ᠠᠷᠪᠠᠨ ᠨᠠᠢ᠍ᠮᠠᠨ ᠲᠠᠮᠤ ᠳ᠋ᠤ᠌ ᠤᠨᠠᠭᠰᠠᠨ ᠬᠥᠮᠦᠰ(ᠭᠢᠯᠪᠠᠭᠠᠨ ᠥᠭᠦᠯᠡᠯᠭᠡ) – ᠰᠡᠴᠡᠨᠪᠢᠯᠢᠭ Арван найман тамд унасан хүмүүс(Гялбаан өгүүллэг) – Цэцэнбилэг
1708ᠠᠷᠪᠠᠨ ᠨᠠᠢ᠍ᠮᠠᠨ ᠲᠠᠮᠤ ᠳ᠋ᠤ᠌ ᠤᠨᠠᠭᠰᠠᠨ ᠬᠥᠮᠦᠰ
A ᠭᠤᠸᠠᠢ ᠶ᠋ᠢ ᠭᠡᠨᠡᠳᠲᠡ ᠳᠥᠷᠪᠡᠨ ᠮᠠᠷᠠᠯ ᠡᠷᠡ ᠢᠰᠬᠦᠯᠵᠦ ᠨᠢᠳᠤᠷᠭᠠᠳᠠᠨ ᠵᠢᠵᠢᠭᠬᠡᠨ ᠬᠠᠷᠠᠩᠭᠤᠢ ᠨᠦᠬᠡ ᠤᠷᠤᠭᠤ ᠠᠷᠠᠰᠤ ᠮᠢᠬᠠ ᠶ᠋ᠢ ᠨᠢ ᠤᠷᠠᠵᠤ ᠰᠢᠯᠪᠤᠭᠤᠯᠤᠨ ᠠᠪᠴᠤ ᠣᠷᠣᠪᠠ᠃ ᠬᠠᠷᠠᠩᠭᠤᠢ ᠨᠦᠬᠡᠨ ᠳᠤᠮᠳᠠᠭᠤᠷ ᠪᠠᠬᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠬᠠᠯᠲᠤᠷᠢᠮᠠ ᠭᠡᠷᠡᠯ ᠭᠢᠯᠪᠠᠭᠰᠠᠨ ᠭᠠᠵᠠᠷ ᠬᠦᠷᠴᠢᠬᠡᠪᠡ᠃ ᠨᠠᠷᠢᠨ ᠠᠵᠢᠭᠯᠠᠪᠠᠯ 《ᠡᠷᠯᠢᠭ ᠨᠣᠮᠣᠨ ᠬᠠᠭᠠᠨ ᠤ᠋ ᠣᠷᠳᠣᠨ》 ᠭᠡᠰᠡᠨ ᠠᠯᠲᠠᠨ ᠫᠠᠢᠰᠠ ᠪᠠᠢᠯᠠ᠃
ᠥᠨᠥ ᠳᠥᠷᠪᠡᠨ ᠡᠷᠡ ᠡᠭᠦᠳᠡᠨ ᠬᠠᠷᠠᠭᠤᠯ ᠳ᠋ᠤ᠌ A ᠭᠤᠸᠠᠢ ᠶ᠋ᠢ ᠲᠤᠰᠢᠶᠠᠵᠤ ᠥᠭᠭᠦᠭᠡᠳ ᠪᠤᠴᠠᠪᠠ᠃
ᠡᠭᠦᠳᠡᠨ ᠬᠠᠷᠠᠭᠤᠯ ᠤ᠋ᠨ ᠨᠢᠭᠡ ᠨᠢ ᠳᠣᠲᠣᠭᠰᠢ ᠣᠷᠣᠨ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠢ᠋ᠶ᠋ᠠᠨ ᠪᠤᠴᠠᠨ ᠢᠷᠡᠵᠦ A ᠵᠢ ᠲᠦᠯᠬᠢᠵᠦ ᠠᠪᠠᠴᠢᠨ ᠡᠷᠯᠢᠭ ᠨᠣᠮ ᠬᠠᠭᠠᠨ ᠤ᠋ ᠡᠮᠦᠨᠡ ᠰᠥᠭᠥᠳᠬᠡᠵᠦ ᠰᠢᠭᠦᠯᠲᠡ ᠡᠬᠢᠯᠡᠪᠡ᠃
— ᠨᠡᠷᠡ ᠴᠢᠨᠢ?
— A
— ᠦᠨᠳᠦᠰᠦᠲᠡᠨ?
— ᠮᠣᠩᠭᠣᠯ᠃
— ᠨᠡᠷᠡᠲᠦ ᠳ᠋ᠦ᠍ ᠠᠮᠢᠳᠤᠷᠠᠭᠰᠠᠨ ᠨᠠᠰᠤ ᠴᠢᠨᠢ?
— ᠳᠥᠴᠢ
— ᠨᠡᠷᠡᠲᠦ ᠳ᠋ᠦ᠍ ᠠᠮᠢᠳᠤᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠨ ᠶᠠᠮᠠᠷ《ᠨᠢᠭᠦᠯ》 ᠦᠢᠯᠡᠳᠪᠡ?
— ᠮᠢᠨᠦ ᠦᠵᠡᠬᠦ ᠪᠡᠷ ᠪᠢ 《ᠨᠢᠭᠦᠯ》 ᠦᠢᠯᠡᠳᠦᠭᠰᠡᠨ ᠦᠭᠡᠢ᠂ ᠨᠢᠭᠡ ᠴᠦ᠍ ᠠᠮᠢ ᠬᠣᠷᠣᠭᠠᠭᠰᠠᠨ ᠦᠭᠡᠢ ᠶᠦᠮ ᠴᠢᠨᠢ᠃
— ᠳᠡᠰ (ᠨᠣᠮᠣᠨ ᠬᠠᠭᠠᠨ ᠰᠢᠷᠡᠭᠡ ᠪᠡᠨ ᠬᠦᠴᠦᠲᠡᠢ ᠳᠡᠯᠡᠳᠦᠨᠡ)! ᠪᠤᠯᠢᠬᠠᠢᠯᠠᠨᠠ ᠭᠡᠨᠡ? ᠠᠮᠢ ᠬᠣᠷᠣᠭᠠᠭᠰᠠᠨ ᠠ᠋ᠴᠠ ᠢᠯᠡᠭᠦᠦ ᠨᠢᠭᠦᠯ ᠢ᠋ ᠴᠢ ᠦᠢᠯᠡᠳᠴᠡᠢ! ᠲᠦᠷᠭᠡᠨ ᠲᠤᠰᠢᠶᠠ!
— ᠡᠨᠡ?
— ᠠᠪᠤ ᠴᠢᠨᠢ ᠴᠢᠮᠠ ᠳ᠋ᠤ᠌ ᠶᠠᠮᠠᠷ ᠥᠪ ᠦᠯᠡᠳᠡᠭᠡᠪᠡ?
— ᠶᠠᠮᠠᠷ ᠴᠤ᠌ ᠮᠥᠩᠭᠥ ᠪᠣᠯᠴᠢᠬᠠᠮᠠᠷ ᠥᠪ ᠦᠯᠡᠳᠡᠭᠡᠭᠰᠡᠨ ᠦᠭᠡᠢ᠃
— ᠳᠡᠰ( ᠨᠣᠮᠣᠨ ᠬᠠᠭᠠᠨ ᠰᠢᠷᠡᠭᠡ ᠪᠡᠨ ᠪᠠᠰᠠ ᠨᠢᠭᠡ ᠳᠡᠯᠡᠳᠦᠨᠡ)!ᠴᠢ ᠪᠠᠰᠠ ᠪᠤᠯᠢᠬᠠᠢᠯᠠᠨᠠ ᠭᠡᠨᠡ? ᠮᠥᠩᠭᠥ ᠪᠣᠯᠴᠢᠬᠠᠮᠠᠷ ᠠᠯᠲᠠ ᠮᠥᠩᠭᠥ ᠲᠣᠷᠭᠠ ᠳᠤᠷᠳᠤᠩ ᠪᠠᠢᠭᠰᠠᠨ ᠦᠭᠡᠢ ᠴᠤ᠌ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠵᠤ ᠪᠢᠴᠢᠭᠰᠡᠨ ᠨᠣᠮ ᠬᠡᠳᠦᠨ ᠭᠡᠷ ᠪᠠᠢᠭᠰᠠᠨ ᠪᠤᠰᠤ ᠤᠤ?
— ᠨᠣᠮ ᠤᠤ! ᠲᠡᠷᠡ ᠴᠦ᠍ ᠪᠠᠢᠭᠰᠠᠨ᠂ ᠭᠡᠪᠡᠴᠦ ᠲᠡᠷᠡ ᠨᠢ ᠨᠠᠳᠠ ᠳ᠋ᠤ᠌ ᠬᠡᠷᠡᠭ ᠦᠭᠡᠢ ᠵᠦᠢᠯ ᠪᠠᠢᠭᠰᠠᠨ᠃
— ᠶᠠᠭᠠᠬᠢᠭᠠᠳ ᠬᠡᠷᠡᠭ ᠦᠭᠡᠢ ᠪᠣᠢ?
— ᠪᠢ ᠥᠭᠡᠯᠡᠢ ᠪᠣᠯᠬᠤ ᠳ᠋ᠤ᠌ ᠪᠠᠨ ᠥᠭᠡᠷᠡ ᠬᠡᠯᠡ ᠰᠤᠷᠤᠭᠰᠠᠨ ᠤᠴᠢᠷ ᠮᠣᠩᠭᠣᠯ ᠬᠡᠯᠡ ᠪᠡᠨ ᠣᠷᠬᠢᠭᠰᠠᠨ ᠠ᠋ᠴᠠ ᠲᠡᠳᠡᠭᠡᠷ ᠨᠣᠮ ᠬᠡᠷᠡᠭ ᠦᠭᠡᠢ ᠪᠣᠯᠤᠭᠰᠠᠨ ᠶᠤᠮ᠃
— ᠲᠡᠭᠡᠭᠡᠳ ᠲᠡᠳᠡᠭᠡᠷ ᠨᠣᠮ ᠢ᠋ ᠶᠠᠭᠠᠬᠢᠪᠠ?
— ᠲᠡᠳᠡᠭᠡᠷ ᠨᠣᠮ ᠤ᠋ᠳ ᠤ᠋ᠨ ᠵᠠᠷᠢᠮ ᠢ᠋ ᠨᠢ ᠮᠠᠭᠤ ᠴᠠᠭᠠᠰᠤ ᠪᠠᠷ ᠬᠤᠳᠠᠯᠳᠤᠴᠢᠬᠠᠭᠰᠠᠨ᠂ ᠵᠠᠷᠢᠮ ᠢ᠋ ᠨᠢ ᠭᠠᠯ ᠬᠥᠭᠵᠢᠭᠡᠭᠰᠡᠨ᠂ ᠵᠠᠷᠢᠮ ᠢ᠋ ᠨᠢ ᠬᠡᠦᠬᠡᠳ ᠦ᠋ᠨ ᠪᠥᠭᠰᠡ ᠠᠷᠴᠢᠴᠢᠬᠠᠭᠰᠠᠨ᠃
— ᠳᠡᠰ (ᠨᠣᠮᠣᠨ ᠬᠠᠭᠠᠨ ᠰᠢᠷᠡᠭᠡ ᠪᠡᠨ ᠭᠤᠷᠪᠠᠳᠠᠬᠢ ᠤᠳᠠᠭᠠ ᠳᠡᠯᠡᠳᠦᠨᠡ)! ᠴᠢ ᠡᠳᠦᠭᠡ ᠦᠨᠡᠨ ᠢ᠋ᠶ᠋ᠡᠨ ᠪᠦᠷ ᠬᠡᠯᠡᠯᠡ᠃ ᠭᠡᠪᠡᠴᠦ ᠴᠢ ᠣᠨᠴᠠ ᠶᠡᠬᠡ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠵᠦ ᠠᠪ ! ᠴᠢ ᠬᠥᠮᠦᠨ ᠪᠣᠯᠵᠤ ᠲᠥᠷᠥᠭᠡᠳ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠦᠭᠡ ᠬᠡᠯᠡ᠂ ᠦᠰᠦᠭ ᠪᠢᠴᠢᠭ᠂ ᠰᠣᠶᠣᠯ ᠤ᠋ᠨ ᠥᠪ ᠢ᠋ᠶ᠋ᠡᠨ ᠵᠠᠯᠭᠠᠮᠵᠢᠯᠠᠵᠤ ᠬᠥᠭᠵᠢᠭᠦᠯᠬᠦ ᠦᠭᠡᠢ ᠬᠠᠷᠢᠨ ᠪᠦᠷᠢᠯᠭᠡᠨ ᠰᠦᠢᠳᠬᠡᠨᠡ ᠭᠡᠳᠡᠭ ᠳᠠᠩᠴᠤ ᠶᠣᠰᠣ ᠪᠤᠰᠤ᠃ ᠡᠨᠳᠡ ᠭᠠᠷ ᠤ᠋ᠨ ᠦᠰᠦᠭ ᠢ᠋ᠶ᠋ᠡᠨ ᠵᠢᠷᠤ᠂ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠴᠢᠮᠠ ᠶ᠋ᠢ《ᠠᠷᠪᠠᠨ ᠨᠠᠢ᠍ᠮᠠᠨ ᠲᠠᠮᠤ》 ᠳ᠋ᠤ᠌ ᠤᠨᠠᠭᠠᠨᠠ᠃
— ᠡᠨᠡ ᠁ ᠥ ᠁ ᠦᠭᠡᠢ ᠁
ᠳᠥᠷᠪᠡᠨ ᠲᠣᠮᠣ ᠡᠷᠡ A ᠭᠤᠸᠠᠢ ᠶ᠋ᠢᠨ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠶ᠋ᠢ ᠴᠠᠭᠠᠰᠤᠨ ᠳᠡᠭᠡᠷᠡ ᠳᠡᠷᠪᠡᠢᠲᠡᠯᠡ ᠠᠯᠪᠠ ᠪᠠᠷ ᠳᠠᠷᠤᠵᠤ 《ᠠᠷᠪᠠᠨ ᠨᠠᠢ᠍ᠮᠠᠨ ᠲᠠᠮᠤ》 ᠶ᠋ᠢᠨ ᠨᠢᠭᠡᠳᠦᠭᠡᠷ ᠣᠷᠳᠣᠨ ᠤᠷᠤᠭᠤ ᠴᠢᠷᠴᠦ ᠶᠠᠪᠤᠪᠠ᠃
1996 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠭᠠᠸᠠ