ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ᠂ ᠨᠠᠢ᠍ᠮᠠ ᠶᠢᠨ ᠠᠭᠤᠯᠠᠨ ᠳᠤ ᠁ (ᠠᠷᠪᠠ) Сэрүүхэн тал нутаг–<свис> Вальтер Босгард (Walter Bosshard)- Дөрөвдүгээр бөлөг 10
286ᠠᠷᠪᠠ ᠂ ᠪᠦᠰᠡᠭᠦᠢᠴᠦᠦᠯ ᠦ᠋ᠨ ᠶᠠᠷᠢᠯᠴᠠᠭᠠ ᠵᠢᠴᠢ ᠳᠡᠭᠡᠷᠡᠮᠴᠢᠳ
– ᠨᠠᠷᠠ ᠴᠦ᠍ ᠡᠭᠦᠯᠡᠨ ᠴᠠᠭᠠᠨᠠ ᠣᠷᠣᠴᠢᠬᠠᠯᠠ᠃ ᠪᠢ ᠥᠨᠥᠳᠥᠷ ᠤᠯᠠᠭᠠᠨ ᠲᠤᠷᠤᠭ ᠰᠠᠷᠠᠨᠠ ᠶ᠋ᠢᠨ ᠴᠡᠴᠡᠭ ᠲᠡᠭᠦᠵᠦ ᠳᠡᠢᠯᠬᠦ ᠦᠭᠡᠢ ᠪᠣᠯᠵᠠᠢ ᠭᠡᠵᠦ ᠠᠯᠲᠠᠨᠴᠡᠴᠡᠭ ᠭᠣᠮᠣᠳᠠᠯᠲᠠᠢ ᠶᠠᠷᠢᠭᠠᠳ ᠮᠢᠨᠦ ᠰᠣᠨᠢᠨ ᠤᠩᠰᠢᠵᠤ ᠪᠠᠢᠭᠠ ᠶ᠋ᠢ ᠪᠠᠬᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
– ᠴᠢ ᠴᠦ᠍ ᠥᠨᠥᠳᠥᠷ ᠲᠡᠷᠡ ᠲᠠᠨᠢᠬᠤ ᠦᠭᠡᠢ ᠣᠯᠠᠨ ᠲᠡᠮᠳᠡᠭ ᠢ᠋ ᠦᠵᠡᠵᠦ ᠪᠣᠯᠤᠭᠰᠠᠨ ᠪᠠᠢᠬᠠ ᠳᠠ! ᠪᠣᠷᠣᠭᠠᠨ ᠣᠷᠣᠨᠠ ᠭᠡᠵᠦ ᠪᠠᠢᠨᠠ ᠰᠢᠦ ᠭᠡᠳ ᠭᠠᠳᠠᠭᠰᠢ ᠭᠠᠷᠴᠤ᠂ ᠲᠣᠭᠣᠨᠣ ᠶ᠋ᠢ ᠪᠦᠲᠡᠭᠡᠯᠡ᠃
ᠪᠢ ᠰᠣᠨᠢᠨ ᠢ᠋ᠶ᠋ᠠᠨ ᠬᠤᠷᠢᠶᠠᠵᠤ ᠲᠠᠯᠪᠢᠭᠠᠳ ᠠᠯᠲᠠᠨᠴᠡᠴᠡᠭ ᠦ᠋ᠨ ᠣᠷᠣᠵᠤ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠬᠦ ᠳ᠋ᠦ᠍ ᠭᠠᠳᠠᠨᠠ ᠲᠡᠭᠦᠨ ᠦ᠌ ᠭᠡᠷ ᠦ᠋ᠨ ᠤᠶᠠᠭᠠ ᠴᠢᠭᠲᠠᠭᠠ ᠶ᠋ᠢ ᠴᠢᠩᠭᠠᠯᠠᠵᠤ ᠪᠠᠢᠬᠤ ᠨᠢ ᠰᠣᠨᠣᠰᠳᠠᠵᠤ ᠪᠠᠢᠪᠠ᠃ ᠲᠡᠷᠡ ᠡᠭᠦᠳᠡᠨ ᠳᠡᠭᠡᠷᠡ ᠵᠣᠭᠰᠣᠵᠤ ᠬᠣᠯᠠ ᠶ᠋ᠢᠨ ᠲᠠᠯᠠ ᠳ᠋ᠤ᠌ ᠳᠠᠪᠬᠢᠵᠤ ᠪᠠᠢᠭᠠ ᠮᠣᠷᠢᠲᠠᠨ ᠢ᠋ ᠨᠡᠯᠢᠶᠡᠳ ᠤᠳᠠᠭᠠᠨ ᠬᠠᠷᠠᠵᠤ ᠵᠣᠭᠰᠣᠪᠠ᠃ ᠰᠠᠯᠬᠢᠨ ᠳ᠋ᠤ᠌ ᠲᠡᠷᠯᠢᠭ ᠦ᠋ᠨ ᠬᠣᠷᠮᠣᠢ ᠨᠢ ᠳᠡᠷᠪᠡᠯᠵᠡᠵᠦ᠂ ᠴᠢᠩᠭᠠ ᠪᠦᠰᠡᠯᠡᠭᠰᠡᠨ ᠲᠡᠷᠯᠢᠭ ᠦ᠋ᠨ ᠨᠢᠮᠭᠡᠬᠡᠨ ᠪᠥᠰ ᠨᠢ ᠬᠥᠭᠡᠷᠦᠬᠦᠨ ᠵᠢᠵᠢᠭ ᠬᠥᠬᠥ ᠶ᠋ᠢ ᠨᠢ ᠱᠤᠭᠤᠨ ᠭᠠᠷᠭᠠᠵᠠᠢ᠃
– ᠴᠢ ᠲᠡᠭᠡᠭᠡᠳ ᠶᠠᠭᠤᠨ ᠤ᠋ ᠲᠥᠯᠥᠭᠡ ᠤᠯᠠᠭᠠᠨ ᠲᠤᠷᠤᠭ ᠰᠠᠷᠠᠨᠠ ᠲᠡᠭᠦᠨᠡ ᠭᠡᠵᠦ ᠪᠠᠢᠬᠤ ᠪᠣᠢ? ᠭᠡᠵᠦ ᠪᠢ ᠠᠰᠠᠭᠤᠪᠠ᠃
– ᠬᠤᠷᠢᠮ ᠤ᠋ᠨ ᠡᠳᠦᠷ ᠲᠦ᠍ ᠰᠠᠢᠬᠠᠨ ᠪᠠᠢᠬᠤ ᠶ᠋ᠢᠨ ᠲᠥᠯᠥᠭᠡ ᠶᠦᠮ ᠭᠡᠳ ᠡᠷᠡᠭᠦᠯ ᠴᠠᠭᠠᠨ ᠰᠢᠳᠦ ᠪᠡᠨ ᠭᠠᠷᠭᠠᠨ ᠢᠷᠠᠯᠵᠠᠨ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ (ᠵᠢᠷᠤᠭ 97) ᠂ ᠴᠡᠴᠡᠭ ᠢ᠋ ᠵᠠᠪᠠᠯ ᠡᠭᠦᠯᠡ ᠦᠭᠡᠢ ᠨᠠᠷᠠ ᠲᠠᠢ ᠰᠠᠢᠬᠠᠨ ᠡᠳᠦᠷ ᠲᠡᠭᠦᠳᠡᠭ ᠂ ᠢᠩᠭᠢᠮᠡᠨᠵᠢᠨ ᠰᠠᠶᠢ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠤᠯᠠᠭᠠᠨ ᠥᠩᠭᠡ ᠨᠢ ᠭᠠᠷᠳᠠᠭ ᠶᠤᠮ (ᠵᠢᠷᠤᠭ 95) ᠃ ᠭᠡᠬᠦ ᠳ᠋ᠦ᠍ ᠣᠳᠣ ᠪᠣᠷᠣᠭᠠᠯᠠᠬᠤ ᠨᠢ! ᠤᠳᠠᠬᠤ ᠦᠭᠡᠢ ᠪᠢ ᠪᠠᠰᠠ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠰᠠᠷᠵᠢ ᠶ᠋ᠢᠨ ᠬᠣᠨᠢ ᠰᠠᠭᠠᠬᠤ ᠳ᠋ᠤ᠌ ᠬᠠᠮᠵᠢᠬᠤ ᠦᠭᠡᠢ ᠪᠣᠯᠬᠤ ᠦᠭᠡᠢ ᠳᠡ ᠭᠡᠵᠦ ᠳᠤᠷᠠ ᠮᠠᠭᠤᠲᠠᠢᠬᠠᠨ ᠶᠠᠷᠢᠯᠠ᠃
ᠠᠯᠲᠠᠨᠴᠡᠴᠡᠭ ᠦᠳᠡ ᠶ᠋ᠢᠨ ᠡᠮᠦᠨᠡ ᠷᠠᠰᠢ ᠲᠠᠢ ᠴᠣᠭ ᠬᠦᠷᠴᠦ ᠢᠷᠡᠭᠡᠳ ᠷᠠᠰᠢ ᠵᠡᠷᠭᠡᠯᠡᠳᠡᠭᠡ ᠠᠢᠯ ᠳ᠋ᠤ᠌ ᠨᠢᠭᠡ ᠮᠣᠷᠢ ᠪᠠᠨ ᠬᠤᠳᠠᠯᠳᠤᠬᠤ ᠪᠠᠷ ᠶᠠᠪᠤᠭᠰᠠᠨ ᠶᠤᠮ᠃ ᠠᠯᠲᠠᠨᠴᠡᠴᠡᠭ ᠦᠷᠡᠳᠠᠨᠳᠠᠷ ᠬᠥᠭᠰᠢᠨ ᠲᠡᠢ ᠪᠠᠬᠠᠨ ᠶᠠᠷᠢᠯᠴᠠᠭᠰᠠᠨ ᠢ᠋ᠶ᠋ᠠᠨ ᠮᠢᠨᠦ ᠬᠣᠨᠣᠭᠯᠠᠵᠤ ᠪᠠᠢᠭᠠ ᠲᠡᠭᠦᠨ ᠦ᠌ ᠰᠢᠨᠡ ᠭᠡᠷ ᠲᠡᠬᠢ ᠲᠠᠨᠢᠯ ᠪᠤᠰᠤ ᠵᠦᠢᠯᠡᠰ ᠢ᠋ ᠭᠠᠢᠬᠠᠨ ᠬᠠᠷᠠᠵᠤ ᠪᠠᠢᠪᠠ᠃ ᠲᠡᠷᠡ ᠳᠠᠭᠤᠤ ᠲᠠᠯᠪᠢᠬᠤ ᠮᠠᠰᠢᠨ ᠢ᠋ ᠰᠣᠨᠣᠰᠬᠤ ᠰᠠᠨᠠᠭᠠ ᠲᠠᠢ ᠪᠥᠭᠡᠳ ᠮᠢᠨᠦ ᠲᠡᠮᠦᠷ ᠬᠦᠷᠢᠶᠡ ᠲᠡᠢ ᠲᠣᠯᠢᠨ ᠳ᠋ᠤ᠌ ᠵᠢᠰᠦ ᠪᠡᠨ ᠬᠠᠷᠠᠬᠤ ᠰᠠᠨᠠᠭᠠ ᠲᠠᠢ ᠪᠠᠢᠪᠠ᠃
– ᠵᠠ ᠴᠢ᠂ ᠪᠠᠨᠳᠢᠩ ᠢ᠋ ᠰᠠᠨᠠᠵᠤ ᠡᠬᠢᠯᠡᠯᠡ ᠪᠢᠵᠡ? ᠴᠢ ᠬᠡᠷᠪᠡ ᠡᠷᠡ ᠳ᠋ᠦ᠍ ᠮᠣᠷᠳᠠᠭᠠᠳ ᠪᠢᠴᠢᠬᠠᠨ ᠬᠡᠦᠬᠡᠳ ᠦ᠋ᠳ ᠠᠳᠠ ᠤᠬᠢᠯᠠᠨ ᠴᠢᠷᠠᠯᠠᠵᠤ ᠪᠠᠢᠪᠠᠯ ᠶᠠᠭᠠᠬᠢᠨᠠ ᠪᠢᠯᠡ? ᠭᠡᠵᠦ ᠪᠢ ᠲᠡᠭᠦᠨ ᠢ᠋ ᠱᠣᠭᠯᠠᠬᠤ ᠳ᠋ᠤ᠌ ᠲᠡᠷᠡ ᠭᠡᠳᠡᠭᠡᠨᠡᠨ ᠢᠨᠢᠶᠡᠭᠰᠡᠭᠡᠷ ᠴᠠᠭᠠᠰᠢ ᠪᠠᠨ ᠬᠠᠷᠠᠯᠠ᠃
– ᠴᠢ ᠲᠡᠭᠡᠭᠡᠳ ᠡᠭᠡᠮᠦᠭ ᠢ᠋ᠶ᠋ᠡᠨ ᠣᠯᠤᠭᠰᠠᠨ ᠤᠤ? ᠯᠠᠮᠠ ᠲᠡᠭᠡᠭᠡᠳ ᠶᠠᠭᠤ ᠭᠡᠵᠦ ᠬᠡᠯᠡᠵᠦ ᠪᠠᠢᠨᠠ? ᠭᠡᠵᠦ ᠪᠢ ᠠᠰᠠᠭᠤᠪᠠ᠃ ᠲᠡᠷᠡ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠨ ᠨᠢᠭᠡ ᠴᠢᠮᠡᠭᠯᠡᠯ ᠨᠢ ᠳᠤᠲᠠᠭᠰᠠᠨ ᠡᠭᠡᠮᠦᠭ ᠢ᠋ᠶ᠋ᠡᠨ ᠲᠡᠮᠲᠡᠷᠢᠰᠬᠢᠭᠰᠡᠨ ᠢ᠋ᠶ᠋ᠡᠨ:
– ᠪᠢ ᠴᠢᠮᠠ ᠠ᠋ᠴᠠ ᠪᠣᠯᠵᠤ ᠰᠠᠨᠳᠤᠷᠴᠤ ᠪᠠᠴᠢᠮᠳᠠᠭᠠᠳ ᠡᠭᠡᠮᠦᠭ ᠢ᠋ᠶ᠋ᠡᠨ ᠠᠰᠠᠭᠤᠬᠤ ᠪᠠᠨ ᠮᠠᠷᠲᠠᠵᠤ ᠣᠷᠬᠢᠭᠰᠠᠨ ᠪᠠᠢᠨᠠ ᠭᠡᠯᠡ᠃
– ᠲᠡᠭᠡᠭᠡᠳ ᠦᠷᠡ ᠬᠡᠦᠬᠡᠳ?
– ᠬᠤᠷᠢᠮ ᠠ᠋ᠴᠠ ᠰᠡᠭᠦᠯᠡᠷ ᠤᠳᠠᠯ ᠦᠭᠡᠢ ᠬᠡᠦᠬᠡᠳ ᠲᠡᠢ ᠪᠣᠯᠤᠨᠠ ᠭᠡᠰᠡᠨ᠃
– ᠪᠢ ᠲᠡᠭᠡᠵᠦ ᠬᠡᠯᠡᠭᠰᠡᠨ ᠦᠭᠡᠢ ᠤᠤ? ᠦᠵᠡ ᠯᠡ ᠳᠡ᠃
– ᠴᠢᠮᠠ ᠳ᠋ᠤ᠌ ᠪᠢ ᠬᠠᠷᠢᠨ ᠢᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ᠃
– ᠶᠠᠭᠠᠬᠢᠭᠠᠳ ᠪᠣᠯᠳᠠᠭ ᠦᠭᠡᠢ ᠶᠦᠮ?
– ᠴᠢ ᠲᠠᠩᠳᠠ ᠬᠥᠮᠦᠨ ᠢ᠋ ᠱᠣᠭᠯᠠᠭᠠᠳ ᠪᠠᠢᠳᠠᠭ ᠪᠥᠭᠡᠳ ᠴᠢ ᠴᠦ᠍ ᠯᠠᠮᠠ ᠪᠢᠰᠢ ᠰᠢᠦ ᠳᠡ᠃
– ᠪᠢ ᠬᠠᠷᠢᠨ ᠳᠠᠷᠠᠭᠠ ᠲᠥᠷᠥᠯ ᠳ᠋ᠡᠭᠡᠨ ᠨᠢᠭᠡ ᠨᠡᠷᠡᠲᠡᠢ ᠲᠣᠮᠣ ᠯᠠᠮᠠ ᠪᠠᠢᠵᠤ ᠮᠡᠳᠡᠨᠡ ᠰᠢᠦ᠃ ᠲᠡᠭᠡᠪᠡᠯ ᠴᠢ ᠨᠠᠳᠠ ᠳᠡᠭᠡᠷᠡ ᠢᠷᠡᠬᠦ ᠤᠤ?
– ᠬᠡᠷᠪᠡ ᠪᠢ ᠴᠢᠮᠠᠶ᠋ᠢ ᠬᠠᠮᠢᠭᠠ ᠳᠠᠬᠢᠵᠤ ᠲᠥᠷᠥᠯ ᠣᠯᠤᠭᠰᠠᠨ ᠢ᠋ ᠴᠢᠨᠢ ᠮᠡᠳᠡᠪᠡᠯ ᠯᠠᠪ ᠬᠦᠷᠴᠦ ᠮᠥᠷᠭᠥᠯ ᠬᠢᠨᠡ ᠳᠡ ᠭᠡᠵᠦ ᠲᠡᠷᠡ ᠨᠡᠯᠢᠶᠡᠳ ᠪᠣᠳᠣᠯᠬᠢᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠠᠷᠢᠭᠤᠯᠪᠠ᠃
ᠪᠣᠷᠣᠭᠠᠨ ᠤ᠋ ᠲᠣᠮᠣ ᠲᠣᠮᠣ ᠳᠤᠰᠤᠯ ᠤ᠋ᠳ ᠭᠡᠷ ᠦ᠋ᠨ ᠮᠢᠨᠢ ᠵᠥᠭᠡᠯᠡᠨ ᠳᠡᠭᠡᠪᠦᠷ ᠢ᠋ ᠳᠤᠤᠭᠠᠷᠭᠠᠵᠤ ᠡᠬᠢᠯᠡᠪᠡ᠃ ᠠᠯᠳᠠᠨᠴᠡᠴᠭ ᠡᠭᠦᠳᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠠᠳ ᠲᠤᠭᠤᠯ ᠬᠠᠷᠢᠭᠤᠯᠵᠤ ᠶᠠᠪᠤᠭᠰᠠᠨ ᠦᠷᠡᠳᠡᠨᠲᠡᠷ ᠢ᠋ ᠭᠡᠷ ᠲᠦ᠍ ᠳᠠᠭᠤᠳᠠᠨ ᠣᠷᠣᠭᠤᠯᠪᠠ ᠃ ᠪᠢ ᠲᠡᠳᠡᠨ ᠦ᠌ ᠬᠡᠷᠬᠢᠨ ᠤᠯᠠᠭᠠᠨ ᠲᠤᠷᠤᠭ ᠰᠠᠷᠠᠨᠠ ᠶ᠋ᠢᠨ ᠴᠡᠴᠡᠭ ᠢ᠋ ᠰᠠᠢᠬᠠᠨ ᠨᠠᠢᠷᠠᠭᠤᠯᠬᠤ ᠲᠤᠬᠠᠢ ᠶᠠᠷᠢᠯᠴᠠᠬᠤ ᠶ᠋ᠢ ᠰᠣᠨᠣᠰᠴᠤ ᠰᠠᠭᠤᠪᠠ ᠃ ᠬᠥᠭᠰᠢᠨ ᠨᠢ ᠵᠠᠯᠠᠭᠤ ᠳ᠋ᠠᠭᠠᠨ ᠥᠪᠡᠷ ᠦ᠋ᠨ ᠨᠢᠭᠤᠴᠠ ᠠᠷᠭᠠ ᠪᠠᠨ ᠲᠠᠨᠢᠯᠴᠠᠭᠤᠯᠬᠤ ᠳ᠋ᠠᠭᠠᠨ :
– ᠴᠡᠴᠡᠭ ᠢ᠋ ᠶᠡᠬᠡ ᠤᠳᠠᠭᠠᠨ ᠲᠠᠯᠪᠢᠵᠤ ᠪᠣᠯᠳᠠᠭ ᠦᠭᠡᠢ ᠶᠦᠮ᠂ ᠲᠡᠭᠡᠪᠡᠯ ᠴᠢᠨᠠᠷ ᠨᠢ ᠠᠯᠳᠠᠭᠳᠠᠳᠠᠭ᠃ ᠬᠠᠮᠤᠭ ᠤ᠋ᠨ ᠰᠠᠢᠨ ᠨᠢ ᠣᠯᠠᠨ ᠤᠳᠠᠭᠠ ᠶᠠᠪᠤᠵᠤ ᠰᠢᠨᠡᠬᠡᠨ ᠴᠡᠴᠡᠭ ᠦ᠋ᠨ ᠬᠡᠯᠲᠡᠰ ᠢ᠋ ᠠᠪᠴᠢᠷᠠᠵᠤ᠂ ᠵᠠᠯᠠᠭᠤ ᠬᠣᠨᠢᠨ ᠤ᠋ ᠰᠦ ᠶ᠋ᠢᠨ ᠵᠥᠭᠡᠬᠡᠢ ᠲᠡᠢ ᠬᠣᠯᠢᠵᠤ ᠵᠢᠭᠤᠷᠠᠭᠠᠳ᠂ ᠦᠳᠡᠰᠢ ᠶ᠋ᠢᠨ ᠲᠤᠶᠠᠭᠠᠨ ᠤ᠋ ᠥᠩᠭᠡ ᠲᠡᠢ ᠥᠳᠬᠡᠨ ᠪᠣᠯᠭᠠᠪᠠᠯ ᠪᠣᠯᠤᠨᠠ ( ᠵᠢᠷᠤᠭ 59. 95. 97 ) ᠃
ᠠᠯᠳᠠᠨᠴᠡᠴᠭ ᠭᠦᠢᠴᠡᠳ ᠠᠩᠬᠠᠷᠤᠯ ᠲᠠᠯᠪᠢᠨ ᠰᠣᠨᠣᠰᠴᠤ᠂ ᠲᠡᠷᠡ ᠶᠣᠰᠣ ᠪᠠᠷ ᠬᠢᠬᠦ ᠪᠡᠨ ᠴᠦ᠍ ᠠᠮᠠᠯᠠᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠨᠠᠳᠠ ᠳ᠋ᠤ᠌ ᠰᠣᠨᠣᠰᠬᠠᠬᠤ ᠦᠭᠡᠢ ᠭᠡᠵᠦ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ《ᠪᠠᠨᠳᠢᠩ ᠳ᠋ᠤ᠌ ᠬᠡᠷᠡᠭ ᠲᠡᠢ ᠡᠢᠮᠦ ᠵᠦᠢᠯᠡᠰ ᠪᠠᠢᠬᠤ ᠶ᠋ᠢ ᠴᠢ ᠪᠠᠰᠠ ᠮᠡᠳᠡᠨᠡ ᠤᠤ? ᠮᠢᠨᠦ ᠬᠡᠯᠡᠵᠦ ᠪᠠᠢᠭᠠ ᠪᠣᠯ ᠲᠡᠭᠦᠨ ᠢ᠋ ᠣᠨᠳᠣᠣ ᠪᠦᠰᠡᠭᠦᠢ ᠳ᠋ᠦ᠍ ᠣᠢᠷᠠᠲᠤᠭᠤᠯᠳᠠᠭ ᠦᠭᠡᠢ ᠵᠦᠢᠯᠡᠰ 》ᠭᠡᠵᠦ ᠢᠴᠢᠭᠰᠡᠨ ᠮᠡᠲᠦ ᠰᠡᠮᠡᠬᠡᠷ ᠠᠰᠠᠭᠤᠯᠠ᠃ ᠦᠷᠡᠳᠡᠨᠲᠡᠷ ᠥᠨᠳᠥᠷ ᠳᠠᠭᠤ ᠪᠠᠷ ᠢᠨᠢᠶᠡᠯᠡ᠃
– ᠲᠡᠢᠮᠦ ᠶᠠᠭᠤᠮᠠ ᠬᠠᠷᠢᠨ ᠠᠯᠠᠭᠠ ᠰᠢᠦ ᠳᠡ᠃ ᠵᠠᠯᠠᠭᠤ ᠪᠠᠢᠬᠤ ᠳ᠋ᠠᠭᠠᠨ ᠪᠢ ᠭᠣᠮᠪᠣ ᠳ᠋ᠤ᠌ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠬᠡᠷᠡᠭᠯᠡᠵᠦ ᠥᠩᠭᠡᠷᠡᠭᠰᠡᠨ ᠠ᠋! ᠭᠡᠬᠦ ᠳ᠋ᠦ᠍ ᠲᠡᠷᠡ ᠮᠥᠨ ᠯᠡ ᠥᠩᠭᠡ ᠴᠦ᠍ ᠦᠭᠡᠢ ᠵᠢᠰᠦ ᠴᠦ᠍ ᠦᠭᠡᠢ ᠷᠦᠭᠵᠢᠳᠮᠠ ᠪᠣᠯᠤᠨ ᠣᠨᠳᠣᠣ ᠪᠦᠰᠡᠭᠦᠢ ᠳᠡᠭᠡᠷᠡ ᠬᠦᠷᠳᠡᠭ ᠯᠡ ᠪᠠᠢᠭᠰᠠᠨ ᠭᠡᠳ ᠬᠠᠵᠠᠭᠤ ᠳ᠋ᠠᠭᠠᠨ ᠬᠥᠮᠦᠨ ᠪᠠᠢᠭᠠ ᠶ᠋ᠢ ᠥᠴᠦᠬᠡᠨ ᠴᠦ᠍ ᠣᠢᠰᠢᠶᠠᠯ ᠦᠭᠡᠢ ᠡᠭᠦᠳᠡ ᠪᠡᠷ ᠭᠠᠳᠠᠭᠰᠢ ᠪᠠᠨ ᠪᠣᠷᠣᠭᠠᠨ ᠤᠷᠤᠭᠤ ᠨᠤᠯᠮᠤᠭᠰᠠᠨ ᠢ᠋ᠶ᠋ᠠᠨ ᠵᠠᠯᠭᠠᠭᠠᠳ᠄
– ᠡᠷᠡᠴᠦᠦᠯ ᠭᠡᠵᠦ ᠮᠥᠨ ᠡᠢᠮᠦ ᠯᠡ ᠳᠡ᠂ ᠬᠡᠷᠡᠭ ᠦᠭᠡᠢ ᠮᠥᠷᠲᠡᠭᠡᠨ ᠦᠯᠢᠶᠡᠬᠦ ᠳᠤᠷᠠᠲᠠᠢ᠃ ᠨᠠᠳᠠ ᠲᠠᠢ ᠠᠳᠠᠯᠢ ᠬᠢᠵᠦ ᠯᠡ ᠪᠠᠢᠭᠠᠷᠠᠢ᠂ ᠬᠡᠷᠪᠡ ᠲᠡᠷᠡ ᠨᠢᠭᠡ ᠪᠦᠰᠡᠭᠦᠢ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠤᠳᠠᠭᠠᠨ ᠰᠠᠭᠤᠭᠠᠳ ᠪᠠᠢᠪᠠᠯ ᠭᠡᠵᠢᠭᠡᠳᠡᠵᠦ ᠠᠪᠤᠭᠠᠳ ᠯᠠ ᠭᠡᠷ ᠡᠴᠡ ᠭᠠᠷᠳᠠᠭ ᠬᠡᠷᠡᠭ᠃
– ᠲᠡᠭᠡᠵᠦ ᠬᠠᠷᠢᠨ ᠪᠢ ᠴᠢᠳᠠᠬᠤ ᠦᠭᠡᠢ ᠰᠢᠦ᠂ ᠲᠡᠭᠡᠭᠡᠳ ᠮᠥᠨ ᠪᠠᠨᠳᠢᠩ ᠳ᠋ᠤ᠌ ᠲᠡᠢᠮᠦ ᠭᠡᠵᠢᠭᠡ ᠴᠦ᠍ ᠠᠯᠠᠭᠠ ᠭᠡᠵᠦ ᠠᠯᠳᠠᠨᠴᠡᠴᠭ ᠪᠢᠰᠢᠭᠦᠷᠬᠡᠨ ᠬᠡᠯᠡᠪᠡ᠃
– ᠦᠷᠡᠳᠡᠨᠲᠡᠷ ᠠ᠋! ᠭᠣᠮᠪᠣ ᠶ᠋ᠢ ᠮᠣᠷᠢᠨ ᠠᠷᠠᠯᠵᠢᠶᠠᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠤ᠋ ᠬᠣᠢᠨᠠ ᠲᠠᠨ ᠤ᠋ ᠳ᠋ᠤ᠌ ᠨᠡᠯᠢᠶᠡᠳ ᠬᠣᠨᠣᠭ ᠪᠠᠢᠭᠰᠠᠨ ᠵᠠᠯᠠᠭᠤ ᠯᠠᠮᠠ ᠯᠤᠭᠠ ᠶ᠋ᠢᠨ ᠦᠯᠢᠭᠡᠷ ᠢ᠋ᠶ᠋ᠡᠨ ᠶᠠᠷᠢᠭᠠᠴᠢ ᠳᠠ! ᠭᠡᠵᠦ ᠪᠢ ᠲᠡᠳᠡᠨ ᠦ᠌ ᠶᠠᠷᠢᠶᠠ ᠶ᠋ᠢ ᠲᠠᠰᠤᠯᠤᠯᠠ᠃ ᠲᠡᠷᠡ ᠬᠥᠭᠰᠢᠨ ᠬᠤᠷᠳᠤᠨ ᠭᠡᠭᠴᠢ ᠡᠷᠭᠢᠨ ᠨᠠᠳᠠ ᠤᠷᠤᠭᠤ ᠮᠠᠭᠤᠬᠠᠢ ᠭᠥᠯᠢᠢᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
– ᠲᠡᠷᠡ ᠪᠣᠯ ᠬᠤᠳᠠᠯ ! ᠲᠡᠭᠡᠭᠡᠳ ᠪᠢ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠡᠵᠡᠭᠦᠢ ᠴᠠᠭ ᠲᠤ᠌ ᠪᠤᠷᠬᠠᠨ ᠤ᠋ ᠱᠠᠪᠢ ᠯᠠᠮᠠ ᠨᠠᠷ ᠢ᠋ ᠭᠡᠷ ᠲᠡᠭᠡᠨ ᠣᠷᠣᠭᠤᠯᠬᠤ ᠦᠭᠡᠢ ᠪᠠᠢᠬᠤ ᠶᠤᠮ ᠤᠤ? ᠴᠢ ᠢᠩᠭᠢᠵᠦ ᠡᠷᠲᠡ ᠦᠶᠡ ᠶ᠋ᠢᠨ ᠡᠳᠡᠭᠡᠷ ᠦᠯᠢᠭᠡᠷ ᠲᠦ᠍ ᠳᠤᠷᠠᠯᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠪᠢᠳᠡᠨ ᠦ᠌ ᠶᠣᠰᠣ ᠵᠠᠩᠰᠢᠯ ᠢ᠋ ᠢᠯᠡᠭᠦᠬᠡᠨ ᠰᠤᠷᠴᠤ ᠪᠠᠢᠭᠠᠴᠢ ᠳᠠ! ᠪᠦᠬᠦ ᠨᠠᠢ᠍ᠮᠠ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠶᠣᠰᠣ ᠵᠠᠶᠢᠭ ᠦᠭᠡᠢ ᠶᠠᠪᠤᠵᠤ ᠪᠠᠢᠭᠠ ᠶ᠋ᠢ ᠴᠢᠨᠢ ᠶᠠᠷᠢᠵᠤ ᠪᠠᠢᠭᠠ ᠰᠢᠦ ᠳᠡ᠂ ᠣᠢᠷᠠ ᠳ᠋ᠤ᠌ ᠪᠠᠰᠠ ᠠᠨᠠᠨ ᠳ᠋ᠤ᠌ ᠶᠡᠬᠡ ᠯᠠᠮᠠ ᠶ᠋ᠢᠨ ᠲᠡᠨᠳᠡ ᠶᠠᠭᠠᠬᠢᠯᠠ ᠭᠡᠨᠡ? ᠪᠤᠷᠬᠠᠨ ᠤ᠋ ᠵᠢᠷᠤᠭ ᠢ᠋ᠶ᠋ᠠᠷ ᠡᠷᠭᠦᠯ ᠬᠢᠬᠦ ᠭᠡᠰᠡᠨ ᠢ᠋ ᠶᠠᠭᠠᠬᠢᠵᠤ ᠪᠣᠳᠣᠵᠤ ᠣᠯᠪᠠ ᠳᠠ᠃ ᠪᠠᠭᠰᠢ ᠴᠢᠨᠢ ᠴᠢᠨᠦ ᠲᠥᠯᠥᠭᠡ ᠢᠴᠡᠵᠦ ᠪᠠᠢᠬᠠ ᠳᠠ ᠭᠡᠯᠡ᠃
– ᠲᠡᠷᠡ ᠴᠦ᠍ ᠪᠠᠰᠠ ᠥᠪᠡᠷ ᠲᠡᠭᠡᠨ ᠲᠡᠭᠡᠳᠡᠭ ᠶᠦᠮ ᠭᠡᠵᠦ ᠪᠢ ᠬᠠᠷᠢᠭᠤᠴᠠᠪᠠ᠃
ᠡᠨᠡ ᠬᠥᠭ᠍ᠰᠢᠨ ᠮᠢᠨᠦ ᠮᠠᠭᠤ ᠶ᠋ᠢ ᠶᠡᠬᠡ ᠤᠳᠠᠭᠠᠨ ᠶᠠᠷᠢᠭᠰᠠᠨ ᠪᠥᠭᠡᠳ ᠪᠣᠷᠣᠭᠠᠨ ᠵᠣᠭᠰᠣᠬᠤ ᠳ᠋ᠤ᠌ ᠡᠷᠡᠴᠦᠦᠯ ᠣᠨᠴᠠᠭᠠᠢᠯᠠᠨ ᠭᠣᠮᠪᠣ ᠶ᠋ᠢᠨ ᠲᠤᠬᠠᠢ ᠶᠠᠩᠰᠢᠭᠰᠠᠭᠠᠷ ᠬᠠᠵᠠᠭᠠᠴᠠᠨ ᠠᠯᠬᠤᠵᠤ ᠣᠳᠪᠠ᠃
ᠷᠠᠰᠢ ᠪᠤᠴᠠᠵᠤ ᠢᠷᠡᠬᠦ ᠳ᠋ᠡᠭᠡᠨ ᠠᠳᠠ ᠠ᠋ᠴᠠ ᠵᠡᠭᠦᠨᠰᠢ ᠶᠡᠬᠡ ᠬᠣᠯᠠ ᠠᠮᠢᠳᠤᠷᠠᠵᠤ ᠪᠠᠢᠳᠠᠭ ᠭᠡᠭᠦᠩᠭᠡ ᠲᠡᠢ ᠴᠣᠭ ᠢᠷᠡᠪᠡ᠃ ᠲᠡᠷᠡ ᠡᠷᠡ ᠰᠢᠨᠡ ᠪᠡᠯᠴᠢᠭᠡᠷ ᠬᠠᠢᠵᠤ ᠶᠠᠪᠤᠭᠠ ᠠᠵᠢ᠃
– ᠨᠢᠭᠡ ᠲᠠᠯᠠ ᠠ᠋ᠴᠠ ᠨᠢ ᠳᠡᠭᠡᠷᠡᠮᠴᠢᠳ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠵᠦ᠂ ᠨᠥᠭᠦᠭᠡ ᠲᠠᠯᠠ ᠠ᠋ᠴᠠ ᠨᠢ ᠶᠠᠪᠤᠨᠴᠤᠳ ᠣᠢᠷᠠᠲᠤᠭᠰᠠᠭᠠᠷ ᠪᠣᠢ᠃ ᠣᠢᠷᠠ ᠳ᠋ᠤ᠌ ᠲᠡᠨᠳᠡ ᠨᠢᠭᠡ ᠰᠦᠷᠦᠭ ᠠᠳᠤᠭᠤ ᠬᠤᠯᠠᠭᠠᠢ ᠳ᠋ᠤ᠌ ᠠᠯᠳᠠᠭᠳᠠᠵᠠᠢ᠃ ᠣᠳᠣ ᠪᠢᠳᠡᠨ ᠦ᠌ ᠨᠣᠣᠰᠣ ᠨᠣᠣᠯᠣᠭᠤᠷ ᠢ᠋ ᠠᠪᠳᠠᠭ ᠶᠠᠫᠣᠨ ᠠᠷᠠᠯᠵᠢᠶᠠᠴᠢᠳ ᠨᠢ ᠮᠥᠩᠭᠥᠨ ᠦ᠌ ᠣᠷᠣᠨ ᠳ᠋ᠤ᠌ ᠡᠳ᠋ ᠪᠠᠷᠠᠭᠠ ᠥᠭᠳᠡᠭ ᠪᠣᠯᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠪᠠᠷᠠᠭᠠ ᠨᠢ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠬᠢ ᠶ᠋ᠢ ᠪᠣᠳᠣᠪᠠᠯ ᠨᠢᠭᠡ ᠳᠠᠬᠢᠨ ᠢᠯᠡᠭᠦᠦ ᠦᠨᠡᠲᠡᠢ᠃ ᠨᠠᠶᠠᠨ ᠮᠥᠩᠭᠥ ᠶ᠋ᠢᠨ ᠨᠣᠣᠰᠣ ᠶ᠋ᠢ ᠲᠡᠳᠡ ᠭᠤᠴᠢᠨ ᠲᠠᠪᠤᠨ ᠮᠥᠩᠭᠥ ᠪᠡᠷ ᠪᠣᠳᠣᠵᠤ᠂ ᠨᠢᠭᠡ ᠬᠡᠰᠡᠭ ᠰᠠᠪᠤᠩ ᠢ᠋ ᠭᠤᠷᠪᠠᠨ ᠵᠢᠩ ᠨᠣᠣᠰᠣ ᠪᠠᠷ ᠰᠣᠯᠢᠳᠠᠭ᠃ ᠪᠢᠳᠡ ᠣᠳᠣ ᠶᠠᠭᠠᠬᠢᠪᠠᠯ ᠲᠠᠭᠠᠷᠠᠨᠠ ᠪᠣᠢ?
ᠬᠡᠷᠪᠡ ᠨᠣᠣᠰᠣ ᠪᠠᠨ ᠲᠡᠨᠳᠡ ᠠᠪᠠᠴᠢᠬᠤ ᠦᠭᠡᠢ ᠪᠣᠯ ᠴᠡᠷᠢᠭ ᠣᠴᠢᠨᠠ ᠭᠡᠮᠡᠨ ᠰᠦᠷᠳᠡᠭᠦᠯᠵᠦ ᠪᠠᠢᠳᠠᠭ᠂ ᠪᠢᠳᠡ ᠡᠩᠬᠡ ᠲᠠᠢᠪᠤᠩ ᠯᠠ ᠠᠮᠢᠳᠤᠷᠠᠬᠤ ᠬᠦᠰᠡᠯ ᠲᠡᠢ ᠰᠢᠦ ᠳᠡ ᠭᠡᠵᠦ ᠡᠨᠡ ᠡᠷᠡ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠲᠣᠭᠠᠴᠢᠯᠠ᠃
ᠬᠡᠭᠦᠩᠭᠡ ᠶ᠋ᠢᠨ ᠶᠠᠷᠢᠬᠤ ᠪᠠᠷ ᠭᠡᠨᠡᠳᠲᠡ ᠯᠡ ᠨᠢᠭᠡ ᠪᠦᠯᠦᠭ ᠳᠡᠭᠡᠷᠡᠮᠴᠢᠳ ᠡᠳᠡᠨ ᠦ᠌ ᠭᠠᠢ ᠵᠣᠪᠠᠯᠠᠩ ᠳ᠋ᠤ᠌ ᠳᠠᠭᠠᠷᠢᠭᠳᠠᠭᠠ ᠦᠭᠡᠢ ᠨᠤᠲᠤᠭ ᠲᠤ᠌ ᠬᠦᠷᠴᠦ ᠢᠷᠡᠭᠰᠡᠨ ᠪᠥᠭᠡᠳ ᠬᠥᠮᠦᠰ ᠦ᠋ᠨ ᠶᠠᠷᠢᠬᠤ ᠪᠠᠷ ᠲᠡᠳᠡ ᠳᠡᠭᠡᠷᠡᠮᠳᠡᠵᠦ ᠣᠯᠤᠭᠰᠠᠨ ᠠᠳᠤᠭᠤᠳ ᠢ᠋ᠶ᠋ᠠᠨ ᠶᠠᠫᠣᠨ ᠴᠡᠷᠢᠭ ᠲᠦ᠍ ᠬᠤᠳᠠᠯᠳᠤᠨ ᠥᠭᠴᠦ᠂ ᠠᠬᠢᠭᠠᠳ ᠲᠡᠨᠳᠡᠬᠢ ᠡᠷᠡᠴᠦᠦᠯ ᠢ᠋ ᠴᠡᠷᠢᠭ ᠲᠡᠭᠡᠨ ᠲᠡᠳᠡᠨ ᠠᠪᠬᠤ ᠶᠤᠮ ᠭᠡᠨᠡ᠃
– ᠲᠡᠳᠡ ᠲᠡᠭᠡᠭᠡᠳ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠨᠠ ᠭᠡᠵᠦ ᠪᠠᠢᠨᠠ ᠪᠣᠢ? ᠭᠡᠵᠦ ᠷᠠᠰᠢ ᠠᠰᠠᠭᠤᠪᠠ᠃
ᠡᠨᠡ ᠲᠤᠬᠠᠢ ᠲᠡᠷᠡ ᠡᠷᠡ ᠥᠴᠦᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠ᠃
– ᠲᠡᠳᠡ ᠡᠨᠡᠭᠦᠷ ᠢᠷᠡᠵᠦ ᠴᠦ᠍ ᠮᠠᠭᠠᠳ ᠦᠭᠡᠢ᠂ ᠡᠰᠡᠪᠡᠯ ᠡᠮᠦᠨᠡᠰᠢ ᠪᠡᠨ ᠶᠠᠪᠤᠬᠤ ᠴᠤ᠌ ᠮᠠᠭᠠᠳ ᠦᠭᠡᠢ᠃ ᠡᠭᠦᠨ ᠦ᠌ ᠲᠤᠬᠠᠢ ᠮᠡᠳᠡᠬᠦ ᠬᠥᠮᠦᠨ ᠭᠡᠵᠦ ᠶᠡᠷᠦ ᠠᠯᠠᠭᠠ᠂ ᠬᠡᠨ ᠲᠡᠳᠡᠨ ᠢ᠋ ᠲᠤᠬᠢᠷᠴᠤ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ ᠪᠣᠯ ᠭᠡᠳᠡᠭ ᠢ᠋ᠶ᠋ᠡᠷ ᠯᠡ ᠲᠣᠭᠲᠠᠭᠠᠭᠳᠠᠨᠠ᠃
ᠮᠥᠨ ᠣᠷᠣᠢ ᠳ᠋ᠤᠨᠢ ᠪᠠᠰᠠ ᠨᠢᠭᠡ ᠬᠥᠮᠦᠨ ᠢᠷᠡᠭᠰᠡᠨ ᠪᠥᠭᠡᠳ ᠡᠨᠡ ᠬᠥᠮᠦᠨ ᠪᠠᠳᠤᠬᠠᠭᠠᠯᠭᠠ ᠳ᠋ᠤ᠌ ᠪᠢᠴᠢᠭᠡᠴᠢ ᠶ᠋ᠢᠨ ᠠᠯᠪᠠ ᠲᠠᠢ᠂ ᠬᠣᠶᠠᠷ ᠭᠠᠷᠠᠭ ᠤ᠋ᠨ ᠴᠢᠯᠥᠭᠡ ᠲᠡᠢ ᠠᠮᠠᠷᠠᠯᠲᠠ ᠪᠠᠷ ᠭᠡᠷ ᠲᠡᠭᠡᠨ ᠢᠷᠡᠵᠦ ᠶᠠᠪᠤᠭᠠ ᠠᠵᠢ᠃ ᠲᠡᠭᠦᠨ ᠦ᠌ ᠬᠡᠯᠡᠬᠦ ᠪᠡᠷ ᠨᠡᠯᠢᠶᠡᠳ ᠣᠯᠠᠨ ᠶᠠᠫᠣᠨ ᠬᠥᠮᠦᠨ ᠪᠠᠲᠤᠬᠠᠭᠠᠯᠭᠠ ᠶ᠋ᠢᠨ ᠬᠠᠭᠤᠴᠢᠨ ᠰᠦᠮᠡ ᠳ᠋ᠦ᠍ ᠢᠷᠡᠭᠡᠳ ᠨᠢᠭᠡᠨᠲᠡ ᠬᠡᠳᠦᠨ ᠭᠠᠷᠠᠭ ᠪᠣᠯᠵᠤ᠂ ᠡᠳᠦᠷ ᠲᠤᠵᠢ ᠠᠩ ᠬᠦᠷᠦᠭᠡ ᠬᠢᠵᠦ᠂ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠠᠩᠨᠠᠨ᠂ ᠴᠢᠰᠤ ᠳᠤᠰᠤᠯᠠᠭᠰᠠᠨ ᠠᠩ ᠤ᠋ᠨ ᠠᠮᠢᠲᠠᠨ ᠢ᠋ᠶ᠋ᠠᠨ ᠰᠦᠮᠡ ᠳ᠋ᠦ᠍ ᠠᠪᠴᠤ ᠣᠷᠣᠵᠤ ᠪᠣᠢ ᠭᠡᠨᠡ᠃
– ᠲᠡᠭᠡᠭᠡᠳ ᠯᠠᠮᠠ ᠨᠠᠷ ᠲᠡᠭᠦᠨ ᠳ᠋ᠦ᠍ ᠳᠤᠷᠠ ᠦᠭᠡᠢᠴᠡᠵᠦ ᠦᠭᠡᠢ ᠶᠦᠮ ᠤᠤ? ᠭᠡᠵᠦ ᠷᠠᠰᠢ ᠰᠠᠨᠳᠤᠷᠤᠨ ᠠᠰᠠᠭᠤᠪᠠ᠃
– ᠲᠡᠳᠡ ᠲᠡᠭᠡᠭᠡᠳ ᠶᠠᠭᠤ ᠬᠢᠵᠦ ᠳᠡᠢᠯᠦᠨᠡ ᠳᠠ? ᠭᠡᠵᠦ ᠪᠠᠳᠤᠬᠠᠭᠠᠯᠭᠠ ᠶ᠋ᠢᠨ ᠡᠷᠡ ᠪᠤᠴᠠᠭᠤᠯᠤᠨ ᠠᠰᠠᠭᠤᠪᠠ᠃
ᠡᠷᠡᠴᠦᠦᠯ ᠣᠯᠠᠨ ᠠᠷᠭᠠ ᠵᠠᠮ ᠰᠦᠪᠡᠭᠴᠢᠯᠡᠨ ᠶᠠᠷᠢᠵᠠᠭᠠᠵᠤ᠂ ᠬᠥᠮᠦᠨ ᠪᠣᠯᠭᠠᠨ ᠥᠪᠡᠷ ᠦ᠋ᠨ ᠦᠵᠡᠯᠲᠡ ᠲᠡᠢ ᠪᠠᠢᠯᠠ᠃
– ᠪᠢᠳᠡ ᠬᠣᠢᠰᠢ ᠪᠠᠨ ᠬᠥᠮᠦᠨ ᠲᠣᠮᠢᠯᠠᠨ ᠣᠴᠢᠭᠤᠯᠵᠤ᠂ ᠶᠡᠬᠡ ᠬᠦᠷᠢᠶᠡ ᠳ᠋ᠦ᠍ ᠪᠠᠢᠭᠠ ᠪᠢᠳᠡᠨ ᠦ᠌ ᠠᠬᠠ ᠲᠡᠭᠦᠦᠰ ᠡᠴᠡ ᠳᠡᠮᠵᠢᠯᠭᠡ ᠭᠤᠶᠤᠵᠤ ᠪᠣᠯᠤᠨᠠ᠃
– ᠪᠤᠯᠱᠧᠸᠢᠭᠴᠦᠳ? ᠪᠣᠯᠬᠤ ᠦᠭᠡᠢ ᠰᠢᠦ᠃ ᠪᠢ ᠲᠡᠳᠡᠨ ᠢ᠋ ᠰᠠᠢᠨ ᠮᠡᠳᠡᠨᠡ ᠰᠢᠦ᠃ ᠪᠢ ᠲᠡᠨᠳᠡ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠪᠢᠰᠢ ᠶᠦᠮ ᠤᠤ ? ᠭᠡᠵᠦ ᠷᠠᠰᠢ ᠴᠢᠩᠭᠠ ᠡᠰᠡᠷᠭᠦᠴᠡᠨ ᠶᠠᠷᠢᠪᠠ᠃ ᠲᠡᠳᠡ ᠴᠦ᠍ ᠮᠣᠩᠭᠣᠯᠴᠤᠳ ᠪᠠᠢᠭᠠ ᠰᠢᠦ ᠳᠡ ᠂ ᠴᠢᠩᠭᠢᠰ ᠪᠣᠭᠳᠠ ᠪᠢᠳᠡ ᠪᠦᠭᠦᠳᠡ ᠶ᠋ᠢᠨ ᠬᠠᠭᠠᠨ ᠡᠵᠡᠨ ᠪᠠᠢᠭᠰᠠᠨ ᠪᠢᠰᠢ ᠶᠦᠮ ᠤᠤ ? ᠭᠡᠵᠦ ᠪᠠᠳᠤᠬᠠᠭᠠᠯᠭᠠ ᠶ᠋ᠢᠨ ᠡᠷᠡ ᠶᠠᠷᠢᠭᠠᠳ ᠠᠶᠠᠭᠠ ᠲᠠᠢ ᠴᠠᠢ ᠪᠠᠨ ᠬᠤᠷᠴᠢᠭᠢᠨᠠᠭᠤᠯᠤᠨ ᠣᠭᠣᠴᠢᠭᠰᠠᠨ ᠢ᠋ᠶ᠋ᠠᠨ:
– ᠬᠡᠷᠪᠡ ᠲᠥᠪᠡᠳ ᠡᠴᠡ ᠢᠷᠡᠭᠰᠡᠨ ᠪᠠᠨᠴᠢᠨ ᠪᠣᠭᠳᠠ ᠮᠥᠨ ᠠᠳᠠ ᠪᠠᠨ ᠪᠠᠢᠭᠰᠠᠨ ᠶᠤᠮ ᠪᠣᠯ ᠬᠠᠷᠢᠨ ᠪᠢᠳᠡᠨ ᠦ᠌ ᠨᠢᠭᠡᠳᠦᠨ ᠬᠦᠴᠦᠷᠬᠡᠭᠵᠢᠬᠦ ᠶ᠋ᠢ ᠪᠡᠶᠡᠯᠡᠭᠦᠯᠵᠦ ᠳᠡᠢᠯᠬᠦ ᠪᠠᠢᠭᠰᠠᠨ ᠳᠠ᠂ ᠲᠡᠷᠡ ᠴᠢᠨᠢ ᠲᠣᠮᠣ ᠪᠣᠭᠳᠠ ᠬᠤᠪᠢᠯᠭᠠᠨ ᠶᠤᠮ ᠰᠢᠦ ᠭᠡᠵᠦ ᠶᠡᠬᠡ ᠪᠣᠳᠣᠯᠭᠠᠰᠢᠷᠠᠨ ᠬᠡᠯᠡᠯᠡ᠃
– ᠲᠡᠷᠡ ᠶᠠᠭᠠᠬᠢᠭᠠᠳ ᠪᠢᠳᠡᠨ ᠢ᠋ ᠣᠷᠬᠢᠭᠠᠳ ᠶᠠᠪᠤᠪᠠ? ᠶᠠᠭᠤᠨ ᠳ᠋ᠤ᠌ ᠭᠦᠮᠪᠦᠮ ᠯᠠᠪᠷᠤᠩ ᠬᠡᠢᠳ ᠲᠡᠭᠡᠨ ᠪᠤᠴᠠᠪᠠ? ᠭᠡᠵᠦ ᠪᠠᠳᠣᠬᠠᠭᠠᠯᠭᠡ ᠶ᠋ᠢᠨ ᠡᠷᠡ ᠰᠡᠳᠬᠢᠯ ᠴᠥᠬᠥᠷᠡᠭᠰᠡᠨ ᠮᠠᠶᠢᠭᠲᠠᠢ ᠬᠡᠯᠡᠪᠡ᠃
– ᠤᠴᠢᠷ ᠨᠢ ᠴᠠᠭ ᠨᠢ ᠪᠣᠯᠤᠭᠠ ᠦᠭᠡᠢ ᠪᠠᠢᠭᠠ ᠰᠢᠦ ᠳᠡ᠃ ᠪᠢᠳᠡ ᠰᠠᠢᠨ ᠳᠠᠭᠠᠳᠬᠠᠭᠰᠠᠨ ᠦᠭᠡᠢ ᠪᠥᠭᠡᠳ ᠪᠤᠷᠬᠠᠨ ᠢ᠋ ᠬᠦᠢᠲᠡᠨ ᠬᠥᠨᠳᠡᠢ ᠪᠠᠢᠯᠭᠠᠭᠰᠠᠨ ᠤᠴᠢᠷ ᠠ᠋ᠴᠠ ᠣᠳᠣ ᠭᠠᠷᠴᠤ ᠪᠠᠢᠭᠠ ᠵᠢᠴᠢ ᠢᠷᠡᠭᠡᠳᠦᠢ ᠳ᠋ᠦ᠍ ᠬᠦᠷᠴᠦ ᠢᠷᠡᠬᠦ ᠭᠠᠢ ᠵᠣᠪᠠᠯᠠᠩ ᠪᠣᠯ ᠪᠦᠷ ᠯᠡ ᠪᠤᠷᠬᠠᠨ ᠲᠡᠭᠷᠢ ᠪᠢᠳᠡᠨ ᠢ᠋ ᠵᠠᠯᠬᠠᠭᠠᠵᠤ ᠪᠠᠢᠭᠠ ᠨᠢ ᠲᠡᠷᠡ ᠭᠡᠵᠦ ᠷᠠᠰᠢ ᠬᠠᠷᠢᠭᠤᠴᠠᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠢᠲᠡᠭᠡᠯ ᠲᠡᠭᠦᠯᠳᠡᠷ ᠢ᠋ᠶ᠋ᠡᠷ ᠵᠠᠯᠭᠠᠵᠤ :
– ᠭᠡᠬᠦ ᠳ᠋ᠦ᠍ ᠳᠡᠯᠡᠬᠡᠢ ᠳ᠋ᠦ᠍ ᠭᠠᠭᠴᠠᠬᠠᠨ ᠲᠣᠮᠣ ᠮᠣᠩᠭᠣᠯ ᠭᠦᠷᠦᠨ ᠮᠢᠨᠢ ᠳᠣᠷᠣᠢᠲᠠᠬᠤ ᠦᠭᠡᠢ ᠶᠦᠮ᠂ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠪᠤᠴᠠᠵᠤ ᠢᠷᠡᠬᠦ ᠪᠣᠯᠤᠨᠠ᠃ ᠲᠡᠷᠡ ᠮᠠᠨᠢ ᠵᠥᠪᠬᠡᠨ ᠤᠨᠲᠠᠵᠤ ᠪᠠᠢᠭᠠ᠂ ᠲᠡᠭᠦᠨ ᠦ᠌ ᠠᠷᠠᠳ ᠢᠷᠭᠡᠳ ᠨᠢ ᠠᠶᠤᠯ ᠲᠦᠭᠰᠢᠭᠦᠷᠢ ᠳ᠋ᠦ᠍ ᠲᠤᠯᠭᠠᠷᠠᠬᠤ ᠦᠶᠡᠰ ᠲᠡᠷᠡ ᠰᠡᠷᠡᠬᠦ ᠪᠥᠭᠡᠳ ᠴᠡᠷᠢᠭ ᠠᠩᠭᠢ ᠪᠠᠨ ᠴᠤᠭᠯᠠᠭᠤᠯᠬᠤ ᠪᠣᠯᠤᠨᠠ ᠭᠡᠯᠡ᠃
– ᠭᠡᠬᠦ ᠳ᠋ᠦ᠍ ᠥᠨᠥᠳᠥᠷ ᠦ᠋ᠨ ᠲᠡᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠬᠠᠷᠢᠨ ᠫᠤᠤ ᠵᠡᠪᠰᠡᠭ᠂ ᠨᠢᠰᠬᠡᠯ ᠪᠣᠯᠤᠨ ᠶᠡᠬᠡ ᠮᠥᠩᠭᠥ ᠲᠥᠭᠥᠷᠢᠭ ᠪᠠᠭᠲᠠᠵᠤ ᠪᠠᠢᠨᠠ᠃ ᠲᠡᠭᠡᠬᠦ ᠳ᠋ᠦ᠍ ᠪᠢᠳᠡ ᠮᠥᠨ ᠯᠡ ᠬᠥᠭᠡᠷᠦᠬᠦᠢ ᠨᠤᠮᠤ ᠰᠤᠮᠤ ᠲᠠᠢ ᠪᠠᠨ ᠯᠠ ᠪᠠᠢᠳᠠᠭ ᠭᠡᠵᠦ ᠪᠠᠳᠤᠬᠠᠭᠠᠯᠭᠠ ᠠ᠋ᠴᠠ ᠢᠷᠡᠭᠰᠡᠨ ᠡᠷᠡ ᠶᠠᠷᠢᠯᠠ᠃