ᠬᠣᠷᠭᠣᠳᠠᠭᠠ ᠰᠢᠯᠦᠭ - ᠪᠠᠪᠤᠤ ᠶ᠋ᠢᠨ ᡀᠬᠠᠪᠠᠰᠥ᠋ᠷᠦᠩ Хоргодоо шүлэг — Бавуугийн Лхагвасүрэн
685 ᠬᠣᠨᠳᠣᠨ ᠳ᠋ᠤᠨᠢ ᠶᠠᠰᠤ ᠪᠠᠨ ᠲᠠᠯᠪᠢᠨᠠ᠁ ᠭᠡᠵᠦ ᠪᠣᠳᠣᠳᠠᠭ
ᠬᠣᠢᠲᠤ ᠤᠷᠲᠤ《ᠥᠨᠵᠢᠭᠦᠯ ᠦ᠋ᠨ ᠪᠣᠭᠳᠠ》 ᠠᠭᠤᠯᠠᠨ ᠳ᠋ᠠᠭᠠᠨ
ᠬᠣᠶᠠᠷ ᠭᠤᠷᠪᠠᠬᠠᠨ ᠬᠣᠨᠣᠭ ᠠᠰᠢᠯᠠᠵᠤ ᠵᠢᠷᠭᠠᠭᠠᠳ
ᠬᠣᠲᠠ ᠤᠷᠤᠭᠤ ᠪᠤᠴᠠᠨᠠ᠁ ᠭᠡᠬᠦ ᠡᠴᠡ᠁
ᠬᠣᠢᠰᠢ ᠪᠠᠨ ᠤᠬᠤᠷᠢᠭᠠᠳ ᠬᠥᠯ ᠳᠤᠷᠠ ᠦᠭᠡᠢ
ᠬᠣᠷᠮᠣᠢ ᠴᠢᠩᠭᠠᠭᠠᠳ ᠰᠠᠯᠬᠢ ᠳᠤᠷᠠ ᠦᠭᠡᠢ
ᠠᠷᠤ ᠳ᠋ᠤ᠌ ᠭᠡᠳᠡᠯᠵᠡᠭᠡᠳ ᠳᠠᠷᠠᠰᠤ ᠳᠤᠷᠠ ᠦᠭᠡᠢ
ᠤᠷᠲᠤ ᠪᠥᠷᠲᠥᠯᠵᠡᠭᠡᠳ ᠬᠠᠷᠢᠶᠠᠴᠠᠢ ᠳᠤᠷᠠ ᠦᠭᠡᠢ
ᠰᠠᠨᠠᠭᠠ ᠳᠠᠭᠠᠭᠠᠳ
ᠶᠠᠭᠤᠮᠠ ᠪᠦᠬᠦᠨ ᠳᠤᠷᠠ ᠦᠭᠡᠢ᠃
ᠰᠡᠳᠬᠢᠯ ᠳ᠋ᠡᠭᠡᠨ᠂ ᠤᠷᠤᠭᠤ ᠲᠠᠲᠠᠭᠳᠠᠭᠠᠳ
ᠪᠢ ᠪᠠᠰᠠ ᠳᠤᠷᠠ ᠦᠭᠡᠢ᠃
ᠭᠢᠰᠬᠢᠵᠦ ᠭᠢᠯᠵᠢᠢᠯᠭᠡᠭᠰᠡᠨ ᠴᠡᠴᠡᠭᠡᠰ ᠢ᠋
ᠡᠷᠭᠢᠭᠡᠳ ᠥᠨᠳᠡᠢᠲᠡᠯᠡ ᠬᠣᠷᠭᠣᠳᠠᠨᠠ᠃
ᠭᠡᠷ ᠦ᠋ᠨ ᠬᠣᠢᠭᠤᠷ ᠳᠠᠭᠤᠯᠠᠭᠠᠳ ᠥᠩᠭᠡᠷᠡᠬᠦ ᠮᠣᠷᠢᠲᠠᠨ ᠢ᠋
ᠪᠠᠷᠠ ᠲᠠᠰᠤᠷᠠᠲᠠᠯᠠ ᠬᠣᠷᠭᠣᠳᠠᠨᠠ᠃
ᠭᠡᠭᠦᠨ ᠵᠠᠯᠠᠨ ᠳᠡᠭᠡᠷᠡ ᠪᠣᠷᠣᠭᠠ ᠰᠢᠭ᠋ ᠰᠢᠪᠡᠷᠡᠬᠦ
《ᠰᠠᠭᠠᠮᠠ ᠶ᠋ᠢᠨ ᠪᠠᠭᠠ ᠦᠳᠡ》 ᠳᠠᠭᠤᠰᠲᠠᠯᠠ ᠬᠣᠷᠭᠣᠳᠠᠨᠠ᠃
ᠭᠦᠶᠦᠵᠦ ᠢᠷᠡᠭᠰᠡᠨ ᠠᠳᠤᠭᠤ ᠳᠡᠷᠪᠡᠵᠦ ᠬᠥᠷᠪᠡᠭᠡᠵᠦ ᠬᠠᠨᠤᠭᠠᠳ
ᠰᠠᠨᠠᠭᠰᠠᠨ ᠤ᠋ ᠲᠣᠭᠣᠰᠣ ᠪᠠᠨ ᠰᠢᠯᠭᠡᠭᠡᠲᠡᠯᠡ ᠬᠣᠷᠭᠣᠳᠠᠨᠠ᠃
ᠡᠪᠡᠰᠦᠨ ᠳ᠋ᠦ᠍ ᠪᠠᠭᠤᠭᠰᠠᠨ ᠥᠴᠥᠭᠡᠳᠦᠷ ᠦᠳᠡᠰᠢ ᠶ᠋ᠢᠨ ᠰᠢᠭᠦᠳᠡᠷᠢ ᠶ᠋ᠢ
ᠡᠭᠰᠢᠵᠦ ᠬᠠᠳᠠᠲᠠᠯᠠ ᠬᠣᠷᠭᠣᠳᠠᠨᠠ᠃
ᠥᠨᠳᠥᠷ ᠦ᠋ᠨ ᠡᠯᠢᠭᠡᠨ ᠦ᠌ ᠬᠡᠯᠡᠭᠡᠢ ᠴᠠᠭᠠᠨ ᠮᠠᠨᠠᠨ ᠢ᠋
ᠲᠩᠷᠢ ᠳ᠋ᠦ᠍ ᠳᠡᠭᠳᠡᠲᠡᠯᠡ ᠬᠣᠷᠭᠣᠳᠠᠨᠠ᠃
ᠠᠵᠢᠶᠠ ᠶ᠋ᠢ ᠮᠢᠨᠢ ᠨᠤᠲᠤᠭᠯᠠᠭᠤᠯᠤᠭᠰᠠᠨ ᠡᠩᠭᠡᠷ ᠦ᠋ᠨ ᠪᠣᠷᠣ ᠰᠡᠭᠦᠳᠡᠷ
ᠨᠡᠭᠦᠭᠡᠳ ᠥᠩᠭᠡᠷᠡᠲᠡᠯᠡ ᠬᠣᠷᠭᠣᠳᠠᠨᠠ᠃
ᠠᠶᠠᠨᠳᠠᠭᠠᠨ ᠠᠰᠬᠠᠷᠠᠬᠤ᠂ ᠴᠢᠮᠡᠭᠡ ᠦᠭᠡᠢ ᠪᠦᠯᠢᠶᠡᠬᠡᠨ ᠨᠢᠯᠪᠤᠰᠤ ᠪᠠᠨ
ᠪᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠬᠣᠷᠭᠣᠳᠠᠨᠠ᠃
2010 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠩᠬᠡᠪᠠᠲᠤ
ᠦᠰᠦᠭ ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ