ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ᠂ ᠨᠠᠢ᠍ᠮᠠ ᠶᠢᠨ ᠠᠭᠤᠯᠠᠨ ᠳᠤ ᠁ (ᠨᠠᠢ᠍ᠮᠠ) Сэрүүхэн тал нутаг–<свис> Вальтер Босгард (Walter Bosshard)- Дөрөвдүгээр бөлөг 8
328ᠨᠠᠢ᠍ᠮᠠ ᠂ ᠬᠠᠨᠠ ᠬᠠᠳᠠ ᠶ᠋ᠢᠨ ᠴᠠᠮ ᠪᠠ ᠨᠠᠭᠠᠳᠤᠮ
ᠪᠥᠬᠡᠵᠢᠵᠦ ᠬᠠᠲᠠᠭᠤᠵᠢᠭᠰᠠᠨ ᠰᠸᠸᠳ᠋ᠸᠡ ᠶ᠋ᠢᠨ ᠬᠥᠮᠦᠰ ᠡᠭᠦᠨ ᠢ᠋ ᠦᠯᠦ ᠠᠩᠵᠠᠭᠠᠷᠠᠵᠤ᠂ ᠪᠣᠷᠣᠭᠠᠨ ᠪᠠᠭᠠ ᠵᠣᠭᠰᠣᠮᠠᠭᠴᠠ ᠰᠢᠷᠠ ᠭᠡᠵᠢᠭᠡ ᠴᠡᠩᠬᠡᠷ ᠨᠢᠳᠦ ᠲᠡᠢ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠮᠠᠰᠢᠨ ᠳ᠋ᠠᠭᠠᠨ ᠰᠠᠭᠤᠯᠭᠠᠭᠠᠳ᠂ ᠮᠢᠨᠦ ᠨᠢᠭᠡ ᠤᠳᠠᠭᠠᠨ ᠤ᠋ ᠠᠶᠠᠯᠠᠯ ᠳ᠋ᠤ᠌ ᠢᠯᠡᠷᠡᠭᠦᠯᠦᠭᠰᠡᠨ ᠳᠦᠭᠦᠷᠲᠡᠯᠡ ᠪᠤᠲᠠᠯᠢᠭ ᠤᠷᠭᠤᠮᠠᠯ ᠪᠠ ᠠᠩᠬᠢᠯᠤᠮᠠ ᠴᠡᠴᠡᠭ ᠤᠷᠭᠤᠭᠰᠠᠨ ᠷᠣᠮᠠᠨᠲ᠋ᠢᠭ ᠰᠠᠢᠬᠠᠨ ᠳᠥᠭᠥᠮ ᠳ᠋ᠡᠬᠢ ᠠᠮᠠᠷᠠᠯᠲᠠ ᠶ᠋ᠢᠨ ᠭᠠᠵᠠᠷ ᠵᠦᠭ ᠬᠥᠳᠡᠯᠪᠡ᠃ ᠲᠡᠨᠳᠡ ᠲᠡᠳᠡ ᠠᠩᠭ᠌ᠯᠢ ᠮᠠᠶᠢᠭ ᠤ᠋ᠨ ᠮᠠᠢᠬᠠᠨ ᠢ᠋ᠶ᠋ᠠᠨ ᠰᠢᠭᠠᠮᠠᠭᠴᠠ᠂ ᠵᠠᠯᠠᠭᠤ ᠰᠸᠸᠳ᠋ᠸᠡ ᠨᠦ᠍ᠭᠦᠳ ᠤᠷᠤᠯᠳᠤᠭᠠᠨ ᠵᠠᠷᠯᠠᠨ ᠬᠠᠵᠠᠭᠤ ᠳ᠋ᠤ᠌ ᠪᠠᠢᠭᠠ ᠬᠠᠳᠠᠳ ᠢ᠋ ᠠᠪᠠᠷᠢᠵᠤ ᠡᠬᠢᠯᠡᠯᠡ᠃ ᠡᠳᠡᠨ ᠲᠡᠢ ᠬᠠᠮᠲᠤ ᠪᠠᠰᠠ ᠡᠵᠢ ᠠᠪᠤ ᠨᠢ ᠳᠡᠭᠡᠷᠡᠮ ᠳ᠋ᠦ᠍ ᠬᠥᠨᠥᠭᠡᠭᠳᠡᠭᠰᠡᠨ ᠬᠣᠶᠠᠷᠬᠠᠨ ᠨᠠᠰᠤᠲᠠᠢ ᠥᠨᠥᠴᠢᠨ ᠮᠣᠩᠭᠣᠯ ᠥᠬᠢᠨ ᠪᠠᠢᠪᠠ᠃ ᠬᠣᠶᠠᠷ ᠰᠤᠮᠤ ᠡᠨᠡ ᠶᠠᠯᠠ ᠬᠢᠯᠢᠨᠴᠡ ᠦᠭᠡᠢ ᠬᠥᠭᠡᠷᠦᠬᠦᠨ ᠥᠬᠢᠨ ᠦ᠌ ᠬᠡᠪᠡᠷᠡᠭ ᠪᠡᠶᠡ ᠶ᠋ᠢ ᠨᠡᠪᠲᠡᠯᠦᠨ ᠭᠠᠷᠤᠭᠠᠳ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠰᠢᠷᠬᠠᠲᠠᠨ ᠢ᠋ ᠠᠪᠤᠷᠠᠬᠤ ᠪᠠᠷ ᠡᠳᠡᠨ ᠦ᠌ ᠬᠢᠨ ᠳ᠋ᠦ᠍ ᠬᠦᠷᠬᠦ ᠳ᠋ᠦ᠍ ᠬᠥᠰᠡᠷ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠵᠠᠢ᠃ ᠲᠡᠭᠦᠨ ᠦ᠌ ᠬᠦᠨᠳᠦ ᠰᠢᠷᠬᠠ ᠶ᠋ᠢ ᠡᠳᠦᠷ ᠲᠤᠵᠢ ᠰᠠᠢᠨ ᠠᠰᠠᠷᠠᠨ ᠡᠮᠨᠡᠭᠦᠯᠬᠦ ᠬᠡᠷᠡᠭᠲᠡᠢ ᠲᠤᠯᠠ ᠲᠡᠳᠡ ᠡᠨᠡ ᠥᠨᠥᠴᠢᠨ ᠥᠬᠢᠨ ᠢ᠋ ᠥᠷᠲᠡᠭᠡᠨ ᠳ᠋ᠡᠭᠡᠨ ᠠᠪᠴᠢᠷᠠᠵᠤ ᠡᠮᠨᠡᠭᠦᠯᠦᠭᠰᠡᠭᠡᠷ ᠠᠮᠢ ᠨᠠᠰᠤᠨ ᠤ᠋ ᠠᠶᠤᠯ ᠦᠭᠡᠢ ᠪᠣᠯᠭᠠᠭᠰᠠᠨ ᠪᠠᠢᠨᠠ᠃ ᠬᠢᠳᠤᠯᠭᠠ ᠶ᠋ᠢᠨ ᠰᠥᠨᠢ ᠶ᠋ᠢᠨ ᠠᠶᠤᠯ ᠰᠣᠴᠢᠯ ᠨᠢ ᠡᠨᠡ ᠬᠡᠦᠬᠡᠳ ᠢ᠋ ᠮᠡᠨᠡᠭ ᠰᠢᠭ ᠪᠣᠯᠭᠠᠵᠠᠢ᠃ ᠲᠡᠷᠡ ᠪᠡᠷ ᠬᠡᠳᠦ ᠬᠡᠳᠦᠨ ᠴᠠᠭ ᠢ᠋ᠶ᠋ᠠᠷ ᠵᠦᠯᠭᠡᠨ ᠳᠡᠭᠡᠷᠡ ᠰᠠᠭᠤᠵᠤ᠂ ᠲᠣᠮᠣ ᠪᠥᠭᠡᠳ ᠭᠣᠶᠣᠬᠠᠨ ᠮᠣᠢᠯ ᠬᠠᠷᠠ ᠬᠥᠭᠡᠷᠦᠬᠦᠨ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠵᠥᠭᠡᠢ ᠪᠤᠶᠤ ᠡᠷᠪᠡᠬᠡᠢ ᠶ᠋ᠢ ᠰᠢᠷᠳᠡᠨ ᠪᠠᠢᠬᠤ ᠠᠵᠢ᠃
ᠮᠣᠩᠭᠣᠯᠴᠤᠳ ᠬᠦᠨᠳᠦ ᠰᠦᠷᠡᠬᠡᠢ ᠪᠥᠭᠡᠳ ᠤᠷᠲᠤ ᠤᠳᠠᠭᠠᠨ ᠡᠪᠦᠯ ᠢ᠋ᠶ᠋ᠡᠨ ᠥᠩᠭᠡᠷᠡᠭᠡᠭᠡᠳ ᠣᠳᠣ ᠪᠣᠯᠬᠤ ᠳ᠋ᠤ᠌ ᠵᠠᠪᠰᠢᠶᠠᠨ ᠪᠣᠯᠭᠠᠨ ᠢ᠋ ᠠᠯᠳᠠᠯ ᠦᠭᠡᠢ ᠨᠠᠢᠷᠯᠠᠳᠠᠭ ᠵᠤᠨ ᠤ᠋ ᠨᠠᠯᠠᠭᠠᠷ ᠰᠠᠢᠬᠠᠨ ᠴᠠᠭ ᠦᠶᠡ ᠬᠦᠷᠴᠦ ᠢᠷᠡᠵᠡᠢ᠃ ᠰᠦᠮᠡ ᠨᠦ᠍ᠭᠦᠳ ᠶᠡᠬᠡ ᠪᠠᠭᠠ ᠭᠡᠵᠦ ᠢᠯᠭᠠᠬᠤ ᠦᠭᠡᠢ ᠵᠤᠨ ᠤ᠋ ᠳᠤᠮᠳᠠᠴᠢ ᠪᠠᠷ ᠪᠦᠷ ᠴᠠᠮ ᠪᠣᠯᠳᠠᠭ ᠪᠥᠭᠡᠳ ᠡᠭᠦᠨ ᠲᠡᠢ ᠬᠠᠮᠲᠤ ᠳ᠋ᠤᠨᠢ ᠪᠠᠰᠠ ᠨᠠᠭᠠᠳᠤᠮ ᠪᠣᠯᠳᠠᠭ ᠪᠢᠯᠡ᠃ ᠮᠠᠯ ᠰᠦᠷᠦᠭ ᠨᠢ ᠬᠠᠪᠤᠷ ᠢ᠋ ᠪᠣᠳᠣᠪᠠᠯ ᠲᠠᠷᠭᠤ ᠬᠦᠴᠦ ᠲᠡᠢ ᠪᠣᠯᠵᠤ᠂ ᠳᠤᠭᠤᠢ ᠳᠤᠭᠤᠢ ᠴᠠᠭᠠᠨ ᠬᠤᠷᠤᠳ ᠢ᠋ᠶ᠋ᠠᠷ ᠪᠠᠭᠠ ᠠᠪᠳᠠᠷᠠ ᠨᠤᠭᠤᠳ ᠢ᠋ᠶ᠋ᠠᠨ ᠳᠦᠭᠦᠷᠭᠡᠵᠦ ᠨᠥᠭᠡᠴᠡᠯᠡᠨ ᠲᠠᠯᠪᠢᠵᠠᠢ᠃ ᠠᠢᠯ ᠪᠣᠯᠭᠠᠨ ᠰᠢᠷᠠ ᠲᠣᠰᠣ᠂ ᠠᠢᠷᠠᠭ ᠲᠠᠷᠠᠭ ᠢ᠋ᠶ᠋ᠠᠷ ᠡᠯᠪᠡᠭ ᠪᠣᠯᠵᠤ ᠵᠤᠨ ᠤ᠋ ᠰᠠᠢᠬᠠᠨ ᠡᠳᠦᠷ ᠦ᠋ᠳ ᠲᠦ᠍ ᠶᠠᠳᠠᠷᠠᠵᠤ ᠲᠤᠢᠯᠳᠠᠭᠰᠠᠨ ᠬᠥᠮᠦᠨ ᠭᠡᠵᠦ ᠭᠠᠭᠴᠠᠬᠠᠨ ᠴᠤ᠌ ᠬᠠᠷᠠᠭᠳᠠᠬᠤ ᠦᠭᠡᠢ ᠠᠵᠢ᠃ ᠡᠷᠡᠴᠦᠦᠯ ᠨᠢ ᠣᠯᠠᠩᠬᠢ ᠳ᠋ᠠᠭᠠᠨ ᠭᠡᠷ ᠲᠡᠭᠡᠨ ᠰᠠᠭᠤᠬᠤ ᠪᠠᠨ ᠪᠣᠯᠢᠨ᠂ ᠨᠠᠢᠵᠠ ᠨᠥᠬᠥᠳ ᠦ᠋ᠨ ᠬᠠᠮᠲᠤ ᠡᠨᠡ ᠨᠠᠢᠷ ᠠ᠋ᠴᠠ ᠲᠡᠷᠡ ᠨᠠᠭᠠᠳᠤᠮ ᠳ᠋ᠤ᠌ ᠳᠠᠮᠵᠢᠨ ᠵᠢᠷᠭᠠᠵᠤ᠂ ᠲᠤᠯᠭᠠᠨ ᠤ᠋ ᠭᠠᠯ ᠢ᠋ ᠲᠣᠭᠣᠷᠢᠨ ᠰᠠᠭᠤᠵᠠᠭᠠᠵᠤ ᠲᠦᠷᠦᠭᠦᠦ ᠰᠠᠷᠠ ᠶ᠋ᠢᠨ ᠨᠠᠭᠠᠳᠤᠮ ᠳ᠋ᠤ᠌ ᠲᠦᠷᠦᠭᠦᠯᠡᠭᠰᠡᠨ ᠮᠣᠷᠢᠨ ᠤ᠋ ᠦᠨᠡ ᠶ᠋ᠢᠨ ᠲᠤᠬᠠᠢ ᠶᠠᠷᠢᠯᠳᠤᠨᠠ᠃ ᠨᠠᠢ᠍ᠮᠠ ᠶ᠋ᠢᠨ ᠠᠭᠤᠯᠠᠨ ᠳ᠋ᠠᠬᠢ ᠬᠠᠮᠤᠭ ᠤ᠋ᠨ ᠲᠣᠮᠣ ᠨᠠᠢᠷ ᠨᠠᠭᠠᠳᠤᠮ ᠨᠢ ᠬᠠᠨᠠ ᠬᠠᠳᠠ ᠳ᠋ᠤ᠌ ᠶᠠᠪᠤᠭᠳᠠᠳᠠᠭ ᠪᠠᠢᠨᠠ ( ᠵᠢᠷᠤᠭ 84 ) ᠃ ᠪᠢ ᠲᠡᠢᠰᠢ ᠨᠠᠢᠷ ᠲᠤ᠌ ᠶᠠᠪᠤᠨᠠ ᠭᠡᠬᠦᠯᠡᠷ ᠰᠸᠸᠳ᠋ᠸᠨ ᠨᠦ᠍ᠭᠦᠳ ᠴᠦ᠍ ᠨᠠᠳᠠ ᠲᠠᠢ ᠴᠣᠭ ᠶᠠᠪᠤᠬᠤ ᠪᠠᠷ ᠪᠣᠯᠪᠠ᠃ ᠪᠢᠳᠡᠨ ᠢ᠋ ᠬᠦᠷᠬᠦ ᠳ᠋ᠦ᠍ ᠨᠠᠷᠠ ᠮᠠᠨᠳᠤᠬᠤ ᠠ᠋ᠴᠠ ᠡᠮᠦᠨᠡ ᠣᠪᠣᠭᠠᠨ ᠳᠡᠭᠡᠷᠡ ᠶᠠᠪᠤᠭᠳᠠᠳᠠᠭ ᠯᠠᠮᠠ ᠨᠠᠷ ᠤ᠋ᠨ ᠲᠠᠬᠢᠯᠭᠠ ᠨᠢᠭᠡᠨᠲᠡ ᠳᠠᠭᠤᠰᠴᠠᠢ᠃ ᠬᠣᠶᠠᠷ ᠲᠠᠯᠠ ᠪᠠᠷ ᠥᠩᠭᠡ ᠪᠦᠷᠢ ᠶ᠋ᠢᠨ ᠵᠢᠵᠢᠭᠬᠡᠨ ᠲᠣᠷᠭᠠᠨ ᠳᠠᠯᠪᠠᠭᠠ ᠬᠠᠳᠬᠤᠭᠰᠠᠨ ᠲᠡᠭᠷᠢ ᠶ᠋ᠢᠨ ᠬᠠᠭᠠᠯᠭᠠ ᠳ᠋ᠤ᠌ ᠬᠦᠷᠬᠦ ᠵᠠᠮ ᠨᠢ ᠯᠤᠤᠰ ᠪᠠ ᠪᠤᠰᠤᠳ ᠪᠤᠷᠬᠠᠳ ᠢ᠋ ᠲᠠᠬᠢᠭᠰᠠᠨ ᠭᠠᠵᠠᠷ ᠬᠦᠷᠲᠡᠯᠡ ᠦᠷᠭᠦᠯᠵᠢᠯᠡᠵᠦ᠂ ᠡᠨᠡ ᠲᠠᠬᠢᠯᠭᠠ ᠪᠠᠷ ᠬᠥᠮᠦᠰ ᠵᠢᠴᠢ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠡᠪᠡᠳᠴᠢᠨ ᠲᠠᠬᠤᠯ᠂ ᠭᠠᠩ ᠭᠠᠴᠢᠭ ᠪᠠ ᠵᠤᠳ ᠵᠡᠷᠭᠡ ᠭᠠᠢ ᠭᠠᠮᠰᠢᠭ ᠠ᠋ᠴᠠ ᠵᠠᠢᠯᠠᠭᠤᠯᠳᠠᠭ ᠠᠵᠢ᠃
ᠪᠢᠳᠡᠨ ᠢ᠋ ᠬᠦᠷᠬᠦ ᠳ᠋ᠦ᠍ ᠲᠠᠬᠢᠯᠭᠠ ᠶ᠋ᠢᠨ ᠤᠷᠲᠤ ᠡᠩᠨᠡᠭᠡ ᠯᠠᠮᠠ ᠨᠠᠷ ᠢ᠋ᠶ᠋ᠠᠷ ᠲᠣᠯᠣᠭᠠᠢᠯᠠᠭᠤᠯᠤᠨ ᠂ ᠬᠣᠶᠠᠷ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠭᠤᠷᠪᠠᠯᠵᠢᠨ ᠳᠠᠯᠪᠠᠭᠠ ᠲᠠᠢ ᠠᠭᠤᠯᠠᠨ ᠠ᠋ᠴᠠ ᠳᠣᠷᠣᠭᠰᠢᠯᠠᠵᠤ᠂ ᠨᠠᠭᠠᠳᠤᠮ ᠤ᠋ᠨ ᠲᠣᠮᠣ ᠬᠥᠬᠡ ᠮᠠᠢᠬᠠᠨ ( ᠵᠢᠷᠤᠭ 83 ) ᠶ᠋ᠢ ᠴᠢᠭᠯᠡᠨ ᠶᠠᠪᠤᠵᠤ ᠪᠠᠢᠪᠠ᠃ ᠵᠢᠭᠰᠠᠭᠠᠯ ᠤ᠋ᠨ ᠡᠩᠨᠡᠭᠡ ᠣᠪᠣᠭᠠᠨ ᠠᠭᠤᠯᠠ ᠶ᠋ᠢᠨ ᠬᠥᠯ ᠳ᠋ᠦ᠍ ᠢᠷᠡᠭᠰᠡᠨ ᠦ᠌ ᠬᠣᠢᠨᠠ ᠪᠠᠷᠢᠵᠤ ᠠᠪᠤᠭᠰᠠᠨ ᠬᠦᠷᠦᠭᠡ - ᠨᠢᠭᠡ ᠵᠡᠭᠡᠷᠡ ᠶ᠋ᠢ ᠲᠠᠯᠪᠢᠪᠠ᠃ ᠬᠥᠮᠦᠨ ᠦ᠌ ᠭᠠᠷ ᠠ᠋ᠴᠠ ᠮᠤᠯᠲᠤᠷᠠᠭᠰᠠᠨ ᠵᠡᠭᠡᠷᠡ ᠨᠢᠰᠬᠦ ᠮᠡᠲᠦ ᠬᠤᠷᠳᠤᠴᠠ ᠪᠠᠷ ᠳᠠᠭᠰᠢᠨ ᠲᠠᠭᠰᠢᠨ ᠳᠠᠪᠬᠢᠭᠰᠠᠭᠠᠷ ᠬᠥᠳᠡᠭᠡ ᠲᠠᠯᠠ ᠶ᠋ᠢ ᠲᠤᠭᠤᠯᠬᠤ ᠳ᠋ᠠᠭᠠᠨ ᠭᠣᠣ ᠵᠢᠯᠠᠭᠠ ᠶ᠋ᠢᠨ ᠳᠡᠭᠡᠭᠦᠷ ᠦᠰᠦᠷᠦᠨ ᠭᠠᠷᠴᠤ᠂ ᠲᠣᠭᠲᠠᠮᠠᠯ ᠤᠰᠤᠨ ᠳ᠋ᠤ᠌ ᠭᠢᠰᠬᠢᠬᠦ ᠳ᠋ᠦ᠍ ᠦᠰᠦᠷᠦᠭᠰᠡᠨ ᠤᠰᠤᠨ ᠳᠤᠰᠤᠯ ᠨᠢ ᠥᠨᠳᠥᠷ ᠭᠡᠭᠴᠢ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃
ᠣᠢᠷᠠ ᠣᠷᠴᠢᠮ ᠤ᠋ᠨ ᠬᠠᠮᠤᠭ ᠤ᠋ᠨ ᠬᠦᠨᠳᠦᠲᠡᠢ ᠭᠡᠭᠡᠨ ᠪᠠ ᠯᠠᠮᠠ ᠨᠠᠷ ᠤ᠋ᠨ ᠰᠠᠭᠤᠵᠤ ᠴᠠᠢ ᠤᠤᠭᠤᠵᠤ ᠪᠠᠢᠭᠠ ᠲᠣᠮᠣ ᠬᠥᠬᠡ ᠮᠠᠢᠬᠠᠨ ᠤ᠋ ᠡᠮᠦᠨᠡ ᠬᠣᠶᠠᠷ ᠳᠠᠯᠪᠠᠭᠠ ᠶ᠋ᠢ ᠬᠠᠳᠬᠤᠨ ᠲᠠᠯᠪᠢᠪᠠ᠃ ᠰᠸᠸᠳ᠋ᠸᠨ ᠦ᠌ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠡᠸᠷᠢᠺᠰᠣᠨ ᠡᠨᠳᠡᠬᠢ ᠬᠥᠮᠦᠨ ᠪᠣᠯᠭᠠᠨ ᠲᠠᠢ ᠲᠠᠨᠢᠯᠴᠠᠬᠤ ᠲᠤᠯᠠ ᠮᠣᠩᠭᠣᠯᠴᠤᠳ ᠪᠢᠳᠡᠨ ᠢ ᠲᠡᠳᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠮᠠᠢᠬᠠᠨ ᠤ᠋ ᠰᠡᠭᠦᠳᠡᠷ ᠲᠦ᠍ ᠰᠠᠭᠤᠬᠤ ᠶ᠋ᠢ ᠤᠷᠢᠯᠠ᠃ ᠪᠢ ᠵᠢᠷᠤᠭ ᠠᠪᠤᠨᠠ ᠭᠡᠮᠡᠨ ᠬᠦᠰᠡᠵᠦ ᠪᠠᠢᠭᠰᠠᠨ ᠪᠣᠯᠬᠣᠷ ᠡᠨᠡ ᠬᠦ᠌ ᠤᠷᠢᠯᠭᠠ ᠳ᠋ᠤ᠌ ᠲᠠᠯᠠᠷᠬᠠᠯ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠭᠡᠳ ᠰᠤᠷ ᠬᠠᠷᠪᠤᠯᠲᠠ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠬᠥᠮᠦᠨ ᠦ᠌ ᠳᠤᠮᠳᠠ ᠣᠷᠣᠪᠠ᠃
ᠭᠤᠴᠢᠨ ᠠᠯᠲᠠ ᠶ᠋ᠢᠨ ᠵᠠᠢᠲᠠᠢ ᠭᠠᠵᠠᠷ ᠲᠤ᠌ ᠳᠤᠭᠤᠢ ᠫᠠᠢ ᠡᠯᠭᠦᠭᠡᠳ᠂ ᠫᠠᠢ ᠶ᠋ᠢᠨ ᠳᠤᠮᠳᠠᠬᠢ ᠵᠢᠵᠢᠭᠬᠡᠨ ᠳᠤᠭᠤᠢ ᠶ᠋ᠢ ᠣᠨᠣᠭᠠᠬᠤ ᠳ᠋ᠤ᠌ ᠬᠦᠷᠪᠡᠯ ᠲᠡᠷᠡ ᠨᠢ ᠴᠠᠭᠠᠰᠢ ᠪᠠᠨ ᠮᠤᠯᠲᠤᠷᠠᠨ ᠤᠨᠠᠨᠠ᠃ ᠠᠩᠬᠠᠨ ᠤ᠋ ᠰᠤᠮᠤ ᠶ᠋ᠢ ᠡᠨᠳᠡᠬᠢ ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠲᠤᠰᠢᠶᠠᠯ ᠪᠦᠬᠦᠢ ᠴᠠᠭᠠᠨ ᠭᠡᠵᠢᠭᠡ ᠲᠡᠢ ᠠᠬᠠᠮᠠᠳ ᠨᠠᠰᠤᠨ ᠤ᠋ ᠬᠦᠨᠳᠦᠲᠦ ᠬᠥᠮᠦᠨ ᠬᠠᠷᠪᠤᠬᠤ ᠪᠠᠷ ᠪᠣᠯᠪᠠ ᠃ ᠬᠦᠴᠢᠷᠲᠡᠢᠬᠡᠨ ᠨᠤᠮᠤ ᠪᠠᠨ ᠲᠠᠲᠠᠵᠤ ( ᠵᠢᠷᠤᠭ 87 ) ᠭᠠᠷ ᠨᠢ ᠪᠠᠭᠠ ᠰᠠᠯᠭᠠᠨᠠᠨ ᠴᠡᠴᠡᠷᠡᠵᠦ ᠪᠠᠢᠬᠤ ᠠ᠋ᠴᠠ ᠬᠦᠴᠦᠨ ᠴᠢᠳᠠᠯ ᠨᠢ ᠬᠦᠷᠬᠦ ᠦᠭᠡᠢ ᠪᠠᠢᠬᠤ ᠨᠢ ᠢᠯᠡᠬᠡᠨ ᠮᠡᠳᠡᠭᠳᠡᠵᠦ ᠂ ᠡᠬᠢᠨ ᠦ᠌ ᠳᠥᠷᠪᠡᠨ ᠰᠤᠮᠤ ᠨᠢ ᠫᠠᠢ ᠶ᠋ᠢ ᠣᠨᠣᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
– ᠰᠠᠯᠬᠢᠨ ᠶᠡᠬᠡ ᠪᠠᠢᠨᠠ ᠳᠠ ᠭᠡᠵᠦ ᠨᠢᠭᠡ ᠳᠠᠭᠠᠭᠰᠠᠳ ᠨᠢ ᠨᠣᠶᠠᠨ ᠳ᠋ᠠᠭᠠᠨ ᠵᠥᠪ ᠥᠭᠴᠦ ᠶᠠᠷᠢᠪᠠ᠃ ᠰᠤᠮᠤ ᠪᠠᠨ ᠠᠬᠢᠨ ᠠᠪᠴᠢᠷᠠᠭᠤᠯᠵᠤ᠂ ᠳᠠᠬᠢᠵᠤ ᠬᠠᠷᠪᠤᠵᠤ ᠦᠵᠡᠬᠦ ᠪᠡᠷ ᠪᠣᠯᠪᠠ᠃ ᠠᠩᠬᠠᠨ ᠤ᠋ ᠰᠤᠮᠤᠨ ᠳ᠋ᠠᠭᠠᠨ ᠫᠠᠢ ᠶ᠋ᠢᠨ ᠭᠣᠣᠯ ᠢ᠋ ᠣᠨᠣᠭᠠᠵᠤ ᠡᠪᠡᠰᠦᠨ ᠳᠡᠭᠡᠷᠡ ᠤᠨᠠᠭᠠᠪᠠ᠃ ᠲᠣᠭᠣᠷᠢᠨ ᠵᠣᠭᠰᠣᠭᠰᠠᠳ ᠤ᠋ᠨ ᠰᠠᠢᠰᠢᠶᠠᠯ ᠮᠠᠭᠲᠠᠭᠠᠯ ᠤ᠋ᠨ ᠳᠤᠮᠳᠠ ᠲᠡᠷᠡ ᠮᠣᠩᠭᠣᠯ ᠡᠷᠡ ᠨᠤᠮᠤ ᠰᠤᠮᠤ ᠪᠠᠨ ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠰ ᠲᠡᠭᠡᠨ ᠥᠭᠭᠦᠭᠡᠳ᠂ ᠮᠠᠢᠬᠠᠨ ᠳᠣᠲᠣᠷᠠᠬᠢ ᠥᠨᠳᠥᠷᠬᠡᠨ ᠵᠠᠰᠠᠭᠰᠠᠨ ᠰᠠᠭᠤᠳᠠᠯ ᠳ᠋ᠠᠭᠠᠨ ᠬᠦᠷᠴᠦ ᠵᠠᠯᠠᠭᠤᠴᠤᠳ ᠤ᠋ᠨ ᠡᠨᠡ ᠬᠦ᠌ ᠳᠤᠷᠠᠲᠠᠢ ᠲᠠᠮᠢᠷ ᠤ᠋ᠨ ᠬᠥᠳᠡᠯᠭᠡᠭᠡᠨ ᠳ᠋ᠡᠭᠡᠨ ᠣᠷᠣᠯᠴᠠᠬᠤ ᠶ᠋ᠢ ᠬᠠᠷᠠᠵᠤ ᠰᠠᠭᠤᠪᠠ᠃ ᠲᠡᠷᠡ ᠣᠯᠠᠨ ᠰᠤᠷᠴᠢᠳ ᠤ᠋ᠨ ᠳᠣᠲᠣᠷᠠ ᠨᠢᠭᠡ ᠨᠢ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠠᠭᠤᠲᠤ ᠵᠡᠪᠡ ᠲᠡᠢ ᠪᠠᠢᠵᠤ᠂ ᠰᠤᠮᠤᠨ ᠤ᠋ ᠬᠢᠨᠢ ᠡᠮᠦᠨᠡᠬᠢ ᠬᠦᠨᠳᠦ ᠬᠡᠰᠡᠭ ᠢ᠋ ᠳᠠᠭᠤ ᠭᠠᠷᠬᠤ ᠪᠠᠷ ᠵᠠᠰᠠᠭᠰᠠᠨ ᠲᠤᠯᠠ ᠬᠥᠪᠴᠢᠨ ᠡᠴᠡ ᠪᠡᠨ ᠰᠠᠯᠤᠮᠠᠭᠴᠠ ᠭᠤᠷᠪᠠ ᠪᠤᠶᠤ ᠳᠥᠷᠪᠡᠨ ᠥᠩᠭᠡ ᠶ᠋ᠢᠨ ᠳᠠᠭᠤ ᠪᠠᠷ ᠬᠥᠭ ᠪᠠᠷᠢᠨ ᠢᠰᠬᠡᠷᠦᠨ ᠣᠳᠬᠤ ᠠᠵᠢ᠃
ᠡᠨᠡ ᠬᠣᠭᠣᠷᠣᠨᠳᠣ ᠮᠣᠷᠢᠨ ᠤᠷᠤᠯᠳᠤᠭᠠᠨ ᠨᠢᠭᠡᠨᠲᠡ ᠪᠡᠯᠡᠨ ᠪᠣᠯᠪᠠ ( ᠵᠢᠷᠤᠭ 83 ) ᠃ ᠠᠷᠪᠠᠭᠠᠳ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠦ᠋ᠳ ᠣᠯᠠᠨ ᠥᠩᠭᠡ ᠶ᠋ᠢᠨ ᠲᠣᠷᠭᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠪᠠᠨ ᠣᠷᠢᠶᠠᠨ ᠲᠣᠷᠭᠠᠨ ᠴᠠᠮᠴᠠ ᠪᠠᠷ ᠪᠡᠶᠡ ᠪᠡᠨ ᠴᠢᠮᠡᠵᠦ ᠮᠣᠷᠢ ᠪᠠᠨ ᠵᠠᠢᠳᠠᠩ ᠤᠨᠤᠭᠠᠳ ᠳᠤᠭᠤᠷᠢᠭᠯᠠᠭᠤᠯᠤᠨ ᠠᠯᠬᠤᠭᠤᠯᠵᠤ ᠪᠠᠢᠯᠠ᠃ ᠨᠢᠭᠡ ᠠᠯᠪᠠᠲᠠᠨ ᠳᠣᠬᠢᠶᠠ ᠥᠭᠬᠦ ᠳ᠋ᠦ᠍ ᠡᠳᠡᠭᠡᠷ ᠬᠡᠦᠬᠡᠳ ᠢ᠋ ᠳᠥᠷᠪᠡᠨ ᠮᠣᠩᠭᠣᠯ ᠠᠪᠴᠤ ᠠᠷᠪᠠᠨ ᠭᠠᠵᠠᠷ ᠤ᠋ᠨ ᠴᠠᠭᠠᠨᠠ ᠪᠠᠢᠭᠠ ᠡᠬᠢᠯᠡᠯᠲᠡ ᠶ᠋ᠢᠨ ᠴᠠᠭ ᠲᠤ᠌ ᠬᠦᠷᠭᠡᠬᠦ ᠪᠡᠷ ᠬᠥᠳᠡᠯᠪᠡ᠃
ᠬᠠᠵᠠᠭᠤ ᠳ᠋ᠤ᠌ ᠪᠠᠢᠭᠠ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡ ᠨᠢ ᠬᠡᠳᠦᠨ ᠡᠳᠦᠷ ᠦ᠋ᠨ ᠡᠮᠦᠨᠡ ᠵᠡᠷᠭᠡᠯᠡᠳᠡᠭᠡ ᠰᠤᠮᠤᠨ ᠤ᠋ ᠨᠠᠭᠠᠳᠤᠮ ᠳᠡᠭᠡᠷᠡ ᠨᠤᠲᠤᠭ ᠤ᠋ᠨ ᠤᠶᠠᠭᠠᠴᠢᠳ ᠤ᠋ᠨ ᠬᠤᠳᠠᠯ ᠬᠡᠯᠡᠭᠰᠡᠨ ᠤᠴᠢᠷ ᠢ᠋ ᠶᠠᠷᠢᠪᠠ᠃ ᠬᠥᠷᠰᠢ ᠰᠤᠮᠤ ᠶ᠋ᠢᠨ ᠬᠢᠨ ᠦ᠌ ᠭᠤᠷᠪᠠ ᠳᠥᠷᠪᠡᠨ ᠰᠠᠢᠨ ᠮᠣᠷᠢᠳ ᠲᠡᠷᠡ ᠰᠤᠮᠤᠨ ᠤ᠋ ᠨᠠᠢᠷ ᠲᠤ᠌ ᠣᠷᠣᠯᠳᠣᠬᠤ ᠪᠠᠷ ᠬᠦᠷᠦᠯᠴᠡᠨ ᠣᠴᠢᠭᠰᠠᠨ ᠳ᠋ᠤ᠌ ᠨᠤᠲᠤᠭ ᠤ᠋ᠨ ᠵᠣᠬᠢᠶᠠᠨ ᠪᠠᠢᠭᠤᠯᠤᠭᠴᠢ ᠨᠢ ᠡᠳᠡᠭᠡᠷ ᠬᠠᠷᠢ ᠰᠤᠮᠤᠨ ᠤ᠋ ᠣᠷᠣᠯᠴᠠᠭᠴᠢ ᠨᠠᠷ ᠢ᠋ ᠠᠷᠤ ᠳ᠋ᠤ᠌ ᠪᠠᠢᠭᠠ ᠬᠥᠲᠥᠯ ᠡᠴᠡ ᠡᠬᠢᠯᠡᠨᠡ ᠭᠡᠮᠡᠨ ᠢᠯᠡᠭᠡᠵᠡᠢ᠃ ᠲᠡᠳᠡᠨ ᠢ᠋ ᠲᠡᠨᠳᠡ ᠬᠦᠷᠬᠦ ᠶ᠋ᠢᠨ ᠵᠡᠷᠭᠡ ᠤᠷᠤᠯᠳᠤᠭᠠᠨ ᠡᠬᠢᠯᠡᠬᠦ ᠳᠣᠬᠢᠶᠠ ᠨᠢᠭᠡᠨᠲᠡ ᠳᠤᠤᠭᠠᠷᠴᠤ᠂ ᠡᠬᠢᠯᠡᠨ ᠣᠷᠣᠯᠳᠣᠬᠤ ᠳ᠋ᠠᠭᠠᠨ ᠨᠤᠲᠤᠭ ᠤ᠋ᠨ ᠮᠣᠷᠢᠳ ᠠ᠋ᠴᠠ ᠳᠥᠷᠪᠡᠨ ᠭᠠᠵᠠᠷ ᠢᠯᠡᠭᠦᠦ ᠬᠣᠴᠣᠷᠴᠠᠢ᠃ ᠭᠡᠬᠦ ᠳ᠋ᠦ᠍ ᠵᠡᠷᠭᠡᠯᠡᠳᠡᠭᠡ ᠰᠤᠮᠤᠨ ᠤ᠋ ᠡᠳᠡᠭᠡᠷ ᠮᠣᠷᠢᠳ ᠬᠠᠷᠢᠨ ᠨᠤᠲᠤᠭ ᠤ᠋ᠨ ᠮᠣᠷᠢᠳ ᠢ᠋ ᠪᠦᠷ ᠭᠦᠢᠴᠡᠨ ᠭᠠᠷᠴᠤ᠂ ᠲᠦᠷᠦᠭᠦᠦ ᠭᠤᠷᠪᠠᠨ ᠨᠡᠷᠡ ᠶ᠋ᠢ ᠪᠦᠷ ᠠᠪᠤᠭᠠᠳ ᠬᠤᠳᠠᠯ ᠬᠡᠯᠡᠵᠦ ᠮᠠᠭᠤᠬᠠᠢ ᠬᠢᠳᠡᠯ ᠬᠢᠭᠰᠡᠨ ᠨᠤᠲᠤᠭ ᠤ᠋ᠨ ᠬᠢᠨ ᠢ᠋ ᠰᠦᠷᠡᠬᠡᠢ ᠢᠴᠢᠭᠡᠵᠦ ᠠᠭᠤᠷᠯᠠᠭᠤᠯᠤᠭᠰᠠᠨ ᠭᠡᠨᠡ᠃
ᠬᠥᠮᠦᠰ ᠡᠭᠦᠨ ᠢ᠋ ᠶᠡᠬᠡ ᠬᠥᠭᠵᠢᠶᠡᠨᠲᠡᠢ ᠪᠡᠷ ᠬᠡᠯᠡᠯᠴᠡᠵᠦ᠂ ᠥᠨᠥᠳᠥᠷ ᠦ᠋ᠨ ᠮᠣᠷᠢᠳ ᠤ᠋ᠨ ᠲᠤᠬᠠᠢ ᠴᠤ᠌ ᠬᠠᠯᠠᠭᠤᠨ ᠶᠠᠷᠢᠯᠴᠠᠨᠠ᠃
– ᠬᠡᠷᠪᠡ ᠬᠡᠭᠡᠷ ᠮᠣᠷᠢ ᠮᠢᠨᠢ ᠠᠬᠢᠭᠠᠳ ᠲᠡᠷᠢᠭᠦᠨ ᠳ᠋ᠦ᠍ ᠢᠷᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠪᠢ ᠲᠡᠭᠦᠨ ᠢ᠋ ᠬᠣᠶᠠᠷ ᠵᠠᠭᠤᠨ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠵᠠᠷᠤᠨᠠ ᠳᠠ ᠭᠡᠵᠦ ᠨᠢᠭᠡ ᠨᠢ ᠶᠡᠬᠡ ᠦᠭᠡ ᠬᠡᠯᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠨᠢ ᠲᠣᠰᠴᠤ ᠠᠪᠤᠭᠠᠳ᠄
– ᠮᠢᠨᠦ ᠵᠡᠭᠡᠷᠳᠡ ᠲᠡᠭᠦᠨ ᠢ᠋ ᠳᠠᠪᠠᠨᠠ ᠠ᠋ ! ᠭᠡᠯᠡ ᠃
– ᠬᠠᠢ ᠂ ᠴᠢᠨᠦ ᠵᠡᠭᠡᠷᠳᠡ ᠲᠦᠷᠦᠭᠦᠦ ᠤᠳᠠᠭᠠ ᠳᠡᠳ᠋ ᠲᠦ᠍ ᠳᠠᠪᠬᠢᠵᠤ ᠪᠠᠢᠭᠰᠠᠨ ᠪᠠᠢᠭᠠᠳ ᠥᠨᠥᠳᠥᠷ ᠵᠠᠪᠠᠯ ᠲᠦᠷᠦᠭᠦᠨ ᠳ᠋ᠦ᠍ ᠢᠷᠡᠬᠦ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ?
– ᠢᠷᠡᠯᠡ ! ᠢᠷᠡᠯᠡ ! ᠭᠡᠮᠡᠨ ᠵᠠᠯᠠᠭᠤᠴᠤᠳ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠤᠤᠬᠠᠢᠯᠠᠨ ᠬᠠᠰᠬᠢᠷᠤᠯᠳᠤᠬᠤ ᠳ᠋ᠤ᠌ ᠬᠥᠮᠦᠰ ᠮᠠᠢᠬᠠᠨ ᠤ᠋ ᠡᠮᠦᠨᠡ ᠵᠠᠢ ᠲᠠᠯᠪᠢᠵᠤ ᠥᠭᠭᠦᠯᠡ ᠃ ᠬᠥᠮᠦᠨ ᠪᠣᠯᠭᠠᠨ ᠥᠪᠡᠷ ᠦ᠋ᠨ ᠪᠤᠶᠤ ᠨᠠᠢᠵᠠ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠮᠣᠷᠢᠳ ᠤ᠋ᠨ ᠬᠣᠢᠨᠠ ᠠ᠋ᠴᠠ ᠰᠡᠳᠬᠢᠯ ᠪᠣᠯᠤᠨ ᠨᠢᠳᠦ ᠪᠡᠨ ᠲᠣᠳᠣᠢᠯᠭᠠᠨ ᠡᠷᠢᠵᠡᠭᠡᠨᠡ᠃
– ᠵᠡᠭᠡᠷᠳᠡ ᠮᠣᠷᠢ᠂ ᠵᠡᠭᠡᠷᠳᠡ ᠮᠣᠷᠢ ! ᠭᠡᠮᠡᠨ ᠨᠢᠭᠡ ᠪᠦᠯᠦᠭ ᠬᠥᠮᠦᠰ ᠪᠠᠷᠬᠢᠷᠠᠯᠳᠤᠪᠠ᠃ ᠭᠡᠬᠦ ᠳ᠋ᠦ᠍ ᠲᠡᠭᠦᠰᠬᠡᠯ ᠦ᠋ᠨ ᠴᠠᠭ ᠠ᠋ᠴᠠ ᠡᠮᠦᠨᠡᠬᠡᠨ ᠲᠡᠭᠦᠨ ᠢ᠋ ᠬᠣᠶᠠᠷ ᠬᠠᠷᠠ ᠮᠣᠷᠢ ᠳᠠᠭᠠᠷᠢᠨ ᠭᠠᠷᠤᠯᠠ᠃
– ᠬᠡᠭᠡᠷ ᠮᠣᠷᠢ ᠲᠡᠭᠡᠭᠡᠳ ᠬᠠᠮᠢᠭᠠ ᠣᠷᠣᠴᠢᠬᠠᠪᠠ? ᠭᠡᠵᠦ ᠨᠢᠭᠡ ᠨᠢ ᠠᠰᠠᠭᠤᠪᠠ᠃
ᠬᠡᠭᠡᠷ ᠮᠣᠷᠢ ᠶ᠋ᠢ ᠬᠦᠯᠢᠶᠡᠭᠡᠳ ᠬᠦᠯᠢᠶᠡᠭᠡᠳ ᠪᠠᠢᠳᠠᠭ ᠦᠭᠡᠢ᠃ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠲᠤ᠌ ᠵᠢᠭᠰᠠᠭᠠᠭᠳᠠᠬᠤ ᠮᠣᠷᠢ ᠬᠦᠷᠴᠦ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠰᠠᠶᠢ ᠬᠣᠯᠠ ᠬᠣᠢᠨᠠ ᠠ᠋ᠴᠠ ᠨᠢ ᠬᠡᠭᠡᠷ ᠮᠣᠷᠢ ᠭᠠᠷᠴᠤ ᠢᠷᠡᠪᠡ᠃ ᠡᠨᠡ ᠬᠡᠭᠡᠷ ᠮᠣᠷᠢ ᠣᠯᠠᠨ ᠨᠠᠢᠷ ᠲᠤ᠌ ᠣᠷᠣᠯᠴᠠᠨ ᠳᠥᠷᠪᠡ ᠤᠳᠠᠭᠠ ᠮᠠᠩᠯᠠᠢᠯᠠᠵᠤ ᠥᠩᠭᠡᠷᠡᠭᠰᠡᠨ ᠪᠣᠯᠪᠠᠴᠤ ᠥᠨᠥᠳᠥᠷ ᠬᠣᠴᠣᠷᠴᠠᠢ᠃ ᠱᠠᠩ ᠬᠦᠷᠲᠡᠭᠡᠬᠦ ᠦᠶᠡ ᠪᠣᠯᠬᠤ ᠳ᠋ᠤ᠌ ᠬᠡᠭᠡᠷ ᠮᠣᠷᠢ ᠡᠵᠡᠨ ᠲᠡᠢ ᠪᠡᠨ ᠵᠢᠴᠢ ᠤᠨᠤᠭᠰᠠᠨ ᠵᠢᠭᠠᠯ ᠨᠢ ᠴᠦ᠍ ᠠᠯᠠᠭᠠ ᠪᠣᠯᠵᠠᠢ ᠃ ᠵᠢᠭᠠᠯ ᠮᠣᠷᠢᠲᠠᠳ ᠱᠠᠩ ᠲᠣᠰᠴᠤ ᠠᠪᠬᠤ ᠳ᠋ᠠᠭᠠᠨ ᠮᠥᠷᠭᠥᠨ ᠲᠣᠰᠴᠤ ᠪᠠᠢᠪᠠ᠃ ᠲᠦᠷᠦᠭᠦᠦ ᠱᠠᠩ ᠳ᠋ᠤ᠌ ᠲᠠᠪᠤᠨ ᠵᠢᠩ ᠲᠤᠲᠤᠷᠭᠠ ᠪᠠᠢᠵᠤ ᠂ ᠳᠠᠷᠠᠭᠠᠴᠢ ᠶ᠋ᠢᠨ ᠬᠢ ᠨᠦ᠍ᠭᠦᠳ ᠨᠢ ᠬᠡᠪ ᠦ᠋ᠨ ᠴᠠᠢ ᠂ ᠠᠮᠤ ᠪᠣᠯᠤᠨ ᠥᠭᠡᠷᠡ ᠢᠳᠡᠭᠡᠨ ᠢ᠋ᠶ᠋ᠡᠷ ᠱᠠᠩᠨᠠᠭᠳᠠᠵᠠᠢ ᠃ ᠲᠡᠷᠡ ᠨᠣᠶᠠᠨ ᠬᠥᠮᠦᠰ ᠦ᠋ᠨ ᠢᠨᠢᠶᠡᠯᠴᠡᠭᠡᠨ ᠦ᠌ ᠳᠤᠮᠳᠠᠭᠤᠷ ᠰᠡᠭᠦᠯ ᠲᠠᠭᠤᠵᠤ ᠢᠷᠡᠭᠰᠡᠨ ᠣᠷᠣᠯᠳᠣᠭᠴᠢ ᠳ᠋ᠤ᠌ ᠲᠠᠰᠢᠭᠤᠷ ᠱᠠᠩᠨᠠᠨ ᠥᠭᠭᠦᠭᠡᠳ᠄
– ᠡᠭᠦᠨ ᠢ᠋ᠶ᠋ᠡᠷ ᠴᠢ ᠳᠠᠷᠠᠭᠠᠴᠢ ᠶ᠋ᠢᠨ ᠤᠳᠠᠭᠠ ᠨᠡᠩ ᠬᠤᠷᠳᠤᠨ ᠭᠦᠶᠦᠯᠭᠡᠬᠦ ᠪᠣᠯᠤᠨᠠ᠃ ᠬᠡᠷᠪᠡ ᠰᠠᠢᠨ ᠪᠣᠯᠪᠠᠰᠤᠷᠠᠳᠠᠭ ᠯᠠ ᠶᠤᠮ ᠪᠣᠯ ᠠᠯᠢ ᠨᠢᠭᠡᠨ ᠡᠳᠦᠷ ᠴᠢ ᠲᠡᠷᠢᠭᠦᠨ ᠳ᠋ᠦ᠍ ᠳᠠᠪᠬᠢᠨ ᠢᠷᠡᠬᠦ ᠪᠣᠯᠤᠨᠠ ᠭᠡᠵᠦ ᠵᠣᠷᠢᠭᠵᠢᠭᠤᠯᠤᠨ ᠬᠡᠯᠡᠯᠡ᠃ ᠡᠬᠢᠨ ᠳ᠋ᠦ᠍ ᠢᠷᠡᠭᠰᠡᠨ ᠳᠥᠷᠪᠡᠨ ᠮᠣᠷᠢᠳ ᠤ᠋ᠨ ᠳᠡᠯ ᠲᠡᠢ ᠨᠢ ᠲᠠᠷᠨᠢ ᠰᠢᠩᠭᠡᠭᠡᠭᠰᠡᠨ ᠰᠠᠬᠢᠭᠤᠰᠤ - ᠵᠢᠵᠢᠭᠬᠡᠨ ᠤᠯᠠᠭᠠᠨ ᠤᠭᠤᠲᠠ ᠶ᠋ᠢ ᠨᠡᠢᠯᠡᠭᠦᠯᠦᠨ ᠬᠦᠷᠦᠭᠰᠡᠨ ᠨᠢ ᠡᠳᠡᠨ ᠢ᠋ ᠭᠠᠢ ᠭᠠᠮᠰᠢᠭ ᠠ᠋ᠴᠠ ᠵᠠᠢᠯᠠᠭᠤᠯᠬᠤ ᠬᠦᠴᠦᠨ ᠴᠢᠳᠠᠯ ᠲᠠᠢ ᠪᠣᠯᠭᠠᠬᠤ ᠲᠣᠮ ᠪᠠᠢᠵᠠᠢ᠃
ᠢᠩᠭᠢᠭᠡᠳ ᠦᠳᠡ ᠶ᠋ᠢᠨ ᠡᠮᠦᠨᠡᠬᠢ ᠤᠷᠤᠯᠳᠤᠭᠠᠨ ᠳᠠᠭᠤᠰᠤᠯᠠ᠃ ᠡᠷᠡᠴᠦᠦᠯ ᠮᠠᠢᠬᠠᠨ ᠤᠷᠤᠭᠤ ᠪᠠᠨ ᠶᠠᠪᠤᠵᠠᠭᠠᠨ ᠵᠠᠷᠢᠮ ᠨᠢ ᠯᠠᠮᠠ ᠨᠠᠷ ᠲᠠᠢ ᠬᠠᠮᠲᠤ ᠰᠦ ᠲᠡᠢ ᠴᠠᠢ ᠤᠤᠭᠤᠵᠠᠭᠠᠪᠠ᠃ ᠮᠠᠰᠢᠨ ᠲᠡᠷᠭᠡᠨ ᠦ᠌ ᠪᠡᠨ ᠰᠡᠭᠦᠳᠡᠷ ᠲᠦ᠍ ᠪᠢᠳᠡ ᠴᠦ᠍ ᠦᠳᠡ ᠶ᠋ᠢᠨ ᠴᠠᠢ ᠪᠠᠨ ᠪᠡᠯᠡᠳᠬᠡᠨ ᠤᠤᠭᠤᠯᠠ᠃ ᠲᠣᠭᠣᠷᠢᠨ ᠰᠠᠭᠤᠭᠰᠠᠨ ᠮᠣᠩᠭᠣᠯᠴᠤᠳ ᠲᠠᠢ ᠪᠢ ᠢᠨᠢᠶᠡᠳᠦᠮ ᠱᠣᠭ ᠬᠡᠯᠡᠵᠦ ᠬᠥᠭᠡᠷᠦᠯᠳᠦᠭᠰᠡᠨ ᠪᠥᠭᠡᠳ ᠨᠢᠭᠡ ᠴᠠᠭᠠᠰᠤᠨ ᠲᠠᠮᠠᠬᠢ ᠭᠠᠷᠭᠠᠨ ᠨᠣᠴᠣᠭᠠᠪᠠ ᠃ ᠮᠠᠰᠢᠨ ᠤ᠋ ᠭᠢᠰᠬᠢᠭᠦᠷ ᠳᠡᠭᠡᠷᠡ ᠨᠢᠭᠡ ᠵᠠᠯᠠᠭᠤᠬᠠᠨ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠪᠣᠯᠤᠨ ᠨᠢᠭᠡ ᠮᠣᠩᠭᠣᠯ ᠲᠠᠢ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠤᠳᠠᠬᠤ ᠦᠭᠡᠢ ᠤᠳᠠᠬᠤ ᠦᠭᠡᠢ ᠨᠠᠳᠠ ᠤᠷᠤᠭᠤ ᠬᠣᠶᠠᠭᠤᠯᠠ ᠪᠠᠨ ᠬᠠᠷᠠᠭᠠᠳ ᠪᠠᠢᠬᠤᠯᠠᠷ ᠨᠢ ᠪᠢ᠄
– ᠨᠠᠳᠠ ᠠ᠋ᠴᠠ ᠶᠠᠭᠤ ᠮᠡᠳᠡᠶᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠪᠣᠢ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠰᠸᠸᠳ᠋ᠸᠨ ᠨᠡᠯᠢᠶᠡᠳ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠠᠷ᠄
– ᠪᠢᠳᠡ ᠮᠣᠩᠭᠣᠯᠴᠤᠳ ᠲᠤ᠌ ᠾᠷᠢᠰᠲ᠋ᠣᠰ ᠲᠠᠮᠠᠬᠢ ᠲᠠᠲᠠᠬᠤ ᠶ᠋ᠢ ᠴᠠᠭᠠᠵᠠᠯᠠᠳᠠᠭ ᠭᠡᠮᠡᠨ ᠰᠤᠷᠭᠠᠨ ᠶᠠᠷᠢᠳᠠᠭ ᠪᠠᠢᠬᠤ ᠳ᠋ᠤ᠌ ᠲᠠᠨ ᠤ᠋ ᠲᠠᠮᠠᠬᠢ ᠲᠠᠲᠠᠵᠤ ᠪᠠᠢᠭᠠ ᠨᠢ ᠨᠢᠭᠦᠯ ᠬᠢᠵᠦ ᠪᠠᠢᠭᠠ ᠤᠴᠢᠷ ᠪᠢᠰᠢ ᠶᠦᠮ ᠤᠤ ? ᠭᠡᠵᠦ ᠡᠨᠡ ᠮᠣᠩᠭᠣᠯ ᠠᠰᠠᠭᠤᠭᠠᠳ ᠪᠠᠢᠨᠠ ᠃ ᠠᠢ ᠳᠠ ! ᠭᠡᠯᠡ᠃
– ᠲᠡᠭᠡᠭᠡᠳ ᠲᠠ ᠶᠠᠭᠤ ᠭᠡᠵᠦ ᠬᠠᠷᠢᠭᠤᠯᠪᠠ ? ᠭᠡᠵᠦ ᠪᠢ ᠡᠨᠡ ᠬᠦ᠌ ᠱᠠᠰᠢᠨ ᠤ᠋ ᠠᠰᠠᠭᠤᠳᠠᠯ ᠤ᠋ᠨ ᠲᠤᠬᠠᠢ ᠬᠠᠳᠠᠭᠠᠨᠠᠨ ᠢᠨᠢᠶᠡᠬᠦ ᠶ᠋ᠢᠨ ᠳᠠᠭᠠᠤ ᠠᠰᠠᠭᠤᠪᠠ᠃
– ᠲᠠᠮᠠᠬᠢᠨ ᠭᠠᠩᠰᠠ ᠪᠠᠷ ᠠᠮᠠ ᠳᠠᠮᠵᠢᠭᠤᠯᠤᠨ ᠲᠠᠲᠠᠬᠤ ᠨᠢ ᠣᠯᠠᠨ ᠡᠪᠡᠳᠴᠢᠨ ᠢ᠋ ᠬᠠᠯᠳᠠᠪᠤᠷᠢᠯᠠᠭᠤᠯᠵᠤ ᠪᠣᠯᠬᠤ ᠲᠤᠯᠠ ᠪᠢᠳᠡ ᠲᠠᠮᠠᠬᠢ ᠲᠠᠲᠠᠬᠤ ᠶ᠋ᠢ ᠬᠣᠷᠢᠭᠯᠠᠵᠤ ᠪᠠᠢᠭᠠ ᠶᠤᠮ ᠭᠡᠵᠦ ᠲᠡᠷᠡ ᠦᠭᠡ ᠪᠡᠨ ᠵᠠᠢᠯᠠᠭᠤᠯᠤᠨ ᠶᠠᠷᠢᠪᠠ ᠃
– ᠲᠡᠭᠡᠪᠡᠯ ᠪᠢ ᠴᠦ᠍ ᠠᠳᠠ ᠮᠠᠭᠤᠬᠠᠢ ᠬᠡᠪ ᠳᠠᠭᠤᠷᠢᠶᠠᠯ ᠪᠣᠯᠵᠤ ᠪᠠᠢᠭᠠ ᠶᠤᠮ ᠪᠠᠢᠨᠠ ᠃ ᠲᠠ ᠲᠡᠭᠡᠭᠡᠳ ᠡᠨᠡ ᠮᠣᠩᠭᠣᠯ ᠳ᠋ᠤ᠌ ᠶᠠᠷᠢᠭᠰᠠᠨ ᠬᠠᠷᠢᠭᠤ ᠪᠠᠨ ᠨᠠᠳᠠ ᠶᠠᠷᠢᠵᠤ ᠥᠭᠬᠦ ᠦᠭᠡᠢ ᠶᠦᠮ ᠤᠤ ?
– ᠶᠠᠷᠢᠬᠤ ᠦᠭᠡᠢ ᠳᠡ᠃ ᠶᠠᠷᠢᠪᠠᠯ ᠲᠠ ᠬᠠᠷᠢᠨ ᠨᠠᠮᠠᠶ᠋ᠢ ᠪᠤᠷᠤᠭᠤ ᠣᠢᠯᠠᠭᠠᠵᠤ ᠮᠡᠳᠡᠨᠡ ᠰᠢᠦ᠃
ᠦᠳᠡ ᠶ᠋ᠢᠨ ᠴᠠᠢ ᠶ᠋ᠢᠨ ᠴᠠᠭ ᠶᠡᠬᠡ ᠤᠳᠠᠭᠠᠨ ᠦᠷᠭᠦᠯᠵᠢᠯᠡᠪᠡ᠃ ᠲᠡᠭᠡᠭᠡᠳ ᠡᠴᠦᠰ ᠲᠡᠭᠡᠨ ᠶᠠᠮᠠᠷ ᠴᠤ᠌ ᠭᠡᠰᠡᠨ ᠠᠲᠠᠨ ᠲᠡᠮᠡᠭᠡ ᠪᠠ ᠲᠠᠷᠢᠶᠠᠨ ᠤ᠋ ᠵᠢᠷᠤᠭ ᠢ᠋ᠶ᠋ᠠᠷ ᠴᠢᠮᠡᠭᠯᠡᠭᠰᠡᠨ ᠰᠠᠢᠬᠠᠨ ᠮᠠᠢᠬᠠᠨ ᠢ᠋ᠶ᠋ᠠᠨ ᠰᠦᠮᠡ ᠶ᠋ᠢᠨ ᠡᠮᠦᠨᠡ ᠪᠣᠰᠬᠠᠪᠠ᠃ ᠤᠳᠠᠯ ᠦᠭᠡᠢ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠯᠴᠠᠭᠴᠢ ᠨᠢᠭᠡ ᠪᠥᠬᠡᠴᠢᠨ ᠨᠣᠶᠠᠳ ᠲᠦᠰᠢᠮᠡᠳ ᠡᠴᠡ ᠡᠮᠦᠨᠡ ᠠᠳᠠ ᠬᠦᠷᠴᠦ ᠢᠷᠡᠭᠰᠡᠨ ᠪᠥᠭᠡᠳ ᠲᠡᠭᠦᠨ ᠢ᠋ ᠳᠠᠭᠠᠯᠳᠤᠨ ᠣᠯᠠᠨ ᠯᠠᠮᠠ ᠵᠢᠴᠢ ᠠᠷᠠᠳ ᠤ᠋ᠳ ᠬᠦᠷᠦᠯᠴᠡᠨ ᠢᠷᠡᠵᠡᠭᠡᠪᠡ᠃ ᠠᠷᠠᠳ ᠤ᠋ᠨ ᠳᠣᠲᠣᠷᠠ ᠡᠷᠡᠴᠦᠦᠯ ᠭᠣᠣᠯᠲᠠᠢ ᠪᠠᠢᠳᠠᠭ ᠨᠢ ᠪᠦᠰᠡᠭᠦᠢᠴᠦᠦᠯ ᠨᠢ ᠠᠷᠤ ᠭᠡᠷ ᠲᠡᠭᠡᠨ ᠠᠵᠢ ᠬᠢᠭᠡᠳ ᠶᠠᠭᠠᠷᠠᠤ ᠪᠠᠢᠳᠠᠭ ᠠᠵᠢ᠃ ᠵᠦᠯᠭᠡᠨ ᠳᠡᠭᠡᠷᠡ ᠲᠣᠮᠣ ᠲᠣᠭᠣᠷᠢᠭ ᠪᠣᠯᠤᠨ ᠰᠠᠭᠤᠵᠠᠭᠠᠵᠤ᠂ ᠯᠠᠮᠠ ᠨᠠᠷ ᠮᠠᠢᠬᠠᠨ ᠤ᠋ ᠵᠡᠭᠦᠨ ᠲᠠᠯᠠ ᠪᠠᠷ ᠪᠠᠢᠷᠢ ᠡᠵᠡᠯᠡᠨ᠂ ᠦᠳᠡ ᠶ᠋ᠢᠨ ᠬᠣᠢᠨᠠ ᠶ᠋ᠢᠨ ᠬᠤᠷᠴᠠ ᠨᠠᠷᠠᠨ ᠳ᠋ᠤ᠌ ᠡᠮᠦᠰᠦᠭᠰᠡᠨ ᠰᠢᠷᠠ ᠬᠦᠷᠡᠩ ᠪᠠᠩᠵᠠᠯ ᠨᠢ ᠨᠢᠳᠦᠨᠡ ᠢᠯᠭᠠᠷᠠᠨ ᠬᠠᠷᠠᠭᠳᠠᠬᠤ ᠪᠥᠭᠡᠳ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠬᠡᠮᠡᠷᠯᠢᠭ ᠲᠣᠷᠭᠠ ᠪᠠᠷ ᠬᠢᠭᠰᠡᠨ ᠭᠣᠶᠣ ᠪᠣᠭᠴᠣ ᠪᠠᠨ ᠣᠮᠣᠭᠲᠠᠢ ᠪᠠᠷ ᠲᠠᠯᠪᠢᠭᠰᠠᠨ ᠨᠢ ᠰᠦᠷᠲᠡᠢ ᠠᠵᠢ᠃ ᠴᠡᠷᠢᠭ ᠦ᠋ᠳ ᠱᠥᠪᠥᠭᠡᠷ ᠣᠷᠣᠢ ᠲᠠᠢ ᠮᠠᠯᠠᠭᠠᠢ ᠡᠮᠦᠰᠴᠦ᠂ ᠬᠠᠭᠤᠴᠢᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠡᠭᠦᠷᠦᠨ ᠪᠥᠬᠡ ᠶ᠋ᠢᠨ ᠲᠠᠯᠠᠪᠠᠢ ᠶ᠋ᠢᠨ ᠳᠤᠭᠤᠢ ᠴᠠᠭᠠᠷᠢᠭ ᠢ᠋ ᠬᠠᠮᠠᠭᠠᠯᠠᠵᠤ ᠪᠠᠢᠪᠠ᠃
ᠰᠢᠷᠠ᠂ ᠤᠯᠠᠭᠠᠨ᠂ ᠨᠣᠭᠣᠭᠠᠨ ᠥᠩᠭᠡ ᠶ᠋ᠢᠨ ᠵᠣᠳᠣᠭ ᠲᠠᠢ ᠪᠥᠬᠡᠴᠢᠳ ᠬᠣᠶᠠᠷ ᠪᠦᠯᠦᠭ ᠪᠣᠯᠵᠤ ᠵᠣᠭᠰᠣᠪᠠ᠃ ᠵᠣᠳᠣᠭ ᠳᠡᠭᠡᠷᠡ ᠨᠢ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠬᠦᠷᠳᠦ ᠵᠡᠷᠭᠡ ᠪᠡᠷ ᠴᠢᠮᠡᠭᠰᠡᠨ ᠪᠠ ᠬᠦᠵᠦᠭᠦᠨ ᠳ᠋ᠦ᠍ᠨᠢ ᠣᠯᠠᠨ ᠥᠩᠭᠡ ᠶ᠋ᠢᠨ ᠲᠣᠷᠭᠠ ᠲᠠᠢ ᠨᠠᠪᠰᠠᠯᠵᠠᠭᠰᠠᠨ ᠵᠠᠩᠭᠢᠶᠠ ᠵᠡᠭᠦᠭᠰᠡᠨ ( ᠵᠢᠷᠤᠭ 90 ) ᠨᠢ ᠪᠦᠷ ᠪᠥᠬᠡᠴᠢᠳ ᠲᠦ᠍ ᠬᠦᠴᠦᠨ ᠴᠢᠳᠠᠯ ᠣᠯᠭᠣᠳᠠᠭ ᠦᠢᠯᠡᠳᠦᠯ ᠲᠡᠢ ᠶᠦᠮ᠃ ᠵᠣᠳᠣᠭᠯᠠᠵᠤ ᠪᠠᠷᠠᠭᠰᠠᠨ ᠪᠥᠬᠡᠴᠢᠳ ᠮᠠᠭᠰᠢᠭᠰᠠᠭᠠᠷ ᠲᠠᠯᠠᠪᠠᠢ ᠳ᠋ᠤ᠌ ᠣᠷᠣᠵᠠᠭᠠᠪᠠ᠃
ᠲᠡᠳᠡᠨ ᠦ᠌ ᠬᠣᠣᠰ ᠤ᠋ᠳ ᠤ᠋ᠨ ᠨᠡᠷᠡᠰ ᠢ᠋ ᠳᠠᠭᠤᠳᠠᠬᠤ ᠶ᠋ᠢᠨ ᠵᠡᠷᠭᠡ ᠬᠣᠶᠠᠭᠤᠯᠠ ᠪᠠᠨ ᠮᠠᠭᠰᠢᠭᠰᠠᠭᠠᠷ ᠮᠠᠢᠬᠠᠨ ᠤ᠋ ᠡᠮᠦᠨᠡ ᠬᠦᠷᠴᠦ᠂ ᠨᠣᠶᠠᠳ ᠲᠦᠰᠢᠮᠡᠳ ᠪᠠ ᠪᠥᠬᠡ ᠶ᠋ᠢᠨ ᠵᠠᠰᠠᠭᠤᠯᠴᠢ ᠨᠠᠷ ᠲᠤ᠌ ᠭᠦᠨ ᠪᠥᠬᠥᠢᠨ ᠶᠣᠰᠣᠯᠠᠵᠤ ᠪᠠᠢᠪᠠ ( ᠵᠢᠷᠤᠭ 88 ) ᠃
ᠢᠩᠭᠢᠭᠡᠳ ᠯᠡ ᠪᠥᠬᠡ ᠪᠠᠷᠢᠯᠳᠤᠵᠤ ᠡᠬᠢᠯᠡᠪᠡ ( ᠵᠢᠷᠤᠭ 86 ) ᠃ ᠬᠦᠴᠦᠨ ᠴᠢᠳᠠᠯ ᠡᠷᠴᠢᠯᠡᠭᠰᠡᠨ ᠲᠣᠮᠣ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠥᠭᠦᠭᠡ ᠡᠲᠡᠭᠡᠳ ᠢ᠋ᠶ᠋ᠡᠨ ᠪᠠᠵᠠᠨ ᠠᠪᠴᠤ᠂ ᠢᠳᠡ ᠲᠤᠯᠤᠨ ᠲᠡᠮᠡᠴᠡᠯᠳᠦᠵᠦ᠂ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠣᠬᠠᠳᠠᠬᠤ᠂ ᠬᠠᠪᠰᠤᠷᠬᠤ ᠣᠯᠠᠨ ᠮᠡᠬᠡ ᠬᠡᠷᠡᠭᠯᠡᠨ ᠡᠰᠡᠷᠭᠦ ᠡᠲᠡᠭᠡᠳ ᠢ᠋ᠶ᠋ᠡᠨ ᠤᠨᠠᠭᠠᠬᠤ ᠶ᠋ᠢ ᠤᠷᠤᠯᠳᠤᠵᠤ ᠪᠠᠢᠪᠠ᠃ ᠵᠠᠷᠢᠮ ᠪᠥᠬᠡ ᠨᠦ᠍ᠭᠦᠳ ᠨᠢ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠡᠰᠡᠷᠭᠦ ᠡᠲᠡᠭᠡᠳ ᠦ᠋ᠨ ᠡᠮᠵᠡᠭ ᠲᠠᠯᠠ ᠶ᠋ᠢ ᠣᠯᠤᠨ ᠠᠪᠴᠤ ᠭᠠᠵᠠᠷ ᠲᠤ᠌ ᠬᠠᠶᠠᠭᠠᠳ ᠮᠠᠭᠰᠢᠭᠰᠠᠭᠠᠷ ᠪᠥᠬᠡ ᠶ᠋ᠢᠨ ᠵᠠᠰᠠᠭᠤᠯᠴᠢ ᠠ᠋ᠴᠠ ᠨᠢᠭᠡ ᠠᠶᠠᠭᠠ ᠠᠢᠷᠠᠭ ᠠᠪᠴᠤ᠂ ᠲᠡᠭᠷᠢ ᠵᠦᠭ ᠢᠳᠠᠮᠯᠠᠨ ᠢᠯᠠᠯᠲᠠ ᠣᠯᠤᠭᠰᠠᠨ ᠳ᠋ᠠᠭᠠᠨ ᠲᠠᠯᠠᠷᠬᠠᠬᠤ ᠠᠵᠢ᠃ ᠨᠥᠭᠦᠭᠡ ᠰᠢᠷᠣᠢ ᠶ᠋ᠢᠨ ᠪᠥᠬᠡ ᠨᠢ ᠲᠣᠭᠣᠷᠢᠨ ᠰᠠᠭᠤᠭᠰᠠᠨ ᠨᠠᠢᠵᠠ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠲᠡᠨᠳᠡ ᠬᠦᠷᠴᠦ ᠳᠡᠯᠳᠠᠷᠠᠵᠤ ᠪᠠᠢᠪᠠ᠃
ᠲᠠᠯᠠᠪᠠᠢ ᠳᠡᠭᠡᠷᠡ ᠬᠣᠷᠢ ᠢᠯᠡᠭᠦᠦ ᠬᠣᠣᠰ ᠤ᠋ᠳ ᠦᠯᠡᠳᠡᠵᠡᠭᠡᠨ ᠬᠦᠴᠦ ᠰᠢᠯᠭᠠᠬᠤ ᠳ᠋ᠤ᠌ ᠬᠡᠦᠬᠡᠳ ᠵᠠᠯᠠᠭᠤᠴᠤᠳ ᠬᠡᠳᠦᠢᠨ ᠦᠵᠡᠬᠦ ᠳᠤᠷᠠ ᠨᠢ ᠠᠯᠳᠠᠷᠠᠨ ᠲᠠᠯᠠᠪᠠᠢ ᠶ᠋ᠢᠨ ᠭᠠᠳᠠᠨᠠ ᠭᠠᠷᠤᠨ ᠪᠠᠷᠢᠯᠳᠤᠵᠤ ᠡᠬᠢᠯᠡᠵᠡᠭᠡᠪᠡ᠃ ᠵᠠᠷᠢᠮ ᠦᠵᠡᠭᠴᠢᠳ ᠬᠣᠢᠰᠢ ᠪᠠᠨ ᠬᠠᠷᠠᠵᠠᠭᠠᠨ᠂ ᠤᠤᠬᠠᠢᠯᠠᠨ ᠱᠠᠭᠰᠢᠵᠠᠭᠠᠬᠤ ᠳ᠋ᠤ᠌᠂ ᠴᠡᠷᠢᠭ ᠦ᠋ᠳ ᠬᠦᠷᠴᠦ ᠢᠷᠡᠨ ᠡᠳᠡᠭᠡᠷ ᠢᠷᠡᠭᠡᠳᠦᠢ ᠶ᠋ᠢᠨ ᠪᠥᠬᠡᠴᠢᠳ ᠢ᠋ ᠶᠣᠰᠣ ᠨᠣᠮ ᠲᠠᠢ ᠪᠣᠯᠭᠠᠪᠠ᠃
ᠪᠢᠳᠡ ᠪᠦᠲᠦᠨ ᠡᠳᠦᠷ ᠲᠤᠵᠢ ᠬᠤᠷᠴᠠ ᠨᠠᠷᠠᠨ ᠤ᠋ ᠳᠣᠣᠷᠠ ᠵᠦᠯᠭᠡᠨ ᠳᠡᠭᠡᠷᠡ ᠤᠳᠠᠭᠠᠨ ᠰᠠᠭᠤᠭᠰᠠᠨ ᠠ᠋ᠴᠠ ᠶᠠᠳᠠᠷᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠴᠦ ᠨᠠᠷᠠ ᠰᠢᠩᠭᠡᠬᠦ ᠶ᠋ᠢᠨ ᠦᠶᠡᠰ ᠢ᠋ᠶ᠋ᠡᠷ ᠬᠠᠷᠢᠬᠤ ᠵᠠᠮ ᠢ᠋ᠶ᠋ᠠᠨ ᠡᠯᠭᠦᠨ ᠠᠪᠬᠤ ᠳ᠋ᠤ᠌ ᠨᠠᠭᠠᠳᠤᠮ ᠪᠠᠰᠠ ᠯᠠ ᠲᠡᠭᠦᠰᠦᠭᠡ ᠦᠭᠡᠢ ᠪᠠᠢᠭᠰᠠᠭᠠᠷ᠃
– ᠶᠣᠰᠣᠲᠠᠢ ᠰᠠᠢᠬᠠᠨ ᠮᠣᠩᠭᠣᠯ ᠨᠠᠢᠷ ᠂ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠢ᠋ ᠬᠠᠷᠠᠯᠠ ᠰᠢᠦ ᠭᠡᠵᠦ ᠰᠸᠸᠳ᠋ᠸᠨ ᠦ᠌ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠡᠸᠷᠢᠺᠰᠣᠨ ᠳ᠋ᠤ᠌ ᠪᠢ ᠱᠠᠭᠰᠢᠨ ᠬᠡᠯᠡᠬᠦ ᠳ᠋ᠦ᠍ ᠲᠡᠷᠡ᠄
– ᠲᠡᠢᠮᠦ ᠠ᠋ ! ᠬᠥᠮᠦᠰ ᠴᠦ᠍ ᠪᠢᠳᠡᠨ ᠳ᠋ᠦ᠍ ᠶᠡᠬᠡ ᠨᠠᠢᠷᠰᠠᠭ ᠬᠠᠨᠳᠤᠭᠰᠠᠨ ᠳᠠ ᠭᠡᠯᠡ᠃
– ᠲᠡᠳᠡ ᠪᠠᠰᠠ ᠣᠨᠳᠣᠣ ᠪᠠᠢᠳᠠᠭ ᠶᠤᠮ ᠤᠤ ?
– ᠪᠢᠳᠡ ᠬᠡᠳᠦᠢᠪᠡᠷ ᠵᠥᠪᠬᠡᠨ ᠲᠡᠳᠡᠨ ᠳ᠋ᠦ᠍ ᠲᠤᠰᠠ ᠬᠦᠷᠭᠡᠶᠡ ᠭᠡᠵᠦ ᠴᠢᠷᠮᠠᠢᠳᠠᠭ ᠪᠣᠯᠪᠠᠴᠤ ᠴᠢᠯᠠᠭᠤ ᠪᠠᠷ ᠤᠭᠲᠤᠭᠳᠠᠬᠤ ᠤᠴᠢᠷ ᠪᠠᠰᠠ ᠲᠠᠩᠳᠠ ᠭᠠᠷᠤᠭᠠᠳ ᠯᠠ ᠪᠠᠢᠳᠠᠭ ᠰᠢᠦ ᠭᠡᠵᠦ ᠵᠣᠪᠠᠨᠢᠩᠬᠠᠨ ᠬᠠᠷᠢᠭᠤᠯᠤᠯᠠ᠃