ᠴᠢᠨᠣᠠ ᠪᠠ ᠳᠣᠯᠣᠭᠠᠨ ᠢᠰᠢᠭᠡЧоно ба долоон ишиг-chono ba doloon ishig
582ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠡᠷᠬᠡ ᠲᠠᠩᠬᠢᠯ ᠳᠣᠯᠣᠭᠠᠨ ᠢᠰᠢᠭᠡ ᠲᠡᠢ ᠡᠶᠡᠯᠳᠡᠭ ᠰᠠᠢᠬᠠᠨ ᠠᠭᠠᠰᠢᠲᠠᠢ ᠨᠢᠭᠡᠨ ᠢᠮᠠᠭᠠ ᠪᠠᠢᠵᠠᠢ᠃ ᠲᠡᠭᠦᠨ ᠳ᠋ᠦ᠍ ᠨᠢᠯᠬᠠ ᠬᠣᠩᠭᠣᠷ ᠢᠰᠢᠭᠡ ᠨᠦ᠍ᠭᠦᠳ ᠡᠴᠡ ᠨᠢ ᠥᠪᠡᠷ ᠨᠠᠨᠳᠢᠨ ᠡᠷᠳᠡᠨᠢ ᠦᠭᠡᠢ ᠭᠡᠨᠡ᠃
ᠢᠮᠠᠭᠠ ᠨᠢᠭᠡᠨ ᠤᠳᠠᠭᠠ ᠡᠪᠡᠰᠦᠨ ᠦ᠌ ᠰᠢᠮᠡᠲᠡᠢ᠂ ᠤᠰᠤᠨ ᠤ᠋ ᠲᠤᠩᠭᠠᠯᠠᠭ ᠲᠤ᠌ ᠢᠳᠡᠭᠡᠰᠢᠯᠡᠬᠦ ᠪᠡᠷ ᠶᠠᠪᠤᠬᠤ ᠳ᠋ᠠᠭᠠᠨ ᠢᠰᠢᠭᠡ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠳᠠᠭᠤᠳᠠᠭᠠᠳ᠄
– ᠡᠩᠬᠦᠷᠡᠢ ᠦᠷᠡᠰ ᠮᠢᠨᠢ ᠡᠵᠢ ᠨᠢ ᠶᠠᠪᠤᠯᠠ᠃ ᠬᠡᠦᠬᠡᠳ ᠦ᠋ᠳ ᠮᠢᠨᠢ ᠴᠢᠨᠣᠠ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠭᠠᠷᠠᠢ᠃ ᠠᠷᠢᠶᠠᠲᠠᠨ ᠴᠢᠨᠣᠠ ᠣᠷᠣᠭᠠᠳ ᠯᠠ ᠢᠷᠡᠪᠡᠯ ᠠᠷᠠᠰᠤ ᠲᠠᠢ ᠦᠰᠦᠲᠡᠢ ᠴᠢᠨᠢ ᠵᠠᠯᠭᠢᠴᠢᠬᠠᠨᠠ ᠰᠢᠦ᠃ ᠬᠣᠣᠷᠯᠠᠯ ᠲᠠᠢ ᠲᠡᠷᠡ ᠠᠮᠢᠲᠠᠨ ᠶᠠᠮᠠᠷ ᠴᠤ᠌ ᠳᠦᠷᠢ ᠳ᠋ᠦ᠍ ᠬᠤᠪᠢᠷᠠᠴᠢᠬᠠᠭᠰᠠᠨ ᠪᠠᠢᠵᠤ ᠮᠡᠳᠡᠨᠡ᠃ ᠬᠠᠭᠤᠷᠲᠠᠪᠠ ᠠ! ᠲᠡᠷᠡ ᠬᠠᠬᠢᠷ ᠪᠦᠳᠦᠭᠦᠨ ᠳᠠᠭᠤ ᠲᠠᠢ᠂ ᠬᠠᠷᠠ ᠰᠠᠷᠠᠯ ᠬᠥᠯ ᠲᠡᠢ ᠭᠡᠳᠡᠭ ᠢ᠋ ᠲᠠ ᠨᠠᠷ ᠮᠡᠳᠡᠨᠡ ᠰᠢᠦ ᠳᠡ ᠭᠡᠵᠦ ᠬᠡᠯᠡᠵᠡᠢ᠃
ᠲᠡᠭᠡᠲᠡᠯᠡ ᠢᠰᠢᠭᠡ ᠨᠦ᠍ᠭᠦᠳ ᠨᠢ 《ᠵᠦᠭᠡᠷ ᠠ᠋ ᠵᠦᠭᠡᠷ᠂ ᠡᠵᠢ᠃ ᠰᠠᠨᠠᠭᠠ ᠵᠣᠪᠠᠯᠲᠠ ᠦᠭᠡᠢ ᠠ᠋᠃ ᠵᠥᠩᠳᠡᠭᠡᠨ ᠢᠷᠭᠤᠢ ᠠᠪᠴᠢᠷᠠᠭᠠᠷᠠᠢ᠃ ᠥᠭᠡᠳᠡ ᠦᠭᠡᠢ ᠮᠠᠭᠤ ᠴᠢᠨᠣᠠ ᠢᠷᠡᠪᠡᠯ ᠡᠭᠦᠳᠡ ᠪᠡᠨ ᠪᠢᠳᠡ ᠨᠡᠭᠡᠭᠡᠬᠦ ᠦᠭᠡᠢ》 ᠭᠡᠮᠡᠨ ᠵᠡᠷᠭᠡ ᠵᠡᠷᠭᠡ ᠮᠠᠢᠯᠠᠯᠳᠤᠵᠤ ᠭᠡᠨᠡ᠃ ᠡᠵᠢ ᠨᠢ ᠲᠡᠳᠡᠨ ᠦ᠌ ᠬᠢ ᠪᠡᠨ ᠴᠣᠪᠣᠭᠣ ᠳᠠᠭᠤᠨ ᠳ᠋ᠤ᠌ ᠪᠡᠶᠡᠰᠴᠦ᠂ ᠡᠩᠬᠦᠷᠡᠢᠯᠡᠵᠦ ᠨᠢᠭᠡᠨᠲᠡ ᠮᠠᠢᠯᠠᠴᠢᠬᠠᠭᠠᠳ ᠯᠠ ᠵᠠᠮ ᠳ᠋ᠠᠭᠠᠨ ᠭᠠᠷᠴᠠᠢ᠃
ᠤᠳᠠᠭᠠ ᠴᠤ᠌ ᠦᠭᠡᠢ ᠪᠠᠢᠲᠠᠯᠠ ᠲᠡᠳᠡᠨ ᠦ᠌ ᠬᠠᠭᠠᠯᠭᠠ ᠶ᠋ᠢ ᠬᠡᠨ ᠨᠢᠭᠡ ᠨᠢ ᠲᠣᠭᠰᠢᠵᠤ᠄
– ᠡᠩᠬᠦᠷᠡᠢ ᠦᠷᠡᠰ ᠮᠢᠨᠢ ᠬᠠᠭᠠᠯᠭᠠ ᠪᠠᠨ ᠨᠡᠬᠡᠭᠡ᠃ ᠡᠵᠢ ᠨᠢ ᠢᠷᠡᠯᠡ᠃ ᠲᠠ ᠨᠡᠷᠡᠲᠦ ᠪᠡᠨ ᠳᠠᠯᠠᠩ ᠳᠦᠭᠦᠷᠡᠩ ᠰᠦ᠂ ᠰᠠᠭᠰᠤ ᠳᠦᠭᠦᠷᠡᠩ ᠢᠷᠭᠤᠢ ᠠᠪᠴᠢᠷᠠᠯᠠ ᠭᠡᠵᠡᠢ᠃
ᠬᠠᠷᠢᠨ ᠢᠰᠢᠭᠡ ᠨᠦ᠍ᠭᠦᠳ ᠬᠠᠬᠢᠷ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠨᠢ ᠴᠢᠨᠣᠠ ᠪᠠᠢᠨᠠ ᠭᠡᠳ ᠲᠦᠪᠡᠭᠭᠦᠢᠬᠡᠨ ᠲᠠᠨᠢᠴᠢᠬᠠᠵᠠᠢ᠃ ᠲᠡᠭᠡᠭᠡᠳ᠄
《ᠬᠠᠭᠠᠯᠭᠠ ᠪᠠᠨ ᠪᠢᠳᠡ ᠨᠡᠭᠡᠭᠡᠬᠦ ᠦᠭᠡᠢ᠃ ᠬᠠᠢᠷᠠᠲᠠᠢ ᠡᠵᠢ ᠮᠠᠨᠢ ᠡᠩᠬᠦᠷᠡᠢ ᠵᠥᠭᠡᠯᠡᠨ ᠳᠠᠭᠤ ᠲᠠᠢ᠃ ᠬᠠᠷᠢᠨ ᠲᠠ ᠪᠣᠯ ᠬᠠᠬᠢᠷ ᠪᠦᠳᠦᠭᠦᠨ ᠳᠠᠭᠤᠲᠤ ᠴᠢᠨᠣᠠ ᠪᠠᠢᠨᠠ ᠰᠢᠦ ᠳᠡ》 ᠭᠡᠵᠦ ᠮᠠᠢᠯᠠᠯᠳᠤᠵᠤ ᠭᠡᠨᠡ᠃
ᠴᠢᠨᠣᠠ 《ᠭᠠᠢᠭᠤᠢ ᠠ᠋᠂ ᠲᠠ ᠨᠠᠷ ᠢ᠋ ᠳᠡ》 ᠭᠡᠵᠦ ᠥᠭᠡᠯᠡᠭᠰᠡᠨ ᠢ᠋ᠶ᠋ᠡᠨ ᠬᠦᠨᠡᠰᠦᠨ ᠦ᠌ ᠮᠤᠬᠤᠯᠠᠭ ᠤᠷᠤᠭᠤ ᠬᠠᠷᠠᠢᠯᠭᠠᠵᠠᠢ᠃ ᠮᠤᠬᠤᠯᠠᠭ ᠠ᠋ᠴᠠ ᠲᠡᠷᠡ ᠲᠦᠭᠦᠬᠡᠢ ᠥᠨᠳᠡᠭᠡ ᠠᠪᠴᠤ ᠤᠤᠭᠤᠭᠠᠳ ᠳᠠᠭᠤ ᠪᠠᠨ ᠰᠢᠩᠭᠡᠷᠡᠭᠦᠯᠵᠦ ᠭᠡᠨᠡ᠃
ᠴᠢᠨᠣᠠ ᠡᠷᠭᠢᠵᠦ ᠣᠴᠢᠭᠠᠳ ᠬᠠᠭᠠᠯᠭᠠ ᠶ᠋ᠢ ᠨᠢ ᠲᠣᠭᠰᠢᠵᠤ᠄
– ᠡᠩᠬᠦᠷᠡᠢ ᠦᠷᠡᠰ ᠮᠢᠨᠢ ᠬᠠᠭᠠᠯᠭᠠ ᠪᠠᠨ ᠨᠡᠬᠡᠭᠡ᠃ ᠡᠵᠢ ᠨᠢ ᠢᠷᠡᠯᠡ᠃ ᠲᠠ ᠨᠡᠷᠡᠲᠦ ᠪᠡᠨ ᠳᠠᠯᠠᠩ ᠳᠦᠭᠦᠷᠡᠩ ᠰᠦ᠂ ᠰᠠᠭᠰᠤ ᠳᠦᠭᠦᠷᠡᠩ ᠢᠷᠭᠤᠢ ᠠᠪᠴᠢᠷᠠᠯᠠ》 ᠭᠡᠵᠦ ᠰᠢᠩᠭᠡᠨ ᠳᠠᠭᠤ ᠪᠠᠷ ᠬᠡᠯᠡᠵᠡᠢ᠃
ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠡᠭᠡᠨ ᠴᠢᠨᠣᠠ ᠤᠷᠲᠤ ᠬᠥᠯ ᠢ᠋ᠶ᠋ᠡᠨ ᠴᠣᠩᠬᠣᠨ ᠳᠡᠭᠡᠷᠡ ᠲᠠᠯᠪᠢᠴᠢᠬᠠᠭᠰᠠᠨ ᠪᠠᠢᠭᠰᠠᠨ ᠢ᠋ ᠨᠢ ᠢᠰᠢᠭᠡ ᠨᠦ᠍ᠭᠦᠳ ᠣᠯᠤᠭᠠᠳ ᠬᠠᠷᠴᠢᠬᠠᠵᠠᠢ᠃ ᠲᠡᠭᠡᠭᠡᠳ ᠲᠡᠳᠡ᠄
– ᠬᠠᠭᠠᠯᠭᠠ ᠪᠠᠨ ᠪᠢᠳᠡ ᠨᠡᠭᠡᠭᠡᠬᠦ ᠦᠭᠡᠢ ᠠ᠋᠃ ᠬᠠᠢᠷᠠᠲᠠᠢ ᠡᠵᠢ ᠮᠢᠨᠢ ᠴᠠᠭᠠᠬᠠᠨ ᠬᠥᠯ ᠲᠡᠢ᠃ ᠬᠠᠷᠢᠨ ᠲᠠ ᠪᠣᠯ ᠬᠠᠷᠠ ᠰᠠᠷᠠᠯ ᠬᠥᠯ ᠲᠡᠢ᠂ ᠬᠠᠲᠠᠭᠤ ᠰᠡᠳᠬᠢᠯᠲᠦ ᠴᠢᠨᠣᠠ ᠪᠠᠢᠨᠠ ᠰᠢᠦ ᠳᠡ ᠭᠡᠵᠦ ᠮᠠᠢᠯᠠᠯᠳᠤᠵᠤ ᠭᠡᠨᠡ. 《ᠵᠠ ᠭᠠᠢᠭᠤᠢ ᠠ᠋᠂ ᠲᠠ ᠨᠠᠷ ᠢ᠋ ᠵᠠᠯᠭᠢᠬᠤ ᠳ᠋ᠠᠭᠠᠨ ᠯᠠ ᠨᠢᠭᠡ ᠵᠠᠯᠭᠢᠨᠠ》 ᠭᠡᠵᠦ ᠴᠢᠨᠣᠠ ᠦᠭᠡᠯᠡᠭᠰᠡᠭᠡᠷ ᠡᠪᠦᠭᠡᠨ ᠲᠠᠯᠬᠠᠴᠢᠨ ᠤ᠋ ᠳ᠋ᠤ᠌ ᠣᠴᠢᠵᠠᠢ᠃ ᠲᠡᠭᠡᠭᠡᠳ ᠲᠠᠯᠬᠠᠴᠢᠨ ᠳ᠋ᠤ᠌᠄
– ᠶᠣᠬᠣ ᠶᠣᠬᠣ᠃ ᠪᠢ ᠬᠥᠯ ᠢ᠋ᠶ᠋ᠡᠨ ᠭᠡᠮᠲᠦᠭᠡᠴᠢᠬᠡᠯᠡ᠃ ᠠᠯᠢᠪ ᠵᠢᠭᠤᠷᠠᠭᠰᠠᠨ ᠭᠤᠯᠢᠷ ᠬᠤᠷᠳᠤᠬᠠᠨ ᠰᠢᠭ᠋ ᠲᠦᠷᠬᠢᠭᠡᠳᠡᠬᠦ ᠭᠡᠵᠡᠢ᠃
ᠡᠪᠦᠭᠡᠨ ᠲᠠᠯᠬᠠᠴᠢᠨ ᠵᠢᠭᠤᠷᠠᠭᠰᠠᠨ ᠭᠤᠯᠢᠷ ᠢ᠋ ᠴᠢᠨᠣᠠ ᠶ᠋ᠢᠨ ᠬᠥᠯᠥᠨ ᠳ᠋ᠦ᠍ ᠵᠤᠵᠠᠭᠠᠨ ᠭᠡᠭᠴᠢ ᠨᠢ ᠲᠦᠷᠬᠢᠵᠦ ᠥᠭᠴᠡᠢ᠃
ᠳᠠᠷᠠᠭᠠ ᠨᠢ ᠴᠢᠨᠣᠠ ᠲᠡᠭᠡᠷᠮᠡᠴᠢᠨ ᠳᠡᠭᠡᠷᠡ ᠣᠴᠢᠭᠠᠳ᠄
– ᠬᠥᠯ ᠦ᠋ᠨ ᠳᠡᠭᠡᠷᠡ ᠮᠢᠨᠢ ᠬᠠᠭᠤᠷᠠᠢ ᠭᠤᠯᠢᠷ ᠴᠠᠴᠤᠭᠤᠯᠬᠤ ᠭᠡᠪᠡ᠃
ᠲᠡᠭᠡᠷᠮᠡᠴᠢᠨ 《ᠬᠡᠵᠢᠶᠡᠨᠡᠢ ᠡᠨᠡ ᠵᠠᠯᠢ ᠲᠠᠢ ᠠᠮᠢᠲᠠᠨ ᠬᠡᠨ ᠨᠢᠭᠡᠨ ᠢ᠋ ᠮᠡᠬᠡᠯᠡᠬᠦ ᠯᠡ ᠭᠡᠵᠦ ᠪᠠᠢᠨᠠ ᠳᠠ》 ᠭᠡᠵᠦ ᠪᠣᠳᠣᠭᠠᠳ 《ᠦᠭᠡᠢ ᠠ᠋᠂ ᠴᠢᠳᠠᠬᠤ ᠦᠭᠡᠢ》 ᠭᠡᠵᠦ ᠭᠡᠨᠡ᠃
《ᠠᠯᠢᠪ ᠬᠤᠷᠳᠤᠯᠠ᠃ ᠰᠢᠨᠠᠭᠠ ᠭᠤᠯᠢᠷ ᠢ᠋ᠶ᠋ᠠᠨ ᠬᠠᠷᠠᠮᠯᠠᠭᠠᠳ ᠪᠠᠢᠪᠠᠯ ᠴᠢᠮᠠᠶ᠋ᠢ ᠴᠤ᠌ ᠭᠡᠰᠡᠨ ᠢᠳᠡᠨᠡ ᠰᠢᠦ》 ᠭᠡᠵᠦ ᠴᠢᠨᠣᠠ ᠰᠦᠷᠳᠡᠭᠦᠯᠬᠦ ᠳ᠋ᠦ᠍ ᠲᠡᠭᠡᠷᠮᠡᠴᠢᠨ ᠠᠶᠤᠭᠰᠠᠨ ᠳ᠋ᠠᠭᠠᠨ ᠰᠢᠨᠠᠭᠠ ᠭᠤᠯᠢᠷ ᠢ᠋ᠶ᠋ᠠᠨ ᠰᠠᠨᠳᠤ ᠮᠡᠨᠳᠦ ᠴᠠᠴᠤᠵᠤ ᠥᠭᠭᠦᠭᠡᠳ ᠶᠠᠪᠤᠭᠤᠯᠵᠠᠢ᠃
ᠭᠠᠢᠬᠠᠯ ᠰᠠᠷᠠᠯ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠪᠠᠨ ᠢᠷᠡᠵᠦ ᠬᠠᠭᠠᠯᠭᠠ ᠶ᠋ᠢ ᠨᠢ ᠲᠤᠭ ᠲᠤᠭ ᠲᠣᠭᠰᠢᠭᠠᠳ᠄
《ᠡᠩᠬᠦᠷᠡᠢ ᠦᠷᠡᠰ ᠮᠢᠨᠢ ᠬᠠᠭᠠᠯᠭᠠ ᠪᠠᠨ ᠨᠡᠬᠡᠭᠡ᠃ ᠡᠵᠢ ᠨᠢ ᠲᠠ ᠨᠡᠷᠡᠲᠦ ᠪᠡᠨ ᠳᠠᠯᠠᠩ ᠳᠦᠭᠦᠷᠡᠩ ᠰᠦ᠂ ᠰᠠᠭᠰᠤ ᠳᠦᠭᠦᠷᠡᠩ ᠢᠷᠭᠤᠢ ᠲᠠᠢ ᠢᠷᠡᠯᠡ》 ᠭᠡᠵᠦ ᠡᠩᠬᠦᠷᠡᠢ ᠢᠯᠳᠠᠮ ᠳᠠᠭᠤ ᠪᠠᠷ ᠬᠡᠯᠡᠵᠡᠢ᠃
《ᠡᠬᠢᠯᠡᠭᠡᠳ ᠪᠢᠳᠡᠨ ᠳ᠋ᠦ᠍ ᠬᠥᠯ ᠢ᠋ᠶ᠋ᠡᠨ ᠦᠵᠡᠭᠦᠯ᠃ ᠡᠵᠢ ᠮᠢᠨᠢ ᠮᠥᠨ ᠡᠰᠡᠬᠦ ᠶ᠋ᠢ ᠮᠡᠳᠡᠶᠡ》 ᠭᠡᠵᠦ ᠢᠰᠢᠭᠡ ᠨᠦ᠍ᠭᠦᠳ ᠮᠠᠢᠯᠠᠯᠳᠤᠵᠤ ᠭᠡᠨᠡ᠃ ᠴᠢᠨᠣᠠ ᠬᠥᠯ ᠢ᠋ᠶ᠋ᠡᠨ ᠴᠣᠩᠬᠣᠨ ᠳᠡᠭᠡᠷᠡ ᠲᠠᠯᠪᠢᠬᠤ ᠳ᠋ᠤ᠌ ᠬᠥᠯ ᠨᠢ ᠴᠠᠭᠠᠨ ᠬᠠᠷᠠᠭᠳᠠᠵᠤ ᠭᠡᠨᠡ᠃ ᠢᠰᠢᠭᠡ ᠨᠦ᠍ᠭᠦᠳ ᠡᠵᠢ ᠶ᠋ᠢ ᠪᠡᠨ ᠭᠡᠵᠦ ᠢᠲᠡᠭᠡᠭᠡᠳ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠵᠡᠢ᠃
ᠭᠡᠲᠡᠯᠡ ᠬᠡᠨ ᠣᠷᠣᠵᠤ ᠢᠷᠡᠭᠰᠡᠨ ᠭᠡᠵᠦ ᠪᠣᠳᠣᠨᠠ᠃ ᠠᠷᠠᠭᠠ ᠰᠢᠳᠦ ᠨᠢ ᠢᠷᠵᠠᠢᠭᠰᠠᠨ᠂ ᠵᠢᠷᠲᠠᠭᠠᠢ ᠰᠠᠷᠠᠯ ᠴᠢᠨᠣᠠ ᠪᠠᠢᠯᠠ᠃ ᠢᠰᠢᠭᠡ ᠨᠦ᠍ᠭᠦᠳ ᠰᠦᠨᠡᠰᠦ ᠪᠡᠨ ᠵᠠᠢᠯᠠᠲᠠᠯᠠ ᠠᠶᠤᠵᠤ ᠨᠢᠭᠡ ᠨᠢ ᠰᠢᠷᠡᠭᠡᠨ ᠳᠣᠣᠭᠤᠷ᠂ ᠬᠣᠶᠠᠷᠳᠠᠬᠢ ᠨᠢ ᠣᠷᠣᠨ ᠳᠣᠣᠭᠤᠷ᠂ ᠭᠤᠷᠪᠠᠳᠠᠬᠢ ᠨᠢ ᠫᠢᠰᠢᠩ ᠳᠣᠲᠣᠷᠠ᠂ ᠳᠥᠷᠪᠡᠳᠡᠬᠢ ᠨᠢ ᠲᠣᠭᠣᠭᠠᠨ ᠤ᠋ ᠰᠠᠪᠤᠩ ᠳ᠋ᠤ᠌᠂ ᠲᠠᠪᠤᠳᠠᠬᠢ ᠨᠢ ᠰᠢᠭᠦᠭᠡᠨ ᠳ᠋ᠦ᠍᠂ ᠵᠢᠷᠭᠤᠳᠠᠬᠢ ᠨᠢ ᠤᠭᠠᠯᠲᠠᠭᠤᠷ ᠳᠣᠲᠣᠷᠠ᠂ ᠳᠣᠯᠣᠭᠠ ᠳ᠋ᠠᠬᠢ ᠨᠢ ᠬᠠᠨᠠ ᠶ᠋ᠢᠨ ᠴᠠᠭᠠᠨᠠ ᠭᠡᠷ ᠳᠣᠲᠣᠷᠠ ᠬᠠᠷᠠᠢᠨ ᠣᠷᠣᠵᠤ ᠨᠢᠭᠤᠭᠳᠠᠵᠠᠭᠠᠯᠠ᠃ ᠴᠢᠨᠣᠠ ᠲᠡᠳᠡᠨ ᠢ᠋ ᠬᠦᠢ ᠬᠠᠶᠠ ᠭᠡᠬᠦ ᠶ᠋ᠢᠨ ᠵᠠᠭᠤᠷᠠ ᠦᠭᠡᠢ ᠣᠯᠤᠭᠠᠳ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠵᠠᠯᠭᠢᠵᠤ ᠣᠷᠬᠢᠯᠠ᠃ ᠬᠠᠷᠢᠨ ᠬᠠᠮᠤᠭ ᠤ᠋ᠨ ᠵᠢᠵᠢᠭ ᠢᠰᠢᠭᠡ ᠨᠢ ᠴᠠᠭᠠᠨᠠ ᠭᠡᠷ ᠳ᠋ᠦ᠍ ᠨᠢᠭᠤᠭᠳᠠᠭᠰᠠᠨ ᠢ᠋ ᠴᠢᠨᠣᠠ ᠠᠩᠵᠠᠭᠠᠷᠠᠯ ᠦᠭᠡᠢ ᠣᠷᠬᠢᠵᠠᠢ᠃ ᠬᠣᠪᠳᠣᠭ ᠰᠠᠷᠠᠯ ᠴᠢᠨᠣᠠ ᠭᠡᠳᠡᠰᠦ ᠪᠡᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠠᠯᠬᠤᠭᠰᠠᠭᠠᠷ ᠭᠡᠷ ᠡᠴᠡ ᠭᠠᠷᠴᠤ᠂ ᠨᠢᠭᠡᠨ ᠮᠣᠳᠣᠨ ᠤ᠋ ᠢᠷᠣᠭᠠᠯ ᠳ᠋ᠤ᠌ ᠬᠡᠪᠲᠡᠭᠡᠳ᠂ ᠬᠠᠬᠢᠷ ᠮᠠᠭᠤᠬᠠᠢ ᠳᠠᠭᠤ ᠪᠠᠷ ᠬᠤᠷᠬᠢᠷᠠᠨ ᠤᠨᠲᠠᠵᠤ ᠭᠡᠨᠡ᠃
ᠲᠡᠭᠡᠲᠡᠯᠡ ᠤᠳᠠᠯ ᠦᠭᠡᠢ ᠡᠩᠬᠦᠷᠡᠢᠬᠡᠨ ᠢᠰᠢᠭᠡ ᠨᠦ᠍ᠭᠦᠳ ᠲᠡᠭᠡᠨ ᠶᠠᠭᠠᠷᠠᠨ᠂ ᠱᠣᠪᠣᠷ ᠱᠣᠪᠣᠷ ᠱᠣᠭᠰᠢᠭᠰᠠᠭᠠᠷ ᠡᠬᠡ ᠢᠮᠠᠭᠠ ᠢᠷᠡᠵᠡᠢ᠃ ᠬᠥᠭᠡᠷᠦᠬᠦᠢ ᠢᠮᠠᠭᠠ ᠭᠡᠲᠡᠯᠡ ᠶᠠᠭᠤᠲᠠᠢ ᠤᠴᠠᠷᠠᠭᠰᠠᠨ ᠭᠡᠭᠡᠴᠢ᠃ ᠬᠠᠭᠠᠯᠭᠠ ᠡᠭᠦᠳᠡ ᠨᠢ ᠳᠡᠯᠭᠡᠭᠳᠡᠵᠦ᠂ ᠬᠠᠮᠤᠭ ᠰᠢᠷᠡᠭᠡ ᠰᠠᠨᠳᠠᠯᠢ ᠨᠢ ᠶᠠᠢᠵᠢᠢᠵᠤ ᠬᠡᠮᠬᠡᠷᠡᠭᠡᠳ᠂ ᠰᠠᠪᠠ ᠰᠠᠭᠤᠯᠭᠠ᠂ ᠣᠷᠣ ᠳᠡᠷᠡ ᠨᠢ ᠱᠠᠯᠠ ᠪᠠᠷ ᠨᠢᠭᠡ ᠬᠥᠭᠯᠡᠷᠡᠴᠢᠬᠡᠭᠰᠡᠨ ᠪᠠᠢᠬᠤ ᠶᠤᠮ ᠭᠡᠨᠡ᠃
ᠢᠰᠢᠭᠡ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠢᠮᠠᠭᠠ ᠡᠷᠢᠭᠡᠳ ᠬᠠᠢᠭᠠᠳ ᠣᠯᠤᠭᠰᠠᠨ ᠦᠭᠡᠢ᠃ ᠨᠡᠷᠡ ᠵᠢᠰᠦ ᠪᠡᠷ ᠨᠢ ᠳᠠᠭᠤᠳᠠᠪᠠᠴᠤ ᠨᠢᠭᠡ ᠴᠦ᠍ ᠬᠠᠷᠢᠭᠤ ᠠᠯᠠᠭᠠ ᠭᠡᠨᠡ᠃ ᠬᠠᠷᠢᠨ ᠲᠡᠭᠡᠲᠡᠯᠡ ᠬᠠᠮᠤᠭ ᠤ᠋ᠨ ᠪᠠᠭᠠ ᠢᠰᠢᠭᠡ ᠨᠢ 《ᠬᠠᠢᠷᠠᠲᠤ ᠡᠵᠢ ᠮᠢᠨᠢ ᠪᠢ ᠴᠠᠭᠠᠨᠠ ᠭᠡᠷ ᠳᠣᠲᠣᠷᠠ ᠪᠠᠢᠨᠠ》 ᠭᠡᠮᠡᠨ ᠳᠤᠭᠤᠯᠳᠠᠬᠤ ᠲᠡᠳᠦᠢ ᠮᠠᠢᠯᠠᠵᠠᠢ᠃ ᠡᠵᠢ ᠨᠢ ᠲᠡᠭᠦᠨ ᠢ᠋ ᠭᠠᠷᠭᠠᠵᠤ ᠠᠪᠲᠠᠯᠠ ᠠᠶᠤᠭᠰᠠᠨ ᠳ᠋ᠠᠭᠠᠨ ᠪᠦᠷ ᠪᠥᠮᠪᠥᠯᠵᠡᠲᠡᠯᠡ ᠴᠡᠴᠡᠷᠡᠵᠦ᠂ ᠪᠥᠮᠪᠥᠷᠢᠲᠡᠯᠡ ᠤᠬᠢᠯᠠᠭᠠᠳ 《ᠠᠶᠤᠮᠰᠢᠭᠲᠤ ᠴᠢᠨᠣᠠ᠂ ᠠᠬᠠ ᠡᠭᠡᠴᠢ ᠨᠠᠷ ᠢ᠋ ᠮᠠᠨᠢ ᠴᠥᠮ ᠢ᠋ ᠨᠢ ᠵᠠᠯᠭᠢᠴᠢᠬᠠᠭᠰᠠᠨ》 ᠭᠡᠵᠦ ᠬᠡᠯᠡᠵᠡᠢ᠃
ᠬᠥᠭᠡᠷᠦᠬᠦᠢ ᠡᠬᠡ ᠨᠢ ᠲᠡᠳᠡᠨ ᠦ᠌ ᠬᠢ ᠪᠡᠨ ᠬᠣᠢᠨᠠ ᠠ᠋ᠴᠠ ᠬᠡᠴᠢᠨᠡᠨ ᠶᠡᠬᠡ ᠤᠬᠢᠯᠠᠵᠤ ᠬᠠᠷᠠᠭᠤᠰᠤᠭᠰᠠᠨ ᠭᠡᠵᠦ ᠰᠠᠨᠠᠨᠠ᠃ ᠲᠡᠭᠦᠨ ᠢ᠋ ᠭᠠᠰᠢᠭᠤᠳᠠᠨ ᠤᠬᠢᠯᠠᠭᠰᠠᠭᠠᠷ ᠭᠠᠳᠠᠭᠰᠢ ᠭᠠᠷᠬᠤ ᠳ᠋ᠤ᠌ ᠪᠢᠴᠢᠬᠠᠨ ᠢᠰᠢᠭᠡ ᠨᠢ ᠠᠷᠤ ᠠ᠋ᠴᠠ ᠨᠢ ᠳᠠᠭᠠᠵᠠᠢ᠃ ᠢᠮᠠᠭᠠ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠠᠳ ᠣᠢᠷᠠᠯᠴᠠᠭᠠᠬᠢ ᠮᠣᠳᠣᠨ ᠤ᠋ ᠢᠷᠣᠭᠠᠯ ᠳ᠋ᠤ᠌ ᠨᠢᠭᠡᠨ ᠪᠦᠳᠦᠭᠦᠨ ᠰᠠᠷᠠᠯ ᠶᠠᠭᠤᠮᠠ ᠬᠡᠪᠲᠡᠵᠦ ᠪᠠᠢᠬᠤ ᠶ᠋ᠢ ᠣᠯᠵᠤ ᠬᠠᠷᠠᠵᠠᠢ᠃ ᠣᠢᠷᠠᠲᠤᠨ ᠣᠴᠢᠪᠠᠯ ᠨᠢᠭᠡ ᠴᠢᠨᠣᠠ ᠮᠣᠳᠣᠨ ᠤ᠋ ᠢᠷᠣᠭᠠᠯ ᠳ᠋ᠤ᠌ ᠬᠡᠪᠲᠡᠭᠡᠳ ᠮᠥᠴᠢᠷ ᠴᠡᠴᠡᠷᠡᠲᠡᠯᠡ ᠬᠤᠷᠬᠢᠷᠠᠨ ᠤᠨᠲᠠᠵᠤ ᠪᠠᠢᠨᠠ ᠭᠡᠨᠡ᠃ ᠰᠠᠢᠨ ᠠᠵᠢᠭᠯᠠᠪᠠᠯ ᠲᠡᠭᠦᠨ ᠦ᠌ ᠭᠣᠯᠢᠢᠵᠤ ᠴᠦᠳᠡᠢᠭᠰᠡᠨ ᠭᠡᠳᠡᠰᠦᠨ ᠳᠣᠲᠣᠷᠠ ᠨᠢ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠬᠥᠳᠡᠯᠬᠦ ᠠᠵᠠᠢ᠃ 《ᠲᠩᠷᠢ ᠮᠢᠨᠢ᠂ ᠬᠡᠦᠬᠡᠳ ᠦ᠋ᠳ ᠮᠠᠨᠢ ᠠᠮᠢᠳᠤ ᠪᠠᠢᠭᠠ ᠶᠤᠮ ᠪᠢᠰᠢ ᠤᠤ? ᠭᠡᠰᠡᠨ ᠪᠣᠳᠣᠯ ᠢᠮᠠᠭᠠᠨ ᠳ᠋ᠤ᠌ ᠲᠥᠷᠦᠵᠢ ᠢᠰᠢᠭᠡ ᠪᠡᠨ ᠭᠡᠷ ᠤᠷᠤᠭᠤ ᠪᠠᠨ ᠭᠦᠶᠦᠯᠭᠡᠵᠦ ᠤᠲᠠᠰᠤ᠂ ᠵᠡᠭᠦᠦ᠂ ᠬᠢᠲᠤᠭᠠ ᠠᠪᠴᠢᠷᠠᠭᠤᠯᠵᠠᠢ᠃ ᠲᠡᠭᠡᠭᠡᠳ ᠤᠬᠠᠭᠠᠨ ᠦᠭᠡᠢ ᠤᠨᠲᠠᠵᠤ ᠪᠣᠢ ᠴᠢᠨᠣᠠ ᠶ᠋ᠢᠨ ᠭᠡᠳᠡᠰᠦ ᠶ᠋ᠢ ᠵᠦᠰᠦᠵᠦ ᠣᠷᠭᠢᠲᠠᠯᠠ ᠨᠢᠭᠡ ᠢᠰᠢᠭᠡᠨ ᠦ᠌ ᠲᠣᠯᠣᠭᠠᠢ ᠴᠤᠬᠤᠢᠯᠠ ᠭᠡᠨᠡ᠃ ᠭᠡᠳᠡᠰᠦ ᠶ᠋ᠢ ᠨᠢ ᠪᠦᠷ ᠲᠣᠮᠣ ᠵᠦᠰᠦᠲᠡᠯᠡ ᠵᠢᠷᠭᠤᠭᠠᠨ ᠢᠰᠢᠭᠡ ᠨᠢ ᠠᠷᠤ ᠠᠷᠤ ᠠ᠋ᠴᠠ ᠪᠠᠨ ᠴᠤᠪᠤᠷᠠᠨ ᠭᠠᠷᠴᠤ ᠢᠷᠡᠵᠡᠢ᠃ ᠬᠣᠮᠣᠬᠠᠢ ᠴᠢᠨᠣᠠ ᠰᠤᠪᠳᠠᠭᠯᠠᠬᠤ ᠳ᠋ᠠᠭᠠᠨ ᠬᠥᠭᠡᠷᠦᠬᠦᠢ ᠲᠡᠳᠡᠨ ᠢ᠋ ᠪᠦᠬᠦᠯᠢ ᠪᠦᠬᠦᠯᠢ ᠪᠡᠷ ᠨᠢ ᠵᠠᠯᠭᠢᠭᠰᠠᠨ ᠨᠢ ᠬᠠᠷᠢᠨ ᠴᠤ᠌ ᠠᠵᠠ ᠰᠢᠦ᠃ ᠢᠰᠢᠭᠡ ᠨᠦ᠍ᠭᠦᠳ ᠬᠠᠢᠷᠠᠲᠠᠢ ᠡᠵᠢ ᠪᠡᠨ ᠲᠡᠪᠡᠷᠢᠨ ᠦᠨᠦᠰᠴᠦ᠂ ᠬᠠᠯᠠᠭᠤᠨ ᠡᠩᠭᠡᠷ ᠲᠦ᠍ ᠨᠢ ᠡᠷᠬᠡᠯᠡᠨ ᠨᠠᠭᠠᠳᠴᠤ᠂ ᠪᠠᠶᠠᠷᠯᠠᠨ ᠳᠡᠪᠬᠡᠴᠡᠵᠦ ᠭᠡᠨᠡ᠃ ᠡᠩᠬᠦᠷᠡᠢ ᠬᠣᠩᠭᠣᠷ ᠦᠷᠡᠰ ᠲᠡᠢ ᠪᠡᠨ ᠡᠰᠡᠨ ᠮᠡᠨᠳᠦ ᠠᠭᠤᠯᠵᠠᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠭᠰᠠᠨ ᠢᠮᠠᠭᠠ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠭᠠᠳ᠄
– ᠠᠯᠢᠪ ᠬᠡᠦᠬᠡᠳ ᠦ᠋ᠳ ᠮᠢᠨᠢ᠂ ᠴᠢᠯᠠᠭᠤ ᠲᠡᠭᠦᠭᠡᠳ ᠢᠷᠡ᠃ ᠠᠶᠤᠮᠰᠢᠭᠲᠠᠢ ᠡᠨᠡ ᠠᠷᠢᠶᠠᠲᠠᠨ ᠢ᠋ ᠰᠡᠷᠡᠬᠦ ᠡᠴᠡ ᠨᠢ ᠡᠮᠦᠨᠡ ᠭᠡᠳᠡᠰᠦᠨ ᠳ᠋ᠦ᠍ ᠨᠢ ᠴᠢᠯᠠᠭᠤ ᠴᠢᠬᠡᠭᠡᠳ ᠣᠶᠣᠴᠢᠬᠠᠶᠠ ᠭᠡᠵᠡᠢ᠃
ᠢᠰᠢᠭᠡ ᠨᠦ᠍ᠭᠦᠳ ᠴᠦ᠍ ᠶᠠᠭᠠᠬᠢᠬᠤ ᠵᠢᠨ ᠵᠠᠭᠤᠷᠠ ᠦᠭᠡᠢ ᠪᠠᠬᠠᠨ ᠴᠢᠯᠠᠭᠤ ᠲᠡᠭᠦᠵᠦ ᠢᠷᠡᠭᠡᠳ ᠴᠢᠨᠣᠠ ᠶ᠋ᠢᠨ ᠭᠡᠳᠡᠰᠦᠨ ᠳ᠋ᠦ᠍ ᠪᠠᠭᠠᠳᠬᠤ ᠴᠢᠨᠡᠭᠡ ᠪᠡᠷ ᠨᠢ ᠴᠢᠬᠠᠵᠠᠢ᠃ ᠢᠮᠠᠭᠠ ᠭᠡᠳᠡᠰᠦ ᠶ᠋ᠢ ᠨᠢ ᠣᠶᠣᠵᠤ ᠪᠠᠢᠬᠤ ᠳ᠋ᠤ᠌ ᠴᠢᠨᠣᠠ ᠢᠷᠠᠭᠯᠠᠨ ᠵᠡᠭᠦᠳᠦᠯᠡᠭᠰᠡᠭᠡᠷ ᠯᠡ ᠤᠨᠲᠠᠵᠤ ᠪᠠᠢᠪᠠ ᠭᠡᠨᠡ᠃ ᠤᠨᠲᠠᠵᠤ ᠤᠨᠲᠠᠵᠤ ᠨᠣᠢᠷ ᠨᠢ ᠬᠠᠨᠤᠭᠰᠠᠨ ᠴᠢᠨᠣᠠ ᠪᠣᠰᠤᠭᠠᠳ ᠢᠷᠡᠵᠡᠢ᠃ ᠭᠡᠳᠡᠰᠦ ᠪᠡᠷ ᠨᠢ ᠳᠦᠭᠦᠷᠡᠩ ᠴᠢᠯᠠᠭᠤ ᠪᠠᠢᠭᠠ ᠪᠣᠯᠬᠤ ᠪᠠᠷ ᠠᠮᠠ ᠨᠢ ᠶᠡᠬᠡ ᠴᠠᠩᠭᠠᠭᠰᠠᠨ ᠪᠠᠢᠵᠤ ᠭᠡᠨᠡ᠃ ᠴᠢᠨᠣᠠ ᠤᠰᠤ ᠤᠤᠭᠤᠬᠤ ᠪᠠᠷ ᠬᠤᠳᠳᠤᠭ ᠤᠷᠤᠭᠤ ᠶᠠᠪᠤᠯᠠ᠃ ᠲᠡᠭᠦᠨ ᠦ᠌ ᠠᠯᠬᠤᠬᠤ ᠲᠤᠭᠤᠯᠠᠨ ᠳ᠋ᠤ᠌ ᠭᠡᠳᠡᠰᠦᠨ ᠳ᠋ᠡᠬᠢ ᠴᠢᠯᠠᠭᠤ ᠨᠤᠭᠤᠳ ᠨᠢ ᠬᠠᠷᠰᠢᠯᠳᠤᠨ ᠮᠥᠷᠭᠥᠯᠳᠦᠵᠦ ᠬᠥᠯ ᠨᠢ ᠭᠤᠢᠪᠢᠯᠠᠵᠤ ᠪᠠᠢᠵᠠᠢ᠃
ᠲᠡᠷᠡ ᠬᠤᠳᠳᠤᠭ ᠤᠷᠤᠭᠤ ᠣᠴᠢᠬᠤ ᠵᠠᠮ ᠳ᠋ᠠᠭᠠᠨ᠂
《ᠬᠣᠳᠣᠭᠣᠳᠣ ᠭᠡᠳᠡᠰᠦᠨ ᠳᠣᠲᠣᠷᠠ ᠮᠠᠨᠢ
ᠬᠠᠷᠠᠰᠢᠨ ᠳᠤᠤᠭᠠᠷᠬᠤ ᠨᠢ ᠤᠤ ᠪᠣᠢ?
ᠵᠢᠷᠭᠤᠭᠠᠨ ᠢᠰᠢᠭᠡ ᠭᠡᠵᠦ ᠪᠣᠳᠣᠭᠰᠠᠨ ᠴᠢᠨᠢ
ᠴᠢᠯᠠᠭᠤ ᠰᠢᠪ ᠳᠡ᠂ ᠡᠴᠡᠪᠡᠰᠦ ᠭᠡᠵᠦ》 ᠥᠭᠡᠯᠡᠨ ᠥᠭᠡᠯᠡᠨ ᠶᠠᠪᠤᠵᠤ ᠭᠡᠨᠡ᠃
ᠲᠡᠭᠡᠭᠡᠳ ᠴᠢᠨᠣᠠ ᠬᠤᠳᠳᠤᠭ ᠤ᠋ᠨ ᠳᠡᠷᠭᠡᠳᠡ ᠣᠴᠢᠭᠠᠳ ᠤᠰᠤ ᠤᠤᠭᠤᠬᠤ ᠪᠠᠷ ᠲᠣᠩᠭᠣᠢᠲᠠᠯᠠ ᠭᠡᠳᠡᠰᠦᠨ ᠳ᠋ᠡᠬᠢ ᠬᠦᠨᠳᠦ ᠴᠢᠯᠠᠭᠤᠨ ᠳ᠋ᠠᠭᠠᠨ ᠲᠠᠲᠠᠭᠳᠠᠨ ᠬᠤᠳᠳᠤᠭ ᠲᠤ᠌ ᠤᠨᠠᠵᠠᠢ᠃
ᠢᠰᠢᠭᠡ ᠨᠦ᠍ᠭᠦᠳ ᠲᠡᠭᠦᠨ ᠢ᠋ ᠣᠴᠢᠵᠤ ᠦᠵᠡᠭᠡᠳ᠄
– ᠴᠢᠨᠣᠠ ᠦᠬᠡᠴᠢᠬᠡᠵᠡᠢ᠃ ᠴᠢᠨᠣᠠ ᠦᠬᠡᠴᠢᠬᠡᠵᠡᠢ ᠭᠡᠮᠡᠨ ᠪᠠᠶᠠᠷᠯᠠᠨ ᠮᠠᠢᠯᠠᠯᠳᠤᠵᠤ ᠡᠵᠢ ᠲᠡᠢ ᠪᠡᠨ ᠬᠤᠳᠳᠤᠭ ᠲᠣᠭᠣᠷᠢᠨ ᠪᠥᠵᠢᠭᠯᠡᠵᠦ ᠪᠡᠶᠡᠰᠦᠨ ᠬᠥᠭᠵᠢᠯᠳᠦᠴᠢᠬᠡᠵᠡᠢ᠃ ᠢᠩᠭᠢᠭᠡᠳ ᠡᠷᠬᠡ ᠲᠠᠩᠬᠢᠯ ᠳᠣᠯᠣᠭᠠᠨ ᠢᠰᠢᠭᠡ ᠡᠵᠢ ᠲᠡᠢ ᠪᠡᠨ ᠬᠠᠮᠲᠤ ᠠᠶᠤᠬᠤ ᠠᠶᠤᠯ ᠦᠭᠡᠢ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠤ ᠭᠡᠨᠡ᠃