬᠡᠨ ᠬᠡᠪᠲᠡᠰᠢᠨ ᠦ᠌ ᠳᠣᠲᠣᠷ ᠪᠦᠷᠬᠦᠪᠴᠢ ᠳ᠋ᠦ᠍ ᠨᠡᠮᠡᠷᠢᠯᠡᠨ᠂ ᠰᠠᠷᠠ ᠶ᠋ᠢᠨ ᠭᠬᠢᠷ ᠦ᠋ᠨ ᠪᠦᠷᠢᠯᠳᠦᠬᠦᠨ ᠪᠣᠯᠤᠨᠠ᠃ ᠤᠴᠢᠷ ᠨᠢ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢᠨ ᠠᠮᠢᠳᠤᠷᠠᠬᠤ ᠵᠦᠢ ᠳ᠋ᠦ᠍ ᠰᠢᠨᠡ ᠬᠠᠭᠤᠴᠢᠨ ᠤ᠋ ᠰᠣᠯᠢᠯᠴᠠᠭᠠ ᠲᠠᠰᠤᠷᠠᠯᠲᠠ ᠦᠭᠡᠢ ᠶᠠᠪᠤᠭᠳᠠᠵᠤ᠂ ᠰᠢᠮᠡ᠂ ᠱᠠᠷᠤᠭ ᠴᠠᠭ ᠪᠦᠷᠢ ᠢᠯᠭᠠᠷᠠᠵᠤ ᠪᠠᠢᠳᠠᠭ ᠲᠤᠯᠠ ᠴᠥᠪ ᠡᠴᠡ ᠴᠦ᠍ ᠲᠤᠩᠭᠠᠯᠠᠭ ᠴᠥᠪ ᠢᠯᠭᠠᠷᠠᠬᠤ ᠶᠣᠰᠣᠲᠠᠢ᠃ ᠰᠡᠮᠰᠧ ᠨᠢ ᠬᠤᠷᠠᠮᠠᠯ ᠤ᠋ᠨ ᠴᠢᠨᠠᠷᠲᠠᠢ᠂ ᠬᠡᠦᠬᠡᠨ ᠬᠡᠪᠲᠡᠰᠢ ᠨᠢ ᠰᠡᠮᠰᠧ ᠶ᠋ᠢᠨ ᠳᠠᠭᠠᠯᠲᠠ ᠡᠷᠬᠡᠲᠡᠨ᠂ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠪᠦᠷᠢᠳᠦᠭᠰᠡᠨ ᠴᠠᠭᠠᠨ ᠤᠯᠠᠭᠠᠨ ᠳᠤᠰᠤᠯ ᠢ᠋ ᠲᠣᠭᠲᠠᠭᠠᠨ ᠪᠣᠢᠵᠢᠭᠤᠯᠬᠤ ᠣᠷᠣᠨ ᠪᠠᠢᠷᠢ ᠲᠤᠯᠠ ᠮᠥᠨ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠴᠢᠨᠠᠷ ᠪᠦᠷᠢᠯᠳᠦᠬᠦ ᠬᠡᠷᠡᠭᠲᠡᠢ᠃ ᠡᠢᠮᠦ ᠡᠴᠡ ᠲᠠᠪᠤᠨ ᠮᠠᠬᠠᠪᠣᠳ ᠪᠦᠷᠢᠳᠦᠭᠰᠡᠨ ᠤᠯᠠᠭᠠᠨ ᠳᠤᠰᠤᠯ ᠪᠣᠯᠪᠠᠰᠤᠷᠠᠬᠤ ᠶᠠᠪᠤᠴᠠ ᠳ᠋ᠤ᠌ ᠢᠯᠭᠠᠷᠠᠵᠤ ᠭᠠᠷᠤᠭᠰᠠᠨ ᠬᠡᠦᠬᠡᠨ ᠬᠡᠪᠲᠡᠰᠢᠨ ᠦ᠌ ᠳᠣᠲᠣᠷ ᠪᠦᠷᠬᠦᠪᠴᠢ ᠳ᠋ᠦ᠍ ᠬᠤᠷᠠᠵᠤ ᠳᠣᠲᠣᠷ ᠪᠦᠷᠬᠦᠪᠴᠢ ᠶ᠋ᠢ ᠵᠤᠵᠠᠭᠠᠷᠠᠭᠤᠯᠤᠨ ᠬᠥᠪᠦᠷᠡᠯ ᠲᠣᠭᠲᠠᠬᠤ ᠳ᠋ᠤ᠌ ᠳᠡᠪᠢᠰᠬᠡᠷ ᠰᠢᠭ ᠵᠥᠭᠡᠯᠡᠨ ᠬᠥᠪᠰᠥᠭᠡᠷ ᠪᠣᠯᠭᠠᠨᠠ᠃ ᠬᠥᠪᠦᠷᠡᠯ ᠲᠣᠭᠲᠠᠪᠠᠯ ᠳᠠᠷᠤᠢ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢ ᠳᠠᠭᠠᠵᠤ ᠲᠡᠯᠡᠭᠳᠡᠬᠦ ᠪᠠ ᠪᠠᠰᠠ ᠬᠣᠢᠲᠤᠬᠢ ᠶ᠋ᠢᠨ ᠨᠢᠭᠡᠨ ᠬᠡᠰᠡᠭ ᠪᠣᠯᠵᠤ᠂ ᠬᠥᠪᠦᠷᠡᠯ ᠦ᠋ᠨ ᠬᠡᠷᠡᠭᠴᠡᠭᠡ ᠶ᠋ᠢ ᠬᠠᠩᠭᠠᠨᠠ᠃ ᠬᠡᠷᠪᠡ ᠬᠥᠪᠦᠷᠡᠯ ᠲᠣᠭᠲᠠᠬᠤ ᠦᠭᠡᠢ ᠪᠣᠯ ᠰᠠᠷᠠ ᠶ᠋ᠢᠨ ᠭᠬᠢᠷ ᠪᠣᠯᠤᠨᠠ᠃ ᠰᠡᠮᠰᠧ ᠨᠢ ᠰᠠᠷᠠ ᠪᠦᠷᠢ ᠨᠢᠭᠡ ᠤᠳᠠᠭᠠ ᠤᠯᠠᠭᠠᠨ ᠳᠤᠰᠤᠯ ᠢ᠋ ᠪᠣᠯᠪᠠᠰᠤᠷᠠᠭᠤᠯᠬᠤ ᠲᠤᠯᠠ᠂ ᠰᠠᠷᠠ ᠶ᠋ᠢᠨ ᠭᠬᠢᠷ ᠨᠢ ᠴᠤ᠌ ᠰᠠᠷᠠ ᠪᠦᠷᠢ ᠨᠢᠭᠡ ᠤᠳᠠᠭᠠ ᠪᠣᠢ ᠪᠣᠯᠵᠤ ᠰᠠᠷᠠ ᠶ᠋ᠢᠨ ᠭᠬᠢᠷ ᠦ᠋ᠨ ᠡᠷᠭᠢᠯᠲᠡ ᠶᠠᠪᠤᠭᠳᠠᠨᠠ᠃ ᠰᠠᠷᠠ ᠶ᠋ᠢᠨ ᠭᠬᠢᠷ ᠢ᠋ 《ᠴᠥᠪ》ᠭᠡᠳᠡᠭ ᠦ᠋ᠨ ᠪᠠᠰᠠ ᠨᠢᠭᠡᠨ ᠰᠢᠯᠲᠠᠭᠠᠨ ᠨᠢ ᠄
1. ᠳᠣᠯᠣᠭᠠᠨ ᠲᠠᠮᠢᠷ ᠤ᠋ᠨ ᠢᠯᠭᠠᠷᠠᠬᠤ ᠴᠥᠪ ᠲᠡᠢ ᠶᠡᠬᠡ ᠲᠥᠰᠦᠭᠡᠲᠡᠢ᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠨᠤᠤᠬᠠ ᠰᠢᠯᠦᠰᠦ ᠵᠡᠷᠭᠡ ᠮᠢᠬᠠᠨ ᠤ᠋ ᠴᠥᠪ ᠦ᠋ᠳ ᠨᠢ ᠬᠠᠷᠠᠭᠠᠯᠵᠠᠭᠰᠠᠨ ᠡᠷᠬᠡᠲᠡᠨ ᠦ᠌ ᠪᠡᠨ ᠣᠨᠴᠠᠯᠢᠭ ᠬᠡᠷᠡᠭᠴᠡᠭᠡ ᠡᠴᠡ ᠪᠣᠯᠵᠤ ᠴᠠᠭ ᠪᠤᠰᠤ ᠠᠳᠠᠯᠢ ᠦᠭᠡᠢ ᠬᠡᠮᠵᠢᠶᠡ ᠪᠡᠷ ᠢᠯᠭᠠᠭᠳᠠᠬᠤ ᠪᠠ ᠲᠡᠭᠦᠨ ᠦ᠌ ᠬᠤᠪᠢᠷᠠᠯᠲᠠ ᠪᠠᠷ ᠬᠠᠷᠠᠭᠠᠯᠵᠠᠭᠰᠠᠨ ᠡᠷᠬᠡᠲᠡᠨ ᠦ᠌ ᠡᠪᠡᠳᠴᠢᠨ ᠢ᠋ ᠮᠠᠭᠠᠳᠯᠠᠨ ᠲᠣᠳᠣᠯᠠᠳᠠᠭ᠃ ᠰᠠᠷᠠ ᠶ᠋ᠢᠨ ᠭᠬᠢᠷ ᠨᠢ ᠴᠦ᠍ ᠰᠠᠷᠠ ᠪᠦᠷᠢ ᠨᠢᠭᠡ ᠤᠳᠠᠭᠠ ᠢᠯᠭᠠᠭᠳᠠᠬᠤ ᠪᠠ ᠲᠡᠭᠦᠨ ᠦ᠌ ᠬᠤᠪᠢᠷᠠᠯᠲᠠ ᠠ᠋ᠴᠠ ᠦᠷᠡᠵᠢᠯ ᠦ᠋ᠨ ᠡᠷᠬᠡᠲᠡᠨ ᠪᠠ ᠪᠤᠰᠤᠳ ᠴᠤᠯᠤ ᠰᠠᠪᠠ ᠶ᠋ᠢᠨ ᠡᠪᠡᠳᠴᠢᠨ ᠢ᠋ ᠮᠠᠭᠠᠳᠯᠠᠳᠠᠭ᠃
2. ᠰᠠᠷᠠ ᠶ᠋ᠢᠨ ᠭᠬᠢᠷ ᠦ᠋ᠨ ᠴᠢᠰᠤ ᠨᠢ ᠪᠤᠰᠤᠳ ᠴᠤᠯᠤ ᠰᠠᠪᠠ ᠶ᠋ᠢᠨ ᠰᠤᠳᠠᠰᠤ ᠠ᠋ᠴᠠ ᠭᠠᠷᠬᠤ ᠴᠢᠰᠤ ᠰᠢᠭ᠋ ᠴᠠᠷᠴᠠᠵᠤ ᠡᠭᠡᠳᠡᠷᠡᠭᠡ ᠦᠭᠡᠢ ᠶᠦᠮ᠃ ᠡᠨᠡ ᠨᠢ ᠲᠠᠪᠤᠨ ᠮᠠᠬᠠᠪᠣᠳ ᠪᠦᠷᠢᠳᠦᠭᠰᠡᠨ ᠤᠯᠠᠭᠠᠨ ᠳᠤᠰᠤᠯ ᠢ᠋ ᠪᠣᠯᠪᠠᠰᠤᠷᠠᠭᠤᠯᠬᠤ ᠳ᠋ᠤ᠌ ᠢᠯᠭᠠᠷᠠᠬᠤ ᠴᠥᠪ ᠪᠣᠯᠤᠭᠰᠠᠨ ᠠ᠋ᠴᠠ ᠪᠠᠢᠵᠤ ᠮᠡᠳᠡᠨᠡ᠃
3. ᠬᠥᠪᠦᠷᠡᠯ ᠲᠣᠭᠲᠠᠵᠤ ᠵᠢᠷᠮᠦᠰᠦᠯᠡᠪᠡᠯ᠂ ᠬᠥᠪᠦᠷᠡᠯ ᠦ᠋ᠨ ᠬᠣᠢᠲᠤᠬᠢ ᠨᠢ ᠰᠡᠮᠰᠧ ᠶ᠋ᠢᠨ ᠠᠵᠢᠯᠯᠠᠭᠠ ᠶ᠋ᠢ ᠣᠷᠣᠯᠠᠨᠠ᠃ ᠳᠤᠰᠤᠯ ᠨᠢ ᠰᠡᠮᠰᠧ ᠳ᠋ᠡᠬᠢ ᠲᠤᠩᠭᠠᠯᠠᠭ ᠴᠥᠪ ᠢᠯᠭᠠᠷᠠᠨᠠ᠃ ᠴᠥᠪ ᠨᠢ ᠰᠡᠮᠰᠧ ᠳ᠋ᠡᠭᠡᠨ ᠦᠯᠡᠳᠡᠵᠦ ᠴᠢᠨᠠᠭᠰᠢ ᠪᠣᠯᠪᠠᠰᠤᠷᠠᠬᠤ ᠦᠭᠡᠢ ᠲᠤᠯᠠ ᠰᠠᠷᠠ ᠶ᠋ᠢᠨ ᠭᠬᠢᠷ ᠪᠠᠢᠳᠠᠭ ᠦᠭᠡᠢ᠃ ᠲᠤᠩᠭᠠᠯᠠᠭ ᠨᠢ ᠵᠢᠷᠦᠬᠡᠨ ᠳ᠋ᠦ᠍ ᠣᠷᠣᠰᠢᠵᠤ ᠴᠢᠳᠠᠯ ᠨᠢ ᠪᠦᠬᠦ ᠪᠡᠶᠡ ᠳ᠋ᠦ᠍ ᠲᠦᠭᠡᠵᠦ᠂ ᠵᠢᠷᠮᠦᠰᠦᠨ ᠦ᠌ ᠬᠡᠯᠪᠡᠷᠢ ᠳᠦᠷᠰᠦ ᠬᠤᠪᠢᠷᠠᠯᠲᠠ ᠶ᠋ᠢ ᠢᠯᠡᠷᠡᠭᠦᠯᠦᠨᠡ᠃
4. ᠰᠡᠮᠰᠧ ᠶ᠋ᠢ ᠣᠭᠲᠣᠯᠬᠤ ᠮᠡᠰᠡ ᠵᠠᠰᠠᠯ ᠬᠢᠴᠢᠬᠡᠪᠡᠯ ᠰᠠᠷᠠ ᠶ᠋ᠢᠨ ᠭᠬᠢᠷ ᠨᠢ ᠳᠠᠷᠤᠢ ᠵᠣᠭᠰᠣᠨᠠ᠃ ᠤᠯᠠᠭᠠᠨ ᠳᠤᠰᠤᠯ ᠢ᠋ ᠪᠣᠯᠪᠠᠰᠤᠷᠠᠭᠤᠯᠬᠤ ᠦᠭᠡᠢ ᠲᠤᠯᠠ ᠴᠥᠪ ᠭᠡᠵᠦ ᠭᠠᠷᠬᠤ ᠦᠭᠡᠢ᠃ ᠬᠡᠷᠪᠡ ᠰᠡᠮᠰᠧ ᠶ᠋ᠢ ᠦᠯᠡᠳᠡᠭᠡᠨ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢ ᠣᠭᠲᠣᠯᠪᠠᠯ᠂ ᠤᠯᠠᠭᠠᠨ ᠳᠤᠰᠤᠯ ᠨᠢ ᠤᠤᠯ ᠤ᠋ᠨ ᠶᠣᠰᠣᠭᠠᠷ ᠢ᠋ᠶ᠋ᠠᠨ ᠪᠣᠯᠪᠠᠰᠤᠷᠠᠬᠤ ᠪᠣᠯᠪᠠᠴᠤ᠂ ᠴᠥᠪ ᠨᠢ ᠰᠠᠷᠠ ᠶ᠋ᠢᠨ ᠭᠬᠢᠷ ᠪᠣᠯᠬᠤ ᠦᠭᠡᠢ᠂ ᠪᠡᠶᠡ ᠶ᠋ᠢᠨ ᠵᠣᠬᠢᠴᠠᠭᠤᠯᠬᠤ ᠴᠢᠳᠠᠪᠤᠷᠢ ᠳ᠋ᠤ᠌ ᠲᠦᠰᠢᠭᠯᠡᠨ ᠪᠤᠰᠤᠳ ᠡᠳ᠋ ᠨᠡᠬᠡᠳᠡᠰᠦ ᠳ᠋ᠦ᠍ ᠨᠡᠮᠡᠷᠢ ᠪᠣᠯᠤᠨᠠ᠃ ᠳᠠᠷᠤᠢ᠂ ᠬᠥᠮᠦᠨ ᠦ᠌ ᠬᠣᠳᠣᠭᠣᠳᠣ᠂ ᠳᠡᠯᠢᠭᠦᠦ᠂ ᠪᠥᠭᠡᠷᠡ ᠶ᠋ᠢ ᠣᠭᠲᠣᠯᠬᠤ ᠮᠡᠰᠡ ᠵᠠᠰᠠᠯ ᠬᠢᠭᠰᠡᠨ ᠲᠡᠢ ᠠᠳᠠᠯᠢ ᠶᠣᠰᠣᠭᠠᠷ ᠪᠤᠰᠤ ᠡᠳ᠋ ᠡᠷᠬᠡᠲᠡᠨ ᠢ᠋ᠶ᠋ᠡᠷ ᠣᠷᠣᠯᠠᠭᠳᠠᠨᠠ᠃ ᠡᠢᠮᠦ ᠡᠴᠡ ᠳᠣᠯᠣᠳᠤᠭᠠᠷ ᠲᠠᠮᠢᠷ ᠳᠤᠰᠤᠯ ᠤ᠋ᠨ ᠴᠥᠪ ᠨᠢ ᠰᠡᠮᠰᠧ ᠳ᠋ᠦ᠍ ᠪᠣᠯᠪᠠᠰᠤᠷᠠᠵᠤ᠂ ᠤᠯᠠᠭᠠᠨ ᠳᠤᠰᠤᠯ ᠪᠣᠯᠵᠤ ᠤᠯᠠᠭᠠᠨ ᠳᠤᠰᠤᠯ ᠢ᠋ ᠳᠠᠮᠵᠢᠭᠤᠯᠬᠤ ᠰᠤᠳᠠᠰᠤ ᠪᠠᠷ ᠬᠡᠦᠬᠡᠨ ᠬᠡᠪᠲᠡᠰᠢᠨ ᠳ᠋ᠦ᠍ ᠣᠷᠣᠨᠠ᠃ ᠡᠨᠡᠬᠦ ᠤᠯᠠᠭᠠᠨ ᠳᠤᠰᠤᠯ ᠢ᠋ ᠪᠣᠯᠪᠠᠰᠤᠷᠠᠭᠤᠯᠬᠤ ᠳ᠋ᠤ᠌ ᠢᠯᠭᠠᠷᠠᠵᠤ ᠴᠥᠪ ᠨᠢ ᠬᠡᠦᠬᠡᠨ ᠬᠡᠪᠲᠡᠰᠢ ᠶ᠋ᠢᠨ ᠳᠣᠲᠣᠷ ᠪᠦᠷᠬᠦᠪᠴᠢ ᠳ᠋ᠦ᠍ ᠨᠡᠮᠡᠷᠢᠯᠡᠨ ᠰᠠᠷᠠ ᠶ᠋ᠢᠨ ᠭᠬᠢᠷ ᠪᠣᠯᠤᠨᠠ᠃ ᠡᠢᠮᠦ ᠡᠴᠡ ᠤᠯᠠᠭᠠᠨ ᠳᠤᠰᠤᠯ᠂ ᠰᠠᠷᠠ ᠶ᠋ᠢᠨ ᠭᠬᠢᠷ ᠨᠢ ᠬᠠᠷᠢᠯᠴᠠᠨ ᠬᠣᠯᠪᠣᠭᠠ ᠲᠠᠢ ᠬᠣᠶᠠᠷ ᠣᠨᠳᠣᠣ ᠵᠦᠢᠯ ᠪᠣᠯᠤᠨᠠ᠃ ᠡᠷᠡᠭᠲᠡᠢ ᠶ᠋ᠢᠨ ᠴᠠᠭᠠᠨ ᠳᠤᠰᠤᠯ᠂ ᠡᠮᠡᠭᠲᠡᠢ ᠶ᠋ᠢᠨ ᠤᠯᠠᠭᠠᠨ ᠳᠤᠰᠤᠯ᠂ ᠰᠠᠷᠠ ᠶ᠋ᠢᠨ ᠭᠬᠢᠷ ᠨᠢ ᠰᠡᠮᠰᠧ ᠶ᠋ᠢᠨ ᠠᠵᠢᠯᠯᠠᠭᠠ ᠳ᠋ᠤ᠌ ᠲᠦᠰᠢᠭᠯᠡᠨᠡ᠃ ᠰᠡᠮᠰᠧ ᠶ᠋ᠢᠨ ᠠᠵᠢᠯᠯᠠᠭᠠ ᠨᠢ ᠲᠠᠷᠢᠬᠢ ᠨᠤᠭᠤᠰᠤᠨ ᠤ᠋ ᠵᠠᠬᠢᠷᠤᠯ ᠢ᠋ ᠬᠦᠯᠢᠶᠡᠨᠡ᠃ ᠠᠷᠪᠠᠨ ᠲᠠᠪᠤᠨ ᠬᠡᠢ᠂ ᠰᠢᠷᠠ ᠂ ᠪᠠᠳᠬᠠᠨ ᠴᠤ᠌ ᠰᠡᠮᠰᠧ ᠳ᠋ᠦ᠍ ᠵᠣᠬᠢᠬᠤ ᠬᠡᠮᠵᠢᠶᠡ ᠪᠡᠷ ᠲᠡᠩᠴᠡᠭᠦᠦ ᠣᠷᠣᠰᠢᠵᠤ ᠪᠦᠬᠦ ᠪᠡᠶᠡ ᠶ᠋ᠢᠨ ᠡᠯᠡ ᠡᠳ᠋ ᠡᠷᠬᠡᠲᠡᠨ ᠴᠤᠯᠤ ᠰᠠᠪᠠ ᠲᠠᠢ ᠬᠠᠷᠢᠯᠴᠠᠨ ᠵᠣᠬᠢᠴᠠᠯᠳᠤᠵᠤ ᠦᠷᠡᠵᠢᠯ ᠦ᠋ᠨ ᠰᠢᠰᠲ᠋ᠧᠮ ᠦ᠋ᠨ ᠡᠷᠡᠭᠦᠯ ᠣᠷᠣᠰᠢᠬᠤ ᠪᠠ ᠪᠡᠶᠡ ᠶ᠋ᠢᠨ ᠲᠡᠩᠴᠡᠭᠦᠷᠢ ᠶ᠋ᠢ ᠪᠠᠲᠤᠯᠠᠳᠠᠭ ᠪᠠᠢᠨᠠ᠃
- - - - - - -
ᠬᠢᠨᠠᠯᠲᠠ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ
1. ᠪᠠᠢ ᠴᠢᠩ ᠶᠦᠨ ᠨᠠᠷ 《ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠨᠡᠪᠲᠡᠷᠬᠡᠢ ᠲᠣᠯᠢ》᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠲᠧᠭᠨᠢᠭ ᠮᠡᠷᠭᠡᠵᠢᠯ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠃1987.5
2. 《ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠤᠷᠪᠠᠨ ᠦᠨᠳᠦᠰᠦ》᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂1978.6
ᠢᠷᠡᠯᠲᠡ ᠄ ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ ᠰᠡᠳᠬᠦᠯ 1996 ᠣᠨ ᠤ᠋1 ᠳ᠋ᠦ᠍ᠭᠡᠷ ᠬᠤᠭᠤᠴᠠᠭᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠭᠠᠸᠠ
ᠦᠰᠦᠭ ᠬᠢᠨᠠᠭᠴᠢ᠄ ᠭᠠᠷᠮᠠ᠂ ᠲᠤᠭᠴᠢ ᠰᠠᠷᠠᠨᠠ