ᠠᠮᠤᠷᠠ ᠬᠢᠭᠡᠳ ᠲᠡᠭᠦᠨ ᠦ᠌ ᠤᠷᠠᠯᠢᠭ ᠦᠰᠦᠭ – ᠦᠨᠡᠨᠵᠢᠷᠭᠠᠯ Амар хийгээд түүний урлаг үсэг – Үнэнжаргал
2582ᠠᠮᠤᠷᠠ ᠬᠢᠭᠡᠳ ᠲᠡᠭᠦᠨ ᠦ᠌ ᠤᠷᠠᠯᠢᠭ ᠦᠰᠦᠭ
ᠵᠣᠬᠢᠶᠠᠭᠴᠢ᠄ ᠦᠨᠡᠨᠵᠢᠷᠭᠠᠯ
ᠬᠥᠮᠦᠨ ᠦ᠌᠂ ᠲᠡᠷᠡ ᠲᠣᠰᠤᠮ ᠢ᠋ᠶ᠋ᠠᠨ ᠮᠣᠩᠭᠣᠯᠴᠤᠳ ᠤ᠋ᠨ ᠰᠡᠳᠬᠢᠮᠵᠢ ᠨᠢ ᠲᠣᠭᠣᠷᠢᠭ ᠬᠡᠯᠪᠡᠷᠢᠲᠦ᠂ ᠰᠡᠳᠬᠢᠴᠡ ᠨᠢ ᠰᠠᠴᠤᠷᠠᠭ ᠬᠡᠯᠪᠡᠷᠢᠲᠦ᠂ ᠰᠡᠳᠬᠢᠯ ᠨᠢ ᠨᠠᠷᠠᠯᠠᠭ ᠬᠡᠯᠪᠡᠷᠢᠲᠦ ᠭᠡᠵᠦ ᠬᠡᠨ ᠨᠢᠭᠡᠨ ᠨᠢ ᠬᠡᠯᠡᠭᠰᠡᠨ ᠪᠠᠢᠳᠠᠭ᠃ ᠡᠨᠡ ᠴᠦ᠍ ᠲᠣᠭᠲᠠᠯᠴᠠᠭᠠ ᠪᠠᠷ᠂ ᠦᠨᠳᠦᠰᠦᠲᠡᠨ ᠪᠣᠯᠭᠠᠨ ᠤ᠋ ᠪᠦᠲᠦᠭᠡᠭᠰᠡᠨ ᠠᠯᠢᠪᠠ ᠵᠦᠢᠯ ᠨᠢ ᠪᠦᠷ ᠴᠦ᠍ ᠥᠪᠡᠷ ᠦ᠋ᠨ ᠭᠡᠰᠡᠨ ᠣᠨᠴᠠᠯᠢᠭ ᠰᠢᠨᠵᠢ ᠶ᠋ᠢ ᠪᠦᠷᠢᠳᠦᠭᠦᠯᠦᠭᠰᠡᠨ ᠵᠢᠱ᠌ᠢᠶᠡ ᠲᠡᠢ᠃ ᠲᠩᠷᠢ ᠡᠴᠡ ᠡᠰᠢᠲᠡᠢ ᠪᠣᠰᠤᠭᠠ ᠮᠣᠩᠭᠣᠯ ᠦᠰᠦᠭ ᠲᠠᠲᠠᠯᠠᠬᠤ ᠳ᠋ᠤ᠌ ᠲᠠᠭᠠᠲᠠᠢ ᠨᠢᠳᠦᠯᠡᠬᠦ ᠳ᠋ᠦ᠍ ᠠᠶᠠᠲᠠᠢ ᠪᠠᠷ ᠢ᠋ᠶ᠋ᠠᠨ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠦ᠌ ᠦᠰᠦᠭ ᠪᠢᠴᠢᠭ ᠦ᠋ᠨ ᠥᠩᠭᠡ ᠳᠦᠷᠰᠦ ᠡᠴᠡ ᠠᠩᠭᠢᠳᠠ ᠲᠣᠳᠣᠷᠬᠠᠢ ᠣᠷᠣᠰᠢᠨᠠ᠃ ᠲᠡᠷᠡ ᠳᠣᠳᠣᠮ ᠢ᠋ᠶ᠋ᠠᠨ ᠮᠠᠯᠴᠢᠨ ᠠᠮᠤᠷᠠ ᠶ᠋ᠢᠨ ᠮᠡᠯᠮᠡᠢ ᠳ᠋ᠦ᠍᠂ ᠤᠷᠠᠨ ᠲᠥᠰᠦᠭᠡᠯᠡᠯ ᠳ᠋ᠦ᠍ ᠨᠢ ᠮᠠᠨ ᠤ᠋ ᠮᠣᠩᠭᠣᠯ ᠪᠢᠴᠢᠭ ᠤᠷᠠᠯᠢᠭ ᠤ᠋ᠨ ᠪᠦᠲᠦᠭᠡᠯ ᠪᠣᠯᠵᠤ ᠠᠮᠢᠯᠠᠳᠠᠭ ᠠᠵᠠᠢ᠃
ᠠᠮᠣᠷᠴᠣᠭᠳᠣ (ᠣᠯᠠᠩᠬᠢ ᠨᠢ ᠠᠮᠤᠷᠠ ᠭᠡᠵᠦ ᠳᠠᠭᠤᠳᠠᠳᠠᠭ) ᠪᠣᠯ ᠠᠷᠤ ᠬᠣᠷᠴᠢᠨ ᠬᠤᠰᠢᠭᠤᠨ ᠤ᠋ ᠪᠠᠶᠠᠨ ᠥᠨᠳᠥᠷ ᠰᠤᠮᠤ ᠶ᠋ᠢᠨ ᠵᠢᠷ ᠦ᠋ᠨ ᠨᠢᠭᠡᠨ ᠮᠠᠯᠴᠢᠨ᠂ ᠪᠠᠭᠠ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠣᠶᠣᠯ ᠤ᠋ᠨ ᠬᠡᠮᠵᠢᠶᠡ ᠲᠡᠢ᠂ ᠲᠡᠷᠡ ᠪᠠᠭᠠ ᠠ᠋ᠴᠠ ᠪᠠᠨ ᠠᠵᠢᠭᠴᠢ ᠭᠢᠷᠠᠬᠠᠢ᠂ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠣᠭᠳᠠᠭᠰᠠᠨ ᠵᠦᠢᠯᠡᠰ ᠢ᠋ᠶ᠋ᠡᠨ ᠲᠡᠷᠡ ᠳᠠᠷᠤᠢ ᠤᠷᠭᠤᠭᠤᠯᠵᠤ ᠴᠢᠨᠠᠭᠰᠢ ᠰᠡᠳᠬᠢᠳᠡᠭ ᠨᠢᠭᠡᠨ ᠪᠠᠢᠵᠠᠢ᠂ ᠠᠷᠪᠠᠨ ᠳᠥᠷᠪᠡᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠡᠷᠡᠪᠡᠷ ᠮᠠᠯ ᠬᠠᠷᠢᠭᠤᠯᠵᠤ ᠰᠠᠭᠤᠬᠤ ᠳ᠋ᠤ᠌ ᠪᠠᠨ ( ᠬᠥᠮᠦᠰ ᠵᠣᠭᠰᠣᠭᠠ ᠵᠢᠯᠣᠭᠣ ᠦᠭᠡᠢ ᠭᠦᠶᠦᠵᠦ ᠯᠡ ᠪᠠᠢᠳᠠᠭ᠂ ᠴᠣᠬᠣᠮ ᠶᠠᠭᠤᠨ ᠤ᠋ ᠴᠦ᠍ ᠲᠥᠯᠥᠭᠡ ᠶᠦᠮ ᠳᠡ ᠭᠡᠵᠦ) ᠪᠣᠳᠣᠯᠣᠩᠭᠤᠢ ᠪᠣᠯᠵᠤ ᠭᠡᠨᠡ᠂ ᠢᠩᠭᠢᠬᠦ ᠳ᠋ᠦ᠍《ᠭᠦᠶᠦᠨᠡ》 ᠭᠡᠰᠡᠨ ᠦᠭᠡ ᠶ᠋ᠢᠨ ᠣᠷᠬᠢᠴᠠ ᠴᠠᠴᠤᠯᠭᠠ ᠨᠢ ᠶᠠᠭ ᠬᠥᠮᠦᠨ ᠦ᠌ ᠭᠦᠶᠦᠵᠦ ᠪᠣᠢ ᠬᠥᠯ ᠰᠢᠭ ᠰᠠᠨᠠᠭᠳᠠᠨ᠂ ᠡᠷᠲᠡᠭᠡᠷ ᠰᠢᠯᠪᠢ ᠪᠠ ᠳᠤᠰᠤᠯ ᠨᠢ ᠰᠠᠵᠢᠯᠠᠵᠤ ᠪᠠᠢᠭᠠ ᠭᠠᠷ ᠮᠡᠲᠦ ᠪᠣᠳᠣᠭᠳᠠᠭᠠᠳ᠂ ᠠᠪᠤᠨ ᠳᠣᠣᠷᠠ ᠪᠠᠨ ᠬᠥᠮᠦᠨ ᠦ᠌ ᠭᠦᠶᠦᠵᠦ ᠪᠠᠢᠭᠠ ᠳᠦᠷᠰᠦ ᠶ᠋ᠢ《ᠭᠦᠶᠦᠨᠡ》 ᠭᠡᠰᠡᠨ ᠦᠰᠦᠭ ᠲᠦ᠍ ᠵᠢᠷᠤᠭᠰᠠᠨ ᠨᠢ ᠤᠷᠠᠨ ᠪᠦᠲᠦᠭᠡᠯ ᠪᠣᠯᠤᠨᠠ ᠭᠡᠵᠦ ᠬᠡᠨ ᠮᠡᠳᠡᠯᠡ᠁
ᠣᠳᠣ ᠪᠣᠯᠬᠤ ᠳ᠋ᠤ᠌ ᠠᠮᠤᠷᠠ ᠶ᠋ᠢᠨ ᠪᠦᠲᠦᠭᠰᠡᠨ ᠪᠦᠲᠦᠭᠡ ᠦᠭᠡᠢ ᠡᠳᠦᠢ ᠲᠡᠳᠦᠢ ᠪᠦᠲᠦᠭᠡᠯ ᠭᠠᠷᠭᠠᠴᠢᠬᠠᠵᠠᠢ᠂ ᠬᠥᠮᠦᠰ ᠲᠡᠭᠦᠨ ᠦ᠌ ᠪᠦᠲᠦᠭᠡᠯ ᠢ᠋ ᠭᠣᠶᠣ ᠭᠡᠵᠦ ᠦᠨᠡᠯᠡᠨ ᠮᠠᠭᠲᠠᠬᠤ ᠳ᠋ᠤ᠌ ᠲᠡᠷᠡ《ᠵᠥᠪᠬᠡᠨ ᠪᠣᠳᠣᠵᠤ ᠣᠯᠤᠭᠰᠠᠨ ᠢ᠋ᠶ᠋ᠠᠨ ᠪᠣᠳᠠᠲᠠᠢ ᠪᠣᠯᠭᠠᠭᠰᠠᠨ ᠳᠤᠷᠠ ᠰᠣᠨᠢᠷᠬᠠᠯ᠂ ᠮᠣᠩᠭᠣᠯ ᠦᠰᠦᠭ ᠡᠴᠡ ᠨᠠᠳᠠ ᠳ᠋ᠤ᠌ ᠣᠯᠭᠣᠭᠰᠠᠨ ᠪᠡᠯᠡᠭ》 ᠭᠡᠵᠦ ᠬᠡᠯᠡᠵᠦ ᠪᠠᠢᠯᠠ᠃
ᠮᠢᠨᠦ ᠬᠤᠪᠢ ᠳ᠋ᠤ᠌ ᠲᠡᠭᠦᠨ ᠦ᠌ ᠡᠳᠡᠭᠡᠷ ᠵᠢᠷᠤᠭ ᠭᠡᠮᠡᠷ ᠦᠰᠦᠭ᠂ ᠦᠰᠦᠭ ᠭᠡᠮᠡᠷ ᠵᠢᠷᠤᠭ ᠤ᠋ᠳ ᠨᠢ ᠨᠢᠭᠡᠨ ᠤᠷᠠᠨ ᠪᠦᠲᠦᠭᠡᠯ ᠭᠡᠵᠦ ᠣᠢᠯᠠᠭᠠᠵᠤ ᠪᠣᠯᠤᠨᠠ᠂ ᠲᠡᠷᠡ ᠪᠣᠯ ᠳᠦᠷᠰᠦᠲᠦ᠂ ᠤᠳᠬᠠᠲᠤ ᠦᠰᠦᠭ ᠪᠢᠰᠢ ᠲᠡᠷᠡ ᠪᠣᠯ ᠪᠣᠰᠤᠭᠠ ᠦᠰᠦᠭ ᠦ᠋ᠨ ᠭᠠᠢᠬᠠᠮᠰᠢᠭ᠂ ᠤᠷᠠᠨ ᠰᠠᠨᠠᠭᠠᠨ ᠤ᠋ ᠬᠢᠨ ᠦᠢᠯᠡᠳᠪᠦᠷᠢ᠂ ᠲᠡᠷᠡ ᠪᠣᠯ ᠮᠠᠨ ᠤ᠋ ᠦᠵᠡᠭᠡᠳ ᠯᠡ ᠥᠩᠭᠡᠷᠡᠬᠦ ᠲᠠᠭᠠᠰᠢᠶᠠᠯ ᠤ᠋ᠨ ᠪᠢᠰᠢ᠂ ᠦᠨᠳᠦᠰᠦᠲᠡᠨ ᠦ᠌ ᠪᠣᠰᠤᠭᠠ ᠦᠰᠦᠭ ᠦ᠋ᠨ ᠭᠠᠢᠬᠠᠮᠰᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠬᠠᠷᠬᠠᠬᠤ ᠪᠠᠶᠠᠷ ᠪᠠᠬᠠᠳᠤᠯ ᠪᠠᠢᠭᠠ ᠶᠤᠮ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠳᠠ