ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ᠂ ᠨᠠᠢ᠍ᠮᠠ ᠶᠢᠨ ᠠᠭᠤᠯᠠᠨ ᠳᠤ ᠁ (ᠶᠢᠰᠦ) Сэрүүхэн тал нутаг–<свис> Вальтер Босгард (Walter Bosshard)- Дөрөвдүгээр бөлөг 9
300ᠶᠢᠰᠦ ᠂ ᠥᠯᠵᠡᠢᠮᠡᠨᠳᠦ – ᠡᠮᠡᠭᠲᠡᠢ ᠶ᠋ᠢᠨ ᠡᠮᠴᠢ ᠪᠥᠭᠡᠳ ᠣᠪᠢᠳᠠᠰᠴᠢᠨ
ᠨᠢᠭᠡᠨ ᠥᠷᠯᠥᠭᠡ ᠷᠠᠰᠢ ᠨᠠᠳᠠ ᠳ᠋ᠤ᠌ ᠥᠯᠵᠡᠢᠮᠡᠨᠳᠦ ᠬᠡᠮᠡᠬᠦ ᠠᠷᠤ ᠮᠣᠩᠭᠣᠯ ᠤ᠋ᠨ ᠬᠡᠷᠦᠯᠦᠨ ᠮᠥᠷᠡᠨ ᠦ᠌ ᠲᠡᠨᠳᠡ ᠡᠴᠡ ᠢᠷᠡᠭᠰᠡᠨ ᠥᠪᠠᠳᠢᠰᠴᠢᠨ ᠠᠳᠠ ᠠ᠋ᠴᠠ ᠬᠣᠷᠢᠨ ᠭᠠᠵᠠᠷ ᠵᠠᠢᠲᠠᠢ ᠠᠨᠠᠨ ᠭᠡᠬᠦ ᠭᠠᠵᠠᠷ ᠲᠤ᠌ ᠢᠷᠡᠵᠦ᠂ ᠳᠠᠷᠠᠭᠠᠴᠢ ᠶ᠋ᠢᠨ ᠬᠣᠶᠠᠷ ᠦᠳᠡᠰᠢ ᠪᠡᠷ ᠪᠦᠰᠡᠭᠦᠢ ᠬᠡᠦᠬᠡᠳ ᠦ᠋ᠨ ᠡᠪᠡᠳᠴᠢᠨ ᠵᠣᠪᠠᠯᠠᠩ ᠢ᠋ ᠠᠷᠢᠯᠭᠠᠵᠤ ᠥᠭᠭᠦᠨᠡ ᠭᠡᠰᠡᠨ ᠴᠢᠮᠡᠭᠡ ᠶ᠋ᠢ ᠬᠡᠯᠡᠵᠦ ᠥᠭᠪᠡ᠃
– ᠡᠮᠡᠭᠲᠡᠢ ᠶ᠋ᠢᠨ ᠰᠠᠯᠠᠭᠠᠨ ᠤ᠋ ᠮᠣᠩᠭᠣᠯ ᠡᠮᠴᠢ! ᠪᠢ ᠲᠡᠭᠦᠨ ᠲᠡᠢ ᠲᠠᠨᠢᠯᠴᠠᠶᠠ ᠭᠡᠵᠦ ᠬᠦᠰᠡᠵᠦ ᠪᠠᠢᠨᠠ᠃
– ᠲᠡᠷᠡ ᠴᠢᠨᠢ ᠡᠮᠴᠢ ᠡᠴᠡ ᠬᠣᠯᠠ ᠢᠯᠡᠭᠦᠦ ᠰᠢᠦ ᠳᠡ᠂ ᠤᠪᠠᠳᠢᠰ ᠭᠠᠷᠭᠠᠨ ᠡᠪᠡᠳᠴᠢᠨ ᠡᠳᠡᠭᠡᠷᠡᠭᠦᠯᠵᠦ ᠴᠢᠳᠠᠨᠠ ᠰᠢᠦ !
– ᠲᠡᠭᠡᠪᠡᠯ ᠨᠡᠩ ᠰᠠᠢᠨ᠂ ᠬᠡᠵᠢᠶᠡ ᠡᠴᠡ ᠡᠬᠢᠯᠡᠨᠡ ᠭᠡᠵᠦ ᠪᠠᠢᠨᠠ ᠪᠣᠢ? ᠮᠢᠨᠦ ᠬᠣᠱᠣᠩᠨᠠᠨ ᠶᠠᠷᠢᠬᠤ ᠶ᠋ᠢ ᠪᠠᠭᠰᠢ ᠮᠠᠨᠢ ᠠᠩᠵᠠᠭᠠᠷᠠᠯ ᠦᠭᠡᠢ ᠪᠡᠷ :
– ᠬᠡᠷᠪᠡ ᠪᠢᠳᠡ ᠠᠳᠠ ᠠ᠋ᠴᠠ ᠦᠳᠡ ᠶ᠋ᠢᠨ ᠬᠣᠢᠨᠠ ᠳᠥᠷᠪᠡᠨ ᠴᠠᠭ ᠤ᠋ᠨ ᠦᠶᠡ ᠪᠡᠷ ᠮᠣᠷᠳᠠᠪᠠᠯ ᠲᠡᠨᠳᠡ ᠴᠦ᠍ ᠡᠷᠲᠡ ᠬᠦᠷᠦᠨᠡ ᠪᠠᠢᠬᠠ ᠳᠠ ! ᠥᠯᠵᠡᠢᠮᠡᠨᠳᠦ ᠶ᠋ᠢᠨ ᠡᠮᠴᠢᠯᠡᠭᠡ ᠶᠡᠷᠦᠳᠡ ᠶ᠋ᠢᠨ ᠪᠠᠢᠳᠠᠯ ᠳ᠋ᠤ᠌ ᠲᠠᠪᠤ ᠠ᠋ᠴᠠ ᠵᠢᠷᠭᠤᠭᠠᠨ ᠴᠠᠭ ᠤ᠋ᠨ ᠬᠣᠭᠣᠷᠣᠨᠳᠣ ᠡᠬᠢᠯᠡᠳᠡᠭ ᠶᠦᠮ ᠭᠡᠯᠡ᠃
ᠦᠳᠡ ᠶ᠋ᠢᠨ ᠬᠣᠢᠨᠠ ᠪᠢᠳᠡ ᠮᠣᠷᠳᠠᠨ ᠭᠠᠷᠤᠭᠠᠳ᠂ ᠨᠠᠷᠠ ᠡᠷᠲᠡ ᠪᠠᠢᠬᠤ ᠪᠣᠯᠬᠣᠷ ᠵᠠᠮ ᠳ᠋ᠠᠭᠠᠨ ᠠᠢᠯ ᠢ᠋ᠶ᠋ᠠᠷ ᠣᠷᠣᠵᠤ ᠠᠶᠠᠭᠠ ᠴᠠᠢ ᠤᠤᠭᠤᠵᠤ ᠠᠪᠤᠭᠠᠳ ᠲᠠᠪᠤᠨ ᠴᠠᠭ ᠥᠩᠭᠡᠷᠡᠰᠬᠢᠬᠦ ᠶ᠋ᠢᠨ ᠦᠶᠡᠰ ᠢ᠋ᠶ᠋ᠡᠷ ᠳᠡᠭᠡᠷᠡ ᠪᠡᠨ ᠶᠡᠬᠡ ᠣᠪᠣᠭᠠ ᠲᠠᠢ ᠣᠷᠣᠢ ᠳᠡᠭᠡᠷᠡ ᠬᠦᠷᠦᠯᠡ᠃ ᠵᠠᠮ ᠳ᠋ᠠᠭᠠᠨ ᠷᠠᠰᠢ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ ᠴᠢᠯᠠᠭᠤ ᠲᠡᠭᠦᠵᠦ ᠪᠠᠢᠭᠰᠠᠨ ᠪᠥᠭᠡᠳ ᠨᠠᠮᠠᠶ᠋ᠢ ᠭᠦᠢᠴᠡᠨ ᠢᠷᠡᠬᠦ ᠪᠡᠷ ᠣᠪᠣᠭᠠᠨ ᠳ᠋ᠤ᠌ ᠨᠡᠮᠡᠬᠦ ᠴᠢᠯᠠᠭᠤᠳ ᠠ᠋ᠴᠠ ᠪᠠᠨ ᠭᠤᠷᠪᠠ ᠶ᠋ᠢ ᠥᠭᠭᠦᠭᠡᠳ᠄
– ᠭᠠᠵᠠᠷ ᠤ᠋ᠨ ᠡᠵᠡᠨ ᠰᠠᠬᠢᠭᠤᠰᠤ ᠪᠢᠳᠡᠨ ᠢ᠋ ᠢᠪᠡᠭᠡᠨ ᠬᠠᠮᠠᠭᠠᠯᠠᠬᠤ ᠪᠣᠯᠤᠭᠠᠰᠠᠢ ᠭᠡᠮᠡᠨ ᠶᠠᠷᠢᠯᠠ᠃
ᠠᠨᠠᠨ ᠬᠦᠷᠲᠡᠯᠡ ᠳᠠᠪᠬᠢᠭᠤᠯᠤᠭᠠᠳ ᠣᠢᠷᠠᠲᠤᠨ ᠬᠦᠷᠬᠦ ᠳ᠋ᠦ᠍ ᠪᠦᠰᠡᠭᠦᠢ ᠬᠡᠦᠬᠡᠳ ᠰᠠᠭᠤᠭᠰᠠᠨ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠦᠬᠡᠷ ᠲᠡᠷᠭᠡ ᠪᠤᠴᠠᠨ ᠶᠠᠪᠤᠵᠤ ᠪᠠᠢᠭᠠ ᠲᠠᠢ ᠲᠣᠬᠢᠶᠠᠯᠳᠤᠪᠠ᠃ ᠬᠠᠷᠢᠨ ᠣᠪᠣᠭᠠᠨ ᠤ᠋ ᠰᠠᠬᠢᠭᠤᠰᠤ ᠡᠨᠡ ᠲᠤᠬᠠᠢ ᠶᠠᠮᠠᠷ ᠴᠤ᠌ ᠵᠦᠩ ᠰᠤᠪᠢᠨ ᠥᠭᠭᠦᠭᠡ ᠦᠭᠡᠢ ᠶᠤᠮᠰᠠᠨ᠃
– ᠥᠯᠵᠡᠢᠮᠡᠨᠲᠦ ᠥᠨᠥᠳᠥᠷ ᠢᠷᠡᠬᠦ ᠦᠭᠡᠢ᠃ ᠲᠡᠷᠡ ᠥᠨᠥᠳᠥᠷ ᠮᠣᠷᠢ ᠬᠤᠳᠠᠯᠳᠤᠨ ᠠᠪᠴᠤ ᠪᠠᠢᠭᠠ ᠲᠤᠯᠠ ᠮᠠᠷᠭᠠᠰᠢ ᠥᠷᠯᠥᠭᠡ ᠠᠷᠪᠠᠨ ᠴᠠᠭ ᠲᠤ᠌ ᠲᠡᠭᠦᠨ ᠦ᠌ ᠪᠤᠶᠠᠨ ᠨᠣᠮ ᠢ᠋ᠶ᠋ᠠᠨ ᠬᠢᠨᠡ ᠭᠡᠵᠦ ᠪᠠᠢᠨᠠ ᠭᠡᠵᠦ ᠷᠠᠰᠢ ᠶ᠋ᠢᠨ ᠠᠰᠠᠭᠤᠭᠰᠠᠨ ᠢ᠋ ᠬᠠᠷᠢᠭᠤᠯᠤᠯᠠ᠃
ᠪᠢᠳᠡᠨ ᠰᠡᠳᠬᠢᠯ ᠴᠥᠬᠥᠷᠡᠨ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠵᠤ ᠳᠠᠪᠬᠢᠭᠤᠯᠬᠤ ᠵᠠᠮ ᠳ᠋ᠠᠭᠠᠨ ᠷᠠᠰᠢ ᠨᠠᠳᠠ ᠳ᠋ᠤ᠌ ᠡᠨᠡ ᠬᠦ᠌ ᠨᠡᠷᠡᠲᠡᠢ ᠬᠥᠮᠦᠨ ᠦ᠌ ᠭᠠᠢᠬᠠᠮᠰᠢᠭᠲᠤ ᠴᠢᠳᠠᠪᠤᠷᠢ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠥᠭᠭᠦᠯᠡ᠃
– ᠲᠡᠷᠡ ᠵᠥᠪᠬᠡᠨ ᠪᠦᠰᠡᠭᠦᠢ ᠬᠡᠦᠬᠡᠳ ᠦ᠋ᠨ ᠡᠪᠡᠳᠴᠢᠨ ᠢ᠋ ᠡᠳᠡᠭᠡᠭᠡᠬᠦ ᠪᠢᠰᠢ᠂ ᠬᠠᠷᠢᠨ ᠪᠠᠰᠠ ᠨᠣᠮ ᠪᠢᠴᠢᠭ ᠡᠴᠡ ᠪᠡᠨ ᠢᠷᠡᠭᠡᠳᠦᠢ ᠶ᠋ᠢ ᠮᠡᠳᠡᠵᠦ ᠴᠢᠳᠠᠳᠠᠭ᠃ ᠲᠡᠷᠡ ᠴᠢᠮᠠᠶ᠋ᠢ ᠨᠢᠭᠡ ᠯᠡ ᠬᠠᠷᠠᠭᠠᠳ ᠴᠢᠨᠦ ᠠᠯᠢᠪᠠ ᠪᠣᠳᠣᠯ ᠢ᠋ ᠴᠢᠨᠢ ᠮᠡᠳᠡᠵᠦ ᠳᠡᠢᠯᠦᠨᠡ ᠃ ᠦᠬᠦᠭᠰᠡᠨ ᠬᠥᠮᠦᠨ ᠢ᠋ ᠴᠦ᠍ ᠠᠮᠢᠯᠠᠭᠤᠯᠵᠤ ᠴᠢᠳᠠᠳᠠᠭ ᠡᠷᠳᠡᠮ ᠲᠡᠢ ᠰᠢᠦ᠃
– ᠴᠢ ᠲᠡᠭᠦᠨ ᠢ᠋ ᠨᠢ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠦᠵᠡᠭᠰᠡᠨ ᠤᠤ ?
– ᠦᠭᠡᠢ᠂ ᠬᠥᠮᠦᠰ ᠲᠡᠭᠡᠵᠦ ᠬᠡᠯᠡᠵᠦ ᠪᠠᠢᠭᠰᠠᠨ᠃ ᠦᠳᠡᠰᠢ ᠨᠢ ᠷᠠᠰᠢ ᠮᠠᠷᠭᠠᠰᠢ ᠥᠷᠯᠥᠭᠡ ᠰᠠᠷᠵᠢ ᠪᠣᠯᠤᠨ ᠪᠢᠴᠢᠬᠠᠨ ᠬᠦᠦ ᠪᠡᠨ ᠴᠦ᠍ ᠳᠠᠭᠠᠭᠤᠯᠤᠨ ᠣᠴᠢᠬᠤ ᠪᠠᠷ ᠲᠣᠭᠲᠠᠭᠠᠳ᠄
– ᠰᠠᠷᠵᠢ ᠲᠡᠳᠡᠨ ᠳ᠋ᠦ᠍ ᠣᠳᠣᠬᠠᠨ ᠳ᠋ᠠᠭᠠᠨ ᠳᠤᠲᠠᠬᠤ ᠶᠠᠭᠤᠮᠠ ᠦᠭᠡᠢ ᠪᠣᠯᠪᠠᠴᠤ ᠲᠡᠨᠳᠡ ᠬᠦᠷᠴᠦ ᠶᠡᠬᠡ ᠪᠠᠭᠰᠢ ᠲᠠᠢ ᠠᠭᠤᠯᠵᠠᠬᠤ ᠨᠢ ᠬᠣᠬᠢᠷᠠᠬᠤ ᠵᠦᠢᠯ ᠭᠡᠵᠦ ᠠᠯᠠᠭᠠ ᠯᠠ ᠳᠠ᠃ ᠬᠣᠩᠭᠣᠷ ᠴᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠣᠨᠢᠨ ᠰᠦᠷᠦᠭ ᠢ᠋ᠶ᠋ᠡᠨ ᠬᠠᠷᠠᠵᠤ ᠳᠡᠢᠯᠬᠦ ᠴᠢᠳᠠᠯ ᠲᠠᠢ ᠪᠣᠯᠵᠠᠢ ᠭᠡᠯᠡ᠃ ᠷᠠᠰᠢ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠪᠠᠷ ᠰᠠᠯᠬᠤ ᠶᠣᠰᠣ ᠬᠢᠭᠡᠳ ᠮᠠᠷᠭᠠᠰᠢ ᠥᠷᠯᠥᠭᠡ ᠲᠡᠳᠡᠨ ᠦ᠌ ᠬᠢᠨ ᠳ᠋ᠦ᠍ ᠠᠭᠤᠯᠵᠠᠬᠤ ᠪᠠᠷ ᠲᠣᠭᠲᠠᠪᠠ᠃
ᠨᠠᠮᠠᠶ᠋ᠢ ᠮᠠᠷᠭᠠᠰᠢ ᠨᠢ ᠨᠠᠮᠵᠢᠭᠤᠬᠠᠨ ᠰᠠᠢᠬᠠᠨ ᠬᠥᠨᠳᠡᠢ ᠪᠡᠷ ᠳᠠᠪᠬᠢᠭᠤᠯᠤᠨ ᠥᠨᠳᠥᠷ ᠳᠡᠭᠡᠷᠡ ᠭᠠᠷᠬᠤ ᠳ᠋ᠤ᠌ ᠲᠣᠭᠲᠠᠭᠰᠠᠨ ᠴᠠᠭ ᠠ᠋ᠴᠠ ᠪᠠᠨ ᠪᠠᠭᠠ ᠬᠣᠴᠣᠷᠤᠭᠰᠠᠨ ᠲᠤᠯᠠ ᠰᠡᠷᠵᠢ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠵᠣᠭᠰᠣᠭᠠᠳ ᠨᠠᠮᠠᠶ᠋ᠢ ᠪᠠᠷᠠᠯᠠᠵᠤ ᠪᠠᠢᠯᠠ᠃ ᠰᠠᠷᠵᠢ ᠬᠦᠨᠳᠦ ᠲᠣᠯᠣᠭᠠᠢ ᠶ᠋ᠢᠨ ᠵᠠᠰᠠᠯ ᠢ᠋ᠶ᠋ᠠᠨ ᠵᠡᠭᠦᠭᠡᠳ ᠡᠷᠬᠢᠮᠰᠦᠭ ᠰᠠᠢᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃ ᠠᠯᠲᠠᠨᠴᠡᠴᠡᠭ ᠴᠦ᠍ ᠲᠣᠷᠭᠠᠨ ᠬᠤᠪᠴᠠᠰᠤ ᠪᠠᠷ ᠬᠤᠪᠴᠠᠯᠠᠭᠠᠳ᠂ ᠵᠥᠪᠬᠡᠨ ᠬᠤᠷᠢᠮᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠰᠠᠶᠢ ᠬᠡᠷᠡᠭᠯᠡᠵᠦ ᠪᠣᠯᠳᠠᠭ ᠮᠥᠩᠭᠥ ᠱ᠌ᠢᠷᠦ ᠪᠡᠷ ᠬᠢᠭᠰᠡᠨ ᠲᠣᠯᠣᠭᠠᠢ ᠶ᠋ᠢᠨ ᠵᠠᠰᠠᠯ ᠯᠠ ᠳᠤᠲᠠᠭᠤ ᠪᠠᠢᠪᠠ᠃
– ᠪᠠᠨᠳᠢᠩ ᠡᠪᠡᠳᠴᠢᠨ ᠲᠡᠢ ᠡᠵᠢ ᠪᠡᠨ ᠠᠪᠴᠤ ᠬᠦᠷᠦᠨᠡ᠃ ᠲᠡᠭᠡᠭᠡᠳ ᠪᠢ ᠴᠦ᠍ ᠶᠠᠪᠤᠬᠤ ᠪᠠᠷ ᠪᠣᠯᠪᠠ ᠭᠡᠵᠦ ᠠᠯᠲᠠᠨᠴᠡᠴᠡᠭ ᠮᠢᠨᠦ ᠭᠠᠢᠬᠠᠭᠰᠠᠨ ᠬᠠᠷᠠᠴᠠ ᠶ᠋ᠢ ᠬᠠᠷᠠᠭᠠᠳ ᠬᠡᠯᠡᠯᠡ᠃
– ᠮᠥᠨ ᠡᠢᠮᠦ ᠯᠡ ᠠᠮᠠᠷᠬᠠᠨ ᠤᠤ? ᠭᠡᠵᠦ ᠪᠢ ᠬᠠᠷᠢᠭᠤ ᠱᠣᠭᠯᠠᠨ ᠠᠰᠠᠭᠤᠪᠠ᠃ ᠡᠮᠦᠨᠡ ᠮᠢᠨᠢ ᠵᠣᠭᠰᠣᠵᠤ ᠪᠠᠢᠭᠠ ᠡᠨᠡ ᠬᠡᠦᠬᠡᠨ ᠨᠡᠯᠢᠶᠡᠳ ᠡᠷᠲᠡᠭᠦᠷ ᠨᠢᠭᠡ ᠡᠭᠡᠮᠦᠭ ᠢ᠋ᠶ᠋ᠡᠨ ᠭᠡᠭᠡᠭᠰᠡᠨ ᠪᠥᠭᠡᠳ ᠯᠠᠮᠠ ᠨᠠᠷ ᠢ᠋ᠶ᠋ᠠᠷ ᠭᠡᠭᠡᠭᠰᠡᠨ ᠭᠠᠵᠠᠷ ᠢ᠋ ᠨᠢ ᠵᠢᠭᠠᠯᠭᠠᠵᠤ ᠣᠯᠵᠤ ᠠᠪᠤᠨᠠ ᠭᠡᠮᠡᠨ ᠬᠦᠰᠡᠵᠦ ᠪᠠᠢᠭᠠ ᠶᠤᠮ᠃
– ᠪᠠᠰᠠ ᠨᠢᠭᠡ ᠨᠢ ᠪᠢ ᠤᠳᠠᠯ ᠦᠭᠡᠢ ᠬᠡᠦᠬᠡᠳ ᠲᠡᠢ ᠪᠣᠯᠬᠤ ᠤᠤ? ᠭᠡᠰᠡᠨ ᠢ᠋ ᠠᠰᠠᠭᠤᠬᠤ ᠭᠡᠰᠡᠨ ᠶᠦᠮ ᠭᠡᠵᠦ ᠰᠢᠷᠪᠡᠭᠡᠲᠦᠨ ᠶᠠᠷᠢᠯᠠ᠃
ᠠᠨᠠᠨ ᠠᠳᠠ ᠠ᠋ᠴᠠ ᠦᠬᠡᠷ ᠲᠡᠷᠭᠡ ᠪᠡᠷ ᠪᠠᠷᠤᠭ ᠭᠤᠷᠪᠠᠨ ᠴᠠᠭ ᠶᠠᠪᠤᠬᠤ ᠵᠠᠢ ᠲᠠᠢ ( ᠵᠢᠷᠤᠭ 91 ) ᠪᠣᠯᠬᠣᠷ ᠡᠨᠡ ᠨᠡᠷᠡᠲᠡᠢ ᠶᠡᠬᠡ ᠪᠠᠭᠰᠢ ᠠ᠋ᠴᠠ ᠠᠬᠢᠭᠠᠳ ᠬᠣᠴᠣᠷᠬᠤ ᠪᠣᠯᠪᠠ ᠤᠤ ᠭᠡᠵᠦ ᠪᠢ ᠵᠢᠷᠦᠬᠡᠰᠢᠶᠡᠵᠦ ᠪᠠᠢᠪᠠ᠃ ᠪᠢᠳᠡ ᠬᠦᠷᠬᠦ ᠭᠠᠵᠠᠷ ᠤᠷᠤᠭᠤ ᠪᠠᠨ ᠱᠠᠯᠠᠪᠳᠠᠨ ᠬᠥᠳᠡᠯᠵᠦ ᠳᠠᠪᠬᠢᠭᠤᠯᠪᠠ᠃ ᠠᠯᠲᠠᠨᠴᠡᠴᠡᠭ ᠲᠠᠩᠳᠠ ᠬᠠᠮᠤᠭ ᠤ᠋ᠨ ᠡᠮᠦᠨᠡ ᠨᠢ ᠳᠠᠪᠬᠢᠭᠤᠯᠵᠤ ᠪᠠᠢᠳᠠᠭ ᠨᠢ ᠲᠡᠭᠦᠨ ᠦ᠌ ᠤᠨᠤᠭᠠ ᠨᠢ ᠠᠳᠤᠭᠤᠨ ᠰᠦᠷᠦᠭ ᠡᠴᠡ ᠰᠢᠨᠡᠬᠡᠨ ᠪᠠᠷᠢᠵᠤ ᠠᠪᠤᠭᠰᠠᠨ ᠵᠠᠯᠠᠭᠤᠬᠠᠨ ᠮᠣᠷᠢ ᠪᠣᠯᠬᠣᠷ ᠡᠮᠡᠭᠡᠯ ᠬᠠᠵᠠᠭᠠᠷ ᠢ᠋ᠶ᠋ᠠᠨ ᠵᠢᠭᠰᠢᠨ ᠪᠤᠯᠭᠢᠨ ᠳᠠᠪᠬᠢᠵᠤ ᠪᠠᠢᠭᠠ ᠠᠵᠢ᠃
ᠬᠣᠢᠨᠠ ᠨᠢ ᠪᠠᠢᠭᠠ ᠥᠨᠳᠥᠷ ᠡᠰᠢ ᠲᠡᠢ ᠵᠢᠵᠢᠭᠬᠡᠨ ᠬᠣᠷᠯᠣ ᠨᠢ ᠰᠠᠯᠬᠢᠨ ᠳ᠋ᠤ᠌ ᠬᠦᠩᠭᠢᠨᠡᠨ ᠳᠤᠤᠭᠠᠷᠬᠤ ᠭᠡᠷ ᠦ᠋ᠨ ᠡᠮᠦᠨᠡ ᠨᠢᠭᠡᠨᠲᠡ ᠶᠡᠬᠡ ᠣᠯᠠᠨ ᠬᠥᠮᠦᠨ ᠠᠪᠠᠭᠠᠷᠠᠯᠳᠤᠨ ᠴᠤᠭᠯᠠᠷᠠᠵᠠᠢ ( ᠵᠢᠷᠤᠭ 92 )᠃ ᠰᠠᠷᠵᠢ ᠪᠣᠯᠤᠨ ᠠᠯᠲᠠᠨᠴᠡᠴᠡᠭ ᠡᠴᠡ ᠴᠦ᠍ ᠭᠣᠶᠣ ᠬᠤᠪᠴᠠᠯᠠᠭᠰᠠᠨ ᠪᠦᠰᠡᠭᠦᠢᠴᠦᠦᠯ ᠪᠢᠳᠡᠨ ᠳ᠋ᠦ᠍ ᠠᠮᠤᠷ ᠡᠷᠢᠵᠦ ᠪᠠᠢᠪᠠ ( ᠵᠢᠷᠤᠭ 94 )᠃ ᠮᠢᠨᠦ ᠤᠯᠠᠭᠠᠨ ᠨᠠᠭᠤᠷ ᠪᠣᠯᠤᠨ ᠣᠪᠣᠭᠠᠨ ᠨᠠᠢᠷ ᠳᠡᠭᠡᠷᠡ ᠲᠠᠨᠢᠯᠴᠠᠭᠰᠠᠨ ᠬᠡᠳᠦᠨ ᠬᠥᠮᠦᠨ ᠪᠢᠳᠡᠨ ᠦ᠌ ᠰᠠᠭᠤᠵᠤ ᠪᠠᠢᠭᠠ ᠵᠦᠯᠭᠡᠨ ᠳᠡᠭᠡᠷᠡ ᠣᠢᠷᠠᠲᠤᠨ ᠢᠷᠡᠵᠦ ᠰᠠᠭᠤᠵᠠᠭᠠᠪᠠ᠃ ᠥᠯᠵᠡᠢᠮᠡᠨᠳᠦ ᠮᠥᠨ ᠯᠡ ᠣᠯᠠᠨ ᠢ᠋ ᠬᠦᠯᠢᠶᠡᠯᠭᠡᠭᠰᠡᠭᠡᠷ ᠪᠠᠢᠪᠠ᠃ ᠨᠠᠮᠠᠶ᠋ᠢ ᠵᠢᠷᠤᠭ ᠤ᠋ᠨ ᠮᠠᠰᠢᠨ ᠢ᠋ᠶ᠋ᠠᠨ ᠭᠠᠷᠭᠠᠬᠤ ᠳ᠋ᠤ᠌ ᠷᠠᠰᠢ ᠢᠳᠡᠭᠡ ᠶᠠᠳᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠬᠠᠷᠠᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠣᠨᠳᠣᠣ ᠮᠣᠩᠭᠣᠯᠴᠤᠳ ᠬᠠᠷᠢᠨ ᠶᠡᠬᠡ ᠯᠡ ᠰᠣᠨᠢᠷᠬᠠᠵᠤ ᠪᠠᠢᠪᠠ᠃ ᠬᠥᠮᠦᠨ ᠪᠣᠯᠭᠠᠨ ᠱᠠᠭᠠᠢᠭᠤᠷ ᠢ᠋ᠶ᠋ᠠᠷ ᠨᠢ ᠬᠠᠷᠠᠵᠤ ᠦᠵᠡᠬᠦ ᠶ᠋ᠢ ᠬᠦᠰᠡᠬᠦ ᠪᠣᠯᠬᠣᠷ ᠪᠢ ᠴᠦ᠍ ᠲᠡᠳᠡᠨ ᠢ᠋ᠶ᠋ᠡᠷ ᠪᠠᠬᠠᠨ ᠬᠠᠷᠠᠭᠤᠯᠪᠠ᠃ ᠲᠡᠭᠡᠭᠡᠳ ᠨᠠᠮᠠᠶ᠋ᠢ ᠠᠩᠬᠠᠨ ᠤ᠋ ᠵᠢᠷᠤᠭ ᠢ᠋ᠶ᠋ᠠᠨ ᠲᠠᠲᠠᠭᠰᠠᠨ ᠤ᠋ ᠳᠠᠷᠠᠭᠠ ᠲᠡᠳᠡ ᠴᠥᠮ ᠵᠢᠷᠤᠭ ᠠᠪᠬᠠᠭᠤᠯᠬᠤ ᠭᠡᠮᠡᠨ ᠬᠦᠰᠡᠵᠡᠭᠡᠪᠡ᠃ ᠮᠣᠷᠢ ᠲᠠᠢ᠂ ᠵᠦᠯᠭᠡᠨ ᠳᠡᠭᠡᠷᠡ᠂ ᠲᠠᠮᠠᠬᠢᠨ ᠲᠣᠭᠣᠭᠠ ᠲᠠᠢ ᠭᠡᠬᠦ ᠮᠡᠲᠦ ᠶᠠᠩᠵᠤ ᠶᠠᠩᠵᠤ ᠪᠠᠷ ᠠᠪᠬᠠᠭᠤᠯᠪᠠ᠃ ᠪᠦᠰᠡᠬᠦᠢᠴᠤᠯ ᠡᠰᠡᠷᠭᠦ ᠲᠠᠯᠠ ᠳ᠋ᠤ᠌ ᠰᠠᠭᠤᠵᠠᠭᠠᠵᠤ ᠪᠠᠢᠪᠠ ( ᠵᠢᠷᠤᠭ 93 )᠃ ᠵᠢᠰᠦ ᠶᠠᠩᠵᠤ ᠨᠢ ᠠᠶᠤᠮᠠᠷ ᠨᠢᠭᠡ ᠬᠥᠭᠰᠢᠨ ᠵᠣᠷᠢᠭᠯᠠᠨ ᠪᠢᠳᠡᠨ ᠤᠷᠤᠭᠤ ᠣᠢᠷᠠᠲᠤᠨ ᠰᠠᠭᠤᠵᠤ᠂ ᠨᠠᠮᠠᠶ᠋ᠢ ᠣᠷᠣᠢ ᠠ᠋ᠴᠠ ᠤᠯᠠ ᠳ᠋ᠤ᠌ ᠲᠤᠯᠲᠠᠯᠠ ᠠᠩᠬᠠᠷᠤᠨ ᠠᠵᠢᠭᠯᠠᠭᠰᠠᠨ ᠢ᠋ᠶ᠋ᠠᠨ ᠠᠯᠭᠤᠷ ᠢ᠋ᠶ᠋ᠠᠷ ᠣᠢᠷᠠᠲᠤᠨ ᠢᠷᠡᠪᠡ᠃ ᠮᠢᠨᠦ ᠭᠠᠷ ᠴᠠᠭ ᠢ᠋ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠣᠯᠢᠶᠠᠪᠤᠷ ᠬᠤᠷᠤᠭᠤ ᠪᠠᠨ ᠬᠥᠩᠭᠡᠬᠡᠨ ᠮᠥᠷᠲᠡᠭᠡᠨ ᠬᠢᠴᠢᠶᠡᠮᠡᠲᠡᠭᠡᠢ ᠪᠡᠷ ᠨᠢᠴᠦᠭᠦᠨ ᠡᠪᠦᠳᠦᠭ ᠲᠦ᠍ ᠮᠢᠨᠢ ᠬᠦᠷᠭᠡᠬᠦ ᠨᠢ ᠶᠠᠭ ᠯᠠ ᠶᠠᠮᠠᠷ ᠨᠢᠭᠡᠨ ᠨᠠᠨᠳᠢᠨ ᠵᠦᠢᠯ ᠳ᠋ᠦ᠍ ᠭᠠᠷ ᠬᠦᠷᠴᠦ ᠪᠠᠢᠭᠠ ᠮᠡᠲᠦ ᠪᠠᠢᠯᠠ᠃ ᠭᠡᠨᠡᠳᠲᠡ ᠲᠡᠷᠡ ᠮᠢᠨᠦ ᠭᠤᠶᠠᠨ ᠳᠡᠭᠡᠷᠡᠬᠢ ᠦᠰᠦᠨ ᠡᠴᠡ ᠨᠢᠭᠡ ᠰᠢᠷᠬᠡᠭ ᠢ᠋ ᠵᠤᠮᠠᠭᠠᠨ ᠠᠪᠤᠮᠠᠭᠴᠠ ᠪᠠᠨ᠄
– ᠠ ! ᠭᠡᠵᠦ ᠪᠠᠷᠬᠢᠷᠠᠭᠠᠳ ᠲᠡᠷᠯᠢᠭ ᠦ᠋ᠨ ᠬᠣᠷᠮᠣᠢ ᠪᠠᠨ ᠲᠦᠷᠭᠡᠬᠡᠨ ᠪᠠᠷᠢᠵᠤ ᠠᠪᠤᠭᠠᠳ ᠪᠦᠰᠡᠭᠦᠢᠴᠦᠦᠯ ᠤᠷᠤᠭᠤ ᠭᠦᠶᠦᠨ ᠣᠳᠪᠠ᠃ ᠪᠢ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠠᠷᠠᠬᠤ ᠳ᠋ᠤ᠌ ᠠᠯᠲᠠᠨᠴᠡᠴᠡᠭ ᠦ᠋ᠨ ᠵᠢᠮᠡᠯᠡᠭᠰᠡᠨ ᠬᠠᠷᠠᠴᠠ ᠲᠠᠢ ᠮᠥᠷᠭᠥᠯᠳᠦᠪᠡ᠃ ᠲᠡᠷᠡ ᠬᠦ᠌ ᠵᠣᠷᠢᠭ ᠲᠠᠢ ᠬᠥᠭᠰᠢᠨ ᠮᠢᠨᠦ ᠰᠢᠷᠭᠠᠯ ᠦᠰᠦ ᠶ᠋ᠢ ᠪᠦᠰᠡᠬᠦᠢᠴᠦᠯ ᠳ᠋ᠡᠭᠡᠨ ᠦᠵᠡᠭᠦᠯᠦᠨ ᠭᠠᠢᠬᠠᠭᠤᠯᠵᠤ ᠪᠠᠢᠬᠤ ᠳ᠋ᠤ᠌ ᠠᠯᠲᠠᠨᠴᠡᠴᠡᠭ ᠮᠢᠨᠦ ᠡᠮᠦᠨᠡ ᠡᠴᠡ ᠢᠴᠢᠵᠦ ᠪᠠᠢᠭᠠ ᠠᠵᠢ ᠃ ᠡᠷᠡᠴᠦᠦᠯ ᠨᠢ ᠡᠭᠦᠨ ᠢ᠋ ᠬᠠᠷᠠᠭᠠᠳ ᠬᠠᠳᠠᠭᠠᠨᠠᠲᠠᠯᠠ ᠪᠠᠨ ᠢᠨᠢᠶᠡᠯᠳᠦᠨ ᠱᠣᠭᠯᠠᠵᠠᠭᠠᠵᠤ ᠪᠠᠢᠪᠠ᠃
ᠡᠨᠡ ᠡᠳᠦᠷ ᠪᠢ ᠲᠠᠭᠠᠲᠠᠢ ᠶ᠋ᠢ ᠪᠣᠳᠣᠭᠠᠳ ᠣᠬᠣᠷ ᠥᠮᠥᠳᠥ ᠡᠮᠦᠰᠦᠭᠰᠡᠨ ᠪᠥᠯᠥᠭᠡ᠃ ᠬᠠᠷᠢᠨ ᠮᠢᠨᠦ ᠨᠢᠴᠦᠭᠦᠨ ᠬᠠᠷᠢᠲᠤ ᠵᠢᠴᠢ ᠭᠤᠶᠠ ᠨᠢ ᠮᠣᠩᠭᠣᠯᠴᠤᠳ ᠤ᠋ᠨ ᠳᠤᠷᠠ ᠦᠭᠡᠢᠴᠡᠯ ᠢ ᠬᠦᠷᠭᠡᠨᠡ ᠭᠡᠵᠦ ᠬᠡᠨ ᠰᠠᠨᠠᠯᠠ ᠳᠠ᠃ ᠠᠯᠲᠠᠨᠴᠠᠴᠡᠭ ᠤᠳᠠᠬᠤ ᠦᠭᠡᠢ ᠤᠳᠠᠬᠤ ᠦᠭᠡᠢ ᠰᠡᠮᠡᠭᠡᠷᠬᠡᠨ ᠡᠷᠡᠴᠦᠦᠯ ᠦ᠋ᠨ ᠪᠦᠯᠦᠭ ᠤᠷᠤᠭᠤ ᠬᠠᠷᠠᠨᠠ᠃ ᠬᠦᠳᠡᠷᠯᠢᠭ ᠴᠢᠭᠢᠷᠠᠭ ᠪᠡᠶᠡ ᠲᠡᠢ ᠲᠥᠪᠯᠡᠭᠦᠬᠡᠨ ᠰᠠᠢᠬᠠᠨ ᠲᠥᠷᠥᠭᠰᠡᠨ᠂ ᠲᠣᠯᠣᠭᠠᠢ ᠳ᠋ᠠᠭᠠᠨ ᠯᠢᠮᠤᠤ ᠮᠠᠯᠠᠭᠠᠢ ᠶ᠋ᠢ ᠡᠷᠬᠢᠮ ᠢᠵᠠᠭᠤᠷᠲᠠᠨ ᠤ᠋ ᠨᠠᠮᠪᠠᠭᠠ ᠲᠠᠢ ᠪᠠᠷ ᠰᠠᠷᠠᠪᠴᠢ ᠪᠠᠨ ᠳᠣᠷᠣᠭᠰᠢ ᠪᠠᠨ ᠮᠤᠷᠤᠢᠯᠭᠠᠨ ᠲᠠᠯᠪᠢᠭᠰᠠᠨ ᠪᠠᠨᠳᠢᠩ ᠪᠢᠳᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠪᠠ᠃ ᠪᠠᠨᠳᠢᠩ ᠢ᠋ ᠪᠢ ᠠᠩᠬᠠ ᠤᠳᠠᠭᠠ ᠠᠭᠤᠯᠵᠠᠬᠤ ᠪᠠᠷ ᠨᠢ ᠶᠡᠬᠡ ᠲᠣᠭᠣᠭᠰᠠᠨ ᠶᠤᠮ᠃ ᠠᠯᠲᠠᠨᠴᠡᠴᠡᠭ ᠢ᠋ ᠲᠡᠷᠡ ᠥᠴᠦᠬᠡᠨ ᠴᠦ᠍ ᠠᠩᠬᠠᠷᠴᠤ ᠪᠠᠢᠬᠤ ᠪᠠᠢᠳᠠᠯ ᠦᠭᠡᠢ ᠪᠥᠭᠡᠳ ᠡᠨᠡ ᠨᠢ ᠡᠨᠳᠡᠬᠢ ᠵᠠᠩᠰᠢᠯ ᠳ᠋ᠠᠬᠢ ᠥᠪᠡᠷ ᠦ᠋ᠨ ᠬᠠᠢᠷᠠ ᠪᠠᠨ ᠴᠢᠯᠥᠭᠡᠲᠡᠢ ᠢᠯᠡᠳᠬᠡᠬᠦ ᠶ᠋ᠢ ᠬᠣᠷᠢᠭᠯᠠᠳᠠᠭ ᠠ᠋ᠴᠠ ᠪᠣᠯᠤᠭᠰᠠᠨ ᠶᠤᠮ᠃ ᠲᠡᠷᠡ ᠪᠡᠷ ᠨᠠᠢᠵᠠ ᠨᠥᠬᠥᠳ ᠨᠢ ᠲᠡᠭᠦᠨ ᠢ ᠱᠣᠭᠯᠠᠨ ᠳᠣᠭᠣᠭᠢᠯᠠᠬᠤ ᠳ᠋ᠤ᠌ ᠨᠢᠭᠡ ᠲᠠᠯᠠ ᠪᠠᠷ ᠴᠢᠷᠠᠢ ᠪᠠᠨ ᠤᠯᠠᠢᠯᠭᠠᠨ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠥᠪᠡᠷᠦᠨ ᠰᠡᠳᠬᠢᠯ ᠦ᠋ᠨ ᠨᠢᠭᠤᠴᠠ ᠶ᠋ᠢ ᠶᠠᠷᠢᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠥᠶᠥᠭᠬᠡᠨ ᠪᠠᠢᠯᠠ᠃
ᠪᠢᠳᠡ ᠡᠨᠡ ᠬᠦ᠌ ᠣᠪᠡᠳᠢᠰᠴᠢᠨ ᠪᠣᠯᠤᠨ ᠡᠮᠡᠭᠲᠡᠢ ᠶ᠋ᠢᠨ ᠡᠮᠴᠢ ᠶ᠋ᠢ ᠬᠡᠳᠦᠨ ᠴᠠᠭ ᠬᠦᠯᠢᠶᠡᠭᠰᠡᠨ ᠪᠥᠭᠡᠲᠡᠯᠡ ᠭᠠᠭᠴᠠ ᠬᠥᠮᠦᠨ ᠴᠦ᠍ ᠬᠦᠯᠢᠶᠡᠵᠦ ᠶᠠᠳᠠᠨ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠦᠭᠡ ᠶᠠᠷᠢᠬᠤ ᠦᠭᠡᠢ ᠠᠵᠢ᠃ ᠬᠥᠮᠦᠰ ᠪᠦᠷ ᠯᠡ ᠵᠠᠪ ᠴᠢᠯᠥᠭᠡ ᠲᠡᠢ ᠪᠥᠭᠡᠳ ᠬᠡᠷᠪᠡ ᠥᠨᠥᠳᠥᠷ ᠥᠯᠵᠡᠢᠮᠡᠨᠲᠦ ᠬᠦᠷᠴᠦ ᠢᠷᠡᠬᠦ ᠦᠭᠡᠢ ᠪᠣᠯ ᠮᠠᠷᠭᠠᠰᠢ ᠪᠤᠶᠤ ᠨᠥᠭᠥᠭᠡᠳᠦᠷ ᠮᠥᠨ ᠯᠡ ᠠᠳᠠ ᠬᠦᠷᠦᠯᠴᠡᠨ ᠢᠷᠡᠬᠦ ᠪᠣᠯᠤᠨᠠ᠃ ᠵᠦᠯᠭᠡᠨ ᠳᠡᠭᠡᠷᠡ ᠳᠡᠭᠡᠭᠰᠢ ᠪᠡᠨ ᠬᠠᠷᠠᠵᠤ ᠬᠡᠪᠲᠡᠭᠡᠳ ᠪᠣᠷᠣᠭᠠᠨ ᠪᠣᠯᠤᠨ ᠪᠠᠭᠤᠵᠤ ᠮᠡᠳᠡᠬᠦ ᠬᠥᠪᠥᠩ ᠴᠠᠭᠠᠨ ᠡᠭᠦᠯᠡ ᠶ᠋ᠢ ᠠᠵᠢᠭᠯᠠᠬᠤ ᠨᠢ ᠶᠠᠭᠤᠲᠠᠢ ᠵᠢᠷᠭᠠᠯᠲᠠᠢ ᠠᠵᠢ᠃
ᠲᠠᠪᠤᠨ ᠴᠠᠭ ᠤ᠋ᠨ ᠦᠶᠡᠰ ᠢ᠋ᠶ᠋ᠡᠷ ᠬᠢᠳᠡᠯ ᠦᠭᠡᠢ ᠵᠣᠭᠣᠭᠳᠠᠨ ᠪᠠᠢᠭᠰᠠᠨ ᠬᠥᠮᠦᠰ ᠭᠡᠨᠡᠳᠲᠡ ᠦᠢᠮᠡᠯᠳᠦᠨ ᠡᠬᠢᠯᠡᠪᠡ᠃ ᠲᠠᠯᠠ ᠳᠡᠭᠡᠭᠦᠷ ᠨᠢᠭᠡ ᠪᠦᠯᠦᠭ ᠮᠣᠷᠢᠲᠠᠨ ᠭᠠᠷᠴᠤ ᠢᠷᠡᠭᠡᠳ᠂ ᠤᠷᠢᠳ ᠢ᠋ᠶ᠋ᠠᠷ ᠬᠡᠮᠡᠷᠯᠢᠭᠲᠦ ᠬᠦᠷᠡᠩ ᠰᠢᠷᠠ ᠲᠡᠷᠯᠢᠭ ᠲᠡᠢ᠂ ᠰᠢᠨᠡᠬᠡᠨ ᠭᠤᠲᠤᠯ ᠪᠠ ᠥᠷᠭᠡᠨ ᠰᠠᠷᠠᠪᠴᠢ ᠲᠠᠢ ᠠᠯᠲᠠᠳᠠᠭᠰᠠᠨ ᠮᠠᠯᠠᠭᠠᠢ ᠲᠠᠢ ᠨᠢᠭᠡ ᠯᠠᠮᠠ ᠳᠠᠪᠬᠢᠨ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠴᠡᠷᠢᠭ ᠪᠣᠯᠤᠨ ᠯᠠᠮᠠ ᠨᠠᠷ ᠨᠡᠯᠢᠶᠡᠳ ᠵᠠᠢᠲᠠᠢ ᠳᠠᠭᠠᠯᠳᠤᠵᠤ ᠪᠠᠢᠪᠠ᠃ ᠲᠡᠷᠡ ᠰᠢᠷᠦᠭᠦᠨ ᠬᠠᠲᠠᠷᠢᠭᠤᠯᠤᠭᠰᠠᠭᠠᠷ ᠭᠡᠷ ᠦ᠋ᠨ ᠡᠮᠦᠨᠡᠬᠡᠨ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍᠂ ᠡᠭᠦᠳᠡᠨ ᠳᠡᠭᠡᠷᠡ ᠲᠦᠷᠭᠡᠬᠡᠨ ᠭᠡᠭᠴᠢ ᠤᠯᠠᠭᠠᠨ ᠬᠡᠪᠢᠰ ᠳᠡᠯᠭᠡᠨ ᠪᠡᠯᠡᠳᠪᠡ᠃ ᠬᠥᠮᠦᠰ ᠣᠪᠠᠳᠢᠰᠴᠢᠨ ᠯᠠᠮᠠ ( ᠵᠢᠷᠤᠭ 96 ) ᠶ᠋ᠢ ᠪᠦᠭᠦᠳᠡᠭᠡᠷ ᠭᠦᠨ ᠪᠥᠬᠥᠢᠵᠦ ᠤᠭᠲᠤᠨ ᠠᠪᠤᠭᠰᠠᠨ ᠪᠥᠭᠡᠳ ᠲᠡᠷᠡ ᠭᠠᠭᠴᠠᠬᠠᠨ ᠤᠳᠠᠭᠠ ᠴᠤ᠌ ᠨᠠᠭᠠᠰᠢ ᠪᠠᠨ ᠨᠢᠳᠦ ᠲᠠᠯᠪᠢᠯ ᠦᠭᠡᠢ ᠪᠡᠷ ᠭᠡᠷ ᠲᠦ᠍ ᠣᠷᠣᠨ ᠳᠠᠯᠳᠠᠷᠠᠪᠠ᠃ ᠭᠡᠷ ᠦ᠋ᠨ ᠡᠭᠦᠳᠡ ᠬᠠᠭᠠᠭᠳᠠᠵᠤ᠂ ᠡᠭᠦᠳᠡᠨ ᠤ ᠬᠠᠵᠠᠭᠤ ᠳ᠋ᠤᠨᠢ ᠬᠣᠶᠠᠷ ᠴᠡᠷᠢᠭ ᠵᠣᠭᠰᠣᠵᠤ ᠮᠠᠨᠠᠭᠠᠳ᠂ ᠰᠣᠨᠢᠷᠬᠠᠨ ᠣᠢᠷᠠᠲᠤᠭᠰᠠᠨ ᠬᠥᠮᠦᠰ ᠢ᠋ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠤᠬᠤᠷᠢᠭᠤᠯᠵᠤ ᠪᠠᠢᠪᠠ᠃ ᠤᠷᠤᠭᠰᠢᠯᠠᠨ ᠲᠡᠮᠡᠦᠯᠵᠦ ᠪᠠᠢᠭᠰᠠᠨ ᠬᠥᠮᠦᠰ ᠢᠨᠢᠶᠡᠯᠳᠦᠨ ᠵᠠᠢᠯᠠᠵᠠᠭᠠᠵᠤ᠂ ᠲᠠᠰᠢᠭᠤᠷ ᠲᠤ᠌ ᠣᠨᠣᠭᠳᠠᠭᠰᠠᠨ ᠦᠭᠡᠢ ᠨᠢᠭᠡ ᠨᠢ ᠪᠠᠶᠠᠷᠯᠠᠵᠠᠭᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠬᠢᠭᠠᠳ ᠡᠮᠦᠨᠡᠰᠢ ᠪᠡᠨ ᠲᠦᠷᠢᠨ ᠰᠢᠬᠠᠨᠠ᠃ ᠲᠣᠯᠣᠭᠠᠢ ᠳ᠋ᠠᠭᠠᠨ ᠴᠣᠯ ᠠᠯᠲᠠᠨ ᠵᠠᠰᠠᠯ ᠲᠠᠢ ᠨᠢᠭᠡ ᠪᠦᠰᠡᠭᠦᠢ ᠵᠥᠪᠰᠢᠶᠡᠷᠡᠯ ᠢ᠋ᠶ᠋ᠡᠷ ᠭᠡᠷ ᠲᠦ᠍ ᠣᠷᠣᠪᠠ᠃
– ᠪᠠᠶᠠᠴᠤᠳ ᠨᠢ ᠡᠮᠦᠨᠡ ᠨᠢ ᠣᠷᠣᠳᠠᠭ ᠶᠤᠮ᠂ ᠲᠡᠳᠡ ᠪᠢᠳᠡᠨ ᠡᠴᠡ ᠢᠯᠡᠭᠦᠦ ᠮᠥᠩᠭᠥ ᠥᠭᠴᠦ ᠳᠡᠢᠯᠦᠨᠡ ᠰᠢᠦ ᠳᠡ ᠭᠡᠵᠦ ᠷᠠᠰᠢ ᠠᠭᠤᠷᠯᠠᠵᠤ ᠭᠣᠮᠣᠳᠠᠭᠰᠠᠨ ᠪᠠᠢᠳᠠᠯ ᠦᠭᠡᠢ ᠲᠠᠢᠪᠤᠭᠤᠬᠠᠨ ᠶᠠᠷᠢᠭᠠᠳ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠵᠠᠯᠭᠠᠵᠤ᠄
– ᠲᠡᠷᠡ ᠪᠦᠰᠡᠭᠦᠢ ᠯᠠᠪ ᠬᠦᠨᠳᠦ ᠡᠪᠡᠳᠴᠢᠯᠡᠭᠰᠡᠨ ᠪᠠᠢᠬᠠ᠂ ᠡᠳᠦᠢ ᠤᠳᠠᠭᠠᠳ ᠭᠠᠷᠴᠤ ᠢᠷᠡᠳᠡᠭ ᠦᠭᠡᠢ ᠭᠡᠭᠴᠢ ᠭᠡᠳ ᠭᠡᠷ ᠦ᠋ᠨ ᠡᠭᠦᠳᠡ ᠤᠷᠤᠭᠤ ᠬᠠᠷᠠᠭᠰᠠᠭᠠᠷ ᠪᠠᠢᠪᠠ ᠃ ᠡᠴᠦᠰ ᠲᠡᠭᠡᠨ ᠲᠡᠷᠡ ᠪᠦᠰᠡᠭᠦᠢ ᠯᠠᠮᠠ ᠶ᠋ᠢᠨ ᠠᠳᠢᠰᠯᠠᠭᠰᠠᠨ ᠬᠥᠬᠡ ᠬᠠᠳᠠᠭ ᠲᠠᠢ ᠭᠠᠷᠴᠤ ᠢᠷᠡᠯᠡ᠃ ᠡᠭᠦᠳᠡᠨ ᠤ ᠡᠮᠦᠨᠡ ᠰᠥᠭᠥᠳᠦᠨ ᠮᠥᠷᠭᠥᠭᠡᠳ ᠬᠣᠢᠰᠢ ᠪᠠᠨ ᠤᠬᠤᠷᠢᠬᠤ ᠳ᠋ᠤ᠌ ᠥᠭᠡᠷᠡ ᠨᠢᠭᠡᠨ ᠪᠠᠶᠠᠨ ᠪᠦᠰᠡᠭᠦᠢ ᠣᠷᠣᠵᠤ ᠣᠴᠢᠪᠠ᠃ ᠴᠡᠷᠢᠭ ᠦ᠋ᠳ ᠠᠬᠢᠨ ᠰᠤᠷ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠡᠷᠭᠢᠭᠦᠯᠦᠨ ᠭᠤᠶᠠᠳᠠᠵᠤ ᠭᠠᠷᠬᠤ ᠳ᠋ᠤ᠌ ᠲᠣᠭᠣᠷᠢᠨ ᠵᠣᠭᠰᠣᠭᠰᠠᠨ ᠮᠣᠩᠭᠣᠯᠴᠤᠳ ᠤ᠋ᠨ ᠴᠢᠷᠠᠢ ᠳ᠋ᠠᠬᠢ ᠪᠠᠶᠠᠷᠯᠠᠭᠰᠠᠨ ᠪᠠᠢᠳᠠᠯ ᠨᠢ ᠠᠷᠢᠯᠵᠤ᠂ ᠨᠢᠭᠤᠷ ᠨᠢ ᠲᠥᠪ ᠪᠤᠯᠵᠠᠭᠠᠪᠠ᠃
ᠷᠠᠰᠢ ᠨᠠᠳᠠ ᠲᠠᠢ ᠣᠯᠠᠨ ᠬᠥᠮᠦᠨ ᠦ᠌ ᠳᠤᠮᠳᠠ ᠪᠠᠢᠵᠤ᠂ ᠮᠢᠨᠦ ᠡᠮᠦᠨᠡᠬᠢ ᠬᠥᠮᠦᠰ ᠪᠦᠷ ᠳᠣᠷᠣᠭᠰᠢ ᠪᠠᠨ ᠰᠥᠭᠥᠳᠦᠨ ᠵᠠᠯᠪᠠᠷᠢᠵᠤ᠂ ᠡᠷᠢᠭᠡ ᠪᠡᠨ ᠲᠣᠭᠠᠯᠠᠵᠤ ᠪᠠᠢᠭᠠ ᠪᠣᠯᠬᠣᠷ ᠭᠡᠷ ᠦ᠋ᠨ ᠡᠭᠦᠳᠡ ᠪᠡᠷ ᠪᠢ ᠳᠣᠲᠣᠷᠠᠬᠢ ᠶ᠋ᠢ ᠨᠢ ᠠᠵᠢᠭᠯᠠᠬᠤ ᠪᠣᠯᠤᠮᠵᠢ ᠲᠠᠢ ᠪᠠᠢᠪᠠ᠃ ᠲᠡᠭᠡᠭᠡᠳ ᠤᠳᠠᠯ ᠦᠭᠡᠢ ᠬᠤᠪᠢ ᠶ᠋ᠢᠨ ᠡᠮᠴᠢᠯᠡᠭᠡ ᠲᠡᠭᠦᠰᠴᠦ᠂ ᠤᠯᠠᠭᠠᠨ ᠬᠡᠪᠢᠰ ᠳᠡᠭᠡᠷᠡ ᠨᠢᠭᠡ ᠰᠠᠨᠳᠠᠯᠢ ᠲᠠᠯᠪᠢᠭᠳᠠᠨ ᠡᠩ ᠦ᠋ᠨ ᠠᠷᠠᠳ ᠤ᠋ᠨ ᠦᠵᠡᠭᠦᠯᠬᠦ ᠡᠭᠡᠯᠵᠢ ᠪᠣᠯᠵᠠᠢ᠃ ᠲᠣᠮᠣ ᠯᠠᠮᠠ ᠲᠣᠯᠣᠭᠠᠢ ᠨᠢᠴᠦᠭᠦᠨ ᠭᠠᠷᠴᠤ ᠢᠷᠡᠨ ᠰᠠᠨᠳᠠᠯᠢ ᠳᠡᠭᠡᠷᠡ ᠯᠠᠪᠳᠠᠭᠤᠬᠠᠨ ᠰᠠᠭᠤᠭᠠᠳ᠂ ᠡᠮᠦᠨᠡ ᠨᠢ ᠰᠥᠭᠥᠳᠴᠦ ᠪᠠᠢᠭᠠ ᠪᠦᠰᠡᠭᠦᠢ ᠲᠡᠢ ᠨᠠᠮ ᠳᠠᠭᠤ ᠪᠠᠷ ᠶᠠᠷᠢᠵᠤ ᠭᠠᠷᠪᠠ᠃ ᠲᠡᠭᠦᠨ ᠦ᠌ ᠨᠢᠳᠦ ᠨᠢ ᠨᠠᠭᠠᠰᠢ ᠴᠠᠭᠠᠰᠢ ᠪᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠨᠠᠳᠠ ᠳᠡᠭᠡᠷᠡ ᠪᠣᠯᠤᠨ ᠮᠢᠨᠦ ᠵᠢᠷᠤᠭ ᠤ᠋ᠨ ᠮᠠᠰᠢᠨ ᠳᠡᠭᠡᠷᠡ ᠲᠣᠭᠲᠠᠪᠠ᠃ ᠲᠡᠭᠡᠭᠡᠳ ᠬᠠᠮᠠᠭᠠᠯᠠᠭᠴᠢ ᠴᠡᠷᠢᠭ ᠲᠡᠭᠡᠨ ᠰᠢᠷᠦᠭᠦᠬᠡᠨ ᠢ᠋ᠶ᠋ᠡᠷ ᠬᠡᠳᠦᠨ ᠦᠭᠡ ᠶᠠᠷᠢᠬᠤ ᠳ᠋ᠤ᠌ ᠴᠡᠷᠢᠭ ᠠᠬᠢᠨ ᠲᠠᠰᠢᠭᠤᠷᠳᠠᠨ ᠡᠬᠢᠯᠡᠭᠡᠳ ᠬᠥᠮᠦᠰ ᠨᠠᠳᠠ ᠤᠷᠤᠭᠤ ᠰᠢᠬᠠᠨ ᠢᠷᠡᠵᠦ᠂ ᠪᠢ ᠴᠦ᠍ ᠬᠣᠢᠰᠢ ᠪᠠᠨ ᠲᠦᠯᠬᠢᠭᠳᠡᠪᠡ᠃ ᠯᠠᠮᠠ ᠶ᠋ᠢᠨ ᠬᠠᠮᠠᠭᠠᠯᠠᠭᠴᠢ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠬᠤ ᠳ᠋ᠤ᠌ ᠨᠠᠮᠠᠶ᠋ᠢ ᠶᠠᠭᠤ ᠪᠣᠯᠤᠭᠰᠠᠨ ᠤ᠋ ᠤᠬᠠᠭᠠᠨ ᠢ ᠨᠢ ᠣᠯᠵᠤ ᠠᠮᠵᠢᠯ ᠦᠭᠡᠢ ᠪᠡᠷ ᠠᠳᠠ ᠲᠡᠨᠳᠡ ᠡᠴᠡ ᠨᠠᠳᠠ ᠤᠷᠤᠭᠤ ᠴᠢᠯᠠᠭᠤ ᠰᠢᠳᠡᠭᠳᠡᠨ ᠢᠷᠡᠪᠡ᠃ ᠪᠦᠰᠡᠭᠦᠢᠴᠦᠳ ᠲᠣᠬᠣᠢ ᠪᠠᠷ ᠢ᠋ᠶ᠋ᠠᠨ ᠨᠠᠮᠠᠶ᠋ᠢ ᠶᠣᠪᠣᠷᠴᠤ᠂ ᠰᠠᠶᠢᠬᠠᠨ ᠬᠦᠷᠲᠡᠯᠡ ᠴᠣᠭ ᠢᠨᠢᠶᠡᠯᠳᠦᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠡᠷᠡᠴᠦᠦᠯ ᠨᠠᠮᠠᠶ᠋ᠢ ᠢᠰᠬᠦᠯᠵᠦ ᠡᠬᠢᠯᠡᠯᠡ᠃ ᠲᠡᠳᠡ ᠭᠠᠵᠠᠷ ᠳᠡᠭᠡᠷᠡ ᠡᠴᠡ ᠰᠢᠳᠡᠮᠡᠷ ᠶᠠᠭᠤᠮᠠ ᠡᠷᠢᠬᠦ ᠵᠠᠭᠤᠷᠠ ᠪᠠᠨ ᠨᠠᠳᠠ ᠤᠷᠤᠭᠤ ᠳᠠᠢᠰᠤᠩᠨᠠᠭᠰᠠᠨ ᠬᠠᠷᠠᠴᠠ ᠪᠠᠷ ᠬᠠᠷᠠᠵᠤ ᠪᠠᠢᠪᠠ᠃
ᠬᠤᠷᠳᠤᠨ ᠠᠳᠠ ᠠ᠋ᠴᠠ ᠵᠠᠢᠯᠠᠬᠤ ᠬᠡᠷᠡᠭᠲᠡᠢ ᠨᠢ ᠢᠯᠡᠳᠲᠡ ᠪᠣᠯᠵᠤ᠂ ᠭᠠᠳᠠᠭᠰᠢ ᠪᠠᠨ ᠬᠠᠨᠳᠤᠨ ᠭᠦᠶᠦᠬᠦ ᠳ᠋ᠦ᠍ ᠴᠢᠯᠠᠭᠤ ᠰᠢᠳᠡᠬᠦ ᠬᠡᠪᠴᠢᠶᠡᠨ ᠡᠴᠡ ᠭᠠᠷᠤᠨ ᠭᠠᠷᠲᠠᠯᠠ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠴᠢᠯᠠᠭᠤ᠂ ᠬᠡᠰᠡᠭᠲᠡᠢ ᠰᠢᠪᠠᠷ᠂ ᠬᠣᠮᠣᠯ ᠤ᠋ᠨ ᠮᠥᠨᠳᠥᠷ ᠪᠠᠭᠤᠪᠠ᠃ ᠪᠢ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠳᠡᠷᠭᠡᠳᠡ ᠬᠦᠷᠦᠭᠡᠳ ᠷᠠᠰᠢ ᠲᠡᠳᠡᠨ ᠢ ᠬᠦᠯᠢᠶᠡᠵᠦ ᠰᠠᠭᠤᠯᠠ᠃ ᠲᠡᠷᠡ ᠬᠠᠮᠠᠭᠠᠯᠠᠭᠴᠢ ᠴᠡᠷᠢᠭ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠬᠤ ᠶ᠋ᠢᠨ ᠵᠡᠷᠭᠡ ᠷᠠᠰᠢ ᠮᠢᠨᠦ ᠬᠠᠵᠠᠭᠤ ᠠ᠋ᠴᠠ ᠳᠣᠣᠷᠠ ᠪᠠᠨ ᠠᠯᠠᠭᠠ ᠪᠣᠯᠪᠠ᠃ ᠨᠢᠭᠡ ᠴᠠᠭ ᠣᠷᠴᠢᠮ ᠪᠢ ᠬᠣᠯᠠ ᠠ᠋ᠴᠠ ᠲᠡᠨᠳᠡ ᠶᠠᠪᠤᠭᠳᠠᠵᠤ ᠪᠠᠢᠭᠠ ᠳᠡᠯᠡᠬᠡᠢ ᠳ᠋ᠦ᠍ ᠬᠣᠪᠣᠷᠬᠠᠨ ᠡᠮᠴᠢᠯᠡᠭᠡ ᠶ᠋ᠢᠨ ᠶᠠᠪᠤᠴᠠ ᠶ᠋ᠢ ᠬᠠᠷᠠᠵᠤ ᠰᠠᠭᠤᠪᠠ᠃ ᠲᠡᠭᠡᠭᠡᠳ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠭᠡᠷ ᠤᠷᠤᠭᠤ ᠪᠠᠨ ᠬᠠᠲᠠᠷᠢᠭᠤᠯᠬᠤ ᠰᠠᠨᠠᠭᠠᠲᠠᠢ ᠴᠢᠳᠥᠷ ᠢ᠋ᠶ᠋ᠡᠨ ᠠᠪᠲᠠᠯᠠ ᠰᠠᠷᠵᠢ᠂ ᠠᠯᠲᠠᠨᠴᠡᠴᠡᠭ ᠦ᠋ᠨ ᠢᠷᠡᠬᠦ ᠨᠢ ᠦᠵᠡᠭᠳᠡᠨ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠮᠠᠨ ᠤ᠋ ᠪᠠᠭᠰᠢ ᠨᠠᠭᠠᠰᠢᠯᠠᠵᠤ ᠶᠠᠪᠤᠭᠠ ᠨᠢ ᠬᠠᠷᠠᠭᠳᠠᠯᠠ᠃ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠲᠥᠪ ᠴᠢᠷᠠᠢᠯᠠᠵᠠᠭᠠᠵᠤ᠂ ᠭᠠᠭᠴᠠ ᠴᠤ᠌ ᠦᠭᠡ ᠳᠤᠤᠭᠠᠷᠤᠭᠠ ᠦᠭᠡᠢ᠃ ᠷᠠᠰᠢ ᠮᠠᠰᠢ ᠤᠳᠠᠭᠠᠨ ᠣᠯᠣᠩ ᠢ᠋ᠶ᠋ᠠᠨ ᠴᠢᠩᠭᠠᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠠᠳᠠ ᠲᠠᠢ ᠬᠠᠨᠢᠯᠠᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠭᠳᠡᠬᠦ ᠦᠭᠡᠢ ᠶ᠋ᠢᠨ ᠲᠤᠰᠠ ᠳ᠋ᠤ᠌ ᠨᠠᠮᠠᠶ᠋ᠢ ᠭᠠᠭᠴᠠᠭᠠᠷ ᠢ᠋ ᠤᠷᠢᠳ ᠢ᠋ᠶ᠋ᠠᠷ ᠶᠠᠪᠤᠭᠤᠯᠪᠠ᠃ ᠬᠣᠶᠠᠷ ᠪᠦᠰᠡᠭᠦᠢ ᠬᠠᠵᠠᠭᠤᠰᠢ ᠪᠠᠨ ᠡᠷᠭᠢᠵᠦ᠂ ᠭᠡᠷ ᠲᠡᠭᠡᠨ ᠬᠦᠷᠬᠦ ᠣᠨᠳᠣᠣ ᠵᠠᠮ ᠢ᠋ ᠡᠯᠭᠦᠨ ᠠᠪᠴᠤ ᠳᠡᠯᠳᠠᠷᠠᠪᠠ᠃ ᠨᠠᠮᠠᠶ᠋ᠢ ᠣᠪᠣᠭᠠᠨ ᠳᠡᠭᠡᠷᠡ ᠬᠦᠷᠬᠦ ᠶ᠋ᠢᠨ ᠡᠮᠦᠨᠡᠬᠡᠨ ᠷᠠᠰᠢ ᠨᠠᠮᠠᠶ᠋ᠢ ᠭᠦᠢᠴᠡᠨ ᠢᠷᠡᠭᠡᠳ ᠵᠡᠷᠭᠡᠴᠡᠵᠦ :
– ᠬᠠᠷᠠᠭᠠᠴᠢ ᠳᠠ ! ᠭᠡᠮᠡᠨ ᠵᠢᠮᠡᠯᠡᠭᠰᠡᠨ ᠮᠠᠶᠢᠭᠲᠠᠢ ᠬᠡᠯᠡᠯᠡ᠃
– ᠴᠢ ᠴᠦ᠍ ᠨᠢᠭᠡ ᠰᠠᠢᠨ ᠪᠠᠭᠰᠢ ᠮᠥᠨ ᠳᠡ ! ᠱᠠᠪᠢ ᠪᠠᠨ ᠢᠩᠭᠢᠭᠡᠳ ᠯᠡ ᠬᠠᠶᠠᠭᠠᠨ ᠳ᠋ᠠᠭᠠᠨ ᠬᠠᠶᠠᠳᠠᠭ ᠭᠡᠵᠦ ᠪᠢ ᠰᠡᠳᠬᠢᠯ ᠳ᠋ᠡᠭᠡᠨ ᠳᠤᠷᠠ ᠦᠭᠡᠢᠴᠡᠨ ᠬᠠᠷᠢᠭᠤᠯᠪᠠ᠃ ᠷᠠᠰᠢ ᠤᠨᠤᠭᠰᠠᠨ ᠤᠨᠤᠭᠠ ᠪᠠᠨ ᠬᠣᠷᠣᠰᠤᠭᠰᠠᠨ ᠮᠡᠲᠦ ᠳᠠᠪᠢᠷᠠᠵᠤ ᠠᠪᠤᠭᠰᠠᠨ ᠢ᠋ᠶ᠋ᠠᠨ :
– ᠬᠡᠳᠦᠨ ᠭᠠᠷᠠᠭ ᠤ᠋ᠨ ᠳᠠᠷᠠᠭᠠ ᠭᠡᠬᠦ ᠳ᠋ᠦ᠍ ᠴᠢ ᠪᠤᠴᠠᠭᠠᠳ ᠠᠯᠠᠭᠠ ᠪᠣᠯᠤᠨᠠ᠂ ᠭᠡᠬᠦ ᠳ᠋ᠦ᠍ ᠪᠢ ᠠᠳᠠ ᠪᠠᠨ ᠮᠥᠨ ᠦᠷᠭᠦᠯᠵᠢᠯᠡᠨ ᠠᠮᠢᠳᠤᠷᠠᠬᠤ ᠬᠡᠷᠡᠭᠲᠡᠢ ᠪᠥᠭᠡᠳ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠲᠡᠢ ᠪᠡᠨ ᠶᠠᠪᠤᠯᠴᠠᠨᠠ ᠰᠢᠦ ᠳᠡ ᠭᠡᠯᠡ᠃
ᠪᠢᠳᠡ ᠭᠡᠷ ᠤᠷᠤᠭᠤ ᠪᠠᠨ ᠦᠭᠡ ᠳᠠᠭᠤᠨ ᠦᠭᠡᠢ ᠬᠠᠲᠠᠷᠢᠭᠤᠯᠤᠭᠰᠠᠭᠠᠷ ᠪᠠᠢᠪᠠ᠃ ᠦᠳᠡᠰᠢ ᠶ᠋ᠢᠨ ᠲᠣᠯᠣᠩ ᠤ᠋ᠨ ᠦᠵᠡᠰᠬᠦᠯᠡᠩᠲᠦ ᠰᠠᠢᠬᠠᠨ ᠦᠵᠡᠮᠵᠢ ᠠᠭᠤᠷ ᠪᠤᠬᠢᠨᠢᠳᠤᠯ ᠢ᠋ ᠮᠢᠨᠢ ᠮᠠᠷᠲᠠᠭᠤᠯᠵᠤ᠂ ᠷᠠᠰᠢ ᠴᠤ᠌ ᠬᠥᠭᠵᠢᠶᠡᠨᠲᠡᠢ ᠪᠠᠢᠳᠠᠯ ᠳ᠋ᠠᠭᠠᠨ ᠪᠤᠴᠠᠨ ᠣᠷᠣᠯᠠ᠃ ᠮᠢᠨᠦ ᠭᠡᠷ ᠬᠠᠷᠠᠭᠳᠠᠬᠤ ᠶ᠋ᠢᠨ ᠦᠶᠡᠰ ᠢ᠋ᠶ᠋ᠡᠷ ᠷᠠᠰᠢ ᠮᠣᠷᠢᠨ ᠤ᠋ ᠪᠠᠨ ᠠᠮᠠᠭᠠᠢ ᠪᠠᠨ ᠲᠡᠳᠡᠨ ᠵᠣᠭᠰᠣᠭᠠᠳ ᠨᠠᠮᠠᠶ᠋ᠢ ᠭᠦᠢᠴᠡᠨ ᠢᠷᠡᠭᠰᠡᠨ ᠦ᠌ ᠬᠣᠢᠨᠠ ᠨᠢᠭᠤᠷ ᠲᠠᠭᠠᠨ ᠲᠩᠵᠢᠨ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠭᠤᠯᠤᠨ :
– ᠪᠢ ᠴᠦ᠍ ᠬᠥᠮᠦᠰ ᠲᠡᠢ ᠬᠠᠮᠲᠤ ᠴᠢᠨᠦ ᠬᠣᠢᠨᠠ ᠠ᠋ᠴᠠ ᠭᠤᠷᠪᠠᠨ ᠬᠡᠰᠡᠭᠲᠡᠢ ᠰᠢᠪᠠᠷ ᠰᠢᠳᠡᠭᠰᠡᠨ ᠰᠢᠦ᠂ ᠭᠡᠬᠦ ᠳ᠋ᠦ᠍ ᠴᠢᠮᠠᠶ᠋ᠢ ᠣᠨᠣᠭᠠᠬᠤ ᠪᠠᠷ ᠰᠢᠳᠡᠭᠰᠡᠨ ᠦᠭᠡᠢ ᠶᠦᠮ ᠭᠡᠯᠡ᠃