ᠶᠠᠭᠠᠷᠠᠪᠠᠯ ᠰᠠᠭᠠᠷᠠᠨᠠ- ᠭ· ᠴᠢᠩᠪᠠᠭᠠᠲᠤᠷЯарвал саарна-Г·Чинбаатар Yaarval saarna
662ᠶᠠᠭᠠᠷᠠᠪᠠᠯ ᠰᠠᠭᠠᠷᠠᠨᠠ
— ᠮᠣᠩᠭᠣᠯ ᠪᠥᠬᠡ ᠶ᠋ᠢ ᠳᠦᠷᠢᠮᠵᠢᠭᠦᠯᠬᠦ ᠲᠤᠬᠠᠢ ᠮᠢᠨᠦ ᠪᠣᠳᠣᠯ
ᠭ᠂ ᠴᠢᠩᠪᠠᠭᠠᠲᠤᠷ
ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠳᠦᠷᠢᠮ ᠭᠣᠷᠢᠮ᠂ ᠡᠮᠦᠰᠬᠡᠯ ᠵᠡᠭᠦᠭᠡᠯ ᠢ᠋ ᠣᠯᠠᠨ ᠤᠯᠤᠰ ᠤ᠋ᠨ ᠪᠥᠬᠡ ᠲᠡᠢ ᠣᠢᠷᠠᠲᠤᠭᠤᠯᠤᠨ᠂ ᠮᠣᠩᠭᠣᠯ ᠪᠥᠬᠡ ᠪᠡᠨ ᠳᠡᠯᠡᠬᠡᠢ ᠶ᠋ᠢᠨ ᠳᠡᠪᠵᠢᠶᠡᠨ ᠳ᠋ᠦ᠍ ᠵᠣᠳᠣᠭᠯᠠᠭᠤᠯᠬᠤ ᠭᠡᠰᠡᠨ ᠢᠳᠡᠪᠬᠢᠲᠡᠢ ᠠᠲᠠᠯᠠ ᠪᠠᠨ ᠳᠤᠲᠠᠭᠳᠠᠯ ᠲᠠᠢ ᠰᠠᠨᠠᠭᠠᠴᠢᠯᠠᠭᠠ ᠰᠡᠭᠦᠯ ᠦ᠋ᠨ ᠵᠢᠯ ᠦ᠋ᠳ ᠲᠦ᠍ ᠶᠡᠬᠡ ᠶᠠᠷᠢᠭᠳᠠᠬᠤ ᠪᠣᠯᠤᠯᠠ᠃ ᠶᠠᠭᠠᠬᠢᠭᠠᠳ ᠢᠳᠡᠪᠬᠢᠲᠡᠢ ᠠᠲᠠᠯᠠ ᠪᠠᠨ ᠳᠤᠲᠠᠭᠳᠠᠯ ᠲᠠᠢ ᠶᠤᠮ ᠪᠣᠢ? ᠭᠡᠪᠡᠯ᠂ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠡᠦᠬᠡ ᠲᠡᠢ ᠤᠷᠠᠨ ᠪᠠᠷᠢᠯᠳᠤᠭᠠᠨ ᠤ᠋ ᠰᠣᠶᠣᠯ ᠢ᠋ᠶ᠋ᠠᠨ ᠳᠡᠯᠡᠬᠡᠢ ᠶ᠋ᠢᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠦᠭᠡᠮᠡᠯᠵᠢᠭᠦᠯᠦᠨᠡ ᠭᠡᠳᠡᠭ ᠡᠭᠦᠳᠡᠨ ᠡᠴᠡ ᠣᠢᠯᠠᠭᠠᠪᠠᠯ ᠢᠳᠡᠪᠬᠢᠲᠡᠢ ᠯᠡ ᠰᠠᠨᠠᠭᠠᠴᠢᠯᠠᠭᠠ᠃ ᠭᠡᠪᠡᠴᠦ ᠮᠣᠩᠭᠣᠯ ᠪᠥᠬᠡ ᠪᠡᠨ ᠶᠠᠭᠠᠬᠢᠵᠤ ᠥᠭᠡᠷᠡᠴᠢᠯᠡᠨ᠂ ᠤᠯᠠᠮᠵᠢᠯᠠᠯ ᠢ᠋ ᠨᠢ ᠶᠠᠮᠠᠷ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠲᠡᠯᠡ ᠬᠠᠳᠠᠭᠠᠯᠠᠬᠤ ᠪᠣᠢ? ᠭᠡᠳᠡᠭ ᠲᠦ᠍ ᠤᠭ ᠰᠠᠨᠠᠭᠠᠴᠢᠯᠠᠭᠠ ᠶ᠋ᠢᠨ ᠵᠠᠷᠢᠮ ᠳᠤᠲᠠᠭᠳᠠᠯ ᠲᠠᠢ ᠲᠠᠯᠠ ᠠᠩᠬᠠᠷᠤᠭᠳᠠᠨᠠ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠳᠡᠯᠡᠬᠡᠢ ᠳ᠋ᠦ᠍ ᠵᠣᠳᠣᠭᠯᠠᠭᠰᠠᠨ ᠮᠣᠩᠭᠣᠯ ᠪᠥᠬᠡ ᠴᠢᠨᠢ ᠤᠯᠠᠮᠵᠢᠯᠠᠯ ᠤ᠋ᠨ ᠶᠠᠮᠠᠷ ᠣᠨᠴᠠᠯᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠪᠥᠬᠡ ᠡᠴᠡ ᠣᠨᠴᠠᠯᠢᠬᠳᠠᠬᠤ ᠭᠡᠳᠡᠭ ᠡᠭᠡᠵᠢᠭ ᠲᠡᠢ ᠠᠰᠠᠭᠤᠳᠠᠯ ᠲᠠᠯᠪᠢᠭᠳᠠᠨᠠ᠃ ᠨᠢᠭᠡ ᠦᠨᠳᠦᠰᠦᠲᠡᠨ ᠦ᠌ ᠤᠯᠠᠮᠵᠢᠯᠠᠯᠲᠤ ᠪᠡᠶᠡ ᠲᠠᠮᠢᠷ ᠤ᠋ᠨ ᠵᠦᠢᠯ ᠨᠢ ᠣᠳᠣᠬᠢ ᠳᠡᠯᠡᠬᠡᠢ ᠶ᠋ᠢᠨ ᠰᠫᠣᠷᠲ ᠲᠤ᠌ ᠠᠶᠠᠯᠳᠤᠵᠤ ᠴᠢᠳᠠᠭᠰᠠᠨ ᠡᠰᠡᠬᠦ ᠪᠡᠷ ᠢ᠋ᠶ᠋ᠡᠨ ᠬᠥᠭᠵᠢᠯ ᠲᠡᠢ ᠡᠰᠡᠬᠦ ᠨᠢ ᠲᠣᠭᠲᠠᠭᠠᠭᠳᠠᠳᠠᠭ ᠪᠢᠰᠢ᠂ ᠬᠠᠷᠢᠨ ᠲᠡᠳᠡᠭᠡᠷ ᠰᠫᠣᠷᠲ ᠤ᠋ᠨ ᠳᠤᠲᠠᠭᠳᠠᠯ ᠲᠠᠢ ᠲᠠᠯᠠ ᠶ᠋ᠢ ᠶᠠᠮᠠᠷ ᠨᠢᠭᠡᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠲᠡᠪᠴᠢᠵᠦ ᠴᠢᠳᠠᠭᠰᠠᠨ ᠪᠠᠢᠬᠤ ᠪᠠ ᠥᠪᠡᠷ ᠦ᠋ᠨ ᠰᠣᠶᠣᠯ ᠤᠯᠠᠮᠵᠢᠯᠠᠯ ᠤ᠋ᠨ ᠣᠨᠴᠠᠯᠢᠭ ᠢ᠋ᠶ᠋ᠠᠨ ᠬᠡᠳᠦᠢ ᠬᠡᠮᠵᠢᠶᠡ ᠪᠡᠷ ᠬᠠᠳᠠᠭᠠᠯᠠᠵᠤ ᠴᠢᠳᠠᠵᠤ ᠪᠠᠢᠭᠠ ᠪᠣᠢ? ᠭᠡᠳᠡᠭ ᠢ᠋ᠶ᠋ᠡᠷ ᠥᠪᠡᠷ ᠦ᠋ᠨ ᠪᠠᠬᠠᠷᠬᠠᠯ ᠲᠠᠢ ᠲᠠᠯᠠ ᠪᠠᠨ ᠭᠠᠢᠬᠠᠭᠤᠯᠳᠠᠭ ᠤᠴᠢᠷᠲᠠᠢ᠃ ᠦᠨᠳᠦᠰᠦᠲᠡᠨ ᠦ᠌ ᠪᠥᠬᠡ ᠭᠡᠳᠡᠭ ᠨᠢ ᠴᠦ᠍ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠤ᠋ᠨ ᠢᠮ ᠲᠠᠮᠠᠭᠠ ᠪᠠᠨ ᠪᠦᠷᠢᠨ ᠬᠠᠳᠠᠭᠠᠯᠠᠵᠤ ᠴᠢᠳᠠᠭᠰᠠᠨ ᠪᠠᠢᠬᠤ ᠬᠡᠷᠡᠭᠲᠡᠢ᠃
ᠵᠢᠵᠢᠭᠬᠡᠨ ᠲᠣᠰᠬᠣᠨ ᠤ᠋ ᠬᠡᠪᠴᠢᠶᠡᠨ ᠳ᠋ᠦ᠍ ᠪᠠᠷᠢᠯᠳᠤᠳᠠᠭ ᠪᠠᠢᠭᠰᠠᠨ ᠶᠠᠫᠣᠨᠴᠤᠳ ᠤ᠋ᠨ ᠵᠢᠤᠳᠣᠣ ᠪᠥᠬᠡ ᠨᠢ ᠤᠯᠠᠮᠵᠢᠯᠠᠯᠲᠤ ᠳᠦᠷᠢᠮ ᠭᠣᠷᠢᠮ᠂ ᠡᠮᠦᠰᠬᠡᠯ ᠵᠡᠭᠦᠭᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠡᠯᠡᠬᠡᠢ ᠳ᠋ᠦ᠍ ᠲᠦᠭᠡᠮᠡᠯᠵᠢᠵᠦ᠂ ᠤᠯᠢᠮᠫᠢᠺ ᠤ᠋ᠨ ᠴᠤᠭᠯᠠᠭᠠᠨ ᠤ᠋ ᠵᠢᠦᠳᠣᠣ ᠶ᠋ᠢᠨ ᠮᠥᠷᠥᠢᠴᠡᠭᠡᠨ ᠦ᠌ ᠬᠤᠪᠢ ᠶᠢ ᠴᠤ ᠶᠠᠫᠣᠨ ᠢ᠋ᠶ᠋ᠠᠷ ᠲᠡᠮᠳᠡᠭᠯᠡᠳᠡᠭ ᠲᠡᠢ ᠬᠠᠷᠢᠴᠠᠭᠤᠯᠤᠨ ᠰᠠᠨᠠᠪᠠᠰᠤ᠂ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠡᠦᠬᠡ ᠲᠡᠢ᠂ ᠣᠳᠣ ᠦᠶᠡ ᠶ᠋ᠢᠨ ᠪᠡᠶᠡ ᠲᠠᠮᠢᠷ ᠤ᠋ᠨ ᠥᠷᠢᠰᠥᠯᠳᠥᠭᠡᠨᠲᠦ ᠴᠢᠨᠠᠷ ᠢ᠋ ᠪᠦᠷᠢᠨᠡ ᠬᠠᠳᠠᠭᠠᠯᠠᠭᠰᠠᠨ ᠪᠦᠬᠦ ᠠᠷᠠᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠷᠣᠯᠴᠠᠵᠤ ᠪᠣᠯᠬᠤ᠂ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠤ᠋ᠨ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠨ ᠢᠯᠡᠷᠬᠡᠢ ᠭᠠᠢᠬᠠᠭᠤᠯᠤᠭᠰᠠᠨ ᠮᠥᠷᠲᠡᠭᠡᠨ ᠨᠡᠯᠢᠶᠡᠳ ᠳᠦᠷᠢᠮᠵᠢᠭᠰᠡᠨ ᠮᠣᠩᠭᠣᠯ ᠪᠥᠬᠡ ᠮᠠᠨᠢ ᠴᠤ ᠳᠡᠯᠡᠬᠡᠢ ᠳ᠋ᠦ᠍ ᠳᠡᠪᠢᠬᠦ ᠪᠣᠯᠤᠮᠵᠢ ᠪᠣᠢ ᠭᠡᠳᠡᠭ ᠢᠲᠡᠭᠡᠯ ᠠᠷᠭᠠ ᠦᠭᠡᠢ ᠯᠡ ᠲᠥᠷᠥᠨᠡ᠃
ᠭᠡᠬᠦ ᠳ᠋ᠡᠭᠡᠨ᠂ ᠶᠠᠮᠠᠷ ᠴᠤ ᠨᠢᠭᠡ ᠪᠡᠶᠡ ᠲᠠᠮᠢᠷ ᠤ᠋ᠨ ᠵᠦᠢᠯ ᠨᠢ ᠤᠷᠢᠳ ᠢ᠋ᠶ᠋ᠠᠷ ᠥᠪᠡᠷ ᠦ᠋ᠨ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠬᠡᠪᠴᠢᠶᠡᠨ ᠳ᠋ᠦ᠍ ᠳᠦᠷᠢᠮᠵᠢᠭᠰᠡᠨ ᠤᠷᠢᠳᠠᠯ ᠳᠣᠣᠷᠠ ᠯᠠ ᠨᠡᠩ ᠳᠡᠯᠭᠡᠷ ᠲᠦᠭᠡᠮᠡᠯᠵᠢᠬᠦ ᠨᠥᠬᠥᠴᠡᠯ ᠪᠦᠷᠢᠳᠦᠨᠡ᠃ ᠭᠡᠪᠡᠴᠦ᠂ ᠮᠠᠨ ᠤ᠋ ᠮᠣᠩᠭᠣᠯ ᠪᠥᠬᠡ ᠣᠷᠣᠨ ᠤ᠋ ᠪᠠᠨ ᠬᠡᠮᠵᠢᠶᠡᠨ ᠳ᠋ᠦ᠍ ᠳᠦᠷᠢᠮᠵᠢᠵᠦ ᠴᠢᠳᠠᠭᠠ ᠦᠭᠡᠢ ᠰᠢᠦ ᠳᠡ! ᠡᠨᠡ ᠬᠦ᠌ ᠳᠦᠷᠢᠮᠵᠢᠯ ᠦ᠋ᠨ ᠲᠤᠬᠠᠢ ᠳ᠋ᠤ᠌·ᠭᠣᠯᠮᠢᠨ· ᠢ᠊· ᠲᠦᠪᠰᠢᠨ᠂ ᠣ᠊· ᠬᠦᠷᠡᠯᠪᠠᠭᠠᠲᠤᠷ᠂ ᠥᠯᠵᠡᠢᠲᠦ᠂ ᠲᠣᠯᠤᠲᠤ᠂ ᠪ᠂ ᠢᠵᠢᠯ ᠨᠠᠷ ᠵᠣᠬᠢᠶᠠᠯ ᠨᠡᠢᠲᠡᠯᠡᠭᠦᠯᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠪᠠ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠷᠠᠳᠢᠣ᠋ ᠶ᠋ᠢᠨ《ᠦᠳᠡᠰᠢ ᠶ᠋ᠢᠨ ᠴᠢᠯᠥᠭᠡ》 ᠰᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠪᠡᠷ ᠪᠥᠬᠡ ᠶ᠋ᠢᠨ ᠶᠡᠬᠡ ᠪᠠᠭᠰᠢ ᠡᠷᠳᠡᠨᠢᠪᠠᠶᠠᠷ᠂ ᠪᠥᠬᠡ ᠰᠤᠳᠤᠯᠤᠭᠠᠴᠢ ᠬᠠᠲᠠᠭᠢᠨ ᠷᠠᠰᠢᠴᠡᠷᠢᠨ᠂ ᠴᠢᠯᠥᠭᠡᠲᠦ ᠪᠥᠬᠡ ᠶ᠋ᠢᠨ ᠳᠠᠰᠬᠠᠯᠵᠢᠭᠤᠯᠤᠭᠴᠢ᠂ ᠮᠢᠩᠭᠠᠨ ᠪᠥᠬᠡ ᠶ᠋ᠢᠨ ᠠᠪᠤᠷᠭᠤ ᠪᠠᠽᠠᠷᠭᠠᠭᠳ᠋ ᠨᠠᠷ ᠲᠤᠰᠬᠠᠢ ᠶᠠᠷᠢᠯᠴᠠᠭᠠ ᠥᠭᠭᠦᠭᠰᠡᠨ ᠪᠠᠢᠨᠠ᠃
ᠡᠳᠡᠭᠡᠷ ᠢ᠋ ᠠᠩᠬᠠᠷᠬᠤ ᠳ᠋ᠤ᠌᠄ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠵᠠᠩᠭᠢᠶᠠ᠂ ᠳᠤᠯᠢᠶᠠ᠂ ᠵᠣᠳᠣᠭ ᠂ ᠯᠠᠪᠠᠷᠢ ᠵᠡᠷᠭᠡ ᠡᠮᠦᠰᠬᠡᠯ ᠵᠡᠭᠦᠭᠡᠯ ᠢ᠋ ᠦᠯᠡᠳᠡᠭᠡᠨᠡ ᠤᠤ? ᠦᠭᠡᠢ ᠤᠤ? ᠴᠠᠭ ᠦᠭᠡᠢ ᠤᠶᠠᠵᠤ ᠪᠠᠷᠢᠯᠳᠤᠬᠤ᠂ ᠳᠡᠰ ᠦ᠋ᠨ ᠢᠯᠭᠠᠮᠵᠢ ᠦᠭᠡᠢ ᠪᠠᠷᠢᠯᠳᠤᠬᠤ᠂ ᠤᠨᠤᠭᠠ ᠲᠠᠭᠠᠷᠠᠭᠤᠯᠬᠤ᠁ ᠵᠡᠷᠭᠡ ᠬᠡᠪᠰᠢᠭᠰᠡᠨ ᠤᠯᠠᠮᠵᠢᠯᠠᠯ ᠢ᠋ ᠬᠠᠯᠠᠨᠠ ᠤᠤ? ᠦᠭᠡᠢ ᠤᠤ? ᠴᠠᠭᠠᠷᠢᠭ ᠲᠦᠯᠬᠢᠬᠦ᠂ ᠵᠣᠭᠣᠰ ᠣᠷᠬᠢᠬᠤ᠂ ᠴᠠᠭ ᠬᠢᠵᠠᠭᠠᠷᠯᠠᠬᠤ ᠭᠡᠬᠦᠴᠢᠯᠡᠨ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠳᠦᠷᠢᠮ ᠨᠦ᠍ᠭᠦᠳ ᠢ᠋ ᠬᠡᠪ ᠢ᠋ᠶ᠋ᠡᠷ ᠨᠢ ᠪᠠᠢᠯᠭᠠᠨᠠ ᠤᠤ? ᠦᠭᠡᠢ ᠤᠤ? ᠪᠠᠷᠢᠯᠳᠤᠬᠤ ᠠ᠋ᠴᠠ ᠡᠮᠦᠨᠡ ᠭᠠᠷ ᠠᠳᠬᠤᠯᠴᠠᠬᠤ ᠡᠰᠡᠬᠦ᠂ ᠬᠢᠨᠠᠭᠴᠢ ᠶ᠋ᠢᠨ ᠳᠦᠷᠢᠮ ᠢ᠋ ᠶᠠᠭᠠᠬᠢᠵᠤ ᠲᠡᠭᠦᠯᠳᠡᠷᠵᠢᠭᠦᠯᠬᠦ ᠵᠡᠷᠭᠡ ᠠᠰᠠᠭᠤᠳᠠᠯ ᠤ᠋ᠨ ᠲᠣᠭᠣᠷᠢᠨ ᠳ᠋ᠤ᠌ ᠲᠥᠪᠯᠡᠷᠡᠵᠦ ᠪᠣᠢ᠃ ᠡᠳᠡᠭᠡᠷ ᠨᠢ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠤᠯᠠᠮᠵᠢᠯᠠᠯ ᠢ᠋ ᠬᠠᠳᠠᠭᠠᠯᠠᠵᠤ ᠪᠠᠢᠭᠠ ᠴᠢᠬᠤᠯᠠ ᠵᠦᠢᠯ ᠪᠣᠯᠬᠤ ᠶ᠋ᠢᠨ ᠤᠯᠠᠮ ᠳ᠋ᠤ᠌ ᠨᠡᠩ ᠴᠦ᠍ ᠬᠢᠨᠠᠮᠠᠭᠠᠢ ᠬᠠᠨᠳᠤᠬᠤ ᠬᠡᠷᠡᠭᠲᠡᠢ᠃ ᠮᠣᠩᠭᠣᠯ ᠪᠥᠬᠡ ᠨᠢ ᠭᠠᠭᠴᠠ ᠪᠠᠷᠢᠯᠳᠤᠭᠠᠨ ᠢ᠋ᠶ᠋ᠠᠷ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠡᠪᠦᠳᠦᠭ ᠡᠴᠡ ᠳᠡᠭᠡᠭᠰᠢ ᠪᠡᠶᠡ ᠶ᠋ᠢᠨ ᠠᠯᠢ ᠴᠤ ᠨᠢᠭᠡ ᠬᠡᠰᠡᠭ ᠰᠢᠷᠣᠢᠲᠤᠪᠠᠯ ᠬᠠᠶᠠᠭᠳᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠳᠠᠭ ᠪᠣᠯᠬᠣᠷ ᠡᠷᠬᠡᠪᠰᠢ ᠬᠢᠨᠠᠭᠤᠷ ᠲᠡᠪᠴᠢᠶᠡᠷᠢ ᠲᠡᠢ ᠪᠠᠷᠢᠯᠳᠤᠬᠤ ᠬᠡᠷᠡᠭᠲᠡᠢ᠃ ᠡᠭᠦᠨ ᠡᠴᠡ ᠪᠡᠨ ᠪᠣᠯᠤᠭᠠᠳ᠂ ᠮᠣᠩᠭᠣᠯ ᠪᠥᠬᠡ ᠨᠢ ᠴᠠᠭ ᠤ᠋ᠨ ᠬᠢᠵᠠᠭᠠᠷ ᠪᠠᠢᠳᠠᠭ ᠦᠭᠡᠢ ᠪᠤᠶᠤ ᠤᠶᠠᠵᠤ ᠪᠠᠷᠢᠯᠳᠤᠵᠤ ᠪᠣᠯᠳᠠᠭ᠃ ᠭᠡᠪᠡᠴᠦ᠂ ᠮᠣᠩᠭᠣᠯ ᠪᠥᠬᠡ ᠮᠠᠨᠢ ᠨᠡᠭᠡᠷᠡᠨ ᠣᠯᠠᠨ ᠤᠯᠤᠰ ᠤ᠋ᠨ ᠰᠫᠣᠷᠲ ᠲᠤ ᠣᠷᠣᠪᠠᠯ ᠲᠠᠮᠢᠷ ᠤ᠋ᠨ ᠴᠤᠭᠯᠠᠭᠠᠨ ᠤ᠋ ᠲᠣᠪᠯᠠᠭᠰᠠᠨ ᠡᠳᠦᠷ ᠬᠤᠭᠤᠴᠠᠭᠠ᠂ ᠡᠮᠬᠢ ᠵᠢᠷᠤᠮ ᠶᠣᠰᠣᠭᠠᠷ ᠴᠠᠭ ᠤ᠋ᠨ ᠬᠢᠵᠠᠭᠠᠷ ᠲᠠᠢ ᠪᠣᠯᠬᠤ ᠨᠢ ᠶᠠᠷᠢᠶᠠᠨ ᠦᠭᠡᠢ᠃ ᠵᠢᠦᠳᠣᠣ ᠮᠡᠲᠦ ᠶ᠋ᠢᠨ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠪᠥᠬᠡ ᠨᠢ ᠲᠠᠪᠤᠨ ᠮᠢᠨᠦ᠋ᠲ ᠭᠡᠬᠦᠴᠢᠯᠡᠨ ᠬᠢᠵᠠᠭᠠᠷᠯᠠᠵᠤ᠂ ᠢᠳᠡᠪᠬᠢ ᠨᠠᠵᠠᠭᠠᠢ ᠪᠠᠷᠢᠯᠳᠤᠭᠰᠠᠨ ᠢ᠋ᠶ᠋ᠠᠷ ᠨᠢ ᠬᠤᠪᠢ ᠲᠡᠮᠳᠡᠭᠯᠡᠨ᠂ ᠬᠠᠢᠨᠴᠠᠪᠠᠯ (ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠬᠠᠢᠨᠴᠠᠯ ᠲᠠᠢ ᠠᠳᠠᠯᠢ ᠦᠭᠡᠢ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠬᠡᠷᠡᠭᠲᠡᠢ) ᠴᠠᠭ ᠨᠡᠮᠡᠳᠡᠭ ᠪᠣᠯᠬᠣᠷ ᠡᠨᠡᠴᠢᠯᠡᠨ ᠳᠦᠷᠢᠮᠵᠢᠭᠦᠯᠪᠡᠯ ᠶᠠᠭᠠᠬᠢᠭᠰᠠᠨ ᠪᠣᠢ ᠭᠡᠵᠦ ᠪᠡᠯᠡᠨᠴᠢᠯᠡᠵᠦ ᠮᠡᠳᠡᠨᠡ᠃ ᠭᠡᠪᠡᠴᠦ ᠮᠣᠩᠭᠣᠯ ᠪᠥᠬᠡ ᠨᠢ ᠬᠤᠪᠢ ᠲᠡᠮᠳᠡᠭᠯᠡᠬᠦ ᠪᠡᠷ ᠪᠢᠰᠢ᠂ ᠵᠠᠪᠠᠯ ᠡᠪᠦᠳᠦᠭ ᠰᠢᠷᠣᠢᠲᠤᠭᠤᠯᠬᠤ ᠪᠠᠷ ᠯᠠ ᠢᠯᠭᠠᠷᠠᠳᠠᠭ ᠪᠣᠯᠬᠣᠷ ᠲᠠᠪᠤᠨ ᠮᠢᠨᠦ᠋ᠲ ᠦ᠋ᠨ ᠬᠢᠵᠠᠭᠠᠷ ᠪᠠ ᠬᠤᠪᠢ ᠲᠡᠮᠳᠡᠭᠯᠡᠬᠦ ᠲᠣᠬᠢᠷᠠᠮᠵᠢ ᠦᠭᠡᠢ ᠭᠡᠳᠡᠭ ᠨᠢ ᠢᠯᠡᠷᠬᠡᠢ᠃ ᠲᠡᠭᠡᠬᠦᠯᠡᠷ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠪᠠᠷᠢᠯᠳᠤᠭᠠᠨ ᠳ᠋ᠤ᠌ ᠲᠣᠬᠢᠷᠠᠭᠰᠠᠨ ᠬᠠᠩᠭᠠᠯᠲᠠᠲᠠᠢ ᠴᠠᠭ ᠲᠣᠭᠲᠠᠭᠠᠨ᠂ ᠬᠠᠢᠨᠴᠠᠬᠤ ᠪᠤᠶᠤ ᠴᠠᠭ ᠬᠡᠲᠦᠷᠡᠪᠡᠯ ᠵᠣᠬᠢᠰᠲᠠᠢ ᠳᠦᠷᠢᠮᠵᠢᠭᠦᠯᠦᠭᠰᠡᠨ ᠠᠷᠭᠠ ᠪᠠᠷ ᠳ᠋ᠦ᠋ᠩ ᠭᠠᠷᠭᠠᠪᠠᠯ ᠵᠦᠢᠲᠡᠢ!
ᠰᠡᠭᠦᠯ ᠦ᠋ᠨ ᠦᠶᠡ ᠪᠡᠷ ᠵᠠᠷᠢᠮ ᠨᠠᠢᠷ ᠨᠠᠭᠠᠳᠤᠮ ᠳᠡᠭᠡᠷᠡ ᠵᠣᠭᠣᠰ ᠣᠷᠬᠢᠬᠤ᠂ ᠴᠠᠭᠠᠷᠢᠭ ᠲᠤ ᠪᠠᠷᠢᠯᠳᠤᠭᠤᠯᠬᠤ ᠵᠡᠷᠭᠡ ᠪᠡᠷ ᠰᠢᠢᠳᠪᠦᠷᠢᠯᠡᠳᠡᠭ ᠪᠠᠢᠭᠰᠠᠨ ᠨᠢ ᠪᠣᠯᠣᠮᠵᠢᠲᠠᠢ ᠠᠷᠭᠠ ᠪᠢᠰᠢ ᠶᠦᠮ᠃ ᠨᠡᠩ ᠴᠦ᠍ ᠵᠣᠭᠣᠰ ᠣᠷᠬᠢᠬᠤ ᠨᠢ ᠶᠠᠮᠠᠷ ᠴᠤ ᠲᠥᠷᠥᠯ ᠦ᠋ᠨ ᠮᠥᠷᠥᠢᠴᠡᠭᠡᠨ ᠦ᠌ ᠳᠦᠷᠢᠮ ᠳ᠋ᠦ᠍ ᠪᠠᠢᠵᠤ ᠪᠣᠯᠣᠰᠢ ᠦᠭᠡᠢ ᠵᠦᠢᠯ᠃ ᠴᠠᠭᠠᠷᠢᠭ ᠲᠤ ᠪᠠᠷᠢᠯᠳᠤᠭᠤᠯᠬᠤ ᠲᠣᠬᠢᠶᠠᠯᠳᠤᠯ ᠳ᠋ᠤ᠌᠂ ᠬᠦᠨᠳᠦ ᠪᠡᠶᠡ ᠲᠡᠢ᠂ ᠴᠢᠳᠠᠯ ᠢ᠋ᠶ᠋ᠠᠷ ᠭᠠᠷᠭᠠᠭᠤᠳᠠ ᠨᠢ ᠨᠥᠭᠥᠭᠡᠳᠡᠬᠢ ᠪᠡᠨ ᠬᠠᠷᠠ ᠮᠤᠨᠠᠢᠳ ᠢ᠋ᠶ᠋ᠠᠷ ᠲᠦᠯᠬᠢᠬᠦ ᠳ᠋ᠦ᠍ ᠯᠡ ᠠᠰᠢᠭᠲᠠᠢ ᠪᠠᠢᠵᠤ᠂ ᠬᠢᠴᠡ ᠶ᠋ᠢᠨ ᠤᠷᠠᠨ᠂ ᠤᠬᠠᠭᠠᠨ ᠤ᠋ ᠲᠠᠮᠢᠷ᠂ ᠵᠣᠷᠢᠭ ᠤ᠋ᠨ ᠲᠡᠪᠴᠢᠶᠡᠷᠢ᠂ ᠬᠦᠴᠦᠨ ᠦ᠌ ᠳᠠᠮ ᠢ᠋ᠶ᠋ᠠᠷ ᠪᠠᠷᠢᠯᠳᠤᠳᠠᠭ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠪᠠᠷᠢᠯᠳᠤᠭᠠᠨ ᠳ᠋ᠤ᠌ ᠲᠣᠬᠢᠷᠠᠮᠵᠢᠲᠠᠢ ᠪᠢᠰᠢ᠃ ᠡᠨᠡ ᠨᠢ ᠶᠠᠫᠣᠨ ᠤ ᠰᠦᠮᠦᠦ ᠪᠥᠬᠡ ᠶ᠋ᠢᠨ ᠳᠦᠷᠢᠮ ᠢ᠋ ᠮᠢᠬᠠᠴᠢᠯᠠᠨ ᠳᠠᠭᠤᠷᠢᠶᠠᠭᠰᠠᠨ ᠳᠦᠷᠢᠮ ᠪᠠᠢᠵᠤ᠂ ᠳᠡᠰ ᠦ᠋ᠨ ᠢᠯᠭᠠᠮᠵᠢ ᠦᠭᠡᠢ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠤᠯᠠᠮᠵᠢᠯᠠᠯ ᠲᠠᠢ ᠨᠡᠢᠴᠡᠪᠦᠷᠢ ᠦᠭᠡᠢ ᠶ᠋ᠢᠨ ᠬᠠᠷᠠᠭᠠ ᠪᠠᠷ ᠵᠠᠷᠢᠮ ᠪᠥᠬᠡᠴᠦᠳ ᠬᠡᠳᠦᠨ ᠨᠤᠭᠤᠯᠤᠭᠠ ᠴᠠᠭᠠᠷᠢᠭ ᠲᠦᠯᠬᠢᠨ ᠢᠯᠠᠵᠤ ᠱᠠᠩ ᠳ᠋ᠤ᠌ ᠬᠦᠷᠴᠦ ᠪᠠᠢᠭᠰᠠᠨ ᠵᠢᠱ᠌ᠢᠶᠡ ᠲᠡᠢ᠃ ᠲᠡᠭᠡᠪᠡᠯ ᠶᠠᠭᠠᠬᠢᠬᠤ ᠪᠣᠢ? ᠬᠣᠶᠠᠷ ᠪᠥᠬᠡᠴᠢᠨ ᠦ᠌ ᠨᠢᠷᠤᠭᠤ ᠶ᠋ᠢ ᠨᠢ ᠡᠭᠦᠷᠦᠭᠦᠯᠵᠦ ᠴᠡᠭᠡᠵᠢ ᠪᠡᠷ ᠨᠢ ᠢᠪᠡᠯᠴᠡᠭᠦᠯᠤᠨ ᠬᠥᠯ ᠢ᠋ᠶ᠋ᠡᠷ ᠪᠠᠷᠢᠯᠳᠤᠭᠤᠯᠬᠤ ᠵᠡᠷᠭᠡ ᠠᠷᠭᠠ ᠶ᠋ᠢ ᠵᠠᠷᠢᠮ ᠨᠠᠢᠷ ᠨᠠᠭᠠᠳᠤᠮ ᠳᠡᠭᠡᠷᠡ ᠬᠡᠷᠡᠭᠯᠡᠳᠡᠭ ᠪᠠᠢᠭᠰᠠᠨ ᠢ᠋ ᠲᠤᠷᠰᠢᠵᠤ ᠪᠣᠯᠤᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠶᠠᠮᠠᠷ ᠴᠤ ᠠᠷᠭᠠ ᠰᠡᠳᠦᠯᠡ ᠭᠡᠳ ᠳᠡᠰ ᠢᠯᠭᠠᠬᠤ ᠦᠭᠡᠢ ᠲᠡᠷᠡ ᠨᠥᠬᠥᠴᠡᠯ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠪᠠᠢᠬᠤ ᠨᠢ ᠴᠢᠬᠤᠯᠠ᠃
ᠣᠯᠠᠨ ᠬᠥᠮᠦᠰ ᠤᠶᠠᠭᠠ ᠪᠠᠷᠢᠯᠳᠤᠭᠠᠨ ᠢ᠋ ᠥᠭᠡᠢᠬᠢᠬᠦ ᠳ᠋ᠦ᠍ ᠲᠠᠭᠠᠯᠠᠮᠵᠢ ᠮᠠᠭᠤᠲᠠᠢ ᠪᠠᠢᠳᠠᠭ᠃ ᠲᠡᠷᠡ ᠨᠢ ᠮᠣᠩᠭᠣᠯ ᠠᠮᠢᠳᠤᠷᠠᠯ ᠤ᠋ᠨ ᠠᠷᠠᠨᠰᠢᠨ᠂ ᠪᠥᠬᠡ ᠶ᠋ᠢᠨ ᠬᠢᠨᠢ ᠣᠨᠴᠠᠯᠢᠭ ᠠ᠋ᠴᠠ ᠰᠢᠯᠲᠠᠭᠠᠯᠠᠭᠰᠠᠨ ᠤᠯᠠᠮᠵᠢᠯᠠᠯ ᠪᠣᠯᠬᠣᠷ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠪᠠᠲᠤ ᠦᠨᠳᠦᠰᠦ ᠲᠡᠢ ᠨᠢ ᠭᠠᠷᠴᠠᠭᠠ ᠦᠭᠡᠢ᠃ ᠨᠡᠭᠡᠷᠡᠨ ᠮᠣᠩᠭᠣᠯ ᠪᠥᠬᠡ ᠮᠠᠨᠢ ᠳᠡᠯᠡᠬᠡᠢ ᠶ᠋ᠢᠨ ᠰᠫᠣᠷᠲ ᠲᠤ ᠣᠷᠣᠵᠤ᠂ ᠴᠠᠭ ᠤ᠋ᠨ ᠬᠢᠵᠠᠭᠠᠷ ᠲᠠᠢ ᠪᠣᠯᠤᠯᠠ ᠴᠤ ᠭᠡᠰᠡᠨ᠂ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠨᠠᠢᠷ ᠨᠠᠭᠠᠳᠤᠮ ᠳᠡᠭᠡᠷᠡ ᠤᠶᠠᠭᠠ ᠪᠠᠷᠢᠯᠳᠤᠭᠠᠨ ᠢ᠋ ᠦᠯᠡᠳᠡᠭᠡᠵᠦ᠂ ᠪᠥᠬᠡᠴᠦᠳ ᠦ᠋ᠨ ᠢ᠋ᠶ᠋ᠡᠨ ᠲᠠᠮᠢᠷ ᠲᠡᠪᠴᠢᠶᠡᠷᠢ᠂ ᠰᠣᠢᠯᠭᠠ ᠳᠠᠰᠬᠠᠯ ᠢ᠋ ᠪᠣᠯᠪᠠᠰᠤᠷᠠᠭᠤᠯᠬᠤ ᠳ᠋ᠤ᠌ ᠦᠯᠦ ᠪᠣᠯᠬᠤ ᠪᠠᠷ ᠦᠭᠡᠢ᠃ ᠭᠠᠳᠠᠨᠠ ᠶ᠋ᠢᠨ ᠪᠥᠬᠡ ᠶ᠋ᠢ ᠬᠣᠭᠣᠷᠣᠨᠳᠣ ᠨᠢ ᠲᠤᠯᠭᠠᠵᠤ᠂ ᠦᠵᠦ ᠵᠠᠢ ᠳ᠋ᠤ᠌ ᠨᠤᠲᠤᠭ ᠤ᠋ᠨ ᠪᠥᠬᠡ ᠪᠡᠨ ᠦᠯᠡᠳᠡᠭᠡᠵᠦ᠂ ᠪᠥᠬᠡ ᠶ᠋ᠢᠨ ᠬᠡᠢᠮᠣᠷᠢ ᠪᠠᠨ ᠬᠠᠳᠠᠭᠠᠯᠠᠬᠤ ᠰᠡᠳᠬᠢᠯᠭᠡᠨ ᠡᠴᠡ ᠡᠭᠦᠰᠪᠦᠷᠢ ᠲᠡᠢ ᠤᠨᠤᠭᠠ ᠲᠠᠭᠠᠷᠠᠭᠤᠯᠬᠤ ᠦᠵᠡᠭᠳᠡᠯ ᠮᠣᠩᠭᠣᠯ ᠪᠥᠬᠡ ᠳ᠋ᠦ᠍ ᠪᠠᠢᠳᠠᠭ ᠨᠢ ᠪᠠᠷᠢᠯᠳᠤᠭᠠᠨ ᠤ᠋ ᠡᠷᠬᠡ ᠲᠡᠭᠰᠢ ᠥᠷᠢᠰᠦᠯᠳᠦᠭᠡᠨ ᠦ᠌ ᠪᠣᠯᠤᠮᠵᠢ ᠶ᠋ᠢ ᠠᠯᠳᠠᠭᠳᠠᠭᠤᠯᠤᠨ᠂ ᠥᠸᠢᠰᠥᠯᠳᠦᠭᠡᠨᠲᠦ ᠴᠢᠨᠠᠷ ᠢ᠋ ᠨᠥᠯᠥᠭᠡᠯᠡᠵᠦ ᠪᠠᠢᠭᠠ ᠪᠣᠯᠬᠣᠷ ᠴᠣᠬᠣᠮ ᠳ᠋ᠠᠭᠠᠨ ᠰᠢᠪᠠᠭᠠ ᠰᠤᠭᠤᠯᠤᠨ ᠤᠨᠤᠭᠠ ᠠᠪᠬᠤ ᠶᠣᠰᠣᠲᠠᠢ ᠪᠥᠭᠡᠳ ᠳᠡᠯᠡᠬᠡᠢ ᠶ᠋ᠢᠨ ᠲᠡᠮᠡᠴᠡᠭᠡᠨ ᠳ᠋ᠦ᠍ ᠤᠨᠤᠭᠠ ᠶᠠᠭᠠᠬᠢᠵᠤ ᠥᠭᠳᠡᠭ ᠪᠣᠯ ᠲᠡᠷᠡ ᠳᠦᠷᠢᠮ ᠢ᠋ᠶ᠋ᠡᠷ ᠳᠦᠷᠢᠮᠵᠢᠭᠦᠯᠬᠦ ᠨᠢ ᠵᠦᠢ᠃ ᠠᠯᠢᠪᠠ ᠥᠷᠢᠰᠦᠯᠳᠦᠭᠡᠨ ᠨᠢ ᠡᠷᠬᠡ ᠲᠡᠭᠰᠢ ᠰᠠᠭᠤᠷᠢᠨ ᠳᠡᠭᠡᠷᠡ ᠭᠣᠣᠯᠴᠢ ᠪᠠᠷ ᠶᠠᠪᠤᠭᠳᠠᠳᠠᠭ ᠲᠡᠢᠮᠦ ᠴᠠᠭ ᠦᠶᠡ ᠮᠣᠩᠭᠣᠯ ᠪᠥᠬᠡ ᠲᠡᠢ ᠴᠤ ᠨᠢᠭᠤᠷᠯᠠᠵᠤ ᠪᠠᠢᠨᠠ ᠭᠡᠳᠡᠭ ᠢ᠋ ᠮᠡᠳᠡᠷᠡᠬᠦ ᠬᠡᠷᠡᠭᠲᠡᠢ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠵᠠᠷᠢᠮ ᠱᠠᠩᠨᠠᠯᠲᠤ ᠮᠥᠷᠥᠢᠴᠡᠭᠡᠨ ᠨᠢ ᠰᠢᠪᠠᠭᠠ ᠲᠠᠲᠠᠬᠤ ᠬᠡᠯᠪᠡᠷᠢ ᠪᠡᠷ ᠤᠨᠤᠭᠠ ᠥᠭᠴᠦ ᠪᠠᠢᠭᠠ ᠨᠢ ᠳᠦᠷᠢᠮᠵᠢᠯ ᠦ᠋ᠨ ᠠᠩᠬᠠᠨ ᠤ᠋ ᠳᠠᠭᠤᠷᠢᠶᠠᠯ ᠪᠣᠯᠤᠭᠰᠠᠨ ᠭᠡᠯᠲᠡᠢ᠃
ᠮᠣᠩᠭᠣᠯ ᠪᠥᠬᠡ ᠨᠢ ᠮᠥᠨ ᠴᠦ᠍ ᠮᠡᠷᠭᠡᠵᠢᠯ ᠦ᠋ᠨ ᠰᠢᠭᠦᠭᠴᠢ ᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ ᠮᠥᠷᠲᠡᠭᠡᠨ ᠰᠢᠭᠦᠭᠴᠢ ᠶ᠋ᠢᠨ ᠡᠮᠦᠰᠬᠡᠯ ᠵᠡᠭᠦᠭᠡᠯ᠂ ᠳᠣᠬᠢᠶᠠᠯᠠᠬᠤ ᠳᠦᠷᠢᠮ ᠢ᠋ ᠴᠦ᠍ ᠳᠦᠷᠢᠮᠵᠢᠭᠦᠯᠬᠦ ᠨᠢ ᠵᠦᠢ᠃ ᠤᠳᠠᠭᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠮᠡᠷᠭᠡᠵᠢᠯ ᠦ᠋ᠨ ᠰᠢᠭᠦᠭᠴᠢ ᠲᠡᠢ ᠪᠣᠯᠬᠤ ᠠᠰᠠᠭᠤᠳᠠᠯ ᠳ᠋ᠤ᠌ ᠠᠷᠠᠢ ᠣᠮᠲᠣᠭᠠᠢ ᠬᠠᠨᠳᠤᠭᠰᠠᠨ ᠠ᠋ᠴᠠ ᠪᠣᠯᠵᠤ᠂ ᠣᠳᠣ ᠪᠣᠯᠲᠠᠯᠠ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠮᠡᠷᠭᠡᠵᠢᠯ ᠦ᠋ᠨ ᠰᠢᠭᠦᠭᠴᠢ ᠭᠠᠭᠴᠠ ᠴᠤ ᠦᠭᠡᠢ ᠭᠡᠬᠦ ᠳ᠋ᠦ᠍ ᠢᠯᠡᠭᠦᠳᠬᠦ ᠦᠭᠡᠢ ᠪᠠᠢᠬᠠ᠃ ᠰᠢᠭᠦᠭᠴᠢ ᠬᠥᠮᠦᠵᠢᠭᠦᠯᠬᠦ ᠲᠤᠰᠬᠠᠢ ᠰᠤᠷᠭᠠᠭᠤᠯᠢᠯᠠᠯ ᠢ᠋ᠶ᠋ᠠᠷ ᠮᠡᠷᠭᠡᠵᠢᠯ ᠦ᠋ᠨ ᠰᠢᠭᠦᠭᠴᠢ ᠪᠣᠯᠪᠠᠰᠤᠷᠠᠭᠤᠯᠠ ᠦᠨᠡᠮᠯᠡᠬᠦ ᠴᠣᠯᠠ ᠣᠯᠭᠣᠬᠤ (ᠭᠠᠳᠠᠭᠠᠳᠤ ᠶ᠋ᠢᠨ ᠬᠥᠮᠦᠰ ᠴᠦ᠍ ᠡᠨᠡ ᠬᠢᠷᠢ ᠭᠡᠮ ᠢ᠋ ᠬᠦᠷᠲᠡᠵᠦ ᠪᠣᠯᠤᠨᠠ) ᠵᠡᠷᠭᠡ ᠪᠡᠷ ᠠᠵᠢᠯᠯᠠᠬᠤ ᠶᠣᠰᠣᠲᠠᠢ᠃ ᠬᠠᠷᠢᠨ ᠰᠢᠭᠦᠭᠴᠢ ᠪᠠᠷᠢᠯᠳᠤᠭᠠᠨ ᠢ᠋ ᠡᠬᠢᠯᠡᠭᠦᠯᠬᠦ᠂ ᠬᠠᠶᠠᠭᠰᠠᠨ ᠪᠥᠬᠡ ᠶ᠋ᠢᠨ ᠭᠠᠷ ᠢ᠋ ᠨᠢ ᠡᠷᠭᠦᠭᠦᠯᠬᠦ ᠵᠡᠷᠭᠡ ᠨᠢ ᠢᠯᠡᠭᠦᠴᠡ ᠪᠣᠯᠬᠣᠷ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠤᠯᠠᠮᠵᠢᠯᠠᠯ ᠶᠣᠰᠣᠭᠠᠷ ᠳᠦᠷᠢᠮᠵᠢᠭᠦᠯᠵᠦ ᠪᠣᠯᠤᠨᠠ᠃ ᠶᠡᠷᠦ ᠶ᠋ᠢᠨ ᠵᠠᠩᠰᠢᠯ ᠳ᠋ᠤ᠌ ᠮᠣᠩᠭᠣᠯᠴᠤᠳ ᠠᠭᠤᠯᠵᠠᠵᠤ ᠤᠴᠠᠷᠠᠬᠤ ᠳ᠋ᠠᠭᠠᠨ ᠠᠯᠠᠭᠠ ᠪᠠᠨ ᠳᠡᠯᠭᠡᠨ ᠮᠡᠨᠳᠦᠴᠢᠯᠡᠳᠡᠭ ᠪᠠᠢᠭᠰᠠᠨ ᠪᠥᠭᠡᠳ ᠶᠠᠮᠠᠷ ᠴᠤ ᠪᠠᠷᠢᠳᠠᠯ ᠵᠡᠪᠰᠡᠭ᠂ ᠬᠣᠷᠣᠨ ᠰᠠᠨᠠᠭᠠ ᠦᠭᠡᠢ ᠭᠡᠳᠡᠭ ᠦ᠋ᠨ ᠬᠢᠨᠢ ᠢᠯᠡᠷᠬᠡᠢᠯᠡᠯ ᠲᠡᠷᠡ ᠶᠦᠮ᠃ ᠢᠯᠠᠩᠭᠤᠶᠠ ᠪᠥᠬᠡ ᠬᠥᠮᠦᠨ ᠮᠠᠬᠠᠪᠣᠳ ᠤ᠋ᠨ ᠥᠴᠦᠬᠡᠨ ᠬᠦᠷᠦᠯᠴᠡᠭᠡ ᠪᠡᠷ ᠰᠣᠢᠯᠭᠠ ᠳᠠᠰᠬᠠᠯ᠂ ᠰᠡᠳᠬᠢᠯ ᠦ᠋ᠨ ᠵᠠᠰᠠᠯ ᠶᠠᠮᠠᠷ ᠭᠡᠳᠡᠭ ᠢ᠋ ᠰᠡᠷᠡᠬᠦ ᠲᠣᠷᠭᠠᠨ ᠮᠡᠳᠡᠷᠡᠮᠵᠢ ᠲᠡᠢ ᠪᠣᠯᠬᠣᠷ ᠪᠠᠷᠢᠯᠳᠤᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠭᠠᠷ ᠠᠳᠬᠤᠯᠴᠠᠬᠤ ᠶ᠋ᠢ ᠲᠠᠲᠠᠭᠠᠯᠵᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠢᠵᠠᠢ᠃ ᠬᠡᠳᠦᠢᠪᠡᠷ ᠣᠳᠣ ᠡᠢᠮᠦᠷᠬᠦᠦ ᠲᠣᠷᠭᠠᠨ ᠮᠡᠳᠡᠷᠡᠮᠵᠢ ᠬᠢᠷᠢ ᠪᠠᠷᠤᠭ ᠤ᠋ᠨ ᠪᠥᠬᠡᠴᠦᠳ ᠲᠦ᠍ ᠦᠭᠡᠢ ᠴᠦ᠍ ᠭᠡᠰᠡᠨ ᠤᠯᠠᠮᠵᠢᠯᠠᠯ ᠤ᠋ᠨ ᠬᠤᠪᠢ ᠳ᠋ᠤ᠌ ᠬᠦᠨᠳᠦᠳᠬᠡᠨ ᠰᠡᠷᠭᠦᠭᠡᠪᠡᠰᠦ᠂ ᠦᠯᠦ ᠶᠠᠯᠢᠬᠤ ᠵᠦᠢᠯ ᠰᠢᠭ ᠴᠦ᠍ ᠨᠠᠷᠢᠨ ᠰᠢᠷᠢᠨ ᠵᠠᠩᠰᠢᠯ ᠤ᠋ᠨ ᠬᠠᠳᠠᠭᠠᠯᠠᠭᠳᠠᠯ ᠨᠢ ᠦᠨᠳᠦᠰᠦᠲᠡᠨ ᠦ᠌ ᠪᠥᠬᠡ ᠶ᠋ᠢᠨ ᠰᠣᠶᠣᠯ ᠤ᠋ᠨ ᠣᠨᠴᠠᠯᠢᠭ ᠢ᠋ ᠥᠳᠬᠡᠷᠡᠭᠦᠯᠵᠦ ᠳᠡᠢᠯᠦᠨᠡ᠃
ᠳᠡᠰ ᠢᠯᠭᠠᠬᠤ ᠦᠭᠡᠢ ᠪᠠᠷᠢᠯᠳᠤᠳᠠᠭ ᠨᠢ ᠮᠣᠩᠭᠣᠯ ᠪᠥᠬᠡ ᠶ᠋ᠢ ᠳᠡᠯᠡᠬᠡᠢ ᠶ᠋ᠢᠨ ᠶᠠᠮᠠᠷ ᠴᠤ ᠮᠠᠶᠢᠭ ᠤ᠋ᠨ ᠪᠥᠬᠡ ᠡᠴᠡ ᠡᠷᠡᠰ ᠢᠯᠭᠠᠭᠳᠠᠬᠤ ᠣᠨᠴᠠᠯᠢᠭ ᠲᠠᠢ ᠪᠣᠯᠭᠠᠭᠰᠠᠨ ᠲᠡᠳᠦᠢ ᠦᠭᠡᠢ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠪᠤᠰᠤᠳ ᠣᠨᠴᠠᠯᠢᠭ ᠤ᠋ᠳ ᠨᠢ ᠴᠤ ᠡᠨᠡ ᠬᠦ᠌ ᠳᠦᠷᠢᠮ ᠦ᠋ᠨ ᠰᠠᠭᠤᠷᠢ ᠳᠡᠭᠡᠷᠡ ᠲᠥᠯᠵᠢᠭᠰᠡᠨ ᠪᠠᠢᠭᠠ ᠶᠤᠮ᠃ ᠡᠨᠡ ᠨᠢ ᠮᠥᠨ ᠴᠦ᠍ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠰᠣᠳᠣᠨ ᠲᠠᠯᠠ ᠨᠢ ᠭᠡᠵᠦ ᠪᠢ ᠣᠢᠯᠠᠭᠠᠳᠠᠭ᠃1990 ᠣᠨ ᠤ᠋ ᠰᠢᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠶᠡᠬᠡ ᠨᠠᠢᠷ ᠤ᠋ᠨ ᠳᠡᠭᠡᠳᠦ ᠳᠥᠷᠪᠡᠨ ᠪᠥᠬᠡ ᠶᠠᠫᠣᠨ ᠤ᠋ ᠲᠣᠤᠺᠢᠣ᠋᠂ ᠨᠠᠷᠠ᠂ ᠶᠣᠺᠣᠬᠠᠮᠠ᠂ ᠣᠣᠰᠺᠠ᠂ ᠳ᠋ᠠᠮᠠᠬᠠᠸᠠ ᠵᠡᠷᠭᠡ ᠬᠣᠲᠠᠳ ᠲᠤ ᠦᠵᠡᠬᠦᠯᠭᠡ ᠶ᠋ᠢᠨ ᠤᠷᠤᠯᠳᠤᠭᠠᠨ ᠬᠢᠭᠰᠡᠨ ᠢ᠋ ᠠᠮᠧᠷᠢᠺᠠ ᠨᠤᠲᠤᠭ ᠲᠠᠢ ᠪᠡᠶᠡ ᠲᠠᠮᠢᠷ ᠤ᠋ᠨ ᠨᠢᠭᠡ ᠫᠷᠣᠹᠧᠰᠰᠣᠷ ᠦᠵᠡᠭᠡᠳ ᠮᠠᠰᠢ ᠭᠠᠢᠬᠠᠵᠤ᠄《ᠢᠯᠠᠵᠤ ᠢᠯᠠᠭᠳᠠᠬᠤ ᠪᠠᠨ ᠭᠠᠭᠴᠠ ᠤᠳᠠᠭᠠ ᠳ᠋ᠤ᠌ ᠢᠯᠭᠠᠷᠠᠭᠤᠯᠬᠤ᠂ ᠳᠡᠰ ᠢᠯᠭᠠᠬᠤ ᠦᠭᠡᠢ ᠵᠡᠷᠭᠡ ᠨᠢ ᠬᠡᠳᠦᠢᠪᠡᠷ ᠣᠳᠣ ᠦᠶᠡ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠵᠠᠷᠢᠮ ᠤᠭ ᠶᠣᠰᠣ ᠶ᠋ᠢ ᠲᠡᠷᠰᠯᠡᠭᠰᠡᠨ ᠪᠣᠯᠪᠠᠴᠤ ᠬᠠᠮᠤᠭ ᠤ᠋ᠨ ᠳᠠᠪᠰᠢᠩᠭᠤᠢ ᠲᠠᠯᠠ ᠨᠢ ᠪᠣᠯᠵᠤ ᠮᠡᠳᠡᠨᠡ᠃ ᠡᠢᠮᠦᠷᠬᠦᠦ ᠬᠤᠷᠴᠠ ᠰᠢᠷᠦᠭᠦᠨ ᠥᠷᠢᠰᠥᠯᠳᠦᠭᠡᠨᠲᠦ ᠣᠨᠴᠠᠯᠢᠭ ᠨᠢ ᠮᠣᠩᠭᠣᠯ ᠪᠥᠬᠡ ᠶ᠋ᠢ ᠳᠡᠯᠡᠬᠡᠢ ᠶ᠋ᠢᠨ ᠴᠢᠨᠠᠷ ᠲᠠᠢ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠣᠷᠣᠭᠤᠯᠵᠤ ᠮᠡᠳᠡᠨᠡ》 ᠭᠡᠵᠦ ᠬᠡᠯᠡᠭᠰᠡᠨ ᠠᠵᠢ᠃ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠪᠠᠷᠢᠯᠳᠤᠭᠠᠨ ᠨᠢ ᠳᠡᠰ ᠢᠯᠭᠠᠮᠵᠢ ᠪᠠᠷ ᠪᠠᠷᠢᠮᠵᠢᠶᠠᠯᠠᠭᠰᠠᠨ ᠬᠦᠨᠳᠦ ᠶ᠋ᠢᠨ ᠵᠢᠩ᠂ ᠬᠦᠴᠦ ᠲᠡᠩᠬᠡᠭᠡ ᠲᠡᠩᠴᠡᠭᠰᠡᠨ 《ᠡᠷᠬᠡ ᠲᠡᠭᠰᠢ》 ᠮᠥᠷᠥᠢᠴᠡᠭᠡᠨ ᠪᠢᠰᠢ᠂ ᠬᠠᠷᠢᠨ ᠶᠠᠪᠤᠭᠳᠠᠵᠤ ᠪᠣᠢ ᠡᠨᠡ ᠬᠦ᠌ ᠮᠥᠷᠥᠢᠴᠡᠭᠡᠨ ᠳ᠋ᠦ᠍ ᠬᠡᠨ ᠴᠤ᠌ ᠭᠡᠰᠡᠨ ᠡᠷᠬᠡ ᠲᠡᠭᠰᠢ ᠣᠷᠣᠯᠴᠠᠵᠤ ᠪᠣᠯᠬᠤ᠂50 ᠺᠢᠯᠣᠭ᠌ᠷᠠᠮ ᠤ᠋ᠨ ᠪᠥᠬᠡᠴᠢᠨ᠂150 ᠺᠢᠯᠣᠭ᠌ᠷᠠᠮ ᠤ᠋ᠨ ᠪᠥᠬᠡᠴᠢᠨ ᠢ᠋ ᠬᠠᠶᠠᠵᠤ ᠴᠤ᠌ ᠴᠢᠳᠠᠬᠤ ᠲᠡᠷᠡ ᠪᠣᠯᠤᠮᠵᠢ ᠶ᠋ᠢ ᠬᠠᠩᠭᠠᠵᠤ ᠪᠠᠢᠭᠠ ᠪᠠᠷ ᠢ᠋ᠶ᠋ᠠᠨ ᠨᠡᠩ ᠡᠷᠬᠡ ᠲᠡᠭᠰᠢ᠂ ᠰᠢᠷᠦᠭᠦᠨ ᠥᠷᠢᠰᠥᠯᠳᠦᠭᠡᠨᠲᠦ ᠪᠠᠷᠢᠯᠳᠤᠭᠠᠨ ᠶᠤᠮ᠃
ᠲᠡᠭᠡᠬᠦᠯᠡᠷ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠪᠠᠷᠢᠯᠳᠤᠭᠠᠨ ᠳ᠋ᠤ᠌ ᠳᠡᠰ ᠢᠯᠭᠠᠨᠠ ᠭᠡᠳᠡᠭ ᠰᠠᠨᠠᠭᠠᠴᠢᠯᠠᠭᠠ ᠨᠢ ᠨᠢᠭᠡᠨᠲᠡ ᠲᠦᠭᠡᠮᠡᠯᠵᠢᠭᠰᠡᠨ ᠪᠤᠰᠤᠳ ᠪᠥᠬᠡ ᠶ᠋ᠢᠨ ᠳᠦᠷᠢᠮ ᠢ᠋ᠶ᠋ᠡᠷ ᠤᠯᠠᠮᠵᠢᠯᠠᠯ ᠨᠢ ᠣᠨᠳᠣᠣ ᠥᠪᠡᠷ ᠦ᠋ᠨ ᠪᠥᠬᠡ ᠪᠡᠨ ᠬᠡᠪᠰᠢᠭᠦᠯᠬᠦ ᠭᠡᠰᠡᠨ ᠵᠦᠢ ᠦᠭᠡᠢ ᠰᠠᠨᠠᠭᠠᠴᠢᠯᠠᠭᠠ ᠶᠤᠮ᠃
ᠡᠢᠮᠦᠷᠬᠦᠦ ᠰᠠᠨᠠᠭᠠᠴᠢᠯᠠᠭᠠ ᠶ᠋ᠢ ᠮᠡᠷᠭᠡᠵᠢᠯ ᠦ᠋ᠨ ᠪᠥᠬᠡᠴᠦᠳ᠂ ᠳᠠᠰᠬᠠᠯᠵᠢᠭᠤᠯᠤᠭᠴᠢ ᠨᠠᠷ ᠳᠤᠷᠠᠳᠬᠤ ᠨᠢ ᠣᠯᠠᠨ ᠪᠠᠢᠳᠠᠭ ᠤ᠋ᠨ ᠤᠴᠢᠷ ᠨᠢ ᠥᠪᠡᠷᠰᠡᠳ ᠦ᠋ᠨ ᠰᠣᠷᠢᠶᠠ ᠥᠭᠴᠦ ᠪᠠᠢᠭᠠ ᠲᠡᠷᠡ ᠪᠥᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠦᠷᠢᠮ ᠢ᠋ᠶ᠋ᠡᠷ᠂
ᠡᠰᠡᠬᠦᠯᠡ ᠲᠡᠷᠡ ᠪᠠᠷᠢᠯᠭᠠᠨ ᠤ᠋ ᠠᠷᠭᠠ ᠪᠠᠷ ᠮᠣᠩᠭᠣᠯ ᠪᠥᠬᠡ ᠪᠡᠨ ᠪᠠᠷᠢᠮᠵᠢᠶᠠᠯᠠᠨ ᠦᠵᠡᠬᠦ ᠪᠤᠶᠤ ᠪᠠᠷᠢᠯᠳᠤᠭᠰᠠᠨ ᠤ᠋ ᠳ᠋ᠦᠩ ᠳ᠋ᠦ᠍ ᠭᠠᠷᠤᠭᠰᠠᠨ ᠬᠠᠯᠭᠤᠤ ᠣᠢᠯᠠᠭᠠᠯᠲᠠ ᠶᠤᠮ᠃
ᠨᠢᠭᠡᠨᠲᠡ ᠲᠦᠭᠡᠮᠡᠯᠵᠢᠭᠰᠡᠨ ᠪᠥᠬᠡ ᠨᠢ ᠯᠠᠪᠲᠠᠢ ᠮᠣᠩᠭᠣᠯ ᠪᠥᠬᠡ ᠡᠴᠡ ᠳᠠᠪᠰᠢᠩᠭᠤᠢ ᠭᠡᠵᠦ ᠰᠣᠬᠣᠷ ᠢ᠋ᠶ᠋ᠠᠷ ᠣᠢᠯᠠᠭᠠᠭᠰᠠᠨ ᠤ᠋ ᠬᠢ ᠶᠦᠮ᠃
ᠳᠡᠰ ᠦ᠋ᠨ ᠢᠯᠭᠠᠮᠵᠢ ᠦᠭᠡᠢ ᠪᠠᠷᠢᠯᠳᠤᠬᠤ ᠨᠢ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠬᠠᠮᠤᠭ ᠴᠢᠬᠤᠯᠠ ᠣᠨᠴᠠᠯᠢᠭ ᠪᠣᠯᠤᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠡᠨᠡ ᠤᠯᠠᠮᠵᠢᠯᠠᠯ ᠢ᠋ ᠶᠠᠭᠠᠬᠢᠭᠰᠠᠨ ᠴᠤ ᠬᠤᠪᠢᠷᠠᠭᠠᠵᠤ ᠪᠣᠯᠬᠤ ᠦᠭᠡᠢ᠃
ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠪᠠᠷᠢᠯᠳᠤᠭᠠᠨ ᠤ᠋ ᠴᠢᠬᠤᠯᠠ ᠡᠮᠦᠰᠬᠡᠯ ᠭᠡᠪᠡᠯ ᠠᠷᠠᠰᠤᠨ ᠵᠣᠳᠣᠭ᠃ ᠲᠡᠷᠡ ᠨᠢ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠪᠠᠷᠢᠯᠳᠤᠬᠤ ᠣᠨᠴᠠᠯᠢᠭ᠂ ᠬᠢᠴᠡ ᠮᠡᠬᠡ ᠳ᠋ᠦ᠍ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠲᠣᠬᠢᠷᠠᠳᠠᠭ ᠪᠣᠯᠬᠣᠷ ᠳᠦᠷᠢᠮᠵᠢᠯ ᠦ᠋ᠨ ᠶᠠᠪᠤᠴᠠ ᠳ᠋ᠤ᠌ ᠦᠯᠡᠳᠡᠬᠦ ᠶᠣᠰᠣᠲᠠᠢ᠃ ᠬᠡᠯᠡᠯᠭᠡᠨ ᠦᠭᠡᠢ ᠬᠠᠨᠴᠤᠢ ᠨᠢ ᠬᠡᠲᠦᠷᠬᠡᠢ ᠪᠠᠷᠢᠭᠤ᠂ ᠪᠦᠰᠡ ᠨᠢ ᠥᠩᠭᠡᠷᠡᠦ ᠰᠤᠯᠠ ᠪᠠᠢᠬᠤ ᠶ᠋ᠢ ᠲᠡᠪᠴᠢᠬᠦ ᠨᠢ ᠲᠠᠭᠠᠷᠠᠨᠠ᠃ ᠬᠠᠷᠢᠨ ᠠᠷᠠᠰᠤᠨ ᠵᠣᠳᠣᠭ ᠢ᠋ ᠳᠠᠪᠤᠤ ᠵᠣᠳᠣᠭ ᠢ᠋ᠶ᠋ᠠᠷ ᠣᠷᠣᠯᠠᠭᠤᠯᠪᠠᠯ ᠦᠨᠳᠦᠰᠦᠲᠡᠨ ᠦ᠌ ᠪᠥᠬᠡ ᠶ᠋ᠢᠨ ᠤᠯᠠᠮᠵᠢᠯᠠᠯᠲᠤ ᠭᠠᠯᠪᠢᠷ ᠢ᠋ ᠠᠯᠳᠠᠭᠳᠠᠭᠤᠯᠬᠤ ᠶ᠋ᠢ ᠪᠢᠲᠡᠭᠡᠢ ᠬᠡᠯᠡ᠂ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠤᠷᠠᠨ ᠬᠢᠴᠡ᠂ ᠬᠠᠷᠢᠭᠤ ᠮᠡᠬᠡ᠂ ᠪᠠᠷᠢᠴᠠ ᠶ᠋ᠢᠨ ᠬᠠᠩᠭᠠᠯᠲᠠ ᠳ᠋ᠤ᠌ ᠵᠣᠬᠢᠬᠤ ᠦᠭᠡᠢ ᠭᠡᠳᠡᠭ ᠢ᠋ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠠᠩᠬᠠᠷᠬᠤ ᠬᠡᠷᠡᠭᠲᠡᠢ ᠮᠡᠲᠦ᠃
ᠣᠯᠠᠨ ᠬᠥᠮᠦᠨ ᠦ᠌ ᠰᠠᠨᠠᠯ ᠨᠢᠭᠡᠳᠬᠦ ᠦᠭᠡᠢ ᠪᠠᠢᠳᠠᠭ ᠪᠠᠰᠠ ᠨᠢᠭᠡ ᠵᠦᠢᠯ ᠨᠢ ᠵᠠᠩᠭᠢᠶᠠ᠃ ᠵᠠᠩᠭᠢᠶᠠ ᠶ᠋ᠢ ᠰᠢᠯᠢ ᠶ᠋ᠢᠨ ᠭᠣᠣᠯ᠂ ᠤᠯᠠᠭᠠᠨᠬᠠᠳᠠ ᠬᠣᠲᠠ ᠶ᠋ᠢᠨ ᠪᠥᠬᠡᠴᠦᠳ ᠵᠡᠭᠦᠬᠦ ᠨᠢ ᠣᠯᠠᠨ ᠪᠠᠢᠵᠤ᠂ ᠪᠤᠰᠤᠳ ᠠᠢᠮᠠᠭ ᠤ᠋ᠨ ᠪᠥᠬᠡᠴᠦᠳ ᠵᠠᠩᠭᠢᠶᠠ ᠲᠠᠢ ᠪᠠᠷᠢᠯᠳᠤᠵᠤ ᠳᠠᠰᠬᠤ ᠦᠭᠡᠢ ᠪᠣᠯᠬᠣᠷ ᠳᠦᠷᠢᠮᠵᠢᠭᠦᠯᠦᠯ ᠦ᠋ᠨ ᠶᠠᠪᠤᠴᠠ ᠳ᠋ᠤ᠌ ᠵᠠᠩᠭᠢᠶᠠ ᠶ᠋ᠢ ᠦᠭᠡᠢᠰᠬᠡᠬᠦ ᠭᠡᠰᠡᠨ ᠳᠤᠷᠠᠳᠤᠯᠭᠠ ᠴᠤ ᠭᠠᠷᠤᠭᠰᠠᠨ᠃ ᠣᠳᠣ ᠶ᠋ᠢᠨ ᠪᠥᠬᠡᠴᠦᠳ ᠦ᠋ᠨ ᠵᠡᠭᠦᠵᠦ ᠪᠠᠢᠭᠠ ᠵᠠᠩᠭᠢᠶᠠ ᠨᠢ ᠪᠠᠷᠢᠮᠵᠢᠶᠠᠵᠢᠭᠰᠠᠨ ᠪᠢᠰᠢ᠂ ᠬᠡᠲᠦᠷᠬᠡᠢ ᠰᠠᠭᠰᠠᠭᠠᠷ᠂ ᠭᠬᠢᠪ ᠨᠢ ᠥᠩᠭᠡᠷᠡᠦ ᠤᠷᠲᠤ ᠪᠠᠢᠵᠤ᠂ ᠪᠥᠬᠡ ᠶ᠋ᠢᠨ ᠬᠡᠢᠮᠣᠷᠢ ᠯᠤᠩᠳᠠ ᠶ᠋ᠢ ᠪᠡᠯᠭᠡᠳᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠭᠣᠶᠣᠯᠠᠯ ᠵᠠᠰᠠᠯ ᠤ᠋ᠨ ᠠᠭᠤᠯᠭᠠ ᠨᠢ ᠳᠠᠪᠠᠮᠠᠭᠠᠢᠯᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠢᠯᠳᠤᠭᠠᠨ ᠢ᠋ ᠨᠥᠯᠥᠭᠡᠯᠡᠵᠦ ᠪᠠᠢᠭᠠ ᠨᠢ ᠦᠨᠡᠨ ᠲᠡᠢ᠃ ᠴᠣᠬᠣᠮ ᠳ᠋ᠠᠭᠠᠨ ᠵᠠᠩᠭᠢᠶᠠ ᠨᠢ ᠬᠠᠳᠠᠭ ᠢ᠋ᠶ᠋ᠠᠷ ᠭᠣᠣᠯ ᠬᠢᠭᠰᠡᠨ᠂ ᠵᠠᠪᠠᠯ ᠭᠡᠭᠡᠨ ᠬᠤᠪᠢᠯᠭᠠᠳ ᠠᠳᠢᠰᠯᠠᠵᠤ ᠥᠭᠳᠡᠭ (ᠪᠤᠰᠤᠳ ᠶᠠᠮᠠᠷ ᠴᠤ᠌ ᠬᠥᠮᠦᠨ ᠪᠥᠬᠡᠴᠦᠳ ᠲᠦ᠍ ᠵᠠᠩᠭᠢᠶᠠ ᠬᠠᠢᠷᠠᠯᠠᠬᠤ ᠡᠷᠬᠡ ᠦᠭᠡᠢ ᠪᠠᠢᠵᠠᠢ)᠂ ᠴᠥᠭᠡᠨ ᠬᠡᠳᠦᠨ ᠭᠬᠢᠪ ᠲᠡᠢ᠂ ᠲᠡᠷᠢᠭᠦᠯᠡᠬᠦ ᠤᠳᠠᠭᠠ ᠶ᠋ᠢᠨ ᠲᠣᠭᠠ ᠪᠠᠷ ᠢ᠋ᠶ᠋ᠠᠨ ᠭᠬᠢᠪ ᠨᠡᠮᠡᠳᠡᠭ ᠤᠯᠠᠮᠵᠢᠯᠠᠯ ᠲᠠᠢ ᠪᠠᠢᠵᠠᠢ᠃ ᠵᠠᠩᠭᠢᠶᠠ ᠶ᠋ᠢ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠤ᠋ ᠨᠥᠯᠥᠭᠡ ᠪᠡᠷ ᠪᠣᠢ ᠪᠣᠯᠤᠭᠰᠠᠨ ᠭᠡᠵᠦ ᠵᠠᠷᠢᠮ ᠬᠥᠮᠦᠨ ᠦᠵᠡᠳᠡᠭ ᠴᠦ᠍ ᠰᠤᠳᠤᠯᠤᠭᠴᠢᠳ ᠲᠡᠭᠦᠨ ᠢ᠋ ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ᠋ ᠦᠶᠡ ᠶ᠋ᠢᠨ ᠤᠯᠠᠮᠵᠢᠯᠠᠯ ᠭᠡᠮᠡᠨ ᠨᠤᠲᠠᠯᠠᠵᠤ ᠪᠠᠢᠨᠠ᠃ ᠲᠡᠭᠡᠭᠡᠳ ᠴᠦ᠍ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠷ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠰᠣᠶᠣᠯ ᠳ᠋ᠤ᠌ ᠠᠭᠤᠰᠤᠯᠴᠠᠨ᠂ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠬᠦᠰᠡᠯ ᠲᠡᠮᠡᠦᠯᠦᠯ᠂ ᠬᠡᠢᠮᠣᠷᠢ ᠰᠦᠯᠳᠡ ᠶ᠋ᠢ ᠪᠡᠯᠭᠡᠳᠡᠭᠰᠡᠨ ᠵᠠᠩᠭᠢᠶᠠ ᠶ᠋ᠢ ᠦᠭᠡᠢᠰᠬᠡᠨᠡ ᠭᠡᠳᠡᠭ ᠵᠣᠷᠢᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠪᠠᠵᠤ᠂ ᠵᠢᠯᠣᠭᠣ ᠪᠠᠷ ᠢ᠋ᠶ᠋ᠠᠨ ᠭᠤᠶᠠᠳᠠᠮᠠᠷ ᠤᠴᠢᠷ ᠪᠢᠰᠢ᠃ ᠢᠯᠠᠩᠭᠤᠶᠠ ᠳᠦᠷᠢᠮᠵᠢᠯ ᠦ᠋ᠨ ᠶᠠᠪᠤᠴᠠ ᠳ᠋ᠤ᠌ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠲᠠᠷᠬᠠᠵᠤ ᠳᠡᠯᠭᠡᠷᠡᠭᠰᠡᠨ ᠨᠤᠲᠤᠭ ᠤᠰᠤ᠂ ᠪᠥᠬᠡᠴᠦᠳ ᠦ᠋ᠨ ᠬᠢᠨᠢ ᠠᠮᠵᠢᠯᠲᠠ ᠪᠦᠲᠦᠮᠵᠢ᠂ ᠦᠷᠡ ᠨᠥᠯᠥᠭᠡ ᠪᠡᠷ ᠦᠵᠡᠭᠰᠡᠨ ᠴᠦ᠍ ᠰᠢᠯᠢ ᠶ᠋ᠢᠨ ᠭᠣᠣᠯ᠂ ᠤᠯᠠᠭᠠᠨᠬᠠᠳᠠ ᠶ᠋ᠢᠨ ᠪᠥᠬᠡᠴᠦᠳ ᠦ᠋ᠨ ᠡᠮᠦᠰᠬᠡᠯ ᠵᠡᠭᠦᠭᠡᠯ ᠢ᠋ᠶ᠋ᠡᠷ ᠪᠠᠷᠢᠮᠵᠢᠶᠠᠯᠠᠬᠤ ᠨᠢ ᠵᠦᠢᠲᠡᠢ᠃ ᠭᠡᠪᠡᠴᠦ᠂ ᠵᠠᠩᠭᠢᠶᠠ ᠳ᠋ᠤ᠌ ᠳᠤᠲᠠᠭᠳᠠᠯ ᠦᠭᠡᠢ ᠪᠢᠰᠢ᠃ ᠪᠥᠬᠡᠴᠦᠳ ᠦ᠋ᠨ ᠠᠮᠵᠢᠯᠲᠠ ᠶ᠋ᠢ ᠢᠯᠭᠠᠪᠤᠷᠢ ᠲᠠᠢ ᠢᠯᠡᠷᠬᠡᠢᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠨᠢ ᠵᠠᠩᠭᠢᠶᠠ ᠶ᠋ᠢᠨ ᠳᠤᠲᠠᠭᠳᠠᠯ ᠭᠡᠯᠲᠡᠢ᠃ ᠨᠡᠩ ᠴᠦ᠍ ᠰᠡᠭᠦᠯ ᠦ᠋ᠨ ᠦᠶᠡ ᠪᠡᠷ ᠪᠥᠬᠡᠴᠢᠨ ᠪᠣᠯᠭᠠᠨ ᠯᠠ ᠵᠠᠩᠭᠢᠶᠠ ᠬᠡᠢᠰᠬᠡᠳᠡᠭ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠡᠨᠡ ᠪᠠᠢᠳᠠᠯ ᠢ᠋ ᠤᠯᠠᠮ ᠪᠠᠯᠠᠷᠬᠠᠢᠰᠢᠭᠤᠯᠵᠤ ᠬᠠᠶᠠᠵᠠᠢ᠃ ᠬᠣᠢᠰᠢᠳᠠ ᠶᠠᠮᠠᠷ ᠵᠡᠷᠭᠡ ᠶ᠋ᠢᠨ ᠨᠠᠢᠷ ᠲᠤ᠌ ᠬᠡᠳᠦ ᠲᠡᠷᠢᠭᠦᠯᠡᠪᠡᠯ ᠵᠠᠩᠭᠢᠶᠠ ᠵᠡᠭᠦᠵᠦ ᠪᠣᠯᠬᠤ᠂ ᠬᠣᠰᠢᠭᠤ᠂ ᠠᠢᠮᠠᠭ᠂ ᠣᠷᠣᠨ᠁ ᠤ᠋ ᠳᠡᠰ ᠦ᠋ᠨ ᠲᠣᠮᠣ ᠨᠠᠢᠷ ᠲᠤ᠌ ᠦᠵᠦᠯᠡᠪᠡᠯ ᠶᠠᠮᠠᠷ ᠵᠠᠩᠭᠢᠶᠠ ᠲᠠᠢ ᠪᠣᠯᠬᠤ ᠵᠡᠷᠭᠡ ᠪᠡᠷ ᠲᠣᠳᠣᠷᠬᠠᠢ ᠪᠠᠷᠢᠮᠵᠢᠶᠠ ᠭᠠᠷᠭᠠᠬᠤ ᠶ᠋ᠢᠨ ᠬᠠᠮᠲᠤ᠂ ᠪᠥᠬᠡ ᠶ᠋ᠢᠨ ᠴᠣᠯᠠ ᠥᠭᠬᠦ ᠶᠣᠰᠣᠨ ᠢ᠋ ᠰᠡᠷᠭᠦᠭᠡᠨ ᠨᠠᠴᠢᠨ᠂ ᠵᠠᠭᠠᠨ᠂ ᠠᠷᠰᠯᠠᠨ᠂ ᠠᠪᠤᠷᠭᠤ᠁ ᠭᠡᠬᠦᠴᠢᠯᠡᠨ ᠴᠣᠯᠠᠯᠠᠪᠠᠯ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠢᠵᠠᠭᠤᠷ ᠵᠠᠩᠰᠢᠯ ᠤ᠋ᠨ ᠤᠯᠠᠮᠵᠢᠯᠠᠯ ᠢ᠋ ᠬᠠᠳᠠᠭᠠᠯᠠᠵᠤ ᠴᠢᠳᠠᠬᠤ ᠲᠡᠳᠦᠢ ᠦᠭᠡᠢ᠂ ᠮᠧᠳᠠᠯ ᠢ᠋ᠶ᠋ᠠᠷ ᠢᠯᠭᠠᠳᠠᠭ ᠦᠬᠦᠮᠡᠯ ᠵᠤᠷᠰᠢᠯ ᠠ᠋ᠴᠠ ᠣᠨᠴᠠᠯᠢᠬᠳᠠᠬᠤ ᠪᠣᠯᠤᠨᠠ᠃ ᠳᠡᠯᠡᠬᠡᠢ ᠶ᠋ᠢᠨ ᠲᠡᠮᠡᠴᠡᠭᠡᠨ ᠳ᠋ᠦ᠍ ᠮᠧᠳᠠᠯ ᠢ᠋ᠶ᠋ᠠᠨ ᠵᠡᠭᠦᠭᠡᠳ ᠪᠠᠷᠢᠯᠳᠤᠳᠠᠭ ᠪᠥᠬᠡᠴᠢᠨ ᠦᠭᠡᠢ ᠪᠢᠵᠡ? ᠭᠡᠳᠡᠭ ᠢ᠋ᠶ᠋ᠡᠷ ᠮᠠᠨ ᠤ᠋ ᠬᠢᠨ ᠵᠠᠩᠭᠢᠶᠠ ᠪᠠᠨ ᠦᠭᠡᠢᠰᠬᠡᠬᠦ ᠰᠢᠯᠲᠠᠭ ᠪᠣᠯᠭᠠᠳᠠᠭ᠃ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠣᠯᠤᠭᠰᠠᠨ ᠪᠦᠲᠦᠮᠵᠢ ᠶ᠋ᠢᠨ ᠬᠢᠨᠢ ᠲᠡᠮᠳᠡᠭ ᠪᠣᠯᠤᠭᠰᠠᠨ ᠮᠧᠳᠠᠯ ᠢ᠋ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠰᠣᠶᠣᠯ ᠤ᠋ᠨ ᠤᠯᠠᠮᠵᠢᠯᠠᠯ ᠪᠣᠯᠤᠭᠰᠠᠨ ᠵᠠᠩᠭᠢᠶᠠ ᠲᠠᠢ ᠢᠩᠭᠢᠵᠦ ᠡᠰᠷᠭᠦᠴᠡᠯᠳᠦᠭᠦᠯᠦᠨ ᠠᠳᠠᠯᠢᠳᠬᠠᠬᠤ ᠨᠢ ᠵᠣᠬᠢᠰ ᠦᠭᠡᠢ ᠶᠦᠮ᠃ ᠵᠠᠩᠭᠢᠶᠠ ᠪᠣᠯ ᠪᠡᠯᠡᠭ ᠪᠢᠰᠢ᠂ ᠮᠧᠳᠠᠯ ᠴᠦ᠍ ᠪᠢᠰᠢ᠂ ᠲᠡᠷᠡ ᠪᠣᠯ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠰᠣᠶᠣᠯ ᠤ᠋ᠨ ᠵᠠᠩᠰᠢᠯ ᠤ᠋ᠨ ᠢᠯᠡᠷᠬᠡᠢᠯᠡᠯ ᠶᠦᠮ᠃ ᠬᠠᠷᠢᠨ ᠵᠠᠩᠭᠢᠶᠠ ᠶ᠋ᠢᠨ ᠲᠤᠬᠠᠢ ᠡᠭᠦᠰᠴᠦ ᠪᠠᠢᠭᠠ ᠡᠳᠦᠢ ᠲᠡᠳᠦᠢ ᠠᠳᠠᠯᠢ ᠦᠭᠡᠢ ᠰᠠᠨᠠᠯ ᠨᠢ ᠮᠣᠩᠭᠣᠯ ᠪᠥᠬᠡ ᠪᠡᠨ ᠪᠢᠳᠡ ᠣᠷᠣᠨ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠬᠡᠪᠴᠢᠶᠡᠨ ᠳ᠋ᠦ᠍ ᠴᠦ᠍ ᠳᠦᠷᠢᠮᠵᠢᠭᠦᠯᠵᠦ ᠴᠢᠳᠠᠭᠠ ᠦᠭᠡᠢ ᠭᠡᠳᠡᠭ ᠢ᠋ ᠮᠠᠨᠢ ᠬᠠᠷᠠᠭᠤᠯᠬᠤ ᠪᠥᠭᠡᠳ ᠡᠨᠡ ᠮᠡᠲᠦ ᠶ᠋ᠢᠨ ᠳᠦᠷᠢᠮᠵᠢᠯ ᠦᠭᠡᠢ ᠪᠠᠢᠳᠠᠯ ᠳᠣᠣᠷᠠ ᠶᠠᠭᠠᠬᠢᠵᠤ ᠳᠡᠯᠡᠬᠡᠢᠴᠢᠯᠡᠬᠦ ᠶᠦᠮ ᠪᠣᠢ? ᠭᠡᠳᠡᠭ ᠰᠢᠨᠠᠯᠭᠠᠯ ᠲᠠᠢ ᠠᠰᠠᠭᠤᠳᠠᠯ ᠲᠠᠯᠪᠢᠭᠳᠠᠵᠤ ᠪᠠᠢᠭᠠ ᠰᠢᠦ ᠳᠡ᠃
ᠭᠡᠬᠦ ᠳ᠋ᠡᠭᠡᠨ ᠳᠤᠯᠢᠶᠠ (ᠵᠢᠭᠢᠷᠢᠭ) ᠨᠢ ᠡᠪᠦᠳᠦᠭ ᠢᠰᠬᠦᠯᠬᠦ ᠵᠡᠷᠭᠡ ᠬᠠᠷᠠᠲᠠᠢ ᠮᠡᠬᠡ ᠶ᠋ᠢ ᠰᠡᠷᠭᠡᠢᠯᠡᠬᠦ ᠱᠠᠭᠠᠷᠳᠠᠯᠭᠠ ᠪᠠᠷ ᠪᠣᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠪᠥᠬᠡᠴᠦᠳ ᠦ᠋ᠨ ᠬᠢᠴᠡ ᠪᠠᠷᠢᠯᠳᠤᠭᠠᠨ ᠢ᠋ ᠴᠦ᠍ ᠨᠥᠯᠥᠭᠡᠯᠡᠳᠡᠭ᠃ ᠲᠡᠷᠡᠴᠢᠯᠡᠨ ᠪᠥᠬᠡᠴᠦᠳ ᠦ᠋ᠨ ᠠᠮᠵᠢᠯᠲᠠ ᠶ᠋ᠢ ᠢᠯᠡᠷᠬᠡᠢᠯᠡᠬᠦ ᠦᠭᠡᠢ᠂ ᠶᠠᠮᠠᠷ ᠨᠢᠭᠡ ᠪᠡᠯᠭᠡᠳᠡᠯ ᠰᠠᠨᠠᠭᠠ ᠦᠭᠡᠢ᠂ ᠪᠣᠯᠪᠠᠰᠤᠨ ᠥᠷᠢᠰᠦᠯᠳᠦᠭᠡᠨ ᠦ᠌ ᠵᠣᠷᠢᠭ ᠰᠠᠨᠠᠭᠠ ᠲᠠᠢ ᠨᠡᠢᠴᠡᠬᠦ ᠦᠭᠡᠢ᠂ ᠭᠣᠶᠣᠯᠠᠯ ᠤ᠋ᠨ ᠵᠣᠷᠢᠭᠤᠯᠤᠯᠲᠠ ᠪᠠᠷ ᠪᠠᠭᠠ ᠪᠤᠶᠤ ᠵᠥᠪᠬᠡᠨ ᠪᠠᠭᠠ ᠯᠠ ᠬᠡᠰᠡᠭ ᠨᠤᠲᠤᠭ ᠲᠤ ᠬᠡᠷᠡᠭᠯᠡᠨ᠂ ᠣᠨᠳᠣᠣ ᠨᠤᠲᠤᠭ ᠲᠤ ᠨᠥᠯᠥᠭᠡ ᠦᠭᠡᠢ᠂ ᠲᠦᠭᠡᠮᠡᠯᠵᠢᠬᠦ ᠶ᠋ᠢᠨ ᠠᠴᠢ ᠬᠣᠯᠪᠣᠭᠳᠠᠯ ᠦᠭᠡᠢ ᠵᠡᠷᠭᠡ ᠡᠴᠡ ᠪᠡᠨ ᠪᠣᠯᠤᠭᠠᠳ ᠳᠦᠷᠢᠮᠵᠢᠯ ᠦ᠋ᠨ ᠶᠠᠪᠤᠴᠠ ᠳ᠋ᠤ᠌ ᠣᠷᠬᠢᠭᠳᠠᠵᠤ ᠪᠣᠯᠤᠨᠠ᠃
ᠥᠨᠢ ᠡᠷᠲᠡᠨ ᠦ᠌ ᠤᠯᠠᠮᠵᠢᠯᠠᠯ ᠲᠠᠢ ᠮᠣᠩᠭᠣᠯ ᠪᠥᠬᠡ ᠨᠢ ᠳᠠᠭᠤᠤ ᠪᠥᠵᠢᠭ᠂ ᠣᠶᠣᠳᠠᠯ ᠦᠢᠯᠡ᠂ ᠤᠷᠠ ᠳᠠᠷᠬᠠ᠂ ᠰᠦᠵᠢᠭ ᠪᠢᠰᠢᠷᠡᠯ᠂ ᠶᠣᠰᠣ ᠵᠠᠩᠰᠢᠯ᠂ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠭᠡᠬᠦᠴᠢᠯᠡᠨ ᠬᠠᠮ ᠨᠡᠢᠳᠬᠡᠯ ᠰᠢᠨᠵᠢ ᠲᠡᠢ ᠪᠡᠷ ᠢ᠋ᠶ᠋ᠡᠨ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠤ᠋ᠨ ᠦᠨᠡᠲᠦ ᠥᠪ ᠪᠣᠯᠤᠭᠰᠠᠨ ᠪᠢᠯᠡ᠃ ᠪᠠᠰᠠ ᠴᠤ ᠨᠠᠰᠤ ᠰᠢᠲᠦ᠂ ᠦᠨᠳᠦᠰᠦᠲᠡᠨ ᠠᠷᠠᠰᠤᠲᠠᠨ ᠢᠯᠭᠠᠯ ᠦᠭᠡᠢ᠂ ᠪᠦᠬᠦ ᠠᠷᠠᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠣᠷᠣᠯᠴᠠᠵᠤ ᠪᠣᠯᠬᠤ ᠣᠯᠠᠨ ᠲᠦᠮᠡᠨᠴᠢ ᠴᠢᠨᠠᠷᠲᠠᠢ ᠪᠠᠷ ᠢ᠋ᠶ᠋ᠠᠨ《ᠪᠦᠬᠦ ᠠᠷᠠᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢᠭᠢᠷᠠᠭᠵᠢᠬᠤ》 ᠳᠤᠷᠠᠳᠤᠯᠭᠠ ᠲᠠᠢ ᠨᠡᠢᠴᠡᠬᠦ ᠪᠥᠭᠡᠳ《ᠣᠷᠣᠯᠳᠣᠬᠤ ᠳ᠋ᠤ᠌ ᠪᠢᠰᠢ᠂ᠣᠷᠣᠯᠴᠠᠬᠤ ᠳ᠋ᠤ᠌ ᠪᠠᠢᠭᠠ》 ᠤᠯᠢᠮᠫᠢᠺ ᠤ᠋ᠨ ᠵᠣᠷᠢᠭ ᠰᠠᠨᠠᠭᠠ ᠲᠠᠢ ᠴᠤ᠌ ᠠᠷᠭᠠ ᠦᠭᠡᠢ ᠲᠣᠬᠢᠷᠠᠯᠴᠠᠵᠤ ᠪᠠᠢᠭᠠ ᠰᠠᠨ᠃ ᠱᠧᠨᠶᠠᠩ ᠤ᠋ᠨ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠫᠷᠣᠹᠧᠰᠰᠣᠷ ᠯᠢᠦ ᠫᠧᠢ ᠳᠧ᠄《ᠮᠣᠩᠭᠣᠯ ᠪᠥᠬᠡ ᠨᠢ ᠲᠠᠯᠠ ᠨᠤᠲᠤᠭ ᠲᠤ ᠲᠦᠭᠡᠮᠡᠯᠵᠢᠭᠰᠡᠨ ᠥᠷᠭᠡᠴᠡ ᠪᠠ ᠭᠦᠨᠴᠡ ᠪᠡᠷ ᠢ᠋ᠶ᠋ᠡᠨ ᠶᠠᠮᠠᠷᠪᠠ ᠨᠢᠭᠡᠨ ᠪᠡᠶᠡ ᠲᠠᠮᠢᠷ ᠤ᠋ᠨ ᠵᠦᠢᠯ ᠡᠴᠡ ᠴᠦ᠍ ᠶᠡᠬᠡ ᠳᠠᠪᠠᠵᠠᠢ ᠭᠡᠳᠡᠭ ᠢ᠋ ᠪᠢ ᠰᠣᠴᠢᠰᠬᠢᠨ ᠣᠢᠯᠠᠭᠠᠯᠠ᠁》 ᠭᠡᠵᠦ ᠶᠠᠷᠢᠭᠰᠠᠨ ᠪᠠᠢᠳᠠᠭ᠃ ᠨᠡᠭᠡᠷᠡᠨ᠂ ᠮᠢᠩᠭᠠᠨ ᠪᠥᠬᠡ ᠪᠠᠷᠢᠯᠳᠤᠭᠤᠯᠵᠤ᠂ ᠭᠠᠭᠴᠠ ᠪᠥᠬᠡ ᠦᠵᠦᠯᠡᠳᠡᠭ ᠨᠢᠵᠢᠭᠡᠷ ᠨᠠᠭᠠᠳᠤᠮ ᠬᠥᠬᠡ ᠮᠥᠩᠭᠥᠨ ᠲᠩᠷᠢ ᠶ᠋ᠢᠨ ᠳᠣᠣᠷᠠ᠂ ᠬᠥᠷᠥᠰᠥᠲᠦ ᠠᠯᠲᠠᠨ ᠳᠡᠯᠡᠬᠡᠢ ᠳᠡᠭᠡᠷᠡ ᠥᠭᠡᠷᠡ ᠬᠠᠮᠢᠭᠠ ᠪᠠᠢᠳᠠᠭ ᠪᠣᠯ?
ᠪᠥᠬᠡ ᠪᠡᠨ ᠳᠡᠯᠡᠬᠡᠢᠴᠢᠯᠡᠬᠦ ᠶ᠋ᠢᠨ ᠵᠣᠷᠢᠯᠭᠠ ᠨᠢ᠂ ᠠᠷᠭᠠᠯᠠᠵᠤ ᠴᠠᠭᠠᠯᠠᠵᠤ ᠪᠠᠢᠭᠠᠳ ᠦᠨᠳᠦᠰᠲᠡᠨ ᠦ᠌ ᠪᠥᠬᠡ ᠪᠡᠨ ᠥᠭᠡᠷᠡᠴᠢᠯᠡᠨ ᠳᠡᠯᠡᠬᠡᠢ ᠶ᠋ᠢᠨ ᠪᠥᠬᠡ ᠲᠡᠢ ᠣᠢᠷᠠᠲᠤᠭᠤᠯᠵᠤ ᠪᠠᠢᠭᠠᠳ ᠣᠯᠠᠨ ᠤᠯᠤᠰ ᠤ᠋ᠨ ᠬᠡᠮᠵᠢᠶᠡᠨ ᠦ᠌ ᠲᠠᠮᠢᠷ ᠤ᠋ᠨ ᠬᠥᠳᠡᠯᠭᠡᠭᠡᠨ ᠪᠣᠯᠭᠠᠶᠠ ᠭᠡᠰᠡᠨ ᠤᠴᠢᠷ ᠪᠢᠰᠢ᠃ ᠬᠠᠷᠢᠨ ᠥᠪᠡᠷ ᠦ᠋ᠨ ᠦᠨᠳᠦᠰᠦᠲᠡᠨ ᠦ᠌ ᠪᠡᠨ ᠪᠥᠬᠡ ᠶ᠋ᠢᠨ ᠰᠣᠶᠣᠯ ᠢ᠋ ᠤᠯᠠᠮᠵᠢᠯᠠᠯ ᠤ᠋ᠨ ᠬᠢᠨᠢ ᠪᠦᠷᠢᠨ ᠪᠦᠲᠦᠨ ᠬᠡᠪ ᠢ᠋ᠶ᠋ᠡᠷ ᠳᠡᠯᠡᠬᠡᠢ ᠶ᠋ᠢᠨ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠳ᠋ᠦ᠍ ᠲᠠᠨᠢᠯᠴᠠᠭᠤᠯᠬᠤ᠂ ᠡᠭᠦᠨ ᠦ᠌ ᠤᠯᠠᠮ ᠢ᠋ᠶ᠋ᠠᠷ ᠮᠣᠩᠭᠣᠯ ᠰᠣᠶᠣᠯ ᠢ᠋ᠶ᠋ᠠᠨ ᠣᠢᠯᠠᠭᠠᠭᠤᠯᠬᠤ ᠬᠡᠳᠦ ᠶ᠋ᠢᠨ ᠵᠣᠷᠢᠭᠤᠯᠤᠯᠲᠠ ᠲᠠᠢ ᠪᠢᠯᠡ᠃ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠪᠥᠬᠡ ᠪᠡᠨ ᠥᠭᠡᠷᠡᠴᠢᠯᠡᠨ ᠳᠡᠯᠡᠬᠡᠢ ᠶ᠋ᠢᠨ ᠰᠫᠣᠷᠲ ᠲᠤ ᠣᠷᠣᠭᠤᠯᠬᠤ ᠪᠢᠰᠢ᠂ ᠬᠠᠷᠢᠨ ᠮᠣᠩᠭᠣᠯ ᠪᠥᠬᠡ ᠶᠠᠮᠠᠷ ᠪᠠᠢᠳᠠᠭ ᠭᠡᠳᠡᠭ ᠢ᠋ ᠳᠡᠯᠡᠬᠡᠢ ᠨᠡᠢᠲᠡ ᠳ᠋ᠦ᠍ ᠲᠠᠨᠢᠭᠤᠯᠬᠤ ᠭᠡᠰᠡᠨ ᠬᠠᠷᠠᠭᠠᠰᠤ ᠠ᠋ᠴᠠ ᠣᠴᠢᠵᠤ ᠣᠢᠯᠠᠭᠠᠬᠤ ᠤᠴᠢᠷᠲᠠᠢ᠃ ᠢᠩᠭᠢᠬᠦ ᠳ᠋ᠦ᠍ ᠶᠠᠭᠤᠨ ᠤ᠋ ᠡᠮᠦᠨᠡ ᠭᠦᠢᠴᠡᠳᠬᠡᠬᠦ ᠶᠣᠰᠣᠲᠠᠢ ᠠᠵᠢᠯ ᠪᠣᠯ ᠮᠣᠩᠭᠣᠯ ᠪᠥᠬᠡ ᠪᠡᠨ ᠨᠠᠷᠢᠨ ᠳᠦᠷᠡᠮᠵᠢᠭᠦᠯᠬᠦ ᠬᠡᠷᠡᠭᠲᠡᠢ᠃ ᠳᠥᠷᠡᠮᠵᠢᠭᠦᠯᠬᠦ ᠳ᠋ᠡᠭᠡᠨ ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠤᠯᠠᠮᠵᠢᠯᠠᠯ ᠠ᠋ᠴᠠ ᠡᠭᠦᠰᠴᠦ᠂ ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠬᠠᠮᠤᠭ ᠦᠨᠳᠦᠰᠦᠨ ᠣᠨᠴᠠᠯᠢᠭ ᠲᠤ ᠲᠣᠬᠢᠷᠠᠯᠴᠠᠭᠰᠠᠨ ᠳᠦᠷᠢᠮ ᠢ᠋ᠶ᠋ᠡᠷ ᠳᠦᠷᠢᠮᠵᠢᠭᠦᠯᠬᠦ ᠡᠴᠡ ᠪᠤᠰᠤ᠂ ᠰᠦᠮᠦᠦ ᠪᠤᠶᠤ ᠵᠢᠤᠳᠤᠤ ᠶ᠋ᠢᠨ ᠳᠦᠷᠢᠮ ᠳᠠᠭᠠᠤ ᠪᠡᠯᠡᠨᠴᠢᠯᠡᠨ ᠳᠦᠷᠢᠮᠵᠢᠭᠦᠯᠵᠦ ᠪᠣᠯᠬᠤ ᠦᠭᠡᠢ᠃ ᠣᠷᠴᠢᠮ ᠤ᠋ᠨ100 ᠵᠢᠯ ᠳ᠋ᠦ᠍ ᠮᠣᠩᠭᠣᠯ ᠪᠥᠬᠡ ᠳᠡᠯᠡᠬᠡᠢ ᠳ᠋ᠦ᠍ ᠵᠣᠳᠣᠭᠯᠠᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠮᠣᠩᠭᠣᠯ ᠨᠤᠲᠤᠭ ᠲᠠᠭᠠᠨ ᠲᠦᠭᠡᠮᠡᠯᠵᠢᠨ ᠳᠦᠷᠢᠮᠵᠢᠵᠦ᠂ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠨ ᠪᠦᠷᠢᠨ ᠬᠠᠳᠠᠭᠠᠯᠠᠵᠤ ᠰᠡᠷᠭᠦᠭᠡᠵᠦ ᠪᠠᠢᠬᠤ ᠱᠠᠭᠠᠷᠳᠠᠯᠭᠠ ᠨᠡᠩ ᠢᠯᠡᠭᠦᠦ ᠪᠠᠢᠨᠠ᠃ ᠬᠡᠳᠦᠢ ᠦᠨᠳᠦᠰᠦᠲᠡᠨ ᠦ᠌ ᠬᠢ ᠪᠣᠯ ᠲᠡᠳᠦᠢ ᠳᠡᠯᠡᠬᠡᠢ ᠶ᠋ᠢᠨ ᠬᠢ ᠭᠡᠰᠡᠨ ᠣᠯᠢᠭ ᠪᠣᠯᠤᠭᠰᠠᠨ ᠶᠣᠰᠣ ᠶ᠋ᠢ ᠡᠨᠳᠡ ᠨᠤᠷᠰᠢᠬᠤ ᠳ᠋ᠤ᠌ ᠢᠯᠡᠭᠦᠳᠬᠦ ᠦᠭᠡᠢ᠃
ᠤᠴᠢᠷ ᠨᠢ ᠪᠥᠬᠡ ᠪᠣᠯ ᠲᠡᠮᠡᠴᠡᠭᠡᠨ ᠮᠥᠷᠡᠢᠴᠡᠭᠡᠨ ᠯᠡ ᠪᠢᠰᠢ᠂ ᠲᠡᠷᠡ ᠪᠣᠯ ᠰᠣᠶᠣᠯ ᠶᠤᠮ᠃
ᠲᠥᠪ ᠦ᠋ᠨ ᠦᠨᠳᠦᠰᠦᠲᠡᠨ ᠦ᠌ ᠶᠡᠬᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠦ᠌ ᠭᠠᠩ1995 ᠣᠨ ᠳ᠋ᠤ᠌ ᠨᠡᠢᠲᠡᠯᠡᠭᠰᠡᠨ ᠥᠭᠦᠯᠡᠯ ᠳ᠋ᠡᠭᠡᠨ᠄《᠁ ᠣᠳᠣ ᠦᠶᠡ ᠶ᠋ᠢᠨ ᠰᠢᠯᠢᠳᠡᠭ ᠪᠡᠶᠡ ᠲᠠᠮᠢᠷ ᠤ᠋ᠨ ᠤᠭ ᠶᠣᠰᠣ ᠭᠡᠳᠡᠭ ᠥᠨᠥᠬᠢ ᠶᠡᠷᠦᠮᠳᠡᠭ ᠵᠤᠷᠰᠢᠯ ᠤ᠋ᠨ ᠪᠠᠯᠠᠷᠬᠠᠢ ᠬᠠᠷᠠᠴᠠ ᠪᠠᠷ ᠲᠡᠳᠡᠭᠡᠷ ᠬᠠᠶᠠᠭᠳᠠᠭᠰᠠᠨ ᠵᠦᠢᠯ ᠢ᠋ ᠨᠢ ᠡᠷᠬᠢᠮ ᠪᠣᠯᠭᠠᠨ᠂ ᠨᠠᠷᠢᠰᠤᠭᠰᠠᠨ ᠵᠦᠢᠯ ᠢ᠋ ᠨᠢ ᠵᠢᠮᠡᠯᠡᠬᠦ ᠪᠣᠯ ᠴᠣᠬᠣᠮ ᠰᠠᠢᠨ ᠮᠠᠭᠤ ᠶ᠋ᠢ ᠴᠦ᠍ ᠮᠠᠲᠠᠯ ᠦᠭᠡᠢ ᠳᠡᠮᠡᠢ ᠪᠠᠯᠠᠢ ᠬᠤᠳᠬᠤᠵᠤ ᠪᠠᠢᠭᠠ ᠬᠡᠷᠡᠭ᠃ ᠡᠢᠮᠦ ᠡᠴᠡ ᠮᠣᠩᠭᠣᠯ ᠪᠥᠬᠡ ᠪᠡᠨ ᠣᠯᠢᠮᠫᠢᠺ ᠲᠤ᠌ ᠣᠢᠷᠠᠲᠤᠭᠤᠯᠤᠶᠠ ᠭᠡᠪᠡᠯ ᠴᠣᠬᠣᠮ ᠣᠯᠢᠮᠫᠢᠺ ᠤ᠋ᠨ ᠬᠢᠨ ᠦ᠌ ᠲᠡᠷᠡ ᠬᠦ᠌ ᠤᠷᠤᠯᠳᠤᠭᠠᠨ ᠤ᠋ ᠵᠦᠢᠯ ᠢ᠋ᠶ᠋ᠡᠨ ᠰᠢᠯᠢᠨ ᠲᠣᠭᠲᠠᠭᠠᠬᠤ ᠳ᠋ᠠᠭᠠᠨ ᠵᠠᠷᠢᠮ ᠲᠠᠯᠠ ᠪᠠᠷ ᠴᠢᠭᠯᠡᠯ ᠢ᠋ᠶ᠋ᠡᠨ ᠠᠯᠳᠠᠵᠤ ᠪᠠᠢᠭᠠ ᠶ᠋ᠢ ᠬᠠᠷᠢᠭᠤᠴᠠᠯᠭᠠ ᠲᠠᠢ ᠪᠠᠷ ᠰᠠᠨᠠᠭᠤᠯᠤᠨ ᠮᠡᠳᠡᠷᠡᠭᠦᠯᠦᠭᠰᠡᠨ ᠨᠢ ᠳᠡᠭᠡᠷᠡ᠃ ᠬᠠᠷᠢᠨ ᠮᠣᠩᠭᠣᠯ ᠪᠥᠬᠡ ᠤ᠋ ᠳᠦᠷᠢᠮ ᠲᠡᠢ ᠨᠣᠴᠣᠯᠳᠤᠨ ᠦᠢᠯᠡ ᠪᠡᠨ ᠪᠠᠷᠠᠭᠰᠠᠨ ᠤ᠋ ᠬᠡᠷᠡᠭ ᠶᠡᠷᠦ ᠨᠢ ᠠᠯᠠᠭᠠ》 ᠭᠡᠵᠦ ᠪᠢᠴᠢᠵᠡᠢ᠃
ᠨᠢᠭᠡᠨᠲᠡ ᠲᠦᠭᠡᠮᠡᠯᠵᠢᠭᠰᠡᠨ ᠪᠥᠬᠡ ᠨᠢ ᠮᠣᠩᠭᠣᠯ ᠪᠥᠬᠡ ᠡᠴᠡ ᠳᠦᠷᠢᠮ ᠦ᠋ᠨ ᠬᠤᠪᠢ ᠳ᠋ᠤ᠌ ᠳᠠᠪᠰᠢᠩᠭᠤᠢ ᠳ᠋ᠠᠭᠠᠨ ᠪᠢᠰᠢ ᠬᠠᠷᠢᠨ ᠬᠡᠴᠢᠨᠡᠨ ᠵᠠᠭᠤᠨ ᠵᠢᠯ ᠢ᠋ᠶ᠋ᠡᠷ᠂ ᠬᠡᠳᠦᠨ ᠦᠶᠡ ᠶ᠋ᠢᠨ ᠬᠥᠮᠦᠨ ᠦ᠌ ᠬᠦᠴᠦ ᠵᠢᠳᠬᠦᠯ᠂ ᠡᠳ᠋ ᠦ᠋ᠨ ᠪᠠ ᠣᠶᠤᠨ ᠤ᠋ ᠴᠢᠷᠮᠠᠢᠯᠭᠠ᠂ ᠤᠬᠠᠭᠤᠯᠭᠠ ᠰᠤᠷᠲᠠᠯᠴᠢᠯᠠᠭᠠ ᠶ᠋ᠢᠨ ᠢᠳᠡ ᠪᠡᠷ ᠠᠭᠠᠵᠢᠮ ᠠᠭᠠᠵᠢᠮ ᠢ᠋ᠶ᠋ᠠᠷ ᠳᠦᠷᠢᠮᠵᠢᠨ ᠲᠦᠭᠡᠮᠡᠯᠵᠢᠭᠰᠡᠨ ᠪᠠᠢᠳᠠᠭ᠃ ᠮᠣᠩᠭᠣᠯ ᠪᠥᠬᠡ ᠪᠡᠨ ᠪᠢᠳᠡ ᠣᠷᠴᠢᠮ ᠤ᠋ᠨ ᠬᠡᠳᠦᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠬᠡᠳᠦᠢ ᠬᠡᠮᠵᠢᠶᠡ ᠪᠡᠷ ᠬᠡᠴᠢᠨᠡᠨ ᠬᠥᠮᠦᠨ ᠶᠠᠭᠠᠬᠢᠵᠤ ᠤᠬᠠᠭᠤᠯᠤᠭᠰᠠᠨ ᠪᠣᠢ? ᠡᠨᠡ ᠲᠠᠯᠠ ᠪᠠᠷ ᠬᠢᠭᠰᠡᠨ ᠪᠢᠳᠡᠨ ᠦ᠌ ᠠᠵᠢᠯ ᠴᠢᠮᠠᠯᠠᠮᠠᠷ ᠪᠠᠭᠠ ᠪᠢᠰᠢ ᠭᠡᠵᠦ ᠤᠤ? ᠵᠢᠤᠳᠤᠤ ᠪᠥᠬᠡ ᠳᠡᠯᠡᠬᠡᠢ ᠳ᠋ᠦ᠍ ᠲᠠᠨᠢᠭᠳᠠᠬᠤ ᠳ᠋ᠤ᠌ 800 ᠵᠠᠭᠤᠨ ᠵᠢᠯ ᠦ᠋ᠨ ᠴᠢᠷᠮᠠᠢᠯᠭᠠ ᠳᠠᠮᠵᠢᠭᠰᠠᠨ ᠰᠢᠦ ᠳᠡ ᠭᠡᠵᠦ ᠪᠣᠳᠣᠭᠠᠴᠢ! ᠲᠡᠭᠡᠬᠦᠯᠡᠷ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠤ᠋ᠨ ᠠᠯᠢ ᠣᠯᠠᠨ ᠵᠦᠢᠯ ᠠᠭᠤᠰᠤᠨ ᠪᠠᠯᠠᠷᠠᠵᠤ᠂ ᠣᠭᠣᠷᠤᠭᠳᠠᠨ ᠭᠡᠭᠡᠭᠳᠡᠵᠦ ᠪᠠᠢᠭᠠ ᠴᠥᠪ ᠦ᠋ᠨ ᠴᠠᠭ ᠰᠢᠭ᠋ ᠬᠠᠲᠠᠭᠤ ᠥᠷᠢᠰᠦᠯᠳᠦᠭᠡᠨ ᠲᠡᠢ ᠦᠶᠡ ᠳ᠋ᠦ᠍᠂ ᠳᠡᠭᠡᠳᠦᠰ ᠡᠴᠡ ᠤᠯᠠᠮᠵᠢᠯᠠᠭᠰᠠᠨ ᠪᠥᠬᠡ ᠶ᠋ᠢᠨ ᠰᠣᠶᠣᠯ ᠢ᠋ᠶ᠋ᠠᠨ ᠬᠢᠮᠠᠭᠠᠳᠠᠨ ᠬᠥᠭᠵᠢᠭᠦᠯᠵᠦ᠂ ᠣᠪᠣᠭᠠ ᠱᠠᠩᠰᠢ ᠪᠠᠨ ᠳᠠᠬᠢᠵᠤ᠂ ᠮᠢᠩᠭᠠᠨ ᠪᠥᠬᠡ ᠪᠡᠨ ᠳᠡᠪᠢᠭᠦᠯᠵᠦ᠂ ᠤᠷᠢᠶᠠ ᠴᠣᠯᠠ ᠪᠠᠨ ᠳᠠᠭᠤᠳᠠᠵᠤ ᠪᠠᠢᠬᠤ ᠪᠠᠨ ᠶᠠᠭᠠᠬᠢᠯᠠ? ᠮᠣᠩᠭᠣᠯᠴᠤᠳ ᠤ᠋ᠨ ᠡᠷᠡ ᠬᠦᠴᠦᠨ᠂ ᠣᠢ ᠤᠬᠠᠭᠠᠨ᠂ ᠪᠠᠭᠠᠲᠤᠷ ᠵᠣᠷᠢᠭ ᠤ᠋ᠨ ᠵᠢᠷᠦᠬᠡᠨ ᠳᠠᠰᠬᠠᠯ ᠪᠣᠯᠤᠭᠰᠠᠨ ᠮᠣᠩᠭᠣᠯ ᠪᠥᠬᠡ ᠪᠡᠨ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠨᠢ ᠠᠪᠴᠤ ᠶᠠᠪᠤᠵᠤ ᠴᠢᠳᠠᠭᠰᠠᠨ ᠡᠰᠡᠬᠦ ᠪᠡᠷ ᠢ᠋ᠶ᠋ᠡᠨ ᠳᠡᠯᠡᠬᠡᠢ ᠶ᠋ᠢᠨ ᠳᠡᠪᠵᠢᠶᠡᠨ ᠳ᠋ᠦ᠍ ᠳᠡᠪᠢᠵᠦ ᠶᠠᠪᠤᠬᠤ ᠰᠠᠢᠬᠠᠨ ᠲᠡᠮᠡᠦᠯᠦᠯ ᠪᠡᠶᠡᠯᠡᠭᠳᠡᠵᠦ ᠴᠢᠳᠠᠨᠠ᠃
ᠮᠣᠩᠭᠣᠯ ᠬᠥᠮᠦᠨ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠢᠯᠳᠤᠵᠤ ᠶᠠᠪᠤᠭᠰᠠᠨ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ 800 ᠵᠢᠯ ᠦ᠋ᠨ ᠳᠠᠷᠠᠭᠠᠬᠢ ᠥᠨᠥᠳᠥᠷ ᠮᠣᠩᠭᠣᠯ ᠪᠥᠬᠡ ᠪᠡᠨ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠷᠢᠯᠳᠤᠭᠤᠯᠬᠤ ᠡᠷᠬᠢᠮ ᠰᠠᠢᠬᠠᠨ ᠰᠠᠨᠠᠭᠠᠴᠢᠯᠠᠭᠠ ᠳᠤᠷᠠᠳᠤᠭᠳᠠᠵᠤ ᠪᠠᠢᠭᠠ ᠳ᠋ᠤ᠌ ᠪᠠᠶᠠᠷᠯᠠᠬᠤ ᠶᠣᠰᠣᠲᠠᠢ ᠪᠥᠭᠡᠳ ᠣᠯᠢᠮᠫᠢᠺ ᠲᠤ᠌ ᠮᠣᠩᠭᠣᠯ ᠪᠥᠬᠡ ᠪᠠᠷᠢᠯᠳᠤᠭᠤᠯᠪᠠᠯ ᠮᠣᠩᠭᠣᠯ ᠬᠥᠮᠦᠨ ᠦᠵᠦᠯᠡᠨᠡ ᠭᠡᠳᠡᠭ ᠰᠠᠢᠬᠠᠨ ᠵᠥᠩᠨᠡᠯ ᠪᠡᠶᠡᠯᠡᠭᠳᠡᠬᠦ ᠶ᠋ᠢᠨ ᠢᠷᠦᠭᠡᠯ ᠲᠠᠯᠪᠢᠶᠠ! ᠪᠥᠬᠡ ᠶ᠋ᠢᠨ ᠬᠡᠢᠮᠣᠷᠢ ᠳᠡᠭᠵᠢᠲᠦᠭᠡᠢ!
① ᠡᠨᠡ ᠵᠣᠬᠢᠶᠠᠯ《ᠤᠷᠤᠭ ᠭᠡᠷ ᠪᠦᠯᠢ ᠨᠡᠢᠭᠡᠮ》 ᠰᠡᠳᠬᠦᠯ ᠦ᠋ᠨ2003 ᠣᠨ ᠤ᠋4 ᠳ᠋ᠦ᠍ᠭᠡᠷ ᠬᠤᠭᠤᠴᠠᠭᠠ ᠳ᠋ᠤ᠌ ᠨᠡᠢᠲᠡᠯᠡᠭᠳᠡᠭᠰᠡᠨ ᠪᠠᠢᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠱᠠᠭᠰᠠᠯ᠂ ᠰᠤᠳᠤᠯᠲᠤ᠂ ᠨᠡᠭᠦᠳᠡᠯ᠂ ᠪᠠᠯ᠂ ᠪᠠᠳᠮᠠ᠂ ᠣᠳᠬᠠᠨᠰᠣᠠ᠂ ᠪᠠᠶᠠᠨᠴᠡᠴᠡᠭ᠂ ᠤᠰᠬᠠᠯ᠂ ᠡᠷᠳᠡᠨᠢᠭᠤᠸᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠰᠡᠬᠡᠭᠡᠷᠡᠯ᠂ ᠭᠠᠷᠮᠠ