ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ᠂ ᠨᠠᠢ᠍ᠮᠠ ᠶᠢᠨ ᠠᠭᠤᠯᠠᠨ ᠳᠤ ᠁ (ᠵᠢᠷᠭᠤᠭᠠ) Сэрүүхэн тал нутаг–<свис> Вальтер Босгард (Walter Bosshard)- Дөрөвдүгээр бөлөг 6
251ᠵᠢᠷᠭᠤᠭᠠ ᠂ ᠴᠢᠨᠣᠠ ᠠᠩᠨᠠᠭᠰᠠᠨ ᠨᠢ
— ᠴᠢᠨᠣᠠ ! ᠴᠢᠨᠣᠠ ! ᠭᠡᠵᠦ ᠲᠡᠷᠡ ᠪᠦᠰᠡᠭᠦᠢ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠭᠠᠳ ᠭᠡᠷ ᠲᠦ᠍ ᠭᠦᠶᠦᠨ ᠣᠷᠣᠵᠤ ᠡᠪᠦᠭᠡᠨ ᠢ᠋ᠶ᠋ᠡᠨ ᠳᠠᠭᠤᠳᠠᠨ ᠰᠡᠷᠡᠭᠡᠪᠡ᠃ ᠡᠨᠡ ᠬᠦ᠌ ᠳᠠᠭᠤ ᠱᠤᠤᠭᠢᠶᠠᠨ ᠨᠢ ᠲᠣᠣᠷᠬᠠᠨ ᠢ᠋ᠶ᠋ᠠᠨ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠶ᠋ᠢᠨ ᠬᠢᠨ ᠳ᠋ᠦ᠍ ᠳᠠᠮᠵᠢᠭᠳᠠᠨ ᠬᠦᠷᠴᠦ᠂ ᠨᠠᠮᠠᠶ᠋ᠢ ᠴᠤ᠌ ᠨᠣᠢᠷ ᠠ᠋ᠴᠠ ᠰᠡᠷᠡᠭᠡᠯᠡ᠃
ᠨᠠᠮᠠᠶ᠋ᠢ ᠲᠡᠳᠡᠨ ᠦ᠌ ᠬᠢᠨ ᠳ᠋ᠦ᠍ ᠬᠦᠷᠬᠦ ᠳ᠋ᠦ᠍ ᠦᠷᠡᠳᠡᠨᠳᠡᠷ ᠪᠣᠯᠤᠨ ᠲᠡᠭᠦᠨ ᠦ᠌ ᠵᠠᠯᠬᠠᠭᠤ ᠡᠷᠡ ᠭᠣᠮᠪᠣ (ᠵᠢᠷᠤᠭ 82) ᠬᠣᠶᠠᠭᠤᠯᠠ ᠪᠠᠨ ᠬᠣᠷᠢᠶᠠᠨ ᠠ᠋ᠴᠠ ᠬᠣᠨᠢᠨ ᠤ᠋ ᠦᠬᠦᠳᠡᠯ ᠦ᠋ᠳ ᠢ᠋ ᠳᠠᠮᠵᠢᠯᠠᠨ ᠵᠦᠯᠭᠡᠨ ᠳᠡᠭᠡᠷᠡ ᠭᠠᠷᠭᠠᠵᠤ ᠪᠠᠢᠪᠠ᠃ ᠬᠣᠨᠢᠨ ᠰᠦᠷᠦᠭ ᠨᠢ ᠡᠪᠡᠰᠦ ᠢᠳᠡᠬᠦ ᠪᠡᠨ ᠴᠦ᠍ ᠮᠠᠷᠲᠠᠭᠰᠠᠨ ᠮᠡᠲᠦ ᠣᠢᠷᠠᠬᠠᠨ ᠲᠠᠯᠠ ᠳᠡᠭᠡᠷᠡ ᠪᠥᠭᠡᠮᠨᠡᠷᠡᠯᠳᠦᠨ ᠭᠦᠶᠦᠯᠳᠦᠬᠦ ᠪᠥᠭᠡᠳ ᠰᠠᠭᠠᠬᠠᠯᠲᠠ ᠨᠤᠭᠤᠳ ᠨᠢ ᠬᠣᠨᠢᠨ ᠤ᠋ ᠦᠬᠦᠳᠡᠯ ᠢ᠋ ᠬᠠᠷᠠᠨ ᠳᠠᠭᠤ ᠴᠢᠮᠡᠭᠡ ᠦᠭᠡᠢ ᠵᠣᠭᠰᠣᠵᠠᠭᠠᠵᠤ ᠪᠠᠢᠪᠠ᠃
ᠨᠠᠢ᠍ᠮᠠᠨ ᠬᠣᠨᠢ᠂ ᠠᠷᠪᠠᠨ ᠬᠣᠶᠠᠷ ᠬᠤᠷᠠᠭᠠ ᠭᠡᠵᠦ ᠭᠣᠮᠪᠣ ᠲᠣᠭᠠᠯᠠᠭᠠᠳ ᠮᠠᠯᠠᠭᠠᠢ ᠪᠠᠨ ᠪᠠᠷᠠᠭᠤᠨ ᠲᠠᠢᠰᠢ ᠪᠠᠨ ᠬᠠᠵᠠᠢᠯᠭᠠᠨ ᠲᠠᠯᠪᠢᠵᠤ᠂ ᠡᠨᠡ ᠶᠡᠬᠡ ᠬᠣᠬᠢᠷᠠᠯ ᠢ᠋ᠶ᠋ᠠᠨ ᠬᠠᠷᠠᠵᠤ ᠵᠣᠭᠰᠣᠨᠠ᠃ ᠦᠷᠡᠳᠡᠨᠳᠡᠷ ᠵᠦᠯᠭᠡᠨ ᠳᠡᠭᠡᠷᠡ ᠰᠠᠭᠤᠵᠤ᠂ ᠦᠰᠦ ᠭᠡᠵᠢᠭᠡ ᠪᠡᠨ ᠵᠤᠮᠠᠭᠠᠨ ᠡᠢᠮᠦ ᠰᠠᠢᠬᠠᠨ ᠥᠷᠯᠥᠭᠡ ᠲᠡᠢ ᠵᠣᠬᠢᠴᠠᠮᠠᠷ ᠦᠭᠡᠢ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠤᠬᠢᠯᠠᠬᠤ ᠠᠵᠢ᠃ ᠮᠢᠬᠠ ᠴᠢᠰᠤᠨ ᠤ᠋ ᠦᠨᠦᠷ ᠠᠪᠤᠭᠰᠠᠨ ᠬᠣᠶᠠᠷ ᠨᠣᠬᠠᠢ ᠨᠢ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠯᠵᠠᠭᠤᠯᠤᠨ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠦᠷᠡᠳᠡᠨᠳᠡᠷ ᠬᠢᠯᠢᠩ ᠪᠠᠳᠠᠷᠠᠭᠤᠯᠤᠨ ᠴᠢᠯᠠᠭᠤ ᠰᠢᠭᠦᠷᠡᠵᠦ ᠲᠡᠳᠡᠨ ᠤᠷᠤᠭᠤ ᠴᠢᠯᠠᠭᠤᠳᠠᠭᠠᠳ᠄
— ᠶᠠᠭᠤᠨ ᠤ᠋ ᠲᠥᠯᠥᠭᠡ ᠪᠢ ᠲᠠ ᠨᠠᠷ ᠢ᠋ ᠲᠡᠵᠢᠭᠡᠵᠦ ᠪᠠᠢᠨᠠ? ᠮᠠᠭᠤ ᠰᠠᠢᠨ ᠠᠮᠢᠲᠠᠳ! ᠵᠥᠪᠬᠡᠨ ᠭᠤᠲᠤᠷᠠᠬᠤ ᠪᠣᠯᠤᠨ ᠵᠠᠯᠬᠠᠭᠤᠷᠠᠬᠤ ᠶ᠋ᠢ ᠯᠡ ᠮᠡᠳᠡᠨᠡ᠂ ᠰᠥᠨᠢ ᠲᠠ ᠨᠠᠷ ᠮᠠᠨᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠵᠠᠯᠬᠠᠭᠤᠷᠠᠨ ᠤᠨᠲᠠᠵᠤ ᠪᠠᠢᠭᠰᠠᠨ ᠪᠢᠵᠡ? ᠦᠬᠦᠭᠰᠡᠨ ᠠᠮᠢᠲᠠᠳ! ᠭᠡᠮᠡᠨ ᠬᠠᠷᠢᠶᠠᠯ ᠲᠠᠯᠪᠢᠬᠤ ᠳ᠋ᠤ᠌ ᠬᠣᠶᠠᠷ ᠨᠣᠬᠠᠢ ᠨᠢ ᠰᠡᠭᠦᠯ ᠢ᠋ᠶ᠋ᠡᠨ ᠬᠠᠪᠴᠢᠨ ᠭᠡᠷ ᠦ᠋ᠨ ᠠᠷᠤ ᠪᠠᠷ ᠣᠷᠣᠭᠠᠳ ᠶᠡᠬᠡ ᠤᠳᠠᠭᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠦᠭᠡᠢ ᠪᠢᠯᠡ᠃
ᠬᠠᠷᠠᠵᠤ ᠪᠠᠢᠭᠰᠠᠨ ᠬᠥᠮᠦᠰ ᠨᠣᠢᠷ ᠠ᠋ᠴᠠ ᠪᠠᠨ ᠰᠡᠷᠡᠭᠰᠡᠨ ᠮᠡᠲᠦ ᠪᠣᠯᠵᠤ᠂ ᠰᠥᠨᠢ ᠶ᠋ᠢᠨ ᠭᠠᠢ ᠭᠠᠮᠰᠢᠭ ᠵᠢᠴᠢ ᠨᠣᠬᠠᠳ ᠤ᠋ᠨ ᠠᠵᠢᠭ ᠠᠪᠤᠭᠰᠠᠨ ᠦᠭᠡᠢ ᠶ᠋ᠢᠨ ᠲᠤᠬᠠᠢ ᠬᠠᠯᠠᠭᠤᠨ ᠲᠠᠢ ᠶᠠᠷᠢᠯᠴᠠᠵᠤ ᠡᠬᠢᠯᠡᠪᠡ᠃
— ᠡᠨᠡᠭᠦᠷ ᠯᠡ ᠰᠢᠷᠭᠤᠵᠤ ᠣᠷᠣᠵᠠᠢ ᠭᠡᠵᠦ ᠴᠠᠭᠠᠨᠲᠠᠮᠡᠭᠡ ᠡᠪᠦᠭᠡᠨ ᠬᠠᠰᠢᠶᠠᠨ ᠳᠡᠭᠡᠷᠡ ᠡᠴᠡ ᠨᠢᠭᠡ ᠣᠷᠢᠶᠠᠮᠠᠭ ᠤᠩᠭᠠᠰᠤ ᠲᠡᠭᠦᠵᠦ ᠠᠪᠬᠤ ᠵᠠᠭᠤᠷᠠ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠵᠠᠯᠭᠠᠵᠤ᠄
— ᠰᠥᠨᠢ ᠶ᠋ᠢᠨ ᠰᠠᠯᠬᠢᠨ ᠪᠠᠷᠠᠭᠤᠨ ᠠ᠋ᠴᠠ ᠰᠠᠯᠬᠢᠯᠠᠵᠤ ᠪᠠᠢᠭᠰᠠᠨ ᠲᠤᠯᠠ ᠨᠣᠬᠠᠳ ᠭᠡᠷ ᠦ᠋ᠨ ᠡᠮᠦᠨᠡ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠪᠣᠯ ᠲᠡᠳᠡᠨ ᠢ᠋ ᠣᠯᠵᠤ ᠦᠵᠡᠵᠦ ᠳᠡᠢᠯᠬᠦ ᠦᠭᠡᠢ ᠪᠥᠭᠡᠳ ᠦᠨᠦᠷᠲᠦᠵᠦ ᠴᠦ᠍ ᠳᠡᠢᠯᠬᠦ ᠦᠭᠡᠢ ᠶᠦᠮ ᠭᠡᠮᠡᠨ ᠬᠠᠰᠢᠷ ᠰᠤᠷᠮᠠᠭᠠᠢ ᠪᠠᠷ ᠶᠠᠷᠢᠯᠠ᠃
— ᠰᠥᠨᠢ ᠶ᠋ᠢᠨ ᠰᠠᠯᠬᠢᠨ? ᠬᠠ ᠬᠠ ᠬᠠ! ᠪᠢ ᠴᠦ᠍ ᠰᠥᠨᠢ ᠶ᠋ᠢᠨ ᠰᠠᠯᠬᠢᠨ ᠢ᠋ ᠮᠡᠳᠡᠨᠡ ᠰᠢᠦ ᠳᠡ ᠭᠡᠮᠡᠨ ᠦᠷᠡᠳᠡᠨᠳᠡᠷ ᠭᠠᠰᠢᠭᠤᠳᠠᠨ ᠢᠨᠢᠶᠡᠭᠡᠳ ᠡᠨᠡ ᠭᠠᠢ ᠠ᠋ᠴᠠ ᠪᠣᠯᠵᠤ ᠮᠠᠭᠤ ᠠᠮᠢᠳᠤᠷᠠᠯ ᠡᠳ᠋ᠯᠡᠬᠦ ᠪᠣᠯᠤᠭᠰᠠᠨ ᠮᠡᠲᠦ ᠬᠣᠨᠢᠨ ᠦᠬᠦᠳᠡᠯ ᠢ᠋ᠶ᠋ᠡᠨ ᠲᠦᠯᠬᠢᠨ ᠬᠥᠳᠡᠯᠭᠡᠨᠡ᠃
ᠨᠡᠯᠢᠶᠡᠳ ᠤᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠥᠮᠦᠰ ᠪᠤᠴᠠᠵᠠᠭᠠᠪᠠ᠃ ᠡᠷᠡᠴᠦᠦᠯ ᠭᠡᠷ ᠲᠡᠭᠡᠨ ᠣᠷᠣᠵᠤ ᠦᠷᠭᠦᠯᠵᠢᠯᠡᠨ ᠤᠨᠲᠠᠵᠠᠭᠠᠵᠤ᠂ ᠪᠦᠰᠡᠭᠦᠢᠴᠦᠦᠯ ᠨᠢ ᠬᠣᠨᠢᠨ ᠤ᠋ ᠬᠠᠰᠢᠶᠠᠨ ᠳ᠋ᠠᠭᠠᠨ ᠬᠦᠷᠴᠦ ᠬᠣᠨᠢᠳ ᠢ᠋ᠶ᠋ᠠᠨ ᠪᠦᠷᠢᠳᠬᠡᠨ᠂ ᠬᠠᠰᠢᠶᠠᠨ ᠤ᠋ ᠪᠠᠨ ᠡᠪᠳᠡᠷᠡᠵᠦ ᠪᠠᠯᠪᠠᠷᠠᠭᠰᠠᠨ ᠬᠡᠰᠡᠭ ᠲᠦ᠍ ᠮᠣᠳᠣᠨ ᠰᠠᠯᠠᠭᠠ ᠰᠦᠯᠵᠢᠨ ᠪᠠᠲᠤᠳᠬᠠᠵᠤ ᠪᠠᠢᠪᠠ᠃
ᠮᠥᠨ ᠡᠳᠦᠷ ᠦ᠋ᠨ ᠦᠳᠡ ᠶ᠋ᠢᠨ ᠡᠮᠦᠨᠡ ᠨᠢ ᠷᠠᠰᠢ ᠨᠠᠳᠠ ᠳᠡᠭᠡᠷᠡ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠲᠦᠷᠦᠭᠦᠴᠢ ᠶ᠋ᠢᠨ ᠤᠳᠠᠭᠠ ᠶᠠᠪᠤᠬᠤ ᠦᠶᠡ ᠶ᠋ᠢᠨ ᠠᠭᠤᠷ ᠪᠤᠬᠢᠨᠢᠳᠤᠯ ᠨᠢ ᠴᠢᠷᠠ᠊ᠢ ᠠ᠋ᠴᠠ ᠨᠢ ᠨᠢᠭᠡᠨᠲᠡ ᠠᠷᠴᠢᠭᠳᠠᠨ᠂ ᠮᠥᠨ ᠯᠡ ᠪᠠᠶᠠᠷ ᠬᠥᠭᠵᠢᠯᠲᠡᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠪᠢ ᠲᠡᠭᠦᠨ ᠳ᠋ᠦ᠍ ᠴᠢᠨᠣᠠ ᠶ᠋ᠢᠨ ᠭᠠᠢ ᠭᠠᠮᠰᠢᠭ ᠤ᠋ᠨ ᠲᠤᠬᠠᠢ ᠶᠠᠷᠢᠵᠤ ᠥᠭᠪᠡ᠃
— ᠡᠢᠮᠦ ᠰᠠᠢᠨ ᠪᠡᠬᠢᠯᠡᠭᠰᠡᠨ ᠬᠣᠲᠠᠨ ᠳ᠋ᠤ᠌ ᠴᠢᠮᠡᠭᠡ ᠠᠨᠢᠷ ᠭᠠᠷᠭᠠᠯ ᠦᠭᠡᠢ ᠣᠷᠣᠵᠤ ᠢᠷᠡᠵᠦ ᠪᠠᠢᠭᠠ ᠨᠢ ᠰᠠᠢᠨ ᠤᠴᠢᠷ ᠪᠢᠰᠢ ᠳᠡ ᠭᠡᠵᠦ ᠷᠠᠰᠢ ᠶᠠᠷᠢᠭᠠᠳ ᠭᠣᠮᠪᠣ ᠶ᠋ᠢᠨ ᠳ᠋ᠦ᠍ ᠬᠦᠷᠴᠦ ᠶᠡᠬᠡ ᠤᠳᠠᠭᠠᠨ ᠶᠠᠷᠢᠯᠳᠤᠪᠠ᠃
ᠲᠡᠷᠡ ᠪᠤᠴᠠᠵᠤ ᠢᠷᠡᠭᠰᠡᠨ ᠦ᠌ ᠪᠡᠨ ᠳᠠᠷᠠᠭᠠ ᠨᠠᠳᠠ ᠠ᠋ᠴᠠ ᠶᠡᠬᠡ ᠨᠢᠭᠤᠴᠠᠭᠠᠢ ᠪᠠᠷ᠄
— ᠦᠷᠡᠳᠡᠨᠳᠡᠷ ᠶᠠᠭᠤ ᠭᠡᠵᠦ ᠶᠠᠷᠢᠵᠤ ᠪᠠᠢᠭᠠ ᠶ᠋ᠢ ᠴᠢ ᠰᠣᠨᠣᠰᠤᠭᠰᠠᠨ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃ ᠪᠢ ᠲᠡᠭᠦᠨ ᠢ᠋ ᠰᠢᠷᠲᠡᠨ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠯᠠᠬᠤ ᠳ᠋ᠤ᠌ ᠲᠡᠷᠡ᠄
— ᠲᠡᠭᠦᠨ ᠦ᠌ ᠶᠠᠷᠢᠬᠤ ᠪᠠᠷ ᠷᠦᠭᠵᠢᠳᠮᠡ ᠶ᠋ᠢᠨ ᠰᠦᠨᠡᠰᠦ ᠢᠷᠡᠵᠦ ᠳᠦᠢᠪᠡᠭᠡᠵᠦ ᠪᠠᠢᠭᠠ ᠭᠡᠨᠡ᠃ ᠡᠨᠡ ᠬᠣᠶᠠᠷ ᠪᠦᠰᠡᠭᠦᠢ ᠬᠣᠭᠣᠷᠣᠨᠳᠣ ᠪᠠᠨ ᠲᠠᠩᠳᠠ ᠬᠡᠷᠡᠭᠦᠯ ᠬᠢᠳᠡᠭ᠃ ᠶᠠᠨᠰᠠᠨ ᠤ᠋ ᠡᠵᠡᠭᠦᠢ ᠳ᠋ᠦ᠍ ᠦᠷᠡᠳᠡᠨᠳᠡᠷ ᠬᠣᠨᠢᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠤ᠋ ᠬᠣᠢᠨᠠ ᠭᠣᠮᠪᠣ ᠵᠥᠩᠳᠡᠭᠡᠨ ᠷᠦᠭᠵᠢᠳᠮᠡ ᠶ᠋ᠢᠨ ᠳ᠋ᠦ᠍ ᠪᠠᠢᠵᠤ ᠪᠠᠢᠳᠠᠭ᠃ ᠪᠠᠷᠤᠭ ᠯᠠ ᠡᠨᠡ ᠤᠴᠢᠷ ᠠ᠋ᠴᠠ ᠪᠣᠯᠵᠤ ᠡᠳᠡ ᠬᠣᠶᠠᠷ ᠮᠠᠭᠤᠳᠠᠯᠴᠠᠭᠰᠠᠨ ᠪᠠᠢᠬᠠ᠂ ᠨᠢᠭᠡ ᠡᠳᠦᠷ ᠦᠷᠡᠳᠡᠨᠳᠡᠷ ᠬᠣᠨᠢᠨ ᠠ᠋ᠴᠠ ᠪᠠᠨ ᠡᠷᠲᠡ ᠰᠢᠭ ᠬᠠᠷᠢᠵᠤ ᠢᠷᠡᠭᠡᠳ ᠭᠣᠮᠪᠣ ᠶ᠋ᠢ ᠲᠡᠭᠦᠨ ᠦ᠌ ᠨᠢᠭᠤᠴᠠ ᠠᠮᠠᠷᠠᠭ ᠤ᠋ᠨ ᠬᠢ ᠡᠴᠡ ᠨᠢ ᠬᠠᠷᠢᠶᠠᠨ ᠪᠠᠢᠵᠤ ᠠᠪᠴᠤ ᠬᠠᠷᠢᠭᠰᠠᠨ ᠶᠤᠮ᠃ ᠪᠢ ᠴᠢᠮᠠ ᠳ᠋ᠤ᠌ ᠷᠦᠭᠵᠢᠳᠮᠡ ᠪᠣᠯ ᠶᠠᠯᠠ ᠬᠢᠯᠢᠨᠴᠡ ᠲᠡᠢ ᠪᠦᠰᠡᠭᠦᠢ ᠮᠥᠨ ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠪᠢᠵᠡ ᠳᠡ? ᠭᠡᠯᠡ᠃
— ᠨᠥᠭᠦᠭᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠶᠠᠪᠤᠭᠰᠠᠨ ᠬᠥᠮᠦᠨ ᠢ᠋ ᠪᠢᠳᠡ ᠠᠮᠤᠷ ᠪᠠᠢᠯᠭᠠᠵᠤ ᠪᠣᠯᠬᠤ ᠦᠭᠡᠢ ᠤᠤ? ᠭᠡᠵᠦ ᠨᠠᠮᠠᠶ᠋ᠢ ᠶᠠᠷᠢᠬᠤ ᠳ᠋ᠤ᠌ ᠷᠠᠰᠢ᠄
— ᠲᠡᠭᠦᠨ ᠦ᠌ ᠪᠡᠶᠡ ᠨᠢ ᠦᠬᠦᠭᠰᠡᠨ ᠡᠴᠡ ᠪᠢᠰᠢ ᠰᠦᠨᠡᠰᠦ ᠨᠢ ᠠᠳᠠ ᠡᠷᠭᠢᠴᠡᠵᠦ ᠪᠠᠢᠭᠠ᠃ ᠦᠷᠡᠳᠡᠨᠳᠡᠷ ᠬᠡᠯᠡᠵᠦ ᠪᠠᠢᠭᠠ ᠨᠢ ᠦᠨᠡᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ᠃ ᠬᠡᠷᠪᠡ ᠷᠦᠭᠵᠢᠳᠮᠡ ᠨᠣᠬᠠᠳ ᠢ᠋ ᠨᠣᠮᠣᠬᠠᠷᠠᠭᠤᠯᠤᠭᠰᠠᠨ ᠦᠭᠡᠢ ᠶᠦ᠍ᠮ ᠪᠣᠯ ᠶᠠᠭᠠᠬᠢᠭᠠᠳ ᠲᠡᠳᠡᠨ ᠦ᠌ ᠬᠣᠲᠠᠨ ᠳ᠋ᠤ᠌ ᠴᠢᠨᠣᠠ ᠣᠷᠣᠵᠤ᠂ ᠬᠣᠷᠢᠨ ᠬᠣᠨᠢᠨ ᠤ᠋ ᠬᠢᠨᠢ ᠪᠠᠭᠠᠯᠵᠠᠭᠤᠷ ᠢ᠋ ᠲᠠᠰᠤᠯᠴᠢᠬᠠᠳᠠᠭ ᠪᠢᠯᠡ ? ᠦᠷᠡᠳᠡᠨᠳᠡᠷ ᠬᠥᠷᠰᠢ ᠠᠢᠯ ᠠ᠋ᠴᠠ ᠢᠷᠡᠵᠦ ᠪᠠᠢᠭᠠ ᠰᠦᠷᠳᠡᠭᠦᠯᠦᠯ ᠢ᠋ ᠣᠳᠣ ᠪᠣᠯᠲᠠᠯᠠ ᠮᠠᠷᠲᠠᠭᠠ ᠦᠭᠡᠢ ᠪᠠᠢᠭᠰᠠᠭᠠᠷ ᠭᠡᠯᠡ᠃
ᠷᠠᠰᠢ ᠰᠥᠨᠢ ᠶ᠋ᠢᠨ ᠭᠠᠢ ᠭᠠᠮᠰᠢᠭ ᠤ᠋ᠨ ᠲᠤᠬᠠᠢ ᠶᠡᠬᠡ ᠤᠳᠠᠭᠠᠨ ᠶᠠᠷᠢᠭᠰᠠᠨ ᠪᠥᠭᠡᠳ ᠡᠴᠦᠰ ᠲᠦ᠋ᠨᠢ ᠪᠦᠬᠦ ᠬᠠᠷᠢᠭᠤᠴᠠᠯᠭᠠ ᠶ᠋ᠢ ᠷᠦᠭᠵᠢᠳᠮᠡ ᠳ᠋ᠦ᠍ ᠨᠥᠮᠥᠷᠭᠡᠨ ᠥᠭᠭᠦᠭᠡᠳ ᠰᠠᠨᠠᠭᠠ ᠨᠢ ᠠᠮᠠᠷᠠᠪᠠ᠃ ᠲᠡᠭᠡᠭᠡᠳ ᠴᠠᠭᠠᠰᠢ ᠨᠢ ᠪᠠᠰᠠ ᠬᠣᠯᠪᠣᠨ ᠰᠡᠳᠬᠢᠵᠦ᠂ ᠡᠨᠡ ᠠᠵᠢᠯᠯᠠᠭᠠ ᠶ᠋ᠢᠨ ᠶᠠᠪᠤᠭᠳᠠᠭᠰᠠᠨ ᠶᠠᠪᠤᠴᠠ ᠶ᠋ᠢ ᠬᠦᠷᠲᠡᠯᠡ ᠲᠠᠭᠠᠮᠠᠭᠯᠠᠨ ᠭᠠᠷᠭᠠᠵᠤ᠄
— ᠦᠷᠡᠳᠡᠨᠳᠡᠷ ᠦ᠋ᠨ ᠵᠣᠪᠠᠨ ᠭᠠᠰᠠᠯᠬᠤ ᠳᠠᠭᠤᠨ ᠢ᠋ ᠰᠣᠨᠣᠰᠬᠤ ᠭᠡᠵᠦ ᠲᠡᠭᠦᠨ ᠦ᠌ ᠰᠦᠨᠡᠰᠦ ᠥᠷᠯᠥᠭᠡ ᠨᠠᠷᠠ ᠭᠠᠷᠬᠤ ᠠ᠋ᠴᠠ ᠡᠮᠦᠨᠡᠬᠡᠨ ᠪᠣᠯᠲᠠᠯᠠ ᠲᠡᠨᠳᠡ ᠡᠷᠭᠢᠴᠡᠵᠦ ᠪᠠᠢᠭᠰᠠᠨ ᠨᠢ ᠯᠠᠪᠲᠠᠢ ᠭᠡᠯᠡ᠃
— ᠣᠳᠣ ᠲᠡᠭᠡᠭᠡᠳ ᠶᠠᠭᠠᠬᠢᠨᠠ ?
— ᠪᠢᠳᠡ ᠵᠠᠪᠠᠯ ᠴᠢᠨᠣᠠ ᠠᠩᠨᠠᠬᠤ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃ ᠠᠢᠯ ᠤ᠋ᠨ ᠬᠥᠮᠦᠰ ᠨᠢᠭᠡᠨᠲᠡ ᠵᠡᠪᠰᠡᠭᠯᠡᠵᠡᠭᠡᠵᠦ᠂ ᠵᠠᠷᠢᠮ ᠨᠢ ᠥᠨᠥᠳᠥᠷ ᠤᠨᠠᠭᠤᠯᠢ ᠮᠠᠯᠲᠠᠵᠤ ᠪᠠᠢᠭᠠ᠃
— ᠴᠢ ᠴᠦ᠍ ᠲᠡᠳᠡᠨ ᠲᠡᠢ ᠴᠣᠭ ᠬᠦᠷᠬᠦ ᠤᠤ ?
— ᠳᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ! ᠴᠢᠨᠣᠠ ᠠᠩᠨᠠᠬᠤ ᠳ᠋ᠤ᠌ ᠮᠣᠩᠭᠣᠯᠴᠤᠳ ᠴᠥᠮ ᠣᠷᠣᠯᠴᠠᠳᠠᠭ ᠶᠤᠮ᠃
— ᠲᠡᠭᠡᠭᠡᠳ ᠪᠢ ?
— ᠴᠢ ᠦᠵᠡᠵᠦ ᠪᠣᠯᠤᠨᠠ ᠠ᠋ ! ᠭᠡᠬᠦ ᠳ᠋ᠦ᠍ ᠴᠢᠨᠦ ᠲᠡᠷᠡ ᠬᠠᠷᠮᠠᠨ ᠫᠤᠤ ᠪᠠᠷ ᠨᠢᠭᠡ ᠶᠡᠬᠡ ᠣᠨᠣᠭᠠᠬᠤ ᠦᠭᠡᠢ ᠪᠠᠢᠭᠠ ᠳᠠ ᠭᠡᠯᠡ᠃ ᠮᠢᠨᠦ ᠡᠷᠬᠢᠪᠴᠢᠲᠦ ᠭᠠᠷ ᠫᠤᠤ ᠶ᠋ᠢ ᠲᠡᠷᠡ ᠬᠡᠵᠢᠶᠡᠳᠡ ᠢᠩᠭᠢᠵᠦ ᠨᠡᠷᠡᠯᠡᠳᠡᠭ᠃ ᠠᠩ ᠤ᠋ᠨ ᠪᠡᠯᠡᠳᠬᠡᠯ ᠦᠳᠡ ᠶ᠋ᠢᠨ ᠬᠣᠢᠨᠠ ᠪᠣᠯᠲᠠᠯᠠ ᠦᠷᠭᠦᠯᠵᠢᠯᠡᠵᠦ᠂ ᠭᠣᠮᠪᠣ᠂ ᠳᠠᠮᠴᠣᠭ᠂ ᠴᠠᠭᠠᠨᠲᠡᠮᠡᠭᠡ᠂ ᠨᠠᠢᠳᠠᠨ ᠨᠠᠷ ᠥᠪᠡᠷ ᠥᠪᠡᠷ ᠦ᠋ᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠪᠳᠠᠷᠠ ᠠ᠋ᠴᠠ ᠪᠠᠨ ᠭᠠᠷᠭᠠᠨ᠂ ᠰᠠᠢᠲᠤᠷ ᠳᠤᠰᠤᠯᠠᠵᠤ ᠲᠠᠯᠪᠢᠪᠠ᠃ ᠴᠠᠭᠠᠨᠲᠠᠮᠡᠭᠡ ᠨᠠᠳᠠ ᠳ᠋ᠤ᠌ ᠡᠪᠦᠭᠡ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠭᠠᠪᠠᠭᠠᠢ ᠤᠨᠠᠭᠠᠵᠤ ᠪᠠᠢᠭᠰᠠᠨ ᠱᠠᠩᠰᠢ ᠫᠤᠤ ᠪᠠᠨ ᠦᠵᠡᠭᠦᠯᠵᠦ᠄
— ᠰᠤᠮᠤ ᠪᠣᠯᠭᠠᠨ ᠨᠢ ᠣᠨᠣᠭᠠᠳᠠᠭ ᠰᠢᠦ ᠭᠡᠵᠦ ᠪᠠᠷᠳᠠᠮᠨᠠᠨ ᠬᠡᠯᠡᠯᠡ᠃
— ᠲᠡᠢᠮᠦ ᠳᠡ᠂ ᠬᠠᠶᠠ ᠪᠠᠰᠠ ᠭᠠᠵᠠᠷ ᠣᠨᠣᠭᠠᠳᠠᠭ ᠰᠢᠦ ᠭᠡᠵᠦ ᠪᠢ ᠢᠨᠢᠶᠡᠨ ᠬᠡᠯᠡᠪᠡ᠃
ᠴᠠᠭᠠᠨᠲᠡᠮᠡᠭᠡ ᠫᠤᠤ ᠪᠠᠨ ᠪᠠᠭᠤᠯᠭᠠᠬᠤ ᠶ᠋ᠢᠨ ᠵᠡᠷᠭᠡ ᠣᠢᠷᠠ ᠪᠠᠢᠭᠠ ᠬᠥᠮᠦᠰ ᠢ᠋ ᠬᠡᠯᠡᠭᠰᠡᠨ ᠦᠭᠡ ᠨᠢ ᠵᠥᠪ ᠪᠣᠯᠬᠤ ᠶ᠋ᠢ ᠭᠡᠷᠡᠴᠢᠯᠡᠭᠦᠯᠬᠦ ᠭᠡᠮᠡᠨ ᠳᠠᠭᠤᠳᠠᠪᠠ᠃ ᠭᠡᠬᠦ ᠳ᠋ᠦ᠍ ᠲᠡᠳᠡᠭᠡᠷ ᠬᠥᠮᠦᠰ ᠥᠪᠡᠷ ᠦ᠋ᠨ ᠵᠡᠪᠰᠡᠭ ᠲᠡᠢ ᠪᠡᠨ ᠤᠷᠤᠯᠳᠤᠨ ᠲᠡᠭᠦᠨ ᠦ᠌ ᠪᠠᠷᠳᠠᠮᠨᠠᠨ ᠶᠠᠷᠢᠬᠤ ᠶ᠋ᠢ ᠥᠴᠦᠬᠡᠨ ᠴᠦ᠍ ᠦᠯᠦ ᠠᠩᠵᠠᠭᠠᠷᠠᠬᠤ ᠠᠵᠢ᠃ ᠲᠡᠳᠡ ᠳᠠᠷᠢ ᠰᠤᠮᠤ ᠰᠠᠪᠠᠯᠠᠭᠰᠠᠨ ᠫᠤᠤ ᠪᠠᠨ ᠰᠢᠯᠭᠠᠨ ᠦᠵᠡᠵᠡᠭᠡᠵᠦ ᠪᠠᠢᠪᠠ᠃
ᠳᠠᠷᠢ ᠰᠤᠮᠤ ᠶ᠋ᠢ ᠲᠡᠳᠡ ᠬᠢᠲᠠᠳ ᠠ᠋ᠴᠠ ᠬᠤᠳᠠᠯᠳᠤᠨ ᠠᠪᠳᠠᠭ ᠪᠥᠭᠡᠳ ᠮᠣᠩᠭᠣᠯᠴᠤᠳ ᠬᠥᠮᠦᠨ ᠪᠣᠯᠭᠠᠨ ᠵᠠᠯᠠᠭᠤ ᠨᠠᠰᠤᠨ ᠠ᠋ᠴᠠ ᠪᠠᠨ ᠳᠠᠷᠢ ᠰᠤᠮᠤ ᠪᠠᠨ ᠰᠠᠪᠠᠯᠠᠵᠤ ᠴᠢᠳᠠᠳᠠᠭ ᠶᠤᠮ᠃ ᠭᠠᠤᠯᠢᠨ ᠰᠤᠮᠤᠨ ᠤ᠋ ᠬᠣᠩᠬᠢᠶᠠ ᠶ᠋ᠢ ᠲᠠᠯᠠ ᠨᠤᠲᠤᠭ ᠲᠤ᠌ ᠦᠢᠯᠡᠳᠪᠦᠷᠢᠯᠡᠵᠦ ᠳᠡᠢᠯᠳᠡᠭ ᠦᠭᠡᠢ ᠲᠤᠯᠠ ᠲᠡᠳᠡ ᠡᠭᠦᠨ ᠢ᠋ᠶ᠋ᠡᠨ ᠶᠡᠬᠡᠳᠡ ᠡᠷᠬᠢᠮᠯᠡᠨ ᠬᠣᠷᠢᠶᠠᠨ ᠲᠠᠯᠪᠢᠬᠤ ᠠᠵᠢ᠃
ᠭᠣᠮᠪᠣ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠨᠢᠭᠡ ᠬᠢᠲᠠᠳ ᠴᠡᠷᠢᠭ ᠡᠴᠡ ᠣᠯᠠᠨ ᠰᠤᠮᠤ ᠬᠤᠳᠠᠯᠳᠤᠨ ᠠᠪᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠠᠮᠰᠠᠯᠲᠠᠢ ᠨᠢ ᠲᠡᠭᠦᠨ ᠦ᠌ ᠫᠤᠤ ᠳ᠋ᠤ᠌ ᠲᠡᠳᠡᠭᠡᠷ ᠰᠤᠮᠤ ᠨᠢ ᠲᠠᠭᠠᠷᠠᠬᠤ ᠦᠭᠡᠢ ᠪᠠᠢᠪᠠ᠃ ᠶᠡᠬᠡ ᠤᠳᠠᠭᠠᠨ ᠶᠠᠷᠢᠯᠴᠠᠭᠠᠨ ᠢ᠋ᠶ᠋ᠠᠷ ᠳᠠᠮᠵᠢᠨ ᠲᠡᠭᠦᠨ ᠢ᠋ ᠨᠠᠢᠳᠠᠨ ᠳ᠋ᠤ᠌ ᠬᠡᠷᠡᠭᠯᠡᠭᠦᠯᠬᠦ ᠪᠡᠷ ᠪᠣᠯᠪᠠ᠃
— ᠬᠡᠷᠪᠡ ᠴᠢ ᠴᠢᠨᠣᠠ ᠤᠨᠠᠭᠠᠬᠤ ᠳ᠋ᠤ᠌ ᠬᠦᠷᠪᠡᠯ ᠠᠷᠠᠰᠤ ᠨᠢ ᠮᠢᠨᠦᠬᠢ ᠪᠣᠯᠬᠤ ᠪᠥᠭᠡᠳ ᠰᠤᠮᠤᠨ ᠬᠣᠩᠬᠢᠶᠠ ᠶ᠋ᠢ ᠴᠦ᠍ ᠨᠠᠳᠠ ᠪᠤᠴᠠᠭᠠᠵᠤ ᠥᠭᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠭᠣᠮᠪᠣ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠨᠠᠢᠳᠠᠨ᠄
— ᠬᠡᠷᠪᠡ ᠪᠢ ᠨᠢᠭᠡ ᠴᠢᠨᠣᠠ ᠠᠯᠠᠪᠠᠯ ᠨᠠᠳᠠ ᠳ᠋ᠤ᠌ ᠳᠥᠷᠪᠡᠨ ᠰᠤᠮᠤ ᠥᠭᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠭᠣᠮᠪᠣ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠠᠢᠵᠤ᠂ ᠶᠠᠷᠢᠯᠴᠠᠭᠠᠨ ᠤ᠋ ᠡᠴᠦᠰ ᠲᠦ᠍ ᠬᠣᠶᠠᠷ ᠰᠤᠮᠤ ᠥᠭᠬᠦ ᠪᠡᠷ ᠪᠣᠯᠤᠭᠠᠳ ᠬᠣᠶᠠᠷ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠰᠡᠳᠬᠢᠯ ᠬᠠᠨᠤᠮᠵᠢᠲᠠᠢ ᠨᠢ ᠢᠯᠡᠬᠡᠨ ᠪᠠᠢᠯᠠ᠃
ᠡᠨᠡ ᠬᠣᠭᠣᠷᠣᠨᠳᠣ ᠷᠠᠰᠢ ᠭᠡᠷ ᠲᠡᠭᠡᠨ ᠪᠤᠴᠠᠵᠤ ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠪᠴᠢᠷᠠᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢ᠋ ᠢᠷᠡᠮᠡᠭᠴᠡ ᠪᠢᠳᠡ ᠬᠥᠳᠡᠯᠪᠡ᠃ ᠭᠣᠮᠪᠣ ᠶ᠋ᠢᠨ ᠬᠦᠦ ᠵᠢᠩᠷᠤᠪ ᠪᠠ ᠬᠣᠶᠠᠷ ᠵᠠᠯᠠᠭᠤ ᠶ᠋ᠢ ᠮᠣᠷᠢᠳ ᠢ᠋ᠶ᠋ᠠᠨ ᠬᠠᠷᠠᠭᠤᠯᠤᠨᠠ ᠭᠡᠮᠡᠨ ᠳᠠᠭᠠᠭᠤᠯᠵᠤ ᠶᠠᠪᠤᠪᠠ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠡᠮᠦᠨᠡ ᠮᠢᠨᠦ ᠣᠯᠵᠤ ᠬᠠᠷᠠᠭᠰᠠᠨ ᠲᠣᠮᠣ ᠨᠦᠬᠡ ᠲᠡᠢ ᠡᠭᠴᠡ ᠬᠥᠲᠥᠯ ᠢ᠋ ᠪᠢᠳᠡ ᠬᠠᠭᠠᠰ ᠲᠣᠭᠣᠷᠢᠭ ᠬᠡᠯᠪᠡᠷᠢ ᠲᠡᠢ ᠪᠡᠷ ᠪᠦᠰᠡᠯᠡᠨ ᠣᠢᠷᠠᠳᠪᠠ᠃ ᠨᠦᠬᠡᠨ ᠡᠴᠡ ᠬᠣᠶᠠᠷ ᠲᠠᠢᠰᠢ ᠪᠠᠨ ᠲᠠᠯᠠ ᠤᠷᠤᠭᠤ ᠡᠪᠡᠰᠦ ᠶ᠋ᠢ ᠨᠠᠯᠠᠭᠰᠠᠨ ᠠᠮᠢᠲᠠᠨ ᠤ᠋ ᠭᠦᠶᠦᠳᠡᠯ ᠦ᠋ᠨ ᠴᠤᠪᠤᠭᠠ ᠢᠯᠡᠬᠡᠨ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃ ᠡᠳᠦᠷ ᠢ᠋ᠶ᠋ᠡᠷ ᠡᠳᠡᠭᠡᠷ ᠠᠮᠢᠲᠠᠳ ᠤ᠋ᠨ ᠰᠢᠷᠭᠤᠨ ᠬᠡᠪᠲᠡᠬᠦ ᠪᠣᠯᠤᠮᠵᠢ ᠪᠦᠬᠦᠢ ᠣᠢᠷᠠ ᠣᠷᠴᠢᠮ ᠤ᠋ᠨ ᠭᠣᠣ ᠵᠢᠯᠠᠭᠠ᠂ ᠪᠤᠲᠠ ᠤᠷᠭᠤᠮᠠᠯ ᠢ᠋ ᠨᠠᠷᠢᠨ ᠪᠠᠢᠴᠠᠭᠠᠵᠤ ᠦᠵᠡᠪᠡ᠃
ᠪᠦᠬᠦ ᠠᠵᠢᠯ ᠴᠥᠮ ᠦᠷᠡ ᠪᠦᠲᠦᠮᠵᠢ ᠦᠭᠡᠢ ᠪᠠᠢᠵᠤ᠂ ᠴᠢᠨᠣᠠ ᠶ᠋ᠢᠨ ᠮᠥᠷ ᠰᠤᠷᠠᠭ ᠢ᠋ ᠭᠠᠷᠭᠠᠵᠤ ᠴᠢᠳᠠᠭᠠ ᠦᠭᠡᠢ᠃ ᠷᠠᠰᠢ ᠨᠦᠬᠡᠨ ᠦ᠌ ᠠᠮᠠᠰᠠᠷ ᠲᠤ᠌ ᠭᠠᠯ ᠨᠣᠴᠣᠭᠠᠨ ᠳᠣᠲᠣᠷᠠ ᠨᠢ ᠪᠠᠢᠭᠠ ᠴᠢᠨᠣᠠ ᠶ᠋ᠢ ᠤᠲᠤᠵᠤ ᠭᠠᠷᠭᠠᠬᠤ ᠰᠠᠨᠠᠭᠤᠯᠭᠠ ᠭᠠᠷᠭᠠᠭᠰᠠᠨ ᠪᠣᠯᠪᠠᠴᠤ ᠳᠣᠣᠷᠠ ᠪᠠᠨ ᠬᠡᠷᠡᠭᠵᠢᠭᠦᠯᠦᠭᠰᠡᠨ ᠦᠭᠡᠢ᠃ ᠡᠨᠡ ᠲᠤᠬᠠᠢ ᠶᠡᠬᠡ ᠤᠳᠠᠭᠠᠨ ᠵᠥᠪᠳᠡᠯᠴᠡᠪᠡ᠃ ᠭᠡᠨᠡᠳᠲᠡ ᠨᠠᠢᠳᠠᠨ ᠳᠣᠷᠣᠭᠰᠢ ᠪᠠᠨ ᠨᠠᠪᠲᠠᠢᠨ ᠬᠡᠪᠲᠡᠪᠡ᠃
— ᠲᠡᠨᠳᠡ ᠡᠴᠡ ᠢᠷᠡᠵᠦ ᠶᠠᠪᠤᠭᠠ ! ᠭᠡᠵᠦ ᠬᠤᠷᠳᠤᠬᠠᠨ ᠬᠡᠯᠡᠭᠡᠳ ᠲᠠᠯᠠ ᠶ᠋ᠢᠨ ᠲᠡᠷᠲᠡᠭᠡᠬᠢ ᠤᠷᠤᠭᠤ ᠳᠣᠬᠢᠪᠠ᠃ ᠬᠣᠯᠠ ᠠ᠋ᠴᠠ ᠠᠭᠠᠵᠢᠮᠬᠠᠨ ᠲᠠᠪᠠᠲᠠᠢᠬᠠᠨ ᠨᠠᠭᠠᠰᠢᠯᠠᠵᠤ ᠶᠠᠪᠤᠭᠠ ᠬᠠᠷᠠ ᠴᠠᠭ - ᠴᠢᠨᠣᠠ ᠶ᠋ᠢ ᠲᠡᠭᠦᠨ ᠦ᠌ ᠭᠢᠷᠠᠬᠠᠢ ᠨᠢᠳᠦ ᠣᠯᠵᠤ ᠬᠠᠷᠠᠭᠰᠠᠨ ᠠᠵᠢ᠃
— ᠰᠠᠯᠬᠢᠨ ᠤ᠋ ᠴᠢᠭᠯᠡᠯ ᠴᠦ᠍ ᠪᠢᠳᠡᠨ ᠳ᠋ᠦ᠍ ᠠᠰᠢᠭᠲᠠᠢ ᠪᠠᠢᠨᠠ ᠭᠡᠵᠦ ᠷᠠᠰᠢ ᠶᠠᠷᠢᠭᠠᠳ᠂ ᠮᠠᠨ ᠤ᠋ ᠬᠠᠨᠢᠲᠠᠳ ᠥᠭᠡᠷᠡ ᠢᠯᠡᠭᠦᠦ ᠳᠤᠲᠠᠭᠤ ᠦᠭᠡ ᠳᠤᠤᠭᠠᠷᠤᠯ ᠦᠭᠡᠢ ᠪᠡᠷ ᠮᠥᠨ ᠠᠷᠢᠶᠠᠲᠠᠨ ᠮᠡᠲᠦ ᠭᠠᠪᠰᠢᠭᠠᠢ ᠰᠤᠷᠮᠠᠭᠠᠢ ᠪᠠᠷ ᠤᠰᠤ ᠨᠢ ᠬᠠᠲᠠᠭᠰᠠᠨ ᠭᠣᠣ ᠪᠠᠷ ᠪᠣᠭᠣᠨᠢᠬᠠᠨ ᠡᠪᠡᠰᠦᠨ ᠦ᠌ ᠳᠤᠮᠳᠠᠭᠤᠷ ᠬᠥᠲᠥᠯ ᠥᠭᠡᠳᠡ ᠮᠥᠯᠬᠥᠨ ᠣᠴᠢᠪᠠ᠃ ᠡᠳᠦᠷ ᠲᠤᠵᠢ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠨᠠᠷᠠᠨ ᠳ᠋ᠤ᠌ ᠡᠭᠡᠪᠦᠷᠯᠡᠵᠦ ᠵᠠᠯᠬᠠᠭᠤᠷᠠᠨ ᠰᠠᠭᠤᠳᠠᠭ ᠭᠣᠮᠪᠣ ᠶ᠋ᠢ ᠴᠦ᠍ ᠲᠡᠭᠦᠨ ᠦ᠌ ᠠᠩᠴᠢᠨ ᠤ᠋ ᠴᠢᠰᠤ ᠨᠢ ᠦᠢᠯᠡᠳᠦᠯ ᠦᠵᠡᠬᠦᠯᠦᠭᠡ ᠪᠣᠯᠤᠯᠲᠠᠢ᠂ ᠱᠠᠯᠠᠮᠠᠭᠠᠢ ᠨᠢ ᠠᠷᠭᠠ ᠦᠭᠡᠢ ᠪᠣᠯᠵᠤ ᠬᠤᠪᠢᠷᠠᠪᠠ᠃ ᠲᠡᠳᠡ ᠪᠦᠭᠦᠳᠡᠭᠡᠷ ᠬᠥᠲᠥᠯ ᠥᠭᠡᠳᠡ ᠰᠤᠷᠮᠠᠭᠠᠢ ᠳᠠᠪᠠᠨ ᠭᠠᠷᠬᠤ ᠳ᠋ᠤ᠌ ᠪᠢ ᠲᠡᠳᠡᠨ ᠢ᠋ ᠳᠠᠭᠠᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ᠃ ᠠᠮᠢᠰᠬᠤᠭᠠᠳᠠᠭᠰᠠᠭᠠᠷ ᠲᠣᠮᠣ ᠪᠤᠲᠠᠨ ᠤ᠋ ᠠᠷᠤ ᠳ᠋ᠤ᠌ ᠬᠡᠪᠲᠡᠭᠡᠳ ᠬᠠᠷᠠᠬᠤ ᠳ᠋ᠤ᠌ ᠮᠣᠩᠭᠣᠯᠴᠤᠳ ᠪᠦᠷ ᠠᠯᠠᠭᠠ ᠪᠣᠯᠪᠠ᠃
ᠲᠠᠯᠠ ᠨᠤᠲᠤᠭ ᠤ᠋ᠨ ᠨᠠᠮᠵᠢᠭᠤᠬᠠᠨ ᠪᠥᠭᠡᠳ ᠰᠦᠷᠯᠢᠭ ᠠᠭᠤᠷ ᠠᠮᠢᠰᠬᠤᠯ ᠤ᠋ᠨ ᠳᠤᠮᠳᠠᠭᠤᠷ ᠡᠨᠳᠡᠬᠢ ᠠᠮᠢᠲᠠᠨ ᠤ᠋ ᠸᠠᠩ ᠨᠢ ᠪᠣᠯᠬᠤ ᠴᠢᠨᠣᠠ ᠡᠭᠦᠷ ᠤᠷᠤᠭᠤ ᠪᠠᠨ ᠣᠢᠷᠠᠲᠤᠭᠰᠠᠭᠠᠷ ᠪᠠᠢᠪᠠ᠃ ᠭᠡᠨᠡᠳᠲᠡ ᠲᠡᠷᠡ ᠣᠷᠣᠨ ᠳ᠋ᠠᠭᠠᠨ ᠵᠣᠭᠰᠣᠭᠠᠳ ᠬᠣᠩᠰᠢᠶᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠪᠡᠨ ᠡᠷᠭᠦᠨ ᠠᠶᠤᠯ ᠪᠠᠢᠬᠤ ᠡᠰᠡᠬᠦ ᠶ᠋ᠢ ᠦᠨᠦᠷᠲᠦᠨ ᠦᠵᠡᠭᠡᠳ ᠲᠡᠷᠲᠡᠭᠡ ᠲᠠᠯᠠ ᠳ᠋ᠤ᠌ ᠪᠡᠯᠴᠢᠵᠦ ᠪᠠᠢᠭᠠ ᠠᠳᠤᠭᠤᠨ ᠰᠦᠷᠦᠭ ᠵᠦᠭ ᠡᠷᠭᠢᠵᠦ ᠬᠠᠷᠠᠪᠠ᠃ ᠪᠠᠢᠳᠠᠯ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠲᠠᠢᠰᠢ ᠪᠠᠨ ᠶᠠᠪᠤᠮᠠᠷ ᠪᠠᠢᠬᠤ ᠠᠵᠢ᠃ ᠲᠡᠷᠡ ᠵᠦᠭ ᠲᠦ᠍ ᠴᠢᠭᠯᠡᠨ ᠬᠡᠳᠦ ᠠᠯᠬᠤᠯᠠᠭᠰᠠᠨ ᠢ᠋ᠶ᠋ᠠᠨ ᠳᠣᠣᠷᠠ ᠪᠠᠨ ᠡᠷᠭᠢᠵᠦ ᠡᠭᠦᠷ ᠦ᠋ᠨ ᠪᠠᠢᠭᠠ ᠬᠥᠲᠥᠯ ᠤᠷᠤᠭᠤ ᠬᠥᠩᠭᠡᠬᠡᠨ ᠱᠣᠭᠰᠢᠵᠤ ᠡᠬᠢᠯᠡᠪᠡ᠃
ᠪᠢ ᠬᠠᠨᠢᠲᠠᠳ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠢᠭᠠ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠪᠥᠭᠡᠳ ᠨᠠᠭᠠᠰᠢ ᠪᠠᠨ ᠣᠢᠷᠠᠳᠴᠤ ᠪᠠᠢᠭᠠ ᠴᠢᠨᠣᠠ ᠶ᠋ᠢ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠲᠡᠵᠦ᠂ ᠲᠡᠭᠦᠨ ᠤ ᠨᠦᠬᠡᠨ ᠡᠴᠡ ᠬᠡᠳᠦᠨ ᠠᠯᠬᠤᠮ ᠵᠠᠢ ᠲᠠᠢ ᠪᠣᠯᠬᠤ ᠪᠠᠷ ᠰᠠᠨᠳᠤᠷᠴᠤ《ᠲᠡᠳᠡ ᠶᠠᠭᠠᠬᠢᠭᠠᠳ ᠫᠤᠤᠳᠠᠬᠤ ᠦᠭᠡᠢ ᠪᠠᠢᠨᠠ?》ᠭᠡᠵᠦ ᠳᠣᠲᠣᠷᠠ ᠪᠠᠨ ᠭᠠᠰᠢᠭᠤᠳᠠᠨ᠂ ᠨᠢᠳᠤᠷᠭᠠ ᠪᠠᠨ ᠵᠠᠩᠭᠢᠳᠤᠨ ᠡᠪᠡᠰᠦ ᠤᠷᠤᠭᠤ ᠰᠢᠭᠠᠵᠤ ᠪᠠᠢᠯᠠ᠃
ᠨᠦᠬᠡᠨ ᠦ᠌ ᠡᠮᠦᠨᠡ ᠬᠦᠷᠴᠦ ᠢᠷᠡᠭᠡᠳ ᠴᠢᠨᠣᠠ ᠪᠠᠷᠤᠭ ᠯᠠ ᠣᠷᠣᠮᠠᠷ ᠪᠣᠯᠪᠠ᠃ ᠭᠡᠬᠦ ᠳ᠋ᠦ᠍ ᠲᠡᠷᠡ ᠣᠷᠣᠭᠠ ᠦᠭᠡᠢ᠂ ᠣᠯᠠᠨ ᠲᠠᠯᠠ ᠶ᠋ᠢ ᠰᠡᠷᠡᠮᠵᠢᠲᠡᠢ ᠠᠵᠢᠭᠯᠠᠵᠤ ᠡᠬᠢᠯᠡᠬᠦ ᠲᠡᠷᠡᠬᠡᠨ ᠠᠭᠱᠠᠨ ᠳ᠋ᠤ᠌ ᠭᠤᠷᠪᠠ ᠳᠥᠷᠪᠡᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠨᠢᠵᠢᠭᠢᠨᠡᠨ ᠳᠤᠤᠭᠠᠷᠪᠠ᠃ ᠴᠢᠨᠣᠠ ᠰᠢᠳᠦ ᠪᠡᠨ ᠢᠷᠵᠠᠢᠯᠭᠠᠨ ᠬᠦᠴᠦᠲᠡᠢ ᠭᠡᠭᠴᠢ ᠦᠰᠦᠷᠴᠦ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠬᠥᠲᠥᠯ ᠤᠷᠤᠭᠤ ᠪᠥᠮᠪᠥᠷᠢᠨ ᠣᠷᠣᠪᠠ᠃
ᠮᠣᠩᠭᠣᠯᠴᠤᠳ ᠣᠷᠣ ᠣᠷᠣᠨ ᠠ᠋ᠴᠠ ᠪᠠᠨ ᠪᠣᠰᠴᠠᠭᠠᠨ ᠤᠤᠬᠠᠢᠯᠠᠯᠳᠤᠵᠤ ᠠᠩ ᠤ᠋ᠨ ᠵᠦᠭ ᠶᠠᠭᠠᠷᠠᠨ ᠭᠦᠶᠦᠯᠳᠦᠪᠡ᠃ ᠨᠠᠮᠠᠶ᠋ᠢ ᠪᠣᠰᠴᠤ ᠬᠡᠳᠦ ᠠᠯᠬᠤᠪᠠ ᠤᠤ ᠦᠭᠡᠢ ᠤᠤ ᠮᠢᠨᠦ ᠳᠡᠭᠡᠭᠦᠷ ᠠᠬᠢᠭᠠᠳ ᠰᠤᠮᠤ ᠱᠤᠤᠭᠢᠨ ᠭᠠᠷᠪᠠ᠃ ᠡᠨᠡ ᠳᠠᠭᠤ ᠱᠤᠤᠭᠢᠶᠠᠨ ᠠ᠋ᠴᠠ ᠪᠣᠯᠵᠤ᠂ ᠪᠠᠰᠠ ᠨᠢᠭᠡ ᠴᠢᠨᠣᠠ ᠪᠣᠰᠴᠤ ᠠᠩᠴᠢᠳ ᠤ᠋ᠨ ᠳᠤᠮᠳᠠᠭᠤᠷ ᠵᠠᠪᠰᠠᠷ ᠬᠠᠢᠨ ᠬᠠᠵᠠᠭᠤ ᠲᠠᠢᠰᠢ ᠪᠠᠨ ᠳᠤᠲᠠᠭᠠᠬᠤ ᠪᠠᠷ ᠭᠦᠶᠦᠪᠡ᠃ ᠮᠣᠩᠭᠣᠯᠴᠤᠳ ᠴᠤ᠌ ᠳᠠᠭᠠᠯᠳᠤᠨ ᠬᠥᠲᠥᠯ ᠦ᠋ᠨ ᠴᠠᠭᠠᠨᠠ ᠭᠠᠷᠤᠨ ᠠᠯᠠᠭᠠ ᠪᠣᠯᠵᠤ᠂ ᠨᠠᠮᠠᠶ᠋ᠢ ᠠᠩᠬᠠᠨ ᠤ᠋ ᠴᠢᠨᠣᠠ ᠶ᠋ᠢᠨ ᠲᠡᠨᠳᠡ ᠬᠦᠷᠲᠡᠯᠡ ᠫᠤᠤ ᠬᠡᠳᠦ ᠳᠠᠬᠢᠨ ᠳᠤᠤᠭᠠᠷᠪᠠ᠃ ᠵᠢᠩᠷᠤᠪ ᠢᠨᠢᠶᠡᠭᠰᠡᠭᠡᠷ ᠮᠣᠷᠢ ᠲᠠᠢ ᠪᠠᠨ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍ ᠮᠣᠷᠢ ᠨᠢ ᠬᠣᠯᠠ ᠠ᠋ᠴᠠ ᠬᠠᠮᠠᠷ ᠢ᠋ᠶ᠋ᠠᠨ ᠳᠣᠷᠭᠢᠨ ᠣᠢᠷᠠᠳᠬᠤ ᠪᠠᠨ ᠪᠣᠯᠢᠪᠠ᠃
— ᠬᠢᠴᠢᠶᠡᠮᠵᠢᠲᠡᠢ ᠪᠠᠢᠭᠠᠷᠠᠢ! ᠭᠡᠵᠦ ᠵᠠᠯᠠᠭᠤ ᠶᠠᠷᠢᠪᠠ᠃ ᠴᠢᠨᠣᠠ ᠶ᠋ᠢᠨ ᠠᠮᠢ ᠨᠢ ᠶᠡᠬᠡ ᠪᠥᠬᠡ ᠮᠥᠷᠲᠡᠭᠡᠨ ᠠᠮᠢ ᠨᠠᠰᠤᠨ ᠤ᠋ ᠡᠴᠦᠰ ᠲᠦ᠍ ᠬᠦᠷᠬᠦ ᠪᠡᠷ ᠦᠬᠦᠭᠰᠡᠨ ᠢ᠋ᠶ᠋ᠡᠷ ᠣᠪᠯᠠᠨ ᠬᠦᠴᠦ ᠪᠡᠨ ᠬᠤᠷᠢᠶᠠᠵᠤ ᠪᠠᠢᠭᠠᠳ ᠡᠴᠦᠰ ᠦ᠋ᠨ ᠳᠠᠭᠠᠷᠢᠯᠲᠠ ᠬᠢᠳᠡᠭ ᠢ᠋ ᠪᠢ ᠮᠡᠳᠡᠬᠦ ᠪᠣᠯᠬᠣᠷ ᠡᠷᠬᠢᠪᠴᠢᠲᠦ ᠫᠤᠤ ᠪᠠᠨ ᠡᠮᠦᠨᠡ ᠪᠡᠨ ᠪᠡᠯᠡᠬᠡᠨ ᠪᠠᠷᠢᠭᠰᠠᠭᠠᠷ ᠣᠢᠷᠠᠳᠪᠠ᠃ ᠫᠤᠤᠳᠠᠭᠰᠠᠨ ᠰᠤᠮᠤ ᠨᠤᠭᠤᠳ ᠨᠢ ᠪᠦᠷ ᠠᠮᠢᠨ ᠭᠠᠵᠠᠷ ᠢ᠋ ᠤᠨᠤᠭᠰᠠᠨ ᠪᠣᠯᠬᠣᠷ ᠨᠢᠭᠡᠨᠲᠡ ᠠᠶᠤᠯ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠵᠤᠨ ᠤ᠋ ᠤᠯᠠᠷᠢᠯ ᠤ᠋ᠨ ᠰᠡᠭᠰᠡᠢᠭᠰᠡᠨ ᠦᠰᠦ ᠲᠡᠢ ᠠᠷᠠᠰᠤᠨ ᠳ᠋ᠤᠨᠢ ᠴᠢᠰᠤ ᠰᠢᠷᠣᠢ ᠨᠠᠭᠠᠯᠳᠤᠵᠠᠢ᠃ ᠵᠢᠩᠷᠤᠪ ᠪᠠᠶᠠᠷᠯᠠᠨ ᠤᠷᠠᠢᠯᠠᠵᠤ᠂ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠰᠢᠲᠦᠨ ᠦ᠌ ᠬᠢᠨᠢ ᠵᠠᠪᠰᠠᠷ ᠢ᠋ᠶ᠋ᠠᠷ ᠴᠢᠴᠢᠯᠡᠬᠦ ᠶ᠋ᠢᠨ ᠳᠠᠭᠠᠤ 《ᠬᠠᠵᠠᠭᠠᠴᠢ ᠳᠠ᠂ ᠴᠢ》 ᠭᠡᠮᠡᠨ ᠱᠣᠣᠯᠠᠭᠠᠳ᠂ ᠦᠬᠦᠳᠡᠯ ᠢ᠋ ᠬᠡᠳᠦ ᠢᠰᠬᠦᠯᠬᠦ ᠳ᠋ᠦ᠍ ᠴᠢᠰᠤ ᠨᠢ ᠦᠷᠭᠦᠯᠵᠢᠯᠡᠨ ᠭᠣᠭᠣᠵᠢᠭᠰᠠᠭᠠᠷ ᠪᠠᠢᠪᠠ᠃
ᠨᠥᠭᠦᠭᠡ ᠬᠡᠳᠦᠨ ᠠᠩᠴᠢᠳ ᠴᠢᠮᠡᠭᠡ ᠦᠭᠡᠢ ᠪᠣᠯᠤᠭᠠᠳ ᠨᠡᠯᠢᠶᠡᠳ ᠤᠳᠠᠪᠠ᠃ ᠮᠣᠩᠭᠣᠯᠴᠤᠳ ᠶᠠᠪᠠᠭᠠᠨ ᠶᠠᠪᠤᠬᠤ ᠳᠤᠷᠠ ᠦᠭᠡᠢ ᠪᠣᠯᠬᠣᠷ ᠪᠢ ᠵᠢᠩᠷᠣᠪ ᠢ᠋ ᠮᠣᠷᠢ ᠪᠠᠷ ᠲᠡᠳᠡᠨ ᠤᠷᠤᠭᠤ ᠢᠯᠡᠭᠡᠪᠡ᠃ ᠲᠡᠭᠦᠨ ᠢ᠋ ᠲᠡᠳᠡᠨ ᠦ᠌ ᠶᠠᠪᠤᠭᠰᠠᠨ ᠵᠦᠭ ᠢ᠋ ᠴᠢᠭᠯᠡᠨ ᠶᠠᠪᠤᠵᠤ ᠪᠠᠢᠭᠠ ᠬᠣᠭᠣᠷᠣᠨᠳᠣ᠂ ᠲᠡᠳᠡ ᠬᠠᠷᠢᠨ ᠬᠥᠲᠥᠯ ᠦ᠋ᠨ ᠴᠠᠭᠠᠨᠠ ᠠ᠋ᠴᠠ ᠬᠣᠶᠠᠳᠠᠬᠢ ᠴᠢᠨᠣᠠ ᠪᠠᠨ ᠳᠠᠮᠵᠢᠯᠠᠭᠰᠠᠭᠠᠷ ᠭᠠᠷᠴᠤ ᠢᠷᠡᠪᠡ᠃ ᠲᠡᠳᠡ ᠣᠢᠷᠠᠳᠴᠤ ᠢᠷᠡᠬᠦ ᠳ᠋ᠦ᠍ ᠪᠢ ᠭᠣᠮᠪᠣ ᠪᠣᠯᠤᠨ ᠨᠠᠢᠳᠠᠨ ᠤ᠋ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠦᠭᠡ ᠪᠤᠯᠢᠶᠠᠯᠴᠠᠬᠤ ᠶ᠋ᠢ ᠣᠯᠵᠤ ᠰᠣᠨᠣᠰᠪᠠ᠃
— ᠴᠢᠨᠦ ᠰᠤᠮᠤ ᠴᠢᠨᠢ ᠬᠠᠵᠠᠭᠤ ᠳ᠋ᠤᠨᠢ ᠲᠤᠰᠬᠤ ᠶ᠋ᠢ ᠪᠢ ᠶᠠᠭ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠠᠷᠠᠭᠰᠠᠨ ᠰᠢᠦ᠃ ᠴᠢ ᠵᠥᠪᠬᠡᠨ ᠯᠡ ᠬᠣᠶᠠᠷ ᠰᠤᠮᠤ ᠬᠣᠨᠵᠢᠨᠠ ᠭᠡᠵᠦ ᠪᠠᠢᠬᠤ ᠠ᠋ᠴᠠ ᠪᠢᠰᠢ ᠭᠡᠵᠦ ᠭᠣᠮᠪᠣ ᠴᠢᠷᠠᠢ ᠪᠠᠨ ᠤᠯᠠᠢᠯᠭᠠᠨ ᠬᠡᠯᠡᠪᠡ᠃ ᠲᠡᠳᠡᠨ ᠦ᠌ ᠬᠣᠭᠣᠷᠣᠨᠳᠣᠬᠢ ᠮᠠᠷᠭᠤᠭᠠᠨ ᠢ᠋ ᠲᠠᠰᠤᠯᠬᠤ ᠶ᠋ᠢᠨ ᠲᠥᠯᠥᠭᠡ ᠷᠠᠰᠢ ᠨᠠᠮᠠᠶ᠋ᠢ ᠲᠠᠰᠤᠯᠤᠭᠴᠢ ᠪᠣᠯᠭᠠᠬᠤ ᠪᠠᠷ ᠭᠤᠶᠤᠬᠤ ᠳ᠋ᠤ᠌ ᠪᠢ :
— ᠪᠢ ᠲᠠ ᠨᠠᠷ ᠲᠠᠢ ᠴᠣᠭ ᠪᠠᠢᠭᠰᠠᠨ ᠦᠭᠡᠢ ᠰᠢᠦ ᠳᠡ᠃ ᠬᠡᠷᠪᠡ ᠲᠠ ᠨᠠᠷ ᠵᠥᠪᠰᠢᠶᠡᠷᠡᠪᠡᠯ ᠣᠷᠣᠢ ᠬᠠᠷᠢᠭᠠᠳ ᠬᠥᠵᠥᠷ ᠡᠴᠡ ᠠᠰᠠᠭᠤᠵᠤ ᠦᠵᠡᠶᠡ ᠭᠡᠵᠦ ᠪᠣᠳᠣᠯᠬᠢᠯᠠᠬᠤ ᠴᠠᠭ ᠣᠯᠬᠤ ᠮᠡᠷᠭᠡᠨ ᠠᠷᠭᠠ ᠭᠠᠷᠭᠠᠨ ᠵᠥᠪᠳᠡᠪᠡ᠃ ᠦᠳᠡᠰᠢ ᠶ᠋ᠢᠨ ᠬᠥᠰᠢᠭᠡ ᠪᠠᠭᠤᠬᠤ ᠪᠣᠯᠵᠤ᠂ ᠦᠬᠡᠷ ᠬᠠᠰᠠᠭ ᠠᠪᠤᠭᠤᠯᠬᠤ ᠪᠠᠷ ᠵᠢᠩᠷᠤᠪ ᠢ᠋ ᠨᠢᠭᠡᠨᠲᠡ ᠲᠣᠮᠢᠯᠠᠪᠠ᠃ ᠦᠯᠡᠳᠡᠭᠰᠡᠨ ᠬᠥᠮᠦᠰ ᠠᠬᠢᠨ ᠳᠡᠭᠡᠭᠰᠢ ᠪᠡᠨ ᠮᠠᠴᠤᠵᠤ ᠨᠦᠬᠡᠨ ᠦ᠌ ᠳᠣᠲᠣᠷᠠ ᠪᠡᠯᠲᠡᠷᠭᠡ ᠪᠠᠢᠬᠤ ᠡᠰᠡᠬᠦ ᠶ᠋ᠢ ᠦᠵᠡᠬᠦ ᠭᠡᠬᠦ ᠳ᠋ᠦ᠍ ᠴᠠᠭᠠᠨᠲᠡᠮᠡᠭᠡ ᠬᠣᠷᠢᠭᠯᠠᠨ ᠵᠣᠭᠰᠣᠭᠠᠪᠠ᠃
— ᠲᠡᠭᠦᠨ ᠢ᠋ ᠬᠡᠦᠬᠡᠳ ᠦ᠋ᠳ ᠮᠠᠷᠭᠠᠰᠢ ᠬᠢᠵᠦ ᠪᠣᠯᠤᠨᠠ ᠰᠢᠦ ᠳᠡ ! ᠮᠢᠨᠦ ᠪᠣᠳᠣᠬᠤ ᠪᠠᠷ ᠥᠨᠥᠳᠥᠷ ᠪᠢᠳᠡᠨ ᠬᠠᠨᠲᠠᠯᠠ ᠠᠵᠢᠯᠯᠠᠭᠰᠠᠨ ᠳᠠ ᠭᠡᠳ ᠡᠬᠢᠨ ᠳ᠋ᠦ᠍ ᠤᠨᠠᠭᠠᠭᠰᠠᠨ ᠴᠢᠨᠣᠠ ᠶ᠋ᠢ ᠠᠵᠢᠭᠯᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠴᠢᠰᠤ ᠲᠠᠢ ᠭᠠᠵᠠᠷ ᠢ᠋ ᠵᠢᠭᠠᠵᠤ:
— ᠡᠨᠡ ᠪᠣᠯ ᠮᠢᠨᠦ ᠰᠤᠮᠤ᠂ ᠶᠠᠭ ᠯᠠ ᠵᠢᠷᠦᠬᠡᠨ ᠭᠣᠣᠯ ᠢ᠋ ᠣᠨᠣᠭᠠᠵᠠᠢ ᠳᠠ ᠭᠡᠬᠦ ᠳ᠋ᠦ᠍ ᠪᠤᠰᠤᠳ ᠨᠢ ᠳᠣᠭᠣᠭᠢᠯᠠᠨ ᠢᠨᠢᠶᠡᠯᠳᠦᠪᠡ᠃
— ᠲᠡᠭᠦᠨ ᠢ᠋ ᠪᠠᠷᠤᠭ ᠯᠠ ᠦᠬᠦᠭᠰᠡᠨ ᠦ᠌ ᠬᠣᠢᠨᠠ ᠲᠠ ᠫᠤᠤᠳᠠᠭᠰᠠᠨ ᠳᠠ ᠭᠡᠵᠦ ᠭᠣᠮᠪᠣ ᠱᠣᠭᠯᠠᠨ ᠬᠡᠯᠡᠪᠡ᠃
— ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠦ᠋ᠨ ᠰᠤᠮᠤ ᠨᠢ ᠬᠠᠮᠤᠭ ᠤ᠋ᠨ ᠣᠨᠣᠪᠴᠢᠲᠠᠢ ᠲᠤᠰᠴᠢ ᠳᠠ᠂ ᠲᠠ ᠨᠠᠷ ᠵᠠᠯᠠᠭᠤ ᠬᠥᠮᠦᠰ ᠭᠡᠵᠦ ᠶᠠᠭᠠᠷᠠᠮᠠᠲᠠᠭᠠᠢ ᠭᠡᠳᠡᠭ ᠨᠢ ᠭᠡᠵᠦ ᠴᠠᠭᠠᠨᠲᠠᠮᠡᠭᠡ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠷᠠᠰᠢ:
— ᠬᠠᠷᠢᠨ ᠲᠠ ᠶᠡᠬᠡ ᠤᠳᠠᠭᠠᠨ ᠪᠠᠢᠬᠤ ᠶᠤᠮ ᠭᠡᠵᠦ ᠬᠠᠷᠢᠭᠤᠴᠠᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ:
— ᠵᠠ ᠶᠠᠪᠤᠶᠠ ᠳᠠ᠂ ᠬᠡᠦᠬᠡᠳ ᠦ᠋ᠳ ᠠᠩ ᠤ᠋ᠨ ᠬᠡᠰᠢᠭ ᠳᠡᠭᠡᠨ ᠵᠥᠪ ᠰᠢᠦ ᠳᠡ᠃ ᠬᠣᠶᠠᠳᠠᠬᠢ ᠴᠢᠨᠣᠠ ᠶ᠋ᠢ ᠬᠡᠨ ᠫᠤᠤᠳᠠᠨ ᠣᠨᠣᠭᠠᠭᠰᠠᠨ ᠢ᠋ ᠴᠢᠨᠦ ᠪᠤᠷᠬᠠᠨ ᠠ᠋ᠴᠠ ᠠᠰᠠᠭᠤᠵᠤ ᠪᠠᠢᠬᠤ ᠵᠠᠭᠤᠷᠠ ᠪᠢᠳᠡᠨ ᠳ᠋ᠦ᠍ ᠠᠷᠢᠬᠢᠨ ᠠ᠋ᠴᠠ ᠪᠠᠨ ᠪᠠᠭᠠ ᠤᠤᠭᠤᠯᠭᠠᠬᠤ ᠦᠭᠡᠢ ᠤᠤ ? ᠭᠡᠵᠦ ᠨᠠᠳᠠ ᠠ᠋ᠴᠠ ᠠᠰᠠᠭᠤᠯᠠ᠃
— ᠪᠠᠢᠬᠤ ᠳ᠋ᠤ᠌ ᠯᠠ ᠬᠦᠷᠪᠡᠯ ᠪᠣᠯᠤᠯ ᠦᠭᠡᠢ ᠳᠡ ᠭᠡᠮᠡᠨ ᠨᠠᠮᠠᠶ᠋ᠢ ᠬᠠᠷᠢᠭᠤᠯᠬᠤ ᠳ᠋ᠤ᠌ ᠷᠠᠰᠢ ᠢᠨᠢᠶᠡᠭᠡᠳ:
— ᠲᠡᠭᠡᠪᠡᠯ ᠰᠠᠢᠨ᠂ ᠴᠢ ᠨᠡᠢᠲᠡ ᠳᠥᠷᠪᠡᠨ ᠯᠣᠩᠬᠣ ᠠᠪᠴᠢᠷᠠᠭᠰᠠᠨ᠃ ᠬᠣᠶᠠᠳᠤᠭᠠᠷ ᠯᠣᠩᠬᠣ ᠶ᠋ᠢ ᠲᠡᠷᠡ ᠬᠥᠭᠰᠢᠨ ᠯᠠᠮᠠ ᠤᠤᠭᠤᠵᠤ ᠣᠷᠬᠢᠭᠰᠠᠨ᠃ ᠣᠳᠣ ᠴᠢᠨᠦ ᠬᠠᠢᠷᠴᠠᠭ ᠲᠤ᠌ ᠪᠠᠰᠠ ᠬᠣᠶᠠᠷ ᠯᠣᠩᠬᠣ ᠪᠠᠢᠬᠤ ᠶᠣᠰᠣ ᠲᠠᠢ ᠳᠠ ᠭᠡᠯᠡ᠃
— ᠴᠢ ᠴᠦ᠍ ᠮᠢᠨᠦ ᠶᠠᠭᠤᠮᠠ ᠶ᠋ᠢ ᠰᠠᠢᠨ ᠠᠩᠵᠠᠭᠠᠷᠠᠳᠠᠭ ᠶᠤᠮ ᠪᠠᠢᠨᠠ᠃
— ᠪᠢ ᠴᠢᠨᠢ ᠴᠢᠨᠦ ᠨᠠᠢᠵᠠ ᠪᠥᠭᠡᠳ ᠪᠠᠭᠰᠢ ᠪᠢᠰᠢ ᠤᠤ ? ᠭᠡᠳ ᠷᠠᠰᠢ ᠨᠠᠳᠠ ᠤᠷᠤᠭᠤ ᠲᠥᠪ ᠴᠢᠷᠠᠢᠯᠠᠨ ᠬᠡᠯᠡᠯᠡ᠃
ᠨᠠᠷᠠ ᠰᠢᠩᠭᠡᠭᠰᠡᠨ ᠦ᠌ ᠨᠡᠯᠢᠶᠡᠳ ᠬᠣᠢᠨᠠ ᠪᠢᠳᠡ ᠰᠠᠶᠢ ᠭᠡᠷ ᠲᠡᠭᠡᠨ ᠬᠦᠷᠪᠡ᠃ ᠪᠦᠰᠡᠭᠦᠢ ᠬᠡᠦᠬᠡᠳ ᠦ᠋ᠳ ᠭᠡᠷ ᠦ᠋ᠨ ᠡᠮᠦᠨᠡ ᠵᠣᠭᠰᠣᠨ ᠬᠦᠯᠢᠶᠡᠵᠡᠭᠡᠵᠦ᠂ ᠮᠢᠬᠠ ᠡᠯᠪᠡᠭ ᠬᠣᠭᠣᠯᠠᠨ ᠤ᠋ ᠦᠨᠦᠷ ᠠᠪᠤᠭᠰᠠᠨ ᠨᠣᠬᠠᠳ ᠪᠠᠶᠠᠷᠯᠠᠨ ᠬᠤᠴᠠᠯᠳᠤᠵᠤ᠂ ᠮᠣᠷᠢᠳ ᠤ᠋ᠨ ᠡᠮᠦᠨᠡ ᠡᠴᠡ ᠬᠠᠷᠠᠢᠯᠠᠨ ᠪᠠᠢᠪᠠ᠃ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠮᠢᠨᠦ ᠭᠡᠷ ᠲᠦ᠍ ᠣᠷᠣᠵᠤ ᠰᠠᠭᠤᠵᠠᠭᠠᠭᠠᠳ᠂ ᠪᠢ ᠬᠥᠵᠥᠷ ᠢ᠋ᠶ᠋ᠡᠨ ᠭᠠᠷᠭᠠᠬᠤ ᠳ᠋ᠤ᠌ ᠷᠠᠰᠢ ᠬᠥᠮᠦᠨ ᠪᠣᠯᠭᠠᠨ ᠳ᠋ᠤ᠌ ᠠᠶᠠᠭᠠ ᠲᠦᠭᠡᠭᠡᠨ ᠥᠭᠭᠦᠭᠡᠳ᠄
— ᠵᠠ ᠬᠦ ! ᠪᠢ ᠴᠦ᠍ ᠤᠮᠳᠠᠭᠠᠰᠴᠤ ᠪᠠᠢᠨᠠ ᠳᠠ ᠭᠡᠯᠡ᠃
— ᠬᠠᠮᠢᠭᠠ ᠪᠠᠢᠭᠠ ᠶ᠋ᠢ ᠨᠢ ᠴᠢ ᠮᠡᠳᠡᠵᠦ ᠪᠠᠢᠭᠠ ᠰᠢᠲᠠ ᠭᠡᠵᠦ ᠪᠢ ᠬᠠᠷᠢᠭᠤᠯᠤᠭᠠᠳ ᠶᠠᠭ ᠯᠠ ᠠᠯᠪᠠᠨ ᠶᠣᠰᠣᠨ ᠤ᠋ ᠴᠢᠬᠤᠯᠠ ᠬᠡᠷᠡᠭ ᠮᠡᠲᠦ ᠪᠡᠷ ᠲᠥᠪ ᠴᠢᠩᠭᠠ ᠪᠠᠷ ᠬᠥᠵᠥᠷ ᠢ᠋ᠶ᠋ᠡᠨ ᠬᠣᠯᠢᠵᠤ ᠡᠬᠢᠯᠡᠪᠡ᠃
— ᠵᠠ ᠣᠳᠣ ᠲᠠ ᠬᠣᠶᠠᠭᠤᠯᠠ ᠬᠥᠵᠥᠷ ᠠᠪᠴᠤ ᠪᠣᠯᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠫᠤᠤᠳᠠᠭᠰᠠᠨ ᠰᠤᠮᠤᠨ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠪᠣᠳᠣᠵᠤ ᠪᠣᠯᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠭᠣᠮᠪᠣ᠂ ᠨᠠᠢᠳᠠᠨ ᠳ᠋ᠤ᠌ ᠬᠠᠨᠳᠤᠨ ᠬᠡᠯᠡᠯᠡ᠃
ᠶᠣᠰᠣᠯᠠᠯ ᠳ᠋ᠤ᠌ ᠣᠷᠣᠯᠴᠠᠵᠤ ᠪᠠᠢᠭᠠ ᠪᠠᠢᠳᠠᠯ ᠲᠠᠢ ᠶᠡᠬᠡ ᠤᠳᠠᠭᠠᠯᠢᠭ ᠢ᠋ᠶ᠋ᠠᠷ ᠪᠢ ᠬᠥᠵᠥᠷ ᠢ᠋ᠶ᠋ᠡᠨ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠰᠢᠷᠢᠳᠡᠭ ᠳᠡᠭᠡᠷᠡ ᠳᠡᠯᠭᠡᠨ ᠲᠠᠯᠪᠢᠵᠤ ᠪᠠᠢᠯᠠ᠃ ᠬᠠᠶᠠ ᠵᠠᠷᠢᠮ ᠪᠣᠳᠣᠯᠬᠢᠯᠠᠬᠤ ᠴᠢᠬᠤᠯᠠ ᠲᠠᠢ ᠦᠶᠡ ᠳ᠋ᠡᠭᠡᠨ ᠵᠣᠭᠰᠣᠰᠬᠢᠨ ᠪᠣᠳᠣᠯᠬᠢᠯᠠᠵᠤ ᠲᠠᠯᠪᠢᠭᠰᠠᠭᠠᠷ ᠪᠠᠢᠪᠠ ᠃ ᠪᠦᠰᠡᠭᠦᠢ ᠬᠡᠦᠬᠡᠳ ᠬᠦᠷᠲᠡᠯᠡ ᠡᠴᠦᠰ ᠦ᠋ᠨ ᠰᠢᠢᠳ ᠢ᠋ ᠦᠵᠡᠬᠦ ᠪᠡᠷ ᠮᠢᠨᠦ ᠭᠡᠷ ᠲᠦ᠍ ᠳᠦᠭᠦᠷᠲᠡᠯᠡ ᠪᠡᠨ ᠢᠷᠡᠵᠡᠭᠡᠭᠰᠡᠨ ᠪᠠᠢᠪᠠ᠃ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠬᠥᠵᠥᠷ ᠢ᠋ᠶ᠋ᠡᠨ ᠲᠠᠯᠪᠢᠭᠰᠠᠨ ᠤ᠋ ᠳᠠᠷᠠᠭᠠ ᠪᠢ ᠨᠡᠯᠢᠶᠡᠳ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
— ᠲᠠᠨ ᠤ᠋ ᠬᠣᠶᠠᠷ ᠤ᠋ᠨ ᠠᠯᠢ ᠨᠢ ᠴᠦ᠍ ᠵᠥᠪ ᠪᠢᠰᠢ ᠳᠡ᠃ ᠬᠠᠷᠠᠭᠠᠴᠢ ᠳᠠ ! ᠴᠡᠴᠡᠭ ᠦ᠋ᠨ ᠠᠷᠪᠠᠨ ᠭᠤᠷᠪᠠ ᠪᠣᠯᠤᠨ ᠳᠥᠷᠪᠡᠯᠵᠢᠨ ᠠᠷᠪᠠᠨ ᠭᠤᠷᠪᠠ ᠶ᠋ᠢᠨ ᠳᠤᠮᠳᠠ ᠨᠢ ᠲᠣᠭᠣᠷ ᠤ᠋ᠨ ᠠᠷᠪᠠᠨ ᠬᠣᠶᠠᠷ – ᠬᠠᠲᠤᠨ ᠪᠠᠢᠨᠠ᠃ ᠬᠣᠶᠠᠳᠤᠭᠠᠷ ᠲᠤ᠌ ᠠᠯᠠᠭᠰᠠᠨ ᠨᠢ ᠥᠯᠥᠭᠴᠢᠨ ᠴᠢᠨᠣᠠ ᠪᠠᠢᠭᠰᠠᠨ ᠶᠤᠮ ᠤᠤ? ᠭᠡᠵᠦ ᠠᠰᠠᠭᠤᠯᠠ᠃
— ᠲᠡᠢᠮᠦ᠂ ᠥᠯᠥᠭᠴᠢᠨ ᠴᠢᠨᠣᠠ ᠪᠠᠢᠭᠰᠠᠨ ᠭᠡᠵᠦ ᠵᠦᠭ ᠪᠦᠷᠢ ᠡᠴᠡ ᠬᠠᠷᠢᠭᠤᠯᠵᠠᠭᠠᠪᠠ᠃
— ᠵᠠ ᠲᠡᠢᠮᠦ ᠪᠣᠯ ᠰᠠᠢᠨ ᠪᠣᠯᠵᠠᠢ᠂ ᠬᠥᠵᠥᠷ ᠦ᠋ᠨ ᠳᠡᠯᠭᠡᠴᠡ ᠡᠴᠡ ᠬᠠᠷᠠᠬᠤ ᠳ᠋ᠤ᠌ ᠲᠠᠨ ᠤ᠋ ᠬᠣᠶᠠᠷ ᠤ᠋ᠨ ᠰᠤᠮᠤ ᠵᠡᠷᠭᠡ ᠳ᠋ᠡᠭᠡᠨ ᠣᠨᠣᠭᠠᠭᠰᠠᠨ ᠪᠠᠢᠨᠠ᠃
— ᠶᠠᠭ ᠯᠠ ᠳᠠ ᠭᠡᠵᠦ ᠷᠠᠰᠢ ᠠᠶᠠᠳᠠᠨ ᠳᠤᠤᠭᠠᠷᠪᠠ᠃
— ᠬᠡᠷᠪᠡ ᠲᠠᠨ ᠤ᠋ ᠬᠣᠶᠠᠷ ᠤ᠋ᠨ ᠰᠤᠮᠤ ᠵᠡᠷᠭᠡ ᠲᠤᠰᠤᠭᠰᠠᠨ ᠪᠣᠯ ᠡᠨᠡ ᠬᠣᠶᠠᠷ ᠰᠤᠮᠤ ᠠᠪ ᠠᠳᠠᠯᠢᠬᠠᠨ᠃ ᠡᠢᠮᠦ ᠡᠴᠡ ᠭᠣᠮᠪᠣ ᠠᠷᠠᠰᠤ ᠶ᠋ᠢ ᠠᠪᠴᠤ ᠨᠠᠢᠳᠠᠨ ᠴᠤ᠌ ᠬᠣᠶᠠᠷ ᠰᠤᠮᠤ ᠲᠠᠢ ᠪᠣᠯᠬᠤ ᠪᠣᠯᠤᠨᠠ᠃
ᠡᠨᠡ ᠬᠦ᠌ ᠰᠢᠢᠳ ᠢ᠋ ᠬᠥᠮᠦᠰ ᠴᠥᠮ ᠪᠠᠶᠠᠷᠲᠠᠢ ᠪᠠᠷ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠪᠥᠭᠡᠳ ᠷᠠᠰᠢ ᠬᠣᠭᠣᠰᠣᠷᠠᠭᠰᠠᠨ ᠠᠶᠠᠭᠠᠨ ᠳ᠋ᠤ᠌ ᠠᠬᠢᠨ ᠠᠷᠢᠬᠢ ᠨᠡᠮᠡᠵᠦ ᠥᠭᠭᠦᠯᠡ᠃ ᠭᠣᠮᠪᠣ ᠭᠡᠷ ᠦ᠋ᠨ ᠲᠤᠭᠤᠷᠭᠠ ᠶ᠋ᠢ ᠳᠥᠰᠢᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠠᠳᠠ ᠤᠷᠤᠭᠤ ᠬᠠᠨᠳᠤᠨ:
— ᠲᠡᠭᠡᠪᠡᠯ ᠴᠢᠨᠦ ᠪᠤᠷᠬᠠᠨ ᠠ᠋ᠴᠠ ᠪᠠᠨ ᠠᠰᠠᠭᠤᠵᠤ ᠦᠵᠡᠭᠡᠴᠢ ᠳᠡ ! ᠡᠭᠦᠷ ᠲᠦ᠍ ᠴᠣᠬᠣᠮ ᠬᠡᠳᠦᠢ ᠪᠡᠯᠲᠡᠷᠭᠡ ᠪᠠᠢᠭᠠ ᠪᠣᠯ ? ᠭᠡᠵᠦ ᠠᠰᠠᠭᠤᠯᠠ᠃ ᠪᠢ ᠬᠥᠵᠥᠷ ᠢ᠋ᠶ᠋ᠡᠨ ᠠᠯᠭᠤᠷᠬᠠᠨ ᠬᠣᠷᠢᠶᠠᠨ ᠠᠪᠴᠤ ᠴᠠᠭᠠᠰᠢ ᠲᠠᠯᠪᠢᠭᠰᠠᠨ ᠢ᠋ᠶ᠋ᠠᠨ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠠᠩᠵᠠᠭᠠᠷᠠᠭᠰᠠᠨ ᠦᠭᠡᠢ ᠮᠡᠲᠦ ᠪᠡᠷ:
— ᠪᠤᠷᠬᠠᠨ ᠳ᠋ᠤ᠌ ᠡᠢᠮᠦ ᠪᠠᠭᠠ ᠠᠰᠠᠭᠤᠳᠠᠯ ᠲᠠᠯᠪᠢᠵᠤ ᠳᠠᠷᠤᠭᠠᠰᠤ ᠥᠭᠴᠦ ᠪᠣᠯᠬᠤ ᠦᠭᠡᠢ ᠰᠢᠦ ᠳᠡ᠂ ᠮᠠᠷᠭᠠᠰᠢ ᠥᠷᠯᠥᠭᠡ ᠶ᠋ᠢ ᠴᠦ᠍ ᠬᠦᠯᠢᠶᠡᠵᠦ ᠳᠡᠢᠯᠬᠦ ᠪᠡᠨ ᠪᠠᠢᠳᠠᠭ ᠨᠢ ᠶᠠᠮᠠᠷ ᠬᠡᠦᠬᠡᠳ ᠪᠢᠰᠢ ᠳᠡ ᠭᠡᠵᠦ ᠵᠢᠮᠡᠯᠡᠭᠰᠡᠨ ᠮᠠᠶᠢᠭ ᠢ᠋ᠶ᠋ᠠᠷ ᠬᠠᠷᠢᠭᠤᠯᠪᠠ᠃
ᠭᠣᠮᠪᠣ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠮᠠᠶᠢᠭᠲᠠᠢ ᠤᠬᠤᠷᠢᠨ ᠰᠠᠭᠤᠬᠤ ᠳ᠋ᠠᠭᠠᠨ ᠰᠡᠵᠢᠭᠯᠡᠯ ᠲᠡᠢ ᠨᠢᠳᠦ ᠪᠡᠷ ᠨᠠᠮᠠᠶ᠋ᠢ ᠬᠠᠷᠠᠭᠰᠠᠭᠠᠷ ᠪᠠᠢᠪᠠ᠃ ᠪᠤᠰᠤᠳ ᠨᠢ ᠬᠠᠷᠢᠨ ᠮᠢᠨᠦ ᠬᠡᠯᠡᠬᠦ ᠶ᠋ᠢ ᠲᠣᠯᠣᠭᠠᠢ ᠳᠣᠬᠢᠨ ᠵᠥᠪᠰᠢᠶᠡᠷᠡᠵᠡᠭᠡᠵᠦ᠂ ᠦᠬᠡᠷ ᠲᠡᠷᠭᠡᠨ ᠦ᠌ ᠪᠤᠴᠠᠨ ᠢᠷᠡᠬᠦ ᠶ᠋ᠢ ᠦᠵᠡᠬᠦ ᠪᠡᠷ ᠶᠠᠭᠠᠷᠠᠨ ᠭᠠᠷᠴᠠᠭᠠᠪᠠ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠬᠣᠶᠠᠷ ᠴᠢᠨᠣᠠ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠨᠢᠭᠡᠨᠲᠡ ᠥᠪᠴᠢᠭᠡᠳ ᠬᠠᠲᠠᠭᠠᠬᠤ ᠪᠠᠷ ᠳᠡᠯᠭᠡᠨ ᠲᠠᠯᠪᠢᠭᠰᠠᠨ ᠦᠶᠡ ᠳ᠋ᠦ᠍ ᠵᠢᠩᠷᠤᠪ ᠠᠯᠢᠶᠠᠬᠠᠨ ᠴᠢᠷᠠᠢ ᠲᠠᠢ ᠪᠠᠷ ᠣᠷᠣᠵᠤ ᠢᠷᠡᠭᠡᠳ ᠮᠠᠭᠤᠬᠠᠢ ᠰᠢᠯᠪᠤᠯᠤᠭᠰᠠᠨ ᠭᠠᠷ ᠢ᠋ᠶ᠋ᠠᠨ ᠨᠠᠭᠠᠰᠢ ᠪᠠᠨ ᠰᠤᠩᠭᠠᠵᠤ:
— ᠨᠠᠳᠠ ᠳ᠋ᠤ᠌ ᠪᠠᠭᠠ ᠡᠮ ᠲᠦᠷᠬᠢᠵᠦ ᠥᠭᠭᠦᠭᠡᠴᠢ ! ᠪᠡᠯᠲᠡᠷᠭᠡ ᠶ᠋ᠢ ᠮᠠᠯᠲᠠᠵᠤ ᠭᠠᠷᠭᠠᠨᠠ ᠭᠡᠳᠡᠭ ᠲᠡᠢᠮᠦ ᠠᠮᠠᠷᠬᠠᠨ ᠶᠠᠭᠤᠮᠠ ᠪᠢᠰᠢ ᠪᠠᠢᠨᠠ᠂ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠᠵᠤ ᠡᠰᠡᠷᠭᠦᠴᠡᠭᠡᠳ ᠯᠡ ᠪᠠᠢᠨᠠ᠃ ᠡᠴᠦᠰ ᠲᠦ᠋ᠨᠢ ᠬᠦᠷᠵᠡ ᠪᠡᠷ ᠴᠣᠬᠢᠵᠤ ᠮᠠᠨᠠᠷᠠᠭᠤᠯᠤᠭᠠᠳ ᠰᠠᠶᠢ ᠭᠠᠷᠭᠠᠵᠤ ᠲᠠᠢᠯᠪᠠ ᠭᠡᠵᠦ ᠶᠠᠷᠢᠪᠠ᠃
— ᠬᠡᠳᠦ ᠪᠠᠢᠨᠠ ᠪᠣᠢ ?
— ᠳᠥᠷᠪᠡ᠂ ᠲᠠ ᠣᠴᠢᠵᠤ ᠦᠵᠡᠨᠡ ᠤᠤ ?
— ᠤᠷᠢᠳ ᠢ᠋ᠶ᠋ᠠᠷ ᠢᠷᠡᠭᠡᠳ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠᠴᠢ ᠳᠠ᠂ ᠲᠡᠷᠡ ᠪᠡᠯᠲᠡᠷᠭᠡ ᠣᠳᠣ ᠶᠠᠮᠠᠷ ᠳᠤᠲᠠᠭᠠᠵᠤ ᠴᠢᠳᠠᠬᠤ ᠴᠤ᠌ ᠪᠢᠰᠢ ! ᠪᠢ ᠵᠠᠯᠠᠭᠤ ᠶ᠋ᠢᠨ ᠰᠢᠯᠪᠤᠷᠠᠭᠰᠠᠨ ᠰᠢᠷᠬᠠᠨ ᠳᠡᠭᠡᠷᠡ ᠢᠣᠳ᠋ ᠲᠦᠷᠬᠢᠵᠦ ᠥᠭᠬᠦ ᠳ᠋ᠦ᠍ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠶᠣᠣᠯᠠᠨ ᠭᠠᠷ ᠢ᠋ᠶ᠋ᠠᠨ ᠲᠡᠳᠡᠨ ᠠᠪᠴᠤ ᠪᠠᠢᠪᠠ᠃ ᠨᠠᠮᠠᠶ᠋ᠢ ᠲᠡᠨᠳᠡ ᠬᠦᠷᠬᠦ ᠳ᠋ᠦ᠍ ᠨᠣᠣᠰᠣᠨ ᠪᠥᠮᠪᠥᠭᠡ ᠰᠢᠭ ᠪᠡᠯᠲᠡᠷᠭᠡ ᠨᠦ᠍ᠭᠦᠳ ᠢ᠋ ᠨᠢᠭᠡᠨᠲᠡ ᠠᠯᠠᠭᠰᠠᠨ ᠪᠠᠢᠪᠠ᠃
— ᠬᠠᠢᠷᠠᠨ ᠶᠠᠭᠤᠮᠠ ᠳᠠ᠃ ᠪᠢ ᠬᠠᠷᠢᠨ ᠲᠡᠳᠡᠨ ᠡᠴᠡ ᠨᠢᠭᠡ ᠶ᠋ᠢ ᠨᠢ ᠲᠡᠵᠢᠭᠡᠵᠦ ᠪᠡᠭᠡᠵᠢᠩ ᠳ᠋ᠦ᠍ ᠠᠪᠠᠴᠢᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠶᠤᠮ ᠭᠡᠵᠦ ᠷᠠᠰᠢ ᠳ᠋ᠤ᠌ ᠬᠡᠯᠡᠯᠡ᠃
— ᠠᠶᠤᠯᠲᠠᠢ ᠰᠢᠦ ! ᠬᠡᠷᠪᠡ ᠠᠯᠢ ᠨᠢᠭᠡᠨ ᠡᠳᠦᠷ ᠳᠤᠲᠠᠭᠠᠵᠤ ᠭᠠᠷᠤᠭᠠᠳ ᠬᠥᠮᠦᠨ ᠦ᠌ ᠬᠣᠨᠢᠨ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠬᠦᠷᠪᠡᠯ ᠴᠢ ᠲᠥᠯᠥᠪᠦᠷᠢ ᠳ᠋ᠦ᠍ ᠣᠷᠣᠨᠠ ᠰᠢᠦ᠂ ᠠᠯᠠᠭᠰᠠᠨ ᠳ᠋ᠠᠭᠠᠨ ᠳᠡᠭᠡᠷᠡ!
— ᠲᠠ ᠨᠠᠷ ᠤ᠋ᠨ ᠱᠠᠰᠢᠨ ᠳ᠋ᠤ᠌ ᠨᠢᠯᠬᠠ ᠠᠮᠢᠲᠠᠨ ᠢ᠋ ᠠᠯᠠᠵᠤ ᠪᠣᠯᠤᠨᠠ ᠭᠡᠵᠦ ᠲᠣᠭᠲᠠᠭᠠᠭᠰᠠᠨ ᠵᠦᠢᠯ ᠪᠠᠢᠨᠠ ᠤᠤ?
— ᠴᠢᠨᠣᠠ ᠪᠢᠳᠡᠨ ᠦ᠌ ᠬᠣᠨᠢᠳ ᠢ᠋ ᠲᠠᠲᠠᠭᠰᠠᠨ ᠢ᠋ ᠪᠤᠷᠬᠠᠨ ᠴᠤ᠌ ᠮᠡᠳᠡᠨᠡ ᠰᠢᠦ ᠳᠡ᠃ ᠨᠢᠭᠡ ᠴᠢᠨᠣᠠ ᠪᠣᠯᠤᠨ ᠠᠷᠪᠠᠨ ᠬᠣᠨᠢᠨ ᠤ᠋ ᠠᠯᠢ ᠨᠢ ᠬᠡᠷᠡᠭ ᠲᠡᠢ ᠪᠣᠢ? ᠮᠥᠨ ᠲᠡᠭᠡᠭᠡᠳ ᠪᠢᠳᠡ ᠠᠩ ᠤ᠋ᠨ ᠳᠠᠷᠠᠭᠠ ᠡᠳᠦᠷ ᠨᠢ ᠪᠤᠷᠬᠠᠨ ᠢ᠋ᠶ᠋ᠠᠨ ᠲᠤᠲᠤᠷᠭᠠ ᠪᠣᠯᠤᠨ ᠮᠢᠬᠠ ᠪᠠᠷ ᠳᠠᠬᠢᠳᠠᠭ ᠰᠢᠦ ᠳᠡ᠃ ᠶᠠᠭᠤ ᠭᠡᠵᠦ ᠪᠤᠷᠬᠠᠨ ᠪᠢᠳᠡᠨ ᠤ ᠬᠣᠶᠠᠷ ᠴᠢᠨᠣᠠ ᠪᠠ ᠳᠥᠷᠪᠡᠨ ᠪᠡᠯᠲᠡᠷᠭᠡ ᠠᠯᠠᠭᠰᠠᠨ ᠳ᠋ᠤ᠌ ᠠᠭᠤᠷᠯᠠᠨ ᠬᠢᠯᠢᠩᠨᠡᠬᠦ ᠪᠢᠯᠡ? ᠭᠡᠵᠦ ᠷᠠᠰᠢ ᠪᠠᠲᠤᠲᠠᠢ ᠬᠡᠯᠡᠯᠡ᠃