ᠤᠳᠬᠠ ᠰᠣᠶᠣᠯ ᠠᠨᠤ ᠠᠷᠠᠳ ᠤᠭᠰᠠᠭᠠ ᠶ᠋ᠢᠨ ᠮᠠᠨᠳᠤᠬᠤ ᠪᠠᠭᠤᠷᠠᠬᠤ ᠳ᠋ᠤᠷ ᠭᠦᠨᠡ ᠶᠡᠬᠡ ᠬᠣᠯᠪᠣᠭᠳᠠᠯᠲᠠᠢ ᠤᠴᠢᠷ – ᠬᠡᠰᠢᠩᠭᠡ Утга соёл ануу ард угсаагийн мандах буурахдур гүнээ их холбогдолтой очир – Гэшингэ
464ᠤᠳᠬᠠ ᠰᠣᠶᠣᠯ ᠠᠨᠤ ᠠᠷᠠᠳ ᠤᠭᠰᠠᠭᠠ ᠶ᠋ᠢᠨ ᠮᠠᠨᠳᠤᠬᠤ ᠪᠠᠭᠤᠷᠠᠬᠤ ᠳ᠋ᠤᠷ ᠭᠦᠨᠡ ᠶᠡᠬᠡ ᠬᠣᠯᠪᠣᠭᠳᠠᠯᠲᠠᠢ ᠤᠴᠢᠷ
ᠳᠤᠮᠳᠠᠳᠤ ᠤᠯᠤᠰ ᠢ᠋ᠶ᠋ᠠᠷ ᠥᠭᠦᠯᠡᠪᠡᠰᠦ ᠡᠷᠲᠡ ᠴᠠᠭ ᠲᠤ᠌ ᠨᠡᠯᠢᠶᠡᠳ ᠣᠯᠠᠨ ᠠᠢᠮᠠᠭ ᠤᠭᠰᠠᠭᠠ ᠪᠠᠢᠵᠤ ᠲᠤᠰ ᠲᠤᠰ ᠨᠢᠭᠡᠨ ᠮᠣᠵᠢ ᠪᠤᠶᠤ ᠬᠡᠳᠦᠨ ᠮᠣᠵᠢ ᠶ᠋ᠢ ᠡᠵᠡᠯᠡᠨ ᠰᠠᠭᠤᠵᠤ ᠥᠪᠡᠷ ᠲᠦ᠍ ᠪᠡᠨ ᠴᠥᠮ ᠲᠤᠰᠠᠭᠠᠷ ᠬᠡᠯᠡ ᠦᠰᠦᠭ ᠲᠡᠢ ᠪᠠᠢᠭᠰᠠᠨ ᠪᠥᠯᠥᠭᠡ᠃ ᠭᠠᠭᠴᠠ ᠲᠡᠳᠡᠭᠡᠷ ᠠᠢᠮᠠᠭ ᠤ᠋ᠳ ᠲᠥᠷᠥ ᠤᠭ ᠠ᠋ᠴᠠ ᠲᠡᠢᠮᠦ ᠭᠠᠢᠬᠠᠮᠰᠢᠭ ᠲᠠᠮᠢᠷ ᠬᠦᠴᠦ ᠲᠡᠢ ᠲᠤᠰᠠᠭᠠᠷ ᠲᠣᠭᠲᠠᠨᠢᠮᠠᠷ ᠦᠭᠡ ᠥᠭᠦᠯᠡᠯ ᠤᠳᠬᠠ ᠦᠰᠦᠭ ᠭᠡᠮᠡᠨ ᠡᠰᠡ ᠪᠠᠢᠭᠰᠠᠨ ᠲᠤᠯᠠ ᠪᠤᠰᠤᠳ ᠤᠭᠰᠠᠭᠠ ᠶ᠋ᠢᠨ ᠤᠳᠬᠠ ᠦᠰᠦᠭ᠂ ᠦᠭᠡ ᠥᠭᠦᠯᠡᠯ ᠳ᠋ᠦ᠍ᠷ ᠪᠠᠯᠠᠷᠠᠭᠳᠠᠨ ᠰᠢᠩᠭᠡᠭᠰᠡᠭᠡᠷ ᠨᠢᠭᠡᠮᠦᠰᠦᠨ ᠪᠤᠰᠤᠳ ᠤ᠋ᠨ ᠬᠡᠯᠡ ᠦᠰᠦᠭ ᠢ᠋ ᠳᠠᠭᠠᠵᠤ ᠥᠪᠡᠷ ᠦ᠋ᠨ ᠬᠡᠯᠡ ᠦᠰᠦᠭ ᠢ᠋ᠶ᠋ᠡᠨ ᠬᠡᠵᠢᠶᠡᠨ ᠦ᠌ ᠤᠮᠠᠷᠲᠠᠨ ᠣᠷᠬᠢᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠨ᠂ ᠤᠭᠰᠠᠭᠠ ᠦᠨᠳᠦᠰᠦ ᠳ᠋ᠦ᠍ᠷ ᠬᠦᠷᠲᠡᠯᠡ ᠤᠨᠲᠠᠷᠠᠨ ᠤᠰᠠᠳᠴᠤ ᠪᠠᠷᠠᠭᠳᠠᠭᠰᠠᠨ ᠢ᠋ᠶ᠋ᠠᠷ ᠡᠳᠦᠭᠡ ᠳ᠋ᠦ᠍ᠷ ᠠᠷᠠᠢ ᠭᠡᠵᠦ ᠬᠢᠲᠠᠳ᠂ ᠮᠠᠨᠵᠤ᠂ ᠮᠣᠩᠭᠣᠯ᠂ ᠬᠣᠲᠣᠩ᠂ ᠲᠥᠪᠡᠳ᠂ ᠬᠡᠮᠡᠬᠦ ᠲᠠᠪᠤᠨ ᠤᠭᠰᠠᠭᠠ ᠶ᠋ᠢᠨ ᠲᠡᠳᠦᠢ ᠦᠯᠡᠳᠡᠭᠳᠡᠵᠦ ᠪᠣᠢ ᠠᠵᠤᠭᠤ᠃ ᠡᠭᠦᠨᠦ ᠳᠣᠲᠣᠷᠠ ᠠ᠋ᠴᠠ ᠮᠠᠨᠵᠤ ᠤᠭᠰᠠᠭᠠ ᠠᠨᠤ ᠣᠳᠣ ᠶᠠᠮᠠᠷ ᠪᠣᠯᠵᠤ ᠪᠠᠢᠨᠠᠮ᠂ ᠭᠠᠭᠴᠠ ᠮᠠᠨᠵᠤ ᠭᠡᠬᠦ ᠨᠡᠷᠡ ᠶ᠋ᠢᠨ ᠲᠡᠳᠦᠢ ᠦᠯᠡᠳᠡᠭᠳᠡᠵᠦ ᠪᠠᠢᠬᠤ ᠠ᠋ᠴᠠ ᠴᠣᠬᠣᠮ ᠦᠨᠡᠨ ᠳ᠋ᠦ᠍ᠷ ᠬᠡᠯᠡ ᠦᠭᠡᠰ ᠪᠠ ᠤᠳᠬᠠ ᠦᠰᠦᠭ ᠢ᠋ᠶ᠋ᠡᠨ ᠬᠡᠵᠢᠶᠡᠨᠡᠢ ᠤᠮᠠᠷᠲᠠᠨ ᠣᠷᠬᠢᠵᠤ ᠰᠢᠭᠤᠳ ᠬᠢᠲᠠᠳ ᠤᠭᠰᠠᠭᠠ ᠲᠠᠢ ᠠᠳᠠᠯᠢ ᠪᠣᠯᠵᠤ ᠢᠯᠭᠠᠯ ᠦᠭᠡᠢ ᠪᠣᠯᠤᠭᠰᠠᠨ ᠪᠢᠰᠢ ᠤᠤ᠃ ᠡᠨᠡ ᠢᠨᠤ ᠮᠠᠨᠵᠤ ᠤᠭᠰᠠᠭᠠᠲᠠᠨ ᠨᠠᠷ ᠤᠭ ᠠ᠋ᠴᠠ ᠥᠪᠡᠷ ᠦ᠋ᠨ ᠬᠡᠯᠡ ᠦᠰᠦᠭ ᠢ᠋ᠶ᠋ᠡᠨ ᠬᠥᠩᠭᠡᠨ ᠦᠵᠡᠵᠦ ᠪᠤᠰᠤᠳ ᠤ᠋ᠨ ᠦᠭᠡ ᠥᠭᠦᠯᠡᠯ ᠤᠳᠬᠠ ᠦᠰᠦᠭ ᠢ᠋ ᠳᠠᠩᠴᠤ ᠬᠦᠨᠳᠦ ᠭᠠᠢᠬᠠᠮᠰᠢᠭᠲᠤ ᠪᠣᠯᠭᠠᠨ ᠡᠳᠦᠷ ᠪᠦᠷᠢ ᠳᠠᠭᠠᠨ ᠳᠠᠭᠤᠷᠢᠶᠠᠨ ᠡᠷᠳᠡᠮ ᠴᠢᠳᠠᠯ ᠪᠣᠯᠭᠠᠨ ᠰᠤᠷᠤᠯᠴᠠᠵᠤ ᠴᠣᠬᠣᠮ ᠬᠦ ᠮᠠᠨᠵᠤ ᠪᠠᠷ ᠬᠡᠯᠡᠯᠴᠡᠬᠦ ᠪᠢᠴᠢᠯᠴᠢᠬᠦ ᠪᠡᠨ ᠢᠴᠢᠭᠦᠷᠢ ᠭᠤᠲᠤᠮᠰᠢᠭ ᠪᠣᠯᠭᠠᠭᠰᠠᠨ ᠬᠠᠷᠠᠭᠠ ᠪᠠᠷ ᠪᠤᠰᠤᠳ ᠠ᠋ᠴᠠ ᠲᠡᠭᠦᠨ ᠢ᠋ ᠰᠠᠨᠠᠭᠠ ᠲᠠᠢ ᠪᠠᠷ ᠲᠤᠰᠬᠠᠢ ᠤᠰᠠᠳᠬᠠᠶᠠ ᠭᠡᠮᠡᠨ ᠣᠷᠣᠯᠳᠤᠯ ᠦᠭᠡᠢ ᠪᠡᠷ ᠥᠪᠡᠷ ᠢ᠋ᠶ᠋ᠡᠨ ᠠᠶᠠᠨᠳᠠᠭᠠᠨ ᠮᠥᠬᠥᠵᠦ ᠰᠥᠨᠥᠵᠦ ᠪᠠᠷᠠᠭᠳᠠᠭᠰᠠᠨ ᠪᠣᠯᠠᠢ᠃ ᠡᠨᠡ ᠬᠡᠳᠦᠢ ᠲᠦᠭᠰᠢᠭᠦᠷᠢ ᠠᠶᠤᠮᠰᠢᠭᠲᠠᠢ ᠪᠠᠢᠨᠠᠮ᠃ ᠡᠢᠮᠦ ᠲᠡᠮᠦᠷ ᠮᠡᠲᠦ ᠭᠡᠷᠡᠴᠢ ᠨᠢᠳᠦᠨᠡ ᠢᠪ ᠢᠯᠡᠬᠡᠨ ᠦᠵᠡᠭᠳᠡᠵᠦ ᠪᠠᠢᠲᠠᠯᠠ ᠮᠠᠨ ᠤ᠋ ᠮᠣᠩᠭᠣᠯ ᠤᠭᠰᠠᠭᠠᠲᠠᠨ ᠣᠳᠣ ᠳᠠᠷᠤᠢ ᠲᠦᠷᠭᠡᠨ ᠰᠡᠷᠭᠦᠵᠦ ᠤᠬᠠᠭᠠᠷᠠᠬᠤ ᠦᠭᠡᠢ ᠪᠣᠯᠤᠮᠤᠢ ᠤᠤ᠃ ᠨᠡᠩᠳᠡ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠡᠨᠡ ᠡᠳᠦᠷ ᠦ᠋ᠨ ᠵᠣᠭᠰᠣᠯᠲᠠ ᠣᠷᠣᠨ ᠬᠡᠮᠡᠪᠡᠰᠦ ᠣᠭᠲᠣ ᠤᠷᠢᠳᠠ ᠶ᠋ᠢᠨ ᠮᠠᠨᠵᠤ ᠤᠭᠰᠠᠭᠠᠲᠠᠨ ᠯᠤᠭᠠ ᠠᠳᠠᠯᠢᠳᠬᠠᠵᠤ ᠪᠣᠯᠬᠤ ᠠᠨᠤ ᠪᠤᠰᠤ᠂ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠡᠳᠦᠭᠡᠬᠢ ᠪᠠᠢᠳᠠᠯ ᠠᠨᠤ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠣᠯᠠᠨ ᠡᠵᠡᠷᠬᠡᠭᠳᠡᠨ ᠦ᠌ ᠳᠤᠮᠳᠠ ᠣᠷᠣᠰᠢᠵᠤ ᠡᠳᠦᠷ ᠢᠷᠡᠬᠦᠶᠡ ᠤᠯᠠᠮ ᠲᠡᠭᠦᠨᠦ ᠬᠠᠯᠳᠠᠨ ᠳᠠᠷᠤᠯᠠᠬᠤ ᠶ᠋ᠢ ᠬᠦᠯᠢᠶᠡᠵᠦ ᠵᠦᠢᠯ ᠪᠦᠷᠢ ᠶ᠋ᠢᠨ ᠭᠠᠴᠢᠭᠳᠠᠯ ᠠᠮᠰᠠᠵᠤ ᠠᠬᠤ ᠶ᠋ᠢᠨ ᠳᠡᠭᠡᠷᠡ ᠡᠨᠡ ᠬᠦ ᠠᠮᠢᠳᠤᠷᠠᠨ ᠲᠣᠭᠲᠠᠨᠢᠬᠤ ᠶ᠋ᠢᠨ ᠲᠡᠮᠡᠴᠡᠯ ᠪᠤᠳᠤᠯᠢᠶᠠᠨᠲᠠᠢ ᠴᠠᠭ ᠲᠣᠬᠢᠶᠠᠯᠳᠤᠭᠰᠠᠨ ᠢ᠋ᠶ᠋ᠠᠷ ᠣᠳᠣ ᠴᠣᠬᠣᠮ ᠬᠦ ᠠᠩᠭ᠌ᠯᠢ ᠶ᠋ᠢᠨ ᠳ᠋ᠠᠷᠸᠢᠨ ᠤ᠋ ᠥᠭᠦᠯᠡᠭᠰᠡᠨ《ᠵᠥᠭᠡᠯᠡᠨ ᠦ᠌ ᠮᠢᠬᠠ᠂ ᠴᠢᠬᠢᠷᠠᠭ ᠤ᠋ᠨ ᠢᠳᠡᠭᠡᠨ》 ᠬᠡᠮᠡᠭᠰᠡᠨ ᠮᠡᠲᠦ ᠮᠠᠨ ᠤ᠋ ᠵᠥᠭᠡᠯᠡᠨ ᠪᠠᠭᠤᠷᠠᠢ ᠮᠣᠩᠭᠣᠯ ᠤᠭᠰᠠᠭᠠ ᠮᠢᠬᠠ ᠪᠣᠯᠵᠤ ᠲᠡᠷᠡ ᠴᠢᠭᠢᠷᠠᠭ ᠬᠦᠴᠦᠳᠡᠨᠡ ᠢᠳᠡᠭᠳᠡᠨ ᠰᠢᠩᠭᠡᠭᠡᠭᠳᠡᠮᠦᠢ ᠢᠠ᠃ ᠶᠠᠭᠤᠨ ᠭᠡᠬᠦᠯᠡ ᠲᠡᠷᠡ ᠪᠠᠰᠠ ᠥᠭᠦᠯᠡᠭᠰᠡᠨ ᠢᠨᠤ《ᠴᠠᠭ ᠤᠴᠠᠷᠠᠯ ᠯᠤᠭᠠ ᠨᠡᠢᠯᠡᠯᠴᠡᠨ ᠵᠣᠬᠢᠭᠴᠢᠳ ᠪᠣᠯᠤᠭᠰᠠᠨ ᠠᠨᠤ ᠠᠮᠢᠳᠤᠷᠠᠨ ᠲᠣᠭᠲᠠᠨᠢᠬᠤ ᠪᠥᠭᠡᠳ ᠡᠰᠡ ᠵᠣᠬᠢᠭᠴᠢᠳ ᠠᠨᠤ ᠰᠥᠨᠥᠵᠦ ᠮᠥᠬᠥᠮᠦᠢ》 ᠬᠡᠮᠡᠵᠦᠬᠦᠢ᠃ ᠮᠠᠨ ᠤ᠋ ᠮᠣᠩᠭᠣᠯ ᠤᠭᠰᠠᠭᠠ ᠡᠨᠡ ᠡᠳᠦᠷ ᠦ᠋ᠨ ᠣᠷᠣᠰᠢᠯᠲᠠ ᠣᠷᠣᠨ ᠪᠠ ᠲᠣᠭᠣᠷᠢᠭᠰᠠᠨ ᠪᠠᠢᠳᠠᠯ ᠬᠢᠭᠡᠳ ᠲᠡᠭᠦᠨᠤ ᠵᠠᠰᠠᠭ ᠵᠠᠰᠠᠯᠲᠠ᠂ ᠰᠤᠷᠭᠠᠯ ᠰᠣᠶᠣᠯ᠂ ᠡᠳ᠋ ᠬᠥᠷᠥᠩᠭᠡ᠂ ᠬᠦᠴᠦᠨ ᠲᠡᠩᠬᠡᠭᠡ ᠠᠯᠢᠪᠠᠰᠤ ᠪᠠᠷ ᠴᠥᠮ ᠬᠥᠮᠦᠨ ᠦ᠌ ᠬᠣᠢᠲᠠᠢ ᠣᠷᠣᠵᠤ ᠬᠣᠴᠣᠷᠤᠭᠳᠠᠵᠤ ᠨᠢᠭᠡᠨᠲᠡ ᠪᠠᠭᠠ ᠪᠠᠭᠤᠷᠠᠢ ᠤᠭᠰᠠᠭᠠᠲᠠᠨ ᠤ᠋ ᠲᠣᠭᠠᠨ ᠳ᠋ᠤᠷ ᠣᠷᠣᠵᠤ ᠲᠣᠭᠠᠯᠠᠭᠳᠠᠵᠤ ᠪᠠᠢᠬᠤ ᠳ᠋ᠤᠷ ᠡᠭᠨᠡᠭᠳᠡ ᠵᠣᠬᠢᠠᠭᠴᠢᠳ ᠪᠣᠯᠬᠤ ᠤᠤ᠂ ᠪᠤᠰᠤ ᠤᠤ! ᠠᠶᠠ ᠬᠡᠯᠡᠵᠦ ᠰᠠᠨᠠᠭᠰᠠᠭᠠᠷ ᠡᠭᠦᠨ ᠳ᠋ᠦ᠍ᠷ ᠠᠮᠠᠳᠠᠨ ᠲᠤᠯᠪᠠᠰᠤ ᠦᠨᠡᠬᠡᠷ ᠡᠯᠢᠭᠡ ᠰᠢᠮᠰᠢᠷᠡᠨ ᠵᠢᠷᠦᠬᠡ ᠬᠡᠮᠬᠡᠷᠡᠮᠦᠢ᠃ ᠬᠡᠳᠦᠢ ᠲᠡᠢᠨ ᠪᠣᠯᠪᠠᠴᠤ ᠮᠠᠨ ᠤ᠋ ᠮᠣᠩᠭᠣᠯ ᠤᠭᠰᠠᠭᠠᠲᠠᠨ ᠤᠭ ᠠ᠋ᠴᠠ ᠲᠡᠢᠮᠦ ᠦᠪᠡᠳᠡᠭᠰᠢ ᠦᠬᠡᠨᠴᠡ ᠳᠣᠷᠣᠢ ᠠᠮᠢᠲᠠᠨ ᠪᠤᠰᠤ ᠪᠢᠯᠡ᠃ ᠡᠷᠲᠡ ᠴᠢᠩᠭᠢᠰ ᠪᠣᠭᠳᠠ ᠶ᠋ᠢᠨ ᠦᠶᠡᠰ ᠴᠣᠭ ᠵᠢᠪᠬᠤᠯᠠᠩ ᠰᠦᠷ ᠡᠷᠳᠡᠮ ᠢᠨᠤ ᠪᠦᠬᠦ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠳᠦᠭᠦᠷᠡᠩ ᠮᠠᠨᠳᠤᠵᠤ ᠮᠠᠩᠯᠠᠢ ᠪᠠᠭᠠᠲᠤᠷ ᠤ᠋ᠨ ᠨᠡᠷᠡ ᠠᠯᠳᠠᠷᠰᠢᠨ ᠳᠡᠯᠭᠡᠷᠡᠵᠦ ᠮᠥᠨ ᠬᠦ ᠠᠽᠢᠶᠠ ᠧᠦ᠋ᠷᠣᠫᠠ ᠬᠣᠶᠠᠷ ᠲᠢᠪ ᠢ᠋ ᠡᠷᠬᠡ ᠳ᠋ᠡᠭᠡᠨ ᠡᠵᠡᠯᠡᠨ ᠠᠪᠴᠤ᠂ ᠡᠷᠲᠡᠨ ᠡᠳᠦᠭᠡ ᠬᠣᠣᠰ ᠵᠡᠷᠭᠡᠴᠡᠯ ᠦᠭᠡᠢ ᠠᠭᠤᠤ ᠶᠡᠬᠡ ᠭᠠᠪᠢᠶᠠ ᠦᠢᠯᠡᠰ ᠢ᠋ ᠪᠦᠲᠦᠭᠡᠵᠦ᠂ ᠳᠤᠮᠳᠠᠳᠤ ᠤᠯᠤᠰ ᠢ᠋ ᠨᠢᠭᠡᠳᠬᠡᠵᠦ ᠶᠤᠸᠠᠨ ᠬᠡᠮᠡᠬᠦ ᠮᠣᠩᠭᠣᠯ ᠶᠡᠬᠡ ᠤᠯᠤᠰ ᠲᠥᠷᠥ ᠶ᠋ᠢ ᠪᠠᠢᠭᠤᠯᠵᠤ᠂ ᠪᠦᠬᠦ ᠳᠡᠯᠡᠬᠡᠢ ᠳᠡᠭᠡᠷᠡ ᠮᠠᠰᠢ ᠭᠡᠷᠡᠯ ᠥᠩᠭᠡ ᠲᠡᠢ ᠮᠠᠨᠳᠤᠨ ᠬᠥᠭᠵᠢᠵᠦ ᠭᠡᠭᠡᠨ ᠭᠢᠯᠪᠠᠯᠵᠠᠭᠰᠠᠨ ᠲᠡᠦᠬᠡ ᠱᠠᠰᠲᠢᠷ ᠲᠠᠢ ᠤᠭᠰᠠᠭᠠᠲᠠᠨ ᠪᠥᠯᠥᠭᠡ᠃ ᠭᠠᠭᠴᠠ ᠡᠨᠡ ᠬᠡᠳᠦᠨ ᠵᠠᠭᠤᠨ ᠣᠨ ᠠ᠋ᠴᠠ ᠢᠨᠠᠭᠰᠢ ᠮᠥᠨ ᠯᠡ ᠤᠷᠢᠳᠤ ᠴᠢᠩ ᠤᠯᠤᠰ ᠤ᠋ᠨ ᠬᠣᠣᠷ ᠬᠠᠷᠠᠲᠠᠢ ᠵᠠᠰᠠᠭ ᠪᠣᠳᠣᠯᠭᠠ ᠳ᠋ᠤᠷ ᠤᠨᠠᠵᠤ ᠲᠡᠭᠦᠨᠤ ᠠᠷᠠᠳ ᠣᠯᠠᠨ ᠢ᠋ ᠮᠤᠩᠬᠠᠷᠠᠭᠤᠯᠤᠨ ᠲᠡᠨᠡᠭᠰᠢᠷᠡᠭᠦᠯᠬᠦ ᠠᠷᠭᠠ ᠮᠡᠬᠡ ᠳ᠋ᠦ᠍ᠷ ᠮᠡᠬᠡᠯᠡᠭᠳᠡᠨ ᠣᠷᠣᠵᠤ᠂ ᠡᠳᠦᠷ ᠢᠷᠡᠬᠦᠶᠡ ᠮᠠᠭᠤᠳᠠᠨ ᠳᠣᠷᠣᠢᠲᠠᠵᠤ᠂ ᠬᠥᠮᠦᠨ ᠦ᠌ ᠬᠣᠣᠷᠯᠠᠨ ᠬᠥᠨᠥᠭᠡᠬᠦ ᠪᠡᠷ ᠵᠠᠪᠳᠤᠵᠤ ᠭᠦᠨ᠂ ᠨᠠᠷᠢᠨ ᠭᠡᠮ ᠬᠣᠣᠷ ᠭᠦᠶᠦᠯᠭᠡᠵᠦ ᠪᠠᠢᠲᠠᠯᠠ ᠥᠴᠦᠬᠡᠨ ᠴᠦ᠍ ᠤᠬᠠᠭᠠᠷᠠᠨ ᠰᠡᠷᠭᠦᠬᠦ ᠦᠭᠡᠢ᠂ ᠪᠠᠭᠠᠲᠤᠷ ᠬᠦᠴᠦᠨ ᠴᠦ᠍ ᠪᠠᠢᠨ ᠪᠠᠢᠭᠰᠠᠭᠠᠷ ᠪᠠᠭᠤᠷᠠᠵᠤ ᠣᠮᠣᠭ ᠵᠣᠷᠢᠭ ᠤᠯᠠᠮ ᠤᠯᠠᠮ ᠤᠰᠠᠳᠴᠤ ᠤᠬᠠᠭᠠᠨ ᠰᠠᠨᠠᠭᠠ ᠬᠠᠭᠠᠭᠳᠠᠵᠤ᠂ ᠮᠠᠲᠠᠯ ᠦᠵᠡᠯ ᠪᠠᠯᠠᠷᠠᠭᠳᠠᠵᠤ᠂ ᠰᠤᠷᠭᠠᠯ ᠰᠣᠶᠣᠯ ᠭᠡᠮᠡᠨ ᠥᠴᠦᠬᠡᠨ ᠴᠦ᠍ ᠡᠷᠬᠢᠯᠡᠬᠦ ᠦᠭᠡᠢ᠂ ᠡᠷᠳᠡᠮ ᠴᠢᠳᠠᠯ ᠭᠡᠮᠡᠨ ᠰᠢᠭᠤᠳ ᠰᠠᠨᠠᠭᠠ ᠲᠠᠯᠪᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠣᠳᠣ ᠴᠣᠬᠣᠮ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠪᠠᠢᠳᠠᠯ ᠲᠥᠯᠥᠪ ᠬᠡᠷᠬᠢᠨ ᠪᠣᠯᠵᠤ᠂ ᠥᠪᠡᠷ ᠪᠤᠰᠤᠳ ᠤ᠋ᠨ ᠬᠠᠮᠢᠶᠠ ᠬᠣᠯᠪᠣᠭᠳᠠᠯ ᠶᠠᠮᠠᠷ ᠪᠣᠯᠵᠤ ᠪᠠᠢᠬᠤ ᠶ᠋ᠢ ᠥᠴᠦᠬᠡᠨ ᠴᠦ᠍ ᠣᠯᠵᠤ ᠮᠡᠳᠡᠬᠦ ᠦᠭᠡᠢ᠂ ᠴᠣᠬᠣᠮ ᠮᠤᠩᠬᠠᠭ ᠬᠠᠷᠠᠩᠭᠤᠢ ᠪᠠᠷ ᠡᠳᠦᠭᠡ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠰᠡᠨ ᠠᠵᠤᠭᠤ᠃ ᠡᠢᠨ ᠠᠲᠠᠯᠠ᠂ ᠮᠠᠨ ᠤ᠋ ᠮᠣᠩᠭᠣᠯ ᠤᠭᠰᠠᠭᠠᠲᠠᠨ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠡᠳᠦᠢᠴᠢᠨᠡᠭᠡᠨ ᠣᠨ ᠥᠩᠭᠡᠷᠡᠲᠡᠯᠡ ᠤᠭᠰᠠᠭᠠ ᠦᠨᠳᠦᠰᠦ ᠤᠭ ᠬᠡᠪ ᠢ᠋ᠶ᠋ᠡᠷ ᠪᠠᠳᠠᠷᠠᠨ ᠲᠣᠭᠲᠠᠨᠢᠵᠤ ᠤᠰᠠᠳᠤᠨ ᠤᠨᠲᠠᠷᠠᠭᠰᠠᠨ ᠦᠭᠡᠢ᠂ ᠡᠨᠡ ᠡᠭᠡᠨᠡᠭᠲᠡ ᠶᠠᠮᠠᠷ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠡᠢᠮᠦ ᠶᠡᠬᠡ ᠠᠴᠢ ᠲᠤᠰᠠ ᠪᠣᠯᠤᠭᠰᠠᠨ ᠪᠣᠢ ᠬᠡᠮᠡᠪᠡᠰᠦ ᠭᠠᠭᠴᠠ ᠬᠡᠯᠡ ᠦᠭᠡᠰ ᠢ᠋ᠶ᠋ᠡᠨ ᠤᠮᠠᠷᠲᠠᠭᠰᠠᠨ ᠦᠭᠡᠢ ᠪᠥᠭᠡᠳ ᠤᠳᠬᠠ ᠦᠰᠦᠭ ᠢ᠋ᠶ᠋ᠡᠨ ᠭᠡᠭᠡᠭᠰᠡᠨ ᠦᠭᠡᠢ ᠶ᠋ᠢᠨ ᠠᠴᠢ ᠲᠤᠰᠠ ᠪᠣᠯᠠᠢ᠃ ᠡᠭᠦᠪᠡᠷ ᠬᠡᠯᠡ ᠦᠭᠡᠰ ᠤᠳᠬᠠ ᠦᠰᠦᠭ ᠭᠡᠭᠴᠢ ᠤᠭᠰᠠᠭᠠ ᠦᠨᠳᠦᠰᠦ ᠳ᠋ᠦ᠍ᠷ ᠭᠦᠨᠡ ᠨᠠᠷᠢᠨ ᠬᠣᠯᠪᠣᠭᠳᠠᠯ ᠲᠠᠢ ᠤᠴᠢᠷ ᠢ᠋ ᠮᠡᠳᠡᠵᠦ ᠪᠣᠯᠤᠮᠤᠢ᠃ ᠡᠭᠦᠨᠴᠡ ᠤᠯᠠᠮ ᠤᠯᠠᠮ ᠡᠷᠬᠢᠯᠡᠨ ᠬᠦᠨᠳᠦᠳᠬᠡᠵᠦ ᠡᠷᠬᠡᠪᠰᠢ ᠣᠯᠠᠨ ᠨᠡᠢᠲᠡ ᠲᠦᠭᠡᠮᠡᠯ ᠢ᠋ᠶ᠋ᠡᠷ ᠮᠣᠩᠭᠣᠯ ᠦᠰᠦᠭ ᠢ᠋ᠶ᠋ᠡᠨ ᠲᠠᠨᠢᠵᠤ ᠮᠡᠳᠡᠵᠦ᠂ ᠪᠢᠴᠢᠭ ᠰᠤᠷᠭᠠᠯ ᠢ᠋ ᠦᠯᠡᠮᠵᠢ ᠪᠠᠳᠠᠷᠠᠭᠤᠯᠵᠤ ᠬᠡᠪ ᠳᠠᠷᠤᠮᠠᠯ ᠢ᠋ ᠣᠨᠴᠠᠭᠠᠢ ᠳᠡᠯᠭᠡᠷᠡᠩᠭᠦᠢ ᠪᠣᠯᠭᠠᠬᠤ ᠶ᠋ᠢᠨ ᠵᠦᠭ ᠬᠦᠴᠦᠯᠡᠨ ᠣᠷᠣᠯᠳᠣᠬᠤ ᠠᠨᠤ ᠠᠯᠢ ᠠ᠋ᠴᠠ ᠴᠤ᠌ ᠡᠷᠬᠢᠮ ᠴᠢᠬᠤᠯᠠ ᠬᠦᠨᠳᠦ ᠠᠵᠢᠯ ᠪᠣᠯᠤᠮᠤᠢ᠃
ᠢᠷᠡᠯᠲᠡ ᠄《 ᠬᠡᠯᠡ ᠪᠢᠴᠢᠭ》1990 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠸᠠ
ᠬᠢᠨᠠᠭᠴᠢ᠄ ᠲᠤᠭᠴᠢ ᠰᠠᠷᠠᠨᠠ