ᠪᠣᠷᠣᠭᠠ ᠲᠠᠢ ᠦᠳᠡᠰᠢ ᠶ᠋ᠢᠨ ᠳᠠᠭᠤᠤ - ᠸᠠᠴᠢᠷᠪᠠᠲᠦ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Бороотой үдшийн дуу - Очирбатын Дашбалбар
962ᠪᠣᠷᠣᠭᠠ ᠲᠠᠢ ᠦᠳᠡᠰᠢ ᠶ᠋ᠢᠨ ᠳᠠᠭᠤᠤ
ᠨᠠᠰᠤᠨ ᠳ᠋ᠠᠭᠠᠨ ᠮᠠᠷᠲᠠᠬᠤ ᠦᠭᠡᠢ ᠬᠠᠢᠷᠠ ᠶ᠋ᠢᠨ ᠰᠢᠪᠡᠨᠡᠭᠡ
ᠨᠠᠮᠠᠶ᠋ᠢ ᠪᠠᠨ ᠬᠥᠲᠥᠯᠦᠨ ᠴᠢ ᠮᠢᠨᠢ ᠠᠯᠬᠤᠬᠤ ᠨᠢ
ᠨᠠᠮᠤᠭᠤᠬᠠᠨ ᠦᠳᠡᠰᠢ ᠶ᠋ᠢᠨ ᠵᠥᠭᠡᠯᠡᠨ ᠤᠶᠠᠩᠭᠠ
ᠴᠡᠴᠡᠭ ᠦ᠋ᠨ ᠦᠨᠦᠷ ᠵᠢᠷᠦᠬᠡᠨ ᠳ᠋ᠦ᠍ ᠰᠢᠩᠭᠡᠵᠦ
ᠴᠡᠭᠡᠵᠢᠨ ᠦ᠌ ᠬᠠᠢᠷᠠ ᠮᠢᠨᠢ ᠬᠠᠷᠠᠴᠠ ᠪᠠᠷ ᠳᠡᠮᠵᠢᠨᠡ
ᠠᠯᠠᠭ ᠨᠢᠳᠦᠨ ᠢᠴᠢᠩᠭᠦᠷᠡᠨ ᠮᠡᠯᠮᠡᠷᠡᠵᠦ
ᠠᠮᠢᠰᠬᠤᠯ ᠳᠠᠷᠤᠨ ᠰᠠᠨᠠᠭᠠ ᠠᠯᠳᠠᠨᠠ
ᠦᠯᠢᠭᠡᠷ ᠦ᠋ᠨ ᠰᠢᠪᠡᠨᠡᠭᠡ ᠪᠣᠷᠣᠭᠠ ᠱᠠᠭᠢᠵᠤ
ᠡᠪᠡᠰᠦᠨ ᠦ᠌ ᠰᠡᠷᠴᠢᠭᠢᠨᠡᠭᠡ ᠵᠢᠷᠦᠬᠡᠨ ᠳ᠋ᠦ᠍ ᠰᠢᠩᠭᠡᠨᠡ
ᠦᠶᠡ ᠥᠶᠡᠬᠡᠨ ᠨᠠᠮᠳᠠᠵᠤ᠂ ᠬᠠᠶᠠᠬᠠᠨ ᠰᠢᠷᠦᠭᠦᠰᠴᠦ
ᠥᠨᠥ ᠦᠳᠡᠰᠢ ᠶ᠋ᠢᠨ ᠰᠡᠳᠬᠢᠯ ᠬᠢᠮᠤᠷᠠᠨᠠ
ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠴᠡᠴᠡᠭ ᠢ᠋ ᠲᠠᠭᠠᠯᠠᠭᠰᠠᠨ
ᠵᠤᠨ ᠤ᠋ ᠰᠥᠨᠢ ᠶ᠋ᠢᠨ ᠣᠳᠣᠳ ᠨᠢᠭᠤᠭᠳᠠᠨᠠ
ᠵᠠᠭᠤᠨ ᠵᠢᠯ ᠴᠢᠮᠠ ᠠ᠋ᠴᠠ ᠬᠠᠭᠠᠴᠠᠯ ᠦᠭᠡᠢ
ᠵᠥᠭᠡᠯᠡᠨ ᠪᠣᠷᠣᠭᠠᠨ ᠵᠣᠭᠰᠣᠮᠠᠷ ᠪᠠᠢᠨᠠ᠃