ᠮᠣᠩᠭᠣᠯ ᠰᠢᠲᠠᠷᠠ ᠶᠢᠨ ᠳᠦᠷᠢᠮ Монгол шатрын дүрэм
665 ᠲᠤᠰ ᠳᠦᠷᠢᠮ ᠢ᠋ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠰᠢᠲᠠᠷᠠ ᠶ᠋ᠢᠨ ᠨᠡᠢᠭᠡᠮᠯᠢᠭ ᠡᠴᠡ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠰᠠᠨ ᠪᠤᠶᠤ ᠵᠥᠪᠰᠢᠶᠡᠷᠡᠭᠰᠡᠨ ᠤᠷᠤᠯᠳᠤᠭᠠᠨ᠂ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠵᠠᠪᠠᠯ ᠮᠥᠷᠳᠡᠬᠦ ᠶᠣᠰᠣᠲᠠᠢ᠃ ᠲᠤᠰ ᠨᠡᠢᠭᠡᠮᠯᠢᠭ ᠦ᠋ᠨ ᠪᠤᠰᠤ ᠡᠲᠡᠭᠡᠳ ᠡᠴᠡ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠪᠠᠢᠭᠠ ᠲᠣᠭᠯᠠᠯᠲᠠ ᠳ᠋ᠤ᠌ ᠮᠥᠨ ᠲᠤᠰ ᠳᠦᠷᠢᠮ ᠢ᠋ ᠮᠥᠷᠳᠡᠬᠦ ᠶ᠋ᠢ ᠬᠦᠰᠡᠨ ᠵᠥᠪᠯᠡᠵᠦ ᠪᠠᠢᠨᠠ᠃
ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠰᠢᠳᠡᠷᠡ ᠶ᠋ᠢᠨ ᠨᠡᠢᠭᠡᠮᠯᠢᠭ ᠦ᠋ᠨ ᠭᠡᠰᠢᠭᠦᠨ ᠨᠡᠢᠭᠡᠮᠯᠢᠭ ᠡᠴᠡ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠪᠠᠢᠭᠠ ᠦᠶᠡ ᠳ᠋ᠦ᠍ ᠲᠤᠰ ᠰᠢᠳᠡᠷᠡ ᠶ᠋ᠢᠨ ᠳᠦᠷᠢᠮ ᠲᠡᠢ ᠬᠣᠯᠪᠣᠭᠠ ᠲᠠᠢ ᠠᠰᠠᠭᠤᠳᠠᠯ ᠢ᠋ᠶ᠋ᠠᠷ ᠵᠢᠷᠤᠮ ᠤ᠋ᠨ ᠵᠣᠬᠢᠴᠠᠭᠤᠯᠤᠯᠲᠠ ᠬᠢᠬᠦ ᠬᠦᠰᠡᠯᠲᠡ ᠭᠠᠷᠭᠠᠵᠤ ᠪᠣᠯᠤᠨᠠ᠃ ᠪᠠᠰᠠ ᠮᠣᠩᠭᠣᠯ ᠰᠢᠲᠠᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠤᠯᠠᠮᠵᠢᠯᠠᠯᠲᠤ ᠰᠠᠢᠬᠠᠨ ᠰᠣᠶᠣᠯ ᠢ᠋ᠶ᠋ᠠᠨ ᠬᠠᠳᠠᠭᠠᠯᠠᠵᠤ ᠪᠠᠳᠠᠷᠠᠭᠤᠯᠬᠤ ᠶ᠋ᠢᠨ ᠲᠥᠯᠥᠭᠡ ᠤᠯᠠᠮ ᠨᠠᠷᠢᠪᠴᠢᠯᠠᠭᠰᠠᠨ ᠳᠦᠷᠢᠮ ᠢ᠋ ᠨᠡᠮᠡᠨ ᠬᠡᠷᠡᠭᠵᠢᠭᠦᠯᠵᠦ ᠪᠣᠯᠤᠨᠠ᠃
ᠳᠡᠭᠡᠷᠡ ᠳᠤᠷᠠᠳᠤᠭᠰᠠᠨ ᠨᠡᠮᠡᠯᠲᠡ ᠳᠦᠷᠢᠮ ᠨᠢ ᠳᠣᠣᠷᠠᠬᠢ ᠭᠤᠷᠪᠠᠨ ᠤᠷᠢᠳᠴᠢᠯᠠᠯ ᠢ᠋ ᠵᠥᠷᠢᠴᠡᠬᠦ ᠦᠭᠡᠢ ᠪᠠᠢᠬᠤ ᠶ᠋ᠢ ᠡᠷᠬᠢᠮᠯᠡᠨᠡ᠃
ᠨᠢᠭᠡ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠰᠢᠳᠡᠷᠡ ᠶ᠋ᠢᠨ ᠨᠡᠢᠭᠡᠮᠯᠢᠭ ᠦ᠋ᠨ ᠳᠦᠷᠢᠮ ᠳ᠋ᠦ᠍ ᠨᠡᠢᠴᠡᠭᠦᠯᠦᠭᠰᠡᠨ ᠪᠠᠢᠬᠤ ᠬᠡᠷᠡᠭᠲᠡᠢ᠃
ᠬᠣᠶᠠᠷ᠂ ᠵᠥᠪᠬᠡᠨ ᠲᠤᠰ ᠭᠡᠰᠢᠭᠦᠨ ᠨᠡᠢᠭᠡᠮᠯᠢᠭ ᠦ᠋ᠨ ᠬᠦᠷᠢᠶᠡ ᠬᠡᠪᠴᠢᠶᠡᠨ ᠳ᠋ᠦ᠍ ᠬᠡᠷᠡᠭᠵᠢᠭᠦᠯᠦᠨᠡ᠃
ᠭᠤᠷᠪᠠ᠂ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠰᠢᠳᠡᠷᠡ ᠶ᠋ᠢᠨ ᠨᠡᠢᠭᠡᠮᠯᠢᠭ ᠡᠴᠡ ᠬᠡᠷᠡᠭᠵᠢᠭᠦᠯᠬᠦ ᠶ᠋ᠢ ᠠᠩᠬᠠ ᠠᠯᠬᠤᠮ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ᠃ ᠳᠠᠷᠤᠢ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠰᠢᠲᠠᠷᠠ ᠶ᠋ᠢᠨ ᠨᠡᠢᠭᠡᠮᠯᠢᠭ ᠢ᠋ ᠲᠥᠯᠥᠭᠡᠯᠡᠬᠦ ᠰᠢᠲᠠᠷᠠᠴᠢᠳ ᠤ᠋ᠨ ᠪᠠᠭ ᠢ᠋ ᠰᠢᠯᠭᠠᠷᠠᠭᠤᠯᠬᠤ ᠤᠷᠤᠯᠳᠤᠭᠠᠨ᠂ ᠨᠡᠢᠭᠡᠮᠯᠢᠭ ᠡᠴᠡ ᠴᠣᠯᠠ ᠣᠯᠭᠣᠬᠤ ᠤᠷᠤᠯᠳᠤᠭᠠᠨ᠂ ᠵᠡᠷᠭᠡ ᠳᠡᠰ ᠦ᠋ᠨ ᠬᠤᠪᠢ ᠲᠡᠮᠳᠡᠭᠯᠡᠬᠦ ᠤᠷᠤᠯᠳᠤᠭᠠᠨ ᠵᠡᠷᠭᠡ ᠳ᠋ᠦ᠍ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠦᠭᠡᠢ᠃
ᠨᠢᠭᠡᠳᠦᠭᠡᠷ ᠪᠦᠯᠦᠭ ᠲᠣᠭᠯᠠᠯᠲᠠ ᠶ᠋ᠢᠨ ᠦᠨᠳᠦᠰᠦᠨ ᠳᠦᠷᠢᠮ
ᠨᠢᠭᠡᠳᠦᠭᠡᠷ ᠵᠦᠢᠯ ᠮᠣᠩᠭᠣᠯ ᠰᠢᠳᠡᠷᠡ ᠶ᠋ᠢᠨ ᠲᠣᠭᠯᠠᠯᠲᠠ ᠶ᠋ᠢᠨ ᠰᠢᠨᠵᠢ ᠴᠢᠨᠠᠷ
ᠨᠢᠭᠡ᠂ ᠰᠢᠲᠠᠷᠠ ᠶ᠋ᠢᠨ ᠲᠣᠭᠯᠠᠯᠲᠠ ᠨᠢ《 ᠰᠢᠲᠠᠷᠠ ᠶ᠋ᠢᠨ ᠬᠥᠯᠭᠡ》 ᠭᠡᠮᠡᠨ ᠨᠡᠷᠡᠯᠡᠬᠦ ᠲᠡᠭᠰᠢ ᠳᠦᠷᠪᠡᠯᠵᠡᠨ ᠬᠥᠯᠭᠡ ᠳᠡᠭᠡᠷᠡ ᠬᠣᠶᠠᠷ ᠲᠣᠭᠯᠠᠭᠴᠢ ᠰᠢᠲᠠᠷᠠ ᠶ᠋ᠢᠨ ᠬᠦᠴᠦᠨ ᠢ᠋ᠶ᠋ᠡᠨ ᠡᠭᠡᠯᠵᠢᠯᠡᠨ ᠨᠡᠭᠦᠵᠦ ᠲᠣᠭᠯᠠᠨᠠ᠃ ᠴᠠᠢᠪᠤᠷ ᠥᠩᠭᠡ ᠶ᠋ᠢᠨ ᠬᠦᠴᠦᠨ ᠲᠡᠢ (ᠴᠠᠭᠠᠨ) ᠲᠠᠯᠠ ᠶ᠋ᠢᠨ ᠲᠣᠭᠯᠠᠭᠴᠢ ᠡᠬᠢᠨ ᠦ᠌ ᠨᠡᠭᠦᠳᠡᠯ ᠢ᠋ ᠭᠦᠢᠴᠡᠳᠬᠡᠵᠦ᠂ ᠪᠠᠷᠠᠭᠠᠨ ᠥᠩᠭᠡ ᠶ᠋ᠢᠨ ᠬᠦᠴᠦᠨ ᠲᠡᠢ (ᠬᠠᠷᠠ) ᠲᠠᠯᠠ ᠶ᠋ᠢᠨ ᠲᠣᠭᠯᠠᠭᠴᠢ ᠳᠠᠷᠠᠭᠠ ᠶ᠋ᠢᠨ ᠨᠡᠭᠦᠳᠡᠯ ᠢ᠋ ᠨᠡᠭᠦᠨᠡ᠃ ᠡᠭᠡᠯᠵᠢ ᠳᠠᠷᠠᠭᠠᠯᠠᠬᠤ ᠳ᠋ᠤ᠌ ᠪᠠᠨ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠲᠣᠭᠯᠠᠭᠴᠢ ᠨᠡᠭᠦᠭᠰᠡᠨ ᠦ᠌ ᠳᠠᠷᠠᠭᠠ ᠡᠨᠡ ᠲᠠᠯᠠ ᠰᠠᠶᠢ ᠨᠡᠭᠦᠬᠦ ᠡᠷᠬᠡ ᠲᠡᠢ ᠪᠣᠯᠤᠨᠠ᠃
ᠬᠣᠶᠠᠷ᠂ ᠲᠣᠭᠯᠠᠭᠴᠢ ᠶ᠋ᠢᠨ ᠵᠣᠷᠢᠯᠭᠠ ᠨᠢ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠨᠣᠶᠠᠨ ᠤᠷᠤᠭᠤ ᠳᠣᠪᠲᠣᠯᠵᠤ (ᠱᠠᠯᠠᠵᠤ) ᠨᠡᠭᠦᠬᠦ ᠨᠡᠭᠦᠳᠡᠯ ᠦᠭᠡᠢ ᠪᠣᠯᠭᠠᠨ ᠮᠠᠳᠯᠠᠬᠤ ᠳ᠋ᠤ᠌ ᠣᠷᠣᠰᠢᠨᠠ᠃ ᠡᠨᠡ ᠬᠦ᠌ ᠵᠣᠷᠢᠯᠭᠠ ᠳ᠋ᠤ᠌ ᠪᠠᠨ ᠬᠦᠷᠴᠦ ᠴᠢᠳᠠᠭᠰᠠᠨ ᠲᠣᠭᠯᠠᠭᠴᠢ ᠶ᠋ᠢ ᠠᠢᠯ ᠤ᠋ᠨ ᠨᠣᠶᠠᠨ ᠢ᠋ ᠮᠠᠳᠯᠠᠭᠰᠠᠨ ᠭᠡᠵᠦ ᠲᠤᠰ ᠥᠷᠥᠭ ᠲᠦ᠍ ᠢᠯᠠᠭᠰᠠᠨ (ᠬᠣᠨᠵᠢᠭᠰᠠᠨ) ᠢ᠋ᠶ᠋ᠠᠷ ᠲᠣᠭᠠᠴᠠᠨᠠ᠃ ᠥᠪᠡᠷ ᠦ᠋ᠨ ᠨᠣᠶᠠᠨ ᠢ᠋ᠶ᠋ᠠᠨ ᠱᠠᠯᠠᠭᠠᠨ ᠳ᠋ᠤ᠌ ᠣᠷᠬᠢᠨ ᠶᠠᠪᠤᠬᠤ᠂ ᠱᠠᠯᠠᠭᠠᠨ ᠳ᠋ᠤ᠌ ᠣᠷᠣᠭᠤᠯᠬᠤ᠂ ᠠᠢᠯ ᠤ᠋ᠨ ᠨᠣᠶᠠᠨ ᠢ᠋ ᠢᠳᠡᠬᠦ ᠵᠡᠷᠭᠡ ᠶᠠᠪᠤᠭᠠ ᠶ᠋ᠢ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ᠃ ᠨᠣᠶᠠᠨ ᠨᠢ ᠮᠠᠳ ᠲᠤ ᠣᠷᠣᠭᠰᠠᠨ ᠲᠣᠭᠯᠠᠭᠴᠢ ᠶ᠋ᠢ ᠲᠤᠰ ᠦᠷᠦᠭ ᠲᠦ᠍ ᠢᠯᠠᠭᠳᠠᠭᠰᠠᠨ (ᠬᠣᠨᠵᠢᠭᠳᠠᠭᠰᠠᠨ) ᠢ᠋ᠶ᠋ᠠᠷ ᠲᠣᠭᠠᠴᠠᠨᠠ᠃
ᠭᠤᠷᠪᠠ᠂ ᠬᠣᠶᠠᠷ ᠲᠣᠭᠯᠠᠭᠴᠢ ᠴᠥᠮ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠨᠣᠶᠠᠨ ᠢ᠋ ᠮᠠᠳᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠷᠢᠯᠠᠯ ᠲᠠᠢ ᠪᠣᠯᠪᠠᠯ᠂ ᠲᠤᠰ ᠦᠷᠦᠭ ᠢ᠋ ᠬᠠᠢᠨᠴᠠᠭᠰᠠᠨ( ᠲᠡᠩᠴᠡᠭᠰᠡᠨ) ᠢ᠋ᠶ᠋ᠡᠷ ᠲᠣᠭᠠᠴᠠᠨᠠ᠃
ᠬᠣᠶᠠᠳᠤᠭᠠᠷ ᠵᠦᠢᠯ ᠰᠢᠳᠡᠷᠡ ᠶ᠋ᠢᠨ ᠬᠥᠯᠭᠡ᠂ ᠰᠢᠳᠡᠷᠡ ᠶ᠋ᠢᠨ
ᠬᠦᠴᠦᠨ(ᠳᠦᠷᠰᠦ) ᠵᠢᠴᠢ ᠲᠡᠳᠡᠭᠡᠷ ᠦᠨ
ᠬᠥᠯᠭᠡ ᠳᠡᠭᠡᠷᠡᠬᠢ ᠠᠩᠬᠠᠨ ᠤ᠋ ᠪᠠᠢᠷᠢᠯᠠᠯ
ᠨᠢᠭᠡ᠂ ᠰᠢᠳᠡᠷᠡ ᠶ᠋ᠢᠨ ᠬᠥᠯᠭᠡ ᠨᠢ ᠴᠠᠢᠪᠤᠷ (ᠴᠠᠭᠠᠨ ᠪᠠᠭᠤᠳᠠᠯ) ᠪᠣᠯᠤᠨ ᠪᠠᠷᠠᠭᠠᠨ (ᠬᠠᠷᠠ ᠪᠠᠭᠤᠳᠠᠯ) ᠥᠩᠭᠡ ᠰᠣᠯᠪᠢᠴᠠᠭᠰᠠᠨ᠂ ᠶᠡᠬᠡ ᠪᠠᠭᠠ ᠨᠢ ᠠᠳᠠᠯᠢᠬᠠᠨ64(8ⅹ8) ᠲᠡᠭᠰᠢ ᠳᠦᠷᠪᠡᠯᠵᠡᠨ ᠪᠠᠭᠤᠳᠠᠯ ᠢ᠋ᠶ᠋ᠠᠷ ᠪᠦᠷᠢᠯᠳᠦᠨᠡ᠃ ᠰᠢᠲᠠᠷᠠ ᠶ᠋ᠢᠨ ᠬᠥᠯᠭᠡ ᠨᠢ ᠲᠣᠭᠯᠠᠭᠴᠢᠳ ᠤ᠋ᠨ ᠳᠤᠮᠳᠠ ᠪᠠᠢᠷᠢᠯᠠᠵᠤ᠂ ᠲᠣᠭᠯᠠᠭᠴᠢ ᠶ᠋ᠢᠨ ᠪᠠᠷᠠᠭᠤᠨ ᠭᠠᠷ ᠲᠠᠯᠠ ᠶ᠋ᠢᠨ ᠣᠢᠷᠠᠬᠠᠨ ᠥᠨᠴᠥᠭ ᠨᠢ ᠴᠠᠭᠠᠨ ᠪᠠᠭᠤᠳᠠᠯ ᠪᠠᠢᠬᠤ ᠶᠣᠰᠣᠲᠠᠢ᠃
ᠵᠢᠷᠤᠭ ᠨᠢᠭᠡ᠂ ᠰᠢᠲᠠᠷᠠ ᠶ᠋ᠢᠨ ᠬᠥᠯᠭᠡ
ᠬᠣᠶᠠᠷ᠂ ᠬᠥᠯᠭᠡ ᠶ᠋ᠢᠨ ᠪᠠᠭᠤᠳᠠᠯ ᠤ᠋ᠨ ᠭᠤᠯᠳᠤ ᠨᠠᠢ᠍ᠮᠠᠨ ᠮᠥᠷ ᠢ᠋《ᠪᠣᠰᠤᠭᠠ ᠱᠤᠭᠤᠮ》 ᠪᠤᠶᠤ ᠬᠢᠯᠪᠠᠷᠴᠢᠯᠠᠨ《ᠡᠩᠨᠡᠭᠡ》 ᠭᠡᠵᠦ ᠨᠠᠷᠠᠯᠠᠨᠠ᠃ ᠥᠨᠴᠥᠭ ᠦ᠋ᠨ ᠴᠠᠭ ᠢ᠋ᠶ᠋ᠠᠨ ᠬᠠᠷᠢᠯᠴᠠᠨ ᠳᠡᠷᠡᠯᠡᠭᠰᠡᠨ ᠠᠳᠠᠯᠢ ᠥᠩᠭᠡ ᠲᠡᠢ ᠪᠠᠭᠤᠳᠠᠯ ᠤ᠋ᠨ ᠵᠢᠰᠢᠭᠦᠦ ᠮᠥᠷᠦᠯᠡᠯ ᠢ᠋《ᠲᠠᠰᠢᠭᠤ ᠱᠤᠭᠤᠮ》 ᠪᠤᠶᠤ ᠬᠢᠯᠪᠠᠷᠴᠢᠯᠠᠨ《ᠲᠠᠰᠢᠭᠤᠪᠴᠢ》 ᠭᠡᠵᠦ ᠨᠡᠷᠡᠯᠡᠨᠡ᠃ ᠳᠡᠭᠡᠷᠡᠬᠢ ᠭᠤᠷᠪᠠᠨ ᠨᠡᠷᠡᠢᠳᠦᠯ ᠢ᠋ ᠶᠡᠷᠦᠩᠬᠡᠢᠯᠡᠭᠡᠳ《ᠵᠠᠮ》 ᠭᠡᠵᠦ ᠳᠠᠭᠤᠳᠠᠨᠠ᠃
ᠭᠤᠷᠪᠠ᠂ ᠰᠢᠳᠡᠷᠡ ᠶ᠋ᠢᠨ ᠬᠦᠴᠦᠨ
(ᠨᠢᠭᠡ) ᠲᠣᠭᠯᠠᠯᠲᠠ ᠡᠬᠢᠯᠡᠬᠦ ᠳ᠋ᠦ᠍᠂ ᠴᠠᠭᠠᠨ ᠲᠠᠯᠠ ᠶ᠋ᠢᠨ ᠲᠣᠭᠯᠠᠭᠴᠢ ᠨᠢ ᠴᠠᠢᠪᠤᠷ ᠥᠩᠭᠡ ᠶ᠋ᠢᠨ16 ᠬᠦᠴᠦᠨ ᠲᠡᠢ᠂ ᠬᠠᠷᠠ ᠲᠠᠯᠠ ᠶ᠋ᠢᠨ ᠲᠣᠭᠯᠠᠭᠴᠢ ᠨᠢ ᠮᠥᠨ ᠪᠠᠷᠠᠭᠠᠨ ᠥᠩᠭᠡ ᠶ᠋ᠢᠨ16 ᠬᠦᠴᠦᠨ ᠲᠡᠢ ᠪᠠᠢᠨᠠ᠃
ᠮᠣᠩᠭᠣᠯ ᠰᠢᠳᠡᠷᠡ ᠶ᠋ᠢᠨ ᠬᠦᠴᠦᠨ ᠨᠢ ᠵᠢᠷᠭᠤᠭᠠᠨ ᠵᠦᠢᠯ ᠪᠠᠢᠬᠤ ᠪᠥᠭᠡᠳ᠂ ᠮᠣᠩᠭᠣᠯᠴᠤᠳ ᠡᠭᠦᠨ ᠢ᠋ ᠪᠡᠨ ᠨᠣᠶᠠᠨ ᠪᠡᠷᠰᠡ᠂ ᠲᠡᠮᠡᠭᠡ᠂ ᠮᠣᠷᠢ᠂ ᠬᠠᠩᠭᠠᠢ (ᠲᠡᠷᠭᠡ)᠂ ᠬᠦᠦ ᠭᠡᠮᠡᠨ ᠲᠤᠰ ᠲᠤᠰ ᠴᠣᠯᠠ ᠥᠭᠭᠦᠭᠰᠡᠨ ᠪᠠᠢᠨᠠ᠃
ᠡᠳᠡᠭᠡᠷ ᠬᠦᠴᠦᠨ ᠨᠢ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠪᠠᠨ ᠲᠤᠰ ᠲᠤᠰ ᠨᠢᠭᠡ ᠨᠣᠶᠠᠨ᠂ ᠨᠢᠭᠡ ᠪᠡᠷᠰᠡ᠂ ᠬᠣᠶᠠᠷ ᠲᠡᠮᠡᠭᠡ᠂ ᠬᠣᠶᠠᠷ ᠮᠣᠷᠢ᠂ ᠬᠣᠶᠠᠷ ᠬᠠᠩᠭᠠᠢ (ᠲᠡᠷᠭᠡ)᠂ ᠨᠠᠢ᠍ᠮᠠᠨ ᠬᠦᠦ ᠲᠡᠢ ᠪᠠᠢᠨᠠ᠃ ᠪᠡᠷᠰᠡ᠂ ᠬᠠᠩᠭᠠᠢ᠂ ᠲᠡᠮᠡᠭᠡ᠂ ᠮᠣᠷᠢ ᠶ᠋ᠢ ᠴᠣᠭ ᠲᠤ ᠨᠢ ᠪᠤᠲᠠ ᠭᠡᠵᠦ ᠳᠠᠭᠤᠳᠠᠳᠠᠭ᠃
ᠬᠦᠴᠦᠨ ᠪᠦᠷᠢ ᠲᠣᠪᠴᠢᠯᠠᠭᠰᠠᠨ ᠲᠡᠮᠳᠡᠭᠯᠡᠭᠡ ᠲᠡᠢ᠃ ᠮᠣᠩᠭᠣᠯ ᠬᠡᠯᠡ ᠪᠡᠷ ᠡᠨᠡ ᠨᠢ ᠲᠤᠬᠠᠢ ᠶ᠋ᠢᠨ ᠨᠡᠷᠡ ᠶ᠋ᠢᠨ ᠡᠬᠢᠨ ᠦ᠌ ᠦᠰᠦᠭ ᠢ᠋ᠶ᠋ᠡᠷ ᠲᠡᠮᠳᠡᠭᠯᠡᠨᠡ᠃ ᠳᠠᠷᠤᠢ ᠨᠣ = ᠨᠣᠶᠠᠨ᠂ ᠪᠠ᠊ = ᠪᠡᠷᠰᠡ᠂ ᠬᠠ = ᠬᠠᠩᠭᠠᠢ᠂ ᠲᠡ᠊ = ᠲᠡᠮᠡᠭᠡ᠂ ᠮᠣ = ᠮᠣᠷᠢ᠂ ᠬᠦ᠊ = ᠬᠦᠦ᠃
ᠳᠡᠯᠡᠬᠡᠢ ᠶ᠋ᠢᠨ ᠰᠢᠲᠠᠷᠠ ᠲᠣᠭᠯᠠᠬᠤ ᠳ᠋ᠤ᠌ ᠮᠣᠩᠭᠣᠯᠴᠤᠳ ᠮᠥᠨ ᠮᠣᠩᠭᠣᠯ ᠰᠢᠲᠠᠷᠠ ᠶ᠋ᠢᠨ ᠬᠦᠴᠦᠨ ᠦ᠌ ᠨᠡᠷᠡ ᠶ᠋ᠢ ᠬᠡᠷᠡᠭᠯᠡᠳᠡᠭ᠃ ᠡᠭᠦᠨ ᠳ᠋ᠦ᠍᠄ ᠨᠣᠶᠠᠨ=ing᠂ ᠪᠡᠷᠰᠡ=Queen᠂ ᠬᠠᠩᠭᠠᠢ=Rook᠂ ᠲᠡᠮᠡᠭᠡ=Bishop᠂ ᠮᠣᠷᠢ=Knight᠂ ᠬᠦᠦ=Pawn᠃
ᠮᠣᠩᠭᠣᠯ ᠰᠢᠲᠠᠷᠠ ᠶ᠋ᠢᠨ ᠬᠦᠴᠦᠨ ᠦ᠌ ᠨᠡᠷᠡ ᠶ᠋ᠢ ᠥᠭᠡᠷᠡ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠲᠣᠭᠯᠠᠭᠴᠢ ᠠᠩᠭ᠌ᠯᠢ ᠬᠡᠯᠡ ᠪᠡᠷ ᠪᠤᠶᠤ ᠥᠪᠡᠷ ᠦ᠋ᠨ ᠣᠷᠣᠨ ᠳ᠋ᠤ᠌ ᠨᠡᠢᠲᠡᠯᠢᠭ ᠬᠡᠷᠡᠭᠯᠡᠳᠡᠭ ᠳᠡᠯᠡᠬᠡᠢ ᠶ᠋ᠢᠨ ᠰᠢᠳᠡᠷᠡ ᠶ᠋ᠢᠨ ᠨᠡᠷᠡ ᠶ᠋ᠢ ᠴᠢᠯᠥᠭᠡᠲᠡᠢ ᠪᠡᠷ ᠲᠠᠭᠠᠷᠠᠭᠤᠯᠤᠨ ᠲᠣᠪᠴᠢᠯᠠᠨ ᠬᠡᠷᠡᠭᠯᠡᠵᠦ ᠪᠣᠯᠤᠨᠠ᠃
ᠵᠢᠱ᠌ᠢᠶᠡ ᠨᠢ᠄ ᠺᠡᠷᠢᠯ ᠢ᠋ᠶ᠋ᠡᠷ ᠨᠣᠶᠠᠨ=Н᠂ ᠪᠡᠷᠰᠡ=Б᠂ ᠬᠠᠩᠭᠠᠢ( ᠲᠡᠷᠭᠡ)=Тр᠂ ᠲᠡᠮᠡᠭᠡ=Т᠂ ᠮᠣᠷᠢ=М᠂ ᠬᠦᠦ=Х᠃
ᠠᠩᠭ᠌ᠯᠢ ᠪᠠᠷ ᠨᠣᠶᠠᠨ=K᠂ ᠪᠡᠷᠰᠡ=Q᠂ ᠬᠠᠩᠭᠠᠢ( ᠲᠡᠷᠭᠡ)=R᠂ ᠲᠡᠮᠡᠭᠡ=B᠂ ᠮᠣᠷᠢ=N᠂ ᠬᠦᠦ=P᠃
ᠬᠢᠲᠠᠳ ᠢ᠋ᠶ᠋ᠠᠷ ᠨᠣᠶᠠᠨ=王᠂ ᠪᠡᠷᠰᠡ=后᠂ ᠬᠠᠩᠭᠠᠢ=车᠂ ᠲᠡᠮᠡᠭᠡ=象᠂ ᠮᠣᠷᠢ=马᠂ ᠬᠦᠦ=兵᠃
(ᠬᠣᠶᠠᠷ) ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠮᠣᠩᠭᠣᠯ ᠰᠢᠲᠠᠷᠠ ᠶ᠋ᠢᠨ ᠨᠡᠢᠭᠡᠮᠯᠢᠭ ᠡᠴᠡ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠪᠠᠢᠭᠠ ᠤᠷᠤᠯᠳᠤᠭᠠᠨ ᠲᠡᠮᠡᠴᠡᠭᠡᠨ ᠳ᠋ᠦ᠍ ᠲᠤᠰ ᠨᠡᠢᠭᠡᠮᠯᠢᠭ ᠡᠴᠡ ᠵᠥᠪᠰᠢᠶᠡᠷᠡᠭᠰᠡᠨ ᠰᠢᠲᠠᠷᠠ ᠶ᠋ᠢ ᠬᠡᠷᠡᠭᠯᠡᠨᠡ᠃
ᠭᠡᠪᠡᠴᠦ ᠰᠢᠲᠠᠷᠠ ᠶ᠋ᠢᠨ ᠬᠦᠴᠦᠨ ᠦ᠌ ᠳᠦᠷᠰᠦ ᠶ᠋ᠢ ᠢᠯᠡᠳᠬᠡᠭᠰᠡᠨ ᠣᠯᠠᠨ ᠰᠠᠢᠬᠠᠨ ᠰᠡᠢᠯᠪᠦᠷᠢ ᠲᠡᠢ ᠤᠷᠠᠨ ᠪᠠᠷᠢᠮᠠᠯ ᠤ᠋ᠳ ᠡᠷᠲᠡᠨ ᠡᠴᠡ ᠮᠣᠩᠭᠣᠯᠴᠤᠳ ᠤ᠋ᠨ ᠳᠤᠮᠳᠠ ᠳᠡᠯᠭᠡᠷᠡᠭᠰᠡᠭᠡᠷ ᠢᠷᠡᠭᠰᠡᠨ ᠲᠡᠦᠬᠡ ᠲᠡᠢ᠃ ᠡᠨᠡᠬᠦ ᠦᠢ ᠣᠯᠠᠨ ᠤᠷᠠᠴᠤᠳ ᠤ᠋ᠨ ᠣᠶᠤᠨ ᠤᠬᠠᠭᠠᠨ ᠢ᠋ ᠰᠢᠩᠭᠡᠭᠰᠡᠨ᠂ ᠡᠯᠡ ᠨᠤᠲᠤᠭ ᠤ᠋ᠨ ᠣᠨᠴᠠᠯᠢᠭ ᠲᠠᠢ ᠰᠣᠶᠣᠯ ᠤ᠋ᠨ ᠰᠠᠢᠬᠠᠨ ᠴᠡᠴᠡᠭ ᠦ᠋ᠳ ᠢ᠋ ᠥᠪᠡᠷ ᠥᠪᠡᠷ ᠦ᠋ᠨ ᠥᠩᠭᠡ ᠪᠡᠷ ᠨᠢ ᠤᠯᠠᠮ ᠤᠯᠠᠮ ᠳᠡᠯᠭᠡᠷᠡᠭᠦᠯᠬᠦ ᠶ᠋ᠢᠨ ᠲᠥᠯᠥᠭᠡ᠂ ᠡᠯᠡ ᠭᠡᠰᠢᠭᠦᠨ ᠨᠡᠢᠭᠡᠮᠯᠢᠭ ᠠᠯᠢ ᠭᠠᠵᠠᠷ ᠤᠷᠤᠯᠳᠤᠭᠠᠨ ᠶᠠᠪᠤᠭᠤᠯᠪᠠᠯ ᠲᠡᠷᠡ ᠨᠤᠲᠤᠭ ᠲᠤ ᠣᠳᠣ ᠳ᠋ᠤ᠌ ᠪᠠᠨ ᠨᠡᠢᠲᠡᠯᠢᠭ ᠬᠡᠷᠡᠭᠯᠡᠳᠡᠭ ᠰᠢᠲᠠᠷᠠ ᠪᠠᠷ ᠲᠣᠭᠯᠠᠵᠤ ᠪᠣᠯᠤᠨᠠ᠃
ᠵᠢᠷᠤᠭ ᠬᠣᠶᠠᠷ ᠂ ᠰᠢᠳᠡᠷᠡ ᠶ᠋ᠢᠨ ᠬᠦᠴᠦᠨ ᠦ᠌ ᠪᠠᠷᠢᠮᠠᠯ ᠳᠦᠷᠰᠦ
ᠰᠢᠲᠠᠷᠠ ᠶᠢᠨ ᠬᠦᠴᠦᠨ ᠦ ᠲᠣᠮᠢᠶᠠᠯᠠᠭᠰᠠᠨ ᠵᠢᠷᠤᠭ ᠨᠢ ᠰᠢᠲᠠᠷᠠ ᠶᠢᠨ ᠳᠤᠬᠠᠢ ᠨᠣᠮ᠂ ᠵᠣᠬᠢᠶᠠᠯ ᠪᠦᠲᠦᠭᠡᠯ᠂ ᠰᠡᠳᠬᠦᠯ ᠵᠡᠷᠭᠡ ᠬᠡᠪᠯᠡᠯ ᠳ᠋ᠤ᠌ ᠬᠡᠷᠡᠭᠯᠡᠳᠡᠭ ᠤᠴᠢᠷ ᠡᠷᠬᠡᠪᠰᠢ ᠪᠠᠷᠢᠮᠵᠢᠶᠠᠵᠢᠭᠤᠯᠬᠤ ᠶᠣᠰᠣᠲᠠᠢ᠃
ᠵᠢᠷᠤᠭ ᠭᠤᠷᠪᠠ᠂ ᠰᠢᠳᠡᠷᠡ ᠶ᠋ᠢᠨ ᠬᠦᠴᠦᠨ ᠦ᠌ ᠲᠣᠮᠢᠶᠠ ᠵᠢᠷᠤᠭ
ᠵᠢᠷᠤᠭ ᠳᠥᠷᠪᠡ ᠂ ᠰᠢᠲᠠᠷᠠ ᠶᠢᠨ ᠬᠦᠴᠦᠨ ᠦ ᠭᠠᠷᠤᠭᠠᠨ ᠤ ᠪᠠᠢᠷᠢᠯᠠᠯ
ᠭᠤᠷᠪᠠᠳᠤᠭᠠᠷ ᠵᠦᠢᠯ ᠰᠢᠲᠠᠷᠠ ᠶᠢᠨ ᠬᠦᠴᠦᠨ ᠦ ᠨᠡᠭᠦᠳᠡᠯ
ᠳᠣᠣᠷᠠᠬᠢ ᠲᠤᠰᠬᠠᠢ ᠨᠡᠷᠡᠰ ᠢ᠋ ᠮᠥᠨ ᠤᠳᠤᠮᠰᠢᠯᠲᠤ ᠳᠠᠭᠤᠳᠠᠯᠭᠠ ᠪᠠᠷ ᠬᠡᠷᠡᠭᠯᠡᠨᠡ᠃
(ᠨᠢᠭᠡ) ᠪᠠᠷᠢᠬᠤ ᠶ᠋ᠢ ᠪᠡᠷᠰᠡ ᠪᠠᠷ ᠪᠣᠯ ᠪᠠᠷᠢᠬᠤ᠂ ᠬᠠᠩᠭᠠᠢ ᠪᠠᠷ ᠪᠣᠯ ᠨᠢᠭᠤᠷᠯᠠᠬᠤ᠂ ᠮᠣᠷᠢ ᠪᠠᠷ ᠪᠣᠯ ᠭᠢᠰᠬᠢᠬᠦ᠂ ᠲᠡᠮᠡᠭᠡ ᠪᠡᠷ ᠪᠣᠯ ᠬᠠᠳᠬᠤᠬᠤ᠂ ᠨᠣᠶᠠᠨ ᠢ᠋ᠶ᠋ᠠᠷ ᠪᠣᠯ ᠰᠢᠬᠠᠬᠤ(ᠰᠦᠷᠳᠡᠭᠦᠯᠬᠦ)᠂ ᠬᠦᠦ ᠪᠡᠷ ᠪᠣᠯ ᠨᠢᠳᠦᠯᠡᠬᠦ ᠭᠡᠨᠡ᠃
(ᠬᠣᠶᠠᠷ) ᠪᠠᠷᠢᠭᠳᠠᠬᠤ ᠶ᠋ᠢ ᠪᠡᠷᠰᠡ ᠶ᠋ᠢᠨ ᠠᠮᠠᠨ ᠳ᠋ᠤ᠌᠂ ᠬᠠᠩᠭᠠᠢ ᠶ᠋ᠢᠨ ᠨᠢᠭᠤᠷ ᠲᠤ᠂ ᠲᠡᠮᠡᠭᠡᠨ ᠦ᠌ ᠬᠥᠯ ᠳ᠋ᠦ᠍(ᠬᠠᠳᠬᠤᠭᠠ ᠳ᠋ᠤ᠌)᠂ ᠮᠣᠷᠢᠨ ᠬᠥᠯ ᠳ᠋ᠦ᠍᠂ ᠬᠦᠦ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍᠂ ᠨᠣᠶᠠᠨ ᠤ᠋ ᠰᠦᠷ ᠲᠦ᠍ ᠭᠡᠨᠡ᠃
(ᠭᠤᠷᠪᠠ) ᠱᠠᠯᠠᠬᠤ ᠶ᠋ᠢ ᠲᠡᠮᠡᠭᠡ ᠪᠡᠷ ᠪᠣᠯ ᠳ᠋ᠤᠭᠯᠠᠬᠤ᠂ ᠮᠣᠷᠢ ᠪᠠᠷ ᠪᠣᠯ ᠴᠥᠷᠯᠡᠬᠦ ᠭᠡᠨᠡ᠂ ᠬᠦᠦ ᠪᠡᠷ ᠪᠣᠯ ᠴᠣᠳᠯᠠᠬᠤ ᠭᠡᠨᠡ᠃
ᠬᠣᠶᠠᠷ᠂ ᠡᠬᠢᠯᠡᠵᠦ ᠨᠡᠭᠦᠬᠦ ᠶᠣᠰᠣ᠄ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠡᠬᠢᠨ ᠦ᠌ ᠨᠡᠭᠦᠳᠡᠯ ᠨᠢ ᠵᠥᠪᠬᠡᠨ ᠳᠣᠣᠷᠠᠬᠢ ᠬᠣᠶᠠᠷ ᠬᠤᠪᠢᠯᠪᠤᠷᠢ ᠶ᠋ᠢᠨ ᠨᠢᠭᠡ ᠨᠢ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠠᠯᠢ ᠬᠤᠪᠢᠯᠪᠤᠷᠢ ᠶ᠋ᠢ ᠰᠣᠩᠭᠣᠬᠤ ᠡᠷᠬᠡ ᠨᠢ ᠴᠠᠭᠠᠨ ᠲᠠᠯᠠ ᠳ᠋ᠤ᠌ ᠪᠠᠢᠨᠠ᠃
(ᠨᠢᠭᠡ) ᠴᠠᠭᠠᠨ ᠲᠠᠯᠠ ᠨᠣᠶᠠᠨ ᠤ᠋ ᠡᠮᠦᠨᠡᠬᠢ ᠬᠦᠦ ᠪᠡᠨ ᠬᠣᠶᠠᠷ ᠪᠠᠭᠤᠳᠠᠯ ᠲᠦᠯᠬᠢᠪᠡᠯ ᠬᠠᠷᠠ ᠲᠠᠯᠠ ᠨᠢ ᠡᠷᠬᠡᠪᠢᠰᠢ ᠨᠣᠶᠠᠨ ᠤ᠋ ᠡᠮᠦᠨᠡᠬᠢ ᠬᠦᠦ ᠪᠡᠨ ᠬᠣᠶᠠᠷ ᠪᠠᠭᠤᠳᠠᠯ ᠲᠦᠯᠬᠢᠵᠦ ᠵᠣᠯᠭᠠᠯᠳᠦᠭᠤᠯᠤᠨᠠ᠃
(ᠬᠣᠶᠠᠷ) ᠴᠠᠭᠠᠨ ᠲᠠᠯᠠ ᠪᠡᠷᠰᠡ ᠶ᠋ᠢᠨ ᠡᠮᠦᠨᠡᠬᠢ ᠬᠦᠦ ᠪᠡᠨ ᠬᠣᠶᠠᠷ ᠪᠠᠭᠤᠳᠠᠯ ᠲᠦᠯᠬᠢᠪᠡᠯ ᠬᠠᠷᠠ ᠲᠠᠯᠠ ᠨᠢ ᠡᠷᠬᠡᠪᠢᠰᠢ ᠪᠡᠷᠰᠡ ᠶ᠋ᠢᠨ ᠡᠮᠦᠨᠡᠬᠢ ᠬᠦᠦ ᠬᠣᠶᠠᠷ ᠪᠠᠭᠤᠳᠠᠯ ᠲᠦᠯᠬᠢᠵᠦ ᠵᠣᠯᠭᠠᠯᠳᠦᠭᠤᠯᠤᠨᠠ᠃
ᠬᠣᠶᠠᠷ ᠰᠢᠲᠠᠷᠠ ᠶ᠋ᠢᠨ ᠬᠦᠦ ᠵᠣᠯᠭᠠᠵᠤ ᠪᠠᠢᠬᠤ ᠦᠶᠡ ᠳ᠋ᠦ᠍ ᠬᠣᠶᠠᠷ ᠰᠢᠲᠠᠷᠠᠴᠢᠨ ᠬᠠᠷᠢᠯᠴᠠᠨ ᠮᠡᠨᠳᠦᠯᠡᠵᠦ ᠪᠠᠢᠨᠠ ᠭᠡᠵᠦ ᠬᠡᠯᠡᠳᠡᠭ ᠤᠳᠤᠮᠰᠢᠯ ᠲᠠᠢ᠃ ᠡᠬᠢᠨ ᠦ᠌ ᠨᠡᠭᠦᠳᠡᠯ ᠳᠠᠭᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠣᠶᠠᠷ ᠲᠣᠭᠯᠠᠭᠴᠢ ᠶ᠋ᠢᠨ ᠨᠡᠭᠦᠬᠦ ᠰᠣᠩᠭᠣᠯᠲᠠ ᠴᠢᠯᠥᠭᠡ ᠲᠡᠢ ᠪᠣᠯᠤᠨᠠ᠃
ᠭᠤᠷᠪᠠ᠂ ᠲᠡᠮᠡᠭᠡ ᠪᠠᠢᠷᠢᠯᠠᠭᠰᠠᠨ ᠪᠠᠭᠤᠳᠠᠯ ᠠ᠋ᠴᠠ ᠪᠠᠨ ᠲᠠᠰᠢᠭᠤᠪᠴᠢ ᠪᠠᠷ ᠠᠯᠢ ᠨᠢᠭᠡ ᠪᠠᠭᠤᠳᠠᠯ ᠳ᠋ᠤ᠌ ᠨᠡᠭᠦᠨᠡ᠃
ᠳᠥᠷᠪᠡ᠂ ᠬᠠᠩᠭᠠᠢ(ᠲᠡᠷᠭᠡ) ᠪᠠᠢᠷᠢᠯᠠᠭᠰᠠᠨ ᠪᠠᠭᠤᠳᠠᠯ ᠠ᠋ᠴᠠ ᠪᠠᠨ ᠬᠥᠨᠳᠡᠯᠡᠨ ᠭᠤᠯᠳᠤ ᠱᠤᠭᠤᠮ ᠤ᠋ᠨ ᠳᠠᠭᠠᠤ ᠠᠯᠢ ᠨᠢᠭᠡ ᠪᠠᠭᠤᠳᠠᠯ ᠳ᠋ᠤ᠌ ᠨᠡᠭᠦᠨᠡ᠃
ᠲᠠᠪᠤ᠂ ᠪᠡᠷᠰᠡ ᠪᠠᠢᠷᠢᠯᠠᠭᠰᠠᠨ ᠪᠠᠭᠤᠳᠠᠯ ᠠ᠋ᠴᠠ ᠪᠠᠨ ᠬᠥᠨᠳᠡᠯᠡᠨ ᠭᠤᠯᠳᠤ ᠱᠤᠭᠤᠮ ᠪᠤᠶᠤ ᠲᠠᠰᠢᠭᠤᠪᠴᠢ ᠶ᠋ᠢᠨ ᠳᠠᠭᠠᠤ ᠠᠯᠢ ᠨᠢᠭᠡ ᠪᠠᠭᠤᠳᠠᠯ ᠳ᠋ᠤ᠌ ᠨᠡᠭᠦᠨᠡ᠃
ᠵᠢᠷᠭᠤᠭᠠ᠂ ᠲᠡᠮᠡᠭᠡ᠂ ᠬᠠᠩᠭᠠᠢ᠂ ᠪᠡᠷᠰᠡ ᠨᠢ ᠥᠭᠡᠷᠡ ᠬᠦᠴᠦᠨ ᠡᠵᠡᠯᠡᠭᠰᠡᠨ ᠪᠠᠭᠤᠳᠠᠯ ᠢ᠋ ᠠᠯᠤᠰᠯᠠᠨ ᠨᠡᠭᠦᠵᠦ ᠪᠣᠯᠬᠤ ᠦᠭᠡᠢ᠃
ᠳᠣᠯᠣᠭᠠ᠂ ᠮᠣᠷᠢ ᠪᠠᠢᠷᠢᠯᠠᠭᠰᠠᠨ ᠪᠠᠭᠤᠳᠠᠯ ᠠ᠋ᠴᠠ ᠪᠠᠨ ᠬᠥᠨᠳᠡᠯᠡᠨ ᠭᠤᠯᠳᠤ ᠱᠤᠭᠤᠮ ᠪᠤᠶᠤ ᠲᠠᠰᠢᠭᠤᠪᠴᠢᠨ ᠳᠡᠭᠡᠷᠡ ᠪᠢᠰᠢ ᠪᠠᠢᠬᠤ ᠬᠠᠮᠤᠭ ᠣᠢᠷᠠᠬᠠᠨ ᠪᠠᠢᠬᠤ ᠪᠠᠭᠤᠳᠠᠯ ᠤ᠋ᠨ ᠠᠯᠢ ᠨᠢᠭᠡᠨ ᠳ᠋ᠦ᠍ ᠨᠡᠭᠦᠨᠡ᠃
ᠨᠠᠢ᠍ᠮᠠ᠂ ᠵᠠᠯᠭᠠᠭᠠ ᠪᠠᠢᠷᠢᠯᠠᠭᠰᠠᠨ ᠠᠯᠢ ᠴᠤ᠌ ᠪᠠᠭᠤᠳᠠᠯ ᠳ᠋ᠤ᠌ ᠨᠡᠭᠦᠵᠦ ᠪᠣᠯᠤᠨᠠ᠃
ᠶᠢᠰᠦ᠂ ᠬᠦᠦ ᠶ᠋ᠢᠨ ᠨᠡᠭᠦᠳᠡᠯ (ᠡᠬᠢᠨ ᠦ᠌ ᠨᠡᠭᠦᠳᠡᠯ ᠡᠴᠡ ᠬᠣᠢᠰᠢ)
(ᠨᠢᠭᠡ) ᠬᠦᠦ ᠶ᠋ᠢᠨ ᠪᠠᠢᠷᠢᠯᠠᠵᠤ ᠪᠠᠢᠭᠠ ᠭᠤᠯᠳᠤ ᠱᠤᠭᠤᠮ ᠤ᠋ᠨ ᠳᠠᠭᠠᠤ ᠬᠣᠭᠣᠰᠣᠨ ᠪᠠᠭᠤᠳᠠᠯ ᠳ᠋ᠤ᠌ ᠨᠢᠭᠡ ᠪᠠᠭᠤᠳᠠᠯ ᠤᠷᠤᠭᠰᠢᠯᠠᠨ ᠨᠡᠭᠦᠨᠡ᠃
(ᠬᠣᠶᠠᠷ) ᠬᠦᠦ ᠶ᠋ᠢᠨ ᠡᠮᠦᠨᠡ ᠲᠠᠰᠢᠭᠤᠪᠴᠢ ᠪᠠᠷ ᠪᠠᠢᠷᠢᠯᠠᠵᠤ ᠪᠠᠢᠭᠠ ᠬᠠᠮᠤᠭ ᠣᠢᠷᠠᠬᠠᠨ ᠬᠣᠶᠠᠷ ᠪᠠᠭᠤᠳᠠᠯ ᠢ᠋ ᠲᠡᠷᠡ ᠬᠦᠦ ᠶ᠋ᠢᠨ ᠨᠢᠳᠦ ᠭᠡᠵᠦ ᠬᠡᠯᠡᠨᠡ᠃ ᠬᠦᠦ ᠨᠢ ᠢᠳᠡᠯᠲᠡ ᠬᠢᠬᠦ ᠳ᠋ᠦ᠍ ᠪᠡᠨ ᠵᠥᠪᠬᠡᠨ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠪᠠᠢᠷᠢᠯᠠᠵᠤ ᠪᠠᠢᠭᠠ ᠠᠢᠯ ᠤ᠋ᠨ ᠪᠤᠲᠠ ᠬᠦᠦ ᠶ᠋ᠢ ᠢᠳᠡᠵᠦ ᠨᠡᠭᠦᠨᠡ᠃
(ᠭᠤᠷᠪᠠ) ᠬᠦᠦ ᠨᠡᠭᠦᠭᠰᠡᠭᠡᠷ ᠪᠠᠢᠭᠠᠳ ᠬᠠᠮᠤᠭ ᠡᠴᠦᠰ ᠦ᠋ᠨ (ᠬᠣᠯᠠ ᠶ᠋ᠢᠨ) ᠡᠩᠨᠡᠭᠡ ᠳ᠋ᠦ᠍ ᠬᠦᠷᠦᠮᠡᠭᠴᠡ ᠥᠪᠡᠷ ᠦ᠋ᠨ ᠥᠩᠭᠡ ᠶ᠋ᠢᠨ ᠪᠡᠷᠰᠡ᠂ ᠬᠠᠩᠭᠠᠢ᠂ ᠲᠡᠮᠡᠭᠡ ᠮᠣᠷᠢ ᠶ᠋ᠢᠨ ᠠᠯᠢ ᠨᠢᠭᠡ ᠪᠡᠷ ᠰᠣᠯᠢᠭᠳᠠᠬᠤ ᠶᠣᠰᠣᠲᠠᠢ᠃ ᠡᠭᠦᠨ ᠢ᠋ ᠬᠦᠦ ᠶ᠋ᠢᠨ《ᠬᠤᠪᠢᠷᠠᠯᠲᠠ》 ᠪᠤᠶᠤ《ᠪᠠᠭᠤᠬᠤ》 ᠭᠡᠵᠦ ᠨᠡᠷᠡᠯᠡᠳᠡᠭ᠃ ᠶᠠᠮᠠᠷ ᠪᠤᠲᠠ ᠪᠠᠭᠤᠬᠤ ᠨᠢ ᠲᠣᠭᠯᠠᠭᠴᠢ ᠶ᠋ᠢᠨ ᠥᠪᠡᠷ ᠦ᠋ᠨ ᠡᠷᠬᠡ ᠪᠥᠭᠡᠳ ᠰᠣᠩᠭᠣᠯᠲᠠ ᠨᠢ ᠡᠮᠦᠨᠡ ᠢᠳᠡᠭᠳᠡᠭᠰᠡᠨ ᠪᠤᠲᠠ ᠪᠠᠷ ᠬᠢᠵᠠᠭᠠᠷᠯᠠᠭᠳᠠᠬᠤ ᠶᠣᠰᠣ ᠦᠭᠡᠢ᠃ ᠬᠤᠪᠢᠷᠠᠭᠰᠠᠨ ᠰᠢᠨᠡ ᠪᠤᠲᠠ ᠨᠢ ᠭᠠᠷᠤᠭᠰᠠᠨ ᠳᠠᠷᠤᠢ ᠳ᠋ᠤ᠌ ᠪᠠᠨ ᠬᠦᠴᠦᠨ ᠲᠡᠢ᠃
(ᠳᠥᠷᠪᠡ) ᠬᠤᠪᠢᠷᠠᠬᠤ ᠡᠩᠨᠡᠭᠡᠨ ᠳ᠋ᠡᠬᠢ ᠬᠦᠦ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠪᠤᠲᠠ ᠪᠠᠢᠪᠠᠯ ᠲᠡᠭᠦᠨ ᠢ᠋ ᠢᠳᠡᠨ ᠬᠤᠪᠢᠶᠠᠵᠤ ᠪᠣᠯᠤᠨᠠ᠃
ᠳᠥᠷᠪᠡᠳᠦᠭᠡᠷ ᠵᠦᠢᠯ ᠨᠡᠭᠦᠳᠡᠯ ᠨᠡᠭᠦᠬᠦ ᠲᠤᠬᠠᠢ
ᠨᠢᠭᠡ᠂ ᠨᠡᠭᠦᠳᠡᠯ ᠪᠦᠷᠢ ᠵᠥᠪᠬᠡᠨ ᠨᠢᠭᠡ ᠭᠠᠷ ᠢ᠋ᠶ᠋ᠠᠷ ᠭᠦᠢᠴᠡᠳᠬᠡᠨᠡ᠃
ᠵᠥᠪᠯᠡᠯᠭᠡ᠄ ᠮᠣᠩᠭᠣᠯ ᠬᠦᠨᠳᠦᠳᠬᠡᠯ ᠦ᠋ᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠨᠡᠭᠦᠳᠡᠯ ᠢ᠋ ᠵᠥᠪ (ᠪᠠᠷᠠᠭᠤᠨ) ᠭᠠᠷ ᠢ᠋ᠶ᠋ᠠᠷ ᠭᠦᠢᠴᠡᠳᠬᠡᠬᠦ ᠶ᠋ᠢ ᠡᠷᠬᠢᠮᠯᠡᠨᠡ᠃ ᠥᠭᠡᠷᠡ ᠦᠨᠳᠦᠰᠦᠲᠡᠨ ᠬᠡᠷᠪᠡ ᠴᠡᠭᠡᠷᠯᠡᠬᠦ ᠦᠭᠡᠢ ᠪᠣᠯ ᠮᠥᠨ ᠵᠥᠪ ᠭᠠᠷ ᠢᠶᠠᠷ ᠨᠡᠭᠦᠬᠦ ᠶᠢ ᠬᠦᠰᠡᠨᠡ᠃
ᠬᠣᠶᠠᠷ᠂ ᠲᠣᠭᠯᠠᠭᠴᠢ ᠥᠪᠡᠷ ᠦ᠋ᠨ ᠨᠡᠭᠦᠬᠦ ᠡᠭᠡᠯᠵᠢᠨ ᠳ᠋ᠦ᠍ ᠵᠥᠪᠬᠡᠨ ᠤᠷᠢᠳᠴᠢᠯᠠᠨ ᠢᠯᠡᠷᠬᠡᠢᠯᠡᠨ ᠮᠡᠳᠡᠭᠳᠡᠭᠰᠡᠨ ᠦ᠌ ᠳᠠᠷᠠᠭᠠ (ᠵᠢᠱ᠌ᠢᠶᠡ᠄ ᠰᠢᠲᠠᠷᠠ ᠪᠠᠨ ᠵᠠᠰᠠᠶᠠ) ᠰᠠᠶᠢ ᠨᠢᠭᠡ ᠪᠠ ᠣᠯᠠᠨ ᠬᠦᠴᠦᠨ ᠢ᠋ ᠪᠠᠭᠤᠳᠠᠯ ᠳᠡᠭᠡᠷᠡ ᠨᠢ ᠵᠠᠰᠠᠨ ᠲᠠᠯᠪᠢᠵᠤ ᠪᠣᠯᠤᠨᠠ᠃
ᠭᠤᠷᠪᠠ᠂ ᠰᠢᠳᠡᠷᠡ ᠶ᠋ᠢᠨ ᠬᠦᠴᠦᠨ ᠢ᠋ᠶ᠋ᠡᠨ ᠲᠠᠯᠪᠢᠬᠤ ᠠ᠋ᠴᠠ ᠪᠤᠰᠤᠳ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠲᠣᠭᠯᠠᠭᠴᠢ ᠥᠪᠡᠷ ᠦ᠋ᠨ ᠡᠭᠡᠯᠵᠢ ᠳ᠋ᠦ᠍ ᠨᠡᠭᠦᠬᠦ ᠪᠤᠶᠤ ᠢᠳᠡᠬᠦ ᠵᠣᠷᠢᠯᠭᠠ ᠪᠠᠷ ᠬᠦᠴᠦᠨ ᠳ᠋ᠦ᠍ ᠭᠠᠷ ᠬᠦᠷᠪᠡᠯ᠄
(ᠨᠢᠭᠡ) ᠨᠢᠭᠡ ᠪᠤᠶᠤ ᠣᠯᠠᠨ ᠥᠪᠡᠷ ᠦ᠋ᠨ ᠬᠦᠴᠦᠨ ᠳ᠋ᠦ᠍ ᠭᠠᠷ ᠬᠦᠷᠦᠭᠰᠡᠨ ᠪᠣᠯ ᠡᠬᠢᠯᠡᠵᠦ ᠬᠦᠷᠦᠭᠰᠡᠨ ᠬᠦᠴᠦᠨ ᠢ᠋ᠶ᠋ᠡᠨ ᠨᠡᠭᠦᠬᠦ ᠬᠡᠷᠡᠭᠲᠡᠢ᠃
(ᠬᠣᠶᠠᠷ) ᠠᠢᠯ ᠤ᠋ᠨ ᠨᠢᠭᠡ ᠪᠤᠶᠤ ᠣᠯᠠᠨ ᠪᠤᠲᠠ ᠬᠦᠦ ᠳ᠋ᠦ᠍ ᠭᠠᠷ ᠬᠦᠷᠦᠭᠰᠡᠨ ᠡᠬᠢᠯᠡᠵᠦ ᠬᠦᠷᠦᠭᠰᠡᠨ ᠪᠤᠲᠠ ᠬᠦᠦ ᠶ᠋ᠢ ᠢᠳᠡᠬᠦ ᠶᠣᠰᠣᠲᠠᠢ᠃ ᠠᠢᠯ ᠤ᠋ᠨ ᠨᠣᠶᠠᠨ ᠳ᠋ᠤ᠌ ᠡᠬᠢᠯᠡᠵᠦ ᠭᠠᠷ ᠬᠦᠷᠦᠭᠰᠡᠨ ᠪᠣᠯ ᠲᠡᠭᠦᠨ ᠢ᠋ ᠱᠠᠯᠠᠬᠤ ᠶᠣᠰᠣᠲᠠᠢ᠃
(ᠭᠤᠷᠪᠠ) ᠥᠪᠡᠷ ᠦ᠋ᠨ ᠪᠣᠯᠤᠨ ᠠᠢᠯ ᠤ᠋ᠨ ᠨᠢᠭᠡ ᠨᠢᠭᠡ ᠪᠤᠲᠠ ᠬᠦᠦ ᠳ᠋ᠦ᠍ ᠭᠠᠷ ᠬᠦᠷᠪᠡᠯ᠂ ᠲᠡᠷᠡ ᠪᠤᠲᠠ ᠬᠦᠦ ᠶ᠋ᠢ ᠥᠪᠡᠷ ᠦ᠋ᠨ ᠪᠤᠲᠠ ᠬᠦᠦ ᠪᠡᠷ ᠢᠳᠡᠬᠦ ᠶᠣᠰᠣᠲᠠᠢ᠃ ᠡᠨᠡ ᠨᠢ ᠪᠣᠯᠤᠮᠵᠢ ᠦᠭᠡᠢ ᠪᠠᠢᠪᠠᠯ ᠥᠪᠡᠷ ᠦ᠋ᠨ ᠪᠤᠲᠠ ᠬᠦᠦ ᠳ᠋ᠦ᠍ ᠪᠡᠨ ᠡᠬᠢᠯᠡᠵᠦ ᠬᠦᠷᠦᠭᠰᠡᠨ ᠪᠣᠯ ᠲᠡᠭᠦᠨ ᠢ᠋ ᠨᠡᠭᠦᠵᠦ᠂ ᠠᠢᠯ ᠤ᠋ᠨ ᠪᠤᠲᠠ ᠬᠦᠦ ᠳ᠋ᠦ᠍ ᠡᠬᠢᠯᠡᠵᠦ ᠬᠦᠷᠦᠭᠰᠡᠨ ᠪᠣᠯ ᠲᠡᠭᠦᠨ ᠢ᠋ ᠥᠪᠡᠷ ᠦ᠋ᠨ ᠥᠭᠡᠷᠡ ᠪᠤᠲᠠ ᠬᠦᠦ ᠪᠡᠷ ᠢᠳᠡᠬᠦ ᠬᠡᠷᠡᠭᠲᠡᠢ᠃ ᠬᠡᠷᠪᠡ ᠠᠯᠢ ᠪᠤᠲᠠ ᠬᠦᠦ ᠳ᠋ᠦ᠍ ᠭᠠᠷ ᠬᠦᠷᠦᠭᠰᠡᠨ ᠢ᠋ ᠲᠣᠭᠲᠠᠭᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠦᠶᠡ ᠳ᠋ᠦ᠍᠂ ᠥᠪᠡᠷ ᠦ᠋ᠨ ᠪᠤᠲᠠ ᠬᠦᠦ ᠳ᠋ᠦ᠍ ᠪᠡᠨ ᠡᠬᠢᠯᠡᠵᠦ ᠬᠦᠷᠦᠭᠰᠡᠨ ᠭᠡᠵᠦ ᠦᠵᠡᠬᠦ ᠶᠣᠰᠣᠲᠠᠢ᠃
ᠳᠥᠷᠪᠡ᠂ ᠬᠦᠦ ᠬᠤᠪᠢᠷᠠᠬᠤ ᠦᠶᠡ ᠳ᠋ᠦ᠍ ᠬᠤᠪᠢᠷᠠᠭᠰᠠᠨ ᠪᠤᠲᠠ ᠨᠢ ᠬᠤᠪᠢᠷᠠᠬᠤ ᠪᠠᠭᠤᠳᠠᠯ ᠳ᠋ᠤ᠌ ᠬᠦᠷᠦᠯᠴᠡᠮᠡᠭᠴᠡ ᠰᠣᠩᠭᠣᠯᠲᠠ ᠳᠠᠭᠤᠰᠴᠤ᠂ ᠥᠭᠡᠷᠡᠴᠢᠯᠡᠵᠦ ᠪᠣᠯᠬᠤ ᠦᠭᠡᠢ᠃
ᠲᠠᠪᠤ᠂ ᠬᠡᠷᠪᠡ ᠭᠠᠷ ᠬᠦᠷᠦᠭᠰᠡᠨ ᠪᠤᠲᠠ ᠬᠦᠦ ᠨᠢ ᠨᠡᠭᠦᠬᠦ ᠪᠤᠶᠤ ᠢᠳᠡᠭᠳᠡᠬᠦ ᠪᠣᠯᠤᠮᠵᠢ ᠦᠭᠡᠢ ᠪᠣᠯ ᠲᠣᠭᠯᠠᠭᠴᠢ ᠳᠦᠷᠢᠮ ᠳ᠋ᠦ᠍ ᠨᠡᠢᠴᠡᠭᠰᠡᠨ ᠥᠭᠡᠷᠡ ᠨᠡᠭᠦᠳᠡᠯ ᠨᠡᠭᠦᠵᠦ ᠪᠣᠯᠤᠨᠠ᠃
ᠵᠢᠷᠭᠤᠭᠠ᠂ ᠬᠦᠦ ᠶ᠋ᠢᠨ ᠬᠤᠪᠢᠷᠠᠯᠲᠠ ᠶ᠋ᠢ ᠳᠠᠷᠠᠭᠠᠬᠢ ᠠᠷᠭᠠ ᠪᠠᠷ ᠬᠢᠵᠦ ᠪᠣᠯᠤᠨᠠ᠄
(ᠨᠢᠭᠡ) ᠬᠦᠦ ᠶ᠋ᠢ ᠲᠤᠬᠠᠢ ᠶ᠋ᠢᠨ ᠬᠤᠪᠢᠷᠠᠬᠤ ᠪᠠᠭᠤᠳᠠᠯ ᠳ᠋ᠤ᠌ ᠵᠠᠪᠠᠯ ᠪᠠᠢᠷᠢᠯᠠᠭᠤᠯᠬᠤ ᠱᠠᠭᠠᠷᠳᠠᠯᠭᠠ ᠥᠬᠡᠢ᠃
(ᠬᠣᠶᠠᠷ) ᠬᠤᠪᠢᠷᠠᠭᠰᠠᠨ ᠬᠦᠦ ᠶ᠋ᠢ ᠠᠪᠴᠤ ᠭᠠᠷᠭᠠᠬᠤ ᠪᠠ ᠰᠢᠨᠡ ᠪᠤᠲᠠ ᠪᠠᠨ ᠬᠤᠪᠢᠷᠠᠭᠰᠠᠨ ᠪᠠᠭᠤᠳᠠᠯ ᠳ᠋ᠤ᠌ ᠪᠠᠢᠷᠢᠯᠠᠭᠤᠯᠬᠤ ᠶ᠋ᠢ ᠠᠯᠢ ᠴᠤ᠌ ᠳᠠᠷᠠᠭᠠᠯᠠᠯ ᠢ᠋ᠶ᠋ᠠᠷ ᠭᠦᠢᠴᠡᠳᠬᠡᠵᠦ ᠪᠣᠯᠤᠨᠠ᠃
ᠳᠣᠯᠣᠭᠠ᠂ ᠬᠡᠷᠪᠡ ᠪᠤᠲᠠ ᠬᠦᠦ ᠶ᠋ᠢ ᠨᠢᠭᠡᠨ ᠪᠠᠭᠤᠳᠠᠯ ᠳᠡᠭᠡᠷᠡ ᠲᠠᠯᠪᠢᠵᠤ ᠭᠠᠷ ᠢ᠋ᠶ᠋ᠠᠨ ᠰᠠᠯᠭᠠᠭᠰᠠᠨ ᠪᠣᠯ ᠥᠭᠡᠷᠡ ᠲᠡᠰᠢ ᠨᠡᠬᠥᠵᠦ ᠪᠣᠯᠬᠤ ᠦᠭᠡᠢ᠃
ᠳᠠᠷᠠᠭᠠᠬᠢ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠨᠡᠭᠦᠳᠡᠯ ᠭᠦᠢᠴᠡᠭᠰᠡᠨ ᠢ᠋ᠶ᠋ᠡᠷ ᠲᠣᠭᠠᠴᠢᠨᠠ᠃ ᠡᠭᠦᠨ ᠳ᠋ᠤ᠌᠄
(ᠨᠢᠭᠡ) ᠢᠳᠡᠯᠲᠡ ᠬᠢᠬᠦ ᠦᠶᠡ ᠳ᠋ᠦ᠍ ᠢᠳᠡᠭᠳᠡᠭᠰᠡᠨ ᠪᠤᠲᠠ ᠬᠦᠦ ᠶ᠋ᠢ ᠰᠢᠲᠠᠷᠠ ᠶ᠋ᠢᠨ ᠬᠦᠯᠦᠭ ᠡᠴᠡ ᠵᠠᠢᠯᠠᠭᠤᠯᠵᠤ᠂ ᠥᠪᠡᠷ ᠦ᠋ᠨ ᠬᠦᠴᠦᠨ ᠢ᠋ᠶ᠋ᠡᠨ ᠰᠢᠨᠡ ᠪᠠᠭᠤᠳᠠᠯ ᠳᠡᠭᠡᠷᠡ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠮᠥᠷᠲᠡᠭᠡᠨ ᠲᠣᠭᠯᠠᠭᠴᠢ ᠶ᠋ᠢᠨ ᠭᠠᠷ ᠠ᠋ᠴᠠ ᠰᠠᠯᠤᠭᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌
(ᠬᠣᠶᠠᠷ) ᠬᠦᠦ ᠬᠤᠪᠢᠷᠠᠬᠤ ᠳ᠋ᠤ᠌᠂ ᠬᠦᠦ ᠪᠡᠨ ᠨᠢᠭᠡᠨᠲᠡ ᠰᠢᠲᠠᠷᠠ ᠶ᠋ᠢᠨ ᠬᠥᠯᠭᠡ ᠡᠴᠡ ᠵᠠᠢᠯᠠᠭᠤᠯᠵᠤ᠂ ᠰᠢᠨᠡ ᠪᠤᠲᠠ ᠬᠤᠪᠢᠷᠠᠯᠲᠠ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤ᠌ ᠲᠣᠭᠯᠠᠭᠴᠢ ᠶ᠋ᠢᠨ ᠭᠠᠷ ᠠ᠋ᠴᠠ ᠰᠠᠯᠤᠭᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌
( ᠬᠦᠦ ᠬᠤᠪᠢᠷᠠᠯᠲᠠ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤ᠌ ᠬᠦᠷᠴᠦ ᠭᠠᠷ ᠢ᠋ᠶ᠋ᠠᠨ ᠰᠠᠯᠭᠠᠭᠰᠠᠨ ᠢ᠋ ᠨᠡᠭᠦᠳᠡᠯ ᠭᠦᠢᠴᠡᠭᠰᠡᠨ ᠦᠭᠡᠢ ᠪᠡᠷ ᠦᠵᠡᠨᠡ᠃ ᠭᠡᠪᠡᠴᠦ ᠲᠤᠰ ᠬᠦᠦ ᠶ᠋ᠢ ᠥᠭᠡᠷᠡ ᠪᠠᠭᠤᠳᠠᠯ ᠳ᠋ᠤ᠌ ᠨᠡᠭᠦᠵᠦ ᠪᠣᠯᠬᠤ ᠦᠭᠡᠢ᠃)
ᠨᠠᠢ᠍ᠮᠠ᠂ ᠡᠰᠡᠷᠭᠦᠦ ᠲᠣᠭᠯᠠᠭᠴᠢ ᠨᠢ ᠳᠡᠭᠡᠷᠡᠬᠢ ᠳᠣᠯᠣᠭᠠᠨ ᠵᠤᠷᠪᠤᠰ ᠠ᠋ᠴᠠ ᠵᠥᠷᠢᠴᠡᠭᠰᠡᠨ ᠪᠠᠢᠳᠠᠯ ᠳ᠋ᠤ᠌᠂ ᠬᠡᠷᠪᠡ ᠨᠡᠭᠦᠬᠦ ᠡᠭᠡᠯᠵᠢᠨ ᠦ᠌ ᠲᠣᠭᠯᠠᠭᠴᠢ ᠶ᠋ᠢ ᠨᠡᠭᠦᠬᠦ ᠪᠤᠶᠤ ᠢᠳᠡᠬᠦ ᠵᠣᠷᠢᠯᠭᠠ ᠪᠠᠷ ᠬᠦᠦ ᠳ᠋ᠦ᠍ ᠭᠠᠷ ᠬᠦᠷᠦᠭᠰᠡᠨ ᠪᠣᠯ ᠡᠰᠡᠷᠭᠦᠦ ᠲᠣᠭᠯᠠᠭᠴᠢ ᠶ᠋ᠢᠨ(ᠳᠦᠷᠢᠮ ᠡᠴᠡ ᠵᠥᠷᠢᠴᠡᠭᠰᠡᠨ) ᠢ᠋ ᠳᠤᠷᠠᠳᠤᠨ ᠵᠠᠭᠠᠯᠳᠤᠬᠤ ᠡᠷᠬᠡ ᠦᠭᠡᠢ ᠪᠣᠯᠤᠨᠠ᠃ ᠳᠠᠷᠤᠢ᠂ ᠡᠰᠡᠷᠭᠦᠦ ᠲᠣᠭᠯᠠᠭᠴᠢ ᠨᠢ ᠳᠦᠷᠢᠮ ᠡᠴᠡ ᠵᠥᠷᠢᠴᠡᠭᠰᠡᠨ ᠨᠡᠭᠦᠳᠡᠯ ᠢ᠋ᠶ᠋ᠡᠨ ᠵᠠᠯᠠᠷᠠᠭᠤᠯᠤᠨ ᠶᠠᠪᠤᠵᠤ᠂ ᠨᠡᠭᠦᠬᠦ ᠡᠭᠡᠯᠵᠢᠨ ᠦ᠌ ᠲᠣᠭᠯᠠᠭᠴᠢ ᠨᠢ ᠭᠠᠷ ᠬᠦᠷᠦᠭᠰᠡᠨ ᠪᠤᠲᠠ ᠬᠦᠦ ᠪᠡᠨ ᠨᠡᠭᠦᠬᠦ ᠪᠤᠶᠤ ᠢᠳᠡᠬᠦ ᠬᠡᠷᠡᠭᠲᠡᠢ᠃
ᠲᠠᠪᠤᠳᠤᠭᠠᠷ ᠵᠦᠢᠯ ᠳᠠᠭᠤᠰᠤᠭᠰᠠᠨ ᠥᠷᠥᠭ
ᠨᠢᠭᠡ
(ᠨᠢᠭᠡ) ᠲᠣᠭᠯᠠᠭᠴᠢ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠨᠣᠶᠠᠨ ᠢ᠋ ᠮᠠᠳᠯᠠᠭᠰᠠᠨ ᠪᠣᠯ ᠦᠷᠦᠭ ᠢ᠋ ᠬᠣᠵᠢᠭᠰᠠᠨ ᠳ᠋ᠤ᠌ ᠲᠣᠭᠠᠴᠢᠵᠤ᠂ ᠦᠷᠦᠭ ᠰᠢᠭᠤᠳ ᠳᠠᠭᠤᠰᠤᠨᠠ᠃
(ᠬᠣᠶᠠᠷ) ᠲᠣᠭᠯᠠᠭᠴᠢ ᠪᠠᠭᠤᠵᠤ ᠥᠭᠴᠦ ᠪᠠᠢᠭᠠ ᠪᠠᠨ ᠮᠡᠳᠡᠭᠳᠡᠭᠰᠡᠨ ᠢᠶᠡᠷ ᠡᠰᠡᠷᠬᠦᠦ ᠲᠠᠯᠠ ᠶᠢᠨ ᠲᠣᠭᠯᠠᠭᠴᠢ ᠶᠢ ᠬᠣᠨᠵᠢᠭᠰᠠᠨ ᠢᠶᠠᠷ ᠲᠣᠭᠠᠴᠠᠵᠤ᠂ ᠥᠷᠥᠭ ᠰᠢᠭᠤᠳ ᠳᠠᠭᠤᠰᠤᠨᠠ᠃
ᠬᠣᠶᠠᠷ
(ᠨᠢᠭᠡ) ᠡᠭᠡᠯᠵᠢᠲᠦ ᠨᠡᠭᠦᠳᠡᠯ ᠢ᠋ᠶ᠋ᠡᠨ ᠬᠢᠬᠦ ᠲᠣᠭᠯᠠᠭᠴᠢ ᠨᠡᠭᠦᠬᠦ ᠨᠡᠭᠦᠳᠡᠯ ᠦᠭᠡᠢ ᠪᠣᠯᠤᠭᠰᠠᠨ ᠪᠠ ᠲᠡᠭᠦᠨ ᠦ᠌ ᠨᠣᠶᠠᠨ ᠱᠠᠯᠭᠠᠨ ᠳ᠋ᠤ᠌ ᠣᠷᠣᠭᠠ ᠦᠭᠡᠢ ᠲᠣᠬᠢᠶᠠᠯᠳᠤᠯ ᠢ᠋《ᠵᠢᠳ》 ᠭᠡᠵᠦ ᠨᠠᠷᠠᠯᠠᠨᠠ᠃ ᠵᠢᠳ ᠪᠣᠯᠤᠭᠰᠠᠨ ᠪᠣᠯ ᠥᠷᠥᠭ ᠬᠠᠢᠨᠴᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠵᠤ ᠳᠠᠭᠤᠰᠤᠨᠠ᠃
(ᠬᠣᠶᠠᠷ) ᠠᠯᠢ ᠴᠤ᠌ ᠲᠣᠭᠯᠠᠭᠴᠢ ᠡᠭᠡᠯᠵᠢᠲᠦ ᠨᠡᠭᠦᠳᠡᠯ ᠦ᠋ᠨ ᠶᠠᠮᠠᠷ ᠴᠤ᠌ ᠶᠠᠪᠤᠭᠠ ᠪᠠᠷ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠨᠣᠶᠠᠨ ᠢ᠋ ᠮᠠᠳᠯᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠲᠡᠢᠮᠦ ᠪᠠᠢᠷᠢᠯᠠᠯ ᠡᠭᠦᠰᠦᠭᠰᠡᠨ ᠪᠣᠯ ᠰᠢᠭᠤᠳ ᠳᠠᠭᠤᠰᠤᠨᠠ᠃ ᠡᠨᠡ ᠬᠦ᠌ ᠪᠠᠢᠳᠠᠯ ᠢ᠋《ᠠᠯᠪᠠ ᠶ᠋ᠢᠨ ᠬᠠᠢᠨᠴᠠᠭᠠ》 ᠭᠡᠵᠦ ᠨᠡᠷᠡᠯᠡᠨᠡ᠃
(ᠭᠤᠷᠪᠠ) ᠬᠣᠶᠠᠷ ᠲᠣᠭᠯᠠᠭᠴᠢ ᠲᠣᠭᠯᠠᠯᠲᠠ ᠶᠢᠨ ᠶᠠᠪᠤᠴᠠ ᠳᠤ ᠬᠠᠢᠨᠴᠠᠭᠠ ᠭᠡᠵᠦ ᠲᠣᠬᠢᠷᠠᠯᠴᠠᠪᠠᠯ᠂ ᠲᠣᠰ ᠥᠷᠥᠭ ᠬᠠᠢᠨᠴᠠᠭᠰᠠᠨ ᠳᠤ ᠲᠣᠭᠠᠴᠠᠭᠳᠠᠵᠤ ᠰᠢᠭᠤᠳ ᠳᠠᠭᠤᠰᠤᠨᠠ᠃
(ᠳᠥᠷᠪᠡ) ᠰᠢᠲᠠᠷᠠ ᠶ᠋ᠢᠨ ᠬᠥᠯᠭᠡ ᠳᠡᠭᠡᠷᠡ ᠠᠳᠠᠯᠢᠬᠠᠨ ᠪᠠᠢᠷᠢᠯᠠᠯ ᠭᠤᠷᠪᠠ ᠪᠤᠶᠤ ᠭᠤᠷᠪᠠ ᠠ᠋ᠴᠠ ᠳᠡᠭᠡᠭᠰᠢ ᠳᠠᠪᠲᠠᠭᠳᠠᠭᠰᠠᠨ ᠪᠣᠯ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠯᠲᠠ ᠬᠠᠢᠨᠴᠠᠭᠰᠠᠨ ᠢ᠋ᠶ᠋ᠠᠷ ᠳᠠᠭᠤᠰᠴᠤ ᠪᠣᠯᠤᠨᠠ᠃
(ᠲᠠᠪᠤ) ᠲᠣᠭᠯᠠᠭᠴᠢᠳ ᠰᠡᠭᠦᠯ ᠦ᠋ᠨ50 ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠨᠡᠭᠦᠳᠡᠯ ᠳ᠋ᠦ᠍ ᠠᠯᠢ ᠴᠤ᠌ ᠬᠦᠦ ᠶ᠋ᠢ ᠬᠥᠳᠡᠯᠭᠡᠭᠡ ᠦᠭᠡᠢ᠂ ᠮᠥᠨ ᠶᠠᠮᠠᠷ ᠴᠤ᠌ ᠪᠤᠲᠠ ᠬᠦᠦ ᠢᠳᠡᠭᠳᠡᠭᠡ ᠦᠭᠡᠢ ᠲᠣᠭᠯᠠᠯᠲᠠ ᠶ᠋ᠢ ᠬᠠᠢᠨᠴᠠᠭᠰᠠᠨ ᠢ᠋ᠶ᠋ᠠᠷ ᠳᠠᠭᠤᠰᠴᠤ ᠪᠣᠯᠤᠨᠠ᠃
ᠬᠣᠶᠠᠳᠤᠭᠠᠷ ᠪᠦᠯᠦᠭ ᠤᠷᠤᠯᠳᠤᠭᠠᠨ ᠤ᠋ ᠳᠦᠷᠢᠮ
ᠨᠢᠭᠡᠳᠦᠭᠡᠷ ᠵᠦᠢᠯ ᠰᠢᠳᠡᠷᠡ ᠶ᠋ᠢᠨ ᠴᠠᠭ
ᠨᠢᠭᠡ᠂ ᠰᠢᠲᠠᠷᠠ ᠶ᠋ᠢᠨ ᠴᠠᠭ ᠭᠡᠳᠡᠭ ᠨᠢ ᠬᠣᠶᠠᠷ ᠴᠠᠭ ᠨᠢᠭᠡ ᠨᠢᠭᠡ ᠪᠡᠷ ᠡᠭᠡᠯᠵᠢᠯᠡᠨ ᠠᠵᠢᠯᠯᠠᠬᠤ ᠮᠠᠶᠢᠭ ᠢ᠋ᠶ᠋ᠠᠷ ᠬᠣᠭᠣᠷᠣᠨᠳᠣ ᠪᠠᠨ ᠬᠣᠯᠪᠣᠭᠳᠠᠭᠰᠠᠨ ᠬᠣᠶᠠᠷ ᠨᠢᠭᠤᠷ ᠲᠠᠢ ᠴᠠᠭ ᠪᠣᠯᠤᠨᠠ᠃
ᠲᠤᠬᠠᠢ ᠶ᠋ᠢᠨ ᠰᠢᠳᠡᠷᠡ ᠶ᠋ᠢᠨ ᠳᠦᠷᠢᠮ ᠳ᠋ᠦ᠍ ᠳᠤᠷᠠᠳᠬᠤ《ᠴᠠᠭ》 ᠬᠡᠮᠡᠬᠦ ᠣᠢᠯᠠᠭᠠᠯᠲᠠ ᠨᠢ ᠲᠤᠬᠠᠢ ᠶ᠋ᠢᠨ ᠬᠣᠶᠠᠷ ᠨᠢᠭᠤᠷ ᠲᠠᠢ ᠴᠠᠭ ᠤ᠋ᠨ ᠨᠢᠭᠡ ᠶ᠋ᠢ ᠬᠡᠯᠡᠨᠡ᠃
ᠨᠢᠭᠤᠷ ᠲᠠᠢ ᠴᠠᠭ ᠪᠦᠷᠢ《ᠲᠤᠭ》 ᠲᠠᠢ ᠪᠠᠢᠨᠠ᠃《ᠲᠤᠭ ᠤᠨᠠᠬᠤ》 ᠭᠡᠳᠡᠭ ᠣᠢᠯᠠᠭᠠᠯᠲᠠ ᠨᠢ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠭᠴᠢ ᠳ᠋ᠤ᠌ ᠥᠭᠭᠦᠭᠰᠡᠨ ᠬᠤᠭᠤᠴᠠᠭᠠ ᠳᠠᠭᠤᠰᠤᠭᠰᠠᠨ ᠢ᠋ ᠬᠡᠯᠡᠨᠡ᠃
ᠬᠣᠶᠠᠷ
(ᠨᠢᠭᠡ) ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠰᠢᠳᠡᠷᠡ ᠶ᠋ᠢᠨ ᠬᠥᠯᠭᠡ ᠳᠡᠭᠡᠷᠡ ᠡᠭᠡᠯᠵᠢᠲᠦ ᠨᠡᠭᠦᠳᠡᠯ ᠢ᠋ᠶ᠋ᠡᠨ ᠬᠢᠵᠦ ᠪᠠᠢᠭᠠ ᠲᠣᠭᠯᠠᠭᠴᠢ ᠯᠠ ᠰᠠᠶᠢ ᠥᠪᠡᠷ ᠦ᠋ᠨ ᠴᠠᠭ ᠢ᠋ ᠵᠣᠭᠰᠣᠭᠠᠵᠤ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠴᠠᠭ ᠢ᠋ ᠠᠵᠢᠯᠯᠠᠭᠤᠯᠬᠤ ᠡᠷᠬᠡ ᠲᠡᠢ᠃ ᠡᠭᠦᠨ ᠢ᠋《 ᠴᠠᠭ ᠢ᠋ᠶ᠋ᠠᠨ ᠳᠠᠷᠤᠨᠠ》 ᠭᠡᠵᠦ ᠬᠡᠯᠡᠨᠡ᠃ ᠡᠨᠡ ᠨᠢ ᠲᠤᠬᠠᠢ ᠶ᠋ᠢᠨ ᠨᠡᠭᠦᠳᠡᠯ ᠬᠢᠭᠰᠡᠨ ᠳ᠋ᠦ᠍ ᠪᠠᠭᠲᠠᠨᠠ᠃
ᠲᠣᠭᠯᠠᠭᠴᠢ ᠰᠢᠳᠡᠷᠡ ᠶ᠋ᠢᠨ ᠬᠥᠯᠭᠡ ᠳᠡᠭᠡᠷᠡᠬᠢ ᠨᠡᠭᠦᠳᠡᠯ ᠢ᠋ᠶ᠋ᠡᠨ ᠬᠢᠭᠰᠡᠨ ᠦ᠌ ᠳᠠᠷᠠᠭᠠ ᠰᠠᠶᠢ ᠴᠠᠭ ᠢ᠋ᠶ᠋ᠠᠨ ᠳᠠᠷᠤᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠨᠡ᠃ ᠬᠥᠯᠭᠡ ᠳᠡᠭᠡᠷᠡ ᠨᠡᠭᠦᠳᠡᠯ ᠬᠢᠬᠦ ᠪᠣᠯᠤᠨ ᠴᠠᠭ ᠳᠠᠷᠤᠬᠤ᠂ ᠮᠥᠨ ᠲᠡᠳᠡᠭᠡᠷ ᠦ᠋ᠨ ᠬᠣᠭᠣᠷᠣᠨᠳᠣᠬᠢ ᠬᠤᠭᠤᠴᠠᠭᠠ ᠶ᠋ᠢ ᠲᠣᠭᠯᠠᠭᠴᠢ ᠳ᠋ᠤ᠌ ᠥᠭᠭᠦᠭᠳᠡᠭᠰᠡᠨ ᠬᠤᠭᠤᠴᠠᠭᠠᠨ ᠤ᠋ ᠬᠡᠰᠡᠭ ᠲᠦ᠍ ᠬᠠᠮᠢᠶᠠᠷᠤᠭᠤᠯᠤᠨ ᠠᠪᠴᠤ ᠦᠵᠡᠨᠡ᠃
(ᠬᠣᠶᠠᠷ) ᠲᠣᠭᠯᠠᠭᠴᠢ ᠨᠡᠭᠦᠳᠡᠯ ᠬᠢᠭᠰᠡᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠠᠭ ᠳᠠᠷᠤᠨᠠ᠃ ᠭᠠᠷ ᠢ᠋ᠶ᠋ᠠᠨ ᠴᠠᠭ ᠤ᠋ᠨ ᠲᠣᠪᠴᠢᠯᠠᠭᠤᠷ ᠠ᠋ᠴᠠ ᠰᠠᠯᠭᠠᠬᠤ ᠦᠭᠡᠢ ᠪᠠᠢᠬᠤ᠂ ᠲᠣᠪᠴᠢᠯᠠᠭᠤᠷ ᠤ᠋ᠨ ᠳᠡᠭᠡᠭᠦᠷ ᠪᠠᠢᠯᠭᠠᠬᠤ ᠶ᠋ᠢ ᠬᠣᠷᠢᠭᠯᠠᠨᠠ᠃
(ᠭᠤᠷᠪᠠ) ᠲᠣᠭᠯᠠᠭᠴᠢ ᠴᠠᠭ ᠢ᠋ ᠨᠢᠮᠪᠠᠢ ᠳᠠᠷᠤᠬᠤ ᠶᠣᠰᠣᠲᠠᠢ᠃ ᠴᠠᠭ ᠢ᠋ ᠬᠦᠴᠦ ᠬᠡᠷᠡᠭᠯᠡᠨ ᠳᠠᠷᠤᠬᠤ᠂ ᠡᠷᠭᠦᠬᠦ ᠤᠨᠠᠭᠠᠬᠤ ᠶ᠋ᠢ ᠬᠣᠷᠢᠭᠯᠠᠨᠠ᠃ ᠰᠢᠳᠡᠷᠡ ᠶ᠋ᠢᠨ ᠴᠠᠭ ᠢ᠋ ᠪᠤᠷᠤᠭᠤ ᠡᠳ᠋ᠯᠡᠪᠡᠯ ᠳᠣᠯᠣᠳᠤᠭᠠᠷ ᠵᠦᠢᠯ ᠦ᠋ᠨ ᠵᠤᠷᠪᠤᠰ ᠶᠢᠰᠦ ᠶ᠋ᠢᠨ ᠳᠠᠭᠠᠤ ᠰᠢᠢᠳᠬᠡᠯ ᠥᠭᠭᠦᠨᠡ᠃
(ᠳᠥᠷᠪᠡ) ᠵᠥᠪᠬᠡᠨ ᠴᠠᠭ ᠨᠢ ᠶᠠᠪᠤᠵᠤ ᠪᠠᠢᠭᠠ ᠲᠣᠭᠯᠠᠭᠴᠢ ᠪᠤᠲᠠ ᠬᠦᠦ ᠪᠡᠨ ᠵᠠᠰᠠᠨ ᠲᠠᠯᠪᠢᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠨᠡ᠃
(ᠲᠠᠪᠤ) ᠲᠣᠭᠯᠠᠭᠴᠢ ᠴᠠᠭ ᠲᠠᠢ ᠬᠠᠷᠢᠴᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠪᠣᠯ ᠲᠤᠰᠠᠯᠠᠭᠴᠢ ᠪᠠᠷ ᠲᠤᠰᠠᠯᠠᠭᠤᠯᠵᠤ ᠪᠣᠯᠤᠨᠠ᠃ ᠭᠡᠪᠡᠴᠦ ᠵᠡᠮᠳᠡᠭ ᠳᠣᠷᠭᠣᠨ(ᠬᠥᠭᠵᠢᠯ ᠦ᠋ᠨ ᠪᠡᠷᠬᠡᠰᠢᠶᠡᠯ ᠲᠡᠢ) ᠲᠣᠭᠯᠠᠭᠴᠢ ᠶ᠋ᠢᠨ ᠴᠠᠭ ᠲᠤ ᠪᠣᠯ ᠲᠣᠬᠢᠷᠠᠭᠤᠯᠤᠯᠲᠠ ᠬᠢᠬᠦ ᠦᠭᠡᠢ᠃
ᠭᠤᠷᠪᠠ
(ᠨᠢᠭᠡ) ᠰᠢᠳᠡᠷᠡ ᠶ᠋ᠢᠨ ᠴᠠᠭ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠦᠶᠡ ᠳ᠋ᠦ᠍ ᠲᠣᠭᠯᠠᠭᠴᠢ ᠲᠣᠭᠲᠠᠭᠠᠭᠳᠠᠭᠰᠠᠨ ᠲᠣᠭᠠ ᠲᠠᠢ ᠨᠡᠭᠦᠳᠡᠯ ᠢ᠋ ᠵᠢᠭᠠᠭᠰᠠᠨ ᠴᠠᠭ ᠲᠤ ᠨᠢ ᠪᠠᠭᠲᠠᠭᠠᠵᠤ ᠨᠡᠭᠦᠨᠡ᠃ ᠡᠰᠡᠪᠡᠯ ᠡᠯᠧᠺᠲ᠋ᠷᠣᠨ ᠴᠠᠭ ᠬᠡᠷᠡᠭᠯᠡᠵᠦ ᠨᠡᠭᠦᠳᠡᠯ ᠪᠣᠯᠭᠠᠨ ᠳ᠋ᠤ᠌ ᠲᠣᠳᠣᠷᠬᠠᠢ ᠵᠢᠭᠠᠭᠰᠠᠨ ᠬᠤᠭᠤᠴᠠᠭᠠ ᠨᠡᠮᠡᠬᠦ ᠠᠷᠭᠠ ᠶ᠋ᠢ ᠠᠪᠴᠤ ᠪᠣᠯᠤᠨᠠ᠃ ᠡᠨᠡ ᠪᠦᠭᠦᠳᠡ ᠶ᠋ᠢᠨ ᠠᠯᠢᠨ ᠨᠢ ᠪᠠᠢᠬᠤ ᠶ᠋ᠢ ᠤᠷᠤᠯᠳᠤᠭᠠᠨ ᠤ᠋ ᠡᠮᠦᠨᠡ ᠤᠷᠢᠳᠴᠢᠯᠠᠨ ᠲᠣᠭᠲᠠᠭᠠᠭᠰᠠᠨ ᠪᠠᠢᠬᠤ ᠶᠣᠰᠣᠲᠠᠢ᠃
(ᠬᠣᠶᠠᠷ) ᠡᠬᠢᠨ ᠦ᠌ ᠬᠡᠰᠡᠭ ᠲᠦ᠍ ᠬᠡᠮᠨᠡᠭᠳᠡᠭᠰᠡᠨ ᠬᠤᠭᠤᠴᠠᠭᠠ ᠳᠠᠷᠠᠭᠠ ᠶ᠋ᠢᠨ ᠬᠡᠰᠡᠭ ᠲᠦ᠍ ᠨᠡᠮᠡᠭᠳᠡᠵᠦ ᠲᠣᠭᠠᠴᠢᠭᠳᠠᠨᠠ᠃ ᠬᠠᠷᠢᠨ ᠬᠤᠭᠤᠴᠠᠭᠠ ᠨᠡᠮᠡᠬᠦ ᠬᠡᠯᠪᠡᠷᠢ ᠲᠡᠢ ᠲᠣᠭᠯᠠᠯᠲᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠣᠶᠠᠷ ᠲᠣᠭᠯᠠᠭᠴᠢ ᠳ᠋ᠤ᠌《ᠦᠨᠳᠦᠰᠦᠨ ᠪᠣᠳᠣᠯᠲᠠ ᠶ᠋ᠢᠨ ᠴᠠᠭ》 ᠬᠡᠮᠡᠬᠦ ᠬᠤᠪᠢᠶᠠᠷᠢ ᠴᠠᠭ ᠥᠭᠳᠡᠭ᠃ ᠮᠥᠨ ᠲᠣᠭᠯᠠᠯᠲᠠ ᠶ᠋ᠢᠨ ᠨᠡᠭᠦᠳᠡᠯ ᠪᠦᠷᠢ ᠳ᠋ᠦ᠍《ᠲᠣᠭᠲᠠᠭᠰᠠᠨ ᠨᠡᠮᠡᠯᠲᠡ ᠬᠤᠭᠤᠴᠠᠭᠠ》 ᠶ᠋ᠢ ᠥᠭᠳᠡᠭ᠃ ᠲᠣᠭᠲᠠᠭᠰᠠᠨ ᠨᠡᠮᠡᠯᠲᠡ ᠬᠤᠭᠤᠴᠠᠭᠠ ᠳᠠᠭᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠦᠨᠳᠦᠰᠦᠨ ᠪᠣᠳᠣᠯᠲᠠ ᠶ᠋ᠢᠨ ᠬᠤᠭᠤᠴᠠᠭᠠᠨ ᠤ᠋ ᠴᠠᠭ ᠶᠠᠪᠤᠵᠤ ᠡᠬᠢᠯᠡᠳᠡᠭ᠃ ᠲᠣᠭᠲᠠᠭᠰᠠᠨ ᠨᠡᠮᠡᠯᠲᠡ ᠬᠤᠭᠤᠴᠠᠭᠠ ᠳᠠᠭᠤᠰᠬᠤ ᠠ᠋ᠴᠠ ᠡᠮᠦᠨᠡ ᠲᠣᠭᠯᠠᠭᠴᠢ ᠴᠠᠭ ᠢ᠋ᠶ᠋ᠠᠨ ᠳᠠᠷᠤᠭᠰᠠᠨ ᠪᠣᠯ ᠲᠡᠭᠦᠨ ᠦ᠌ ᠦᠨᠳᠦᠰᠦᠨ ᠬᠤᠭᠤᠴᠠᠭᠠᠨ ᠤ᠋ ᠦᠯᠡᠳᠡᠭᠳᠡᠯ ᠬᠤᠪᠢᠷᠠᠬᠤ ᠦᠭᠡᠢ᠃ ᠡᠨᠡ ᠨᠢ ᠨᠡᠮᠡᠯᠲᠡ ᠬᠤᠭᠤᠴᠠᠭᠠᠨ ᠤ᠋ ᠦᠯᠡᠳᠡᠭᠳᠡᠯ ᠲᠡᠢ ᠶᠠᠮᠠᠷ ᠴᠤ᠌ ᠬᠣᠯᠪᠣᠭᠳᠠᠯ ᠪᠠᠢᠬᠤ ᠦᠭᠡᠢ᠃
ᠳᠥᠷᠪᠡ᠂ ᠴᠠᠭ ᠤ᠋ᠨ ᠲᠤᠭ ᠤᠨᠠᠭᠰᠠᠨ ᠳᠠᠷᠤᠢ ᠳ᠋ᠤ᠌ ᠳᠡᠭᠡᠷᠡᠬᠢ ᠵᠤᠷᠪᠤᠰ ᠤ᠋ᠨ ᠳᠠᠭᠠᠤ ᠰᠢᠯᠭᠠᠨᠠ᠃
ᠲᠠᠪᠤ᠂ ᠲᠣᠭᠯᠠᠯᠲᠠ ᠡᠬᠢᠯᠡᠬᠦ ᠶ᠋ᠢᠨ ᠡᠮᠦᠨᠡ ᠰᠢᠳᠡᠷᠡ ᠶ᠋ᠢᠨ ᠴᠠᠭ ᠬᠠᠮᠢᠭᠠ ᠪᠠᠢᠷᠢᠯᠠᠭᠤᠯᠬᠤ ᠶ᠋ᠢ ᠬᠢᠨᠠᠭᠴᠢ <ᠰᠢᠭᠦᠭᠴᠢ> ᠰᠢᠢᠳᠪᠦᠷᠢᠯᠡᠨᠡ᠃
ᠵᠢᠷᠭᠤᠭᠠ᠂ ᠤᠷᠤᠯᠳᠤᠭᠠᠨ ᠡᠬᠢᠯᠡᠬᠦ ᠴᠠᠭ ᠲᠤᠯᠤᠮᠠᠭᠴᠠ ᠨᠡᠭᠦᠬᠦ ᠡᠭᠡᠯᠵᠢᠨ ᠦ᠌ ᠲᠣᠭᠯᠠᠭᠴᠢ ᠶ᠋ᠢᠨ ᠴᠠᠭ ᠢ᠋ ᠳᠠᠷᠤᠨᠠ᠃
ᠳᠣᠯᠣᠭᠠ
(ᠨᠢᠭᠡ) ᠤᠷᠤᠯᠳᠤᠭᠠᠨ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠴᠢ ᠠ᠋ᠴᠠ 《ᠣᠷᠣᠢᠲᠠᠬᠤ ᠶ᠋ᠢ ᠵᠥᠪᠰᠢᠶᠠᠷᠡᠬᠦ ᠬᠤᠭᠤᠴᠠᠭᠠ》ᠶ᠋ᠢ ᠤᠷᠢᠳᠴᠢᠯᠠᠨ ᠲᠣᠭᠲᠠᠭᠠᠭᠰᠠᠨ ᠪᠠᠢᠬᠤ ᠱᠠᠭᠠᠷᠳᠠᠯᠭᠠ ᠲᠠᠢ᠃ ᠬᠡᠷᠪᠡ ᠬᠢᠨᠠᠭᠴᠢ ᠥᠭᠡᠷᠡ ᠪᠡᠷ ᠰᠢᠢᠳᠪᠤᠷᠢ ᠭᠠᠷᠭᠠᠭᠰᠠᠨ ᠦᠭᠡᠢ ᠪᠣᠯ ᠲᠤᠰ ᠬᠤᠭᠤᠴᠠᠭᠠᠨ ᠠ᠋ᠴᠠ ᠣᠷᠣᠢ ᠢᠷᠡᠭᠰᠡᠨ ᠲᠣᠭᠯᠠᠭᠴᠢ ᠶ᠋ᠢ ᠡᠨᠡ ᠦᠷᠦᠭ ᠲᠦ᠍ ᠢᠯᠠᠭᠳᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠨᠠ᠃
(ᠬᠣᠶᠠᠷ) ᠬᠣᠶᠠᠷ ᠲᠣᠭᠯᠠᠭᠴᠢ ᠠᠯᠢ ᠠᠯᠢ ᠨᠢ ᠢᠷᠡᠭᠰᠡᠨ ᠦᠭᠡᠢ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠬᠡᠷᠪᠡ ᠬᠢᠨᠠᠭᠴᠢ ᠥᠭᠡᠷᠡ ᠪᠡᠷ ᠰᠢᠢᠳᠪᠦᠷᠢ ᠭᠠᠷᠭᠠᠭᠰᠠᠨ ᠦᠭᠡᠢ ᠪᠣᠯ ᠨᠡᠭᠦᠬᠦ ᠡᠭᠡᠯᠵᠢᠨ ᠦ᠌ ᠲᠣᠭᠯᠠᠭᠴᠢ ᠶ᠋ᠢᠨ ᠴᠠᠭ ᠨᠢ ᠲᠡᠭᠦᠨ ᠢ᠋ ᠢᠷᠡᠲᠡᠯᠡ ᠶᠠᠪᠤᠬᠤ ᠪᠣᠯᠤᠨᠠ᠃
ᠨᠠᠢ᠍ᠮᠠ᠂ ᠬᠢᠨᠠᠭᠴᠢ ᠲᠤᠭ ᠤᠨᠠᠭᠰᠠᠨ ᠢ᠋ ᠲᠣᠭᠲᠠᠭᠠᠬᠤ᠂ ᠡᠰᠡᠪᠡᠯ ᠠᠯᠢ ᠨᠢᠭᠡ ᠲᠣᠭᠯᠠᠭᠴᠢ ᠡᠨᠡ ᠲᠤᠬᠠᠢ ᠵᠥᠪ ᠮᠡᠳᠡᠭᠳᠡᠯ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠷ ᠴᠠᠭ ᠤ᠋ᠨ ᠲᠤᠭ ᠢ᠋ ᠤᠨᠠᠭᠰᠠᠨ ᠭᠡᠵᠦ ᠲᠣᠭᠲᠠᠭᠠᠨᠠ᠃
ᠶᠢᠰᠦ᠂ ᠨᠢᠭᠡᠳᠦᠭᠡᠷ ᠪᠦᠯᠦᠭ ᠦ᠋ᠨ ᠲᠠᠪᠤᠳᠤᠭᠠᠷ ᠵᠦᠢᠯ ᠦ᠋ᠨ ᠵᠤᠷᠪᠤᠰ ᠨᠢᠭᠡ ᠶ᠋ᠢᠨ (ᠨᠢᠭᠡ)(ᠬᠣᠶᠠᠷ)᠂ ᠵᠤᠷᠪᠤᠰ ᠬᠣᠶᠠᠷ ᠤ᠋ᠨ (ᠨᠢᠭᠡ)(ᠬᠣᠶᠠᠷ)(ᠭᠤᠷᠪᠠ) ᠶ᠋ᠢᠨ ᠠᠯᠢ ᠨᠢᠭᠡ ᠡᠴᠡ ᠪᠤᠰᠤᠳ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠲᠣᠭᠯᠠᠭᠴᠢ ᠦᠭᠭᠦᠭᠳᠡᠭᠰᠠᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠪᠠᠨ ᠲᠣᠭᠲᠠᠭᠰᠠᠨ ᠨᠡᠭᠦᠳᠡᠯ ᠢ᠋ ᠪᠦᠷᠢᠨ ᠬᠢᠵᠦ ᠠᠮᠵᠢᠭᠰᠠᠨ ᠦᠭᠡᠢ ᠪᠣᠯ ᠲᠡᠭᠦᠨ ᠢ᠋ ᠬᠤᠵᠢᠭᠳᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠨᠠ᠃ ᠭᠡᠪᠡᠴᠦ ᠠᠯᠢ ᠴᠤ᠌ ᠲᠣᠭᠯᠠᠭᠴᠢ ᠡᠭᠡᠯᠵᠢᠲᠦ ᠨᠡᠭᠦᠳᠡᠯ ᠦ᠋ᠨ ᠶᠠᠮᠠᠷ ᠴᠤ᠌ ᠶᠠᠪᠤᠭᠠ ᠪᠠᠷ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠨᠣᠶᠠᠨ ᠢ᠋ ᠮᠠᠳᠯᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠪᠠᠢᠷᠢᠯᠠᠯ ᠡᠭᠦᠰᠦᠭᠰᠡᠨ ᠪᠣᠯ ᠬᠠᠢᠨᠴᠠᠭᠰᠠᠨ ᠭᠡᠵᠦ ᠲᠣᠭᠠᠴᠠᠨᠠ᠃
ᠠᠷᠪᠠ
(ᠨᠢᠭᠡ) ᠴᠠᠭ ᠲᠤ᠌ ᠮᠡᠳᠡᠭᠳᠡᠬᠦᠢᠴᠡ ᠭᠠᠵᠢᠭ ᠪᠠᠢᠬᠤ ᠦᠭᠡᠢ ᠯᠡ ᠪᠣᠯ ᠲᠡᠭᠦᠨ ᠦ᠌ ᠵᠢᠭᠠᠯᠲᠠ ᠶ᠋ᠢ ᠵᠥᠪ ᠭᠡᠵᠦ ᠦᠵᠡᠨᠡ᠃ ᠡᠪᠳᠡᠷᠡᠪᠡᠯ᠂ ᠡᠪᠳᠡᠷᠬᠡᠢ ᠴᠠᠭ ᠢ᠋ ᠬᠢᠨᠠᠭᠴᠢ ᠰᠣᠯᠢᠬᠤ ᠪᠠ ᠢᠩᠭᠢᠬᠦ ᠳ᠋ᠦ᠍ ᠪᠡᠨ ᠰᠢᠨᠡ ᠴᠠᠭ ᠤ᠋ᠨ ᠵᠢᠭᠠᠯᠲᠠ ᠶ᠋ᠢ ᠴᠢᠳᠠᠬᠤ ᠶ᠋ᠢᠨ ᠴᠢᠨᠡᠭᠡ ᠪᠡᠷ ᠵᠥᠪ ᠲᠣᠬᠢᠷᠠᠭᠤᠯᠤᠨᠠ᠃
(ᠬᠣᠶᠠᠷ) ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠰᠢᠳᠡᠷᠡ ᠶ᠋ᠢᠨ ᠴᠠᠭ ᠤ᠋ᠨ ᠠᠯᠢ ᠨᠢᠭᠡ ᠨᠢ ᠡᠰᠡᠪᠡᠯ ᠬᠣᠶᠠᠭᠤᠯᠠ ᠪᠠᠨ ᠪᠤᠷᠤᠭᠤ ᠲᠠᠭᠠᠷᠠᠭᠤᠯᠤᠭᠰᠠᠨ ᠨᠢ ᠬᠡᠷᠪᠡ ᠲᠣᠭᠲᠠᠭᠠᠭᠳᠠᠪᠠᠯ ᠲᠤᠰ ᠴᠠᠭ ᠢ᠋ ᠬᠢᠨᠠᠭᠴᠢ ᠳ᠋ᠤ᠌ ᠳᠠᠷᠤᠢᠬᠠᠨ ᠮᠡᠳᠡᠭᠳᠡᠵᠦ ᠵᠣᠭᠰᠣᠭᠠᠨᠠ᠃ ᠬᠢᠨᠠᠭᠴᠢ ᠴᠠᠭ ᠢ᠋ ᠵᠥᠪ ᠲᠣᠬᠢᠷᠠᠭᠤᠯᠵᠤ᠂ ᠱᠠᠭᠠᠷᠳᠠᠯᠭᠠ ᠲᠠᠢ ᠭᠡᠵᠦ ᠦᠵᠡᠪᠡᠯ ᠴᠠᠭ ᠪᠣᠯᠤᠨ ᠨᠡᠭᠦᠳᠡᠯ ᠦ᠋ᠨ ᠲᠣᠭᠠᠴᠠᠭᠠ ᠶ᠋ᠢ ᠲᠣᠬᠢᠷᠠᠭᠤᠯᠤᠨᠠ᠃
ᠠᠷᠪᠠᠨ ᠨᠢᠭᠡ᠂ ᠬᠡᠷᠪᠡ ᠴᠠᠭ ᠤ᠋ᠨ ᠬᠣᠶᠠᠷ ᠲᠤᠭ ᠬᠣᠶᠠᠭᠤᠯᠠ ᠪᠠᠨ ᠤᠨᠠᠴᠢᠬᠠᠭᠰᠠᠨ᠂ ᠠᠯᠢ ᠨᠢ ᠲᠦᠷᠦᠭᠦᠦ ᠤᠨᠠᠭᠰᠠᠨ ᠢ᠋ ᠨᠢ ᠲᠣᠭᠲᠠᠭᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠪᠠᠢᠪᠠᠯ᠄
(ᠨᠢᠭᠡ) ᠬᠡᠷᠪᠡ ᠡᠨᠡ ᠨᠢ ᠲᠣᠭᠯᠠᠯᠲᠠ ᠶ᠋ᠢᠨ ᠰᠡᠭᠦᠯᠴᠢ ᠶ᠋ᠢᠨ ᠬᠤᠭᠤᠴᠠᠭᠠᠨ ᠠ᠋ᠴᠠ ᠪᠤᠰᠤᠳ ᠲᠣᠭᠯᠠᠯᠲᠠ ᠶ᠋ᠢᠨ ᠠᠯᠢ ᠨᠢᠭᠡ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠪᠣᠯ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠯᠲᠠ ᠶ᠋ᠢ ᠴᠢᠨᠠᠭᠰᠢᠳᠠ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃
(ᠬᠣᠶᠠᠷ) ᠬᠡᠷᠪᠡ ᠡᠢᠮᠦ ᠲᠣᠬᠢᠶᠠᠯᠳᠤᠯ ᠨᠢ ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠭᠦᠢᠴᠡᠳᠬᠡᠬᠦ ᠶᠣᠰᠣᠲᠠᠢ ᠪᠦᠬᠦ ᠨᠡᠭᠦᠳᠡᠯ ᠢ᠋ ᠨᠡᠭᠦᠭᠰᠡᠨ ᠦᠶᠡ ᠳ᠋ᠦ᠍ ᠲᠣᠬᠢᠶᠠᠯᠳᠤᠭᠰᠠᠨ ᠪᠣᠯ ᠲᠤᠬᠠᠢ ᠶ᠋ᠢᠨ ᠦᠷᠦᠭ ᠢ᠋ ᠬᠠᠢᠨᠴᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠨᠠ᠃
ᠠᠷᠪᠠᠨ ᠬᠣᠶᠠᠷ
(ᠨᠢᠭᠡ) ᠬᠡᠷᠪᠡ ᠥᠷᠥᠭ ᠢ᠋ ᠵᠣᠭᠰᠣᠭᠠᠬᠤ ᠱᠠᠭᠠᠷᠳᠠᠯᠭᠠ ᠭᠠᠷᠪᠠᠯ ᠬᠢᠨᠠᠭᠴᠢ ᠬᠣᠶᠠᠭᠤᠯᠠ ᠶ᠋ᠢᠨ ᠴᠠᠭ ᠢ᠋ ᠵᠣᠭᠰᠣᠭᠠᠨᠠ᠃
(ᠬᠣᠶᠠᠷ) ᠬᠢᠨᠠᠭᠴᠢ ᠶ᠋ᠢᠨ ᠲᠤᠰᠠᠯᠠᠯᠴᠠᠭᠠ ᠱᠠᠭᠠᠷᠳᠠᠯᠭᠠ ᠲᠠᠢ ᠪᠣᠯᠤᠭᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠲᠣᠭᠯᠠᠭᠴᠢ ᠥᠪᠡᠷ ᠦ᠋ᠨ ᠴᠠᠭ ᠢ᠋ ᠵᠣᠭᠰᠣᠭᠠᠬᠤ ᠪᠣᠯᠤᠮᠵᠢ ᠲᠠᠢ᠃ ᠵᠢᠱ᠌ᠢᠶᠡ ᠨᠢ᠄ ᠬᠦᠦ ᠶ᠋ᠢ ᠬᠤᠪᠢᠷᠠᠭᠠᠬᠤ ᠳ᠋ᠤ᠌ ᠰᠣᠯᠢᠬᠤ ᠪᠤᠲᠠ ᠨᠢ ᠣᠢᠷᠠ ᠪᠠᠢᠬᠤ ᠦᠭᠡᠢ ᠵᠡᠷᠭᠡ᠃
(ᠭᠤᠷᠪᠠ) ᠲᠣᠭᠯᠠᠯᠲᠠ ᠳᠠᠬᠢᠨ ᠬᠡᠵᠢᠶᠡ ᠡᠬᠢᠯᠡᠬᠦ ᠶ᠋ᠢ ᠬᠢᠨᠠᠭᠴᠢ ᠰᠢᠢᠳᠪᠦᠷᠢᠯᠡᠨᠡ᠃
(ᠳᠥᠷᠪᠡ) ᠬᠢᠨᠠᠭᠴᠢ ᠶ᠋ᠢᠨ ᠲᠤᠰᠠᠯᠠᠯᠴᠠᠭᠠ ᠠᠪᠬᠤ ᠪᠠᠷ ᠲᠣᠭᠯᠠᠭᠴᠢ ᠬᠡᠷᠪᠡ ᠴᠠᠭ ᠢ᠋ ᠵᠣᠭᠰᠣᠭᠠᠪᠠᠯ᠂ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠭᠴᠢ ᠡᠭᠦᠨ ᠢ᠋ ᠨᠢ ᠦᠢᠯᠡᠳᠪᠡᠰᠦ ᠵᠣᠬᠢᠬᠤ ᠰᠢᠯᠲᠠᠭᠠᠨ ᠪᠠᠢᠬᠤ ᠪᠤᠶᠤ ᠦᠭᠡᠢ ᠶ᠋ᠢ ᠬᠢᠨᠠᠭᠴᠢ ᠲᠣᠳᠣᠷᠠᠭᠤᠯᠤᠨᠠ᠃ ᠬᠡᠷᠪᠡ ᠲᠣᠭᠯᠠᠭᠴᠢ ᠴᠠᠭ ᠢ᠋ ᠵᠣᠭᠰᠣᠭᠠᠬᠤ ᠬᠠᠩᠭᠠᠯᠲᠠ ᠲᠠᠢ ᠰᠢᠯᠲᠠᠭᠠᠨ ᠪᠠᠢᠬᠤ ᠦᠭᠡᠢ ᠪᠣᠯ ᠳᠣᠯᠣᠳᠤᠭᠠᠷ ᠵᠦᠢᠯ ᠦ᠋ᠨ ᠵᠤᠷᠪᠤᠰ ᠶᠢᠰᠦ ᠶ᠋ᠢᠨ ᠳᠠᠭᠠᠤ ᠰᠢᠢᠳᠬᠡᠯ ᠥᠭᠭᠦᠨᠡ᠃
ᠬᠣᠶᠠᠳᠤᠭᠠᠷ ᠵᠦᠢᠯ ᠳᠦᠷᠢᠮ ᠵᠥᠷᠢᠴᠡᠭᠰᠡᠨ ᠪᠠᠢᠳᠠᠯ
ᠨᠢᠭᠡ᠂ ᠬᠡᠷᠪᠡ ᠶᠠᠮᠠᠷ ᠨᠢᠭᠡ ᠠᠯᠳᠠᠭᠠ ᠭᠠᠷᠬᠤ ᠡᠰᠡᠪᠡᠯ ᠠᠯᠳᠠᠭᠠ ᠨᠢ ᠡᠮᠦᠨᠡᠬᠢ ᠪᠠᠢᠷᠢᠯᠠᠯ ᠢ᠋ ᠰᠡᠷᠭᠦᠭᠡᠵᠦ ᠪᠤᠲᠠ ᠬᠦᠦ ᠶ᠋ᠢ ᠬᠥᠳᠡᠯᠭᠡᠬᠦ ᠱᠠᠭᠠᠷᠳᠠᠯᠭᠠ ᠭᠠᠷᠤᠭᠰᠠᠨ ᠪᠣᠯ ᠴᠠᠭ ᠤ᠋ᠨ ᠳᠡᠭᠡᠷᠡᠬᠢ ᠬᠤᠭᠤᠴᠠᠭᠠ ᠶ᠋ᠢ ᠬᠢᠨᠠᠭᠴᠢ ᠪᠠᠢᠳᠠᠯ ᠢ᠋ ᠦᠨᠳᠦᠰᠦᠯᠡᠨ ᠲᠣᠳᠣᠷᠬᠠᠢᠯᠠᠨᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠰᠢᠲᠠᠷᠠ ᠶ᠋ᠢᠨ ᠴᠠᠭ ᠤ᠋ᠨ ᠬᠤᠭᠤᠴᠠᠭᠠ ᠶ᠋ᠢ ᠥᠭᠡᠷᠡᠴᠢᠯᠡᠬᠦ ᠡᠷᠬᠡ ᠦᠭᠡᠢ᠃ ᠮᠥᠨ ᠱᠠᠭᠠᠷᠳᠠᠯᠭᠠ ᠲᠠᠢ ᠪᠣᠯ ᠴᠠᠭ ᠲᠤ ᠨᠡᠭᠦᠳᠡᠯ ᠦ᠋ᠨ ᠲᠣᠭᠠ ᠶ᠋ᠢ ᠲᠣᠭᠲᠠᠭᠠᠵᠤ ᠪᠣᠯᠤᠨᠠ᠃
ᠬᠣᠶᠠᠷ
(ᠨᠢᠭᠡ) ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠰᠢᠳᠡᠷᠡ ᠶ᠋ᠢᠨ ᠬᠦᠴᠦᠨ ᠦ᠌ ᠠᠩᠬᠠᠨ ᠤ᠋ ᠪᠠᠢᠷᠢᠯᠠᠯᠲᠠ ᠨᠢ ᠪᠤᠷᠤᠭᠤ ᠪᠣᠯᠤᠭᠰᠠᠨ ᠨᠢ ᠮᠡᠳᠡᠭᠳᠡᠪᠡᠯ ᠥᠷᠥᠭ ᠢ᠋ ᠵᠣᠭᠰᠣᠭᠠᠨ ᠰᠢᠨᠡ ᠪᠡᠷ ᠡᠬᠢᠯᠡᠭᠦᠯᠦᠨᠡ᠃
(ᠬᠣᠶᠠᠷ) ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠵᠥᠪᠬᠡᠨ ᠰᠢᠳᠡᠷᠡ ᠶ᠋ᠢᠨ ᠬᠥᠯᠭᠡ ᠨᠢ ᠨᠢᠭᠡᠳᠦᠭᠡᠷ ᠪᠦᠯᠦᠭ ᠦ᠋ᠨ ᠬᠣᠶᠠᠳᠤᠭᠠᠷ ᠵᠦᠢᠯ ᠦ᠋ᠨ ᠵᠤᠷᠪᠤᠰ ᠨᠢᠭᠡ ᠶ᠋ᠢᠨ ᠱᠠᠭᠠᠷᠳᠠᠯᠭᠠ ᠳ᠋ᠤ᠌ ᠨᠡᠢᠴᠡᠭᠰᠡᠨ ᠦᠭᠡᠢ ᠪᠡᠷ ᠪᠤᠷᠤᠭᠤ ᠲᠠᠯᠪᠢᠭᠰᠠᠨ ᠨᠢ ᠮᠡᠳᠡᠭᠳᠡᠪᠡᠯ ᠵᠥᠪ ᠲᠠᠯᠪᠢᠭᠰᠠᠨ ᠬᠥᠯᠭᠡ ᠳᠡᠭᠡᠷᠡ ᠣᠳᠣᠬᠢ ᠪᠠᠢᠷᠢᠯᠠᠯᠲᠠ ᠶ᠋ᠢ ᠰᠢᠯᠵᠢᠭᠦᠯᠵᠦ ᠦᠷᠭᠦᠯᠵᠢᠯᠡᠨ ᠲᠣᠭᠯᠠᠨᠠ᠃
ᠭᠤᠷᠪᠠ᠂ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠰᠢᠳᠡᠷᠡ ᠶ᠋ᠢᠨ ᠥᠩᠭᠡ ᠨᠢ ᠰᠣᠯᠢᠭᠳᠠᠭᠠᠳ ᠲᠣᠭᠯᠠᠯᠲᠠ ᠡᠬᠢᠯᠡᠭᠰᠡᠨ ᠬᠣᠢᠨᠠ ᠮᠡᠳᠡᠭᠳᠡᠭᠰᠡᠨ ᠪᠠᠢᠪᠠᠯ ᠲᠡᠷᠡ ᠦᠷᠦᠭ ᠢ᠋ ᠮᠥᠨ ᠴᠢᠨᠠᠭᠰᠢ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃ ᠡᠨᠡ ᠪᠠᠢᠳᠠᠯ ᠳ᠋ᠤ᠌ ᠬᠡᠷᠪᠡ ᠬᠢᠨᠠᠭᠴᠢ ᠠ᠋ᠴᠠ ᠥᠭᠡᠷᠡ ᠰᠢᠢᠳᠪᠦᠷᠢ ᠭᠠᠷᠭᠠᠪᠠᠯ ᠲᠡᠭᠦᠨ ᠢ᠋ ᠨᠢ ᠬᠦᠯᠢᠶᠡᠵᠦ ᠠᠪᠤᠨᠠ᠃
ᠳᠥᠷᠪᠡ᠂ ᠬᠡᠷᠪᠡ ᠲᠣᠭᠯᠠᠭᠴᠢ ᠨᠢᠭᠡ ᠶᠦᠮ ᠤᠤ ᠲᠡᠭᠦᠨ ᠡᠴᠡ ᠣᠯᠠᠨ ᠬᠦᠴᠦᠨ ᠢ᠋ ᠨᠢ ᠤᠨᠠᠭᠠᠪᠠᠯ᠂ ᠲᠡᠷᠡ ᠲᠣᠭᠯᠠᠭᠴᠢ ᠥᠪᠡᠷ ᠦ᠋ᠨ ᠴᠠᠭ ᠳᠡᠭᠡᠷᠡ ᠪᠠᠢᠷᠢᠯᠠᠯᠲᠠ ᠶ᠋ᠢ ᠰᠡᠷᠭᠦᠭᠡᠨᠡ᠃ ᠬᠡᠷᠪᠡ ᠱᠠᠭᠠᠷᠳᠠᠯᠭᠠ ᠲᠠᠢ ᠪᠣᠯ ᠲᠣᠭᠯᠠᠭᠴᠢ ᠴᠠᠭ ᠢ᠋ ᠵᠣᠭᠰᠣᠭᠠᠨ ᠬᠢᠨᠠᠭᠴᠢ ᠳ᠋ᠤ᠌ ᠬᠠᠨᠳᠤᠬᠤ ᠶᠣᠰᠣᠲᠠᠢ᠃ ᠬᠢᠨᠠᠭᠴᠢ ᠤᠨᠠᠭᠠᠭᠰᠠᠨ ᠲᠣᠭᠯᠠᠭᠴᠢ ᠶ᠋ᠢ ᠲᠣᠷᠭᠠᠵᠤ ᠪᠣᠯᠤᠨᠠ᠃
ᠲᠠᠪᠤ
(ᠨᠢᠭᠡ) ᠬᠡᠷᠪᠡ ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠪᠣᠯᠤᠮᠵᠢ ᠦᠭᠡᠢ ᠨᠡᠭᠦᠳᠡᠯ ᠨᠡᠭᠦᠭᠰᠡᠨ ᠨᠢ ᠢᠯᠡᠷᠡᠪᠡᠯ ᠡᠨᠡ ᠵᠥᠷᠢᠴᠡᠯ ᠦ᠋ᠨ ᠶᠠᠭ ᠡᠮᠦᠨᠡᠬᠢ ᠪᠠᠢᠷᠢᠯᠠᠯ ᠢ᠋ ᠰᠡᠷᠭᠦᠭᠡᠬᠦ ᠬᠡᠷᠡᠭᠲᠡᠢ᠃ ᠡᠨᠡ ᠪᠠᠢᠳᠠᠯ ᠰᠡᠷᠭᠦᠭᠡᠭᠳᠡᠬᠦ ᠪᠣᠯᠤᠮᠵᠢ ᠦᠭᠡᠢ ᠪᠣᠯ ᠤᠷᠤᠭᠰᠢ ᠪᠠᠨ ᠲᠦᠯᠬᠢᠵᠦ᠂ ᠵᠥᠷᠢᠴᠡᠯ ᠡᠴᠡ ᠡᠮᠦᠨᠡᠬᠢ ᠬᠠᠮᠤᠭ ᠣᠢᠷᠠᠬᠠᠨ ᠰᠡᠷᠭᠦᠭᠡᠭᠳᠡᠬᠦ ᠪᠣᠯᠤᠮᠵᠢ ᠲᠠᠢ ᠪᠠᠢᠷᠢᠯᠠᠯ ᠠ᠋ᠴᠠ ᠲᠣᠭᠯᠠᠯᠲᠠ ᠶ᠋ᠢ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃ ᠪᠣᠯᠤᠮᠵᠢ ᠦᠭᠡᠢ ᠨᠡᠭᠦᠳᠡᠯ ᠢ᠋ ᠨᠢᠭᠡᠳᠦᠭᠡᠷ ᠪᠦᠯᠦᠭ ᠦ᠋ᠨ ᠳᠥᠷᠪᠡᠳᠦᠭᠡᠷ ᠵᠦᠢᠯ ᠦ᠋ᠨ ᠭᠤᠷᠪᠠ ᠪᠠ ᠳᠣᠯᠣᠭᠠ ᠶ᠋ᠢ ᠠᠰᠢᠭᠯᠠᠨ ᠵᠠᠯᠠᠷᠠᠭᠤᠯᠤᠨᠠ᠃ ᠬᠡᠷᠪᠡ ᠲᠣᠭᠯᠠᠭᠴᠢ ᠬᠤᠪᠢᠷᠠᠯᠲᠠ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤ᠌ ᠬᠦᠦ ᠪᠡᠨ ᠲᠦᠯᠬᠢᠵᠦ ᠴᠠᠭ ᠢ᠋ ᠳᠠᠷᠤᠭᠳᠠᠭᠰᠠᠨ ᠪᠣᠯᠪᠠᠴᠤ ᠬᠦᠦ ᠶ᠋ᠢ ᠰᠢᠨᠡ ᠪᠤᠲᠠ ᠪᠠᠷ ᠰᠣᠯᠢᠭᠠ ᠦᠭᠡᠢ ᠪᠣᠯ ᠡᠨᠡ ᠨᠡᠭᠦᠳᠡᠯ ᠢ᠋ ᠳᠦᠷᠢᠮ ᠵᠥᠷᠢᠴᠡᠭᠰᠡᠨ ᠭᠡᠵᠦ ᠦᠵᠡᠨᠡ᠃ ᠲᠤᠬᠠᠢ ᠶ᠋ᠢᠨ ᠬᠦᠦ ᠶ᠋ᠢ ᠠᠳᠠᠯᠢ ᠥᠩᠭᠡ ᠶ᠋ᠢᠨ ᠪᠡᠷᠰᠡ ᠪᠡᠷ ᠬᠤᠪᠢᠷᠠᠭᠠᠨ ᠰᠣᠯᠢᠨᠠ᠃
(ᠬᠣᠶᠠᠷ) ᠳᠡᠭᠡᠷᠡᠬᠢ (ᠨᠢᠭᠡ) ᠵᠤᠷᠪᠤᠰ ᠢ᠋ ᠭᠦᠢᠴᠡᠳᠬᠡᠬᠦ ᠳ᠋ᠦ᠍ ᠲᠣᠭᠯᠠᠭᠴᠢ ᠡᠬᠢᠨ ᠦ᠌ ᠤᠳᠠᠭᠠ ᠪᠣᠯᠤᠮᠵᠢ ᠦᠭᠡᠢ ᠨᠡᠭᠦᠳᠡᠯ ᠬᠢᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌᠂ ᠬᠢᠨᠠᠭᠴᠢ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠲᠣᠭᠯᠠᠭᠴᠢ ᠳ᠋ᠤ᠌ ᠬᠣᠶᠠᠷ ᠮᠢᠨᠦ᠋ᠲ ᠦ᠋ᠨ ᠨᠡᠮᠡᠯᠲᠡ ᠬᠤᠭᠤᠴᠠᠭᠠ ᠨᠥᠬᠥᠵᠦ ᠥᠭᠭᠦᠨᠡ᠃ ᠬᠡᠷᠪᠡ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠭᠴᠢ ᠬᠣᠶᠠᠷᠳᠠᠬᠢ ᠤᠳᠠᠭᠠ ᠪᠣᠯᠭᠣᠮᠵᠢ ᠦᠭᠡᠢ ᠨᠡᠭᠦᠳᠡᠯ ᠬᠢᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠬᠢᠨᠠᠭᠴᠢ ᠲᠣᠭᠯᠠᠯᠲᠠ ᠶ᠋ᠢ ᠳᠠᠭᠤᠰᠬᠠᠵᠤ ᠲᠤᠰ ᠲᠣᠭᠯᠠᠭᠴᠢ ᠶ᠋ᠢ ᠬᠣᠵᠢᠭᠳᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠨᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠡᠰᠡᠷᠭᠦᠦ ᠲᠣᠭᠯᠠᠭᠴᠢ ᠨᠢ ᠴᠤᠪᠤᠷᠠᠯ ᠪᠣᠯᠤᠮᠵᠢᠲᠤ ᠨᠡᠭᠦᠳᠡᠯ ᠢ᠋ᠶ᠋ᠡᠷ ᠲᠤᠰ ᠲᠣᠭᠯᠠᠭᠴᠢ ᠶ᠋ᠢᠨ ᠨᠣᠶᠠᠨ ᠢ᠋ ᠨᠢ ᠮᠠᠳᠯᠠᠵᠤ ᠴᠢᠳᠠᠬᠤ ᠪᠠᠷ ᠦᠭᠡᠢ ᠪᠣᠯ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠯᠲᠠ ᠶ᠋ᠢ ᠬᠠᠢᠨᠴᠠᠭᠰᠠᠨ ᠢ᠋ᠶ᠋ᠠᠷ ᠲᠣᠭᠠᠴᠠᠨᠠ᠃
ᠵᠢᠷᠭᠤᠭᠠ᠂ ᠬᠡᠷᠪᠡ ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠰᠢᠳᠡᠷᠡ ᠶ᠋ᠢᠨ ᠬᠦᠴᠦᠨ ᠪᠠᠢᠷᠢᠯᠠᠯ ᠠ᠋ᠴᠠ ᠪᠠᠨ ᠨᠡᠭᠦᠳᠡᠯ ᠪᠤᠰᠤ ᠪᠠᠷ ᠬᠥᠳᠡᠯᠦᠭᠰᠡᠨ ᠨᠢ ᠮᠡᠳᠡᠭᠳᠡᠪᠡᠯ ᠬᠥᠳᠡᠯᠬᠦ ᠡᠴᠡ ᠶᠠᠭ ᠡᠮᠦᠨᠡᠬᠡᠨ ᠪᠠᠢᠷᠢᠯᠠᠯ ᠢ᠋ ᠰᠡᠷᠭᠦᠭᠡᠬᠦ ᠶᠣᠰᠣᠲᠠᠢ᠃ ᠡᠨᠡ ᠬᠦ᠌ ᠪᠠᠢᠷᠢᠯᠠᠯ ᠰᠡᠷᠭᠦᠭᠡᠭᠳᠡᠬᠦ ᠪᠣᠯᠤᠮᠵᠢ ᠦᠭᠡᠢ ᠪᠣᠯ ᠲᠡᠭᠦᠨ ᠡᠴᠡ ᠡᠮᠦᠨᠡᠬᠢ ᠲᠣᠭᠲᠠᠭᠠᠭᠳᠠᠭᠰᠠᠨ ᠪᠠᠢᠷᠢᠯᠠᠯ ᠠ᠋ᠴᠠ ᠲᠣᠭᠯᠠᠯᠲᠠ ᠶ᠋ᠢ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃
ᠭᠤᠷᠪᠠᠳᠤᠭᠠᠷ ᠵᠦᠢᠯ ᠨᠡᠭᠦᠳᠡᠯ ᠦ᠋ᠨ ᠲᠡᠮᠳᠡᠭᠯᠡᠯ ᠬᠢᠬᠦ ᠲᠤᠬᠠᠢ
ᠨᠢᠭᠡ
(ᠨᠢᠭᠡ) ᠤᠷᠤᠯᠳᠤᠭᠠᠨ ᠳ᠋ᠤ᠌ ᠮᠣᠩᠭᠣᠯ ᠰᠢᠳᠡᠷᠡ ᠶ᠋ᠢᠨ ᠪᠠᠷᠢᠮᠵᠢᠶᠠᠲᠤ ᠲᠡᠮᠳᠡᠭᠯᠡᠬᠦ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠨᠡ᠃ ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠲᠣᠭᠯᠠᠭᠴᠢ ᠥᠪᠡᠷ ᠦ᠋ᠨ ᠪᠣᠯᠤᠨ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠲᠣᠭᠯᠠᠭᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠡᠭᠦᠳᠡᠯ ᠢ᠋ ᠳᠡᠰ ᠳᠠᠷᠠᠭᠠᠯᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠥᠪ ᠲᠣᠳᠣᠷᠬᠠᠢ ᠲᠡᠮᠳᠡᠭᠯᠡᠬᠦ ᠶᠣᠰᠣᠲᠠᠢ᠃ ᠲᠡᠮᠳᠡᠭᠯᠡᠯ ᠬᠢᠬᠦ ᠳ᠋ᠡᠭᠡᠨ ᠵᠠᠪᠠᠯ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠵᠣᠷᠢᠭᠤᠯᠤᠭᠰᠠᠨ ᠲᠤᠰᠬᠠᠢ ᠬᠦᠰᠦᠨᠦᠭ ᠲᠡᠢ ᠴᠠᠭᠠᠰᠤᠨ ᠬᠠᠭᠤᠳᠠᠰᠤ ᠶ᠋ᠢ ᠬᠡᠷᠡᠭᠯᠡᠨᠡ᠃
ᠲᠡᠮᠳᠡᠭᠯᠡᠬᠦ ᠠᠷᠭᠠ᠄ ᠤᠷᠢᠳᠠᠪᠡᠷ ᠴᠠᠭᠠᠨ ᠲᠠᠯᠠ ᠶ᠋ᠢᠨ ᠬᠦᠴᠦᠨ ᠦ᠌ ᠣᠳᠣ ᠶ᠋ᠢᠨ ᠪᠠᠭᠤᠳᠠᠯ ᠤ᠋ᠨ ᠨᠡᠷᠡ ᠶ᠋ᠢ ᠪᠢᠴᠢᠵᠦ᠂ ᠬᠦᠴᠦᠨ ᠲᠥᠯᠥᠭᠡᠨ ᠦ᠌ ᠲᠡᠮᠳᠡᠭ ᠢ᠋ ᠪᠢᠴᠢᠵᠦ᠂ ᠨᠡᠭᠦᠳᠡᠯ ᠦ᠋ᠨ ᠲᠡᠮᠳᠡᠭ ᠢ᠋ ᠪᠢᠴᠢᠵᠦ᠂ ᠨᠡᠭᠦᠵᠦ ᠬᠦᠷᠦᠭᠰᠡᠨ ᠪᠠᠭᠤᠳᠠᠯ ᠤ᠋ᠨ ᠨᠡᠷᠡ ᠶ᠋ᠢ ᠪᠢᠴᠢᠨᠡ᠂ ᠳᠠᠷᠠᠭᠠ ᠨᠢ ᠬᠠᠷᠠ ᠲᠠᠯᠠ ᠶ᠋ᠢ ᠮᠥᠨ ᠠᠳᠠᠯᠢ ᠪᠠᠷ ᠪᠢᠴᠢᠨᠡ᠃
(ᠬᠣᠶᠠᠷ) ᠤᠷᠤᠯᠳᠤᠭᠠᠨ ᠤ᠋ ᠲᠡᠮᠳᠡᠭᠯᠡᠯ ᠦ᠋ᠨ ᠬᠠᠭᠤᠳᠠᠰᠤᠨ ᠳᠡᠭᠡᠷᠡ ᠵᠥᠪᠬᠡᠨ ᠨᠡᠭᠦᠳᠡᠯ ᠦ᠋ᠳ᠂ ᠴᠠᠭ ᠤ᠋ᠨ ᠬᠤᠭᠤᠴᠠᠭᠠ᠂ ᠬᠠᠢᠨᠴᠠᠬᠤ ᠰᠠᠨᠠᠯ᠂ ᠪᠤᠰᠤᠳ ᠬᠣᠯᠪᠣᠭᠳᠠᠯ ᠪᠦᠬᠦᠢ ᠮᠡᠳᠡᠭᠡᠯᠡᠯ ᠢ᠋ ᠪᠢᠴᠢᠵᠦ ᠪᠣᠯᠤᠨᠠ᠃
(ᠭᠤᠷᠪᠠ) ᠬᠡᠷᠪᠡ ᠲᠣᠭᠯᠠᠭᠴᠢ ᠨᠡᠭᠦᠳᠡᠯ ᠦ᠋ᠨ ᠲᠡᠮᠳᠡᠭᠯᠡᠯ ᠬᠢᠬᠦ ᠪᠣᠯᠤᠮᠵᠢ ᠦᠭᠡᠢ ᠪᠣᠯ ᠬᠢᠨᠠᠭᠴᠢ ᠶ᠋ᠢᠨ ᠵᠥᠪᠰᠢᠶᠡᠷᠡᠭᠰᠡᠨ ᠲᠣᠭᠯᠠᠭᠴᠢ ᠲᠡᠭᠦᠨ ᠢ᠋ ᠣᠷᠣᠯᠠᠨ ᠬᠢᠵᠦ ᠪᠣᠯᠤᠨᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠪᠠᠨ ᠲᠥᠪ ᠭᠣᠣᠯᠴᠢ ᠪᠠᠢᠬᠤ ᠵᠠᠷᠴᠢᠮ ᠢ᠋ᠶ᠋ᠠᠷ ᠬᠢᠨᠠᠭᠴᠢ ᠠ᠋ᠴᠠ ᠲᠡᠭᠦᠨ ᠦ᠌ ᠴᠠᠭ ᠲᠤ ᠲᠣᠬᠢᠷᠠᠭᠤᠯᠤᠯᠲᠠ ᠬᠢᠨᠡ᠃ ᠭᠡᠪᠡᠴᠦ ᠵᠡᠮᠳᠡᠭ ᠳᠣᠷᠭᠣᠨ ᠲᠣᠭᠯᠠᠭᠴᠢ ᠳ᠋ᠤ᠌ ᠪᠣᠯ ᠡᠨᠡ ᠲᠣᠬᠢᠷᠠᠭᠤᠯᠤᠯᠲᠠ ᠶ᠋ᠢ ᠬᠢᠬᠦ ᠦᠭᠡᠢ᠃
ᠬᠣᠶᠠᠷ᠂ ᠲᠡᠮᠳᠡᠭᠯᠡᠯ ᠨᠢ ᠪᠦᠬᠦ ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠᠠ ᠳ᠋ᠤ᠌ ᠬᠢᠨᠠᠭᠴᠢ ᠳ᠋ᠤ᠌ ᠬᠠᠷᠠᠭᠳᠠᠬᠤ ᠪᠠᠷ ᠪᠠᠢᠬᠤ ᠶᠣᠰᠣᠲᠠᠢ᠃
ᠭᠤᠷᠪᠠ᠂ ᠲᠣᠭᠯᠠᠯᠲᠠ ᠬᠢᠭᠰᠡᠨ ᠬᠠᠭᠤᠳᠠᠰᠤ ᠶ᠋ᠢ ᠤᠷᠤᠯᠳᠤᠭᠠᠨ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠴᠢ ᠥᠮᠴᠢᠯᠡᠨᠡ᠃
ᠳᠥᠷᠪᠡ᠂ ᠨᠡᠭᠦᠳᠡᠯ ᠪᠣᠯᠭᠠᠨ ᠤ᠋ ᠳᠠᠷᠠᠭᠠ 30 ᠰᠧᠺᠦ᠋ᠨ᠋ᠳ᠋ ᠪᠤᠶᠤ ᠲᠡᠭᠦᠨ ᠡᠴᠡ ᠢᠯᠡᠭᠦᠦ ᠬᠤᠭᠤᠴᠠᠭᠠ ᠪᠠᠷ ᠨᠡᠮᠡᠭᠳᠡᠳᠡᠭ ᠴᠠᠭ ᠢ᠋ᠶ᠋ᠠᠷ ᠲᠣᠭᠯᠠᠵᠤ ᠪᠠᠢᠭᠠ ᠠ᠋ᠴᠠ ᠪᠤᠰᠤᠳ ᠲᠣᠬᠢᠶᠠᠯᠳᠤᠯ ᠳ᠋ᠤ᠌᠂ ᠲᠣᠭᠯᠠᠭᠴᠢ ᠶ᠋ᠢᠨ ᠴᠠᠭ ᠳᠡᠭᠡᠷᠡᠬᠢ ᠦᠯᠡᠳᠡᠭᠰᠡᠨ ᠬᠤᠭᠤᠴᠠᠭᠠ ᠨᠢ 5 ᠮᠢᠨᠦ᠋ᠲ ᠬᠦᠷᠬᠦ ᠦᠭᠡᠢ ᠪᠣᠯ ᠲᠡᠮᠳᠡᠭᠯᠡᠯ ᠬᠢᠬᠦ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ᠃ ᠭᠡᠪᠡᠴᠦ ᠠᠯᠢ ᠨᠢᠭᠡ ᠲᠤᠭ ᠤᠨᠠᠩᠭᠤᠲᠠ ᠲᠣᠭᠯᠠᠭᠴᠢ ᠳᠠᠷᠠᠭᠠ ᠶ᠋ᠢᠨ ᠨᠡᠭᠦᠳᠡᠯ ᠬᠢᠬᠦ ᠡᠴᠡ ᠡᠮᠦᠨᠡ ᠲᠡᠮᠳᠡᠭᠯᠡᠯ ᠢ᠋ ᠪᠦᠷᠢᠨ ᠨᠥᠬᠥᠵᠦ ᠪᠢᠴᠢᠬᠦ ᠶᠣᠰᠣᠲᠠᠢ᠃
ᠲᠠᠪᠤ
(ᠨᠢᠭᠡ) ᠬᠡᠷᠪᠡ ᠲᠣᠭᠯᠠᠭᠴᠢ ᠬᠣᠶᠠᠭᠤᠯᠠ ᠪᠠᠨ ᠵᠤᠷᠪᠤᠰ ᠳᠥᠷᠪᠡ ᠳ᠋ᠦ᠍ ᠵᠢᠭᠠᠭᠰᠠᠨ ᠨᠥᠬᠥᠴᠡᠯ ᠢ᠋ᠶ᠋ᠡᠷ ᠲᠡᠮᠳᠡᠭᠯᠡᠯ ᠬᠢᠬᠦ ᠪᠣᠯᠤᠮᠵᠢ ᠦᠭᠡᠢ ᠪᠠᠢᠭᠠ ᠦᠶᠡ ᠳ᠋ᠦ᠍ ᠬᠢᠨᠠᠭᠴᠢ ᠪᠠ ᠲᠡᠭᠦᠨ ᠦ᠌ ᠲᠤᠰᠠᠯᠠᠭᠴᠢ ᠪᠣᠯᠤᠮᠵᠢ ᠪᠡᠷ ᠢ᠋ᠶ᠋ᠡᠨ ᠬᠠᠵᠠᠭᠤ ᠳ᠋ᠤ᠌ ᠨᠢ ᠪᠠᠢᠯᠴᠠᠵᠤ ᠲᠡᠮᠳᠡᠭᠯᠡᠯ ᠬᠢᠬᠦ ᠶᠣᠰᠣᠲᠠᠢ᠃ ᠡᠨᠡ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠲᠡᠭᠦᠨ ᠦ᠌ ᠲᠤᠭ ᠤᠨᠠᠮᠠᠭᠴᠠ ᠬᠢᠨᠠᠭᠴᠢ ᠴᠠᠭ ᠢ᠋ ᠵᠣᠭᠰᠣᠭᠠᠨᠠ᠃ ᠳᠠᠷᠠᠭᠠ ᠨᠢ ᠬᠣᠶᠠᠷ ᠲᠣᠭᠯᠠᠭᠴᠢ ᠬᠢᠨᠠᠭᠴᠢ ᠶ᠋ᠢᠨ ᠲᠡᠮᠳᠡᠭᠯᠡᠯ ᠪᠠ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠮᠳᠡᠭᠯᠡᠯ ᠢ᠋ ᠠᠰᠢᠭᠯᠠᠨ ᠲᠡᠮᠳᠡᠭᠯᠡᠯ ᠢ᠋ ᠪᠦᠷᠢᠨ ᠰᠡᠷᠭᠦᠭᠡᠬᠦ ᠶᠣᠰᠣᠲᠠᠢ᠃
(ᠬᠣᠶᠠᠷ) ᠵᠤᠷᠪᠤᠰ ᠳᠥᠷᠪᠡ ᠳ᠋ᠦ᠍ ᠵᠢᠭᠠᠭᠰᠠᠨ ᠨᠥᠬᠥᠴᠡᠯ ᠳ᠋ᠦ᠍ ᠵᠥᠪᠬᠡᠨ ᠨᠢᠭᠡ ᠲᠣᠭᠯᠠᠭᠴᠢ ᠲᠡᠮᠳᠡᠭᠯᠡᠯ ᠢ᠋ᠶ᠋ᠡᠨ ᠬᠢᠵᠦ ᠴᠢᠳᠠᠬᠤ ᠦᠭᠡᠢ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠠᠯᠢ ᠨᠢᠭᠡ ᠲᠤᠭ ᠤᠨᠠᠩᠭᠤᠲᠠ ᠨᠡᠭᠦᠳᠡᠯ ᠬᠢᠬᠦ ᠡᠴᠡ ᠪᠡᠨ ᠡᠮᠦᠨᠡ ᠲᠡᠮᠳᠡᠭᠯᠡᠯ ᠢ᠋ ᠪᠦᠷᠢᠨ ᠰᠡᠷᠭᠦᠭᠡᠬᠦ ᠶᠣᠰᠣᠲᠠᠢ᠃ ᠥᠪᠡᠷ ᠦ᠋ᠨ ᠨᠡᠭᠦᠳᠡᠯ ᠬᠢᠬᠦ ᠡᠭᠡᠯᠵᠢ ᠪᠣᠯ ᠨᠥᠭᠦᠭᠡ ᠲᠣᠭᠯᠠᠭᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠮᠳᠡᠭᠯᠡᠯ ᠢ᠋ ᠠᠰᠢᠭᠯᠠᠵᠤ ᠪᠣᠯᠤᠨᠠ᠃ ᠬᠠᠷᠢᠨ ᠨᠡᠭᠦᠳᠡᠯ ᠬᠢᠬᠦ ᠡᠴᠡ ᠪᠡᠨ ᠡᠮᠦᠨᠡ ᠪᠤᠴᠠᠭᠠᠵᠤ ᠥᠭᠬᠦ ᠶᠣᠰᠣᠲᠠᠢ᠃
(ᠭᠤᠷᠪᠠ) ᠬᠡᠷᠪᠡ ᠨᠡᠭᠦᠭᠰᠡᠨ ᠨᠡᠭᠦᠳᠡᠯ ᠦ᠋ᠨ ᠢ᠋ᠶ᠋ᠡᠨ ᠲᠡᠮᠳᠡᠭᠯᠡᠯ ᠢ᠋ ᠪᠦᠷᠢᠨ ᠰᠡᠷᠭᠦᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠪᠣᠯ ᠬᠢᠨᠠᠭᠴᠢ ᠪᠠ ᠬᠢᠨᠠᠭᠴᠢ ᠶ᠋ᠢᠨ ᠲᠤᠰᠠᠯᠠᠭᠴᠢ ᠶ᠋ᠢᠨ ᠠᠵᠢᠭᠯᠠᠯᠲᠠ ᠶ᠋ᠢᠨ ᠳᠣᠣᠷᠠ ᠥᠭᠡᠷᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠥᠷᠥᠭ ᠢ᠋ ᠳᠠᠬᠢᠨ ᠰᠡᠷᠭᠦᠭᠡᠨ ᠥᠷᠥᠨᠡ᠃ ᠲᠣᠭᠯᠠᠯᠲᠠ ᠶ᠋ᠢᠨ ᠥᠷᠥᠭ ᠢ᠋ ᠳᠠᠬᠢᠨ ᠦᠷᠦᠬᠦ ᠡᠴᠡ ᠡᠮᠦᠨᠡ ᠬᠡᠷᠪᠡ ᠪᠣᠯᠤᠮᠵᠢ ᠲᠠᠢ ᠪᠣᠯ ᠲᠣᠭᠯᠠᠭᠴᠢᠳ ᠥᠷᠥᠭ ᠦ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠪᠠᠢᠷᠢᠯᠠᠯ᠂ ᠴᠠᠭ ᠤ᠋ᠨ ᠵᠢᠭᠠᠯᠲᠠ᠂ ᠬᠡᠨ ᠦ᠌ ᠴᠠᠭ ᠳᠡᠭᠡᠷᠡ ᠲᠣᠭᠯᠠᠯᠲᠠ ᠦᠷᠭᠦᠯᠵᠢᠯᠡᠵᠦ ᠪᠠᠢᠭᠰᠠᠨ᠂ ᠨᠡᠭᠦᠭᠰᠡᠨ ᠨᠡᠭᠦᠳᠡᠯ ᠦ᠋ᠨ ᠲᠣᠭᠠ ᠶ᠋ᠢ ᠪᠢᠴᠢᠵᠦ ᠠᠪᠤᠨᠠ᠃
ᠵᠢᠷᠭᠤᠭᠠ᠂ ᠬᠡᠷᠪᠡ ᠰᠡᠭᠦᠯᠴᠢ ᠶ᠋ᠢᠨ ᠪᠠᠢᠷᠢᠯᠠᠯ ᠬᠦᠷᠲᠡᠯᠡᠬᠢ ᠲᠡᠮᠳᠡᠭᠯᠡᠯ ᠢ᠋ ᠪᠦᠷᠢᠨ ᠰᠡᠷᠭᠦᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠪᠣᠯ᠂ ᠲᠣᠭᠯᠠᠭᠴᠢ ᠬᠢᠨᠠᠯᠲᠠ ᠶ᠋ᠢᠨ ᠴᠠᠭ ᠲᠤ ᠲᠣᠭᠲᠠᠭᠠᠭᠰᠠᠨ ᠨᠡᠭᠦᠳᠡᠯ ᠢ᠋ ᠬᠢᠵᠦ ᠠᠮᠵᠢᠭᠠ ᠦᠭᠡᠢ ᠭᠡᠵᠦ ᠪᠠᠲᠤᠯᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠡᠢᠮᠦ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠦᠷᠦᠭ ᠢ᠋ ᠴᠢᠨᠠᠭᠰᠢ ᠦᠷᠭᠦᠯᠵᠢᠯᠡᠭᠦᠯᠬᠦ ᠪᠠ ᠡᠬᠢᠨ ᠦ᠌ ᠨᠡᠭᠦᠭᠰᠡᠨ ᠨᠡᠭᠦᠳᠡᠯ ᠢ᠋ ᠳᠠᠷᠠᠭᠠ ᠶ᠋ᠢᠨ ᠬᠢᠨᠠᠯᠲᠠ ᠶ᠋ᠢᠨ ᠡᠬᠢᠨ ᠦ᠌ ᠨᠡᠭᠦᠳᠡᠯ ᠭᠡᠵᠦ ᠦᠵᠡᠨᠡ᠃
ᠳᠣᠯᠣᠭᠠ᠂ ᠲᠣᠭᠯᠠᠯᠲᠠ ᠶ᠋ᠢᠨ ᠲᠡᠭᠦᠰᠬᠡᠯ ᠳ᠋ᠦ᠍ ᠬᠣᠶᠠᠷ ᠲᠣᠭᠯᠠᠭᠴᠢ ᠥᠷᠥᠭ ᠦ᠋ᠨ ᠦᠷᠡ ᠳ᠋ᠦᠩ ᠢ᠋ ᠬᠠᠷᠭᠤᠭᠤᠯᠤᠭᠰᠠᠨ ᠪᠢᠴᠢᠯᠲᠡ ᠶ᠋ᠢᠨ ᠬᠠᠭᠤᠳᠠᠰᠤᠨ ᠳᠡᠭᠡᠷᠡ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠨᠠ᠃ ᠲᠣᠭᠯᠠᠯᠲᠠ ᠶ᠋ᠢᠨ ᠳ᠋ᠦᠩ ᠪᠤᠷᠤᠭᠤ ᠪᠠᠢᠯᠠ ᠴᠤ᠌ ᠭᠡᠰᠡᠨ ᠬᠢᠨᠠᠭᠴᠢ ᠰᠢᠢᠳ ᠭᠠᠷᠭᠠᠲᠠᠯᠠ ᠲᠡᠷᠡ ᠰᠢᠢᠳᠪᠦᠷᠢ ᠬᠡᠪ ᠢ᠋ᠶ᠋ᠡᠷ ᠪᠠᠢᠨᠠ᠃
ᠳᠥᠷᠪᠡᠳᠦᠭᠡᠷ ᠵᠦᠢᠯ ᠬᠠᠢᠨᠴᠠᠬᠤ ᠲᠤᠬᠠᠢ
ᠨᠢᠭᠡ
(ᠨᠢᠭᠡ) ᠤᠷᠤᠯᠳᠤᠭᠠᠨ ᠤ᠋ ᠳᠦᠷᠢᠮ ᠳ᠋ᠦ᠍ ᠬᠢᠨᠠᠭᠴᠢ ᠶ᠋ᠢᠨ ᠵᠥᠪᠰᠢᠶᠡᠷᠡᠯ ᠦᠭᠡᠢ ᠪᠡᠷ ᠬᠣᠶᠠᠷ ᠲᠣᠭᠯᠠᠭᠴᠢ ᠬᠠᠷᠢᠯᠴᠠᠨ ᠬᠠᠢᠨᠴᠠᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠲᠣᠭᠲᠠᠭᠠᠵᠤ ᠪᠣᠯᠤᠨᠠ᠂ ᠡᠰᠡᠪᠡᠯ ᠵᠥᠪᠰᠢᠶᠡᠷᠡᠭᠳᠡᠭᠰᠡᠨ ᠨᠡᠭᠦᠳᠡᠯ ᠦ᠋ᠨ ᠲᠣᠭᠠ ᠠ᠋ᠴᠠ ᠪᠠᠭᠠ ᠦᠶᠡ ᠳ᠋ᠦ᠍ ᠬᠠᠷᠢᠯᠴᠠᠨ ᠬᠠᠢᠨᠴᠠᠬᠤ ᠪᠠᠷ ᠵᠥᠪᠰᠢᠶᠡᠷᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠲᠣᠭᠲᠠᠭᠠᠵᠤ ᠪᠣᠯᠤᠨᠠ᠃
(ᠬᠣᠶᠠᠷ) ᠬᠡᠷᠪᠡ ᠤᠷᠤᠯᠳᠤᠭᠠᠨ ᠤ᠋ ᠳᠦᠷᠢᠮ ᠳ᠋ᠦ᠍ ᠬᠣᠶᠠᠷ ᠲᠣᠭᠯᠠᠭᠴᠢ ᠬᠠᠷᠢᠯᠴᠠᠨ ᠬᠠᠢᠨᠴᠠᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠵᠦ ᠪᠣᠯᠬᠤ ᠭᠡᠵᠦ ᠲᠣᠭᠲᠠᠭᠠᠭᠰᠠᠨ ᠪᠣᠯ᠄
1 ᠬᠠᠢᠨᠴᠠᠬᠤ ᠰᠠᠨᠠᠯ ᠪᠣᠯᠭᠠᠬᠤ ᠶ᠋ᠢ ᠬᠦᠰᠡᠭᠰᠡᠨ ᠲᠣᠭᠯᠠᠭᠴᠢ ᠨᠡᠭᠦᠳᠡᠯ ᠢ᠋ᠶ᠋ᠡᠨ ᠨᠡᠭᠦᠭᠡᠳ ᠴᠠᠭ ᠢ᠋ᠶ᠋ᠠᠨ ᠳᠠᠷᠤᠬᠤ ᠠ᠋ᠴᠠ ᠡᠮᠦᠨᠡ ᠲᠡᠭᠦᠨ ᠢ᠋ ᠪᠡᠨ ᠢᠯᠡᠷᠬᠡᠢᠯᠡᠨᠡ᠃ ᠲᠣᠭᠯᠠᠭᠴᠢ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠪᠤᠰᠤᠳ ᠶᠠᠮᠠᠷ ᠴᠤ᠌ ᠦᠶᠡ ᠳ᠋ᠦ᠍ ᠢᠯᠡᠷᠬᠡᠢᠯᠡᠭᠰᠡᠨ ᠬᠠᠢᠨᠴᠠᠬᠤ ᠰᠠᠨᠠᠯ ᠢ᠋ ᠬᠦᠴᠦᠨ ᠲᠡᠢ ᠳ᠋ᠦ᠍ ᠲᠣᠭᠠᠴᠠᠬᠤ ᠪᠣᠯᠪᠠᠴᠤ11.5 ᠵᠤᠷᠪᠤᠰ ᠢ᠋ ᠬᠠᠷᠠᠭᠠᠯᠵᠠᠨ ᠦᠵᠡᠨᠡ᠃ ᠲᠤᠬᠠᠢ ᠶ᠋ᠢᠨ ᠬᠠᠢᠨᠴᠠᠬᠤ ᠰᠠᠨᠠᠯ ᠳ᠋ᠤ᠌ ᠶᠠᠮᠠᠷ ᠨᠢᠭᠡ ᠨᠥᠬᠥᠴᠡᠯ ᠢ᠋ ᠬᠣᠯᠪᠣᠨ ᠠᠪᠴᠤ ᠦᠵᠡᠬᠦ ᠦᠭᠡᠢ᠃ ᠳᠡᠭᠡᠷᠡᠬᠢ ᠬᠣᠶᠠᠷ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠬᠠᠢᠨᠴᠠᠬᠤ ᠰᠠᠨᠠᠯ ᠢ᠋ ᠪᠤᠴᠠᠭᠠᠨ ᠲᠠᠲᠠᠬᠤ ᠦᠭᠡᠢ ᠪᠠ ᠡᠰᠡᠷᠭᠦᠦ ᠲᠣᠭᠯᠠᠭᠴᠢ ᠰᠠᠨᠠᠯ ᠢ᠋ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠲᠡᠯᠡ᠂ ᠡᠰᠡᠪᠡᠯ ᠲᠤᠬᠠᠢ ᠶ᠋ᠢᠨ ᠰᠠᠨᠠᠯ ᠢ᠋ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ ᠪᠡᠨ ᠠᠮᠠ ᠪᠠᠷ ᠶᠤᠮ ᠤᠤ᠂ ᠭᠠᠷ ᠢ᠋ᠶ᠋ᠠᠨ ᠨᠢᠭᠡ ᠬᠦᠴᠦᠨ ᠳ᠋ᠦ᠍ ᠬᠦᠷᠴᠦ ᠨᠡᠭᠦᠳᠡᠯ ᠢ᠋ᠶ᠋ᠡᠷ ᠢᠯᠡᠳᠲᠡ ᠢᠯᠡᠷᠬᠡᠢᠯᠡᠬᠦ᠂ ᠡᠰᠡᠪᠡᠯ ᠥᠷᠥᠭ ᠥᠭᠡᠷᠡ ᠶᠠᠮᠠᠷ ᠨᠢᠭᠡ ᠬᠡᠯᠪᠡᠷᠢ ᠪᠡᠷ ᠲᠣᠭᠯᠠᠯᠲᠠ ᠪᠠᠨ ᠦᠷᠭᠦᠯᠵᠢᠯᠡᠭᠦᠯᠬᠦ ᠬᠦᠷᠲᠡᠯᠡ ᠲᠡᠷᠡ ᠰᠠᠨᠠᠯ ᠬᠦᠴᠦᠨ ᠲᠡᠢ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠨᠠ᠃
2 ᠬᠠᠢᠨᠴᠠᠬᠤ ᠰᠠᠨᠠᠯ ᠢ᠋ ᠲᠣᠭᠯᠠᠭᠴᠢ ᠪᠦᠷᠢ ᠲᠡᠮᠳᠡᠭᠯᠡᠯ ᠦ᠋ᠨ ᠬᠠᠭᠤᠳᠠᠰᠤᠨ ᠳᠡᠭᠡᠷᠡ = ᠲᠡᠮᠳᠡᠭ ᠢ᠋ᠶ᠋ᠡᠷ ᠲᠡᠮᠳᠡᠭᠯᠡᠨᠡ᠃
3 ᠲᠤᠰ ᠵᠦᠢᠯ ᠦ᠋ᠨ ᠵᠤᠷᠪᠤᠰ ᠬᠣᠶᠠᠷ ᠪᠠ ᠭᠤᠷᠪᠠ ᠶ᠋ᠢᠨ ᠳᠠᠭᠠᠤ ᠬᠠᠢᠨᠴᠠᠬᠤ ᠲᠤᠬᠠᠢ ᠮᠡᠳᠡᠭᠡᠯᠡᠯ ᠢ᠋ ᠬᠠᠢᠨᠴᠠᠬᠤ ᠰᠠᠨᠠᠯ ᠭᠡᠮᠡᠨ ᠠᠪᠴᠤ ᠦᠵᠡᠨᠡ᠃
ᠬᠣᠶᠠᠷ᠂ ᠠᠳᠠᠯᠢ ᠪᠠᠢᠷᠢᠯᠠᠯ ᠭᠤᠷᠪᠠ ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠳᠠᠷᠠᠭᠠᠬᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠳᠠᠪᠲᠠᠭᠳᠠᠭᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ (ᠨᠡᠭᠦᠳᠡᠯ ᠦ᠋ᠨ ᠳᠠᠪᠲᠠᠯᠲᠠ ᠶ᠋ᠢ ᠬᠢᠬᠦ ᠱᠠᠭᠠᠷᠳᠠᠯᠭᠠ ᠥᠬᠡᠢ ᠪᠡᠷ) ᠨᠡᠭᠦᠳᠡᠯ ᠬᠢᠵᠦ ᠪᠠᠢᠭᠠ ᠲᠣᠭᠯᠠᠭᠴᠢ ᠦᠨᠡᠨ ᠵᠥᠪ ᠮᠡᠳᠡᠭᠡᠯᠡᠯ ᠭᠠᠷᠭᠠᠭᠰᠠᠨ ᠢ᠋ᠶ᠋ᠠᠷ ᠲᠤᠰ ᠦᠷᠦᠭ ᠢ᠋ ᠬᠠᠢᠨᠴᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠨᠠ᠃ ᠡᠭᠦᠨ ᠳ᠋ᠦ᠍᠄
(ᠨᠢᠭᠡ) ᠬᠡᠷᠪᠡ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠭᠴᠢ ᠳᠠᠷᠤᠢᠬᠠᠨ ᠬᠢᠬᠦ ᠨᠡᠭᠦᠳᠡᠯ ᠢ᠋ᠶ᠋ᠡᠨ ᠨᠡᠭᠦᠬᠦ ᠦᠭᠡᠢ ᠪᠡᠷ ᠲᠡᠮᠳᠡᠭᠯᠡᠯ ᠦ᠋ᠨ ᠬᠠᠭᠤᠳᠠᠰᠤᠨ ᠳᠡᠭᠡᠷᠡ ᠪᠢᠴᠢᠵᠦ᠂ ᠡᠨᠡ ᠲᠤᠬᠠᠢ ᠪᠠᠨ ᠬᠢᠨᠠᠭᠴᠢ ᠳ᠋ᠦ᠍ ᠮᠡᠳᠡᠭᠳᠡᠭᠰᠡᠨ᠂ ᠮᠥᠨ ᠢᠩᠭᠢᠵᠦ ᠨᠡᠭᠦᠪᠡᠯ ᠠᠳᠠᠯᠢ ᠪᠠᠢᠷᠢᠯᠠᠯ ᠭᠤᠷᠪᠠ ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠳᠠᠪᠲᠠᠭᠳᠠᠬᠤ ᠪᠠᠷ ᠪᠣᠯᠬᠤ ᠪᠣᠯ᠂
(ᠬᠣᠶᠠᠷ) ᠡᠰᠡᠪᠡᠯ ᠭᠤᠷᠪᠠ ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠠᠳᠠᠯᠢ ᠪᠠᠢᠷᠢᠯᠠᠯ ᠳᠠᠪᠲᠠᠭᠳᠠᠭᠰᠠᠨ ᠪᠠ ᠬᠠᠢᠨᠴᠠᠬᠤ ᠶ᠋ᠢ ᠰᠠᠨᠠᠯ ᠪᠣᠯᠭᠠᠭᠰᠠᠨ ᠲᠣᠭᠯᠠᠭᠴᠢ ᠨᠡᠭᠦᠳᠡᠯ ᠬᠢᠰᠠᠨ ᠪᠣᠯ᠂
ᠬᠡᠷᠪᠡ ᠨᠡᠭᠦᠳᠡᠯ ᠬᠢᠬᠦ ᠲᠣᠭᠯᠠᠭᠴᠢ ᠶ᠋ᠢᠨ ᠡᠭᠡᠯᠵᠢ᠂ ᠢᠵᠢᠯ ᠲᠥᠷᠥᠯ ᠦ᠋ᠨ ᠪᠠ ᠥᠩᠭᠡ ᠶ᠋ᠢᠨ ᠬᠦᠴᠦᠨ ᠨᠦ᠍ᠭᠦᠳ ᠪᠠᠢᠷᠢᠯᠠᠭᠰᠠᠨ ᠪᠠᠢᠳᠠᠯ᠂ ᠲᠣᠭᠯᠠᠭᠴᠢᠳ ᠤ᠋ᠨ ᠪᠦᠬᠦ ᠬᠦᠴᠦᠨ ᠨᠦ᠍ᠭᠦᠳ ᠦ᠋ᠨ ᠪᠣᠯᠤᠮᠵᠢᠲᠤ ᠨᠡᠭᠦᠳᠡᠯ ᠦ᠋ᠳ ᠪᠣᠯᠤᠨ ᠢᠵᠢᠯ ᠨᠡᠭᠦᠳᠡᠯ ᠦ᠋ᠳ ᠨᠢ ᠪᠦᠭᠦᠳᠡ ᠪᠡᠷ ᠠᠳᠠᠯᠢ ᠪᠣᠯ ᠲᠤᠬᠠᠢ ᠶ᠋ᠢᠨ ᠪᠠᠢᠷᠢᠯᠠᠯᠲᠠ ᠶ᠋ᠢ ᠰᠠᠶᠢ ᠠᠳᠠᠯᠢ ᠭᠡᠵᠦ ᠦᠵᠡᠨᠡ᠃
ᠭᠤᠷᠪᠠ᠂ ᠥᠪᠡᠷ ᠦ᠋ᠨ ᠨᠡᠭᠦᠬᠦ ᠡᠭᠡᠯᠵᠢᠨ ᠳᠡᠭᠡᠷᠡ ᠲᠣᠭᠯᠠᠭᠴᠢ ᠦᠨᠡᠨ ᠵᠥᠪ ᠮᠡᠳᠡᠭᠡᠯᠡᠭᠰᠡᠨ ᠢ᠋ᠶ᠋ᠡᠷ ᠳᠠᠷᠠᠭᠠᠬᠢ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠲᠣᠭᠯᠠᠯᠲᠠ ᠶ᠋ᠢ ᠬᠠᠢᠨᠴᠠᠭᠰᠠᠨ ᠢ᠋ᠶ᠋ᠠᠷ ᠲᠣᠭᠠᠴᠠᠨᠠ᠃ ᠡᠭᠦᠨ ᠳ᠋ᠦ᠍᠄
(ᠨᠢᠭᠡ) ᠬᠡᠷᠪᠡ ᠲᠣᠭᠯᠠᠭᠴᠢ ᠥᠭᠡᠷᠡᠴᠢᠯᠡᠬᠦ ᠪᠣᠯᠤᠮᠵᠢ ᠦᠭᠡᠢ ᠪᠡᠷ ᠨᠡᠭᠦᠳᠡᠯ ᠢ᠋ᠶ᠋ᠡᠨ ᠲᠡᠮᠳᠡᠭᠯᠡᠯ ᠦ᠋ᠨ ᠬᠠᠭᠤᠳᠠᠰᠤᠨ ᠳᠡᠭᠡᠷᠡ ᠪᠢᠴᠢᠭᠡᠳ᠂ ᠲᠣᠭᠯᠠᠭᠴᠢ ᠪᠦᠷᠢ ᠬᠦᠦ ᠬᠥᠳᠡᠯᠭᠡᠭᠡ ᠦᠭᠡᠢ ᠪᠡᠷ᠂ ᠪᠠᠰᠠ ᠢᠳᠡᠯᠲᠡ ᠬᠢᠭᠡ ᠦᠭᠡᠢ ᠪᠡᠷ ᠰᠡᠭᠦᠯ ᠦ᠋ᠨ 50 ᠨᠡᠭᠦᠳᠡᠯ ᠨᠡᠭᠦᠭᠰᠡᠨ ᠢ᠋ ᠬᠢᠨᠠᠭᠴᠢ ᠳ᠋ᠤ᠌ ᠮᠡᠳᠡᠭᠦᠯᠦᠭᠰᠡᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌᠂
(ᠬᠣᠶᠠᠷ) ᠲᠣᠭᠯᠠᠭᠴᠢᠳ ᠰᠡᠭᠦᠯ ᠦ᠋ᠨ 50 ᠨᠡᠭᠦᠳᠡᠯ ᠢ᠋ ᠶᠠᠮᠠᠷ ᠨᠢᠭᠡ ᠬᠦᠦ ᠪᠡᠷ ᠨᠡᠭᠦᠭᠡ ᠦᠭᠡᠢ᠂ ᠮᠥᠨ ᠢᠳᠡᠯᠲᠡ ᠬᠢᠭᠡ ᠦᠭᠡᠢ ᠪᠡᠷ ᠨᠡᠭᠦᠭᠰᠡᠨ ᠪᠣᠯ᠂
ᠳᠥᠷᠪᠡ᠂ ᠬᠡᠷᠪᠡ ᠲᠣᠭᠯᠠᠭᠴᠢ ᠨᠢᠭᠡᠳᠦᠭᠡᠷ ᠪᠦᠯᠦᠭ ᠦ᠋ᠨ ᠳᠥᠷᠪᠡᠳᠦᠭᠡᠷ ᠵᠦᠢᠯ ᠦ᠋ᠨ ᠵᠤᠷᠪᠤᠰ ᠭᠤᠷᠪᠠ ᠶ᠋ᠢᠨ ᠳᠠᠭᠠᠤ ᠰᠢᠳᠡᠷᠡ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ ᠭᠠᠷ ᠬᠦᠷᠦᠭᠰᠡᠨ ᠪᠣᠯ ᠲᠤᠬᠠᠢ ᠶ᠋ᠢᠨ ᠨᠡᠭᠦᠳᠡᠯ ᠢ᠋ᠶ᠋ᠡᠷ ᠬᠣᠶᠠᠷ ᠪᠣᠯᠤᠨ ᠵᠤᠷᠪᠤᠰ ᠭᠤᠷᠪᠠ ᠶ᠋ᠢᠨ ᠳᠠᠭᠠᠤ ᠬᠠᠢᠨᠴᠠᠬᠤ ᠡᠷᠬᠡ ᠪᠡᠨ ᠠᠯᠳᠠᠨᠠ᠃
ᠲᠠᠪᠤ᠂ ᠬᠡᠷᠪᠡ ᠲᠣᠭᠯᠠᠭᠴᠢ ᠵᠤᠷᠪᠤᠰ ᠬᠣᠶᠠᠷ ᠪᠣᠯᠤᠨ ᠵᠤᠷᠪᠤᠰ ᠭᠤᠷᠪᠠ ᠶ᠋ᠢᠨ ᠳᠠᠭᠠᠤ ᠬᠠᠢᠨᠴᠠᠬᠤ ᠮᠡᠳᠡᠭᠡᠯᠡᠯ ᠭᠠᠷᠭᠠᠪᠠᠯ᠂ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠭᠴᠢ ᠪᠤᠶᠤ ᠬᠢᠨᠠᠭᠴᠢ ᠴᠠᠭ ᠢ᠋ ᠵᠣᠭᠰᠣᠭᠠᠨᠠ᠃ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠭᠴᠢ ᠡᠨᠡ ᠲᠣᠬᠢᠶᠠᠯ ᠳ᠋ᠤ᠌ ᠬᠠᠢᠨᠴᠠᠬᠤ ᠮᠡᠳᠡᠭᠳᠡᠯ ᠢ᠋ᠶ᠋ᠡᠨ ᠪᠤᠴᠠᠭᠠᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ᠃
(ᠨᠢᠭᠡ) ᠬᠡᠷᠪᠡ ᠲᠤᠬᠠᠢ ᠶ᠋ᠢᠨ ᠮᠡᠳᠡᠭᠳᠡᠯ ᠦᠨᠡᠨ ᠪᠣᠯᠬᠤ ᠶ᠋ᠢ ᠪᠠᠲᠤᠯᠠᠪᠠᠯ ᠲᠤᠰ ᠥᠷᠥᠭ ᠳᠠᠷᠤᠢ ᠬᠠᠢᠨᠴᠠᠭᠰᠠᠨ ᠢ᠋ᠶ᠋ᠠᠷ ᠳᠠᠭᠤᠰᠤᠨᠠ᠃
(ᠬᠣᠶᠠᠷ) ᠬᠡᠷᠪᠡ ᠲᠤᠬᠠᠢ ᠶ᠋ᠢᠨ ᠮᠡᠳᠡᠭᠳᠡᠯ ᠪᠤᠷᠤᠭᠤ ᠪᠣᠯᠬᠤ ᠶ᠋ᠢ ᠲᠣᠭᠲᠠᠭᠠᠪᠠᠯ ᠬᠢᠨᠠᠭᠴᠢ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠦᠨᠳᠦᠰᠦᠨ ᠪᠣᠳᠣᠯ ᠤ᠋ᠨ ᠴᠠᠭ ᠳᠡᠭᠡᠷᠡ ᠬᠣᠶᠠᠷ ᠮᠢᠨᠦ᠋ᠲ ᠨᠡᠮᠡᠵᠦ ᠥᠭᠭᠦᠨᠡ᠃ ᠡᠢᠨ ᠬᠦ᠌ ᠲᠣᠭᠯᠠᠯᠲᠠ ᠴᠠᠭᠠᠰᠢ ᠦᠷᠭᠦᠯᠵᠢᠯᠡᠨᠡ᠂ ᠬᠡᠷᠪᠡ ᠲᠤᠬᠠᠢ ᠶ᠋ᠢᠨ ᠮᠡᠳᠡᠭᠳᠡᠯ ᠵᠣᠷᠢᠯᠲᠠ ᠳ᠋ᠤ᠌ ᠨᠡᠭᠦᠳᠡᠯ ᠦ᠋ᠳ ᠳᠡᠭᠡᠷᠡ ᠲᠤᠯᠭᠠᠭᠤᠷᠢᠯᠠᠭᠰᠠᠨ ᠪᠣᠯ ᠡᠨᠡ ᠬᠦ᠌ ᠨᠡᠭᠦᠳᠡᠯ ᠢ᠋ ᠵᠤᠷᠪᠤᠰ ᠭᠤᠷᠪᠠ ᠠ᠋ᠴᠠ ᠵᠤᠷᠪᠤᠰ ᠳᠥᠷᠪᠡ ᠶ᠋ᠢᠨ ᠳᠠᠭᠠᠤ ᠬᠢᠨᠡ᠃
ᠵᠢᠷᠭᠤᠭᠠ᠂ ᠬᠡᠷᠪᠡ ᠳᠠᠷᠠᠭᠠᠬᠢ ᠦᠢᠯᠡᠳᠦᠯ ᠦ᠋ᠨ ᠠᠯᠢ ᠨᠢᠭᠡ ᠡᠰᠡᠪᠡᠯ ᠬᠣᠶᠠᠭᠤᠯᠠ ᠪᠠᠨ ᠲᠣᠬᠢᠶᠠᠯᠳᠤᠪᠠᠯ ᠬᠢᠨᠠᠭᠴᠢ ᠥᠷᠥᠭ ᠢ᠋ ᠬᠠᠢᠨᠴᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠵᠤ ᠳᠠᠷᠤᠢᠬᠠᠨ ᠳᠠᠭᠤᠰᠬᠠᠨᠠ᠃ ᠡᠨᠡ ᠨᠢ ᠲᠣᠭᠯᠠᠭᠴᠢ ᠠ᠋ᠴᠠ ᠬᠠᠢᠨᠴᠠᠬᠤ ᠰᠠᠨᠠᠯ ᠮᠡᠳᠡᠭᠳᠡᠭᠰᠡᠨ ᠡᠰᠡᠬᠦ ᠲᠡᠢ ᠬᠣᠯᠪᠣᠭᠳᠠᠯ ᠦᠭᠡᠢ᠃
(ᠨᠢᠭᠡ) ᠵᠤᠷᠪᠤᠰ ᠬᠣᠶᠠᠷ ᠤ᠋ᠨ(ᠬᠣᠶᠠᠷ) ᠲᠤ ᠵᠢᠭᠠᠭᠰᠠᠨ ᠠᠳᠠᠯᠢ ᠪᠠᠢᠷᠢᠯᠠᠯ ᠲᠠᠪᠤ ᠠ᠋ᠴᠠ ᠳᠣᠭᠣᠭᠰᠢ ᠦᠭᠡᠢ ᠪᠡᠷ ᠪᠣᠯᠤᠭᠰᠠᠨ᠃
(ᠬᠣᠶᠠᠷ) ᠬᠦᠦ ᠨᠡᠭᠦᠬᠦ ᠦᠭᠡᠢ ᠪᠡᠷ ᠡᠰᠡᠪᠡᠯ ᠢᠳᠡᠯᠲᠡ ᠬᠢᠬᠦ ᠦᠭᠡᠢ ᠪᠡᠷ ᠲᠣᠭᠯᠠᠭᠴᠢ ᠪᠦᠷ ᠳᠠᠷᠠᠭᠠᠯᠠᠭᠰᠠᠨ 75 ᠨᠡᠭᠦᠳᠡᠯ ᠬᠢᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌᠂ ᠭᠡᠪᠡᠴᠦ ᠬᠡᠷᠪᠡ ᠰᠡᠭᠦᠯ ᠦ᠋ᠨ ᠨᠡᠭᠦᠳᠡᠯ ᠳ᠋ᠦ᠍ ᠮᠠᠳ ᠬᠢᠭᠰᠡᠨ ᠪᠣᠯ ᠰᠡᠭᠦᠯᠴᠢ ᠶ᠋ᠢᠨ ᠡᠨᠡ ᠦᠢᠯᠡᠳᠦᠯ ᠢ᠋ ᠬᠦᠴᠦᠨ ᠲᠡᠢ ᠳ᠋ᠦ᠍ ᠲᠣᠭᠠᠴᠠᠨᠠ᠃
ᠳᠣᠯᠣᠭᠠ᠂ ᠵᠥᠪᠰᠢᠶᠡᠷᠡᠭᠳᠡᠭᠰᠡᠨ ᠪᠣᠯᠤᠮᠵᠢ ᠳ᠋ᠤ᠌ ᠴᠤᠪᠤᠷᠠᠯ ᠨᠡᠭᠦᠳᠡᠯ ᠢ᠋ᠶ᠋ᠡᠷ ᠮᠠᠳᠯᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠪᠠᠢᠷᠢᠯᠠᠯ ᠡᠭᠦᠰᠦᠭᠰᠡᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠲᠤᠬᠠᠢ ᠶ᠋ᠢᠨ ᠦᠷᠦᠭ ᠢ᠋ ᠬᠠᠢᠨᠴᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠨᠠ᠃
ᠲᠠᠪᠤᠳᠤᠭᠠᠷ ᠵᠦᠢᠯ ᠬᠤᠪᠢ ᠲᠡᠮᠳᠡᠭᠯᠡᠬᠦ
ᠲᠣᠭᠯᠠᠯᠲᠠ ᠶ᠋ᠢᠨ ᠳᠦᠷᠢᠮ ᠳ᠋ᠦ᠍ ᠥᠭᠡᠷᠡ ᠪᠡᠷ ᠲᠣᠭᠲᠠᠭᠠᠭᠰᠠᠨ ᠦᠭᠡᠢ ᠪᠣᠯ ᠲᠤᠬᠠᠢ ᠶ᠋ᠢᠨ ᠥᠷᠥᠭ ᠲᠦ᠍ ᠢᠯᠠᠭᠰᠠᠨ ᠲᠣᠭᠯᠠᠭᠴᠢ᠂ ᠡᠰᠡᠪᠡᠯ ᠨᠥᠭᠥᠭᠡᠳᠡᠬᠢ ᠨᠢ ᠪᠠᠭᠤᠵᠤ ᠦᠭᠭᠦᠭᠰᠡᠨ ᠢ᠋ᠶ᠋ᠡᠷ ᠢᠯᠠᠭᠰᠠᠨ ᠲᠣᠭᠯᠠᠭᠴᠢ ᠨᠢᠭᠡ ᠬᠤᠪᠢ(1) ᠲᠡᠮᠳᠡᠭᠯᠡᠬᠦ ᠪᠠ ᠲᠤᠬᠠᠢ ᠶ᠋ᠢᠨ ᠦᠷᠦᠭ ᠦ᠋ᠨ ᠢᠯᠠᠭᠳᠠᠭᠰᠠᠨ᠂ ᠡᠰᠡᠪᠡᠯ ᠪᠠᠭᠤᠵᠤ ᠦᠭᠭᠦᠭᠰᠡᠨ ᠲᠣᠭᠯᠠᠭᠴᠢ ᠲᠡᠭ ᠬᠤᠪᠢ(0) ᠲᠡᠮᠳᠡᠭᠯᠡᠨᠡ᠃ ᠬᠠᠢᠨᠴᠠᠭᠰᠠᠨ ᠲᠣᠭᠯᠠᠭᠴᠢ ᠲᠣᠰᠪᠣᠷᠢ ᠬᠠᠭᠠᠰ(1/2) ᠬᠤᠪᠢ ᠲᠡᠮᠳᠡᠭᠯᠡᠨᠡ᠃
ᠵᠢᠷᠭᠤᠳᠤᠭᠠᠷ ᠵᠦᠢᠯ ᠲᠣᠭᠯᠠᠭᠴᠢ ᠶ᠋ᠢᠨ ᠪᠠᠷᠢᠮᠲᠠᠯᠠᠯ
ᠨᠢᠭᠡ᠂ ᠰᠢᠲᠠᠷᠠ ᠶ᠋ᠢᠨ ᠲᠣᠭᠯᠠᠯᠲᠠ ᠳ᠋ᠤ᠌ ᠰᠠᠭᠠᠳ ᠤᠴᠠᠷᠠᠭᠤᠯᠬᠤ ᠪᠠᠷ ᠶᠠᠮᠠᠷ ᠴᠤ᠌ ᠦᠢᠯᠡᠳᠦᠯ ᠬᠢᠵᠦ ᠪᠣᠯᠬᠤ ᠦᠭᠡᠢ᠃
ᠬᠣᠶᠠᠷ᠂ ᠲᠣᠭᠯᠠᠯᠲᠠ ᠶ᠋ᠢᠨ ᠲᠠᠯᠠᠪᠠᠢ᠂ ᠪᠡᠶᠡ ᠵᠠᠰᠠᠬᠤ ᠭᠠᠵᠠᠷ᠂ ᠠᠮᠠᠷᠠᠯᠲᠠ ᠶ᠋ᠢᠨ ᠥᠷᠥᠭᠡ᠂ ᠴᠠᠢ ᠤᠤᠭᠤᠬᠤ ᠭᠠᠵᠠᠷ᠂ ᠲᠠᠮᠠᠬᠢ ᠲᠠᠲᠠᠬᠤ ᠴᠢᠭ᠂ ᠡᠰᠡᠪᠡᠯ ᠬᠢᠨᠠᠭᠴᠢ ᠶ᠋ᠢᠨ ᠵᠥᠪᠰᠢᠶᠡᠷᠡᠭᠰᠡᠨ ᠪᠤᠰᠤᠳ ᠭᠠᠵᠠᠷ ᠤ᠋ᠳ ᠢ᠋《 ᠤᠷᠤᠯᠳᠤᠭᠠᠨ ᠶᠠᠪᠤᠭᠤᠯᠬᠤ ᠭᠠᠵᠠᠷ》 ᠭᠡᠮᠡᠨ ᠠᠪᠴᠤ ᠦᠵᠡᠨᠡ᠃ ᠲᠣᠭᠯᠠᠯᠲᠠ ᠶ᠋ᠢᠨ ᠲᠠᠯᠠᠪᠤᠷ ᠨᠢ ᠲᠣᠭᠯᠠᠬᠤ ᠥᠷᠥᠭ ᠪᠠᠢᠷᠢᠯᠠᠭᠰᠠᠨ ᠭᠠᠵᠠᠷ ᠢ᠋ ᠬᠡᠯᠡᠨᠡ᠃ ᠵᠥᠪᠬᠡᠨ ᠬᠢᠨᠠᠭᠴᠢ ᠶ᠋ᠢᠨ ᠵᠥᠪᠰᠢᠶᠡᠷᠡᠯ ᠲᠡᠢ ᠪᠡᠷ ᠳᠣᠣᠷᠠᠬᠢ ᠬᠣᠶᠠᠷ ᠦᠢᠯᠡᠳᠦᠯ ᠢ᠋ ᠬᠢᠵᠦ ᠪᠣᠯᠤᠨᠠ᠄
(ᠨᠢᠭᠡ) ᠲᠣᠭᠯᠠᠭᠴᠢ ᠤᠷᠤᠯᠳᠤᠭᠠᠨ ᠶᠠᠪᠤᠭᠤᠯᠬᠤ ᠭᠠᠵᠠᠷ ᠠ᠋ᠴᠠ ᠶᠠᠪᠤᠬᠤ
(ᠬᠣᠶᠠᠷ) ᠲᠣᠭᠯᠠᠭᠴᠢ ᠨᠡᠭᠦᠳᠡᠯ ᠬᠢᠬᠦ ᠡᠭᠡᠯᠵᠢᠨ ᠳ᠋ᠦ᠍ ᠪᠡᠨ ᠲᠣᠭᠯᠠᠯᠲᠠ ᠶ᠋ᠢᠨ ᠲᠠᠯᠠᠪᠤᠷ ᠢ᠋ ᠣᠷᠬᠢᠨ ᠶᠠᠪᠤᠬᠤ ᠡᠭᠦᠨ ᠡᠴᠡ ᠭᠠᠳᠠᠨᠠ ᠲᠣᠭᠯᠠᠭᠴᠢ᠂ ᠡᠰᠡᠪᠡᠯ ᠬᠢᠨᠠᠭᠴᠢ ᠪᠢᠰᠢ ᠬᠥᠮᠦᠨ ᠲᠣᠭᠯᠠᠯᠲᠠ ᠶ᠋ᠢᠨ ᠲᠠᠯᠠᠪᠤᠷ ᠲᠤ ᠣᠷᠣᠬᠤ ᠶ᠋ᠢ ᠬᠣᠷᠢᠭᠯᠠᠨᠠ᠃
ᠭᠤᠷᠪᠠ
(ᠨᠢᠭᠡ) ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠲᠣᠭᠯᠠᠭᠴᠢ ᠶᠠᠮᠠᠷ ᠨᠢᠭᠡ ᠲᠡᠮᠳᠡᠭᠯᠡᠯ᠂ ᠮᠡᠳᠡᠭᠡᠯᠡᠯ ᠦ᠋ᠨ ᠥᠭᠡᠷᠡ ᠡᠬᠡ ᠰᠤᠷᠪᠤᠯᠵᠢ᠂ ᠵᠥᠪᠯᠡᠯᠭᠡ᠂ ᠥᠭᠡᠷᠡ ᠰᠢᠲᠠᠷᠠ ᠶ᠋ᠢᠨ ᠬᠥᠯᠭᠡ ᠳᠡᠭᠡᠷᠡ ᠰᠢᠨᠵᠢᠯᠡᠭᠡ ᠬᠢᠬᠦ ᠶ᠋ᠢ ᠬᠣᠷᠢᠭᠯᠠᠨᠠ᠃
(ᠬᠣᠶᠠᠷ) ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠤᠷᠤᠯᠳᠤᠭᠠᠨ ᠶᠠᠪᠤᠭᠤᠯᠬᠤ ᠭᠠᠵᠠᠷ ᠲᠣᠭᠯᠠᠭᠴᠢ ᠭᠠᠷ ᠤᠲᠠᠰᠤ ᠪᠠ ᠥᠭᠡᠷᠡ ᠪᠤᠰᠤᠳ ᠴᠠᠬᠢᠮ ᠬᠠᠷᠢᠯᠴᠠᠭᠠᠨ ᠤ᠋ ᠬᠡᠷᠡᠭᠰᠡᠯ ᠠᠰᠢᠭᠯᠠᠬᠤ ᠶ᠋ᠢ ᠬᠣᠷᠢᠭᠯᠠᠨᠠ᠃ ᠬᠡᠷᠪᠡ ᠲᠣᠭᠯᠠᠭᠴᠢ ᠡᠳᠡᠭᠡᠷ ᠬᠡᠷᠡᠭᠰᠡᠯ ᠢ᠋ ᠤᠷᠤᠯᠳᠤᠭᠠᠨ ᠶᠠᠪᠤᠭᠤᠯᠬᠤ ᠭᠠᠵᠠᠷ ᠠᠪᠴᠢᠷᠠᠭᠰᠠᠨ ᠪᠣᠯᠬᠤ ᠨᠢ ᠲᠣᠳᠣᠷᠬᠠᠢ ᠪᠣᠯᠤᠭᠰᠠᠨ ᠪᠣᠯ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠭᠴᠢ ᠲᠤᠰ ᠥᠷᠥᠭ ᠲᠦ᠍ ᠢᠯᠠᠭᠳᠠᠭᠰᠠᠨ ᠢ᠋ᠶ᠋ᠠᠷ ᠲᠣᠭᠠᠴᠠᠨᠠ᠃
ᠤᠷᠤᠯᠳᠤᠭᠠᠨ ᠤ᠋ ᠳᠦᠷᠢᠮ ᠢ᠋ᠶ᠋ᠡᠷ ᠢᠯᠭᠠᠭᠠ ᠲᠠᠢ᠂ ᠲᠣᠷᠭᠠᠭᠤᠯᠢ᠂ ᠪᠠᠭᠠ ᠵᠡᠷᠭᠡ ᠬᠠᠲᠠᠭᠤ ᠳᠦᠷᠢᠮ ᠢ᠋ ᠲᠣᠳᠣᠷᠠᠭᠤᠯᠵᠤ ᠥᠭᠬᠦ ᠨᠢ᠄ ᠬᠢᠨᠠᠭᠴᠢ ᠲᠣᠭᠯᠠᠭᠴᠢ ᠶ᠋ᠢᠨ ᠬᠤᠪᠴᠠᠰᠤ᠂ ᠰᠡᠪ ᠲᠣᠣᠷ᠂ ᠪᠤᠰᠤᠳ ᠵᠦᠢᠯᠡᠰ ᠢ᠋ ᠰᠢᠯᠭᠠᠬᠤ ᠶ᠋ᠢ ᠱᠠᠭᠠᠷᠳᠠᠵᠤ ᠪᠣᠯᠤᠨᠠ᠃ ᠬᠢᠨᠠᠭᠴᠢ ᠡᠰᠡᠪᠡᠯ ᠬᠢᠨᠠᠭᠴᠢ ᠶ᠋ᠢᠨ ᠲᠣᠮᠢᠯᠠᠭᠰᠠᠨ ᠬᠥᠮᠦᠨ ᠡᠭᠦᠨ ᠢ᠋ ᠰᠢᠯᠭᠠᠬᠤ ᠪᠠ ᠲᠤᠬᠠᠢ ᠶ᠋ᠢᠨ ᠰᠢᠯᠭᠠᠬᠤ ᠬᠥᠮᠦᠨ ᠨᠢ ᠰᠢᠯᠭᠠᠭᠤᠯᠤᠭᠴᠢ ᠲᠠᠢ ᠢᠵᠢᠯ ᠬᠦᠢᠰᠦ ᠲᠡᠢ ᠪᠠᠢᠨᠠ᠃ ᠬᠡᠷᠪᠡ ᠲᠣᠭᠯᠠᠭᠴᠢ ᠡᠳᠡᠭᠡᠷ ᠡᠭᠦᠷᠭᠡ ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠬᠦᠯᠢᠶᠡᠬᠦ ᠡᠴᠡ ᠲᠠᠲᠠᠭᠠᠯᠵᠠᠪᠠᠯ ᠬᠢᠨᠠᠭᠴᠢ ᠳᠣᠯᠣᠳᠤᠭᠠᠷ ᠵᠦᠢᠯ ᠦ᠋ᠨ ᠵᠤᠷᠪᠤᠰ ᠶᠢᠰᠦ ᠶ᠋ᠢᠨ ᠳᠠᠭᠠᠤ ᠠᠷᠭᠠ ᠬᠡᠮᠵᠢᠶᠡ ᠠᠪᠤᠨᠠ᠃
(ᠭᠤᠷᠪᠠ) ᠲᠠᠮᠠᠬᠢ ᠲᠠᠲᠠᠬᠤ ᠴᠠᠭ ᠢ᠋ ᠵᠥᠪᠬᠡᠨ ᠬᠢᠨᠠᠭᠴᠢ ᠶ᠋ᠢᠨ ᠵᠥᠪᠰᠢᠶᠡᠷᠡᠭᠰᠡᠨ ᠤᠷᠤᠯᠳᠤᠭᠠᠨ ᠶᠠᠪᠤᠭᠤᠯᠬᠤ ᠭᠠᠵᠠᠷ ᠲᠤ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠨᠡ᠃
ᠳᠥᠷᠪᠡ᠂ ᠥᠷᠥᠭ ᠳᠠᠭᠤᠰᠬᠠᠭᠰᠠᠨ ᠲᠣᠭᠯᠠᠭᠴᠢ ᠶ᠋ᠢ ᠦᠵᠡᠭᠴᠢ ᠭᠡᠮᠡᠨ ᠦᠵᠡᠨᠡ᠃
ᠲᠠᠪᠤ᠂ ᠥᠷᠢᠰᠦᠯᠳᠦᠭᠴᠢ ᠶ᠋ᠢ ᠶᠠᠮᠠᠷ ᠨᠢᠭᠡ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠩᠬᠠᠷᠤᠯ ᠢ᠋ ᠰᠠᠷᠨᠢᠭᠤᠯᠬᠤ᠂ ᠡᠰᠡᠪᠡᠯ ᠠᠭᠤᠷᠯᠠᠭᠤᠯᠬᠤ ᠶ᠋ᠢ ᠬᠣᠷᠢᠭᠯᠠᠨᠠ᠃ ᠡᠭᠦᠨ ᠳ᠋ᠦ᠍ ᠰᠢᠯᠲᠠᠭᠠᠨ ᠦᠭᠡᠢ ᠮᠡᠳᠡᠭᠳᠡᠯ ᠭᠠᠷᠭᠠᠬᠤ᠂ ᠰᠢᠯᠲᠠᠭᠠᠨ ᠦᠭᠡᠢ ᠪᠡᠷ ᠬᠠᠢᠨᠴᠠᠬᠤ ᠰᠠᠨᠠᠯ ᠲᠠᠯᠪᠢᠬᠤ᠂ ᠡᠰᠡᠪᠡᠯ ᠲᠣᠭᠯᠠᠯᠲᠠ ᠶ᠋ᠢᠨ ᠲᠠᠯᠠᠪᠤᠷ ᠲᠤ ᠴᠢᠮᠡᠭᠡ ᠱᠤᠤᠭᠢᠶᠠᠨ ᠭᠠᠷᠭᠠᠬᠤ ᠵᠡᠷᠭᠡ ᠦᠢᠯᠡᠳᠦᠯ ᠦ᠋ᠳ ᠣᠷᠣᠨᠠ᠃
ᠵᠢᠷᠭᠤᠭᠠ᠂ ᠨᠢᠭᠡ ᠡᠴᠡ ᠲᠠᠪᠤ ᠶ᠋ᠢᠨ ᠵᠢᠭᠠᠯᠲᠠ ᠨᠤᠭᠤᠳ ᠤ᠋ᠨ ᠠᠯᠢ ᠨᠢᠭᠡ ᠨᠥᠬᠥᠴᠡᠯ ᠢ᠋ ᠵᠥᠷᠢᠴᠡᠬᠦ ᠨᠢ ᠳᠣᠯᠣᠳᠤᠭᠠᠷ ᠵᠦᠢᠯ ᠦ᠋ᠨ ᠵᠤᠷᠪᠤᠰ ᠶᠢᠰᠦ ᠶ᠋ᠢᠨ ᠳᠠᠭᠠᠤ ᠰᠢᠢᠳᠬᠡᠯ ᠥᠭᠭᠦᠨᠡ᠃
ᠳᠣᠯᠣᠭᠠ᠂ ᠰᠢᠳᠡᠷᠡ ᠶ᠋ᠢᠨ ᠳᠦᠷᠢᠮ ᠢ᠋ ᠮᠥᠷᠳᠡᠯᠭᠡ ᠪᠣᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠲᠣᠭᠯᠠᠭᠴᠢ ᠡᠭᠦᠨ ᠢ᠋ ᠪᠠᠢᠩᠭᠤ ᠲᠠᠲᠠᠭᠠᠯᠵᠠᠬᠤ ᠨᠢ ᠲᠣᠭᠯᠠᠯᠲᠠ ᠶ᠋ᠢᠨ ᠥᠷᠥᠭ ᠢ᠋ ᠢᠯᠠᠭᠳᠠᠬᠤ ᠰᠢᠢᠳᠬᠡᠯ ᠬᠦᠯᠢᠶᠡᠨᠡ᠃ ᠬᠢᠨᠠᠭᠴᠢ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠬᠤᠪᠢ ᠠᠪᠬᠤ ᠬᠡᠮᠵᠢᠶᠡ ᠶ᠋ᠢ ᠰᠢᠢᠳᠪᠦᠷᠢᠯᠡᠨᠡ᠃
ᠨᠠᠢ᠍ᠮᠠ᠂ ᠬᠡᠷᠪᠡ ᠲᠣᠭᠯᠠᠭᠴᠢ ᠬᠣᠶᠠᠭᠤᠯᠠ ᠪᠠᠨ ᠵᠤᠷᠪᠤᠰ ᠳᠣᠯᠣᠭᠠ ᠶ᠋ᠢᠨ ᠳᠠᠭᠠᠤ ᠪᠤᠷᠤᠭᠤ ᠲᠠᠢ ᠨᠢ ᠲᠣᠭᠲᠠᠭᠠᠭᠳᠠᠪᠠᠯ ᠲᠤᠬᠠᠢ ᠶ᠋ᠢᠨ ᠦᠷᠦᠭ ᠲᠦ᠍ ᠬᠣᠶᠠᠷ ᠲᠣᠭᠯᠠᠭᠴᠢ ᠶ᠋ᠢ ᠪᠦᠷ ᠢᠯᠠᠭᠳᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠨᠠ᠃
ᠶᠢᠰᠦ᠂ ᠰᠢᠳᠡᠷᠡ ᠶ᠋ᠢᠨ ᠳᠦᠷᠢᠮ ᠦ᠋ᠨ ᠳᠠᠭᠠᠤ ᠲᠤᠰᠬᠠᠢ ᠬᠤᠪᠢ ᠥᠭᠭᠦᠭᠰᠡᠨ ᠲᠠᠯᠠ ᠪᠠᠷ ᠲᠠᠢᠯᠪᠤᠷᠢᠯᠠᠵᠤ ᠥᠭᠬᠦ ᠶ᠋ᠢ ᠲᠣᠭᠯᠠᠭᠴᠢ ᠬᠢᠨᠠᠭᠴᠢ ᠳ᠋ᠤ᠌ ᠬᠦᠰᠡᠯᠲᠡ ᠭᠠᠷᠭᠠᠬᠤ ᠡᠷᠬᠡ ᠲᠡᠢ᠃
ᠠᠷᠪᠠ᠂ ᠤᠷᠤᠯᠳᠤᠭᠠᠨ ᠤ᠋ ᠳᠦᠷᠢᠮ ᠳ᠋ᠦ᠍ ᠥᠭᠡᠷᠡ ᠲᠣᠭᠲᠠᠭᠠᠯ ᠦᠭᠡᠢ ᠪᠣᠯ ᠲᠣᠭᠯᠠᠭᠴᠢ ᠬᠡᠳᠦᠢᠪᠡᠷ ᠦᠷᠦᠭ ᠦ᠋ᠨ ᠦᠷᠡ ᠳ᠋ᠦᠩ ᠢ᠋ ᠬᠠᠷᠠᠭᠤᠯᠤᠭᠰᠠᠨ ᠬᠠᠭᠤᠳᠠᠰᠤᠨ ᠳ᠋ᠤ᠌ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠭᠰᠠᠨ ᠴᠤ᠌ ᠬᠢᠨᠠᠭᠴᠢ ᠶ᠋ᠢᠨ ᠰᠢᠢᠳᠪᠦᠷᠢ ᠶ᠋ᠢᠨ ᠡᠰᠡᠷᠭᠦᠦ ᠭᠣᠮᠣᠳᠠᠯ ᠭᠠᠷᠭᠠᠵᠤ᠂ ᠵᠠᠭᠠᠯᠳᠤᠯᠭᠠ ᠳᠡᠪᠰᠢᠭᠦᠯᠬᠦ ᠡᠷᠬᠡ ᠲᠡᠢ᠃
ᠳᠣᠯᠣᠳᠤᠭᠠᠷ ᠵᠦᠢᠯ ᠬᠢᠨᠠᠭᠴᠢ ᠶ᠋ᠢᠨ ᠭᠦᠢᠴᠡᠳᠬᠡᠬᠦ ᠡᠭᠦᠷᠭᠡ
ᠨᠢᠭᠡ᠂ ᠬᠢᠨᠠᠭᠴᠢ ᠰᠢᠲᠠᠷᠠ ᠶ᠋ᠢᠨ ᠳᠦᠷᠢᠮ ᠢ᠋ ᠴᠢᠩᠳᠠ ᠬᠠᠲᠠᠭᠤ ᠪᠠᠷᠢᠮᠲᠠᠯᠠᠬᠤ ᠨᠥᠬᠥᠴᠡᠯ ᠢ᠋ ᠪᠦᠷᠢᠯᠳᠦᠭᠦᠯᠦᠨ ᠠᠵᠢᠯᠯᠠᠨᠠ᠃
ᠬᠣᠶᠠᠷ᠂ ᠬᠢᠨᠠᠭᠴᠢ ᠨᠢ ᠳᠠᠷᠠᠭᠠᠬᠢ ᠡᠭᠦᠷᠭᠡ ᠬᠦᠯᠢᠶᠡᠨᠡ᠃
(ᠨᠢᠭᠡ) ᠰᠢᠳᠤᠷᠭᠤ ᠲᠣᠭᠯᠠᠯᠲᠠ ᠶ᠋ᠢ ᠶᠠᠪᠤᠭᠤᠯᠬᠤ
(ᠬᠣᠶᠠᠷ) ᠤᠷᠤᠯᠳᠤᠭᠠᠨ ᠤ᠋ ᠬᠠᠮᠤᠭ ᠰᠠᠢᠨ ᠠᠰᠢᠭ ᠰᠣᠨᠢᠷᠬᠠᠯ ᠳ᠋ᠤ᠌ ᠨᠡᠢᠴᠡᠭᠦᠯᠦᠨ ᠠᠵᠢᠯᠯᠠᠬᠤ
(ᠭᠤᠷᠪᠠ) ᠲᠣᠭᠯᠠᠯᠲᠠ ᠶ᠋ᠢᠨ ᠰᠠᠢᠨ ᠣᠷᠴᠢᠨ ᠢ᠋ ᠪᠦᠷᠢᠯᠳᠦᠭᠦᠯᠬᠦ ᠳ᠋ᠦ᠍ ᠨᠥᠯᠥᠭᠡᠯᠡᠨ ᠠᠵᠢᠯᠯᠠᠬᠤ
(ᠳᠥᠷᠪᠡ) ᠲᠣᠭᠯᠠᠭᠴᠢᠳ ᠲᠤ ᠰᠠᠭᠠᠳ ᠪᠣᠯᠬᠤ ᠪᠠᠷ ᠦᠭᠡᠢ ᠨᠥᠬᠥᠴᠡᠯ ᠪᠠᠢᠳᠠᠯ ᠢ᠋ ᠪᠣᠢ ᠪᠣᠯᠭᠠᠬᠤ
(ᠲᠠᠪᠤ) ᠤᠷᠤᠯᠳᠤᠭᠠᠨ ᠤ᠋ ᠦᠢᠯᠡ ᠶᠠᠪᠤᠴᠠ ᠶ᠋ᠢ ᠬᠢᠨᠠᠨ ᠰᠢᠯᠭᠠᠬᠤ
(ᠵᠢᠷᠭᠤᠭᠠ) ᠬᠥᠳᠡᠯᠵᠦ ᠪᠠᠷᠢᠬᠤ ᠳ᠋ᠤ᠌ ᠪᠡᠷᠬᠡᠰᠢᠶᠡᠯ ᠲᠡᠢ ᠬᠥᠮᠦᠰ᠂ ᠡᠮᠨᠡᠯᠭᠡ ᠶ᠋ᠢᠨ ᠠᠷᠭᠠ ᠬᠡᠮᠵᠢᠶᠡ ᠠᠪᠬᠤ ᠱᠠᠭᠠᠷᠳᠠᠯᠭᠠ ᠲᠠᠢ ᠲᠣᠭᠯᠠᠭᠴᠢ ᠳ᠋ᠤ᠌ ᠣᠨᠴᠠᠭᠠᠢ ᠬᠠᠷᠠᠭᠠᠯᠵᠠᠯ ᠤ᠋ᠨ ᠠᠷᠭᠠ ᠬᠡᠮᠵᠢᠶᠡ ᠠᠪᠴᠤ ᠠᠵᠢᠯᠯᠠᠨᠠ᠃
ᠭᠤᠷᠪᠠ᠂ ᠬᠢᠨᠠᠭᠴᠢ ᠨᠢ ᠲᠣᠭᠯᠠᠯᠲᠠ ᠶ᠋ᠢᠨ ᠶᠠᠪᠤᠴᠠ ᠶ᠋ᠢ ᠪᠠᠢᠩᠭᠤ ᠠᠵᠢᠭᠯᠠᠵᠤ᠂ ᠢᠯᠠᠩᠭᠤᠶᠠ ᠲᠣᠭᠯᠠᠭᠴᠢ ᠶ᠋ᠢᠨ ᠴᠠᠭ ᠪᠠᠴᠢᠮ ᠦᠶᠡ ᠳ᠋ᠦ᠍ ᠭᠠᠷᠭᠠᠭᠰᠠᠨ ᠰᠢᠢᠳᠪᠦᠷᠢ ᠪᠡᠨ ᠬᠡᠷᠡᠭᠵᠢᠭᠦᠯᠬᠦ᠂ ᠵᠣᠬᠢᠬᠤ ᠲᠣᠭᠯᠠᠭᠴᠢᠳ ᠲᠤ ᠰᠢᠢᠳᠬᠡᠯ ᠦ᠋ᠨ ᠠᠷᠭᠠ ᠬᠡᠮᠵᠢᠶᠡ ᠠᠪᠴᠤ ᠴᠢᠳᠠᠬᠤ ᠪᠠᠷ ᠠᠵᠢᠯᠯᠠᠨᠠ᠃
ᠳᠥᠷᠪᠡ᠂ ᠬᠢᠨᠠᠭᠴᠢ ᠶ᠋ᠢ ᠲᠣᠭᠯᠠᠯᠲᠠ ᠳ᠋ᠤ᠌ ᠠᠵᠢᠭᠯᠠᠯᠲᠠ ᠬᠢᠬᠦ ᠪᠡᠷ ᠲᠤᠰᠠᠯᠠᠭᠴᠢᠳ ᠢ᠋ ᠲᠣᠮᠢᠯᠠᠵᠤ ᠪᠣᠯᠤᠨᠠ᠃ ᠵᠢᠱ᠌ᠢᠶᠡ ᠨᠢ᠄ ᠬᠡᠳᠦ ᠬᠡᠳᠦᠨ ᠲᠣᠭᠯᠠᠭᠴᠢ ᠶ᠋ᠢᠨ ᠴᠠᠭ ᠳᠠᠭᠤᠰᠬᠤ ᠳᠥᠭᠥᠭᠰᠡᠨ ᠪᠣᠯ
ᠲᠠᠪᠤ᠂ ᠲᠣᠭᠯᠠᠭᠴᠢᠳ ᠭᠠᠳᠠᠨᠠ ᠶ᠋ᠢᠨ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠨᠥᠯᠥᠭᠡᠯᠡᠯ ᠳ᠋ᠦ᠍ ᠤᠴᠠᠷᠠᠭᠰᠠᠨ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠬᠣᠶᠠᠷ ᠲᠣᠭᠯᠠᠭᠴᠢᠳ ᠲᠤ ᠨᠡᠮᠡᠯᠲᠡ ᠴᠠᠭ ᠲᠠᠯᠪᠢᠵᠤ ᠥᠭᠴᠦ ᠪᠣᠯᠤᠨᠠ᠃
ᠵᠢᠷᠭᠤᠭᠠ᠂ ᠰᠢᠲᠠᠷᠠ ᠶ᠋ᠢᠨ ᠳᠦᠷᠢᠮ ᠳ᠋ᠦ᠍ ᠵᠢᠭᠠᠭᠰᠠᠨ ᠠ᠋ᠴᠠ ᠪᠤᠰᠤᠳ ᠲᠣᠬᠢᠶᠠᠯᠳᠤᠯ ᠳ᠋ᠤ᠌ ᠬᠢᠨᠠᠭᠴᠢ ᠲᠣᠭᠯᠠᠯᠲᠠ ᠳ᠋ᠤ᠌ ᠬᠥᠨᠳᠡᠯᠡᠨ ᠡᠴᠡ ᠣᠷᠣᠯᠴᠠᠬᠤ ᠡᠷᠬᠡ ᠦᠭᠡᠢ᠃ ᠬᠢᠨᠠᠭᠴᠢ ᠨᠡᠭᠦᠳᠡᠯ ᠦ᠋ᠨ ᠲᠣᠭᠠ ᠶ᠋ᠢ ᠵᠠᠷᠯᠠᠬᠤ ᠦᠭᠡᠢ᠃ ᠨᠥᠭᠦᠭᠡ ᠲᠠᠯᠠ ᠨᠢ ᠨᠡᠭᠦᠳᠡᠯ ᠬᠢᠭᠰᠡᠨ᠂ ᠡᠰᠡᠪᠡᠯ ᠲᠤᠬᠠᠯᠠᠭᠴᠢ ᠴᠠᠭ ᠢ᠋ᠶ᠋ᠠᠨ ᠳᠠᠷᠤᠭᠰᠠᠨ ᠦᠭᠡᠢ ᠵᠡᠷᠭᠡ ᠲᠠᠯᠠ ᠪᠠᠷ ᠲᠣᠭᠯᠠᠭᠴᠢᠳ ᠲᠤ ᠰᠠᠨᠠᠭᠤᠯᠭᠠ ᠥᠭᠴᠦ ᠪᠣᠯᠬᠤ ᠦᠭᠡᠢ᠃
ᠳᠣᠯᠣᠭᠠ᠂ ᠬᠡᠷᠪᠡ ᠬᠡᠨ ᠨᠢᠭᠡᠨ ᠵᠦᠢ ᠪᠤᠰᠤ ᠵᠦᠢᠯ ᠠᠵᠢᠭᠯᠠᠪᠠᠯ ᠡᠭᠦᠨ ᠢ᠋ ᠵᠥᠪᠬᠡᠨ ᠬᠢᠨᠠᠭᠴᠢ ᠳ᠋ᠤ᠌ ᠮᠡᠳᠡᠭᠳᠡᠨᠡ᠃ ᠥᠭᠡᠷᠡ ᠲᠣᠭᠯᠠᠯᠲᠠ ᠳ᠋ᠤ᠌ ᠣᠷᠣᠯᠴᠠᠭᠰᠠᠨ ᠲᠣᠭᠯᠠᠭᠴᠢᠳ ᠶᠠᠷᠢᠬᠤ ᠡᠷᠬᠡ ᠦᠭᠡᠢ ᠡᠰᠡᠪᠡᠯ ᠲᠣᠭᠯᠠᠯᠲᠠ ᠳ᠋ᠤ᠌ ᠬᠥᠨᠳᠡᠯᠡᠨ ᠡᠴᠡ ᠣᠷᠣᠯᠴᠠᠬᠤ ᠦᠭᠡᠢ᠃ ᠦᠵᠡᠭᠴᠢᠳ ᠲᠣᠭᠯᠠᠯᠲᠠ ᠳ᠋ᠤ᠌ ᠬᠥᠨᠳᠡᠯᠡᠨ ᠡᠴᠡ ᠣᠷᠣᠯᠴᠠᠬᠤ ᠶ᠋ᠢ ᠡᠷᠡᠰ ᠬᠣᠷᠢᠭᠯᠠᠨᠠ᠃ ᠬᠢᠨᠠᠭᠴᠢ ᠳᠦᠷᠢᠮ ᠵᠥᠷᠢᠴᠡᠭᠰᠡᠳ ᠢ᠋ ᠤᠷᠤᠯᠳᠤᠭᠠᠨ ᠶᠠᠪᠤᠭᠳᠠᠭᠤᠯᠵᠤ ᠪᠠᠢᠭᠠ ᠭᠠᠵᠠᠷ ᠠ᠋ᠴᠠ ᠭᠠᠷᠭᠠᠬᠤ ᠡᠷᠬᠡ ᠲᠡᠢ᠃
ᠨᠠᠢ᠍ᠮᠠ᠂ ᠬᠢᠨᠠᠭᠴᠢ ᠠ᠋ᠴᠠ ᠵᠥᠪᠰᠢᠶᠡᠷᠡᠯ ᠣᠯᠭᠣᠭᠰᠠᠨ ᠦᠭᠡᠢ ᠪᠣᠯ ᠤᠷᠤᠯᠳᠤᠭᠠᠨ ᠶᠠᠪᠤᠭᠤᠯᠬᠤ ᠭᠠᠵᠠᠷ ᠡᠰᠡᠪᠡᠯ ᠬᠢᠨᠠᠭᠴᠢ ᠶ᠋ᠢᠨ ᠲᠣᠳᠣᠷᠬᠠᠢᠯᠠᠭᠰᠠᠨ ᠠᠯᠢᠪᠠ ᠭᠠᠵᠠᠷ ᠲᠤ ᠬᠡᠨ ᠨᠢᠭᠡᠨ ᠭᠠᠷ ᠤᠲᠠᠰᠤ᠂ ᠠᠯᠢᠪᠠ ᠬᠣᠯᠪᠣᠭᠠ ᠬᠠᠷᠢᠯᠴᠠᠭᠠᠨ ᠤ᠋ ᠬᠡᠷᠡᠭᠰᠡᠯ ᠠᠰᠢᠭᠯᠠᠬᠤ ᠶ᠋ᠢ ᠬᠣᠷᠢᠭᠯᠠᠨᠠ᠃
ᠶᠢᠰᠦ᠂ ᠬᠢᠨᠠᠭᠴᠢ ᠶ᠋ᠢᠨ ᠡᠷᠬᠡ ᠵᠦᠢ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠭᠳᠡᠭᠰᠡᠨ ᠲᠣᠷᠭᠠᠭᠤᠯᠢ᠂ ᠰᠢᠢᠳᠬᠡᠯ ᠦ᠋ᠨ ᠠᠷᠭᠠ ᠬᠡᠮᠵᠢᠶᠡ ᠨᠦ᠍ᠭᠦᠳ᠄
(ᠨᠢᠭᠡ) ᠰᠡᠷᠡᠮᠵᠢ( ᠠᠩᠬᠠᠷᠤᠭᠤᠯᠤᠭᠠ ) ᠥᠭᠬᠦ
(ᠬᠣᠶᠠᠷ) ᠥᠷᠢᠰᠦᠯᠳᠦᠭᠴᠢ ᠶ᠋ᠢᠨ ᠦᠯᠡᠳᠡᠭᠰᠡᠨ ᠬᠤᠭᠤᠴᠠᠭᠠ ᠶ᠋ᠢ ᠨᠡᠮᠡᠬᠦ
(ᠭᠤᠷᠪᠠ) ᠵᠥᠷᠢᠴᠡᠯ ᠭᠠᠷᠭᠠᠭᠰᠠᠨ ᠲᠣᠭᠯᠠᠭᠴᠢ ᠶ᠋ᠢᠨ ᠦᠯᠡᠳᠡᠭᠰᠡᠨ ᠬᠤᠭᠤᠴᠠᠭᠠ ᠠ᠋ᠴᠠ ᠬᠠᠰᠤᠬᠤ
(ᠥᠷᠪᠡ) ᠡᠰᠡᠷᠭᠦᠦ ᠲᠣᠭᠯᠠᠭᠴᠢ ᠳ᠋ᠤ᠌ ᠲᠤᠬᠠᠢ ᠶ᠋ᠢᠨ ᠦᠷᠦᠭ ᠦ᠋ᠨ ᠬᠤᠪᠢ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠠᠰᠢᠭᠲᠠᠢ ᠬᠤᠪᠢ (ᠤᠨᠤᠭᠠ) ᠶ᠋ᠢ ᠨᠡᠮᠡᠬᠦ
(ᠲᠠᠪᠤ) ᠵᠥᠷᠢᠴᠡᠯ ᠭᠠᠷᠭᠠᠵᠤ ᠪᠠᠢᠭᠠ ᠲᠣᠭᠯᠠᠭᠴᠢ ᠶ᠋ᠢᠨ ᠲᠤᠬᠠᠢ ᠶ᠋ᠢᠨ ᠦᠷᠦᠭ ᠲᠦ᠍ ᠥᠭᠬᠦ ᠬᠤᠪᠢ (ᠤᠨᠤᠭᠠ) ᠶ᠋ᠢ ᠬᠠᠰᠤᠬᠤ
(ᠵᠢᠷᠭᠤᠭᠠ) ᠵᠥᠷᠢᠴᠡᠯ ᠭᠠᠷᠭᠠᠭᠰᠠᠨ ᠲᠣᠭᠯᠠᠭᠴᠢ ᠶ᠋ᠢᠨ ᠲᠤᠬᠠᠢ ᠶ᠋ᠢᠨ ᠲᠣᠭᠯᠠᠯᠲᠠ ᠳ᠋ᠤ᠌ ᠢᠯᠠᠭᠳᠠᠭᠰᠠᠨ ᠢ᠋ ᠮᠡᠳᠡᠭᠳᠡᠬᠦ (ᠮᠥᠨ ᠲᠡᠭᠦᠨᠴᠢᠯᠡᠨ ᠥᠷᠢᠰᠦᠯᠳᠦᠭᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠰᠢᠢᠳᠪᠦᠷᠢ ᠭᠠᠷᠭᠠᠨᠠ)
(ᠳᠣᠯᠣᠭᠠ) ᠲᠣᠷᠭᠠᠭᠤᠯᠢ ᠶ᠋ᠢ ᠤᠷᠢᠳᠴᠢᠯᠠᠨ ᠮᠡᠳᠡᠭᠳᠡᠬᠦ
(ᠨᠠᠢ᠍ᠮᠠ) ᠵᠠᠷᠢᠮ ᠲᠣᠭᠯᠠᠭᠴᠢ ᠶ᠋ᠢ ᠤᠷᠤᠯᠳᠤᠭᠠᠨ ᠠ᠋ᠴᠠ ᠭᠠᠷᠭᠠᠬᠤ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠡᠭᠷᠢ ᠡᠵᠢ᠂ ᠭᠠᠷᠮᠠ᠂ ᠳᠠᠪᠰᠢᠯᠲᠦ᠂ ᠴᠣᠯᠮᠣᠨᠲᠤᠶᠠᠭᠠ