ᠶᠢᠷᠲᠢᠨᠴᠦ ᠡᠭᠦᠳᠬᠦᠢ - ᠸᠠᠴᠢᠷᠪᠠᠲᠦ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Ертөнц үүдэхүй - Очирбатын Дашбалбар
809ᠶᠢᠷᠲᠢᠨᠴᠦ ᠡᠭᠦᠳᠬᠦᠢ
ᠴᠠᠭᠠᠳᠤ ᠨᠢᠭᠤᠴᠠ ᠪᠠᠨ ᠬᠠᠳᠠᠭᠠᠯᠠᠨ ᠰᠠᠨᠰᠠᠷ ᠤ᠋ᠨ ᠵᠣᠪᠠᠯᠠᠩ ᠡᠳ᠋ᠯᠡᠵᠦ ᠪᠣᠢ
ᠴᠢᠰ ᠬᠢᠲᠡᠯᠡ ᠬᠡᠦᠬᠡᠳ ᠣᠷᠢᠯᠠᠬᠤ ᠳ᠋ᠤ᠌ ᠴᠢᠨᠦ ᠰᠡᠳᠬᠢᠯ ᠡᠪᠡᠳᠳᠡᠭ ᠤᠤ
ᠴᠢᠩᠭᠠ ᠠᠳᠬᠤᠭᠰᠠᠨ ᠴᠢᠯᠠᠭᠤ ᠪᠠᠨ ᠣᠷᠬᠢᠵᠤ ᠭᠦᠶᠦᠳᠡᠭ ᠤᠤ
ᠴᠢᠮᠠ ᠠ᠋ᠴᠠ ᠦᠯᠦ ᠰᠢᠯᠲᠠᠭᠠᠯᠠᠨ ᠪᠦᠬᠦ ᠶᠠᠭᠤᠮᠠ ᠣᠷᠣᠰᠢᠨ ᠪᠣᠢ
ᠨᠣᠮ ᠤ᠋ᠨ ᠣᠷᠴᠢᠯᠠᠩ ᠬᠡᠢ ᠶᠦᠮ ᠤᠤ ᠪᠣᠳᠠᠲᠠᠢ ᠶᠤᠮ ᠤᠤ ᠴᠢ ᠮᠡᠳᠡᠬᠦ ᠦᠭᠡᠢ
ᠨᠣᠭᠣᠭᠠᠨ ᠨᠤᠭᠤ ᠳ᠋ᠤ᠌ ᠴᠠᠭᠠᠨ ᠮᠣᠷᠢ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠨ ᠢᠳᠡᠰᠢᠯᠡᠨᠡ
ᠨᠣᠬᠠᠢ ᠳᠡᠷᠭᠡᠳᠡᠭᠦᠷ ᠭᠦᠶᠦᠭᠡᠳ ᠥᠩᠭᠡᠷᠡᠬᠦ ᠳ᠋ᠦ᠍ ᠨᠢᠷᠤᠭᠤ ᠤᠷᠤᠭᠤ ᠵᠢᠷᠢᠰᠬᠢᠨᠡ
ᠨᠢᠳᠤᠨᠤᠨ ᠪᠣᠯᠤᠨ ᠡᠨᠡ ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣ ᠴᠢ ᠪᠢᠳᠡ ᠬᠠᠪᠴᠢᠭᠤᠯᠤᠭᠳᠠᠵᠠᠢ
ᠨᠣᠮ ᠤ᠋ᠨ ᠣᠷᠴᠢᠯᠠᠩ ᠬᠡᠢ ᠶᠦᠮ ᠤᠤ ᠪᠣᠳᠠᠲᠠᠢ ᠶᠤᠮ ᠤᠤ ᠪᠢ ᠮᠡᠳᠡᠬᠦ ᠦᠭᠡᠢ
ᠨᠠᠳᠠ ᠠ᠋ᠴᠠ ᠦᠯᠦ ᠰᠢᠯᠲᠠᠭᠠᠯᠠᠨ ᠪᠦᠬᠦ ᠶᠠᠭᠤᠮᠠ ᠮᠥᠬᠥᠵᠦ ᠪᠣᠢ
ᠨᠠᠮᠤᠷ ᠤ᠋ᠨ ᠨᠠᠪᠴᠢᠰ ᠬᠡᠢᠰᠦᠨ ᠬᠠᠭᠠᠴᠠᠨ ᠣᠳᠬᠤᠢ ᠪᠠᠷ ᠰᠡᠷᠴᠢᠭᠢᠨᠡᠵᠦ
ᠨᠠᠷᠠᠨ ᠬᠣᠷᠸᠠ ᠳ᠋ᠤ᠌ ᠲᠡᠭᠦᠷᠳᠡᠭᠰᠡᠨ ᠡᠪᠦᠭᠡᠨ ᠳᠡᠷᠡᠰᠦᠨ ᠦ᠌ ᠨᠥᠮᠥᠷᠢ ᠳ᠋ᠦ᠍ ᠠᠮᠠᠷᠠᠨᠠ
ᠨᠠᠰᠤ ᠭᠡᠳᠡᠭ ᠨᠢ ᠰᠠᠯᠬᠢ ᠶᠤᠮ ᠤᠤ ᠬᠡᠢᠰᠦᠨ ᠠᠷᠢᠯᠵᠠᠢ ᠬᠡᠳᠦᠢᠨᠡᠢ᠁
ᠨᠠᠳᠠ ᠠ᠋ᠴᠠ ᠦᠯᠦ ᠰᠢᠯᠲᠠᠭᠠᠯᠠᠨ ᠪᠦᠬᠦ ᠶᠠᠭᠤᠮᠠ ᠮᠥᠬᠥᠵᠦ ᠪᠣᠢ
ᠲᠩᠷᠢ ᠡᠴᠡ ᠦᠯᠦ ᠰᠢᠯᠲᠠᠭᠠᠯᠠᠨ ᠪᠦᠬᠦ ᠶᠠᠭᠤᠮᠠ ᠣᠷᠴᠢᠯᠳᠤᠵᠤ ᠪᠣᠢ
ᠲᠡᠷᠭᠡᠯ ᠰᠠᠷᠠᠨ ᠤᠷᠭᠤᠬᠤ ᠴᠠᠭ ᠲᠤ᠌ ᠬᠥᠨᠳᠡᠢ ᠲᠠᠯᠠ ᠳ᠋ᠤ᠌ ᠭᠣᠣᠯ ᠤ᠋ᠳ ᠮᠥᠩᠭᠥᠷᠡᠵᠦ
ᠲᠡᠨᠳᠡ ᠬᠠᠳᠠᠨ ᠤ᠋ ᠢᠷᠣᠭᠠᠷ ᠨᠢᠭᠡ ᠴᠡᠴᠡᠭ ᠳᠡᠯᠪᠡᠭᠡ ᠪᠡᠨ ᠵᠠᠳᠠᠯᠤᠨ ᠴᠢᠴᠢᠭᠡᠨᠡᠨᠡ
ᠲᠡᠮᠡᠭᠡ ᠪᠤᠢᠯᠠᠬᠤ ᠳ᠋ᠤ᠌ ᠲᠤᠯᠤᠭᠤᠳ ᠤ᠋ᠨ ᠳᠤᠮᠳᠠ ᠨᠣᠭᠣᠭᠠᠨ ᠰᠢᠷᠠ ᠳᠣᠯᠭᠢᠶᠠᠨ ᠡᠭᠦᠰᠴᠦ
ᠲᠩᠷᠢ ᠡᠴᠡ ᠦᠯᠦ ᠰᠢᠯᠲᠠᠭᠠᠯᠠᠨ ᠪᠦᠬᠦ ᠶᠠᠭᠤᠮᠠ ᠣᠷᠴᠢᠯᠳᠤᠵᠤ ᠪᠣᠢ
ᠬᠡᠨ ᠡᠴᠡ ᠴᠦ᠍ ᠦᠯᠦ ᠰᠢᠯᠲᠠᠭᠠᠯᠠᠨ ᠬᠠᠮᠤᠭ ᠶᠠᠭᠤᠮᠠ ᠰᠦᠯᠡᠯᠡᠳᠦᠵᠦ᠍ ᠪᠣᠢ
ᠬᠡᠷᠢᠶᠡ ᠦᠬᠦᠭᠰᠡᠨ ᠤᠬᠤᠨᠠ ᠶ᠋ᠢᠨ ᠨᠢᠳᠦ ᠲᠣᠩᠰᠢᠬᠤ ᠳ᠋ᠠᠭᠠᠨ ᠨᠢᠭᠡ ᠣᠳᠣ ᠵᠠᠯᠭᠢᠵᠤ ᠪᠣᠢ
ᠬᠡᠭᠡᠷᠡ ᠶ᠋ᠢᠨ ᠴᠡᠴᠡᠭ ᠲᠡᠭᠦᠬᠦ ᠳ᠋ᠦ᠍ ᠰᠥᠨᠢ ᠳᠤᠮᠳᠠ ᠵᠡᠭᠦᠳᠦᠯᠡᠳᠡᠭ ᠡᠪᠡᠳᠴᠢᠨ ᠲᠡᠢ ᠪᠣᠯᠬᠤ ᠪᠣᠢ
ᠬᠡᠪᠡᠷᠡᠭᠬᠡᠨ ᠡᠷᠪᠡᠬᠡᠢ ᠴᠢᠯᠠᠭᠤᠨ ᠤ᠋ ᠬᠡ ᠪᠣᠯᠵᠤ ᠰᠠᠶᠠ ᠰᠠᠶᠠ ᠵᠢᠯ ᠢ᠋ ᠲᠤᠭᠤᠯᠬᠤ ᠪᠣᠢ
ᠬᠡᠨ ᠡᠴᠡ ᠴᠦ᠍ ᠦᠯᠦ ᠰᠢᠯᠲᠠᠭᠠᠯᠠᠨ ᠬᠠᠮᠤᠭ ᠶᠠᠭᠤᠮᠠ ᠰᠦᠯᠡᠯᠳᠦᠵᠦ ᠪᠣᠢ
ᠪᠢᠳᠡᠨ ᠡᠴᠡ ᠦᠯᠦ ᠰᠢᠯᠲᠠᠭᠠᠯᠠᠨ ᠬᠠᠮᠤᠭ ᠶᠠᠭᠤᠮᠠ ᠡᠪᠳᠡᠷᠡᠵᠦ ᠪᠣᠢ
ᠪᠡᠭᠡᠷᠡᠭᠰᠡᠨ ᠲᠠᠭᠲᠠᠭᠠ ᠶ᠋ᠢ ᠬᠦᠢᠲᠡᠨ ᠬᠣᠰᠢᠭᠤ ᠪᠠᠷ ᠰᠠᠯᠬᠢ ᠲᠠᠭᠠᠯᠠᠨᠠ
ᠪᠡᠯᠪᠡᠰᠦᠨ ᠠᠪᠠᠭᠠᠢ ᠶ᠋ᠢ ᠬᠥᠨᠥᠭᠡᠯᠲᠦ ᠲᠤᠶᠠᠭᠠ ᠪᠠᠷ ᠢ᠋ᠶ᠋ᠠᠨ ᠰᠠᠷᠠ ᠯᠠ ᠦᠯᠢᠶᠡᠨᠡ
ᠪᠡᠷᠢ ᠴᠡᠴᠡᠭ ᠢ᠋ ᠬᠥᠭᠰᠢᠨ ᠦᠨᠢᠶᠡ ᠬᠡᠪᠢᠵᠦ ᠣᠷᠬᠢᠨᠠ
ᠪᠢᠳᠡᠨ ᠡᠴᠡ ᠦᠯᠦ ᠰᠢᠯᠲᠠᠭᠠᠯᠠᠨ ᠬᠠᠮᠤᠭ ᠶᠠᠭᠤᠮᠠ ᠡᠪᠳᠡᠷᠡᠵᠦ ᠪᠣᠢ
ᠬᠥᠮᠦᠨ ᠡᠴᠡ ᠦᠯᠦ ᠰᠢᠯᠲᠠᠭᠠᠯᠠᠨ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠡᠭᠦᠳᠴᠦ ᠪᠣᠢ
ᠬᠦᠰᠡᠪᠡᠴᠦ ᠡᠰᠡ ᠬᠦᠰᠡᠪᠡᠴᠦ ᠲᠩᠷᠢ ᠰᠠᠭᠠᠷᠠᠯᠳᠤᠵᠤ ᠮᠣᠭᠠᠢ ᠭᠤᠤᠵᠢᠵᠤ ᠪᠣᠢ
ᠬᠦᠢᠯᠡᠨ ᠬᠣᠷᠸᠠ ᠳ᠋ᠤ᠌ ᠮᠡᠯᠡᠬᠡᠢ ᠭᠤᠸᠠᠭᠯᠠᠵᠤ ᠵᠢᠭᠠᠰᠤ ᠳᠦᠷᠰᠦ ᠪᠡᠨ ᠰᠢᠬᠠᠵᠤ ᠪᠣᠢ
ᠬᠦᠢᠲᠡᠨ ᠰᠥᠨᠢ ᠪᠡᠷ ᠣᠳᠣᠳ ᠳᠡᠯᠪᠡᠷᠡᠵᠦ ᠭᠠᠯᠲᠤ ᠰᠢᠭᠤᠷᠭᠠ ᠣᠷᠴᠢᠯᠠᠩ ᠳ᠋ᠤ᠌ ᠵᠠᠮᠬᠠᠷᠠᠵᠤ ᠪᠣᠢ
ᠬᠥᠮᠦᠨ ᠡᠴᠡ ᠦᠯᠦ ᠰᠢᠯᠲᠠᠭᠠᠯᠠᠨ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠡᠭᠦᠳᠴᠦ ᠪᠣᠢ᠃