ᠡᠴᠢᠭᠡ- ᠫ · ᠫᠦᠷᠪᠦᠰᠥ᠋ᠷᠦᠩЭцэг-П ·Пүрэвсүрэн
1596ᠡᠴᠢᠭᠡ
ᠵᠣᠬᠢᠶᠠᠭᠴᠢ᠄ ᠫ · ᠫᠦᠷᠪᠦᠰᠥ᠋ᠷᠦᠩ
ᠡᠪᠦᠭᠡᠨ ᠦ᠌ ᠭᠡᠷ ᠦ᠋ᠨ ᠡᠷᠦᠬᠡ ᠪᠦᠲᠡᠭᠡᠯᠭᠡᠰᠦ ᠲᠡᠢ᠃ ᠡᠳᠦᠢ ᠪᠣᠯᠲᠠᠯᠠ ᠪᠣᠰᠤᠭᠠ ᠦᠭᠡᠢ ᠪᠠᠢᠭᠠ ᠳ᠋ᠤᠨᠢ ᠳ᠋ᠤᠨᠳᠤᠯᠮᠠ ᠭᠠᠢᠬᠠᠯᠠ᠃《ᠲᠤᠩ ᠡᠷᠲᠡᠴᠢ ᠬᠥᠮᠦᠨ ᠰᠠᠨ᠃ ᠶᠠᠭᠠᠬᠢᠭᠠᠳ ᠢᠩᠭᠢᠵᠦ ᠣᠷᠣᠢᠲᠠᠭᠠ ᠶᠤᠮ ᠪᠣᠯ》 ᠭᠡᠵᠦ ᠪᠣᠳᠣᠭᠠᠳ ᠬᠡᠳᠦᠨ ᠵᠠᠯᠳᠠᠰᠤ ᠬᠣᠷᠮᠣᠢᠯᠠᠨ ᠭᠡᠷ ᠲᠦ᠍ ᠪᠡᠨ ᠣᠷᠣᠪᠠ᠃ ᠬᠣᠢᠮᠣᠷ ᠤ᠋ᠨ ᠠᠪᠳᠠᠷᠠ ᠳᠡᠭᠡᠷᠡᠬᠢ ᠴᠠᠭ ᠠᠷᠪᠠ ᠶ᠋ᠢ ᠵᠢᠭᠠᠵᠤ ᠪᠠᠢᠨᠠ᠃ ᠳ᠋ᠤᠨᠳᠤᠯᠮᠠ ᠭᠠᠯ ᠳ᠋ᠤ᠌ ᠪᠠᠨ ᠬᠡᠳᠦᠨ ᠮᠣᠳᠣ ᠬᠠᠶᠠᠭᠠᠳ《ᠡᠪᠦᠭᠡᠨ ᠥᠴᠥᠭᠡᠳᠦᠷ ᠦ᠋ᠨ ᠰᠠᠷᠮᠢᠰᠤ ᠲᠠᠢ ᠬᠡᠳᠦᠨ ᠪᠤᠤᠰᠠᠨ ᠳ᠋ᠤ᠌ ᠪᠠᠨ ᠨᠠᠮ ᠴᠣᠬᠢᠭᠤᠯᠵᠤ ᠳᠠ ᠭᠡᠵᠦ ᠭᠠᠭᠴᠠᠭᠠᠷ ᠢᠨᠢᠶᠡᠮᠰᠦᠭᠯᠡᠪᠡ᠃
ᠨᠥᠬᠥᠷ ᠨᠢ ᠬᠠᠷᠠ ᠦᠦᠷ ᠢ᠋ᠶ᠋ᠡᠷ ᠠᠵᠢᠯ ᠳ᠋ᠤ᠌ ᠪᠠᠨ ᠶᠠᠪᠤᠬᠤ ᠳ᠋ᠤ᠌ ᠳ᠋ᠤᠨᠳᠤᠯᠮᠠ ᠬᠣᠶᠠᠷ ᠬᠡᠦᠬᠡᠳ ᠲᠡᠢ ᠪᠡᠨ ᠤᠨᠲᠠᠭᠰᠠᠭᠠᠷ ᠬᠣᠴᠣᠷᠤᠨᠠ᠃ ᠵᠠᠷᠢᠮ ᠳ᠋ᠤ᠌ ᠪᠠᠨ ᠠᠢᠯ ᠤ᠋ᠨ ᠡᠪᠦᠭᠡᠨ ᠣᠷᠣᠵᠤ ᠢᠷᠡᠭᠡᠳ᠄
— ᠬᠡᠦᠬᠡ ᠪᠣᠰ ᠠ᠋ ᠪᠣᠰ! ᠠᠢᠯ ᠤ᠋ᠨ ᠠᠪᠠᠭᠠᠢ ᠢᠩᠭᠢᠵᠦ ᠶᠡᠬᠡ ᠤᠨᠲᠠᠬᠤ ᠲᠤᠰᠠ ᠦᠭᠡᠢ ᠪᠠᠢᠳᠠᠭ ᠶᠤᠮ ᠭᠡᠨᠡ᠃ ᠲᠡᠭᠦᠨ ᠳ᠋ᠦ᠍ ᠳ᠋ᠤᠨᠳᠤᠯᠮᠠ ᠳᠤᠷᠠᠲᠠᠢ ᠪᠢᠰᠢ᠃《ᠪᠢ ᠡᠨᠡ ᠬᠥᠮᠦᠨ ᠳ᠋ᠦ᠍ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠪᠢᠯᠡ》 ᠭᠡᠰᠡᠨ ᠰᠢᠦ ᠶᠠᠭᠤᠮᠠ ᠪᠣᠳᠣᠨᠠ᠃
ᠵᠢᠯ ᠦ᠋ᠨ ᠡᠮᠦᠨᠡ ᠨᠠᠮᠰᠠᠷᠠᠢ ᠬᠡᠮᠡᠬᠦ ᠡᠨᠡ ᠡᠪᠦᠭᠡᠨ ᠦ᠌ ᠬᠢ ᠬᠠᠰᠢᠶᠠᠨ ᠳ᠋ᠤᠨᠢ ᠪᠠᠭᠤᠵᠤ᠂ ᠵᠢᠵᠢᠭᠬᠡᠨ ᠭᠡᠷ ᠢ᠋ᠶ᠋ᠡᠨ ᠪᠠᠷᠢᠵᠠᠢ᠃
— ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠬᠢ ᠶᠦᠮ᠃ ᠶᠠᠳᠠᠷᠠᠭᠰᠠᠨ ᠠᠮᠢᠲᠠᠨ᠃ ᠠᠢᠯ ᠤ᠋ᠨ ᠬᠠᠰᠢᠶᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠶᠤᠮ᠃ ᠲᠡᠷᠡ ᠬᠠᠰᠢᠶᠠ ᠨᠢ ᠭᠠᠵᠠᠷ ᠲᠤ ᠣᠷᠣᠴᠢᠬᠠᠵᠤ ᠭᠡᠵᠦ ᠨᠥᠬᠥᠷ ᠨᠢ ᠬᠡᠯᠡᠵᠡᠢ᠃ ᠲᠣᠪ ᠬᠢᠭᠰᠡᠨ ᠳᠥᠷᠪᠡᠨ ᠬᠠᠨᠠ ᠲᠠᠢ ᠭᠡᠷ ᠢ᠋ ᠨᠢ ᠪᠠᠷᠢᠯᠴᠠᠵᠤ᠂ ᠰᠦᠷ ᠪᠠᠷᠠ ᠪᠠᠭᠠ ᠲᠠᠢ ᠴᠤ᠌ ᠲᠡᠷᠡ ᠭᠡᠷ ᠲᠦ᠍ ᠪᠡᠨ ᠲᠠᠭᠠᠷᠠᠭᠰᠠᠨ ᠲᠠᠪᠢᠯᠭᠠ ᠶ᠋ᠢ ᠨᠢ ᠵᠠᠰᠠᠯᠴᠠᠪᠠ᠃ ᠨᠠᠮᠰᠠᠷᠠᠢ ᠡᠪᠦᠭᠡᠨ ᠳᠠᠯᠠ ᠬᠦᠷᠦᠭᠰᠡᠨ ᠭᠡᠬᠦ ᠳ᠋ᠦ᠍ ᠰᠦᠷᠡᠬᠡᠢ ᠰᠡᠷᠭᠦᠯᠡᠩ ᠠᠵᠢ᠃ ᠡᠨᠡ ᠪᠦᠬᠦ ᠠᠵᠢᠯ ᠢ᠋ ᠠᠮᠵᠢᠭᠤᠯᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠨ ᠦᠷᠭᠦᠯᠵᠢ ᠨᠢᠭᠡ ᠶ᠋ᠢ ᠶᠠᠷᠢᠵᠤ ᠪᠠᠰᠠ ᠵᠠᠷᠢᠮ ᠳ᠋ᠤ᠌ ᠪᠠᠨ ᠬᠥᠭᠡᠷᠦᠬᠦᠨ ᠱᠣᠭ ᠦᠭᠡ ᠴᠤ᠌ ᠬᠡᠯᠡᠵᠦ ᠪᠠᠢᠯᠠ᠃ ᠲᠡᠷᠡ ᠡᠳᠦᠷ ᠡᠴᠡ ᠡᠬᠢᠯᠡᠨ ᠮᠥᠩᠬᠡ᠂ ᠳ᠋ᠤᠨᠳᠤᠯᠮᠠ ᠬᠣᠶᠠᠷ ᠢ᠋ ᠮᠢᠨᠦ ᠬᠦᠦ ᠥᠬᠢᠨ ᠭᠡᠮᠡᠨ ᠳᠠᠭᠤᠳᠠᠵᠤ᠂ ᠪᠠᠰᠠ ᠬᠣᠶᠠᠷ ᠬᠡᠦᠬᠡᠳ ᠢ᠋ ᠨᠢ《ᠬᠠᠯᠲᠠᠬᠠᠢ ᠨᠤᠭᠤᠳ》 ᠭᠡᠮᠡᠨ ᠥᠬᠥᠭᠡᠷᠳᠡᠨ ᠡᠷᠬᠡᠯᠡᠭᠦᠯᠬᠦ ᠪᠣᠯᠪᠠ᠃ ᠤᠳᠠᠯ ᠦᠭᠡᠢ ᠵᠢᠭᠠᠯ ᠤ᠋ᠳ ᠨᠢ《ᠡᠪᠦᠭᠡ ᠡᠪᠦᠭᠡ》 ᠭᠡᠮᠡᠨ ᠭᠦᠶᠦᠯᠳᠦᠵᠦ ᠵᠢᠭᠠᠬᠠᠨ ᠭᠡᠷ ᠲᠦ᠍ ᠨᠢ ᠱᠤᠯᠤᠭᠠᠨᠠᠯᠳᠤᠨ ᠨᠠᠭᠠᠳᠬᠤ ᠳᠤᠷᠠᠲᠠᠢ ᠪᠣᠯᠤᠯᠠ᠃ ᠮᠥᠩᠬᠡ《ᠰᠠᠢᠬᠠᠨ ᠡᠪᠦᠭᠡᠨ ᠪᠠᠢᠭᠠ ᠶᠤᠮ ᠠ᠋᠃ ᠨᠠᠰᠤᠲᠠᠢ ᠬᠥᠮᠦᠨ ᠬᠡᠦᠬᠡᠳ ᠲᠦ᠍ ᠶᠡᠬᠡ ᠲᠦᠰᠢᠭ ᠲᠡᠢ》 ᠭᠡᠵᠦ ᠠᠪᠠᠭᠠᠢ ᠳ᠋ᠤ᠌ ᠪᠠᠨ ᠶᠠᠷᠢᠨᠠ᠃
ᠳ᠋ᠤᠨᠳᠤᠯᠮᠠ ᠪᠣᠯᠬᠣᠷ ᠦᠷᠭᠦᠯᠵᠢ ᠬᠣᠷᠮᠣᠢ ᠠ᠋ᠴᠠ ᠵᠡᠭᠦᠭᠳᠡᠨ ᠭᠡᠷ ᠲᠦ᠍ ᠤᠶᠠᠵᠤ ᠪᠠᠢᠳᠠᠭ ᠵᠢᠭᠠᠯ ᠤ᠋ᠳ ᠢ᠋ᠶ᠋ᠠᠨ ᠰᠠᠭᠠᠲᠠᠭᠤᠯᠬᠤ ᠬᠥᠮᠦᠨ ᠲᠡᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠣᠯᠵᠠᠭᠤᠷᠬᠠᠨ᠂ ᠳᠡᠯᠭᠡᠭᠦᠷ ᠬᠣᠷᠰᠢᠶᠠ᠂ ᠲᠠᠨᠢᠯ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠠᠭᠠᠵᠢᠭᠤᠬᠠᠨ ᠠᠮᠢᠰᠬᠤᠭᠠ ᠲᠠᠢ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠨᠠᠮᠰᠠᠷᠠᠢ ᠡᠪᠦᠭᠡᠨ ᠦ᠌ ᠴᠢᠰᠤᠨ ᠤ᠋ ᠳᠠᠷᠤᠯᠲᠠ ᠶᠡᠬᠡᠲᠡᠢ ᠪᠣᠯᠪᠠᠴᠤ ᠲᠡᠷᠡ ᠪᠣᠯᠭᠠᠨ ᠬᠡᠪᠲᠡᠭᠡᠳ ᠪᠠᠢᠬᠤ ᠦᠭᠡᠢ᠃ ᠲᠡᠳᠬᠦᠪᠦᠷᠢ ᠶ᠋ᠢᠨ ᠬᠡᠳᠦ ᠪᠡᠷ ᠢ᠋ᠶ᠋ᠡᠨ ᠲᠣᠪᠬᠢᠲᠠᠯᠠ ᠠᠮᠢᠳᠤᠷᠠᠨᠠ᠃ ᠲᠡᠭᠦᠨ ᠢ᠋ᠶ᠋ᠡᠨ ᠠᠪᠤᠭᠰᠠᠨ ᠡᠳᠦᠷ ᠬᠠᠯᠳᠠᠬᠠᠢ ᠨᠤᠭᠤᠳ ᠢ᠋ ᠵᠠᠪᠠᠯ ᠪᠠᠶᠠᠷᠯᠠᠭᠤᠯᠤᠨᠠ᠃ ᠳᠤᠯᠠᠭᠠᠨ ᠴᠠᠭ ᠲᠤ ᠬᠠᠰᠢᠶᠠᠨ ᠤ᠋ ᠭᠠᠳᠠᠨᠠᠬᠢ ᠰᠠᠨᠳᠠᠯᠢ ᠳᠡᠭᠡᠷᠡ ᠪᠣᠳᠣᠯᠭᠠᠰᠢᠷᠠᠨ ᠰᠠᠭᠤᠬᠤ ᠨᠢ ᠣᠯᠠᠨᠲᠠ᠃ ᠤᠯᠠᠷᠢᠯ ᠳ᠋ᠤ᠌ ᠨᠢᠭᠡ ᠤᠳᠠᠭᠠ《ᠮᠠᠭᠤ ᠬᠦᠦ ᠪᠡᠨ ᠡᠷᠭᠢᠭᠡᠳ ᠢᠷᠡᠨᠡ》 ᠭᠡᠮᠡᠨ ᠭᠤᠷᠪᠠ᠂ ᠳᠥᠷᠪᠡᠨ ᠬᠣᠨᠣᠭ ᠢ᠋ᠶ᠋ᠠᠷ ᠠᠯᠠᠭᠠ ᠪᠣᠯᠤᠨᠠ᠃ ᠲᠡᠭᠦᠨ ᠦ᠌ ᠭᠠᠭᠴᠠ ᠬᠦᠦ ᠨᠢ《ᠠᠪᠤ ᠶ᠋ᠢᠨ ᠳ᠋ᠦ᠍》 ᠠᠷᠪᠠᠭᠠᠳ ᠵᠢᠯ ᠰᠠᠭᠤᠵᠤ ᠪᠠᠢᠭᠠ ᠭᠡᠨᠡ᠃ ᠨᠢᠭᠡᠨ ᠪᠠᠶᠠᠷ ᠢ᠋ᠶ᠋ᠠᠷ ᠡᠪᠦᠭᠡᠨ ᠮᠥᠩᠬᠡ ᠶ᠋ᠢᠨ ᠳ᠋ᠦ᠍ ᠬᠣᠭᠣᠯᠠ ᠢᠳᠡᠵᠦ᠂ ᠬᠣᠶᠠᠷ ᠬᠤᠨᠳᠠᠭᠠ ᠠᠷᠢᠬᠢ ᠤᠤᠭᠤᠭᠠᠳ ᠢᠩᠭᠢᠵᠦ ᠶᠠᠷᠢᠵᠠᠢ᠃
— ᠪᠢ ᠴᠤ᠌ ᠵᠠᠶᠠᠭᠠ ᠦᠭᠡᠢ ᠠᠮᠢᠲᠠᠨ ᠳᠠ᠃ ᠤᠤᠯ ᠨᠢ ᠪᠤᠰᠤᠳ ᠲᠤ ᠭᠡᠮ ᠨᠢᠭᠦᠯ ᠬᠢᠭᠡ ᠦᠭᠡᠢ ᠯᠡ ᠶᠤᠮᠰᠠᠨ᠃ ᠭᠡᠲᠡᠯᠡ ᠠᠮᠢᠳᠤᠷᠠᠯ ᠮᠢᠨᠢ ᠥᠭᠡᠳᠡ ᠲᠡᠢ ᠶᠠᠪᠤᠭᠰᠠᠨ ᠦᠭᠡᠢ᠃ ᠴᠡᠷᠢᠭ ᠴᠤᠤᠬᠠ ᠭᠡᠵᠦ ᠶᠠᠪᠤᠭᠰᠠᠭᠠᠷ ᠭᠤᠴᠢ ᠬᠦᠷᠴᠦ ᠭᠡᠷᠯᠡᠭᠰᠡᠨ ᠶᠦᠮ᠃ ᠭᠤᠷᠪᠠᠨ ᠬᠡᠦᠬᠡᠳ ᠭᠠᠷᠤᠭᠰᠠᠨ ᠪᠣᠯᠪᠠᠴᠤ ᠳᠡᠭᠡᠳᠦᠬᠢ ᠬᠣᠶᠠᠷ ᠨᠢ ᠪᠠᠭᠠ ᠳ᠋ᠤ᠌ ᠪᠠᠨ ᠪᠢᠳᠡ ᠬᠣᠶᠠᠷ ᠤ᠋ᠨ ᠢ᠋ᠶ᠋ᠠᠨ ᠡᠯᠢᠭᠡ ᠶ᠋ᠢ ᠬᠠᠷᠠᠯᠠᠭᠤᠯᠵᠤ ᠣᠳᠤᠯᠠ᠃ ᠠᠪᠠᠭᠠᠢ ᠶ᠋ᠢᠨ ᠪᠡᠶᠡ ᠨᠢ ᠥᠭᠡᠳᠡᠯᠡᠬᠦ ᠦᠭᠡᠢ᠃ ᠣᠢᠷᠠ ᠶ᠋ᠢᠨ ᠨᠢᠭᠡ ᠯᠠᠮᠠ ᠪᠠᠷ ᠰᠡᠮᠡᠬᠡᠨ ᠦᠵᠡᠭᠦᠯᠪᠡᠯ ᠄
— ᠨᠤᠲᠤᠭ ᠢ᠋ᠶ᠋ᠠᠨ ᠰᠣᠯᠢᠭᠰᠠᠨ ᠨᠢ ᠳᠡᠭᠡᠷᠡ ᠶᠦᠮ ᠪᠠᠢᠨᠠ ᠭᠡᠳᠡᠭ ᠪᠠᠢᠨᠠ ᠰᠢᠦ᠃
ᠲᠡᠭᠡᠭᠡᠳ ᠳᠥᠴᠢ ᠭᠠᠷᠤᠭᠰᠠᠨ ᠤ᠋ ᠬᠣᠢᠨᠠ ᠪᠠᠨ ᠬᠣᠲᠠ ᠣᠷᠣᠵᠤ ᠢᠷᠡᠭᠰᠡᠨ ᠬᠡᠷᠡᠭ᠃ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠵᠢᠯ ᠬᠢᠵᠦ ᠮᠠᠭᠤ ᠬᠠᠨᠢ᠂ ᠭᠠᠭᠴᠠ ᠬᠦᠦ ᠪᠡᠨ ᠮᠥᠷᠥ ᠪᠦᠲᠦᠨ ᠭᠡᠳᠡᠰᠦ ᠴᠠᠳᠬᠤᠯᠠᠩ ᠯᠠ ᠪᠠᠢᠯᠭᠠᠵᠤ ᠪᠠᠢᠭᠰᠠᠨ ᠳᠠ᠃ ᠭᠡᠲᠡᠯᠡ ᠨᠠᠰᠤᠲᠠᠨ ᠮᠢᠨᠢ ᠠᠷᠪᠠᠨ ᠨᠠᠰᠤᠲᠠᠢ ᠬᠦᠦ ᠪᠢᠳᠡ ᠬᠣᠶᠠᠷ ᠢ᠋ ᠦᠯᠡᠳᠡᠭᠡᠭᠡᠳ ᠬᠣᠷᠸᠠ ᠠ᠋ᠴᠠ ᠬᠠᠯᠢᠯᠠ᠃
ᠳᠡᠪᠡᠯ ᠦ᠋ᠨ ᠭᠣᠣᠯ ᠪᠣᠯᠤᠭᠰᠠᠨ ᠪᠢ ᠦᠬᠦᠭᠰᠡᠨ ᠡᠴᠡ ᠦᠯᠡᠳᠡᠭᠰᠡᠨ ᠭᠠᠭᠴᠠ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ ᠯᠡ ᠠᠮᠢᠳᠤ ᠶᠠᠪᠤᠵᠤ ᠪᠠᠢᠭᠰᠠᠨ ᠳᠠ᠃ ᠬᠦᠦ ᠪᠡᠨ ᠳᠠᠩᠴᠤ ᠡᠷᠬᠡ ᠥᠰᠬᠡᠭᠰᠡᠨ ᠳ᠋ᠦ᠍ ᠪᠡᠨ ᠣᠳᠣ ᠥᠭᠢᠷᠡ ᠲᠣᠯᠣᠭᠠᠢ ᠪᠠᠨ ᠰᠢᠭᠠᠵᠤ ᠰᠠᠭᠤᠬᠤ ᠶᠤᠮ᠃ ᠬᠦᠦ ᠮᠢᠨᠢ ᠪᠦᠲᠦᠯ ᠦᠭᠡᠢ ᠬᠥᠮᠦᠰ ᠲᠡᠢ ᠨᠡᠢᠯᠡᠵᠦ᠂ ᠡᠯᠳᠡᠪ ᠬᠡᠷᠡᠭ ᠬᠢᠵᠦ ᠶᠠᠪᠤᠭᠰᠠᠨ ᠢ᠋ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ ᠪᠢᠯᠡ᠃
ᠦᠷᠡ ᠳ᠋ᠦ᠍ ᠪᠡᠨ ᠢᠲᠡᠭᠡᠭᠰᠡᠨ ᠡᠴᠢᠭᠡ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠬᠠᠷᠠᠳᠠᠵᠤ ᠰᠡᠷᠡᠳᠡᠬᠦ ᠶ᠋ᠢᠨ ᠵᠠᠢ ᠴᠤ᠌ ᠪᠠᠢᠳᠠᠭ ᠦᠭᠡᠢ ᠶᠤᠮᠰᠠᠨᠵᠠᠢ᠃ ᠮᠥᠩᠭᠥ ᠰᠠᠩᠭᠠ ᠶᠡᠬᠡᠲᠡᠢ ᠶᠠᠪᠤᠳᠠᠭ ᠪᠠᠢᠪᠠ᠃ ᠬᠠᠶᠠ ᠰᠣᠭᠲᠣᠭᠤ ᠬᠥᠯᠴᠥᠭᠦᠦ ᠴᠤ᠌ ᠢᠷᠡᠨᠡ᠃ ᠨᠥᠬᠥᠳ ᠣᠯᠠᠨ ᠲᠠᠢ ᠪᠣᠯᠵᠤ ᠪᠠᠢᠪᠠ᠃ ᠪᠢ《ᠠᠵᠢᠯ ᠬᠢᠵᠦ ᠪᠠᠢᠭᠠ ᠬᠥᠮᠦᠨ ᠢᠩᠭᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ》 ᠭᠡᠵᠦ ᠯᠡ ᠪᠣᠳᠣᠳᠠᠭ ᠪᠠᠢᠯᠠ᠃ ᠮᠢᠨᠦ ᠬᠦᠦ ᠪᠠᠷᠢᠯᠭᠠ ᠳ᠋ᠤ᠌ ᠠᠵᠢᠯᠯᠠᠵᠤ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠡᠲᠡᠯᠡ ᠬᠣᠷᠢᠨ ᠲᠠᠪᠤᠨ ᠤ᠋ ᠪᠠᠨ ᠵᠢᠯ ᠳᠡᠭᠡᠷᠡ ᠬᠡᠷᠡᠭ ᠲᠦ᠍ ᠣᠷᠣᠵᠤ᠂ ᠠᠷᠪᠠᠨ ᠲᠠᠪᠤᠨ ᠵᠢᠯ ᠠᠪᠴᠢᠬᠠᠳᠠᠭ ᠶᠤᠮ ᠪᠠᠢᠨᠠ᠃ ᠠᠵᠢᠯ ᠠ᠋ᠴᠠ ᠪᠠᠨ ᠭᠠᠷᠤᠭᠠᠳ ᠵᠢᠯ ᠭᠠᠷᠤᠢ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ᠃ ᠪᠢ ᠳᠠᠩᠴᠤ ᠬᠣᠵᠢᠭᠤ ᠮᠡᠳᠡᠭᠰᠡᠨ ᠠᠮᠢᠲᠠᠨ᠃ ᠣᠳᠣ ᠴᠤ᠌ ᠰᠤᠯᠠᠯᠠᠭᠳᠠᠬᠤ ᠳᠥᠭᠥᠵᠦ ᠯᠡ ᠪᠠᠢᠨᠠ ᠳᠠ᠃ ᠪᠢ ᠯᠡ ᠠᠮᠢᠳᠤ ᠪᠠᠢᠵᠤ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠶᠠᠷ ᠢ᠋ ᠬᠤᠪᠢᠶᠠᠯᠴᠠᠬᠤ ᠶᠤᠮᠰᠠᠨ ᠭᠡᠰᠡᠨ ᠪᠢᠯᠡ᠃ ᠲᠡᠷᠡ ᠣᠷᠣᠢ ᠳ᠋ᠤᠨᠳᠤᠯᠮᠠ ᠮᠥᠩᠬᠡ ᠡᠴᠡ ᠪᠡᠨ᠄
— ᠬᠦᠦ ᠨᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ ᠭᠡᠪᠡᠯ
— ᠣᠯᠠᠨ ᠳᠠᠬᠢᠨ ᠳᠠᠪᠲᠠᠭᠰᠠᠨ ᠪᠦᠯᠦᠭ ᠳᠡᠭᠡᠷᠡᠮ ᠦ᠋ᠨ ᠬᠡᠷᠡᠭ ᠶᠦᠮ ᠭᠡᠰᠡᠨ ᠰᠢᠦ ᠭᠡᠵᠡᠢ᠃
ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠨᠢᠭᠡ ᠡᠳᠦᠷ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠷᠣᠲᠠᠯᠠ ᠡᠪᠦᠭᠡᠨ ᠣᠷᠣᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠭᠠᠳ᠂ ᠲᠣᠮᠣ ᠰᠢᠷᠠ ᠬᠠᠳᠠᠭ ᠳᠡᠯᠭᠡᠨ ᠨᠢᠭᠡ ᠶᠠᠭᠤᠮᠠ ᠦᠵᠡᠵᠦ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠳᠤᠷᠤᠨ ᠬᠤᠮᠢᠵᠤ ᠳᠡᠷᠡ ᠶ᠋ᠢᠨ ᠳᠣᠣᠭᠤᠷ ᠢ᠋ᠶ᠋ᠠᠨ ᠬᠢᠬᠦ ᠶ᠋ᠢ ᠳ᠋ᠤᠨᠳᠤᠯᠮᠠ ᠬᠠᠯᠲᠤ ᠬᠠᠷᠠᠵᠠᠢ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ《ᠡᠪᠦᠭᠡᠨ ᠬᠠᠳᠠᠭᠠᠯᠠᠭᠰᠠᠨ ᠮᠥᠩᠭᠥ ᠶᠦᠮ ᠤᠤ᠂ ᠦᠨᠡᠲᠦ ᠡᠳ᠋ᠯᠡᠯ ᠢ᠋ᠶ᠋ᠡᠨ ᠦᠵᠡᠵᠦ ᠪᠠᠢᠬᠤ ᠳ᠋ᠤᠨᠢ ᠣᠷᠣᠴᠢᠬᠠᠵᠤ᠂ ᠲᠡᠭᠦᠨ ᠡᠴᠡ ᠪᠢᠰᠢ ᠶᠠᠭᠤᠨ ᠳ᠋ᠤ᠌ ᠲᠡᠭᠡᠲᠡᠯᠡ ᠰᠠᠨᠳᠤᠷᠤᠨ ᠨᠢᠭᠤᠬᠤ ᠪᠣᠯᠪᠠ》 ᠭᠡᠵᠦ ᠪᠣᠳᠣᠬᠤ ᠪᠣᠯᠪᠠ᠃
— ᠮᠠᠨ ᠤ᠋ ᠡᠪᠦᠭᠡᠨ ᠶᠡᠬᠡ ᠮᠥᠩᠭᠥ ᠲᠡᠢ ᠪᠠᠢᠬᠠ ᠠ᠋ ᠭᠡᠵᠦ ᠮᠥᠩᠬᠡ ᠳ᠋ᠦ᠍ ᠪᠡᠨ ᠶᠠᠷᠢᠪᠠᠯ᠂
— ᠵᠠ ᠶᠠᠭᠤ ᠯᠠ ᠪᠠᠢᠳᠠᠭ ᠶᠤᠮ᠂ ᠶᠠᠳᠠᠷᠠᠭᠰᠠᠨ ᠠᠮᠢᠲᠠᠨ ᠭᠡᠪᠡ᠃
— ᠮᠥᠩᠭᠥ ᠪᠠᠭᠠ ᠲᠠᠢ ᠪᠠᠢᠯᠠ ᠴᠤ᠌ ᠬᠠᠲᠠᠭᠤ ᠡᠳ᠋ᠯᠡᠯ ᠯᠠᠪ ᠪᠣᠢ ᠭᠡᠪᠡᠯ᠂
— ᠪᠠᠢᠪᠠᠯ ᠪᠠᠢᠭᠠ ᠯᠠ ᠪᠢᠵᠡ᠃ ᠴᠢᠮᠠ ᠳ᠋ᠤ᠌ ᠶᠠᠮᠠᠷ ᠬᠠᠮᠢᠭᠠ ᠲᠠᠢ ᠶᠤᠮ ᠪᠣᠢ ᠭᠡᠵᠦ ᠴᠠᠭᠠᠳᠤᠬᠢ ᠨᠢ ᠤᠴᠠᠭᠠᠷᠯᠠᠵᠠᠢ᠃
ᠳ᠋ᠤᠨᠳᠤᠯᠮᠠ ᠤᠬᠢᠶᠠᠳᠠᠰᠤ ᠠᠰᠬᠠᠬᠤ ᠪᠠᠷ ᠳᠠᠬᠢᠨ ᠭᠠᠷᠬᠤ ᠳ᠋ᠤ᠌ ᠡᠪᠦᠭᠡᠨ ᠪᠣᠰᠤᠭᠠ ᠦᠭᠡᠢ ᠯᠡ ᠪᠣᠯᠤᠯᠲᠠᠢ᠂ ᠡᠷᠦᠬᠡ ᠨᠢ ᠪᠦᠲᠡᠭᠡᠯᠭᠡᠰᠦ ᠲᠡᠢ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ᠃ ᠶᠠᠭᠠᠬᠢᠭᠠᠳ ᠣᠳᠣ ᠪᠣᠯᠲᠠᠯᠠ ᠪᠣᠰᠳᠠᠭ ᠦᠭᠡᠢ ᠶᠦᠮ ᠪᠣᠯ ᠪᠡᠶᠡ ᠨᠢ ᠵᠦᠭᠡᠷ ᠪᠠᠢᠭᠠ ᠳᠠ》 ᠭᠡᠵᠦ ᠪᠣᠳᠣᠭᠠᠳ ᠡᠷᠦᠬᠡ ᠶ᠋ᠢ ᠨᠢ ᠲᠠᠲᠠᠴᠢᠬᠠᠭᠠᠳ ᠭᠠᠯ ᠢ᠋ ᠨᠢ ᠲᠦᠯᠡᠬᠦ ᠪᠡᠷ ᠢ᠋ᠶ᠋ᠡᠷ ᠭᠡᠷ ᠲᠦ᠋ᠨᠢ ᠣᠷᠣᠪᠠ᠃ ᠡᠪᠦᠭᠡᠨ ᠥᠨᠥᠬᠢ ᠰᠢᠷᠠ ᠬᠠᠳᠠᠭ ᠢ᠋ᠶ᠋ᠠᠨ ᠨᠢᠭᠤᠷ ᠳᠡᠭᠡᠷᠡ ᠪᠡᠨ ᠪᠠᠷᠢᠭᠠᠳ ᠲᠠᠭ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠨᠠ᠃
ᠳ᠋ᠤᠨᠳᠤᠯᠮᠠ ᠳ᠋ᠤ᠌ ᠨᠢᠭᠡ ᠯᠡ ᠬᠠᠴᠢᠨ ᠰᠠᠨᠠᠭᠳᠠᠭᠠᠳ《ᠡᠪᠦᠭᠡ》 ᠭᠡᠵᠦ ᠴᠡᠴᠡᠷᠬᠢᠯᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠬᠣᠶᠠᠷ ᠳᠠᠬᠢᠨ ᠳᠠᠭᠤᠳᠠᠪᠠ᠃ ᠭᠡᠨᠡᠳᠲᠡ ᠠᠢᠳᠠᠰ ᠬᠦᠷᠦᠭᠰᠡᠨ ᠪᠣᠯᠪᠠᠴᠤ《ᠠᠷᠠᠢ ᠦᠭᠡᠢ ᠪᠠᠢᠬᠤ》 ᠭᠡᠵᠦ ᠪᠣᠳᠣᠨ ᠠᠶᠠᠷᠬᠠᠨ ᠳᠥᠭᠥᠭᠡᠳ ᠳᠤᠬᠤ ᠶ᠋ᠢ ᠨᠢ ᠳᠠᠷᠤᠵᠤ ᠦᠵᠡᠪᠡᠯ ᠴᠠᠪ ᠬᠦᠢᠲᠡᠨ᠃ ᠨᠠᠮᠰᠠᠷᠠᠢ ᠡᠪᠦᠭᠡ ᠠᠯᠢ ᠡᠷᠲᠡ ᠠᠮᠢᠰᠬᠤᠯ ᠬᠤᠷᠢᠶᠠᠭᠰᠠᠨ ᠢ᠋ ᠨᠢ ᠰᠠᠶᠢ ᠯᠠ ᠤᠬᠠᠭᠠᠷᠠᠵᠤ ᠶᠠᠭᠠᠷᠠᠨ ᠭᠠᠷᠤᠯᠠ᠃ ᠭᠡᠷ ᠲᠦ᠍ ᠪᠡᠨ ᠣᠷᠣᠭᠠᠳ《ᠣᠳᠣ ᠶᠠᠭᠠᠬᠢᠬᠤ ᠪᠣᠢ》 ᠭᠡᠵᠦ ᠪᠣᠳᠣᠩᠭᠤᠲᠠ ᠥᠨᠥᠬᠢ ᠰᠢᠷᠠ ᠬᠠᠳᠠᠭ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠ᠃
ᠳ᠋ᠤᠨᠳᠤᠯᠮᠠ《ᠠᠮᠢᠲᠠᠨ ᠬᠥᠮᠦᠨ ᠳ᠋ᠦ᠍ ᠳᠣᠭᠣᠯᠭᠠᠬᠤ ᠠ᠋ᠴᠠ ᠡᠮᠦᠨᠡ ᠲᠡᠭᠦᠨ ᠢ᠋ ᠦᠵᠡᠬᠦ ᠬᠡᠷᠡᠭᠲᠡᠢ》 ᠭᠡᠵᠦ ᠪᠣᠳᠣᠨ᠂ ᠪᠦᠰᠡ ᠪᠡᠨ ᠪᠦᠰᠡᠯᠡᠭᠡᠳ ᠡᠷᠭᠢᠵᠦ ᠭᠠᠷᠤᠯᠠ᠃ ᠵᠣᠷᠢᠭ ᠢ᠋ᠶ᠋ᠠᠨ ᠴᠢᠩᠭᠠᠯᠠᠨ ᠪᠠᠢᠵᠤ ᠡᠪᠦᠭᠡᠨ ᠦ᠌ ᠭᠡᠷ ᠲᠦ᠍ ᠣᠷᠣᠭᠠᠳ᠂ ᠭᠡᠲᠡᠬᠦ ᠮᠡᠲᠦ ᠠᠶᠠᠷᠬᠠᠨ ᠳᠥᠭᠥᠭᠰᠡᠭᠡᠷ ᠣᠷᠣᠨ ᠤ᠋ ᠬᠢᠨᠢ ᠡᠮᠦᠨᠡ ᠵᠣᠭᠰᠣᠪᠠ᠃ ᠲᠡᠭᠡᠭᠡᠳ ᠬᠠᠳᠠᠭ ᠢ᠋ᠶ᠋ᠠᠨ ᠳᠠᠷᠤᠵᠤ ᠬᠥᠰᠢᠭᠰᠡᠨ ᠴᠠᠪ ᠬᠦᠢᠲᠡᠨ ᠭᠠᠷ ᠢ᠋ ᠨᠢ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠷᠠᠢᠬᠠᠨ ᠬᠥᠨᠳᠡᠢᠷᠡᠭᠦᠯᠵᠦ᠂ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠭᠤ ᠣᠢᠴᠢᠬᠤ ᠪᠣᠯ ᠭᠡᠰᠡᠨ ᠮᠡᠲᠦ ᠪᠣᠯᠭᠣᠮᠵᠢᠯᠠᠨ ᠬᠠᠳᠠᠭ ᠢ᠋ ᠠᠪᠲᠠᠯᠠ ᠡᠪᠦᠭᠡᠨ ᠦ᠌ ᠠᠮᠠ ᠬᠠᠮᠠᠷ ᠳᠡᠭᠡᠷᠡ ᠬᠡᠰᠡᠭᠬᠡᠨ ᠬᠠᠯᠢᠭᠤᠨ ᠦᠰᠦ ᠦᠯᠡᠳᠡᠬᠦ ᠳ᠋ᠦ᠍ ᠬᠡᠦᠬᠡᠨ ᠦ᠌ ᠰᠣᠴᠢᠵᠤ ᠲᠣᠮᠣᠷᠠᠭᠰᠠᠨ ᠬᠠᠷᠠ ᠨᠢᠳᠦ ᠲᠡᠷᠡ ᠴᠢᠭ ᠲᠦ᠍ ᠪᠡᠨ ᠭᠥᠯᠢᠷᠡᠴᠢᠬᠡᠪᠡ᠃
ᠵᠥᠭᠡᠯᠡᠨ ᠳᠣᠯᠭᠢᠶᠠᠯᠢᠭ ᠬᠡᠳᠦᠨ ᠲᠤᠭ ᠦᠰᠦ᠃ ᠳᠠᠭᠠᠬᠢ! ᠬᠡᠦᠬᠡᠳ ᠦ᠋ᠨ ᠳᠠᠭᠠᠬᠢ ᠠᠵᠠᠢ᠃ ᠡᠪᠦᠭᠡᠨ ᠰᠡᠭᠦᠯᠴᠢ ᠶ᠋ᠢᠨ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠯᠬᠠ ᠶ᠋ᠢᠨ ᠰᠡᠪᠡᠯᠭᠡ ᠶ᠋ᠢ ᠦᠨᠦᠷᠯᠡᠭᠰᠡᠨ ᠨᠢ ᠲᠡᠷᠡ ᠪᠠᠢᠵᠤ᠃ ᠬᠥᠭᠡᠷᠦᠬᠦᠢ ᠡᠴᠢᠭᠡ!
ᠢᠷᠡᠯᠲᠡ᠄ ᠯ ᠲᠦᠳᠦᠪ ᠨᠠᠷ ᠤ᠋ᠨ
《ᠤᠳᠬᠠ ᠶ᠋ᠢᠨ ᠴᠢᠮᠡᠭ》 ᠨᠣᠮ ᠤ᠋ᠨ ᠫ · ᠫᠦᠷᠪᠦᠰᠥ᠋ᠷᠦᠩ ᠦ᠋ᠨ 《ᠡᠴᠢᠭᠡ》 ᠭᠡᠬᠦ
ᠥᠭᠦᠯᠡᠯᠭᠡ ᠡᠴᠡ ᠰᠡᠢᠷᠡᠭᠦᠯᠪᠡ᠃
ᠭᠠᠭᠴᠠᠬᠠᠨ ᠠᠭᠤᠯᠵᠠᠭᠠᠳ ᠲᠡᠪᠡᠷᠢᠭᠦᠯᠬᠦ ᠰᠠᠨ
ᠦᠭᠡ᠄ ᠪᠡ᠊· ᠪᠠᠲᠤᠰᠦ᠋ᠬᠡ
ᠠᠶᠠ᠄ ᠪᠡ᠊ ᠫᠦᠷᠪᠦᠰᠦ᠋ᠷᠦᠩ
ᠳᠠᠭᠤᠴᠢᠨ᠄ ᠯ ᠪᠠᠨᠽᠠᠷᠠᠭᠴᠢ
ᠰᠠᠢᠬᠠᠨ ᠠᠪᠤ ᠶ᠋ᠢ ᠪᠡᠨ ᠰᠠᠨᠠᠭᠠᠳ ᠯᠠ ᠠᠰᠬᠠᠷᠠᠲᠠᠯᠠ ᠤᠬᠢᠯᠠᠳᠠᠭ ᠳᠠ
ᠰᠠᠭᠠᠬᠠᠯᠲᠠ ᠶ᠋ᠢᠨ ᠴᠠᠭᠠᠨᠠ ᠠ᠋ᠴᠠ ᠬᠦᠯᠢᠶᠡᠵᠦ ᠤᠳᠠᠭᠠᠨ
ᠵᠣᠭᠰᠣᠳᠠᠭ ᠳᠠ
ᠡᠵᠡᠨ ᠦᠭᠡᠢ ᠦᠯᠡᠳᠡᠭᠰᠡᠨ
ᠳᠡᠪᠡᠯ ᠢ᠋ ᠨᠢ
ᠨᠥᠮᠥᠷᠦᠭᠡᠳ ᠰᠠᠭᠤᠬᠤ ᠪᠠᠷ ᠲᠠᠢᠪᠤᠰᠢᠷᠠᠬᠤ ᠶᠤᠮ
ᠡᠯᠡᠰᠦᠲᠦ ᠮᠠᠩᠬᠠᠨ ᠤ᠋
ᠦᠵᠦᠭᠦᠷ ᠡᠴᠡ ᠠᠯᠬᠤᠭᠠᠳ ᠢᠷᠡᠳᠡᠭ ᠴᠦ᠍ ᠪᠣᠯᠤᠭᠠᠰᠠᠢ
ᠠᠪᠤ ᠳ᠋ᠤ᠌ ᠪᠠᠨ ᠵᠢᠮᠡᠯᠡᠭᠦᠯᠦᠭᠰᠡᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠡᠳᠬᠢᠯ ᠤᠶᠠᠰᠠᠭᠠᠳ ᠪᠣᠯᠬᠤ ᠦᠭᠡᠢ ᠨᠢ ᠠ᠋
ᠠᠬᠢᠭᠠᠳ ᠭᠠᠭᠴᠠᠬᠠᠨ ᠠᠭᠤᠯᠵᠠᠪᠠᠯ
ᠬᠦᠦ ᠴᠢᠨᠢ ᠲᠠᠨ ᠢ᠋ ᠪᠡᠨ ᠲᠡᠪᠡᠷᠢᠮᠡᠷ ᠪᠠᠢᠨᠠ
ᠬᠠᠢᠷᠠᠲᠠᠢ ᠠᠪᠤ ᠶ᠋ᠢ ᠪᠡᠨ ᠳᠤᠷᠠᠰᠤᠭᠠᠳ ᠯᠠ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠳᠠᠭ ᠳᠠ
ᠬᠠᠴᠢᠨ ᠶᠡᠬᠡ ᠪᠡᠷ ᠰᠠᠨᠠᠭᠠᠰᠢᠷᠠᠨ ᠨᠡᠷᠡ ᠶ᠋ᠢ ᠨᠢ ᠳᠠᠭᠤᠳᠠᠳᠠᠭ ᠳᠠ ᠡᠪᠬᠡᠭᠡᠳ ᠣᠷᠬᠢᠭᠰᠠᠨ
ᠪᠦᠰᠡ ᠶ᠋ᠢ ᠨᠢ ᠳᠡᠷᠡᠯᠡᠭᠡᠳ ᠤᠨᠲᠠᠬᠤ ᠪᠠᠷ ᠠᠭᠤᠵᠢᠷᠠᠬᠤ ᠶᠤᠮ
ᠡᠵᠢ ᠶ᠋ᠢᠨ ᠮᠢᠨᠢ ᠴᠠᠢ ᠶ᠋ᠢ
ᠤᠤᠭᠤᠬᠤ ᠪᠠᠷ ᠡᠷᠭᠢᠭᠡᠳ ᠢᠷᠡᠳᠡᠭ ᠴᠦ᠍ ᠪᠣᠯᠤᠭᠠᠰᠠᠢ
ᠠᠪᠤ ᠳ᠋ᠤ᠌ ᠪᠠᠨ ᠵᠢᠮᠡᠯᠡᠭᠦᠯᠦᠭᠰᠡᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠡᠳᠬᠢᠯ ᠤᠶᠠᠰᠠᠭᠠᠳ
ᠪᠣᠯᠬᠤ ᠦᠭᠡᠢ ᠨᠢ ᠠ᠋
ᠠᠬᠢᠭᠠᠳ ᠭᠠᠭᠴᠠᠬᠠᠨ ᠠᠭᠤᠯᠵᠠᠪᠠᠯ
ᠬᠦᠦ ᠴᠢᠨᠢ ᠲᠠᠨ ᠢ᠋ ᠪᠡᠨ ᠲᠡᠪᠡᠷᠢᠮᠡᠷ ᠪᠠᠢᠨᠠ
ᠵᠦᠢᠳᠡᠯ ᠦᠭᠡᠢ ᠲᠡᠭᠷᠢ ᠶ᠋ᠢᠨ ᠠᠭᠤᠳᠠᠮ ᠳ᠋ᠠᠬᠢ ᠣᠳᠣᠳ ᠤ᠋ᠨ ᠴᠢᠭᠤᠯᠭᠠᠨ ᠠ᠋ᠴᠠ
ᠵᠡᠭᠦᠳᠦᠨ ᠳ᠋ᠦ᠍ ᠬᠦᠦ ᠳ᠋ᠦ᠍ ᠪᠡᠨ ᠢᠷᠡᠨᠡ ᠭᠡᠵᠦ ᠮᠠᠨᠠᠵᠤ
ᠬᠣᠨᠣᠳᠠᠭ ᠳᠠ
ᠨᠤᠲᠤᠭ ᠤ᠋ᠨ ᠪᠤᠭᠤᠷᠤᠯ ᠬᠥᠭᠰᠢᠴᠦᠦᠯ ᠠᠳᠠᠯᠢᠬᠠᠨ ᠬᠠᠷᠠᠭᠳᠠᠭᠠᠳ ᠰᠡᠮᠡᠷᠡᠬᠦ ᠶᠦᠮ
ᠨᠢᠷᠤᠭᠤ ᠲᠠᠢ ᠶᠠᠪᠤᠭᠰᠠᠨ
ᠠᠪᠤ ᠮᠢᠨᠢ ᠲᠣᠰᠤᠭᠠᠳ
ᠢᠷᠡᠳᠡᠭ ᠴᠦ᠍ ᠪᠣᠯᠤᠭᠠᠰᠠᠢ
ᠠᠪᠤ ᠳ᠋ᠤ᠌ ᠪᠠᠨ ᠵᠢᠮᠡᠯᠡᠭᠦᠯᠦᠭᠰᠡᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠡᠳᠬᠢᠯ ᠪᠣᠯᠬᠤ ᠦᠭᠡᠢ ᠨᠢ ᠠ᠋
ᠠᠬᠢᠭᠠᠳ ᠭᠠᠭᠴᠠᠬᠠᠨ ᠠᠭᠤᠯᠵᠠᠪᠠᠯ
ᠬᠦᠦ ᠴᠢᠨᠢ ᠲᠠᠨ ᠢ᠋ ᠪᠡᠨ ᠲᠡᠪᠡᠷᠢᠮᠡᠷ ᠪᠠᠢᠨᠠ
ᠠᠪᠤ ᠳ᠋ᠤ᠌ ᠪᠠᠨ ᠵᠢᠮᠡᠯᠡᠭᠦᠯᠦᠭᠰᠡᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠡᠳᠬᠢᠯ ᠤᠶᠠᠰᠤᠭᠠᠳ ᠪᠣᠯᠬᠤ ᠦᠭᠡᠢ ᠨᠢ ᠠ᠋
ᠠᠬᠢᠭᠠᠳ ᠭᠠᠭᠴᠠᠬᠠᠨ ᠠᠭᠤᠯᠵᠠᠪᠠᠯ
ᠬᠦᠦ ᠴᠢᠨᠢ ᠲᠠᠨ ᠢ᠋ ᠪᠡᠨ
ᠲᠡᠪᠡᠷᠢᠮᠡᠷ ᠪᠠᠢᠨᠠ
ᠬᠦᠦ ᠴᠢᠨᠢ ᠲᠠᠨ ᠢ᠋ ᠪᠡᠨ
ᠲᠡᠪᠡᠷᠢᠮᠡᠷ ᠪᠠᠢᠨᠠ
ᠠᠪᠤ ᠳ᠋ᠤ᠌ ᠪᠠᠨ ᠵᠢᠮᠡᠯᠡᠭᠦᠯᠦᠭᠰᠡᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠡᠳᠬᠢᠯ ᠪᠣᠯᠬᠤ ᠦᠭᠡᠢ ᠨᠢ ᠠ᠋
ᠠᠬᠢᠭᠠᠳ ᠭᠠᠭᠴᠠᠬᠠᠨ ᠠᠭᠤᠯᠵᠠᠪᠠᠯ
ᠬᠦᠦ ᠴᠢᠨᠢ ᠲᠠᠨ ᠢ᠋ ᠪᠡᠨ ᠲᠡᠪᠡᠷᠢᠮᠡᠷ ᠪᠠᠢᠨᠠ
ᠠᠪᠤ ᠳ᠋ᠤ᠌ ᠪᠠᠨ ᠵᠢᠮᠡᠯᠡᠭᠦᠯᠦᠭᠰᠡᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠡᠳᠬᠢᠯ ᠤᠶᠠᠰᠤᠭᠠᠳ ᠪᠣᠯᠬᠤ ᠦᠭᠡᠢ ᠨᠢ ᠠ᠋
ᠠᠬᠢᠭᠠᠳ ᠭᠠᠭᠴᠠᠬᠠᠨ ᠠᠭᠤᠯᠵᠠᠪᠠᠯ
ᠬᠦᠦ ᠴᠢᠨᠢ ᠲᠠᠨ ᠢ᠋ ᠪᠡᠨ
ᠲᠡᠪᠡᠷᠢᠮᠡᠷ ᠪᠠᠢᠨᠠ
ᠬᠦᠦ ᠴᠢᠨᠢ ᠲᠠᠨ ᠢ᠋ ᠪᠡᠨ
ᠲᠡᠪᠡᠷᠢᠮᠡᠷ ᠪᠠᠢᠨᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠴᠢ · ᠤᠷᠠᠨᠴᠡᠴᠡᠭ
ᠬᠢᠨᠠᠯᠲᠠ ᠄ ᠮᠥᠴᠢᠷ᠂ ᠢᠷᠡᠭᠡᠳᠦᠢ᠂ ᠭᠠᠷᠮᠠ