ᠮᠢᠩᠭᠠᠨ ᠴᠡᠩᠬᠡᠷ ᠠᠭᠤᠯᠠᠰ ᠤᠨ ᠣᠷᠣᠨ- ᠸᠠᠴᠢᠷᠪᠠᠲᠦ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Мянган цэнхэр уулсын орон - Очирбатын Дашбалбар
872ᠮᠢᠩᠭᠠᠨ ᠴᠡᠩᠬᠡᠷ ᠠᠭᠤᠯᠠᠰ ᠤᠨ ᠣᠷᠣᠨ
ᠣᠯᠠᠨ ᠨᠠᠭᠤᠷ ᠤ᠋ᠨ ᠣᠷᠣᠨ ᠳᠠᠷᠢᠭᠠᠩᠭᠠ !
ᠥᠷᠯᠥᠭᠡᠬᠡᠨ ᠪᠣᠯᠵᠣᠮᠣᠷ ᠵᠢᠷᠭᠢᠬᠦ ᠢᠷᠠᠭᠤ
ᠡᠮᠦᠨᠡ ᠶ᠋ᠢᠨ ᠠᠭᠤᠯᠠᠰ ᠤ᠋ᠨ ᠣᠷᠣᠨ — ᠳᠠᠷᠢᠭᠠᠩᠭᠠ!
ᠡᠭᠦᠯᠡᠰ ᠦ᠋ᠨ ᠲᠡᠭᠡᠪᠦᠷ — ᠡᠷᠲᠡᠨ ᠦ᠌ ᠠᠭᠤᠯᠠᠰ ᠤ᠋ᠨ
ᠦᠯᠦ ᠦᠵᠡᠭᠳᠡᠬᠦ ᠨᠢᠭᠤᠴᠠ ᠶ᠋ᠢ ᠰᠣᠨᠣᠰᠤᠭᠰᠠᠨ
ᠣᠳᠣᠨ ᠤ᠋ ᠤᠷᠲᠤ — ᠳᠣᠯᠭᠢᠶᠠᠨᠲᠤ ᠨᠠᠭᠤᠷ ᠤ᠋ᠨ
ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠠᠶᠠᠯᠭᠤ ᠶ᠋ᠢ ᠴᠢᠩᠨᠠᠭᠰᠠᠨ
ᠮᠢᠩᠭᠠᠨ ᠴᠡᠩᠬᠡᠷ ᠠᠭᠤᠯᠠᠰ ᠤ᠋ᠨ ᠣᠷᠣᠨ —
ᠮᠢᠨᠳᠠᠰᠤᠨ ᠰᠢᠷᠬᠡᠭ ᠲᠡᠢ ᠡᠯᠡᠰᠦᠨ ᠦ᠌ ᠬᠡ !
ᠮᠥᠩᠭᠥᠨ ᠴᠡᠩᠬᠡᠷ ᠭᠣᠷᠣᠬᠠ ᠶ᠋ᠢᠨ ᠣᠷᠣᠨ —
ᠮᠥᠴᠢᠷ ᠨᠢ ᠵᠢᠮᠢᠰ ᠲᠡᠢ ᠮᠤᠨᠤᠰᠤᠨ ᠤ᠋ ᠲᠦᠭᠡᠯ !
ᠨᠣᠮᠢᠨ ᠰᠣᠯᠣᠩᠭᠠ ᠬᠠᠭᠠᠯᠭᠠ ᠨᠢ ᠪᠣᠯᠵᠤ
ᠨᠠᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠤᠰᠤᠨ ᠳ᠋ᠤ᠌ ᠥᠪᠡᠷ ᠢ᠋ ᠪᠡᠨ ᠲᠣᠯᠢᠳᠠᠭᠰᠠᠨ
ᠨᠢᠭᠤᠴᠠ ᠶ᠋ᠢᠨ ᠢ᠋ᠶ᠋ᠡᠨ ᠳᠤᠮᠳᠠ ᠠᠨᠢᠷ ᠦᠭᠡᠢ ᠣᠷᠣᠰᠢᠵᠤ
ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠲᠩᠷᠢ ᠶ᠋ᠢᠨ ᠡᠬᠢᠯᠡᠯ ᠪᠣᠯᠤᠭᠰᠠ
ᠴᠡᠩᠬᠡᠷ ᠤᠨᠢᠶᠠᠷ ᠲᠤ᠌ ᠬᠥᠪᠦᠭᠰᠡᠨ ᠨᠤᠲᠤᠭ —
ᠴᠡᠴᠡᠭ ᠦ᠋ᠨ ᠳᠤᠮᠳᠠ ᠪᠠᠨ ᠣᠷᠣᠰᠢᠭᠰᠠᠨ ᠳᠠᠷᠢᠭᠠᠩᠭᠠ !
ᠰᠢᠯᠦᠭ ᠨᠣᠢᠷ ᠵᠢᠩᠭᠢᠨᠡᠭᠰᠡᠨ ᠰᠡᠷᠡᠭᠦᠯᠭᠡ
ᠰᠥᠨᠢ ᠳᠦᠯᠢ ᠢᠷᠡᠭᠰᠡᠨ ᠭᠡᠢᠴᠢᠨ — ᠳᠠᠷᠢᠭᠠᠩᠭᠠ !
ᠲᠤᠯᠤᠭᠠᠳ ᠳᠤᠮᠳᠠ ᠪᠠᠨ ᠠᠳᠤᠭᠤ ᠢᠨᠴᠠᠭᠠᠬᠤ ᠳ᠋ᠤ᠌
ᠲᠣᠮᠣ ᠤᠯᠠᠭᠠᠨ ᠨᠠᠷᠠ ᠮᠡᠯᠲᠡᠰ ᠬᠢᠨᠡ
ᠲᠣᠭᠣᠷᠢᠮ ᠪᠦᠷᠢᠳᠦᠨ ᠳ᠋ᠦ᠍ ᠠᠩᠭᠢᠷ ᠭᠠᠩᠭᠠᠨᠠᠬᠤ ᠳ᠋ᠤ᠌
ᠲᠣᠷᠭᠠᠨ ᠤ᠋ ᠬᠡ ᠰᠡᠮᠬᠡᠨ ᠰᠡᠮᠡᠷᠡᠨᠡ
ᠦᠯᠦ ᠮᠡᠳᠡᠭᠳᠡᠬᠦ ᠠᠪᠢᠶᠠᠨ ᠤ᠋ ᠣᠷᠣᠨ —
ᠦᠵᠦᠭᠦᠷ ᠦᠭᠡᠢ ᠲᠩᠷᠢ ᠶ᠋ᠢᠨ ᠡᠬᠢᠯᠡᠯ !
ᠵᠠᠭᠤᠨ ᠳᠠᠮᠵᠢᠭᠰᠠᠨ ᠨᠢᠭᠤᠴᠠ ᠶ᠋ᠢᠨ ᠥᠯᠥᠭᠡᠢ —
ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠴᠡᠴᠡᠭ ᠦ᠋ᠨ ᠮᠠᠨᠳᠠᠯ!
ᠠᠶᠠ ! ᠠᠪᠤ ᠶ᠋ᠢᠨ ᠮᠢᠨᠢ ᠳᠠᠷᠢᠭᠠᠩᠭᠠ —
ᠠᠯᠲᠠᠨ ᠬᠢᠯᠢ ᠶ᠋ᠢᠨ ᠢᠷᠠᠭᠤ ᠴᠢᠪᠬᠠᠳᠠᠰᠤ !
ᠠᠷᠤ ᠶᠢᠨ ᠪᠤᠯᠠᠭ ᠤ᠋ᠨ ᠮᠥᠩᠭᠥᠨ ᠭᠤᠷᠴᠢᠭᠢᠨᠠᠭᠠ —
ᠠᠬᠢᠭᠠᠳ ᠣᠯᠳᠠᠬᠤ ᠦᠭᠡᠢ ᠨᠠᠰᠤᠨ ᠤ᠋ ᠣᠷᠣᠨ!