ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ᠂ ᠨᠠᠢ᠍ᠮᠠ ᠶᠢᠨ ᠠᠭᠤᠯᠠᠨ ᠳᠤ ᠁ (ᠠᠷᠪᠠᠨ ᠬᠣᠶᠠᠷ) Сэрүүхэн тал нутаг–<свис> Вальтер Босгард (Walter Bosshard)- Дөрөвдүгээр бөлөг 12
236ᠠᠷᠪᠠᠨ ᠬᠣᠶᠠᠷ ᠂ ᠬᠦᠩ ᠦ᠋ᠨ ᠣᠷᠳᠣᠨ - ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ
ᠰᠥᠨᠢᠳ ᠸᠠᠩ ᠤ᠋ᠨ ᠰᠢᠨᠡ ᠲᠥᠪ ᠵᠠᠪᠰᠠᠷ ᠲᠤ᠌ ᠶᠡᠬᠡ ᠴᠡᠷᠢᠭ ᠠᠩᠭᠢ ᠪᠠᠢᠭᠤᠯᠤᠭᠳᠠᠪᠠ᠃ ᠲᠥᠷᠥ ᠶ᠋ᠢᠨ ᠠᠯᠪᠠᠲᠠᠳ ᠳᠥᠷᠪᠡᠨ ᠵᠦᠭ ᠲᠦ᠍ ᠳᠠᠪᠬᠢᠯᠳᠤᠨ ᠴᠡᠷᠢᠭ ᠡᠯᠰᠡᠵᠦ ᠣᠯᠠᠨ ᠵᠠᠯᠠᠭᠤᠴᠤᠳ ᠢ᠋ ᠡᠨᠡᠬᠦ ᠲᠠᠯᠠ ᠨᠤᠲᠤᠭ ᠤ᠋ᠨ ᠬᠣᠪᠣᠷᠬᠠᠨ ᠬᠣᠲᠠ ᠳ᠋ᠤ᠌ ᠴᠤᠭᠯᠠᠭᠤᠯᠪᠠ᠃ ᠡᠨᠡ ᠬᠦ᠌ ᠭᠡᠨᠡᠳᠲᠡ ᠶ᠋ᠢᠨ ᠬᠥᠮᠦᠨ ᠠᠮᠠ ᠶ᠋ᠢᠨ ᠨᠡᠮᠡᠭᠳᠡᠯ ᠡᠴᠡ ᠪᠣᠯᠵᠤ ᠡᠨᠳᠡᠬᠢ ᠢᠳᠡᠰᠢ ᠤᠤᠭᠤᠰᠢᠨ ᠤ᠋ ᠠᠰᠠᠭᠤᠳᠠᠯ ᠢ᠋ ᠪᠣᠢ ᠪᠣᠯᠭᠠᠭᠰᠠᠨ ᠪᠠᠢᠨᠠ᠃ ᠮᠢᠨᠦ ᠬᠠᠭᠤᠴᠢᠨ ᠨᠠᠢᠵᠠ ᠳ᠋ᠢᠯᠸᠡ ᠬᠤᠲᠤᠭᠲᠤ ᠨᠢᠭᠡᠨᠲᠡ ᠵᠠᠩᠵᠤᠨ ᠡᠷᠭᠦᠮᠵᠢᠯᠡᠭᠳᠡᠵᠦ᠂ ᠪᠠᠷᠠᠭᠤᠨ ᠬᠡᠰᠡᠭ ᠦ᠋ᠨ ᠤᠷᠠᠳ ᠨᠤᠲᠤᠭ ᠠ᠋ᠴᠠ ᠲᠡᠮᠴᠦᠭᠳᠦᠩᠷᠣᠪ ᠨᠣᠶᠠᠨ ᠳ᠋ᠤ᠌ 5000 ᠴᠡᠷᠢᠭ ᠦ᠋ᠨ ᠠᠭᠲᠠ ᠬᠤᠳᠠᠯᠳᠤᠨ ᠠᠪᠴᠢᠷᠠᠬᠤ ᠡᠭᠦᠷᠭᠡ ᠶ᠋ᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠪᠠᠢᠨᠠ᠃
- ᠲᠡᠮᠴᠦᠭᠳᠦᠩᠷᠣᠪ ᠨᠣᠶᠠᠨ ᠬᠠᠮᠢᠭᠠ ᠠ᠋ᠴᠠ ᠡᠢᠮᠦ ᠠᠷᠪᠢᠨ ᠮᠥᠩᠭᠥ ᠣᠯᠤᠭᠰᠠᠨ ᠪᠣᠯ? ᠭᠡᠵᠦ ᠨᠠᠮᠠᠶ᠋ᠢ ᠮᠣᠩᠭᠣᠯᠴᠤᠳ ᠠ᠋ᠴᠠ ᠠᠰᠠᠭᠤᠬᠤ ᠪᠠᠷ :
- ᠶᠠᠫᠣᠨᠴᠤᠳ ᠲᠡᠭᠦᠨ ᠳ᠋ᠦ᠍ 100 ᠲᠦᠮᠡᠨ ᠶᠸᠨ ᠵᠢᠭᠡᠯᠡᠭᠦᠯᠵᠦ ᠥᠭ᠍ᠭᠦᠭ᠍ᠰᠡᠨ ᠢ᠋ ᠴᠢ ᠮᠡᠳᠡᠬᠦ ᠦᠭᠡᠢ ᠶᠦᠮ ᠤᠤ? ᠡᠨᠡ ᠬᠦ᠌ ᠮᠥᠩᠭᠥ ᠳ᠋ᠡᠭᠡᠨ ᠶᠡᠬᠡᠩᠬᠢ ᠶ᠋ᠢ ᠨᠢ ᠵᠠᠷ ᠵᠡᠪᠰᠡᠭ ᠂ ᠳᠠᠷᠢ ᠰᠤᠮᠤ ᠂ ᠨᠢᠰᠬᠡᠯ ᠂ ᠮᠠᠰᠢᠨ ᠲᠡᠷᠭᠡ ᠵᠡᠷᠭᠡ ᠶᠠᠭᠤᠮᠠ ᠥᠭᠭᠦᠭᠰᠡᠨ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠡᠳᠦᠢ ᠲᠡᠳᠦᠢ ᠪᠡᠯᠡᠨ ᠮᠥᠩᠭᠥ ᠴᠦ᠍ ᠥᠭᠭᠦᠭᠰᠡᠨ ᠪᠠᠢᠬᠠ ᠭᠡᠨᠡ᠃
ᠡᠨᠡ ᠴᠦ᠍ ᠶᠣᠰᠣᠲᠠᠢ ᠮᠠᠭᠤ ᠴᠢᠮᠡᠭᠡ ᠳᠡ ! ᠶᠠᠫᠣᠨ ᠤ᠋ ᠣᠹᠢᠼᠧᠷ ᠦ᠋ᠳ ᠡᠨᠡ ᠬᠦ᠌ ᠵᠠᠯᠠᠭᠤ ᠮᠣᠩᠭᠣᠯ ᠸᠠᠩ ᠢ᠋ ᠠᠯᠪᠠᠲᠠᠨ ᠡᠢᠮᠦ ᠶᠡᠬᠡ ᠴᠡᠷᠢᠭ ᠠᠩᠭᠢ ᠪᠠᠢᠭᠤᠯᠤᠭᠤᠯᠵᠤ ᠪᠠᠢᠨᠠ᠂ ᠤᠴᠢᠷ ᠨᠢ ᠡᠨᠡ ᠬᠦ᠌ ᠮᠣᠩᠭᠣᠯ ᠤᠯᠤᠰ ᠨᠢ ᠲᠦᠮᠡ ᠡᠴᠡ ᠲᠦᠮᠡ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠪᠠᠷ ᠲᠡᠵᠢᠭᠡᠵᠦ ᠳᠡᠢᠯᠬᠦ ᠦᠭᠡᠢ ᠰᠢᠦ ᠳᠡ᠃
- ᠲᠡᠮᠴᠡᠭᠲᠦᠩᠷᠣᠪ ᠨᠣᠶᠠᠨ ᠲᠡᠭᠡᠭᠡᠳ ᠶᠠᠭᠤ ᠪᠠᠷ ᠢ᠋ᠶ᠋ᠠᠨ ᠡᠨᠡ ᠵᠢᠭᠡᠯᠡᠯᠭᠡ ᠶ᠋ᠢ ᠪᠤᠴᠠᠭᠠᠨᠠ ᠭᠡᠵᠦ ᠪᠠᠢᠬᠤ ᠪᠣᠢ?
- ᠪᠤᠴᠠᠭᠠᠨᠠ ᠭᠡᠨᠡ? ᠪᠤᠴᠠᠭᠠᠬᠤ ᠶ᠋ᠢ ᠶᠠᠫᠣᠨᠴᠤᠳ ᠥᠴᠦᠬᠡᠨ ᠴᠦ᠍ ᠬᠦᠰᠡᠬᠦ ᠦᠭᠡᠢ᠃ ᠲᠡᠮᠴᠦᠭᠲᠦᠩᠷᠣᠪ ᠨᠣᠶᠠᠨ ᠲᠡᠳᠡᠨ ᠳ᠋ᠦ᠍ ᠪᠦᠬᠦ ᠤᠯᠤᠰ ᠢ᠋ᠶ᠋ᠠᠨ ᠬᠤᠳᠠᠯᠳᠤᠭᠰᠠᠨ ᠰᠢᠦ᠃ ᠮᠣᠩᠭᠣᠯ ᠲᠡᠭᠡᠭᠡᠳ 100 ᠲᠦᠮᠡᠨ ᠶᠸᠨ ᠦ᠌ ᠦᠨᠡ ᠬᠦᠷᠦᠨᠡ ᠭᠡᠳᠡᠭ ᠲᠦ᠍ ᠴᠢ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠨᠠ ᠤᠤ ?
ᠪᠢ ᠪᠠᠰᠠ ᠶᠠᠫᠣᠨ ᠤ᠋ ᠬᠤᠳᠠᠯᠳᠤᠭᠠᠴᠢᠳ ᠬᠥᠳᠡᠭᠡ ᠨᠤᠲᠤᠭ ᠢ᠋ᠶ᠋ᠠᠷ ᠳᠠᠪᠬᠢᠯᠳᠤᠨ ᠴᠡᠷᠢᠭ ᠦ᠋ᠨ ᠠᠭᠲᠠ ᠬᠤᠳᠠᠯᠳᠤᠨ ᠠᠪᠴᠤ ᠪᠠᠢᠬᠤ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠪᠠ᠃ ᠮᠣᠩᠭᠣᠯᠴᠤᠳ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠶ᠋ᠢᠨ ᠬᠥᠭᠵᠢᠯᠲᠡ ᠢᠷᠡᠯᠡ ᠭᠡᠵᠦ ᠪᠠᠶᠠᠷᠯᠠᠵᠠᠭᠠᠵᠤ ᠪᠠᠢᠪᠠ᠃ ᠲᠡᠳᠡ ᠨᠠᠷ ᠡᠪᠦᠯ ᠥᠩᠭᠡᠷᠡᠵᠦ ᠳᠡᠢᠯᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠬᠥᠭᠰᠢᠨ ᠮᠣᠷᠢᠳ ᠢ᠋ᠶ᠋ᠠᠨ ᠳᠠᠭᠤᠨ ᠠᠪᠠᠴᠢᠵᠤ᠂ ᠮᠣᠷᠢ ᠪᠣᠯᠭᠠᠨ ᠢ᠋ 40 ~ 50 ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠬᠤᠳᠠᠯᠳᠤᠵᠤ ᠪᠠᠢᠪᠠ᠃ ᠮᠣᠷᠢᠨ ᠤ᠋ ᠠᠷᠠᠯᠵᠢᠶᠠ ᠳ᠋ᠤ᠌ ᠦᠯᠦ ᠲᠠᠨᠢᠬᠤ ᠶᠠᠫᠣᠨᠴᠤᠳ ᠵᠥᠪᠬᠡᠨ ᠮᠠᠨᠵᠤ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠲᠥᠯᠥᠳᠡᠭ ᠪᠠᠢᠨᠠ᠃ ᠨᠢᠭᠡ ᠮᠠᠨᠵᠤ ᠲᠥᠭᠥᠷᠢᠭ ᠨᠢ ᠨᠢᠭᠡ ᠬᠢᠲᠠᠳ ᠲᠥᠭᠥᠷᠢᠭ ᠦ᠋ᠨ ᠠᠷᠪᠠᠨ ᠤ᠋ ᠶᠢᠰᠦ ᠲᠡᠢ ᠨᠢ ᠲᠡᠩᠴᠡᠭᠦᠦ ᠪᠠᠢᠳᠠᠭ᠃ ᠭᠡᠬᠦ ᠳ᠋ᠡᠭᠡᠨ ᠡᠨᠡ ᠨᠢ ᠪᠠᠰᠠ ᠯᠠ ᠰᠠᠢᠨ ᠮᠠᠢᠮᠠᠢ ᠳ᠋ᠠᠭᠠᠨ ᠣᠷᠣᠵᠤ᠂ ᠠᠷᠢᠬᠢᠳᠠᠨ ᠨᠠᠢᠷᠯᠠᠵᠠᠭᠠᠵᠤ ᠪᠠᠢᠪᠠ᠃
ᠮᠠᠨᠵᠤ ᠲᠥᠭᠥᠷᠢᠭ ᠨᠢ ᠮᠣᠩᠭᠣᠯ ᠤ᠋ᠨ ᠭᠦᠢᠯᠭᠡᠭᠡᠨ ᠳ᠋ᠦ᠍ ᠵᠠᠷᠤᠭᠳᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠮᠣᠩᠭᠣᠯᠴᠤᠳ ᠲᠡᠭᠦᠨ ᠳ᠋ᠦ᠍ ᠳᠤᠷᠠ ᠦᠭᠡᠢ᠂ ᠪᠣᠯᠬᠤ ᠶ᠋ᠢᠨ ᠳᠣᠲᠣᠷᠠ ᠬᠤᠷᠳᠤᠨ ᠬᠢᠲᠠᠳ ᠪᠠᠩᠬᠢ ᠶ᠋ᠢᠨ ᠴᠠᠭᠠᠰᠤᠨ ᠵᠣᠭᠣᠰ ᠢ᠋ᠶ᠋ᠠᠷ ᠰᠣᠯᠢᠵᠤ ᠪᠠᠢᠪᠠ᠃ ᠬᠠᠤᠯᠢ ᠳ᠋ᠤ᠌ ᠦᠨᠳᠦᠰᠦᠯᠡᠪᠡᠯ ᠡᠨᠡ ᠬᠣᠶᠠᠷ ᠮᠥᠩᠭᠥᠨ ᠲᠡᠮᠳᠡᠭᠲᠦ ᠨᠢ ᠠᠳᠠᠯᠢ ᠦᠨᠡ ᠥᠷᠲᠡᠭ ᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠨᠡ᠃ ᠨᠢᠭᠡᠨ ᠡᠳᠦᠷ ᠪᠢ ᠮᠥᠩᠭᠥ ᠪᠡᠷ ᠡᠮᠵᠢᠭᠰᠡᠨ ᠠᠶᠠᠭᠠᠨ ᠤ᠋ ᠦᠨᠡ ᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠮᠣᠩᠭᠣᠯ ᠠᠷᠪᠠᠨ ᠲᠠᠪᠤᠨ ᠬᠢᠲᠠᠳ ᠲᠥᠭᠥᠷᠢᠭ ᠪᠤᠶᠤ ᠠᠷᠪᠠᠨ ᠨᠠᠢ᠍ᠮᠠᠨ ᠮᠠᠨᠵᠤ ᠲᠥᠭᠥᠷᠢᠭ ᠭᠡᠵᠦ ᠬᠠᠷᠢᠭᠤᠯᠬᠤ ᠶᠤᠮ ᠪᠢᠯᠡ᠃
ᠨᠠᠢ᠍ᠮᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠡᠬᠢᠨ ᠦ᠌ ᠨᠢᠭᠡ ᠡᠳᠦᠷ ᠵᠡᠭᠦᠨᠲᠡᠢ ᠡᠴᠡ ᠨᠢᠭᠡ ᠮᠣᠷᠢᠲᠠᠨ ᠬᠦᠷᠢᠶᠡᠨ ᠡᠮᠦᠨᠡ ᠢᠷᠡᠭᠡᠳ ᠪᠠᠭᠤᠪᠠ᠃ ᠲᠡᠷᠡ ᠪᠢᠳᠡᠨ ᠳ᠋ᠦ᠍ ᠳᠡᠭᠡᠷᠡᠮᠴᠢᠳ ᠦ᠋ᠨ ᠴᠢᠮᠡᠭᠡ ᠶ᠋ᠢ ᠶᠠᠷᠢᠵᠤ ᠥᠭᠭᠦᠯᠡ᠃ ᠡᠨᠡ ᠨᠢᠭᠡ ᠪᠦᠯᠦᠭ ᠳᠡᠭᠡᠷᠡᠮᠴᠢᠳ ᠲᠤᠯᠤᠨ ᠨᠠᠭᠤᠷ ᠤ᠋ᠨ ᠲᠡᠨᠳᠡ ᠡᠴᠡ ᠢᠷᠡᠭᠰᠡᠨ ᠪᠥᠭᠡᠳ ᠵᠠᠮ ᠵᠠᠭᠤᠷᠠ ᠵᠠᠩᠪᠸᠢ ᠰᠢᠶᠠᠨ ᠤ᠋ ᠣᠷᠴᠢᠮ ᠪᠠᠢᠭᠠ ᠬᠦᠩ ᠴᠧ ᠶ᠋ᠢ ᠳᠡᠭᠡᠷᠡᠮᠳᠡᠭᠰᠡᠨ ᠪᠠᠢᠨᠠ᠃
- ᠭᠤᠷᠪᠠᠨ ᠮᠢᠩᠭᠠ ᠣᠷᠴᠢᠮ ᠯᠠ ᠬᠥᠮᠦᠨ ᠲᠡᠢ ᠪᠠᠢᠬᠠ ! ᠮᠠᠨᠵᠤ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠳ ᠲᠡᠳᠡᠨ ᠡᠴᠡ ᠪᠠᠢᠯᠳᠤᠭᠠ ᠦᠭᠡᠢ ᠪᠡᠷ ᠳᠤᠲᠠᠭᠠᠭᠰᠠᠨ ᠶᠤᠮ᠃
- ᠲᠡᠳᠡᠨ ᠦ᠌ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠵᠤ ᠪᠠᠢᠬᠤ ᠶ᠋ᠢ ᠴᠢ ᠮᠡᠳᠡᠬᠦ ᠤᠤ? ᠭᠡᠵᠦ ᠮᠣᠩᠭᠣᠯ ᠤ᠋ᠨ ᠬᠦᠩ ᠠᠰᠠᠭᠤᠬᠤ ᠳ᠋ᠤ᠌ :
- ᠪᠠᠷᠠᠭᠤᠨ ᠬᠣᠢᠰᠢ ᠪᠠᠨ ᠵᠠᠩᠪᠸᠢ ᠰᠢᠶᠠᠨ ᠤ᠋ ᠵᠦᠭ ᠭᠡᠵᠦ ᠬᠥᠮᠦᠨ ᠶᠠᠷᠢᠵᠤ ᠪᠠᠢᠭᠰᠠᠨ᠃ ᠣᠳᠣ ᠲᠡᠨᠳᠡ ᠬᠦᠷᠴᠢᠬᠡᠭᠡᠳ ᠳᠡᠭᠡᠷᠡᠮᠳᠡᠵᠦ ᠪᠠᠢᠬᠤ ᠴᠤ᠌ ᠮᠠᠭᠠᠳ ᠦᠭᠡᠢ ᠭᠡᠨᠡ᠃
ᠭᠡᠷ ᠦ᠋ᠨ ᠡᠮᠦᠨᠡ ᠨᠠᠷᠠᠨ ᠤ᠋ ᠳᠣᠣᠷᠠ ᠪᠢᠳᠡ ᠡᠨᠡ ᠬᠦ᠌ ᠥᠯᠵᠡᠢ ᠪᠤᠰᠤ ᠴᠢᠮᠡᠭᠡᠨ ᠦ᠌ ᠲᠤᠬᠠᠢ ᠤᠳᠠᠲᠠᠯᠠ ᠶᠠᠷᠢᠯᠳᠤᠪᠠ᠃ ᠮᠣᠩᠭᠣᠯ ᠤ᠋ᠨ ᠬᠦᠩ ᠨᠡᠯᠢᠶᠡᠳ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ :
- ᠪᠢ ᠵᠥᠪᠬᠡᠨ ᠲᠡᠳᠡᠨ ᠦ᠌ ᠬᠠᠮᠢᠭᠠ ᠠ᠋ᠴᠠ ᠭᠡᠨᠡᠳᠲᠡ ᠭᠠᠷᠴᠤ ᠢᠷᠡᠭᠰᠡᠨ ᠪᠠ ᠬᠡᠨ ᠲᠡᠳᠡᠨ ᠳ᠋ᠦ᠍ ᠳᠠᠷᠢ ᠰᠤᠮᠤ ᠣᠯᠭᠣᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠶᠡ ᠭᠡᠮᠡᠨ ᠪᠣᠳᠣᠵᠤ ᠪᠠᠢᠨᠠ ᠭᠡᠯᠡ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠪᠢᠳᠡ ᠬᠠᠷᠢᠭᠤᠯᠲᠠ ᠪᠠᠨ ᠣᠯᠤᠯᠠ᠃ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠠ᠋ᠴᠠ ᠬᠣᠢᠰᠢ ᠪᠠᠨ ᠶᠠᠪᠤᠬᠤ ᠵᠠᠬᠢᠳᠠᠯ ᠬᠦᠷᠭᠡᠭᠴᠢ ᠪᠢᠳᠡᠨ ᠳᠡᠭᠡᠷᠡ ᠢᠷᠡᠭᠡᠳ ᠰᠢᠨᠡ ᠰᠤᠷᠠᠭ ᠳᠠᠮᠵᠢᠭᠤᠯᠪᠠ᠃
- ᠳᠡᠭᠡᠷᠡᠮᠴᠢᠳ ᠵᠠᠩᠪᠸᠢ ᠰᠢᠶᠠᠨ ᠬᠦᠷᠦᠭᠡᠳ ᠪᠠᠭᠤᠳᠠᠯᠯᠠᠵᠤ ᠪᠠᠢᠬᠤ ᠳ᠋ᠤᠨᠢ ᠬᠥᠮᠦᠨ ᠪᠣᠯᠭᠠᠨ ᠭᠤᠷᠪᠠᠨ ᠲᠥᠭᠥᠷᠢᠭ ᠂ ᠬᠣᠷᠢᠨ ᠰᠤᠮᠤ ᠣᠯᠵᠠᠢ᠃ ᠲᠡᠭᠡᠭᠡᠳ ᠡᠳᠡᠭᠡᠷ ᠳᠡᠭᠡᠷᠡᠮᠴᠢᠳ ᠦᠷᠭᠦᠯᠵᠢᠯᠡᠨ ᠴᠠᠭᠠᠰᠢ ᠬᠥᠳᠡᠯᠦᠭᠡᠳ ᠬᠢᠯᠢ ᠳᠠᠪᠠᠵᠤ ᠱᠠᠨ ᠰᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠦ᠌ ᠵᠠᠬᠢᠷᠤᠯ ᠤ᠋ᠨ ᠣᠷᠣᠨ ᠳ᠋ᠤ᠌ ᠣᠷᠣᠭᠠᠳ ᠲᠡᠳᠡᠨ ᠲᠡᠢ ᠪᠠᠢᠯᠳᠤᠵᠤ ᠡᠬᠢᠯᠡᠵᠡᠢ᠃
- ᠲᠡᠳᠡᠨ ᠦ᠌ ᠲᠦᠷᠦᠭᠦᠦ ᠨᠢ ᠬᠡᠨ ᠪᠣᠢ? ᠭᠡᠵᠦ ᠨᠠᠮᠠᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌ :
- ᠰᠡᠷᠡᠩᠪᠣᠣ ᠡᠪᠦᠭᠡᠨ ᠮᠥᠨ ᠭᠡᠵᠦ ᠬᠠᠷᠢᠭᠤᠯᠪᠠ᠃
ᠮᠣᠩᠭᠣᠯ ᠤ᠋ᠨ ᠬᠦᠩ ᠯᠠᠷᠰᠤᠨ ᠡᠨᠡ ᠬᠦ᠌ ᠠᠶᠤᠮᠰᠢᠭᠲᠠᠢ ᠳᠡᠭᠡᠷᠡᠮ ᠦ᠋ᠨ ᠲᠤᠬᠠᠢ ᠮᠡᠳᠡᠳᠡᠭ ᠪᠠᠢᠯᠠ᠃
- ᠠᠩᠬᠠᠨ ᠳ᠋ᠠᠭᠠᠨ ᠲᠡᠷᠡ ᠮᠣᠷᠣᠩᠭᠠ ᠶ᠋ᠢᠨ ᠳᠣᠣᠷᠠ ᠪᠠᠢᠭᠰᠠᠨ᠃ ᠮᠣᠷᠣᠩᠭᠠ ᠭᠡᠳᠡᠭ ᠴᠢᠨᠢ ᠤᠮᠠᠷᠠᠲᠤ ᠳ᠋ᠢᠶᠠᠨᠪᠣᠣ ᠶ᠋ᠢᠨ ᠱᠤᠭᠤᠮ ᠤ᠋ᠨ ᠠᠩᠭ᠌ᠯᠢ ᠬᠥᠮᠦᠨ ᠭᠷᠠᠨᠲ ᠢ ᠠᠯᠠᠭᠰᠠᠨ ᠬᠥᠮᠦᠨ ᠰᠢᠦ᠃ ᠠᠷᠤ ᠮᠣᠩᠭᠣᠯ ᠲᠡᠭᠦᠨ ᠢ᠋ ᠪᠠᠷᠢᠭᠠᠳ᠂ ᠲᠡᠮᠡᠭᠡᠨ ᠡᠴᠡ ᠴᠢᠷᠴᠦ ᠶᠡᠬᠡ ᠬᠦᠷᠢᠶᠡ ᠵᠦᠭ ᠠᠪᠴᠤ ᠶᠠᠪᠤᠭᠰᠠᠨ ᠶᠤᠮ᠃ ᠲᠡᠨᠳᠡ ᠬᠦᠷᠬᠦ ᠳ᠋ᠦ᠍ ᠵᠥᠪᠬᠡᠨ ᠨᠢᠭᠡ ᠵᠢᠵᠢᠭᠬᠡᠨ ᠬᠡᠰᠡᠭ ᠮᠢᠬᠠ ᠯᠠ ᠦᠯᠡᠲᠡᠯᠡ ᠭᠡᠳᠡᠭ᠃ ᠤᠷᠢᠳᠤ ᠢᠩᠭᠢᠵᠦ ᠯᠡ ᠶᠠᠯᠠᠯᠠᠨ ᠰᠢᠢᠳᠬᠡᠵᠦ ᠪᠠᠢᠵᠠᠢ ᠭᠡᠯᠡ᠃
ᠨᠡᠯᠢᠶᠡᠳ ᠬᠡᠳᠦᠨ ᠡᠳᠦᠷ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠨᠢᠭᠡᠨ ᠦᠳᠡᠰᠢ ᠪᠡᠷ ᠮᠠᠰᠢᠨ ᠤ᠋ ᠳ᠋ᠧᠩ ᠬᠠᠷᠠᠩᠭᠤᠢ ᠨᠡᠪᠲᠡᠯᠦᠨ ᠬᠠᠷᠠᠭᠳᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠪᠢ ᠯᠠᠷᠰᠤᠨ ᠲᠠᠢ ᠬᠠᠮᠲᠤ ᠶᠠᠭ ᠭᠡᠷ ᠦ᠋ᠨ ᠡᠮᠦᠨᠡᠬᠢ ᠲᠠᠢᠰᠠᠨ ᠳᠡᠭᠡᠷᠡ ᠰᠠᠭᠤᠵᠤ ᠰᠠᠷᠠ ᠮᠠᠨᠳᠤᠬᠤ ᠶ᠋ᠢ ᠰᠣᠨᠢᠷᠬᠠᠵᠤ ᠪᠠᠢᠪᠠ᠃ ᠡᠨᠡ ᠰᠸᠸᠳ᠋ᠸᠨ ᠬᠥᠮᠦᠨ ᠥᠷᠭᠡᠨ ᠴᠢᠷᠠᠢ ᠪᠠᠨ ᠭᠡᠨᠡᠳᠲᠡ ᠡᠷᠭᠦᠭᠡᠳ᠄
- ᠮᠠᠰᠢᠨ! ᠬᠡᠨ ᠡᠢᠮᠦ ᠣᠷᠣᠢ ᠢᠷᠡᠳᠡᠭ ᠪᠢᠯᠡ? ᠭᠡᠪᠡ᠃
ᠪᠢ ᠳᠤᠷᠠᠨ ᠢ᠋ᠶ᠋ᠠᠨ ᠠᠪᠴᠤ ᠬᠠᠷᠠᠭᠠᠳ 《ᠴᠠᠢᠪᠤᠷ ᠳᠡᠭᠡᠪᠦᠷ ᠲᠠᠢ ᠯᠠ ᠮᠠᠰᠢᠨ ᠪᠠᠢᠨᠠ 》ᠭᠡᠬᠦ ᠪᠡᠷ ᠯᠠᠷᠰᠤᠨ᠄
- ᠲᠡᠭᠡᠪᠡᠯ ᠳ᠋ᠢᠯᠦᠠ ᠬᠤᠲᠤᠭᠲᠤ ᠯᠠ ᠪᠠᠢᠵᠤ ᠲᠠᠭᠠᠷᠠᠯᠠ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠲᠡᠷᠡ ᠮᠣᠩᠭᠣᠯ ᠳ᠋ᠤ᠌ ᠪᠠᠢᠭᠠ ᠮᠠᠰᠢᠨ ᠲᠡᠷᠭᠡ ᠨᠦ᠍ᠭᠦᠳ ᠢ᠋ ᠪᠦᠷ ᠲᠠᠨᠢᠳᠠᠭ ᠠᠵᠢ᠃
ᠪᠢᠳᠡ ᠬᠤᠲᠤᠭᠲᠤ ᠶ᠋ᠢ ᠲᠤᠰᠬᠤ ᠪᠠᠷ ᠬᠦᠷᠢᠶᠡᠨ ᠭᠠᠳᠠᠨᠠ ᠭᠠᠷᠪᠠ᠃ ᠲᠣᠭᠣᠰᠣᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠲᠠᠢ ᠲᠡᠷᠡ ᠲᠠᠪᠢᠭᠠᠳ ᠨᠠᠰᠤᠨ ᠤ᠋ ᠬᠥᠮᠦᠨ ᠭᠡᠮᠡᠷ ᠦᠭᠡᠢ ᠲᠡᠷᠭᠡᠨ ᠡᠴᠡ ᠦᠰᠦᠷᠦᠨ ᠪᠠᠭᠤᠭᠠᠳ᠂ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠪᠢᠳᠡᠨ ᠦ᠌ ᠵᠦᠭ ᠳᠠᠯᠠᠯᠵᠤ ᠥᠪᠡᠷᠦᠨ ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ ᠳ᠋ᠦ᠍ ᠢᠷᠡᠭᠡᠳ ᠪᠠᠶᠠᠷᠯᠠᠵᠤ ᠪᠠᠢᠭᠠ ᠪᠠ᠊ᠨ ᠥᠴᠦᠬᠡᠨ ᠴᠦ᠍ ᠨᠢᠭᠤᠯ ᠦᠭᠡᠢ ᠢᠯᠡᠳᠬᠡᠪᠡ᠃
ᠮᠠᠰᠢᠨ ᠤ᠋ ᠬᠢᠨᠢ ᠨᠢᠭᠡ ᠬᠠᠷᠢᠮᠠᠭ ᠬᠤᠭᠤᠷᠠᠭᠰᠠᠨ ᠠ᠋ᠴᠠ ᠪᠣᠯᠵᠤ ᠣᠷᠣᠢᠲᠠᠯᠠ ᠭᠡᠵᠦ ᠠᠭᠤᠴᠢᠯᠠᠯ ᠬᠦᠰᠡᠪᠡ᠃ ᠯᠠᠷᠰᠤᠨ ᠳᠣᠣᠷᠠ ᠪᠠᠨ ᠰᠦ ᠲᠡᠢ ᠴᠠᠢ᠂ ᠠᠮᠲᠠᠲᠤ ᠬᠣᠭᠣᠯᠠ ᠪᠡᠯᠡᠳᠬᠡᠯᠭᠡᠵᠦ ᠲᠡᠳᠡᠨ ᠳ᠋ᠦ᠍ ᠵᠣᠭᠣᠭᠯᠠᠭᠤᠯᠪᠠ᠃ ᠬᠣᠭᠣᠯᠠᠨ ᠤ᠋ ᠳᠠᠷᠠᠭᠠ ᠬᠤᠲᠤᠭᠲᠤ ᠪᠢᠳᠡᠨ ᠳ᠋ᠦ᠍ ᠤᠴᠠᠷᠠᠯ ᠢ᠋ᠶ᠋ᠠᠨ ᠲᠣᠭᠠᠴᠢᠯᠠ᠄
- ᠪᠢ ᠶᠣᠰᠣᠲᠠᠢ ᠣᠷᠣᠢᠲᠠᠵᠤ ᠬᠦᠷᠴᠡᠢ᠃ ᠬᠢᠲᠠᠳ ᠤ᠋ᠳ ᠲᠡᠨᠳᠡᠬᠢ ᠶ᠋ᠢᠨ ᠮᠣᠷᠢᠳ ᠢ᠋ ᠪᠦᠬᠦᠨ ᠢ᠋ ᠬᠤᠳᠠᠯᠳᠤᠭᠠᠳ ᠠᠪᠴᠢᠬᠠᠵᠠᠢ᠃ ᠭᠠᠭᠴᠠ ᠤᠨᠤᠭᠠ ᠣᠯᠬᠤ ᠳ᠋ᠤ᠌ ᠴᠤ᠌ ᠪᠡᠷᠬᠡᠲᠡᠢ ᠪᠣᠯᠵᠠᠢ᠃
ᠳ᠋ᠢᠯᠦᠠ ᠬᠤᠲᠤᠭᠲᠤ ᠮᠠᠷᠭᠠᠰᠢ ᠵᠠᠪᠰᠠᠷ ᠬᠦᠷᠴᠦ ᠡᠨᠡ ᠪᠠᠢᠳᠠᠯ ᠢ᠋ᠶ᠋ᠠᠨ ᠮᠡᠳᠡᠭᠦᠯᠬᠦ ᠭᠡᠵᠦ ᠪᠠᠢᠭᠠ ᠠᠵᠢ᠃ ᠰᠥᠨᠢ ᠶ᠋ᠢᠨ ᠭᠦᠨ ᠪᠣᠯᠲᠠᠯᠠ ᠪᠢᠳᠡ ᠰᠠᠷᠠᠨ ᠤ᠋ ᠲᠤᠨᠤᠯᠵᠠᠭᠰᠠᠨ ᠭᠡᠷᠡ᠊ᠯ ᠳᠣᠣᠷᠠ ᠰᠠᠭᠤᠵᠠᠭᠠᠵᠤ ᠤᠯᠤᠰ ᠲᠥᠷᠥ ᠂ ᠣᠳᠣ ᠪᠠ ᠢᠷᠡᠭᠡᠳᠦᠢ ᠶ᠋ᠢᠨ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠨᠠᠷᠭᠢᠪᠠ᠃ ᠲᠡᠭᠡᠭᠡᠳ ᠳ᠋ᠢᠯᠦᠠ ᠬᠤᠲᠤᠭᠲᠤ ᠯᠠᠷᠰᠤᠨ ᠤ᠋ ᠵᠣᠴᠢᠨ ᠳ᠋ᠠᠭᠠᠨ ᠪᠡᠯᠡᠳᠬᠡᠨ ᠭᠣᠶᠣ ᠰᠠᠢᠬᠠᠨ ᠶᠠᠩᠵᠤᠯᠠᠭᠰᠠᠨ ᠭᠡᠷ ᠲᠦ᠍ ᠣᠷᠣᠪᠠ᠃
ᠥᠷᠯᠥᠭᠡ ᠶ᠋ᠢᠨ ᠬᠢᠨᠢ ᠲᠠᠪᠤᠨ ᠴᠠᠭ ᠲᠤ᠌ ᠬᠤᠲᠤᠭᠲᠤ ᠨᠢᠭᠡᠨᠲᠡ ᠦᠷᠭᠦᠯᠵᠢᠯᠡᠨ ᠠᠶᠠᠯᠠᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠲᠡᠷᠡ ᠶᠠᠮᠠᠷ ᠨᠢᠭᠡᠨ ᠶᠣᠰᠣᠯᠠᠯ ᠳ᠋ᠤ᠌ ᠣᠷᠣᠯᠴᠠᠬᠤ ᠭᠡᠰᠡᠨ ᠮᠡᠲᠦ ᠰᠢᠷᠠ ᠬᠣᠷᠭᠣᠢ ᠳᠡᠪᠡᠯ ᠡᠮᠦᠰᠴᠦ᠂ ᠶᠡᠬᠡᠮᠰᠦᠭ ᠰᠦᠷᠯᠢᠭ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠱᠠᠪᠢ ᠨᠠᠷ ᠯᠠᠷᠰᠤᠨ ᠠ᠋ᠴᠠ ᠵᠢᠭᠡᠯᠡᠭᠰᠡᠨ ᠰᠢᠷᠠ ᠲᠣᠷᠭᠠᠨ ᠳᠡᠷᠡ ᠶ᠋ᠢ ᠮᠠᠰᠢᠨ ᠳ᠋ᠠᠭᠠᠨ ᠣᠷᠣᠭᠤᠯᠵᠤ ᠪᠠᠢᠪᠠ᠃ ᠡᠭᠦᠨ ᠢ᠋ ᠮᠠᠰᠢᠨ ᠵᠠᠰᠠᠵᠤ ᠰᠢᠨᠡᠳᠬᠡᠬᠦ ᠪᠣᠯᠲᠠᠯᠠ ᠬᠡᠷᠡᠭᠯᠡᠬᠦ ᠶᠦᠮ ᠪᠠᠢᠨᠠ᠃ ᠲᠡᠷᠡ ᠲᠡᠭᠦᠨ ᠳ᠋ᠦ᠍ ᠮᠥᠷᠭᠥᠬᠦ ᠪᠡᠷ ᠢᠷᠡᠭᠰᠡᠨ ᠪᠦᠰᠡᠭᠦᠢ ᠬᠡᠦᠬᠡᠳ ᠦ᠋ᠳ ᠲᠦ᠍ ᠡᠷᠬᠢᠮᠰᠦᠭ ᠬᠦᠨᠳᠦᠲᠡᠢ ᠪᠡᠷ ᠠᠳᠢᠰ ᠲᠠᠯᠪᠢᠭᠰᠠᠨ ᠤ᠋ ᠳᠠᠷᠠᠬᠠ ᠮᠠᠰᠢᠨ ᠳ᠋ᠤ᠌ ᠭᠠᠷᠴᠤ᠂ ᠵᠠᠮ ᠳ᠋ᠠᠭᠠᠨ ᠣᠷᠣᠯᠠ᠃
- ᠶᠠᠮᠠᠷᠬᠠᠨ ᠬᠣᠪᠣᠷ ᠲᠣᠬᠢᠶᠠᠯᠳᠤᠬᠤ ᠬᠥᠮᠦᠨ ᠪᠠ ᠪᠤᠷᠬᠠᠨ ᠤ᠋ ᠪᠦᠷᠢᠯᠸᠠ ᠪᠢᠯᠡ ! ᠣᠳᠣ ᠲᠡᠭᠡᠭᠡᠳ ᠪᠠᠰᠠ ᠵᠠᠩᠵᠤᠨ ᠰᠢᠦ! ᠭᠡᠵᠦ ᠨᠠᠮᠠᠶ᠋ᠢ ᠯᠠᠷᠰᠤᠨ ᠤᠷᠤᠭᠤ ᠬᠠᠨᠳᠤᠨ ᠶᠠᠷᠢᠬᠤ ᠳ᠋ᠤ᠌ ᠲᠡᠷᠡ ᠬᠠᠭᠤᠴᠢᠨ ᠨᠠᠢᠵᠠ ᠪᠠᠨ ᠥᠮᠥᠭᠯᠡᠵᠦ:
- ᠲᠡᠷᠡ ᠶᠡᠬᠡ ᠣᠯᠠᠨ ᠠᠵᠢᠯ ᠬᠢᠭᠰᠡᠨ ᠬᠥᠮᠦᠨ ᠰᠢᠦ! ᠣᠳᠣ ᠳ᠋ᠠᠭᠠᠨ ᠲᠡᠷᠡ ᠶᠠᠳᠠᠭᠤ᠂ ᠲᠡᠭᠦᠨ ᠳ᠋ᠦ᠍ ᠵᠠᠭᠤᠨ ᠠᠳᠤᠭᠤ ᠴᠤ᠌ ᠪᠠᠢᠬᠤ ᠦᠭᠡᠢ ᠪᠠᠢᠭᠠ᠃ ᠪᠢ ᠲᠡᠭᠦᠨ ᠢ᠋ ᠶᠡᠬᠡ ᠬᠦᠷᠢᠶᠡᠨ ᠳ᠋ᠦ᠍ ᠶᠣᠰᠣᠲᠠᠢ ᠪᠠᠶᠠᠨ ᠰᠦᠮᠡ ᠶ᠋ᠢᠨ ᠭᠡᠭᠡᠨ ᠪᠠᠢᠬᠤ ᠳ᠋ᠤᠨᠢ ᠲᠠᠨᠢᠯᠴᠠᠭᠰᠠᠨ ᠶᠤᠮ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠴᠦ᠍ ᠭᠡᠳ ᠮᠥᠨ ᠣᠳᠣ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠨᠠᠢᠷᠰᠠᠭ᠂ ᠨᠢᠭᠦᠯᠡᠰᠦᠩᠭᠦᠢ᠂ ᠪᠤᠰᠤᠳ ᠲᠤ᠌ ᠬᠠᠪᠰᠤᠷᠬᠤ ᠳᠤᠷᠠᠲᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠰᠢᠦ ᠳᠡ! ᠪᠢᠳᠡ ᠲᠡᠭᠦᠨ ᠦ᠌ ᠲᠥᠯᠥᠪᠯᠡᠭᠡ ᠠᠵᠢᠯ ᠳ᠋ᠤ᠌ ᠳ᠋ᠦᠩᠨᠡᠯᠲᠡ ᠬᠢᠬᠦ ᠨᠢ ᠠᠷᠠᠢ ᠲᠣᠬᠢᠷᠠᠮᠵᠢ ᠦᠭᠡᠢ ᠪᠠᠢᠬᠠ᠂ ᠤᠴᠢᠷ ᠨᠢ ᠪᠢᠳᠡ ᠲᠡᠭᠦᠨ ᠢ᠋ ᠶᠠᠮᠠᠷ ᠲᠦᠯᠬᠢᠴᠡ ᠬᠦᠴᠦᠨ ᠡᠴᠡ ᠪᠣᠯᠵᠤ ᠶᠠᠫᠣᠨ ᠤ᠋ ᠲᠠᠯᠠ ᠳ᠋ᠤ᠌ ᠣᠷᠣᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠰᠢᠦ ᠭᠡᠯᠡ᠃
ᠯᠠᠷᠰᠤᠨ ᠬᠦᠩ ᠮᠢᠨᠦ ᠬᠡᠯᠡᠭᠰᠡᠨ ᠦᠭᠡᠨ ᠳ᠋ᠦ᠍ ᠳᠤᠷᠠ ᠦᠭᠡᠢ ᠬᠦᠷᠦᠭᠰᠡᠨ ᠨᠢ ᠢᠯᠡᠬᠡᠨ ᠪᠥᠭᠡᠳ ᠦᠭᠡ ᠳᠠᠭᠤ ᠦᠭᠡᠢ ᠭᠡᠷ ᠲᠡᠭᠡᠨ ᠪᠤᠴᠠᠨ ᠣᠷᠣᠯᠠ᠃
ᠮᠥᠨ ᠲᠡᠷᠡ ᠡᠳᠦᠷ ᠦ᠋ᠨ ᠦᠳᠡ ᠶ᠋ᠢᠨ ᠬᠣᠢᠨᠠ ᠭᠤᠷᠪᠠᠨ ᠠᠴᠢᠶᠠᠨ ᠤ᠋ ᠮᠠᠰᠢᠨ ᠶᠠᠪᠤᠭᠠ ᠨᠢ ᠬᠠᠷᠠᠭᠳᠠᠵᠤ᠂ ᠨᠢᠭᠡᠨ ᠶᠠᠫᠣᠨ ᠵᠢᠯᠣᠭᠣᠴᠢ ᠥᠪᠡᠷ ᠦ᠋ᠨ ᠵᠠᠮ ᠲᠥᠭᠡᠷᠢᠭᠰᠡᠨ ᠭᠡᠳᠡᠭ ᠢ᠋ᠶ᠋ᠡᠨ ᠶᠠᠷᠢᠵᠤ᠂ ᠪᠠᠷᠠᠭᠤᠨᠰᠢ ᠠᠶᠠᠯᠠᠬᠤ ᠵᠠᠮ ᠠᠰᠠᠭᠤᠪᠠ᠃ ᠲᠡᠷᠭᠡᠨ ᠳᠡᠭᠡᠷᠡ ᠪᠦᠷ ᠫᠤᠤ ᠵᠡᠪᠰᠡᠭ ᠦ᠋ᠨ ᠬᠠᠢᠷᠴᠠᠭ ᠠᠴᠢᠶᠠᠯᠠᠵᠤ᠂ ᠵᠡᠪᠰᠡᠭᠯᠡᠭᠰᠡᠨ ᠶᠠᠪᠤᠨᠴᠤᠳ ᠮᠠᠨᠠᠭᠰᠠᠨ ᠪᠠᠢᠪᠠ᠃
ᠤᠳᠠᠯ ᠦᠭᠡᠢ ᠲᠡᠢᠨ ᠳᠡᠭᠳᠡᠬᠦ ᠶ᠋ᠢᠨ ᠲᠡᠮᠳᠡᠭ ᠢᠯᠡᠬᠡᠨ ᠪᠣᠯᠪᠠ᠃ ᠬᠦᠩ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠣᠶᠠᠷ ᠠᠴᠢᠶᠠᠨ ᠤ᠋ ᠮᠠᠰᠢᠨ ᠢ᠋ᠶ᠋ᠠᠨ ᠲᠦᠮᠡᠳ ᠲᠦ᠍ ᠢᠯᠡᠭᠡᠵᠦ᠂ ᠬᠣᠨᠣᠭ ᠪᠤᠳᠠᠭᠠ᠂ ᠪᠤᠭᠤᠳᠠᠢ ᠵᠡᠷᠭᠡ ᠶ᠋ᠢ ᠠᠪᠤᠭᠤᠯᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠬᠣᠭᠣᠰᠣᠨ ᠪᠤᠴᠠᠵᠤ ᠢᠷᠡᠪᠡ᠃ ᠤᠴᠢᠷ ᠨᠢ ᠵᠢᠯᠣᠭᠣᠴᠢ ᠨᠠᠷ ᠨᠢ ᠮᠣᠩᠭᠣᠯ ᠠᠢᠯ ᠤ᠋ᠳ ᠢ᠋ᠶ᠋ᠠᠷ ᠬᠣᠨᠣᠭᠯᠠᠬᠤ ᠵᠠᠭᠤᠷᠠ ᠲᠡᠨᠳᠡᠬᠢ ᠳᠡᠭᠡᠷᠡᠮᠴᠢᠳ ᠦ᠋ᠨ ᠬᠠᠷᠠᠰᠠᠯᠲᠠᠢ ᠬᠡᠷᠡᠭ ᠦ᠋ᠳ ᠦ᠋ᠨ ᠲᠤᠬᠠᠢ ᠰᠣᠨᠣᠰᠴᠤ᠂ ᠱᠠᠨ ᠰᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠪᠠ ᠰᠠᠷᠠᠩᠪᠦᠤ ᠶ᠋ᠢᠨ ᠳᠡᠭᠡᠷᠡᠮ ᠦ᠋ᠨ ᠲᠤᠯᠤᠯᠳᠤᠵᠤ ᠪᠠᠢᠭᠠ ᠭᠠᠵᠠᠷ ᠢ᠋ᠶ᠋ᠠᠷ ᠠᠶᠤᠯ ᠲᠦᠭᠰᠢᠭᠦᠷᠢ ᠶ᠋ᠢ ᠬᠠᠢᠬᠤᠷᠤᠯ ᠦᠭᠡᠢ ᠠᠶᠠᠯᠠᠬᠤ ᠠ᠋ᠴᠠ ᠲᠠᠲᠠᠭᠠᠯᠵᠠᠭᠰᠠᠨ ᠠᠵᠢ᠃
- ᠳᠡᠭᠡᠷᠡᠮᠴᠢᠳ ᠬᠢᠲᠠᠳ ᠤ᠋ᠨ ᠴᠡᠷᠢᠭ ᠲᠡᠢ ᠣᠢᠷᠠᠳᠴᠤ ᠣᠴᠢᠬᠤ ᠳ᠋ᠠᠭᠠᠨ ᠤᠷᠢᠳ ᠢ᠋ᠶ᠋ᠠᠷ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠬᠣᠶᠠᠷ ᠵᠠᠭᠤ ᠣᠷᠴᠢᠮ ᠬᠢᠲᠠᠳ ᠨᠡᠭᠦᠳᠡᠯᠴᠢᠳ ᠢ᠋ ᠫᠤᠤ ᠶ᠋ᠢᠨ ᠪᠥᠭᠯᠡᠭᠡ ᠪᠣᠯᠭᠠᠨ ᠬᠠᠮᠤᠭ ᠤ᠋ᠨ ᠡᠮᠦᠨᠡ ᠨᠢ ᠳᠠᠭᠠᠷᠢᠭᠤᠯᠪᠠ᠃ ᠲᠡᠳᠡᠨ ᠡᠴᠡ ᠭᠠᠭᠴᠠ ᠬᠥᠮᠦᠨ ᠴᠦ᠍ ᠠᠮᠢᠳᠤ ᠦᠯᠡᠳᠡᠭᠰᠡᠨ ᠦᠭᠡᠢ᠂ ᠮᠥᠨ ᠳᠡᠭᠡᠷᠡᠮᠴᠢᠳ ᠴᠦ᠍ ᠶᠡᠬᠡ ᠬᠣᠬᠢᠷᠠᠵᠠᠢ᠃ ᠬᠢᠲᠠᠳ ᠴᠡᠷᠢᠭ ᠦ᠋ᠳ ᠬᠥᠮᠦᠨ ᠦ᠌ ᠲᠣᠭᠠ ᠪᠠᠷ ᠣᠯᠠᠨ ᠪᠥᠭᠡᠳ ᠵᠡᠪᠰᠡᠭ ᠰᠠᠢᠲᠠᠢ᠃ ᠰᠠᠷᠠᠩᠪᠦᠤ ᠶ᠋ᠢᠨ ᠪᠦᠯᠦᠭ ᠢ᠋ ᠪᠦᠰᠡᠯᠡᠵᠦ ᠠᠪᠤᠭᠠᠳ ᠭᠤᠷᠪᠠᠨ ᠡᠳᠦᠷ ᠲᠤᠯᠤᠯᠳᠤᠪᠠ᠃ ᠶᠠᠫᠣᠨ ᠤ᠋ ᠵᠡᠪᠰᠡᠭ ᠬᠦᠷᠭᠡᠭᠰᠡᠨ ᠠᠴᠢᠶᠠᠨ ᠤ᠋ ᠮᠠᠰᠢᠨ ᠰᠢᠷᠬᠠᠲᠠᠨ ᠢ᠋ ᠲᠡᠭᠡᠭᠡᠵᠦ ᠵᠠᠪᠰᠠᠷ ᠲᠠᠭᠠᠨ ᠪᠤᠴᠠᠪᠠ ᠭᠡᠯᠡ᠃
- ᠡᠨᠡ ᠴᠦ᠍ ᠲᠤᠷᠰᠢᠯᠲᠠ ᠶ᠋ᠢᠨ ᠴᠢᠨᠠᠷᠲᠠᠢ ᠳᠠᠭᠠᠷᠢᠯᠲᠠ ᠪᠠᠢᠨᠠ᠃ ᠶᠠᠫᠣᠨ ᠤ᠋ ᠮᠣᠩᠭᠣᠯ ᠠᠷᠮᠢ ᠬᠢᠲᠠᠳ ᠴᠡᠷᠢᠭ ᠢ᠋ ᠰᠢᠭᠤᠳ ᠳᠠᠭᠠᠷᠢᠬᠤ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠰᠠᠢᠨ ᠬᠢᠭᠡ ᠦᠭᠡᠢ ᠪᠠᠢᠭᠠ ᠳᠠ ! ᠡᠨᠡ ᠲᠡᠢᠨ ᠳ᠋ᠦ᠍ ᠬᠡᠨ ᠴᠦ᠍ ᠨᠢᠭᠤᠷ ᠢ᠋ᠶ᠋ᠠᠨ ᠪᠠᠷᠠᠭᠰᠠᠨ ᠤᠴᠢᠷ ᠦᠭᠡᠢ᠂ ᠶᠠᠪᠤᠨ ᠴᠤ᠌ ᠲᠡᠷᠡ᠂ ᠮᠣᠩᠭᠣᠯᠴᠤᠳ ᠴᠤ᠌ ᠲᠡᠷᠡ᠃ ᠤᠴᠢᠷ ᠨᠢ ᠠᠯᠢᠪᠠ ᠪᠤᠷᠤᠭᠤ ᠶ᠋ᠢ ᠴᠥᠮ ᠰᠠᠷᠠᠩᠪᠦᠤ ᠶ᠋ᠢᠨ ᠳᠡᠭᠡᠷᠡᠮ ᠳ᠋ᠦ᠍ ᠲᠦᠯᠬᠢᠪᠡᠯ ᠪᠠᠷᠠᠭᠰᠠᠨ ᠬᠡᠷᠡᠭ ᠭᠡᠵᠦ ᠴᠠᠭᠠᠨ ᠬᠦᠷᠢᠶᠡᠨ ᠳ᠋ᠦ᠍ ᠲᠦᠷ ᠠᠮᠠᠷᠠᠵᠤ ᠪᠠᠢᠭᠰᠠᠨ ᠨᠢᠭᠡ ᠵᠣᠴᠢᠨ ᠶᠠᠷᠢᠯᠠ᠃
ᠲᠡᠢᠨ ᠡᠴᠡ ᠪᠣᠯᠵᠤ ᠵᠠᠪᠰᠠᠷ ᠪᠠ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠶ᠋ᠢᠨ ᠬᠣᠭᠣᠷᠣᠨᠳᠣᠬᠢ ᠮᠠᠰᠢᠨ ᠢ᠋ ᠨᠡᠩ ᠴᠢᠩᠭᠠ ᠪᠠᠷ ᠪᠠᠢᠴᠠᠭᠠᠨ ᠰᠢᠯᠭᠠᠬᠤ ᠪᠣᠯᠵᠤ᠂ ᠨᠠᠮᠠᠶ᠋ᠢ ᠴᠣᠬᠣᠮ ᠶᠠᠮᠠᠷ ᠵᠠᠮ ᠢ᠋ᠶ᠋ᠠᠷ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠶᠠᠪᠤᠭᠤᠯᠬᠤ ᠲᠤᠬᠠᠢ ᠯᠠᠷᠰᠤᠨ ᠵᠣᠪᠠᠵᠤ ᠡᠬᠢᠯᠡᠪᠡ᠃ ᠮᠢᠨᠦ ᠠᠪᠴᠤ ᠪᠠᠢᠭᠠ ᠣᠯᠠᠨ ᠰᠠᠢᠬᠠᠨ ᠵᠢᠷᠤᠭ ᠰᠡᠭᠦᠳᠡᠷ ᠦ᠋ᠳ ᠢ᠋ ᠪᠠᠢᠴᠠᠭᠠᠯᠲᠠ ᠳᠡᠭᠡᠷᠡ ᠪᠦᠬᠦᠨ ᠢ᠋ ᠠᠯᠳᠠᠬᠤ ᠪᠣᠯᠤᠯᠴᠠᠭᠠ ᠲᠠᠢ ᠪᠠᠢᠯᠠ᠃
- ᠪᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠥᠭᠰᠢᠷᠡᠭᠰᠡᠨ ᠳ᠋ᠡᠭᠡᠨ ᠪᠠᠶᠠᠷᠯᠠᠵᠤ ᠪᠠᠢᠨᠠ᠃ ᠶᠡᠬᠡ ᠬᠦᠷᠢᠶᠡ ᠳ᠋ᠡᠬᠢ ᠮᠢᠨᠦ ᠣᠷᠳᠣᠨ ᠪᠣᠯ ᠣᠷᠣᠰᠴᠤᠳ ᠢᠷᠡᠬᠦ ᠪᠣᠯᠲᠠᠯᠠ ᠳᠡᠯᠡᠬᠡᠢ ᠳᠡᠭᠡᠷᠡᠬᠢ ᠳ᠋ᠧᠪᠠᠵᠠᠨ ᠪᠠᠢᠭᠰᠠᠨ᠃ ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ ᠲᠡᠢᠮᠦ ᠭᠣᠶᠣ ᠪᠢᠰᠢ ᠪᠣᠯᠪᠠᠴᠤ ᠪᠢ ᠬᠠᠷᠢᠨ ᠠᠳᠠ ᠲᠠᠭᠠᠲᠠᠢᠬᠠᠨ ᠬᠡᠳᠦᠨ ᠵᠢᠯ ᠢ᠋ ᠥᠩᠭᠡᠷᠡᠭᠦᠯᠦᠯᠡ᠃ ᠣᠳᠣ ᠶᠠᠫᠣᠨᠴᠤᠳ ᠢᠷᠡᠯᠡ᠃ ᠠᠯᠢ ᠨᠢᠭᠡᠨ ᠡᠳᠦᠷ ᠪᠢ ᠴᠦ᠍ ᠠᠳᠠ ᠠ᠋ᠴᠠ ᠵᠠᠢᠯᠠᠬᠤ ᠪᠣᠯᠤᠯᠠ ᠭᠡᠵᠦ ᠯᠠᠷᠰᠤᠨ ᠨᠢᠭᠡ ᠦᠳᠡᠰᠢ ᠶᠠᠷᠢᠯᠠ᠃
- ᠲᠠ ᠬᠡᠲᠦᠷᠬᠡᠢ ᠭᠤᠲᠤᠷᠠᠩᠭᠤᠢ ᠪᠠᠢᠨᠠ ᠭᠡᠵᠦ ᠪᠢ ᠨᠢᠴᠤᠭᠠᠭᠠᠳ ᠶᠠᠪᠤᠨᠴᠤᠳ ᠲᠠᠨ ᠢ᠋ ᠶᠠᠭᠤ ᠭᠡᠵᠦ ᠬᠥᠭᠡᠭᠡᠬᠦ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
- ᠤᠴᠢᠷ ᠨᠢ ᠮᠣᠩᠭᠣᠯᠴᠤᠳ ᠨᠠᠮᠠᠶ᠋ᠢ ᠢᠲᠡᠭᠡᠳᠡᠭ᠂ ᠨᠠᠳᠠ ᠳ᠋ᠤ᠌ ᠪᠦᠬᠦᠨ ᠢ᠋ᠶ᠋ᠡᠨ ᠶᠠᠷᠢᠳᠠᠭ ᠪᠥᠭᠡᠳ ᠨᠠᠳᠠ ᠠ᠋ᠴᠠ ᠵᠥᠪᠯᠡᠯᠭᠡ ᠴᠦ᠍ ᠠᠪᠴᠤ ᠪᠠᠢᠳᠠᠭ᠃ ᠡᠨᠡ ᠨᠢ ᠶᠠᠫᠣᠨᠴᠤᠳ ᠲᠤ᠌ ᠲᠠᠭᠠᠯᠠᠮᠵᠢ ᠦᠭᠡᠢ ᠤᠴᠢᠷ ᠰᠢᠦ ᠳᠡ᠃ ᠲᠡᠢᠮᠦ ᠠ᠋ ! ᠪᠢ ᠴᠦ᠍ ᠶᠠᠷᠢᠶᠠᠨ ᠦᠭᠡᠢ ᠮᠣᠩᠭᠣᠯ ᠳ᠋ᠤ᠌ ᠪᠠᠰᠠ ᠢᠯᠡᠭᠦᠦ ᠬᠡᠳᠦᠨ ᠵᠢᠯ ᠦᠷᠭᠦᠯᠵᠢᠯᠡᠨ ᠰᠠᠢᠬᠠᠨ ᠠᠮᠢᠳᠤᠷᠠᠬᠤ ᠶ᠋ᠢ ᠬᠦᠰᠡᠨᠡ ᠳᠡ ᠭᠡᠵᠦ ᠯᠠᠷᠰᠤᠨ ᠬᠠᠷᠢᠭᠤᠯᠤᠯᠠ᠃