ᠨᠢᠭᠤᠬᠤ ᠦᠭᠡᠢ ᠦᠨᠡᠨ ᠦ ᠲᠤᠬᠠᠢ ᠰᠢᠯᠦᠭ - ᠱ ᠂ ᠭᠦᠷᠦᠪᠠᠽᠠᠷ Нуухгүй үнэний тухай шүлэг – Ш᠂ Гүрбазар
594ᠨᠢᠭᠤᠬᠤ ᠦᠭᠡᠢ ᠦᠨᠡᠨ ᠦ ᠲᠤᠬᠠᠢ ᠰᠢᠯᠦᠭ
ᠦᠨᠡᠨᠴᠢ ᠶ᠋ᠢᠨ ᠠᠯᠳᠠᠷ ᠢ᠋ ᠴᠢᠮᠠ ᠠ᠋ᠴᠠ ᠪᠠᠨ ᠰᠣᠨᠣᠰᠬᠤ ᠭᠡᠵᠦ
ᠦᠨᠡᠨ ᠢ᠋ ᠨᠢᠭᠤᠭᠠᠳ ᠶᠠᠭᠠᠬᠢᠬᠤ ᠰᠠᠨ ᠪᠢᠯᠡ ᠳᠠ᠂ ᠬᠠᠨᠢ ᠮᠢᠨᠢ
ᠨᠢᠳᠦ ᠪᠦᠳᠦᠷᠢᠭᠡᠭᠰᠡᠨ ᠣᠷᠴᠢᠯᠠᠩ ᠤ᠋ᠨ ᠰᠠᠢᠬᠠᠨ ᠢ᠋
ᠵᠥᠷᠢᠭᠦᠦ ᠬᠠᠷᠠᠵᠤ ᠪᠠᠢᠭᠠ ᠦᠭᠡᠢ᠂ ᠪᠢ
ᠨᠢᠭᠤᠷ ᠢ᠋ᠶ᠋ᠠᠨ ᠰᠡᠳᠬᠢᠯ ᠭᠡᠵᠦ ᠪᠣᠳᠣᠳᠠᠭ
ᠬᠡᠦᠬᠡᠨ ᠨᠦ᠍ᠭᠦᠳ ᠢ᠋ ᠴᠤ᠌ ᠵᠥᠭᠡᠵᠦ ᠶᠠᠪᠤᠭᠠ ᠦᠭᠡᠢ
ᠡᠷᠡ ᠬᠥᠮᠦᠨ ᠭᠡᠳᠡᠭ ᠡᠮᠵᠡᠭᠬᠡᠨ ᠤᠴᠠᠷᠠᠯ ᠢ᠋ ᠳᠠᠭᠠᠭᠠᠳᠠᠭ ᠠᠮᠢᠲᠠᠨ ᠪᠢᠰᠢ
ᠡᠩᠬᠦᠷᠡᠢᠬᠡᠨ ᠬᠠᠷᠠᠴᠠ ᠴᠤ᠌ ᠭᠡᠰᠡᠨ ᠰᠠᠨᠠᠭᠠ ᠬᠤᠭᠤᠰᠬᠠᠨ ᠰᠠᠭᠠᠲᠠᠭᠤᠯᠵᠤ
ᠡᠶᠡᠯᠳᠡᠭᠬᠡᠨ ᠶᠠᠷᠢᠬᠤ ᠴᠤ᠌ ᠬᠦᠷᠲᠡᠯᠡ ᠶᠠᠩᠵᠤ ᠶ᠋ᠢᠨ ᠯᠡ ᠪᠠᠢᠳᠠᠭ ᠶᠤᠮ ᠳᠠ
ᠪᠦᠰᠡᠭᠦᠢ ᠪᠦᠬᠦᠨ ᠲᠡᠢ ᠮᠣᠷᠢᠨ ᠤ᠋ ᠰᠠᠢᠨ᠂ ᠪᠣᠳᠣᠯ ᠤ᠋ᠨ ᠬᠣᠯᠠ ᠶ᠋ᠢ
ᠶᠠᠷᠢᠵᠤ ᠶᠠᠪᠤᠭᠰᠠᠨ ᠭᠡᠵᠦ ᠬᠡᠯᠡᠬᠦ ᠦᠭᠡᠢ
ᠪᠦᠷ ᠨᠠᠭᠠᠨᠠᠳᠠᠵᠤ ᠬᠡᠷᠡᠭ ᠦᠭᠡᠢᠬᠡᠨ ᠶᠠᠷᠢᠶᠠ ᠢᠨᠢᠶᠡᠳᠦ ᠬᠣᠶᠠᠷ ᠢ᠋ᠶ᠋ᠠᠷ
ᠵᠤᠭᠠᠴᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠤᠬᠤ ᠦᠭᠡᠢ
ᠠᠢᠯ ᠰᠤᠷᠠᠭᠰᠠᠨ ᠬᠡᠦᠬᠡᠨ ᠡᠷᠭᠢᠵᠦ ᠬᠠᠷᠠᠭᠰᠠᠭᠠᠷ ᠬᠠᠷᠠᠭᠰᠠᠭᠠᠷ ᠪᠤᠴᠠᠬᠤ ᠳ᠋ᠤ᠌
ᠠᠶᠠᠰ ᠤ᠋ᠨ ᠬᠡᠨᠡᠭᠡᠨ ᠱᠣᠬᠣᠭᠣᠷᠬᠠᠯ ᠢ᠋ᠶ᠋ᠠᠷ ᠪᠣᠱᠣᠭᠠᠨ ᠴᠠᠭᠠᠨᠠ ᠪᠠᠨ ᠬᠤᠯᠮᠠᠯᠵᠠᠵᠤ
ᠭᠤᠶᠤᠵᠤ ᠤᠴᠠᠷᠠᠭᠠ ᠦᠭᠡᠢ ᠲᠥᠷᠬᠦ ᠠᠭᠠᠰᠢ ᠰᠢᠭ᠋ ᠣᠯᠠᠨ ᠤᠴᠠᠷᠠᠯ ᠭᠡᠳᠡᠭ
ᠲᠤᠭᠤᠯᠬᠤ ᠥᠩᠭᠡᠷᠡᠬᠦ ᠨᠠᠰᠤᠨ ᠳ᠋ᠤ᠌ ᠠᠯᠢ ᠶ᠋ᠢ ᠴᠤ᠌ ᠲᠡᠷᠡ ᠭᠡᠬᠦ ᠪᠣᠢ ᠳᠠ᠂ ᠬᠠᠨᠢ ᠮᠢᠨᠢ
ᠥᠩᠭᠡ᠂ ᠢᠨᠢᠶᠡᠳᠦ ᠬᠣᠶᠠᠷ ᠲᠤ ᠪᠤᠨᠲᠠᠩ ᠤ᠋ᠨ ᠬᠠᠲᠤᠨ ᠰᠢᠭ᠋ ᠬᠠᠭᠤᠷᠲᠠᠵᠤ
ᠡᠪᠦᠭᠡᠨ ᠴᠢᠨᠢ ᠴᠢᠮᠠ ᠳ᠋ᠠᠭᠠᠨ ᠰᠡᠳᠬᠢᠯ ᠦ᠋ᠨ ᠵᠢᠮᠡ ᠲᠡᠢ ᠶᠠᠪᠤᠭᠰᠠᠨ ᠴᠤ᠌
ᠬᠠᠢᠷᠠ᠂ ᠦᠨᠡᠨ ᠬᠣᠶᠠᠷ ᠢ᠋ ᠴᠢᠨᠢ ᠴᠢᠮᠠ ᠠ᠋ᠴᠠ ᠪᠢᠰᠢ᠂
ᠪᠤᠰᠤᠳ ᠠ᠋ᠴᠠ ᠯᠠ ᠤᠬᠠᠭᠠᠷᠠᠭᠰᠠᠨ ᠳ᠋ᠠᠭᠠᠨ
ᠬᠠᠵᠠᠭᠤ ᠳ᠋ᠤ᠌ ᠴᠢᠨᠢ ᠯᠡ ᠪᠢ ᠬᠠᠷᠢᠨ ᠡᠢᠮᠦ ᠤᠳᠠᠭᠠᠨ ᠶᠠᠪᠤᠭᠠ ᠴᠤ᠌ ᠪᠢᠯᠡ ᠤᠤ ᠳᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠩᠬᠡᠪᠠᠲᠤ
ᠦᠰᠦᠭ ᠬᠢᠨᠠᠭᠴᠢ᠄ ᠪᠠᠶᠠᠷᠴᠡᠴᠡᠭ