ᠨᠢᠭᠡᠨ ᠦᠳᠡᠰᠢ - ᠸᠠᠴᠢᠷᠪᠠᠲᠤ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Нэгэн үдэш - Очирбатын Дашбалбар
667ᠨᠢᠭᠡᠨ ᠦᠳᠡᠰᠢ
ᠠᠶᠠᠲᠠᠢᠬᠠᠨ ᠳᠣᠲᠣᠷᠯᠠᠵᠤ ᠮᠥᠩᠭᠥᠨ ᠠᠶᠠᠭᠠ ᠰᠢᠭ᠋ ᠪᠣᠯᠭᠠᠵᠠᠢ
ᠮᠥᠩᠭᠥᠯᠢᠭ ᠡᠨᠡᠬᠡᠨ ᠰᠥᠨᠢ ᠵᠢᠵᠢᠭ ᠴᠥᠭᠥᠷᠥᠮ
ᠮᠥᠩᠭᠥᠨ ᠲᠣᠯᠢᠨ ᠤ᠋ ᠬᠠᠭᠠᠷᠠᠭᠰᠠᠨ ᠬᠡᠯᠲᠡᠷᠬᠡᠢ ᠰᠢᠭ
ᠲᠡᠭᠡᠭᠡᠳ ᠮᠥᠴᠢᠷ ᠳᠠᠮᠵᠢᠨ ᠭᠤᠯᠠᠰᠬᠤ ᠰᠠᠷᠠᠨ ᠤ᠋ ᠲᠤᠶᠠᠭᠠ
ᠲᠩᠷᠢᠯᠢᠭ ᠮᠣᠳᠣᠳ ᠢ᠋ ᠮᠣᠭᠠᠢ ᠰᠢᠭ᠋ ᠣᠷᠢᠶᠠᠭᠰᠠᠭᠠᠷ ᠯᠠ ᠁
ᠰᠡᠢᠮᠡᠬᠡᠢ ᠬᠥᠰᠢᠭᠡ ᠰᠢᠭ ᠣᠳᠣᠳ ᠤ᠋ᠨ ᠨᠣᠭᠣᠭᠠᠬᠠᠨ ᠲᠤᠶᠠᠭᠠ
ᠰᠡᠳᠬᠢᠯ ᠦ᠋ᠨ ᠭᠦᠨ ᠤᠷᠤᠭᠤ ᠡᠷᠳᠡᠨᠢ ᠶ᠋ᠢᠨ ᠤᠲᠠᠰᠤ ᠰᠦᠪᠡᠯᠡᠬᠦ ᠰᠢᠭ᠁
ᠴᠡᠴᠡᠭᠯᠡᠨ ᠪᠣᠢ ᠠᠯᠢᠮᠠ ᠶ᠋ᠢᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠳᠡᠭᠡᠷᠡ
ᠴᠡᠩᠬᠡᠷᠬᠡᠨ ᠲᠤᠶᠠᠭᠠ ᠲᠠᠢ ᠴᠥᠭᠥᠷᠥᠮ ᠠᠮᠠᠰᠠᠷ ᠢ᠋ ᠡᠮᠵᠢᠨ
ᠪᠦᠭᠡᠭᠡᠨ ᠣᠳᠣᠳ ᠤ᠋ᠨ ᠢᠯᠡᠭᠡᠭᠰᠡᠨ ᠨᠢᠭᠤᠴᠠ ᠵᠠᠬᠢᠳᠠᠯ ᠢ ᠲᠠᠢᠯᠤᠨ
ᠪᠦᠰᠡᠭᠦᠢ ᠬᠥᠮᠦᠨ ᠰᠢᠭ ᠡᠬᠡᠷ ᠲᠡᠳᠡᠨ ᠤᠩᠰᠢᠬᠤ ᠮᠢᠨᠦ᠁
ᠨᠠᠮᠤᠭ ᠤ᠋ᠨ ᠮᠡᠯᠡᠬᠡᠢ ᠨᠦ᠍ᠭᠦᠳ ᠬᠠᠮᠢᠭᠠ ᠨᠢᠭᠡᠲᠡᠢ ᠭᠤᠸᠠᠯᠠᠬᠤ ᠠᠨᠤ
ᠨᠠᠮ ᠭᠦᠮ ᠳ᠋ᠦ᠍ ᠬᠠᠷᠢ ᠭᠠᠷᠠᠭ ᠲᠠᠢ ᠬᠠᠷᠢᠴᠠᠬᠤ ᠪᠤᠤᠬᠢᠶᠠ ᠤᠤ!
ᠮᠡᠯᠡᠬᠡᠢ ᠶ᠋ᠢᠨ ᠬᠦᠢᠲᠡᠨ ᠪᠠᠶᠠᠨ ᠳ᠋ᠤ᠌ ᠮᠡᠳᠡᠷᠡᠬᠦᠢ ᠶ᠋ᠢᠨ ᠨᠢᠭᠤᠴᠠ ᠤᠪᠠᠳᠢᠰ
ᠮᠡᠳᠡᠬᠦ ᠪᠣᠯᠤᠭᠠᠳ ᠮᠡᠳᠡᠬᠦ ᠦᠭᠡᠢ ᠲᠡᠮᠳᠡᠭᠲᠦ ᠪᠡᠷ ᠨᠡᠪᠴᠢᠬᠦ ᠢᠨᠦ᠁
ᠨᠠᠪᠴᠢᠨ ᠳᠡᠭᠡᠷᠡ ᠰᠡᠷᠢᠭᠦᠦ ᠲᠠᠲᠠᠵᠤ ᠰᠢᠭᠦᠳᠡᠷᠢ ᠪᠠᠭᠤᠨᠠ
ᠨᠠᠭᠠᠯ ᠮᠣᠭᠠᠢ ᠰᠡᠮᠬᠡᠨ ᠭᠤᠯᠠᠰᠴᠤ ᠲᠡᠭᠦᠨ ᠢ᠋ ᠰᠢᠮᠡᠨᠡ
ᠬᠠᠢᠷᠰᠤ ᠨᠢ ᠭᠢᠯᠲᠠᠭᠠᠨᠠᠬᠤ ᠲᠡᠭᠦᠨ ᠢ᠋ ᠰᠠᠷᠠᠨ ᠤ᠋ ᠲᠤᠶᠠᠭᠠ ᠡᠩᠬᠦᠷᠡᠢᠯᠡᠨᠡ
ᠬᠠᠮᠢᠭᠠ ᠨᠢᠭᠡᠲᠡᠭᠡ ᠮᠡᠯᠡᠬᠡᠢ ᠭᠤᠸᠠᠭᠠᠯᠠᠬᠤ ᠨᠢ ᠮᠣᠭᠠᠢ ᠳ᠋ᠤ᠌ ᠲᠠᠭᠠᠲᠠᠢ᠃
ᠠᠯᠢᠮᠠᠨ ᠤ᠋ ᠮᠣᠳᠣᠨ ᠠ᠋ᠴᠠ ᠡᠨᠡ ᠰᠠᠷᠠ ᠶ᠋ᠢ ᠬᠡᠨ ᠳᠡᠭᠦᠵᠢᠯᠡᠭᠡ ᠪᠣᠢ
ᠠᠯᠲᠠᠨ ᠳ᠋ᠧᠩᠯᠦ ᠬᠡᠷᠡᠯᠳᠦᠬᠦ ᠰᠢᠭ ᠰᠠᠨᠠᠭᠳᠠᠮᠤᠢ
ᠠᠩᠬᠢᠯᠤᠭᠤᠨ ᠦᠨᠦᠷᠲᠦ ᠰᠥᠨᠢ ᠶ᠋ᠢᠨ ᠡᠨᠡᠬᠡᠨ ᠴᠡᠴᠡᠷᠯᠢᠭ ᠲᠦ᠍
ᠠᠯᠤᠰ ᠤ᠋ᠨ ᠣᠳᠣᠳ ᠤ᠋ᠨ ᠴᠢᠭᠤᠯᠭᠠᠨ ᠳᠣᠬᠢᠶᠠ ᠪᠠᠨ ᠰᠠᠮ ᠢᠯᠡᠭᠡᠭᠰᠡᠭᠡᠷ᠁
ᠴᠢᠯᠠᠭᠤᠲᠤ ᠪᠢᠴᠢᠬᠠᠨ ᠵᠥᠷᠢᠭ ᠢ᠋ᠶ᠋ᠡᠷ ᠰᠡᠷᠢᠭᠦᠦ ᠲᠠᠲᠠᠭᠤᠯᠤᠨ ᠠᠯᠬᠤᠬᠤᠢ
ᠴᠤᠩ ᠡᠷᠳᠡᠨᠢ ᠶ᠋ᠢᠨ ᠣᠳᠣᠳ ᠨᠠᠪᠴᠢᠰ ᠪᠣᠯᠭᠠᠨ ᠳᠡᠭᠡᠷᠡ ᠭᠢᠯᠲᠠᠢᠨᠠ
ᠲᠩᠷᠢ ᠪᠤᠷᠬᠠᠨ ᠤᠬᠢᠯᠠᠭᠰᠠᠨ ᠭᠡᠯᠲᠡᠢ ᠭᠡᠷᠡᠯᠲᠦ ᠰᠤᠪᠤᠳ ᠤ᠋ᠨ ᠰᠢᠭᠦᠳᠡᠷᠢ ᠨᠦ᠍ᠭᠦᠳ
ᠲᠡᠨᠳᠡ ᠡᠨᠳᠡ ᠦᠭᠡᠢ ᠴᠠᠴᠤᠭᠳᠠᠵᠤ ᠡᠨᠳᠡ ᠲᠡᠨᠳᠡ ᠦᠭᠡᠢ ᠪᠦᠩᠵᠦᠢᠨᠠ᠃
ᠰᠠᠷᠠ ᠲᠤᠰᠤᠭᠰᠠᠨ ᠴᠥᠭᠥᠷᠥᠮ ᠦ᠋ᠨ ᠭᠦᠨ ᠳ᠋ᠦ᠍ ᠨᠢᠭᠡᠨ ᠨᠢᠭᠤᠴᠠ ᠬᠣᠲᠠ ᠪᠣᠢ
ᠰᠠᠨᠠᠭᠠ ᠪᠣᠳᠣᠯ ᠢ᠋ᠶ᠋ᠠᠷ ᠪᠣᠰᠤᠭᠰᠠᠨ ᠬᠡᠢ ᠤᠷᠲᠤ ᠬᠠᠷᠰᠢ ᠨᠤᠭᠤᠳ ᠤ᠋ᠨ ᠳᠤᠮᠳᠠ
ᠬᠠᠷᠴᠠᠭᠠᠢ ᠰᠦᠷᠬᠢᠨ ᠥᠩᠭᠡᠷᠡᠬᠦᠢ ᠴᠥᠭᠥᠷᠥᠮ ᠦ᠋ᠨ ᠭᠠᠳᠠᠷᠭᠤ
ᠬᠠᠯᠭᠢᠨ ᠠᠳᠠᠷᠭᠠ ᠡᠭᠦᠰᠴᠦ ᠭᠦᠨ ᠳ᠋ᠦ᠍ᠨᠢ ᠪᠦᠰᠡᠭᠦᠢ ᠬᠥᠮᠦᠨ ᠢᠨᠢᠶᠡᠨᠡ᠃