ᠬᠥᠨᠳᠡᠭᠦᠷ ᠶᠡᠬᠡᠲᠡᠢ ᠳᠡᠭᠡᠳᠦ ᠨᠡᠢᠰᠯᠡᠯ – ᠰᠡᠴᠡᠨᠪᠢᠯᠢᠭ Хөндүүр ихтэй дээд нийслэл – Цэцэнбилэг
1636 ᠪᠢᠳᠡ ᠭᠠᠨᠲᠢᠭ ᠴᠠᠭᠠᠨ ᠲᠠᠢᠯᠪᠤᠷᠢ ᠬᠥᠰᠢᠭᠡᠨ ᠦ᠌ ᠡᠮᠦᠨᠡ ᠬᠣᠯᠠ ᠶ᠋ᠢ ᠪᠠᠷᠠᠭᠠᠯᠠᠨ ᠴᠢᠩᠨᠠᠨ ᠵᠣᠭᠰᠣᠵᠠᠭᠠᠪᠠ᠃ ᠮᠠᠨᠤᠰ ᠴᠢᠨᠢ ᠨᠡᠢᠰᠯᠡᠯ ᠲᠡᠢ ᠤᠯᠤᠰ ᠪᠠᠢᠵᠤ ᠰᠢᠦ᠃ ᠭᠡᠲᠡᠯᠡ ᠨᠡᠢᠰᠯᠡᠯ ᠮᠢᠨᠢ ᠨᠢᠭᠤᠷ ᠥᠭᠬᠦ ᠦᠭᠡᠢ ᠭᠣᠯᠣᠴᠢᠬᠠᠭᠠᠳ ᠤᠤ ? ᠭᠣᠮᠣᠳᠠᠴᠢᠬᠠᠭᠠᠳ ᠤᠤ ? ᠪᠢ ᠮᠡᠳᠡᠬᠦ ᠦᠭᠡᠢ᠂ ᠶᠠᠭᠤ ᠪᠣᠯᠤᠭᠰᠠᠨ ᠴᠤ᠌ ᠠᠯᠢ ᠪᠦᠬᠦᠨ ᠢ᠋ᠶ᠋ᠡᠨ ᠪᠢᠳᠡᠨ ᠡᠴᠡ ᠨᠢᠭᠤᠵᠤ ᠳᠠᠯᠳᠠᠯᠠᠭᠠᠳ᠂ ᠤᠨᠢᠶᠠᠷ ᠮᠠᠨᠠᠨ ᠢ᠋ᠶ᠋ᠠᠨ ᠪᠠᠭᠤᠯᠭᠠᠵᠠᠢ᠃ ᠤᠶᠠᠷᠠᠬᠤ ᠳ᠋ᠤ᠌ ᠪᠠᠨ ᠮᠠᠨᠤᠰ ᠢ᠋ ᠤᠬᠢᠯᠠᠴᠢᠬᠠᠬᠤ ᠮᠠᠭᠠᠳ ᠦᠭᠡᠢ᠂ ᠰᠣᠴᠢᠬᠤ ᠳ᠋ᠤ᠌ ᠪᠠᠨ ᠮᠠᠨᠤᠰ ᠢ᠋ ᠬᠠᠰᠬᠢᠷᠴᠢᠬᠠᠬᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠳᠡᠭᠡᠳᠦ ᠨᠡᠢᠰᠯᠡᠯ ᠮᠢᠨᠢ ᠠᠶᠤᠯᠠ ᠴᠤ᠌ ᠶᠤᠮ ᠤᠤ ᠳᠠ ? ᠨᠢᠭᠡ ᠬᠡᠯᠡᠪᠡᠯ᠂ ᠶᠠᠭᠤᠮᠠ ᠶᠡᠷᠦ ᠨᠢ ᠪᠦᠷᠦᠭ ᠪᠠᠷᠤᠭ ᠪᠠᠢᠬᠤ ᠳ᠋ᠤ᠌ ᠪᠠᠨ ᠳᠡᠭᠡᠷᠡ᠂ ᠪᠣᠳᠠᠲᠠᠢ ᠪᠢᠰᠢ ᠬᠡᠢᠰᠪᠦᠷᠢ ᠪᠠᠢᠬᠤ ᠳ᠋ᠤ᠌ ᠪᠠᠨ ᠳᠡᠭᠡᠷᠡ ᠠ᠋᠃
ᠨᠡᠢᠰᠯᠡᠯ ᠭᠡᠵᠦ ᠰᠠᠨᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ᠂ ᠭᠡᠬᠦ ᠳ᠋ᠦ᠍ ᠪᠡᠨ ᠨᠡᠢᠰᠯᠡᠯ ᠪᠠᠢᠭᠰᠠᠨ ᠨᠢ ᠦᠨᠡᠨ᠂ ᠳᠣᠯᠣᠭᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠡᠮᠦᠨᠡ ᠬᠤᠪᠢᠯᠠᠢ ᠡᠨᠳᠡ ᠠᠩᠬᠠ ᠨᠡᠢᠰᠯᠡᠯᠯᠡᠵᠦ ᠬᠥᠮᠦᠨ ᠪᠦᠯᠢ ᠨᠢ ᠬᠣᠷᠢᠨ ᠲᠠᠪᠤᠨ ᠲᠦᠮᠡ ᠬᠦᠷᠦᠭᠰᠡᠨ ᠮᠣᠩᠭᠣᠯ ᠨᠡᠢᠰᠯᠡᠯ ᠪᠠᠢᠭᠰᠠᠨ ᠨᠢ ᠦᠨᠡᠨ᠃
《ᠶᠠᠭᠤ ᠭᠡᠵᠦ ᠰᠢᠲᠠᠭᠠᠭᠰᠠᠨ ᠪᠣᠢ? 》 ᠭᠡᠵᠦ ᠬᠡᠦᠬᠡᠨ ᠮᠢᠨᠢ ᠠᠰᠠᠭᠤᠪᠠ᠃
《ᠶᠠᠭᠤ ᠭᠡᠵᠦ ᠰᠢᠲᠠᠭᠠᠬᠤ ᠤᠤ ᠳᠠ᠂ ᠮᠣᠩᠭᠣᠯ ᠢ᠋ ᠮᠥᠬᠥᠭᠡᠨᠡ ᠭᠡᠵᠦ ᠰᠢᠲᠠᠭᠠᠨᠠ ᠰᠢᠲᠠ》 ᠭᠡᠵᠦ ᠪᠢ ᠬᠠᠷᠢᠭᠤᠯᠪᠠ᠃
《ᠮᠣᠩᠭᠣᠯ ᠢ᠋ ᠮᠥᠬᠥᠭᠡᠨᠡ ᠭᠡᠨᠡ 》 ᠭᠡᠵᠦ ᠬᠡᠦᠬᠡᠨ ᠮᠢᠨᠢ ᠯᠠᠪᠯᠠᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠨᠢ ᠪᠦᠯᠲᠡᠭᠡᠨᠡᠪᠡ᠃
《ᠲᠡᠢᠮᠦ ᠠ᠋ ! 》ᠭᠡᠵᠦ ᠪᠢ ᠥᠭᠡᠷᠡ ᠦᠭᠡ ᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠬᠡᠦᠬᠡᠨ ᠢ᠋ᠶ᠋ᠡᠨ ᠠᠶᠤᠯᠭᠠᠭᠰᠠᠨ ᠢ᠋ ᠮᠡᠳᠡᠮᠡᠭᠴᠡ ᠭᠡᠮᠰᠢᠯᠡ᠃ ᠪᠢ ᠴᠢᠨᠢ ᠬᠡᠦᠬᠡᠨ ᠢ᠋ᠶ᠋ᠡᠨ ᠪᠠᠶᠠᠰᠬᠠᠬᠤ ᠭᠡᠵᠦ ᠳᠠᠭᠠᠭᠤᠯᠤᠭᠠ ᠦᠭᠡᠢ᠂ ᠨᠢᠯᠬᠠ ᠡᠩᠬᠦᠷᠡᠢ ᠰᠡᠳᠬᠢᠯ ᠢ᠋ ᠨᠢ ᠬᠥᠨᠳᠡᠭᠡᠬᠦ ᠭᠡᠵᠦ ᠳᠠᠭᠠᠭᠤᠯᠤᠭᠰᠠᠨ ᠪᠠᠢᠵᠤ ᠰᠢᠦ᠃ ᠡᠨᠡ ᠮᠢᠨᠦ ᠪᠤᠷᠤᠭᠤ᠂ ᠠᠪᠤ ᠨᠢ ᠪᠣᠯᠤᠭᠰᠠᠨ ᠮᠢᠨᠦ ᠬᠡᠦᠬᠡᠨ ᠢ᠋ᠶ᠋ᠡᠨ ᠣᠢᠯᠭᠠᠭᠰᠠᠨ ᠦᠭᠡᠢ ᠶ᠋ᠢᠨ ᠪᠤᠷᠤᠭᠤ᠃
ᠨᠡᠢᠰᠯᠡᠯ ᠮᠢᠨᠢ ᠳᠠᠷᠠᠰᠤ ᠪᠣᠯᠭᠠᠨ ᠱᠤᠤᠭᠢᠨ ᠰᠡᠭᠦᠷᠡᠰᠦᠯᠡᠵᠦ ᠰᠣᠨᠣᠰᠳᠠᠨᠠ᠃ ᠳᠠᠷᠠᠰᠤ ᠨᠢ ᠰᠡᠭᠦᠷᠡᠰᠦ ᠠᠯᠲᠠᠨ ᠱᠤᠤᠭᠢᠭᠰᠠᠨ᠂ ᠳᠡᠨᠵᠢ ᠨᠢ ᠰᠣᠷᠪᠢ ᠪᠠᠨ ᠲᠡᠮᠲᠡᠷᠢᠨ ᠶᠣᠣᠯᠠᠭᠰᠠᠨ ᠡᠷᠲᠡ ᠳᠡᠭᠡᠳᠦ ᠶ᠋ᠢᠨ ᠶᠡᠬᠡ ᠪᠠᠯᠠᠮᠠᠳ᠂ ᠶᠡᠬᠡ ᠪᠠᠯᠠᠢ ᠳᠤᠮᠳᠠᠭᠤᠷ ᠪᠢᠳᠡ ᠰᠦᠯᠵᠢᠵᠦ ᠳᠠᠯᠳᠢᠷᠠᠭᠰᠠᠭᠠᠷ ᠶᠠᠪᠤᠯᠠ᠃ ᠨᠣᠮ ᠤ᠋ᠨ ᠰᠢᠵᠢᠷ ᠦᠰᠦᠭ ᠰᠢᠭ ᠰᠢᠷᠠ ᠴᠡᠴᠡᠭ ᠯᠠ ᠨᠣᠯ ᠰᠢᠷᠭᠠᠯᠲᠤᠵᠤ ᠲᠠᠯᠠ ᠳᠦᠭᠦᠷᠡᠩ ᠤᠳᠬᠠᠯᠢᠭ ᠴᠢᠮᠪᠠᠢᠯᠢᠭ ᠳᠡᠯᠭᠡᠷᠡᠨᠡ᠃ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠥᠬᠡ ᠬᠡᠳᠦᠨ ᠵᠠᠭᠤᠨ ᠢ᠋ᠶ᠋ᠠᠷ ᠵᠤᠯᠭᠠᠷᠠᠳᠠᠭ ᠦᠭᠡᠢ᠂ ᠶᠠᠮᠠᠷ ᠴᠤ᠌ ᠬᠦᠨᠳᠦ ᠵᠢᠷᠤᠮ ᠢ᠋ ᠪᠣᠳᠣᠭᠰᠠᠨ ᠴᠡᠴᠡᠭ ᠶᠦᠮ ᠳᠡ?
ᠨᠤᠷᠠᠵᠤ ᠭᠦᠢᠴᠡᠳ ᠪᠠᠯᠠᠷᠠᠭᠠ ᠦᠭᠡᠢ ᠬᠣᠲᠠ ᠶ᠋ᠢᠨ ᠬᠡᠷᠡᠮ ᠳ᠋ᠦ᠍ ᠪᠦᠳᠦᠭᠦᠨ ᠪᠦᠳᠦᠭᠦᠨ ᠠᠭᠤᠢ ᠭᠡᠮᠡᠷ ᠨᠦᠬᠡ ᠮᠠᠨᠤᠰ ᠤ᠋ᠨ ᠥᠭᠡᠳᠡ ᠠᠩᠭᠠᠢᠨ ᠬᠠᠷᠠᠩᠭᠤᠢᠯᠠᠵᠤ᠄ 《ᠶᠠᠭᠠᠬᠢᠬᠤ ᠳ᠋ᠠᠭᠠᠨ ᠲᠠᠨᠤᠰ ᠣᠳᠣ ᠰᠠᠢ ᠢᠷᠡᠭᠡ ᠶᠦᠮ ᠪᠣᠢ ? 》ᠭᠡᠵᠦ ᠠᠰᠠᠭᠤᠨ ᠪᠠᠢᠭᠠ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠪᠢᠳᠡ ᠠᠭᠤᠢ ᠳ᠋ᠤ᠌ ᠣᠷᠣᠯᠠ᠃ ᠨᠢᠭᠡ ᠨᠢᠭᠡᠨ ᠢ᠋ᠶ᠋ᠡᠨ ᠰᠢᠲᠠᠭᠠᠵᠤ ᠳᠣᠭᠰᠢᠷᠠᠭᠰᠠᠨ ᠬᠣᠶᠠᠷ ᠲᠥᠷᠥ ᠶ᠋ᠢᠨ ᠥᠷᠢᠰᠦᠯᠳᠦᠭᠡᠨ᠂ ᠬᠣᠷᠣᠰᠤᠯ ᠥᠰᠢᠶᠡᠨ ᠦ᠌ ᠬᠢᠨ ᠭᠦᠨ ᠳᠣᠲᠣᠷᠠ ᠣᠷᠣᠯᠠ᠃ ᠬᠡᠨᠡᠭ ᠦᠭᠡᠢ ᠭᠦᠨᠵᠡᠭᠡᠢ᠂ ᠬᠠᠷᠰᠢᠯ ᠬᠢᠰᠠᠯ ᠤ᠋ᠨ ᠬᠢᠨ ᠤᠲᠤᠭᠠ ᠰᠠᠷᠨᠢᠭᠠ ᠦᠭᠡᠢ ᠲᠡᠦᠬᠡ ᠶ᠋ᠢᠨ ᠶᠡᠬᠡ ᠠᠮᠠ᠂ ᠲᠥᠷᠥ ᠶ᠋ᠢᠨ ᠶᠡᠬᠡ ᠠᠭᠤᠢ ᠳᠣᠲᠣᠷᠠ ᠪᠢᠳᠡ ᠬᠡᠰᠡᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠠᠷᠴᠤ ᠢᠷᠡᠵᠡᠭᠡᠪᠡ᠃ ᠵᠠᠷᠢᠮ ᠨᠢ ᠬᠠᠮᠠᠷ ᠳᠡᠭᠡᠷᠡ ᠪᠡᠨ ᠬᠦ ᠲᠡᠢ᠂ ᠵᠠᠷᠢᠮ ᠨᠢ ᠬᠣᠢᠰᠢ ᠳ᠋ᠤ᠌ ᠪᠠᠨ ᠥᠷᠢ ᠲᠡᠢ᠂ ᠳᠠᠷᠢ ᠦᠨᠦᠷᠲᠦᠭᠦᠯᠦᠭᠰᠡᠨ ᠰᠢᠭ᠂ ᠰᠥᠰᠥ ᠳᠣᠯᠢᠶᠠᠭᠰᠠᠨ ᠰᠢᠭ᠋ ᠭᠢᠯᠠᠯᠵᠠᠨ ᠭᠠᠷᠴᠤ ᠢᠷᠡᠵᠡᠭᠡᠪᠡ᠃ ᠢᠷᠮᠡᠭ ᠨᠢ ᠡᠮᠲᠡᠷᠬᠡᠢ ᠵᠢᠵᠢᠭ ᠴᠢᠯᠠᠭᠤᠨ ᠣᠩᠭᠣᠴᠠᠨ ᠳ᠋ᠤ᠌ ᠤᠰᠤ ᠲᠤᠨᠤᠨ ᠪᠠᠢᠪᠠ᠃ ᠣᠢᠷᠠᠳᠴᠤ ᠥᠩᠭᠡᠢᠨ ᠱᠠᠭᠠᠢᠪᠠᠯ ᠭᠢᠯᠠ ᠲᠤᠩᠭᠠᠯᠠᠭ᠂ ᠤᠰᠤ ᠪᠢᠰᠢ᠂ ᠤᠨᠲᠠᠷᠠᠭᠰᠠᠨ ᠭᠦᠷᠦᠨ ᠦ᠌ ᠮᠢᠨᠢ ᠪᠢᠳᠡᠨ ᠳ᠋ᠦ᠍ ᠦᠯᠡᠳᠡᠭᠡᠭᠰᠡᠨ ᠲᠣᠯᠢ ᠪᠠᠢᠯᠠ᠃ 《ᠪᠢᠳᠡ ᠶᠠᠭᠠᠬᠢᠯᠠ ?》ᠭᠡᠵᠦ ᠮᠠᠨᠤᠰ ᠵᠢᠰᠦ ᠪᠡᠨ ᠰᠢᠨᠵᠢᠵᠦ᠂ ᠰᠦᠨᠡᠰᠦ ᠪᠡᠨ ᠲᠣᠯᠢᠳᠠᠨ ᠵᠣᠭᠰᠣᠵᠠᠭᠠᠪᠠ᠂ ᠨᠡᠢᠰᠯᠡᠯ ᠦ᠋ᠨ ᠮᠢᠨᠢ ᠡᠬᠡ ᠬᠥᠷᠥᠰᠥ ᠨᠡᠢᠳᠡᠮ ᠳ᠋ᠦ᠍ ᠪᠡᠨ ᠱᠠᠯᠪᠠᠭ᠃ ᠭᠠᠵᠠᠷ ᠤ᠋ᠨ ᠭᠦᠨ ᠡᠴᠡ ᠨᠡᠪᠴᠢᠵᠦ ᠳᠡᠭᠡᠭᠰᠢ ᠬᠤᠷᠠᠭᠰᠠᠨ ᠱᠠᠯᠪᠠᠭ ᠬᠥᠯ ᠢ᠋ ᠮᠢᠨᠢ ᠵᠢᠩᠳᠡᠭᠡᠵᠦ᠂ ᠪᠣᠳᠣᠯ ᠢ᠋ ᠮᠢᠨᠢ ᠬᠠᠭᠠᠷᠢᠨᠠ᠃ ᠠᠯᠤᠰ ᠤ᠋ᠨ ᠲᠡᠷᠡ ᠬᠦ ᠣᠨ ᠵᠢᠯ ᠦ᠋ᠨ ᠴᠠᠭᠠᠨᠠ ᠠ᠋ᠴᠠ ᠡᠳᠦᠭᠡ ᠪᠣᠯᠲᠠᠯᠠ ᠬᠤᠷᠠᠵᠤ ᠲᠣᠨᠣᠭᠰᠠᠨ ᠣᠰᠣᠯ ᠠᠯᠳᠠᠭᠠ᠂ ᠤᠨᠠᠯ ᠭᠡᠨᠡᠳᠡᠯ ᠦ᠋ᠨ ᠮᠢᠨᠢ ᠰᠤᠷᠭᠠᠮᠵᠢ ᠲᠤᠨᠤᠳᠠᠰᠤ ᠶᠤᠮ ᠴᠢᠨᠢ ᠬᠦᠢᠲᠡᠨ ᠵᠢᠩᠳᠡᠭᠦᠦ ᠪᠠᠢᠬᠤ ᠨᠢ ᠳᠠᠮᠵᠢᠭ ᠦᠭᠡᠢ ᠠ᠋᠃
ᠨᠡᠢᠰᠯᠡᠯ ᠮᠢᠨᠢ ᠨᠢᠭᠡ ᠰᠠᠷᠠ ᠰᠢᠲᠠᠮᠠᠨ(ᠨᠢᠭᠡ ᠵᠢᠯ ᠴᠦ᠍ ᠰᠢᠲᠠᠭᠰᠠᠨ ᠮᠠᠭᠠᠳ) ᠰᠠᠢ ᠨᠤᠷᠠᠵᠠᠢ ᠭᠡᠨᠡ ᠰᠢᠦ᠂ ᠪᠢᠴᠢᠭ ᠨᠣᠮ ᠨᠢ ᠬᠡᠭᠡᠷᠡ ᠬᠥᠳᠡᠭᠡ ᠪᠡᠷ ᠡᠨᠡᠯᠦᠨ ᠰᠢᠨᠠᠯᠤᠨ ᠬᠡᠢᠰᠴᠦ ᠭᠦᠢᠴᠡᠪᠡ ᠭᠡᠨᠡ ᠠ᠋᠃ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠮᠢᠨᠢ ᠣᠶᠤᠨ ᠪᠢᠯᠢᠭ ᠦ᠋ᠨ ᠳᠡᠭᠡᠵᠢ᠂ ᠬᠥᠮᠥᠷᠭᠡ ᠬᠥᠮᠥᠷᠭᠡ ᠪᠡᠷ ᠬᠠᠳᠠᠭᠠᠯᠠᠵᠤ ᠨᠠᠨᠳᠢᠩᠨᠠᠭᠰᠠᠨ ᠡᠷᠳᠡᠨᠢ ᠮᠡᠷᠭᠡᠨ ᠰᠤᠷᠭᠠᠯ ᠮᠢᠨᠢ ᠪᠦᠲᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠯᠡᠳᠡᠬᠦ ᠦᠭᠡᠢ ᠴᠦ᠍ ᠭᠡᠰᠡᠨ᠂ ᠪᠦᠯᠦᠭ ᠬᠤᠭᠤᠰ ᠨᠢ ᠴᠦ᠍ ᠦᠯᠡᠳᠡᠭᠰᠡᠨ ᠪᠠᠢᠭᠰᠠᠨ ᠪᠣᠯ ᠬᠥᠮᠦᠨ ᠠᠷᠠᠳ ᠮᠢᠨᠢ ᠣᠳᠣ ᠬᠢ ᠰᠢᠭ ᠰᠣᠶᠣᠯ ᠢ᠋ᠶ᠋ᠠᠷ ᠳᠣᠷᠣᠢ ᠣᠢ ᠪᠠᠷ ᠣᠷᠣᠢ ᠶᠠᠪᠤᠬᠤ ᠦᠭᠡᠢ ᠰᠢᠦ ᠳᠡ᠃
ᠪᠢᠳᠡ ᠨᠡᠯᠢᠶᠡᠳ ᠡᠷᠭᠢᠴᠡᠯᠡ᠃ ᠬᠡᠨ ᠨᠢ ᠴᠦ᠍ ᠬᠥᠭᠰᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠬᠡᠨ ᠨᠢ ᠭᠡᠳ ᠰᠠᠯᠵᠤ ᠲᠦᠪᠳᠡᠬᠦ ᠦᠭᠡᠢ᠃ ᠬᠠᠮᠢᠭᠠ ᠠ᠋ᠴᠠ ᠨᠢᠭᠡ ᠳᠠᠭᠤᠳᠠᠯᠭᠠ ᠢᠷᠡᠵᠦ ᠪᠠᠢᠬᠤ ᠰᠢᠭ᠋᠂ ᠳᠠᠢᠴᠢᠯᠠᠭᠠ ᠰᠣᠨᠣᠰᠳᠠᠵᠤ ᠪᠠᠢᠬᠤ ᠰᠢᠭ᠋ ᠴᠢᠬᠢ ᠪᠠᠢᠨ ᠪᠠᠢᠨ ᠬᠠᠩᠭᠢᠨᠠᠨ᠂ ᠨᠢᠳᠦ ᠪᠠᠢᠨ ᠪᠠᠢᠨ ᠪᠦᠷᠦᠯᠵᠡᠨ᠂ ᠳᠡᠭᠡᠳᠦ ᠨᠡᠢᠰᠯᠡᠯ ᠳᠡᠭᠡᠷᠡ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠠᠶᠤᠮᠰᠢᠭᠲᠠᠢ ᠬᠠᠷᠭᠢᠰ ᠲᠡᠷᠡ ᠴᠠᠭ ᠮᠥᠴᠡ ᠳᠠᠬᠢᠨ ᠢᠯᠡᠷᠡᠬᠦ ᠰᠢᠦ ᠪᠣᠯᠤᠯᠠ᠁
ᠲᠡᠦᠬᠡ ᠶ᠋ᠢᠨ ᠦᠨᠡᠨ ᠢ᠋ ᠰᠡᠷᠭᠦᠭᠡᠨᠡ ᠂ᠳᠡᠭᠡᠳᠦ ᠨᠡᠢᠰᠯᠡᠯ ᠢ᠋ᠶ᠋ᠡᠨ ᠪᠤᠰᠬᠠᠨᠠ ᠭᠡᠵᠦ ᠨᠠᠮ ᠲᠥᠷᠥ ᠮᠢᠨᠢ ᠰᠡᠳᠬᠢᠯ ᠰᠢᠭᠤᠳᠴᠤ᠂ ᠢᠪᠡᠭᠡᠯ ᠬᠠᠢᠷᠠ ᠪᠠᠨ ᠬᠦᠷᠲᠡᠭᠡᠵᠦ ᠡᠬᠢᠯᠡᠭᠡ ᠨᠢ ᠢᠯᠡᠷᠬᠡᠢ᠃ ᠮᠤᠬᠤᠯᠠᠭ ᠡᠭᠦᠳᠡ ᠲᠡᠢ ᠮᠣᠩᠭᠣᠯ ᠨᠠᠮᠪᠠ ᠲᠠᠢ ᠡᠷᠲᠡᠨ ᠦ᠌ ᠬᠥᠬᠡ ᠪᠠᠷᠢᠯᠭᠠ ᠪᠣᠰᠤᠨ ᠪᠣᠢ᠃ ᠨᠡᠢᠰᠯᠡᠯ ᠦ᠋ᠨ ᠮᠢᠨᠢ ᠬᠢᠷᠢ ᠰᠦᠷ ᠭᠢᠯᠪᠠᠭᠠ ᠪᠠᠢᠭᠠ ᠦᠭᠡᠢ ᠴᠦ᠍ ᠨᠢᠳᠦᠨ ᠳ᠋ᠦ᠍ ᠳᠤᠯᠠᠭᠠᠨ ᠬᠠᠷᠠᠭᠳᠠᠬᠤ ᠲᠡᠷᠡ ᠬᠦ ᠵᠢᠵᠢᠭ ᠪᠠᠷᠢᠯᠭᠠ ᠶ᠋ᠢ ᠡᠷᠲᠡᠬᠡᠨ ᠪᠣᠰᠤᠭᠠᠷᠠᠢ ᠭᠡᠵᠦ ᠪᠢᠳᠡ ᠵᠥᠩᠨᠡᠨ ᠬᠦᠰᠡᠪᠡ!
ᠨᠡᠢᠰᠯᠡᠯ ᠮᠢᠨᠢ ᠰᠥᠨᠥᠵᠦ ᠪᠣᠯᠤᠨᠠ᠂ ᠰᠡᠳᠬᠢᠯ ᠮᠢᠨᠢ ᠰᠦᠢᠷᠡᠵᠦ ᠪᠣᠯᠬᠤ ᠦᠭᠡᠢ᠂ ᠰᠦᠢᠷᠡᠭᠰᠡᠨ ᠰᠡᠳᠬᠢᠯ ᠢ ᠭᠠᠩᠨᠠᠵᠤ ᠨᠡᠢᠯᠡᠭᠦᠯᠬᠦ ᠨᠢ ᠰᠥᠨᠥᠭᠰᠡᠨ ᠨᠡᠢᠰᠯᠡᠯ ᠢ᠋ ᠰᠡᠷᠭᠦᠭᠡᠵᠦ ᠮᠠᠨᠳᠤᠭᠤᠯᠬᠤ ᠠ᠋ᠴᠠ ᠬᠣᠯᠠ ᠴᠠᠭᠠᠰᠢ ᠬᠦᠴᠢᠷ ᠪᠠᠢᠵᠤ ᠮᠡᠳᠡᠨᠡ᠃ ᠡᠨᠡ ᠦᠭᠡ ᠶ᠋ᠢ ᠬᠡᠨ ᠬᠡᠯᠡᠪᠡ ? ᠬᠡᠨ ᠴᠦ᠍ ᠬᠡᠯᠡᠭᠡ ᠦᠭᠡᠢ᠂ ᠪᠢ ᠪᠣᠳᠣᠪᠠ᠃ ᠨᠠᠳᠠ ᠳ᠋ᠤ᠌ ᠶᠠᠭᠠᠬᠢᠭᠠᠳ ᠡᠢᠮᠦ ᠰᠡᠴᠡᠨ ᠪᠣᠳᠣᠯ ᠲᠥᠷᠥᠭᠳᠡᠴᠢᠬᠡᠪᠡ? ᠭᠡᠵᠦ ᠪᠢ ᠪᠡᠶᠡ ᠪᠡᠨ ᠭᠠᠢᠬᠠᠯᠠ᠃ ᠪᠤᠰᠤᠳ ᠢ᠋ᠶ᠋ᠠᠨ ᠬᠠᠷᠠᠯᠠ᠃ ᠨᠥᠬᠥᠳ ᠦ᠋ᠨ ᠮᠢᠨᠢ ᠨᠢᠳᠦᠨ ᠳ᠋ᠦ᠍ ᠴᠦ᠍ ᠨᠠᠳᠠ ᠲᠠᠢ ᠠᠳᠠᠯᠢ ᠭᠡᠭᠡᠨ ᠪᠣᠳᠣᠯ ᠭᠡᠷᠡᠯᠲᠦᠨ ᠪᠠᠢᠪᠠ ᠰᠢᠦ᠃ ᠨᠡᠢᠰᠯᠡᠯ ᠮᠢᠨᠢ᠂ ᠦᠷᠡᠭᠳᠡᠭᠰᠡᠨ ᠬᠡᠰᠡᠭ ᠸᠠᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠯᠲᠦᠷᠡᠭᠰᠡᠨ ᠴᠠᠬᠢᠮ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠨᠤᠰ ᠲᠤ᠌ ᠦᠵᠡᠭᠦᠯᠬᠦ ᠪᠡᠨ ᠦᠵᠡᠭᠦᠯᠵᠦ ᠪᠣᠳᠣᠭᠤᠯᠬᠤ ᠪᠠᠨ ᠪᠣᠳᠣᠭᠤᠯᠵᠤ ᠠᠮᠵᠢᠭᠰᠠᠨ ᠪᠠᠢᠵᠠᠢ᠃
ᠬᠡᠦᠬᠡᠨ ᠲᠡᠢ ᠮᠢᠨᠢ ᠵᠣᠭᠣᠭᠳᠠᠬᠤ ᠬᠥᠮᠦᠨ ᠦᠭᠡᠢ᠃ ᠡᠪᠡᠰᠦᠨ ᠳᠤᠮᠳᠠᠭᠤᠷ ᠡᠮᠵᠡᠭ ᠳᠣᠲᠣᠭᠤᠷ ᠶᠠᠭᠤᠮᠠ ᠬᠠᠢᠵᠤ ᠶᠠᠪᠤᠨᠠ᠃ ᠳᠡᠭᠡᠳᠦ ᠨᠡᠢᠰᠯᠡᠯ ᠦ᠋ᠨ ᠮᠢᠨᠢ ᠪᠢᠳᠡᠨ ᠳ᠋ᠦ᠍ ᠪᠡᠨ ᠬᠡᠯᠡᠬᠦ᠂ ᠪᠢᠳᠡ ᠡᠷᠭᠢᠭᠡᠳ ᠬᠡᠦᠬᠡᠳ ᠲᠦ᠍ ᠪᠡᠨ ᠬᠡᠯᠡᠬᠦ᠂ ᠳᠡᠭᠡᠳᠦᠰ ᠦ᠋ᠨ ᠲᠤᠬᠠᠢ᠂ ᠲᠡᠦᠬᠡ ᠶ᠋ᠢᠨ ᠲᠤᠬᠠᠢ ᠰᠤᠷᠭᠠᠯ ᠵᠠᠬᠢᠶᠠ ᠶ᠋ᠢ ᠬᠡᠦᠬᠡᠨ ᠮᠢᠨᠢ ᠮᠠᠨᠤᠰ ᠠ᠋ᠴᠠ ᠪᠢᠰᠢ᠂ ᠳᠡᠭᠡᠳᠦ ᠨᠡᠢᠰᠯᠡᠯ ᠡᠴᠡ ᠰᠢᠭᠤᠳ ᠣᠯᠵᠤ ᠰᠣᠨᠣᠰᠬᠤ ᠬᠤᠪᠢ ᠲᠠᠢ ᠢᠷᠡᠵᠡᠢ᠃ ᠵᠣᠯ ᠵᠠᠪᠰᠢᠶᠠᠨ ᠪᠦᠬᠦᠨ ᠬᠡᠦᠬᠡᠳ ᠬᠣᠢᠴᠢᠰ ᠤ᠋ᠨ ᠮᠢᠨᠢ ᠪᠣᠯᠤᠭᠠᠰᠠᠢ!
ᠳᠡᠭᠡᠳᠦ ᠨᠡᠢᠰᠯᠡᠯ ᠦ᠋ᠨ ᠮᠢᠨᠢ ᠮᠠᠨᠠ ᠥᠳᠬᠡᠷᠡᠵᠦ᠂ ᠳᠡᠭᠡᠷᠡ ᠡᠴᠡ ᠬᠥᠬᠡ ᠲᠩᠷᠢ ᠨᠥᠮᠥᠢᠵᠦ᠂ ᠲᠡᠷᠲᠡᠭᠡ ᠰᠦᠷᠯᠢᠭ ᠠᠭᠤᠯᠠᠰ ᠨᠢ ᠪᠦᠷᠦᠢᠵᠦ᠂ ᠲᠡᠦᠬᠡ ᠠᠬᠤᠢ ᠠᠯᠢ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠦᠷᠦᠭ ᠪᠠᠷᠤᠭ ᠤ᠋ᠨ ᠳᠤᠮᠳᠠ ᠣᠨᠢᠰᠣᠭᠠ ᠰᠢᠭ᠋ ᠠᠯᠭᠤᠷᠬᠠᠨ ᠨᠢᠭᠤᠭᠳᠠᠵᠤ ᠴᠠᠭᠠᠰᠢᠯᠠᠯᠠ᠃
ᠪᠦᠬᠦ ᠰᠢᠯᠢ ᠶ᠋ᠢᠨ ᠭᠣᠣᠯ ᠢ᠋ᠶ᠋ᠠᠷ ᠪᠠᠶᠠᠷᠯᠠᠵᠤ ᠶᠠᠪᠤᠭᠰᠠᠨ ᠪᠢᠳᠡ᠂ ᠡᠨᠳᠡ ᠨᠢᠭᠡ ᠬᠥᠨᠳᠡᠭᠳᠡᠵᠦ ᠬᠦᠨᠳᠡᠭᠦᠷᠯᠡᠭᠳᠡᠵᠦ ᠪᠣᠯᠤᠨᠠ ᠰᠢᠦ ᠳᠡ ! ᠲᠡᠷᠭᠡᠨ ᠳ᠋ᠦ᠍ ᠭᠠᠷᠬᠤ ᠦᠶᠡ ᠂ ᠬᠡᠦᠬᠡᠨ ᠮᠢᠨᠢ ᠨᠠᠳᠠ ᠳ᠋ᠤ᠌ ᠨᠢᠭᠡ ᠬᠡᠰᠡᠭ ᠸᠠᠭᠠᠷ ᠭᠠᠷᠭᠠᠵᠤ ᠦᠵᠡᠭᠦᠯᠦᠯᠡ᠃ ᠪᠢ ᠶᠣᠰᠣᠲᠠᠢ ᠭᠠᠢᠬᠠᠪᠠ᠃ ᠬᠡᠦᠬᠡᠳ ᠢ᠋ ᠬᠡᠦᠬᠡᠳ ᠭᠡᠵᠦ ᠪᠠᠰᠤᠵᠤ ᠪᠣᠯᠳᠠᠭ ᠦᠭᠡᠢ ᠠᠵᠢ᠃ ᠨᠣᠭᠣᠭᠠᠨ ᠥᠩᠭᠡ ᠲᠡᠢ᠂ ᠲᠤᠯᠭᠠᠨ ᠬᠡᠯᠪᠡᠷᠢ ᠲᠡᠢ᠂ ᠠᠯᠠᠭᠠᠨ ᠵᠢᠷᠤᠭᠠᠰᠤ ᠲᠠᠢ᠂ ᠲᠣᠳᠣᠬᠠᠨ ᠴᠤᠤᠷᠢᠶᠠ ᠲᠠᠢ ᠲᠡᠷᠡ ᠬᠡᠰᠡᠭ ᠸᠠᠭᠠᠷ ᠢ᠋ ᠪᠢ ᠤᠳᠠᠲᠠᠯᠠ ᠰᠢᠨᠵᠢᠵᠦ᠂ ᠬᠡᠦᠬᠡᠨ ᠢ᠋ᠶ᠋ᠡᠨ ᠰᠢᠷᠲᠡᠯᠡ᠃ ᠥᠩᠭᠡ ᠶ᠋ᠢ ᠨᠢ ᠬᠠᠷᠠᠨ ᠪᠡᠶᠡᠰᠴᠦ᠂ ᠬᠡᠯᠪᠡᠷᠢ ᠶ᠋ᠢ ᠨᠢ ᠲᠣᠭᠣᠨ ᠰᠢᠲᠦᠵᠦ᠂ ᠵᠢᠷᠤᠭᠠᠰᠤ ᠶ᠋ᠢ ᠨᠢ ᠨᠢᠳᠦᠯᠡᠨ ᠤᠬᠠᠭᠠᠵᠢᠵᠤ᠂ ᠴᠤᠤᠷᠢᠶᠠ ᠶ᠋ᠢ ᠨᠢ ᠴᠢᠩᠨᠠᠨ ᠣᠮᠣᠭᠰᠢᠶᠠ ᠭᠡᠵᠦ ᠬᠡᠦᠬᠡᠨ ᠮᠢᠨᠢ ᠲᠡᠷᠡ ᠬᠡᠰᠡᠭ ᠸᠠᠭᠠᠷ ᠢ᠋ ᠲᠡᠭᠦᠭᠰᠡᠨ ᠪᠠᠢᠬᠤ ᠳᠠ!
ᠰᠢᠯᠤᠭᠤᠨ ᠬᠥᠬᠡ ᠶ᠋ᠢᠨ ᠮᠢᠨᠢ ᠰᠢᠷᠠ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠰᠢᠷᠬᠠ ᠲᠠᠢ ᠰᠦᠨᠳᠡᠷᠯᠡᠭᠡ ᠳᠡᠭᠡᠳᠦ ᠨᠡᠢᠰᠯᠡᠯ ᠮᠢᠨᠢ ᠡᠭᠦᠯᠡᠨ ᠳ᠋ᠦ᠍ ᠳᠠᠯᠳᠠᠯᠠᠭᠳᠠᠵᠤ᠂ ᠥᠷᠥᠴᠡᠨ ᠳ᠋ᠦ᠍ ᠳᠠᠷᠬᠠᠯᠠᠭᠳᠠᠵᠤ᠂ ᠬᠣᠯᠠ ᠳ᠋ᠤ᠌ ᠠᠨᠢᠷ ᠢ᠋ᠶ᠋ᠠᠨ ᠥᠭᠭᠦᠭᠰᠡᠭᠡᠷ ᠠᠷᠤ ᠳ᠋ᠤ᠌ ᠮᠢᠨᠢ ᠨᠢᠯᠪᠤᠰᠤ ᠲᠠᠢ ᠳᠠᠯᠳᠠᠷᠠᠪᠠ᠃
ᠬᠥᠨᠳᠡᠭᠦᠷ ᠶᠡᠬᠡᠲᠡᠢ ᠳᠡᠭᠡᠳᠦ ᠨᠡᠢᠰᠯᠡᠯ ᠮᠢᠨᠢ᠂ ᠬᠥᠮᠦᠨ ᠦ᠌ ᠬᠣᠷᠸᠠ ᠶ᠋ᠢᠨ ᠬᠣᠩᠬᠣ ᠪᠤᠶᠤ ᠬᠥᠬᠡ ᠲᠡᠦᠬᠡ ᠶ᠋ᠢᠨ ᠮᠢᠨᠢ ᠴᠣᠩᠬᠣ ᠪᠤᠶᠤ !
1995 ᠣᠨ 10 ᠰᠠᠷᠠ ᠬᠥᠬᠡᠬᠣᠲᠠ
ᠢᠷᠡᠯᠲᠡ ᠄《ᠤᠩᠰᠢᠬᠤ ᠪᠢᠴᠢᠭ》
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠭᠠᠸᠠ ᠦᠰᠦᠭ