ᠮᠠᠯᠴᠢᠨ ᠬᠥᠮᠦᠨ ᠦ᠌ ᠲᠤᠬᠠᠢ ᠭᠤᠷᠪᠠᠨ ᠪᠠᠳᠠᠭ - ᠴᠠ᠊᠂ ᠪᠠᠲᠤМалчин хүний тухай гураван бадаг-Ц,Бат
5385ᠮᠠᠯᠴᠢᠨ ᠬᠥᠮᠦᠨ ᠦ᠌ ᠲᠤᠬᠠᠢ ᠭᠤᠷᠪᠠᠨ ᠪᠠᠳᠠᠭ
ᠴᠠ ᠪᠠᠲᠤ
1 ᠮᠠᠯᠴᠢᠨ ᠬᠥᠮᠦᠨ
ᠮᠣᠩᠭᠣᠯ ᠤ᠋ᠨ ᠲᠤᠯᠭᠠᠭᠤᠷᠢ ᠪᠣᠯᠳᠠᠭ ᠨᠢᠭᠡᠨ ᠰᠠᠯᠠᠭᠠ ᠬᠥᠮᠦᠰ ᠢ᠋ ᠮᠠᠯᠴᠢᠨ ᠬᠥᠮᠦᠨ ᠭᠡᠳᠡᠭ ᠃
ᠮᠠᠯ ᠢ᠋ᠶ᠋ᠠᠨ ᠬᠠᠷᠢᠭᠤᠯᠠᠵᠤ ᠮᠢᠬᠠ ᠦᠢᠯᠡᠳᠪᠦᠷᠢᠯᠡᠳᠡᠭ ᠂ ᠠᠭᠤᠤ ᠶᠡᠬᠡ ᠬᠥᠳᠡᠯᠮᠦᠷᠢᠴᠢᠨ ᠢ᠋ ᠮᠠᠯᠴᠢᠨ ᠬᠥᠮᠦᠨ ᠭᠡᠳᠡᠭ ᠃
ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠮᠥᠩᠬᠡ ᠭᠠᠯ ᠢ᠋ ᠂ ᠮᠢᠩᠭᠠᠨ ᠵᠢᠯ ᠢ᠋ᠶ᠋ᠡᠷ ᠨᠣᠴᠣᠭᠠᠵᠤ ᠢᠷᠡᠭᠰᠡᠨ ᠬᠥᠮᠦᠰ ᠢ᠋ ᠮᠠᠯᠴᠢᠨ ᠬᠥᠮᠦᠨ ᠭᠡᠳᠡᠭ ᠃
ᠮᠣᠩᠭᠣᠯ ᠡᠬᠡ ᠬᠡᠯᠡ ᠰᠡᠳᠬᠢᠬᠦᠢ ᠳ᠋ᠦ᠍ ᠂ ᠮᠣᠷᠢᠨ ᠭᠦᠶᠦᠳᠡᠯ ᠢ᠋ᠶ᠋ᠡᠷ ᠴᠠᠬᠢᠯᠭᠠᠨ ᠴᠡᠨᠡᠭᠯᠡᠳᠡᠭ ᠡᠷᠳᠡᠮᠲᠡᠨ ᠢ᠋ ᠮᠠᠯᠴᠢᠨ ᠬᠥᠮᠦᠨ ᠭᠡᠳᠡᠭ ᠃
ᠮᠠᠯᠴᠢᠨ ᠬᠥᠮᠦᠨ ᠢ᠋ ᠦᠯᠦ ᠲᠣᠭᠣᠮᠰᠤᠷᠯᠠᠬᠤ ᠪᠣᠯ᠂ ᠣᠳᠣᠬᠢ ᠨᠡᠢᠭᠡᠮ ᠦ᠋ᠨ ᠪᠠᠰᠠ ᠨᠢᠭᠡᠨ ᠬᠠᠷᠠᠩᠭᠤᠢ ᠨᠢ ᠶᠤᠮ ᠃
ᠮᠢᠬᠠ ᠶ᠋ᠢ ᠨᠢ ᠢᠳᠡᠵᠦ ᠂ ᠱᠥᠯᠥ ᠶ᠋ᠢ ᠨᠢ ᠤᠤᠭᠤᠵᠤ᠂ ᠡᠵᠡᠨ ᠢ᠋ ᠨᠢ ᠭᠣᠯᠣᠬᠤ ᠪᠣᠯ ᠥᠨᠥᠳᠥᠷ ᠦ᠋ᠨ ᠪᠠᠰᠠ ᠨᠢᠭᠡᠨ ᠮᠤᠩᠬᠠᠭ ᠲᠠᠯᠠ ᠨᠢ ᠶᠤᠮ ᠃
ᠮᠠᠩᠨᠤᠭ ᠲᠠᠯᠠ ᠶ᠋ᠢ ᠮᠠᠯᠲᠠᠵᠤ ᠂ ᠮᠠᠯ ᠰᠦᠷᠦᠭ ᠢ᠋ ᠬᠣᠷᠢᠬᠤ ᠪᠤᠯ ᠲᠥᠷᠥ ᠶᠢᠨ ᠪᠣᠳᠣᠯᠭᠠ ᠶ᠋ᠢᠨ ᠪᠠᠰᠠ ᠨᠢᠭᠡᠨ ᠡᠨᠳᠡᠭᠦᠷᠡᠯ ᠨᠢ ᠶᠤᠮ ᠃
ᠮᠤᠩᠬᠠᠷᠠᠵᠤ ᠶᠠᠪᠤᠭᠠ ᠪᠣᠯ ᠪᠦᠷ ᠮᠠᠯᠴᠢᠨ ᠠᠷᠠᠳ ᠠ᠋ᠴᠠ ᠪᠣᠯᠤᠯᠠ ᠭᠡᠳᠡᠭ ᠪᠣᠯ ᠂ ᠣᠳᠣ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠠᠳᠠᠭ ᠬᠡᠯᠡᠯᠭᠡ ᠨᠢ ᠶᠤᠮ ᠃
ᠪᠡᠯᠴᠢᠭᠡᠷ ᠲᠦᠰᠢᠵᠦ ᠮᠠᠯᠵᠢᠬᠤ ᠨᠢ ᠂ ᠪᠡᠷᠬᠡᠰᠢᠶᠡᠯ ᠳ᠋ᠦ᠍ ᠲᠤᠯᠭᠠᠷᠠᠵᠤ ᠪᠠᠢᠬᠤ ᠪᠣᠯ ᠦᠨᠡᠨ ᠶᠠᠪᠤᠳᠠᠯ ᠠ᠋ !
ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠴᠢᠷᠮᠠᠢᠭᠠᠳ ᠂ ᠪᠣᠳᠠᠲᠠᠢ ᠣᠷᠣᠯᠭᠠ ᠣᠯᠬᠤ ᠦᠭᠡᠢ ᠨᠢ ᠪᠠᠰᠠ ᠦᠨᠡᠨ ᠬᠥᠭᠡᠷᠦᠬᠦᠢ ᠠ᠋ !
ᠪᠤᠷᠤᠭᠤ ᠵᠥᠪ ᠣᠯᠠᠨ ᠬᠤᠪᠢᠰᠤᠯ ᠲᠠᠢ ᠪᠠᠢᠳᠠᠭ ᠂ ᠥᠨᠥ ᠶ᠋ᠢᠨ ᠨᠡᠢᠭᠡᠮ ᠳ᠋ᠦ᠍ ᠪᠣᠰᠴᠤ ᠵᠣᠭᠰᠣᠬᠤ ᠳ᠋ᠤ᠌ ᠪᠠᠰᠠ ᠨᠡᠭᠡᠷᠡᠨ ᠬᠦᠴᠢᠷᠲᠡᠢ
ᠪᠤᠷᠬᠠᠨ ᠰᠡᠳᠬᠢᠯᠲᠦ ᠮᠠᠯᠴᠢᠨ ᠳ᠋ᠤ᠌ ᠪᠣᠷᠣᠭᠠᠨ ᠪᠠᠰᠠ ᠣᠷᠣᠬᠤ ᠦᠭᠡᠢ ᠂ ᠪᠡᠯᠴᠢᠭᠡᠷ ᠪᠠᠰᠠ ᠤᠷᠭᠤᠬᠤ ᠦᠭᠡᠢ ᠶ᠋ᠢ ᠶᠠᠭᠠᠬᠢᠶᠠ!
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠵᠠᠶᠠᠭᠠ ᠮᠠᠭᠤᠳᠠᠪᠠᠯ ᠂ ᠮᠣᠩᠭᠣᠯ ᠤᠷᠤᠭᠤᠳᠠᠬᠤ ᠦᠭᠡᠢ ᠭᠡᠳ ᠶᠠᠭᠠᠬᠢᠬᠤᠪ ⁉
ᠮᠠᠯᠵᠢᠵᠤ ᠠᠮᠢᠳᠤᠷᠠᠬᠤ ᠳ᠋ᠤ᠌ ᠬᠦᠴᠢᠷᠲᠡᠢ ᠪᠣᠯᠤᠭᠰᠠᠨ ᠠ᠋ᠴᠠ ᠂ ᠮᠠᠯᠴᠢᠳ ᠥᠷᠢᠳᠡᠬᠦ ᠦᠭᠡᠢ ᠭᠡᠳ ᠶᠠᠭᠠᠬᠢᠬᠤᠪ ⁉
ᠮᠠᠭᠲᠠᠭᠠᠯ ᠪᠤᠶᠤ ᠵᠢᠭᠤᠯᠴᠢᠯᠠᠯ ᠢ᠋ᠶ᠋ᠠᠷ ᠯᠠ ᠂ ᠮᠠᠯᠴᠢᠨ ᠤ᠋ ᠠᠮᠢᠳᠤᠷᠠᠯ ᠢ᠋ ᠣᠢᠯᠠᠭᠠᠪᠠᠯ ᠳᠠ ᠴᠢᠬᠢᠶᠠᠳᠤᠷᠠᠤ ᠁
ᠮᠠᠷᠭᠠᠰᠢ ᠶ᠋ᠢᠨ ᠬᠥᠭᠡᠷᠦᠬᠦᠢ ᠮᠠᠯᠴᠢᠳ ᠠ᠋ᠴᠠ ᠦᠢᠯᠡᠴᠢᠯᠡᠭᠡ ᠪᠤᠶᠤ ᠤᠳᠤᠷᠢᠳᠤᠯᠭᠠ ᠳ᠋ᠤ᠌ ᠡᠰᠡᠷᠭᠦᠴᠡᠯ ᠲᠠᠯᠪᠢᠨᠠ ᠨᠡᠭᠡᠷᠡᠨ!
ᠡᠵᠡᠨ ᠦᠭᠡᠢ ᠨᠤᠲᠤᠭ ᠂ ᠠᠲᠠᠷ ᠬᠡᠭᠡᠷᠡ ᠲᠠᠯᠠ ᠭᠡᠮᠡᠨ ᠮᠠᠯᠴᠢᠳ ᠤ᠋ᠨ ᠪᠡᠯᠴᠢᠭᠡᠷ ᠢ᠋ ᠣᠢᠯᠠᠭᠠᠵᠤ ᠪᠣᠯᠬᠤ ᠦᠭᠡᠢ ᠣᠳᠣ!
ᠡᠷᠬᠡ ᠠᠳᠬᠤᠵᠤ ᠨᠣᠶᠠᠷᠬᠠᠯ ᠶᠠᠪᠤᠭᠤᠯᠬᠤ ᠳ᠋ᠤ᠌ ᠪᠠᠨ ᠂ ᠡᠯᠡ ᠲᠠᠯᠠ ᠤ᠋ᠳ ᠢ᠋ ᠡᠪᠯᠡᠭᠦᠯᠵᠦ ᠰᠠᠢᠬᠠᠨ ᠪᠣᠳᠣᠭᠠᠷᠠᠢ ᠳᠠ !
ᠡᠪᠡᠷ ᠲᠡᠢ ᠦᠬᠡᠷ ᠂ ᠡᠵᠡᠨ ᠲᠡᠢ ᠰᠦᠷᠦᠭ ᠦ᠋ᠳ ᠦ᠋ᠨ ᠬᠢᠨᠢ ᠪᠡᠯᠴᠢᠭᠡᠷ ᠪᠠ ᠨᠤᠲᠤᠭ ᠨᠢ ᠪᠠᠢᠭᠰᠠᠨ ᠶᠤᠮ ᠰᠢᠦ ᠲᠡᠷᠡ ᠴᠢᠨᠢ ᠁
ᠡᠷᠡᠯᠬᠡᠭ ᠳᠠᠢᠴᠢᠨ ᠳᠡᠭᠡᠳᠦᠰ ᠦ᠋ᠨ ᠮᠢᠨᠢ ᠂ ᠠᠮᠢ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠰᠣᠯᠢᠭᠰᠠᠨ ᠭᠠᠵᠠᠷ ᠰᠢᠷᠣᠢ ᠨᠢ ᠶᠤᠮ ᠰᠢᠦ ᠲᠡᠷᠡ ᠴᠢᠨᠢ
ᠥᠷᠥᠨᠡᠳᠠᠬᠢᠨ ᠤ᠋ ᠣᠳᠣᠬᠢᠴᠢᠯᠠᠭᠰᠠᠨ ᠠᠮᠢᠳᠤᠷᠠᠯ ᠴᠢᠨᠢ ᠪᠣᠯᠤᠯᠠ ᠭᠡᠳ ᠂ ᠰᠦ ᠪᠠ ᠮᠢᠬᠠ ᠲᠠᠢ ᠯᠠ ᠪᠠᠢᠳᠠᠭ ᠶᠤᠮ ᠳᠠ !
ᠥᠶᠥᠭ ᠲᠠᠷᠭᠤᠨ ᠮᠠᠯᠴᠢᠨ ᠮᠣᠩᠭᠣᠯ ᠤ᠋ᠳ ᠤ᠋ᠨ ᠮᠢᠨᠢ ᠂ ᠦᠶᠡ ᠤᠯᠠᠷᠢᠨ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠠᠷᠭᠠ ᠮᠠᠶᠢᠭ ᠨᠢ ᠶᠤᠮ ᠳᠡ !
ᠢᠳᠡᠬᠦ ᠳ᠋ᠡᠭᠡᠨ ᠴᠠᠳᠤᠭᠰᠠᠨ ᠦᠭᠡᠢ ᠬᠥᠮᠦᠰ ᠦ᠋ᠨ ᠰᠡᠳᠬᠢᠬᠦᠢ ᠪᠡᠷ ᠂ ᠥᠪᠡᠷ ᠦ᠋ᠨ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠢ᠋ ᠣᠢᠯᠠᠭᠠᠬᠤ ᠳ᠋ᠤ᠌ ᠬᠦᠷᠪᠡᠯ ᠳᠡ
ᠦᠬᠡᠷ ᠦ᠋ᠨ ᠮᠢᠬᠠᠨ ᠤ᠋ ᠠᠮᠲᠠᠲᠤ ᠪᠣᠷᠴᠠ ᠪᠠᠨ ᠂ ᠢᠯᠵᠠᠷᠠᠵᠤ ᠸᠠᠯᠠᠭᠰᠠᠨ ᠡᠮᠲᠦ ᠢᠳᠡᠭᠡᠨ ᠲᠡᠢ ᠵᠦᠢᠷᠯᠡᠭᠰᠡᠨ ᠤᠴᠢᠷ ᠮᠥᠨ ᠳᠡ ᠁
ᠮᠠᠯᠴᠢᠨ ᠲᠦᠮᠡᠨ ᠳ᠋ᠦ᠍ ᠬᠠᠨᠳᠤᠳᠠᠭ ᠣᠯᠠᠨ ᠨᠡᠢᠲᠡ ᠶ᠋ᠢᠨ ᠦᠢᠯᠡᠴᠢᠯᠡᠭᠡ ᠪᠤᠶᠤ ᠰᠠᠭᠤᠷᠢ ᠲᠥᠬᠥᠭᠡᠷᠦᠮᠵᠢ ᠦ᠋ᠳ ᠳᠤᠲᠠᠭᠳᠠᠵᠤ ᠪᠠᠢᠨᠠ ᠣᠳᠣ !
ᠮᠤᠬᠤᠷᠳᠠᠵᠤ ᠪᠠᠢᠳᠠᠭ ᠬᠥᠮᠦᠰ ᠲᠦ᠍ ᠴᠢᠭᠯᠡᠭᠰᠡᠨ ᠮᠡᠳᠡᠯᠭᠡ ᠂ ᠮᠡᠷᠭᠡᠵᠢᠯ ᠂ ᠲᠠᠪᠴᠠᠩ ᠂ ᠵᠣᠯ ᠵᠠᠪᠰᠢᠶᠠᠨ ᠤ᠋ᠳ ᠪᠠᠭᠠ ᠪᠠᠢᠨᠠ ᠥᠨᠥᠳᠥᠷ !
ᠮᠠᠭᠲᠠᠵᠤ ᠦᠯᠢᠶᠡᠳᠡᠭ ᠵᠠᠭᠤᠴᠢᠯᠠᠭᠤᠷ ᠤ᠋ᠳ ᠂ ᠣᠪᠣᠷ ᠂ ᠵᠣᠭᠰᠣᠯᠲᠠ ᠂ ᠦᠵᠡᠯᠲᠡ ᠪᠡᠨ ᠬᠤᠪᠢᠷᠠᠭᠤᠯᠬᠤ ᠴᠠᠭ ᠪᠣᠯᠵᠠᠢ ᠣᠳᠣ !
ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠦᠨᠳᠦᠰᠦᠨ ᠱᠠᠲᠤᠨ ᠳ᠋ᠤ᠌ ᠦᠢᠯᠡᠴᠢᠯᠡᠬᠦ ᠂ ᠲᠠᠨᠢᠯᠲᠠ ᠂ ᠤᠬᠠᠮᠰᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢᠯᠡᠭᠦᠯᠬᠦ ᠴᠢᠬᠤᠯᠠᠲᠠᠢ ᠣᠳᠣᠬᠠᠨᠠ
ᠮᠠᠯᠴᠢᠨ ᠪᠠ ᠮᠣᠩᠭᠣᠯ ᠬᠣᠶᠠᠷ ᠲᠥᠷᠥᠯᠬᠢ ᠡᠴᠡ ᠪᠡᠨ ᠬᠠᠷᠢᠴᠠᠭᠠ ᠲᠠᠢ ᠶ᠋ᠢ ᠮᠠᠨ ᠤ᠋ ᠦᠨᠳᠦᠰᠦᠲᠡᠨ ᠮᠡᠳᠡᠪᠡ ᠤᠤ ? ᠦᠭᠡᠢ ᠤᠤ ?
ᠮᠢᠬᠠ ᠪᠠ ᠰᠦ ᠨᠢ ᠰᠢᠮᠡ ᠲᠡᠵᠢᠭᠡᠯ ᠡᠯᠪᠡᠭ ᠪᠠᠢᠳᠠᠭ ᠢ᠋ ᠣᠳᠣᠬᠢᠴᠢᠯᠠᠭᠰᠠᠨ ᠨᠡᠢᠭᠡᠮ ᠰᠡᠳᠬᠢᠪᠡ ᠤᠤ ? ᠦᠭᠡᠢ ᠦᠣ ?
ᠮᠠᠯᠵᠢᠬᠤ ᠂ ᠲᠠᠷᠢᠶᠠᠯᠠᠬᠤ ᠂ ᠮᠠᠯᠲᠠᠳᠠᠭ ᠠᠭᠤᠷᠬᠠᠢ ᠭᠤᠷᠪᠠᠭᠤᠯᠠ ᠂ ᠠᠳᠠᠯᠢᠬᠠᠨ ᠴᠢᠬᠤᠯᠠ ᠪᠠᠢᠳᠠᠭ ᠢ᠋ ᠺᠠᠳ᠋ᠷ ᠳᠠᠷᠤᠭᠠ ᠤ᠋ᠳ ᠲᠠᠨᠢᠪᠠ ᠦᠣ ? ᠦᠭᠡᠢ ᠦᠣ ?
ᠮᠠᠰᠢᠨ ᠲᠧᠭᠨᠢᠭ ᠢ᠋ᠶ᠋ᠡᠷ ᠣᠳᠣᠬᠢᠴᠢᠯᠠᠬᠤ ᠪᠣᠯᠪᠠᠴᠤ ᠂ ᠮᠠᠯᠵᠢᠯ ᠤ᠋ᠨ ᠰᠣᠶᠣᠯ ᠲᠠᠯᠠ ᠨᠤᠲᠤᠭ ᠲᠤ᠌ ᠬᠠᠷᠢᠨ ᠲᠣᠬᠢᠷᠠᠳᠠᠭ ᠢ᠋ ᠬᠥᠮᠦᠰ ᠮᠡᠳᠡᠪᠡ ᠦᠣ ? ᠦᠭᠡᠢ ᠤᠣ ?
ᠨᠠᠷᠠᠨ ᠤ᠋ ᠳᠣᠣᠷᠠ ᠰᠦᠷᠦᠭ ᠢ᠋ᠶ᠋ᠡᠨ ᠬᠠᠷᠢᠭᠤᠯᠵᠤ ᠂ ᠨᠠᠷᠮᠠᠢ ᠮᠣᠩᠭᠣᠯ ᠢ᠋ ᠠᠴᠢᠶᠠᠯᠠᠵᠤ ᠶᠠᠪᠤᠳᠠᠭ ᠢ᠋ ᠮᠠᠯᠴᠢᠨ ᠬᠥᠮᠦᠨ ᠭᠡᠳᠡᠭ ᠃
ᠨᠤᠲᠤᠭ ᠤᠰᠤ ᠪᠠᠨ ᠪᠦᠲᠦᠭᠡᠨ ᠪᠠᠢᠭᠤᠯᠵᠤ ᠂ ᠨᠠᠢᠷᠰᠠᠭ ᠮᠣᠩᠭᠣᠯ ᠢ᠋ ᠶᠢᠷᠲᠢᠨᠴᠦ ᠳ᠋ᠦ᠍ ᠰᠣᠨᠢᠷᠬᠠᠭᠤᠯᠳᠠᠭ ᠢ᠋ ᠮᠠᠯᠴᠢᠨ ᠬᠥᠮᠦᠨ ᠭᠡᠳᠡᠭ ᠃
ᠨᠡᠷᠡ ᠠᠯᠳᠠᠷ ᠢ᠋ ᠬᠡᠢ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠬᠥᠭᠡᠭᠡᠴᠡᠯᠳᠦᠬᠦ ᠪᠢᠰᠢ ᠂ ᠨᠡᠢᠲᠡ ᠮᠣᠩᠭᠣᠯ ᠳ᠋ᠤ᠌ ᠵᠢᠳᠬᠦᠳᠡᠭ ᠢ᠋ ᠮᠠᠯᠴᠢᠨ ᠬᠥᠮᠦᠨ ᠭᠡᠳᠡᠭ ᠃
ᠨᠢᠷᠤᠭᠤ ᠨᠢ ᠴᠢᠳᠠᠯᠲᠠᠢ ᠂ ᠨᠢᠭᠤᠭᠳᠠᠮᠠᠯ ᠮᠥᠰᠥᠨ ᠲᠡᠢ ᠂ ᠨᠤᠭᠤᠴᠠᠭᠠᠨ ᠢ᠋ ᠲᠡᠰᠪᠦᠷᠢᠯᠡᠳᠡᠭ ᠬᠦᠯᠢᠴᠡᠩᠭᠦᠢ ᠬᠥᠮᠦᠰ ᠢ᠋ ᠮᠠᠯᠴᠢᠨ ᠬᠥᠮᠦᠨ ᠭᠡᠳᠡᠭ ᠃
2 ᠬᠥᠭᠡᠷᠦᠬᠦᠢ ᠮᠠᠯᠴᠢᠨ ᠪᠢᠳᠡ ᠨᠠᠷ ᠣᠳᠣ ᠶᠠᠭᠠᠬᠢᠯᠲᠠᠢ ᠪᠣᠢ ⁉
ᠬᠥᠳᠡᠭᠡ ᠨᠤᠲᠤᠭ ᠲᠠᠭᠠᠨ ᠰᠠᠭᠤᠭᠠᠳ ᠮᠠᠯ ᠢ᠋ᠶ᠋ᠠᠨ ᠮᠡᠯᠵᠢᠶᠡ ᠭᠡᠬᠦ ᠳ᠋ᠦ᠍ ᠂ 《 ᠬᠥᠭᠡᠭᠡᠵᠦ ᠬᠠᠰᠢᠶᠠᠯᠠᠬᠤ 》 ᠭᠡᠳ ᠠᠮᠤᠷ ᠰᠠᠭᠤᠯᠭᠠᠬᠤ ᠦᠭᠡᠢ ᠨᠢ ᠠᠶᠤᠮᠠᠷ ᠠ᠋ !
ᠬᠦᠦ ᠥᠬᠢᠨ ᠢ᠋ᠶ᠋ᠡᠨ ᠲᠦᠰᠢᠭᠡᠳ ᠬᠣᠲᠠ ᠣᠷᠣᠶᠠ ᠭᠡᠬᠦ ᠳ᠋ᠦ᠍ ᠂ 《 ᠬᠦᠴᠦᠲᠡᠢ ᠰᠠᠢᠬᠠᠨ 》 ᠠᠮᠢᠰᠬᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠳᠠᠭ ᠪᠣᠯᠬᠣᠷ ᠪᠠᠰᠠ ᠵᠢᠭᠰᠢᠮᠡᠷ ᠠ᠋
ᠬᠦᠴᠦ ᠶᠠᠪᠤᠭᠠᠳ ᠠᠮᠢᠳᠤᠷᠠᠶᠠ ᠭᠡᠬᠦ ᠳ᠋ᠦ᠍ ᠬᠥᠯᠥᠰᠥᠨ ᠵᠣᠭᠣᠰ ᠨᠢ ᠂ 《 ᠬᠢᠮᠳᠠ ᠮᠥᠷᠲᠡᠭᠡᠨ ᠬᠦᠷᠲᠡᠭᠡᠮᠵᠢ 》 ᠪᠠᠭᠠ ᠠ᠋ᠴᠠ ᠪᠠᠰᠠ ᠰᠢᠷᠭᠢᠮᠡᠷ ᠠ᠋ !
ᠬᠦᠷᠢᠶᠡᠯᠡᠵᠦ ᠰᠠᠭᠤᠭᠠᠳ ᠨᠠᠢᠷᠠᠯᠳᠤᠶᠠ ᠭᠡᠬᠦ ᠳ᠋ᠦ᠍ ᠂ 《 ᠬᠥᠵᠥᠷ ᠮᠠᠵᠢᠶᠠᠩ 》 ᠤ᠋ᠨ ᠵᠣᠭᠣᠰ ᠵᠤᠭᠠ ᠳ᠋ᠤᠨᠢ ᠪᠠᠰᠠ ᠬᠣᠨᠵᠢᠭᠳᠠᠮᠠᠷ ᠠ᠋ !
ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠠᠭᠤᠵᠢᠮ ᠠᠲᠠᠯᠠ ᠬᠥᠭᠡᠷᠦᠬᠦᠢ ᠮᠠᠨ ᠤ᠋ ᠮᠠᠯᠴᠢᠨ ᠬᠥᠮᠦᠨ ᠢ᠋ ᠂ ᠪᠠᠭᠲᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠨᠢ ᠶᠠᠭᠤᠨ ᠳ᠋ᠤ᠌ ᠪᠢᠯᠡ ⁉
ᠬᠥᠳᠡᠭᠡ ᠭᠡᠷ ᠲᠡᠭᠡᠨ ᠪᠢᠳᠡ ᠨᠠᠷ ᠨᠣᠮᠣᠬᠠᠨ ᠠᠷᠠᠳ ᠰᠠᠭᠤᠵᠤ ᠪᠠᠢᠲᠠᠯᠠ ᠪᠠᠨ ᠂ ᠬᠡᠷᠡᠭ ᠲᠦ᠍ ᠣᠷᠢᠶᠠᠭᠳᠠᠭᠠᠳ ᠪᠠᠢᠳᠠᠭ ᠨᠢ ᠶᠠᠭᠠᠬᠢᠭᠠᠳ ᠪᠢᠯᠡ⁉
ᠬᠥᠮᠦᠨ ᠪᠣᠯᠭᠠᠨ ᠡᠷᠬᠡ ᠲᠡᠭᠰᠢ ᠭᠡᠵᠦ ᠣᠨᠣᠯ ᠶᠣᠰᠣᠨ ᠳ᠋ᠠᠭᠠᠨ ᠶᠠᠷᠢᠳᠠᠭ ᠪᠠᠢᠭᠠᠳ ᠂ ᠬᠦᠷᠲᠡᠵᠦ ᠪᠢᠳᠡ ᠣᠯᠬᠤ ᠦᠭᠡᠢ ᠶ᠋ᠢᠨ ᠰᠢᠯᠲᠠᠭᠠᠨ ᠨᠢ ᠶᠠᠭᠤ ᠪᠢᠯᠡ ⁉
ᠬᠥᠳᠡᠭᠡ ᠬᠣᠲᠠ ᠳ᠋ᠤ᠌ ᠠᠳᠠᠯᠢᠬᠠᠨ ᠦᠢᠯᠡᠴᠢᠯᠡᠨᠡ ᠭᠡᠵᠦ ᠪᠠᠢᠭᠠᠳ ᠂ ᠬᠥᠭᠡᠷᠦᠬᠦᠢ ᠮᠠᠯᠴᠢᠨ ᠢ᠋ᠶ᠋ᠠᠨ ᠮᠠᠷᠲᠠᠭᠠᠳ ᠪᠠᠢᠬᠤ ᠨᠢ ᠶᠠᠭᠠᠬᠢᠭᠠᠳ ᠪᠢᠯᠡ ?
ᠮᠠᠯ ᠤᠨᠤᠭᠠ ᠪᠠᠷ ᠮᠠᠰᠢ ᠡᠯᠪᠡᠭ ᠪᠠᠢᠭᠰᠠᠨ ᠴᠠᠭ ᠦᠶᠡ ᠳ᠋ᠦ᠍ ᠂ ᠮᠠᠰᠢ ᠣᠯᠠᠨ 《 ᠭᠠᠢᠯᠢ ᠲᠠᠲᠠᠪᠤᠷᠢ 》 ᠤ᠋ᠳ ᠠᠪᠴᠤ ᠯᠠ ᠪᠠᠢᠭᠰᠠᠨ ᠶᠤᠮ ᠳᠠ !
ᠮᠠᠤ ᠽᠧ ᠳ᠋ᠦᠩ ᠦ᠋ᠨ ᠤᠷᠢᠶᠠᠯᠠᠭᠠ ᠶ᠋ᠢ ᠴᠤᠤᠷᠢᠶᠠᠲᠤᠨ ᠳᠠᠭᠠᠭᠠᠷᠠᠢ ᠭᠡᠳ ᠂ ᠮᠠᠯᠴᠢᠨ ᠬᠥᠮᠦᠨ ᠢ᠋ᠶ᠋ᠡᠨ 《 ᠤᠬᠠᠭᠤᠯᠵᠤ ᠯᠠ 》 ᠪᠠᠢᠭᠰᠠᠨ ᠶᠤᠮ ᠳᠠ !
ᠮᠠᠷᠭᠠᠰᠢ ᠶ᠋ᠢᠨ ᠠᠮᠢᠳᠤᠷᠠᠯ ᠴᠢᠨᠢ ᠵᠣᠯ ᠵᠢᠷᠭᠠᠯ ᠲᠠᠢ ᠪᠣᠯᠤᠨᠠ ᠭᠡᠳ ᠂ ᠮᠠᠯᠴᠢᠳ ᠤ᠋ᠳ ᠲᠤ᠌ 《 ᠶᠠᠷᠢᠵᠤ ᠯᠠ 》 ᠪᠠᠢᠭᠰᠠᠨ ᠶᠤᠮ ᠳᠠ !
ᠮᠤᠯᠭᠤ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠪᠢᠳᠡ ᠣᠳᠣ ᠪᠣᠳᠣᠭᠠᠳ ᠦᠵᠡᠬᠦ ᠳ᠋ᠦ᠍ ᠂ 《 ᠳᠡᠭᠡᠳᠦ ᠵᠢᠭᠠᠪᠤᠷᠢ ᠶᠤᠮ ᠦᠦ ? 》 ᠳᠠᠷᠤᠭᠠ ᠨᠣᠶᠠᠨ ᠶᠤᠮ ᠤᠤ ? ᠬᠠᠰᠢᠯᠠ ᠨᠢᠭᠡ ᠨᠢ ᠬᠤᠳᠠᠯ ᠳᠠ !
ᠬᠥᠮᠦᠨ ᠠᠮᠠ ᠪᠠᠭᠠ ᠪᠣᠯᠤᠭᠠᠳ ᠪᠠᠢᠬᠤ ᠶᠤᠮ ᠴᠢᠨᠢ ᠂ ᠬᠥᠨᠵᠢᠯᠡ ᠳᠦᠭᠦᠷᠡᠩ ᠬᠡᠦᠬᠡᠳ ᠲᠦᠷᠦᠶᠡ ᠮᠠᠨ ᠤ᠋ ᠮᠠᠯᠴᠢᠳ ᠃
ᠬᠥᠷᠥᠰᠥᠲᠦ ᠭᠠᠵᠠᠷ ᠢ᠋ ᠤᠷᠪᠠᠭᠤᠯᠤᠭᠠᠳ ᠪᠠᠢᠬᠤ ᠶᠤᠮ ᠴᠢᠨᠢ ᠂ ᠬᠦᠴᠦᠨ ᠦ᠌ ᠳᠣᠲᠣᠷᠠ ᠪᠠᠨ ᠰᠠᠨᠠᠯ ᠢ᠋ᠶ᠋ᠠᠨ ᠬᠡᠯᠡᠶᠡ ᠮᠠᠨ ᠤ᠋ ᠮᠠᠯᠴᠢᠳ
ᠬᠦᠦ ᠬᠡᠦᠬᠡᠨ ᠬᠠᠮᠢᠶᠠ ᠦᠭᠡᠢ ᠶᠡᠬᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠶᠠᠪᠤᠭᠰᠠᠨ ᠣᠶᠤᠲᠠᠨ ᠢ᠋ᠶ᠋ᠠᠨ ᠂ ᠴᠢᠬᠢᠨ ᠡᠴᠡ ᠨᠢ ᠴᠢᠷᠦᠭᠡᠳ ᠠᠪᠤᠭᠠᠳ ᠢᠷᠡᠶᠡ ᠬᠠᠵᠠᠭᠤ ᠳ᠋ᠠᠭᠠᠨ ᠃
ᠬᠦᠷᠲᠡᠭᠡᠵᠦ ᠤᠯᠤᠰ ᠪᠠ ᠣᠷᠣᠨ ᠠ᠋ᠴᠠ ᠥᠭᠳᠡᠭ ᠵᠣᠭᠣᠰ ᠢ᠋ ᠮᠢᠨᠢ ᠂ ᠬᠥᠨᠳᠡᠯᠡᠨ ᠡᠴᠡ ᠨᠢ ᠪᠢᠲᠡᠭᠡᠢ ᠰᠢᠯᠵᠢᠭᠦᠯᠦᠭᠡᠷᠡᠢ ᠭᠡᠵᠦ ᠰᠢᠭᠤᠳ ᠭᠤᠶᠤᠶᠠ ᠳᠠᠷᠤᠭᠠ ᠳ᠋ᠠᠭᠠᠨ
ᠬᠥᠳᠡᠭᠡ ᠨᠤᠲᠤᠭ ᠢ᠋ ᠪᠠᠢᠭᠤᠯᠬᠤ ᠡᠭᠦᠷᠭᠡ ᠶ᠋ᠢ 《 ᠬᠦᠴᠦᠨ ᠴᠢᠳᠠᠯᠲᠠᠢ 》 ᠨᠢ ᠮᠠᠯᠴᠢᠨ ᠶᠤᠮ ᠭᠡᠵᠦ ᠂ ᠲᠦᠯᠬᠢᠵᠦ ᠥᠭᠭᠦᠭᠡᠳ ᠯᠡ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠪᠠ ᠳᠠ ⁉
ᠬᠥᠭᠵᠢᠯᠲᠦ ᠰᠠᠢᠬᠠᠨ ᠵᠢᠷᠭᠠᠯᠲᠤ ᠢᠷᠡᠭᠡᠳᠦᠢ ᠶ᠋ᠢᠨ 《 ᠬᠤᠪᠢ ᠵᠠᠶᠠᠭᠠ 》 ᠶ᠋ᠢ ᠂ ᠬᠥᠳᠡᠭᠡ ᠶ᠋ᠢᠨ ᠪᠣᠷᠣ ᠮᠠᠯᠴᠢᠨ ᠪᠠᠰᠠ ᠠᠳᠠᠯᠢᠬᠠᠨ ᠡᠳ᠋ᠯᠡᠵᠦ ᠪᠣᠯᠤᠨᠠ ᠪᠠ ᠳᠠ⁉
ᠬᠥᠮᠦᠨ ᠪᠣᠯᠭᠠᠨ ᠳ᠋ᠤ᠌ ᠠᠳᠠᠯᠢ ᠲᠡᠭᠰᠢ ᠪᠡᠷ ᠬᠠᠨᠳᠤᠨᠠ ᠭᠡᠵᠦ ᠬᠠᠤᠯᠢ ᠴᠠᠭᠠᠵᠠ ᠳ᠋ᠤ᠌ ᠪᠢᠴᠢᠵᠦ ᠪᠠᠢᠭᠠᠳ ᠂ ᠬᠥᠭᠡᠷᠦᠬᠦᠢ ᠮᠠᠯᠴᠢᠨ ᠤ᠋ 《 ᠪᠡᠶᠡ ᠶ᠋ᠢᠨ ᠡᠷᠬᠡ 》 ᠳ᠋ᠦ᠍ ᠶᠠᠭᠤᠨ ᠳ᠋ᠤ᠌ ᠬᠠᠯᠳᠠᠨᠠ ᠪᠣᠢ ⁉
ᠬᠦᠴᠦ ᠶᠠᠪᠤᠭᠰᠠᠨ ᠬᠥᠯᠥᠰᠥᠨ ᠲᠠᠷᠢᠶᠠᠴᠢᠨ ᠪᠠᠰᠠ ᠥᠨᠥᠳᠥᠷ ᠪᠠᠶᠠᠵᠢᠵᠤ ᠪᠠᠢᠬᠤ ᠳ᠋ᠤ᠌ ᠂ 《 ᠬᠦᠵᠦᠭᠦᠦ ᠪᠡᠨ ᠰᠤᠨᠲᠠᠯᠠ 》 ᠵᠢᠳᠬᠦᠭᠰᠡᠨ ᠮᠠᠯᠴᠢᠨ ᠶᠠᠭᠠᠬᠢᠭᠠᠳ ᠶᠠᠳᠠᠭᠤ ᠪᠣᠯᠪᠠ ⁉
ᠶᠠᠳᠠᠭᠤᠷᠠᠳᠠᠭ ᠮᠠᠯᠴᠢᠨ ᠤ᠋ ᠠᠰᠠᠭᠤᠳᠠᠯ ᠳ᠋ᠤ᠌ ᠄ ᠨᠡᠢᠭᠡᠮ ᠦ᠋ᠨ ᠂ ᠠᠵᠤ ᠠᠬᠤᠢ ᠶ᠋ᠢᠨ ᠂ ᠠᠮᠢ ᠠᠬᠤᠢ ᠶ᠋ᠢᠨ ᠂ ᠵᠠᠬᠠ ᠳᠡᠯᠭᠡᠭᠦᠷ ᠦ᠋ᠨ ᠂ ᠲᠤᠰ ᠪᠡᠶᠡ ᠶ᠋ᠢᠨ ᠣᠯᠠᠨ ᠰᠢᠯᠲᠠᠭ ᠤ᠋ᠳ ᠪᠠᠢᠳᠠᠭ ᠶᠤᠮ ᠃
ᠶᠠᠳᠠᠭᠤᠯᠢᠭ ᠠᠮᠢᠳᠤᠷᠠᠯ ᠤ᠋ᠨ ᠠᠰᠠᠭᠤᠳᠠᠯ ᠳ᠋ᠤ᠌ ᠄ ᠺᠠᠳ᠋ᠷ ᠳᠠᠷᠤᠭᠠ ᠶ᠋ᠢᠨ ᠂ ᠦᠨᠡ ᠬᠠᠩᠰᠢ ᠶ᠋ᠢᠨ ᠂ ᠦᠵᠡᠯᠲᠡ ᠲᠠᠨᠢᠯᠲᠠ ᠶ᠋ᠢᠨ ᠂ ᠡᠷᠡᠭᠦᠯ ᠴᠢᠭᠢᠷᠠᠭ ᠤ᠋ᠨ ᠂ ᠬᠡᠪ ᠴᠢᠨᠠᠷ ᠤ᠋ᠨ ᠣᠯᠠᠨ ᠬᠦᠴᠣᠰᠤ ᠪᠠᠢᠳᠠᠭ ᠶᠤᠮ ᠃
ᠶᠠᠷᠰᠢᠭ ᠲᠠᠢ ᠠᠰᠠᠭᠤᠳᠠᠯ ᠳ᠋ᠤ᠌ ᠄ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢᠨ ᠲᠣᠭᠲᠠᠭᠠᠯ ᠤ᠋ᠨ ᠂ ᠠᠷᠠᠳᠴᠢᠯᠠᠯ ᠤ᠋ᠨ ᠂ ᠡᠷᠳᠡᠮ ᠮᠡᠳᠡᠯᠭᠡ ᠶ᠋ᠢᠨ ᠂ ᠡᠷᠬᠡ ᠴᠢᠯᠥᠭᠡᠨ ᠦ᠌ ᠣᠯᠠᠨ ᠲᠠᠯᠠ ᠶ᠋ᠢᠨ ᠰᠢᠯᠲᠠᠭ ᠪᠠᠢᠳᠠᠭ ᠶᠤᠮ ᠃
ᠶᠠᠷᠢᠶᠠ ᠤᠬᠠᠭᠤᠯᠤᠯ ᠤ᠋ᠨ ᠠᠰᠠᠭᠤᠳᠠᠯ ᠳ᠋ᠤ᠌ ᠄ ᠦᠨᠡᠨ ᠢ᠋ ᠨᠢᠭᠤᠵᠤ ᠂ ᠬᠤᠳᠠᠯ ᠢ᠋ᠶ᠋ᠠᠷ ᠬᠡᠯᠡᠬᠦ ᠂ ᠤᠳᠤᠷᠢᠳᠤᠯᠭᠠ ᠶ᠋ᠢ ᠮᠠᠭᠲᠠᠵᠤ ᠂ ᠠᠷᠠᠳ ᠢ᠋ ᠳᠠᠷᠤᠬᠤ ᠂ ᠲᠠᠯᠠ ᠥᠩᠭᠡ ᠬᠠᠷᠠᠬᠤ ᠵᠦᠢᠯ ᠪᠠᠢᠳᠠᠭ ᠶᠤᠮ ᠃
ᠡᠮᠦᠨᠡᠲᠦ ᠣᠷᠣᠨ ᠤ᠋ ᠵᠠᠷᠢᠮ ᠺᠠᠳ᠋ᠷ ᠳᠠᠷᠤᠭᠠ ᠪᠣᠯ ᠄ ᠠᠵᠢᠯ ᠳ᠋ᠠᠭᠠᠨ ᠦᠨᠡᠨᠴᠢ ᠂ ᠠᠷᠠᠳ ᠲᠠᠭᠠᠨ ᠠᠮᠠᠷᠠᠭ ᠂ ᠥᠪᠡᠷ ᠦ᠋ᠨ ᠪᠣᠳᠠᠲᠠᠢ ᠠ᠋ᠴᠠ ᠡᠭᠦᠰᠴᠦ ᠬᠢᠵᠦ ᠴᠢᠳᠠᠳᠠᠭ ᠨᠢ 《 ᠠᠶᠤᠮᠠᠷ 》 ᠃
ᠤᠮᠠᠷᠠᠲᠤ ᠣᠷᠣᠨ ᠤ᠋ ᠵᠠᠷᠢᠮ ᠺᠠᠳ᠋ᠷ ᠳᠠᠷᠤᠭᠠ ᠪᠣᠯ ᠄ ᠢᠳᠡᠵᠦ ᠤᠤᠭᠤᠬᠤ ᠨᠢ ᠳᠠᠪᠠᠭᠤ ᠂ ᠤᠷᠪᠠᠭᠠᠳ ᠭᠠᠷᠪᠠᠯ ᠮᠠᠷᠲᠠᠨᠠ ᠂ ᠥᠪᠡᠷ ᠦ᠋ᠨ ᠠᠵᠢᠯ ᠳ᠋ᠠᠭᠠᠨ ᠲᠥᠬᠥᠭᠡ ᠲᠣᠮᠣᠭᠠ ᠦᠭᠡᠢ ᠨᠢ 《 ᠬᠡᠴᠡᠭᠦᠦ 》 ᠃
ᠡᠮᠦᠨᠡᠲᠦ ᠣᠷᠣᠨ ᠤ᠋ ᠵᠠᠷᠢᠮ ᠺᠠᠳ᠋ᠷ ᠳᠠᠷᠤᠭᠠ ᠪᠣᠯ ᠄ 《 ᠦᠭᠡᠢ ᠶᠠᠭᠤᠮᠠ 》 ᠶ᠋ᠢ ᠡᠭᠦᠳᠴᠦ ᠬᠢᠨᠡ ᠂ ᠥᠷᠯᠥᠭᠡ ᠦᠳᠡᠰᠢ ᠦᠭᠡᠢ ᠴᠢᠷᠮᠠᠢᠨᠠ ᠂ ᠥᠷᠭᠡᠨ ᠣᠯᠠᠨ ᠢ᠋ᠶ᠋ᠠᠨ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠴᠢᠳᠠᠳᠠᠭ ᠃
ᠤᠮᠠᠷᠠᠲᠤ ᠣᠷᠣᠨ ᠤ᠋ ᠵᠠᠷᠢᠮ ᠺᠠᠳ᠋ᠷ ᠳᠠᠷᠤᠭᠠ ᠪᠣᠯ ᠄ 《 ᠦᠵᠡᠯ ᠰᠠᠨᠠᠭᠠ ᠨᠢ 》ᠶᠡᠬᠡ ᠬᠤᠪᠢᠰᠬᠠᠯᠴᠢ ᠂ ᠠᠭᠤᠳᠠᠯᠠᠵᠤ ᠮᠠᠯᠲᠠᠬᠤ ᠳ᠋ᠤ᠌ ᠶᠡᠬᠡ ᠰᠠᠢᠨ ᠂ ᠣᠯᠠᠨ ᠲᠦᠮᠡᠨ ᠢ᠋ᠶ᠋ᠡᠨ 《 ᠠᠶᠤᠯᠭᠠᠵᠤ ᠴᠢᠳᠠᠳᠠᠭ 》 ᠃
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠄ ᠡᠳᠦᠷ ᠦ᠋ᠨ ᠠᠵᠢᠯ ᠪᠣᠯ 《 ᠶᠡᠬᠡ ᠤᠷᠲᠤ 》 ᠪᠠᠢᠬᠤ ᠳ᠋ᠤ᠌ ᠂ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠪᠣᠯ ᠣᠬᠣᠷ ᠪᠥᠭᠡᠳ 《 ᠴᠣᠴᠢᠮᠠᠲᠠᠭᠠᠢ 》 ᠪᠠᠢᠳᠠᠭ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠳ᠋ᠦ᠍ ᠄ ᠥᠪᠡᠷ ᠦ᠋ᠨ ᠬᠡᠦᠬᠡᠳ ᠪᠣᠯ 《 ᠭᠠᠳᠠᠭᠰᠢ ᠪᠠᠨ ᠶᠠᠪᠤᠳᠠᠭ 》 ᠪᠠᠢᠬᠤ ᠳ᠋ᠤ᠌ ᠂ ᠨᠠᠩᠭᠢᠶᠠᠳ ᠤ᠋ᠨ ᠬᠥᠮᠦᠨ ᠪᠣᠯ 《 ᠨᠠᠭᠠᠰᠢ ᠪᠠᠨ 》 ᠢᠷᠡᠳᠡᠭ ᠪᠠᠢᠳᠠᠭ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠳ᠋ᠦ᠍ ᠄ ᠤᠳᠤᠷᠢᠳᠤᠯᠭᠠ ᠺᠠᠳ᠋ᠷ ᠪᠣᠯ 《 ᠬᠠᠯᠠᠲᠠᠢ ᠬᠠᠲᠠᠭᠤ 》 ᠮᠥᠷᠲᠡᠭᠡᠨ ᠮᠣᠰᠢᠭᠤ ᠣᠨᠣᠯ ᠢ᠋ᠶ᠋ᠠᠷ ᠮᠠᠯᠠᠭᠠᠢᠳᠠᠵᠤ ᠢᠷᠡᠬᠦ ᠨᠢ 《 ᠬᠡᠴᠡᠭᠦᠦ 》 ᠪᠠᠢᠳᠠᠭ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠳ᠋ᠦ᠍ ᠄ ᠡᠪᠦᠯ ᠵᠤᠨ ᠤ᠋ 《 ᠢᠯᠭᠠᠭᠠ ᠦᠭᠡᠢ 》 ᠦᠨᠡᠨ ᠬᠤᠳᠠᠯ ᠤ᠋ᠨ 《 ᠪᠠᠷᠢᠮᠵᠢᠶᠠ 》 ᠭᠡᠵᠦ ᠪᠠᠷᠤᠭ ᠲᠥᠯᠥᠪ ᠣᠷᠣᠰᠢᠬᠤ ᠦᠭᠡᠢ ᠪᠠᠢᠳᠠᠭ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠳ᠋ᠤ᠌ ᠄ 《 ᠮᠠᠩᠨᠤᠭ ᠨᠣᠭᠣᠭᠠᠨ ᠲᠠᠯᠠ 》 ᠮᠢᠨᠢ ᠬᠡᠵᠢᠶᠡ ᠳᠠᠬᠢᠵᠤ ᠢᠷᠡᠳᠡᠭ ᠪᠣᠯ ᠠ᠋ ⁉ ᠭᠡᠵᠦ ᠡᠴᠢᠭᠡ ᠲᠡᠭᠷᠢ ᠡᠴᠡ ᠪᠡᠨ ᠠᠰᠠᠭᠤᠶᠠ ᠁
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠰᠦᠷᠦᠭ ᠲᠦ᠍ ᠄ 《 ᠡᠪᠡᠰᠦ ᠪᠡᠯᠴᠢᠭᠡᠷ 》 ᠬᠡᠵᠢᠶᠡ ᠳᠠᠬᠢᠵᠤ ᠨᠣᠭᠣᠭᠠᠷᠠᠵᠤ ᠤᠷᠭᠤᠳᠠᠭ ᠪᠣᠯ ᠠ᠋ ⁉ ᠭᠡᠵᠦ ᠡᠬᠡ ᠭᠠᠵᠠᠷ ᠠ᠋ᠴᠠ ᠪᠠᠨ ᠠᠰᠠᠭᠤᠶᠠ ᠁
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠤᠰᠤ ᠤᠮᠳᠠᠭᠠᠨ ᠨᠢ ᠄ ᠬᠡᠵᠢᠶᠡ ᠳᠠᠬᠢᠵᠤ 《 ᠰᠢᠷᠭᠢᠵᠦ ᠬᠠᠲᠠᠬᠤ 》 ᠦᠭᠡᠢ ᠤᠷᠤᠰᠳᠠᠭ ᠪᠣᠯᠳᠠᠭ ᠪᠣᠯ ᠠ᠋ ⁉ ᠭᠡᠵᠦ ᠠᠭᠤᠯᠠ ᠬᠠᠢᠷᠬᠠᠨ ᠠ᠋ᠴᠠ ᠪᠠᠨ ᠠᠰᠠᠭᠤᠶᠠ ᠁
ᠮᠠᠯᠴᠢᠨ ᠬᠥᠮᠦᠨ ᠦ᠌ ᠵᠣᠯ ᠵᠢᠷᠭᠠᠯ ᠨᠢ ᠄ ᠬᠡᠵᠢᠶᠡ ᠪᠤᠰᠤᠳ ᠲᠠᠢ ᠠᠳᠠᠯᠢᠬᠠᠨ ᠪᠣᠯᠵᠤ 《 ᠢᠷᠡᠳᠡᠭ 》 ᠪᠢᠯᠡ ᠠ᠋ ⁉ ᠭᠡᠵᠦ ᠤᠳᠤᠷᠢᠳᠤᠯᠭᠠ ᠺᠠᠳ᠋ᠷ ᠠ᠋ᠴᠠ ᠪᠠᠨ ᠠᠰᠠᠭᠤᠶᠠ ᠁
3 ᠮᠠᠯᠴᠢᠨ ᠬᠥᠮᠦᠨ ᠦᠨᠡ ᠥᠷᠲᠡᠭ ᠲᠡᠢ ᠪᠣᠯᠤᠭᠠᠳ ᠢᠷᠡᠪᠡᠯ
ᠤᠷᠭᠠ ᠪᠠᠨ ᠪᠠᠷᠢᠭᠰᠠᠨ ᠮᠠᠯᠴᠢᠨ ᠬᠥᠮᠦᠨ ᠤᠷᠢᠳᠤ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠦᠨᠡᠨᠳᠡᠭᠡᠨ ᠶᠡᠬᠡᠬᠡᠨ ᠦᠨᠡ ᠥᠷᠲᠡᠭ ᠲᠡᠢ ᠪᠠᠢᠭᠰᠠᠨ ᠶᠤᠮ ᠰᠢᠦ ᠮᠣᠩᠭᠣᠯ ᠳ᠋ᠤ᠌
ᠤᠬᠠᠭᠤᠯᠤᠯ ᠵᠠᠭᠤᠴᠢᠯᠠᠭᠤᠷ ᠤ᠋ᠨ ᠵᠣᠭᠰᠣᠴᠠ ᠦᠭᠡ ᠶᠠᠷᠢᠶᠠ ᠶ᠋ᠢᠨ ᠣᠨᠳᠣᠣᠰᠢᠯ ᠠ᠋ᠴᠠ ᠪᠣᠯᠵᠤ ᠂ ᠥᠪᠡᠷ ᠦ᠋ᠨ ᠬᠥᠭᠡᠷᠦᠬᠦᠢ ᠮᠠᠯᠴᠢᠨ ᠢ᠋ᠶ᠋ᠠᠨ ᠥᠭᠡᠳᠡ ᠦᠭᠡᠢ ᠪᠡᠷ ᠤᠬᠠᠪᠠ ᠪᠢᠳᠡ ᠨᠠᠷ ᠁
ᠤᠵᠠᠭᠤᠷ ᠮᠣᠩᠭᠣᠯ ᠰᠣᠶᠣᠯ ᠢ᠋ ᠤᠯᠠᠮᠵᠢᠯᠠᠵᠤ ᠬᠠᠳᠠᠭᠠᠯᠠᠵᠤ ᠢᠷᠡᠭᠰᠡᠨ ᠮᠠᠯᠴᠢᠨ ᠬᠥᠮᠦᠨ ᠦ᠌ ᠠᠴᠢ ᠭᠠᠪᠢᠶᠠ ᠶ᠋ᠢ ᠣᠳᠣ ᠮᠡᠳᠡᠷᠡᠬᠦ ᠦᠭᠡᠢ ᠪᠣᠯ ᠳᠠ
ᠥᠪᠡᠷ ᠦ᠋ᠨ ᠲᠡᠦᠬᠡ ᠰᠣᠶᠣᠯ ᠦᠷᠭᠦᠯᠵᠢᠯᠡᠬᠦ ᠰᠠᠢᠬᠠᠨ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠥᠪᠡᠷᠲᠡᠭᠡᠨ ᠪᠢᠳᠡ ᠨᠠᠷ ᠮᠡᠳᠡᠬᠦ ᠦᠭᠡᠢ ᠪᠣᠯᠤᠨᠠ ᠰᠢᠦ ᠳᠡ !
ᠮᠠᠯᠴᠢᠨ ᠬᠥᠮᠦᠨ ᠦᠨᠡ ᠥᠷᠲᠡᠭ ᠲᠡᠢ ᠪᠣᠯᠤᠭᠠᠳ ᠢᠷᠡᠪᠡᠯ ᠂ ᠮᠠᠯ ᠤ᠋ᠨ ᠮᠢᠬᠠ ᠱᠥᠯᠥ ᠪᠤᠶᠤ ᠰᠦ ᠴᠠᠭᠠ ᠶ᠋ᠢᠨ ᠦᠨᠡ ᠬᠠᠩᠰᠢ ᠨᠢ ᠥᠰᠦᠭᠡᠳ ᠢᠷᠡᠳᠡᠭ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠦᠨᠡ ᠥᠷᠲᠡᠭ ᠲᠡᠢ ᠪᠣᠯᠤᠭᠠᠳ ᠢᠷᠡᠪᠡᠯ ᠂ ᠮᠣᠩᠭᠣᠯ ᠤ᠋ᠨ ᠲᠠᠯᠠ ᠨᠤᠲᠤᠭ ᠪᠠ ᠮᠠᠯ ᠰᠦᠷᠦᠭ ᠨᠢ ᠬᠥᠷᠥᠩᠭᠡᠵᠢᠵᠦ ᠬᠣᠭᠰᠢᠳᠠᠭ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠦᠨᠡ ᠥᠷᠲᠡᠭ ᠲᠡᠢ ᠪᠣᠯᠤᠭᠠᠳ ᠢᠷᠡᠪᠡᠯ ᠂ ᠮᠣᠩᠭᠣᠯᠵᠢᠨ ᠭᠤᠸᠠ ᠣᠶᠤᠲᠠᠨ ᠬᠡᠦᠬᠡᠨ ᠮᠠᠯᠴᠢᠨ ᠵᠠᠯᠠᠭᠤ ᠲᠠᠢ ᠠᠮᠢᠳᠤᠷᠠᠬᠤ ᠶ᠋ᠢ ᠪᠣᠳᠣᠭᠠᠳ ᠣᠯᠬᠤ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠦᠨᠡ ᠥᠷᠲᠡᠭ ᠲᠡᠢ ᠪᠣᠯᠤᠭᠠᠳ ᠢᠷᠡᠪᠡᠯ ᠂ ᠮᠤᠰᠢᠭᠠᠢ ᠠᠰᠬᠠᠨ ᠢ᠋ᠶ᠋ᠠᠷ ᠬᠠᠷᠢ ᠨᠤᠲᠤᠭ ᠲᠤ᠌ ᠵᠤᠷᠰᠢᠳᠠᠭ ᠬᠥᠮᠦᠰ ᠨᠢ ᠪᠤᠴᠠᠭᠠᠳ ᠢᠷᠡᠳᠡᠭ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠦᠨᠡ ᠥᠷᠲᠡᠭ ᠲᠡᠢ ᠪᠠᠢᠬᠤ ᠠ᠋ᠴᠠ ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠲᠡᠷᠢᠭᠦᠯᠡᠭᠴᠢ ᠥᠪᠡᠷ ᠦ᠋ᠨ ᠲᠠᠢᠰᠠᠨ ᠠ᠋ᠴᠠ ᠪᠠᠨ ᠪᠠᠭᠤᠭᠠᠳ ᠡᠩ ᠦ᠋ᠨ ᠮᠠᠯᠴᠢᠨ ᠲᠠᠢ ᠪᠥᠵᠢᠭᠯᠡᠳᠡᠭ ᠪᠣᠯᠤᠭᠰᠠᠨ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠦᠨᠡ ᠥᠷᠲᠡᠭ ᠲᠡᠢ ᠪᠠᠢᠳᠠᠭ ᠠ᠋ᠴᠠ ᠂ ᠠᠮᠠᠷᠠᠯᠲᠠ ᠪᠠᠨ ᠠᠪᠤᠭᠰᠠᠨ ᠸᠸᠨ ᠵᠢᠶᠠ ᠪᠤᠤ ᠦᠨᠳᠦᠰᠦᠲᠡᠨ ᠦ᠌ ᠰᠤᠷᠭᠠᠭᠤᠯᠢ ᠶ᠋ᠢ ᠡᠷᠭᠢᠵᠦ ᠦᠵᠡᠭᠰᠡᠨ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠦᠨᠡ ᠥᠷᠲᠡᠭ ᠲᠡᠢ ᠪᠠᠢᠳᠠᠭ ᠠ᠋ᠴᠠ ᠭᠠᠳᠠᠭᠠᠳᠤ ᠶᠠᠪᠤᠳᠠᠯ ᠤ᠋ᠨ ᠰᠠᠢᠳ ᠸᠠᠩ ᠢ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠦᠬᠡᠷ ᠬᠣᠨᠢᠨ ᠮᠢᠬᠠ ᠶ᠋ᠢ ᠮᠠᠭᠲᠠᠬᠤ ᠪᠣᠯᠤᠭᠰᠠᠨ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠦᠨᠡ ᠥᠷᠲᠡᠭ ᠲᠡᠢ ᠪᠠᠢᠳᠠᠭ ᠠ᠋ᠴᠠ ᠤᠯᠤᠰ ᠤ᠋ᠨ ᠲᠡᠷᠢᠭᠦᠯᠦᠭᠴᠢ ᠰᠢ ᠵᠢᠨ ᠫᠢᠩ ᠡᠪᠦᠯ ᠦ᠋ᠨ ᠴᠠᠰᠤᠨ ᠳ᠋ᠤ᠌ ᠡᠩ ᠦ᠋ᠨ ᠮᠠᠯᠴᠢᠳ ᠢ᠋ ᠦᠵᠡᠵᠦ ᠬᠠᠯᠠᠮᠵᠢᠯᠠᠵᠤ ᠪᠠᠢᠭᠰᠠᠨ ᠶᠤᠮ ᠃
ᠮᠣᠩᠭᠣᠯ ᠰᠣᠶᠣᠯ ᠢ᠋ ᠥᠪᠯᠡᠵᠦ ᠬᠠᠮᠠᠭᠠᠯᠠᠵᠤ ᠬᠥᠭᠵᠢᠭᠦᠯᠵᠦ ᠶᠠᠪᠤᠶᠠ ᠭᠡᠪᠡᠯ ᠂ ᠮᠠᠯᠴᠢᠨ ᠬᠥᠮᠦᠨ ᠢ᠋ᠶ᠋ᠡᠨ ᠵᠠᠪᠠᠯ ᠬᠦᠨᠳᠦᠳᠬᠡᠵᠦ ᠳᠡᠭᠡᠵᠢᠯᠡᠬᠦ ᠤᠴᠢᠷ ᠲᠠᠢ ᠶᠤᠮ ᠃
ᠮᠣᠩᠭᠣᠯ ᠦᠭᠡ ᠬᠡᠯᠡ ᠦᠰᠦᠭ ᠪᠢᠴᠢᠭ ᠢ᠋ᠶ᠋ᠡᠨ ᠪᠠᠶᠠᠯᠢᠭᠵᠢᠭᠤᠯᠬᠤ ᠪᠠᠷ ᠠᠵᠢᠯᠯᠠᠨᠠ ᠭᠡᠪᠡᠯ ᠂ ᠮᠠᠯᠴᠢᠨ ᠬᠥᠮᠦᠨ ᠦ᠌ ᠠᠮᠢᠳᠤᠷᠠᠯ ᠰᠡᠳᠬᠢᠬᠦᠢ ᠨᠢ ᠰᠠᠭᠤᠷᠢ ᠪᠣᠯᠳᠠᠭ ᠶᠤᠮ ᠃
ᠮᠣᠩᠭᠣᠯ ᠠᠵᠤ ᠠᠮᠢᠳᠤᠷᠠᠯ ᠰᠣᠶᠣᠯ ᠪᠣᠯᠪᠠᠰᠤᠨ ᠢ᠋ᠶ᠋ᠠᠨ ᠮᠥᠩᠬᠡ ᠬᠠᠳᠠᠭᠠᠯᠠᠬᠤ ᠭᠡᠪᠡᠯ ᠂ ᠮᠠᠯᠴᠢᠨ ᠬᠥᠮᠦᠨ ᠦ᠌ ᠪᠣᠳᠠᠲᠠᠢ ᠠᠵᠢᠯ ᠦᠢᠯᠡᠳᠦᠯᠭᠡ ᠨᠢ ᠲᠤᠷᠰᠢᠯᠭᠠ ᠬᠠᠩᠭᠠᠳᠠᠭ ᠶᠤᠮ ᠃
ᠮᠣᠩᠭᠣᠯ ᠤ᠋ᠨ ᠢᠷᠡᠭᠡᠳᠦᠢ ᠶ᠋ᠢ ᠰᠣᠯᠣᠩᠭᠠᠷᠠᠭᠰᠠᠨ ᠰᠠᠢᠬᠠᠨ ᠪᠣᠯᠭᠠᠨᠠ ᠭᠡᠪᠡᠯ ᠂ ᠰᠢᠨᠡ ᠳᠡᠭᠡᠳᠦ ᠮᠡᠷᠭᠡᠵᠢᠯ ᠢ᠋ᠶ᠋ᠡᠷ ᠮᠠᠯᠴᠢᠨ ᠠᠷᠠᠳ ᠲᠤ᠌ ᠦᠢᠯᠡᠴᠢᠯᠡᠬᠦ ᠴᠢᠬᠤᠯᠠ ᠲᠠᠢ ᠶᠤᠮ ᠃
ᠮᠠᠯᠴᠢᠨ ᠠᠪᠤ ᠦᠨᠡᠲᠡᠢ ᠪᠣᠯᠤᠭᠠᠳ ᠢᠷᠡᠪᠡᠯ ᠂ ᠮᠠᠰᠢ ᠣᠯᠠᠨ ᠬᠣᠲᠠ ᠬᠥᠳᠡᠭᠡ ᠶ᠋ᠢᠨ ᠬᠡᠦᠬᠡᠳ ᠦ᠋ᠳ ᠨᠢ ᠲᠡᠭᠦᠨ ᠢ᠋ ᠲᠡᠵᠢᠭᠡᠨᠡ ᠭᠡᠵᠦ ᠪᠤᠯᠢᠶᠠᠯᠳᠤᠬᠤ ᠶᠤᠮ ᠃
ᠮᠠᠯᠴᠢᠨ ᠪᠦᠰᠡᠭᠦᠢ ᠬᠦᠨᠳᠦᠲᠡᠢ ᠪᠣᠯᠤᠭᠠᠳ ᠢᠷᠡᠪᠡᠯ ᠂ ᠮᠢᠩᠭᠠᠨ ᠲᠦᠮᠡᠨ ᠲᠡᠢ ᠲᠠᠷᠭᠤᠨ ᠪᠠᠶᠠᠨ ᠲᠡᠭᠦᠨ ᠲᠡᠢ ᠠᠮᠢᠳᠤᠷᠠᠬᠤ ᠭᠡᠵᠦ ᠭᠤᠶᠤᠴᠢᠯᠠᠭᠠᠳ ᠢᠷᠡᠬᠦ ᠶᠤᠮ ᠃
ᠮᠠᠯᠴᠢᠨ ᠬᠦᠦ ᠬᠣᠪᠣᠷ ᠪᠣᠯᠤᠭᠠᠳ ᠢᠷᠡᠪᠡᠯ ᠂ ᠮᠠᠰᠢ ᠦᠵᠡᠰᠬᠦᠯᠡᠩ ᠬᠣᠲᠠ ᠶ᠋ᠢᠨ ᠬᠡᠦᠬᠡᠨ ᠪᠣᠷᠣ ᠬᠦᠦ ᠶ᠋ᠢ ᠪᠣᠷᠪᠢ ᠵᠣᠭᠰᠣᠯ ᠦᠭᠡᠢ ᠳᠠᠭᠠᠭᠠᠳ ᠢᠷᠡᠬᠦ ᠶᠤᠮ ᠃
ᠮᠠᠯᠴᠢᠨ ᠬᠡᠦᠬᠡᠨ ᠬᠥᠷᠥᠩᠭᠡᠵᠢᠵᠦ ᠪᠠᠶᠠᠵᠢᠭᠠᠳ ᠢᠷᠡᠪᠡᠯ ᠂ ᠮᠠᠭᠲᠠᠭᠠᠯ ᠳ᠋ᠤ᠌ ᠳᠤᠷᠠᠲᠠᠢ ᠳᠠᠷᠤᠭᠠ ᠶ᠋ᠢᠨ ᠰᠠᠳᠤᠨ ᠤ᠋ᠳ ᠳᠠᠭᠠᠭᠠᠳ ᠳᠡᠷᠪᠡᠯᠵᠡᠳᠡᠭ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠤᠤᠯ ᠳ᠋ᠤ᠌ ᠦᠨᠡ ᠥᠷᠲᠡᠭ ᠦᠭᠡᠢ ᠪᠠᠢᠭᠰᠠᠨᠠ᠋ᠴᠠ ᠮᠠᠩᠨᠤᠭ ᠲᠠᠯᠠ ᠶ᠋ᠢ ᠨᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠤᠷᠪᠠᠭᠤᠯᠵᠤ ᠣᠩᠭᠢᠴᠢᠬᠤ ᠪᠠᠢᠭᠰᠠᠨ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠢ᠋ ᠦᠵᠡᠬᠦ ᠳᠤᠷᠠ ᠦᠭᠡᠢ ᠪᠠᠢᠭᠰᠠᠨ ᠦᠶᠡ ᠬᠥᠳᠡᠯᠮᠦᠷᠢ ᠪᠡᠷ ᠢ᠋ᠶ᠋ᠡᠨ ᠪᠠᠶᠠᠵᠢᠭᠰᠠᠨ ᠬᠥᠭᠡᠷᠦᠬᠦᠢ ᠮᠠᠯᠴᠢᠨ ᠢ᠋ ᠬᠤᠪᠢᠰᠬᠠᠯ ᠤ᠋ᠨ ᠡᠰᠡᠷᠭᠦᠴᠡᠭᠴᠢ ᠭᠡᠵᠦ ᠪᠣᠯᠭᠠᠵᠤ ᠪᠠᠢᠭᠰᠠᠨ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠢ᠋ ᠮᠠᠭᠤᠬᠠᠢ ᠨᠢᠳᠦ ᠪᠡᠷ ᠬᠠᠷᠠᠳᠠᠭ ᠦᠶᠡ ᠳ᠋ᠦ᠍ ᠭᠠᠢᠯᠢ ᠲᠠᠲᠠᠪᠤᠷᠢ ᠬᠦᠦ ᠮᠥᠩᠭᠥᠨ ᠦ᠌ ᠬᠢᠨᠢ ᠨᠣᠷᠮᠠ ᠨᠢ ᠥᠨᠳᠥᠷ ᠪᠠᠢᠭᠰᠠᠨ ᠶᠤᠮ ᠃
ᠮᠠᠯᠴᠢᠨ ᠬᠥᠮᠦᠨ ᠪᠠ ᠮᠣᠩᠭᠣᠯ ᠢ᠋ ᠠᠮᠢᠳᠤᠷᠠᠭᠤᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠬᠤ ᠦᠶᠡ ᠳ᠋ᠦ᠍ ᠮᠠᠯ ᠪᠡᠯᠴᠢᠭᠡᠷ ᠢ᠋ ᠨᠢ ᠬᠤᠷᠢᠶᠠᠵᠤ ᠬᠣᠲᠠ ᠥᠭᠡᠳᠡ ᠬᠥᠭᠡᠭᠡᠬᠦ ᠪᠣᠯᠳᠠᠭ ᠶᠤᠮ ᠃
ᠠᠮᠲᠠᠲᠠᠢ ᠮᠢᠬᠠ ᠢᠳᠡᠶᠡ ᠂ ᠠᠭᠰᠢᠭᠤᠨ ᠰᠦ ᠤᠤᠭᠤᠶᠠ ᠭᠡᠳᠡᠭ ᠬᠡᠷᠡᠭᠯᠡᠭᠡ ᠣᠷᠣᠰᠢᠵᠤ ᠯᠠ ᠪᠠᠢᠪᠠᠯ ᠂ ᠮᠠᠯᠴᠢᠨ ᠬᠥᠮᠦᠨ ᠦ᠌ ᠠᠵᠢᠯ ᠨᠢ ᠦᠨᠡ ᠥᠷᠲᠡᠭ ᠢ᠋ᠶ᠋ᠡᠷ ᠪᠦᠷᠢᠨ ᠶᠤᠮ ᠃
ᠠᠭᠤᠯᠠ ᠤᠰᠤ ᠪᠠᠨ ᠬᠠᠮᠠᠭᠠᠯᠠᠵᠤ ᠂ ᠡᠬᠡ ᠪᠠᠢᠭᠠᠯᠢ ᠪᠠᠨ ᠬᠠᠢᠷᠠᠯᠠᠬᠤ ᠤᠬᠠᠮᠰᠠᠷ ᠣᠷᠣᠰᠢᠵᠤ ᠯᠠ ᠪᠠᠢᠪᠠᠯ ᠂ ᠮᠠᠯᠴᠢᠨ ᠬᠥᠮᠦᠨ ᠦ᠌ ᠲᠠᠨᠢᠯᠲᠠ ᠬᠡᠵᠢᠶᠡᠳᠡ ᠵᠥᠪ ᠶᠤᠮ ᠃
ᠠᠭᠤᠳᠠᠮ ᠡᠨᠡᠷᠢᠩᠭᠦᠢ ᠰᠡᠳᠬᠢᠯ ᠂ ᠠᠭᠤᠤ ᠶᠡᠬᠡ ᠲᠡᠪᠴᠢᠶᠡᠷᠢᠲᠡᠢ ᠵᠠᠩ ᠮᠣᠷᠠᠯ ᠵᠥᠪ ᠪᠠᠢᠬᠤ ᠳ᠋ᠤ᠌ ᠯᠠ ᠬᠦᠷᠪᠡᠯ ᠂ ᠮᠠᠯᠴᠢᠨ ᠬᠥᠮᠦᠨ ᠦ᠌ ᠮᠥᠰᠥ ᠴᠢᠨᠠᠷ ᠬᠠᠮᠤᠭ ᠤ᠋ᠨ ᠰᠠᠢᠨ ᠶᠤᠮ ᠃
ᠠᠮᠢ ᠪᠡᠶᠡ ᠶ᠋ᠢᠨ ᠠᠵᠢᠯᠴᠢ ᠬᠥᠳᠡᠯᠮᠦᠷᠢ ᠪᠡᠷ ᠢ᠋ᠶ᠋ᠡᠨ ᠠᠷᠠᠳ ᠣᠯᠠᠨ ᠳ᠋ᠤ᠌ ᠦᠢᠯᠡᠴᠢᠯᠡᠬᠦ ᠥᠷᠲᠡᠭ ᠦ᠋ᠨ ᠦᠵᠡᠯᠲᠡ ᠶ᠋ᠢ ᠡᠷᠬᠢᠮᠯᠡᠳᠡᠭ ᠯᠡ ᠪᠣᠯ ᠮᠠᠯᠴᠢᠨ ᠤ᠋ ᠬᠠᠷᠢᠭᠤᠴᠠᠯᠭᠠ ᠬᠠᠮᠤᠭ ᠤ᠋ᠨ ᠳᠠᠷᠬᠠᠨ ᠶᠤᠮ ᠃
ᠠᠶᠤᠯ ᠦᠭᠡᠢ᠂ ᠰᠢᠮᠡ ᠲᠡᠵᠢᠭᠡᠯ ᠲᠡᠢ ᠠᠷᠢᠭᠤᠨ ᠴᠡᠪᠡᠷ ᠢᠳᠡᠭᠡᠨ ᠤᠮᠳᠠᠭᠠᠨ ᠤ᠋ᠳ ᠮᠠᠯᠴᠢᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠠᠮᠤᠭ ᠣᠯᠠᠨ ᠪᠠᠢᠳᠠᠭ ᠶᠤᠮ ᠃
ᠠᠷᠢᠭᠤᠨ ᠴᠡᠪᠡᠷ ᠠᠭᠠᠷ ᠠᠩᠬᠢᠯᠤᠮᠠ ᠰᠠᠢᠬᠠᠨ ᠴᠡᠴᠡᠭ ᠂ ᠷᠠᠰᠢᠶᠠᠨ ᠤᠰᠤ ᠮᠡᠲᠦ ᠰᠥᠮᠥᠰᠦ ᠦ᠋ᠳ ᠮᠠᠯᠴᠢᠨ ᠤ᠋ ᠣᠲᠣᠷ ᠲᠤ᠌ ᠬᠠᠮᠤᠭ ᠣᠯᠠᠨ ᠣᠷᠣᠰᠢᠳᠠᠭ ᠶᠤᠮ ᠃
ᠠᠵᠠ ᠵᠢᠷᠭᠠᠯ ᠤ᠋ᠨ ᠨᠠᠭᠠᠳᠤᠮ᠂ ᠠᠭᠰᠤᠮ ᠬᠦᠯᠦᠭ ᠦ᠋ᠨ ᠳᠣᠪᠲᠣᠯᠤᠭᠠ ᠂ ᠠᠷᠢᠭᠤᠨ ᠴᠡᠪᠡᠷ ᠰᠡᠳᠬᠢᠯᠭᠡ ᠮᠠᠯᠴᠢᠨ ᠬᠥᠮᠦᠨ ᠦ᠌ ᠲᠣᠭᠣᠷᠢᠨ ᠳ᠋ᠤ᠌ ᠬᠠᠮᠤᠭ ᠣᠯᠠᠨ ᠥᠷᠨᠢᠳᠡᠭ ᠶᠤᠮ ᠃
ᠠᠯᠵᠢᠶᠠᠷᠠᠯ ᠢ᠋ ᠮᠠᠷᠲᠠᠬᠤ ᠪᠣᠳᠣᠯ᠂ ᠠᠭᠤᠳᠠᠮ ᠶᠡᠬᠡ ᠮᠡᠳᠡᠷᠡᠮᠵᠢ ᠤᠶᠠᠩᠭᠠᠷᠠᠬᠤ ᠳᠠᠭᠤᠤ ᠠᠶᠠᠰ ᠤ᠋ᠳ ᠮᠠᠯᠴᠢᠨ ᠤ᠋ ᠳᠡᠷᠭᠡᠳᠡ ᠡᠴᠡ ᠬᠠᠮᠤᠭ ᠬᠢᠯᠪᠠᠷ ᠤᠯᠳᠠᠳᠠᠭ ᠶᠤᠮ ᠃
ᠠᠵᠤ ᠦᠢᠯᠡᠳᠪᠦᠷᠢ ᠶ᠋ᠢᠨ ᠠᠷᠠᠭᠠᠲᠤ ᠬᠦᠷᠳᠦ ᠪᠡᠷ ᠦᠢᠯᠡᠳᠪᠦᠷᠢᠯᠡᠭᠰᠡᠨ ᠲᠠᠸᠠᠷ ᠤ᠋ᠳ ᠤ᠋ᠨ ᠦᠨᠡ ᠬᠠᠩᠰᠢ ᠨᠢ ᠬᠢᠮᠳᠠᠷᠠᠬᠤ ᠪᠣᠯ ᠂ ᠠᠵᠤ ᠠᠬᠤᠢ ᠶ᠋ᠢᠨ ᠵᠢᠮᠡ ᠶᠣᠰᠣ ᠮᠥᠨ ᠃
ᠠᠵᠢᠯᠴᠢ ᠬᠥᠳᠡᠯᠮᠦᠷᠢᠴᠢ ᠮᠠᠯᠴᠢᠨ ᠤ᠋ ᠠᠷᠢᠭᠤᠨ ᠭᠠᠷ ᠢ᠋ᠶ᠋ᠠᠷ ᠪᠦᠲᠦᠭᠡᠭᠰᠡᠨ ᠦᠢᠯᠡᠳᠬᠦᠨ ᠦ᠋ᠳ ᠂ ᠡᠳᠦᠷ ᠢᠷᠡᠬᠦᠶᠡ ᠦᠨᠡᠲᠡᠢ ᠪᠣᠯᠬᠤ ᠪᠣᠯ ᠲᠡᠦᠬᠡᠨ ᠬᠠᠨᠳᠤᠰᠢ ᠶᠤᠮ ᠃
ᠠᠷᠵᠠᠢᠲᠠᠯᠠ ᠠᠮᠢᠳᠤᠷᠠᠳᠠᠭ ᠬᠣᠲᠠ ᠶ᠋ᠢᠨ ᠪᠣᠷᠣᠴᠤᠤᠯ ᠤ᠋ᠳ ᠬᠣᠷᠣᠬᠠᠢ ᠰᠢᠪᠠᠵᠢ ᠪᠠᠨ ᠢᠳᠡᠵᠦ ᠪᠠᠷᠠᠭᠰᠠᠨ ᠪᠤᠶᠤ ᠳᠤᠷᠠ ᠦᠭᠡᠢ ᠪᠣᠯᠬᠤ ᠦᠶᠡ ᠳ᠋ᠦ᠍
ᠠᠳᠤᠭᠤ ᠮᠠᠯ ᠲᠠᠢ ᠂ ᠠᠶᠠᠭᠠ ᠱᠥᠯᠥ ᠲᠡᠢ ᠂ ᠠᠶᠠᠰ ᠬᠥᠭᠵᠢᠮ ᠲᠡᠢ ᠮᠠᠯᠴᠢᠨ ᠬᠥᠮᠦᠨ ᠢ᠋ ᠠᠮᠢᠳᠤ ᠪᠤᠷᠬᠠᠨ ᠠᠳᠠᠯᠢ ᠰᠢᠲᠦᠬᠦ ᠴᠠᠭ ᠯᠠᠪ ᠢᠷᠡᠨᠡ ᠰᠢᠦ ᠳᠡ᠃