ᠲᠡᠮᠡᠭᠡᠨ ᠦ᠌ ᠵᠢᠷᠤᠭ - ᠵᠢᠮᠪᠠ ᠶ᠋ᠢᠨ ᠳᠠᠰᠢᠳᠣᠨᠳᠤᠭТэмээний жирүг
493 ᠵᠢᠮᠪᠠ ᠶ᠋ᠢᠨ ᠳᠠᠰᠢᠳᠣᠨᠳᠤᠭ
ᠬᠠᠷᠠᠨᠳᠠ ᠴᠠᠭᠠᠰᠤ ᠨᠡᠢᠯᠡᠭᠦᠯᠵᠦ ᠰᠤᠷᠤᠭᠠᠳ
ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠲᠡᠮᠡᠭᠡ ᠵᠢᠷᠤᠭᠠᠳ
ᠠᠬᠠ ᠳ᠋ᠠᠭᠠᠨ ᠦᠵᠡᠭᠦᠯᠲᠡᠯᠡ ᠲᠣᠯᠣᠭᠠᠢ ᠰᠡᠭᠰᠦᠷᠴᠦ
ᠠᠷᠠᠢ ᠯᠠ ᠪᠢᠰᠢ ᠪᠠᠢᠨᠠ ᠳᠠ ᠭᠡᠳ
《ᠮᠡᠳᠡᠳᠡᠭ ᠬᠥᠮᠦᠨ ᠳ᠋ᠦ᠍ ᠦᠵᠡᠭᠦᠯ》 ᠭᠡᠯᠡ
《ᠮᠡᠷᠭᠡᠨ ᠦᠭᠡ ᠶ᠋ᠢ ᠨᠢ ᠰᠣᠨᠣᠰ》 ᠭᠡᠯᠡ
ᠠᠩᠬᠠᠨ ᠤ᠋ ᠪᠠᠨ ᠵᠢᠷᠤᠭ ᠢ᠋ ᠪᠠᠷᠢᠭᠰᠠᠭᠠᠷ
ᠠᠢᠯ ᠤ᠋ᠨ ᠢ᠋ᠶ᠋ᠠᠨ ᠬᠠᠭᠠᠯᠭᠠ ᠶ᠋ᠢ ᠲᠠᠲᠠᠯᠠ
《ᠲᠡᠮᠡᠭᠡ ᠨᠢ ᠲᠡᠮᠡᠭᠡ ᠯᠡ ᠶᠤᠮᠰᠠᠨᠵᠠᠢ!
ᠲᠡᠭᠡᠬᠦ ᠳ᠋ᠡᠭᠡᠨ ᠯᠡ ᠣᠨᠳᠣᠣ ᠪᠣᠯᠤᠭᠰᠠᠨᠵᠠᠢ!
ᠰᠢᠷᠡᠭᠡ ᠪᠦᠬᠦ ᠨᠢ ᠪᠣᠰᠤᠭᠠᠳᠠᠵᠠᠢ!》
ᠰᠠᠷᠠᠨᠠᠩ ᠭᠤᠸᠠᠢ ᠢᠩᠭᠢᠵᠦ ᠵᠥᠪᠯᠡᠯᠡ᠃
ᠪᠠᠯᠠᠯᠵᠤ ᠵᠠᠰᠠᠭᠰᠠᠭᠠᠷ ᠪᠠᠢᠲᠠᠯᠠ
ᠪᠠᠷᠤᠭ ᠪᠦᠬᠦ ᠦᠭᠡᠢ ᠪᠣᠯᠴᠢᠬᠠᠯᠠ ᠠ᠋᠂
ᠬᠠᠷᠠᠭᠠᠳ ᠪᠠᠢᠪᠠᠯ ᠨᠢᠭᠡ ᠯᠡ ᠪᠢᠰᠢ ᠳᠡ᠂
ᠬᠠᠵᠠᠭᠤ ᠠᠢᠯ ᠳ᠋ᠠᠭᠠᠨ ᠪᠠᠰᠠ ᠯᠠ ᠣᠷᠣᠯᠠ᠃
《ᠲᠡᠮᠡᠭᠡ ᠨᠢ ᠲᠡᠮᠡᠭᠡ ᠯᠡ ᠶᠤᠮᠰᠠᠨᠵᠠᠢ!
ᠲᠡᠭᠡᠬᠦ ᠳ᠋ᠡᠭᠡᠨ ᠯᠡ ᠣᠨᠳᠣᠣ ᠪᠣᠯᠤᠭᠰᠠᠨᠵᠠᠢ!
ᠬᠦᠵᠦᠭᠦᠦ ᠨᠢ ᠠᠷᠠᠢ ᠥᠨᠳᠥᠷᠳᠡᠵᠡᠢ!》
ᠬᠦᠷᠡᠯ ᠭᠤᠸᠠᠢ ᠢᠩᠭᠢᠵᠦ ᠵᠥᠪᠯᠡᠯᠡ᠃
ᠪᠠᠯᠠᠯᠵᠤ ᠵᠠᠰᠠᠭᠰᠠᠭᠠᠷ ᠪᠠᠢᠲᠠᠯᠠ
ᠪᠠᠷᠤᠭ ᠬᠦᠵᠦᠭᠦᠦ ᠦᠭᠡᠢ ᠪᠣᠯᠴᠢᠬᠠᠪᠠ ᠠ᠋᠂
ᠰᠠᠢᠨ ᠠᠵᠢᠪᠠᠯ ᠨᠢᠭᠡ ᠯᠡ ᠪᠢᠰᠢ ᠳᠡ᠂
ᠰᠠᠭᠠᠬᠠᠯᠲᠠ ᠠᠢᠯ ᠳ᠋ᠠᠭᠠᠨ ᠪᠠᠰᠠ ᠯᠠ ᠣᠷᠣᠯᠠ᠃
《ᠲᠡᠮᠡᠭᠡ ᠨᠢ ᠲᠡᠮᠡᠭᠡ ᠶᠤᠮᠰᠠᠨᠵᠠᠢ!
ᠲᠡᠭᠡᠬᠦ ᠳ᠋ᠡᠭᠡᠨ ᠯᠡ ᠣᠨᠳᠣᠣ ᠪᠣᠯᠤᠭᠰᠠᠨᠵᠠᠢ!
ᠨᠠᠷᠢᠨ ᠬᠥᠯ ᠨᠢ ᠤᠷᠲᠤᠳᠠᠵᠠᠢ!》
ᠨᠠᠴᠤᠭ ᠭᠤᠸᠠᠢ ᠢᠩᠭᠢᠵᠦ ᠵᠥᠪᠯᠡᠯᠡ᠃
ᠪᠠᠯᠠᠯᠵᠤ ᠵᠠᠰᠠᠭᠰᠠᠭᠠᠷ ᠪᠠᠢᠲᠠᠯᠠ
ᠪᠠᠷᠤᠭ ᠬᠥᠯ ᠦᠭᠡᠢ ᠪᠣᠯᠴᠢᠬᠠᠪᠠ ᠠ᠋᠂
ᠬᠥᠷᠰᠢ ᠠᠢᠯ ᠳ᠋ᠠᠭᠠᠨ ᠬᠡᠰᠦᠨ ᠬᠡᠰᠦᠭᠰᠡᠭᠡᠷ
ᠬᠥᠮᠦᠨ ᠦ᠌ ᠦᠭᠡ ᠪᠡᠷ ᠵᠠᠰᠠᠨ ᠵᠠᠰᠠᠭᠰᠠᠭᠠᠷ
ᠠᠲᠠᠨ ᠲᠡᠮᠡᠭᠡ ᠪᠡᠨ ᠠᠳᠠᠭ ᠰᠡᠭᠦᠯ ᠳ᠋ᠦ᠍ᠨᠢ
ᠠᠬᠠ ᠳ᠋ᠠᠭᠠᠨ ᠦᠵᠡᠭᠦᠯᠲᠡᠯᠡ ᠮᠠᠯ ᠭᠠᠢᠬᠠᠵᠤ᠄
《ᠬᠤᠪᠢᠷᠠᠭᠰᠠᠭᠠᠷ᠂ ᠬᠤᠪᠢᠷᠠᠭᠰᠠᠭᠠᠷ ᠲᠡᠮᠡᠭᠡ ᠴᠢᠨᠢ
ᠬᠤᠯᠤᠭᠠᠨᠠ ᠪᠣᠯᠴᠢᠬᠠᠯᠠ ᠭᠡᠵᠢ ᠤᠤ?》 ᠭᠡᠯᠡ᠃
ᠣᠯᠠᠨ ᠬᠥᠮᠦᠨ ᠦ᠌ ᠵᠥᠪᠯᠡᠯᠭᠡ ᠬᠦᠴᠦᠲᠡᠢ ᠶ᠋ᠢ
ᠣᠳᠣ ᠯᠠ ᠰᠠᠢᠨ ᠮᠡᠳᠡᠵᠦ ᠠᠪᠤᠯᠠ᠂
ᠬᠤᠳᠠᠯ ᠭᠡᠪᠡᠯ ᠠᠲᠠᠨ ᠲᠡᠮᠡᠭᠡ ᠶ᠋ᠢ
ᠬᠤᠯᠤᠭᠠᠨᠠ ᠪᠣᠯᠭᠠᠳᠠᠭ ᠪᠠᠢᠨᠠ ᠰᠢᠦ᠃
1990 ᠣᠨ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ
ᠬᠢᠨᠠᠭᠴᠢ᠄ ᠪᠠᠶᠠᠨᠴᠡᠴᠡᠭ᠂ ᠣᠳᠬᠠᠨᠰᠣᠠ