ᠳ᠋ᠠᠯᠢᠩᠪᠣᠷᠣ- ᠭᠡ᠊᠂ ᠴᠦᠢᠵᠢᠨᠵᠠᠪ Даалибор-Гэ, Чойжинжав
1145ᠳ᠋ᠠᠯᠢᠩᠪᠣᠷᠣ
ᠵᠣᠬᠢᠶᠠᠭᠴᠢ᠄ ᠭᠡ᠊᠂ ᠴᠦᠢᠵᠢᠨᠵᠠᠪ
ᠵᠢᠷᠠᠭᠠᠳ ᠣᠨ ᠤ᠋ ᠰᠡᠭᠦᠯᠴᠢ ᠳᠠᠯᠠᠭᠠᠳ ᠣᠨ ᠤ᠋ ᠡᠬᠢ ᠪᠡᠷ ᠮᠠᠨ ᠤ᠋ ᠳ᠋ᠤ᠌ ᠳ᠋ᠠᠯᠢᠩᠪᠣᠷᠤ ᠭᠡᠳᠡᠭ ᠨᠢᠭᠡᠨ ᠠᠳᠠ ᠪᠠᠢᠭᠰᠠᠨ᠃ ᠡᠨᠡ ᠲᠡᠮᠡᠭᠡ ᠤᠯᠠᠭᠠᠨ ᠪᠣᠷᠣ ᠥᠩᠭᠡ ᠲᠡᠢ᠂ ᠪᠡᠶᠡ ᠥᠨᠳᠥᠷ ᠮᠥᠷᠲᠡᠭᠡᠨ ᠤᠷᠲᠤ᠂ ᠪᠤᠭᠤᠷᠤᠯ ᠬᠣᠰᠢᠭᠤ ᠲᠠᠢ᠂ ᠵᠣᠭᠳᠣᠷ ᠨᠢ ᠣᠬᠣᠷᠬᠠᠨ᠂ ᠴᠡᠭᠡᠵᠢ ᠤᠷᠲᠤ᠂ ᠰᠢᠯᠪᠢ ᠨᠢ ᠨᠠᠷᠢᠨ᠂ ᠲᠠᠪᠠᠭ ᠨᠢ ᠲᠣᠮᠣ ᠪᠥᠭᠡᠳ ᠳᠥᠷᠪᠡᠯᠵᠢᠨ᠂ ᠬᠣᠶᠠᠷ ᠪᠦᠬᠦ ᠨᠢ ᠤᠷᠲᠤ ᠮᠥᠷᠲᠡᠭᠡᠨ ᠪᠦᠳᠦᠭᠦᠨ᠃ ᠪᠠᠭᠠ ᠪᠠᠢᠬᠤ ᠳ᠋ᠤ᠌ ᠤᠨᠤᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠪᠦᠬᠦ ᠶ᠋ᠢᠨ ᠲᠤᠭ ᠨᠢ ᠨᠢᠳᠦ ᠬᠠᠭᠠᠭᠠᠳ ᠡᠮᠦᠨᠡ ᠲᠠᠯᠠ ᠶ᠋ᠢᠨ ᠵᠠᠮ ᠦᠵᠡᠭᠳᠡᠳᠡᠭ ᠦᠭᠡᠢ ᠪᠠᠢᠭᠰᠠᠨ᠃ ᠰᠠᠢᠬᠠᠨ ᠥᠩ ᠲᠠᠷᠭᠤ ᠲᠠᠢ ᠵᠢᠯ ᠳ᠋ᠦ᠍ ᠪᠦᠳᠦᠭᠦᠨ ᠬᠥᠮᠦᠨ ᠤᠨᠤᠬᠤ ᠳ᠋ᠤ᠌ ᠬᠣᠶᠠᠷ ᠪᠦᠬᠦ ᠶ᠋ᠢᠨ ᠳᠤᠮᠳᠠ ᠵᠠᠢ ᠨᠢ ᠲᠤᠩ ᠰᠢᠬᠠᠭᠤ ᠪᠠᠢᠵᠤ ᠨᠡᠩ ᠴᠦ᠍ ᠮᠣᠷᠳᠠᠬᠤ ᠪᠠ ᠪᠠᠭᠤᠬᠤ ᠳ᠋ᠤ᠌ ᠬᠣᠶᠠᠷ ᠪᠦᠬᠦ ᠳ᠋ᠦ᠍ ᠨᠢ ᠬᠥᠯ ᠲᠡᠭᠡᠭᠯᠡᠭᠡᠳ ᠲᠤᠩ ᠵᠦᠳᠡᠷᠡᠵᠦ ᠪᠠᠢᠵᠤ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢ ᠭᠠᠷᠳᠠᠭ᠃ ᠲᠡᠮᠡᠭᠡ ᠪᠡᠨ ᠤᠨᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠲᠡᠮᠡᠭᠡᠨ ᠳᠡᠭᠡᠷᠡ ᠡᠴᠡ ᠪᠡᠨ ᠤᠨᠤᠭᠰᠠᠨ ᠲᠡᠮᠡᠭᠡ ᠪᠡᠨ ᠬᠡᠪᠲᠡᠭᠦᠯᠵᠦ ᠳᠡᠢᠯᠬᠦ ᠦᠭᠡᠢ ᠲᠤᠯᠠ ᠪᠠᠭᠤᠬᠤ ᠳ᠋ᠤ᠌ ᠨᠡᠩ ᠲᠦᠪᠡᠭ ᠲᠡᠢ ᠪᠠᠢᠳᠠᠭ᠃ ᠲᠡᠢᠮᠦ ᠡᠴᠡ ᠬᠣᠶᠠᠷ ᠪᠦᠬᠦ ᠡᠴᠡ ᠨᠢ ᠳ᠋ᠠᠯᠢᠩᠪᠣᠷᠤ ᠭᠡᠵᠦ ᠨᠡᠷᠡ ᠥᠭᠭᠦᠭᠰᠡᠨ ᠭᠡᠵᠦ ᠡᠵᠢ ᠮᠢᠨᠢ ᠬᠡᠯᠡᠳᠡᠭ᠃
ᠡᠨᠡ ᠠᠳᠠ ᠪᠣᠯ ᠮᠠᠨ ᠤ᠋ ᠬᠠᠭᠤᠴᠢᠨ ᠲᠡᠮᠡᠭᠡᠨ ᠦ᠌ ᠤᠭ᠂ ᠬᠤᠷᠰᠢᠶᠠ ᠨᠢᠭᠡᠳᠦᠯ ᠳ᠋ᠦ᠍ ᠣᠷᠣᠭᠤᠯᠤᠭᠰᠠᠨ ᠦᠭᠡᠢ ᠬᠤᠪᠢ ᠶ᠋ᠢᠨ ᠲᠡᠮᠡᠭᠡ ᠶᠤᠮ᠃ ᠮᠢᠩᠭᠠ ᠶᠢᠰᠦᠨ ᠵᠠᠭᠤᠨ ᠲᠠᠪᠢᠨ ᠳᠥᠷᠪᠡᠨ ᠣᠨ ᠤ᠋ ᠪᠣᠲᠣᠭᠣ᠂ ᠨᠠᠳᠠ ᠲᠠᠢ ᠨᠠᠰᠤ ᠰᠠᠴᠠᠭᠤ᠂ ᠨᠢᠭᠡ ᠵᠢᠯ ᠦ᠋ᠨ ᠲᠥᠯ ᠭᠡᠨᠡ ᠯᠠᠢ᠃
ᠡᠨᠡ ᠠᠳᠠ ᠠᠬᠠ ᠳᠡᠭᠦᠦ ᠭᠤᠷᠪᠠᠨ ᠡᠷᠡ ᠪᠣᠲᠣᠭᠣ ᠪᠠᠢᠵᠤ᠂ ᠬᠠᠮᠤᠭ ᠶᠡᠬᠡ ᠨᠢ ᠶᠡᠬᠡ ᠰᠢᠷᠠ᠂ ᠳᠤᠮᠳᠠᠬᠢ ᠨᠢ ᠪᠠᠭᠠ ᠰᠢᠷᠠ᠂ ᠬᠠᠮᠤᠭ ᠪᠠᠭᠠ ᠶ᠋ᠢ ᠨᠢ ᠳ᠋ᠠᠯᠢᠩᠪᠣᠷᠣ ᠭᠡᠳᠡᠭ ᠨᠡᠷᠡ ᠲᠡᠢ᠂ ᠶᠡᠬᠡ ᠰᠢᠷᠠ ᠨᠢ ᠨᠠᠮᠠᠶ᠋ᠢ ᠪᠠᠭᠠ ᠪᠠᠢᠬᠤ ᠳ᠋ᠤ᠌ ᠬᠥᠭᠰᠢᠷᠡᠭᠡᠳ ᠦᠭᠡᠢ ᠪᠣᠯᠵᠤ᠂ ᠪᠠᠭᠠ ᠰᠢᠷᠠ ᠨᠢ ᠨᠢᠭᠡ ᠮᠢᠩᠭᠠ ᠶᠢᠰᠦᠨ ᠵᠠᠭᠤᠨ ᠵᠢᠷᠠᠨ ᠬᠡᠳᠦᠨ ᠣᠨ ᠳ᠋ᠤ᠌ ᠶᠡᠬᠡ ᠪᠣᠷᠣᠭᠠᠨ ᠤ᠋ ᠬᠠᠭᠤᠷᠠᠢ ᠦᠶᠡᠷ ᠦ᠋ᠨ ᠤᠰᠤᠨ ᠳ᠋ᠤ᠌ ᠳᠠᠭᠠᠷᠢᠭᠳᠠᠭᠠᠳ᠂ ᠲᠤᠱᠠᠭᠠ ᠲᠠᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠮᠥᠯᠬᠥᠭᠰᠡᠭᠡᠷ ᠪᠠᠢᠭᠠᠳ ᠭᠣᠣᠯ ᠤ᠋ᠨ ᠡᠷᠭᠢ ᠳ᠋ᠦ᠍ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠬᠦᠨᠳᠦ ᠰᠢᠷᠬᠠᠲᠤᠵᠠᠢ᠂ ᠡᠮᠦᠨᠡ ᠬᠣᠶᠠᠷ ᠡᠪᠦᠳᠦᠭ ᠦ᠋ᠨ ᠶᠠᠰᠤ ᠨᠢ ᠭᠠᠷᠴᠢᠬᠠᠭᠰᠠᠨ ᠪᠠᠢᠭᠰᠠᠨ᠃ ᠲᠡᠭᠡᠭᠡᠳ ᠪᠢᠳᠡ ᠨᠠᠷ ᠠᠷᠪᠠᠨ ᠬᠡᠳᠦᠨ ᠡᠳᠦᠷ ᠬᠡᠪᠲᠡᠷᠢ ᠳ᠋ᠦ᠍ ᠨᠢ ᠲᠡᠵᠢᠭᠡᠵᠦ ᠪᠠᠢᠭᠠᠳ ᠦᠬᠦᠭᠰᠡᠨ ᠪᠢᠯᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠮᠠᠯ ᠡᠮᠨᠡᠯᠭᠡ ᠶ᠋ᠢᠨ ᠨᠥᠬᠥᠴᠡᠯ ᠲᠤᠩ ᠳᠤᠲᠠᠮᠠᠭ ᠪᠠᠢᠭᠰᠠᠨ ᠶᠤᠮ ᠴᠢᠨᠢ ᠠᠷᠭᠠ ᠦᠭᠡᠢ ᠯᠡ ᠪᠣᠯᠵᠠᠢ᠃ ᠮᠠᠨᠠᠢᠬᠢᠨ ᠪᠠᠷᠢᠭᠠᠳᠠ ᠶ᠋ᠢᠨ ᠨᠢᠭᠡ ᠬᠣᠲᠠ ᠪᠠᠭᠠ ᠮᠠᠯ ᠬᠠᠷᠢᠭᠤᠯᠳᠠᠭ᠂ ᠭᠡᠪᠡᠴᠦ ᠨᠡᠭᠦᠵᠦ ᠰᠠᠭᠤᠬᠤ᠂ ᠤᠰᠤ ᠪᠣᠷᠳᠣᠭᠠ ᠠᠴᠢᠬᠤ᠂ ᠬᠣᠯᠠ ᠣᠢᠷᠠ ᠶᠠᠪᠤᠬᠤ ᠬᠡᠷᠡᠭᠴᠡᠭᠡᠨ ᠡᠴᠡ ᠪᠣᠯᠵᠤ᠂ ᠪᠠᠷᠢᠭᠠᠳᠠ ᠠ᠋ᠴᠠ ᠨᠢᠭᠡ ᠬᠣᠲᠠ ᠪᠠᠭᠠ ᠮᠠᠯ ᠤ᠋ᠨ ᠳᠡᠭᠡᠷᠡ ᠪᠠᠰᠠ ᠲᠡᠮᠡᠭᠡ ᠳᠠᠭᠠᠭᠠᠴᠢᠯᠠᠭᠤᠯᠵᠤ ᠥᠭᠳᠡᠭ᠃ ᠮᠠᠨ ᠤ᠋ ᠳ᠋ᠤ᠌ ᠬᠤᠪᠢ ᠶ᠋ᠢᠨ ᠲᠡᠮᠡᠭᠡ᠂ ᠬᠠᠮᠲᠤ ᠶ᠋ᠢᠨ ᠨᠡᠢᠯᠡᠭᠡᠳ ᠵᠢᠷᠭᠤᠭᠠ ᠠ᠋ᠴᠠ ᠳᠣᠯᠣᠭᠠᠨ ᠲᠡᠮᠡᠭᠡ ᠪᠠᠢᠳᠠᠭ ᠪᠠᠢᠭᠰᠠᠨ᠂ ᠬᠠᠷᠢᠨ ᠡᠨᠡ ᠭᠤᠷᠪᠠᠨ ᠠᠳᠠ ᠪᠣᠯ ᠬᠣᠷᠰᠢᠶᠠᠵᠢᠯ ᠳ᠋ᠤ᠌ ᠣᠷᠣᠭᠤᠯᠤᠭᠠ ᠦᠭᠡᠢ ᠬᠤᠪᠢ ᠶ᠋ᠢᠨ ᠲᠡᠮᠡᠭᠡ ᠶᠤᠮ᠃
ᠳ᠋ᠠᠯᠢᠩᠪᠣᠷᠤ ᠭᠡᠵᠦ ᠪᠤᠰᠤᠳ ᠲᠡᠮᠡᠭᠡ ᠡᠴᠡ ᠤᠨᠤᠵᠤ ᠠᠴᠢᠶᠠᠯᠠᠬᠤ ᠳ᠋ᠤ᠌ ᠳᠠᠭᠠᠭᠠᠴᠠ ᠲᠠᠢ ᠮᠠᠯ ᠶᠤᠮ᠃ ᠥᠪᠡᠷ ᠦ᠋ᠨ ᠬᠥᠮᠦᠨ (ᠮᠠᠨᠠᠢᠬᠢᠨ ) ᠭᠤᠶᠠ᠂ ᠴᠠᠪᠢ ᠶ᠋ᠢ ᠨᠢ ᠢᠯᠪᠢᠵᠦ ᠮᠠᠭᠠᠵᠢᠵᠤ ᠪᠠᠢᠭᠰᠠᠨ ᠴᠤ᠌ ᠲᠡᠷᠡ᠂ ᠬᠡᠦᠬᠡᠳ ᠳᠥᠷᠪᠡᠨ ᠬᠥᠯ ᠳᠣᠭᠤᠤᠷ ᠨᠢ ᠮᠥᠯᠬᠥᠵᠦ ᠪᠠᠢᠭᠰᠠᠨ ᠴᠤ᠌ ᠲᠡᠷᠡ᠂︽ᠲᠡᠭᠡᠵᠦ ᠯᠡ ᠪᠠᠢᠳᠠᠭ ᠶᠤᠮ︾ ᠭᠡᠰᠡᠨ ᠶᠠᠩᠵᠤ ᠲᠠᠢ ᠠᠵᠢᠭ ᠴᠤ᠌ ᠦᠭᠡᠢ ᠬᠡᠪᠢᠭᠡᠳ ᠵᠣᠭᠰᠣᠵᠤ ᠯᠠ ᠪᠠᠢᠳᠠᠭ᠂ ᠲᠤᠩ ᠶᠡᠬᠡ ᠡᠭᠳᠡᠭᠦᠦ ᠨᠢ ᠬᠦᠷᠪᠡᠯ ᠡᠷᠭᠢᠵᠦ ᠢᠷᠡᠭᠡᠳ ᠨᠢᠭᠡ ᠮᠠᠭᠤᠬᠠᠢ ᠬᠠᠷᠠᠳᠠᠭ᠂ ᠤᠨᠤᠵᠤ ᠠᠴᠢᠬᠤ ᠳ᠋ᠤ᠌ ᠬᠡᠪᠲᠡᠵᠦ ᠯᠡ ᠪᠠᠢᠳᠠᠭ᠂ ᠬᠡᠦᠬᠡᠳ᠂ ᠬᠥᠭᠰᠢᠳ ᠮᠠᠴᠤᠵᠤ ᠮᠠᠴᠤᠵᠤ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢ ᠭᠠᠷᠬᠤ ᠳ᠋ᠤ᠌ ᠬᠥᠳᠡᠯᠳᠡᠭ ᠴᠦ᠍ ᠦᠭᠡᠢ᠂ ᠪᠣᠰᠳᠠᠭ ᠴᠤ᠌ ᠦᠭᠡᠢ᠂ ᠶᠡᠷᠦ ᠡᠴᠡ ᠪᠡᠨ ᠪᠣᠰᠤᠨ ᠬᠠᠷᠠᠢᠳᠠᠭ ᠦᠭᠡᠢ᠂ ᠨᠡᠭᠦᠳᠡᠯᠯᠡᠬᠦ ᠳ᠋ᠦ᠍ ᠠᠴᠢᠶᠠ ᠠᠴᠢᠬᠤ ᠳ᠋ᠠᠭᠠᠨ ᠬᠠᠮᠤᠭ ᠤ᠋ᠨ ᠳᠠᠭᠤ ᠴᠢᠮᠡᠭᠡ ᠭᠠᠷᠳᠠᠭ᠂ ᠪᠠᠯᠪᠠᠷᠠᠬᠤ ᠳ᠋ᠤ᠌ ᠠᠮᠠᠷᠬᠠᠨ ᠠᠶᠠᠭᠠ ᠰᠢᠨᠠᠭᠠ᠂ ᠲᠣᠭᠣᠭᠠ ᠬᠠᠢᠰᠤ᠂ ᠰᠠᠪᠠ ᠰᠠᠭᠤᠯᠠᠭᠠ ᠵᠡᠷᠭᠡ ᠪᠡᠨ ᠲᠡᠭᠦᠨ ᠳᠡᠭᠡᠷᠡ ᠪᠡᠨ ᠠᠴᠢᠳᠠᠭ᠃ ᠠᠶᠠᠨ ᠶᠠᠪᠤᠬᠤ ᠳ᠋ᠠᠭᠠᠨ ᠪᠦᠷ ᠭᠠᠷ ᠲᠠᠭᠠᠨ ᠬᠥᠲᠥᠯᠳᠡᠭ᠂ ᠲᠡᠮᠡᠭᠡᠨ ᠦ᠌ ᠠᠷᠤ ᠳ᠋ᠤ᠌ ᠴᠥᠷᠬᠡᠯᠡᠭᠡ ᠴᠥᠷᠬᠡᠯᠡᠪᠡᠯ ᠡᠮᠦᠨᠡᠰᠢ ᠳᠠᠭᠠᠷᠢᠭᠠᠳ ᠪᠠᠢᠳᠠᠭ ᠲᠡᠢᠮᠦ ᠲᠡᠮᠡᠭᠡ ᠪᠠᠢᠯᠠ᠃
ᠡᠨᠡ ᠠᠳᠠ ᠬᠠᠮᠠᠷ ᠬᠠᠲᠠᠭᠤ᠂ ᠶᠠᠪᠤᠳᠠᠯ ᠬᠠᠲᠠᠭᠤ ᠲᠤᠯᠠ ᠪᠠᠷᠤᠭ ᠲᠠᠢ ᠬᠥᠮᠦᠨ ᠬᠠᠮᠠᠷ ᠢ᠋ ᠨᠢ ᠳᠡᠢᠯᠳᠡᠭ ᠦᠭᠡᠢ᠂ ᠳᠡᠭᠡᠷᠡ ᠨᠢ ᠤᠨᠤᠴᠢᠬᠠᠭᠠᠳ ᠪᠤᠷᠠᠨᠲᠠᠭ ᠢ᠋ ᠨᠢ ᠭᠠᠷ ᠲᠠᠭᠠᠨ ᠬᠣᠶᠠᠷ ᠣᠷᠢᠶᠠᠭᠠᠳ ᠪᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠵᠠᠮ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠡᠪᠡᠰᠦ ᠶ᠋ᠢ ᠦᠵᠡᠭᠡᠳ ᠬᠦᠵᠦᠭᠦᠦ ᠪᠡᠨ ᠬᠤᠷᠢᠶᠠᠭᠠᠳ ᠲᠣᠯᠣᠭᠠᠢ ᠪᠠᠨ ᠨᠢᠭᠡ ᠯᠡ ᠬᠥᠨᠲᠥᠷᠬᠦ ᠳ᠋ᠦ᠍ ᠭᠠᠷ ᠢ᠋ ᠭᠠᠯ ᠪᠤᠲᠠᠷᠠᠲᠠᠯᠠ ᠬᠠᠯᠠᠭᠠᠭᠠᠳ ᠪᠤᠷᠠᠨᠲᠠᠭ ᠢ᠋ᠶ᠋ᠠᠨ ᠰᠢᠪᠲᠤᠯᠤᠨ ᠠᠪᠳᠠᠭ᠂ ᠵᠠᠷᠢᠮ ᠳ᠋ᠠᠭᠠᠨ ᠪᠤᠷᠠᠨᠲᠠᠭ ᠢ᠋ ᠨᠢ ᠬᠤᠷᠳᠤᠨ ᠲᠠᠯᠪᠢᠵᠤ ᠥᠭᠬᠦ ᠦᠭᠡᠢ ᠪᠣᠯ ᠡᠮᠦᠨᠡᠰᠢ ᠪᠡᠨ ᠲᠠᠲᠠᠵᠤ ᠤᠨᠠᠭᠠᠬᠤ ᠠᠶᠤᠯ ᠭᠠᠷᠳᠠᠭ᠃ ᠬᠥᠮᠦᠨ ᠦ᠌ ᠳᠤᠷᠠ ᠦᠭᠡᠢ ᠶ᠋ᠢ ᠬᠦᠷᠭᠡᠬᠦ ᠳ᠋ᠦ᠍ ᠪᠤᠷᠠᠨᠲᠠᠭ ᠢ᠋ ᠨᠢ ᠬᠡᠳᠦᠢ ᠬᠦᠴᠦᠲᠡᠢ ᠳᠤᠭᠲᠤᠷᠴᠤ ᠪᠠᠢᠭᠰᠠᠨ ᠴᠤ᠌ ᠳᠠᠭᠤ ᠭᠠᠷᠳᠠᠭ ᠦᠭᠡᠢ᠂ ᠪᠠᠷᠬᠢᠷᠠᠳᠠᠭ ᠦᠭᠡᠢ ᠵᠦᠭᠡᠷ ᠯᠡ ᠬᠥᠮᠦᠨ ᠤᠷᠤᠭᠤ ᠮᠠᠭᠤᠬᠠᠢ ᠰᠢᠭ᠋ ᠬᠠᠷᠠᠵᠤ ᠪᠠᠢᠳᠠᠭ᠃ ᠵᠠᠮ ᠶᠠᠪᠤᠬᠤ ᠳ᠋ᠤ᠌ ᠬᠦᠵᠦᠭᠦᠦ ᠪᠡᠨ ᠪᠠᠭᠠ ᠡᠮᠦᠨᠡᠰᠢ ᠲᠠᠯᠪᠢᠵᠤ ᠢᠷᠡᠭᠡᠳ ᠯᠡ ᠠᠯᠬᠤᠭᠠᠳ ᠢᠷᠡᠬᠦ ᠳ᠋ᠦ᠍ ᠬᠠᠮᠲᠤ ᠶᠠᠪᠤᠭᠰᠠᠨ ᠲᠡᠮᠡᠭᠡ ᠪᠦᠷ ᠯᠡ ᠱᠣᠭᠰᠢᠵᠤ ᠲᠡᠰᠢᠬᠦ ᠳᠡᠭᠡᠷᠡ ᠲᠤᠯᠳᠠᠭ᠃ ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠶᠠᠪᠤᠬᠤ ᠳ᠋ᠤ᠌ ᠱᠣᠭᠰᠢᠨ ᠪᠥᠬᠥᠢᠭᠡᠳ ᠡᠪᠡᠰᠦ ᠳᠠᠭᠠᠷᠢᠵᠤ ᠢᠳᠡᠭᠡᠳ ᠶᠠᠪᠤᠳᠠᠭ᠃ ᠤᠨᠤᠭᠠᠨ ᠳᠡᠭᠡᠷᠡ ᠡᠴᠡ ᠡᠪᠡᠰᠦ ᠰᠢᠭᠦᠷᠡᠳᠡᠭ ᠲᠡᠮᠡᠭᠡ ᠶᠠᠪᠤᠳᠠᠯ ᠳ᠋ᠤ᠌ ᠴᠤ᠌ ᠰᠠᠭᠠᠳ ᠪᠣᠯᠳᠠᠭ ᠦᠭᠡᠢ ᠮᠥᠷᠲᠡᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠶᠠᠪᠤᠵᠤ ᠪᠠᠢᠭᠠᠳ ᠢᠳᠡᠭᠡᠳ ᠴᠠᠳᠴᠢᠬᠠᠳᠠᠭ᠂ ᠲᠡᠭᠡᠵᠦ ᠲᠤᠰᠬᠠᠢ ᠲᠠᠯᠪᠢᠵᠤ ᠢᠳᠡᠭᠦᠯᠬᠦ ᠴᠢᠬᠤᠯᠠ ᠦᠭᠡᠢ ᠪᠠᠢᠳᠠᠭ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠤᠨᠤᠬᠤ ᠲᠡᠮᠡᠭᠡ ᠠᠷᠪᠢᠨ ᠪᠣᠯᠪᠠᠴᠤ ᠤᠨᠤᠭᠠᠨ ᠳᠡᠭᠡᠷᠡ ᠡᠴᠡ ᠢᠳᠡᠳᠡᠭ (ᠤᠨᠤᠵᠤ ᠶᠠᠪᠤᠬᠤ ᠶ᠋ᠢᠨ ᠳᠠᠭᠠᠤ ᠡᠪᠡᠰᠦ ᠢᠳᠡᠬᠦ ) ᠲᠡᠮᠡᠭᠡ ᠲᠤᠩ ᠴᠥᠭᠡᠨ᠃
ᠡᠨᠡ ᠲᠡᠮᠡᠭᠡ ᠤᠶᠠᠭᠠ ᠲᠠᠢᠯᠬᠤ ᠳ᠋ᠠᠭᠠᠨ ᠲᠤᠩ ᠮᠡᠷᠭᠡᠨ᠂ ᠶᠠᠮᠠᠷ ᠤᠶᠠᠭᠠᠨ ᠠ᠋ᠴᠠ ᠶᠠᠭᠠᠬᠢᠵᠤ ᠤᠶᠠᠯᠠ ᠭᠡᠳ ᠪᠦᠷ ᠲᠠᠢᠯᠵᠤ ᠳᠡᠢᠯᠳᠡᠭ᠂ ᠤᠶᠠᠭᠠᠨ ᠳᠡᠭᠡᠷᠡ ᠨᠢ ᠮᠠᠯ ᠤ᠋ᠨ ᠪᠠᠭᠠᠰᠤ ᠳᠦᠷᠭᠢᠭᠡᠳ ᠴᠦ᠍ ᠬᠡᠷᠡᠭ ᠪᠣᠯᠳᠠᠭ ᠦᠭᠡᠢ᠂ ᠤᠷᠤᠭᠤᠯ ᠢ᠋ᠶ᠋ᠠᠨ ᠢᠷᠵᠠᠢᠯᠭᠠᠭᠠᠳ ᠰᠢᠲᠦ ᠪᠡᠷ ᠢ᠋ᠶ᠋ᠡᠨ ᠬᠠᠵᠠᠭᠰᠠᠭᠠᠷ ᠪᠠᠢᠭᠠᠳ ᠲᠠᠢᠯᠤᠭᠠᠳ ᠠᠪᠳᠠᠭ᠃ ᠠᠢᠯ ᠳ᠋ᠤ᠌ ᠶᠤᠮ ᠤᠤ ᠡᠰᠡᠪᠡᠯ ᠭᠡᠷ ᠲᠡᠭᠡᠨ ᠢᠵᠢᠯᠢ ᠲᠡᠢ ᠨᠢ ᠬᠠᠮᠲᠤ ᠤᠶᠠᠭᠠᠳ ᠬᠡᠷᠡᠭ ᠪᠠᠢᠳᠠᠭ ᠦᠭᠡᠢ᠂ ᠥᠪᠡᠷ ᠦ᠋ᠨ ᠤᠶᠠᠭᠠ ᠪᠠᠨ ᠲᠠᠢᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠢᠵᠢᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠤᠶᠠᠭᠠ ᠶ᠋ᠢ ᠪᠦᠭᠦᠳᠡ ᠶ᠋ᠢ ᠨᠢ ᠲᠠᠢᠯᠵᠤ ᠠᠪᠤᠭᠠᠳ ᠬᠠᠮᠲᠤ ᠳ᠋ᠤ᠌ ᠪᠠᠨ ᠶᠠᠪᠤᠭᠠᠳ ᠥᠭᠳᠡᠭ᠃ ᠤᠶᠠᠬᠤ ᠴᠢᠬᠤᠯᠠ ᠲᠠᠢ ᠦᠶᠡ ᠳ᠋ᠦ᠍ ᠬᠣᠶᠠᠷ ᠡᠮᠦᠨᠡ ᠬᠥᠯ ᠢ᠋ ᠨᠢ ᠪᠠᠭᠯᠠᠵᠤ ᠯᠠ ᠬᠠᠶᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠪᠠᠢᠳᠠᠭ ᠦᠭᠡᠢ᠃
ᠳ᠋ᠠᠯᠢᠩᠪᠣᠷᠤ ᠨᠠᠳᠠᠳᠤ ᠶᠡᠬᠡ ᠯᠡ ᠲᠠᠭᠠᠰᠢᠶᠠᠯ ᠲᠠᠢ ᠪᠠᠢᠳᠠᠭ᠂ ᠬᠡᠳᠦᠢᠪᠡᠷ ᠶᠠᠪᠤᠳᠠᠯ ᠨᠢ ᠬᠠᠲᠠᠭᠤ ᠪᠣᠯᠪᠠᠴᠤ᠂ ᠣᠨᠴᠠᠭᠠᠢ ᠤᠴᠢᠷ ᠶᠠᠪᠤᠳᠠᠯ ᠳ᠋ᠤ᠌ ᠵᠠᠪᠠᠯ ᠲᠡᠭᠦᠨ ᠢ᠋ ᠯᠡ ᠤᠨᠤᠵᠤ ᠡᠳ᠋ᠯᠡᠬᠦ ᠤᠴᠢᠷ ᠪᠣᠯᠳᠠᠭ᠃ ᠵᠢᠱ᠌ᠢᠶᠡᠯᠡᠪᠡᠯ᠂ ᠰᠥᠨᠢ ᠵᠠᠮ ᠬᠥᠭᠡᠭᠡᠵᠦ ᠠᠢᠯ ᠡᠷᠢᠬᠦ᠂ ᠤᠰᠤ ᠡᠷᠢᠬᠦ ᠵᠡᠷᠭᠡ ᠳ᠋ᠦ᠍ ᠲᠡᠷᠡ ᠮᠢᠨᠢ ᠬᠥᠮᠦᠨ ᠡᠴᠡ ᠴᠦ᠍ ᠮᠡᠷᠭᠡᠨ᠃ ᠮᠢᠩᠭᠠ ᠶᠢᠰᠦᠨ ᠵᠠᠭᠤᠨ ᠳᠠᠯᠠᠨ ᠣᠨ᠂ ᠳᠠᠯᠠᠨ ᠨᠢᠭᠡᠨ ᠣᠨ ᠳ᠋ᠤ᠌ ᠮᠠᠯᠴᠢᠳ ᠢ᠋ ᠳᠤᠭᠤᠢᠯᠠᠩ ᠬᠤᠪᠢᠶᠠᠵᠤ ᠠᠷᠪᠢᠨ ᠰᠤᠷᠤᠯᠴᠠᠭᠤᠯᠳᠠᠭ ᠪᠠᠢᠭᠰᠠᠨ᠂ ᠪᠠᠷᠤᠭ ᠠᠷᠪᠠ ᠬᠣᠨᠣᠭ ᠲᠤ᠌ ᠨᠢᠭᠡ ᠤᠳᠠᠭᠠᠨ ᠤ᠋ ᠰᠤᠷᠤᠯᠴᠠᠯᠭᠠ ᠪᠠᠢᠳᠠᠭ᠃ ᠭᠡᠬᠦ ᠳ᠋ᠡᠭᠡᠨ ᠡᠨᠡ ᠰᠤᠷᠤᠯᠴᠠᠯᠭᠠ ᠨᠢ ᠡᠳᠦᠷ ᠪᠠᠢᠵᠤ ᠪᠣᠯᠳᠠᠭ ᠦᠭᠡᠢ᠂ ᠡᠳᠦᠷ ᠪᠣᠯ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠬᠣᠨᠢ᠂ ᠢᠮᠠᠭᠠ᠂ ᠲᠡᠮᠡᠭᠡ ᠮᠠᠯ ᠲᠥᠯ ᠭᠡᠳ ᠶᠠᠭᠠᠷᠠᠤ ᠤᠴᠢᠷ ᠠ᠋ᠴᠠ ᠣᠴᠢᠬᠤ ᠬᠥᠮᠦᠨ ᠦᠭᠡᠢ᠂ ᠡᠢᠮᠦ ᠡᠴᠡ ᠣᠷᠣᠢ ᠰᠥᠨᠢ ᠯᠡ ᠴᠤᠭᠯᠠᠷᠠᠵᠤ ᠬᠤᠷᠠᠳᠠᠭ᠃ ᠮᠠᠨ ᠤ᠋ ᠪᠠᠭᠠ ᠳᠤᠭᠤᠢᠯᠠᠩ ᠳ᠋ᠤ᠌ ᠠᠷᠪᠠᠭᠠᠳ ᠡᠷᠦᠬᠡ ᠲᠡᠢ ᠪᠣᠯᠪᠠᠴᠤ ᠦᠰᠦᠭ ᠲᠠᠨᠢᠬᠤ ᠬᠥᠮᠦᠨ ᠴᠥᠭᠡᠨ᠂ ᠨᠡᠩ ᠢᠯᠠᠩᠭᠤᠶᠠ ᠮᠠᠲ᠋ᠧᠷᠢᠶᠠᠯ ᠤᠩᠰᠢᠬᠤ ᠬᠥᠮᠦᠨ ᠪᠠᠷᠤᠭ ᠪᠠᠢᠳᠠᠭ ᠦᠭᠡᠢ᠂ ᠨᠢᠭᠡ ᠬᠣᠶᠠᠷ ᠦᠰᠦᠭ ᠲᠠᠨᠢᠬᠤ ᠬᠥᠮᠦᠨ ᠪᠠᠢᠪᠠᠴᠤ ᠶᠠᠳᠠᠷᠠᠭᠤ᠂ ᠮᠧᠶᠢᠶᠢᠦ ᠳ᠋ᠧᠩ (ᠨᠡᠭᠦᠷᠡᠰᠦᠨ ᠲᠣᠰᠣᠨ ᠳ᠋ᠧᠩ ) ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠦᠵᠡᠬᠦ ᠦᠭᠡᠢ ᠡᠴᠡ ᠪᠣᠯᠵᠤ ᠪᠤᠷᠤᠭᠤ ᠬᠠᠵᠠᠭᠠᠢ᠂ ᠬᠠᠭᠠᠰ ᠬᠤᠭᠤᠰ ᠯᠠ ᠤᠩᠰᠢᠵᠤ ᠬᠡᠯᠡᠵᠦ ᠲᠡᠭᠦᠰᠬᠡᠳᠡᠭ᠃ ᠮᠢᠨᠦ ᠦᠶᠡ ᠶ᠋ᠢᠨ ᠬᠡᠳᠦᠨ ᠬᠡᠦᠬᠡᠨ ᠨᠦ᠍ᠭᠦᠳ ᠪᠠᠢᠳᠠᠭ ᠪᠣᠯᠪᠠᠴᠤ ᠰᠥᠨᠢ ᠶ᠋ᠢᠨ ᠬᠤᠷᠠᠯ ᠪᠣᠯᠬᠣᠷ ᠪᠠᠷᠤᠭ ᠨᠢ ᠣᠴᠢᠳᠠᠭ ᠦᠭᠡᠢ᠂ ᠪᠢ ᠮᠣᠩᠭᠣᠯ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠨ ᠰᠠᠢᠨ ᠤᠩᠰᠢᠳᠠᠭ ᠪᠣᠯᠬᠣᠷ ᠳᠤᠭᠤᠢᠯᠠᠩ ᠤ᠋ᠨ ᠳᠠᠷᠤᠭᠠ ᠨᠠᠮᠠᠶ᠋ᠢ ᠣᠴᠢᠬᠤ ᠶ᠋ᠢ ᠶᠡᠬᠡ ᠱᠠᠭᠠᠷᠳᠠᠳᠠᠭ᠃ ᠰᠤᠷᠤᠯᠴᠠᠯᠭᠠ ᠳ᠋ᠤ᠌ ᠶᠠᠪᠤᠬᠤ ᠳ᠋ᠤ᠌ ᠣᠷᠣᠢ ᠮᠠᠯ ᠠ᠋ᠴᠠ ᠪᠠᠨ ᠬᠠᠷᠢᠵᠤ ᠢᠷᠡᠭᠡᠳ ᠲᠥᠯ ᠮᠠᠯ ᠢ᠋ᠶ᠋ᠠᠨ ᠬᠥᠬᠥᠭᠦᠯᠵᠦ᠂ ᠮᠠᠯ ᠢ᠋ᠶ᠋ᠠᠨ ᠪᠣᠷᠳᠣᠭᠠᠳ ᠪᠠᠷᠠᠲᠠᠯᠠ ᠪᠦᠷ ᠯᠡ ᠬᠠᠷᠠᠩᠭᠤᠢ ᠪᠣᠯᠴᠢᠬᠠᠳᠠᠭ᠃ ᠵᠠᠷᠢᠮ ᠳ᠋ᠠᠭᠠᠨ ᠮᠠᠯ ᠠ᠋ᠴᠠ ᠢᠷᠡᠭᠰᠡᠭᠡᠷ ᠲᠡᠮᠡᠭᠡ ᠪᠡᠨ ᠠᠪᠬᠤ ᠪᠠᠷ ᠬᠥᠳᠡᠭᠡ ᠭᠦᠶᠦᠳᠡᠭ᠂ ᠲᠡᠮᠡᠭᠡ ᠪᠡᠨ ᠠᠪᠴᠤ ᠢᠷᠡᠭᠡᠳ ᠰᠤᠷᠤᠯᠴᠠᠭᠠᠨ ᠳ᠋ᠤ᠌ ᠤᠨᠤᠵᠤ ᠶᠠᠪᠤᠨᠠ᠃ ᠶᠠᠪᠤᠬᠤ ᠳ᠋ᠤ᠌ ᠪᠦᠷ ᠣᠷᠣᠢ ᠶ᠋ᠢᠨ ᠶᠢᠰᠦ᠂ ᠠᠷᠪᠠᠨ ᠴᠠᠭ ᠪᠣᠯᠵᠤ ᠬᠠᠷᠠᠩᠭᠤᠢ ᠪᠣᠯᠳᠠᠭ᠃ ᠰᠥᠨᠢ ᠶᠠᠪᠤᠬᠤ ᠤᠴᠢᠷ ᠠ᠋ᠴᠠ ᠳ᠋ᠠᠯᠢᠩᠪᠣᠷᠤ ᠪᠠᠨ ᠯᠠ ᠤᠨᠤᠵᠤ ᠶᠠᠪᠤᠨᠠ᠃ ᠮᠠᠨ ᠤ᠋ ᠨᠤᠲᠤᠭ ᠲᠤ᠌ ᠠᠢᠯ ᠠᠢᠯ ᠤ᠋ᠨ ᠬᠣᠭᠣᠷᠣᠨᠳᠣ ᠪᠠᠨ ᠣᠢᠷᠠ ᠨᠢ ᠠᠷᠪᠠᠭᠠᠳ ᠭᠠᠵᠠᠷ᠂ ᠬᠣᠯᠠ ᠨᠢ ᠬᠣᠷᠢ ᠭᠤᠴᠢᠨ ᠤ᠋ ᠭᠠᠵᠠᠷ ᠵᠠᠢᠲᠠᠢ ᠰᠠᠭᠤᠴᠢᠬᠠᠳᠠᠭ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠪᠢ ᠠᠷᠪᠠᠨ ᠲᠠᠪᠤ᠋᠂ ᠵᠢᠷᠭᠤᠭᠠ ᠲᠠᠢ ᠯᠠ ᠪᠠᠢᠭᠰᠠᠨ᠂ ᠲᠡᠭᠡᠭᠡᠳ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠠᠳ ᠳ᠋ᠠᠯᠢᠩᠪᠣᠷᠤ ᠪᠠᠨ ᠤᠨᠤᠭᠠᠳ ᠠᠪᠤᠪᠠᠯ ᠣᠴᠢᠬᠤ ᠭᠡᠰᠡᠨ ᠠᠢᠯ ᠵᠦᠭ ᠢ᠋ᠶ᠋ᠡᠨ ᠴᠢᠭᠯᠡᠭᠦᠯᠦᠭᠡᠳ ᠲᠠᠯᠪᠢᠪᠠᠯ᠂ ᠰᠡᠭᠦᠯ ᠢ᠋ᠶ᠋ᠡᠨ ᠵᠢᠭᠠᠬᠠᠨ ᠰᠢᠷᠪᠢᠵᠦ᠂ ᠬᠦᠵᠦᠭᠦᠦ ᠪᠡᠨ ᠤᠷᠤᠭᠤ ᠰᠢᠭ᠋ ᠲᠠᠯᠪᠢᠵᠤ ᠠᠪᠤᠭᠠᠳ ᠯᠠ ᠱᠤᠤᠭᠢᠭᠠᠳ ᠠᠯᠬᠤᠯᠠᠵᠤ ᠡᠬᠢᠯᠡᠳᠡᠭ᠂ ᠰᠢᠪᠬᠠᠷᠴᠤ᠂ ᠵᠠᠯᠠᠬᠤ ᠶ᠋ᠢᠨ ᠬᠡᠷᠡᠭ ᠶᠡᠷᠦ ᠪᠠᠢᠳᠠᠭ ᠦᠭᠡᠢ᠂ ᠬᠠᠶᠠ ᠵᠠᠷᠢᠮ ᠳ᠋ᠠᠭᠠᠨ ᠬᠣᠶᠠᠷ ᠵᠠᠮ ᠤ᠋ᠨ ᠠᠭᠤᠯᠵᠠᠷ ᠲᠤ᠌ ᠬᠦᠷᠪᠡᠯ ᠮᠡᠳᠡᠭ ᠲᠡᠳᠡᠨ ᠵᠣᠭᠰᠣᠵᠤ ᠠᠪᠬᠤ ᠮᠠᠭᠠᠳ᠂ ᠢᠩᠭᠢᠬᠦ ᠳ᠋ᠦ᠍ ᠵᠥᠪ ᠵᠠᠮ ᠤᠷᠤᠭᠤ ᠨᠢ ᠵᠠᠯᠠᠴᠢᠬᠠᠪᠠᠯ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠠᠯᠢ ᠠᠢᠯ ᠳ᠋ᠤ᠌ ᠣᠴᠢᠬᠤ ᠪᠠᠨ ᠮᠡᠳᠡᠭᠰᠡᠨ ᠲᠡᠷᠡ᠃ ᠰᠥᠨᠢ ᠶ᠋ᠢᠨ ᠵᠠᠮ ᠳ᠋ᠤ᠌ ᠦᠨᠡᠭᠡ᠂ ᠲᠠᠤᠯᠠᠢ ᠪᠣᠰᠴᠤ ᠭᠦᠶᠦᠬᠦ ᠳ᠋ᠦ᠍ ᠳ᠋ᠠᠯᠢᠩᠪᠣᠷᠤ ᠮᠢᠨᠢ ᠶᠡᠷᠦ ᠡᠴᠡ ᠰᠣᠴᠢᠵᠤ ᠦᠷᠭᠦᠵᠦ ᠦᠰᠦᠷᠳᠡᠭ ᠦᠭᠡᠢ᠂ ᠬᠣᠶᠠᠷ ᠴᠢᠬᠢ ᠪᠡᠨ ᠳᠠᠯᠪᠠᠢᠯᠭᠠᠵᠤ᠂ ᠬᠦᠵᠦᠭᠦᠦ ᠪᠡᠨ ᠬᠤᠷᠢᠶᠠᠵᠤ ᠰᠦᠷᠡᠬᠡᠢ ᠨᠠᠭᠠᠰᠢ ᠴᠠᠭᠠᠰᠢ ᠬᠠᠷᠠᠳᠠᠭ᠂ ᠡᠨᠡ ᠦᠶᠡ ᠳ᠋ᠦ᠍ ᠬᠠᠰᠬᠢᠷᠴᠤ ᠳᠠᠭᠤ ᠭᠠᠷᠭᠠᠵᠤ ᠴᠢᠮᠡᠭᠡ ᠥᠭᠴᠢᠬᠡᠪᠡᠯ ᠪᠣᠯᠴᠢᠬᠠᠳᠠᠭ᠃ ᠬᠡᠵᠢᠶᠡ ᠪᠡᠶᠡ ᠪᠡᠨ ᠵᠠᠰᠠᠭᠠᠳ ᠰᠢᠭᠡᠭᠡᠳ ᠵᠣᠭᠰᠣᠪᠠᠯ ᠲᠡᠷᠡ ᠠᠢᠯ ᠳ᠋ᠤ᠌ ᠬᠦᠷᠦᠯᠡ ᠭᠡᠰᠡᠨ ᠦᠭᠡ᠃ ᠢᠩᠭᠢᠭᠡᠳ ᠨᠢᠷᠤᠭᠤᠨ ᠠ᠋ᠴᠠ ᠨᠢ ᠪᠠᠭᠤᠵᠤ ᠡᠪᠲᠡᠢᠬᠡᠨ ᠭᠠᠵᠠᠷ ᠣᠯᠵᠤ ᠡᠮᠦᠨᠡ ᠬᠣᠶᠠᠷ ᠬᠥᠯ ᠢ᠋ ᠨᠢ ᠪᠠᠭᠯᠠᠬᠤ ᠶᠤᠮ ᠤᠤ᠂ ᠡᠰᠡᠪᠡᠯ ᠬᠡᠪᠲᠡᠭᠦᠯᠦᠭᠡᠳ ᠡᠮᠦᠨᠡ ᠨᠢᠭᠡ ᠡᠪᠦᠳᠦᠭ ᠢ᠋ ᠨᠢ ᠪᠣᠭᠣᠵᠤ ᠣᠷᠬᠢᠪᠠᠯ ᠪᠣᠯᠤᠭᠰᠠᠨ ᠲᠡᠷᠡ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠦᠷ ᠰᠥᠨᠢ ᠪᠡᠷ ᠪᠣᠰᠤᠭᠠᠳ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢ ᠰᠠᠭᠤᠭᠠᠳ ᠠᠪᠤᠪᠠᠯ ᠭᠡᠷ ᠤᠷᠤᠭᠤ ᠪᠠᠨ ᠵᠥᠩᠳᠡᠭᠡᠨ ᠱᠤᠤᠭᠢᠵᠤ (ᠶᠠᠪᠤᠵᠤ ) ᠥᠭᠳᠡᠭ᠃ ᠪᠠᠭᠠ ᠬᠡᠦᠬᠡᠳ ᠦ᠋ᠨ ᠬᠡᠷᠡᠭ᠂ ᠰᠥᠨᠢ ᠳ᠋ᠦ᠍ ᠨᠢ ᠣᠷᠣᠢ ᠤᠨᠲᠠᠵᠤ᠂ ᠥᠷᠯᠥᠭᠡ ᠡᠷᠲᠡ ᠪᠣᠰᠤᠭᠰᠠᠨ ᠤ᠋ ᠤᠴᠢᠷ᠂ ᠵᠠᠮ ᠳ᠋ᠠᠭᠠᠨ ᠨᠣᠢᠷ ᠬᠦᠷᠴᠦ ᠲᠡᠮᠡᠭᠡᠨ ᠳᠡᠭᠡᠷᠡ ᠪᠡᠨ ᠵᠡᠭᠦᠷᠮᠡᠭᠯᠡᠵᠦ ᠯᠡ ᠶᠠᠪᠤᠳᠠᠭ᠂ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠪᠠᠢᠬᠤ ᠪᠣᠯᠬᠣᠷ ᠬᠠᠮᠠᠷ ᠤ᠋ᠨ ᠪᠤᠷᠠᠨᠲᠠᠭ ᠢ᠋ ᠨᠢ ᠶᠡᠷᠦ ᠵᠠᠯᠠᠬᠤ ᠶ᠋ᠢᠨ ᠬᠡᠷᠡᠭ ᠦᠭᠡᠢ ᠪᠠᠢᠳᠠᠭ᠃ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠢᠷᠡᠬᠦ ᠳ᠋ᠦ᠍ ᠮᠠᠨᠠᠢᠬᠢᠨ ᠪᠠᠷᠤᠭ ᠴᠠᠢ ᠪᠠᠨ ᠤᠤᠭᠤᠵᠤ ᠠᠮᠵᠢᠭᠠ ᠦᠭᠡᠢ ᠪᠠᠢᠳᠠᠭ᠃ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠳᠥᠷᠥᠭᠡ ᠲᠣᠬᠣᠮ ᠢ᠋ᠶ᠋ᠠᠨ ᠠᠪᠴᠤ ᠪᠤᠷᠠᠨᠲᠠᠭ ᠢ᠋ ᠨᠢ ᠬᠦᠵᠦᠭᠦᠨ ᠳ᠋ᠦ᠍ ᠨᠢ ᠰᠠᠢᠬᠠᠨ ᠡᠪᠬᠡᠭᠡᠳ ᠲᠠᠯᠪᠢᠴᠢᠬᠠᠪᠠᠯ ᠪᠣᠯᠤᠭᠰᠠᠨ ᠲᠡᠷᠡ᠃ ᠮᠠᠨ ᠤ᠋ ᠲᠡᠨᠳᠡ ᠬᠡᠳᠦᠢᠪᠡᠷ ᠠᠭᠤᠯᠠ ᠲᠠᠢ ᠲᠣᠯᠣᠭᠠᠢ ᠲᠠᠢ ᠭᠠᠵᠠᠷ ᠪᠣᠯᠪᠠᠴᠤ ᠲᠡᠷᠡ ᠲᠡᠮᠡᠭᠡ ᠢᠵᠢᠯᠢ ᠪᠡᠨ ᠣᠯᠬᠤ ᠦᠭᠡᠢ ᠤᠴᠢᠷ ᠶᠡᠷᠦ ᠪᠠᠢᠳᠠᠭ ᠦᠭᠡᠢ᠂ ᠵᠠᠷᠢᠮ ᠳ᠋ᠠᠭᠠᠨ ᠢᠵᠢᠯᠢ ᠶ᠋ᠢ ᠨᠢ ᠬᠠᠢᠵᠤ ᠣᠯᠬᠤ ᠶ᠋ᠢᠨ ᠲᠥᠯᠥᠭᠡ ᠳ᠋ᠠᠯᠢᠩᠪᠣᠷᠤ ᠪᠠᠨ ᠬᠥᠲᠥᠯᠦᠭᠡᠳ ᠥᠨᠳᠥᠷ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠳᠠᠭ᠂ ᠢᠩᠭᠢᠪᠡᠯ ᠲᠡᠷᠡ ᠮᠢᠨᠢ ᠴᠢᠬᠢ ᠪᠡᠨ ᠳᠠᠯᠪᠠᠢᠯᠭᠠᠵᠤ ᠵᠦᠭ ᠪᠦᠷᠢ ᠳ᠋ᠦ᠍ ᠰᠠᠢᠨ ᠬᠠᠷᠠᠳᠠᠭ᠂ ᠵᠠᠷᠢᠮ ᠳ᠋ᠠᠭᠠᠨ ᠠᠨᠢᠷ ᠴᠢᠮᠡᠭᠡ ᠶ᠋ᠢ ᠴᠢᠩᠨᠠᠵᠤ ᠪᠠᠢᠭᠠ ᠴᠤ᠌ ᠶᠠᠩᠵᠤ ᠭᠠᠷᠭᠠᠳᠠᠭ᠂ ᠲᠡᠭᠡᠭᠡᠳ ᠯᠡ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢ ᠱᠦᠷᠭᠦᠭᠡᠵᠦ ᠠᠪᠤᠭᠠᠳ ᠶᠠᠪᠤᠬᠤ ᠭᠡᠵᠦ ᠶᠠᠩᠵᠤ ᠭᠠᠷᠤᠭᠠᠳ ᠢᠷᠡᠪᠡᠯ ᠪᠤᠷᠠᠨᠲᠠᠭ ᠢ᠋ ᠨᠢ ᠤᠷᠲᠤ ᠲᠠᠯᠪᠢᠵᠤ ᠠᠷᠤ ᠠ᠋ᠴᠠ ᠨᠢ ᠳᠠᠭᠠᠭᠠᠳ ᠶᠠᠪᠤᠪᠠᠯ ᠢᠵᠢᠯᠢ ᠶ᠋ᠢ ᠨᠢ ᠠᠮᠠᠷᠬᠠᠨ ᠣᠯᠤᠭᠠᠳ ᠠᠪᠳᠠᠭ᠃
ᠡᠨᠡ ᠲᠡᠮᠡᠭᠡ ᠵᠠᠷᠢᠮ ᠳ᠋ᠠᠭᠠᠨ ᠪᠠᠰᠠ ᠬᠥᠮᠦᠨ ᠦ᠌ ᠳᠤᠷᠠ ᠦᠭᠡᠶᠢᠴᠡᠯ ᠢ᠋ ᠬᠦᠷᠭᠡᠵᠦ ᠬᠥᠮᠦᠨ ᠢ᠋ ᠵᠣᠪᠠᠭᠠᠳᠠᠭ᠃ ᠮᠢᠩᠭᠠ ᠶᠢᠰᠦᠨ ᠵᠠᠭᠤᠨ ᠵᠢᠷᠠᠨ ᠶᠢᠰᠦᠨ ᠣᠨ ᠳ᠋ᠤ᠌ ᠪᠢ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠲᠠᠢ ᠪᠠᠢᠵᠠᠢ᠂ ᠮᠠᠨᠠᠢᠬᠢᠨ ᠡᠷᠪᠡᠬᠡᠢ ᠳ᠋ᠦ᠍ ᠶᠡᠬᠡ ᠡᠭᠡᠴᠢ ᠶ᠋ᠢᠨ ᠳ᠋ᠦ᠍ ᠵᠣᠯᠭᠠᠯᠲᠠ ᠬᠢᠬᠦ ᠪᠡᠷ ᠶᠠᠪᠤᠭᠰᠠᠨ᠂ ᠲᠡᠭᠡᠭᠡᠳ ᠭᠡᠷ ᠲᠦ᠍ ᠮᠠᠯ ᠳᠡᠭᠡᠷᠡ ᠮᠠᠨ ᠤ᠋ ᠨᠠᠭᠠᠴᠤ ᠡᠵᠢ ᠶ᠋ᠢ ᠭᠤᠶᠤᠵᠤ ᠠᠪᠴᠤ ᠢᠷᠡᠭᠡᠳ ᠨᠠᠳᠠ ᠲᠠᠢ ᠬᠣᠶᠠᠭᠤᠯᠠ ᠪᠠᠢᠭᠰᠠᠨ᠃ ᠢᠩᠭᠢᠭᠡᠳ ᠨᠢᠭᠡ ᠡᠳᠦᠷ ᠨᠡᠭᠦᠬᠦ ᠪᠣᠯᠵᠤ ᠨᠠᠭᠠᠴᠤ ᠡᠵᠢ ᠶ᠋ᠢᠨ ᠬᠥᠯ ᠭᠠᠷ ᠮᠠᠭᠤ ᠲᠡᠮᠡᠭᠡ ᠠᠪᠴᠢᠷᠠᠵᠤ ᠠᠴᠢᠶᠠ ᠠᠴᠢᠶᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠣᠷ ᠮᠠᠯ ᠤᠰᠤᠯᠠᠬᠤ ᠪᠠᠷ ᠮᠠᠯ ᠳ᠋ᠠᠭᠠᠨ ᠶᠠᠪᠤᠭᠰᠠᠨ᠂ ᠪᠢ ᠲᠡᠮᠡᠭᠡ ᠪᠡᠨ ᠠᠪᠴᠤ ᠠᠴᠢᠶᠠ ᠪᠠᠨ ᠠᠴᠢᠬᠤ ᠪᠣᠯᠪᠠ᠃ ᠶᠠᠭ ᠬᠠᠯᠠᠭᠤᠨ ᠦᠳᠡ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠪᠢ ᠠᠴᠢᠶᠠ ᠲᠠᠢ ᠲᠡᠮᠡᠭᠡ ᠪᠡᠨ ᠬᠥᠲᠥᠯᠦᠭᠡᠳ ᠪᠠᠭᠤᠬᠤ ᠭᠡᠰᠡᠨ ᠭᠠᠵᠠᠷ ᠢ᠋ᠶ᠋ᠠᠨ ᠣᠢᠷᠠᠲᠤᠵᠤ ᠬᠦᠷᠴᠦ ᠶᠠᠪᠤᠲᠠᠯᠠ ᠨᠢᠭᠡ ᠬᠠᠷᠠᠬᠤ ᠳ᠋ᠤ᠌ ᠮᠠᠨ ᠤ᠋ ᠮᠠᠯ ᠬᠤᠳᠳᠤᠭ ᠠ᠋ᠴᠠ ᠤᠰᠤ ᠤᠤᠭᠤᠭᠠᠳ ᠭᠠᠷᠴᠤ ᠢᠷᠡᠭᠡᠳ ᠶᠠᠭ ᠴᠦᠷᠬᠦᠯᠦᠭᠰᠡᠨ ᠲᠡᠮᠡᠭᠡ ᠰᠢᠭ ᠨᠢᠭᠡ ᠬᠣᠶᠠᠷ ᠤ᠋ᠨ ᠭᠠᠵᠠᠷ ᠤᠷᠲᠤ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠵᠡᠭᠦᠨ ᠠᠭᠤᠯᠠ ᠵᠦᠭ ᠰᠤᠪᠤᠷᠠᠵᠤ (ᠴᠤᠪᠤᠵᠤ ) ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠮᠠᠯ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠨᠠᠭᠠᠴᠤ ᠡᠵᠢ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠪᠠᠷᠠ ᠰᠤᠷᠠᠭ ᠲᠠᠭ ᠦᠭᠡᠢ ᠪᠠᠢᠯᠠ᠃ ᠬᠡᠷᠪᠡ ᠵᠤᠨ ᠤ᠋ ᠲᠥᠯ ᠲᠡᠢ ᠮᠠᠯ ᠵᠡᠭᠦᠨ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠪᠠᠯ ᠬᠤᠷᠢᠶᠠᠵᠤ ᠪᠠᠭᠤᠯᠭᠠᠵᠤ ᠢᠷᠡᠨᠡ ᠭᠡᠵᠦ ᠠᠮᠠᠷ ᠬᠡᠷᠡᠭ ᠪᠢᠰᠢ ᠠ᠋᠃ ᠲᠡᠭᠡᠭᠡᠳ ᠮᠢᠨᠦ ᠶᠠᠭᠠᠷᠠᠭᠰᠠᠨ ᠢ᠋ ᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠂ ᠰᠢᠭᠤᠳ ᠠᠴᠢᠶᠠ ᠲᠠᠢ ᠲᠡᠮᠡᠭᠡ ᠪᠡᠨ ᠪᠠᠭᠤᠳᠠᠯ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠠᠴᠢᠶᠠ ᠲᠠᠢ ᠨᠢ ᠨᠢᠭᠡ ᠨᠢᠭᠡ ᠪᠡᠷ ᠰᠠᠯᠭᠠᠵᠤ ᠪᠤᠲᠠ ᠴᠢᠯᠠᠭᠤ ᠠ᠋ᠴᠠ ᠤᠶᠠᠮᠠᠭᠴᠠ ᠯᠠ ᠮᠠᠯ ᠤ᠋ᠨ ᠡᠮᠦᠨᠡᠭᠦᠷ ᠲᠣᠰᠤᠭᠠᠳ ᠭᠦᠶᠦᠯᠡ᠃ ᠴᠡᠭᠡᠵᠢ ᠪᠠᠭᠲᠠᠷᠠᠲᠠᠯᠠ ᠪᠠᠨ ᠭᠦᠶᠦᠵᠦ ᠮᠠᠯ ᠤ᠋ᠨ ᠲᠦᠷᠦᠭᠦᠴᠢ ᠪᠡᠨ ᠪᠤᠴᠠᠭᠠᠨ ᠡᠷᠭᠢᠭᠦᠯᠵᠦ ᠠᠪᠤᠭᠠᠳ ᠭᠡᠳᠡᠷᠭᠦ ᠬᠠᠷᠠᠭᠰᠠᠨ ᠴᠢᠨᠢ ᠥᠨᠥᠬᠢ ᠳ᠋ᠠᠯᠢᠩᠪᠣᠷᠤ ᠤᠶᠠᠭᠠ ᠪᠠᠨ ᠲᠠᠢᠯᠵᠤ ᠠᠪᠤᠭᠠᠳ ᠬᠠᠳᠠᠨ ᠲᠣᠯᠣᠭᠠᠢ ᠥᠭᠡᠳᠡ ᠮᠠᠴᠤᠵᠤ ᠪᠠᠢᠬᠤ ᠬᠠᠷᠠᠭᠳᠠᠪᠠ᠃ ᠣᠳᠣ ᠴᠤ᠌ ᠬᠡᠷᠡᠭ ᠪᠣᠯᠤᠯᠠ! ᠬᠡᠷᠪᠡ ᠠᠴᠢᠶᠠ ᠪᠠᠨ ᠤᠨᠠᠭᠠᠪᠠᠯ ᠲᠣᠭᠣᠭᠠ᠂ ᠰᠢᠨᠠᠭᠠ᠂ ᠠᠶᠠᠭᠠ᠂ ᠰᠠᠪᠠ ᠰᠠᠭᠤᠯᠠᠭᠠ ᠪᠦᠷ ᠪᠠᠯᠪᠠᠴᠢᠵᠤ ᠬᠠᠶᠠᠬᠤ ᠪᠣᠯᠤᠨᠠ᠃ ᠲᠡᠷᠡ ᠦᠶᠡ ᠵᠣᠭᠣᠰ ᠵᠠᠷᠤᠯᠭᠠ ᠪᠠᠭᠠ ᠡᠳᠡᠭᠡᠷ ᠶᠠᠭᠤᠮᠠ ᠶ᠋ᠢ ᠳᠠᠬᠢᠨ ᠬᠤᠳᠠᠯᠳᠤᠨ ᠠᠪᠬᠤ ᠴᠢᠳᠠᠯ ᠦᠭᠡᠢ᠂ ᠡᠳᠡᠭᠡᠷ ᠶᠠᠭᠤᠮᠠ ᠪᠦᠷ ᠲᠡᠷᠡ ᠲᠡᠮᠡᠭᠡᠨ ᠳᠡᠭᠡᠷᠡ ᠠᠴᠢᠶᠠᠲᠠᠢ ᠪᠣᠢ᠂ ᠲᠡᠭᠡᠭᠡᠳ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠮᠠᠯ ᠢ᠋ᠶ᠋ᠠᠨ ᠪᠤᠴᠠᠭᠠᠵᠤ ᠰᠠᠢᠨ ᠬᠥᠭᠡᠭᠡᠴᠢᠬᠡᠭᠡᠳ ᠥᠨᠥ ᠲᠡᠮᠡᠭᠡ ᠤᠷᠤᠭᠤ ᠳᠠᠬᠢᠭᠠᠳ ᠯᠠ ᠭᠦᠶᠦᠯᠡ᠃ ᠲᠡᠮᠡᠭᠡᠨ ᠳᠡᠭᠡᠷᠡ ᠪᠡᠨ ᠬᠦᠷᠴᠦ ᠲᠡᠮᠡᠭᠡ ᠪᠡᠨ ᠬᠥᠲᠥᠯᠦᠭᠡᠳ ᠪᠠᠭᠤᠳᠠᠯ ᠳ᠋ᠠᠭᠠᠨ ᠣᠴᠢᠵᠤ ᠠᠴᠢᠶᠠ ᠪᠠᠨ ᠪᠠᠭᠤᠯᠭᠠᠭᠠᠳ ᠪᠠᠷᠠᠵᠤ ᠪᠠᠢᠲᠠᠯᠠ ᠮᠠᠨ ᠤ᠋ ᠨᠠᠭᠠᠴᠤ ᠡᠵᠢ ᠴᠦ᠍ ᠮᠠᠯ ᠤ᠋ᠨ ᠠᠷᠤ ᠠ᠋ᠴᠠ ᠰᠠᠶᠢ ᠬᠦᠷᠴᠦ ᠢᠷᠡᠯᠡ᠃ ᠣᠳᠣ ᠪᠣᠳᠣᠬᠤ ᠳ᠋ᠤ᠌ ᠡᠨᠡ ᠲᠡᠮᠡᠭᠡ ᠲᠡᠷᠡ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠰᠠᠢᠬᠠᠨ ᠡᠪᠡᠰᠦ ᠶ᠋ᠢ ᠣᠯᠵᠤ ᠦᠵᠡᠭᠰᠡᠨ ᠡᠴᠡ ᠲᠡᠭᠡᠵᠦ ᠶᠠᠪᠤᠭᠰᠠᠨ ᠪᠠᠢᠵᠤ ᠯᠠ ᠳᠠ᠃ ᠠᠢ ᠬᠥᠭᠡᠷᠦᠬᠦᠢ ! ᠲᠡᠮᠡᠭᠡ ᠶᠤᠮ ᠴᠢᠨᠢ ᠨᠢᠷᠤᠭᠤᠨ ᠳᠡᠭᠡᠷᠡᠬᠢ ᠠᠴᠢᠶᠠ ᠨᠤᠷᠠᠬᠤ ᠪᠣᠢ ᠭᠡᠵᠦ ᠶᠠᠭᠠᠬᠢᠵᠤ ᠴᠤ᠌ ᠮᠡᠳᠡᠬᠦ ᠪᠣᠢ !
ᠪᠢᠳᠡᠨ ᠦ᠌ ᠮᠡᠳᠡᠬᠦ ᠪᠡᠷ ᠠᠷᠰᠯᠠᠨ᠂ ᠵᠡᠷᠯᠢᠭ ᠪᠤᠭᠤ᠂ ᠪᠤᠤᠷᠠ᠂ ᠠᠳᠤᠭᠤᠨ ᠤ᠋ ᠠᠵᠢᠷᠭᠠ ᠪᠦᠷ ᠯᠡ ᠥᠪᠡᠷ ᠦ᠋ᠨ ᠬᠣᠲᠠᠨ ᠤ᠋ ᠪᠠᠨ ᠡᠮᠡ ᠢᠵᠢᠯᠢ ᠶ᠋ᠢ ᠪᠡᠨ ᠬᠠᠮᠠᠭᠠᠯᠠᠳᠠᠭ᠂ ᠭᠡᠪᠡᠴᠦ ᠲᠡᠳᠡ ᠵᠥᠪᠬᠡᠨ ᠡᠮᠡ ᠢᠵᠢᠯᠢ ᠶ᠋ᠢ ᠪᠠᠨ ᠯᠠ ᠬᠠᠮᠠᠭᠠᠯᠠᠳᠠᠭ᠃ ᠮᠠᠨ ᠤ᠋ ᠡᠨᠡ ᠳ᠋ᠠᠯᠢᠩᠪᠣᠷᠤ ᠬᠠᠷᠢᠨ ᠡᠷᠡ᠂ ᠡᠮᠡ ᠭᠡᠵᠦ ᠢᠯᠭᠠᠯ ᠦᠭᠡᠢ ᠪᠦᠬᠦ ᠬᠣᠲᠠᠨ ᠤ᠋ ᠪᠠᠨ ᠢᠵᠢᠯᠢ ᠶ᠋ᠢ ᠪᠦᠷ ᠬᠠᠮᠠᠭᠠᠯᠠᠳᠠᠭ᠃ ᠡᠨᠡ ᠠᠲᠠᠨ ᠤ᠋ ᠬᠡᠳᠦᠨ ᠭᠠᠢᠬᠠᠯᠲᠠᠢ ᠤᠴᠢᠷ ᠮᠢᠨᠦ ᠰᠠᠨᠠᠭᠠᠨ ᠠ᠋ᠴᠠ ᠶᠡᠷᠦ ᠨᠢ ᠭᠠᠷᠳᠠᠭ ᠦᠭᠡᠢ ᠶᠤᠮ᠃ ᠨᠢᠭᠡ ᠨᠢ᠂ ᠨᠠᠮᠠᠶ᠋ᠢ ᠳᠣᠯᠣᠭᠠ᠂ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠤ᠌ ᠨᠢᠭᠡᠨ ᠬᠠᠪᠤᠷ ᠤ᠋ᠨ ᠥᠷᠯᠥᠭᠡ ᠡᠷᠲᠡ ᠶᠡᠬᠡ ᠡᠭᠡᠴᠢ ᠪᠢᠳᠡᠨ ᠬᠣᠶᠠᠷ ᠬᠣᠨᠢ ᠪᠠᠨ ᠬᠠᠷᠢᠭᠤᠯᠤᠭᠠᠳ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠠᠳ ᠳᠡᠮᠡᠢ ᠬᠣᠯᠠ ᠶᠠᠪᠤᠭᠰᠠᠨ ᠦᠭᠡᠢ᠂ ᠰᠠᠶᠢ ᠬᠣᠲᠠᠨ ᠠ᠋ᠴᠠ ᠪᠠᠨ ᠭᠠᠷᠤᠭᠰᠠᠨ ᠮᠠᠯ ᠪᠣᠯᠬᠣᠷ ᠰᠠᠢᠬᠠᠨ ᠡᠩᠨᠡᠭᠡᠳ ᠶᠠᠪᠤᠵᠤ ᠯᠠ ᠪᠠᠢᠭᠰᠠᠨ᠂ ᠪᠢᠳᠡᠨ ᠬᠣᠶᠠᠷ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠠᠷᠤ ᠳ᠋ᠤ᠌ ᠨᠢ ᠳᠠᠭᠠᠵᠤ ᠶᠠᠪᠤᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠮᠠᠯ ᠶᠠᠭ ᠳᠤᠮᠳᠠᠭᠤᠷ ᠢ᠋ᠶ᠋ᠠᠨ ᠲᠠᠰᠤ ᠬᠠᠭᠠᠷᠠᠭᠰᠠᠨ ᠰᠢᠭ᠋ ᠬᠣᠶᠠᠷ ᠲᠠᠢᠰᠢ ᠠᠩᠭᠢᠷᠠᠵᠤ ᠲᠣᠭᠣᠰᠣ ᠲᠡᠳᠡᠨ ᠦᠷᠭᠦᠯᠡ (ᠰᠣᠴᠢᠯᠠ )᠃ ᠡᠨᠡ ᠦᠶᠡ ᠳ᠋ᠦ᠍ ᠡᠭᠡᠴᠢ ᠮᠢᠨᠢ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠰᠬᠢᠷᠴᠤ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠨᠢᠭᠡ ᠲᠠᠯᠠ ᠤᠷᠤᠭᠤ ᠭᠦᠶᠦᠯᠡ᠂ ᠪᠢ ᠴᠦ᠍ ᠮᠥᠨ ᠮᠠᠯ ᠤ᠋ᠨ ᠨᠥᠭᠦᠭᠡ ᠬᠡᠰᠡᠭ ᠤᠷᠤᠭᠤ ᠭᠦᠶᠦᠵᠦ ᠬᠣᠶᠠᠭᠤᠯᠠ ᠪᠠᠨ ᠮᠠᠯ ᠢ᠋ᠶ᠋ᠠᠨ ᠲᠣᠭᠲᠠᠭᠠᠵᠤ ᠠᠪᠤᠭᠠᠳ ᠬᠣᠶᠠᠷ ᠬᠡᠰᠡᠭ ᠮᠠᠯ ᠢ᠋ ᠨᠡᠢᠯᠡᠭᠦᠯᠬᠦ ᠭᠡᠵᠦ ᠲᠠᠭᠤᠬᠤ ᠳ᠋ᠤ᠌ ᠮᠠᠯ ᠣᠭᠲᠣ ᠶᠠᠪᠤᠬᠤ ᠦᠭᠡᠢ ᠮᠠᠯ ᠤ᠋ᠨ ᠪᠡᠶᠡ ᠨᠢ ᠪᠦᠷ ᠴᠡᠴᠡᠷᠡᠵᠦ ᠳᠡᠰ ᠳᠡᠰ ᠭᠡᠲᠡᠯᠡ ᠳᠣᠷᠭᠢᠵᠤ᠂ ᠪᠥᠭᠡᠮᠨᠡᠷᠡᠭᠡᠳ ᠪᠠᠢᠬᠤ ᠠ᠋ᠴᠠ ᠪᠢᠰᠢ ᠶᠡᠷᠦ ᠡᠮᠦᠨᠡᠰᠢ ᠪᠡᠨ ᠶᠠᠪᠤᠬᠤ ᠦᠭᠡᠢ ᠪᠠᠢᠯᠠ᠃ ᠪᠢᠳᠡᠨ ᠬᠣᠶᠠᠷ ᠮᠠᠯ ᠢ᠋ᠶ᠋ᠠᠨ ᠬᠠᠷᠠ ᠶ᠋ᠢᠨ ᠠᠯᠪᠠ ᠪᠠᠷ ᠲᠠᠭᠤᠭᠰᠠᠭᠠᠷ ᠪᠠᠢᠵᠤ ᠠᠷᠠᠢ ᠭᠡᠵᠦ ᠬᠣᠶᠠᠷ ᠠᠩᠭᠢᠷᠤᠭᠰᠠᠨ ᠮᠠᠯ ᠢ᠋ᠶ᠋ᠠᠨ ᠨᠡᠢᠯᠡᠭᠦᠯᠵᠦ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠡᠭᠡᠴᠢ ᠭᠡᠨᠡᠳᠲᠡ ᠵᠡᠭᠦᠨ ᠥᠨᠳᠥᠷ ᠣᠷᠣᠢ ᠶ᠋ᠢ ᠵᠢᠭᠠᠵᠤ ︽ᠲᠡᠷᠡ ᠦᠵᠡ ! ᠴᠢᠨᠣᠠ ᠪᠠᠢᠨᠠ》 ᠭᠡᠪᠡ᠃ ᠪᠢ ᠰᠠᠨᠳᠤᠷᠴᠤ ᠲᠡᠷᠡ ᠵᠦᠭ ᠲᠦ᠍ ᠬᠠᠷᠠᠭᠰᠠᠨ ᠴᠢᠨᠢ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠨᠢᠭᠡ ᠨᠣᠬᠠᠢ ᠰᠢᠭ᠋ ᠶᠠᠭᠤᠮᠠ ᠵᠣᠭᠰᠣᠵᠤ ᠪᠠᠢᠭᠠᠳ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠴᠠᠭᠠᠰᠢ (ᠴᠢᠨᠠᠭᠰᠢ ) ᠪᠠᠨ ᠳᠠᠪᠠᠭᠠᠳ ᠣᠷᠣᠴᠢᠬᠠᠯᠠ᠃ ᠡᠭᠦᠨ ᠡᠴᠡ ᠡᠮᠦᠨᠡ ᠴᠢᠨᠣᠠ ᠭᠡᠳᠡᠭ ᠠᠮᠢᠲᠠᠨ ᠢ᠋ ᠠᠷᠪᠢᠨ ᠰᠣᠨᠣᠰᠤᠭᠰᠠᠨ ᠪᠣᠯᠪᠠᠴᠤ᠂ ᠶᠡᠷᠦ ᠥᠪᠡᠷ ᠦ᠋ᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠣᠯᠵᠤ ᠦᠵᠡᠭᠡ ᠦᠭᠡᠢ᠂ ᠡᠭᠡᠴᠢ ᠪᠢᠳᠡᠨ ᠬᠣᠶᠠᠷ ᠮᠠᠯ ᠢ᠋ᠶ᠋ᠠᠨ ᠰᠠᠢᠬᠠᠨ ᠪᠠᠢᠴᠠᠭᠠᠵᠤ ᠦᠵᠡᠭᠰᠡᠨ ᠳ᠋ᠦ᠍ ᠴᠢᠨᠣᠠ ᠳ᠋ᠤ᠌ ᠬᠠᠵᠠᠭᠳᠠᠵᠤ ᠰᠢᠷᠬᠠᠳᠤᠭᠰᠠᠨ ᠮᠠᠯ ᠦᠭᠡᠢ ᠪᠦᠷᠢᠨ ᠪᠦᠲᠦᠨ ᠰᠠᠢᠨ ᠪᠠᠢᠯᠠ᠃ ᠢᠩᠭᠢᠭᠡᠳ ᠴᠠᠭᠠᠰᠢ ᠮᠠᠯ ᠢ᠋ᠶ᠋ᠠᠨ ᠲᠠᠭᠤᠵᠤ ᠨᠢᠷᠤᠭᠤ ᠳᠠᠪᠠᠵᠤ ᠪᠡᠯᠴᠢᠭᠡᠷ ᠲᠡᠭᠡᠨ ᠬᠦᠷᠦᠯᠡ᠃
ᠮᠠᠨ ᠤ᠋ ᠬᠡᠳᠦᠨ ᠲᠡᠮᠡᠭᠡ ᠤᠷᠢᠳᠤ ᠣᠷᠣᠢ ᠨᠢ ᠪᠠᠰᠠ ᠲᠡᠷᠡ ᠵᠦᠭ ᠲᠦ᠍ ᠪᠡᠯᠴᠢᠭᠡᠭᠰᠡᠨ ᠪᠠᠢᠵᠠᠢ᠃ ᠪᠡᠯᠴᠢᠭᠡᠷ ᠲᠦ᠍ ᠬᠦᠷᠦᠭᠰᠡᠨ ᠦ᠌ ᠳᠠᠷᠠᠭᠠ ᠡᠭᠡᠴᠢ ᠨᠠᠳᠠᠳᠤ ᠄︽ᠴᠢ ᠡᠨᠳᠡ ᠮᠠᠯ ᠢ᠋ᠶ᠋ᠠᠨ ᠬᠠᠷᠠᠵᠤ ᠪᠠᠢᠭᠠᠷᠠᠢ᠂ ᠥᠨᠥᠬᠢ ᠴᠢᠨᠣᠠ ᠨᠢᠭᠡᠨᠲᠡ ᠬᠥᠮᠦᠨ ᠢ᠋ ᠣᠯᠵᠤ ᠦᠵᠡᠭᠰᠡᠨ ᠪᠣᠯᠬᠣᠷ ᠪᠠᠷᠤᠭ ᠳᠠᠬᠢᠵᠤ ᠢᠷᠡᠬᠦ ᠦᠭᠡᠢ ᠪᠠᠢᠬᠠ ᠪᠢ ᠣᠴᠢᠵᠤ ᠬᠡᠳᠦᠨ ᠲᠡᠮᠡᠭᠡ ᠪᠡᠨ ᠬᠠᠢᠵᠤ ︵ᠡᠷᠢᠵᠦ) ᠣᠯᠤᠭᠠᠳ ᠢᠷᠡᠶᠡ᠂ ᠲᠡᠮᠡᠭᠡᠨ ᠳᠣᠲᠣᠷᠠ ᠨᠢᠭᠡ ᠲᠣᠷᠣᠮ ᠲᠠᠢ ᠢᠩᠭᠡ ᠴᠢᠨᠣᠠ ᠳ᠋ᠤ᠌ ᠢᠳᠡᠭᠳᠡᠭᠰᠡᠨ ᠪᠠᠢᠵᠤ ᠮᠡᠳᠡᠨᠡ᠂ ᠬᠤᠷᠳᠤᠨ ᠬᠠᠢᠵᠤ ᠣᠯᠬᠤ ᠦᠭᠡᠢ ᠪᠣᠯᠬᠤ ᠦᠭᠡᠢ᠂ ᠴᠢ ᠮᠠᠯ ᠢ᠋ᠶ᠋ᠠᠨ ᠰᠠᠢᠨ ᠬᠠᠷᠠᠵᠤ ᠪᠤᠲᠠᠷᠠᠭᠤᠯᠵᠤ᠂ ᠰᠠᠯᠭᠠᠵᠤ ᠪᠣᠯᠬᠤ ᠦᠭᠡᠢ᠂ ᠳᠠᠭᠤ ᠴᠢᠮᠡᠭᠡ ᠰᠠᠢᠨ ᠥᠭᠴᠦ ᠪᠠᠢ ᠬᠥᠮᠦᠨ ᠦ᠌ ᠳᠠᠭᠤ ᠴᠢᠮᠡᠭᠡ ᠡᠴᠡ ᠴᠢᠨᠣᠠ ᠠᠶᠤᠳᠠᠭ︾ ᠭᠡᠵᠦ ᠬᠡᠯᠡᠭᠡᠳ ᠲᠡᠮᠡᠭᠡ ᠪᠡᠨ ᠬᠠᠢᠬᠤ (ᠡᠷᠢᠬᠦ ) ᠪᠡᠷ ᠶᠠᠪᠤᠴᠢᠬᠠᠯᠠ᠃ ᠪᠢ ᠴᠦ᠍ ᠡᠭᠡᠴᠢ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠪᠡᠷ ᠮᠠᠯ ᠢ᠋ᠶ᠋ᠠᠨ ᠲᠣᠭᠣᠷᠢᠭᠠᠳ᠂ ᠲᠣᠭᠲᠠᠭᠠᠭᠠᠳ᠂ ᠬᠠᠰᠬᠢᠷᠴᠤ ᠳᠠᠭᠤᠯᠠᠭᠠᠳ ᠭᠦᠶᠦᠭᠡᠳ ᠪᠠᠢᠯᠠ᠂ ᠠᠶᠤᠵᠤ ᠰᠣᠴᠢᠭᠰᠠᠨ ᠬᠡᠦᠬᠡᠳ ᠦ᠋ᠨ ᠬᠡᠷᠡᠭ ᠵᠦᠳᠡᠷᠡᠵᠦ ᠶᠠᠳᠠᠷᠠᠬᠤ ᠪᠠᠨ ᠪᠦᠷ ᠮᠠᠷᠲᠠᠭᠰᠠᠨ᠂ ᠢᠩᠭᠢᠵᠦ ᠮᠠᠯ ᠢ᠋ᠶ᠋ᠠᠨ ᠪᠥᠭᠡᠮᠨᠡᠭᠦᠯᠵᠦ ᠬᠠᠷᠢᠭᠤᠯᠵᠤ ᠪᠠᠢᠲᠠᠯᠠ ᠣᠷᠣᠢ ᠴᠤ᠌ ᠪᠣᠯᠤᠯᠠ᠂ ᠮᠠᠯ ᠭᠡᠷ ᠥᠭᠡᠳᠡ ᠪᠡᠨ ᠪᠤᠴᠠᠬᠤ ᠴᠠᠭ ᠴᠤ᠌ ᠪᠣᠯᠤᠯᠠ᠂ ᠲᠡᠮᠡᠭᠡᠨ ᠳ᠋ᠦ᠍ ᠶᠠᠪᠤᠭᠰᠠᠨ ᠡᠭᠡᠴᠢ ᠪᠠᠰᠠ ᠯᠠ ᠢᠷᠡᠳᠡᠭ ᠦᠭᠡᠢ᠂ ᠪᠠᠴᠢᠮᠳᠠᠵᠤ ᠠᠶᠤᠬᠤ ᠳ᠋ᠠᠭᠠᠨ ᠪᠠᠷᠬᠢᠷᠠᠵᠤ ᠣᠷᠢᠯᠠᠭᠰᠠᠨ ᠴᠤ᠌ ᠶᠤᠮ ᠰᠢᠭ᠋ ᠪᠣᠳᠣᠭᠳᠠᠨᠠ᠃ ᠢᠩᠭᠢᠵᠦ ᠪᠠᠢᠲᠠᠯᠠ ᠡᠭᠡᠴᠢ ᠳ᠋ᠠᠯᠢᠩᠪᠣᠷᠤ ᠪᠠᠨ ᠤᠨᠤᠵᠤ ᠪᠤᠰᠤᠳ ᠲᠡᠮᠡᠭᠡ ᠪᠡᠨ ᠬᠥᠲᠥᠯᠦᠭᠡᠳ ᠱᠣᠭᠰᠢᠭᠤᠯᠤᠭᠠᠳ ︵ᠭᠦᠶᠦᠭᠡᠳ ) ᠢᠷᠡᠯᠡ᠂ ᠥᠨᠥ ᠮᠠᠭᠤ ᠡᠷᠬᠡ ᠳᠡᠯᠳᠡᠩ ᠬᠠᠷᠠ ᠪᠣᠲᠣᠭᠣ ᠮᠢᠨᠢ ᠲᠡᠮᠡᠭᠡᠨ ᠦ᠌ ᠠᠷᠤ ᠳ᠋ᠤ᠌ ᠱᠣᠪᠣᠩ ᠱᠣᠪᠣᠩ ᠭᠦᠶᠦᠭᠡᠳ ᠳᠠᠭᠠᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠰᠡᠳᠬᠢᠯ ᠶᠡᠬᠡ ᠯᠡ ᠠᠮᠤᠷᠵᠢᠵᠤ ᠪᠢᠯᠡ᠃ ᠮᠠᠨ ᠤ᠋ ᠶᠡᠬᠡ ᠡᠭᠡᠴᠢ ᠲᠡᠮᠡᠭᠡ ᠮᠠᠯ ᠤ᠋ᠨ ᠡᠷᠢᠯ ᠳ᠋ᠦ᠍ ᠲᠤᠩ ᠰᠠᠢᠨ ᠬᠥᠮᠦᠨ ᠪᠠᠢᠭᠰᠠᠨ᠃
ᠲᠡᠭᠡᠭᠡᠳ ᠡᠭᠡᠴᠢ ᠶ᠋ᠢ ᠢᠷᠡᠬᠦᠯᠡᠷ ᠶᠠᠭᠠᠬᠢᠭᠠᠳ ᠲᠡᠢᠮᠦ ᠤᠳᠠᠭᠠᠨ ᠶᠠᠪᠤᠪᠠ ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠡᠭᠡᠴᠢ ᠄︽ᠪᠤᠰᠤᠳ ᠲᠡᠮᠡᠭᠡ ᠨᠢ ᠡᠨᠡ ᠠᠷᠤ ᠳᠡᠭᠡᠷᠡ ᠣᠢᠷᠠᠬᠠᠨ ᠪᠠᠢᠵᠠᠢ᠂ ᠭᠠᠭᠴᠠ ᠳ᠋ᠠᠯᠢᠩᠪᠣᠷᠤ ᠪᠠᠢᠳᠠᠭ ᠦᠭᠡᠢ᠂ ᠲᠡᠭᠡᠭᠡᠳ ᠮᠥᠷ ᠢ᠋ ᠨᠢ ᠦᠵᠡᠭᠰᠡᠨ ᠴᠢᠨᠢ ᠤᠷᠢᠳᠤ (ᠥᠴᠥᠭᠡᠳᠦᠷ ) ᠰᠥᠨᠢ ᠴᠢᠨᠣᠠ ᠮᠠᠨ ᠤ᠋ ᠲᠡᠮᠡᠭᠡ ᠤᠷᠤᠭᠤ ᠳᠠᠭᠠᠷᠢᠵᠠᠢ᠂ ᠳ᠋ᠠᠯᠢᠩᠪᠣᠷᠤ ᠬᠡᠪᠲᠡᠷᠢ ᠡᠴᠡ ᠪᠣᠰᠴᠤ ᠥᠨᠥ ᠴᠢᠨᠣᠠ ᠶ᠋ᠢ ᠬᠥᠭᠡᠭᠡᠵᠡᠢ᠂ ᠬᠥᠭᠡᠭᠡᠭᠰᠡᠭᠡᠷ ᠪᠠᠢᠭᠠᠳ ᠲᠡᠷᠡ ᠴᠢᠨᠣᠠ ᠶ᠋ᠢ ᠪᠤᠰᠤᠳ ᠲᠡᠮᠡᠭᠡᠨ ᠡᠴᠡ ᠨᠢ ᠰᠠᠯᠭᠠᠵᠤ ᠠᠪᠤᠭᠠᠳ ᠳᠡᠪᠰᠡᠵᠦ ᠬᠠᠷᠠᠢᠭᠰᠠᠭᠠᠷ ᠪᠠᠢᠭᠠᠳ ᠪᠣᠭᠤᠴᠢᠭᠠᠲᠠᠢ (ᠲᠡᠮᠡᠭᠡ ᠶ᠋ᠢ ᠡᠮᠦᠨᠡ ᠵᠥᠪ ᠡᠪᠦᠳᠦᠭ ᠡᠴᠡ ᠨᠢ ᠪᠤᠷᠠᠨᠲᠠᠭ ᠢ᠋ᠶ᠋ᠠᠷ ᠨᠢ ᠪᠠᠭᠠ ᠪᠥᠬᠥᠢᠯᠭᠡᠵᠦ ᠤᠶᠠᠬᠤ ᠶ᠋ᠢ ᠬᠡᠯᠡᠳᠡᠭ ) ᠪᠠᠢᠭᠰᠠᠨ ᠪᠤᠷᠠᠨᠲᠠᠭ ᠢ᠋ᠶ᠋ᠠᠨ ᠲᠠᠰᠤᠯᠴᠢᠬᠠᠵᠠᠢ᠂ ᠢᠩᠭᠢᠭᠡᠳ ᠴᠢᠨᠣᠠ ᠶ᠋ᠢ ᠪᠠᠷᠤᠭ ᠬᠣᠷᠢᠭᠠᠳ ᠭᠠᠵᠠᠷ ᠬᠥᠭᠡᠭᠡᠵᠡᠢ᠂ ᠳᠡᠪᠰᠡᠵᠦ ᠠᠯᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠮᠥᠷ ᠢ᠋ ᠨᠢ ᠬᠠᠷᠠᠬᠤ ᠳ᠋ᠤ᠌ ᠲᠤᠩ ᠣᠢᠷᠠᠲᠤᠵᠤ ᠬᠦᠷᠦᠭᠰᠡᠨ ᠶᠠᠩᠵᠤ ᠲᠠᠢ᠂ ᠪᠠᠳᠠᠢ ᠶ᠋ᠢᠨ ᠵᠢᠷᠠᠨ ᠤ᠋ ᠡᠯᠡᠰᠦᠨ ᠦ᠌ ᠡᠮᠦᠨᠡ ᠵᠠᠬᠠ ᠳ᠋ᠤ᠌ ᠬᠦᠷᠦᠭᠡᠳ ᠰᠢᠷᠠᠯᠵᠢ ᠰᠢᠪᠠᠭ᠂ ᠪᠤᠲᠠ ᠥᠨᠳᠥᠷ ᠪᠣᠯᠬᠣᠷ ᠴᠢᠨᠣᠠ ᠪᠠᠨ ᠠᠯᠳᠠᠴᠢᠬᠠᠵᠠᠢ᠂ ᠲᠡᠭᠡᠭᠡᠳ ᠪᠤᠴᠠᠭᠠᠳ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠣᠯᠵᠤ ᠠᠪᠤᠯᠠ︾ ᠭᠡᠨᠡ᠃ ᠡᠭᠡᠴᠢ ᠶ᠋ᠢ ᠬᠦᠷᠬᠦ ᠳ᠋ᠦ᠍ ᠪᠠᠰᠠ ᠪᠡᠶᠡ ᠪᠡᠨ ᠶᠠᠭ ᠬᠤᠷᠢᠶᠠᠴᠢᠬᠠᠭᠰᠠᠨ ᠴᠡᠴᠡᠷᠡᠵᠦ ᠪᠠᠢᠭᠰᠠᠨ᠂ ᠪᠢ ᠬᠠᠮᠠᠷ ᠴᠢᠬᠢ ᠶ᠋ᠢ ᠨᠢ ᠬᠡᠰᠡᠭ ᠢᠯᠢᠭᠰᠡᠨ ᠳ᠋ᠦ᠍ ᠵᠢᠭᠠᠬᠠᠨ ᠵᠦᠭᠡᠷ ᠪᠣᠯᠤᠯᠠ ᠭᠡᠪᠡ᠃ ᠢᠩᠭᠢᠭᠡᠳ ᠨᠠᠷᠠ ᠰᠢᠩᠭᠡᠬᠦ ᠡᠴᠡ ᠡᠮᠦᠨᠡᠬᠡᠨ ᠪᠢᠳᠡᠨ ᠬᠣᠶᠠᠷ ᠲᠡᠮᠡᠭᠡ ᠲᠡᠢ ᠮᠠᠯ ᠲᠠᠢ ᠪᠠᠨ ᠪᠦᠷᠢᠨ ᠪᠦᠲᠦᠨ ᠬᠠᠷᠢᠵᠤ ᠢᠷᠡᠭᠰᠡᠨ᠃ ᠲᠡᠷᠡ ᠣᠷᠣᠢ ᠨᠢ ᠮᠠᠨᠠᠢᠬᠢᠨ ᠮᠠᠯ ᠲᠡᠮᠡᠭᠡ ᠪᠡᠨ ᠠᠷᠴᠠ ᠪᠠᠷ ᠤᠲᠤᠵᠤ ᠠᠷᠢᠭᠤᠳᠬᠠᠵᠤ ᠡᠪᠡᠳᠴᠢᠨ ᠬᠢᠵᠢᠭ ᠢ᠋ ᠠᠷᠢᠯᠭᠠᠵᠤ ᠰᠡᠳᠬᠢᠯ ᠰᠠᠨᠠᠭᠠ ᠶ᠋ᠢ ᠨᠢ ᠲᠠᠢᠪᠤᠰᠢᠷᠠᠭᠤᠯᠵᠤ ᠪᠠᠢᠭᠰᠠᠨ᠃ ᠰᠣᠨᠣᠰᠬᠤ ᠳ᠋ᠤ᠌ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠪᠠᠷᠢᠭᠠᠳᠠ ᠠ᠋ᠴᠠ ᠬᠥᠮᠦᠨ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠲᠡᠷᠡ ᠴᠢᠨᠣᠠ ᠶ᠋ᠢ ᠠᠯᠠᠭᠰᠠᠨ ᠭᠡᠨᠡ᠃
ᠪᠠᠰᠠ ᠨᠢᠭᠡ ᠨᠢ᠂ ᠨᠢᠭᠡᠨ ᠬᠠᠪᠤᠷ ᠤ᠋ᠨ ᠡᠬᠢᠨ ᠪᠠᠢᠭᠰᠠᠨ᠂ ᠮᠠᠨᠠᠢᠬᠢᠨ ᠣᠲᠣᠷ ᠢ᠋ᠶ᠋ᠠᠷ ᠪᠠᠷᠢᠭᠠᠳᠠ ᠠ᠋ᠴᠠ ᠳᠡᠮᠡᠢ ᠬᠣᠯᠠ ᠦᠭᠡᠢ ᠪᠠᠭᠤᠳᠠᠯᠯᠠᠵᠤ ᠪᠠᠢᠭᠰᠠᠨ᠃ ᠨᠢᠭᠡᠨ ᠥᠷᠯᠥᠭᠡ ᠡᠷᠲᠡ ᠬᠣᠰᠢ (ᠡᠳ᠋ ) ᠪᠠᠷᠠᠭᠠ ᠪᠠᠨ ᠡᠭᠦᠷᠦᠭᠰᠡᠨ ᠭᠤᠷᠪᠠᠨ ᠬᠥᠮᠦᠨ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠯᠡ᠂ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠨᠢᠭᠡ ᠨᠢ ᠮᠠᠨ ᠤ᠋ ᠪᠠᠷᠢᠭᠠᠳᠠ ᠶ᠋ᠢᠨ ᠬᠥᠮᠦᠨ᠂ ᠨᠥᠭᠦᠭᠡ ᠬᠣᠶᠠᠷ ᠨᠢ ᠬᠤᠰᠢᠭᠤᠨ ᠤ᠋ ᠺᠠᠳ᠋ᠷ᠂ ᠲᠡᠳᠡᠨᠡᠷ ᠦ᠋ᠨ ᠬᠡᠯᠡᠬᠦ ᠪᠡᠷ ᠳᠣᠷᠣᠭᠰᠢ ᠪᠠᠭᠤᠵᠤ ᠠᠵᠢᠯ ᠳᠡᠮᠵᠢᠵᠦ ᠪᠠᠢᠭᠠ ᠤᠯᠤᠰ ᠤ᠋ᠳ᠂ ᠣᠳᠣ ᠬᠣᠢᠲᠤ ᠪᠠᠷᠢᠭᠠᠳᠠ ᠳ᠋ᠤ᠌ ᠣᠴᠢᠬᠤ ᠤᠴᠢᠷ ᠲᠠᠢ ᠭᠡᠨᠡ᠃ ᠥᠴᠥᠭᠡᠳᠦᠷ ᠶᠠᠪᠤᠬᠤ ᠭᠡᠳ ᠪᠠᠷᠢᠭᠠᠳᠠ ᠳᠡᠭᠡᠷᠡ ᠤᠨᠤᠭᠠᠨ ᠤ᠋ ᠲᠡᠮᠡᠭᠡ ᠦᠭᠡᠢ ᠤᠴᠢᠷ ᠠ᠋ᠴᠠ ᠪᠠᠷᠢᠭᠠᠳᠠ ᠶ᠋ᠢᠨ ᠳᠠᠷᠤᠭᠠ ᠮᠠᠨ ᠤ᠋ ᠲᠡᠮᠡᠭᠡ ᠣᠢᠷᠠ ᠪᠠᠢᠬᠤ ᠶ᠋ᠢ ᠮᠡᠳᠡᠵᠦ ᠪᠠᠢᠬᠤ ᠲᠤᠯᠠ ᠡᠨᠡ ᠬᠥᠮᠦᠨ ᠢ᠋ ᠶᠠᠪᠤᠭᠤᠯᠵᠤ ᠮᠠᠨ ᠤ᠋ ᠲᠡᠮᠡᠭᠡ ᠡᠴᠡ ᠭᠤᠷᠪᠠ ᠶ᠋ᠢ ᠨᠢ ᠪᠠᠷᠢᠵᠤ ᠢᠷᠡᠭᠡᠳ ᠡᠨᠡ ᠬᠣᠶᠠᠷ ᠺᠠᠳ᠋ᠷ ᠢ᠋ ᠲᠡᠷᠡ ᠪᠠᠷᠢᠭᠠᠳᠠ ᠳᠡᠭᠡᠷᠡ ᠬᠦᠷᠭᠡᠵᠦ ᠥᠭ ᠭᠡᠵᠡᠢ᠃ ᠲᠡᠷᠡ ᠬᠥᠮᠦᠨ ᠮᠠᠨ ᠤ᠋ ᠬᠡᠳᠦᠨ ᠲᠡᠮᠡᠭᠡ ᠶ᠋ᠢ ᠬᠥᠳᠡᠭᠡ ᠡᠴᠡ ᠣᠯᠵᠤ ᠠᠪᠤᠭᠠᠳ ᠨᠢᠭᠡ ᠶ᠋ᠢ ᠨᠢ ᠪᠠᠷᠢᠬᠤ ᠭᠡᠰᠡᠨ ᠴᠢᠨᠢ ᠥᠨᠥ ᠳ᠋ᠠᠯᠢᠩᠪᠣᠷᠤ ᠬᠠᠵᠠᠵᠤ ᠬᠥᠭᠡᠭᠡᠭᠡᠳ ᠶᠠᠭᠠᠬᠢᠭᠰᠠᠨ ᠴᠤ᠌ ᠲᠡᠮᠡᠭᠡᠨ ᠳ᠋ᠦ᠍ ᠣᠢᠷᠠᠲᠤᠭᠤᠯᠬᠤ ᠦᠭᠡᠢ ᠭᠡᠨᠡ᠂ ᠲᠡᠭᠡᠭᠡᠳ ᠲᠡᠮᠡᠭᠡ ᠪᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠡᠨᠡ ᠥᠷᠯᠥᠭᠡ ᠵᠠᠮ ᠳᠠᠭᠠᠤ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠵᠦ ᠡᠵᠡᠨ ᠢ᠋ᠶ᠋ᠡᠷ ᠨᠢ ᠲᠡᠮᠡᠭᠡ ᠶ᠋ᠢ ᠨᠢ ᠪᠠᠷᠢᠭᠤᠯᠵᠤ ᠲᠡᠷᠡ ᠬᠣᠶᠠᠷ ᠺᠠᠳ᠋ᠷ ᠢ᠋ ᠬᠣᠢᠲᠤ ᠪᠠᠷᠢᠭᠠᠳᠠ ᠳ᠋ᠤ᠌ ᠬᠦᠷᠭᠡᠵᠦ ᠥᠭᠬᠦ ᠭᠡᠰᠡᠨ ᠪᠠᠢᠵᠠᠢ᠃ ᠲᠡᠳᠡᠨ ᠦ᠌ ᠬᠡᠯᠡᠬᠦ ᠪᠡᠷ᠄ ᠲᠡᠮᠡᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠣᠴᠢᠭᠠᠳ ᠨᠢᠭᠡ ᠰᠡᠷᠡᠭᠡ(ᠬᠣᠶᠠᠷ ᠪᠦᠬᠦ ᠨᠢ ᠥᠭᠡᠳᠡ ᠪᠡᠨ ᠪᠣᠰᠤᠭᠠ ) ᠰᠢᠷᠠ ᠠᠳᠠ ᠶ᠋ᠢ ᠶᠠᠭ ᠪᠠᠷᠢᠬᠤ ᠭᠡᠵᠦ ᠪᠠᠢᠲᠠᠯᠠ ᠳᠡᠮᠡᠢ ᠬᠣᠯᠠ ᠦᠭᠡᠢ ᠰᠢᠭ ᠨᠢᠭᠡ ᠪᠣᠷᠣ ᠠᠳᠠ ᠶᠠᠭ ᠡᠪᠦᠯ ᠦ᠋ᠨ ᠣᠷᠣᠭᠰᠠᠨ ᠪᠤᠤᠷᠠ ᠰᠢᠭ᠋ ᠠᠮᠠᠨ ᠠ᠋ᠴᠠ ᠪᠠᠨ ᠴᠠᠭᠠᠨ ᠬᠥᠭᠡᠰᠦ ᠴᠣᠬᠣᠷᠴᠤ ᠬᠦᠵᠦᠭᠦᠦ ᠪᠡᠨ ᠭᠠᠵᠠᠷ ᠨᠠᠭᠠᠯᠳᠤᠭᠤᠯᠤᠨ ᠰᠦᠷ ᠬᠦᠴᠦᠲᠡᠢ ᠳᠠᠭᠠᠷᠢᠭᠠᠳ ᠢᠷᠡᠯᠡ ᠭᠡᠨᠡ᠂ ᠵᠣᠯ ᠢ᠋ᠶ᠋ᠠᠷ ᠬᠠᠵᠠᠭᠤ ᠳ᠋ᠤ᠌ ᠨᠢ ᠨᠢᠭᠡ ᠪᠦᠳᠦᠭᠦᠨ ᠬᠠᠷᠠ ᠪᠤᠲᠠ ᠪᠠᠢᠵᠤ ᠪᠤᠲᠠᠨ ᠤ᠋ ᠠᠷᠤ ᠳ᠋ᠤ᠌ ᠨᠢᠭᠤᠭᠳᠠᠵᠤ ᠪᠠᠢᠵᠤ ᠰᠠᠶᠢ ᠳᠤᠲᠠᠭᠠᠵᠤ ᠭᠠᠷᠤᠭᠰᠠᠨ ᠭᠡᠨᠡ᠃
ᠲᠡᠷᠡ ᠦᠶᠡ ᠳ᠋ᠦ᠍ ᠲᠡᠮᠡᠭᠡ ᠠᠷᠪᠢᠨ᠂ ᠴᠢᠨᠣᠠ ᠴᠤ᠌ ᠠᠷᠪᠢᠨ᠂ ᠴᠢᠨᠣᠠ ᠬᠥᠭᠡᠭᠡᠳᠡᠭ ᠲᠡᠮᠡᠭᠡ ᠪᠠᠰᠠ ᠪᠠᠢᠭᠰᠠᠨ ᠪᠠᠢᠯᠭᠦᠢ᠂ ᠭᠡᠪᠡᠴᠦ ᠢᠵᠢᠯᠢ ᠪᠡᠨ ᠬᠠᠮᠠᠭᠠᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠴᠢᠨᠣᠠ ᠬᠥᠭᠡᠭᠡᠳᠡᠭ ᠠᠲᠠᠨ ᠲᠡᠮᠡᠭᠡ ᠲᠤᠩ ᠴᠥᠭᠡᠨ ᠪᠠᠢᠬᠠ᠂ ᠨᠡᠩ ᠴᠦ᠍ ᠢᠵᠢᠯᠢ ᠪᠡᠨ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠳ᠋ᠦ᠍ ᠪᠠᠷᠢᠭᠤᠯᠬᠤ ᠦᠭᠡᠢ ᠭᠡᠵᠦ ᠬᠥᠮᠦᠨ ᠬᠥᠭᠡᠭᠡᠳᠡᠭ ᠲᠡᠮᠡᠭᠡ ᠪᠠᠷᠤᠭ ᠪᠠᠢᠳᠠᠭ ᠦᠭᠡᠢ ᠪᠠᠢᠬᠠ᠃
ᠬᠠᠮᠲᠤ ᠨᠡᠢᠲᠡ ᠳ᠋ᠦ᠍ ᠪᠠᠢᠬᠤ ᠳ᠋ᠤ᠌ ᠪᠠᠷᠢᠭᠠᠳᠠ ᠨᠢᠭᠡᠳᠦᠯ ᠦ᠋ᠨ ᠬᠤᠷᠠᠯ ᠴᠤᠭᠯᠠᠭᠠᠨ ᠲᠤᠩ ᠠᠷᠪᠢᠨ ᠪᠠᠢᠳᠠᠭ ᠪᠠᠢᠭᠰᠠᠨ᠃ ᠶᠠᠮᠠᠷ ᠭᠡᠰᠢᠭᠦᠳ ᠦ᠋ᠨ ᠬᠤᠷᠠᠯ᠂ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠦ᠌ ᠬᠤᠷᠠᠯ᠂ ᠡᠷᠦᠬᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠤᠷᠠᠯ᠂ ᠪᠣᠯᠪᠠᠰᠤᠷᠠᠯ᠂ ᠰᠤᠷᠤᠯᠴᠠᠯᠭᠠ ᠭᠡᠬᠦ ᠮᠡᠲᠦ᠃ ᠵᠠᠷᠢᠮ ᠳ᠋ᠠᠭᠠᠨ ᠵᠢᠷᠭᠤᠭᠠ ᠳᠣᠯᠣᠭᠠᠨ ᠡᠳᠦᠷ ᠦ᠋ᠨ ᠴᠤᠭᠯᠠᠭᠠᠨ ᠪᠣᠯᠳᠠᠭ᠃ ᠨᠢᠭᠡᠳᠦᠯ ᠪᠠᠷᠢᠭᠠᠳᠠ ᠳ᠋ᠤ᠌ ᠶᠠᠪᠤᠬᠤ ᠳ᠋ᠤ᠌ ᠮᠠᠨ ᠤ᠋ ᠭᠣᠪᠢ ᠭᠠᠵᠠᠷ ᠲᠡᠷᠭᠡ ᠬᠠᠰᠠᠭ ᠭᠡᠵᠦ ᠶᠡᠷᠦᠨᠢ ᠪᠠᠢᠳᠠᠭ ᠦᠭᠡᠢ᠂ ᠲᠡᠮᠡᠭᠡ ᠪᠡᠷ ᠤᠨᠤᠭᠠ ᠬᠢᠵᠦ ᠣᠴᠢᠳᠠᠭ᠃ ᠲᠡᠭᠡᠬᠦ ᠪᠡᠷ ᠯᠠ ᠲᠡᠵᠢᠭᠡᠬᠦ ᠡᠪᠡᠰᠦ ᠣᠯᠳᠠᠳᠠᠭ ᠦᠭᠡᠢ᠂ ᠲᠠᠯᠪᠢᠵᠤ ᠢᠳᠡᠭᠦᠯᠬᠦ ᠡᠪᠡᠰᠦ ᠲᠡᠵᠢᠭᠡᠷᠢ ᠬᠣᠪᠣᠷᠬᠠᠨ ᠮᠥᠷᠲᠡᠭᠡᠨ ᠬᠠᠷᠠᠵᠤ ᠬᠠᠷᠢᠭᠤᠯᠬᠤ ᠬᠥᠮᠦᠨ ᠴᠦ᠍ ᠪᠠᠢᠳᠠᠭ ᠦᠭᠡᠢ᠂ ᠲᠤᠱᠠᠭᠠᠳ ᠲᠠᠯᠪᠢᠭᠰᠠᠨ ᠴᠤ᠌ ᠲᠡᠮᠡᠭᠡ ᠵᠣᠭᠰᠣᠳᠠᠭ ᠦᠭᠡᠢ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠮᠠᠨᠠᠢᠬᠢᠨ ᠠ᠋ᠴᠠ ᠬᠡᠨ ᠨᠢ ᠶᠠᠪᠤᠭᠰᠠᠨ ᠴᠤ᠌ ᠳ᠋ᠠᠯᠢᠩᠪᠣᠷᠤ ᠪᠠᠨ ᠯᠠ ᠤᠨᠤᠵᠤ ᠶᠠᠪᠤᠳᠠᠭ᠂ ᠣᠴᠢᠳᠠᠭ ᠭᠠᠵᠠᠷ ᠢ᠋ᠶ᠋ᠠᠨ ᠣᠴᠢᠭᠠᠳ ᠠᠪᠬᠤ ᠴᠢᠬᠤᠯᠠ ᠲᠠᠢ ᠶᠠᠭᠤᠮᠠ ᠪᠠᠨ ᠠᠪᠤᠭᠠᠳ ᠨᠢᠷᠤᠭᠤᠨ ᠳ᠋ᠤ᠌ ᠨᠢ ᠰᠠᠢᠨ ᠠᠴᠢᠶᠠᠯᠠᠭᠠᠳ ᠲᠠᠯᠪᠢᠵᠤ ᠶᠠᠪᠤᠭᠤᠯᠴᠢᠬᠠᠪᠠᠯ ᠪᠣᠯᠤᠭᠰᠠᠨ ᠲᠡᠷᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠵᠣᠭᠣᠰ ᠮᠥᠩᠭᠥ ᠳᠤᠲᠠᠮᠠᠭ᠂ ᠪᠠᠷᠠᠭᠠ ᠲᠠᠸᠠᠷ ᠬᠣᠪᠣᠷ᠂ ᠠᠮᠢᠳᠤᠷᠠᠯ ᠲᠤᠩ ᠵᠦᠳᠡᠭᠦᠦ ᠪᠠᠢᠭᠰᠠᠨ ᠴᠠᠭ᠂ ᠬᠡᠵᠢᠶᠡ ᠨᠢᠭᠡ ᠬᠣᠷᠰᠢᠶᠠᠨ (ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠢᠵᠦ ᠶᠠᠭᠤᠮᠠ ᠬᠤᠳᠠᠯᠳᠤᠳᠠᠭ ᠭᠠᠵᠠᠷ) ᠲᠤ᠌ ᠣᠴᠢᠪᠠᠯ ᠳ᠋ᠧᠩ ᠦ᠋ᠨ ᠲᠣᠰᠣ᠂ ᠵᠢᠭᠠᠬᠠᠨ ᠬᠠᠷᠠ᠂ ᠴᠠᠭᠠᠨ ᠰᠢᠬᠢᠷ᠂ ᠴᠦᠳᠡᠩ᠂ ᠴᠠᠢ ᠵᠡᠷᠭᠡ ᠶ᠋ᠢᠨ ᠶᠠᠭᠤᠮᠠ ᠠᠪᠳᠠᠭ᠃ ᠡᠳᠡᠭᠡᠷ ᠶᠠᠭᠤᠮᠠ ᠪᠠᠨ ᠳ᠋ᠠᠯᠢᠩᠪᠣᠷᠤ ᠳᠡᠭᠡᠷᠡ ᠪᠡᠨ ᠠᠴᠢᠭᠠᠳ ᠪᠤᠷᠠᠨᠲᠠᠭ ᠢ᠋ ᠨᠢ ᠬᠦᠵᠦᠭᠦᠦ ᠳ᠋ᠦ᠍ ᠨᠢ ᠰᠠᠢᠨ ᠭᠡᠭᠴᠢ ᠡᠪᠬᠡᠵᠦ ᠲᠠᠯᠪᠢᠭᠠᠳ ᠶᠠᠪᠤᠭᠤᠯᠴᠢᠬᠠᠪᠠᠯ ᠵᠠᠮ ᠳ᠋ᠠᠭᠠᠨ ᠲᠦᠮᠡ ᠮᠢᠩᠭᠠᠨ ᠲᠡᠮᠡᠭᠡ ᠪᠠᠢᠭᠰᠠᠨ ᠴᠤ᠌ ᠶᠡᠷᠦ ᠡᠴᠡ ᠲᠣᠷᠴᠤ ᠲᠡᠭᠡᠭᠯᠡᠳᠡᠭ ᠦᠭᠡᠢ᠂ ᠥᠭᠡᠷᠡ ᠠᠢᠯ ᠤ᠋ᠨ ᠲᠡᠮᠡᠭᠡᠨ ᠳ᠋ᠦ᠍ ᠢᠵᠢᠯᠢᠰᠢᠳᠡᠭ ᠴᠦ᠍ ᠦᠭᠡᠢ᠂ ᠶᠠᠭ ᠯᠠ ᠳᠡᠭᠡᠷᠡ ᠨᠢ ᠬᠥᠮᠦᠨ ᠤᠨᠤᠭᠰᠠᠨ ᠶᠤᠮ ᠰᠢᠭ᠋ ᠰᠢᠭᠤᠳ ᠭᠡᠷ ᠵᠦᠭ ᠢ᠋ᠶ᠋ᠡᠨ ᠶᠠᠪᠤᠳᠠᠭ᠃ ᠪᠠᠷᠢᠭᠠᠳᠠ ᠠ᠋ᠴᠠ ᠵᠢᠷᠠ ᠳᠠᠯᠠᠨ ᠤ᠋ ᠭᠠᠵᠠᠷ᠂ ᠬᠡᠷᠪᠡ ᠥᠷᠯᠥᠭᠡ ᠡᠷᠲᠡ ᠲᠠᠯᠪᠢᠭᠰᠠᠨ ᠪᠣᠯ ᠵᠠᠷᠢᠮ ᠳ᠋ᠠᠭᠠᠨ ᠡᠳᠦᠷ ᠲᠡᠭᠡᠨ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠢᠷᠡᠳᠡᠭ᠂ ᠬᠠᠮᠤᠭ ᠣᠷᠣᠢ ᠳ᠋ᠠᠭᠠᠨ ᠵᠠᠮ ᠳ᠋ᠤ᠌ ᠨᠢᠭᠡ ᠬᠣᠨᠣᠭᠠᠳ ᠮᠠᠷᠭᠠᠰᠢ ᠨᠢ ᠢᠷᠡᠴᠢᠬᠡᠳᠡᠭ᠂ ᠭᠡᠷ ᠣᠢᠷᠠᠲᠤᠵᠤ ᠢᠷᠡᠭᠡᠳ ᠢᠵᠢᠯᠢ ᠨᠢ ᠦᠵᠡᠭᠳᠡᠪᠡᠯ ᠢᠵᠢᠯᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠳ᠋ᠤ᠌ ᠣᠴᠢᠳᠠᠭ᠂ ᠢᠵᠢᠯᠢ ᠨᠢ ᠦᠭᠡᠢ ᠪᠣᠯ ᠭᠡᠷ ᠦ᠋ᠨ ᠭᠠᠵᠠᠭᠠ (ᠭᠠᠳᠠᠨᠠ ) ᠢᠷᠡᠳᠡᠭ᠃ ᠪᠢᠳᠡ ᠪᠠᠷᠢᠭᠠᠳᠠ ᠨᠢᠭᠡᠳᠦᠯ ᠡᠴᠡ ᠠᠷᠪᠢᠨ ᠤᠳᠠᠭᠠ ᠲᠡᠭᠡᠵᠦ ᠲᠠᠯᠪᠢᠭᠰᠠᠨ᠂ ᠵᠠᠮ ᠳ᠋ᠠᠭᠠᠨ ᠶᠡᠷᠦ ᠨᠢ ᠬᠥᠮᠦᠨ ᠦ᠌ ᠬᠥᠮᠦᠨ ᠳ᠋ᠦ᠍ ᠪᠠᠷᠢᠭᠳᠠᠳᠠᠭ ᠦᠭᠡᠢ᠂ ᠬᠠᠮᠢᠶᠠ ᠦᠭᠡᠢ ᠲᠣᠭᠣᠷᠢᠭᠠᠳ ᠶᠠᠪᠤᠴᠢᠬᠠᠳᠠᠭ ᠴᠤ᠌ ᠦᠭᠡᠢ᠂ ᠶᠠᠭ ᠯᠠ ᠶᠠᠪᠤᠭᠰᠠᠨ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠠᠭᠠᠵᠤ ᠪᠤᠴᠠᠳᠠᠭ᠃ ᠮᠠᠨ ᠤ᠋ ᠪᠠᠷᠢᠭᠠᠳᠠ ᠶ᠋ᠢᠨ ᠬᠢᠨ <ᠶᠠᠩᠵᠤ ᠶ᠋ᠢᠨ ᠮᠠᠯ᠂ ᠮᠠᠭᠤ ᠰᠢᠭ᠋ ᠬᠡᠯᠡ(ᠴᠢᠮᠡᠭᠡ ) ᠬᠦᠷᠭᠡᠳᠡᠭ ᠬᠥᠮᠦᠨ ᠡᠴᠡ ᠯᠡ ᠳᠡᠭᠡᠷᠡ ᠠᠮᠢᠲᠠᠨ> ᠭᠡᠵᠦ ᠶᠡᠬᠡ ᠯᠡ ᠭᠠᠢᠬᠠᠴᠢᠬᠠᠳᠠᠭ ᠪᠠᠢᠭᠰᠠᠨ᠃
ᠡᠨᠡ ᠠᠳᠠ ᠬᠣᠲᠠᠨ ᠤ᠋ ᠬᠡᠳᠦᠨ ᠲᠡᠮᠡᠭᠡᠨ ᠳ᠋ᠡᠭᠡᠨ ᠲᠡᠷᠢᠭᠦᠯᠡᠵᠦ ᠵᠢᠯᠣᠭᠣᠳᠴᠤ ᠪᠠᠢᠳᠠᠭ᠃ ᠬᠠᠪᠤᠷ ᠣᠷᠣᠢ ᠰᠢᠭ᠋ ᠪᠣᠯᠬᠤ ᠳ᠋ᠤ᠌ ᠪᠤᠰᠤᠳ ᠨᠢ ᠲᠣᠭᠲᠠᠭᠤᠨ ᠢᠳᠡᠰᠢᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠲᠡᠷᠡ ᠭᠠᠭᠴᠠ ᠪᠠᠷ ᠢ᠋ᠶ᠋ᠠᠨ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠤᠭᠠᠳ ᠡᠢᠰᠢ ᠲᠡᠢᠰᠢ ᠬᠠᠷᠠᠭᠠᠳ ᠮᠠᠰᠢ ᠤᠳᠠᠭᠠᠨ ᠵᠣᠭᠰᠣᠵᠤ ᠪᠠᠢᠪᠠᠯ ᠬᠣᠯᠠ ᠲᠣᠭᠣᠷᠢᠬᠤ ᠪᠠᠷ ᠶᠠᠪᠤᠨᠠ ᠭᠡᠰᠡᠨ ᠰᠢᠨᠵᠢ᠃ ᠢᠩᠭᠢᠵᠦ ᠵᠣᠭᠰᠣᠵᠤ ᠪᠠᠢᠭᠠᠳ ᠯᠠ ᠬᠣᠶᠠᠷ ᠡᠳᠦᠷ ᠡᠴᠡ ᠢᠵᠢᠯᠢ ᠪᠡᠨ ᠳᠠᠭᠠᠭᠤᠯᠤᠭᠠᠳ ᠬᠣᠯᠠ ᠶᠠᠪᠤᠵᠤ ᠲᠣᠭᠣᠷᠢᠳᠠᠭ᠂ ᠨᠠᠭᠠᠰᠢ ᠴᠠᠭᠠᠰᠢ ᠪᠠᠷᠤᠭ ᠨᠢᠭᠡ ᠬᠣᠶᠠᠷ ᠵᠠᠭᠤᠨ ᠤ᠋ ᠭᠠᠵᠠᠷ ᠶᠠᠪᠤᠳᠠᠭ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠲᠡᠮᠦᠷ ᠤᠲᠠᠰᠤ ᠲᠣᠣᠷ ᠭᠡᠰᠡᠨ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠲᠤᠯᠠ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠶᠠᠪᠤᠵᠤ ᠮᠡᠳᠡᠨᠡ᠂ ᠬᠥᠮᠦᠨ ᠲᠡᠭᠦᠨ ᠢ᠋ ᠮᠡᠳᠡᠬᠦ ᠠᠷᠭᠠ ᠦᠭᠡᠢ᠂ ᠶᠠᠪᠤᠭᠰᠠᠨ ᠤ᠋ ᠠᠷᠤ ᠳ᠋ᠤ᠌ ᠨᠢ ᠮᠥᠷ ᠢ᠋ ᠨᠢ ᠭᠠᠷᠭᠠᠬᠤ ᠬᠡᠷᠡᠭ ᠪᠣᠯᠳᠠᠭ᠃ ᠶᠠᠭᠤᠨ ᠳ᠋ᠤ᠌ ᠭᠡᠨᠡᠳᠲᠡ ᠲᠡᠭᠡᠵᠦ ᠪᠡᠯᠴᠢᠭᠡᠷ ᠡᠴᠡ ᠬᠣᠯᠠ ᠭᠠᠷᠴᠤ ᠶᠠᠪᠤᠳᠠᠭ ᠢ᠋ ᠮᠡᠳᠡᠬᠦ ᠦᠭᠡᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠪᠣᠳᠣᠬᠤ ᠳ᠋ᠤ᠌ ᠨᠢᠭᠡ ᠪᠣᠯ ᠨᠢᠭᠡ ᠪᠡᠯᠴᠢᠭᠡᠷ ᠲᠦ᠍ ᠤᠳᠠᠭᠠᠨ ᠪᠠᠢᠬᠤᠯᠠᠷ ᠪᠠᠷᠤᠭ ᠤᠢᠳᠬᠠᠷ ᠬᠦᠷᠳᠡᠭ ᠪᠠᠢᠬᠠ᠂ ᠢᠩᠭᠢᠭᠡᠳ ᠪᠡᠯᠴᠢᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠠᠭᠤᠷ ᠨᠢᠭᠡ ᠲᠣᠭᠣᠷᠢᠵᠤ ᠭᠠᠵᠠᠷ ᠤᠰᠤ ᠦᠵᠡᠵᠦ ᠤᠢᠳᠬᠠᠷ ᠢ᠋ᠶ᠋ᠠᠨ ᠲᠠᠢᠯᠠᠶᠠ ᠭᠡᠵᠦ ᠶᠠᠪᠤᠳᠠᠭ ᠪᠠᠢᠵᠤ ᠴᠤ᠌ ᠮᠡᠳᠡᠨᠡ᠂ ᠪᠠᠰᠠ ᠨᠢᠭᠡ ᠪᠣᠯ ᠪᠡᠯᠴᠢᠭᠡᠷ ᠦ᠋ᠨ ᠡᠪᠡᠰᠦ ᠨᠢ ᠪᠠᠭᠠ ᠲᠠᠴᠢᠷᠳᠠᠵᠤ ᠰᠢᠨᠡ ᠰᠣᠷᠭᠣᠭ ᠡᠪᠡᠰᠦ ᠰᠣᠯᠢᠬᠤ ᠶ᠋ᠢᠨ ᠬᠠᠮᠲᠤ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠡᠷᠭᠢᠵᠦ ᠶᠠᠮᠠᠷ ᠭᠠᠵᠠᠷ ᠡᠪᠡᠰᠦ ᠨᠣᠭᠣᠭᠠ ᠰᠠᠢᠨ ᠪᠠᠢᠬᠤ ᠶ᠋ᠢ ᠦᠵᠡᠬᠦ ᠪᠡᠷ ᠶᠠᠪᠤᠳᠠᠭ ᠪᠠᠢᠬᠠ᠃ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠵᠣᠭᠰᠣᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠣᠢᠷᠠ ᠳ᠋ᠤ᠌ ᠲᠡᠮᠡᠭᠡ ᠠᠴᠢᠶᠠᠯᠠᠵᠤ ᠤᠨᠤᠵᠤ ᠡᠳ᠋ᠯᠡᠬᠦ ᠤᠴᠢᠷ ᠲᠠᠢ ᠪᠣᠯ ᠬᠤᠷᠳᠤᠨ ᠣᠴᠢᠵᠤ ᠪᠠᠷᠢᠵᠤ ᠲᠤᠱᠠᠬᠤ ᠦᠭᠡᠢ ᠪᠣᠯ ᠶᠠᠪᠤᠨᠠ ᠭᠡᠰᠡᠨ ᠯᠡ ᠦᠭᠡ᠃ ᠶᠠᠪᠤᠭᠠᠳ ᠡᠬᠢᠯᠡᠪᠡᠯ ᠶᠠᠭ ᠬᠥᠮᠦᠨ ᠲᠠᠭᠤᠭᠰᠠᠨ ᠮᠡᠲᠦ ᠵᠠᠮ ᠳ᠋ᠠᠭᠠᠨ ᠲᠠᠪᠠ ᠪᠠᠷ ︵ᠭᠠᠵᠢᠭᠤ) ᠢᠳᠡᠰᠢᠯᠡᠨᠡ ᠭᠡᠵᠦ ᠪᠠᠢᠳᠠᠭ ᠦᠭᠡᠢ᠂ ᠠᠷᠤ ᠠ᠋ᠴᠠ ᠨᠢ ᠬᠥᠭᠡᠭᠡᠵᠦ ᠭᠦᠢᠴᠡᠨᠡ ᠭᠡᠵᠦ ᠰᠠᠨᠠᠬᠤ ᠦᠭᠡᠢ ᠬᠡᠷᠡᠭ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠣᠳᠣ ᠰᠢᠭ᠋ ᠮᠣᠲ᠋ᠣᠷ᠂ ᠲᠡᠷᠭᠡ ᠦᠭᠡᠢ ᠶᠤᠮ ᠴᠢᠨᠢ ᠬᠣᠶᠠᠷ ᠶᠠᠪᠠᠭᠠᠨ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠮᠡᠭᠡᠨ ᠦ᠌ ᠳᠥᠷᠪᠡᠨ ᠬᠥᠯ ᠲᠡᠢ ᠦᠵᠡᠯᠴᠡᠨᠡ ᠭᠡᠰᠡᠨ ᠤᠴᠢᠷ᠃ ᠬᠡᠷᠪᠡ ᠪᠠᠴᠢᠮ ᠡᠳ᠋ᠯᠡᠬᠦ ᠬᠡᠷᠡᠭᠴᠡᠭᠡ ᠦᠭᠡᠢ ᠪᠣᠯ ᠠᠷᠤ ᠠ᠋ᠴᠠ ᠨᠢ ᠰᠠᠨᠳᠤᠷᠴᠤ ᠬᠥᠭᠡᠭᠡᠴᠡᠯᠳᠦᠬᠦ ᠬᠡᠷᠡᠭ ᠦᠭᠡᠢ᠂ ᠤᠳᠠᠭᠠᠨ ᠳ᠋ᠠᠭᠠᠨ ᠵᠢᠷᠭᠤᠭᠠ᠂ ᠳᠣᠯᠣᠭᠠᠨ ᠬᠣᠨᠣᠭ ᠶᠠᠪᠤᠭᠠᠳ ᠳᠠᠬᠢᠭᠠᠳ ᠢᠵᠢᠯᠢ ᠪᠡᠨ ᠳᠠᠭᠠᠭᠤᠯᠤᠨ ᠨᠤᠲᠤᠭ ᠤᠰᠤᠨ ᠳ᠋ᠠᠭᠠᠨ ᠪᠤᠴᠠᠭᠠᠳ ᠢᠷᠡᠳᠡᠭ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠡᠯᠴᠢᠭᠡᠷ ᠲᠡᠭᠡᠨ᠂ ᠡᠰᠡᠪᠡᠯ ᠬᠤᠳᠳᠤᠭ ᠤᠰᠤᠨ ᠳᠡᠭᠡᠷᠡ ᠪᠡᠨ ᠢᠷᠡᠴᠢᠬᠡᠭᠰᠡᠨ ᠪᠠᠢᠳᠠᠭ᠃ ᠨᠣᠣᠰᠣᠨ ᠤ᠋ ᠴᠠᠭ ᠲᠤ᠌ ᠪᠣᠯ ᠬᠠᠷᠢᠨ ᠶᠠᠪᠤᠭᠤᠯᠵᠤ ᠪᠣᠯᠬᠤ ᠦᠭᠡᠢ᠂ ᠬᠥᠮᠦᠨ ᠠᠷᠭᠠᠯᠠᠵᠤ ᠪᠠᠷᠢᠵᠤ ᠠᠪᠤᠭᠠᠳ ᠨᠡᠩ ᠢᠯᠠᠩᠭᠤᠶᠠ ᠭᠠᠨᠰᠦ ᠶ᠋ᠢᠨ ᠬᠢᠨ ᠪᠣᠯ ᠪᠠᠷᠢᠵᠤ ᠠᠪᠤᠭᠠᠳ ᠨᠣᠣᠰᠣ ᠶ᠋ᠢ ᠨᠢ ᠠᠪᠴᠢᠬᠠᠳᠠᠭ᠃ ᠲᠡᠷᠡ ᠦᠶᠡ ᠶ᠋ᠢᠨ ᠮᠠᠯᠴᠢᠨ ᠠᠢᠯ ᠳ᠋ᠤ᠌ ᠬᠡᠯᠡᠪᠡᠯ ᠶᠡᠬᠡᠬᠡᠨ ᠬᠣᠬᠢᠷᠠᠯ ᠪᠣᠯᠳᠠᠭ᠃
ᠪᠢᠳᠡᠨ ᠦ᠌ ᠠᠵᠤ ᠠᠮᠢᠳᠤᠷᠠᠯ ᠳ᠋ᠤ᠌ ᠶᠣᠰᠣᠲᠠᠢ ᠠᠴᠢ ᠲᠤᠰᠠ ᠲᠠᠢ ᠮᠠᠯ ᠪᠠᠢᠭᠰᠠᠨ᠂ ᠠᠴᠢᠶᠠᠨ ᠤ᠋ ᠶᠡᠬᠡ ᠶ᠋ᠢ ᠲᠡᠭᠦᠨ ᠳᠡᠭᠡᠷᠡ ᠠᠴᠢᠳᠠᠭ᠂ ᠠᠯᠢ ᠳᠤᠤᠭᠠᠷᠳᠠᠭ᠂ ᠪᠠᠯᠪᠠᠷᠠᠳᠠᠭ ᠶᠠᠭᠤᠮᠠ ᠶ᠋ᠢ ᠪᠦᠷ ᠲᠡᠭᠦᠨ ᠳᠡᠭᠡᠷᠡ ᠠᠴᠢᠳᠠᠭ᠂ ᠵᠠᠷᠢᠮ ᠳ᠋ᠠᠭᠠᠨ ᠵᠥᠪ ᠪᠤᠷᠤᠭᠤ ᠲᠠᠯᠠ ᠠ᠋ᠴᠠ ᠨᠢ ᠵᠡᠭᠦᠭᠰᠡᠭᠡᠷ᠂ ᠨᠡᠮᠡᠭᠰᠡᠭᠡᠷ ᠪᠠᠢᠲᠠᠯᠠ ᠠᠴᠢᠶᠠ ᠨᠢ ᠲᠤᠩ ᠬᠦᠨᠳᠦ ᠪᠣᠯᠳᠠᠭ᠃ ᠲᠡᠷᠡ ᠴᠠᠭ ᠲᠤ᠌ ᠬᠣᠨᠢ ᠢᠮᠠᠭᠠ ᠶᠡᠬᠡ ᠲᠥᠪᠯᠡᠷᠡᠩᠭᠦᠢ ᠬᠤᠷᠠᠭᠠᠯᠠᠵᠤ ᠢᠰᠢᠭᠡᠯᠡᠳᠡᠭ᠂ ᠢᠰᠢᠭᠡ ᠬᠤᠷᠠᠭᠠ ᠪᠠᠨ ᠠᠴᠢᠬᠤ ᠭᠡᠵᠦ ᠵᠠᠪᠠᠯ ᠲᠡᠮᠡᠭᠡ ᠬᠥᠲᠥᠯᠵᠦ ᠶᠠᠪᠤᠬᠤ ᠬᠡᠷᠡᠭᠲᠡᠢ ᠪᠣᠯᠳᠠᠭ᠂ ᠡᠨᠡ ᠦᠶᠡ ᠳ᠋ᠦ᠍ ᠰᠣᠩᠭᠣᠯᠲᠠ ᠦᠭᠡᠢ ᠳ᠋ᠠᠯᠢᠩᠪᠣᠷᠤ ᠯᠠ ᠪᠠᠢᠳᠠᠭ᠃ ᠮᠠᠯ ᠬᠠᠷᠢᠭᠤᠯᠬᠤ ᠳ᠋ᠠᠭᠠᠨ ᠬᠥᠲᠥᠯᠦᠭᠡᠳ ᠶᠠᠪᠤᠬᠤ ᠳ᠋ᠤ᠌ ᠬᠠᠵᠠᠭᠤ ᠪᠠᠷ ᠢᠳᠡᠭᠡᠳ ᠶᠠᠪᠤᠳᠠᠭ᠂ ᠰᠠᠶᠢ ᠭᠠᠷᠤᠭᠰᠠᠨ ᠬᠤᠷᠠᠭᠠ ᠢᠰᠢᠭᠡ ᠶ᠋ᠢ ᠤᠭᠤᠲᠠᠨ ᠳ᠋ᠤ᠌ ᠬᠢᠭᠡᠳ ᠠᠴᠢᠬᠤ ᠳ᠋ᠤ᠌ ᠬᠤᠷᠠᠭᠠ ᠢᠰᠢᠭᠡ ᠪᠠᠷᠬᠢᠷᠠᠵᠤ ᠲᠡᠯᠴᠢᠯᠡᠵᠦ ᠪᠠᠢᠳᠠᠭ ᠪᠣᠯᠪᠠᠴᠤ ᠲᠡᠷᠡ ᠠᠵᠢᠭ ᠴᠤ᠌ ᠦᠭᠡᠢ ᠪᠠᠢᠳᠠᠭ᠂ ᠵᠠᠷᠢᠮ ᠳ᠋ᠠᠭᠠᠨ ᠪᠤᠷᠠᠨᠲᠠᠭ ᠢ᠋ ᠨᠢ ᠰᠢᠭᠤᠭᠠᠳ ᠲᠠᠯᠪᠢᠴᠢᠬᠠᠳᠠᠭ᠂ ᠢᠰᠢᠭᠡ᠂ ᠬᠤᠷᠠᠭᠠ ᠪᠠᠨ ᠨᠢᠷᠤᠭᠤᠨ ᠳ᠋ᠠᠭᠠᠨ ᠡᠭᠦᠷᠦᠭᠡᠳ ᠮᠠᠯ ᠤ᠋ᠨ ᠠᠷᠤ ᠠ᠋ᠴᠠ ᠰᠠᠢᠬᠠᠨ ᠳᠠᠭᠠᠭᠠᠳ ᠢᠳᠡᠰᠢᠯᠡᠭᠡᠳ ᠶᠠᠪᠤᠳᠠᠭ᠂ ᠵᠠᠷᠢᠮ ᠳ᠋ᠠᠭᠠᠨ ᠮᠠᠯ ᠠᠩᠭᠢᠷᠴᠤ ᠲᠠᠰᠤᠷᠠᠭᠰᠠᠨ ᠶᠤᠮ ᠤᠤ ᠡᠰᠡᠪᠡᠯ ᠮᠠᠯ ᠤ᠋ᠨ ᠲᠦᠷᠦᠭᠦᠴᠢ ᠶ᠋ᠢ ᠪᠤᠴᠠᠭᠠᠵᠤ ᠬᠥᠮᠦᠨ ᠬᠣᠯᠠ ᠰᠢᠭ᠋ ᠵᠠᠢᠳᠠᠬᠤ ᠳ᠋ᠤ᠌ ᠪᠤᠷᠠᠨᠲᠠᠭ ᠢ᠋ᠶ᠋ᠠᠷ ᠨᠢ ᠮᠣᠷᠴᠢᠯᠠᠭᠠᠳ(ᠪᠣᠭᠣᠴᠢᠬᠤ ᠮᠥᠷᠲᠡᠭᠡᠨ ᠲᠤᠱᠠᠬᠤ) ᠲᠠᠯᠪᠢᠳᠠᠭ᠃ ᠪᠢ ᠲᠡᠭᠦᠨ ᠢ᠋ ᠡᠳᠦᠷ ᠲᠡᠭᠡᠨ ᠮᠠᠯ ᠳ᠋ᠤ᠌ ᠳᠠᠭᠠᠭᠤᠯᠤᠭᠠᠳ᠂ ᠬᠥᠲᠥᠯᠦᠭᠡᠳ ᠢᠳᠡᠵᠦ ᠴᠠᠳᠬᠤ ᠦᠭᠡᠢ ᠪᠠᠢᠬᠠ ᠭᠡᠵᠦ ᠶᠡᠬᠡ ᠦᠷᠦ ᠡᠪᠡᠳᠳᠡᠭ ᠪᠠᠢᠭᠰᠠᠨ᠂ ᠲᠡᠭᠡᠭᠡᠳ ᠪᠤᠲᠠᠨ ᠳᠣᠲᠣᠷᠠ ᠮᠠᠯ ᠢᠳᠡᠭᠰᠡᠨ ᠦᠭᠡᠢ ᠰᠣᠷᠭᠣᠭ ᠡᠪᠡᠰᠦ ᠪᠠᠢᠪᠠᠯ ᠲᠡᠭᠦᠵᠦ ᠲᠡᠭᠦᠨ ᠳ᠋ᠡᠭᠡᠨ ᠢᠳᠡᠭᠦᠯᠳᠡᠭ᠃ ᠪᠤᠰᠤᠳ ᠲᠡᠮᠡᠭᠡ ᠬᠡᠳᠦᠢᠪᠡᠷ ᠠᠴᠢᠵᠤ ᠤᠨᠤᠬᠤ ᠳ᠋ᠤ᠌ ᠨᠣᠮᠣᠬᠠᠨ ᠪᠠᠢᠳᠠᠭ ᠪᠣᠯᠪᠠᠴᠤ ᠬᠠᠷᠢᠨ ᠮᠠᠢᠯᠠᠵᠤ ᠪᠠᠷᠬᠢᠷᠠᠭᠰᠠᠨ ᠢᠰᠢᠭᠡ᠂ ᠬᠤᠷᠠᠭᠠ ᠠᠴᠢᠭᠠᠳ ᠮᠠᠯ ᠳᠠᠭᠠᠭᠤᠯᠵᠤ ᠢᠳᠡᠭᠡᠳ ᠶᠠᠪᠤᠳᠠᠭ ᠲᠡᠮᠡᠭᠡ ᠲᠤᠩ ᠬᠣᠪᠣᠷ ᠪᠠᠢᠭᠰᠠᠨ᠃
ᠥᠭᠡᠷᠡ ᠠᠢᠯ ᠤ᠋ᠳ ᠤ᠋ᠨ ᠲᠡᠮᠡᠭᠡ ᠵᠤᠨ ᠪᠣᠯᠬᠤ ᠳ᠋ᠤ᠌ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠭᠠᠳ ᠨᠠᠮᠤᠷ ᠣᠷᠣᠢ ᠪᠣᠯᠬᠤ ᠳ᠋ᠤ᠌ ᠬᠤᠷᠢᠶᠠᠵᠤ ᠣᠯᠵᠤ ᠠᠪᠤᠨᠠ ᠭᠡᠵᠦ ᠶᠡᠬᠡ ᠤᠴᠢᠷ ᠪᠣᠯᠳᠠᠭ᠂ ᠬᠥᠮᠦᠨ ᠳ᠋ᠦ᠍ ᠰᠤᠷᠠᠭ ᠵᠠᠩᠭᠢ ᠲᠠᠯᠪᠢᠵᠤ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠬᠠᠮᠵᠢᠯᠴᠠᠵᠤ ᠳᠡᠮᠵᠢᠯᠴᠡᠵᠦ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠬᠠᠷᠢᠯᠴᠠᠨ ᠣᠯᠵᠤ ᠥᠭᠳᠡᠭ᠃ ᠬᠡᠳᠦᠬᠡᠨ ᠲᠡᠮᠡᠭᠡ ᠲᠡᠢ ᠠᠢᠯ ᠪᠠᠢᠭᠠᠳ ᠵᠠᠷᠢᠮ ᠲᠡᠮᠡᠭᠡ ᠪᠡᠨ ᠡᠯᠡᠰᠦᠨ ᠵᠠᠭᠠᠭ ᠠ᠋ᠴᠠ ᠣᠯᠵᠤ᠂ ᠵᠠᠷᠢᠮ ᠢ᠋ ᠨᠢ ᠥᠭᠡᠷᠡ ᠪᠠᠷᠢᠭᠠᠳᠠ᠂ ᠭᠦᠩᠱᠧ ᠡᠴᠡ ᠤᠪᠤᠷᠤᠭᠤ ᠰᠤᠪᠤᠷᠤᠭᠤ (ᠤᠷᠢᠳᠠ ᠬᠣᠢᠨᠠ ) ᠣᠯᠵᠤ ᠢᠷᠡᠳᠡᠭ᠂ ᠭᠡᠪᠡᠴᠦ ᠮᠠᠨ ᠤ᠋ ᠬᠡᠳᠦᠨ ᠲᠡᠮᠡᠭᠡ ᠲᠡᠢᠮᠦ ᠪᠢᠰᠢ ᠶᠡᠷᠦ ᠡᠴᠡ ᠰᠠᠯᠵᠤ ᠪᠤᠲᠠᠷᠠᠳᠠᠭ ᠦᠭᠡᠢ ᠬᠡᠵᠢᠶᠡᠳᠡ ᠬᠠᠮᠲᠤ ᠪᠠᠢᠳᠠᠭ᠂ ᠨᠠᠮᠤᠷ ᠪᠣᠯᠵᠤ ᠰᠦᠯᠡ ᠭᠠᠷᠴᠤ (ᠡᠪᠡᠰᠦ ᠰᠢᠷᠠᠯᠠᠬᠤ ) ᠲᠡᠮᠡᠭᠡ ᠬᠤᠷᠢᠶᠠᠬᠤ ᠳ᠋ᠤ᠌ ᠲᠡᠭᠡᠵᠦ ᠬᠠᠢᠬᠤ ᠤᠴᠢᠷ ᠪᠠᠷᠤᠭ ᠪᠠᠢᠳᠠᠭ ᠦᠭᠡᠢ᠂ ᠵᠢᠯ ᠪᠣᠯᠭᠠᠨ ᠤ᠋ ᠨᠠᠮᠤᠷ ᠣᠷᠣᠢ ᠰᠢᠭ᠋ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠯᠡ ᠪᠡᠯᠴᠢᠭᠡᠷ ᠲᠡᠭᠡᠨ ᠪᠤᠶᠤ ᠡᠪᠦᠯᠵᠢᠶᠡᠨ ᠳ᠋ᠡᠭᠡᠨ ᠡᠰᠡᠪᠡᠯ ᠤᠰᠤᠨ ᠳ᠋ᠠᠭᠠᠨ ᠪᠥᠭᠡᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠤᠴᠠᠭᠠᠳ ᠢᠷᠡᠴᠢᠬᠡᠭᠰᠡᠨ ᠪᠠᠢᠳᠠᠭ᠃ ᠡᠨᠡ ᠨᠢ ᠮᠥᠨ ᠳ᠋ᠠᠯᠢᠩᠪᠣᠷᠤ ᠶ᠋ᠢᠨ ᠲᠣᠯᠣᠭᠠᠢᠴᠢ ᠦᠢᠯᠡᠳᠦᠯ ᠦ᠋ᠨ ᠠᠴᠢ ᠭᠠᠪᠢᠶᠠ ᠶᠤᠮ᠃ ᠪᠦᠬᠦ ᠬᠣᠲᠠᠨ ᠤ᠋ ᠲᠡᠮᠡᠭᠡ ᠲᠡᠭᠦᠨ ᠡᠴᠡ ᠶᠡᠷᠦ ᠰᠠᠯᠳᠠᠭ ᠦᠭᠡᠢ ᠲᠡᠭᠦᠨ ᠢ᠋ ᠪᠡᠨ ᠳᠠᠭᠠᠳᠠᠭ᠃ ᠶᠠᠭᠠᠬᠢᠭᠠᠳ ᠡᠢᠮᠦ ᠰᠡᠳᠬᠢᠯ ᠨᠢᠭᠡᠲᠡᠢ ᠪᠠᠢᠳᠠᠭ ᠢ᠋ ᠪᠢ ᠪᠠᠰᠠ ᠪᠣᠳᠣᠭᠠᠳ ᠣᠯᠳᠠᠭ ᠦᠭᠡᠢ᠃
ᠵᠠ ᠲᠡᠭᠡᠭᠡᠳ ᠳ᠋ᠠᠯᠢᠩᠪᠣᠷᠤ ᠭᠡᠵᠦ ᠡᠢᠮᠦ ᠯᠡ ᠠᠴᠢ ᠲᠤᠰᠠ ᠲᠠᠢ ᠮᠠᠯ ᠪᠠᠢᠭᠰᠠᠨ᠂ ᠴᠣᠬᠣᠮ ᠴᠤ᠌ ᠢᠵᠢᠯᠢ ᠳ᠋ᠡᠭᠡᠨ ᠡᠭᠡᠯᠢ ᠲᠡᠢ ᠡᠵᠡᠨ ᠳ᠋ᠡᠭᠡᠨ ᠢᠪᠡᠭᠡᠯ ᠲᠡᠢ ᠪᠡᠶᠡ ᠵᠢᠰᠦ ᠪᠡᠷ ᠥᠨᠢᠷ ᠪᠠᠶᠠᠯᠢᠭ ᠰᠠᠢᠬᠠᠨ ᠲᠡᠮᠡᠭᠡ᠂ ᠲᠡᠢᠮᠦ ᠡᠴᠡ ᠮᠢᠨᠦ ᠰᠠᠨᠠᠭᠠᠨ ᠠ᠋ᠴᠠ ᠶᠡᠷᠦ ᠭᠠᠷᠳᠠᠭ ᠦᠭᠡᠢ᠂ ᠣᠳᠣ ᠬᠦᠷᠲᠡᠯᠡ ᠵᠠᠷᠢᠮ ᠳ᠋ᠠᠭᠠᠨ ᠵᠡᠭᠦᠳᠦᠨ ᠳ᠋ᠦ᠍ ᠣᠷᠣᠵᠤ ᠨᠢᠳᠦᠨ ᠳ᠋ᠦ᠍ ᠦᠵᠡᠭᠳᠡᠬᠦ ᠰᠢᠭ ᠪᠣᠯᠳᠠᠭ᠃ ᠲᠡᠭᠡᠭᠡᠳ ᠲᠡᠭᠦᠨ ᠢ᠋ ᠪᠡᠨ ᠪᠣᠳᠣᠬᠤ ᠳ᠋ᠤ᠌ ᠶᠠᠭ ᠥᠪᠡᠷ ᠦ᠋ᠨ ᠨᠤᠲᠤᠭ ᠤᠰᠤ ᠮᠢᠨᠢ ᠦᠵᠡᠭᠳᠡᠬᠦ ᠰᠢᠭ᠂ ᠡᠪᠡᠰᠦ ᠤᠷᠭᠤᠮᠠᠯ ᠨᠢ ᠦᠨᠦᠷᠲᠦᠭᠳᠡᠬᠦ ᠰᠢᠭ᠂ ᠪᠠᠭᠠ ᠶ᠋ᠢᠨ ᠨᠠᠰᠤᠨ ᠳ᠋ᠠᠭᠠᠨ ᠳᠠᠬᠢᠭᠠᠳ ᠣᠷᠣᠭᠰᠠᠨ ᠰᠢᠭ᠋ ᠠᠭᠤᠵᠢᠮ ᠪᠠᠶᠠᠷᠯᠠᠩᠭᠤᠢ ᠰᠠᠨᠠᠭᠳᠠᠵᠤ ᠪᠠᠶᠠᠰᠤᠯ ᠲᠥᠷᠥᠭᠡᠳ ᠪᠠᠢᠳᠠᠭ᠃
ᠪᠢ ᠨᠤᠲᠤᠭ ᠠ᠋ᠴᠠ ᠪᠠᠨ ᠰᠠᠯᠵᠤ ᠵᠢᠷᠭᠤᠭᠠᠨ ᠵᠢᠯ ᠴᠡᠷᠢᠭ ᠲᠦ᠍ ᠶᠠᠪᠤᠭᠰᠠᠨ᠂ ᠡᠨᠡ ᠳᠤᠮᠳᠠ ᠨᠢ ᠴᠢᠯᠥᠭᠡ ᠪᠡᠷ ᠨᠢᠭᠡ ᠤᠳᠠᠭᠠ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠵᠤᠨ ᠤ᠋ ᠤᠯᠠᠷᠢᠯ ᠪᠣᠯᠬᠣᠷ ᠲᠡᠷᠡ ᠲᠡᠮᠡᠭᠡ ᠪᠡᠨ ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ᠂ ᠰᠡᠭᠦᠯᠡᠷ ᠴᠡᠷᠢᠭ ᠡᠴᠡ ᠬᠠᠯᠠᠭᠳᠠᠭᠠᠳ ᠪᠤᠴᠠᠵᠤ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠬᠦ ᠳ᠋ᠦ᠍ ᠨᠢᠭᠡᠨᠲᠡ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠭᠰᠠᠨ᠃ ᠠᠷᠭᠠ ᠴᠤ᠌ ᠦᠭᠡᠢ ᠳᠡ! ᠲᠡᠮᠡᠭᠡ ᠬᠣᠷᠢᠨ ᠬᠡᠳᠦ ᠬᠦᠷᠦᠨᠡ ᠭᠡᠵᠦ ᠰᠠᠢᠨ ᠤᠳᠤᠮ ᠤ᠋ᠨ ᠲᠡᠮᠡᠭᠡ ᠪᠠᠢᠵᠠᠢ᠃ ᠬᠠᠭᠤᠴᠢᠨ ᠦᠭᠡᠨ ᠳ᠋ᠦ᠍ 《ᠮᠠᠯ ᠡᠵᠡᠨ ᠢ᠋ᠶ᠋ᠡᠨ》 ᠭᠡᠳᠡᠭ᠂ ᠡᠢᠮᠦ ᠬᠠᠴᠢᠨ ᠭᠠᠢᠬᠠᠯᠲᠠᠢ ᠮᠠᠯ ᠨᠢ ᠬᠠᠰᠢᠷ ᠭᠠᠪᠰᠢᠭᠠᠢ ᠮᠠᠯᠴᠢᠨ ᠤ᠋ ᠭᠠᠷ ᠠ᠋ᠴᠠ ᠯᠠ ᠭᠠᠷᠳᠠᠭ ᠪᠠᠢᠬᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠵᠢᠩᠯᠢᠬᠤᠸᠠᠷ᠂ ᠬᠡᠯᠡᠰᠣᠶᠣᠯ᠂ ᠰᠡᠬᠡᠭᠡᠷᠡᠯ᠂ ᠳᠡᠭᠦᠦᠵᠠᠶᠠᠭᠠ᠂ ᠭᠠᠷᠮᠠ᠂ ᠰᠡᠴᠡᠨᠴᠢᠮᠡᠭ
ᠶᠡᠷᠦᠩᠬᠡᠢ ᠬᠢᠨᠠᠭᠴᠢ᠄ ᠨᠤᠮᠤᠴᠢᠨ ᠪᠢᠯᠢᠭ᠂ᠣᠳᠬᠠᠨᠰᠣᠠ