ᠢᠷᠭᠠᠤ ᠨᠠᠢᠷᠠᠭᠴᠢ ᠮ᠂ ᠴᠠᠳᠠᠨᠳᠣᠷᠵᠢ ᠳᠤ - ᠸᠠᠴᠢᠷᠪᠠᠲᠤ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Яргуу найрагч М᠂ Цэдэндоржид - Очирбатын Дашбалбар
437ᠢᠷᠭᠠᠤ ᠨᠠᠢᠷᠠᠭᠴᠢ ᠮ᠂ ᠴᠠᠳᠠᠨᠳᠣᠷᠵᠢ ᠳᠤ
ᠵᠣᠪᠠᠯᠠᠩ ᠳ᠋ᠠᠭᠠᠨ ᠲᠡᠭᠦᠷᠲᠦᠭᠡ ᠦᠭᠡᠢ ᠴᠦ᠍ ᠠᠷᠢᠬᠢᠨ ᠳ᠋ᠠᠭᠠᠨ ᠲᠡᠭᠦᠷᠲᠦᠵᠦ ᠰᠢᠨᠠᠯᠤᠭᠰᠠᠨ
ᠦᠰᠦ ᠰᠠᠭᠠᠯ ᠨᠢ ᠤᠷᠭᠤᠭᠰᠠᠨ ᠦᠭᠡ ᠳᠠᠭᠤ ᠴᠥᠭᠡᠨ ᠲᠡᠢ ᠡᠷᠡ
ᠦᠶᠡ ᠦᠶᠡ ᠶᠡᠬᠡ ᠬᠣᠲᠠ ᠳ᠋ᠤ᠌ ᠮᠢᠨᠢ ᠠᠯᠬᠤᠯᠠᠵᠤ ᠪᠠᠷᠠᠭᠤᠨ ᠵᠦᠭ ᠡᠴᠡ ᠢᠷᠡᠳᠡᠭ ᠰᠠᠨ
ᠬᠡᠨ ᠨᠢᠭᠡ ᠰᠠᠢᠨ ᠰᠠᠨᠠᠭᠠᠲᠤ ᠨᠢ ᠬᠠᠯᠠᠭᠤᠨ ᠬᠣᠭᠣᠯᠠ ᠥᠭᠴᠦ ᠰᠢᠷᠠ ᠶ᠋ᠢ ᠨᠢ ᠲᠠᠢᠯᠬᠤ ᠳ᠋ᠤ᠌
ᠬᠡᠯᠡ ᠶᠠᠷᠢᠶᠠ ᠨᠢ ᠴᠡᠭᠴᠡᠷᠡᠵᠦ ᠢᠯᠳᠠᠮ ᠵᠥᠭᠡᠯᠡᠨ ᠪᠣᠯᠤᠭᠠᠳ
ᠠᠶᠠᠯᠭᠤ ᠲᠠᠩᠰᠤᠭ ᠨᠠᠢᠷᠠᠭ ᠠᠷᠠᠳ ᠤ᠋ᠨ ᠴᠡᠴᠡᠨ ᠤᠬᠠᠭᠠᠨ
ᠠᠶᠠᠨᠳᠠᠭᠠᠨ ᠲᠡᠭᠦᠨ ᠦ᠌ ᠴᠡᠭᠡᠵᠢᠨ ᠡᠴᠡ ᠣᠨᠳᠣᠷᠴᠤ ᠰᠣᠨᠣᠰᠤᠭᠰᠠᠨ ᠪᠦᠬᠦᠨ ᠪᠢᠰᠢᠷᠡᠨᠡ
ᠶᠠᠪᠤᠭᠠᠳ ᠥᠭᠭᠦᠭᠰᠡᠨ ᠬᠣᠢᠨᠠ ᠨᠢ ᠬᠡᠨ ᠬᠥᠮᠦᠨ ᠦᠭᠡᠢ ᠱᠠᠭᠰᠢᠵᠤ
ᠢᠷᠠᠭᠤ ᠨᠠᠢᠷᠠᠭᠴᠢ ᠲᠡᠭᠦᠨ ᠢ᠋《 ᠬᠡᠷᠡᠭ ᠲᠡᠢ ᠬᠥᠮᠦᠨ 》 ᠭᠡᠵᠦ ᠮᠠᠭᠲᠠᠨᠠ
ᠦᠦᠷ ᠴᠠᠢᠲᠠᠯᠠ ᠨᠥᠭᠥᠭᠡᠬᠢ ᠨᠢ ᠨᠣᠢᠷ ᠬᠠᠭᠠᠰᠯᠠᠨ ᠰᠠᠭᠤᠵᠤ
ᠦᠨᠡᠨ ᠲᠡᠦᠬᠡ ᠂ ᠭᠦᠨ ᠤᠬᠠᠭᠠᠨ ᠲᠤᠭᠤᠷᠪᠢᠵᠤ ᠨᠠᠷᠠ ᠶ᠋ᠢ ᠤᠭᠲᠤᠨᠠ
ᠥᠷᠯᠥᠭᠡᠭᠦᠷ ᠵᠢᠭᠠᠬᠠᠨ ᠳᠤᠭᠭᠢᠵᠤ ᠦᠳᠡ ᠳᠤᠮᠳᠠ ᠬᠣᠲᠠ ᠣᠷᠣᠵᠤ ᠢᠷᠡᠨᠡ
ᠥᠷᠪᠥᠢᠭᠰᠡᠨ ᠰᠢᠨᠠᠯᠤᠭᠰᠠᠨ ᠲᠡᠭᠦᠨ ᠢ᠋ ᠡᠮᠡᠰ ᠥᠬᠢᠳ ᠠᠲᠠᠯᠠᠨᠠ
ᠡᠷᠡᠭᠡ ᠦᠭᠡᠢ ᠪᠠᠶᠠᠴᠤᠤᠯ ᠳᠡᠭᠡᠷᠡᠩᠭᠦᠢ ᠬᠠᠷᠠᠴᠠ ᠪᠠᠷ ᠣᠯᠠᠨ ᠳ᠋ᠠᠭᠠᠨ ᠭᠢᠰᠬᠢᠵᠦ
ᠡᠷᠬᠢᠮᠰᠦᠭ ᠳᠡᠭᠡᠳᠦᠰ ᠳᠡᠷᠭᠡᠳᠡᠭᠦᠷ ᠨᠢ ᠰᠠᠯᠬᠢ ᠲᠠᠲᠠᠭᠤᠯᠤᠨ ᠥᠩᠭᠡᠷᠡᠨᠡ
ᠲᠠᠩᠬᠠᠢ ᠪᠠᠨᠳᠢ ᠨᠠᠷ ᠴᠢᠯᠠᠭᠤ ᠰᠢᠳᠡᠵᠦ ᠳᠣᠭᠣᠭᠢᠯᠠᠨᠠ
《ᠲᠠ ᠨᠠᠷ ᠬᠠᠷᠠᠮᠰᠠᠬᠤ ᠴᠠᠭ ᠢᠷᠡᠨᠡ ᠳᠠ 》 ᠭᠡᠵᠦ ᠲᠡᠷᠡ ᠭᠤᠨᠢᠭᠯᠠᠨᠠ
ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠳ᠋ᠦ᠍ ᠵᠤᠨ ᠤ᠋ ᠬᠤᠪᠴᠠᠰᠤ ᠲᠠᠢ ᠱᠣᠭᠰᠢᠨᠠ
ᠡᠳᠦᠷ ᠦ᠋ᠨ ᠤᠷᠲᠤ ᠳ᠋ᠤ᠌ ᠵᠦᠰᠦᠮ ᠲᠠᠯᠬᠠ ᠬᠠᠷᠠ ᠴᠠᠢ ᠲᠠᠢ ᠨᠥᠬᠥᠷᠯᠡᠨᠡ
ᠨᠠᠩᠴᠢᠳ ᠣᠯᠳᠠᠪᠠᠯ ᠬᠦᠷᠲᠡᠵᠦ ᠨᠠᠪᠰᠠᠢᠲᠠᠯᠠ ᠠᠷᠢᠬᠢᠳᠠᠵᠤ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠤᠮᠠᠷᠲᠠᠨᠠ
ᠨᠠᠷᠠᠨ ᠵᠢᠷᠭᠠᠬᠤ ᠳ᠋ᠤ᠌ ᠲᠣᠯᠣᠭᠠᠢᠲᠤ ᠳ᠋ᠠᠬᠢ ᠰᠢᠷᠠ ᠪᠠᠢᠰᠢᠩ ᠳ᠋ᠠᠭᠠᠨ ᠣᠴᠢᠨᠠ
ᠥᠷᠥᠭᠡ ᠳᠦᠭᠦᠷᠡᠩ ᠨᠣᠮ ᠢ᠋ᠶ᠋ᠠᠨ ᠤᠩᠰᠢᠵᠤ ᠥᠭᠡᠷᠡ ᠨᠥᠬᠥᠷ ᠦᠭᠡᠢ ᠰᠡᠭᠦᠳᠡᠷ ᠲᠡᠢ ᠪᠡᠨ ᠭᠡᠶᠦᠷᠡᠨᠡ
ᠥᠷᠯᠥᠭᠡ ᠪᠣᠯᠲᠠᠯᠠ ᠪᠠᠳᠠᠭ ᠱᠠᠳ ᠥᠷᠥᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠷᠢᠭᠤᠰᠬᠠᠨᠠ
ᠣᠨ ᠵᠢᠯ ᠡᠢᠨ ᠥᠩᠭᠡᠷᠡᠭᠰᠡᠭᠡᠷ ᠰᠡᠳᠬᠢᠯ ᠦ᠋ᠨ ᠬᠤᠷᠠ ᠪᠠᠷ ᠲᠡᠳᠬᠦᠭᠰᠡᠨ
ᠣᠨᠴᠠ ᠶ᠋ᠢᠨ ᠰᠠᠢᠬᠠᠨ ᠴᠡᠴᠡᠷᠯᠢᠭ ᠨᠣᠮ ᠤ᠋ᠳ ᠨᠢ ᠠᠮᠢᠯᠠᠨ ᠠᠬᠤᠢ ᠳ᠋ᠤ᠌
《ᠠᠮᠢᠨ ᠳ᠋ᠠᠭᠠᠨ ᠠᠷᠴᠢᠭᠠ ᠦᠭᠡᠢᠬᠡᠨ ᠶᠠᠪᠤᠭᠰᠠᠨ ᠨᠠᠮᠠᠶ᠋ᠢ ᠠᠭᠤᠴᠢᠯᠠᠭᠠᠷᠠᠢ
ᠠᠮᠢᠳᠤᠷᠠᠯ ᠮᠢᠨᠢ ᠲᠠ ᠨᠠᠮᠠᠶ᠋ᠢ ᠡᠢᠮᠦ ᠪᠣᠯᠭᠠᠭᠰᠠᠨ ᠴᠤ᠌ ᠪᠠᠶᠠᠷᠯᠠᠯᠠ
᠁ ᠢᠩᠭᠢᠭᠡᠳ ᠪᠢ ᠦᠬᠦᠯᠡ ᠁ ᠬᠡᠲᠦᠷᠬᠡᠢ ᠨᠣᠮᠣᠢ ᠶᠠᠪᠤᠭᠰᠠᠨ ᠢ᠋ ᠮᠢᠨᠢ ᠥᠷᠥᠰᠢᠶᠡ
ᠢᠨᠢᠶᠡᠬᠦ ᠮᠢᠨᠢ ᠴᠥᠭᠡᠷᠡᠭᠰᠡᠭᠡᠷ ᠭᠠᠪ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠦᠯᠡᠲᠡᠯᠡ ᠪᠢ
ᠣᠷᠣᠢ ᠶ᠋ᠢᠨ ᠨᠠᠷᠠᠨ ᠵᠢᠷᠭᠠᠯᠠ ᠁ ᠣᠳᠣ ᠪᠣᠯᠤᠯᠠ ᠨᠣᠮ ᠤ᠋ᠳ ᠮᠢᠨᠢ ᠪᠠᠶᠠᠷᠲᠠᠢ
ᠣᠷᠴᠢᠯᠠᠩ ᠲᠠᠢ ᠲᠣᠭᠠᠴᠠᠭᠠ ᠳᠠᠭᠤᠰᠤᠭᠰᠠᠨ ᠭᠠᠭᠴᠠ ᠬᠤᠨᠳᠠᠭᠠ ᠬᠥᠷᠲᠡᠶᠡ ! 》
ᠰᠢᠷᠦᠭᠦᠨ ᠬᠠᠲᠠᠭᠤ ᠴᠤ᠌ ᠭᠡᠰᠡᠨ ᠠᠮᠢᠳᠤᠷᠠᠯ ᠮᠢᠨᠢ ᠴᠢᠮᠠᠶ᠋ᠢ ᠬᠠᠢᠷᠠᠯᠠᠭᠰᠠᠨ ᠪᠢ
ᠰᠢᠨᠡ ᠦᠶᠡ ᠶ᠋ᠢᠨ ᠬᠢᠨ ᠳ᠋ᠦ᠍ ᠨᠣᠮ ᠢ᠋ ᠮᠢᠨᠢ ᠰᠢᠯᠦᠭ ᠢ᠋ ᠮᠢᠨᠢ ᠥᠭᠭᠦᠭᠡᠷᠡᠢ᠁
᠁ ᠳᠠᠭᠤᠰᠲᠠᠯᠠ ᠤᠤᠭᠤᠭᠰᠠᠨ ᠬᠤᠨᠳᠠᠭᠠᠨ ᠳ᠋ᠤ᠌ ᠳᠤᠰᠤᠯ ᠨᠢᠯᠪᠤᠰᠤ ᠤᠨᠠᠯᠠ
《ᠳᠤᠭᠤᠷᠠ ᠥᠨᠳᠥᠷᠯᠡᠪᠡ 》 ᠭᠡᠵᠦ ᠥᠪᠡᠷ ᠲᠡᠭᠡᠨ ᠲᠡᠷᠡ ᠰᠢᠪᠡᠨᠡᠯᠡ ᠁