ᠵᠡᠭᠦᠳᠦ - ᠱ ᠂ ᠭᠦᠷᠦᠪᠠᠽᠠᠷ Зүүд – Ш᠂ Гүрбазар
382ᠵᠡᠭᠦᠳᠦ
ᠤᠷᠢᠳᠤ ᠰᠥᠨᠢ ᠪᠢ ᠡᠵᠢ ᠳ᠋ᠡᠭᠡᠨ
ᠤᠰᠤ ᠬᠦᠷᠭᠡᠵᠦ ᠶᠠᠪᠤᠨᠠ ᠭᠡᠵᠦ ᠵᠡᠭᠦᠳᠦᠯᠡᠯᠡ
ᠤᠷᠤᠭᠤᠯ ᠢ᠋ᠶ᠋ᠠᠨ ᠲᠠᠰᠤ ᠬᠠᠵᠠᠨ
ᠠᠭᠤᠯᠠ ᠲᠠᠯᠠ ᠶ᠋ᠢ ᠲᠠᠭᠤᠴᠢᠵᠤ
ᠭᠦᠮ ᠦ᠋ᠨ ᠭᠤᠲᠤᠯ ᠤ᠋ᠨ ᠢ᠋ᠶ᠋ᠠᠨ ᠤᠯᠠ ᠪᠠᠷ
ᠬᠥᠯ ᠢ᠋ᠶ᠋ᠡᠨ ᠵᠢᠭᠢᠨ ᠲᠠᠭᠤᠴᠢᠵᠤ ᠶᠠᠪᠤᠨᠠ ᠭᠡᠵᠦ ᠵᠡᠭᠦᠳᠦᠯᠡᠯᠡ
ᠭᠡᠲᠡᠯᠡ
ᠠᠷᠠᠰᠤᠨ ᠲᠠᠰᠢᠮᠠᠭ ᠴᠤᠭᠤᠷᠠᠵᠤ
ᠡᠭᠦᠷᠦᠭᠰᠡᠨ ᠤᠰᠤ ᠮᠢᠨᠢ ᠠᠰᠬᠠᠷᠠᠴᠢᠬᠠᠬᠤ ᠶᠤᠮ
ᠠᠩᠭᠠᠭ ᠴᠠᠩᠭᠠᠭ ᠬᠥᠷᠥᠰᠥ ᠬᠣᠪᠬᠤ ᠰᠣᠷᠣᠴᠢᠬᠠᠬᠤ ᠶᠤᠮ
ᠠᠷᠭᠠᠯ ᠵᠡᠭᠡᠭᠯᠡᠭᠰᠡᠨ ᠡᠵᠢ ᠳ᠋ᠡᠭᠡᠨ
ᠤᠰᠤ ᠦᠭᠡᠢ ᠣᠴᠢᠬᠤ ᠨᠢ
ᠠᠶᠠᠭᠠ ᠴᠡᠭᠡᠨ ᠬᠢᠷᠠᠮᠠ
ᠤᠤᠭᠤᠯᠭᠠᠵᠤ ᠠᠮᠵᠢᠬᠤ ᠦᠭᠡᠢ ᠨᠢ
ᠠᠯᠠᠭ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠯᠪᠤᠰᠤ ᠪᠠᠷ ᠯᠠ
ᠠᠮᠠ ᠪᠠᠨ ᠴᠢᠭᠢᠭᠯᠡᠳᠡᠭ ᠦᠭᠡᠢ ᠶᠦᠮ ᠪᠣᠯ
ᠠᠩᠭᠢᠷ ᠰᠠᠢᠬᠠᠨ ᠡᠵᠢ ᠮᠢᠨᠢ
ᠠᠩᠭᠠᠵᠤ ᠦᠬᠦᠬᠦ ᠨᠢ ᠭᠡᠵᠦ ᠵᠡᠭᠦᠳᠦᠯᠡᠯᠡ
ᠡᠯᠢᠭᠡ ᠬᠥᠬᠡᠷᠡᠲᠡᠯᠡ ᠬᠠᠷᠠ ᠳᠠᠷᠤᠭᠰᠠᠨ
ᠵᠡᠭᠦᠳᠦᠨ ᠦ᠌ ᠲᠠᠭ ᠢ᠋ᠶ᠋ᠠᠨ ᠲᠦᠯᠬᠢᠲᠡᠯᠡ
ᠡᠵᠢ ᠶ᠋ᠢᠨ ᠮᠢᠨᠢ ᠨᠥᠮᠥᠷᠢ
ᠳᠡᠷᠭᠡᠳᠡ ᠪᠠᠢᠭᠰᠠᠨ ᠦᠭᠡᠢ
ᠰᠠᠢᠬᠠᠨ ᠡᠵᠢ ᠪᠡᠨ ᠪᠢ
ᠰᠠᠨᠠᠭᠠ ᠶ᠋ᠢ ᠨᠢ ᠴᠠᠩᠭᠠᠭᠠᠭᠰᠠᠨ ᠶᠤᠮ ᠪᠢᠰᠢ ᠪᠠᠢᠭᠠ
ᠬᠣᠶᠠᠷ ᠨᠠᠷᠠ ᠶ᠋ᠢ ᠡᠷᠢᠭᠰᠡᠨ ᠪᠢᠰᠢ
ᠬᠣᠯᠠ ᠶ᠋ᠢᠨ ᠭᠠᠵᠠᠷ ᠶᠠᠭᠤ ᠪᠠᠨ ᠬᠢᠨᠡ
ᠮᠠᠷᠭᠠᠰᠢ ᠥᠷᠯᠥᠭᠡᠨ ᠦ᠌ ᠣᠩᠭᠣᠴᠠ ᠪᠠᠷ
ᠨᠤᠲᠤᠭ ᠲᠠᠭᠠᠨ ᠯᠠ ᠣᠴᠢᠶᠠ᠂ ᠪᠠᠢᠵᠠ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠩᠬᠡᠪᠠᠲᠤ
ᠦᠰᠦᠭ ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ