ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ᠂ ᠨᠠᠢ᠍ᠮᠠ ᠶᠢᠨ ᠠᠭᠤᠯᠠᠨ ᠳᠤ ᠁ (ᠳᠥᠷᠪᠡ) Сэрүүхэн тал нутаг–<свис> Вальтер Босгард (Walter Bosshard)- Дөрөвдүгээр бөлөг 4
369ᠳᠥᠷᠪᠡ ᠂ ᠰᠠᠷᠵᠢ ᠪᠣᠯᠤᠨ 《ᠢᠨᠢᠶᠡᠭᠰᠡᠨ ᠡᠭᠦᠯᠡ 》
ᠪᠢᠳᠡᠨ ᠢ ᠤᠶᠠᠭᠠᠨ ᠳᠡᠭᠡᠷᠡ ᠡᠴᠡ ᠪᠡᠨ ᠮᠣᠷᠳᠠᠭᠠᠳ ᠬᠡᠳᠦᠨ ᠭᠡᠷ ᠦ᠋ᠨ ᠬᠠᠵᠠᠭᠤ ᠪᠠᠷ ᠭᠠᠷᠬᠤ ᠳ᠋ᠤ᠌ ᠭᠡᠷ ᠦ᠋ᠨ ᠡᠮᠦᠨᠡ ᠬᠡᠳᠦᠨ ᠡᠷᠡᠴᠦᠦᠯ ᠡᠷᠢᠭᠡ ᠪᠡᠨ ᠪᠠᠷᠢᠨ ᠰᠠᠭᠤᠵᠠᠭᠠᠵᠤ ᠪᠠᠢᠪᠠ᠃ ᠲᠡᠳᠡ ᠨᠠᠷ ᠴᠢᠬᠢᠪᠴᠢ ᠪᠡᠨ ᠨᠠᠪᠲᠠᠯᠵᠠᠭᠤᠯᠤᠭᠰᠠᠨ ᠢᠰᠡᠭᠡᠢ ᠮᠠᠯᠠᠭᠠᠢ ᠳᠤᠬᠤᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠤ᠂ ᠤᠷᠲᠤ ᠲᠡᠷᠯᠢᠭ ᠢ᠋ᠶ᠋ᠡᠨ ᠪᠦᠰᠡᠯᠡᠵᠦ᠂ ᠬᠥᠯ ᠳ᠋ᠡᠭᠡᠨ ᠤᠯᠠᠭᠠᠨ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠡᠮᠵᠢᠶᠡᠷᠢᠯᠡᠭᠰᠡᠨ ᠡᠷᠲᠡᠭᠡᠷ ᠬᠣᠩᠰᠢᠶᠠᠷ ᠲᠠᠢ ᠭᠤᠲᠤᠯ ᠡᠮᠦᠰᠴᠡᠢ᠃ ᠪᠣᠷᠣ ᠢᠰᠡᠭᠡᠢ ᠭᠡᠷ ᠦ᠋ᠨ ᠡᠮᠦᠨᠡᠭᠦᠷ ᠬᠡᠳᠦᠨ ᠤᠨᠠᠭᠠ ᠢᠳᠡᠰᠢᠯᠡᠵᠦ᠂ ᠴᠢᠳᠥᠷ ᠲᠤᠰᠢᠶᠠ ᠠ᠋ᠴᠠ ᠪᠠᠨ ᠪᠣᠯᠵᠤ ᠰᠢᠮᠡᠯᠢᠭ ᠪᠡᠯᠴᠢᠭᠡᠷ ᠲᠦ᠍ ᠬᠦᠷᠴᠦ ᠴᠢᠳᠠᠬᠤ ᠦᠭᠡᠢ ᠰᠠᠨᠳᠤᠷᠴᠠᠭᠠᠨᠠ᠃
ᠭᠡᠷ ᠡᠴᠡ ᠨᠡᠯᠢᠶᠡᠳ ᠵᠠᠢᠲᠠᠢ ᠭᠠᠵᠠᠷ ᠲᠤ᠌ ᠨᠢᠭᠡ ᠬᠡᠦᠬᠡᠳ ᠲᠣᠮᠣ ᠨᠣᠬᠠᠢ ᠲᠠᠢ ᠪᠠᠨ ᠲᠣᠭᠯᠠᠨᠠ᠃ ᠲᠡᠷᠡ ᠨᠣᠬᠠᠢ ᠨᠢ ᠪᠢᠳᠡᠨ ᠦ᠌ ᠢᠷᠡᠭᠰᠡᠨ ᠢ ᠮᠡᠳᠡᠭᠡᠯᠡᠵᠦ ᠨᠡᠯᠢᠶᠡᠳ ᠤᠳᠠᠭᠠᠨ ᠪᠢᠳᠡᠨ ᠢ ᠨᠥᠬᠥᠷᠰᠡᠭ ᠪᠤᠰᠤ ᠪᠠᠷ ᠬᠣᠷᠭᠣᠭᠣᠪᠠ᠃ ᠬᠣᠶᠠᠷ ᠪᠦᠰᠡᠭᠦᠢ ᠪᠣᠷᠣ ᠲᠣᠯᠣᠭᠠᠢ ᠶ᠋ᠢ ᠠᠯᠭᠤᠷᠬᠠᠨ ᠳᠠᠪᠠᠭᠰᠠᠭᠠᠷ ᠭᠠᠷᠴᠤ᠂ ᠬᠤᠳᠳᠤᠭ ᠳᠡᠭᠡᠷᠡ ᠬᠦᠷᠴᠦ ᠤᠰᠤ ᠤᠳᠬᠤᠨ ᠮᠣᠳᠣᠨ ᠰᠠᠭᠤᠯᠠᠭᠠ ᠪᠠᠨ ᠳᠦᠭᠦᠷᠭᠡᠨᠡ᠃ ᠲᠡᠳᠡᠨ ᠦ᠌ ᠨᠢᠭᠡ ᠨᠢ ᠲᠣᠯᠣᠭᠠᠢ ᠪᠠᠨ ᠬᠥᠬᠡ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠣᠷᠢᠶᠠᠵᠤ᠂ ᠪᠥᠬᠥᠢᠬᠦ ᠳ᠋ᠦ᠍ ᠮᠥᠩᠭᠥ ᠱ᠌ᠢᠷᠦ ᠪᠡᠷ ᠬᠢᠭᠰᠡᠨ ᠤᠷᠲᠤ ᠡᠭᠡᠮᠦᠭ ᠨᠢ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠲᠠᠭᠠᠨᠠᠭᠰᠠᠨ ᠤᠰᠤᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠣᠴᠣ ᠬᠠᠷᠠᠭᠳᠠᠨ᠂ ᠶᠠᠭ ᠯᠠ ᠤᠯᠠᠭᠠᠨ ᠪᠣᠳᠣᠭ ᠳᠣᠷᠣᠭᠰᠢ ᠪᠠᠨ ᠳᠤᠰᠤᠯᠠᠵᠤ ᠪᠠᠢᠭᠠ ᠮᠡᠲᠦ ᠠᠵᠢ᠃ ᠲᠡᠭᠡᠭᠡᠳ ᠲᠡᠷᠡ ᠪᠦᠰᠡᠭᠦᠢ ᠦᠵᠡᠭᠦᠯᠵᠦ ᠯᠡ ᠪᠠᠢᠮᠠᠷ ᠲᠡᠢᠮᠦ ᠭᠤᠸᠠ ᠰᠠᠢᠬᠠᠨ ᠵᠢᠮᠰᠡᠭ ᠢ᠋ᠶ᠋ᠡᠨ ᠳᠣᠣᠷᠠ ᠪᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢᠩᠭᠠ ᠣᠷᠢᠶᠠᠪᠠ᠃
ᠲᠠᠯᠠ ᠨᠤᠲᠤᠭ ᠤ᠋ᠨ ᠥᠴᠥᠭᠡᠳᠦᠷ᠂ ᠥᠨᠥᠳᠥᠷ᠂ ᠮᠠᠷᠭᠠᠰᠢ ᠶ᠋ᠢᠨ ᠠᠮᠢᠳᠤᠷᠠᠯ ᠡᠢᠮᠦ ᠯᠡ ᠭᠣᠶᠣ᠂ ᠬᠤᠪᠢᠷᠠᠰᠢ ᠦᠭᠡᠢ᠃ ᠨᠡᠭᠦᠳᠡᠯᠴᠢᠳ ᠲᠦ᠍ ᠠᠪᠴᠤ ᠬᠡᠯᠡᠪᠡᠯ ᠡᠳᠦᠷ ᠰᠥᠨᠢ ᠬᠢᠭᠡᠳ ᠤᠯᠠᠷᠢᠯ ᠤ᠋ᠨ ᠬᠤᠪᠢᠷᠠᠯ ᠢ ᠭᠠᠷᠭᠠᠪᠠᠯ ᠥᠭᠡᠷᠡ ᠪᠤᠰᠤᠳ ᠨᠢ ᠬᠤᠪᠢᠷᠠᠰᠢ ᠦᠭᠡᠢ ᠪᠠᠢᠳᠠᠭ ᠠᠵᠤᠭᠤ᠃ ᠬᠠᠶᠠ ᠳ᠋ᠠᠭᠠᠨ ᠪᠣᠷᠣᠭᠠᠯᠠᠪᠠᠴᠤ ᠳᠠᠷᠠᠭᠠ ᠨᠢ ᠪᠠᠰᠠ ᠨᠠᠷᠠ ᠨᠢᠳᠦ ᠭᠢᠯᠠᠰᠬᠠᠨ ᠳᠤᠯᠠᠢᠳᠠᠭ᠃ ᠰᠥᠨᠢ ᠨᠢ ᠬᠠᠷᠠᠩᠭᠤᠢ ᠪᠣᠯᠬᠤ ᠳ᠋ᠤ᠌ ᠬᠥᠮᠦᠨ ᠨᠢ ᠤᠨᠲᠠᠵᠤ ᠠᠮᠠᠷᠠᠨ᠂ ᠡᠳᠦᠷ ᠪᠣᠯᠵᠤ ᠨᠠᠷᠠ ᠮᠠᠨᠳᠤᠬᠤ ᠳ᠋ᠤ᠌ ᠠᠵᠢᠯ ᠳ᠋ᠠᠭᠠᠨ ᠭᠠᠷᠬᠤ ᠨᠢ ᠶᠠᠭ ᠯᠠ ᠮᠠᠯᠴᠢᠳ ᠤ᠋ᠨ ᠠᠵᠢᠯ ᠠᠮᠢᠳᠤᠷᠠᠯ ᠪᠠ ᠪᠠᠶᠠᠷ ᠪᠠᠶᠠᠰᠤᠯ ᠳ᠋ᠤ᠌ ᠵᠣᠷᠢᠭᠤᠯᠤᠭᠳᠠᠭᠰᠠᠨ ᠮᠡᠲᠦ᠃ ᠡᠩ ᠦ᠋ᠨ ᠠᠷᠠᠳ ᠤ᠋ᠨ ᠠᠮᠢᠳᠤᠷᠠᠯ ᠤ᠋ᠨ ᠭᠠᠢᠬᠠᠮᠰᠢᠭ ᠪᠣᠯ - ᠡᠬᠡ ᠭᠠᠵᠠᠷ ᠪᠠ ᠰᠠᠯᠬᠢᠨ ᠤ᠋ ᠦᠨᠦᠷ ᠲᠦ᠍ ᠠᠮᠢᠳᠤᠷᠠᠬᠤ ᠪᠣᠯᠤᠨᠠ᠃
ᠪᠢᠳᠡ ᠭᠡᠷ ᠲᠦ᠍ ᠬᠡᠰᠡᠭ ᠡᠷᠡᠴᠦᠦᠯ ᠂ ᠪᠦᠰᠡᠭᠦᠢᠴᠦᠦᠯ ᠲᠡᠢ ᠴᠣᠭ ᠲᠤᠯᠭᠠ ᠲᠣᠭᠣᠷᠢᠨ ᠰᠠᠭᠤᠪᠠ᠃ ᠡᠨᠡ ᠨᠢ ᠨᠠᠳᠠ ᠶᠠᠭ ᠯᠠ ᠲᠥᠷᠥᠯ ᠰᠠᠳᠤᠨ ᠴᠣᠭ ᠲᠠᠭᠠᠨ ᠪᠠᠢᠭᠠ ᠰᠢᠭ᠋ ᠂ ᠶᠠᠭ ᠯᠠ ᠲᠠᠯᠠ ᠨᠤᠲᠤᠭ ᠤ᠋ᠨ ᠰᠠᠯᠬᠢ ᠬᠥᠷᠥᠰᠥᠨ ᠤ ᠳᠡᠭᠡᠷᠡ ᠨᠢ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠬᠥᠮᠦᠨ ᠵᠤᠨ ᠳ᠋ᠠᠭᠠᠨ ᠦᠵᠡᠭᠦᠯᠵᠦ ᠪᠠᠢᠭᠠ ᠬᠠᠢᠷᠠ ᠬᠠᠯᠠᠮᠵᠢ ᠲᠠᠢ ᠠᠳᠠᠯᠢᠬᠠᠨ᠃
ᠪᠢᠳᠡᠨ ᠲᠡᠢ ᠴᠣᠭ ᠬᠡᠰᠡᠭ ᠳᠣᠪᠲᠣᠯᠭᠠᠭᠰᠠᠨ ᠡᠷᠡ ᠡᠪᠦᠷ ᠢ᠋ᠶ᠋ᠡᠨ ᠠᠭᠤᠳᠠᠯᠵᠤ ᠤᠯᠠᠭᠠᠨ ᠬᠦᠷᠡᠩ ᠥᠩᠭᠡ ᠲᠡᠢ ᠮᠠᠨᠤᠬᠤᠨ ᠬᠥᠬᠦᠦᠷ ᠭᠠᠷᠭᠠᠨ ᠨᠠᠳᠠ ᠳ᠋ᠤ᠌ ᠪᠠᠷᠢᠯᠠ᠃ ᠷᠠᠰᠢ ᠳᠣᠣᠷᠠ ᠪᠠᠨ ᠨᠠᠳᠠ ᠳ᠋ᠤ᠌ ᠥᠪᠡᠷ ᠦ᠋ᠨ ᠮᠥᠩᠭᠥᠨ ᠬᠥᠬᠦᠦᠷ ᠢ᠋ᠶ᠋ᠡᠨ ᠥᠭᠴᠦ᠂ ᠴᠠᠭᠠᠰᠢ ᠪᠠᠨ ᠭᠡᠷ ᠦ᠋ᠨ ᠡᠵᠡᠨ ᠳ᠋ᠦ᠍ ᠳᠠᠮᠵᠢᠭᠤᠯᠬᠤ ᠶ᠋ᠢ ᠳᠣᠬᠢᠪᠠ᠃ ᠭᠡᠷ ᠦ᠋ᠨ ᠡᠵᠡᠨ ᠬᠣᠶᠠ᠊ᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠣᠰᠴᠤ ᠠᠪᠤᠭᠠᠳ ᠬᠦᠨᠳᠦᠳᠬᠡᠯᠲᠡᠢ ᠪᠡᠷ ᠬᠠᠮᠠᠷ ᠤ᠋ᠨ ᠢ᠋ᠶ᠋ᠠᠨ ᠡᠮᠦᠨᠡ ᠬᠦᠷᠭᠡᠭᠡᠳ ᠨᠠᠳᠠ ᠳ᠋ᠤ᠌ ᠶᠣᠰᠣᠷᠬᠠᠭ ᠪᠤᠴᠠᠭᠠᠯᠠ᠃ ᠪᠢ ᠴᠦ᠍ ᠲᠡᠭᠦᠨ ᠲᠡᠢ ᠠᠳᠠᠯᠢ ᠶᠣᠰᠣᠭᠠᠷ ᠬᠢᠭᠡᠳ ᠥᠭᠭᠦᠭᠰᠡᠨ ᠬᠦᠬᠦᠷ ᠢ ᠨᠢ ᠪᠤᠴᠠᠭᠠᠭᠰᠠᠨ ᠤ᠋ ᠳᠠᠷᠠᠭᠠ᠂ ᠲᠡᠳᠡᠭᠡᠷ ᠡᠷᠡᠴᠦᠦᠯ ᠡᠬᠢᠯᠡᠨ ᠨᠠᠳᠠ ᠲᠠᠢ ᠡᠩᠬᠡ ᠮᠡᠨᠳᠦ᠂ ᠮᠠᠯ ᠰᠦᠷᠦᠭ ᠦ᠋ᠨ ᠲᠤᠬᠠᠢ ᠶᠠᠷᠢᠵᠤ ᠭᠠᠷᠪᠠ᠃ ᠪᠢᠳᠡᠨ ᠶᠠᠷᠢᠯᠴᠠᠭᠠᠨ ᠳ᠋ᠠᠭᠠᠨ ᠬᠢᠲᠠᠳ ᠮᠣᠩᠭᠣᠯ ᠬᠣᠯᠢᠨ᠂ ᠬᠠᠶᠠ ᠨᠢᠭᠡ ᠳᠣᠷᠴᠣ᠌ ᠲᠡᠭᠡᠭᠯᠡᠬᠦ ᠳ᠋ᠦ᠍ ᠰᠠᠬᠠᠯᠲᠤ ᠡᠷᠡ ᠬᠠᠮᠵᠢᠵᠤ ᠥᠭᠭᠦᠨᠡ᠃ ᠡᠷᠡᠴᠦᠦᠯ ᠨᠢ ᠪᠣᠷᠣᠯᠠᠭᠰᠠᠨ ᠨᠥᠬᠥᠷᠰᠡᠭ ᠴᠢᠷᠠᠢ ᠲᠠᠢ᠂ ᠬᠠᠷᠠ ᠭᠡᠵᠢᠭᠡ ᠪᠡᠨ ᠮᠠᠯᠠᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠣᠣᠭᠤᠷ ᠤᠨᠵᠢᠭᠤᠯᠵᠠᠢ᠃ ᠲᠡᠳᠡᠨ ᠤ ᠳᠣᠲᠣᠷᠠᠬᠢ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠪᠦᠰᠡᠭᠦᠢ ᠶ᠋ᠢ ᠰᠠᠷᠠᠨᠭᠡᠷᠡᠯ ( ᠵᠢᠷᠤᠭ 79 ) ᠭᠡᠳᠡᠭ᠃ ᠲᠡᠷᠡ ᠬᠦᠷᠡᠩ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠥᠷᠭᠡᠨ ᠳᠤᠭᠤᠢ ᠴᠢᠷᠠᠢ ᠪᠠᠨ ᠣᠷᠢᠶᠠᠵᠤ᠂ ᠰᠣᠷᠮᠤᠤᠰᠤ ᠪᠣᠯᠤᠨ ᠠᠨᠢᠰᠬᠠ ᠨᠢ ᠪᠠᠬᠠᠨ ᠬᠠᠷᠠᠯᠠᠵᠠᠢ᠃
ᠥᠭᠡᠷᠡ ᠨᠢᠭᠡ ᠪᠦᠰᠡᠭᠦᠢ ᠬᠤᠳᠳᠤᠭ ᠠ᠋ᠴᠠ ᠤᠰᠤ ᠠᠪᠤᠭᠠᠳ ᠢᠷᠡᠯᠡ᠃ ᠲᠡᠭᠦᠨ ᠳ᠋ᠦ᠍ ᠲᠣᠯᠣᠭᠠᠢ ᠶ᠋ᠢᠨ ᠵᠠᠰᠠᠯ ᠠᠯᠠᠭᠠ᠃ ᠡᠨᠡ ᠥᠬᠢᠨ ᠨᠠᠮᠤᠷ ᠬᠤᠷᠢᠮᠯᠠᠬᠤ ᠪᠠᠷ ᠪᠠᠢᠭᠠ ᠶᠤᠮ ᠭᠡᠵᠦ ᠷᠠᠰᠢ ᠨᠠᠳᠠ ᠳ᠋ᠤ᠌ ᠶᠠᠷᠢᠪᠠ᠃ ᠨᠡᠭᠡᠭᠡᠯᠲᠡ ᠲᠡᠢ ᠭᠡᠷ ᠦ᠋ᠨ ᠡᠭᠦᠳᠡ ᠪᠡᠷ ᠪᠢ ᠲᠡᠭᠦᠨ ᠤ ᠭᠣᠶᠣ ᠠᠯᠬᠤᠳᠠᠯ ᠢ ᠠᠵᠢᠭᠯᠠᠪᠠ᠃ ᠬᠣᠶᠠᠷ ᠭᠤᠶᠠ ᠨᠢ ᠲᠡᠭᠦᠨ ᠣ ᠠᠯᠬᠤᠳᠠᠯ ᠢ ᠳᠠᠭᠠᠨ ᠪᠥᠰ ᠲᠡᠷᠯᠢᠭ ᠳᠣᠲᠣᠷᠠ ᠪᠠᠨ ᠢᠯᠡᠬᠡᠨ ᠮᠡᠳᠡᠭᠳᠡᠨᠡ᠃ ᠭᠤᠶᠠ ᠨᠢ ᠣᠬᠣᠷᠬᠠᠨ ᠪᠥᠭᠡᠳ ᠶᠠᠭ ᠯᠠ ᠬᠤᠭᠤᠷ ᠤ᠋ᠨ ᠬᠥᠪᠴᠢ ᠠᠳᠠᠯᠢ ᠴᠢᠩᠭᠠ ᠠᠵᠢ᠃ ᠭᠡᠷ ᠲᠦ᠍ ᠲᠡᠷᠡ ᠡᠪᠦᠳᠦᠭ ᠢ᠋ᠶ᠋ᠡᠨ ᠨᠤᠭᠤᠯᠤᠨ ᠰᠥᠬᠥᠷᠡᠨ ᠰᠠᠭᠤᠭᠠᠳ ᠤᠰᠤ ᠪᠠᠨ ᠨᠠᠷᠢᠬᠠᠨ ᠥᠨᠳᠥᠷ ᠸᠠᠭᠠᠷ ᠲᠤ᠌ ᠶᠡᠭᠦᠯᠡᠯᠡ᠃ ᠬᠡᠴᠢᠨᠡᠭᠡᠨ ᠵᠠᠭᠤᠨ ᠮᠢᠩᠭᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠨᠡᠭᠦᠳᠡᠯᠴᠢᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠡᠨᠡ ᠬᠦ᠌ ᠬᠥᠳᠡᠯᠭᠡᠭᠡᠨ ᠢ᠋ ᠬᠥᠮᠦᠰ ᠬᠡᠳᠦᠢ ᠤᠳᠠᠭᠠ ᠬᠢᠭᠰᠡᠨ ᠪᠣᠯ ? ᠪᠢᠳᠡ ᠴᠠᠢ ᠤᠤᠭᠤᠵᠤ᠂ ᠬᠦᠴᠢᠲᠡᠢ ᠬᠠᠲᠠᠭᠤ ᠬᠤᠷᠤᠳ ᠢᠳᠡᠪᠡ᠃ ᠭᠡᠨᠡᠳᠲᠡ ᠷᠠᠰᠢ ᠶ᠋ᠢᠨ ᠴᠢᠷᠠᠢ ᠪᠠᠷᠤᠢᠵᠤ ᠪᠣᠰᠤᠭᠠᠳ ᠠᠷᠤ ᠳ᠋ᠤ᠌ ᠮᠢᠨᠢ ᠲᠠᠯᠪᠢᠭᠠᠰᠤᠲᠠᠢ ᠲᠠᠰᠢᠭᠤᠷ ᠢ᠋ ᠲᠡᠳᠡᠨ ᠠᠪᠤᠭᠠᠳ ᠡᠭᠦᠳᠡᠨ ᠭᠠᠳᠠᠨᠠ ᠲᠠᠯᠪᠢᠪᠠ᠃ ᠢᠩᠭᠢᠭᠡᠳ ᠳᠡᠮᠡᠢ ᠯᠡ ᠤᠳᠠᠯ ᠦᠭᠡᠢ ᠠᠳᠠ ᠠ᠋ᠴᠠ ᠠᠶᠠᠷᠯᠠᠵᠤ ᠮᠣᠷᠳᠠᠯᠠ᠃ ᠨᠡᠯᠢᠶᠡᠳ ᠳᠠᠭᠤ ᠦᠭᠡᠢ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠷᠠᠰᠢ ᠨᠠᠳᠠ ᠤᠷᠤᠭᠤ ᠬᠠᠨᠳᠤᠨ :
— ᠬᠣᠶᠠᠷ ᠵᠦᠢᠯ ᠦ᠋ᠨ ᠶᠠᠭᠤᠮᠠ ᠶ᠋ᠢ ᠴᠢ ᠶᠠᠭᠤᠨ ᠤ᠋ ᠤᠷᠢᠳ ᠮᠡᠳᠡᠵᠦ ᠪᠠᠢᠬᠤ ᠶᠣᠰᠣᠲᠠᠢ᠃ ᠬᠡᠨ ᠬᠡᠷᠪᠡ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠭᠡᠷ ᠲᠦ᠍ ᠠᠪᠴᠤ ᠣᠷᠣᠪᠠᠯ ᠭᠡᠷ ᠦ᠋ᠨ ᠡᠵᠡᠨ ᠢ᠋ ᠳᠣᠷᠣᠮᠵᠢᠯᠠᠭᠰᠠᠨ ᠳ᠋ᠤ᠌ ᠲᠣᠭᠠᠴᠠᠭᠳᠠᠨᠠ᠃ ᠪᠠᠰᠠ ᠬᠡᠨ ᠬᠡᠷᠪᠡ ᠬᠥᠯ ᠢ᠋ᠶ᠋ᠡᠨ ᠭᠠᠯ ᠤ᠋ᠨ ᠥᠭᠡᠳᠡ ᠵᠢᠭᠢᠪᠡᠯ ᠭᠠᠯ ᠤ᠋ᠨ ᠪᠤᠷᠬᠠᠨ ᠳ᠋ᠤ᠌ ᠨᠢᠭᠦᠯ ᠬᠢᠭᠰᠡᠨ ᠤᠴᠢᠷ ᠮᠥᠨ᠃ ᠡᠨᠡ ᠪᠣᠯ ᠮᠣᠩᠭᠣᠯ ᠶᠣᠰᠣ᠂ ᠬᠠᠭᠤᠴᠢᠨ ᠳᠠᠳᠬᠠᠯ ! ᠭᠡᠯᠡ᠃
— ᠴᠢ ᠲᠡᠭᠡᠪᠡᠯ ᠡᠨᠡ ᠳᠦᠷᠢᠮ ᠢ᠋ ᠨᠠᠳᠠ ᠳ᠋ᠤ᠌ ᠡᠷᠲᠡᠬᠡᠨ ᠬᠡᠯᠡᠬᠦ ᠪᠡᠨ ᠶᠠᠭᠠᠬᠢᠭᠰᠠᠨ ᠪᠣᠢ ?
— ᠬᠡᠨ ᠮᠡᠳᠡᠨᠡ ᠳᠠ ! ᠴᠢ ᠡᠭᠦᠨ ᠢ᠋ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠭᠡᠵᠦ᠃ ᠬᠡᠦᠬᠡᠳ ᠦ᠋ᠳ ᠠᠯᠬᠤᠵᠤ ᠴᠢᠳᠠᠬᠤ ᠠ᠋ᠴᠠ ᠪᠠᠨ ᠡᠬᠢᠯᠡᠭᠡᠳ ᠮᠡᠳᠡᠳᠡᠭ ᠶᠣᠰᠣ ᠶ᠋ᠢ!
ᠪᠢᠳᠡᠨ ᠦ᠌ ᠡᠮᠦᠨᠡ ᠨᠡᠢᠳᠡᠮ ᠳ᠋ᠡᠭᠡᠨ ᠬᠥᠬᠡᠷᠡᠨ ᠵᠡᠷᠭᠡᠯᠭᠡᠡᠲᠦᠵᠦ᠂ ᠮᠣᠷᠢᠳ ᠤ᠋ᠨ ᠲᠤᠭᠤᠷᠠᠢ ᠨᠠᠪᠴᠢᠰ ᠤ᠋ᠨ ᠳᠡᠭᠡᠷᠡᠬᠢ ᠰᠢᠭᠦᠳᠡᠷᠢ ᠶ᠋ᠢᠨ ᠤᠰᠤ ᠶ᠋ᠢ ᠴᠡᠴᠡᠭ ᠦ᠋ᠨ ᠳᠡᠭᠡᠭᠦᠷ ᠦᠰᠦᠷᠬᠢᠯᠡᠭᠦᠯᠦᠭᠰᠡᠭᠡᠷ ᠪᠠᠢᠯᠠ᠃ ᠠᠭᠤᠴᠢᠯᠠᠭᠠᠷᠠᠢ ! ᠬᠥᠭᠡᠷᠦᠬᠦᠨ ᠴᠡᠴᠡᠭ ᠦ᠋ᠳ ᠮᠢᠨᠢ᠂ ᠮᠢᠨᠦ ᠬᠣᠢᠨᠠ ᠲᠡᠳᠡ ᠪᠦᠷ ᠯᠡ ᠬᠤᠭᠤᠷᠠᠵᠤ ᠲᠠᠰᠤᠷᠠᠨ ᠡᠰᠡᠬᠦᠯᠡ ᠬᠠᠲᠠᠵᠤ ᠦᠬᠦᠬᠦ ᠪᠣᠯᠤᠨᠠ᠃ ᠷᠠᠰᠢ ᠳ᠋ᠤ᠌ ᠡᠭᠦᠨ ᠢ᠋ ᠠᠩᠬᠠᠷᠬᠤ ᠰᠡᠳᠬᠢᠯ ᠭᠡᠵᠦ ᠠᠯᠠᠭᠠ᠃ ᠪᠢᠳᠡᠨ ᠢ᠋ ᠨᠢᠭᠡ ᠲᠡᠭᠰᠢᠬᠡᠨ ᠨᠠᠮᠬᠠᠨ ᠳᠠᠪᠠᠭᠠ ᠳ᠋ᠤ᠌ ᠣᠢᠷᠠᠳᠬᠤ ᠳ᠋ᠤ᠌ ᠷᠠᠰᠢ ᠪᠠᠶᠠᠷᠯᠠᠭᠰᠠᠨ ᠳᠠᠭᠤ ᠪᠠᠷ ᠨᠠᠳᠠ ᠳ᠋ᠤ᠌᠄
— ᠡᠨᠡ ᠳᠠᠪᠠᠭᠠᠨ ᠤ᠋ ᠴᠠᠭᠠᠨᠠ ᠴᠢ ᠮᠢᠨᠦ ᠪᠡᠯᠴᠢᠵᠦ ᠪᠠᠢᠭᠠ ᠬᠣᠨᠢᠨ ᠰᠦᠷᠦᠭ ᠢ᠋ ᠬᠠᠷᠠᠬᠤ ᠪᠣᠯᠤᠨᠠ ᠭᠡᠯᠡ᠃
ᠲᠡᠷᠡ ᠤᠷᠢᠳ ᠢ᠋ᠶ᠋ᠠᠷ ᠳᠣᠪᠲᠣᠯᠤᠨ ᠣᠳᠪᠠ᠃ ᠥᠨᠳᠥᠷ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠲᠡᠷᠡ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ᠂ ᠰᠠᠷᠠᠪᠴᠢᠯᠠᠨ ᠬᠠᠷᠠᠭᠠᠳ ᠳᠥᠭᠥᠮ ᠦ᠋ᠨ ᠡᠩᠭᠡᠷ ᠲᠦ᠍ ᠬᠠᠷᠠᠭᠳᠠᠬᠤ ᠭᠡᠷ ᠢ᠋ ᠵᠢᠭᠠᠪᠠ᠃ ᠴᠠᠭᠠᠳᠤ ᠲᠠᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍ ᠪᠥᠮᠪᠥᠭᠡᠷ ᠪᠥᠮᠪᠥᠭᠡᠷ ᠲᠣᠮᠣ ᠬᠠᠲᠠᠳ ᠤ᠋ᠨ ᠳᠤᠮᠳᠠ ᠬᠣᠨᠢᠳ ᠨᠢ ᠢᠳᠡᠰᠢᠯᠡᠵᠦ ᠪᠠᠢᠨᠠ᠃ ᠦᠳᠡ ᠶ᠋ᠢᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠬᠣᠯᠠ ᠠ᠋ᠴᠠ ᠶᠠᠭ ᠯᠠ ᠴᠠᠭᠠᠨ ᠭᠡᠷᠡᠯ ᠪᠤᠶᠤ ᠴᠠᠭᠠᠨ ᠴᠡᠴᠡᠭ ᠮᠡᠲᠦ ᠬᠠᠷᠠᠭᠳᠠᠵᠤ᠂ ᠬᠠᠶᠠ ᠴᠠᠢᠷᠠᠨ ᠬᠠᠶᠠ ᠳᠠᠯᠳᠠᠷᠠᠨᠠ᠃
ᠷᠠᠰᠢ ᠬᠥᠳᠡᠯᠬᠦ ᠶ᠋ᠢ ᠶᠠᠭᠠᠷᠠᠭᠤᠯᠵᠤ᠂ ᠪᠢᠳᠡ ᠳᠠᠬᠢᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠯᠠ᠃ ᠷᠠᠰᠢ ᠡᠮᠦᠨᠡ ᠮᠢᠨᠢ ᠳᠠᠪᠬᠢᠭᠤᠯᠤᠨ ᠣᠳᠴᠤ᠂ ᠰᠠᠷᠵᠢ ᠶ᠋ᠢᠨ ᠨᠠᠳᠠ ᠳ᠋ᠤ᠌ ᠪᠠᠷᠢᠭᠰᠠᠨ ᠭᠡᠷ ᠴᠣᠬᠣᠮ ᠰᠠᠢᠬᠠᠨ ᠪᠠᠷᠢᠭᠳᠠᠭᠰᠠᠨ ᠡᠰᠡᠬᠦ ᠶ᠋ᠢ ᠰᠢᠯᠭᠠᠬᠤ ᠪᠠᠷ ᠪᠣᠯᠪᠠ᠃ ᠬᠡᠦᠬᠡᠳ ᠲᠡᠪᠡᠷᠢᠭᠰᠡᠨ ᠰᠠᠷᠵᠢ ᠨᠠᠮᠠᠶ᠋ᠢ ᠲᠣᠰᠣᠨ ᠭᠠᠷᠴᠤ ᠢᠷᠡᠭᠡᠳ:
— ᠠᠮᠤᠷᠬᠠᠨ ᠰᠠᠢᠨ ! ᠭᠡᠵᠦ ᠲᠥᠪ ᠶᠣᠰᠣᠷᠬᠠᠭ ᠶᠠᠷᠢᠭᠠᠳ ᠳᠣᠷᠣᠭᠰᠢ ᠪᠠᠨ ᠪᠥᠬᠥᠢᠯᠡ᠃ ᠲᠡᠭᠡᠭᠡᠳ ᠮᠢᠨᠦ ᠠᠩᠬᠠᠷᠤᠯ ᠢ ᠬᠡᠦᠬᠡᠳ ᠳᠡᠭᠡᠷᠡ ᠪᠡᠨ ᠲᠠᠲᠠᠬᠤ ᠭᠡᠵᠦ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠠᠷᠠᠵᠤ᠂ ᠰᠢᠨᠡ ᠲᠡᠷᠯᠢᠭ ᠦ᠋ᠨ ᠬᠣᠷᠮᠣᠢ ᠠ᠋ᠴᠠ ᠨᠢ ᠲᠠᠲᠠᠵᠤ ᠥᠭᠪᠡ᠃
— ᠡᠷᠡᠭᠦᠯ ᠴᠢᠭᠢᠷᠠᠭ᠂ ᠰᠦᠷᠯᠢᠭ ᠬᠥᠪᠡᠭᠦᠨ ᠪᠠᠢᠨᠠ ᠳᠠ ᠭᠡᠵᠦ ᠮᠢᠨᠦ ᠮᠠᠭᠲᠠᠭᠰᠠᠨ ᠢ ᠷᠠᠰᠢ ᠰᠣᠨᠣᠰᠤᠭᠰᠠᠨ ᠪᠥᠭᠡᠳ ᠰᠠᠷᠵᠢ ᠭᠡᠷ ᠲᠡᠭᠡᠨ ᠣᠷᠣᠬᠤ ᠶ᠋ᠢ ᠤᠷᠢᠯᠠ᠃
— ᠪᠤᠤ ᠲᠡᠢᠮᠦ ᠥᠨᠳᠥᠷ ᠳᠠᠭᠤ ᠪᠠᠷ ᠶᠠᠷᠢᠭᠠᠴᠢ ! ᠲᠡᠭᠦᠨ ᠦ᠌ ᠬᠦᠦ ᠭᠡᠰᠡᠨ ᠢ ᠪᠤᠷᠬᠠᠨ ᠲᠡᠭᠷᠢ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠰᠢᠦ! ᠡᠢᠮᠦ ᠡᠴᠡ ᠡᠳᠦᠢ ᠪᠣᠯᠲᠠᠯᠠ ᠥᠬᠢᠨ ᠬᠥᠮᠦᠨ ᠦ᠌ ᠬᠤᠪᠴᠠᠰᠤ ᠡᠮᠦᠰᠬᠡᠵᠦ ᠪᠠᠢᠭᠠ ᠶᠤᠮ ᠭᠡᠯᠡ᠃
ᠲᠡᠭᠦᠨ ᠦ᠌ ᠠᠶᠤᠳᠠᠭ ᠵᠦᠢᠯ ᠳ᠋ᠦ᠍ᠨᠢ ᠪᠢ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠢᠨᠢᠶᠡᠭᠡᠳ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠤ᠋ ᠳᠠᠷᠠᠭᠠ᠄
— ᠶᠠᠮᠠᠷ ᠨᠡᠷᠡ ᠲᠡᠢ ᠪᠣᠢ ? ᠬᠦᠦ ᠴᠢᠨᠢ ᠭᠡᠵᠦ ᠠᠰᠠᠭᠤᠯᠠ᠃
— ᠳᠥᠷᠪᠡᠨ ᠨᠠᠰᠤ ᠬᠦᠷᠦᠭᠰᠡᠨ ᠬᠣᠢᠨᠠ ᠪᠢ ᠲᠡᠭᠦᠨ ᠢ ᠬᠤᠪᠢᠯᠭᠠᠨ ᠳ᠋ᠤ᠌ ᠠᠪᠠᠴᠢᠨ ᠨᠡᠷᠡ ᠭᠤᠶᠤᠨᠠ᠃ ᠲᠡᠷᠡ ᠪᠣᠯᠲᠠᠯᠠ ᠪᠢᠳᠡ ᠲᠡᠭᠦᠨ ᠢ ᠪᠢᠴᠢᠬᠠᠨ ᠰᠢᠪᠠᠭᠤ᠂ ᠴᠠᠭᠠᠨ ᠴᠡᠴᠡᠭ᠂ ᠢᠨᠢᠶᠡᠭᠰᠡᠨ ᠡᠭᠦᠯᠡ ᠪᠤᠶᠤ ᠪᠣᠳᠣᠯ ᠳ᠋ᠤ᠌ ᠣᠷᠣᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠷ ᠯᠡ ᠨᠡᠷᠡᠯᠡᠨᠡ᠃
ᠰᠠᠷᠵᠢ ᠶ᠋ᠢ ᠳᠠᠭᠠᠯᠳᠤᠨ ᠭᠡᠷ ᠲᠦ᠋ᠨᠢ ᠣᠷᠣᠪᠠᠯ ᠴᠠᠢ ᠪᠠᠨ ᠨᠢᠭᠡᠨᠲᠡ ᠪᠡᠯᠡᠬᠡᠨ ᠪᠣᠯᠭᠠᠵᠠᠢ᠃ ᠰᠠᠷᠵᠢ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠡᠷᠡᠭᠦᠯ ᠮᠥᠷᠲᠡᠭᠡᠨ ᠬᠦᠳᠡᠷᠯᠢᠭ᠃ ᠲᠡᠷᠡ ᠪᠠᠶᠠᠷᠲᠠᠢ ᠢᠨᠢᠶᠡᠮᠰᠦᠭᠯᠡᠵᠦ᠂ ᠰᠢᠨᠡᠬᠡᠨ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠤᠭᠰᠠᠨ ᠨᠢᠴᠦᠭᠦᠨ ᠬᠡᠦᠬᠡᠳ ᠲᠡᠢ ᠪᠡᠨ ᠨᠠᠭᠠᠳᠤᠨᠠ᠃ 《ᠢᠨᠢᠶᠡᠭᠰᠡᠨ ᠡᠭᠦᠯᠡ 》ᠭᠡᠷ ᠲᠦ᠍ ᠬᠣᠨᠢᠨ ᠠᠷᠠᠰᠤᠨ ᠳᠡᠭᠡᠷᠡ ᠨᠠᠭᠠᠰᠢ ᠴᠠᠭᠠᠰᠢ ᠪᠠᠨ ᠲᠣᠩᠭᠣᠷᠠᠨ ᠮᠥᠯᠬᠥᠵᠦ᠂ ᠱᠠᠭᠠᠢ ᠶ᠋ᠢᠨ ᠴᠢᠨᠡᠭᠡᠬᠡᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠡᠭᠡᠭᠡᠯᠲᠡᠲᠡᠢ ᠡᠭᠦᠳᠡ ᠪᠡᠷ ᠲᠤᠰᠤᠭᠰᠠᠨ ᠨᠠᠷᠠᠨ ᠭᠡᠷᠡᠯ ᠢ ᠪᠠᠷᠢᠵᠤ ᠨᠠᠭᠠᠳᠤᠨᠠ᠃ ᠰᠠᠷᠵᠢ ᠥᠪᠡᠷ ᠢ᠋ᠶ᠋ᠡᠨ ᠰᠢᠨᠡᠬᠡᠨ ᠬᠢᠭᠰᠡᠨ ᠪᠣᠣᠪᠣ᠂ ᠬᠤᠷᠤᠳ᠂ ᠰᠢᠷᠠ ᠲᠣᠰᠣ ᠪᠠᠨ ᠭᠠᠷᠭᠠᠵᠤ ᠲᠠᠯᠪᠢᠭᠠᠳ ᠪᠢᠳᠡᠨ ᠳ᠋ᠦ᠍ ᠴᠠᠢ ᠠᠶᠠᠭᠠᠯᠠᠯᠠ᠃
— ᠴᠢ ᠴᠦ᠍ ᠰᠠᠢᠬᠠᠨ ᠠᠮᠢᠳᠤᠷᠠᠵᠤ ᠪᠠᠢᠨᠠ ᠳᠠ᠂ ᠷᠠᠰᠢ ᠠ᠋ ! ᠭᠡᠵᠦ ᠪᠢ ᠲᠣᠭᠣᠷᠢᠭᠤᠯᠤᠨ ᠲᠠᠯᠪᠢᠭᠰᠠᠨ ᠠᠪᠳᠠᠷᠠ ᠬᠣᠷᠭᠣ ᠶ᠋ᠢ ᠵᠢᠭᠠᠨ ᠬᠡᠯᠡᠪᠡ᠃
— ᠢᠳᠡᠬᠦ ᠳ᠋ᠡᠭᠡᠨ ᠪᠦᠷ ᠭᠦᠢᠴᠡᠨᠡ᠃ ᠬᠡᠷᠪᠡ ᠲᠡᠢᠨ ᠡᠭᠦᠰᠬᠦ ᠦᠭᠡᠢ ᠶᠦᠮ ᠪᠣᠯ ᠮᠢᠨᠦ ᠮᠠᠯ ᠰᠦᠷᠦᠭ ᠴᠦ᠍ ᠥᠩᠰᠢᠭ ᠥᠰᠦᠨᠡ ᠳᠡ ( ᠵᠢᠷᠤᠭ 77 ) !
— ᠲᠡᠢᠨ ᠡᠭᠦᠰᠦᠨᠡ ᠭᠡᠨᠡ ?
— ᠴᠢ ᠮᠡᠳᠡᠬᠦ ᠦᠭᠡᠢ ᠶᠦᠮ ᠤᠤ ? ᠶᠠᠫᠣᠨᠴᠤᠳ ᠲᠡᠢᠨ ᠬᠢᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ᠃
— ᠵᠥᠪᠬᠡᠨ ᠶᠠᠷᠢᠶᠠ ᠯᠠ ᠲᠡᠳᠦᠢ ᠰᠢᠲᠠ !
— ᠲᠡᠳᠡ ᠶᠠᠭᠤᠨ ᠳ᠋ᠠᠭᠠᠨ ᠲᠡᠭᠡᠭᠡᠳ ᠵᠠᠯᠠᠭᠤᠴᠤᠳ ᠢ ᠮᠢᠨᠢ ᠴᠤᠭᠯᠠᠭᠤᠯᠵᠤ᠂ ᠫᠤᠤ ᠵᠡᠪᠰᠡᠭ ᠠᠳᠬᠤᠭᠤᠯᠳᠠᠭ ᠶᠤᠮ ᠪᠣᠢ ? ᠶᠠᠭᠤᠨ ᠳ᠋ᠤ᠌ ᠪᠢᠳᠡᠨ ᠢ ᠮᠣᠷᠢ ᠪᠠ᠊ᠨ ᠬᠤᠳᠠᠯᠳᠤᠬᠤ ᠶ᠋ᠢ ᠬᠣᠷᠢᠭᠯᠠᠳᠠᠭ ᠪᠣᠢ ? ᠡᠨᠡ ᠨᠢ ᠵᠥᠪᠬᠡᠨ ᠬᠣᠭᠣᠰᠣᠨ ᠶᠠᠷᠢᠶᠠ ᠲᠡᠳᠦᠢ ᠭᠡᠵᠢ ᠤᠤ ? ᠭᠠᠷᠠᠭ ᠤ᠋ᠨ ᠡᠮᠦᠨᠡ ᠬᠣᠶᠠᠷ ᠶᠠᠫᠣᠨ᠂ ᠵᠢᠷᠭᠤᠭᠠᠨ ᠮᠣᠩᠭᠣᠯ ᠴᠡᠷᠢᠭ ᠲᠡ᠊ᠢ ᠢᠷᠡᠭᠡᠳ ᠶᠠᠭᠤᠮᠠ ᠪᠦᠬᠦᠨ ᠢ ᠲᠡᠮᠳᠡᠭᠯᠡᠵᠦ ᠠᠪᠤᠭᠰᠠᠨ᠃ ᠪᠢᠳᠡᠨ ᠦ᠌ ᠮᠣᠷᠢ ᠬᠣᠨᠢ ᠴᠢᠨᠠᠭᠰᠢᠯᠠᠪᠠᠯ ᠨᠣᠬᠠᠢ ᠶ᠋ᠢ ᠴᠦ᠍ ᠲᠡᠮᠳᠡᠭᠯᠡᠵᠦ ᠠᠪᠤᠭᠰᠠᠨ ᠪᠥᠭᠡᠳ ᠪᠢᠳᠡᠨ ᠢ ᠵᠤᠨ ᠲᠤᠷᠰᠢ ᠭᠠᠳᠠᠭᠰᠢ ᠶᠠᠭᠤᠮᠠ ᠪᠠᠨ ᠬᠤᠳᠠᠯᠳᠤᠵᠤ ᠪᠣᠯᠬᠤ ᠥᠬᠡᠢ ᠭᠡᠮᠡᠨ ᠵᠠᠬᠢᠭᠰᠠᠨ᠃ ᠪᠢ ᠨᠢᠭᠡᠨ ᠡᠴᠡ ᠨᠢ ᠲᠡᠭᠡᠭᠡᠳ ᠪᠢᠳᠡ ᠶᠠᠭᠤ ᠪᠠᠷ ᠢ᠋ᠶ᠋ᠠᠨ ᠭᠤᠯᠢᠷ ᠬᠤᠳᠠᠯᠳᠤᠨ ᠠᠪᠬᠤ ᠪᠣᠢ ? ᠭᠡᠬᠦ ᠳ᠋ᠦ᠍ ᠲᠡᠷᠡ ᠲᠠ ᠨᠠᠷ ᠲᠤ᠌ ᠭᠤᠯᠢᠷ ᠬᠡᠷᠡᠭ ᠠᠯᠠᠭᠠ᠂ ᠴᠠᠭᠠᠨ ᠢᠳᠡᠭᠡ ᠪᠡᠷ ᠢ᠋ᠶ᠋ᠡᠨ ᠠᠮᠢᠳᠤᠷᠠᠵᠤ ᠪᠣᠯᠤᠨᠠ ᠰᠢᠲᠠ ᠭᠡᠵᠦ ᠬᠠᠷᠢᠭᠤᠯᠤᠯᠠ ᠰᠢᠦ᠃
ᠨᠣᠬᠠᠢ ᠬᠤᠴᠠᠪᠠ᠃
ᠰᠠᠷᠵᠢ ᠶ᠋ᠢ ᠭᠡᠷ ᠦ᠋ᠨ ᠡᠭᠦᠳᠡ ᠪᠡᠷ ᠭᠠᠳᠠᠭᠰᠢ ᠬᠠᠷᠠᠬᠤ ᠵᠠᠭᠤᠷᠠ ᠷᠠᠰᠢ ᠴᠢᠮᠡᠭᠡ ᠦᠭᠡᠢ ᠴᠢᠩᠨᠠᠨ ᠰᠠᠭᠤᠪᠠ᠃
— ᠲᠡᠷᠭᠡᠯ ᠢᠷᠡᠯᠡ ᠭᠡᠵᠦ ᠰᠠᠷᠵᠢ ᠬᠡᠯᠡᠬᠦ ᠳ᠋ᠦ᠍ ᠷᠠᠰᠢ ᠲᠡᠭᠦᠨ ᠢ ᠤᠭᠲᠤᠬᠤ ᠪᠠᠷ ᠭᠠᠳᠠᠭᠰᠢ ᠪᠠᠨ ᠭᠠᠷᠤᠯᠠ᠃ ᠭᠡᠷ ᠲᠦ᠍ ᠪᠤᠴᠠᠨ ᠣᠷᠣᠵᠤ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠷᠠᠰᠢ ᠪᠠᠰᠠ ᠯᠠ ᠰᠠᠶᠢ ᠶ᠋ᠢᠨ ᠦᠭᠡ ᠶ᠋ᠢᠨ ᠰᠡᠳᠦᠪ ᠢ᠋ᠶ᠋ᠡᠨ ᠡᠯᠭᠦᠨ ᠠᠪᠤᠯᠠ᠃
— ᠲᠡᠷᠭᠡᠯ ᠺᠠᠩᠪᠤᠤ ᠰᠢᠶᠠᠨ ᠳ᠋ᠤ᠌ ᠨᠤᠲᠤᠭ ᠲᠠᠢ᠂ ᠲᠡᠨᠳᠡ ᠡᠴᠡ ᠳᠥᠷᠪᠡᠨ ᠭᠠᠷᠴᠤ ᠢᠷᠡᠭᠡᠳ ᠡᠷᠦᠬᠡ ᠭᠡᠷ ᠨᠢ ᠵᠡᠭᠦᠨ ᠪᠠᠯ ᠳᠡᠭᠡᠷᠡ ᠪᠣᠢ ᠭᠡᠵᠦ ᠢᠷᠡᠭᠰᠡᠨ ᠵᠣᠴᠢᠨ ᠢ᠋ᠶ᠋ᠠ᠊ᠨ ᠨᠠᠳᠠ ᠲᠠᠨᠢᠯᠴᠠᠭᠤᠯᠤᠯᠠ᠃
— ᠶᠠᠷᠢᠭᠠᠴᠢ ᠳᠠ ! ᠥᠪᠡᠷ ᠦ᠋ᠨ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠭᠡᠵᠦ ᠷᠠᠰᠢ ᠶ᠋ᠢ ᠰᠢᠪᠠᠳᠠᠵᠤ ᠭᠠᠷᠬᠤ ᠳ᠋ᠤ᠌ ᠲᠡᠷᠭᠡᠯ᠄
— ᠴᠢ ᠮᠡᠳᠡᠨᠡ ᠰᠢᠦ ᠳᠡ! ᠪᠢ ᠭᠤᠷᠪᠠᠨ ᠮᠣᠷᠢ ᠪᠠᠨ ᠬᠤᠳᠠᠯᠳᠤᠭᠰᠠᠨ ᠠ᠋ᠴᠠ ᠪᠣᠯᠵᠤ ᠶᠠᠫᠣᠨᠴᠤᠳ ᠨᠠᠮᠠᠶ᠋ᠢ ᠵᠠᠪᠰᠠᠷ ᠲᠤ᠌ ᠴᠡᠷᠢᠭ ᠦ᠋ᠨ ᠠᠯᠪᠠ ᠬᠠᠭᠠᠯᠭᠠᠬᠤ ᠭᠡᠯᠡ᠃ ᠡᠨᠡ ᠵᠤᠨ ᠤ᠋ ᠭᠣᠣᠯ ᠳ᠋ᠤ᠌ ᠪᠢ ᠶᠠᠪᠤᠵᠤ ᠳᠡᠢᠯᠬᠦ ᠦᠭᠡᠢ ᠰᠢᠦ ᠳᠡ ! ᠬᠥᠭᠰᠢᠨ ᠠᠪᠤ ᠮᠢᠨᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠲᠡᠷᠡ ᠣᠯᠠᠨ ᠠᠳᠤᠭᠤ ᠮᠠᠯ ᠢ ᠬᠡᠷᠬᠢᠨ ᠳᠣᠳᠣᠮᠳᠠᠵᠤ ᠳᠡᠢᠯᠦᠨᠡ ᠪᠣᠢ? ᠭᠡᠬᠦ ᠳ᠋ᠦ᠍ ᠳᠠᠷᠤᠭᠠ ᠨᠣᠶᠠᠳ ᠨᠠᠮᠠᠶ᠋ᠢ ᠶᠠᠭ ᠵᠦᠭᠡᠷ ᠰᠠᠭᠤᠯᠭᠠᠳᠠᠭ ᠪᠢᠰᠢ᠃ ᠢᠩᠭᠡᠭᠡᠳ ᠪᠢ ᠺᠠᠩᠪᠤᠤ ᠰᠢᠶᠠᠨ ᠳ᠋ᠤ᠌ ᠬᠦᠷᠴᠦ ᠤᠴᠢᠷ ᠪᠠᠢᠳᠠᠯ ᠢ᠋ᠶ᠋ᠠᠨ ᠨᠣᠶᠠᠨ ᠳ᠋ᠠᠭᠠᠨ ᠠᠢᠯᠠᠳᠬᠠᠯᠠ᠃
— ᠲᠡᠭᠡᠭᠡᠳ ? ᠭᠡᠵᠦ ᠷᠠᠰᠢ ᠴᠢᠬᠤᠯᠳᠠᠨ ᠠᠰᠠᠭᠤᠨᠠ᠃
— ᠵᠤᠨ ᠲᠤᠷᠰᠢ ᠪᠢ ᠭᠡᠷ ᠲᠡᠭᠡᠨ ᠴᠢᠯᠥᠭᠡᠲᠡᠢ ᠰᠠᠭᠤᠬᠤ ᠪᠣᠯᠤᠨᠠ᠂ ᠭᠡᠬᠦ ᠳ᠋ᠦ᠍ ᠲᠡᠢᠨ ᠪᠣᠯᠬᠤ ᠳ᠋ᠤ᠌ ᠯᠠ ᠬᠦᠷᠪᠡᠯ ᠨᠠᠮᠤᠷ ᠠ᠋ᠴᠠ ᠪᠢ ᠵᠠᠪᠠᠯ ᠶᠠᠪᠤᠬᠤ ᠬᠡᠷᠡᠭᠲᠡᠢ᠃
— ᠡᠨᠡ ᠠᠶᠤᠯ ᠪᠢᠳᠡᠨ ᠳᠡᠭᠡᠷᠡ ᠬᠦᠷᠴᠦ ᠢᠷᠡᠨᠡ ᠭᠡᠳᠡᠭ ᠲᠦ᠍ ᠴᠢ ᠢᠲᠡᠭᠡᠨᠡ ᠤᠤ ? ᠶᠠᠭᠤᠨ ᠳ᠋ᠤ᠌ ᠴᠡᠷᠢᠭ ᠬᠡᠷᠡᠭ ᠲᠡᠢ ᠪᠣᠢ ? ᠶᠠᠫᠣᠨᠴᠤᠳ ᠪᠢᠳᠡᠨ ᠳ᠋ᠦ᠍ ᠫᠤᠤ ᠵᠡᠪᠰᠡᠭ ᠥᠭᠴᠦ ᠪᠠᠢᠭᠠ ᠨᠢ ᠵᠥᠪᠬᠡᠨ ᠪᠢᠳᠡᠨ ᠢ ᠦᠨᠡᠭᠡ ᠴᠢᠨᠣᠠ ᠠᠩᠨᠠᠬᠤ ᠳ᠋ᠤ᠌ ᠠᠮᠠᠷᠬᠠᠨ ᠪᠣᠯᠭᠠᠵᠤ ᠪᠠᠢᠨᠠ ᠭᠡᠵᠦ ᠴᠢ ᠪᠣᠳᠣᠵᠤ ᠪᠠᠢᠨᠠ ᠤᠤ ? ᠭᠡᠵᠦ ᠷᠠᠰᠢ ᠨᠠᠳᠠ ᠡᠴᠡ ᠠᠰᠠᠭᠤᠯᠠ᠃
— ᠲᠡᠭᠡᠭᠡᠳ ᠲᠡᠳᠡ ᠬᠡᠨ ᠲᠡᠢ ᠳᠠᠢᠳᠤᠨᠠ ᠭᠡᠵᠦ ᠪᠠᠢᠭᠠ ᠶᠤᠮ ᠪᠣᠢ ? ᠭᠡᠵᠦ ᠨᠠᠮᠠᠶ᠋ᠢ ᠪᠤᠴᠠᠭᠤᠯᠤᠨ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ᠄
— ᠡᠭᠦᠨ ᠢ ᠪᠢᠳᠡᠨ ᠦ᠌ ᠡᠪᠦᠭᠡᠴᠦᠦᠯ ᠴᠦ᠍ ᠰᠠᠢᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠪᠠᠷᠤᠭ ᠱᠠᠨ ᠰᠢ ᠪᠣᠯᠤᠨ ᠬᠦᠢᠬᠣᠸᠠ ᠳ᠋ᠤ᠌ ᠪᠠᠢᠭᠠ ᠬᠢᠲᠠᠳ ᠴᠡᠷᠢᠭ ᠠᠩᠭᠢ ᠲᠠᠢ ᠯᠠ ᠪᠠᠢᠬᠠ᠃ ᠲᠡᠳᠡᠨ ᠦ᠌ ᠨᠣᠶᠠᠳ ᠨᠢ ᠣᠳᠣ ᠪᠣᠯᠲᠠᠯᠠ ᠶᠠᠫᠣᠨ ᠳ᠋ᠤ᠌ ᠬᠤᠳᠠᠯᠳᠤᠭᠳᠠᠵᠤ ᠢᠷᠡᠭᠡ ᠦᠭᠡᠢ ᠭᠡᠰᠡᠨ ᠭᠡᠪᠡ᠃ ᠲᠡᠷᠭᠡᠯ ᠪᠠᠷᠠᠭᠤᠨ ᠬᠡᠰᠡᠭ ᠦ᠋ᠨ ᠮᠣᠩᠭᠣᠯᠴᠤᠳ ᠬᠡᠷᠬᠢᠨ ᠶᠠᠫᠣᠨ ᠤ᠋ ᠣᠹᠢᠼᠧᠷ ᠢ ᠡᠰᠡᠷᠭᠦᠴᠡᠳᠡᠭ ᠲᠤᠬᠠᠢ ᠶᠡᠬᠡ ᠤᠳᠠᠭᠠᠨ ᠮᠥᠷᠲᠡᠭᠡᠨ ᠨᠠᠷᠢᠨ ᠶᠠᠷᠢᠵᠤ ᠭᠠᠷᠪᠠ᠃
ᠲᠡᠳᠡ ᠬᠣᠶᠠᠷ ᠡᠨᠡ ᠪᠠᠢᠳᠠᠯ ᠳ᠋ᠠᠭᠠᠨ ᠳᠤᠷᠠ ᠠᠯᠳᠠᠷᠠᠵᠤ᠂ ᠨᠢᠭᠡ ᠨᠢ ᠬᠥᠮᠦᠨ ᠮᠠᠯ ᠲᠠᠢ ᠪᠠᠨ ᠨᠡᠭᠦᠨ ᠣᠳᠬᠤ ᠲᠤᠬᠠᠢ ᠴᠤ᠌ ᠶᠠᠷᠢᠵᠤ ᠭᠠᠷᠤᠯᠠ᠃
— ᠬᠠᠮᠢᠭᠠᠰᠢ ᠨᠡᠭᠦᠬᠦ ᠪᠣᠢ ? ᠣᠷᠣᠢᠲᠠᠭᠰᠠᠨ ᠰᠢᠦ ᠳᠡ ! ᠲᠡᠳᠡᠨ ᠦ᠌ ᠮᠠᠰᠢᠨ ᠪᠢᠳᠡᠨ ᠢ ᠬᠠᠮᠢᠭᠠ ᠣᠴᠢᠭᠰᠠᠨ ᠴᠤ᠌ ᠭᠦᠢᠴᠡᠨᠡ ᠰᠢᠦ ᠳᠡ ᠭᠡᠵᠦ ᠲᠡᠷᠭᠡᠯ ᠶᠠᠷᠢᠯᠠ᠃
ᠲᠡᠷᠭᠡᠯ ᠢ ᠮᠣᠷᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠣᠩᠭᠣᠷ ᠶᠠᠭᠠᠷᠠᠤᠬᠠᠨ ᠬᠦᠷᠴᠦ ᠢᠷᠡᠯᠡ᠃ ᠲᠡᠷᠡ ᠪᠢᠳᠡᠨ ᠦ᠌ ᠮᠣᠷᠢᠳ ᠢ ᠪᠠᠭᠠᠨᠠ ᠳᠡᠭᠡᠷᠡ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠬᠣᠨᠢ ᠪᠠᠨ ᠠᠯᠲᠠᠨᠴᠡᠴᠡᠭ ᠲᠦ᠍ ᠣᠷᠬᠢᠭᠠᠳ ᠢᠷᠡᠭᠰᠡᠨ ᠠᠵᠢ᠃ ᠡᠨᠡ ᠥᠬᠢᠨ ᠴᠦ᠍ ᠲᠠᠨᠢᠭᠳᠠᠮᠠᠷ ᠦᠭᠡᠢ ᠲᠣᠮᠣ ᠪᠣᠯᠵᠤ ᠬᠤᠪᠢᠷᠠᠵᠠᠢ᠃ ᠭᠦᠷᠦᠮᠡᠯ ᠬᠣᠶᠠᠷ ᠭᠡᠵᠢᠭᠡ ᠨᠢ ᠲᠠᠰᠢᠶᠠᠨ ᠳ᠋ᠤᠨᠢ ᠲᠤᠯᠵᠤ᠂ ᠥᠨᠳᠥᠷ ᠨᠠᠷᠢᠬᠠᠨ ᠭᠣᠶᠣ ᠥᠬᠢᠨ ᠪᠣᠯᠤᠭᠰᠠᠨ ᠲᠡᠭᠦᠨ ᠳ᠋ᠦ᠍ ᠭᠠᠭᠴᠠ ᠬᠦ᠌ ᠳᠡᠭᠵᠢᠨ ᠬᠣᠶᠠᠷ ᠨᠢᠳᠦ ᠨᠢ ᠯᠡ ᠤᠭ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠯᠡᠳᠡᠵᠡᠢ᠃ ᠬᠣᠩᠭᠣᠷ ᠨᠠᠳᠠ ᠵᠦᠭ ᠬᠠᠨᠳᠤᠭᠠᠳ ᠶᠠᠭ ᠯᠠ ᠬᠦᠨᠳᠦᠲᠦ ᠵᠣᠴᠢᠨ ᠳ᠋ᠠᠭᠠᠨ ᠬᠠᠨᠳᠤᠵᠤ ᠪᠠᠢᠭᠠ ᠰᠢᠭ᠋ ᠲᠥᠪᠯᠡᠭᠦᠨ ᠢ᠋ᠶ᠋ᠡᠷ ᠮᠡᠬᠦᠢᠨ ᠶᠣᠰᠣᠯᠠᠪᠠ᠃ ᠪᠢ ᠠᠪᠴᠢᠷᠠᠭᠰᠠᠨ ᠬᠠᠢᠷᠴᠠᠭ ᠲᠠᠢ ᠴᠣᠺᠣᠯᠠᠳ᠋ ᠢ᠋ᠶ᠋ᠠᠨ ᠥᠭᠬᠦ ᠳ᠋ᠦ᠍ ᠬᠣᠩᠭᠣᠷ ᠬᠢᠴᠢᠶᠡᠮᠵᠢᠲᠡᠢᠬᠡᠨ ᠨᠡᠭᠡᠭᠡᠵᠦ᠂ ᠭᠣᠶᠣ ᠬᠠᠢᠷᠴᠠᠭ ᠢ ᠨᠢ ᠦᠵᠡᠭᠡᠳ ᠬᠠᠵᠠᠭᠤ ᠲᠠᠢᠰᠢ ᠪᠠᠨ ᠲᠠᠯᠪᠢᠯᠠ᠃
— ᠵᠠ ᠶᠠᠪᠤ ! ᠬᠠᠮᠵᠢᠵᠤ ᠬᠣᠨᠢ ᠰᠠᠭᠠᠭᠠᠴᠢ ᠭᠡᠵᠦ ᠷᠠᠰᠢ ᠵᠠᠷᠯᠢᠭᠳᠠᠪᠠ᠃ ᠨᠡᠯᠢᠶᠡᠳ ᠤᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠪᠢ᠄
— ᠬᠣᠩᠭᠣᠷ ᠲᠤ᠌ ᠣᠨᠳᠣᠣ ᠶᠠᠭᠤᠮᠠ ᠠᠪᠴᠢᠷᠠᠭᠰᠠᠨ ᠪᠣᠯ ᠲᠠᠭᠠᠷᠠᠬᠤ ᠪᠠᠢᠵᠢ ᠳᠠ ! ᠭᠡᠯᠡ᠃
— ᠣᠨᠳᠣᠣ ᠶᠠᠭᠤᠮᠠ ? ᠶᠠᠭᠠᠬᠢᠭᠠᠳ ᠣᠨᠳᠣᠣ ᠶᠠᠭᠤᠮᠠ ᠭᠡᠵᠦ ? ᠭᠡᠮᠡᠨ ᠷᠠᠰᠢ ᠭᠠᠢᠬᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠪᠢ᠄
— ᠴᠣᠺᠣᠯᠠᠳ᠋ ᠢ ᠲᠡᠷᠡ ᠮᠡᠳᠡᠬᠦ ᠪᠢᠰᠢ᠃ ᠬᠠᠷᠠᠭᠠᠴᠢ ᠳᠠ ! ᠬᠠᠢᠷᠴᠠᠭ ᠲᠠᠢ ᠨᠢ ᠠᠪᠤᠭᠠᠳ ᠬᠠᠮᠢᠶᠠ ᠦᠭᠡᠢ ᠬᠠᠵᠠᠭᠤ ᠳ᠋ᠠᠭᠠᠨ ᠲᠠᠯᠪᠢᠴᠢᠬᠠᠯᠠ ᠪᠢᠰᠢ ᠤᠤ ! ᠭᠡᠪᠡᠯ ᠷᠠᠰᠢ ᠬᠠᠳᠠᠭᠠᠨᠠᠲᠠᠯᠠ ᠪᠠᠨ ᠢᠨᠢᠶᠡᠵᠦ᠂ ᠬᠣᠩᠭᠣᠷ ᠢ ᠳᠠᠭᠤᠳᠠᠨ ᠠᠪᠴᠢᠷᠠᠭᠠᠳ᠄
— ᠢᠷᠡᠭᠰᠡᠨ ᠵᠣᠴᠢᠨ ᠳ᠋ᠠᠭᠠᠨ ᠬᠢᠲᠠᠳ ᠰᠢᠭ᠋ ᠲᠠᠯᠠᠷᠬᠠᠭᠠᠴᠢ ! ᠡᠨᠡ ᠬᠥᠮᠦᠨ ᠴᠢᠨᠢ ᠮᠣᠩᠭᠣᠯ ᠤ᠋ᠨ ᠶᠣᠰᠣ ᠶ᠋ᠢ ᠮᠡᠳᠡᠬᠦ ᠪᠢᠰᠢ ᠭᠡᠪᠡ᠃
ᠬᠣᠩᠭᠣᠷ ᠮᠢᠨᠦ ᠡᠮᠦᠨᠡ ᠪᠥᠬᠥᠢᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠨᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠡᠮᠦᠨᠡ ᠪᠠᠷᠢᠵᠤ᠂ ᠶᠡᠬᠡ ᠯᠡ ᠬᠥᠰᠢᠭᠦᠨ ᠢ᠋ᠶ᠋ᠡᠷ ᠶᠣᠰᠣ ᠭᠦᠢᠴᠡᠳᠬᠡᠯᠡ᠃
— ᠮᠢᠨᠦ ᠰᠠᠨᠠᠭᠠ ᠡᠢᠮᠦ ᠪᠢᠰᠢ ᠭᠡᠵᠦ ᠨᠠᠮᠠᠶ᠋ᠢ ᠳᠥᠩᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠬᠣᠩᠭᠣᠷ ᠳᠠᠬᠢᠨ ᠢᠨᠢᠶᠡᠮᠰᠦᠭᠯᠡᠵᠦ᠂ ᠨᠢᠭᠡ ᠬᠡᠰᠡᠭ ᠴᠣᠺᠣᠯᠠᠳ᠋ ᠬᠡᠯᠲᠡᠯᠦᠨ ᠠᠮᠠᠨ ᠳ᠋ᠠᠭᠠᠨ ᠬᠢᠭᠡᠳ ᠠᠷᠢᠯᠪᠠ᠃
— ᠮᠣᠩᠭᠣᠯᠴᠤᠳ ᠬᠥᠮᠦᠨ ᠡᠴᠡ ᠪᠡᠯᠡᠭ ᠲᠤᠰᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠠᠶᠠᠷᠯᠠᠭᠰᠠᠨ ᠢ᠋ᠶ᠋ᠠᠨ ᠶᠡᠷᠦ ᠡᠴᠡ ᠢᠯᠡᠳᠬᠡᠳᠡᠭ ᠦᠭᠡᠢ᠃ ᠢᠩᠭᠢᠬᠦ ᠳ᠋ᠦ᠍ ᠬᠦᠷᠪᠡᠯ ᠶᠣᠰᠣᠷᠬᠠᠭ ᠪᠤᠰᠤ ᠪᠥᠭᠡᠳ ᠨᠡᠩ ᠠᠷᠪᠢᠨ ᠪᠡᠯᠡᠭ ᠠᠪᠬᠤ ᠭᠡᠰᠡᠨ ᠤᠳᠬᠠ ᠲᠠᠢ ᠪᠣᠯᠳᠠᠭ᠃ ᠴᠢ ᠪᠣᠯᠬᠤ ᠶ᠋ᠢᠨ ᠳᠣᠲᠣᠷᠠ ᠮᠣᠩᠭᠣᠯ ᠵᠠᠩ ᠠᠭᠠᠯᠢ ᠳ᠋ᠤ᠌ ᠬᠤᠷᠳᠤᠨ ᠳᠠᠰᠤᠭᠠᠷᠠᠢ ᠭᠡᠵᠦ ᠷᠠᠰᠢ ᠲᠠᠢᠯᠪᠤᠷᠢᠯᠠᠨ ᠬᠡᠯᠡᠯᠡ᠃
ᠭᠠᠳᠠᠨᠠ ᠬᠣᠨᠢᠳ ᠮᠠᠢᠯᠠᠯᠳᠤᠬᠤ ᠳ᠋ᠤ᠌ ᠪᠢ ᠭᠠᠷᠴᠤ ᠦᠵᠡᠶᠡ ᠭᠡᠵᠦ ᠷᠠᠰᠢ ᠳ᠋ᠤ᠌ ᠬᠡᠯᠡᠪᠡ᠃ ᠷᠠᠰᠢ ᠨᠠᠮᠠᠶ᠋ᠢ ᠳᠠᠭᠠᠭᠤᠯᠵᠤ ᠬᠠᠵᠠᠭᠤ ᠳ᠋ᠠᠬᠢ ᠬᠥᠮᠦᠨ ᠰᠠᠭᠤᠭᠠ ᠦᠭᠡᠢ ᠭᠡᠷ ᠲᠦ᠍ ᠬᠦᠷᠦᠭᠡᠳ᠄
— ᠠᠳᠠ ᠴᠢ ᠤᠨᠲᠠᠨᠠ᠃ ᠡᠨᠡ ᠭᠡᠷ ᠲᠦ᠍ ᠴᠢ ᠠᠳᠠ ᠠ᠋ᠴᠠ ᠶᠠᠪᠤᠨ ᠶᠠᠪᠤᠲᠠᠯᠠ ᠭᠠᠭᠴᠠᠭᠠᠷ ᠰᠠᠭᠤᠬᠤ ᠪᠣᠯᠤᠨᠠ ᠭᠡᠯᠡ᠃ ᠡᠨᠡ ᠭᠡᠷ ᠢ ᠲᠡᠳᠡ ᠰᠠᠢᠬᠠᠨ ᠵᠠᠰᠠᠨ ᠲᠣᠬᠢᠷᠠᠭᠤᠯᠵᠠᠢ᠃ ᠬᠠᠮᠤᠭ ᠤ᠋ᠨ ᠰᠠᠢᠨ ᠬᠡᠪᠢᠰ ᠢ᠋ᠶ᠋ᠡᠨ ᠳᠡᠪᠢᠰᠴᠦ᠂ ᠴᠢᠨᠠᠭᠰᠢᠯᠠᠪᠠᠯ ᠨᠠᠳᠠ ᠳ᠋ᠤ᠌ ᠤᠬᠢᠶᠠᠯᠭᠠ ᠶ᠋ᠢᠨ ᠭᠠᠳᠤᠷᠠ ᠪᠡᠯᠡᠳᠦᠭᠰᠡᠨ ᠪᠠᠢᠵᠠᠢ᠃
— ᠲᠠᠨᠤᠰ ᠡᠳᠡᠭᠡᠷ ᠶᠠᠭᠤᠮᠠ ᠶ᠋ᠢ ᠬᠡᠷᠡᠭᠯᠡᠬᠦ ᠲᠠᠯᠠ ᠪᠠᠷ ᠮᠠᠨ ᠠ᠋ᠴᠠ ᠢᠯᠡᠭᠦᠦ᠂ ᠲᠠᠨᠤᠰ ᠤ᠋ᠨ ᠬᠡᠵᠢᠶᠡᠳᠡ ᠴᠡᠪᠡᠷᠬᠡᠨ ᠪᠠᠢᠬᠤ ᠶ᠋ᠢ ᠬᠦᠰᠡᠳᠡᠭ ᠢ ᠪᠢ ᠮᠡᠳᠡᠨᠡ ᠰᠢᠦ ᠭᠡᠵᠦ ᠷᠠᠰᠢ ᠬᠡᠯᠡᠪᠡ᠃
— ᠴᠢ ᠴᠦ᠍ ᠪᠢᠳᠡᠨ ᠦ᠌ ᠵᠠᠩ ᠵᠠᠩᠰᠢᠯ ᠢ᠋ ᠶᠡᠬᠡ ᠲᠦᠷᠭᠡᠨ ᠰᠤᠷᠤᠭᠰᠠᠨ ᠪᠠᠢᠨᠠ ᠳᠠ ᠭᠡᠵᠦ ᠨᠠᠮᠠᠶ᠋ᠢ ᠲᠣᠭᠯᠠᠨ ᠬᠡᠯᠡᠬᠦ ᠳ᠋ᠦ᠍:
— ᠬᠡᠷᠪᠡ ᠪᠢ ᠰᠢᠭ ᠢᠩᠭᠢᠵᠦ ᠣᠯᠠᠨ ᠭᠠᠳᠠᠭᠠᠳᠤ ᠶ᠋ᠢᠨ ᠬᠥᠮᠦᠨ ᠲᠡᠢ ᠬᠠᠷᠢᠯᠴᠠᠳᠠᠭ ᠪᠣᠯ ᠬᠡᠨ ᠴᠦ᠍ ᠲᠡᠳᠡᠨ ᠦ᠌ ᠵᠠᠩ ᠳᠠᠳᠬᠠᠯ ᠢ᠋ ᠠᠩᠬᠠᠷᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ! ᠭᠡᠪᠡ᠃
ᠭᠤᠷᠪᠠᠨ ᠡᠮᠡᠭᠲᠡᠢ - ᠰᠠᠷᠵᠢ᠂ ᠠᠯᠲᠠᠨᠴᠡᠴᠡᠭ ᠪᠠ ᠬᠣᠩᠭᠣᠷ ᠣᠴᠣᠢᠨ ᠰᠠᠭᠤᠭᠠᠳ ᠬᠣᠨᠢ ᠰᠠᠭᠠᠵᠤ ᠪᠠᠢᠨᠠ᠃ ᠠᠯᠲᠠᠨᠴᠡᠴᠡᠭ ᠪᠣᠯ ᠵᠢᠰᠦᠷᠬᠡᠭ ᠬᠡᠦᠬᠡᠨ ᠪᠢᠯᠡ᠃ ᠲᠡᠷᠡ ᠬᠣᠨᠢᠨ ᠤ᠋ ᠴᠠᠭᠠᠭᠤᠷ ᠨᠢᠭᠤᠷ ᠢ᠋ᠶ᠋ᠠᠨ ᠪᠤᠷᠤᠭᠤᠯᠠᠵᠤ᠂ ᠬᠠᠶᠠ ᠨᠠᠳᠠ ᠤᠷᠤᠭᠤ ᠢᠴᠢᠭᠰᠡᠨ ᠮᠠᠶᠢᠭᠲᠠᠢ ᠬᠠᠷᠠᠵᠤ ᠠᠪᠤᠨᠠ᠃ ᠬᠣᠩᠭᠣᠷ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠬᠣᠨᠢ ᠰᠠᠭᠠᠬᠤ ᠪᠥᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ ᠶᠠᠭᠤ ᠨᠢᠭᠡ ᠶ᠋ᠢ ᠶᠠᠷᠢᠯᠴᠠᠨ᠂ ᠰᠡᠮᠬᠡᠨ ᠢᠨᠢᠶᠡᠯᠳᠦᠨᠡ᠃
— ᠪᠢ ᠨᠢᠭᠡ ᠴᠦ᠍ ᠤᠳᠠᠭᠠ ᠬᠣᠨᠢᠨ ᠤ᠋ ᠰᠦ ᠤᠤᠭᠤᠵᠤ ᠥᠩᠭᠡᠷᠡᠭᠡ ᠦᠭᠡᠢ ᠰᠢᠦ᠂ ᠴᠢ ᠨᠠᠳᠠ ᠳ᠋ᠤ᠌ ᠪᠠᠬᠠᠨ ᠤᠤᠭᠤᠯᠭᠠᠵᠤ ᠪᠣᠯᠬᠤ ᠤᠤ? ᠭᠡᠵᠦ ᠨᠠᠮᠠᠶ᠋ᠢ ᠠᠯᠲᠠᠨᠴᠡᠴᠡᠭ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠪᠣᠰᠴᠤ ᠮᠣᠳᠣᠨ ᠰᠠᠭᠤᠯᠠᠭᠠ ᠪᠠᠨ ᠨᠠᠳᠠ ᠤᠷᠤᠭᠤ ᠣᠢᠷᠠᠲᠤᠭᠤᠯᠪᠠ᠃ ᠨᠠᠮᠠᠶ᠋ᠢ ᠰᠠᠭᠤᠯᠠᠭᠠᠨ ᠠ᠋ᠴᠠ ᠰᠢᠭᠤᠳ ᠠᠮᠠᠨ ᠳ᠋ᠠᠭᠠᠨ ᠣᠢᠷᠠᠲᠤᠭᠤᠯᠬᠤ ᠭᠡᠬᠦ ᠳ᠋ᠦ᠍ ᠬᠣᠩᠭᠣᠷ ᠡᠯᠡᠭᠯᠡᠨ ᠢᠨᠢᠶᠡᠵᠦ :
— ᠴᠢ ᠵᠠᠪᠠᠯ ᠬᠣᠶᠠᠷ ᠠᠯᠠᠭᠠ ᠪᠠᠨ ᠪᠢᠲᠡᠭᠦᠯᠡᠵᠦ᠂ ᠠᠶᠠᠭᠠ ᠰᠢᠭ᠋ ᠪᠣᠯᠭᠠᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠵᠢᠭᠠᠪᠠ᠃
ᠠᠯᠲᠠᠨᠴᠡᠴᠡᠭ ᠬᠠᠵᠠᠭᠤ ᠳ᠋ᠤ᠌ ᠮᠢᠨᠢ ᠵᠣᠭᠰᠣᠵᠤ᠂ ᠠᠯᠠᠭᠠᠨ ᠳ᠋ᠤ᠌ ᠬᠠᠯᠠᠭᠤᠨ ᠰᠦ ᠶ᠋ᠢ ᠠᠯᠭᠤᠷᠬᠠᠨ ᠬᠢᠪᠡ᠃ ᠡᠨᠡ ᠬᠡᠦᠬᠡᠨ ᠬᠦᠳᠡᠷᠯᠢᠭ ᠪᠡᠶᠡ ᠲᠡᠢ᠂ ᠬᠡᠦᠬᠡᠨ ᠴᠠᠭ ᠲᠠᠭᠠᠨ ᠪᠦᠰᠡᠯᠡᠳᠡᠭ ᠪᠦᠰᠡ ᠪᠡᠨ ᠴᠢᠪᠬᠢᠲᠡᠯᠡ ᠪᠦᠰᠡᠯᠡᠭᠰᠡᠨ ᠢ᠋ᠶ᠋ᠡᠷ ᠬᠣᠶᠠᠷ ᠬᠥᠬᠥ ᠨᠢ ᠬᠤᠪᠴᠠᠰᠤᠨ ᠤ᠋ ᠴᠠᠭᠠᠨᠠ ᠠ᠋ᠴᠠ ᠲᠦᠩᠬᠦᠢᠵᠦ ᠬᠠᠷᠠᠭᠳᠠᠨᠠ᠃
— ᠴᠢ ᠤᠳᠠᠯ ᠦᠭᠡᠢ ᠬᠤᠷᠢᠮᠯᠠᠨᠠ ᠭᠡᠵᠦ ᠪᠠᠢᠭᠰᠠᠨ᠃ ᠪᠢ ᠣᠳᠣ ᠴᠢᠨᠦ ᠭᠡᠷ ᠲᠦ᠍ ᠰᠠᠭᠤᠬᠤ ᠪᠣᠯᠤᠭᠰᠠᠨ ᠲᠤᠯᠠ ᠴᠢ ᠬᠦᠯᠢᠶᠡᠬᠦ ᠬᠡᠷᠡᠭᠲᠡᠢ ᠪᠣᠯᠵᠠᠢ᠂ ᠴᠢᠮᠠ ᠳ᠋ᠤ᠌ ᠶᠡᠬᠡ ᠬᠡᠴᠡᠭᠦᠦ ᠰᠠᠨᠠᠭᠳᠠᠵᠤ ᠪᠠᠢᠨᠠ ᠤᠤ ? ᠭᠡᠬᠦ ᠪᠡᠷ ᠲᠡᠷᠡ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠵᠥᠪᠬᠡᠨ ᠢᠴᠢᠭᠰᠡᠨ ᠮᠠᠶᠢᠭᠲᠠᠢ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠪᠠ᠃
— ᠬᠡᠨ ᠮᠡᠳᠡᠬᠦ ᠪᠣᠢ ! ᠪᠠᠨᠳᠢᠩ ᠢ᠋ ᠪᠠᠰᠠ ᠴᠡᠷᠢᠭ ᠲᠦ᠍ ᠶᠠᠪᠤᠭᠤᠯᠬᠤ ᠮᠠᠭᠠᠳ ᠦᠭᠡᠢ᠂ ᠴᠢ ᠡᠨᠡ ᠲᠤᠬᠠᠢ ᠰᠣᠨᠣᠰᠤᠭᠠ ᠦᠭᠡᠢ ᠤᠤ? ᠭᠡᠵᠦ ᠷᠠᠰᠢ ᠶᠠᠷᠢᠬᠤ ᠳ᠋ᠤ᠌ ᠬᠣᠩᠭᠣᠷ ᠢᠴᠢᠭᠰᠡᠨ ᠠᠯᠲᠠᠨᠴᠡᠴᠡᠭ ᠢ᠋ ᠣᠷᠣᠯᠠᠨ᠄
— ᠭᠡᠪᠡᠴᠦ ᠲᠡᠷᠡ ᠶᠠᠪᠤᠬᠤ ᠰᠠᠨᠠᠭᠠ ᠦᠭᠡᠢ᠃ ᠶᠠᠫᠣᠨᠴᠤᠳ ᠤ᠋ᠨ ᠲᠥᠯᠥᠭᠡ ᠲᠡᠢᠨ ᠬᠢᠬᠦ ᠪᠡᠷ ᠢ᠋ᠶ᠋ᠡᠨ ᠡᠯᠡᠰᠦᠨ ᠳ᠋ᠦ᠍ ᠣᠷᠣᠭᠰᠠᠨ ᠨᠢ ᠳᠡᠭᠡᠷᠡ ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠭᠡᠯᠡ᠃
— ᠲᠡᠭᠡᠪᠡᠯ ᠴᠢ ᠶᠠᠭᠠᠬᠢᠬᠤ ᠪᠣᠢ ? ᠭᠡᠵᠦ ᠨᠠᠮᠠᠶ᠋ᠢ ᠠᠯᠲᠠᠨᠴᠡᠴᠡᠭ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠳᠣᠣᠷᠠ ᠳᠠᠭᠤᠨ ᠢ᠋ᠶ᠋ᠠᠷ᠄
— ᠪᠢ ᠴᠣᠭ ᠶᠠᠪᠤᠬᠤ ᠯᠠ ᠪᠣᠯᠤᠨᠠ ᠭᠡᠨᠡ᠃
— ᠲᠡᠢᠮᠦ ᠳᠡ ! ᠶᠡᠬᠡ ᠠᠮᠠᠷᠬᠠᠨ ᠯᠠ ᠪᠣᠳᠣᠬᠤ ᠶᠤᠮ᠃ ᠡᠯᠡᠰᠦᠨ ᠳ᠋ᠦ᠍ ᠣᠷᠣᠭᠰᠠᠨ ᠤ᠋ ᠳᠠᠷᠠᠭᠠ ᠲᠠ ᠨᠠᠷ ᠶᠠᠭᠠᠬᠢᠬᠤ ᠪᠣᠢ ? ᠭᠡᠵᠦ ᠷᠠᠰᠢ ᠳᠤᠮᠳᠠ ᠠ᠋ᠴᠠ ᠨᠢ ᠲᠠᠰᠤᠯᠪᠠ᠃
— ᠶᠠᠭᠠᠬᠢᠬᠤ ᠪᠠᠨ ᠪᠠᠨᠳᠢᠩ ᠨᠢᠭᠡᠨᠲᠡ ᠪᠦᠷ ᠮᠡᠳᠡᠭᠰᠡᠨ ᠭᠡᠵᠦ ᠠᠯᠲᠠᠨᠴᠡᠴᠡᠭ ᠢᠲᠡᠭᠡᠯᠲᠡᠢ ᠶᠠᠷᠢᠭᠠᠳ ᠬᠣᠨᠢᠨ ᠤ᠋ ᠠᠷᠤ ᠳ᠋ᠤ᠌ ᠰᠠᠭᠤᠵᠤ ᠦᠷᠭᠦᠯᠵᠢᠯᠡᠨ ᠰᠠᠭᠠᠯᠠ᠃
— ᠴᠢ ᠨᠢᠭᠡ ᠬᠣᠨᠢ ᠭᠠᠷᠭᠠᠭᠠᠳ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠪᠠᠨ ᠪᠡᠯᠡᠳᠬᠡᠭᠡᠷᠡᠢ ᠭᠡᠵᠦ ᠭᠡᠷ ᠦ᠋ᠨ ᠡᠵᠡᠨ ᠵᠠᠷᠯᠢᠭ ᠪᠣᠯᠪᠠ᠃
— ᠨᠠᠳᠠ ᠠ᠋ᠴᠠ ᠪᠣᠯᠵᠤ ᠪᠦᠦ ᠯᠡ ᠢᠩᠭᠢᠭᠡᠷᠡᠢ ! ᠰᠠᠢᠨ ᠮᠣᠩᠭᠣᠯ ᠵᠤᠨ ᠳ᠋ᠠᠭᠠᠨ ᠮᠠᠯ ᠭᠠᠷᠭᠠᠳᠠᠭ ᠦᠭᠡᠢ ᠰᠢᠦ ᠭᠡᠵᠦ ᠪᠢ ᠬᠡᠯᠡᠬᠦ ᠳ᠋ᠦ᠍ ᠷᠠᠰᠢ ᠡᠯᠭᠦᠨ ᠠᠪᠴᠤ᠄
— ᠴᠢᠨᠦ ᠪᠤᠴᠠᠵᠤ ᠢᠷᠡᠭᠰᠡᠨ ᠳ᠋ᠦ᠍ ᠨᠠᠢᠷᠯᠠᠨᠠ᠂ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠴᠦ᠍ ᠪᠦᠷ ᠢᠷᠡᠨᠡ᠃ ᠢᠩᠭᠢᠪᠡᠯ ᠮᠢᠬᠠ ᠦᠯᠡᠳᠡᠵᠦ ᠮᠠᠭᠤᠳᠠᠬᠤ ᠤᠴᠢᠷ ᠴᠤ᠌ ᠦᠭᠡᠢ ᠪᠣᠯᠤᠨᠠ ᠭᠡᠪᠡ᠃
ᠷᠠᠰᠢ ᠶᠡᠬᠡᠮᠰᠦᠭ ᠮᠥᠷᠲᠡᠭᠡᠨ ᠠᠯᠭᠤᠷᠬᠠᠨ ᠠᠯᠬᠤᠭᠰᠠᠭᠠᠷ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠦᠭᠡᠳ ᠲᠠᠯᠠ ᠳ᠋ᠤ᠌ ᠪᠡᠯᠴᠢᠭᠰᠡᠨ ᠠᠳᠤᠭᠤᠨ ᠰᠦᠷᠦᠭ ᠢ᠋ ᠬᠠᠷᠠᠰᠬᠢᠵᠦ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠡᠷ ᠲᠡᠭᠡᠨ ᠣᠷᠣᠵᠤ᠂ ᠲᠡᠭᠦᠨ ᠦ᠌ ᠢᠷᠡᠭᠡᠳᠦᠢ ᠪᠣᠯᠤᠨ ᠲᠡᠢᠨ ᠦ᠌ ᠲᠤᠬᠠᠢ ᠪᠣᠳᠣᠯᠭᠠᠰᠢᠷᠠᠯ ᠳ᠋ᠠᠭᠠᠨ ᠣᠷᠣᠪᠠ᠃
ᠲᠠᠯᠠ ᠨᠤᠲᠤᠭ ᠤ᠋ᠨ ᠴᠡᠪᠡᠷᠬᠡᠨ ᠪᠥᠭᠡᠳ ᠬᠠᠯᠠᠭᠤᠨ ᠰᠠᠯᠬᠢ᠂ ᠰᠢᠷᠭᠠᠯ ᠨᠠᠷᠠᠨ ᠨᠢ ᠤᠳᠠᠭᠠᠨ ᠠᠶᠠᠯᠠᠭᠰᠠᠨ ᠨᠠᠮᠠᠶ᠋ᠢ ᠶᠠᠳᠠᠷᠠᠭᠤᠯᠵᠤ᠂ ᠮᠣᠩᠭᠣᠯ ᠭᠡᠷ ᠦ᠋ᠨ ᠰᠡᠷᠢᠭᠦᠬᠡᠨ ᠱᠠᠯᠠ᠊ᠨ ᠳᠡᠭᠡᠷᠡ ᠤᠳᠠᠭᠠᠨ ᠭᠡᠭᠴᠢ ᠤᠨᠲᠠᠭᠤᠯᠪᠠ᠃ ᠬᠣᠩᠭᠣᠷ ᠨᠠᠮᠠᠶ᠋ᠢ ᠰᠡᠷᠡᠭᠡᠬᠦ ᠳ᠋ᠦ᠍ ᠨᠠᠷᠠ ᠨᠢᠭᠡᠨᠲᠡ ᠶᠡᠬᠡ ᠳᠣᠣᠷᠠ ᠬᠡᠯᠪᠡᠢᠭᠰᠡᠨ ᠪᠥᠭᠡᠳ ᠭᠠᠳᠠᠨᠠ ᠮᠣᠷᠢᠳ ᠤ᠋ᠨ ᠲᠤᠷᠭᠢᠬᠤ᠂ ᠨᠣᠬᠠᠳ ᠬᠤᠴᠠᠬᠤ ᠵᠢᠴᠢ ᠡᠷᠡᠴᠦᠦᠯ ᠦ᠋ᠨ ᠶᠠᠷᠢᠯᠴᠠᠬᠤ ᠳᠠᠭᠤᠨ ᠰᠣᠨᠣᠰᠳᠠᠨᠠ᠃ ᠭᠠᠷᠪᠠᠯ ᠷᠠᠰᠢ ᠶᠠᠭ ᠰᠠᠢᠬᠠᠨ ᠪᠢᠳᠡᠨ ᠦ᠌ ᠬᠠᠮᠲᠤ ᠶ᠋ᠢᠨ ᠠᠶᠠᠯᠠᠯ ᠤ᠋ᠨ ᠲᠤᠬᠠᠢ ᠨᠠᠷᠢᠯᠢᠭ ᠰᠠᠢᠬᠠᠨ ᠲᠠᠢᠯᠪᠤᠷᠢᠯᠠᠵᠤ᠂ ᠢᠯᠠᠩᠭᠤᠶᠠ ᠲᠤᠯᠤᠨ ᠨᠠᠭᠤᠷ ᠲᠤ᠌ ᠠᠶᠠᠯᠠᠭᠰᠠᠨ ᠢ᠋ᠶ᠋ᠠᠨ ᠪᠠᠷᠳᠠᠮᠨᠠᠨ ᠶᠠᠷᠢᠵᠤ ᠰᠠᠭᠤᠨᠠ᠃ ᠲᠣᠮᠣ ᠲᠣᠭᠣᠭᠠᠨ ᠳ᠋ᠤ᠌ ᠳᠦᠭᠦᠷᠡᠩ ᠮᠢᠬᠠ ᠪᠤᠴᠠᠯᠤᠨᠠ᠃ ᠰᠠᠷᠵᠢ ᠶᠠᠭᠠᠷᠠᠯᠲᠠᠢ ᠪᠠᠷ ᠭᠡᠷ ᠲᠦ᠍ ᠣᠷᠣᠨ ᠭᠠᠷᠤᠨ ᠠᠬᠤᠢᠯᠠᠵᠤ ᠶᠠᠩᠵᠤᠯᠠᠨᠠ᠃ ᠤᠯᠠᠢᠢᠭᠰᠠᠨ ᠠᠷᠭᠠᠯ ᠠ᠋ᠴᠠ ᠬᠠᠯᠠᠭᠤᠨ ᠢᠯᠴᠢ ᠪᠠᠳᠠᠷᠠᠵᠤ᠂ ᠰᠠᠷᠵᠢ ᠪᠠᠢᠨ ᠪᠠᠢᠨ ᠡᠭᠦᠳᠡᠨ ᠦ᠌ ᠲᠣᠰᠢᠢᠡ ᠬᠦᠷᠴᠦ ᠮᠠᠩᠨᠠᠢ ᠶ᠋ᠢᠨ ᠬᠥᠯᠥᠰᠥ ᠪᠡᠨ ᠠᠷᠴᠢᠨᠠ᠃
ᠷᠠᠰᠢ ᠨᠠᠮᠠᠶ᠋ᠢ ᠡᠭᠦᠳᠡᠨ ᠦ᠌ ᠡᠰᠡᠷᠭᠦ ᠳ᠋ᠡᠬᠢ ᠣᠯᠪᠣᠭ ᠳᠡᠪᠢᠰᠦᠭᠰᠡᠨ ᠬᠦᠨᠳᠦᠲᠦ ᠭᠡᠢᠴᠢᠨ ᠦ᠌ ᠣᠷᠣᠨ ᠳ᠋ᠠᠭᠠᠨ ᠵᠠᠯᠠᠨ ᠰᠠᠭᠤᠯᠭᠠᠵᠤ᠂ ᠵᠡᠰ ᠴᠠᠷᠠ ᠲᠠᠢ ᠰᠢᠭᠦᠰᠦ ᠶ᠋ᠢ ᠮᠢᠨᠦ ᠡᠮᠦᠨᠡ ᠲᠠᠯᠪᠢᠪᠠ᠃ ᠢᠩᠭᠢᠬᠦ ᠨᠢ ᠪᠢ ᠵᠠᠪᠠᠯ ᠮᠠᠩᠨᠠᠢ ᠠ᠋ᠴᠠ ᠨᠢ ᠵᠢᠵᠢᠭ ᠬᠡᠰᠡᠭ ᠣᠭᠲᠣᠯᠵᠤ᠂ ᠣᠳᠣ ᠪᠣᠯᠲᠠᠯᠠ ᠣᠯᠠᠨ ᠳ᠋ᠤ᠌ ᠡᠷᠡᠭᠦᠯ ᠮᠡᠨᠳᠦ ᠶ᠋ᠢ ᠰᠣᠶᠣᠷᠬᠠᠭᠰᠠᠨ ᠪᠤᠷᠬᠠᠨ ᠳ᠋ᠤ᠌ ᠳᠡᠭᠡᠵᠢ ᠡᠷᠭᠦᠬᠦ ᠶᠣᠰᠣᠲᠠᠢ ᠶᠤᠮ᠃ ᠲᠡᠭᠡᠭᠡᠳ ᠷᠠᠰᠢ ᠵᠡᠰ ᠴᠠᠷᠠ ᠶ᠋ᠢ ᠡᠭᠡᠭᠦᠯᠦᠨ ᠠᠪᠠᠴᠢᠵᠤ᠂ ᠮᠢᠬᠠ ᠪᠠᠨ ᠦᠶᠡᠯᠡᠨ ᠬᠡᠰᠡᠭᠯᠡᠭᠡᠳ᠂ ᠳᠠᠬᠢᠨ ᠠᠪᠴᠢᠷᠠᠵᠤ ᠲᠠᠯᠪᠢᠪᠠ᠃ ᠨᠠᠳᠠᠳᠤ ᠬᠣᠨᠢᠨ ᠤ᠋ ᠲᠠᠷᠭᠤᠨ ᠰᠡᠭᠦᠯ ᠥᠭᠬᠦ ᠳ᠋ᠦ᠍ ᠪᠢ ᠨᠢᠭᠡ ᠲᠠᠯᠠ ᠪᠠᠷ ᠠᠮᠠᠨ ᠳ᠋ᠠᠭᠠᠨ ᠬᠢᠵᠦ ᠵᠠᠵᠢᠯᠤᠨ᠂ ᠨᠥᠭᠦᠭᠡ ᠲᠠᠯᠠ ᠪᠠᠷ ᠮᠥᠩᠭᠥᠨ ᠠᠶᠠᠭᠠ ᠲᠠᠢ ᠪᠠᠷᠢᠭᠰᠠᠨ ᠬᠢᠲᠠᠳ ᠠᠷᠢᠬᠢ ᠶ᠋ᠢ ᠬᠥᠨᠲᠥᠷᠪᠡ᠃
ᠢᠷᠡᠭᠰᠡᠨ ᠵᠣᠴᠢᠳ ᠪᠥᠰᠡᠨ ᠳ᠋ᠡᠬᠢ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠵᠤ᠂ ᠬᠣᠨᠢᠨ ᠮᠢᠬᠠ ᠶ᠋ᠢ ᠬᠥᠮᠦᠨ ᠠᠶᠤᠯᠭᠠᠮᠠᠷ ᠠᠶᠤᠮᠰᠢᠭᠲᠠᠢ ᠣᠭᠲᠣᠯᠤᠨ ᠢᠳᠡᠵᠡᠭᠡᠪᠡ᠃ ᠳᠡᠮᠡᠢ ᠤᠳᠠᠯ ᠦᠭᠡᠢ ᠪᠢ ᠴᠠᠳᠤᠯᠠ ᠭᠡᠰᠡᠨ ᠳ᠋ᠦ᠍ ᠥᠭᠡᠷᠡ ᠵᠣᠴᠢᠳ ᠴᠥᠮ ᠨᠠᠮᠠᠶ᠋ᠢ ᠳᠣᠭᠣᠭᠢᠯᠠᠭᠰᠠᠨ ᠮᠠᠶᠢᠭᠲᠠᠢ ᠢᠨᠢᠶᠡᠵᠡᠭᠡᠯᠡ᠃ ᠡᠨᠡ ᠬᠦ᠌ ᠳᠡᠮᠡᠢ ᠣᠯᠠᠨ ᠲᠣᠬᠢᠶᠠᠯᠳᠤᠳᠠᠭ ᠦᠭᠡᠢ ᠬᠠᠲᠠᠭᠤ ᠠᠷᠢᠬᠢ ᠨᠢ ᠲᠡᠳᠡᠨ ᠢ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠬᠠᠯᠠᠰᠬᠠᠵᠤ᠂ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠬᠡᠷᠬᠢᠨ ᠶᠠᠫᠣᠨᠴᠤᠳ ᠢ ᠠᠬᠤᠢᠯᠠᠬᠤ ᠲᠤᠬᠠᠢ ᠣᠷᠬᠢᠵᠤ ᠭᠠᠷᠴᠠᠭᠠᠪᠠ᠃ ᠰᠠᠷᠵᠢ ᠶ᠋ᠢ ᠦᠯᠡᠳᠡᠭᠰᠡᠨ ᠮᠢᠬᠠ ᠪᠠᠨ ᠪᠦᠬᠦᠨ ᠢ ᠭᠠᠷᠭᠠᠵᠤ ᠱᠠᠯᠠᠬᠤ ᠳ᠋ᠤ᠌ ᠲᠡᠳᠡ ᠴᠥᠮ ᠴᠠᠳᠤᠯᠠ ᠭᠡᠵᠡᠭᠡᠵᠦ᠂ ᠬᠠᠨᠤᠮᠵᠢᠲᠠᠢ ᠬᠣᠢᠰᠢ ᠪᠠᠨ ᠰᠠᠭᠤᠵᠠᠭᠠᠪᠠ᠃ ᠷᠠᠰᠢ ᠭᠠᠷ ᠲᠠᠭᠠᠨ ᠡᠷᠢᠭᠡ ᠪᠠᠷᠢᠵᠤ᠂ ᠬᠤᠷᠤᠭᠤᠨ ᠤ᠋ ᠪᠠᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠤᠷᠳᠤᠨ ᠬᠤᠷᠳᠤᠨ ᠲᠣᠭᠠᠯᠠᠨᠠ᠃ ᠰᠠᠷᠠ ᠭᠠᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠣᠴᠢᠳ ᠪᠣᠰᠴᠠᠭᠠᠨ ᠠᠶᠠᠷᠯᠠᠯᠠ᠃ ᠷᠠᠰᠢ ᠲᠡᠳᠡᠨ ᠢ ᠡᠭᠦᠳᠡᠨ ᠦ᠌ ᠭᠠᠳᠠᠨᠠ ᠭᠠᠷᠲᠠᠯᠠ ᠦᠳᠡᠪᠡ᠃ ᠭᠠᠳᠠᠨᠠ ᠨᠢᠭᠡᠨ ᠵᠡᠷᠭᠡ ᠮᠣᠷᠢᠳ ᠤ᠋ᠨ ᠳᠠᠪᠬᠢᠶᠠ᠂ ᠨᠣᠬᠠᠳ ᠤ᠋ᠨ ᠬᠤᠴᠠᠯᠭᠠ ᠰᠣᠨᠣᠰᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠬᠣᠩᠭᠣᠷ ᠠᠯᠲᠠᠨᠴᠡᠴᠡᠭ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠭᠡᠳ ᠳᠠᠭᠤ ᠦᠭᠡᠢ ᠠᠬᠤᠢᠯᠠᠵᠤ ᠡᠬᠢᠯᠡᠪᠡ᠃ ᠠᠶᠠᠭᠠ ᠶ᠋ᠢ ᠨᠢ ᠬᠠᠭᠤᠴᠢᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠠᠷᠴᠢᠭᠠᠳ ᠪᠣᠭᠣᠨᠢᠬᠠᠨ ᠡᠷᠭᠢᠨᠡᠭ ᠲᠦ᠍ ᠣᠪᠣᠭᠠᠯᠠᠵᠤ ᠲᠠᠯᠪᠢᠪᠠ᠃
ᠭᠡᠨᠡᠳᠲᠡ ᠪᠢ ᠪᠢᠴᠢᠬᠠᠨ ᠬᠦᠦ ᠶ᠋ᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠭᠠᠳ᠂ 《ᠢᠨᠢᠶᠡᠭᠰᠡᠨ ᠡᠭᠦᠯᠡ 》 ᠶ᠋ᠢ ᠠᠰᠠᠭᠤᠪᠠ᠃ ᠰᠠᠷᠵᠢ ᠠᠯᠲᠠᠨ ᠪᠤᠷᠬᠠᠨ ᠲᠠᠢ ᠭᠦᠩᠭᠠᠷᠠᠪᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠠᠬᠢ ᠬᠤᠪᠴᠠᠰᠤᠨ ᠤ᠋ ᠸᠠᠳᠠᠩ ᠢ ᠵᠢᠭᠠᠪᠠ᠃ ᠪᠢᠳᠡᠨ ᠦ᠌ ᠨᠠᠢᠷᠯᠠᠵᠤ ᠢᠨᠢᠶᠡᠯᠴᠡᠵᠦ ᠪᠠᠢᠬᠤ ᠳ᠋ᠤ᠌ ᠡᠨᠡ ᠲᠠᠯᠠ ᠶ᠋ᠢᠨ ᠬᠦᠦ ᠬᠠᠷᠢᠨ ᠠᠳᠠ ᠤᠨᠲᠠᠵᠤ ᠪᠠᠢᠭᠰᠠᠨ ᠠᠵᠢ᠃ ᠦᠳᠡᠰᠢ ᠶ᠋ᠢᠨ ᠲᠥᠭᠥᠷᠢᠭ ᠰᠠᠷᠠ ᠡᠮᠦᠨᠡ ᠬᠥᠲᠥᠯ ᠦ᠋ᠨ ᠴᠠᠭᠠᠭᠤᠷ ᠳᠣᠨᠣᠯᠵᠠᠨᠠ᠃ ᠬᠠᠰᠢᠶᠠᠨ ᠳ᠋ᠤ᠌ ᠬᠠᠭᠠᠭᠰᠠᠨ ᠬᠣᠨᠢᠳ ᠪᠠ ᠲᠤᠭᠤᠯ ᠨᠠᠮᠵᠢᠭᠤᠬᠠᠨ ᠠᠮᠢᠰᠬᠤᠯᠯᠠᠵᠤ᠂ ᠵᠡᠭᠦᠳᠦᠨ ᠦ᠌ ᠶᠢᠷᠲᠢᠨᠴᠦ ᠳ᠋ᠡᠭᠡᠨ ᠲᠣᠭᠣᠷᠢᠨᠠ᠃ ᠰᠠᠷᠠᠨ ᠤ᠋ ᠭᠡᠷᠡᠯ ᠳᠣᠣᠷᠠ ᠨᠠᠭᠠᠰᠢ ᠴᠠᠭᠠᠰᠢ ᠪᠠᠨ ᠰᠦᠯᠵᠢᠯᠳᠦᠨ ᠬᠡᠪᠲᠡᠭᠰᠡᠨ ᠬᠣᠨᠢᠳ ᠤ᠋ᠨ ᠬᠠᠶᠠ ᠵᠠᠷᠢᠮ ᠨᠢ ᠬᠥᠳᠡᠯᠦᠨᠡ᠃ ᠵᠠᠷᠢᠮ ᠨᠢ ᠲᠣᠯᠣᠭᠠᠢ ᠪᠠᠨ ᠡᠷᠭᠦᠨ᠂ ᠭᠦᠨ ᠠᠮᠢᠰᠬᠤᠯᠯᠠᠵᠤ ᠠᠪᠤᠭᠠᠳ᠂ ᠲᠠᠢᠪᠤᠰᠢᠷᠠᠭᠰᠠᠨ ᠮᠡᠲᠦ ᠰᠠᠨᠠᠭᠠ ᠠᠯᠳᠠᠨᠠ᠃ ᠲᠡᠳᠡᠨ ᠡᠴᠡ ᠬᠠᠩᠬᠤᠯᠬᠤ ᠦᠨᠦᠷ ᠨᠢ ᠶᠠᠭ ᠯᠠ ᠦᠵᠦᠮ ᠦ᠋ᠨ ᠳᠠᠷᠠᠰᠤ ᠰᠢᠭ ᠰᠠᠢᠬᠠᠨ ᠮᠥᠷᠲᠡᠭᠡᠨ ᠬᠠᠲᠠᠭᠤ᠃
— ᠢᠷᠡᠭᠰᠡᠨ ᠴᠢᠨᠢ ᠶᠣᠰᠣᠲᠠᠢ ᠭᠣᠶᠣ ᠪᠣᠯᠤᠯᠠ ! ᠷᠠᠰᠢ ᠴᠢᠮᠠᠶ᠋ᠢ ᠲᠠᠩᠳᠠ ᠳᠤᠷᠠᠰᠳᠠᠭ ᠶᠤᠮ ᠰᠢᠦ ᠭᠡᠵᠦ ᠰᠠᠷᠵᠢ ᠭᠡᠷ ᠲᠦ᠍ ᠮᠢᠨᠢ ᠭᠡᠷᠡᠯ ᠠᠪᠴᠢᠷᠠᠬᠤ ᠳ᠋ᠠᠭᠠᠨ ᠶᠠᠷᠢᠯᠠ᠃