ᠬᠡᠢᠮᠣᠷᠢ ᠶ᠋ᠢᠨ ᠳᠠᠯᠠᠯᠭᠠ ᠲᠠᠢ ᠡᠬᠡ ᠣᠷᠣᠨ – ᠲ ᠂ ᠲᠡᠮᠦᠷᠭᠣᠣᠯᠲᠤ Хийморийн даллагатай эх орон – Т ᠂ Төмөргоолт
919 ᠠᠷᠠᠳ ᠲᠦᠮᠡᠨ ᠦ᠌ ᠡᠯᠢᠭᠡ ᠵᠢᠷᠦᠬᠡᠨ ᠳ᠋ᠦ᠍ ᠮᠥᠩᠬᠡᠷᠡᠬᠦ ᠬᠠᠢᠷᠠ
ᠠᠭᠤᠤ ᠶᠡᠬᠡ ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠪᠢ ᠮᠠᠭᠲᠠᠨ ᠰᠢᠯᠦᠭᠯᠡᠶᠡ
ᠠᠽᠢᠶᠠ ᠶ᠋ᠢᠨ ᠲᠦᠮᠡᠨ ᠪᠠᠷᠲᠠᠭᠠᠨ ᠤ᠋ ᠳᠤᠮᠳᠠ ᠰᠦᠨᠳᠡᠷᠯᠡᠩᠬᠡᠨ ᠣᠷᠣᠰᠢᠭᠠ
ᠠᠯᠲᠠᠨ ᠶᠠᠰᠤᠲᠤ ᠲᠩᠷᠢᠯᠢᠭ ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠪᠢ ᠱᠠᠭᠰᠢᠨ ᠤᠶᠠᠩᠭᠠᠯᠠᠶᠠ
ᠮᠢᠩᠭᠠᠨ ᠮᠢᠩᠭᠠᠨ ᠣᠨ ᠤ᠋ ᠨᠡᠭᠦᠳᠡᠯ ᠦ᠋ᠨ ᠰᠢᠷᠭᠠᠯ ᠵᠠᠮ ᠳ᠋ᠤ᠌
ᠮᠠᠯᠵᠢᠬᠤ ᠰᠣᠶᠣᠯ ᠤ᠋ᠨ ᠠᠷᠢᠭᠤᠨ ᠭᠣᠯᠣᠮᠲᠠ ᠳ᠋ᠤ᠌ ᠪᠠᠨ ᠭᠠᠯ ᠪᠠᠳᠠᠷᠠᠭᠠᠨ
ᠮᠠᠭᠲᠠᠨ ᠳᠠᠭᠤᠯᠠᠬᠤ ᠰᠣᠯᠣᠩᠭᠠᠨ ᠳᠣᠯᠣᠭᠠᠨ ᠡᠭᠡᠰᠢᠭ ᠲᠡᠢ ᠪᠡᠨ ᠰᠢᠲᠦᠯᠴᠡᠩᠬᠡᠨ ᠲᠣᠭᠲᠠᠨᠢᠭᠠ
ᠮᠠᠨᠳᠤᠯ ᠬᠥᠭᠵᠢᠯᠲᠦ ᠢᠷᠡᠭᠡᠳᠦᠢ ᠶ᠋ᠢᠨ ᠴᠤᠤᠷᠢᠶᠠ ᠲᠠᠢ ᠮᠢᠨᠦ ᠡᠬᠡ ᠣᠷᠣᠨ
ᠮᠣᠷᠢᠲᠠᠨ ᠪᠠᠭᠠᠲᠤᠷᠴᠤᠳ ᠤ᠋ᠨ ᠢ᠋ᠶ᠋ᠠᠨ ᠰᠦᠷ ᠰᠦᠯᠳᠡ ᠳ᠋ᠦ᠍ ᠰᠦᠮᠪᠦᠷ ᠠᠭᠤᠯᠠᠰ ᠨᠢ ᠲᠣᠭᠳᠣᠯᠵᠠᠵᠤ
ᠮᠢᠷᠠᠯᠵᠠᠨ ᠣᠷᠣᠰᠠᠠᠣ ᠭᠣᠣᠯ ᠮᠥᠷᠡᠨ ᠢ᠋ᠶ᠋ᠡᠨ ᠰᠢᠭ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠰᠢᠷᠤᠩᠬᠠᠢᠯᠠᠨ
ᠮᠦᠰᠢᠶᠡᠨ ᠢᠨᠢᠶᠡᠯᠳᠦᠬᠦ ᠬᠡᠦᠬᠡᠳ ᠪᠠᠭᠠᠴᠤᠳ ᠨᠢ ᠲᠣᠷᠨᠢᠭᠤᠨ ᠴᠣᠪᠣᠭᠣᠯᠢᠭ ᠥᠰᠴᠦ
ᠮᠠᠩᠬᠠᠢᠬᠤ ᠦᠷ ᠰᠢᠭ ᠭᠡᠷᠡᠯᠲᠦ ᠢᠷᠡᠭᠡᠳᠦᠢ ᠪᠡᠨ ᠬᠡᠢᠮᠣᠷᠢ ᠪᠣᠰᠤᠭᠠ ᠤᠭᠲᠤᠨᠠ
ᠰᠠᠨᠰᠠᠷ ᠣᠷᠴᠢᠯᠠᠩ ᠤ᠋ᠨ ᠣᠳᠣᠨ ᠮᠡᠴᠢᠳ ᠬᠢᠯᠠᠯᠵᠠᠩᠬᠠᠨ ᠳᠠᠯᠠᠯᠬᠤ ᠮᠡᠲᠦ
ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠨᠣᠶᠠᠨ ᠣᠷᠭᠢᠯ ᠲᠠᠢᠰᠢ ᠬᠦᠰᠡᠯ ᠦ᠋ᠨ ᠵᠢᠭᠦᠷ ᠢ᠋ᠶ᠋ᠡᠨ ᠳᠡᠯᠭᠡᠨ
ᠰᠢᠵᠢᠷ ᠡᠷᠢᠨ ᠦ᠌ ᠵᠠᠯᠠᠭᠤᠰ ᠢᠳᠡᠷᠴᠦᠳ ᠵᠢᠪᠬᠤᠭᠠ ᠲᠡᠭᠦᠯᠳᠡᠷ ᠤᠷᠤᠭᠰᠢᠯᠠᠵᠤ
ᠰᠢᠷᠭᠠᠭᠤ ᠬᠥᠳᠡᠯᠮᠦᠷᠢ ᠶ᠋ᠢᠨ ᠪᠠᠶᠠᠰᠤᠯᠳᠤ ᠳᠠᠭᠤᠤ ᠪᠠᠨ ᠳᠡᠯᠡᠬᠡᠢ ᠶ᠋ᠢᠨ ᠰᠣᠨᠣᠷ ᠲᠤ᠌ ᠬᠦᠷᠭᠡᠨᠡ
ᠠᠳᠤᠭᠤᠨ ᠰᠦᠷᠦᠭ ᠦ᠋ᠨ ᠲᠣᠷᠭᠠᠨ ᠲᠣᠭᠣᠰᠣᠨ ᠳ᠋ᠤ᠌ ᠠᠯᠲᠠᠨ ᠤᠨᠠᠭᠠ ᠦᠦᠷᠰᠡᠭᠡᠳ
ᠠᠲᠠᠷ ᠲᠠᠯᠠ ᠶ᠋ᠢᠨ ᠲᠠᠩᠰᠤᠭ ᠪᠡᠯᠴᠢᠭᠡᠷ ᠲᠦ᠍ ᠵᠦᠰᠡᠷ ᠪᠣᠷᠣᠭᠠᠨ ᠱᠠᠭᠢᠨᠠ
ᠠᠨᠳᠠ ᠶ᠋ᠢᠨ ᠵᠢᠷᠤᠮ ᠲᠠᠢ ᠠᠬᠠ ᠳᠡᠭᠦᠦ ᠣᠯᠠᠭᠤᠯᠠ ᠠᠵᠢᠯ ᠦᠢᠯᠡᠰ ᠢ᠋ᠶ᠋ᠡᠨ ᠥᠷᠨᠢᠭᠦᠯᠦᠩᠭᠡᠨ
ᠠᠵᠢᠨᠠᠢ ᠬᠦᠯᠦᠭ ᠦ᠋ᠨ ᠢᠨᠴᠠᠭᠠᠨ ᠴᠢᠩᠨᠠᠵᠤ ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠶ᠋ᠢ ᠡᠵᠡᠮᠳᠡᠨᠡ
ᠨᠠᠢᠷ ᠤ᠋ᠨ ᠳᠠᠯᠠᠢ ᠳ᠋ᠤ᠌ ᠡᠷᠡ ᠶ᠋ᠢᠨ ᠭᠤᠷᠪᠠᠨ ᠨᠠᠭᠠᠳᠤᠮ ᠢ᠋ᠶ᠋ᠠᠷ ᠪᠡᠶᠡᠰᠴᠦ
ᠨᠠᠢᠷᠠᠭ ᠰᠢᠯᠦᠭ ᠦ᠋ᠨ ᠣᠩᠭᠣᠨ ᠲᠩᠷᠢ ᠣᠯᠠᠨ ᠥᠩᠭᠡ ᠪᠡᠷ ᠰᠣᠯᠣᠩᠭᠠᠷᠠᠨ
ᠠᠢᠷᠠᠭ ᠲᠠᠷᠠᠭ ᠰᠡᠩᠭᠢᠨᠡᠬᠦ ᠲᠠᠯᠠ ᠶ᠋ᠢᠨ ᠮᠣᠩᠭᠣᠯ ᠠᠢᠯ ᠤ᠋ᠳ
ᠠᠮᠢᠵᠢᠷᠠᠯ ᠠᠮᠢᠳᠤᠷᠠᠯ ᠪᠤᠴᠠᠯᠭᠠᠵᠤ ᠤᠯᠠᠮᠵᠢᠯᠠᠯᠲᠤ ᠰᠣᠶᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠢᠷᠭᠠᠨᠠ
ᠪᠤᠮᠠᠨ ᠣᠨ ᠤ᠋ ᠲᠡᠦᠬᠡ ᠲᠡᠢ ᠬᠡᠢᠮᠣᠷᠢ ᠰᠡᠷᠭᠦᠭᠡᠭᠰᠡᠨ ᠡᠬᠡ ᠣᠷᠣᠨ ᠳ᠋ᠤ᠌ ᠮᠢᠨᠢ
ᠪᠤᠭᠤᠷᠤᠯ ᠳᠡᠭᠡᠳᠦᠰ ᠦ᠋ᠨ ᠷᠢᠳᠢ ᠰᠢᠳᠢ ᠲᠡᠢ ᠮᠥᠩᠬᠡ ᠶ᠋ᠢᠨ ᠰᠤᠷᠭᠠᠯ ᠤᠯᠠᠮᠵᠢᠯᠠᠭᠳᠠᠨᠠ
ᠪᠤᠷᠬᠠᠨ ᠭᠤᠶᠤᠭᠰᠠᠨ ᠴᠤ᠌ ᠥᠭᠭᠦᠭᠰᠡᠨ ᠦᠭᠡᠢ ᠭᠠᠵᠠᠷ ᠰᠢᠷᠣᠢ ᠶ᠋ᠢᠨ ᠬᠢᠨᠢ ᠬᠡᠰᠢᠭ ᠢ᠋ᠶ᠋ᠡᠷ
ᠪᠤᠶᠠᠨᠲᠤ ᠨᠤᠲᠤᠭ ᠤ᠋ᠨ ᠳᠠᠷᠬᠠᠨ ᠠᠯᠳᠠᠷ ᠳᠠᠶᠠᠩ ᠳᠡᠯᠡᠬᠡᠢ ᠳ᠋ᠦ᠍ ᠳᠠᠭᠤᠷᠢᠰᠤᠨᠠ
ᠴᠠᠬᠢᠯᠭᠠᠨ ᠲᠩᠷᠢ ᠶ᠋ᠢᠨ ᠣᠳᠣᠳ ᠢ᠋ ᠲᠣᠭᠠᠯᠠᠭᠰᠠᠭᠠᠷ ᠢᠷᠡᠭᠰᠡᠨ ᠾᠦᠩᠨᠦ ᠰᠢᠶᠦ᠋ᠩᠨᠦ ᠶ᠋ᠢᠨ ᠤᠳᠤᠮ
ᠴᠠᠭ ᠡᠷᠢᠨ ᠲᠡᠢ ᠮᠥᠷᠥ ᠵᠡᠷᠭᠡᠴᠡᠨ ᠴᠢᠳᠠᠪᠤᠷᠢᠲᠠᠨ ᠮᠡᠷᠭᠡᠵᠢᠯᠲᠡᠨ ᠴᠣᠯᠭᠣᠷᠠᠵᠤ
ᠴᠠᠭᠯᠠᠰᠢ ᠦᠭᠡᠢ ᠭᠡᠭᠡᠨ ᠪᠢᠯᠢᠭ ᠢ᠋ᠶ᠋ᠡᠷ ᠮᠠᠨᠳᠤᠯ ᠬᠥᠭᠵᠢᠯ ᠢ᠋ ᠨᠢ ᠬᠤᠷᠤᠢᠯᠠᠵᠤ
ᠴᠠᠭᠠᠨ ᠰᠦ ᠶ᠋ᠢᠨ ᠰᠠᠴᠤᠯᠢ ᠶ᠋ᠢᠨ ᠳᠠᠯᠠᠯᠭᠠ ᠲᠠᠢ ᠡᠬᠡ ᠣᠷᠣᠨ ᠮᠥᠩᠬᠡᠷᠡᠨᠡ
2024 10 3
ᠲᠤᠰ ᠰᠢᠯᠦᠭ ᠢ᠋ ᠮᠥᠴᠢᠷ ᠵᠠᠰᠠᠨ ᠬᠢᠨᠠᠵᠤ᠂ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠲᠠ ᠠᠮᠢᠯᠠᠭᠤᠯᠪᠠ᠃