ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ᠂ ᠨᠠᠢ᠍ᠮᠠ ᠶᠢᠨ ᠠᠭᠤᠯᠠᠨ ᠳᠤ ᠁ (ᠠᠷᠪᠠᠨ ᠲᠠᠪᠤ) Сэрүүхэн тал нутаг–<свис> Вальтер Босгард (Walter Bosshard)- Дөрөвдүгээр бөлөг 15
310ᠠᠷᠪᠠᠨ ᠲᠠᠪᠤ ᠂ ᠲᠠᠯᠠ ᠨᠤᠲᠤᠭ ᠠ᠋ᠴᠠ ᠠᠶᠠᠷᠯᠠᠭᠰᠠᠨ ᠮᠠᠨᠢ
ᠵᠤᠨ ᠳᠠᠭᠤᠰᠬᠤ ᠪᠣᠯᠤᠯᠠ᠃ ᠰᠥᠨᠢ ᠳ᠋ᠡᠭᠡᠨ ᠶᠡᠬᠡ ᠬᠦᠢᠲᠡᠨ ᠪᠣᠯᠵᠤ ᠯᠠᠷᠰᠤᠨ ᠠᠪᠠᠭᠠᠢ ᠵᠤᠤᠬᠠ ᠪᠠᠨ ᠴᠡᠪᠡᠷᠯᠡᠵᠦ ᠨᠣᠴᠣᠭᠠᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠣᠯᠭᠠᠪᠠ᠃ ᠵᠠᠩᠪᠸᠢ ᠳ᠋ᠤ᠌ ᠪᠠᠢᠭᠠ ᠶᠠᠫᠣᠨ ᠤ᠋ ᠪᠠᠢᠭᠤᠯᠤᠮᠵᠢ ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ ᠳ᠋ᠦ᠍ ᠬᠦᠷᠬᠦ ᠵᠠᠬᠢᠳᠠᠯ ᠴᠢᠮᠡᠭᠡ ᠬᠦᠷᠭᠡᠭᠴᠢᠳ ᠢ᠋ ᠭᠤᠷᠪᠠᠨ ᠭᠠᠷᠠᠭ ᠰᠢᠬᠠᠮ ᠬᠣᠷᠢᠨ ᠵᠣᠭᠰᠣᠭᠠᠪᠠ᠃ ᠡᠸᠷᠢᠺᠰᠣᠨ ᠤ᠋ ᠰᠡᠳᠬᠢᠯ ᠰᠠᠨᠠᠭᠠ ᠴᠤ᠌ ᠪᠦᠷ ᠲᠣᠭᠲᠠᠭᠤᠨ ᠪᠤᠰᠤ ᠪᠣᠯᠤᠯᠠ ᠃ ᠵᠠᠪᠰᠠᠷ ᠲᠤ᠌ ᠪᠠᠢᠭᠠ ᠮᠣᠩᠭᠣᠯ ᠨᠠᠢᠵᠠ ᠨᠠᠷ ᠲᠡᠭᠦᠨ ᠳ᠋ᠦ᠍ ᠶᠠᠫᠣᠨ ᠤ᠋ ᠵᠥᠪᠯᠡᠭᠴᠢ ᠨᠠᠷ ᠯᠠᠷᠰᠤᠨ ᠬᠦᠩ ᠪᠣᠯᠤᠨ ᠰᠸᠸᠳ᠋ᠸᠨ ᠦ᠌ ᠪᠦᠬᠦ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠨᠠᠷ ᠢ᠋ ᠦᠯᠳᠡᠨ ᠬᠥᠭᠡᠭᠡᠬᠦ ᠪᠡᠷ ᠪᠢᠰᠢᠯᠭᠠᠵᠤ ᠪᠠᠢᠭᠠ ᠶ᠋ᠢ ᠨᠢ ᠬᠡᠯᠡᠵᠦ ᠥᠭᠪᠡ᠃ ᠮᠣᠩᠭᠣᠯᠴᠤᠳ ᠤ᠋ᠨ ᠡᠨᠡ ᠬᠦ᠌ ᠰᠸᠸᠳ᠋ᠸᠨ ᠦ᠌ ᠬᠠᠭᠤᠴᠢᠨ ᠨᠠᠢᠵᠠ ᠠ᠋ᠴᠠ ᠪᠠᠨ ᠦᠷᠭᠦᠯᠵᠢ ᠠᠷᠭᠠ ᠲᠤᠰᠠ ᠡᠷᠢᠳᠡᠭ ᠢ᠋ ᠶᠠᠪᠤᠴᠤᠳ ᠮᠡᠳᠡᠳᠡᠭ ᠪᠥᠭᠡᠳ ᠶᠠᠫᠣᠨ ᠤ᠋ ᠮᠠᠨᠵᠤ ᠳ᠋ᠤ᠌ ᠪᠣᠯᠪᠠᠰᠤᠷᠠᠭᠤᠯᠵᠤ ᠪᠠᠢᠭᠠ ᠲᠥᠯᠥᠪᠯᠡᠭᠡ ᠵᠣᠷᠢᠯᠬᠠ ᠶ᠋ᠢ ᠨᠢ ᠲᠡᠭᠦᠨ ᠳ᠋ᠦ᠍ ᠵᠠᠳᠠᠷᠠᠭᠤᠯᠤᠨᠠ ᠭᠡᠳᠡᠭ ᠢ᠋ ᠶᠠᠫᠣᠨᠴᠤᠳ ᠲᠣᠳᠣᠷᠬᠠᠢ ᠣᠢᠯᠠᠭᠠᠳᠠᠭ ᠠᠵᠢ᠃
ᠡᠨᠡ ᠬᠣᠭᠣᠷᠣᠨᠳᠣ ᠪᠢ ᠴᠦ᠍ ᠠᠯᠭᠤᠷᠬᠠᠨ ᠢ᠋ᠶ᠋ᠠᠷ ᠶᠠᠪᠤᠬᠤ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠬᠢᠵᠦ ᠡᠬᠢᠯᠡᠯᠡ᠃ ᠭᠡᠬᠦ ᠳ᠋ᠦ᠍ ᠣᠳᠣ ᠪᠣᠯᠲᠠᠯᠠ ᠴᠣᠬᠣᠮ ᠠᠯᠢ ᠵᠠᠮ ᠢ᠋ᠶ᠋ᠠᠷ ᠪᠤᠴᠠᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠰᠠᠭᠠᠷ᠃ ᠵᠠᠪᠰᠠᠷ ᠲᠤ᠌ ᠪᠠᠢᠭᠠ ᠶᠠᠫᠣᠨ ᠤ᠋ ᠪᠠᠢᠭᠤᠯᠤᠮᠵᠢ ᠨᠢ ᠮᠢᠨᠦ ᠠᠴᠢᠶᠠ ᠶ᠋ᠢ ᠰᠢᠯᠭᠠᠨ ᠪᠠᠢᠴᠠᠭᠠᠵᠤ᠂ ᠮᠢᠨᠦ ᠪᠦᠬᠦ ᠹᠢᠯᠢᠮ ᠢ᠋ ᠬᠣᠷᠢᠶᠠᠨ ᠠᠪᠬᠤ ᠪᠣᠯᠬᠣᠷ ᠲᠡᠭᠦᠨ ᠢ᠋ᠶ᠋ᠡᠷ ᠶᠠᠭᠠᠬᠢᠭᠰᠠᠨ ᠴᠤ᠌ ᠳᠠᠭᠠᠷᠢᠨ ᠭᠠᠷᠴᠤ ᠪᠣᠯᠬᠤ ᠦᠭᠡᠢ ᠶᠦᠮ᠃ ᠶᠠᠭ ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠬᠥᠳᠡᠭᠡ ᠲᠠᠯᠠ ᠪᠠᠷ ᠶᠠᠪᠤᠬᠤ ᠵᠠᠮ ᠱᠤᠭᠤᠮ ᠵᠥᠩᠳᠡᠭᠡᠨ ᠣᠯᠠᠨ ᠪᠠᠢᠭᠠ ᠯᠠ ᠳᠠ᠃ ᠨᠢᠭᠡᠨ ᠰᠥᠨᠢ ᠭᠡᠨᠡᠳᠲᠡ ᠮᠠᠰᠢᠨ ᠤ᠋ ᠬᠦᠩᠭᠢᠨᠡᠬᠦ ᠳᠠᠭᠤᠨ ᠳ᠋ᠤ᠌ ᠰᠣᠴᠢᠨ ᠰᠡᠷᠡᠵᠦ ᠪᠣᠰᠤᠭᠠᠳ ᠬᠠᠷᠠᠬᠤ ᠳ᠋ᠤ᠌ ᠲᠠᠯᠠ ᠳᠡᠭᠡᠷᠡ ᠮᠠᠰᠢᠨ ᠤ᠋ ᠭᠡᠷᠡᠯ ᠭᠢᠯᠠᠯᠵᠠᠨ ᠣᠢᠷᠠᠳᠴᠤ ᠶᠠᠪᠤᠨᠠ᠃ ᠣᠯᠠᠨ ᠤᠳᠠᠭᠠ ᠯᠠᠷᠰᠤᠨ ᠬᠦᠩ ᠲᠡᠢ ᠭᠡᠨᠡᠳᠲᠡ ᠶ᠋ᠢᠨ ᠳᠠᠭᠠᠷᠢᠯᠲᠠ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠭᠰᠠᠨ ᠲᠤᠯᠠ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠡᠮᠳᠡᠭᠯᠡᠯ ᠳᠡᠪᠲᠡᠷ ᠪᠣᠯᠤᠨ ᠹᠢᠯᠢᠮ ᠢ᠋ᠶ᠋ᠡᠨ ᠬᠥᠮᠦᠨ ᠦ᠌ ᠨᠢᠳᠦ ᠲᠤᠰᠬᠤ ᠦᠭᠡᠢ ᠠᠶᠤᠯ ᠦᠭᠡᠢ ᠭᠠᠵᠠᠷ ᠲᠤ᠌ ᠰᠢᠯᠵᠢᠭᠦᠯᠬᠦ ᠶᠠᠪᠤᠳᠠᠯ ᠮᠢᠨᠦ ᠲᠠᠷᠢᠬᠢᠨ ᠳ᠋ᠤ᠌ ᠭᠢᠯᠠᠰᠬᠢᠨ ᠪᠠᠭᠤᠪᠠ᠃ ᠬᠤᠷᠳᠤᠬᠠᠨ ᠭᠡᠭᠴᠢ ᠥᠪᠡᠷ ᠦ᠋ᠨ ᠦᠨᠡᠲᠡᠢ ᠭᠡᠷᠡᠯ ᠵᠢᠷᠤᠭ ᠤ᠋ᠨ ᠮᠠᠰᠢᠨ ᠠᠭᠤᠯᠤᠭᠰᠠᠨ ᠠᠶᠠᠨ ᠤ᠋ ᠠᠪᠳᠠᠷᠠ ᠪᠣᠯᠤᠨ ᠪᠤᠰᠤᠳ ᠴᠢᠬᠤᠯᠠ ᠭᠡᠵᠦ ᠰᠠᠨᠠᠭᠳᠠᠭᠰᠠᠨ ᠵᠦᠢᠯᠡᠰ ᠢ᠋ᠶ᠋ᠡᠨ ᠠᠪᠴᠤ ᠭᠠᠷᠤᠭᠠᠳ ᠡᠭᠴᠡ ᠱᠠᠲᠤ ᠪᠠᠷ ᠥᠭᠰᠥᠨ ᠪᠠᠢᠰᠢᠩ ᠤ᠋ᠨ ᠲᠡᠭᠰᠢᠬᠡᠨ ᠣᠷᠣᠢ ᠳ᠋ᠤ᠌ ᠭᠠᠷᠤᠯᠠ᠃ ᠡᠢᠮᠦ ᠭᠠᠵᠠᠷ ᠨᠢᠭᠤᠨᠠ ᠭᠡᠳᠡᠭ ᠢ᠋ ᠳᠡᠭᠡᠷᠡᠮᠴᠢᠳ ᠪᠣᠳᠣᠵᠤ ᠴᠤ᠌ ᠣᠯᠬᠤ ᠦᠭᠡᠢ ᠪᠠᠢᠭᠠᠰᠠᠢ ᠭᠡᠮᠡᠨ ᠬᠦᠰᠡᠨ ᠳᠠᠭᠠᠳᠬᠠᠵᠤ᠂ ᠪᠠᠢᠰᠢᠩ ᠤ᠋ᠨ ᠡᠮᠦᠨᠡᠬᠢ ᠲᠠᠢᠰᠠᠨ ᠳᠡᠭᠡᠷᠡ ᠵᠣᠭᠰᠣᠵᠤ ᠤᠯᠠᠮ ᠠ᠋ᠴᠠ ᠤᠯᠠᠮ ᠣᠢᠷᠠ ᠪᠣᠯᠵᠤ ᠪᠠᠢᠭᠠ ᠮᠠᠰᠢᠨ ᠢ᠋ ᠪᠠᠴᠢᠮᠳᠠᠨ ᠬᠦᠯᠢᠶᠡᠪᠡ᠃ ᠮᠠᠰᠢᠨ ᠡᠭᠦᠳᠡᠨ ᠡᠮᠦᠨᠡ ᠢᠷᠡᠵᠦ ᠵᠣᠭᠰᠣᠪᠠ᠃ ᠳᠡᠭᠡᠷᠡᠮᠴᠢᠳ ᠦ᠋ᠨ ᠪᠦᠳᠦᠭᠦᠯᠢᠭ ᠳᠠᠭᠤᠨ ᠤ᠋ ᠣᠷᠣᠨ ᠳ᠋ᠤ᠌ ᠠᠮᠤᠷ ᠮᠡᠨᠳᠦ ᠮᠡᠳᠡᠯᠴᠡᠭᠰᠡᠨ ᠳᠠᠭᠤᠨ ᠮᠢᠨᠦ ᠴᠢᠬᠢᠨ ᠳ᠋ᠦ᠍ ᠰᠣᠨᠣᠰᠳᠠᠪᠠ᠃ ᠯᠠᠷᠰᠤᠨ ᠬᠦᠩ ᠦ᠋ᠨ ᠠᠴᠢᠶᠠᠨ ᠤ᠋ ᠮᠠᠰᠢᠨ ᠬᠠᠷᠢᠵᠤ ᠢᠷᠡᠭᠰᠡᠨ ᠪᠥᠭᠡᠳ ᠬᠣᠶᠠᠷ ᠤᠭᠤᠲᠠ ᠲᠥᠪ ᠳᠦᠭᠦᠷᠡᠩ ᠰᠢᠤᠳᠠᠨ ᠤ᠋ ᠵᠦᠢᠯ ᠠᠪᠴᠢᠷᠠᠵᠠᠢ᠃ ᠯᠠᠷᠰᠤᠨ ᠬᠦᠩ᠂ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠶ᠋ᠢᠨ ᠲᠤᠬᠠᠢ ᠵᠢᠴᠢ ᠵᠠᠮ ᠵᠠᠭᠤᠷᠠ ᠶ᠋ᠢᠨ ᠪᠠᠢᠳᠠᠯ ᠢ᠋ ᠠᠰᠠᠭᠤᠵᠤ ᠪᠠᠢᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠪᠢ ᠯᠡ ᠶ᠋ᠢᠨ ᠭᠡᠷᠡᠯ ᠳᠣᠣᠷᠠ ᠠᠪᠴᠢᠷᠠᠭᠰᠠᠨ ᠰᠢᠤᠳᠠᠨ ᠢ᠋ ᠢᠯᠭᠠᠨ ᠰᠠᠯᠭᠠᠪᠠ᠃
— ᠵᠥᠪᠬᠡᠨ ᠰᠣᠨᠢᠨ ᠯᠠ ᠶᠤᠮ ᠤᠤ? ᠵᠠᠬᠢᠳᠠᠯ ᠨᠢ ᠲᠡᠭᠡᠭᠡᠳ ᠬᠠᠮᠢᠭᠠ ᠪᠠᠢᠨᠠ ᠪᠣᠢ? ᠭᠡᠵᠦ ᠪᠢ ᠭᠣᠮᠣᠳᠠᠯᠲᠠᠢ ᠠᠰᠠᠭᠤᠬᠤ ᠳ᠋ᠤ᠌ ᠯᠠᠷᠰᠤᠨ:
— ᠰᠸᠷᠤ᠋ᠳᠣ ᠮᠠᠷᠭᠠᠰᠢ ᠥᠷᠯᠥᠭᠡ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠦᠷᠭᠡᠵᠦ ᠢᠷᠡᠨᠡ᠃ ᠲᠡᠷᠡ ᠬᠠᠳᠠᠨ ᠰᠦᠮᠡ ᠳ᠋ᠦ᠍ ᠪᠠᠭᠤᠵᠤ᠂ ᠤᠳᠠᠭᠠᠨ ᠬᠣᠨᠣᠭ ᠬᠦᠷᠦᠭᠡ ᠦᠭᠡᠢ ᠭᠡᠷ ᠲᠡᠭᠡᠨ ᠬᠠᠷᠢᠭᠰᠠᠨ ᠪᠠᠢᠨᠠ ᠭᠡᠯᠡ᠃
ᠪᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠣᠨᠢᠨ ᠢ᠋ᠶ᠋ᠠᠨ ᠰᠤᠭᠤᠨ ᠳᠣᠣᠷᠠ ᠪᠠᠨ ᠬᠠᠪᠴᠢᠭᠤᠯᠤᠭᠠᠳ ᠬᠤᠷᠳᠤᠬᠠᠨ ᠭᠡᠭᠴᠢ ᠥᠷᠥᠭᠡᠨ ᠳ᠋ᠡᠭᠡᠨ ᠣᠷᠣᠵᠤ᠂ ᠭᠠᠳᠠᠨᠠ ᠶᠢᠷᠲᠢᠨᠴᠦ ᠳ᠋ᠦ᠍ ᠭᠠᠷᠤᠭᠰᠠᠨ ᠰᠢᠨᠡ ᠬᠡᠷᠡᠭ ᠤᠴᠢᠷ ᠤ᠋ᠳ ᠢ᠋ ᠮᠡᠳᠡᠨᠡ ᠭᠡᠮᠡᠨ ᠨᠢᠭᠡ ᠨᠢᠭᠡ ᠴᠠᠭᠠᠰᠤ ᠪᠠᠷ ᠡᠷᠭᠢᠭᠦᠯᠵᠦ ᠰᠠᠭᠤᠯᠠ᠃ ᠭᠡᠨᠡᠳᠲᠡ ᠬᠠᠷᠠᠭᠠᠨ ᠳ᠋ᠤ᠌ ᠮᠢᠨᠢ 《ᠪᠣᠰᠬᠠᠷᠳ᠋ ᠤ᠋ᠨ ᠮᠣᠩᠭᠣᠯ ᠳ᠋ᠤ᠌ ᠠᠯᠠᠭᠠ ᠪᠣᠯᠤᠭᠰᠠᠨ ᠨᠢ ᠬᠥᠮᠦᠰ ᠢ᠋ ᠪᠠᠴᠢᠮᠳᠠᠭᠤᠯᠵᠤ ᠪᠣᠢ 》ᠬᠡᠮᠡᠬᠦ ᠲᠣᠮᠣ ᠭᠠᠷᠴᠠᠭ ᠬᠠᠷᠠᠭᠳᠠᠪᠠ᠃ ᠪᠡᠭᠡᠵᠢᠩ ᠳ᠋ᠦ᠍ ᠪᠠᠢᠭᠠ ᠨᠡᠢᠵᠡᠳ ᠮᠠᠨᠢ ᠨᠠᠮᠠᠶ᠋ᠢ ᠳᠡᠭᠡᠷᠡᠮᠴᠢᠳ ᠦ᠋ᠨ ᠭᠠᠷ ᠲᠤ᠌ ᠪᠠᠷᠢᠭᠳᠠᠯᠠ ᠭᠡᠳᠡᠭ ᠳᠠᠮ ᠤ᠋ᠨ ᠴᠢᠮᠡᠭᠡᠨ ᠳ᠋ᠦ᠍ ᠢᠲᠡᠭᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠲᠡᠳᠡ ᠶᠡᠬᠡ ᠤᠳᠠᠭᠠᠨ ᠮᠢᠨᠦ ᠲᠤᠬᠠᠢ ᠰᠤᠷᠠᠭ ᠴᠢᠮᠡᠭᠡ ᠶ᠋ᠢ ᠣᠯᠵᠤ ᠰᠣᠨᠣᠰᠤᠭᠠ ᠦᠭᠡᠢ ᠪᠥᠭᠡᠳ ᠮᠢᠨᠦ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠵᠠᠬᠢᠶᠠᠨ ᠠ᠋ᠴᠠ ᠨᠠᠢ᠍ᠮᠠ ᠶ᠋ᠢᠨ ᠠᠭᠤᠯᠠ ᠠ᠋ᠴᠠ ᠨᠢᠭᠡᠨᠲᠡ ᠰᠠᠯᠤᠨ ᠣᠳᠤᠭᠰᠠᠨ ᠢ᠋ ᠪᠠᠷᠤᠭᠯᠠᠵᠠᠭᠠᠵᠤ ᠪᠠᠢᠪᠠ᠃ ᠡᠨᠡ ᠬᠦ᠌ ᠰᠣᠨᠢᠨ ᠮᠡᠳᠡᠭᠡ ᠨᠢ ᠠᠳᠠ ᠠ᠋ᠴᠠ ᠵᠠᠭᠤ ᠲᠠᠪᠢᠨ ᠺᠢᠯᠣᠮᠧᠲ᠋ᠷ ᠲᠦ᠍ ᠣᠷᠣᠰᠢᠬᠤ ᠬᠦᠢᠬᠤᠸᠠ ᠠ᠋ᠴᠠ ᠭᠠᠷᠤᠭᠰᠠᠨ ᠪᠠᠢᠪᠠ᠃ ᠪᠢ ᠡᠨᠡ ᠬᠦ᠌ ᠬᠥᠮᠦᠨ ᠢ᠋ ᠰᠣᠴᠢᠭᠠᠮᠠ ᠴᠢᠮᠡᠭᠡ ᠶ᠋ᠢ ᠳᠣᠣᠷᠠ ᠪᠠᠨ ᠯᠠᠷᠰᠤᠨ ᠳ᠋ᠤ᠌ ᠶᠠᠷᠢᠵᠤ ᠥᠭᠬᠦ ᠪᠡᠷ ᠰᠢᠭᠤᠳᠴᠤ ᠲᠡᠭᠦᠨ ᠦ᠌ ᠤᠨᠲᠠᠯᠭᠠ ᠶ᠋ᠢᠨ ᠥᠷᠥᠭᠡᠨᠡ ᠬᠦᠷᠬᠦ ᠳ᠋ᠦ᠍ ᠭᠡᠷᠡᠯ ᠢ᠋ᠶ᠋ᠡᠨ ᠨᠢᠭᠡᠨᠲᠡ ᠤᠨᠲᠠᠷᠠᠭᠠᠭᠰᠠᠨ ᠪᠠᠢᠯᠠ᠃ ᠢᠩᠭᠢᠭᠡᠳ ᠯᠡ ᠳᠠᠷᠤᠮᠠᠯᠯᠠᠭᠰᠠᠨ ᠬᠡᠰᠡᠭ ᠴᠠᠭᠠᠰᠤ ᠠ᠋ᠴᠠ ᠪᠣᠯᠵᠤ ᠲᠡᠭᠦᠨ ᠦ᠌ ᠰᠥᠨᠢ ᠶ᠋ᠢᠨ ᠨᠣᠢᠷ ᠢ᠋ ᠨᠢ ᠦᠢᠮᠡᠭᠦᠯᠦᠭᠰᠡᠨ ᠬᠡᠷᠡᠭ ᠪᠣᠯᠵᠤ ᠪᠢᠯᠡ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠰᠸᠷᠤ᠋ᠳᠦ ᠪᠦᠬᠦ ᠵᠠᠬᠢᠶᠠ ᠪᠠᠨ ᠠᠪᠤᠭᠠᠳ ᠬᠦᠷᠴᠦ ᠢᠷᠡᠪᠡ᠃ ᠡᠭᠦᠨ ᠳ᠋ᠦ᠍ ᠠᠵᠢᠯ ᠤ᠋ᠨ ᠬᠠᠨᠢᠳᠠᠨ ᠤ᠋ ᠮᠢᠨᠢ ᠪᠡᠭᠡᠵᠢᠩ ᠡᠴᠡ ᠢᠷᠡᠭᠦᠯᠦᠭᠰᠡᠨ ᠨᠢᠭᠡ ᠵᠠᠬᠢᠶᠠ ᠪᠠᠢᠵᠤ᠂ ᠳᠣᠲᠣᠷᠠ ᠨᠢ ᠮᠢᠨᠦ ᠬᠠᠮᠢᠭᠠ ᠪᠠᠢᠬᠤ ᠶ᠋ᠢ ᠰᠤᠷᠠᠭᠯᠠᠬᠤ ᠪᠠᠷ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠬᠦᠷᠴᠦ ᠥᠩᠭᠡᠷᠡᠭᠰᠡᠨ ᠵᠡᠷᠭᠡ ᠪᠡᠨ ᠪᠢᠴᠢᠭᠰᠡᠨ ᠪᠠᠢᠯᠠ᠃ ᠠᠮᠧᠷᠢᠺᠠ ᠶ᠋ᠢᠨ ᠨᠢᠭᠡ ᠹᠢᠯᠢᠮ ᠰᠡᠭᠦᠳᠡᠷᠯᠡᠭᠴᠢ ᠬᠦᠢᠬᠤᠸᠠ ᠳ᠋ᠤ᠌ ᠬᠦᠷᠴᠦ ᠢᠷᠡᠵᠦ ᠪᠠᠢᠭᠰᠠᠨ ᠪᠠ ᠲᠡᠨᠳᠡᠬᠢ ᠶ᠋ᠢᠨ ᠨᠢᠭᠡ ᠮᠠᠯᠴᠢᠨ ᠠ᠋ᠴᠠ ᠨᠠᠮᠠᠶ᠋ᠢ ᠨᠠᠢ᠍ᠮᠠ ᠶ᠋ᠢᠨ ᠠᠭᠤᠯᠠᠨ ᠠ᠋ᠴᠠ ᠳᠤᠲᠠᠭᠠᠭᠰᠠᠨ ᠰᠢᠭ᠋ ᠭᠡᠨᠡᠳᠲᠡ ᠵᠠᠢᠯᠠᠨ ᠣᠳᠤᠭᠰᠠᠨ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠪᠠᠢᠪᠠ᠃ ᠡᠨᠡ ᠬᠦ᠌ ᠴᠢᠮᠡᠭᠡ ᠨᠢ ᠶᠠᠪᠤᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠮᠠᠭᠤ ᠴᠢᠮᠡᠭᠡ ᠪᠣᠯᠤᠨ ᠬᠤᠪᠢᠷᠠᠭᠰᠠᠭᠠᠷ ᠪᠡᠭᠡᠵᠢᠩ ᠬᠦᠷᠬᠦ ᠳ᠋ᠦ᠍ ᠨᠢᠭᠡᠨᠲᠡ ᠨᠢᠳᠦ ᠲᠡᠢ ᠬᠠᠮᠠᠷ ᠲᠠᠢ ᠶᠠᠷᠢᠭᠳᠠᠬᠤ ᠳᠡᠭᠡᠷᠡᠮᠴᠢᠳ ᠲᠦ᠍ ᠪᠠᠷᠢᠭᠳᠠᠭᠰᠠᠨ ᠦᠯᠢᠭᠡᠷ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠠᠵᠢ᠃ ᠶᠠᠫᠣᠨᠴᠤᠳ ᠡᠨᠡ ᠬᠦ᠌ ᠮᠡᠳᠡᠭᠡᠨ ᠡᠴᠡ ᠨᠠᠳᠠ ᠳ᠋ᠤ᠌ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠯᠠᠪᠲᠠᠢ ᠬᠠᠨᠳᠤᠭᠤᠯᠬᠤ ᠲᠤᠯᠠ ᠡᠨᠡ ᠬᠦ᠌ ᠬᠥᠮᠦᠨ ᠢ᠋ ᠳᠣᠩᠰᠣᠯᠭᠠᠮᠠ ᠮᠡᠳᠡᠭᠡ ᠨᠢ ᠰᠡᠳᠬᠢᠯ ᠢ ᠮᠢᠨᠢ ᠲᠣᠭᠲᠠᠭᠤᠨ ᠪᠤᠰᠤ ᠪᠣᠯᠭᠠᠪᠠ᠃ ᠮᠥᠨ ᠡᠳᠦᠷ ᠦ᠋ᠨ ᠦᠳᠡ ᠶ᠋ᠢᠨ ᠬᠣᠢᠨᠠ ᠨᠢ ᠮᠢᠨᠦ ᠪᠣᠳᠣᠯ ᠤ᠋ᠨ ᠵᠥᠪ ᠪᠣᠯᠬᠤ ᠶ᠋ᠢ ᠪᠠᠲᠤᠯᠠᠪᠠ᠃ ᠵᠠᠪᠰᠠᠷ ᠠ᠋ᠴᠠ ᠳᠠᠪᠬᠢᠭᠤᠯᠤᠨ ᠢᠷᠡᠭᠰᠡᠨ ᠨᠢᠭᠡ ᠮᠣᠩᠭᠣᠯ ᠶᠠᠫᠣᠨ ᠤ᠋ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠣᠨᠴᠠᠭᠠᠢᠯᠠᠨ ᠴᠠᠬᠢᠯᠭᠠᠨ ᠢᠷᠡᠭᠦᠯᠵᠦ ᠨᠠᠮᠠᠶ᠋ᠢ ᠠᠰᠠᠭᠤᠭᠰᠠᠨ ᠲᠤᠬᠠᠢ ᠴᠢᠮᠡᠭᠡ ᠶ᠋ᠢ ᠯᠠᠷᠰᠤᠨ ᠬᠦᠩ ᠳ᠋ᠦ᠍ ᠬᠡᠯᠡᠵᠦ ᠦᠭᠭᠦᠭᠰᠡᠨ ᠪᠢᠯᠡ᠃ ᠮᠢᠨᠦ ᠨᠡᠷᠡ ᠶ᠋ᠢ ᠶᠠᠫᠣᠨ ᠬᠡᠯᠡᠨ ᠳ᠋ᠦ᠍ ᠣᠷᠴᠢᠭᠤᠯᠬᠤ ᠳ᠋ᠠᠭᠠᠨ ᠶᠡᠬᠡ ᠥᠭᠡᠷᠡ ᠪᠣᠯᠭᠠᠭᠰᠠᠨ ᠪᠥᠭᠡᠳ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠨᠠᠷ ᠤ᠋ᠨ ᠨᠡᠷᠡᠰ ᠦ᠋ᠨ ᠵᠢᠭᠰᠠᠭᠠᠯ ᠳᠣᠲᠣᠷᠠ ᠠ᠋ᠴᠠ ᠴᠤ᠌ ᠲᠡᠳᠡ ᠨᠠᠮᠠᠶ᠋ᠢ ᠡᠷᠢᠵᠦ ᠣᠯᠬᠤ ᠦᠭᠡᠢ ᠠᠵᠢ᠃
ᠮᠢᠨᠦ ᠡᠨᠳᠡᠬᠢ ᠨᠢᠭᠤᠴᠠ ᠠᠮᠢᠳᠤᠷᠠᠯ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠵᠦ ᠳᠡᠢᠯᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠪᠢ ᠤᠬᠠᠭᠠᠷᠠᠵᠤ᠂ ᠪᠣᠯᠬᠤ ᠶ᠋ᠢᠨ ᠳᠣᠲᠣᠷᠠ ᠬᠤᠷᠳᠤᠨ ᠭᠡᠭᠴᠢ ᠪᠤᠴᠠᠬᠤ ᠵᠠᠮ ᠢ᠋ᠶ᠋ᠠᠨ ᠡᠯᠭᠦᠬᠦ ᠪᠡᠷ ᠰᠢᠭᠤᠳᠪᠠ᠃ ᠯᠠᠷᠰᠤᠨ ᠤ᠋ ᠠᠴᠢᠶᠠᠨ ᠤ᠋ ᠮᠠᠰᠢᠨ ᠮᠥᠨ ᠡᠳᠦᠷ ᠲᠡᠭᠡᠨ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠪᠤᠴᠠᠬᠤ ᠲᠤᠯᠠ ᠵᠠᠷᠤᠴᠠ ᠳ᠋ᠠᠭᠠᠨ ᠠᠶᠠᠨ ᠤ᠋ ᠣᠷᠣ ᠪᠣᠯᠤᠨ ᠳᠡᠮᠡᠢ ᠴᠢᠬᠤᠯᠠ ᠪᠢᠰᠢ ᠵᠦᠢᠯᠡᠰ ᠢ᠋ᠶ᠋ᠡᠨ ᠥᠭᠴᠦ ᠶᠠᠪᠤᠭᠤᠯᠪᠠ᠃ ᠪᠢ ᠥᠪᠡᠷ ᠦ᠋ᠨ ᠪᠦᠬᠦ ᠦᠨᠡ ᠪᠡᠨᠡ ᠲᠡᠢ ᠠᠴᠢᠶᠠ ᠪᠠᠨ ᠠᠪᠴᠤ ᠮᠤᠷᠤᠢ ᠵᠠᠮ ᠢ᠋ᠶ᠋ᠠᠷ ᠪᠤᠴᠠᠬᠤ ᠭᠡᠮᠡᠨ ᠪᠣᠳᠣᠯᠬᠢᠯᠠᠵᠤ ᠪᠠᠢᠪᠠ᠃ ᠪᠤᠴᠠᠯᠭᠠᠨ ᠳ᠋ᠠᠭᠠᠨ ᠨᠠᠳᠠ ᠳ᠋ᠤ᠌ ᠨᠢᠭᠡ ᠮᠠᠰᠢᠨ ᠬᠡᠷᠡᠭ ᠲᠡᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠯᠠᠷᠰᠤᠨ ᠬᠦᠩ ᠦ᠋ᠨ ᠮᠠᠰᠢᠨ ᠨᠤᠭᠤᠳ ᠴᠥᠮ ᠠᠶᠠᠨ ᠤ᠋ ᠵᠠᠮ ᠳ᠋ᠠᠭᠠᠨ ᠪᠠᠢᠵᠤ ᠪᠠᠢᠪᠠ᠃ ᠡᠸᠷᠢᠺᠰᠣᠨ ᠬᠠᠷᠢᠨ ᠭᠡᠨᠡᠳᠲᠡ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠤᠷᠤᠭᠤ ᠰᠢᠭᠤᠳ ᠪᠤᠴᠠᠬᠤ ᠳᠤᠷᠠ ᠰᠣᠨᠢᠷᠬᠠᠯ ᠠᠨᠠᠢ ᠪᠣᠯᠤᠭᠰᠠᠨ ᠨᠢ ᠶᠠᠫᠣᠨᠴᠤᠳ ᠲᠠᠢ ᠰᠢᠨᠡ ᠵᠥᠷᠢᠴᠡᠯ ᠮᠥᠷᠭᠥᠯᠳᠦᠭᠡᠨ ᠡᠭᠦᠰᠬᠦ ᠡᠴᠡ ᠬᠢᠴᠢᠶᠡᠵᠦ ᠪᠠᠢᠭᠠ ᠠᠵᠢ᠃ ᠲᠡᠷᠡ ᠤᠷᠢᠳ ᠢ᠋ᠶ᠋ᠠᠷ ᠨᠠᠮᠠᠶ᠋ᠢ ᠳᠣᠯᠣᠭᠠᠨ ᠡᠳᠦᠷ ᠦ᠋ᠨ ᠪᠠᠶᠠᠷ ᠬᠡᠮᠡᠬᠦ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠬᠤ ᠥᠷᠲᠡᠭᠡᠨ ᠳ᠋ᠦ᠍ ᠰᠢᠯᠵᠢᠭᠦᠯᠬᠦ ᠶ᠋ᠢ ᠵᠣᠷᠢᠪᠠ᠃ ᠪᠢ ᠬᠡᠳᠦᠢᠪᠡᠷ ᠥᠨᠳᠥᠷ ᠦᠨᠡ ᠲᠡᠢ ᠵᠠᠮ ᠤ᠋ᠨ ᠵᠠᠷᠤᠳᠠᠯ ᠢ᠋ ᠳᠠᠭᠠᠭᠠᠨᠠ ᠭᠡᠮᠡᠨ ᠠᠮᠠᠯᠠᠭᠰᠠᠨ ᠪᠣᠯᠪᠠᠴᠤ ᠲᠡᠨᠳᠡᠬᠢ ᠶ᠋ᠢᠨ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠨᠢ ᠭᠦᠨ ᠪᠣᠳᠣᠯ ᠲᠠᠢ ᠪᠠᠷ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠯᠠᠪᠠ᠃ 《ᠲᠡᠢᠨ ᠦ᠌ ᠦᠶᠡ ᠶ᠋ᠢᠨ ᠪᠠᠴᠢᠮ ᠬᠤᠷᠠᠯ 》ᠬᠤᠷᠠᠯᠳᠤᠭᠤᠯᠬᠤ ᠪᠠᠷ ᠳᠠᠮᠵᠢᠨ ᠪᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠦᠢᠬᠤᠸᠠ ᠪᠠᠷ ᠲᠣᠭᠣᠷᠢᠨ ᠶᠠᠪᠤᠬᠤ ᠰᠢᠢᠳ ᠢ᠋ ᠯᠠᠷᠰᠤᠨ ᠪᠣᠯᠤᠨ ᠡᠸᠷᠢᠺᠰᠣᠨ ᠤ᠋ ᠬᠠᠮᠲᠤ ᠪᠠᠷ ᠲᠣᠭᠲᠠᠭᠠᠯᠠ᠃ ᠮᠥᠨ ᠲᠡᠭᠡᠭᠡᠳ ᠪᠢ ᠠᠮᠤᠷ ᠲᠦᠪᠰᠢᠨ ᠪᠣᠯᠬᠤ ᠪᠣᠯᠲᠠᠯᠠ ᠪᠠᠨ ᠥᠭᠡᠷᠡ ᠬᠡᠨ ᠳ᠋ᠦ᠍ ᠴᠦ᠍ ᠡᠨᠡ ᠲᠤᠬᠠᠢ ᠦᠭᠡ ᠪᠤᠯᠲᠠᠢᠯᠭᠠᠬᠤ ᠦᠭᠡᠢ ᠪᠡᠷ ᠠᠨᠳᠠᠭᠠᠢᠯᠠᠪᠠ᠃
ᠢᠩᠭᠢᠭᠡᠳ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠬᠢᠵᠦ ᠳᠠᠭᠤᠰᠤᠭᠠᠳ᠂ ᠶᠢᠰᠦᠳᠦᠭᠡᠷ ᠰᠠᠷᠠ ᠶ᠋ᠢᠨ ᠬᠣᠶᠠᠷ ᠲᠤ᠌ ᠯᠠᠷᠰᠤᠨ ᠬᠦᠩ ᠦ᠋ᠨ ᠵᠣᠴᠢᠨ ᠤ᠋ ᠥᠷᠥᠭᠡ ᠡᠴᠡ ᠰᠠᠯᠤᠯᠠ᠃ ᠪᠣᠷᠣᠭᠠᠨ ᠲᠠᠢ ᠨᠡᠲᠦᠭᠡᠷ ᠡᠳᠦᠷ ᠪᠠᠢᠵᠤ᠂ ᠵᠤᠵᠠᠭᠠᠨ ᠬᠠᠷᠠ ᠡᠭᠦᠯᠡ ᠲᠠᠯᠠ ᠨᠤᠲᠤᠭ ᠢ᠋ ᠪᠦᠷᠬᠦᠨ ᠬᠤᠴᠢᠵᠠᠢ᠃ ᠦᠳᠡᠰᠢ ᠶ᠋ᠢᠨ ᠬᠦᠢᠲᠡᠨ ᠰᠠᠯᠬᠢ ᠥᠭᠡᠳᠡ ᠡᠴᠡ ᠮᠠᠨᠢ ᠦᠯᠢᠶᠡᠬᠦ ᠳ᠋ᠦ᠍ ᠨᠡᠬᠡᠢ ᠳᠡᠪᠡᠯ ᠢ᠋ᠶ᠋ᠡᠨ ᠵᠠᠷᠤᠴᠠ ᠳ᠋ᠠᠭᠠᠨ ᠥᠭᠴᠦ ᠶᠠᠪᠤᠭᠤᠯᠬᠤ ᠪᠠᠨ ᠮᠠᠷᠲᠠᠭᠰᠠᠨ ᠳ᠋ᠠᠭᠠᠨ ᠪᠢ ᠣᠯᠵᠠᠭᠤᠷᠬᠠᠵᠤ ᠪᠠᠢᠯᠠ᠃
ᠠᠬᠢᠨ ᠨᠢᠭᠡ ᠤᠳᠠᠭᠠ ᠳᠠᠸᠠ ᠬᠦᠩ ᠦ᠋ᠨ ᠳ᠋ᠦ᠍ ᠬᠣᠨᠣᠭᠯᠠᠬᠤ ᠳ᠋ᠤ᠌ ᠲᠡᠷᠡ ᠴᠦ᠍ ᠣᠯᠠᠨ ᠠᠷᠪᠢᠨ ᠰᠣᠨᠢᠨ ᠰᠠᠢᠬᠠᠨ ᠲᠠᠨᠢᠯᠴᠠᠭᠤᠯᠬᠤ ᠪᠠᠷ ᠪᠡᠯᠡᠬᠡᠨ ᠪᠠᠢᠯᠠ᠃
— ᠳᠥᠷᠪᠡᠳ ᠦ᠋ᠨ ᠸᠠᠩ ᠢ᠋ ᠶᠠᠫᠣᠨᠴᠤᠳ ᠠᠯᠢ ᠡᠷᠲᠡᠨ ᠡᠴᠡ ᠪᠡᠨ ᠬᠣᠷᠣᠰᠴᠤ ᠪᠠᠢᠭᠰᠠᠨ ᠪᠥᠭᠡᠳ ᠨᠢᠭᠡᠨ ᠡᠳᠦᠷ ᠲᠡᠭᠦᠨ ᠢ᠋ ᠪᠠᠷᠢᠪᠴᠢᠯᠠᠬᠤ ᠪᠠᠷ ᠸᠠᠩ ᠤ᠋ᠨ ᠣᠷᠳᠣᠨ ᠤ᠋ ᠡᠮᠦᠨᠡ ᠨᠢ ᠭᠦᠢᠴᠡᠳ ᠴᠡᠷᠢᠭ ᠲᠡᠢ ᠬᠣᠶᠠᠷ ᠮᠠᠰᠢᠨ ᠢᠷᠡᠨ ᠵᠣᠭᠰᠣᠪᠠ᠃ ᠳᠥᠷᠪᠡᠳ ᠸᠠᠩ ᠬᠡᠳᠦᠢᠪᠡᠷ ᠵᠢᠭᠤᠲᠠᠬᠤ ᠪᠠᠷ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠶᠠᠭ ᠲᠡᠷᠡ ᠮᠥᠴᠡ ᠳ᠋ᠦ᠍ ᠵᠢᠯᠣᠭᠣᠴᠢ ᠨᠢ ᠮᠠᠰᠢᠨ ᠢ᠋ᠶ᠋ᠠᠨ ᠠᠰᠠᠭᠠᠵᠤ ᠳᠡᠢᠯᠬᠦ ᠦᠭᠡᠢ ᠪᠠᠢᠭᠰᠠᠭᠠᠷ ᠪᠠᠢᠭᠠᠳ ᠪᠠᠢᠳᠠᠭ ᠡᠭᠦᠳᠡ ᠪᠡᠨ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠲᠦ᠍ ᠡᠵᠡᠯᠡᠭᠦᠯᠵᠡᠢ᠃ ᠶᠠᠫᠣᠨᠴᠤᠳ ᠸᠠᠩ ᠢ᠋ ᠪᠠᠷᠢᠨ ᠠᠪᠤᠭᠠᠳ ᠲᠡᠮᠴᠦᠭᠳᠦᠩᠷᠣᠪ ᠨᠣᠶᠠᠨ ᠳ᠋ᠤ᠌ ᠬᠦᠷᠭᠡᠨ ᠰᠢᠢᠳᠬᠡᠭᠦᠯᠬᠦ ᠪᠡᠷ ᠪᠣᠯᠪᠠ᠃ 《ᠲᠡᠭᠦᠨ ᠢ᠋ ᠰᠢᠢᠳᠬᠡᠶᠡ ᠭᠡᠪᠡᠯ ᠲᠠ ᠨᠠᠷ ᠤᠷᠢᠳ ᠢ᠋ᠶ᠋ᠠᠷ ᠨᠠᠮᠠᠶ᠋ᠢ ᠠᠯᠠᠬᠤ ᠬᠡᠷᠡᠭᠲᠡᠢ 》ᠭᠡᠵᠦ ᠰᠥᠨᠢᠳ ᠸᠠᠩ ᠶᠠᠫᠣᠨᠴᠤᠳ ᠲᠤ᠌ ᠬᠡᠯᠡᠭᠰᠡᠨ ᠪᠠᠢᠬᠠ ᠳᠠ᠃ ᠴᠠᠭ ᠥᠩᠭᠡᠷᠡᠬᠦ ᠶ᠋ᠢ ᠳᠠᠭᠠᠯᠳᠤᠨ ᠳᠡᠮᠴᠤᠭᠳᠣᠩᠷᠤᠪ ᠨᠣᠶᠠᠨ ᠤ᠋ ᠠᠭᠤᠷ ᠨᠢ ᠴᠦ᠍ ᠲᠠᠢᠳᠬᠤᠷᠠᠵᠤ᠂ ᠳᠥᠷᠪᠡᠳ ᠮᠣᠩᠭᠣᠯᠴᠤᠳ ᠤ᠋ᠨ ᠡᠵᠡᠨ ᠢ᠋ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠠᠰᠢᠨ ᠢ᠋ᠶ᠋ᠠᠷ ᠭᠡᠷ ᠲᠦ᠋ᠨᠢ ᠬᠦᠷᠭᠡᠭᠦᠯᠦᠭᠰᠡᠨ ᠶᠦᠮ᠃
ᠳᠠᠸᠠ ᠬᠦᠩ ᠡᠨᠡ ᠬᠦ᠌ ᠤᠴᠢᠷ ᠤ᠋ᠨ ᠲᠤᠬᠠᠢ ᠳᠡᠭᠵᠢᠨ ᠬᠥᠭᠡᠷᠦᠬᠦᠨ ᠢ᠋ᠶ᠋ᠡᠷ ᠢᠨᠢᠶᠡᠨ ᠶᠠᠷᠢᠵᠤ ᠭᠠᠷᠬᠤ ᠳ᠋ᠤ᠌ ᠡᠸᠷᠢᠺᠰᠣᠨ ᠬᠠᠷᠢᠨ ᠲᠥᠪ ᠴᠢᠷᠠᠢᠯᠠᠨ ᠳᠤᠭᠤᠢ ᠰᠠᠭᠤᠭᠰᠠᠭᠠᠷ ᠪᠠᠢᠪᠠ᠃ ᠡᠨᠡ ᠬᠦ᠌ ᠴᠢᠮᠡᠭᠡ ᠨᠢ ᠲᠡᠭᠦᠨ ᠢ᠋ ᠭᠦᠨ ᠪᠣᠳᠣᠯ ᠳ᠋ᠤ᠌ ᠣᠷᠣᠭᠤᠯᠵᠤ᠂ ᠰᠥᠨᠢ ᠶ᠋ᠢᠨ ᠭᠦᠨ ᠪᠣᠯᠲᠠᠯᠠ ᠭᠡᠷ ᠦ᠋ᠨ ᠡᠮᠦᠨᠡ ᠠᠯᠬᠤᠯᠠᠵᠤ ᠪᠠᠢᠬᠤ ᠴᠢᠮᠡᠭᠡ ᠨᠢ ᠰᠣᠨᠣᠰᠳᠠᠵᠤ ᠪᠠᠢᠭᠰᠠᠨ ᠶᠤᠮ᠃
ᠮᠠᠷᠭᠠᠰᠢ ᠶ᠋ᠢᠨ ᠠᠶᠠᠨ ᠤ᠋ ᠡᠳᠦᠷ ᠨᠢ ᠪᠢᠳᠡᠨ ᠢ᠋ ᠨᠠᠷᠠ ᠲᠠᠢ ᠰᠠᠢᠬᠠᠨ ᠥᠷᠯᠥᠭᠡ ᠤᠭᠲᠤᠨ ᠠᠪᠤᠯᠠ᠃ ᠡᠸᠷᠢᠺᠰᠣᠨ ᠬᠥᠮᠦᠨ ᠣᠯᠠᠨᠲᠠᠢ ᠵᠠᠮ ᠠ᠋ᠴᠠ ᠵᠠᠢᠯᠠᠨ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠦ᠋ᠨ ᠯᠡ ᠮᠡᠳᠡᠳᠡᠭ ᠪᠣᠢᠳᠠ ᠵᠠᠮ ᠢ᠋ᠶ᠋ᠠᠷ ᠵᠠᠮᠨᠠᠬᠤ ᠶ᠋ᠢ ᠰᠣᠩᠭᠣᠪᠠ᠃ ᠦᠳᠡ ᠶ᠋ᠢᠨ ᠬᠣᠢᠨᠠ ᠪᠢᠳᠡ ᠰᠦᠢᠶᠤᠸᠡᠨ ᠦ᠌ ᠺᠠᠲ᠋ᠣᠯᠢᠭ ᠱᠠᠰᠢᠨ ᠤ᠋ ᠨᠢᠭᠡ ᠱᠠᠰᠢᠨ ᠳᠡᠯᠭᠡᠷᠡᠭᠦᠯᠬᠦ ᠥᠷᠲᠡᠭᠡᠨᠡ ᠬᠦᠷᠴᠦ᠂ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠪᠠᠨ ᠳᠣᠲᠣᠭᠰᠢ ᠤᠯᠠᠮᠵᠢᠯᠠᠪᠠ᠃ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠪᠸᠯᠬᠢ ᠶ᠋ᠢᠨ ᠨᠢᠭᠡ ᠵᠠᠯᠠᠭᠤᠬᠠᠨ ᠬᠠᠷᠠ ᠯᠠᠮᠠ ᠭᠠᠷᠴᠤ ᠢᠷᠡᠭᠡᠳ:
— ᠶᠣᠰᠣᠲᠠᠢ ᠭᠡᠨᠡᠳᠲᠡ ᠶ᠋ᠢᠨ ᠪᠠᠶᠠᠷ ᠪᠣᠯᠤᠯᠠ᠂ ᠪᠢ ᠲᠠᠨ ᠢ᠋ ᠳᠡᠭᠡᠷᠡᠮᠴᠢᠳ ᠦ᠋ᠨ ᠭᠠᠷ ᠲᠤ᠌ ᠪᠠᠢᠭᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ᠃ ᠭᠡᠬᠦ ᠳ᠋ᠦ᠍ ᠣᠳᠣ ᠲᠠ ᠬᠠᠮᠠᠷ ᠴᠢᠬᠢ ᠪᠡᠨ ᠣᠭᠲᠣᠯᠤᠭᠤᠯᠤᠭᠰᠠᠨ ᠦᠭᠡᠢ ᠮᠢᠨᠦ ᠡᠮᠦᠨᠡ ᠵᠣᠭᠰᠣᠵᠤ ᠪᠠᠢᠨᠠ! ᠭᠡᠮᠡᠨ ᠢᠨᠢᠶᠡᠨ ᠬᠡᠯᠡᠯᠡ᠃
ᠳᠣᠣᠷᠠ ᠪᠠᠨ ᠲᠡᠷᠡ ᠠᠶᠠᠨ ᠤ᠋ ᠲᠦᠷᠭᠡᠨ ᠬᠣᠭᠣᠯᠠ ᠪᠡᠯᠡᠳᠦᠭᠦᠯᠵᠦ᠂ ᠡᠨᠡ ᠬᠣᠭᠣᠷᠣᠨᠳᠣ ᠪᠠᠨ ᠮᠢᠨᠦ ᠤᠴᠠᠷᠠᠯ ᠤ᠋ᠨ ᠲᠤᠬᠠᠢ ᠰᠣᠨᠢᠷᠬᠠᠨ ᠠᠰᠠᠭᠤᠵᠤ ᠪᠠᠢᠪᠠ᠃ ᠪᠢᠳᠡᠨ ᠢ᠋ ᠠᠳᠠ ᠠ᠋ᠴᠠ ᠠᠶᠠᠷᠯᠠᠬᠤ ᠦᠶᠡ ᠳ᠋ᠦ᠍ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠨᠠᠳᠠ ᠳ᠋ᠤ᠌ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠪᠠᠨ ᠦᠭᠭᠦᠭᠰᠡᠨ ᠪᠥᠭᠡᠳ ᠮᠥᠨ ᠡᠨᠡ ᠬᠦ᠌ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠨᠢ ᠰᠡᠭᠦᠯᠡᠷ ᠲᠤᠩ ᠴᠢᠬᠤᠯᠠ ᠦᠢᠯᠡᠳᠦᠯ ᠦᠵᠡᠭᠦᠯᠦᠨᠡ ᠭᠡᠳᠡᠭ ᠢ᠋ ᠲᠡᠷᠡ ᠦᠶᠡ ᠳ᠋ᠡᠭᠡᠨ ᠪᠢᠳᠡ ᠬᠡᠷᠬᠢᠨ ᠮᠡᠳᠡᠬᠦ ᠪᠢᠯᠡ᠃ ᠪᠢᠳᠡ ᠥᠴᠦᠬᠡᠨ ᠴᠦ᠍ ᠰᠠᠭᠠᠳ ᠭᠠᠷᠤᠯ ᠦᠭᠡᠢ ᠪᠡᠷ ᠭᠦᠢᠬᠤᠸᠠ ᠬᠣᠲᠠ ᠳ᠋ᠤ᠌ ᠬᠦᠷᠴᠦ ᠢᠷᠡᠭᠡᠳ ᠮᠢᠨᠦ ᠨᠠᠢᠵᠠ ᠦᠪᠸᠷᠬᠧ ᠶ᠋ᠢᠨ ᠲᠤᠬᠠᠢ ᠠᠰᠠᠭᠤᠬᠤ ᠳ᠋ᠤ᠌ ᠭᠡᠷ ᠪᠦᠯᠢ ᠲᠡᠢ ᠪᠡᠨ ᠬᠠᠮᠲᠤ ᠠᠭᠤᠯᠠᠨ ᠳ᠋ᠤ᠌ ᠠᠪᠠᠯᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠪᠠᠢᠯᠠ᠃ ᠪᠢ ᠳᠣᠣᠷᠠ ᠪᠠᠨ ᠪᠡᠭᠡᠵᠢᠩ ᠬᠦᠷᠬᠦ ᠭᠠᠯ ᠲᠡᠷᠭᠡᠨ ᠳ᠋ᠦ᠍ ᠭᠠᠷᠬᠤ ᠪᠠᠷ ᠰᠢᠢᠳᠪᠡ᠃ ᠡᠸᠷᠢᠺᠰᠤᠨ ᠬᠡᠳᠦᠢᠪᠡᠷ ᠪᠠᠰᠠ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠬᠦᠷᠬᠦ ᠭᠡᠵᠦ ᠪᠠᠢᠭᠠ ᠪᠣᠯᠪᠠᠴᠤ ᠨᠠᠳᠠ ᠲᠠᠢ ᠬᠠᠮᠲᠤ ᠶᠠᠪᠤᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠭᠳᠡᠬᠦ ᠦᠭᠡᠢ ᠶ᠋ᠢᠨ ᠲᠤᠰᠠᠳᠠ ᠠᠳᠠ ᠪᠠᠨ ᠨᠢᠭᠡ ᠬᠣᠨᠣᠬᠤ ᠪᠠᠷ ᠪᠣᠯᠪᠠ᠃ ᠪᠢᠳᠡᠨ ᠦ᠌ ᠬᠠᠮᠲᠤ ᠶ᠋ᠢᠨ ᠠᠶᠠᠨ ᠤ᠋ ᠣᠷᠣ ᠮᠥᠷ ᠢ᠋ ᠣᠷᠣ ᠲᠠᠰᠤ ᠠᠷᠢᠯᠭᠠᠬᠤ ᠴᠢᠬᠤᠯᠠ ᠲᠠᠢ ᠶᠤᠮ᠃
ᠭᠠᠯᠲᠤ ᠶ᠋ᠢᠨ ᠤᠨᠲᠠᠯᠭᠠ ᠶ᠋ᠢᠨ ᠸᠠᠭᠣᠨ ᠳ᠋ᠤ᠌ ᠨᠢᠭᠡ ᠲᠠᠰᠤᠯᠭᠠ ᠶ᠋ᠢ ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠡᠵᠡᠯᠡᠪᠡ᠃ ᠵᠡᠷᠭᠡᠯᠡᠳᠡᠭᠡ ᠥᠷᠥᠭᠡᠨ ᠳ᠋ᠦ᠍ ᠭᠤᠷᠪᠠ ᠳᠥᠷᠪᠡᠨ ᠶᠠᠫᠣᠨᠴᠤᠳ ᠪᠠᠢᠭᠠ ᠪᠣᠯᠪᠠᠴᠤ ᠪᠢ ᠲᠡᠳᠡᠨ ᠢ᠋ ᠥᠴᠦᠬᠡᠨ ᠴᠦ᠍ ᠠᠩᠬᠠᠷᠤᠭᠰᠠᠨ ᠮᠠᠶᠢᠭ ᠦᠭᠡᠢ ᠶᠠᠪᠤᠵᠤ ᠪᠠᠢᠯᠠ᠃ ᠦᠳᠡᠰᠢ ᠪᠡᠷ ᠦᠢᠯᠡᠴᠢᠯᠡᠭᠴᠢ ᠢᠷᠡᠵᠦ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠶ᠋ᠢ ᠠᠪᠴᠤ ᠡᠭᠦᠳᠡᠨ ᠳ᠋ᠦ᠍ ᠬᠠᠪᠴᠢᠭᠤᠯᠵᠤ ᠲᠠᠯᠪᠢᠵᠤ ᠪᠠᠢᠭᠠ ᠨᠢ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠬᠡᠷᠡᠭ ᠦᠭᠡᠢ ᠬᠥᠮᠦᠰ ᠢᠷᠡᠵᠦ ᠲᠦᠢᠪᠡᠭᠡᠬᠦ ᠡᠴᠡ ᠰᠡᠷᠭᠡᠢᠯᠡᠵᠦ ᠪᠠᠢᠭᠠ ᠠᠵᠢ᠃ ᠪᠢ ᠬᠠᠷᠮᠠᠨ ᠠ᠋ᠴᠠ ᠪᠠᠨ ᠪᠸᠯᠬᠢ ᠶ᠋ᠢᠨ ᠮᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠶ᠋ᠢᠨ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠶ᠋ᠢ ᠭᠠᠷᠭᠠᠨ ᠦᠭᠭᠦᠯᠡ᠃ ᠢᠩᠭᠢᠭᠡᠳ ᠯᠡ ᠨᠣᠢᠷ ᠤ᠋ᠨ ᠳᠠᠯᠠᠢ ᠳ᠋ᠠᠭᠠᠨ ᠱᠤᠮᠪᠠᠨ ᠪᠠᠢᠲᠠᠯᠠ ᠸᠠᠭᠣᠨ ᠤ᠋ ᠭᠤᠳᠤᠮᠵᠢᠨ ᠳ᠋ᠤ᠌ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠶᠠᠷᠢᠯᠴᠠᠬᠤ ᠴᠢᠮᠡᠭᠡ ᠨᠣᠢᠷ ᠢ᠋ ᠮᠢᠨᠢ ᠰᠡᠷᠡᠭᠡᠪᠡ᠃ ᠰᠡᠷᠡᠮᠵᠢᠲᠡᠢ ᠪᠡᠷ ᠡᠭᠦᠳᠡᠨ ᠳ᠋ᠦ᠍ ᠴᠢᠬᠢ ᠪᠡᠨ ᠨᠠᠭᠠᠨ ᠴᠢᠩᠨᠠᠪᠠ᠃
— ᠶᠠᠭᠠᠬᠢᠭᠰᠠᠨ ᠴᠤ᠌ ᠬᠣᠶᠠᠷ ᠬᠥᠮᠦᠨ ᠪᠠᠢᠵᠤ ᠲᠠᠭᠠᠷᠠᠨᠠ ᠭᠡᠵᠦ ᠥᠳᠬᠡᠨ ᠬᠣᠭᠣᠯᠠᠢ ᠲᠠᠢ ᠬᠥᠮᠦᠨ ᠶᠠᠷᠢᠬᠤ ᠳ᠋ᠤ᠌ ᠥᠭᠡᠳᠡ ᠡᠴᠡ ᠨᠢ :
— ᠭᠠᠭᠴᠠᠬᠠᠨ ᠯᠠ ᠧᠦ᠋ᠷᠣᠫᠠ ᠶ᠋ᠢᠨ ᠬᠥᠮᠦᠨ ᠪᠠᠢᠭᠠ ᠭᠡᠵᠦ ᠬᠠᠷᠢᠭᠤᠯᠬᠤ ᠨᠢ ᠰᠣᠨᠣᠰᠳᠠᠨᠠ᠃
ᠪᠠᠰᠠ ᠪᠠᠭᠠ ᠵᠡᠷᠭᠡ ᠴᠢᠩᠨᠠᠭᠰᠠᠨ ᠢ᠋ᠶ᠋ᠠᠨ ᠪᠢ ᠡᠭᠦᠳᠡ ᠪᠡᠨ ᠣᠩᠭᠣᠢᠯᠭᠠᠯᠠ᠃ ᠨᠢᠭᠡ ᠶᠠᠫᠣᠨ ᠭᠠᠢᠬᠠᠰᠢ ᠠᠯᠳᠠᠭᠰᠠᠨ ᠮᠠᠶᠢᠭᠲᠠᠢ ᠬᠠᠵᠠᠭᠤ ᠲᠠᠢᠰᠢ ᠪᠠᠨ ᠵᠠᠢᠯᠠᠨ ᠵᠣᠭᠰᠣᠭᠠᠳ ᠨᠠᠮᠠᠶ᠋ᠢ ᠠᠵᠢᠭᠯᠠᠵᠤ ᠪᠠᠢᠬᠤ ᠵᠠᠭᠤᠷᠠ ᠪᠢ ᠦᠢᠯᠡᠴᠢᠯᠡᠭᠴᠢ ᠳ᠋ᠦ᠍ ᠥᠷᠯᠥᠭᠡ ᠶ᠋ᠢᠨ ᠴᠠᠢ ᠪᠠᠨ ᠬᠡᠨᠡᠭ ᠴᠦ᠍ ᠦᠭᠡᠢ ᠵᠠᠬᠢᠶᠠᠯᠠᠪᠠ᠃
— ᠲᠠ ᠨᠠᠷ ᠰᠠᠶᠢᠬᠠᠨ ᠶᠠᠭᠤᠨ ᠤ᠋ ᠲᠤᠬᠠᠢ ᠮᠠᠷᠭᠤᠯᠳᠤᠪᠠ ? ᠭᠡᠵᠦ ᠲᠡᠷᠡ ᠦᠢᠯᠡᠴᠢᠯᠡᠭᠴᠢ ᠬᠢᠲᠠᠳ ᠴᠠᠢ ᠠᠪᠴᠢᠷᠠᠨ ᠰᠢᠷᠡᠭᠡᠨᠡ ᠲᠠᠯᠪᠢᠬᠤ ᠵᠠᠭᠤᠷᠠ ᠪᠢ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ :
— ᠲᠡᠷᠡ ᠶᠠᠫᠣᠨ ᠲᠠᠨ ᠤ᠋ ᠥᠷᠥᠭᠡᠨ ᠳ᠋ᠦ᠍ ᠪᠠᠢᠭᠠ ᠭᠡᠮᠡᠨ ᠦᠵᠡᠵᠦ ᠪᠠᠢᠭᠠ ᠬᠣᠶᠠᠳᠠᠬᠢ ᠠᠶᠠᠨᠴᠢᠨ ᠤ᠋ ᠨᠡᠷᠡ ᠶ᠋ᠢ ᠨᠢ ᠮᠡᠳᠡᠬᠦ ᠭᠡᠮᠡᠨ ᠬᠦᠴᠦᠯᠡᠵᠦ ᠪᠢᠯᠡ᠂ ᠲᠡᠭᠦᠨ ᠦ᠌ ᠦᠵᠡᠬᠦ ᠪᠡᠷ ᠡᠭᠦᠳᠡᠨ ᠳᠡᠭᠡᠷᠡᠬᠢ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠪᠣᠯ ᠬᠠᠭᠤᠷᠮᠠᠭ ᠭᠡᠨᠡ ᠭᠡᠯᠡ᠃ ᠪᠢ ᠥᠷᠯᠥᠭᠡᠨ ᠦ᠌ ᠴᠠᠢ ᠪᠠᠨ ᠤᠤᠭᠤᠬᠤ ᠪᠠᠷ ᠬᠣᠭᠣᠯᠠᠨ ᠤ᠋ ᠸᠠᠭᠣᠨ ᠬᠦᠷᠬᠦ ᠪᠡᠷ ᠪᠣᠰᠤᠯᠠ᠃ ᠲᠠᠢᠰᠢ ᠪᠠᠨ ᠠᠯᠬᠤᠯᠠᠵᠤ ᠪᠠᠢᠬᠤ ᠵᠠᠭᠤᠷᠠ ᠥᠪᠡᠷ ᠦ᠋ᠨ ᠠᠶᠠᠨ ᠤ᠋ ᠠᠪᠳᠠᠷᠠ ᠪᠠᠨ ᠣᠨᠢᠰᠤᠯᠠᠭᠰᠠᠨ ᠦᠭᠡᠢ ᠪᠡᠨ ᠰᠠᠨᠠᠭᠠᠳ ᠪᠤᠴᠠᠨ ᠢᠷᠡᠬᠦ ᠳ᠋ᠦ᠍ ᠲᠡᠷᠡ ᠶᠠᠫᠣᠨ ᠮᠢᠨᠦ ᠬᠠᠪᠴᠢᠭᠤᠯᠤᠭᠰᠠᠨ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠶ᠋ᠢ ᠭᠠᠷ ᠲᠠᠭᠠᠨ ᠪᠠᠷᠢᠭᠠᠳ᠂ ᠬᠢᠨᠠᠮᠠᠭᠠᠢ ᠪᠠᠷ ᠲᠡᠮᠳᠡᠭᠯᠡᠨ ᠠᠪᠴᠤ ᠪᠠᠢᠯᠠ᠃ ᠮᠢᠨᠦ ᠢᠷᠡᠬᠦ ᠶ᠋ᠢ ᠬᠠᠷᠠᠩᠭᠤᠲᠠ ᠲᠦᠷᠭᠡᠨ ᠭᠡᠭᠴᠢ ᠤᠤᠯ ᠣᠷᠣᠨ ᠳ᠋ᠤᠨᠢ ᠬᠠᠪᠴᠢᠭᠤᠯᠤᠭᠠᠳ᠂ ᠥᠪᠡᠷ ᠦ᠋ᠨ ᠲᠠᠰᠤᠯᠭᠠᠨ ᠳ᠋ᠠᠭᠠᠨ ᠳᠠᠯᠳᠠᠷᠠᠪᠠ᠃ ᠡᠨᠡ ᠬᠦ᠌ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠡᠭᠦᠷᠭᠡ ᠪᠡᠨ ᠨᠢᠭᠡᠨᠲᠡ ᠪᠡᠶᠡᠯᠡᠭᠦᠯᠦᠭᠰᠡᠨ ᠪᠣᠯᠬᠣᠷ ᠠᠪᠴᠤ ᠬᠠᠷᠮᠠᠨ ᠳ᠋ᠠᠭᠠᠨ ᠬᠢᠭᠡᠳ ᠠᠪᠳᠠᠷᠠ ᠪᠠᠨ ᠣᠨᠢᠰᠤᠯᠠᠵᠤ᠂ ᠰᠠᠨᠠᠭᠠ ᠠᠮᠤᠷ ᠥᠷᠯᠥᠭᠡ ᠶ᠋ᠢᠨ ᠴᠠᠢ ᠪᠠᠨ ᠤᠤᠭᠤᠵᠤ ᠰᠠᠭᠤᠪᠠ᠃
ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠶ᠋ᠢᠨ ᠵᠣᠭᠰᠣᠭᠠᠯ ᠳᠡᠭᠡᠷᠡ ᠨᠢᠭᠡ ᠨᠠᠢᠵᠠ ᠮᠢᠨᠢ ᠵᠣᠭᠰᠣᠵᠤ ᠪᠠᠢᠯᠠ᠃
— ᠲᠠ ᠲᠡᠭᠡᠭᠡᠳ ᠬᠠᠮᠢᠭᠠ ᠠ᠋ᠴᠠ ᠭᠠᠷᠤᠭᠠᠳ ᠢᠷᠡᠪᠡ? ᠶᠠᠫᠣᠨᠴᠤᠳ ᠵᠠᠮ ᠲᠤᠷᠰᠢ ᠲᠠᠨ ᠢ᠋ ᠡᠷᠢᠵᠦ ᠬᠠᠢᠨ ᠰᠦᠢᠳ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠲᠠ ᠮᠡᠳᠡᠨᠡ ᠪᠢᠵᠡ? ᠭᠡᠮᠡᠨ ᠲᠡᠷᠡ ᠭᠠᠢᠬᠠᠰᠢ ᠠᠯᠲᠠᠨ ᠠᠰᠠᠭᠤᠵᠤ ᠭᠠᠷᠪᠠ᠃
— ᠪᠢ ᠪᠧ ᠯᠬᠢ ᠶ᠋ᠢᠨ ᠮᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠶ᠋ᠢᠨ ᠬᠤᠪᠢ ᠪᠠᠷ ᠠᠶᠠᠯᠠᠵᠤ ᠪᠠᠢᠨᠠ᠂ ᠮᠥᠨ ᠲᠡᠭᠡᠭᠡᠳ ᠪᠢ ᠪᠡᠭᠡᠵᠢᠩ ᠳ᠋ᠦ᠍ ᠬᠥᠷᠴᠢᠬᠡᠪᠡᠯ ᠮᠢᠨᠦ ᠬᠠᠮᠢᠭᠠ ᠠ᠋ᠴᠠ ᠢᠷᠡᠭᠰᠡᠨ ᠨᠢ ᠴᠦ᠍ ᠨᠢᠭᠡ ᠶᠡᠬᠡ ᠰᠣᠨᠢᠷᠬᠠᠯᠲᠠᠢ ᠪᠢᠰᠢ ᠪᠠᠢᠬᠠ ᠭᠡᠮᠡᠨ ᠪᠢ ᠢᠨᠢᠶᠡᠨ ᠬᠠᠷᠢᠭᠤᠯᠪᠠ᠃
ᠣᠳᠣ ᠲᠡᠭᠡᠭᠡᠳ ᠯᠡ ᠮᠣᠩᠭᠣᠯ ᠬᠠᠷᠠᠭᠠᠨ ᠠ᠋ᠴᠠ ᠮᠢᠨᠢ ᠦᠭᠡᠢ ᠪᠣᠯᠬᠤ ᠪᠣᠯᠤᠯᠠ᠃ ᠶᠡᠬᠡ ᠤᠳᠠᠭᠠᠨ ᠲᠡᠷᠭᠡᠨ ᠦ᠌ ᠴᠣᠩᠬᠣᠨ ᠤ᠋ ᠳᠡᠷᠭᠡᠳᠡ ᠵᠣᠭᠰᠣᠨ ᠮᠢᠨᠦ ᠳᠣᠲᠣᠨᠣ ᠳᠠᠰᠤᠯ ᠪᠣᠯᠤᠭᠰᠠᠨ ᠲᠠᠯᠠ ᠨᠤᠲᠤᠭ ᠤ᠋ᠨ ᠥᠩᠭᠡ ᠦᠵᠡᠮᠵᠢ ᠶ᠋ᠢᠨ ᠬᠣᠢᠰᠢ ᠪᠠᠨ ᠬᠠᠶᠠᠭᠳᠠᠬᠤ ᠶ᠋ᠢ ᠬᠠᠷᠠᠯᠠ᠃ ᠪᠢ ᠡᠢᠨ ᠬᠦ᠌ ᠡᠨᠡ ᠨᠤᠲᠤᠭ ᠤ᠋ᠨ ᠠᠭᠤᠤ ᠶᠡᠬᠡ ᠠᠷᠠᠳ ᠲᠦᠮᠡᠨ ᠲᠡᠢ ᠬᠠᠮᠲᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠨᠠᠰᠤᠨ ᠳ᠋ᠠᠭᠠᠨ ᠮᠠᠷᠲᠠᠰᠢ ᠦᠭᠡᠢ ᠬᠡᠷᠡᠭ ᠤᠴᠢᠷ ᠤ᠋ᠳ ᠢ᠋ ᠬᠣᠢᠨᠠ ᠪᠠᠨ ᠣᠷᠬᠢᠭᠰᠠᠨ ᠪᠢᠯᠡ᠃ ᠠᠮᠤᠭᠤᠯᠠᠩ ᠮᠥᠷᠲᠡᠭᠡᠨ ᠪᠤᠰᠤᠳ ᠤ᠋ᠨ ᠦᠢᠮᠡᠭᠦᠯᠦᠯ ᠦᠭᠡᠢ ᠪᠡᠷ ᠲᠠᠯᠠ ᠨᠤᠲᠤᠭ ᠲᠠᠭᠠᠨ ᠵᠢᠷᠭᠠᠯ ᠲᠠᠢ ᠠᠮᠢᠳᠤᠷᠠᠬᠤ ᠶ᠋ᠢ ᠬᠦᠰᠡᠨ ᠪᠠᠢᠭᠠ ᠡᠨᠡ ᠦᠨᠳᠦᠰᠦᠲᠡᠨ ᠢ᠋ ᠢᠷᠡᠭᠡᠳᠦᠢ ᠴᠣᠬᠣᠮ ᠬᠠᠮᠢᠭᠠᠰᠢ ᠪᠠᠨ ᠬᠥᠲᠥᠯᠦᠨ ᠠᠪᠠᠴᠢᠳᠠᠭ ᠪᠣᠯ? ᠥᠨᠳᠥᠷᠯᠢᠭ ᠦ᠋ᠨ ᠳᠡᠭᠡᠭᠦᠷ ᠨᠡᠲᠦᠢᠨ ᠪᠠᠷᠤᠢᠬᠤ ᠬᠠᠷᠠ ᠡᠭᠦᠯᠡᠰ ᠲᠡᠢᠮᠦ ᠰᠠᠢᠨ ᠵᠦᠩ ᠰᠤᠪᠢᠨ ᠪᠢᠰᠢ ᠰᠢᠭ ᠬᠠᠷᠠᠭᠳᠠᠬᠤ ᠪᠥᠭᠡᠳ ᠨᠠᠳᠠ ᠳ᠋ᠤ᠌ ᠮᠣᠩᠭᠣᠯᠴᠤᠳ ᠶᠠᠭ ᠯᠠ ᠡᠷᠬᠡ ᠴᠢᠯᠥᠭᠡ ᠪᠠ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠤ᠋ᠨ ᠲᠥᠯᠥᠭᠡ ᠶᠠᠪᠤᠭᠤᠯᠬᠤ ᠰᠢᠨᠡ ᠲᠡᠮᠡᠴᠡᠯ ᠳ᠋ᠡᠭᠡᠨ ᠬᠡᠷᠡᠭᠯᠡᠬᠦ ᠬᠦᠴᠦᠨ ᠢ᠋ᠶ᠋ᠡᠨ ᠠᠯᠢ ᠡᠷᠲᠡ ᠪᠠᠷᠠᠭᠠᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠭᠰᠠᠨ ᠪᠢᠯᠡ᠃