ᠲᠦᠨᠲᠡᠯᠡᠢ ᠬᠦᠦ - ᠮᠣᠩᠭᠣᠯ ᠠᠷᠠᠳ ᠤᠨ ᠦᠯᠢᠭᠡᠷТүнтээлэй хүү - Монгол ардын үлгэр Дэлхийн үлгэр
4728ᠲᠦᠨᠲᠡᠯᠡᠢ ᠬᠦᠦ
ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠠᠮᠠᠨ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠶᠤᠮ ᠭᠡᠨᠡ᠃ ᠨᠢᠭᠡ ᠡᠳᠦᠷ ᠲᠦᠨᠲᠡᠯᠡᠢ ᠬᠦᠦ ᠲᠦᠮᠡᠨ ᠪᠣᠷᠣ ᠬᠣᠨᠢ ᠪᠠᠨ ᠬᠠᠷᠢᠭᠤᠯᠤᠭᠠᠳ ᠲᠣᠢᠨ ᠭᠣᠣᠯ ᠤ᠋ᠨ ᠵᠠᠬᠠ ᠪᠠᠷ ᠶᠠᠪᠤᠵᠤ ᠪᠠᠢᠵᠠᠢ ᠭᠡᠨᠡ᠃
ᠠᠰᠠᠷ ᠭᠡᠳᠡᠭ ᠨᠣᠬᠠᠢ ᠨᠢ ᠠᠷᠤ ᠲᠠᠯᠠ ᠳ᠋ᠤ᠌ ᠨᠢ᠂ ᠪᠠᠰᠠᠷ ᠭᠡᠳᠡᠭ ᠨᠣᠬᠠᠢ ᠨᠢ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠨᠢ᠂ ᠲᠦᠨᠲᠡᠯᠡᠢ ᠬᠦᠦ ᠲᠦᠷᠦᠭᠦᠬᠡᠨ ᠳ᠋ᠦ᠍ ᠨᠢ ᠶᠠᠪᠤᠵᠤ ᠪᠠᠢᠵᠠᠢ ᠭᠡᠨᠡ᠃ ᠲᠦᠮᠡᠨ ᠬᠣᠨᠢᠨ ᠤ᠋ ᠲᠦᠷᠦᠭᠦᠴᠢ ᠲᠣᠢᠨ ᠭᠣᠣᠯ ᠤ᠋ᠨ ᠵᠠᠬᠠ ᠤᠷᠤᠭᠤ ᠡᠩᠨᠡᠨ ᠣᠷᠣᠵᠤ ᠲᠤᠩᠭᠠᠯᠠᠭ ᠤᠰᠤ ᠤᠤᠭᠤᠵᠤ ᠪᠠᠢᠲᠠᠯᠠ ᠠᠰᠠᠷ ᠪᠠᠰᠠᠷ ᠬᠣᠶᠠᠷ ᠨᠣᠬᠠᠢ ᠨᠢ ᠬᠤᠴᠠᠵᠤ ᠠᠷᠤ ᠥᠪᠥᠷ ᠢ᠋ᠶ᠋ᠡᠷ ᠨᠢ ᠭᠦᠶᠦᠯᠳᠦᠵᠡᠢ ᠭᠡᠨᠡ᠃ ᠲᠦᠲᠡᠯᠡᠢ ᠬᠦᠦ ᠲᠦᠷᠭᠡᠨ ᠰᠠᠮᠪᠠᠭᠠ ᠲᠠᠢ ᠪᠣᠯᠬᠣᠷ ᠢ᠋ᠶ᠋ᠠᠨ ᠲᠦᠷᠭᠡᠨ ᠤᠷᠤᠰᠬᠠᠯᠲᠤ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠳᠠᠭᠠᠵᠤ ᠬᠠᠮᠢᠭᠠ᠂ ᠶᠠᠭᠤ ᠪᠠᠢᠭᠠ ᠶ᠋ᠢ ᠨᠢ ᠣᠯᠵᠤ ᠬᠠᠷᠠᠬᠤ ᠭᠡᠵᠦ ᠣᠯᠠᠨ ᠬᠣᠨᠢᠨ ᠤ᠋ ᠳᠤᠮᠳᠠᠭᠤᠷ ᠶᠠᠪᠤᠵᠤ ᠦᠵᠡᠭᠰᠡᠨ ᠴᠢᠨᠢ ᠦᠵᠡᠭᠳᠡᠬᠦ ᠬᠠᠷᠠᠭᠳᠠᠬᠤ ᠶᠠᠭᠤᠮᠠ ᠪᠠᠢᠭᠰᠠᠨ ᠦᠭᠡᠢ᠃ ᠡᠨᠡ ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠪᠠᠢᠭᠠ ᠶᠤᠮ ᠪᠣᠯ ᠠ᠋! ᠭᠡᠵᠦ ᠲᠥᠨᠲᠡᠯᠡᠢ ᠬᠦᠦ ᠪᠣᠳᠣᠭᠠᠳ ᠲᠣᠢᠨ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠰᠥᠷᠦᠨ ᠬᠠᠷᠠᠪᠠᠯ ᠳᠠᠪ᠁ ᠲᠡᠷᠲᠡᠭᠡ ᠤᠰᠤᠨ ᠤ᠋ ᠤᠷᠤᠰᠬᠠᠯ ᠢ᠋ᠶ᠋ᠠᠷ ᠨᠢᠭᠡᠨ ᠪᠥᠭᠡᠮ ᠶᠠᠭᠤᠮᠠ ᠠᠢᠰᠤᠢ ᠶᠠᠪᠤᠨᠠ ᠭᠡᠨᠡ᠃ ᠲᠡᠭᠡᠵᠦ ᠪᠠᠢᠲᠠᠯᠠ ᠲᠦᠮᠡᠨ ᠬᠣᠨᠢ ᠨᠢ ᠬᠣᠰᠢᠭᠤᠷᠠᠨ ᠭᠦᠶᠦᠬᠦ ᠳ᠋ᠦ᠍ ᠲᠡᠷᠡ ᠳᠤᠮᠳᠠ ᠨᠢ ᠭᠤᠷᠪᠠᠭᠤᠯᠠ ᠪᠠᠨ ᠣᠷᠣᠭᠠᠳ ᠯᠠ ᠢᠷᠡᠵᠦ ᠪᠠᠢᠭᠠ ᠶᠠᠭᠤᠮᠠᠨ ᠤ᠋ ᠥᠭᠡᠳᠡ ᠡᠴᠡ ᠣᠴᠢᠲᠠᠯᠠ ᠠᠯᠲᠠ ᠬᠦᠷᠬᠦ ᠦᠭᠡᠢ ᠪᠠᠨᠵᠠᠨ ᠳᠡᠭᠡᠷᠡ ᠲᠣᠬᠣᠢ ᠶ᠋ᠢᠨ ᠴᠢᠨᠡᠭᠡ ᠬᠦᠦ ᠮᠠᠨᠴᠤᠢ ᠡᠴᠡ ᠪᠠᠨ ᠭᠠᠷ ᠢ᠋ᠶ᠋ᠠᠨ ᠭᠠᠷᠭᠠᠭᠠᠳ ᠯᠠ ᠳᠡᠷᠡᠰᠦᠨ ᠨᠤᠮᠤ ᠰᠤᠮᠤ ᠪᠠᠷ ᠨᠠᠭᠠᠳᠤᠨ ᠨᠠᠷᠠᠨ ᠳ᠋ᠤ᠌ ᠪᠡᠶᠡᠰᠦᠨ ᠤᠰᠤᠨ ᠳ᠋ᠤ᠌᠂ ᠲᠣᠯᠢᠳᠠᠨ ᠢᠷᠡᠵᠦ ᠶᠠᠪᠤᠵᠠᠢ᠃
ᠬᠣᠨᠢ ᠬᠤᠷᠠᠭᠠ ᠮᠠᠢᠯᠠᠯᠳᠤᠨ ᠱᠤᠤᠭᠢᠵᠤ ᠲᠣᠢᠨ ᠭᠣᠣᠯ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠶᠠᠷᠯᠠᠬᠤ ᠮᠡᠲᠦ ᠪᠣᠯᠵᠠᠢ ᠭᠡᠨᠡ᠃ ᠲᠥᠨᠲᠡᠯᠡᠢ ᠬᠦᠦ ᠲᠣᠰᠣᠨ ᠣᠴᠢᠪᠠᠯ ᠬᠦᠦ ᠰᠠᠢᠬᠠᠨ ᠠᠯᠠᠭ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠣᠷᠴᠢᠨ ᠲᠣᠭᠣᠷᠢᠨ ᠢ᠋ ᠬᠠᠷᠠᠵᠤ᠄
— ᠡᠨᠡ ᠭᠣᠣᠯ ᠢ᠋ ᠶᠠᠮᠠᠷ ᠭᠣᠣᠯ ᠭᠡᠳᠡᠭ ᠶᠦ᠍ᠮ ᠪᠣᠢ? ᠭᠡᠬᠦ ᠳ᠋ᠦ᠍ ᠲᠥᠨᠲᠡᠯᠡᠢ ᠬᠦᠦ᠄
— ᠲᠣᠢᠨ ᠭᠣᠣᠯ ᠭᠡᠳᠡᠭ ᠶᠦ᠍ᠮ᠂ ᠭᠡᠵᠡᠢ᠃
ᠬᠦᠦ ᠲᠥᠨᠲᠡᠯᠡᠢ ᠶ᠋ᠢ ᠬᠠᠷᠠᠵᠤ ᠢᠨᠢᠶᠡᠭᠡᠳ᠄
— ᠡᠨᠡ ᠣᠯᠠᠨ ᠬᠣᠨᠢᠨ ᠰᠦᠷᠦᠭ ᠴᠢᠨᠢ ᠬᠡᠨ ᠦ᠌ ᠬᠣᠨᠢ ᠪᠣᠢ?
— ᠮᠢᠨᠦ ᠬᠣᠨᠢ᠂ ᠭᠡᠵᠦ ᠲᠥᠨᠲᠡᠯᠡᠢ ᠬᠦᠦ ᠬᠠᠷᠢᠭᠤᠯᠤᠯᠠ᠃
— ᠠᠢ ᠬᠥᠭᠡᠷᠦᠬᠦᠢ! ᠶᠠᠭᠠᠬᠢᠭᠰᠠᠨ ᠪᠠᠶᠠᠨ ᠲᠠᠩᠰᠤᠭ ᠠᠢᠯ ᠪᠣᠢ? ᠡᠵᠡᠨ ᠨᠢ ᠬᠡᠨ ᠭᠡᠳᠡᠭ ᠬᠥᠮᠦᠨ ᠪᠣᠢ? ᠡᠵᠡᠨ ᠨᠢ ᠡᠢᠮᠦ ᠵᠢᠭᠠᠬᠠᠨ ᠬᠣᠨᠢ ᠨᠢ ᠡᠢᠮᠦ ᠣᠯᠠᠨ ᠪᠠᠢᠬᠤ ᠦᠭᠡᠢ ᠪᠠᠢᠯᠭᠦᠢ ᠡᠰᠡᠬᠦᠯᠡ ᠲᠠ ᠶᠠᠮᠠᠷ ᠨᠢᠭᠡ ᠨᠣᠶᠠᠨ ᠪᠠᠶᠠᠨ ᠤ᠋ ᠬᠡᠦᠬᠡᠳ ᠤᠤ? ᠭᠡᠯᠡ᠃
— ᠨᠣᠶᠠᠨ ᠪᠠᠶᠠᠨ ᠤ᠋ ᠬᠡᠦᠬᠡᠳ ᠪᠢᠰᠢ ᠠ᠋! ᠤᠭ ᠤ᠋ᠨ ᠶᠠᠳᠠᠭᠤ ᠤᠤᠯ ᠤ᠋ᠨ ᠬᠠᠷᠠᠴᠤ ᠠᠷᠠᠳ ᠤ᠋ᠨ ᠬᠡᠦᠬᠡᠳ ᠭᠡᠬᠦ ᠳ᠋ᠦ᠍ ᠨᠢ᠄
— ᠠᠢ ᠬᠥᠭᠡᠷᠦᠬᠦᠢ! ᠶᠡᠬᠡ ᠪᠤᠶᠠᠨ ᠲᠠᠢ ᠬᠡᠦᠬᠡᠳ ᠶᠦ᠍ᠮ ᠳᠡ! ᠭᠡᠯᠡ᠃
— ᠪᠤᠶᠠᠨ ᠪᠤᠶᠠᠨ ᠯᠠ ᠭᠡᠨᠡ᠂ ᠪᠢ ᠪᠤᠶᠠᠨ ᠢ᠋ ᠴᠢᠨᠢ ᠦᠵᠡᠭᠡ ᠦᠭᠡᠢ᠂ ᠬᠠᠷᠢᠨ ᠠᠯᠲᠠ ᠪᠡᠶᠡ ᠶ᠋ᠢᠨ ᠠᠯᠵᠢᠶᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠠᠷᠪᠠ ᠲᠠᠪᠤᠨ ᠮᠠᠯ ᠢ᠋ᠶ᠋ᠠᠨ ᠮᠠᠯᠯᠠᠭᠠᠳ ᠪᠠᠢᠪᠠᠯ ᠪᠤᠶᠠᠨ ᠭᠡᠳᠡᠭ ᠥᠪᠡᠷ ᠢ᠋ᠶ᠋ᠡᠨ ᠢᠷᠡᠵᠦ ᠪᠠᠢᠳᠠᠭ ᠶᠤᠮ ᠪᠢᠰᠢᠦ? ᠭᠡᠪᠡ᠃
— ᠲᠠ ᠲᠡᠭᠡᠪᠡᠯ ᠪᠤᠶᠠᠨ ᠭᠡᠳᠡᠭ ᠢ᠋ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ? ᠭᠡᠬᠦ ᠳ᠋ᠦ᠍ ᠨᠢ ᠲᠥᠨᠲᠡᠯᠡᠢ᠄
— ᠰᠡᠳᠬᠢᠯ ᠦ᠋ᠨ ᠠᠷᠢᠭᠤᠨ᠂ ᠰᠠᠨᠠᠭᠠᠨ ᠤ᠋ ᠰᠢᠯᠤᠭᠤᠨ᠂ ᠬᠥᠳᠡᠯᠮᠦᠷᠢ ᠶ᠋ᠢᠨ ᠦᠷᠡ᠂ ᠭᠠᠵᠠᠷ ᠤ᠋ᠨ ᠰᠢᠮᠡ᠂ ᠮᠠᠯ ᠤ᠋ᠨ ᠠᠰᠢᠭ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠳᠠᠭ ᠳᠠ᠂ ᠵᠠ ᠡᠷᠬᠢᠮ ᠳᠡᠭᠦᠦ ᠬᠠᠮᠢᠭᠠ ᠭᠠᠵᠠᠷ ᠡᠴᠡ ᠶᠠᠪᠤᠭᠠ ᠬᠡᠨ ᠦ᠌ ᠬᠡᠨ ᠭᠡᠳᠡᠭ ᠶᠠᠮᠠᠷ ᠤᠴᠢᠷ ᠡᠴᠡ ᠠᠯᠲᠠ ᠮᠣᠳᠣᠨ ᠳᠡᠭᠡᠷᠡ ᠰᠠᠭᠤᠭᠠᠳ ᠬᠥᠬᠡ ᠤᠰᠤᠨ ᠳᠡᠭᠡᠭᠦᠷ ᠬᠥᠪᠴᠦ ᠶᠠᠪᠤᠳᠠᠭ ᠰᠠᠨ ᠪᠢᠯᠡ? ᠭᠡᠬᠦ ᠳ᠋ᠦ᠍ ᠨᠢ
— ᠪᠢ ᠢᠩᠭᠢᠵᠦ ᠶᠠᠪᠤᠬᠤ ᠬᠤᠪᠢ ᠵᠠᠶᠠᠭᠠ ᠲᠠᠢ ᠶᠤᠮ ᠭᠡᠨᠡ᠂ ᠲᠣᠢᠨ ᠭᠣᠣᠯ ᠤ᠋ᠨ ᠡᠬᠢᠨ ᠳ᠋ᠦ᠍ ᠪᠠᠢᠳᠠᠭ ᠲᠠᠪᠤᠨ ᠬᠠᠷᠠ ᠢᠮᠠᠭᠠᠲᠤ᠂ ᠪᠤᠶᠠᠨ ᠡᠪᠦᠭᠡᠨ ᠦ᠌ ᠬᠦᠦ ᠪᠠᠽᠠᠷ ᠭᠡᠳᠡᠭ ᠶᠦ᠍ᠮ᠃ ᠲᠡᠭᠡᠭᠡᠳ ᠨᠢᠭᠡ ᠰᠢᠨᠵᠢᠭᠡᠴᠢ ᠬᠥᠮᠦᠨ ᠢ᠋ᠶ᠋ᠡᠷ ᠮᠢᠨᠦ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠰᠢᠨᠵᠢᠭᠦᠯᠦᠭᠰᠡᠨ ᠴᠢᠨᠢ ᠣᠳᠣᠬᠠᠨ ᠠᠯᠠᠭᠠ ᠪᠣᠯᠭᠠᠬᠤ ᠦᠭᠡᠢ ᠪᠣᠯ ᠪᠣᠰᠤᠭᠠ ᠣᠷᠣᠯᠠᠩ ᠪᠣᠯᠤᠨᠠ᠂ ᠬᠣᠯᠠ ᠣᠢᠷᠠ ᠶ᠋ᠢ ᠰᠦᠢᠳᠬᠡᠬᠦ ᠪᠤᠵᠠᠷ ᠮᠠᠭᠤᠬᠠᠢ ᠠᠮᠢᠲᠠᠨ ᠪᠣᠯᠬᠤ ᠶᠤᠮ ᠪᠠᠢᠨᠠ ᠭᠡᠰᠡᠨ᠂ ᠲᠡᠭᠡᠭᠡᠳ ᠠᠪᠤ ᠮᠠᠨᠢ ᠠᠷᠭᠠ ᠪᠠᠷᠠᠬᠤ ᠳ᠋ᠤ᠌ ᠪᠠᠨ ᠡᠵᠢ ᠳ᠋ᠦ᠍《ᠡᠨᠡ ᠬᠦᠦ ᠶ᠋ᠢ ᠣᠳᠣ ᠶᠠᠭᠠᠬᠢᠬᠤ ᠪᠣᠢ? ᠨᠢᠭᠡ ᠪᠣᠯ ᠪᠢᠳᠡ ᠬᠣᠶᠠᠷ ᠬᠦᠦ ᠪᠡᠨ ᠳᠠᠭᠠᠭᠠᠳ ᠶᠠᠪᠤᠶᠠ᠂ ᠨᠢᠭᠡ ᠪᠣᠯ ᠡᠨᠡ ᠬᠦᠦ ᠶ᠋ᠢ ᠶᠠᠮᠠᠷ ᠨᠢᠭᠡᠨ ᠠᠷᠭᠠ ᠪᠠᠷ ᠬᠣᠯᠠᠳᠠᠭᠤᠯᠬᠤ ᠬᠡᠷᠡᠭᠲᠡᠢ ᠪᠣᠯᠵᠤ ᠪᠠᠢᠨᠠ ᠳᠠ!》 ᠭᠡᠬᠦ ᠳ᠋ᠦ᠍ ᠡᠵᠢ《ᠥᠷᠭᠡᠨ ᠠᠯᠠᠭ ᠳᠡᠯᠡᠬᠡᠢ ᠥᠨᠢᠷ ᠪᠠᠶᠠᠨ ᠪᠢᠯᠡ᠂ ᠶᠢᠷᠲᠢᠨᠴᠦ ᠳᠡᠭᠡᠷᠡ ᠬᠠᠷᠠ ᠮᠠᠭᠤ ᠰᠠᠨᠠᠭᠠᠲᠠᠨ ᠡᠴᠡ ᠰᠠᠢᠨ ᠰᠠᠨᠠᠭᠠᠲᠠᠨ ᠣᠯᠠᠨ ᠪᠢᠯᠡ᠃ ᠡᠢᠮᠦ ᠪᠣᠯᠬᠣᠷ ᠬᠦᠦ ᠪᠡᠨ ᠠᠯᠤᠰ ᠭᠠᠵᠠᠷ ᠶᠠᠮᠠᠷ ᠨᠢᠭᠡ ᠠᠷᠭᠠ ᠪᠠᠷ ᠶᠠᠪᠤᠭᠤᠯᠵᠤ ᠴᠦᠯᠡᠶᠡ ᠳᠡ!》 ᠭᠡᠬᠦ ᠪᠡᠷ ᠠᠪᠤ ᠵᠥᠪᠰᠢᠶᠡᠷᠡᠵᠦ ᠨᠠᠮᠠ ᠶ᠋ᠢ ᠬᠥᠨᠳᠡᠯᠡᠨ ᠮᠣᠳᠣᠨ ᠠᠷᠤᠪᠴᠢᠨ ᠳᠡᠭᠡᠷᠡ ᠰᠠᠭᠤᠯᠭᠠᠵᠤ ᠬᠥᠬᠡ ᠤᠰᠤᠨ ᠳᠡᠭᠡᠷᠡ ᠲᠠᠯᠪᠢᠵᠤ ᠤᠷᠤᠰᠬᠠᠭᠰᠠᠨ ᠨᠢ ᠡᠨᠡ ᠳᠡ᠃
ᠲᠥᠨᠲᠡᠯᠡᠢ ᠬᠦᠦ ᠪᠠᠽᠠᠷ ᠲᠤ᠌ ᠮᠣᠳᠣᠨ᠂ ᠴᠥᠭᠦᠴᠡᠨ ᠳ᠋ᠦ᠍ ᠴᠠᠢ ᠬᠢᠵᠦ᠂ ᠮᠥᠩᠭᠥᠨ ᠳᠠᠪᠠᠰᠢ ᠳ᠋ᠤ᠌ ᠠᠭᠠᠷᠤᠤᠯ ᠬᠢᠵᠦ᠂ ᠭᠠᠤᠯᠢᠨ ᠲᠠᠪᠠᠭ ᠲᠤ᠌ ᠥᠷᠥᠮᠡ ᠬᠢᠵᠦ ᠡᠮᠦᠨᠡ ᠨᠢ ᠲᠠᠯᠪᠢᠭᠠᠳ᠄
— ᠢᠳᠡᠵᠦ ᠤᠤᠭᠤ᠂ ᠰᠠᠭᠤᠵᠤ ᠠᠮᠠᠷᠠ᠂ ᠶᠠᠷᠢᠵᠤ ᠬᠥᠭᠡᠷ ᠭᠡᠬᠦ ᠳ᠋ᠦ᠍ ᠨᠢ ᠪᠠᠽᠠᠷ ᠬᠦᠦ᠄
— ᠡᠷᠬᠢᠮ ᠠᠬᠠ ᠠ᠋! ᠲᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠢᠳᠠᠭ ᠤᠤ? ᠠᠴᠢᠲᠤ ᠠᠪᠤ ᠡᠨᠡᠷᠢᠯᠲᠦ ᠡᠵᠢ ᠴᠢᠨᠢ ᠪᠣᠢ ᠤᠤ? ᠭᠡᠯᠡ᠃
— ᠠᠢ! ᠠᠯᠢ ᠠᠯᠢ ᠨᠢ ᠨᠠᠮᠠ ᠶ᠋ᠢ ᠭᠤᠷᠪᠠᠨ ᠨᠠᠰᠤ ᠲᠠᠢ ᠪᠠᠢᠬᠤ ᠳ᠋ᠤ᠌ ᠨᠠᠰᠤ ᠡᠴᠦᠰᠯᠡᠭᠰᠡᠨ ᠲᠠ᠂ ᠲᠠᠪᠤᠨ ᠬᠣᠨᠢ ᠬᠣᠶᠠᠷ ᠨᠣᠬᠠᠢ ᠲᠠᠢ ᠬᠣᠴᠣᠷᠤᠭᠰᠠᠨ ᠶᠤᠮ᠂ ᠠᠷᠪᠠᠨ ᠲᠠᠪᠤᠨ ᠵᠢᠯ ᠪᠣᠯᠬᠤ ᠳ᠋ᠤ᠌ ᠬᠣᠨᠢ ᠮᠠᠨᠢ ᠮᠢᠩᠭᠠ ᠬᠦᠷᠴᠦ ᠰᠠᠢᠨ ᠰᠠᠢᠬᠠᠨ ᠠᠵᠤ ᠲᠥᠷᠥᠵᠦ ᠠᠮᠢᠳᠤᠷᠠᠵᠤ ᠪᠠᠢᠨᠠ᠃ ᠮᠢᠩᠭᠠᠨ ᠬᠣᠨᠢ ᠪᠠᠨ ᠲᠦᠮᠡ ᠬᠦᠷᠭᠡᠬᠦ ᠶ᠋ᠢ ᠪᠣᠳᠣᠳᠠᠭ ᠳᠠ᠃ ᠭᠡᠬᠦ ᠳ᠋ᠦ᠍ ᠪᠠᠽᠠᠷ ᠬᠦᠦ ᠪᠠᠬᠠᠨ ᠶᠠᠭᠤᠮᠠ ᠪᠣᠳᠣᠵᠤ ᠪᠣᠳᠣᠵᠤ᠄
— ᠭᠠᠭᠴᠠ ᠪᠡᠶᠡ ᠳ᠋ᠦ᠍ ᠡᠢᠮᠦ ᠣᠯᠠᠨ ᠬᠣᠨᠢ ᠪᠠᠷ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠠᠪᠤ ᠡᠵᠢ ᠴᠢᠨᠢ ᠠᠲᠠᠭᠠᠲᠤ ᠳᠠᠢᠰᠤᠨ ᠳ᠋ᠤ᠌ ᠠᠯᠠᠭᠳᠠᠭᠰᠠᠨ ᠤᠤ? ᠡᠮᠭᠡᠭ ᠬᠠᠭᠤᠴᠢ ᠪᠠᠷ ᠦᠬᠦᠭᠰᠡᠨ ᠶᠦ᠍ᠮ ᠤᠤ?
— ᠡᠮᠭᠡᠭ ᠬᠠᠭᠤᠴᠢ ᠪᠠᠷ ᠡᠯᠡᠭᠳᠡᠭᠰᠡᠨ ᠶᠦ᠍ᠮ ᠠ᠋᠂ ᠭᠠᠵᠠᠷ ᠳᠡᠯᠡᠬᠡᠢ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠮᠠᠯ ᠰᠦᠷᠦᠭ ᠣᠯᠠᠨ ᠪᠠᠢᠬᠤ ᠤᠴᠢᠷᠲᠠᠢ ᠶᠤᠮ᠂ ᠬᠠᠪᠢ ᠣᠢᠷᠠ ᠶ᠋ᠢᠨ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠥᠮᠦᠰ ᠮᠠᠨ ᠤ᠋ ᠮᠠᠯ ᠤ᠋ᠨ ᠰᠢᠮᠡ ᠶ᠋ᠢ ᠠᠪᠴᠤ ᠪᠠᠢᠳᠠᠭ ᠶᠤᠮ ᠰᠢᠦ ᠳᠡ᠂ ᠭᠡᠬᠦ ᠳ᠋ᠦ᠍ ᠪᠠᠽᠠᠷ ᠬᠦᠦ᠄
— ᠦ᠂ ᠲᠡᠭᠡᠪᠡᠯ ᠲᠠ ᠴᠢᠨᠢ ᠶᠣᠰᠣᠲᠠᠢ ᠨᠥᠭᠦᠭᠡ ᠪᠤᠶᠠᠨ ᠭᠡᠳᠡᠭ ᠴᠢᠨᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠠᠢᠭᠠ ᠶᠤᠮ ᠪᠠᠢᠨᠠ ᠰᠢᠦ ᠳᠡ ᠭᠡᠯᠡ᠃
—ᠲᠡᠢᠮᠦ ᠠ᠋! ᠶᠣᠰᠣᠲᠠᠢ ᠯᠠ ᠮᠠᠯ ᠤ᠋ᠨ ᠪᠤᠶᠠᠨ ᠭᠡᠵᠦ ᠪᠠᠢᠳᠠᠭ ᠪᠠᠢᠬᠠ ᠳᠠ᠂ ᠡᠵᠡᠨ ᠬᠢᠴᠢᠶᠡᠪᠡᠯ ᠵᠠᠶᠠᠭᠠ ᠬᠢᠴᠢᠶᠡᠨᠡ ᠭᠡᠵᠦ ᠬᠣᠨᠢ ᠮᠠᠨᠢ ᠲᠦᠪᠡᠭ ᠦᠭᠡᠢ ᠯᠡ ᠥᠰᠦᠭᠰᠡᠭᠡᠷ ᠡᠳᠦᠢ ᠬᠦᠷᠦᠯᠡ᠂ ᠭᠡᠵᠡᠢ ᠭᠡᠨᠡ᠃
ᠪᠠᠽᠠᠷ ᠬᠦᠦ᠄
— ᠠᠪᠤ ᠡᠵᠢ ᠴᠢᠨᠢ ᠲᠠᠨ ᠳ᠋ᠤ᠌ ᠶᠠᠭᠤ ᠭᠡᠵᠦ ᠬᠡᠯᠡᠭᠰᠡᠨ ᠪᠣᠯ? ᠭᠡᠬᠦ ᠳ᠋ᠦ᠍ ᠨᠢ ᠲᠥᠨᠲᠡᠯᠡᠢ᠄
— 《ᠰᠡᠳᠬᠢᠯ ᠦ᠋ᠨ ᠠᠷᠢᠭᠤᠨ᠂ ᠰᠠᠨᠠᠭᠠᠨ ᠤ᠋ ᠰᠠᠢᠬᠠᠨ᠂ ᠬᠥᠳᠡᠯᠮᠦᠷᠢ ᠶ᠋ᠢᠨ ᠦᠷᠡ ᠰᠢᠮᠡ ᠪᠡᠷ ᠠᠮᠢᠳᠤᠷᠠᠳᠠᠭ ᠶᠤᠮ ᠰᠢᠦ!》 ᠭᠡᠵᠦ ᠵᠠᠬᠢᠭᠰᠠᠨ ᠶᠤᠮ ᠭᠡᠵᠡᠢ ᠭᠡᠨᠡ᠃
ᠪᠠᠽᠠᠷ ᠬᠦᠦ ᠪᠠᠬᠠᠨ ᠶᠠᠭᠤᠮᠠ ᠪᠣᠳᠣᠵᠤ᠄
— ᠶᠢᠷᠲᠢᠨᠴᠦ ᠶ᠋ᠢᠨ ᠰᠠᠢᠨ ᠰᠠᠨᠠᠭᠠᠲᠤ ᠬᠥᠮᠦᠨ ᠦ᠌ ᠨᠢᠭᠡ ᠨᠢ ᠲᠠ ᠶᠤᠮ ᠪᠠᠢᠨᠠ᠂ ᠪᠢ ᠲᠠᠨ ᠢ᠋ ᠦᠷᠭᠦᠯᠵᠢ ᠪᠣᠳᠣᠵᠤ ᠶᠠᠪᠤᠬᠤ ᠪᠣᠯᠤᠨᠠ᠂ ᠳᠠ ᠨᠠᠮᠠ ᠶ᠋ᠢ ᠪᠠᠢᠨᠠ ᠰᠢᠦ ᠲᠠ᠂ ᠮᠠᠷᠭᠠᠰᠢ ᠲᠣᠢᠨ ᠭᠣᠣᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠤᠷᠤᠰᠬᠠᠭᠠᠳ ᠥᠭᠭᠦᠭᠡᠷᠡᠢ! ᠵᠠ ᠶᠣ᠃ ᠭᠡᠬᠦ ᠳ᠋ᠦ᠍ ᠨᠢ ᠲᠥᠨᠲᠡᠯᠡᠢ᠄
— ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠠᠯᠢ ᠠᠯᠢ ᠨᠢ ᠡᠷᠡ ᠭᠠᠭᠴᠠ ᠬᠥᠮᠦᠨ᠂ ᠠᠬᠠ ᠳᠡᠭᠦᠦ ᠪᠣᠯᠪᠠᠯ ᠪᠣᠯᠬᠤ ᠯᠠ ᠶᠤᠮ ᠳᠠ᠂ ᠭᠡᠰᠡᠨ ᠴᠦ᠍ ᠮᠢᠨᠦ ᠳᠡᠭᠦᠦ ᠶᠢᠷᠲᠢᠨᠴᠦ ᠶ᠋ᠢᠨ ᠰᠠᠢᠨ ᠮᠠᠭᠤ ᠬᠥᠮᠦᠨ ᠢ᠋ ᠲᠠᠨᠢᠬᠤ ᠭᠡᠵᠦ ᠶᠠᠪᠤᠭᠠ ᠪᠣᠯᠬᠣᠷ ᠶᠠᠭᠠᠷᠠᠳᠠᠭ ᠨᠢ ᠵᠥᠪ᠂ ᠭᠡᠵᠦ ᠬᠡᠯᠡᠵᠡᠢ ᠭᠡᠨᠡ᠃
ᠮᠠᠷᠭᠠᠰᠢ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠᠨ ᠢ᠋ᠶ᠋ᠠᠷ ᠲᠥᠨᠲᠡᠯᠡᠢ ᠬᠦᠦ ᠪᠠᠽᠠᠷ ᠬᠦᠦ ᠶ᠋ᠢ ᠳᠠᠭᠠᠭᠤᠯᠤᠨ ᠬᠣᠶᠠᠷ ᠨᠣᠬᠠᠢ ᠲᠠᠢ ᠪᠠᠨ ᠳᠥᠷᠪᠡᠭᠦᠯᠡ ᠪᠡᠨ ᠲᠣᠢᠨ ᠭᠣᠣᠯ ᠤ᠋ᠨ ᠡᠷᠭᠢ ᠳ᠋ᠦ᠍ ᠣᠴᠢᠵᠤ ᠠᠯᠲᠠ ᠮᠣᠳᠣᠨ ᠠᠷᠤᠪᠴᠢᠨ ᠳ᠋ᠤ᠌ ᠰᠠᠭᠤᠯᠭᠠᠵᠤ ᠠᠭᠠᠷᠤᠤᠯ ᠥᠷᠥᠮᠡ ᠠᠮᠲᠠᠲᠤ ᠢᠳᠡᠭᠡ ᠶ᠋ᠢ ᠳᠡᠷᠭᠡᠳᠡ ᠨᠢ ᠣᠪᠣᠭᠠᠯᠠᠵᠤ ᠥᠭᠭᠦᠭᠡᠳ ᠰᠠᠢᠨ ᠶᠠᠪᠤᠬᠤ ᠶ᠋ᠢ ᠬᠦᠰᠡᠵᠦ ᠰᠠᠯᠵᠤ ᠬᠠᠭᠠᠴᠠᠨ ᠥᠯᠳᠡᠵᠡᠢ ᠭᠡᠨᠡ᠃
ᠬᠥᠭᠡᠭᠡᠬᠦ ᠶ᠋ᠢ ᠤᠰᠤ ᠮᠡᠳᠡ᠂ ᠬᠦᠷᠬᠦ ᠶ᠋ᠢ ᠭᠠᠵᠠᠷ ᠮᠡᠳᠡ᠂ ᠭᠡᠵᠦ ᠪᠠᠽᠠᠷ ᠬᠦᠦ ᠰᠠᠨᠠᠭᠠᠳ ᠳᠡᠷᠡᠰᠦᠨ ᠨᠤᠮᠤ ᠰᠤᠮᠤ ᠪᠠᠨ ᠪᠠᠷᠢᠭᠠᠳ ᠶᠠᠪᠤᠵᠤ ᠪᠠᠢᠵᠠᠢ ᠭᠡᠨᠡ᠃ ᠪᠦᠲᠦᠨ ᠡᠳᠦᠷ ᠰᠥᠨᠢ ᠬᠦᠪᠦᠭᠡᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠨᠢᠭᠡ ᠶᠠᠭᠤᠮᠠ ᠰᠡᠪᠬᠢᠲᠡᠯᠡ ᠡᠷᠭᠦᠭᠡᠳ ᠯᠡ ᠠᠪᠤᠭᠠᠳ ᠶᠠᠪᠤᠴᠢᠬᠠᠬᠤ ᠰᠢᠭ᠋ ᠪᠣᠯᠤᠭᠠᠳ ᠤᠬᠠᠭᠠᠨ ᠠᠯᠳᠠᠴᠢᠬᠠᠵᠠᠢ᠃ ᠨᠢᠭᠡ ᠢᠩᠭᠢᠭᠡᠳ ᠯᠡ ᠰᠡᠷᠡᠭᠰᠡᠨ ᠴᠢᠨᠢ ᠬᠣᠶᠠᠷ ᠬᠥᠮᠦᠨ ᠢᠨᠢᠶᠡᠯᠳᠦᠵᠦ ᠪᠠᠢᠨᠠ ᠭᠡᠨᠡ᠃ ᠪᠠᠽᠠᠷ ᠬᠦᠦ ᠢᠩᠭᠢᠭᠡᠳ ᠴᠢᠮᠡᠭᠡ ᠴᠢᠩᠨᠠᠭᠰᠠᠨ ᠴᠢᠨᠢ᠄
— ᠡᠨᠡ ᠮᠠᠭᠤ ᠬᠡᠦᠬᠡᠳ ᠢ᠋ ᠴᠢᠨᠢ ᠨᠢᠷᠤᠭᠤᠨ ᠳ᠋ᠤ᠌ ᠨᠢ ᠠᠷᠤᠭ᠂ ᠭᠠᠷ ᠲᠤ᠌ ᠨᠢ ᠰᠠᠪᠠᠷ᠂ ᠬᠥᠯ ᠳ᠋ᠦ᠍ ᠨᠢ ᠱᠠᠬᠠᠢ ᠡᠮᠦᠰᠬᠡᠭᠡᠳ ᠡᠳᠦᠷᠵᠢᠨ ᠵᠠᠷᠤᠴᠠᠯᠠᠳᠠᠭ ᠬᠡᠷᠡᠭ ᠠ᠋! ᠡᠳᠦᠷ ᠲᠦ᠍ ᠨᠢᠭᠡ ᠠᠶᠠᠭᠠ ᠤᠰᠤ ᠥᠭᠴᠦ ᠠᠳᠬᠤ ᠰᠢᠷᠠ ᠪᠤᠳᠠᠭᠠ ᠪᠠᠷ ᠭᠡᠳᠡᠰᠦ ᠶ᠋ᠢ ᠨᠢ ᠳᠦᠭᠦᠷᠭᠡᠭᠡᠳ ᠪᠠᠢᠬᠤ ᠳ᠋ᠤ᠌ ᠪᠣᠯᠬᠤ ᠦᠭᠡᠢ ᠶᠠᠭᠠᠬᠢᠳᠠᠭ ᠶᠤᠮ? ᠭᠡᠵᠦ ᠪᠠᠢᠨᠠ ᠭᠡᠨᠡ᠃
ᠠᠪᠠᠭᠠᠢ᠄— ᠦᠭᠡᠢ ᠴᠢ ᠴᠢᠨᠢ ᠥᠨᠥᠳᠥᠷ ᠶᠡᠬᠡ ᠣᠯᠵᠠ ᠲᠠᠢ ᠶᠠᠪᠤᠵᠠᠢ᠂ ᠡᠨᠡ ᠬᠦᠦ ᠶ᠋ᠢ ᠶᠠᠭᠠᠬᠢᠵᠤ ᠪᠠᠢᠭᠠᠳ ᠶᠠᠭᠠᠬᠢᠰᠬᠢᠭᠡᠳ ᠪᠠᠷᠢᠭᠠᠳ ᠠᠪᠤᠪᠠ? ᠭᠡᠵᠦ ᠪᠠᠢᠨᠠ ᠭᠡᠨᠡ᠃
— ᠲᠣᠢᠨ ᠭᠣᠣᠯ ᠤ᠋ᠨ ᠤᠰᠤᠨ ᠳ᠋ᠤ᠌ ᠤᠷᠤᠰᠤᠭᠠᠳ ᠶᠠᠪᠤᠵᠤ ᠪᠠᠢᠬᠤ ᠪᠠᠷ ᠨᠢ᠁ ᠶᠠᠭᠠᠬᠢᠬᠤᠪ ᠳᠠ᠂ ᠨᠥᠭᠦᠭᠡ ᠪᠠᠷᠢᠳᠠᠭ ᠠᠷᠭᠠ ᠪᠠᠷ ᠢ᠋ᠶ᠋ᠠᠨ ᠯᠠ ᠪᠠᠷᠢᠭᠠᠳ ᠢᠷᠡᠯᠡ᠂ ᠰᠡᠷᠭᠦᠯᠡᠩ ᠶᠠᠩᠵᠤ ᠶ᠋ᠢᠨ ᠬᠡᠦᠬᠡᠳ ᠪᠠᠢᠳᠠᠭ ᠰᠢᠦ᠂ ᠮᠡᠳᠡᠭᠡᠲᠡᠢᠬᠡᠨ ᠪᠠᠢᠭᠠᠷᠠᠢ! ᠭᠡᠵᠦ ᠬᠡᠯᠡᠭᠡᠳ ᠰᠠᠨᠳᠤᠷᠤᠭᠠᠳ ᠯᠠ ᠭᠠᠷᠤᠭᠠᠳ ᠶᠠᠪᠤᠴᠢᠬᠠᠵᠠᠢ ᠭᠡᠨᠡ᠃
ᠪᠠᠽᠠᠷ ᠪᠣᠰᠴᠤ ᠴᠢᠢᠳᠡᠮ ᠵᠢᠭᠠᠯ ᠵᠠᠯᠭᠢᠯᠠᠭᠠᠳ ᠭᠠᠷᠲᠠᠯᠠ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠣᠭᠣᠰᠣᠷ ᠪᠦᠴᠡ ᠦᠭᠡᠢ ᠴᠠᠭᠠᠨ ᠥᠷᠭᠥᠭᠡ ᠪᠠᠢᠨᠠ ᠭᠡᠨᠡ ᠰᠢᠦ᠂ ᠬᠠᠶᠠᠭᠠᠨ ᠳ᠋ᠤ᠌ ᠨᠢ ᠣᠴᠢᠭᠠᠳ ᠴᠢᠩᠨᠠᠭᠰᠠᠨ ᠴᠢᠨᠢ ᠬᠣᠶᠠᠷ ᠠᠪᠠᠭᠠᠢ ᠢᠩᠭᠢᠵᠦ ᠶᠠᠷᠢᠵᠤ ᠪᠠᠢᠨᠠ ᠭᠡᠨᠡ᠃
— ᠵᠠ ᠬᠦ᠂ ᠴᠢ ᠮᠠᠨ ᠤ᠋ ᠭᠡᠷ ᠦ᠋ᠨ ᠡᠵᠡᠨ ᠢ᠋ ᠮᠡᠳᠡᠨᠡ ᠳᠠ᠂ ᠡᠳᠦᠢ ᠪᠣᠯᠲᠠᠯᠠ ᠪᠠᠨ ᠬᠠᠰᠢᠷ ᠰᠠᠭᠤᠵᠤ᠂ ᠬᠠᠯᠠ ᠦᠵᠡᠭᠡ ᠦᠭᠡᠢ ᠭᠡᠵᠦ ᠬᠡᠨ ᠴᠦ᠍ ᠬᠡᠯᠡᠬᠦ ᠦᠭᠡᠢ ᠲᠠ᠂ ᠦᠭᠡᠢ ᠲᠡᠭᠡᠭᠡᠳ ᠥᠨᠥᠳᠥᠷ ᠲᠣᠢᠨ ᠭᠣᠣᠯ ᠢ᠋ᠶ᠋ᠠᠷ ᠤᠷᠤᠰᠴᠤ ᠶᠠᠪᠤᠭᠰᠠᠨ ᠲᠣᠬᠣᠢ ᠶ᠋ᠢᠨ ᠴᠢᠨᠡᠭᠡ ᠬᠡᠦᠬᠡᠳ ᠢ᠋ ᠪᠠᠷᠢᠭᠠᠳ ᠠᠪᠤᠭᠠᠳ ᠢᠷᠡᠵᠡᠢ᠂ ᠬᠠᠷᠠᠬᠤ ᠳ᠋ᠤ᠌ ᠠᠢᠬᠤᠪᠲᠤᠷ ᠰᠦᠷᠡᠬᠡᠢ ᠬᠡᠦᠬᠡᠳ ᠪᠠᠢᠨᠠ᠂ ᠠᠷᠭᠠ ᠪᠠᠨ ᠶᠠᠳᠠᠬᠤ ᠳ᠋ᠤ᠌ ᠪᠠᠨ ᠠᠵᠠ ᠬᠡᠢᠮᠣᠷᠢ ᠨᠢ ᠵᠠᠢᠯᠠᠭ ᠭᠡᠵᠦ ᠬᠥᠰᠡᠷ ᠦ᠋ᠨ ᠮᠠᠭᠤ ᠬᠤᠪᠴᠠᠰᠤ ᠡᠮᠦᠰᠦᠭᠦᠯᠦᠭᠡᠳ ᠪᠠᠢᠭᠠ ᠨᠢ ᠲᠡᠷᠡ᠃ ᠭᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠠᠪᠠᠭᠠᠢ᠄
— ᠲᠡᠢᠮᠦ ᠵᠢᠭᠠᠬᠠᠨ ᠬᠡᠦᠬᠡᠳ ᠲᠡᠭᠡᠵᠦ ᠶᠠᠪᠤᠬᠤ ᠤᠴᠢᠷ ᠦᠭᠡᠢ᠂ ᠲᠡᠷᠡ ᠯᠠᠪ ᠨᠢᠭᠡ ᠪᠣᠯ ᠪᠤᠷᠬᠠᠨ ᠪᠠᠢᠬᠤ᠂ ᠨᠢᠭᠡ ᠪᠣᠯ ᠠᠳᠠ ᠲᠠᠢ ᠮᠠᠭᠤ ᠠᠮᠢᠲᠠᠨ ᠪᠠᠢᠵᠤ ᠲᠠᠭᠠᠷᠠᠨᠠ᠂ ᠵᠣᠷᠢᠭ ᠢ᠋ᠶ᠋ᠠᠷ ᠨᠢ ᠰᠢᠦ ᠪᠠᠢᠯᠭᠠᠵᠤ ᠪᠠᠢᠭᠠᠳ ᠯᠠ ᠨᠥᠭᠥᠭᠡᠳᠡᠭᠦᠯᠡ ᠪᠡᠨ ᠢᠷᠡᠮᠡᠭᠴᠡ ᠨᠢᠭᠡ ᠤᠴᠢᠷ ᠢ᠋ ᠨᠢ ᠣᠯᠤᠭᠰᠠᠨ ᠨᠢ ᠳᠡᠭᠡᠷᠡ ᠭᠡᠵᠦ ᠪᠠᠢᠨᠠ ᠭᠡᠨᠡ᠃
ᠪᠠᠴᠠᠷ ᠡᠨᠡ ᠦᠭᠡ ᠶ᠋ᠢ ᠳᠤᠭᠤᠯᠤᠭᠠᠳ ᠵᠠᠢᠯᠠᠬᠤ ᠶ᠋ᠢ ᠪᠣᠳᠣᠵᠤ ᠡᠢᠰᠢ ᠲᠠᠢᠰᠢ ᠪᠠᠨ ᠬᠠᠷᠠᠭᠰᠠᠨ ᠴᠢᠨᠢ ᠮᠣᠳᠣᠨ ᠠᠷᠤᠪᠴᠢ ᠳᠡᠷᠡᠰᠦᠨ ᠨᠤᠮᠤ ᠰᠤᠮᠤ ᠨᠢ ᠲᠣᠮᠣ ᠭᠡᠷ ᠦ᠋ᠨ ᠵᠡᠭᠦᠨᠲᠡᠢ ᠬᠤᠷᠢᠶᠠᠭᠰᠠᠨ ᠪᠠᠷᠠᠭᠠᠨ ᠳᠡᠭᠡᠷᠡ ᠳᠠᠮᠨᠠᠭᠤᠯᠤᠭᠠᠳ ᠬᠠᠶᠠᠭᠰᠠᠨ ᠬᠠᠷᠠᠭᠳᠠᠵᠠᠢ ᠭᠡᠨᠡ᠂ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠳᠡᠭᠡᠷᠡ ᠨᠣᠭᠣᠭᠠᠨ ᠭᠥᠯᠢᠮ ᠲᠡᠢ ᠱᠠᠭᠠᠵᠠᠭᠠᠢ ᠠᠯᠠᠭ ᠮᠣᠷᠢ ᠲᠣᠯᠣᠭᠠᠢ ᠪᠠᠨ ᠬᠠᠶᠠᠯᠠᠨ ᠵᠣᠭᠰᠣᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ᠂ ᠡᠨᠡ ᠯᠠᠪ ᠰᠡᠭᠦᠯ ᠦ᠋ᠨ ᠢᠷᠡᠭᠰᠡᠨ ᠠᠪᠠᠭᠠᠢ ᠶ᠋ᠢᠨ ᠮᠣᠷᠢ ᠪᠠᠢᠵᠤ ᠲᠠᠭᠠᠷᠠᠬᠤ ᠨᠢ ᠠ᠋! ᠭᠡᠵᠦ ᠪᠣᠳᠣᠵᠤ ᠭᠡᠨᠡ᠃
ᠡᠨᠡ ᠬᠣᠶᠠᠷ ᠠᠪᠠᠭᠠᠢ ᠬᠣᠭᠣᠯᠠ ᠤᠮᠳᠠᠨ ᠤ᠋ ᠪᠠᠨ ᠭᠡᠷ ᠲᠦ᠍ ᠣᠷᠣᠵᠤ ᠵᠠᠷᠤᠴᠠ ᠨᠠᠷ ᠲᠤ᠌ ᠪᠠᠨ ᠲᠡᠭᠡ᠂ ᠢᠩᠭᠢ ᠭᠡᠵᠦ ᠲᠤᠰᠢᠶᠠᠯ ᠪᠠᠭᠤᠯᠭᠠᠵᠤ ᠪᠠᠢᠭᠠ ᠶᠤᠮ ᠪᠠᠢᠨᠠ ᠳᠠ ᠭᠡᠵᠦ ᠪᠣᠳᠣᠵᠠᠢ᠂
ᠠᠯᠠᠭ ᠮᠣᠷᠢ ᠳᠡᠭᠡᠷᠡ ᠣᠴᠢᠪᠠᠯ ᠬᠦᠵᠦᠭᠦᠦ ᠰᠤᠩᠭᠠᠨ ᠦᠨᠦᠷᠯᠡᠵᠦ ᠪᠠᠢᠨᠠ ᠭᠡᠨᠡ᠂ ᠪᠠᠽᠠᠷ ᠬᠦᠦ ᠤᠶᠠᠭᠠ ᠶ᠋ᠢ ᠲᠠᠢᠯᠤᠩᠭᠤᠲᠠ ᠮᠣᠷᠳᠠᠬᠤ ᠭᠡᠰᠡᠨ ᠴᠢᠨᠢ ᠬᠥᠯ ᠨᠢ ᠳᠥᠷᠦᠭᠡᠨ ᠳ᠋ᠦ᠍ ᠨᠢ ᠬᠦᠷᠳᠡᠭ ᠦᠭᠡᠢ᠃ ᠲᠡᠭᠡᠬᠦ ᠪᠡᠷ ᠨᠢ ᠠᠷᠤᠭ ᠳᠡᠭᠡᠷᠡ ᠭᠠᠷᠴᠤ ᠮᠣᠷᠳᠠᠭᠠᠳ ᠯᠠ ᠵᠡᠭᠦᠨ ᠬᠣᠢᠲᠤ ᠵᠦᠭ ᠤᠷᠤᠭᠤ ᠳᠠᠪᠬᠢᠨ ᠣᠳᠴᠠᠢ ᠭᠡᠨᠡ᠃
ᠲᠥᠨᠲᠡᠯᠡᠢ ᠬᠦᠦ ᠲᠦᠮᠡᠨ ᠬᠣᠨᠢ ᠪᠠᠨ ᠬᠠᠷᠢᠭᠤᠯᠤᠭᠠᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠴᠢᠨᠢ ᠪᠠᠷᠠᠭᠤᠨ ᠤᠷᠲᠤ ᠵᠦᠭ ᠡᠴᠡ ᠪᠠᠷᠠᠭᠠᠨ ᠲᠣᠭᠣᠰᠣ ᠭᠠᠷᠴᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ᠂
ᠵᠠ ᠳᠠ!᠂ ᠡᠨᠡ ᠴᠦ᠍ ᠯᠠᠪ ᠰᠠᠢᠨ ᠡᠷᠡ ᠶ᠋ᠢᠨ ᠮᠣᠷᠢᠨ ᠤ᠋ ᠲᠣᠭᠣᠰᠣ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠠᠰᠠᠷ ᠪᠠᠰᠠᠷ ᠬᠣᠶᠠᠷ ᠨᠣᠬᠠᠢ ᠪᠠᠨ ᠲᠡᠷᠡ ᠵᠦᠭ ᠲᠦ᠍ ᠲᠣᠬᠢᠷᠠᠭᠠᠳ ᠣᠷᠭᠢᠲᠠᠯᠠ ᠬᠣᠶᠠᠷ ᠨᠣᠬᠠᠢ ᠨᠢ ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠣᠳᠴᠠᠢ ᠭᠡᠨᠡ᠃
ᠪᠠᠽᠠᠷ ᠬᠦᠦ ᠶ᠋ᠢᠨ ᠱᠠᠭᠠᠵᠠᠭᠠᠢ ᠠᠯᠠᠭ ᠮᠣᠷᠢ ᠠᠶᠠᠭᠠ ᠶ᠋ᠢᠨ ᠴᠢᠨᠡᠭᠡ ᠴᠢᠯᠠᠭᠤ ᠶ᠋ᠢ ᠠᠷᠤ ᠲᠡᠢᠰᠢ ᠨᠢ ᠰᠢᠳᠡᠯᠡᠵᠦ᠂ ᠠᠯᠲᠠ ᠴᠠᠭᠠᠨ ᠲᠣᠭᠣᠰᠣ ᠶ᠋ᠢ ᠡᠭᠴᠡ ᠥᠭᠡᠳᠡ ᠨᠢ ᠪᠣᠰᠬᠠᠵᠤ᠂ ᠰᠤᠭᠤ ᠴᠢᠬᠢ ᠪᠡᠨ ᠰᠣᠯᠪᠢᠭᠤᠯᠵᠤ᠂ ᠲᠣᠷᠮᠣᠭᠣᠷ ᠨᠢᠳᠦ ᠪᠡᠨ ᠴᠠᠪᠴᠢᠭᠤᠯᠵᠤ ᠨᠢᠭᠡᠨ ᠵᠢᠭᠳᠡ ᠳᠠᠪᠬᠢᠵᠤ ᠶᠠᠪᠤᠲᠠᠯᠠ ᠠᠰᠠᠷ ᠪᠠᠰᠠᠷ ᠬᠣᠶᠠᠷ ᠨᠣᠬᠠᠢ ᠤᠭᠲᠤᠨ ᠣᠴᠢᠵᠤ ᠵᠡᠷᠭᠡᠴᠡᠨ ᠢᠷᠡᠭᠡᠳ᠂ ᠡᠵᠡᠨ ᠪᠢᠳᠡᠨ ᠢ᠋ ᠤᠭᠲᠤᠭᠤᠯᠪᠠ ᠭᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ ᠡᠯᠳᠡᠪ ᠬᠥᠭᠡᠷᠦᠬᠦᠨ ᠠᠭᠠᠰᠢ ᠭᠠᠷᠭᠠᠵᠤ ᠡᠷᠬᠡᠯᠡᠨ ᠪᠠᠢᠵᠠᠢ᠂ ᠪᠠᠽᠠᠷ ᠬᠦᠦ
— ᠰᠠᠢᠨ ᠠᠬᠠ ᠶ᠋ᠢᠨ ᠠᠮᠤᠷ ᠢ᠋ ᠡᠷᠢᠶᠡ! ᠭᠡᠰᠡᠨ ᠳ᠋ᠦ᠍ ᠲᠥᠨᠲᠡᠯᠡᠢ᠄
— ᠰᠠᠢᠨ ᠳᠡᠭᠦᠦ ᠶ᠋ᠢᠨ ᠠᠮᠤᠷ ᠢ᠋ ᠡᠷᠢᠶᠡ! ᠵᠠ᠂ ᠮᠢᠨᠦ ᠳᠡᠭᠦᠦ ᠰᠠᠨᠠᠭᠠ ᠮᠠᠭᠤᠲᠤ ᠬᠥᠮᠦᠰ ᠲᠡᠢ ᠠᠭᠤᠯᠵᠠᠭᠠ ᠤᠤ? ᠭᠡᠬᠦ ᠳ᠋ᠦ᠍ ᠨᠢ ᠪᠠᠴᠠᠷ ᠬᠦᠦ ᠪᠠᠬᠠᠨ ᠳᠠᠭᠤ ᠦᠭᠡᠢ ᠪᠠᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
ᠠᠭᠤᠯᠵᠠᠭᠠᠳ ᠵᠢᠭᠤᠲᠠᠭᠠᠳ ᠢᠷᠡᠯᠡ ᠭᠡᠵᠡᠢ ᠭᠡᠨᠡ᠃ ᠲᠥᠨᠲᠡᠯᠡᠢ ᠬᠦᠦ᠄
— ᠵᠠ! ᠴᠢ ᠪᠢᠳᠡ ᠬᠣᠶᠠᠷ ᠠᠬᠠ ᠳᠡᠭᠦᠦ ᠪᠣᠯᠵᠤ ᠠᠪᠤ ᠡᠵᠢ ᠳᠡᠭᠡᠷᠡ ᠴᠢᠨᠢ ᠣᠴᠢᠨᠠ ᠳᠠ᠂ ᠪᠢ ᠴᠢᠮᠠ ᠶ᠋ᠢ ᠢᠩᠭᠢᠭᠡᠳ ᠬᠦᠷᠦᠭᠡᠳ ᠢᠷᠡᠨᠡ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠬᠠᠷᠠ ᠪᠤᠷᠤᠭᠤ ᠰᠠᠨᠠᠭᠠᠲᠤ ᠬᠡᠰᠡᠭ ᠳᠡᠭᠡᠷᠡᠮᠴᠢᠳ ᠬᠣᠯᠠ ᠣᠢᠷᠠ ᠡᠴᠡ ᠶᠠᠪᠤᠭᠠ ᠬᠥᠮᠦᠨ ᠦ᠌ ᠤᠨᠤᠭᠠ ᠮᠠᠯ᠂ ᠤᠰᠤ ᠭᠠᠲᠤᠯᠬᠤ ᠪᠠᠷ ᠶᠠᠪᠤᠭᠠ ᠰᠦᠷᠦᠭ ᠢ᠋ ᠳᠡᠭᠡᠷᠡᠮᠳᠡᠵᠦ ᠬᠡᠷᠡᠭᠲᠡᠢ ᠭᠡᠵᠦ ᠰᠠᠨᠠᠭᠰᠠᠨ ᠡᠵᠡᠨ ᠢ᠋ ᠬᠣᠷᠣᠭᠠᠵᠤ ᠪᠠᠢᠳᠠᠭ ᠬᠥᠮᠦᠰ ᠣᠳᠣ ᠪᠢᠳᠡᠨ ᠳ᠋ᠦ᠍ ᠠᠶᠤᠬᠤ ᠶ᠋ᠢᠨ ᠠᠶᠤᠯ ᠪᠠᠢᠬᠤ ᠦᠭᠡᠢ ᠭᠡᠵᠡᠢ᠂ ᠡᠳ᠋ ᠪᠠᠶᠠᠯᠢᠭ ᠤ᠋ᠨ ᠠᠷᠢᠭᠤᠨ ᠡᠴᠡ ᠡᠷᠬᠢᠮ ᠰᠡᠳᠬᠢᠯ ᠦ᠋ᠨ ᠠᠷᠢᠭᠤᠨ ᠭᠡᠵᠦ ᠪᠠᠢᠳᠠᠭ ᠶᠤᠮ᠂ ᠡᠢᠮᠦ ᠪᠣᠯᠬᠣᠷ ᠬᠡᠵᠢᠶᠡᠳᠡ ᠰᠠᠢᠨ ᠶᠠᠭᠤᠮᠠ ᠰᠠᠨᠠᠵᠤ ᠶᠠᠪᠤᠬᠤ ᠬᠡᠷᠡᠭᠲᠡᠢ᠃ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠨᠢ ᠪᠠᠽᠠᠷ ᠳᠡᠭᠦᠦ ᠨᠢ ᠵᠥᠪᠰᠢᠶᠡᠷᠡᠵᠡᠢ᠃
ᠢᠩᠭᠢᠭᠡᠳ ᠡᠨᠡ ᠬᠣᠶᠠᠷ ᠠᠬᠠ ᠳᠡᠭᠦᠦ ᠪᠣᠯᠵᠤ ᠲᠦᠮᠡᠨ ᠬᠣᠨᠢ ᠪᠠᠨ ᠬᠠᠷᠢᠭᠤᠯᠵᠤ ᠡᠷᠭᠢᠬᠦ ᠳᠥᠷᠪᠡᠨ ᠤᠯᠠᠷᠢᠯ ᠳ᠋ᠤ᠌ ᠡᠷᠬᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠰᠠᠢᠨ ᠰᠠᠢᠬᠠᠨ ᠠᠮᠢᠳᠤᠷᠠᠵᠤ ᠠᠷᠠᠳ ᠣᠯᠠᠨ ᠳ᠋ᠤ᠌ ᠪᠠᠨ ᠲᠤᠰᠠ ᠬᠦᠷᠭᠡᠭᠰᠡᠭᠡᠷ ᠪᠠᠢᠭᠰᠠᠨ ᠶᠤᠮ ᠭᠡᠨᠡ ᠯᠠᠢ᠃
ᠦᠯᠢᠭᠡᠷ ᠲᠦ᠍ ᠭᠠᠷᠳᠠᠭ ᠪᠢ ᠬᠡᠯᠡ ᠪᠣᠯᠵᠤ ᠦᠨᠡᠨ ᠢ᠋ ᠬᠦᠰᠡᠭᠰᠡᠨ ᠰᠠᠨᠠᠭᠠ ᠨᠢ ᠪᠦᠲᠦᠵᠦ᠂ ᠦᠢᠯᠡᠰ ᠪᠦᠬᠦᠨ ᠤᠷᠤᠭᠰᠢᠲᠠᠢ ᠶᠠᠪᠤᠵᠤ ᠦᠢ ᠲᠦᠮᠡᠨ ᠮᠠᠨᠢ ᠪᠡᠶᠡᠰᠴᠦ ᠪᠠᠢᠨᠠ᠂ ᠦᠯᠢᠭᠡᠷ ᠡᠴᠡ ᠰᠤᠷᠬᠤ ᠶᠠᠭᠤᠮᠠ ᠶᠡᠬᠡ ᠪᠣᠢ᠂ ᠦᠯᠢᠭᠡᠷ ᠡᠴᠡ ᠰᠠᠨᠠᠬᠤ ᠶᠠᠭᠤᠮᠠ ᠶᠡᠬᠡ ᠪᠣᠢ᠂ ᠮᠠᠰᠢ ᠰᠠᠢᠨ ᠮᠠᠭᠠᠳᠯᠠᠨ ᠳᠤᠭᠤᠯᠤᠭᠠᠳ ᠮᠠᠷᠭᠠᠰᠢ ᠶ᠋ᠢᠨ ᠦᠯᠢᠭᠡᠷ ᠢ᠋ ᠰᠣᠨᠣᠰᠤᠭᠠᠷᠠᠢ᠃
ᠦᠰᠦᠭ ᠬᠠᠲᠠᠭᠰᠠᠨ ᠨᠢ᠄ ᠰᠡᠷᠭᠦᠯᠡᠩ᠂
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠠᠷᠠᠨᠲᠤᠶᠠᠭᠠ᠃