ᠮᠡᠳᠡᠭᠦᠯᠭᠡ-ᠴ· ᠬᠤᠯᠠᠨ Мэдүүлэг-Ц,Хулан
1403ᠮᠡᠳᠡᠭᠦᠯᠭᠡ
ᠴ· ᠬᠤᠯᠠᠨ ᠬᠤᠷᠠᠬᠤ ᠠᠩᠭᠢ ᠠ᠋ᠴᠠ ᠰᠢᠯᠦᠭ
ᠮᠣᠰᠺᠸᠠ ᠶ᠋ᠢᠨ ᠬᠢᠨ ᠨᠠᠳᠠ ᠪᠠᠷ ᠲᠤᠭ ᠲᠠᠬᠢᠵᠠᠢ᠂
ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠴᠢ ᠦᠨᠡᠬᠡᠷ ᠮᠣᠬᠣᠵᠠᠢ᠃
ᠨᠠᠴᠤᠭᠳᠣᠷᠵᠢ᠂ ᠷᠢᠨᠴᠢᠨ ᠶᠡᠬᠡᠰ ᠢ᠋ ᠲᠠᠮᠤᠯᠠᠳᠠᠭ ᠱᠣᠷᠣᠩ ᠳ᠋ᠤ᠌ ᠪᠠᠨ᠂
ᠨᠠᠮᠠ ᠶ᠋ᠢ ᠴᠢᠬᠢᠵᠦ ᠲᠠᠮᠤᠯᠠᠬᠤ ᠴᠢᠨᠢ ᠨᠡᠷᠡ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠠ᠋᠃
ᠨᠣᠮ ᠤ᠋ᠨ ᠮᠤᠩᠬᠠᠭ ᠢ᠋ ᠮᠠᠭᠲᠠᠵᠤ ᠵᠠᠯᠠᠳᠠᠭ᠂
ᠨᠣᠮ ᠲᠠᠢ ᠮᠡᠷᠭᠡᠳ ᠢ᠋ ᠭᠦᠳᠬᠡᠵᠦ ᠠᠯᠠᠳᠠᠭ᠃
ᠲᠥᠷᠥ ᠴᠢᠷᠠᠢᠯᠠᠭᠰᠠᠨ ᠤᠯᠠᠭᠠᠨ ᠨᠠᠮ ᠤ᠋ᠨ ᠬᠢᠨ ᠢ᠋᠂
ᠲᠥᠷᠬᠦ ᠦᠭᠡᠢ ᠪᠤᠵᠠᠷ ᠶᠠᠪᠤᠳᠠᠯ ᠤ᠋ᠳ ᠢ᠋ ᠮᠡᠳᠡᠬᠦ ᠦᠭᠡᠢ ᠴᠦ᠍ ᠪᠢᠰᠢ ᠳᠡ᠃
ᠬᠣᠷᠣᠬᠠᠢᠲᠤᠭᠰᠠᠨ ᠪᠠᠭᠠᠪᠠᠭᠠᠢ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠪᠠᠷᠢᠵᠤ ᠰᠢᠲᠠᠵᠤ ᠥᠭᠭᠦᠭᠰᠡᠨ᠂
ᠭᠤᠷᠪᠠᠨ ᠲᠦᠮᠡᠨ ᠮᠣᠩᠭᠣᠯ ᠤ᠋ᠨ ᠠᠮᠢᠨ ᠵᠣᠯᠢᠶᠠ ᠶ᠋ᠢ ᠮᠠᠷᠲᠠᠭᠠ ᠤᠤ⁈
ᠬᠣᠨᠵᠢᠨ ᠳ᠋ᠤ᠌ ᠮᠠᠭᠤ ᠶ᠋ᠢᠨ ᠬᠢᠮᠤᠰᠤᠨ ᠳ᠋ᠤ᠌ ᠭᠣᠬᠠᠳᠠᠭᠤᠯᠤᠭᠰᠠᠨ᠂
ᠭᠤᠷᠪᠠᠨ ᠰᠠᠶᠠ ᠠᠷᠠᠳ ᠤ᠋ᠨ ᠮᠢᠨᠢ ᠭᠤᠨᠢᠭ ᠵᠣᠪᠠᠯᠠᠩ ᠪᠠᠭᠠᠳᠠᠭᠠ ᠤᠤ⁈
ᠠᠯᠲᠠ ᠪᠡᠶᠡ ᠶ᠋ᠢ ᠮᠢᠨᠢ ᠲᠡᠯᠡᠵᠦ ᠬᠠᠲᠠᠭᠠᠳ ᠨᠢᠭᠡᠳᠦᠭᠰᠡᠨ ᠴᠦ᠍᠂
ᠠᠯᠳᠠᠭᠠ ᠨᠢᠭᠦᠯ ᠢ᠋ ᠲᠠ ᠨᠠᠷ ᠨᠠᠳᠠ ᠠ᠋ᠴᠠ ᠣᠯᠬᠤ ᠦᠭᠡᠢ᠃
ᠠᠯᠲᠠ ᠠ᠋ᠴᠠ ᠤᠷᠲᠤ ᠮᠢᠨᠢ ᠣᠪᠣᠭᠠ ᠪᠤᠰᠬᠠᠵᠤ ᠮᠥᠩᠭᠥ ᠪᠡᠷ ᠮᠥᠷᠡᠨ ᠤᠷᠤᠰᠬᠠᠭᠠᠳ ᠴᠣ᠂
ᠠᠳᠠᠭ ᠤ᠋ᠨ ᠰᠢᠨᠤᠬᠠᠢ ᠲᠠ ᠨᠠᠷ ᠰᠢᠭ᠋ ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠪᠢ ᠬᠤᠳᠠᠯᠳᠤᠬᠤ ᠦᠭᠡᠢ᠃
ᠪᠦᠷᠢᠨ ᠨᠤᠲᠤᠭ ᠤ᠋ᠨ ᠪᠣᠰᠤᠭᠠ ᠠᠭᠤᠯᠠᠰ ᠮᠢᠨᠦ ᠨᠣᠶᠠᠨ ᠨᠢᠷᠤᠭᠤ᠂
ᠨᠤᠭᠤᠷᠠᠰᠢ ᠦᠭᠡᠢ ᠶ᠋ᠢᠨ ᠪᠠᠲᠤᠯᠠᠭᠠ᠃
ᠪᠦᠰᠡᠭᠦᠢ ᠢᠯᠳᠠᠮ ᠴᠡᠴᠡᠭ ᠦ᠋ᠨ ᠰᠢᠭᠦᠳᠡᠷᠢ ᠮᠢᠨᠦ ᠴᠠᠩ ᠴᠠᠩ ᠤ᠋ᠨ ᠨᠢᠯᠪᠤᠰᠤ᠂
ᠬᠤᠪᠢᠷᠠᠰᠢ ᠦᠭᠡᠢ ᠶ᠋ᠢᠨ ᠨᠤᠲᠠᠯᠠᠭᠠ᠃
ᠰᠦᠷᠡᠵᠦ ᠳᠠᠪᠬᠢᠳᠠᠭ ᠡᠷᠡᠮᠡᠭ ᠰᠠᠯᠬᠢ ᠮᠢᠨᠦ ᠬᠡᠢᠮᠣᠷᠢ ᠵᠣᠷᠢᠭ ᠢ᠋ ᠠᠨᠳᠠᠬᠤ ᠦᠭᠡᠢ᠂
ᠰᠥᠬᠥᠷᠡᠵᠦ ᠤᠨᠠᠳᠠᠭ ᠬᠥᠷᠥᠰᠥᠲᠦ ᠭᠠᠵᠠᠷ ᠮᠢᠨᠦ ᠤᠶᠠᠬᠠᠨ ᠵᠥᠭᠡᠯᠡᠨ ᠢ᠋ ᠡᠨᠳᠡᠬᠦ ᠦᠭᠡᠢ᠃
ᠴᠥᠬᠥᠷᠡᠵᠦ ᠰᠢᠷᠳᠡᠭᠡ ᠬᠥᠬᠡ ᠲᠩᠷᠢ ᠮᠢᠨᠦ ᠠᠭᠤᠵᠢᠮ ᠰᠠᠷᠠᠭᠤᠯ ᠢ᠋ ᠮᠡᠳᠡᠨᠡ᠂
ᠬᠥᠬᠡᠷᠡᠵᠦ ᠠᠯᠤᠰᠯᠠᠭᠠ ᠣᠨ ᠵᠢᠯ ᠦ᠋ᠳ ᠮᠢᠨᠦ ᠤᠳᠤᠮ ᠰᠤᠳᠤᠷ ᠢ᠋ ᠮᠡᠳᠡᠨᠡ᠃
ᠳᠡᠯᠭᠡᠷᠡᠭᠡᠳ ᠤᠭᠲᠤᠳᠠᠭ ᠲᠤᠤᠯᠠ ᠶ᠋ᠢᠨ ᠲᠣᠬᠣᠢ ᠳ᠋ᠤ᠌ ᠪᠣᠳᠣᠭᠰᠠᠨ ᠰᠠᠭᠤᠭᠰᠠᠨ ᠮᠥᠷ ᠮᠢᠨᠢ ᠪᠣᠢ᠂
ᠳᠡᠯᠭᠡᠷᠡᠭᠡᠳ ᠤᠩᠰᠢᠳᠠᠭ ᠲᠤᠤᠯᠢᠰ ᠰᠤᠳᠤᠷ ᠲᠤ ᠪᠣᠳᠣᠭᠰᠠᠨ ᠤᠬᠠᠭᠠᠷᠠᠭᠰᠠᠨ ᠵᠠᠮ ᠮᠢᠨᠢ ᠪᠣᠢ᠃
ᠳᠡᠷᠭᠡᠳᠡ ᠨᠢ ᠢᠨᠢᠶᠡᠵᠦ ᠳᠤᠮᠳᠠ ᠨᠢ ᠮᠢᠨᠦ ᠰᠡᠮᠬᠡᠨ ᠤᠬᠢᠯᠠᠵᠤ ᠶᠠᠪᠤᠭᠰᠠᠨ᠂
ᠳᠡᠭᠡᠳᠦᠰ ᠦ᠋ᠨ ᠪᠤᠷᠬᠠᠳ ᠠ᠋ᠴᠠ ᠴᠤ᠌ ᠢᠪᠡᠭᠡᠯᠲᠡᠢ ᠡᠭᠡᠯ ᠲᠦᠮᠡᠨ ᠦ᠌ ᠪᠡᠨ ᠡᠮᠦᠨᠡ᠂
ᠮᠡᠯᠮᠡᠢ ᠪᠡᠨ ᠨᠣᠷᠭᠠᠵᠤ ᠮᠡᠳᠡᠭᠦᠯᠭᠡ ᠪᠡᠨ ᠢᠯᠡ ᠥᠭᠭᠦᠶᠡ᠂
ᠥᠯᠮᠡᠢ ᠪᠡᠨ ᠡᠷᠭᠦᠵᠦ ᠥᠴᠢᠭ ᠢ᠋ᠶ᠋ᠡᠨ ᠲᠣᠳᠣ ᠥᠭᠭᠦᠶᠡ᠃
ᠮᠢᠨᠦ ᠨᠤᠲᠠᠯᠠᠬᠤ ᠪᠠᠷᠢᠮᠲᠠ᠂
ᠮᠡᠴᠢᠳ ᠵᠢᠷᠭᠤᠭᠠᠨ ᠦᠰᠦᠭ ᠢ᠋ᠶ᠋ᠡᠷ ᠭᠡᠷᠡᠯᠲᠦᠭᠦᠯᠵᠦ ᠪᠢᠴᠢᠳᠡᠭ᠃
ᠡᠬᠡ ᠣᠷᠣᠨ ᠮᠢᠨᠢ ᠪᠦᠬᠦᠯᠢ ᠪᠡᠷ ᠢ᠋ᠶ᠋ᠡᠨ᠂
ᠬᠠᠴᠢᠯᠠᠵᠤ ᠪᠢᠰᠢ ᠴᠢᠩ ᠦᠨᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠠᠮᠠ ᠶ᠋ᠢ ᠰᠢᠭᠦᠬᠦ᠃
ᠬᠠᠢᠷᠠᠲᠠᠢ ᠪᠦᠬᠦᠨ ᠢ᠋ᠶ᠋ᠡᠨ ᠥᠮᠥᠭᠯᠡᠭᠰᠡᠨ ᠡᠨᠡ ᠯᠡ ᠮᠢᠨᠦ《ᠮᠠᠰᠢ ᠨᠢᠭᠤᠴᠠ》 ᠲᠡᠦᠬᠡ᠂
ᠲᠡᠮᠦᠷ ᠦ᠋ᠨ ᠮᠠᠭᠤ ᠬᠢᠲᠤᠭᠠ ᠪᠣᠯᠳᠠᠭ ᠭᠡᠨᠡ ᠯᠠᠢ᠂ ᠦᠨᠡᠨ ᠶᠦᠮ ᠪᠠᠢᠨᠠ᠃
ᠲᠥᠷᠥ ᠶ᠋ᠢᠨ ᠮᠠᠭᠤ ᠨᠢ ᠬᠤᠶᠠᠭ ᠪᠢᠰᠢ ᠰᠢᠭᠦᠭᠴᠢ ᠪᠣᠯᠤᠭᠰᠠᠨ ᠨᠢ ᠬᠤᠳᠠᠯ ᠦᠭᠡᠢ ᠪᠠᠢᠨᠠ᠂
ᠠᠯᠤᠬᠠ ᠪᠠᠷ ᠴᠣᠬᠢᠵᠤ ᠠᠯᠠᠬᠤ ᠠ᠋ᠴᠠ ᠨᠢ ᠡᠮᠦᠨᠡ᠂
ᠠᠮᠵᠢᠵᠤ ᠲᠠ ᠨᠠᠷ ᠠ᠋ᠴᠠ ᠭᠠᠭᠴᠠᠬᠠᠨ ᠶᠠᠭᠤᠮᠠ ᠠᠰᠠᠭᠤᠶᠠ᠃
ᠬᠠᠰᠪᠤᠤ ᠴᠢᠩᠭᠢᠰ ᠦ᠋ᠨ ᠲᠠᠮᠠᠭᠠ ᠪᠠᠨ ᠡᠯᠵᠢᠭᠡᠨ ᠳ᠋ᠦ᠍ ᠠᠴᠢᠶᠠᠯᠠᠭᠠᠳ᠂
ᠬᠠᠮᠢᠭᠠ ᠬᠦᠷᠴᠦ ᠶᠠᠪᠤᠨᠠ ᠪᠣᠢ ᠴᠢ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠠ᠋⁈
ᠬᠣᠶᠠᠷ ᠮᠢᠩᠭᠠ ᠬᠣᠷᠢᠨ ᠭᠤᠷᠪᠠᠨ ᠣᠨ ᠤ᠋ ᠬᠣᠶᠠᠳᠤᠭᠠᠷ ᠰᠠᠷᠠ ᠠ᠋ᠴᠠ ᠲᠠᠪᠤᠳᠤᠭᠠᠷ ᠰᠠᠷᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠮᠥᠩᠬᠡ ᠭᠠᠯ
ᠦᠰᠦᠭ ᠬᠠᠲᠠᠭᠴᠢ᠄ ᠮᠥᠩᠬᠡ ᠭᠠᠯ
ᠬᠢᠨᠠᠭᠴᠢ᠄ ᠮᠠᠨᠳᠠᠷᠠᠸᠠ᠂ ᠪᠠᠶᠠᠷᠴᠡᠴᠡᠭ