ᠬᠥᠳᠡᠭᠡᠨ ᠦ ᠨᠣᠬᠠᠢ-ᠬᠡᠦᠬᠡᠯᠳᠡᠢ ᠶᠢᠨ ᠺᠢᠨᠣ᠋Хөдөөний нохой(Huduunii nohoi) хүүхэлдэйн кино
2491ᠬᠥᠳᠡᠭᠡᠨ ᠦ ᠨᠣᠬᠠᠢ
ᠬᠣᠢᠯᠣᠭ ᠨᠡᠷᠡ ᠲᠡᠢ ᠬᠣᠲᠠᠴᠢ ᠨᠣᠬᠠᠢ ᠪᠢ ᠤᠭ ᠨᠢ
ᠥᠷᠥᠰᠢᠶᠡᠯᠳᠦ ᠡᠵᠡᠨ ᠦ᠌ ᠪᠡᠨ ᠦᠨᠡᠨᠴᠢ ᠲᠤᠰᠠ
ᠥᠪᠡᠷ ᠦ᠋ᠨ ᠭᠡᠰᠡᠨ ᠠᠨᠳᠠ ᠲᠠᠢ᠂ ᠰᠡᠭᠦᠯ ᠲᠡᠢ
ᠰᠡᠭᠦᠯ ᠦᠭᠡᠢ ᠴᠢᠨᠣᠠ ᠶ᠋ᠢ ᠰᠦᠷᠦᠭ ᠮᠠᠯ ᠤᠷᠤᠭᠤ ᠪᠠᠨ
ᠠᠯᠬᠤᠮ ᠴᠤ᠌ ᠣᠢᠷᠠᠲᠤᠭᠤᠯᠳᠠᠭ ᠦᠭᠡᠢ
ᠨᠢᠭᠡ ᠶᠣᠰᠣᠨ ᠳ᠋ᠤ᠌ ᠪᠠᠨ ᠲᠠᠩᠭᠠᠷᠢᠭ ᠡᠷᠭᠦᠭᠡ ᠦᠭᠡᠢ ᠬᠢᠯᠢᠴᠢᠨ
ᠭᠡᠷᠡ ᠬᠢᠭᠡ ᠦᠭᠡᠢ ᠴᠦ᠍ ᠬᠠᠮᠠᠭᠠᠯᠠᠭᠴᠢ ᠶᠠᠪᠤᠯᠠ᠃
ᠲᠥᠷᠥᠭᠰᠡᠨ ᠨᠤᠲᠤᠭ ᠠ᠋ᠴᠠ ᠪᠠᠨ
ᠲᠥᠭᠡ ᠴᠦ᠍ ᠬᠣᠯᠠᠳᠴᠤ ᠦᠵᠡᠭᠡ ᠦᠭᠡᠢ
ᠲᠥᠪ ᠰᠠᠭᠤᠷᠢᠨ ᠭᠠᠵᠠᠷ ᠤ᠋ᠨ ᠪᠠᠷᠠ ᠶ᠋ᠢ ᠴᠦ᠍ ᠬᠠᠷᠠᠵᠤ ᠶᠠᠪᠤᠭᠠ ᠦᠭᠡᠢ
ᠲᠠᠯᠠ ᠰᠠᠢᠬᠠᠨ ᠨᠤᠲᠤᠭ ᠲᠤ᠌ ᠪᠠᠨ
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠢ᠋ᠶ᠋ᠠᠨ ᠬᠠᠷᠢᠭᠤᠯᠵᠤ
ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠠᠮᠢᠳᠤᠷᠠᠵᠤ ᠶᠠᠪᠤᠬᠤ
ᠲᠠᠪᠢᠯᠠᠩ ᠵᠠᠶᠠᠭᠠᠨ ᠳ᠋ᠤ᠌ ᠪᠠᠨ ᠢᠲᠡᠭᠡᠭᠰᠡᠨ ᠥᠪᠡᠷ ᠢ᠋ ᠪᠡᠨ
ᠲᠣᠮᠣᠭᠤᠲᠤ ᠶ᠋ᠢᠨ ᠲᠣᠭᠣᠰᠣ ᠰᠢᠷᠣᠢ ᠳ᠋ᠤ᠌ ᠳᠠᠷᠤᠭᠳᠠᠨ
ᠲᠣᠣᠷ ᠲᠠᠢ ᠬᠠᠰᠢᠶᠠᠨ ᠤ᠋ ᠪᠤᠯᠤᠩ ᠳ᠋ᠤ᠌ ᠬᠣᠷᠢᠭᠳᠠᠭᠠᠳ
ᠲᠣᠭᠠ ᠲᠠᠢ ᠨᠠᠰᠤ ᠪᠠᠨ ᠡᠯᠡᠭᠡᠬᠦ ᠶᠦᠮ ᠠ᠋ ᠭᠡᠵᠦ
ᠲᠣᠭᠠᠴᠠᠭᠠᠯᠠ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠦᠶᠡ ᠪᠣᠢ᠃
ᠤᠯᠤᠰ ᠠᠮᠢᠲᠠᠨ ᠪᠥᠭᠡᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ
ᠤᠯᠠᠭᠠᠨᠪᠠᠭᠠᠲᠤᠷ ᠢ᠋ ᠵᠣᠷᠢᠬᠤ ᠪᠣᠯᠤᠯᠠ᠃
ᠠᠯᠤᠰ ᠢᠷᠡᠭᠡᠳᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ
ᠠᠬᠤᠢ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠳᠡᠭᠡᠭᠰᠢᠯᠡᠭᠦᠯᠬᠦ
ᠬᠣᠢᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠢᠨ ᠰᠠᠢᠬᠠᠨ ᠳ᠋ᠤ᠌ ᠢᠳᠡᠭᠡᠨ
ᠬᠣᠲᠠ ᠭᠠᠵᠠᠷ ᠤᠷᠤᠭᠤ ᠨᠡᠭᠦᠳᠡᠯᠯᠡᠬᠦ ᠪᠣᠯᠤᠯᠠ᠃
ᠶᠡᠬᠡ ᠨᠡᠭᠦᠳᠡᠯ ᠦ᠋ᠨ ᠳᠠᠪᠠᠯᠭᠠᠨ
ᠡᠵᠡᠨ ᠬᠥᠮᠦᠰ ᠢ᠋ ᠨᠢ ᠮᠠᠨᠢ ᠴᠤ᠌ ᠲᠣᠭᠣᠷᠢᠭᠰᠠᠨ ᠦᠭᠡᠢ᠃
ᠬᠣᠨᠢ ᠮᠠᠯ ᠢ᠋ᠶ᠋ᠠᠨ ᠬᠤᠳᠠᠯᠳᠤᠭᠠᠳ
ᠬᠣᠢᠯᠣᠭ ᠨᠠᠮᠠ ᠪᠠᠨ ᠳᠠᠭᠠᠭᠤᠯᠤᠭᠠᠳ
ᠬᠣᠯᠠ ᠶ᠋ᠢᠨ ᠬᠣᠯᠠ ᠶ᠋ᠢ ᠵᠣᠷᠢᠯᠠ ᠃
ᠬᠣᠲᠠ ᠬᠡᠮᠡᠭᠴᠢ ᠭᠠᠵᠠᠷ ᠢᠷᠡᠯᠡ ᠃
ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠭᠡᠳᠡᠭ ᠴᠢᠨᠢ
ᠤᠭ ᠨᠢ ᠪᠣᠯ ᠲᠣᠮᠣ ᠭᠠᠵᠠᠷ ᠶᠤᠮ ᠠ᠋ ᠃
ᠤᠴᠢᠷ ᠢ᠋ ᠨᠢ ᠣᠯᠵᠤ ᠠᠮᠢᠳᠤᠷᠠᠬᠤ ᠳ᠋ᠤ᠌ ᠬᠠᠷᠢᠨ
ᠤᠬᠠᠭᠠᠨ ᠪᠣᠳᠣᠯ ᠬᠦᠷᠬᠦ ᠦᠭᠡᠢ ᠨᠢ ᠪᠣᠯᠤᠯᠲᠠᠢ
ᠤᠲᠤᠭᠠ ᠤᠨᠢᠶᠠᠷ ᠢ᠋ᠶ᠋ᠠᠷ ᠨᠢ ᠠᠮᠢᠰᠬᠤᠯᠯᠠᠬᠤ ᠳ᠋ᠤ᠌
ᠠᠭᠤᠰᠬᠢ ᠴᠡᠭᠡᠵᠢ ᠮᠢᠨᠢ ᠴᠦ᠍ ᠳᠠᠪᠴᠢᠳᠠᠬᠤ ᠨᠢ ᠪᠣᠯᠤᠯᠲᠠᠢ ᠃
ᠨᠡᠢᠰᠯᠡᠯ ᠦ᠋ᠨ ᠨᠢᠭᠡᠨ ᠵᠠᠬᠠ ᠳ᠋ᠤ᠌ ᠲᠡᠭᠦᠷᠭᠡ ᠶ᠋ᠢ
ᠨᠡᠢᠯᠡᠭᠦᠯᠦᠨ ᠪᠠᠷᠢᠭᠰᠠᠨ ᠣᠯᠠᠨ ᠬᠠᠰᠢᠶᠠᠨ ᠤ᠋ ᠮᠤᠬᠤᠷ ᠲᠤ᠌
ᠵᠠᠮ ᠮᠠᠭᠤᠲᠠᠢ ᠠᠢᠯ ᠤ᠋ᠨ ᠬᠠᠶᠠᠭᠠᠨ ᠳ᠋ᠤ᠌
ᠵᠠᠢ ᠭᠠᠷᠭᠠᠵᠤ ᠡᠵᠡᠳ ᠮᠠᠨᠢ ᠭᠡᠷ ᠢ᠋ᠶ᠋ᠡᠨ ᠪᠠᠷᠢᠯᠠ ᠃
ᠬᠡᠦᠬᠡᠳ ᠪᠠᠭᠠᠴᠤᠳ ᠢ᠋ ᠠᠶᠤᠯᠭᠠᠴᠢᠬᠠᠨᠠ
ᠬᠥᠮᠦᠨ ᠠᠮᠢᠲᠠᠨ ᠢ᠋ ᠤᠷᠠᠴᠢᠬᠠᠨᠠ ᠭᠡᠳ
ᠣᠴᠢᠭᠰᠠᠨ ᠡᠳᠦᠷ ᠡᠴᠡ ᠪᠡᠨ ᠡᠬᠢᠯᠡᠭᠡᠳ
ᠣᠭᠣᠰᠣᠷ ᠭᠢᠨᠵᠢᠨ ᠳ᠋ᠦ᠍ ᠬᠦᠯᠢᠭᠳᠡᠪᠡ ᠪᠢ ᠴᠢᠨᠢ ᠃
ᠭᠡᠮ ᠬᠢᠭᠰᠡᠨ ᠠᠮᠢᠲᠠᠨ ᠰᠢᠭ᠋
ᠭᠢᠨᠵᠢᠨ ᠳ᠋ᠦ᠍ ᠳᠥᠩᠭᠡᠯᠡᠭᠦᠯᠵᠦ ᠬᠡᠪᠲᠡᠭᠡᠳ
ᠬᠣᠨᠢ ᠬᠠᠷᠢᠭᠤᠯᠳᠠᠭ ᠬᠣᠲᠠᠴᠢ ᠨᠣᠬᠠᠢ ᠪᠢ ᠴᠢᠨᠢ
ᠬᠣᠲᠠ ᠶ᠋ᠢᠨ ᠬᠠᠰᠢᠶᠠᠨ ᠤ᠋ ᠰᠠᠬᠢᠭᠤᠯ ᠪᠣᠯᠴᠢᠬᠠᠪᠠ ᠃
ᠬᠣᠶᠠᠷᠬᠠᠨ ᠠᠯᠬᠤᠮ ᠤ᠋ᠨ ᠵᠠᠢ ᠳ᠋ᠤ᠌
ᠬᠣᠯᠬᠢᠬᠤ ᠠ᠋ᠴᠠ ᠥᠭᠡᠷᠡ ᠠᠵᠢᠯ ᠦᠭᠡᠢ
ᠬᠢᠬᠦ ᠶᠠᠭᠤᠮᠠ ᠦᠭᠡᠢ ᠭᠡᠶᠦᠷᠡᠵᠦ ᠬᠡᠪᠲᠡᠭᠰᠡᠭᠡᠷ
ᠬᠡᠢ ᠬᠠᠭᠤᠴᠢ ᠳ᠋ᠤ᠌ ᠪᠠᠷᠢᠭᠳᠠᠵᠤ ᠡᠬᠢᠯᠡᠪᠡ ᠃
ᠰᠤᠷᠤᠭᠰᠠᠨ ᠭᠠᠭᠴᠠ ᠡᠷᠳᠡᠮ ᠮᠠᠨᠢ ᠬᠠᠷᠢᠨ
ᠰᠤᠨᠵᠤ ᠬᠡᠪᠲᠡᠬᠦ ᠯᠡ ᠪᠣᠯᠵᠠᠢ ᠳᠠ ᠃
ᠬᠤᠯᠠᠭᠠᠢᠴᠢ ᠵᠡᠯᠡᠭᠡᠴᠢ ᠢᠷᠡᠪᠡᠯ
ᠬᠤᠴᠠᠬᠤ ᠠ᠋ᠴᠠ ᠥᠭᠡᠷᠡ ᠴᠢᠳᠠᠪᠤᠷᠢ ᠦᠭᠡᠢ ᠃
ᠶᠠᠮᠪᠠᠷᠠᠴᠢᠬᠠᠭᠰᠠᠨ ᠴᠤ᠌ ᠶᠤᠮ ᠰᠢᠭ᠋᠂
ᠶᠠᠳᠠᠷᠠᠴᠢᠬᠠᠭᠰᠠᠨ ᠶᠤᠮ ᠶᠤᠮ ᠰᠢᠭ᠋
ᠶᠠᠩᠵᠤ ᠶ᠋ᠢᠨ ᠠᠮᠢᠲᠠᠨ ᠪᠣᠯᠵᠤ ᠬᠤᠪᠢᠷᠠᠪᠠ ᠃
ᠲᠠᠯᠠ ᠰᠠᠢᠬᠠᠨ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠨ ᠂
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠢ᠋ᠶ᠋ᠠᠨ ᠦᠭᠡᠢᠯᠡᠨ ᠂
ᠪᠣᠰᠤᠨ ᠰᠠᠭᠤᠨ ᠤᠢᠳᠬᠠᠷᠯᠠᠨ ᠂
ᠪᠣᠷᠪᠢ ᠪᠠᠨ ᠲᠡᠨᠢᠢᠯᠭᠡᠬᠦ ᠬᠦᠰᠡᠯ ᠳ᠋ᠦ᠍ ᠪᠡᠨ ᠠᠪᠲᠠᠨ
ᠪᠣᠣᠬᠠᠢ ᠴᠢᠨᠣᠠ ᠶ᠋ᠢ ᠴᠦ᠍ ᠦᠭᠡᠢᠯᠡᠬᠦ ᠶᠦᠮ ᠭᠡᠵᠦ
ᠪᠣᠳᠣᠵᠤ ᠦᠵᠡᠭᠰᠡᠨ ᠦᠭᠡᠢ ᠶᠠᠪᠤᠯᠠ ᠃
ᠤᠨᠲᠠᠬᠤ ᠪᠣᠯᠭᠠᠨ ᠳ᠋ᠤ᠌ ᠪᠠᠨ ᠤᠨᠠᠭᠠᠨ ᠨᠤᠲᠤᠭ ᠂
ᠠᠭᠤᠯᠠ ᠤᠰᠤ ᠂ ᠬᠣᠲᠠ ᠠᠢᠯ ᠂
ᠬᠣᠨᠢ ᠬᠤᠷᠠᠭᠠ ᠪᠠᠨ ᠵᠡᠭᠦᠳᠦᠯᠡᠨᠡ ᠃
ᠰᠡᠷᠢᠬᠦ ᠲᠣᠭᠠᠯᠠᠩ ᠳ᠋ᠤ᠌ ᠪᠠᠨ ᠬᠠᠷᠢᠨ
ᠰᠡᠳᠬᠢᠯ ᠰᠠᠨᠠᠭᠠ ᠪᠠᠷ ᠤᠨᠠᠨᠠ ᠃
ᠡᠢᠨ ᠬᠦ᠌ ᠡᠳᠦᠷ ᠬᠣᠨᠣᠭ ᠢ᠋ ᠥᠩᠭᠡᠷᠡᠭᠡᠭᠰᠡᠭᠡᠷ
ᠶᠡᠬᠡ ᠬᠣᠲᠠ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠠᠭᠤᠰᠤᠯᠠ᠃ ᠴᠢ ᠮᠢᠨᠢ
ᠢᠳᠡᠷ ᠴᠠᠬᠢᠷᠠᠭ ᠪᠡᠶᠡ ᠮᠢᠨᠢ ᠬᠠᠷᠢᠨ
ᠢᠲᠡᠭᠡᠬᠦ ᠦᠭᠡᠢ ᠰᠤᠯᠪᠠᠭᠠᠷ ᠨᠢᠭᠡᠨ ᠪᠣᠯᠴᠢᠬᠠᠯᠠ ᠃
ᠬᠠᠷᠢᠨ ᠨᠢᠭᠡ ᠡᠳᠦᠷ ᠡᠵᠡᠨ ᠮᠠᠨᠢ ᠦᠷᠦ ᠡᠪᠡᠳᠦᠭᠡᠳ
ᠬᠠᠰᠢᠶᠠᠨ ᠠ᠋ᠴᠠ ᠭᠠᠷᠬᠤ ᠴᠢᠯᠥᠭᠡ ᠣᠯᠭᠣᠪᠠ ᠃
ᠪᠠᠶᠠᠷᠯᠠᠵᠤ ᠬᠥᠭᠡᠷᠦᠭᠰᠡᠨ ᠳ᠋ᠦ᠍ ᠪᠡᠨ ᠪᠣᠯᠤᠭᠠᠳ ᠪᠢ ᠴᠢᠨᠢ
ᠪᠠᠬᠠᠨ ᠳᠠᠪᠬᠢᠵᠤ ᠶᠠᠪᠤᠭᠠᠳ
ᠪᠤᠴᠠᠭᠠᠳ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠬᠤ ᠭᠡᠲᠡᠯᠡ
ᠪᠤᠳᠤᠯᠢᠵᠤ ᠰᠠᠮᠠᠭᠤᠷᠠᠭᠠᠳ ᠲᠥᠭᠡᠷᠢᠴᠢᠬᠡᠪᠡ ᠃
ᠵᠠᠪᠰᠠᠷ ᠦᠭᠡᠢ ᠬᠥᠯᠬᠢᠬᠦ ᠮᠠᠰᠢᠨ ᠲᠡᠷᠭᠡ ᠨᠦ᠍ᠭᠦᠳ
ᠵᠠᠢ ᠦᠭᠡᠢ ᠰᠢᠬᠠᠯᠳᠤᠭᠰᠠᠨ ᠪᠠᠷᠢᠯᠭᠠ ᠳᠤᠮᠳᠠ
ᠵᠦᠭ ᠢ᠋ᠶ᠋ᠡᠨ ᠠᠯᠳᠠᠵᠤ ᠲᠣᠯᠣᠭᠠᠢ ᠡᠷᠭᠢᠭᠡᠳ
ᠵᠣᠯᠪᠢᠩ ᠰᠢᠭ᠋ ᠬᠡᠳᠦᠨ ᠬᠣᠨᠣᠭ ᠲᠡᠨᠦᠯᠡ ᠃
ᠵᠣᠯᠪᠢᠩ ᠨᠣᠬᠠᠢ ᠪᠠᠢᠬᠤ ᠶ᠋ᠢᠨ
ᠵᠣᠪᠠᠯᠠᠩ ᠢ᠋ ᠬᠠᠷᠢᠨ ᠨᠢᠭᠡ ᠠᠮᠰᠠᠵᠤ ᠦᠵᠡᠯᠡ ᠲᠠ ᠃
ᠵᠣᠯ ᠵᠠᠶᠠᠭᠠᠨ ᠳ᠋ᠤ᠌ ᠪᠠᠨ ᠭᠣᠮᠣᠳᠠᠭᠠᠳ
ᠵᠣᠯ ᠲᠠᠢ ᠯᠠ ᠦᠬᠦᠬᠦ ᠰᠢᠬᠠᠯᠠ ᠃
ᠣᠷᠣᠨ ᠰᠠᠭᠤᠴᠠ ᠶ᠋ᠢᠨ ᠬᠣᠷᠢᠶᠠᠯᠠᠯ ᠳᠤᠮᠳᠠᠭᠤᠷ
ᠣᠷᠣᠵᠤ ᠨᠢᠭᠡ ᠲᠣᠭᠣᠷᠢᠵᠤ ᠨᠢᠭᠡ ᠶᠠᠪᠤᠵᠤ ᠪᠠᠢᠲᠠᠯᠠ
ᠣᠭᠲᠣ ᠬᠠᠷᠠᠭᠠ ᠦᠭᠡᠢ ᠬᠠᠴᠢᠨ ᠵᠢᠰᠦᠮ ᠦ᠋ᠨ ᠨᠣᠬᠠᠳ
ᠣᠢᠷᠠᠲᠤᠵᠤ ᠨᠠᠮᠠ ᠶ᠋ᠢ ᠪᠦᠰᠡᠯᠡᠪᠡ ᠃
ᠰᠡᠭᠦᠯ ᠠᠭᠰᠠᠨ ᠳᠠᠭᠠᠷᠢᠯᠠ ᠃
ᠰᠦᠷᠳᠡᠵᠦ ᠪᠢ ᠵᠢᠭᠤᠲᠠᠭᠰᠠᠨ ᠦᠭᠡᠢ ᠃
ᠪᠣᠣᠬᠠᠢ ᠴᠢᠨᠣᠠ ᠲᠠᠢ ᠲᠡᠮᠡᠴᠡᠵᠦ ᠶᠠᠪᠤᠭᠰᠠᠨ ᠲᠤᠷᠰᠢᠯᠭᠠ ᠪᠠᠷ ᠢ᠋ᠶ᠋ᠠᠨ
ᠪᠣᠭᠣᠷᠯᠠᠭᠰᠠᠨ ᠨᠣᠬᠠᠳ ᠲᠠᠢ ᠦᠵᠡᠯᠴᠡᠵᠦ ᠳᠡᠢᠯᠦᠯᠡ ᠲᠠ᠃
ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠨᠤᠲᠤᠭ ᠲᠤ᠌ ᠪᠠᠢᠭᠠ ᠰᠠᠨ ᠪᠣᠯ
ᠥᠯᠥᠰᠬᠦ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠦᠵᠡᠨᠡ ᠭᠡᠵᠦ ᠦᠭᠡᠢ ᠰᠠᠨ ᠃
ᠳᠠᠩᠴᠤ ᠬᠥᠮᠦᠨ ᠣ ᠨᠤᠲᠤᠭ ᠲᠤ᠌ ᠪᠠᠢᠭᠠ ᠪᠣᠯᠬᠣᠷ
ᠳᠠᠭᠠᠭᠠᠮᠠᠢ ᠶᠡᠬᠡ ᠥᠯᠥᠰᠴᠦ ᠶᠠᠳᠠᠷᠠᠯᠠ ᠃
ᠬᠣᠭᠣᠯᠠ ᠬᠠᠢᠨ ᠭᠦᠶᠦᠵᠦ ᠶᠠᠪᠤᠭᠰᠠᠭᠠᠷ
ᠬᠣᠭ ᠤ᠋ᠨ ᠰᠠᠪᠠ ᠶ᠋ᠢᠨ ᠣᠢᠷᠠ ᠢᠷᠡᠯᠡ ᠃
ᠭᠡᠨᠡᠳᠲᠡ ᠲᠡᠭᠡᠲᠡᠯᠡ ᠫᠤᠤ ᠳᠤᠤᠭᠠᠷᠴᠤ
ᠭᠡᠮ ᠦᠭᠡᠢ ᠨᠢᠭᠡ ᠨᠣᠬᠠᠢ ᠳᠡᠷᠡᠢᠬᠦ ᠬᠠᠷᠠᠭᠳᠠᠯᠠ ᠃
ᠶᠡᠬᠡ ᠬᠣᠯᠠ ᠶ᠋ᠢᠨ ᠡᠨᠡ ᠡᠷᠬᠢᠮᠰᠦᠭ ᠬᠥᠮᠦᠰ ᠴᠢᠨᠢ
ᠡᠵᠡᠨ ᠦᠭᠡᠢ ᠶᠠᠪᠤᠭᠠ ᠨᠣᠬᠠᠢ ᠶ᠋ᠢ ᠦᠵᠡᠬᠦ ᠦᠭᠡᠢ ᠶᠦᠮ ᠭᠡᠵᠦ
ᠡᠪ ᠵᠦᠢ ᠶ᠋ᠢ ᠨᠢ ᠲᠠᠭᠠᠷᠠᠭᠤᠯᠵᠤ ᠪᠠᠢᠭᠠᠳ
ᠡᠳ᠋ ᠪᠡᠯᠡ ᠬᠢᠳᠡᠭ ᠪᠣᠯᠤᠯᠲᠠᠢ ᠶᠤᠮ ᠪᠠᠢᠨᠠ ᠃
ᠦᠳᠲᠡᠷ ᠲᠦᠷᠭᠡᠨ ᠵᠠᠢᠯᠠᠬᠤ ᠦᠭᠡᠢ ᠪᠣᠯ
ᠦᠬᠦᠵᠦ ᠴᠦ᠍ ᠮᠡᠳᠡᠬᠦ ᠨᠢ ᠠ᠋! ᠭᠡᠳ
ᠬᠠᠨᠳᠤᠭᠰᠠᠨ ᠵᠦᠭ ᠤᠷᠤᠭᠤ ᠪᠠᠨ ᠳᠠᠪᠬᠢᠵᠤ ᠶᠠᠪᠤᠲᠠᠯᠠ
ᠬᠠᠴᠢᠨ ᠲᠠᠨᠢᠯ ᠦᠨᠦᠷ ᠬᠠᠩ ᠬᠢᠯᠡ ᠃
ᠬᠣᠲᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠪᠡᠯᠴᠢᠵᠦ ᠶᠠᠪᠤᠭᠠ
ᠬᠣᠨᠢ ᠢᠮᠠᠭᠠ ᠬᠠᠷᠠᠭᠳᠠᠬᠤ ᠨᠢ ᠲᠡᠷᠡ ᠃
ᠬᠠᠨᠢ ᠢᠵᠢᠯᠢ ᠪᠡᠨ ᠣᠯᠤᠭᠰᠠᠨ ᠶᠤᠮ ᠰᠢᠭ᠋
ᠬᠠᠴᠢᠨ ᠶᠡᠬᠡ ᠪᠠᠶᠠᠷᠯᠠᠭᠠᠳ ᠳᠥᠭᠥᠲᠡᠯᠡ
ᠬᠦᠢ! ᠬᠠᠢ! ᠵᠣᠯᠪᠢᠩ ᠨᠣᠬᠠᠢ ᠢᠷᠡᠯᠡ ᠃
ᠬᠠᠭᠤ ᠲᠠᠲᠠᠴᠢᠬᠠᠨᠠ ᠰᠢᠦ ᠂ ᠨᠠᠭᠠᠳᠤᠬᠢ ᠴᠢᠨᠢ
ᠬᠣᠨᠢ ᠢᠮᠠᠭᠠ ᠶ᠋ᠢ ᠮᠢᠨᠢ ᠭᠡᠵᠦ ᠬᠥᠮᠦᠰ ᠬᠠᠰᠬᠢᠷᠤᠯᠳᠤᠯᠠ ᠃
ᠡᠨᠳᠡ ᠲᠡᠨᠳᠡ ᠡᠴᠡ ᠴᠢᠯᠠᠭᠤ ᠨᠡᠭᠦᠯᠭᠡᠯᠡ ᠃
ᠬᠣᠨᠢ ᠮᠠᠯ ᠤ᠋ᠨ ᠠᠪᠤᠷᠠᠨ ᠬᠠᠮᠠᠭᠠᠯᠠᠭᠴᠢ
ᠬᠣᠲᠠᠴᠢ ᠨᠣᠬᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠤᠷᠠᠰᠤᠨ
ᠬᠣᠭᠣᠯᠠᠢ ᠮᠢᠨᠢ ᠵᠠᠩᠭᠢᠷᠠᠭᠠᠳ ᠢᠷᠡᠯᠡ ᠃
ᠬᠣᠷᠭᠣᠳᠠᠨ ᠬᠣᠷᠭᠣᠳᠠᠭᠰᠠᠭᠠᠷ ᠬᠣᠯᠠᠳᠠᠯᠠ ᠃
ᠳᠠᠬᠢᠭᠠᠳ ᠯᠠ ᠴᠠᠭᠠᠱᠢ ᠪᠠᠨ ᠳᠡᠮᠡᠢ ᠳᠠᠪᠬᠢᠵᠤ ᠶᠠᠪᠤᠭᠠᠳ ᠭᠠᠷᠲᠠᠯᠠ
ᠬᠥᠭᠡᠷᠦᠬᠦᠢ ᠡᠵᠡᠨ ᠮᠢᠨᠢ ᠠᠯᠬᠤᠵᠤ ᠶᠠᠪᠤᠯᠠ ᠃
ᠬᠥᠯ ᠦ᠋ᠨ ᠬᠤᠷᠳᠤ ᠪᠠᠷ ᠬᠠᠷᠠᠢᠵᠤ ᠬᠦᠷᠦᠯᠡ ᠃
ᠥᠪᠡᠷ ᠦ᠋ᠨ ᠡᠵᠡᠨ ᠭᠡᠳᠡᠭ ᠶᠠᠭᠤᠲᠠᠢ ᠰᠠᠢᠬᠠᠨ
ᠥᠭᠭᠢᠶᠡᠮᠦᠷ ᠬᠠᠢᠷᠠ ᠨᠢ ᠶᠠᠮᠠᠷ ᠠᠭᠤᠤ ᠪᠣᠢ ᠃
ᠬᠡᠷᠪᠡ ᠪᠢ ᠶᠠᠷᠢᠵᠤ ᠴᠢᠳᠠᠳᠠᠭ ᠰᠠᠨ ᠪᠣᠯ
ᠬᠡᠷᠬᠢᠨ ᠲᠠᠯᠠᠷᠬᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠬᠦ ᠪᠠᠢᠯᠠ ᠃
ᠲᠥᠷᠥᠭᠰᠡᠨ ᠨᠤᠲᠤᠭ ᠲᠤ᠌ ᠪᠠᠨ ᠪᠤᠴᠠᠵᠤ ᠣᠴᠢᠬᠤ ᠶ᠋ᠢ
ᠲᠦᠮᠡᠨᠲᠡ ᠮᠥᠷᠭᠥᠵᠦ ᠭᠤᠶᠤᠬᠤ ᠪᠠᠢᠯᠠ ᠃
ᠬᠥᠮᠦᠰ ᠲᠠ ᠨᠠᠷ ᠲᠤ᠌ ᠪᠢᠳᠡ ᠴᠢᠨᠢ ᠪᠠᠶᠠᠷᠯᠠᠵᠤ ᠶᠠᠪᠤᠳᠠᠭ ᠶᠤᠮ ᠠ᠋!
ᠪᠠᠶᠠᠷᠯᠠᠵᠤ ᠶᠠᠪᠤᠳᠠᠭ ᠶᠤᠮ ᠠ᠋!
ᠬᠥᠮᠦᠨ ᠢ᠋ ᠲᠤᠰᠠᠯᠠᠬᠤ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠠᠨ
ᠪᠠᠬᠠᠷᠬᠠᠵᠤ ᠶᠠᠪᠤᠳᠠᠭ ᠶᠤᠮ ᠠ᠋! ᠥᠪᠡᠷᠰᠡᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠨ
ᠬᠣᠯᠠ ᠶ᠋ᠢᠨ ᠬᠣᠯᠠ ᠬᠣᠲᠠ ᠭᠠᠵᠠᠷ ᠨᠡᠭᠦᠬᠦ ᠳ᠋ᠦ᠍ ᠪᠡᠨ
ᠬᠣᠭᠣᠰᠣᠨ ᠪᠠᠭᠤᠷᠢᠨ ᠳᠡᠭᠡᠷᠡ ᠪᠡᠨ ᠣᠷᠬᠢᠵᠤ ᠶᠠᠪᠤᠭᠠ ᠦᠭᠡᠢ
ᠬᠣᠲᠠᠴᠢ ᠨᠣᠬᠠᠢ ᠪᠣᠯᠭᠠᠬᠤ ᠬᠣᠪᠣᠷᠬᠠᠨ ᠵᠠᠶᠠᠭᠠ ᠶ᠋ᠢ ᠬᠠᠢᠷᠠᠯᠠᠭᠰᠠᠨ
ᠡᠵᠡᠨ ᠬᠥᠮᠦᠨ ᠦ᠌ ᠪᠡᠨ ᠡᠭᠡᠨᠡᠭᠰᠢᠬᠦᠢ ᠠᠴᠢ ᠶ᠋ᠢ
ᠡᠨᠡ ᠶᠠᠪᠤᠭᠠ ᠨᠠᠰᠤᠨ ᠳ᠋ᠤ᠌ ᠪᠠᠨ ᠬᠠᠷᠢᠭᠤᠯᠠᠨᠠ ᠭᠡᠵᠦ ᠪᠣᠳᠣᠳᠠᠭ ᠃
ᠬᠣᠢᠲᠤ ᠨᠠᠰᠤ ᠭᠡᠵᠦ ᠬᠠᠷᠢᠨ ᠦᠨᠡᠬᠡᠷ ᠪᠠᠢᠳᠠᠭ ᠶᠤᠮ ᠪᠣᠯ
ᠬᠣᠲᠠ ᠶ᠋ᠢᠨ ᠨᠣᠬᠠᠢ ᠯᠠ ᠪᠣᠯᠵᠤ ᠲᠥᠷᠥᠬᠦ ᠦᠭᠡᠢ ᠶᠦᠮ ᠰᠠᠨ ᠲᠠ!
※ᠵᠣᠬᠢᠶᠠᠯᠴᠢ᠄ ᠴ· ᠨᠠᠷᠠᠨᠴᠡᠴᠡᠭ
ᠨᠠᠢᠷᠠᠭᠤᠯᠤᠭᠴᠢ᠄ ᠭ· ᠮᠥᠩᠬᠡᠲᠦ
ᠵᠢᠷᠤᠭᠯᠠᠴᠢ᠄ ᠪ· ᠪᠠᠲᠤᠴᠢᠯᠠᠭᠤᠨ
ᠬᠥᠳᠡᠯᠭᠡᠭᠡᠨ ᠣ ᠵᠢᠷᠤᠭᠠᠴᠢ᠄ ᠭ· ᠮᠥᠩᠬᠡᠪᠠᠲᠤ᠂ ᠮ· ᠤᠤᠭᠠᠨᠪᠠᠶᠠᠷ
ᠡᠪᠯᠡᠭᠦᠯᠦᠭᠴᠢ᠄ ᠳ· ᠭᠠᠩᠪᠠᠭᠠᠲᠤᠷ᠂
ᠳᠠᠭᠤᠤ ᠣᠷᠣᠭᠤᠯᠤᠭᠰᠠᠨ ᠵᠥᠴᠥᠭᠡᠭᠴᠢᠳ᠄ ᠭ· ᠷᠠᠪᠳᠠᠨ᠂ ᠱ· ᠪᠠᠲᠤᠪᠤᠯᠤᠳ
ᠫᠷᠦᠳ᠋ᠶᠣᠰᠸᠷ᠄ ᠭ· ᠮᠥᠩᠬᠡᠪᠠᠲᠤ
ᠮᠣᠩᠭᠣᠯ ᠦᠰᠦᠭ ᠬᠠᠳᠠᠭᠴᠢ ᠄ ᠵᠡᠷᠮᠦᠳ ᠸ· ᠥᠯᠵᠡᠢ
ᠬᠢᠨᠠᠭᠴᠢ᠄ ᠮᠥᠴᠢᠷ