ᠬᠡᠢ ᠦᠵᠡᠭᠳᠡᠯ - ᠸᠠᠴᠢᠷᠪᠠᠲᠤ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Хий үзэгдэл - Очирбатын Дашбалбар
575ᠬᠡᠢ ᠦᠵᠡᠭᠳᠡᠯ
ᠴᠠᠰᠤ ᠪᠤᠳᠠᠷᠠᠭᠠᠨ ᠳᠠᠪᠬᠢᠨᠠ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌᠁
ᠦᠶᠡ ᠦᠶᠡ ᠣᠯᠠᠨ ᠮᠣᠷᠢᠳ ᠤ᠋ᠨ ᠲᠦᠪᠡᠷᠭᠡᠨ
ᠦᠯᠦ ᠦᠵᠡᠭᠳᠡᠬᠦ ᠬᠥᠮᠦᠰ ᠦ᠋ᠨ ᠬᠠᠰᠬᠢᠷᠤᠯᠳᠤᠭᠠᠨ᠁
《ᠡᠷᠲᠡᠨ ᠦ᠌ ᠾᠦᠩᠨᠦ ᠶ᠋ᠢᠨ ᠪᠠᠭᠠᠲᠤᠷ ᠤ᠋ᠳ ᠤ᠋ᠨ ᠰᠦᠨᠡᠰᠦ
ᠡᠨᠡ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠡᠭᠦᠷᠢᠳᠡ ᠬᠣᠷᠭᠣᠳᠠᠵᠤ
ᠮᠢᠩᠭᠠᠨ ᠵᠢᠯ ᠢ᠋ᠶ᠋ᠡᠷ ᠲᠤᠯᠤᠯᠳᠤᠵᠤ ᠪᠣᠢ 》ᠭᠡᠵᠦ
ᠮᠠᠨᠠᠨᠲᠤ ᠰᠥᠨᠢ ᠡᠮᠧ ᠮᠢᠨᠢ ᠥᠭᠦᠯᠡᠨᠡ᠃
ᠣᠷᠣᠨ ᠭᠡᠷ ᠦᠭᠡᠢ ᠴᠠᠭᠠᠨ ᠮᠣᠷᠢᠲᠠᠢ ᠬᠥᠮᠦᠨ
ᠣᠭᠣᠴᠢᠬᠤ ᠠᠶᠠᠭᠠ ᠦᠭᠡᠢ ᠴᠠᠭᠠᠨ ᠮᠣᠷᠢᠲᠠᠢ ᠬᠥᠮᠦᠨ
ᠤᠭᠤᠷᠴᠠᠭ ᠲᠤᠯᠤᠭᠠᠳ ᠤ᠋ᠨ ᠳᠤᠮᠳᠠᠭᠤᠷ ᠳᠠᠪᠬᠢᠵᠤ
ᠣᠨ ᠵᠢᠯ ᠮᠣᠷᠢᠨ ᠲᠦᠪᠡᠷᠭᠡᠨ ᠤᠷᠤᠰᠤᠨᠠ᠃
ᠡᠬᠡ ᠨᠤᠲᠤᠭ ᠤ᠋ᠨ ᠮᠢᠨᠢ ᠰᠥᠨᠢ ᠶ᠋ᠢᠨ ᠵᠡᠷᠭᠡᠯᠭᠡᠨ ᠳ᠋ᠦ᠍
ᠡᠯᠳᠡᠪ ᠵᠦᠢᠯ ᠦ᠋ᠨ ᠦᠵᠡᠭᠳᠡᠯ ᠪᠣᠢ᠁
ᠦᠦᠷ ᠰᠥᠨᠢ ᠪᠡᠷ ᠣᠯᠠᠨ ᠡᠷᠡᠰ ᠬᠠᠰᠬᠢᠷᠤᠯᠳᠤᠵᠤ
ᠦᠯᠦ ᠦᠵᠡᠭᠳᠡᠬᠦ ᠮᠣᠷᠢᠨ ᠲᠦᠪᠡᠷᠭᠡᠨ᠁
ᠡᠵᠡᠨ ᠦᠭᠡᠢ ᠲᠠᠯᠠ ᠳ᠋ᠤ᠌ ᠨᠢ ᠬᠣᠲᠠ ᠰᠠᠭᠤᠷᠢᠨ ᠪᠦᠷᠦᠯᠵᠡᠵᠦ
ᠡᠮᠡᠭᠲᠡᠢ ᠬᠥᠮᠦᠨ ᠰᠥᠳᠡᠢᠨ ᠶᠠᠪᠤᠬᠤ ᠦᠵᠡᠭᠳᠡᠨᠡ
ᠣᠴᠢᠭᠠᠳ ᠦᠵᠡᠬᠦ ᠪᠡᠷ ᠬᠣᠲᠠ ᠰᠠᠭᠤᠷᠢᠨ ᠵᠠᠮᠬᠠᠷᠠᠵᠤ
ᠣᠷᠣ ᠦᠭᠡᠢ ᠬᠣᠭᠣᠰᠣᠨ ᠳ᠋ᠤ᠌ ᠪᠦᠰᠡᠭᠦᠢ ᠶ᠋ᠢᠨ ᠳᠦᠷᠰᠦ ᠠᠭᠤᠰᠤᠨᠠ
ᠴᠠᠭᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠬᠡᠭᠡᠷᠡ ᠲᠠᠯᠠ ᠪᠠᠷ
ᠴᠠᠬᠢᠯᠤᠨ ᠥᠩᠭᠡᠷᠡᠨᠡ ᠰᠥᠨᠢ ᠪᠦᠷᠢ᠁
ᠴᠠᠭ ᠤ᠋ᠨ ᠬᠠᠷᠠᠭᠤᠯ ᠲᠤᠯᠤᠭᠠᠳ ᠡᠩᠨᠡᠵᠦ
ᠴᠠᠢᠪᠤᠷ ᠰᠢᠷᠣᠢ ᠳ᠋ᠤ᠌ ᠳᠠᠷᠤᠭᠳᠠᠨ ᠦᠯᠡᠳᠡᠨᠡ
ᠲᠡᠷᠡ ᠮᠣᠷᠢᠲᠠᠨ ᠬᠠᠨᠠ ᠲᠤᠭᠤᠷᠭᠠ ᠨᠡᠪᠲᠡᠯᠦᠨ
ᠲᠡᠷᠲᠡᠭᠡᠬᠢ ᠠᠯᠤᠰ ᠤᠷᠤᠭᠤ ᠲᠣᠷᠤᠯ ᠦᠭᠡᠢ ᠳᠣᠪᠲᠣᠯᠤᠨᠠ
ᠠᠯᠤᠰ ᠤ᠋ᠨ ᠬᠠᠨᠠᠨ ᠠᠭᠤᠯᠠᠰ ᠢ᠋ ᠴᠣᠭᠣᠯᠤᠨ ᠣᠷᠣᠭᠠᠳ
ᠠᠵᠢᠶᠠᠷᠠᠯ ᠦᠭᠡᠢ ᠴᠠᠭᠠᠳᠤ ᠲᠠᠯᠠ ᠳ᠋ᠤᠨᠢ ᠳᠠᠪᠬᠢᠵᠤ ᠶᠠᠪᠤᠨᠠ
ᠦᠦᠷ ᠴᠠᠢᠵᠤ ᠨᠠᠷᠠᠨ ᠮᠠᠨᠳᠤᠬᠤ ᠳ᠋ᠤ᠌
ᠦᠯᠦ ᠦᠵᠡᠭᠳᠡᠬᠦ ᠴᠠᠭᠠᠨ ᠮᠣᠷᠢᠲᠠᠨ᠁
ᠦᠳᠡᠰᠢ ᠪᠣᠯᠵᠤ ᠰᠠᠷᠠᠨ ᠭᠡᠢᠬᠦ ᠳ᠋ᠦ᠍
ᠦᠷᠭᠡᠯᠡᠬᠦ ᠲᠤᠯᠤᠭᠠᠳ ᠢ᠋ ᠰᠡᠷᠡᠭᠡᠨ ᠳᠠᠪᠬᠢᠨᠠ
ᠬᠤᠷᠴᠠ ᠲᠤᠭᠤᠷᠠᠢ ᠳ᠋ᠤᠨᠢ ᠭᠠᠯ ᠮᠠᠨᠠᠯᠵᠠᠨ
ᠬᠤᠷᠳᠤᠨ ᠬᠦᠯᠦᠭ ᠵᠢᠭᠳᠡᠬᠡᠨ ᠳᠣᠭᠳᠣᠯᠤᠨᠠ
ᠰᠡᠯᠡᠮᠡ ᠶ᠋ᠢᠨ ᠢᠷ ᠢ᠋ᠶ᠋ᠡᠷ ᠵᠦᠰᠦᠭᠦᠯᠦᠭᠰᠡᠨ ᠮᠡᠲᠦ ᠰᠠᠯᠬᠢ
ᠰᠠᠮ ᠢᠷᠠᠭᠳᠠᠨ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠰᠡᠷᠴᠢᠭᠢᠨᠡᠨᠡ
ᠰᠡᠭᠦᠳᠡᠷ ᠦᠭᠡᠢ ᠴᠠᠭᠠᠨ ᠮᠣᠷᠢᠲᠠᠨ ᠰᠦᠷᠦᠭ
ᠰᠢᠪᠠᠭᠤ ᠶ᠋ᠢ ᠦᠷᠭᠦᠭᠡᠨ ᠳᠣᠪᠲᠣᠯᠭᠠᠨᠠ
ᠭᠠᠵᠠᠷ ᠳᠡᠯᠡᠬᠡᠢ ᠯᠡ ᠤᠷᠤᠰᠤᠨ ᠵᠢᠷᠢᠯᠵᠡᠵᠦ
ᠭᠠᠢᠬᠠᠮᠰᠢᠭᠲᠤ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠡᠷᠢᠶᠡᠯᠵᠢᠯᠡᠨᠡ
ᠡᠭᠡᠷᠡᠮᠡ ᠲᠠᠯᠠ ᠳᠤᠮᠳᠠᠭᠤᠷ ᠴᠠᠭᠠᠨ ᠮᠣᠷᠢᠲᠠᠨ
ᠡᠷᠴᠢᠯᠡᠬᠦ ᠬᠤᠢ ᠰᠠᠯᠬᠢ ᠰᠢᠭ᠋ ᠳᠣᠪᠲᠣᠯᠭᠠᠨ
ᠡᠵᠢ ᠲᠡᠢ ᠪᠡᠨ ᠲᠡᠷᠡ ᠬᠡᠵᠢᠶᠡ ᠴᠦ᠍ ᠵᠣᠯᠭᠠᠬᠤ ᠦᠭᠡᠢ
ᠡᠬᠡᠨᠡᠷ ᠲᠡᠢ ᠪᠡᠨ ᠲᠡᠷᠡ ᠬᠡᠷᠬᠢᠪᠡᠴᠦ ᠤᠴᠠᠷᠠᠬᠤ ᠦᠭᠡᠢ
ᠬᠤᠷ ᠳᠡᠯ ᠳ᠋ᠦ᠍ ᠨᠢᠭᠤᠷ ᠢ᠋ᠶ᠋ᠠᠨ ᠨᠠᠭᠠᠭᠠᠳ ᠯᠠ
ᠬᠤᠷᠮᠤᠰᠲᠠ ᠶ᠋ᠢᠨ ᠳᠣᠣᠷᠠ ᠡᠭᠦᠷᠢᠳᠡ ᠳᠠᠪᠬᠢᠨᠠ
ᠲᠣᠨᠢᠯᠵᠤ ᠴᠢᠳᠠᠭᠠ ᠦᠭᠡᠢ ᠰᠦᠨᠡᠰᠦ ᠨᠢ ᠰᠥᠨᠢ ᠳ᠋ᠡᠭᠡᠨ
ᠲᠤᠯᠤᠭᠠᠳ ᠤ᠋ᠨ ᠳᠡᠭᠡᠭᠦᠷ ᠪᠦᠷᠦᠯᠵᠡᠨ ᠳᠠᠪᠬᠢᠨᠠ
ᠦᠯᠦ ᠦᠵᠡᠭᠳᠡᠬᠦ ᠮᠣᠷᠢᠲᠠᠨ ᠡᠷᠡᠰ ᠦ᠋ᠨ
ᠦᠢᠯᠡ ᠶ᠋ᠢᠨ ᠦᠷᠡ ᠨᠢ ᠮᠢᠩᠭᠠᠨ ᠵᠢᠯ ᠳᠠᠭᠤᠰᠬᠤ ᠦᠭᠡᠢ
ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠲᠤᠯᠤᠯᠳᠤᠬᠤ ᠡᠷᠡᠰ ᠢ᠋
ᠬᠡᠨ ᠴᠦ᠍ ᠵᠣᠭᠰᠣᠭᠠᠵᠤ ᠳ᠋ᠧᠪᠠᠵᠠᠨ ᠳ᠋ᠤ᠌ ᠢᠯᠡᠭᠡᠬᠦ ᠦᠭᠡᠢ
ᠪᠦᠷᠦᠢ ᠲᠠᠰᠤᠷᠠᠮᠠᠭᠴᠠ ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠤᠷ ᠲᠤ᠌
ᠪᠦᠷᠢᠨ ᠵᠡᠪᠰᠡᠭ ᠬᠠᠩᠭᠢᠨᠠᠭᠤᠯᠤᠨ ᠬᠠᠰᠬᠢᠷᠤᠯᠳᠤᠨᠠ
ᠦᠦᠷ ᠴᠠᠢᠬᠤ ᠳ᠋ᠤ᠌ ᠶᠠᠭᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌
ᠡᠪᠡᠰᠦ ᠨᠠᠢᠭᠤᠵᠤ ᠰᠢᠭᠦᠳᠡᠷᠢ ᠭᠢᠯᠲᠠᠢᠵᠤ ᠨᠠᠷᠠᠨ ᠮᠠᠨᠳᠤᠨᠠ
ᠳᠠᠬᠢᠭᠠᠳ ᠯᠠ ᠰᠥᠨᠢ ᠪᠣᠯᠵᠤ ᠮᠣᠷᠢᠲᠠᠨ ᠡᠷᠡᠰ
ᠳᠠᠢᠴᠢᠨ ᠤᠷᠢᠶᠠ ᠬᠠᠰᠬᠢᠷᠤᠨ ᠳᠠᠭᠠᠷᠢᠨ ᠣᠷᠣᠨᠠ
ᠭᠠᠯᠲᠤ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠬᠤ ᠦᠭᠡᠢ ᠨᠢ ᠬᠠᠴᠢᠨ
ᠭᠠᠵᠠᠷ ᠤᠨᠠᠭᠠᠳ ᠦᠬᠦᠬᠦ ᠦᠭᠡᠢ ᠨᠢ ᠭᠠᠢᠬᠠᠮᠠ
ᠨᠤᠮᠤ ᠰᠤᠮᠤ ᠪᠠᠷ ᠬᠠᠷᠪᠤᠭᠠᠳ ᠨᠡᠮᠡᠷᠢ ᠦᠭᠡᠢ
ᠨᠢᠭᠤᠴᠠ ᠤᠲᠤᠭᠠᠨ ᠳᠤ ᠤᠨᠠᠭᠠᠭᠠᠳ ᠱᠠᠯᠢᠬᠤ ᠦᠭᠡᠢ
ᠰᠥᠨᠢ ᠪᠦᠬᠦᠨ ᠦᠬᠦᠪᠡᠴᠦ ᠮᠠᠷᠭᠠᠰᠢ ᠨᠢ ᠠᠮᠢᠳᠤ
ᠰᠢᠪᠦᠭᠡᠨ ᠵᠢᠳᠠ ᠲᠠᠢ ᠤᠤᠯᠭᠠᠯᠠᠨ ᠳᠠᠭᠠᠷᠢᠭᠰᠠᠭᠠᠷ ᠯᠠ᠁
ᠬᠡᠵᠢᠶᠡᠳᠡ ᠠᠮᠢᠳᠤ ᠬᠡᠵᠢᠶᠡᠳᠡ ᠠᠮᠢᠳᠤ᠁
ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌᠂ ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠲᠤᠯᠤᠯᠳᠤᠭᠰᠠᠭᠠᠷ ᠯᠠ!
ᠬᠡᠴᠡᠭᠦᠦ ᠡᠢᠮᠦ ᠶᠠᠯᠠ ᠶ᠋ᠢ ᠬᠡᠨ ᠦ᠌ ᠦᠷᠡᠰ ᠲᠦ᠍
ᠬᠡᠵᠢᠶᠡ᠂ ᠶᠠᠭᠠᠬᠢᠭᠠᠳ᠂ ᠬᠡᠨ ᠣᠨᠣᠭᠠᠨᠠ ᠪᠣᠢ?
ᠬᠠᠷᠭᠤᠢ ᠶ᠋ᠢᠨ ᠲᠣᠭᠣᠰᠣ ᠪᠣᠰᠬᠠᠨ ᠮᠣᠷᠢᠲᠠᠨ ᠡᠷᠡᠰ
ᠬᠠᠮᠢᠭᠠ ᠪᠣᠯ ᠬᠠᠮᠢᠭᠠ ᠳᠠᠪᠬᠢᠨ ᠶᠠᠪᠤᠨᠠ
ᠢᠰᠬᠡᠷᠦᠨ ᠱᠤᠤᠭᠢᠬᠤ ᠰᠠᠯᠬᠢᠨ ᠳᠤᠮᠳᠠ ᠠ᠋ᠴᠠ
ᠢᠵᠢᠢ ᠮᠢᠨᠢ᠁ ᠭᠡᠵᠦ ᠡᠮᠡ ᠬᠥᠮᠦᠨ ᠭᠢᠩᠰᠢᠨᠡ
ᠲᠠᠯᠠ ᠬᠥᠨᠳᠡᠢ ᠲᠤᠯᠤᠭᠠᠳ ᠤ᠋ᠨ ᠳᠤᠮᠳᠠᠭᠤᠷ
ᠲᠠᠴᠢᠭᠢᠨᠠᠨ ᠥᠩᠭᠡᠷᠡᠨᠡ ᠮᠣᠷᠢᠲᠠᠨ ᠡᠷᠡᠰ ᠁
ᠥᠯᠥᠭᠡᠢ ᠲᠡᠢ ᠬᠡᠦᠬᠡᠳ ᠰᠥᠨᠢᠵᠢᠨ ᠤᠬᠢᠯᠠᠩᠨᠠᠵᠤ
ᠥᠷᠯᠥᠭ ᠡᠵᠢ ᠨᠢ ᠢᠰᠡᠭᠡᠢ ᠦᠨᠡᠭᠡ ᠬᠠᠢᠴᠢᠯᠠᠨᠠ
ᠦᠯᠦ ᠦᠵᠡᠭᠳᠡᠬᠦ ᠡᠷᠡᠰ ᠢ᠋ ᠢᠳᠡᠭ! ᠭᠡᠮᠡᠨ
ᠥᠨᠳᠥᠷ ᠣᠪᠣᠭᠠᠨ ᠳ᠋ᠤ᠌ ᠢᠳᠡᠭᠡ ᠪᠤᠳᠠᠭᠠ ᠡᠷᠭᠦᠨᠡ
ᠡᠭᠦᠷᠢᠳᠡ ᠶ᠋ᠢᠨ ᠵᠣᠪᠠᠯᠠᠩ ᠲᠠᠢ ᠤᠯᠤᠰ ᠬᠥᠭᠡᠷᠦᠬᠦᠢ ᠭᠡᠵᠦ
ᠡᠪᠦᠭᠡᠨ ᠬᠥᠭᠰᠢᠨ ᠵᠠᠯᠪᠠᠷᠢᠵᠤ ᠨᠠᠮᠠᠨᠴᠢᠯᠠᠨᠠ
ᠥᠷᠥᠭᠡᠯ ᠪᠤᠰᠤᠳ ᠲᠤ ᠭᠠᠢ ᠵᠣᠪᠠᠯᠠᠩ ᠣᠲᠣᠬᠤ ᠦᠭᠡᠢ
ᠥᠨᠢ ᠡᠷᠲᠡᠨ ᠦ᠌ ᠡᠷᠡᠰ ᠲᠤᠯᠤᠯᠳᠤᠨᠠ
ᠬᠡᠭᠡᠷᠡ ᠲᠠᠯᠠ ᠳ᠋ᠤ᠌ ᠶᠠᠪᠤᠬᠤ ᠳ᠋ᠤ᠌ ᠪᠠᠨ ᠠᠶᠤᠬᠤ ᠬᠡᠷᠡᠭ ᠦᠭᠡᠢ
ᠬᠡᠢ ᠦᠵᠡᠭᠳᠡᠯ ᠢ᠋ ᠰᠣᠨᠢᠷᠬᠠᠨ ᠰᠠᠭᠠᠲᠠᠭᠠᠷᠠᠢ!
ᠪᠠᠯᠠᠷ ᠣᠢ ᠱᠤᠤᠭᠢᠬᠤ ᠰᠢᠭ᠋ ᠪᠢᠲᠡᠭᠦᠦ ᠴᠢᠮᠡᠭᠡᠨ ᠳ᠋ᠦ᠍
ᠪᠠᠷᠠᠭᠠᠨ ᠲᠠᠩᠭᠢᠰ ᠴᠠᠯᠭᠢᠬᠤ ᠰᠢᠭ᠋ ᠰᠣᠨᠢᠨ ᠠᠪᠢᠶᠠᠨ ᠳ᠋ᠤ᠌
ᠴᠠᠭᠠᠨ ᠮᠣᠷᠢᠲᠠᠢ ᠬᠥᠮᠦᠨ ᠪᠦᠷᠦᠯᠵᠡᠨ ᠭᠠᠷᠴᠤ ᠢᠷᠡᠭᠡᠳ
ᠴᠠᠭᠠᠰᠢᠯᠠᠨ ᠳᠠᠪᠬᠢᠨᠠ ᠲᠤᠯᠤᠭᠠᠳ ᠳᠠᠮᠵᠢᠨ᠁
ᠲᠠᠯᠠ ᠶ᠋ᠢᠨ ᠳᠡᠭᠡᠷᠡ ᠴᠡᠩᠬᠡᠷᠯᠡᠬᠦ ᠮᠠᠨᠠᠨ ᠶᠤᠮ᠂ ᠲᠡᠷᠡ
ᠲᠠ ᠪᠢᠳᠡᠨ ᠦ᠌ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠰᠡᠭᠦᠳᠡᠷ ᠶᠦ᠍ᠮ᠂ ᠲᠡᠷᠡ
ᠬᠣᠯᠠ ᠶ᠋ᠢᠨ ᠲᠡᠷᠲᠡᠭᠡ ᠰᠦᠮᠡᠯᠵᠡᠬᠦ ᠵᠡᠷᠭᠡᠯᠭᠡ ᠶᠦ᠍ᠮ᠂ ᠲᠡᠷᠡ
ᠭᠣᠣᠯ ᠤ᠋ᠨ ᠡᠷᠭᠢ ᠪᠡᠷ ᠰᠥᠳᠡᠯᠵᠡᠬᠦ ᠦᠵᠡᠭᠳᠡᠯ ᠶᠦ᠍ᠮ᠂ ᠲᠡᠷᠡ
ᠰᠥᠨᠢ ᠶ᠋ᠢᠨ ᠠᠮᠤᠭᠤᠯᠠᠩ ᠢ᠋ ᠡᠪᠳᠡᠨ ᠰᠣᠴᠢᠭᠠᠬᠤ
ᠥᠨᠢ ᠶ᠋ᠢᠨ ᠡᠪᠦᠭᠡᠳ ᠡᠴᠡ ᠠᠶᠤᠬᠤ ᠬᠡᠷᠡᠭ ᠦᠭᠡᠢ
ᠣᠯᠢᠨ ᠬᠤᠴᠠᠬᠤ ᠨᠣᠬᠠᠢ ᠯᠠ ᠲᠡᠳᠡᠨ ᠢ᠋ ᠳᠠᠭᠠᠨ
ᠠᠭᠤᠯᠠ ᠬᠥᠨᠳᠡᠢ ᠪᠡᠷ ᠬᠡᠰᠡᠭ ᠳᠠᠪᠬᠢᠨᠠ
ᠦᠦᠷ ᠦ᠋ᠨ ᠭᠡᠭᠡ ᠮᠠᠩᠬᠠᠢᠨ ᠴᠠᠢᠬᠤ ᠳ᠋ᠤ᠌
ᠦᠢᠮᠡᠭᠰᠡᠨ ᠲᠤᠯᠤᠭᠠᠳ ᠨᠠᠮ ᠭᠦᠮ᠁
ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠳ᠋ᠦ᠍ ᠡᠬᠢᠯᠡᠭᠰᠡᠨ ᠲᠤᠯᠤᠯᠳᠤᠭᠠᠨ
ᠦᠯᠦ ᠦᠵᠡᠭᠳᠡᠬᠦ ᠣᠷᠣᠨ ᠵᠠᠢ ᠳ᠋ᠤ᠌᠁
ᠮᠣᠷᠢᠨ ᠲᠦᠪᠡᠷᠭᠡᠨ ᠨᠢᠵᠢᠭᠢᠨᠡᠨ
ᠬᠣᠭᠣᠰᠣᠨ ᠲᠠᠯᠠ ᠳ᠋ᠤ᠌ ᠠᠭᠤᠰᠤᠨᠠ
ᠮᠣᠷᠢᠨ ᠲᠦᠪᠡᠷᠭᠡᠨ ᠨᠢᠵᠢᠭᠢᠨᠡᠨ
ᠬᠣᠯᠠ ᠶ᠋ᠢᠨ ᠬᠣᠯᠠ ᠳ᠋ᠤ᠌ ᠵᠠᠮᠬᠠᠷᠠᠨᠠ
ᠠᠭᠤᠯᠠ ᠲᠤᠯᠤᠭᠠᠳ ᠨᠠᠮ ᠭᠦᠮ᠁
ᠤᠯᠠᠭᠠᠨ ᠨᠠᠷᠠᠨ ᠴᠢᠪ ᠴᠢᠮᠡᠭᠡ ᠦᠭᠡᠢ᠁
ᠤᠰᠤ ᠭᠣᠣᠯ ᠠᠨᠢᠷ ᠭᠦᠮ᠁
ᠤᠷᠭᠤᠬᠤ ᠨᠣᠭᠣᠭᠠ ᠯᠠ ᠰᠢᠪᠢᠷ ᠢᠪᠢᠷ᠁
ᠴᠠᠭᠠᠨ ᠮᠣᠷᠢ ᠲᠠᠢ ᠬᠥᠮᠦᠨ
ᠴᠠᠭ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠠᠭᠤᠰᠤᠨ ᠠᠯᠳᠠᠷᠠᠵᠤ
ᠣᠯᠠᠨ ᠮᠣᠷᠢᠲᠠᠨ ᠡᠷᠡᠰ
ᠣᠭᠣᠷᠴᠣᠭ ᠲᠤᠯᠤᠭᠠᠳ ᠲᠤ᠌ ᠰᠢᠩᠭᠡᠪᠡ ᠤᠤ?
ᠡᠵᠡᠭᠦᠢ ᠲᠠᠯᠠ ᠳᠡᠭᠡᠷᠡ ᠠᠢᠯ ᠭᠡᠷ ᠦ᠋ᠳ ᠡᠨᠳᠡ ᠲᠡᠨᠳᠡ᠁
ᠡᠭᠡᠷᠡᠮᠡ ᠲᠠᠯᠠ ᠶ᠋ᠢᠨ ᠭᠦᠨ ᠳ᠋ᠦ᠍ ᠠᠷᠭᠠᠯ ᠤ᠋ᠨ ᠤᠲᠤᠭᠠ ᠲᠠᠷᠬᠠᠨᠠ
ᠡᠨᠡ ᠰᠥᠨᠢ ᠶ᠋ᠢᠨ ᠬᠡᠢ ᠦᠵᠡᠭᠳᠡᠯ ᠦ᠋ᠨ ᠰᠡᠭᠦᠯᠴᠢ ᠭᠡᠯᠲᠡᠢ
ᠡᠷᠴᠢᠯᠡᠭᠰᠡᠨ ᠴᠡᠩᠬᠡᠷ ᠤᠲᠤᠭᠠ ᠲᠦᠳᠡᠯ ᠦᠭᠡᠢ ᠵᠠᠮᠬᠠᠷᠠᠨᠠ᠃