ᠬᠠᠭᠠᠨ ᠬᠤᠷᠤᠭᠤ Хаан хуруу-ᠲᠤᠯᠭᠠᠷ ᠤ᠋ᠨ ᠪᠠᠲᠤᠵᠢᠷᠭᠠᠯ
1441 ᠲᠤᠯᠭᠠᠷ ᠤ᠋ᠨ ᠪᠠᠲᠤᠵᠢᠷᠭᠠᠯ
ᠲᠠᠪᠤᠨ ᠬᠤᠷᠤᠭᠤ ᠨᠢᠭᠡ ᠤᠳᠠᠭᠠ
ᠲᠠᠪᠠᠲᠠᠢᠬᠠᠨ ᠪᠥᠭᠡᠮᠨᠡᠷᠡᠵᠦ ᠰᠠᠭᠤᠭᠠᠳ
ᠬᠠᠭᠠᠨ ᠬᠤᠷᠤᠭᠤ ᠪᠠᠨ ᠰᠣᠩᠭᠣᠬᠤ
ᠬᠠᠯᠠᠭᠤᠨ ᠬᠤᠷᠠᠯ ᠬᠢᠵᠡᠢ᠃
ᠥᠨᠳᠥᠷ ᠠᠯᠳᠠᠷ ᠤ᠋ᠨ ᠲᠥᠯᠥᠭᠡ
ᠥᠷᠢᠰᠦᠯᠳᠦᠵᠦ ᠡᠬᠢᠯᠡᠯᠡ
ᠥᠪᠡᠷ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠨᠡᠷᠡ ᠶ᠋ᠢ
ᠡᠷᠭᠦᠵᠦ ᠳᠡᠪᠰᠢᠭᠦᠯᠦᠨᠡ᠃
ᠡᠷᠡᠬᠡᠢ᠄《ᠡᠷᠳᠡᠮ ᠨᠣᠮ ᠪᠦᠲᠦᠭᠡᠳᠡᠭ
ᠡᠷᠳᠡᠨᠢ ᠶ᠋ᠢᠨ ᠦᠵᠦᠭ ᠲᠦᠰᠢᠯᠴᠡᠳᠡᠭ
ᠡᠷᠡᠬᠡᠢ ᠮᠡᠷᠭᠡᠨ ᠭᠡᠮᠡᠨ
ᠡᠷᠲᠡᠨ ᠡᠴᠡ ᠠᠯᠳᠠᠷᠰᠢᠭᠰᠠᠨ
ᠡᠨᠡ ᠤᠳᠠᠭᠠ ᠪᠢ
ᠡᠵᠡᠨ ᠪᠣᠯᠬᠤ ᠪᠣᠯᠤᠯᠲᠠᠢ ᠪᠠᠢᠨᠠ᠃》
ᠳᠣᠯᠢᠶᠠᠪᠤᠷ᠄《ᠳᠣᠮᠴᠢ ᠡᠮᠴᠢ ᠭᠡᠮᠡᠨ
ᠳᠣᠮᠣᠭ ᠬᠠᠭᠤᠴᠢᠨ ᠳ᠋ᠤ᠌ ᠪᠢᠴᠢᠭᠳᠡᠭᠰᠡᠨ
ᠳᠣᠬᠢᠶᠠ ᠵᠠᠩᠭᠢ ᠶ᠋ᠢᠨ ᠲᠦᠷᠦᠭᠦᠨ ᠳ᠋ᠦ᠍
ᠳᠣᠷᠣᠭᠰᠢ ᠳᠡᠭᠡᠭᠰᠢ ᠴᠢᠴᠢᠯᠡᠭᠰᠡᠨ
ᠬᠠᠭᠠᠨ ᠬᠤᠷᠤᠭᠤ ᠪᠣᠯᠬᠤ ᠳ᠋ᠤ᠌
ᠬᠠᠷᠰᠢᠯᠠᠬᠤ ᠵᠦᠢᠯ ᠠᠯᠠᠭᠠ᠃》
ᠳᠤᠮᠳᠠ ᠬᠤᠷᠤᠭᠤ᠄
《ᠳᠣᠯᠢᠶᠠᠪᠤᠷ ᠢ᠋ ᠬᠠᠭᠠᠨ ᠪᠣᠯᠭᠠᠬᠤ ᠳ᠋ᠤ᠌
ᠳᠤᠭᠤᠵᠢᠶᠠ ᠮᠠᠭᠤᠲᠠᠢ ᠶᠤᠮ ᠳᠠ
ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠢ᠋ ᠪᠡᠨ ᠶᠡᠷᠦ ᠨᠢ
ᠬᠠᠭᠠᠨ ᠪᠣᠯᠭᠠᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ?》
ᠶᠠᠭ ᠳᠠᠭᠤᠰᠬᠤ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ
ᠶᠠᠩᠵᠤ ᠶ᠋ᠢᠨ ᠶᠠᠭᠤᠮᠠ ᠪᠣᠯᠪᠠ
ᠰᠣᠨᠣᠷ ᠤ᠋ᠨ ᠨᠦᠬᠡᠨ ᠳ᠋ᠦ᠍ ᠬᠡᠰᠡᠭ ᠬᠣᠯᠬᠢ
ᠰᠣᠨᠢᠨ ᠤ᠋ ᠲᠠᠰᠤᠷᠬᠠᠢ ᠰᠢᠭ᠋ ᠦᠯᠡᠳᠡᠪᠡ
ᠠᠭᠤᠢ ᠳ᠋ᠤ᠌ ᠣᠷᠣᠭᠰᠠᠨ ᠬᠢᠷᠰᠠ ᠰᠢᠭ᠋
ᠠᠪᠲᠠᠵᠤ ᠥᠭᠬᠦ ᠦᠭᠡᠢ ᠵᠣᠪᠠᠭᠠᠪᠠ᠃
ᠳᠤᠮᠳᠠ ᠬᠤᠷᠤᠭᠤ ᠤᠬᠤᠵᠤ ᠤᠬᠤᠵᠤ
ᠳᠤᠷᠠᠮᠵᠢᠬᠠᠨ ᠪᠤᠴᠠᠵᠤ ᠢᠷᠡᠪᠡ
ᠡᠷᠡᠬᠡᠢ ᠳᠠᠷᠠᠭᠠ ᠨᠢ ᠣᠴᠢᠭᠠᠳ
ᠡᠪ ᠢ᠋ᠶ᠋ᠡᠷ ᠣᠷᠣᠯᠳᠣᠭᠠᠳ ᠴᠤ ᠳᠡᠢᠯᠦᠭᠰᠡᠨ ᠦᠭᠡᠢ
ᠳᠣᠯᠢᠶᠠᠪᠤᠷ ᠨᠠᠭᠠᠨᠠ ᠠ᠋ᠴᠠ ᠨᠢ ᠳᠣᠪᠲᠣᠯᠤᠭᠠᠳ
ᠳᠣᠷᠪᠢᠲᠠᠢ ᠠᠮᠵᠢᠯᠲᠠ ᠣᠯᠤᠭᠰᠠᠨ ᠦᠭᠡᠢ
ᠢᠳᠠᠮ ᠬᠤᠷᠤᠭᠤ ᠣᠴᠢᠬᠤ ᠳ᠋ᠤ᠌
ᠶᠠᠷᠭᠢᠵᠤ ᠴᠠᠭᠠᠰᠢ ᠣᠷᠣᠪᠠ᠃
《ᠪᠢ ᠶᠠᠪᠤᠭᠠᠳ ᠨᠡᠮᠡᠷᠢ ᠦᠭᠡᠢ》 ᠭᠡᠳ
ᠪᠢᠴᠢᠬᠠᠨ ᠰᠢᠭᠡᠵᠢ ᠲᠠᠲᠠᠭᠠᠯᠵᠠᠯᠠ᠃
《ᠡᠷᠢᠶᠡᠨ ᠵᠥᠭᠡᠢ ᠣᠷᠣᠭᠰᠠᠨ ᠰᠢᠭ᠋
ᠢᠷᠪᠢᠭᠢᠨᠡᠭᠦᠯᠵᠦ ᠵᠠᠭᠠᠲᠤᠨᠠᠭᠤᠯᠤᠭᠠᠳ
ᠡᠵᠡᠨ ᠦ᠌ ᠪᠡᠶᠡ ᠶ᠋ᠢ ᠶᠡᠷᠦ ᠨᠢ
ᠡᠪ ᠦᠭᠡᠢ ᠪᠣᠯᠭᠠᠵᠤ ᠪᠠᠢᠨᠠ᠂
ᠲᠡᠢᠮᠦ ᠡᠴᠡ ᠡᠭᠦᠨ ᠢ᠋ ᠠᠪᠤᠭᠰᠠᠨ ᠨᠢ
ᠲᠡᠷᠢᠭᠦᠨ ᠬᠠᠭᠠᠨ ᠪᠣᠯᠤᠨᠠ》 ᠭᠡᠵᠦ
ᠢᠳᠠᠮ ᠬᠤᠷᠤᠭᠤ ᠲᠡᠨᠳᠡ ᠡᠴᠡ
ᠶᠠᠭ ᠦᠭᠡᠢ ᠰᠠᠨᠠᠯ ᠭᠠᠷᠭᠠᠯᠠ᠃
ᠰᠢᠭᠡᠵᠢ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ
ᠴᠢᠬᠢ ᠤᠷᠤᠭᠤ ᠭᠦᠶᠦᠭᠡᠳ ᠣᠷᠣᠴᠢᠬᠠᠪᠠ
ᠤᠳᠠᠵᠤ ᠤᠳᠠᠵᠤ᠂ ᠤᠬᠤᠵᠤ ᠤᠬᠤᠵᠤ
ᠤᠷᠠᠨ ᠬᠢᠮᠤᠰᠤᠨ ᠤ᠋ ᠪᠠᠨ ᠵᠠᠪᠰᠠᠷ ᠲᠤ
ᠴᠠᠭᠠᠨ ᠬᠤᠯᠬᠢ ᠡᠭᠦᠷᠦᠭᠰᠡᠭᠡᠷ
ᠴᠠᠭᠠᠨᠠ ᠪᠠᠨ ᠪᠠᠶᠠᠷᠲᠠᠢ ᠭᠠᠷᠴᠤ ᠢᠷᠡᠪᠡ
ᠢᠩᠭᠢᠭᠡᠳ ᠰᠢᠭᠡᠵᠢ ᠬᠤᠷᠤᠭᠤ
ᠶᠡᠬᠡ ᠬᠠᠭᠠᠨ ᠪᠣᠯᠪᠠ ᠠ᠋᠃
ᠢᠳᠠᠮ᠄
《ᠡᠷᠳᠡᠨᠢ ᠶ᠋ᠢᠨ ᠮᠥᠩᠭᠥᠨ ᠪᠦᠰᠡ ᠬᠡᠨ ᠳ᠋ᠦ᠍ ᠪᠠᠢᠨᠠ ᠪᠣᠢ?
ᠡᠨᠡ ᠯᠡ ᠬᠠᠭᠠᠨ ᠪᠣᠯᠬᠤ ᠶᠣᠰᠣᠲᠠᠢ
ᠲᠡᠷᠢᠭᠦᠨ ᠨᠠᠩᠵᠢᠳ ᠢ᠋ ᠬᠡᠨ ᠡᠬᠢᠯᠡᠵᠦ
ᠲᠩᠷᠢ ᠭᠠᠵᠠᠷ ᠲᠤ᠌ ᠬᠦᠷᠲᠡᠭᠡᠳᠡᠭ ᠪᠢᠯᠡ?
ᠲᠡᠷᠡ ᠯᠠ ᠬᠠᠭᠠᠨ ᠪᠣᠯᠬᠤ ᠤᠴᠢᠷᠲᠠᠢ᠃》
ᠰᠢᠭᠡᠵᠢ᠄
《ᠬᠠᠭᠠᠨ ᠪᠣᠯᠬᠤ ᠳ᠋ᠤ᠌ ᠳᠤᠷᠠ ᠦᠭᠡᠢ ᠬᠤᠷᠤᠭᠤ
ᠬᠠᠮᠢᠭᠠ ᠠ᠋ᠴᠠ ᠪᠢᠳᠡᠨ ᠳ᠋ᠦ᠍ ᠪᠠᠢᠬᠤ ᠪᠣᠢ᠂
ᠪᠡᠶᠡ ᠵᠢᠵᠢᠭ ᠭᠡᠬᠦ ᠦᠭᠡᠢ ᠪᠣᠯ
ᠪᠢ ᠴᠦ᠍ ᠭᠡᠰᠡᠨ ᠬᠠᠭᠠᠨᠴᠢᠯᠠᠵᠤ ᠴᠢᠳᠠᠨᠠ᠃
ᠡᠯᠳᠡᠪ ᠦ᠋ᠨ ᠦᠭᠡ ᠪᠡᠷ ᠶᠠᠭᠠᠬᠢᠬᠤ ᠪᠣᠢ
ᠡᠷᠳᠡᠮ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠷᠣᠯᠳᠣᠶᠠ
ᠡᠨᠡ ᠲᠡᠮᠡᠴᠡᠭᠡᠨ ᠳ᠋ᠦ᠍ ᠲᠥᠷᠥᠭᠦᠯᠦᠭᠰᠡᠨ ᠨᠢ
ᠡᠵᠡᠨ ᠬᠠᠭᠠᠨ ᠪᠣᠯᠤᠨᠠ᠃》
ᠳᠣᠯᠢᠶᠠᠪᠤᠷ᠄
《ᠤᠷᠢᠳᠤ ᠤᠷᠭᠤᠭᠰᠠᠨ ᠴᠢᠬᠢᠨ ᠡᠴᠡ
ᠬᠣᠢᠨᠠ ᠤᠷᠭᠤᠭᠰᠠᠨ ᠡᠪᠡᠷ ᠭᠡᠭᠴᠢ ᠪᠡᠷ
ᠤᠬᠠᠭᠠᠨᠲᠤ ᠰᠢᠭᠡᠵᠢ ᠶ᠋ᠢᠨ ᠰᠠᠨᠠᠯ ᠢ᠋
ᠤᠤᠬᠠᠢ ᠶ᠋ᠢᠨ ᠲᠠᠰᠤ ᠵᠥᠪᠰᠢᠶᠡᠷᠡᠵᠦ ᠪᠠᠢᠨᠠ᠃》
ᠳᠤᠮᠳᠠ ᠢᠳᠠᠮ ᠬᠤᠷᠤᠭᠤ ᠨᠤᠭᠤᠳ
ᠳᠤᠷᠠᠲᠠᠢ ᠭᠡᠭᠴᠢ ᠳᠡᠮᠵᠢᠵᠡᠢ᠃
ᠡᠷᠡᠬᠡᠢ ᠬᠠᠷᠢᠨ ᠲᠡᠭᠡᠨᠡᠭᠡᠯᠵᠡᠪᠡᠴᠦ
ᠡᠷᠬᠡ ᠦᠭᠡᠢ ᠭᠠᠭᠴᠠᠭᠠᠷᠳᠠᠯᠠ᠃
ᠠᠶᠠᠭᠠ ᠳᠦᠭᠦᠷᠡᠩ ᠤᠰᠤᠨ ᠳ᠋ᠤ᠌
ᠠᠷᠤ ᠥᠪᠥᠷ ᠦᠭᠡᠢ ᠨᠣᠷᠴᠤ
ᠠᠩᠬᠢᠯᠤᠭᠤᠨ ᠦᠨᠦᠷᠲᠦ ᠰᠠᠪᠤᠩ ᠢ᠋
ᠠᠯᠠᠭ ᠴᠣᠭᠣᠭ ᠦᠭᠡᠢ ᠲᠦᠷᠬᠢᠵᠦ
ᠡᠵᠡᠨ ᠦ᠌ ᠲᠡᠷᠢᠭᠦᠨ ᠢ᠋ ᠴᠡᠪᠡᠷᠯᠡᠬᠦ
ᠡᠷᠬᠢᠮ ᠠᠵᠢᠯ ᠡᠬᠢᠯᠡᠯᠡ᠃
ᠲᠡᠷᠡ ᠡᠨᠡ ᠭᠡᠵᠦ ᠢᠯᠭᠠᠯ ᠦᠭᠡᠢ
ᠲᠩᠰᠢ ᠰᠠᠢᠨ ᠣᠷᠣᠯᠴᠠᠪᠠ
ᠴᠢ ᠪᠢ ᠭᠡᠵᠦ ᠬᠡᠯᠡᠯ ᠦᠭᠡᠢ
ᠴᠢᠩ ᠰᠢᠳᠤᠷᠭᠤ ᠵᠢᠳᠬᠦᠪᠡ᠃
1994 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠶᠠᠨᠴᠡᠴᠡᠭ ᠸᠠᠩ᠂ ᠪᠠᠳᠮᠠ
ᠬᠢᠨᠠᠭᠴᠢ ᠪᠠᠭᠰᠢ᠄ ᠳᠠᠷᠤᠴᠢᠨ ᠨᠠᠨᠳᠢᠨ᠂ ᠪᠠᠶᠠᠨᠴᠡᠴᠡᠭ᠂ ᠣᠳᠬᠠᠨᠰᠣᠠ