ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ – (ᠬᠣᠶᠠᠷ) Монгол эм эмнэлэг (2)
525ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠢ᠋ ᠵᠠᠰᠠᠭᠰᠠᠨ ᠠᠬᠠᠮᠠᠳ ᠮᠣᠩᠭᠣᠯ ᠡᠮᠴᠢ ᠪᠣᠷᠵᠢᠭᠢᠨ ᠡᠷᠳᠡᠨᠢᠴᠤᠭᠲᠤ ᠶ᠋ᠢᠨ ᠲᠤᠷᠰᠢᠯᠭᠠ
【ᠲᠣᠪᠴᠢ ᠠᠭᠤᠯᠭᠠ 】
ᠨᠡᠢᠭᠡᠮ ᠦ᠋ᠨ ᠬᠥᠭᠵᠢᠯᠲᠡ ᠶ᠋ᠢ ᠳᠠᠭᠠᠯᠳᠤᠨ ᠠᠵᠢᠯ ᠠᠮᠢᠳᠤᠷᠠᠯ ᠤ᠋ᠨ ᠳᠠᠷᠤᠭᠠᠰᠤ ᠶᠡᠬᠡᠳᠦᠭᠰᠡᠨ ᠡᠴᠡ ᠪᠣᠯᠵᠤ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠨᠢ ᠦᠷᠭᠦᠯᠵᠢ ᠲᠣᠬᠢᠶᠠᠯᠳᠤᠬᠤ ᠡᠪᠡᠳᠴᠢᠨ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠲᠤᠰ ᠡᠪᠡᠳᠴᠢᠨ ᠪᠣᠯ ᠮᠠᠬᠠᠪᠣᠳ ᠤ᠋ᠨ ᠬᠢᠮᠤᠷᠠᠯ ᠢ᠋ᠶ᠋ᠠᠷ ᠨᠣᠢᠷ ᠢ᠋ ᠨᠥᠯᠥᠭᠡᠯᠡᠵᠦ ᠡᠷᠡᠭᠦᠯ ᠶᠣᠰᠣᠭᠠᠷ ᠤᠨᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠦᠵᠡᠭᠳᠡᠯ ᠢ᠋ ᠬᠡᠯᠡᠵᠦ ᠪᠠᠢᠨᠠ᠃ ᠪᠣᠷᠵᠢᠭᠢᠨ ᠡᠷᠳᠡᠨᠢᠴᠣᠭᠲᠤ ᠡᠮᠴᠢ ᠡᠴᠡ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠢ᠋ ᠵᠠᠰᠠᠬᠤ ᠳ᠋ᠤ᠌ ᠪᠠᠨ ᠥᠪᠡᠷᠮᠢᠴᠡ ᠭᠠᠷ ᠠᠪᠤᠯᠭᠠ ᠲᠠᠢ ᠪᠠᠢᠵᠤ᠂ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠪᠦᠬᠦᠯᠢ ᠴᠣᠭᠴᠠ ᠶ᠋ᠢᠨ ᠦᠵᠡᠯᠲᠡ ᠶ᠋ᠢ ᠪᠠᠷᠢᠮᠲᠠᠯᠠᠨ᠂ ᠡᠪᠡᠳᠴᠢᠨ ᠦ᠌ ᠰᠢᠯᠲᠠᠭᠠᠨ ᠨᠥᠬᠥᠴᠡᠯ ᠳ᠋ᠦ᠍ ᠵᠣᠷᠢᠭᠤᠯᠤᠨ᠂ ᠣᠯᠠᠨ ᠵᠦᠢᠯ ᠦ᠋ᠨ ᠰᠢᠯᠲᠠᠭᠠᠨ ᠠ᠋ᠴᠠ ᠪᠣᠯᠤᠭᠰᠠᠨ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠢ᠋ ᠵᠠᠰᠠᠨ ᠡᠳᠡᠭᠡᠷᠡᠭᠦᠯᠳᠡᠭ᠃
【ᠲᠦᠯᠬᠢᠭᠦᠷ ᠦᠭᠡ 】
ᠪᠣᠷᠵᠢᠭᠢᠨ ᠡᠷᠳᠡᠨᠢᠴᠤᠭᠲᠤ ; ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ; ᠡᠮᠴᠢᠯᠡᠭᠡᠨ ᠦ᠌ ᠲᠤᠷᠰᠢᠯᠭᠠ ᠨᠣᠢᠷ ᠬᠤᠯᠵᠢᠬᠤ ᠪᠣᠯ ᠨᠣᠢᠷ ᠰᠡᠷᠭᠡᠭ᠌ᠰᠢᠵᠤ ᠤᠨᠲᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠤᠶᠤ ᠤᠨᠲᠠᠭᠰᠠᠨ ᠴᠤ᠌ ᠤᠳᠠᠯ ᠦᠭᠡᠢ ᠰᠡᠷᠡᠬᠦ᠂ ᠰᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠳᠠᠬᠢᠵᠤ ᠤᠨᠲᠠᠵᠤ ᠳᠡᠢᠯᠬᠦ ᠦᠭᠡᠢ ᠮᠡᠲᠦ ᠰᠢᠨᠵᠢ ᠪᠦᠬᠦᠢ ᠡᠪᠡᠳᠴᠢᠨ ᠪᠣᠯᠤᠨᠠ᠃ ᠥᠭᠡᠷᠡ ᠪᠡᠷ ᠪᠠᠰᠠ 《ᠨᠣᠢᠷ ᠠᠯᠳᠠᠬᠤ》 ᠭᠡᠵᠦ ᠬᠡᠯᠡᠳᠡᠭ᠃ ᠲᠤᠰ ᠡᠪᠡᠳᠴᠢᠨ ᠢ᠋ ᠥᠩᠭᠡᠷᠡᠭᠰᠡᠨ ᠦ᠌ ᠨᠣᠮ ᠰᠤᠳᠤᠷ ᠤ᠋ᠳ ᠲᠤ᠌ ᠶᠡᠷᠦ ᠡᠴᠡ ᠲᠤᠰᠬᠠᠢ ᠡᠪᠡᠳᠴᠢᠨ ᠪᠣᠯᠭᠠᠨ ᠲᠠᠢᠯᠪᠤᠷᠢᠯᠠᠵᠤ ᠥᠩᠭᠡᠷᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ 《ᠬᠡᠢ ᠡᠪᠡᠳᠴᠢᠨ》᠂ 《ᠵᠢᠷᠦᠬᠡᠨ ᠡᠪᠡᠳᠴᠢᠨ》 ᠵᠡᠷᠭᠡ ᠡᠪᠡᠳᠴᠢᠨ ᠨᠤᠭᠦᠳ ᠦ᠋ᠨ ᠳᠣᠲᠣᠷᠠ ᠰᠢᠨᠵᠢ ᠲᠡᠮᠳᠡᠭ ᠦ᠋ᠨ ᠬᠤᠪᠢ ᠪᠠᠷ ᠲᠠᠷᠠᠬᠠᠢ ᠪᠤᠲᠠᠷᠬᠠᠢ ᠲᠡᠮᠳᠡᠭᠯᠡᠵᠦ ᠪᠠᠢᠪᠠ᠃ ᠣᠳᠣ ᠶ᠋ᠢᠨ ᠨᠡᠢᠭᠡᠮ ᠦ᠋ᠨ ᠬᠥᠭᠵᠢᠯᠲᠡ ᠶ᠋ᠢ ᠳᠠᠭᠠᠯᠳᠤᠨ ᠬᠥᠮᠦᠰ ᠦ᠋ᠨ ᠠᠵᠢᠯ ᠠᠮᠢᠳᠤᠷᠠᠯ ᠤ᠋ᠨ ᠳᠠᠷᠤᠭᠠᠰᠤ ᠬᠦᠨᠳᠦᠷᠡᠵᠦ᠂ ᠠᠵᠢᠯᠯᠠᠵᠤ ᠠᠮᠠᠷᠠᠬᠤ ᠬᠡᠪ ᠦ᠋ᠨ ᠪᠤᠰᠤ ᠵᠡᠷᠭᠡ ᠨᠥᠬᠥᠴᠡᠯ ᠡᠴᠡ ᠪᠣᠯᠵᠤ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠵᠦ ᠪᠠᠢᠭᠠ ᠬᠥᠮᠦᠰ ᠡᠳᠦᠷ ᠢᠷᠡᠬᠦᠶᠡ ᠣᠯᠠᠰᠢᠷᠠᠵᠤ ᠪᠠᠢᠨᠠ᠃
1. ᠰᠢᠯᠲᠠᠭᠠᠨ ᠨᠥᠬᠥᠴᠡᠯ ᠪᠠ ᠡᠪᠡᠳᠴᠢᠨ ᠦ᠌ ᠵᠦᠢ ᠬᠡᠢ ᠴᠢᠰᠤᠨ ᠤ᠋ ᠬᠢᠮᠤᠷᠠᠯ ᠪᠣᠯ ᠲᠤᠰ ᠡᠪᠡᠳᠴᠢᠨ ᠦ᠌ ᠭᠣᠣᠯ ᠰᠢᠯᠲᠠᠭᠠᠨ ᠪᠣᠯᠬᠤ ᠪᠥᠭᠡᠳ ᠵᠢᠷᠦᠬᠡ ᠴᠠᠭᠠᠨ ᠰᠤᠳᠠᠯ ᠪᠣᠯ ᠡᠪᠡᠳᠴᠢᠨ ᠦ᠌ ᠭᠣᠣᠯ ᠣᠷᠣᠨ ᠪᠣᠯᠤᠨᠠ [1] ᠃ ᠰᠡᠳᠬᠢᠯ ᠦ᠋ᠨ ᠠᠵᠢᠯᠯᠠᠭᠠ ᠶ᠋ᠢ ᠬᠡᠲᠦᠷᠡᠭᠦᠯᠬᠦ ᠂ ᠢᠯᠠᠩᠭᠤᠶᠠ ᠭᠡᠨᠡᠳᠲᠡ ᠪᠡᠷ ᠪᠠᠶᠠᠷᠯᠠᠵᠤ᠂ ᠭᠡᠨᠡᠳᠲᠡ ᠪᠡᠷ ᠭᠣᠮᠣᠳᠠᠬᠤ᠂ ᠭᠡᠨᠡᠳᠲᠡ ᠪᠡᠷ ᠠᠭᠤᠷᠯᠠᠵᠤ ᠭᠡᠨᠡᠳᠲᠡ ᠪᠡᠷ ᠪᠠᠴᠢᠮᠳᠠᠬᠤ ᠮᠡᠲᠦ ᠪᠡᠷ ᠰᠡᠳᠬᠢᠯ ᠰᠠᠨᠠᠭᠠ ᠲᠣᠭᠲᠠᠪᠤᠷᠢ ᠦᠭᠡᠢ ᠪᠣᠯᠬᠤ᠂ ᠴᠢᠰᠤ ᠶᠡᠬᠡ ᠭᠠᠷᠬᠤ ᠪᠤᠶᠤ ᠴᠢᠰᠤ ᠪᠠᠷᠠᠭᠳᠠᠬᠤ᠂ ᠨᠠᠰᠤ ᠠᠭᠰᠢᠷᠠᠵᠤ ᠬᠥᠭᠰᠢᠷᠡᠬᠦ ᠵᠡᠷᠭᠡ ᠪᠡᠷ ᠮᠠᠬᠠᠪᠣᠳ ᠤ᠋ᠨ ᠬᠤᠪᠢ ᠪᠠᠷ ᠬᠡᠢ ᠠᠷᠪᠢᠳᠠᠵᠤ ᠵᠢᠷᠦᠬᠡᠨ ᠳ᠋ᠦ᠍ ᠣᠷᠣᠰᠢᠬᠤ᠂ ᠡᠰᠡᠬᠦᠯᠡ ᠠᠭᠤᠷᠯᠠᠵᠤ ᠬᠢᠯᠢᠩᠨᠡᠭᠰᠡᠨ ᠪᠤᠶᠤ ᠠᠶᠤᠵᠤ ᠰᠣᠴᠢᠭᠰᠠᠨ ᠵᠡᠷᠭᠡ ᠪᠡᠷ ᠬᠡᠢ ᠰᠢᠷᠠ ᠬᠢᠮᠤᠷᠠᠵᠤ ᠴᠠᠭᠠᠨ ᠰᠤᠳᠠᠯ ᠳ᠋ᠤ᠌ ᠪᠠᠭᠤᠬᠤ᠂ ᠡᠰᠡᠬᠦᠯᠡ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠪᠠᠷ ᠡᠪᠡᠳᠴᠢᠨ ᠡᠮᠭᠡᠭ ᠲᠦ᠍ ᠨᠡᠷᠪᠡᠭᠳᠡᠵᠦ ᠲᠠᠮᠢᠷ ᠲᠡᠩᠬᠡᠭᠡ ᠮᠠᠭᠤᠳᠠᠬᠤ᠂ ᠠᠯᠵᠠᠭᠤᠷᠠᠨ ᠰᠠᠭᠤᠵᠤ ᠪᠡᠶᠡ ᠲᠠᠮᠢᠷ ᠤ᠋ᠨ ᠬᠥᠳᠡᠯᠭᠡᠭᠡᠨ ᠳᠤᠲᠠᠭᠤᠳᠠᠬᠤ᠂ ᠬᠤᠷᠢᠴᠠᠯ ᠬᠡᠲᠦᠷᠡᠵᠦ ᠪᠡᠶᠡ ᠵᠦᠳᠡᠷᠡᠬᠦ ᠵᠡᠷᠭᠡ ᠪᠡᠷ ᠪᠥᠭᠡᠷᠡᠨ ᠲᠠᠮᠢᠷ ᠳᠣᠷᠣᠢᠲᠠᠵᠤ ᠬᠡᠢ ᠥᠷᠨᠢᠬᠦ ᠵᠡᠷᠭᠡ ᠪᠡᠷ ᠨᠥᠬᠥᠴᠡᠯᠳᠦᠨᠡ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠬᠡᠢ ᠰᠢᠷᠠ ᠬᠢᠮᠤᠷᠠᠨ ᠵᠢᠷᠦᠬᠡ ᠪᠥᠭᠡᠷᠡ ᠶ᠋ᠢ ᠨᠥᠯᠥᠭᠡᠯᠡᠵᠦ ᠡᠷᠡᠭᠦᠯ ᠦᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᠰᠠᠮᠠᠭᠤᠷᠠᠭᠤᠯᠤᠭᠠᠳ ᠤᠨᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠨᠣᠢᠷ ᠠᠯᠲᠠᠨ ᠲᠤᠰ ᠡᠪᠡᠳᠴᠢᠨ ᠪᠣᠯᠤᠨᠠ᠃
2. ᠵᠦᠢᠯ ᠢᠯᠭᠠᠯ ᠪᠠ ᠰᠢᠨᠵᠢ ᠲᠡᠮᠳᠡᠭ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠳ᠋ᠤ᠌ ᠡᠪᠡᠳᠴᠢᠨ ᠦ᠌ ᠮᠠᠬᠠᠪᠣᠳ ᠢ᠋ ᠦᠨᠳᠦᠰᠦᠯᠡᠵᠦ᠂ ᠬᠡᠢ ᠪᠡᠷ ᠨᠣᠢᠷ ᠬᠤᠯᠵᠢᠬᠤ᠂ ᠰᠢᠷᠠ ᠪᠠᠷ ᠨᠣᠢᠷ ᠬᠤᠯᠵᠢᠬᠤ᠂ ᠪᠣᠷᠣ ᠪᠠᠷ ᠨᠣᠢᠷ ᠬᠤᠯᠵᠢᠬᠤ ᠭᠡᠵᠦ᠂ ᠡᠪᠡᠳᠴᠢᠨ ᠡᠭᠦᠰᠦᠭᠰᠡᠨ ᠣᠷᠣᠨ ᠢ᠋ ᠦᠨᠳᠦᠰᠦᠯᠡᠵᠦ ᠵᠢᠷᠦᠬᠡᠨ ᠦ᠌ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠬᠤ᠂ ᠪᠥᠭᠡᠷᠡᠨ ᠦ᠌ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠬᠤ᠂ ᠴᠠᠭᠠᠨ ᠰᠤᠳᠠᠯ ᠤ᠋ᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠬᠤ ᠭᠡᠵᠦ ᠲᠤᠰᠬᠠᠢ ᠬᠤᠪᠢᠶᠠᠨ ᠰᠢᠨᠵᠢᠯᠡᠭᠰᠡᠨ ᠪᠠᠢᠳᠠᠭ᠃ ᠡᠭᠦᠨ ᠳ᠋ᠦ᠍ ᠬᠡᠢ ᠶ᠋ᠢᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠵᠤ ᠪᠠᠢᠪᠠᠯ ᠲᠣᠯᠣᠭᠠᠢ ᠡᠷᠭᠢᠬᠦ᠂ ᠨᠢᠳᠦ ᠡᠷᠢᠶᠡᠯᠵᠡᠬᠦ᠂ ᠤᠨᠲᠠᠵᠤ ᠣᠷᠣᠬᠤ ᠦᠭᠡᠢ ᠪᠤᠶᠤ ᠤᠨᠲᠠᠭᠰᠠᠨ ᠴᠤ᠌ ᠣᠯᠠᠨ ᠵᠡᠭᠦᠳᠦᠯᠡᠬᠦ᠂ ᠣᠯᠠᠨ ᠡᠪᠰᠢᠶᠡᠬᠦ᠂ ᠭᠠᠷ ᠬᠥᠯ ᠴᠡᠴᠡᠷᠡᠬᠦ᠂ ᠰᠤᠳᠠᠯ ᠨᠢ ᠬᠥᠨᠳᠡᠢ ᠬᠣᠭᠣᠰᠣᠨ ᠯᠤᠭᠰᠢᠬᠤ᠂ ᠰᠢᠭᠡᠰᠦ ᠨᠢ ᠲᠤᠩᠭᠠᠯᠠᠭ᠂ ᠬᠥᠭᠡᠰᠦ ᠶᠡᠬᠡ ᠲᠡᠢ ᠪᠠᠢᠬᠤ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠨᠡ᠃ ᠰᠢᠷᠠ ᠶ᠋ᠢᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ ᠠᠮᠠ ᠭᠠᠰᠢᠭᠤᠷᠠᠬᠤ᠂ ᠪᠡᠶᠡ ᠬᠠᠯᠠᠭᠤᠷᠠᠬᠤ᠂ ᠠᠮᠠ ᠬᠡᠯᠡ ᠬᠠᠲᠠᠵᠤ ᠤᠮᠳᠠᠭᠠᠰᠬᠤ᠂ ᠲᠣᠯᠣᠭᠠᠢ ᠡᠪᠡᠳᠬᠦ᠂ ᠳᠣᠲᠣᠷ ᠪᠠᠴᠢᠮᠳᠠᠵᠤ ᠤᠴᠠᠭᠠᠷᠯᠠᠬᠤ ᠳᠤᠷᠠᠲᠠᠢ ᠪᠣᠯᠬᠤ᠂ ᠨᠢᠳᠦ ᠠᠷᠠᠰᠤ ᠰᠢᠷᠠᠯᠠᠬᠤ᠂ ᠢᠳᠡᠭᠡᠨ ᠦ᠌ ᠳᠤᠷᠠᠰᠢᠯ ᠮᠠᠭᠤᠳᠠᠬᠤ᠂ ᠰᠤᠳᠠᠯ ᠨᠢ ᠨᠠᠷᠢᠨ ᠲᠦᠷᠭᠡᠨ ᠯᠤᠭᠰᠢᠬᠤ᠂ ᠰᠢᠭᠡᠰᠦ ᠨᠢ ᠰᠢᠷᠠ᠂ ᠦᠨᠦᠷ ᠠᠭᠤᠷ ᠶᠡᠬᠡ ᠪᠣᠯᠬᠤ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠨᠡ᠃ ᠪᠣᠷᠣ ᠶ᠋ᠢᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ ᠰᠢᠯᠲᠠᠭᠠᠨ ᠦᠭᠡᠢ ᠪᠡᠷ ᠨᠣᠢᠷ ᠠᠯᠳᠠᠬᠤ᠂ ᠨᠢᠭᠤᠷ ᠴᠢᠷᠠᠢ ᠤᠯᠠᠢᠵᠤ ᠪᠣᠷᠣᠯᠠᠬᠤ᠂ ᠠᠮᠠ ᠵᠠᠪᠠᠭᠠᠷᠠᠵᠤ ᠰᠢᠩᠭᠡᠭᠡᠯᠲᠡ ᠮᠠᠭᠤᠳᠠᠬᠤ᠂ ᠮᠠᠩᠨᠠᠢ ᠨᠢᠳᠦᠨ ᠤᠬᠤᠷᠬᠠᠢ ᠪᠠᠷ ᠡᠪᠡᠳᠬᠦ᠂ ᠭᠠᠷ ᠬᠥᠯ ᠦ᠋ᠨ ᠠᠯᠠᠭᠠ ᠬᠠᠯᠠᠭᠤᠷᠠᠬᠤ᠂ ᠰᠤᠳᠠᠯ ᠨᠢ ᠤᠯᠠᠪᠤᠷ ᠰᠢᠷᠠ ᠪᠣᠯᠬᠤ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠨᠡ᠃ ᠵᠢᠷᠦᠬᠡᠨ ᠦ᠌ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ ᠵᠢᠷᠦᠬᠡ ᠭᠣᠣᠯ ᠲᠦᠭᠰᠢᠬᠦ᠂ ᠰᠡᠳᠬᠢᠯ ᠰᠠᠨᠠᠭᠠ ᠲᠣᠭᠲᠠᠪᠤᠷᠢ ᠦᠭᠡᠢ ᠪᠣᠯᠬᠤ᠂ ᠠᠷᠭᠠᠯᠠᠭᠠᠳ ᠤᠨᠲᠠᠭᠰᠠᠨ ᠴᠤ᠌ ᠵᠡᠭᠦᠳᠦ ᠣᠯᠠᠨ ᠪᠥᠭᠡᠳ ᠠᠬᠢᠨ ᠳᠠᠬᠢᠨ ᠰᠣᠴᠢᠵᠤ ᠰᠡᠷᠡᠬᠦ᠂ ᠴᠡᠭᠡᠵᠢᠯᠡᠬᠦ ᠴᠢᠳᠠᠪᠤᠷᠢ ᠮᠠᠰᠢ ᠮᠠᠭᠤᠳᠠᠬᠤ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠨᠡ᠃ ᠪᠥᠭᠡᠷᠡᠨ ᠦ᠌ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ ᠴᠢᠬᠢ ᠱᠤᠤᠭᠢᠬᠤ᠂ ᠲᠣᠯᠣᠭᠠᠢ ᠡᠷᠭᠢᠬᠦ᠂ ᠨᠢᠷᠤᠭᠤ ᠬᠥᠰᠢᠬᠦ᠂ ᠣᠯᠠᠨ ᠵᠡᠭᠦᠳᠦᠯᠡᠬᠦ᠂ ᠳᠤᠰᠤᠯ ᠠᠯᠳᠠᠬᠤ᠂ ᠪᠡᠯᠬᠡᠰ ᠦ᠋ᠨ ᠳᠣᠷᠣᠢᠲᠠᠯ ᠪᠣᠯᠬᠤ᠂ ᠭᠠᠷ ᠬᠥᠯ ᠬᠠᠯᠠᠭᠤᠨ ᠣᠷᠬᠢᠬᠤ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠨᠡ᠃ ᠴᠠᠭᠠᠨ ᠰᠤᠳᠠᠯ ᠤ᠋ᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ ᠲᠣᠯᠣᠭᠠᠢ ᠡᠷᠭᠢᠵᠦ ᠨᠢᠳᠦ ᠡᠷᠢᠶᠡᠯᠵᠡᠬᠦ᠂ ᠬᠦᠵᠦᠭᠦᠦ ᠳᠠᠯᠤ ᠪᠠᠷ ᠬᠥᠰᠢᠵᠦ ᠡᠪᠡᠳᠬᠦ᠂ ᠶᠠᠪᠤᠵᠤ ᠰᠠᠭᠤᠬᠤ ᠶ᠋ᠢ ᠬᠦᠰᠡᠬᠦ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠨᠡ [1] ᠃
3. ᠡᠮᠴᠢᠯᠡᠭᠡ
3.1 ᠵᠠᠰᠠᠬᠤ ᠵᠠᠷᠴᠢᠮ ᠶᠡᠷᠦᠩᠬᠡᠢ ᠳ᠋ᠦ᠍ ᠪᠡᠨ ᠬᠡᠢ ᠴᠢᠰᠤ ᠶ᠋ᠢ ᠲᠡᠭᠰᠢᠳᠬᠡᠵᠦ᠂ ᠵᠢᠷᠦᠬᠡ ᠴᠠᠭᠠᠨ ᠰᠤᠳᠠᠯ ᠢ᠋ ᠲᠠᠢᠳᠬᠤᠷᠠᠭᠤᠯᠤᠨ ᠨᠣᠢᠷ ᠢ᠋ ᠢᠷᠡᠭᠦᠯᠵᠦ ᠵᠠᠰᠠᠬᠤ ᠤᠷᠢᠳᠠᠯ ᠳᠣᠣᠷᠠ ᠡᠪᠡᠳᠴᠢᠨ ᠦ᠌ ᠮᠠᠬᠠᠪᠣᠳ ᠪᠠ ᠣᠷᠣᠨ ᠲᠠᠢ ᠨᠢ ᠤᠶᠠᠯᠳᠤᠭᠤᠯᠵᠤ ᠵᠠᠰᠠᠬᠤ ᠵᠠᠷᠴᠢᠮ ᠢ᠋ ᠪᠠᠷᠢᠮᠲᠠᠯᠠᠨᠠ᠃
3.2 ᠡᠮ ᠨᠠᠢᠷᠯᠠᠭᠠ ᠶ᠋ᠢᠨ ᠡᠮᠴᠢᠯᠡᠭᠡ ᠬᠡᠢ ᠶ᠋ᠢᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ ᠬᠡᠢ ᠶ᠋ᠢ ᠳᠠᠷᠤᠬᠤ ᠪᠠᠷ ᠭᠣᠶᠣ —13. ᠠᠭᠠᠷᠤ —35᠂ ᠰᠦᠭᠮᠡᠯ —3 ᠤ᠋ ᠳᠠᠩ ᠵᠡᠷᠭᠡ ᠡᠮ ᠨᠠᠢᠷᠯᠠᠭᠠ ᠠ᠋ᠴᠠ ᠰᠣᠩᠭᠣᠨ ᠬᠡᠷᠡᠭᠯᠡᠨᠡ; ᠰᠢᠷᠠ ᠶ᠋ᠢᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ ᠰᠢᠷᠠ ᠶ᠋ᠢ ᠳᠠᠷᠤᠵᠤ᠂ ᠮᠠᠬᠠᠪᠣᠳ ᠢ᠋ ᠲᠡᠭᠰᠢᠳᠬᠡᠬᠦ ᠪᠡᠷ ᠠᠯᠲᠠᠨ ᠠᠷᠤᠷᠠ — 5᠂ ᠶᠡᠬᠡ ᠬᠠᠷᠠ —12 ᠵᠡᠷᠭᠡ ᠰᠢᠷᠠ ᠶ᠋ᠢ ᠳᠠᠷᠤᠬᠤ ᠨᠠᠢᠷᠯᠠᠭᠠ ᠠ᠋ᠴᠠ ᠰᠣᠩᠭᠣᠨ ᠬᠡᠷᠡᠭᠯᠡᠨᠡ; ᠪᠣᠷᠣ ᠶ᠋ᠢᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ ᠮᠠᠬᠠᠪᠣᠳ ᠢ᠋ ᠲᠡᠭᠰᠢᠳᠬᠡᠵᠦ᠂ ᠭᠠᠯ ᠤ᠋ᠨ ᠢᠯᠴᠢ ᠶ᠋ᠢ ᠰᠡᠯᠪᠢᠬᠦ ᠪᠡᠷ ᠬᠠᠷᠠ ᠭᠠᠪᠤᠷ —10᠂ ᠴᠠᠭᠠᠨ ᠦᠷᠢᠯ᠂ ᠶᠡᠬᠡ ᠳᠠᠩ᠂ ᠡᠷᠳᠡᠨᠢ — 7 ᠤ᠋ ᠳᠠᠩ ᠵᠡᠷᠭᠡ ᠡᠴᠡ ᠰᠣᠩᠭᠣᠨ ᠬᠡᠷᠡᠭᠯᠡᠨᠡ ; ᠵᠢᠷᠦᠬᠡᠨ ᠦ᠌ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ᠂ ᠬᠡᠢ ᠶ᠋ᠢ ᠳᠠᠷᠤᠵᠤ᠂ ᠵᠢᠷᠦᠬᠡᠨ ᠲᠠᠮᠢᠷ ᠢ᠋ ᠰᠠᠢᠵᠢᠷᠠᠭᠤᠯᠬᠤ ᠪᠠᠷ ᠵᠢᠷᠦᠬᠡ — 6᠂ ᠠᠮᠢᠨ ᠡᠷᠳᠡᠨᠢ ᠂ ᠽᠠᠨᠳᠠᠨ —3 ᠤ᠋ ᠳᠠᠩ ᠵᠡᠷᠭᠡ ᠡᠮ ᠨᠠᠢᠷᠯᠠᠭᠠ ᠠ᠋ᠴᠠ ᠰᠣᠩᠭᠣᠨ ᠬᠡᠷᠡᠭᠯᠡᠨᠡ ; ᠴᠠᠭᠠᠨ ᠰᠤᠳᠠᠯ ᠤ᠋ᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ᠂ ᠴᠠᠭᠠᠨ ᠰᠤᠳᠠᠯ ᠢ᠋ ᠰᠢᠮᠡᠵᠢᠭᠦᠯᠬᠦ ᠪᠡᠷ ᠡᠷᠳᠡᠨᠢ ᠦᠷᠢᠯ᠂ ᠭᠠᠷᠤᠳᠢ —13 ᠵᠡᠷᠭᠡ ᠡᠮ ᠨᠠᠢᠷᠯᠠᠭᠠ ᠠ᠋ᠴᠠ ᠰᠣᠩᠭᠣᠨ ᠬᠡᠷᠡᠭᠯᠡᠨᠡ; ᠪᠥᠭᠡᠷᠡᠨ ᠦ᠌ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠪᠠᠯ ᠪᠥᠭᠡᠷᠡᠨ ᠲᠠᠮᠢᠷ ᠢ᠋ ᠰᠠᠢᠵᠢᠷᠠᠭᠤᠯᠬᠤ ᠪᠠᠷ ᠰᠦᠭᠮᠡᠯ —10᠂ ᠨᠠᠷᠠᠨ ᠮᠠᠨᠳᠠᠯ᠂ ᠰᠠᠷᠢ ᠭᠠᠷᠤᠳᠢ ᠵᠡᠷᠭᠡ ᠨᠠᠢᠷᠠᠯᠭᠠ ᠠ᠋ᠴᠠ ᠰᠣᠩᠭᠣᠨ ᠬᠡᠷᠡᠭᠯᠡᠵᠦ᠂ ᠡᠪᠡᠳᠴᠢᠨ ᠦ᠌ ᠪᠣᠳᠠᠲᠤ ᠪᠠᠢᠳᠠᠯ ᠲᠠᠢ ᠨᠢ ᠤᠶᠠᠯᠳᠤᠭᠤᠯᠤᠨ ᠬᠤᠪᠢᠰᠤᠩᠭᠤᠢ ᠪᠠᠷ ᠡᠮᠴᠢᠯᠡᠳᠡᠭ᠃
3.3 ᠵᠠᠰᠠᠯ ᠤ᠋ᠨ ᠡᠮᠴᠢᠯᠡᠭᠡ ᠪᠣᠷᠵᠢᠭᠢᠨ ᠡᠷᠳᠡᠨᠢᠴᠤᠭᠲᠣ᠌ ᠡᠮᠴᠢ ᠡᠴᠡ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠢ᠋ ᠡᠮᠴᠢᠯᠡᠬᠦ ᠳ᠋ᠦ᠍ ᠤᠯᠠᠮᠵᠢᠯᠠᠯᠲᠤ ᠵᠠᠰᠠᠯ ᠤ᠋ᠨ ᠲᠠᠯᠠ ᠪᠠᠷ ᠥᠪᠡᠷ ᠦ᠋ᠨ ᠭᠡᠰᠡᠨ ᠭᠠᠷ ᠠᠪᠤᠯᠭᠠ ᠲᠠᠢ ᠪᠠᠢᠳᠠᠭ ᠮᠥᠷᠲᠡᠭᠡᠨ ᠢᠯᠠᠩᠭᠤᠶᠠ ᠠᠯᠲᠠ ᠮᠥᠩᠭᠥᠨ ᠪᠦᠯᠢᠶᠡᠨ ᠵᠡᠭᠦᠦ ᠪᠡᠷ ᠮᠠᠰᠢ ᠣᠯᠠᠨ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠢ᠋ ᠡᠮᠨᠡᠨ ᠡᠳᠡᠭᠡᠷᠡᠭᠦᠯᠦᠭᠰᠡᠨ ᠶᠦ᠍ᠮ᠃ ᠳᠠᠷᠤᠢ ᠪᠦᠯᠢᠶᠡᠨ ᠵᠡᠭᠦᠦ ᠶ᠋ᠢᠨ ᠢᠯᠴᠢ ᠪᠡᠷ ᠳᠠᠮᠵᠢᠨ ᠬᠡᠢ ᠶ᠋ᠢ ᠳᠠᠷᠤᠵᠤ᠂ ᠪᠡᠶᠡ ᠰᠡᠳᠬᠢᠯ ᠢ᠋ ᠲᠠᠢᠳᠬᠤᠷᠠᠭᠤᠯᠬᠤ ᠵᠠᠷᠴᠢᠮ ᠢ᠋ᠶ᠋ᠠᠷ ᠡᠪᠡᠳᠴᠢᠲᠡᠨ ᠦ᠌ ᠰᠢᠨᠵᠢ ᠢᠯᠡᠷᠡᠯ᠂ ᠪᠡᠶᠡ ᠶ᠋ᠢᠨ ᠲᠠᠮᠢᠷ᠂ ᠰᠡᠳᠬᠢᠯ ᠰᠠᠨᠠᠭᠠᠨ ᠤ᠋ ᠲᠠᠯᠠ ᠪᠠᠷ ᠬᠦᠯᠢᠶᠡᠨ ᠠᠪᠬᠤ ᠵᠡᠷᠭᠡ ᠶ᠋ᠢ ᠣᠢᠯᠠᠭᠠᠭᠰᠠᠨ ᠪᠠᠢᠳᠠᠯ ᠳᠣᠣᠷᠠ᠂ ᠡᠪᠡᠳᠴᠢᠲᠡᠨ ᠦ᠌ ᠬᠤᠷᠠᠮᠠᠯ ᠤ᠋ᠨ ᠪᠠᠯᠴᠢᠷ ᠲᠤ᠌ ᠮᠥᠩᠭᠥᠨ ᠵᠡᠭᠦᠦ ( ᠪᠦᠯᠢᠶᠡᠨ ᠵᠡᠭᠦᠦ) ᠬᠠᠳᠬᠤᠬᠤ ᠠᠷᠭᠠ ᠪᠣᠯᠤᠨᠠ᠃ ᠤᠷᠢᠳᠠᠪᠡᠷ ᠨᠠᠮ ᠵᠢᠮ ᠣᠷᠴᠢᠨ ᠳ᠋ᠤ᠌ ᠡᠪᠡᠳᠴᠢᠲᠡᠨ ᠢ᠋ ᠳᠡᠭᠡᠭᠰᠢ ᠬᠠᠷᠠᠭᠤᠯᠤᠨ ᠬᠡᠪᠲᠡᠭᠦᠯᠵᠦ᠂ ᠡᠪᠡᠳᠴᠢᠲᠡᠨ ᠢ᠋ ᠬᠡᠪᠡᠯᠢ ᠪᠡᠷ ᠢ᠋ᠶ᠋ᠡᠨ ᠭᠦᠨ ᠠᠮᠢᠰᠬᠤᠬᠤ ᠬᠥᠳᠡᠯᠭᠡᠭᠡᠨ ᠬᠢᠯᠭᠡᠵᠦ᠂ ᠪᠡᠶᠡ ᠰᠡᠳᠬᠢᠯ ᠢ᠋ ᠠᠭᠤᠵᠢᠭᠤ ᠰᠤᠯᠠ ᠪᠣᠯᠭᠠᠭᠰᠠᠨ ᠨᠥᠬᠥᠴᠡᠯ ᠦ᠋ᠨ ᠳᠣᠣᠷᠠ75% ᠤ᠋ ᠰᠫᠢᠷᠲ ᠲᠡᠢ ᠬᠥᠪᠥᠩ ᠢ᠋ᠶ᠋ᠡᠷ ᠠᠷᠢᠭᠤᠳᠬᠠᠭᠰᠠᠨ ᠮᠥᠩᠭᠥᠨ ᠵᠡᠭᠦᠦ ᠶ᠋ᠢ ᠡᠪᠡᠳᠴᠢᠲᠡᠨ ᠦ᠌ ᠬᠤᠷᠠᠮᠠᠯ ᠤ᠋ᠨ ᠪᠠᠯᠴᠢᠷ ᠲᠤ᠌ ᠬᠠᠳᠬᠤᠨᠠ᠃ ᠳᠠᠷᠠᠭᠠ ᠨᠢ ᠡᠪᠡᠳᠴᠢᠲᠡᠨ ᠪᠣᠯᠭᠠᠨ ᠤ᠋ ᠢᠯᠴᠢ ᠶ᠋ᠢ ᠬᠦᠯᠢᠶᠡᠨ ᠠᠪᠬᠤ ᠬᠡᠮᠵᠢᠶᠡ ᠶ᠋ᠢᠨ ᠠᠳᠠᠯᠢ ᠪᠤᠰᠤ ᠶ᠋ᠢ ᠦᠨᠳᠦᠰᠦᠯᠡᠨ 2 ~3 ᠮᠢᠨᠦ᠋ᠲ ᠠᠯᠤᠰᠯᠠᠨ 3~7 ᠰᠧᠭᠦ᠋ᠨ᠋ᠳ᠋ ᠮᠥᠩᠭᠥᠨ ᠵᠡᠭᠦᠦ ᠶ᠋ᠢᠨ ᠡᠰᠢ ᠶ᠋ᠢᠨ ᠬᠡᠰᠡᠭ ᠲᠦ᠍ ᠬᠠᠯᠠᠭᠠᠵᠤ᠂ ᠡᠪᠡᠳᠴᠢᠲᠡᠨ ᠢ᠋ ᠦᠭᠡ ᠵᠣᠭᠣᠭ ᠶᠠᠷᠢᠬᠤ ᠦᠭᠡᠢ ᠨᠠᠮ ᠵᠢᠮ ᠪᠠᠢᠯᠭᠠᠨ᠂ ᠢᠯᠴᠢ ᠶ᠋ᠢᠨ ᠪᠡᠶᠡ ᠳ᠋ᠡᠬᠢ ᠳᠡᠮᠵᠢᠯᠲᠡ ᠶ᠋ᠢ ᠥᠪᠡᠷᠲᠡᠭᠡᠨ ᠰᠠᠷᠠᠨ ᠮᠡᠳᠡᠷᠡᠬᠦ ᠶ᠋ᠢ ᠵᠠᠬᠢᠨᠠ᠃ ᠡᠪᠡᠳᠴᠢᠲᠡᠨ ᠦ᠌ ᠪᠠᠢᠳᠠᠯ ᠢ᠋ ᠦᠨᠳᠦᠰᠦᠯᠡᠨ ᠡᠨᠡ ᠬᠦ᠌ ᠵᠠᠰᠠᠯ ᠢ᠋ ᠡᠳᠦᠷ ᠦ᠋ᠨ ᠨᠢᠭᠡ ᠤᠳᠠᠭᠠ ᠬᠢᠵᠦ᠂ ᠤᠳᠠᠭᠠ ᠪᠦᠷᠢ 30 ~ 60 ᠮᠢᠨᠦ᠋ᠲ ᠬᠢᠨᠡ᠃ ᠡᠮᠴᠢᠯᠡᠭᠡᠨ ᠦ᠌ ᠬᠤᠭᠤᠴᠠᠭᠠ ᠶ᠋ᠢ ᠡᠪᠡᠳᠴᠢᠲᠡᠨ ᠦ᠌ ᠰᠢᠨᠵᠢ ᠢᠯᠡᠷᠡᠯ ᠦ᠋ᠨ ᠰᠠᠢᠵᠢᠷᠠᠯᠲᠠ ᠶ᠋ᠢᠨ ᠪᠠᠢᠳᠠᠯ᠂ ᠡᠪᠡᠳᠴᠢᠲᠡᠨ ᠦ᠌ ᠵᠠᠰᠠᠯ ᠢ᠋ ᠬᠦᠯᠢᠶᠡᠨ ᠠᠪᠬᠤ ᠪᠠᠢᠳᠠᠯ ᠵᠡᠷᠭᠡ ᠶ᠋ᠢ ᠦᠨᠳᠦᠰᠦᠯᠡᠨ ᠲᠣᠭᠲᠠᠭᠠᠨᠠ᠃ ᠶᠡᠷᠦᠩᠬᠡᠢ ᠳ᠋ᠦ᠍ ᠪᠡᠨ 7 ᠡᠳᠦᠷ ᠢ᠋ᠶ᠋ᠡᠷ ᠨᠢᠭᠡ ᠡᠮᠴᠢᠯᠡᠭᠡᠨ ᠦ᠌ ᠬᠤᠭᠤᠴᠠᠭᠠ ᠪᠣᠯᠭᠠᠳᠠᠭ᠃ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠢ᠋ ᠵᠠᠰᠠᠬᠤ ᠳ᠋ᠤ᠌ ᠡᠮ ᠨᠠᠢᠷᠯᠠᠭᠠ ᠶ᠋ᠢᠨ ᠡᠮᠴᠢᠯᠡᠭᠡᠨ ᠳ᠋ᠦ᠍ ᠡᠨᠡ ᠬᠦ᠌ ᠵᠠᠰᠠᠯ ᠢ᠋ ᠬᠠᠪᠰᠤᠷᠭᠠᠬᠤ ᠨᠢ ᠡᠮᠴᠢᠯᠡᠭᠡᠨ ᠦ᠌ ᠦᠷᠡ ᠳ᠋ᠦᠩ ᠦ᠋ᠨ ᠲᠠᠯᠠ ᠪᠠᠷ ᠳᠠᠩ ᠭᠠᠭᠴᠠ ᠡᠮ ᠨᠠᠢᠷᠠᠯᠭᠠ ᠪᠠᠷ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠢ᠋ ᠵᠠᠰᠠᠭᠰᠠᠨ ᠠ᠋ᠴᠠ ᠡᠮᠴᠢᠯᠡᠭᠡᠨ ᠦ᠌ ᠬᠤᠭᠤᠴᠠᠭᠠ ᠣᠬᠣᠷ᠂ ᠦᠢᠯᠡᠳᠦᠯ ᠢ᠋ᠶ᠋ᠡᠷ ᠲᠦᠷᠭᠡᠨ᠂ ᠡᠪᠡᠳᠴᠢᠲᠡᠨ ᠪᠡᠶᠡ ᠰᠡᠳᠬᠢᠯ ᠦ᠋ᠨ ᠲᠠᠯᠠ ᠪᠠᠷ ᠭᠦᠢᠴᠡᠳ ᠲᠠᠢᠪᠤᠰᠢᠷᠠᠯ ᠣᠯᠵᠤ ᠴᠢᠳᠠᠬᠤ ᠵᠡᠷᠭᠡ ᠳᠠᠪᠠᠭᠤᠯᠢᠭ ᠲᠠᠯᠠ ᠲᠠᠢ ᠪᠠᠢᠳᠠᠭ᠃
3.4 ᠰᠤᠪᠢᠯᠠᠯᠲᠠ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ ᠲᠠᠯᠠ ᠪᠠᠷ᠂ ᠵᠥᠭᠡᠯᠡᠨ ᠪᠥᠭᠡᠳ ᠲᠣᠰᠣᠯᠢᠭ ᠰᠢᠮᠡ ᠲᠡᠢ᠂ ᠰᠢᠩᠭᠡᠬᠦ ᠳ᠋ᠦ᠍ ᠬᠢᠯᠪᠠᠷ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ ᠰᠢᠲᠦᠵᠦ᠂ ᠢᠮᠠᠭᠠᠨ ᠮᠢᠬᠠ᠂ ᠶᠤᠤᠮᠠᠢ ᠶ᠋ᠢᠨ ᠭᠤᠯᠢᠷ᠂ ᠰᠠᠭᠠᠭ ᠤ᠋ᠨ ᠭᠤᠯᠢᠷ᠂ ᠥᠨᠳᠡᠭᠡ᠂ ᠪᠤᠷᠴᠠᠭ ᠤ᠋ᠨ ᠵᠦᠢᠯ᠂ ᠡᠬᠡᠭᠦᠨ ᠴᠠᠢ ᠵᠡᠷᠭᠡ ᠬᠥᠩᠭᠡᠨ ᠰᠢᠷᠦᠭᠦᠨ ᠪᠠ ᠰᠢᠮᠡ ᠦᠭᠡᠢ ᠢᠳᠡᠭᠡᠨ ᠤᠮᠳᠠᠭᠠᠨ᠂ ᠲᠦᠭᠦᠬᠡᠢ ᠢᠳᠡᠭᠡᠨ ᠵᠡᠷᠭᠡ ᠶ᠋ᠢ ᠴᠡᠭᠡᠷᠯᠡᠵᠦ᠂ ᠣᠨᠴᠠᠭᠠᠢᠯᠠᠨ ᠤᠨᠲᠠᠬᠤ ᠠ᠋ᠴᠠ ᠡᠮᠦᠨᠡ ᠴᠠᠢ ᠤᠤᠭᠤᠬᠤ ᠶ᠋ᠢ ᠴᠡᠭᠡᠷᠯᠡᠨᠡ᠃ ᠶᠠᠪᠤᠳᠠᠯ ᠮᠥᠷ ᠦ᠋ᠨ ᠲᠠᠯᠠ ᠪᠠᠷ᠂ ᠬᠡᠲᠦᠷᠬᠡᠢ ᠠᠭᠤᠷᠯᠠᠵᠤ ᠪᠠᠴᠢᠮᠳᠠᠬᠤ᠂ ᠬᠡᠳᠦ ᠪᠠᠶᠠᠷᠯᠠᠬᠤ᠂ ᠬᠡᠳᠦ ᠭᠣᠮᠣᠳᠠᠬᠤ᠂ ᠦᠵᠡᠯ ᠰᠠᠨᠠᠭᠠᠨ ᠤ᠋ ᠲᠠᠯᠠ ᠪᠠᠷ ᠭᠡᠨᠡᠳᠲᠡ ᠶ᠋ᠢᠨ ᠰᠡᠲᠡᠯᠲᠡ ᠣᠯᠬᠤ᠂ ᠬᠡᠳᠦ ᠶᠠᠳᠠᠷᠠᠬᠤ ᠵᠡᠷᠭᠡ ᠪᠡᠶᠡ ᠰᠡᠳᠬᠢᠯ ᠦ᠋ᠨ ᠦᠢᠯᠡ ᠶ᠋ᠢ ᠬᠡᠲᠦᠷᠡᠭᠦᠯᠬᠦ ᠡᠴᠡ ᠬᠢᠴᠢᠶᠡᠬᠦ ᠬᠡᠷᠡᠭᠲᠡᠢ᠃
4. ᠡᠪᠡᠳᠴᠢᠨ ᠦ᠌ ᠵᠢᠱ᠌ᠢᠶᠡ
(1) ᠡᠪᠡᠳᠴᠢᠲᠡᠨ ᠫᠠᠩ **᠂ 58 ᠨᠠᠰᠤᠲᠠᠢ᠂ ᠡᠮᠡᠭᠲᠡᠢ᠂ ᠬᠤᠪᠢ ᠶ᠋ᠢᠨ ᠡᠵᠡᠩᠨᠡᠯᠲᠡᠨ᠃ ᠭᠣᠣᠯᠳᠠᠭᠤ ᠵᠠᠪᠰᠠᠷᠯᠠᠭᠠ ᠶ᠋ᠢᠨ ᠴᠢᠨᠠᠷᠲᠠᠢ ᠨᠣᠢᠷ ᠬᠤᠯᠵᠢᠵᠤ ᠭᠤᠷᠪᠠᠨ ᠵᠢᠯ ᠭᠠᠷᠤᠢ ᠪᠣᠯᠪᠠ᠃ ᠭᠤᠷᠪᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠡᠴᠡ ᠡᠬᠢᠯᠡᠨ ᠭᠡᠨᠡᠳᠲᠡ ᠶ᠋ᠢᠨ ᠤᠴᠠᠷᠠᠯ ᠠ᠋ᠴᠠ ᠪᠣᠯᠵᠤ ᠨᠣᠢᠷ ᠲᠡᠭᠰᠢ ᠦᠭᠡᠢ᠂ ᠤᠨᠲᠠᠬᠤ ᠳ᠋ᠤ᠌ ᠬᠦᠴᠢᠷᠳᠡᠬᠦ ᠪᠣᠯᠵᠤ᠂ ᠤᠨᠲᠠᠭᠰᠠᠨ ᠴᠤ᠌ ᠵᠡᠭᠦᠳᠦ ᠣᠯᠠᠨ᠂ 3 ᠴᠠᠭ ᠣᠷᠴᠢᠮ ᠤᠨᠲᠠᠬᠤ ᠪᠣᠯᠪᠠᠴᠤ ᠠᠮᠠᠷᠬᠠᠨ ᠰᠡᠷᠡᠬᠦ ᠪᠠ ᠪᠡᠶᠡ ᠲᠠᠮᠢᠷᠳᠠᠵᠤ᠂ ᠬᠠᠶᠠ ᠪᠦᠲᠦᠨ ᠰᠥᠨᠢ ᠪᠡᠷ ᠤᠨᠲᠠᠬᠤ ᠦᠭᠡᠢ᠂ ᠬᠥᠯᠥᠰᠥ ᠭᠠᠷᠴᠤ᠂ ᠵᠢᠷᠦᠬᠡ ᠴᠡᠴᠡᠷᠡᠨ᠂ ᠴᠡᠭᠡᠵᠢ ᠴᠢᠬᠤᠯᠳᠠᠬᠤ ᠵᠡᠷᠭᠡ ᠰᠢᠨᠵᠢ ᠲᠡᠢ᠂ ᠶᠠᠭ ᠤᠨᠲᠠᠵᠤ ᠣᠷᠣᠬᠤ ᠦᠭᠡᠢ ᠦᠶᠡ ᠳ᠋ᠦ᠍ ᠪᠡᠨ ᠥᠪᠡᠷᠲᠡᠭᠡᠨ ᠡᠮ ᠦ᠋ᠨ ᠳᠡᠯᠭᠡᠭᠦᠷ ᠡᠴᠡ ᠯᠤᠤ ᠯᠠ ᠰᠢ ᠫᠠᠨ ᠠᠪᠴᠤ ᠤᠤᠭᠤᠳᠠᠭ ᠪᠣᠯᠪᠠᠴᠤ ᠮᠡᠳᠡᠭᠳᠡᠮᠡ ᠰᠠᠢᠵᠢᠷᠠᠯᠲᠠ ᠦᠭᠡᠢ᠃ ᠭᠤᠷᠪᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠰᠢᠰᠲ᠋ᠧᠮ ᠲᠡᠢ ᠡᠮᠴᠢᠯᠡᠭᠡ ᠬᠢᠵᠦ ᠥᠩᠭᠡᠷᠡᠭᠰᠡᠨ ᠦᠭᠡᠢ᠂ ᠮᠣᠩᠭᠣᠯ ᠡᠮᠨᠡᠯᠭᠡ ᠪᠡᠷ ᠡᠮᠴᠢᠯᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ ᠮᠠᠨ ᠤ᠋ ᠡᠭᠦᠳᠡᠨ ᠡᠮᠨᠡᠯᠭᠡ ᠳ᠋ᠦ᠍ ᠢᠷᠡᠪᠡ᠃ ᠪᠠᠢᠴᠠᠭᠠᠬᠤ ᠳ᠋ᠤ᠌ ᠬᠡᠢ ᠰᠢᠷᠠ ᠶ᠋ᠢᠨ ᠥᠪᠡᠷᠮᠢᠴᠡ ᠴᠢᠨᠠᠷᠲᠠᠨ᠂ ᠭᠣᠣᠯᠳᠠᠭᠤ ᠨᠣᠢᠷ ᠬᠤᠯᠵᠢᠬᠤ᠂ ᠵᠢᠷᠦᠬᠡ ᠴᠡᠴᠡᠷᠡᠬᠦ ᠡᠴᠡ ᠭᠠᠳᠠᠨᠠ ᠪᠠᠰᠠ ᠬᠡᠪᠡᠯᠢ ᠶ᠋ᠢᠨ ᠳᠣᠣᠷᠠ ᠬᠡᠰᠡᠭ ᠬᠦᠢᠲᠡᠨ ᠣᠷᠬᠢᠵᠤ ᠡᠪᠡᠳᠬᠦ᠂ ᠬᠥᠯ ᠲᠠᠭᠠᠷᠠᠵᠤ ᠵᠢᠩᠭᠢᠨᠡᠬᠦ ᠵᠡᠷᠭᠡ ᠰᠢᠨᠵᠢ ᠲᠡᠢ᠂ ᠰᠤᠳᠠᠯ ᠨᠢ ᠬᠥᠨᠳᠡᠢ ᠬᠣᠭᠣᠰᠣᠨ ᠯᠤᠭᠰᠢᠵᠤ᠂ ᠬᠡᠯᠡ ᠨᠢ ᠤᠯᠠᠭᠠᠨ ᠥᠩᠭᠡ ᠲᠡᠢ᠂ ᠴᠠᠢᠪᠤᠷ ᠨᠢᠮᠭᠡᠨ ᠥᠩᠭᠥᠷ ᠲᠡᠢ᠂ ᠰᠢᠭᠡᠰᠦ ᠨᠢ ᠲᠤᠩᠭᠠᠯᠠᠭ᠂ ᠬᠥᠭᠡᠰᠦ ᠲᠡᠢ᠂ ᠬᠡᠮᠵᠢᠶᠡ ᠡᠷᠡᠭᠦᠯ᠃ ᠪᠣᠷᠵᠢᠭᠢᠨ ᠡᠷᠳᠡᠨᠢᠴᠤᠭᠲᠤ ᠡᠮᠴᠢ ᠡᠴᠡ ᠳᠡᠭᠡᠷᠡᠬᠢ ᠪᠠᠢᠳᠠᠯ ᠢ᠋ ᠦᠨᠳᠦᠰᠦᠯᠡᠵᠦ ᠬᠡᠢ ᠶ᠋ᠢᠨ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠭᠡᠵᠦ ᠣᠨᠣᠰᠢᠯᠠᠵᠤ᠂ ᠬᠡᠢ ᠶ᠋ᠢ ᠳᠠᠷᠤᠵᠤ᠂ ᠢᠯᠴᠢ ᠶ᠋ᠢ ᠰᠡᠯᠪᠢᠨ᠂ ᠨᠣᠢᠷ ᠢ᠋ ᠢᠷᠡᠭᠦᠯᠵᠦ ᠵᠠᠰᠠᠬᠤ ᠵᠠᠷᠴᠢᠮ ᠢ᠋ᠶ᠋ᠠᠷ ᠥᠷᠯᠥᠭᠡ ᠽᠠᠳᠢ —5᠂ ᠦᠳᠡ ᠳ᠋ᠦ᠍ ᠰᠦᠭᠮᠡᠯ —7᠂ ᠣᠷᠣᠢ ᠵᠢᠷᠦᠬᠡ —6᠂ ᠶ᠋ᠢ ᠰᠦᠭᠮᠡᠯ —3 ᠤ᠋ ᠳᠠᠩ ᠢ᠋ᠶ᠋ᠠᠷ ᠥᠭᠬᠦ ᠶ᠋ᠢᠨ ᠬᠠᠮᠲᠤ ᠬᠤᠷᠠᠮᠠᠯ ᠤ᠋ᠨ ᠪᠠᠯᠴᠢᠷ ᠲᠤ᠌ ᠮᠥᠩᠭᠥᠨ ᠵᠡᠭᠦᠦ (ᠪᠦᠯᠢᠶᠡᠨ ᠵᠡᠭᠦᠦ) ᠬᠠᠳᠬᠤᠵᠤ᠂ ᠬᠡᠢ ᠶ᠋ᠢᠨ ᠪᠠᠯᠴᠢᠷ᠂ ᠬᠠᠷᠠ ᠴᠠᠭᠠᠨ ᠤ᠋ ᠵᠠᠪᠰᠠᠷ ᠤ᠋ᠨ ᠪᠠᠯᠴᠢᠷ᠂ ᠵᠢᠷᠦᠬᠡᠨ ᠦ᠌ ᠪᠠᠯᠴᠢᠷ ᠵᠡᠷᠭᠡ ᠪᠠᠯᠴᠢᠷ ᠣᠷᠣᠨ ᠳ᠋ᠤ᠌ ᠬᠠᠳᠬᠤᠬᠤ ᠵᠠᠰᠠᠯ ᠬᠠᠪᠰᠤᠷᠭᠠᠵᠤ ᠠᠷᠪᠠ ᠬᠣᠨᠣᠭ ᠤ᠋ᠨ ᠡᠮᠴᠢᠯᠡᠭᠡ ᠬᠢᠵᠦ ᠡᠪᠡᠳᠴᠢᠲᠡᠨ ᠦ᠌ ᠪᠡᠶᠡ ᠲᠠᠮᠢᠷᠳᠠᠬᠤ᠂ ᠵᠢᠷᠦᠬᠡ ᠴᠡᠴᠡᠷᠡᠬᠦ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠯ ᠨᠢ ᠠᠷᠢᠯᠵᠤ᠂ ᠤᠨᠲᠠᠬᠤ ᠨᠢ ᠡᠷᠡᠭᠦᠯᠵᠢᠪᠡ᠃
(2) ᠶᠠᠩ** ᠂ 58 ᠨᠠᠰᠤᠲᠠᠢ᠂ ᠡᠮᠡᠭᠲᠡᠢ᠂ ᠠᠵᠢᠯ ᠠ᠋ᠴᠠ ᠪᠠᠨ ᠠᠮᠠᠷᠠᠪᠠ᠃ ᠡᠪᠡᠳᠴᠢᠲᠡᠨ ᠭᠣᠣᠯᠳᠠᠭᠤ ᠨᠣᠢᠷ ᠬᠤᠯᠵᠢᠨ ᠠᠷᠪᠠᠨ ᠵᠢᠯ ᠪᠣᠯᠵᠠᠢ᠃ ᠠᠷᠪᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠬᠡᠳᠦ ᠰᠡᠳᠬᠢᠯ ᠵᠣᠪᠠᠭᠰᠠᠨ ᠠ᠋ᠴᠠ ᠨᠣᠢᠷ ᠬᠤᠯᠵᠢᠨ᠂ ᠪᠦᠲᠦᠨ ᠰᠥᠨᠢ ᠪᠡᠷ ᠤᠨᠲᠠᠵᠤ ᠣᠷᠣᠬᠤ ᠦᠭᠡᠢ᠂ ᠡᠳᠦᠷ ᠢ᠋ᠶ᠋ᠡᠷ ᠴᠦ᠍ ᠤᠨᠲᠠᠵᠤ ᠣᠷᠣᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠠ᠋ᠴᠠ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠪᠡᠶᠡ ᠰᠡᠳᠬᠢᠴᠠᠡ ᠶ᠋ᠢᠨ ᠡᠮᠴᠢᠯᠡᠭᠡ ᠬᠢᠵᠦ᠂ ᠬᠠᠮᠲᠤ ᠳ᠋ᠤ᠌ ᠨᠢ ᠯᠤᠤ ᠯᠠ ᠰᠢ ᠫᠠᠨ ᠪᠣᠯᠤᠨ ᠽᠦᠸᠧ ᠫᠢ ᠺᠧ ᠯᠦᠩ ᠤᠤᠭᠤᠵᠤ᠂ ᠡᠪᠡᠳᠴᠢᠨ ᠦ᠌ ᠪᠠᠢᠳᠠᠯ ᠪᠠᠭᠠ ᠰᠠᠢᠵᠢᠷᠠᠨ ᠰᠥᠨᠢ ᠳ᠋ᠦ᠍ ᠪᠡᠨ 4~ 5 ᠴᠠᠭ ᠤᠨᠲᠠᠬᠤ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠤᠨᠲᠠᠭᠰᠠᠨ ᠴᠤ᠌ ᠠᠮᠠᠷᠬᠠᠨ ᠰᠡᠷᠡᠬᠦ᠂ ᠵᠡᠭᠦᠳᠦ ᠣᠯᠠᠨ᠂ ᠵᠢᠷᠦᠬᠡ ᠳᠣᠯᠭᠢᠰᠬᠤ ᠵᠡᠷᠭᠡ ᠰᠢᠨᠵᠢ ᠢᠯᠡᠷᠡᠯ ᠲᠡᠢ ᠪᠣᠯᠬᠣᠷ ᠮᠣᠩᠭᠣᠯ ᠡᠮ ᠪᠠ ᠵᠡᠭᠦᠦ ᠵᠠᠰᠠᠯ ᠤ᠋ᠨ ᠡᠮᠴᠢᠯᠡᠭᠡ ᠶ᠋ᠢ ᠬᠠᠪᠰᠤᠷᠭᠠᠬᠤ ᠪᠠᠷ ᠡᠭᠦᠳᠡᠨ ᠡᠮᠨᠡᠯᠭᠡ ᠳ᠋ᠦ᠍ ᠢᠷᠡᠪᠡ᠃ ᠪᠠᠢᠴᠠᠭᠠᠬᠤ ᠳ᠋ᠤ᠌ ᠴᠣᠭ ᠰᠦᠯᠳᠡ ᠠᠨᠠᠢ᠂ ᠪᠠᠳᠬᠠᠨ ᠬᠡᠢ ᠶ᠋ᠢᠨ ᠥᠪᠡᠷᠮᠢᠴᠡ ᠴᠢᠨᠠᠷᠲᠠᠨ᠂ ᠢᠳᠡᠭᠡᠨ ᠦ᠌ ᠳᠤᠷᠠᠰᠢᠯ ᠮᠠᠭᠤ᠂ ᠰᠢᠩᠭᠡᠭᠡᠯᠲᠡ ᠮᠠᠭᠤ᠂ ᠬᠣᠷᠭᠣᠰᠣᠯᠠᠬᠤ ᠰᠢᠨᠵᠢ ᠲᠡᠢ᠂ ᠰᠢᠩᠭᠡᠨ ᠮᠥᠷ ᠲᠡᠭᠰᠢ᠂ ᠰᠤᠳᠠᠯ ᠨᠢ ᠲᠦᠷᠭᠡᠨ᠂ ᠬᠣᠭᠣᠰᠣᠨ᠃ ᠬᠡᠯᠡ ᠨᠢ ᠤᠯᠠᠭᠠᠨ᠂ ᠴᠠᠢᠪᠤᠷ ᠨᠢᠮᠭᠡᠨ ᠥᠩᠭᠥᠷ ᠲᠡᠢ᠂ ᠬᠡᠯᠪᠡᠷᠢ ᠡᠷᠡᠭᠦᠯ᠃ ᠰᠢᠭᠡᠰᠦ ᠴᠠᠢᠪᠤᠷ᠂ ᠦᠨᠦᠷ ᠠᠭᠤᠷ ᠪᠠᠭᠠ᠂ ᠬᠥᠭᠡᠰᠦ ᠲᠡᠢ᠂ ᠬᠡᠮᠵᠢᠶᠡ ᠡᠷᠡᠭᠦᠯ᠃ ᠪᠣᠷᠵᠢᠭᠢᠨ ᠡᠷᠳᠡᠨᠢᠴᠤᠭᠲᠤ ᠡᠮᠴᠢ ᠡᠴᠡ ᠡᠪᠡᠳᠴᠢᠲᠡᠨ ᠦ᠌ ᠪᠠᠢᠳᠠᠯ ᠢ᠋ ᠦᠨᠳᠦᠰᠦᠯᠡᠨ ᠵᠢᠷᠦᠬᠡᠨ ᠦ᠌ ᠭᠡᠮ ᠢ᠋ᠶ᠋ᠡᠷ ᠨᠣᠢᠷ ᠬᠤᠯᠵᠢᠬᠤ ᠭᠡᠵᠦ ᠣᠨᠣᠰᠢᠯᠠᠨ᠂ ᠵᠢᠷᠦᠬᠡᠨ ᠬᠡᠢ ᠶ᠋ᠢ ᠳᠠᠷᠤᠵᠤ᠂ ᠭᠠᠯ ᠤ᠋ᠨ ᠢᠯᠴᠢ ᠶ᠋ᠢ ᠰᠡᠯᠪᠢᠨ᠂ ᠰᠢᠩᠭᠡᠭᠡᠯᠲᠡ ᠶ᠋ᠢ ᠰᠠᠢᠵᠢᠷᠠᠭᠤᠯᠵᠤ᠂ ᠨᠣᠢᠷ ᠢ᠋ ᠢᠷᠡᠭᠦᠯᠵᠦ ᠵᠠᠰᠠᠬᠤ ᠵᠠᠷᠴᠢᠮ ᠢ᠋ᠶ᠋ᠠᠷ ᠥᠷᠯᠥᠭᠡ ᠠᠮᠢᠨ ᠡᠷᠳᠡᠨᠢ᠂ ᠵᠢᠷᠦᠬᠡᠨ ᠠᠭᠠᠷᠤ — 8᠂ ᠦᠳᠡ ᠳ᠋ᠦ᠍ ᠬᠠᠷᠠ ᠭᠠᠪᠤᠷ —10᠂ ᠠᠮᠤᠷ — 6 ᠣᠷᠣᠢ ᠭᠣᠶᠣ —13᠂ ᠠᠭᠠᠷᠤ —35 ᠥᠭᠴᠦ᠂ ᠬᠤᠷᠠᠮᠠᠯ ᠤ᠋ᠨ ᠪᠠᠯᠴᠢᠷ ᠲᠤ᠌ ᠮᠥᠩᠭᠥᠨ ᠵᠡᠭᠦᠦ (ᠪᠦᠯᠢᠶᠡᠨ ᠵᠡᠭᠦᠦ) ᠬᠠᠳᠬᠤᠵᠤ᠂ ᠬᠡᠢ ᠶ᠋ᠢᠨ ᠪᠠᠯᠴᠢᠷ᠂ ᠬᠠᠷᠠ ᠴᠠᠭᠠᠨ ᠤ᠋ ᠵᠠᠪᠰᠠᠷ ᠤ᠋ᠨ ᠪᠠᠯᠴᠢᠷ᠂ ᠵᠢᠷᠦᠬᠡᠨ ᠦ᠌ ᠪᠠᠯᠴᠢᠷ ᠵᠡᠷᠭᠡ ᠪᠠᠯᠴᠢᠷ ᠣᠷᠣᠨ ᠳ᠋ᠤ᠌ ᠬᠠᠳᠬᠤᠬᠤ ᠵᠠᠰᠠᠯ ᠬᠠᠪᠰᠤᠷᠭᠠᠵᠤ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠡᠮᠴᠢᠯᠡᠭᠡ ᠬᠢᠭᠰᠡᠨ ᠳ᠋ᠦ᠍ ᠪᠦᠷᠢᠮᠦᠰᠦᠨ ᠡᠳᠡᠭᠡᠷᠡᠪᠡ᠃
5. ᠳ᠋ᠦᠩᠨᠡᠯᠲᠡ
ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠨᠢ ᠬᠥᠮᠦᠰ ᠦ᠋ᠨ ᠡᠳᠦᠷ ᠳᠣᠳᠣᠮ ᠤ᠋ᠨ ᠠᠵᠢᠯ ᠠᠮᠢᠳᠤᠷᠠᠯ ᠤ᠋ᠨ ᠳᠠᠷᠤᠭᠠᠰᠤ ᠠ᠋ᠴᠠ ᠪᠣᠯᠵᠤ ᠡᠮᠴᠢᠯᠡᠭᠡᠨ ᠳ᠋ᠦ᠍ ᠦᠷᠭᠦᠯᠵᠢ ᠲᠣᠬᠢᠶᠠᠯᠳᠤᠬᠤ ᠮᠥᠷᠲᠡᠭᠡᠨ ᠡᠳᠦᠷ ᠢᠷᠡᠬᠦᠶᠡ ᠣᠯᠠᠰᠢᠷᠠᠬᠤ ᠪᠣᠯᠤᠭᠰᠠᠨ ᠡᠪᠡᠳᠴᠢᠨ ᠮᠥᠨ᠃ ᠡᠨᠡ ᠪᠣᠯ ᠮᠠᠬᠠᠪᠣᠳ ᠤ᠋ᠨ ᠬᠢᠮᠤᠷᠠᠯ ᠢ᠋ᠶ᠋ᠠᠷ ᠦᠷᠭᠦᠯᠵᠢ ᠡᠷᠡᠭᠦᠯ ᠶᠣᠰᠣᠭᠠᠷ ᠤᠨᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠦᠵᠡᠭᠳᠡᠯ ᠢ᠋ ᠬᠡᠯᠡᠵᠦ ᠪᠠᠢᠨᠠ᠃ ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠳ᠋ᠤ᠌ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠢ᠋ ᠵᠠᠰᠠᠬᠤ ᠳ᠋ᠤ᠌ ᠪᠦᠬᠦᠯᠢ ᠴᠣᠭᠴᠠᠲᠤ ᠦᠵᠡᠯᠲᠡ ᠶ᠋ᠢ ᠪᠠᠷᠢᠮᠲᠠᠯᠠᠨ᠂ ᠬᠡᠢ ᠴᠢᠰᠤᠨ ᠤ᠋ ᠬᠢᠮᠤᠷᠠᠯ ᠢ᠋ ᠲᠡᠭᠰᠢᠳᠬᠡᠵᠦ ᠬᠤᠪᠢᠰᠤᠩᠭᠤᠢ ᠪᠠᠷ ᠡᠮᠴᠢᠯᠡᠳᠡᠭ᠃ ᠪᠣᠷᠵᠢᠭᠢᠨ ᠡᠷᠳᠡᠨᠢᠴᠤᠭᠲᠤ ᠡᠮᠴᠢ ᠳᠥᠴᠢ ᠭᠠᠷᠤᠢ ᠵᠢᠯ ᠦ᠋ᠨ ᠡᠮᠴᠢᠯᠡᠭᠡᠨ ᠦ᠌ ᠳᠤᠮᠳᠠ ᠪᠠᠨ ᠨᠣᠢᠷ ᠬᠤᠯᠵᠢᠬᠤ ᠡᠪᠡᠳᠴᠢᠨ ᠢ᠋ ᠡᠮᠨᠡᠨ ᠵᠠᠰᠠᠭᠰᠠᠨ ᠲᠤᠷᠰᠢᠯᠭᠠ ᠶ᠋ᠢ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠪᠠᠢᠵᠤ᠂ ᠪᠦᠬᠦᠯᠢ ᠴᠣᠭᠴᠠ ᠶ᠋ᠢᠨ ᠦᠵᠡᠯᠲᠡ ᠶ᠋ᠢ ᠪᠠᠷᠢᠮᠲᠠᠯᠠᠬᠤ ᠤᠷᠢᠳᠠᠯ ᠳᠣᠣᠷᠠ ᠥᠪᠡᠷᠮᠢᠴᠡ ᠴᠢᠨᠠᠷ᠂ ᠡᠪᠡᠳᠴᠢᠨ ᠡᠭᠦᠰᠦᠭᠰᠡᠨ ᠰᠢᠯᠲᠠᠭᠠᠨ ᠨᠥᠬᠥᠴᠡᠯ ᠲᠡᠢ ᠨᠢᠭᠲᠠ ᠤᠶᠠᠯᠳᠤᠭᠤᠯᠤᠨ ᠡᠮ ᠨᠠᠢᠷᠠᠯᠭᠠ ᠶ᠋ᠢ ᠬᠤᠪᠢᠰᠤᠩᠭᠤᠢ ᠪᠠᠷ ᠬᠡᠷᠡᠭᠯᠡᠵᠦ᠂ ᠲᠤᠬᠠᠢᠲᠤ ᠪᠠᠯᠴᠢᠷ ᠣᠷᠣᠨ ᠳ᠋ᠤ᠌ ᠠᠯᠲᠠ ᠮᠥᠩᠭᠥᠨ ᠪᠦᠯᠢᠶᠡᠨ ᠵᠡᠭᠦᠦ ᠵᠠᠰᠠᠯ ᠢ᠋ ᠬᠠᠪᠰᠤᠷᠭᠠᠨ᠂ ᠡᠮᠴᠢᠯᠡᠭᠡᠨ ᠦ᠌ ᠳᠤᠮᠳᠠ ᠢᠳᠡᠭᠡᠨ ᠤᠮᠳᠠᠭᠠᠨ ᠪᠠ ᠶᠠᠪᠤᠳᠠᠯ ᠮᠥᠷ ᠦ᠋ᠨ ᠰᠤᠪᠢᠯᠠᠯᠲᠠ ᠶ᠋ᠢ ᠰᠠᠢᠲᠤᠷ ᠠᠩᠬᠠᠷᠴᠤ ᠡᠮᠴᠢᠯᠡᠭᠡᠳ ᠳᠣᠪᠣᠢᠮᠠ ᠠᠮᠵᠢᠯᠲᠠ ᠣᠯᠵᠤ ᠴᠢᠳᠠᠭᠰᠠᠨ ᠪᠠᠢᠨᠠ᠃ ᠡᠭᠦᠨ ᠳ᠋ᠦ᠍᠂ ᠠᠬᠠᠮᠠᠳ ᠮᠣᠩᠭᠣᠯ ᠡᠮᠴᠢ ᠨᠠᠷ ᠤ᠋ᠨ ᠡᠮᠴᠢᠯᠡᠭᠡᠨ ᠦ᠌ ᠲᠤᠷᠰᠢᠯᠭᠠ᠂ ᠭᠠᠷ ᠠᠪᠤᠯᠭᠠ ᠵᠢᠴᠢ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠦ᠌ ᠦᠵᠡᠯ ᠰᠠᠨᠠᠭᠠ ᠶ᠋ᠢ ᠤᠯᠠᠮᠵᠢᠯᠠᠨ ᠵᠠᠯᠭᠠᠮᠵᠢᠯᠠᠵᠤ᠂ ᠪᠠᠭᠰᠢ ᠨᠠᠷ ᠤ᠋ᠨ ᠭᠠᠷ ᠠᠪᠤᠯᠭᠠ ᠶ᠋ᠢ ᠠᠮᠢᠳᠤᠯᠢᠭ ᠢ᠋ᠶ᠋ᠠᠷ ᠡᠵᠡᠮᠰᠢᠵᠦ᠂ ᠵᠠᠯᠭᠠᠮᠵᠢᠯᠠᠨ ᠬᠥᠭᠵᠢᠭᠦᠯᠬᠦ ᠨᠢ ᠵᠠᠯᠠᠭᠤ ᠡᠮᠴᠢ ᠨᠠᠷ ᠤ᠋ᠨ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠪᠣᠯᠤᠨᠠ᠃
ᠵᠡᠭᠦᠯᠲᠡ —
[1] ᠼᠧ᠂ ᠰᠥᠷᠤᠩᠵᠡᠪ ᠨᠠᠢᠷᠠᠭᠤᠯᠪᠠ ᠄《ᠮᠣᠩᠭᠣᠯ ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠳᠣᠲᠣᠷ ᠡᠪᠡᠳᠴᠢᠨ ᠦ᠌ ᠰᠤᠳᠤᠯᠤᠯ》᠂ ᠦᠨᠳᠦᠰᠦᠲᠡᠨ ᠦ᠌ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ᠂ 490 —491 ᠨᠢᠭᠤᠷ᠃ ᠬᠡᠭᠡᠨᠳᠤᠶᠠᠭᠠ ᠭᠣᠣᠯᠯᠠᠭᠴᠢ ᠡᠮᠴᠢ᠂ ᠸᠠᠩ ᠵᠢᠶᠦ᠋ᠨ ᠸᠧᠩ ᠭᠣᠣᠯᠯᠠᠭᠴᠢ ᠡᠮᠴᠢ᠂ ᠴᠢᠮᠡᠭᠡᠯᠡᠯ ᠦ᠋ᠨ ᠵᠣᠬᠢᠶᠠᠭᠴᠢ᠄ ᠪᠣᠷᠵᠢᠭᠢᠨ ᠡᠷᠳᠡᠨᠢᠴᠤᠭᠲᠤ ᠡᠷᠬᠢᠯᠡᠭᠴᠢ ᠡᠮᠴᠢ ᠬᠥᠬᠡᠬᠣᠲᠠ ᠶ᠋ᠢᠨ ᠬᠢᠲᠠᠳ ᠮᠣᠩᠭᠣᠯ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠ （010050 ᠃
ᠢᠷᠡᠯᠲᠡ —
《ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠮᠣᠩᠭᠣᠯ ᠡᠮ ᠡᠮᠨᠡᠯᠭᠡ》 ᠰᠡᠳᠬᠦᠯ ᠦ᠋ᠨ2023 ᠣᠨ ᠤ᠋ 12 ᠳ᠋ᠤᠭᠠᠷ ᠬᠤᠭᠤᠴᠠᠭᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠭᠠᠸᠠ
ᠦᠰᠦᠭ ᠬᠢᠨᠠᠭᠴᠢ ᠄ ᠲᠤᠭᠴᠢ ᠰᠠᠷᠠᠨᠠ