ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ᠂ ᠨᠠᠢ᠍ᠮᠠ ᠶᠢᠨ ᠠᠭᠤᠯᠠᠨ ᠳᠤ ᠁ (ᠭᠤᠷᠪᠠ) Сэрүүхэн тал нутаг–<свис> Вальтер Босгард (Walter Bosshard)- Дөрөвдүгээр бөлөг 3
393ᠭᠤᠷᠪᠠ ᠂ ᠨᠠᠢ᠍ᠮᠠ ᠶ᠋ᠢᠨ ᠠᠭᠤᠯᠠᠨ ᠠ᠋ᠴᠠ ᠢᠯᠡᠭᠡᠭᠰᠡᠨ ᠵᠠᠬᠢᠳᠠᠯ
ᠬᠠᠢᠷᠠᠲᠤ ᠮᠢᠨᠢ ᠂ ᠵᠢᠵᠢᠭᠬᠡᠨ ᠽᠧᠦ ᠽᠧᠦ ᠮᠢᠨᠢ ᠄
ᠬᠣᠲᠠ ᠶ᠋ᠢᠨ ᠵᠢᠵᠢᠭᠬᠡᠨ ᠬᠡᠦᠬᠡᠳ ᠦ᠋ᠳ ᠶᠠᠮᠠᠷ ᠨᠢᠭᠡᠨ ᠰᠡᠭᠦᠳᠡᠷ ᠲᠦ᠍ ᠰᠠᠭᠤᠵᠠᠭᠠᠵᠤ᠂ ᠣᠬᠣᠷᠬᠠᠨ ᠪᠥᠭᠡᠳ ᠠᠮᠢᠵᠢᠷᠠᠯ ᠤ᠋ᠨ ᠬᠦᠴᠦᠨ ᠪᠢᠯᠬᠠᠮᠠ ᠬᠠᠪᠤᠷ ᠢ᠋ ᠬᠦᠰᠡᠨ ᠪᠠᠷᠠᠯᠠᠬᠤ ᠪᠤᠶᠤ ᠨᠠᠮᠤᠷ ᠤ᠋ᠨ ᠨᠠᠯᠠᠭᠠᠷ ᠰᠠᠢᠬᠠᠨ ᠡᠳᠦᠷ ᠢ᠋ ᠪᠣᠳᠣᠵᠤ ᠪᠠᠢᠬᠤ ᠮᠠᠭᠠᠳ᠃ ᠡᠰᠡᠪᠡᠯ ᠲᠡᠳᠡ ᠡᠨᠡ ᠬᠠᠯᠠᠭᠤᠨ ᠳ᠋ᠤ᠌ ᠶᠠᠭᠤ ᠴᠤ᠌ ᠪᠣᠳᠣᠭᠠ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ ᠳᠠ᠃ ᠶᠠᠭᠤᠨ ᠳ᠋ᠤ᠌ ᠴᠢ ᠮᠢᠨᠢ ᠨᠠᠳᠠ ᠲᠠᠢ ᠴᠣᠭ ᠬᠦᠷᠴᠦ ᠢᠷᠡᠭᠰᠡᠨ ᠦᠭᠡᠢ ᠪᠣᠢ ? ᠣᠯᠠᠨ ᠠᠷᠪᠢᠨ ᠰᠢᠮᠠᠭᠤᠯ ᠪᠣᠯᠤᠨ ᠰᠠᠯᠬᠢᠨ ᠤ᠋ ᠠᠶᠠ ᠪᠠᠷ ᠦᠨᠦᠷᠲᠦᠬᠦ ᠲᠡᠮᠡᠭᠡᠨ ᠦ᠌ ᠰᠢᠭᠡᠭ ᠦ᠋ᠨ ᠦᠨᠦᠷ ᠡᠴᠡ ᠠᠶᠤᠭᠠᠳ ᠡᠰᠡ ᠢᠷᠡᠯᠡ ᠭᠡᠬᠦ ᠶᠦᠮ᠃ ᠡᠨᠡ ᠪᠣᠯ ᠬᠤᠳᠠᠯ ! ᠰᠢᠮᠠᠭᠤᠯ ᠤ᠋ᠳ ᠪᠦᠭᠦᠳᠡ ᠡᠪᠦᠯ ᠦ᠋ᠨ ᠢᠴᠡᠭᠡᠨ ᠡᠴᠡ ᠪᠡᠨ ᠭᠠᠷᠤᠭᠠ ᠦᠭᠡᠢ ᠪᠠᠢᠬᠤ ᠮᠠᠶᠢᠭᠲᠠᠢ ᠪᠥᠭᠡᠳ ᠲᠡᠮᠡᠭᠡ ᠭᠡᠳᠡᠭ ᠠᠮᠢᠲᠠᠨ ᠡᠨᠡ ᠣᠢᠷᠠ ᠣᠷᠴᠢᠮ ᠳ᠋ᠤ᠌ ᠪᠠᠷᠠ ᠰᠤᠷᠠᠭ ᠭᠡᠵᠦ ᠠᠯᠠᠭᠠ᠃ ᠭᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠬᠣᠷᠭᠣᠯ ᠨᠢ ᠬᠠᠷᠢᠨ ᠠᠳᠠ ᠬᠠᠮᠤᠭ ᠤ᠋ᠨ ᠰᠠᠢᠨ ᠲᠦᠯᠡᠰᠢ ᠪᠠᠢᠵᠤ᠂ ᠪᠢ ᠲᠡᠭᠦᠨ ᠢ᠋ᠶ᠋ᠡᠷ ᠡᠳᠦᠷ ᠲᠤᠵᠢ ᠳᠤᠯᠠᠭᠠᠴᠠᠵᠤ ᠪᠠᠢᠭᠠ ( ᠵᠢᠷᠤᠭ 74 ) ᠶᠤᠮᠰᠠᠨ᠃
ᠨᠠᠢ᠍ᠮᠠ ᠶ᠋ᠢᠨ ᠠᠭᠤᠯᠠ ᠶ᠋ᠢ ᠪᠢ ᠬᠠᠮᠤᠭ ᠤ᠋ᠨ ᠰᠠᠢᠬᠠᠨ ᠵᠤᠰᠠᠯᠠᠩ ᠤ᠋ᠨ ᠭᠠᠵᠠᠷ ᠭᠡᠵᠦ ᠬᠡᠯᠡᠪᠡᠯ ᠴᠢ ᠯᠠᠪ ᠨᠠᠮᠠᠶ᠋ᠢ ᠬᠡᠲᠦᠷᠡᠭᠦᠯᠵᠦ ᠪᠠᠢᠨᠠ ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠮᠡᠳᠡᠵᠦ ᠪᠠᠢᠨᠠ᠃ ᠭᠡᠬᠦ ᠳ᠋ᠦ᠍ ᠴᠢ ᠬᠡᠷᠪᠡ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠠᠳᠠ ᠬᠦᠷᠦᠯᠴᠡᠨ ᠢᠷᠡᠭᠰᠡᠨ ᠪᠣᠯ ᠮᠢᠨᠦ ᠶᠠᠷᠢᠭᠰᠠᠨ ᠢ᠋ ᠵᠥᠪ ᠭᠡᠵᠦ ᠵᠥᠪᠰᠢᠶᠡᠷᠡᠬᠦ ᠯᠡ ᠪᠣᠯᠤᠨᠠ᠃ ᠠᠳᠠ ᠶᠠᠭᠤᠮᠠ ᠪᠦᠬᠦᠨ ᠪᠦᠷ ᠪᠠᠢᠭᠠ᠃ ᠠᠪᠠᠷᠢᠬᠤ ᠳ᠋ᠤ᠌ ᠠᠭᠤᠯᠠ ᠲᠠᠢ᠂ ᠬᠠᠲᠠᠷᠢᠭᠤᠯᠬᠤ ᠳ᠋ᠤ᠌ ᠲᠠᠯᠠ ᠲᠠᠢ ( ᠵᠢᠷᠤᠭ 1᠂ 69 ) ᠂ ᠴᠢᠨᠣᠠ ᠡᠭᠦᠷᠯᠡᠭᠰᠡᠨ ᠬᠠᠪᠴᠢᠯ ᠵᠢᠯᠠᠭᠠ ᠲᠠᠢ᠂ ᠠᠯᠫᠠᠰ ᠠᠭᠤᠯᠠ ᠶ᠋ᠢᠨ ᠰᠠᠢᠬᠠᠨ ᠴᠡᠴᠡᠭ ᠳᠡᠯᠭᠡᠷᠡᠭᠰᠡᠨ ᠠᠰᠬᠠ ᠬᠠᠲᠠᠳ ᠲᠠᠢ᠂ ᠡᠭᠦᠯᠳᠡᠷ ᠰᠠᠢᠲᠠᠢ ᠮᠣᠷᠢᠳ ᠲᠠᠢ᠂ ᠤᠤᠭᠤᠵᠤ ᠢᠳᠡᠬᠦ ᠳ᠋ᠦ᠍ ᠰᠢᠨᠡᠬᠡᠨ ᠰᠦ ( ᠵᠢᠷᠤᠭ 110 ) ᠴᠠᠭᠠᠨ ᠢᠳᠡᠭᠡ ᠲᠡᠢ᠃ ᠨᠢᠭᠡ ᠯᠡ ᠦᠭᠡ ᠪᠡᠷ ᠬᠡᠯᠡᠪᠡᠯ ᠲᠡᠭᠷᠢ ᠶ᠋ᠢᠨ ᠣᠷᠳᠣᠨ ᠭᠡᠵᠦ ᠮᠡᠳᠡ ᠠ᠋ ! ᠴᠢᠨᠦ ᠤᠰᠤᠨ ᠳ᠋ᠤ᠌ ᠤᠮᠪᠠᠵᠤ ᠳᠡᠢᠯᠦᠨᠡ ᠤᠤ ? ᠭᠡᠵᠦ ᠠᠰᠠᠭᠤᠬᠤ ᠨᠢ ᠰᠣᠨᠣᠰᠳᠠᠬᠤ ᠰᠢᠭ᠋ ᠪᠠᠢᠨᠠ᠃ ᠲᠡᠢᠮᠦ ᠠ᠋ ! ᠭᠦᠨ ᠬᠤᠳᠳᠤᠭ ᠠ᠋ᠴᠠ ᠳᠡᠰ ᠬᠦᠢᠲᠡᠨ ᠤᠰᠤ ᠲᠡᠳᠡᠨ ᠭᠠᠷᠭᠠᠵᠤ ᠪᠣᠢ ᠪᠥᠭᠡᠳ ᠶᠡᠬᠡ ᠣᠩᠭᠣᠴᠠᠨ ᠳ᠋ᠤ᠌ ᠬᠢᠭᠡᠳ ᠮᠠᠯ ᠤᠰᠤᠯᠠᠳᠠᠭ᠃ ᠤᠰᠤᠯᠠᠭᠰᠠᠨ ᠤ᠋ ᠳᠠᠷᠠᠭᠠ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠪᠣᠯᠤᠨᠠ ᠯᠠ ᠳᠠ᠂ ᠭᠡᠬᠦ ᠳ᠋ᠦ᠍ ᠤᠮᠪᠠᠨᠠ ᠭᠡᠪᠡᠯ ᠪᠠᠭᠠᠳᠠᠨᠠ ᠪᠠᠢᠬᠤ᠃ ᠳᠡᠯᠡᠬᠡᠢ ᠶᠢᠷᠲᠢᠨᠴᠦ ᠶ᠋ᠢᠨ ᠬᠥᠮᠦᠰ ᠦ᠋ᠨ ᠲᠠᠨᠢᠬᠤ ᠦᠭᠡᠢ ᠵᠦᠢᠯᠡᠰ ᠨᠢ ᠪᠦᠷ ᠡᠨᠳᠡ ᠪᠠᠢᠭᠠ ᠭᠡᠵᠦ ᠪᠣᠳᠣᠭᠠᠴᠢ ᠳᠠ !
ᠨᠡᠭᠡᠷᠡᠨ ᠪᠢ ᠷᠠᠰᠢ ᠶ᠋ᠢ ᠶᠠᠷᠢᠬᠤ ᠪᠠᠨ ᠮᠠᠷᠲᠠᠬᠤ ᠰᠢᠬᠠᠯᠠ᠃ ᠮᠢᠨᠦ ᠦᠨᠡᠨᠴᠢ ᠬᠠᠨᠢ ᠪᠥᠭᠡᠳ ᠰᠠᠢᠨ ᠨᠠᠢᠵᠠ ᠷᠠᠰᠢ ᠶ᠋ᠢ ᠴᠢ ᠴᠦ᠍ ᠲᠠᠨᠢᠨᠠ ᠰᠢᠦ ᠳᠡ᠃ ᠲᠡᠷᠡ ᠮᠠᠨᠢ ᠲᠠᠩᠳᠠ ᠪᠤᠷᠬᠠᠨ ᠤ᠋ ᠣᠷᠣᠨ ᠤᠲᠠᠢ ᠳ᠋ᠤ᠌ ᠮᠥᠷᠭᠥᠯ ᠬᠢᠬᠦ ᠪᠡᠷ ᠶᠠᠪᠤᠨᠠ ᠭᠡᠵᠦ ᠬᠦᠰᠡᠳᠡᠭ ᠪᠥᠭᠡᠳ ᠣᠳᠣ ᠬᠠᠷᠢᠨ ᠶᠠᠭ ᠲᠡᠭᠦᠨ ᠤ ᠡᠰᠡᠷᠭᠦ ᠴᠢᠭᠯᠡᠯ ᠢ᠋ᠶ᠋ᠡᠷ ᠵᠡᠭᠦᠨᠰᠢᠯᠡᠵᠦ᠂ ᠨᠢᠭᠡ ᠰᠠᠢᠬᠠᠨ ᠪᠡᠯᠴᠢᠭᠡᠷ ᠤᠰᠤ ᠲᠠᠢ ᠭᠠᠵᠠᠷ ᠢ ᠣᠯᠵᠤ ᠠᠪᠤᠪᠠ ( ᠵᠢᠷᠤᠭ 70 ) ᠃ ᠲᠡᠭᠦᠨ ᠤ ᠭᠡᠷ ᠮᠢᠨᠦ ᠠᠳᠠ ᠠ᠋ᠴᠠ ᠮᠠᠰᠢᠨ ᠢ᠋ᠶ᠋ᠠᠷ ᠬᠣᠶᠠᠷ ᠴᠠᠭ ᠠᠶᠠᠯᠠᠬᠤ ᠵᠠᠢᠲᠠᠢ ᠪᠥᠭᠡᠳ ᠲᠡᠨᠳᠡ ᠰᠠᠷᠵᠢ ᠪᠣᠯᠤᠨ ᠬᠣᠩᠭᠣᠷ ᠭᠠᠮᠰᠢᠭ ᠢ ᠲᠤᠭᠤᠯᠤᠭᠰᠠᠨ ᠬᠣᠨᠢ ᠪᠣᠯᠤᠨ ᠬᠡᠳᠦᠨ ᠠᠳᠤᠭᠤ ᠪᠠᠨ ᠮᠠᠯᠵᠢᠵᠤ ᠪᠣᠢ᠃
ᠪᠢ ᠠᠳᠠ ᠢᠷᠡᠭᠰᠡᠨ ᠠᠩᠬᠠᠨ ᠤ᠋ ᠡᠳᠦᠷ ᠲᠡᠭᠡᠨ ᠷᠠᠰᠢ ᠳ᠋ᠤ᠌ ᠬᠥᠮᠦᠨ ᠢᠯᠡᠭᠡᠵᠦ ᠮᠡᠳᠡᠭᠳᠡᠪᠡ ᠃ ᠮᠥᠨ ᠣᠷᠣᠢ ᠳ᠋ᠤᠨᠢ ᠡᠷᠡᠭᠦᠯ ᠴᠢᠭᠢᠷᠠᠭ ᠭᠢᠯᠠᠯᠵᠠᠭᠰᠠᠨ ᠪᠣᠷᠣ ᠴᠢᠷᠠᠢ ᠲᠠᠢ ᠲᠡᠷᠡ ᠡᠭᠦᠳᠡᠨ ᠳ᠋ᠦ᠍ ᠮᠢᠨᠢ ᠵᠣᠭᠰᠣᠵᠤ ᠪᠠᠢᠯᠠ᠃ ᠮᠢᠨᠦ ᠲᠥᠯᠥᠭᠡ ᠰᠡᠳᠬᠢᠯ ᠠᠯᠭᠠᠰᠠᠵᠤ ᠪᠠᠢᠭᠰᠠᠨ ᠢ ᠨᠢ ᠬᠡᠯᠡᠬᠦ ᠤᠤ ! ᠲᠡᠷᠡ ᠮᠢᠨᠦ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠶ᠋ᠢᠨ ᠲᠡᠨᠳᠡ ᠵᠣᠬᠢᠴᠠᠭᠤᠯᠤᠭᠰᠠᠨ ᠪᠠᠢᠷᠢ ᠶ᠋ᠢ ᠬᠠᠷᠠᠭᠠᠳ ᠠᠭᠤᠷᠲᠠᠢ ᠪᠠᠷ ᠨᠠᠳᠠ ᠤᠷᠤᠭᠤ : 《ᠴᠢ ᠲᠡᠭᠡᠭᠡᠳ ᠡᠨᠡ ᠴᠠᠭᠠᠨ ᠲᠡᠮᠦᠷ ᠬᠠᠪᠲᠠᠰᠤᠨ ᠣᠷᠣᠢ ᠲᠠᠢ ᠪᠠᠢᠰᠢᠩ ᠳ᠋ᠤ᠌ ᠠᠮᠢᠳᠤᠷᠠᠨᠠ ᠭᠡᠵᠦ ᠪᠠᠢᠬᠤ ᠶᠤᠮ ᠤᠤ ? ᠪᠢ ᠴᠢᠨᠢ ᠴᠢᠮᠠᠶ᠋ᠢ ᠮᠣᠩᠭᠣᠯ ᠶᠣᠰᠣ ᠪᠠᠷ ᠠᠮᠢᠳᠤᠷᠠᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠠ᠋᠂ ᠲᠡᠭᠡᠪᠡᠯ ᠴᠢᠮᠠ ᠳ᠋ᠤ᠌ ᠵᠠᠪᠠᠯ ᠨᠢᠭᠡ ᠭᠡᠷ ᠪᠠᠢᠬᠤ ᠬᠡᠷᠡᠭᠲᠡᠢ 》ᠭᠡᠵᠦ ᠶᠠᠷᠢᠯᠠ᠃ ᠪᠢ ᠲᠡᠭᠦᠨ ᠳ᠋ᠦ᠍ ᠡᠨᠡ ᠴᠦ᠍ ᠦᠨᠡᠨ ᠭᠡᠬᠦ ᠳ᠋ᠦ᠍ ᠲᠡᠷᠡ ᠬᠠᠷᠢᠨ ᠨᠠᠳᠠ ᠭᠣᠶᠣ ᠰᠠᠢᠬᠠᠨ ᠰᠢᠨᠡ ᠭᠡᠷ ᠠᠪᠴᠢᠷᠠᠵᠤ ᠥᠭᠭᠦᠶᠡ ᠭᠡᠵᠦ ᠶᠠᠷᠢᠯᠠ᠃ ᠲᠡᠷᠡ᠄ 《ᠲᠡᠷᠡ ᠪᠣᠯ ᠠᠯᠲᠠᠨᠴᠡᠴᠡᠭ ᠦ᠋ᠨ ᠶᠦᠮ᠂ ᠲᠡᠭᠦᠨ ᠢ ᠠᠳᠠ ᠠᠪᠴᠢᠷᠠᠬᠤ ᠬᠡᠷᠡᠭᠲᠡᠢ 》ᠭᠡᠯᠡ᠃《ᠬᠡᠨ ᠨᠢ ᠲᠡᠭᠡᠭᠡᠳ ᠠᠯᠲᠠᠨᠴᠡᠴᠡᠭ ᠪᠣᠯᠪᠠ ? 》ᠭᠡᠵᠦ ᠨᠠᠮᠠᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠷᠡ ᠡᠬᠢᠨ ᠳ᠋ᠡᠭᠡᠨ ᠰᠠᠷᠵᠢ ᠶ᠋ᠢᠨ ᠥᠬᠢᠨ ᠳᠡᠭᠦᠦ ᠨᠢ ᠭᠡᠵᠦ ᠰᠡᠭᠦᠯᠡᠷ ᠨᠢ ᠠᠬᠢᠭᠠᠳ ᠵᠠᠰᠠᠵᠤ : 《ᠪᠢᠰᠢ᠂ ᠵᠢᠩᠬᠢᠨᠢ ᠥᠬᠢᠨ ᠳᠡᠭᠦᠦ ᠨᠢ ᠪᠢᠰᠢ᠂ ᠭᠡᠬᠦ ᠳ᠋ᠡᠭᠡᠨ ᠪᠠᠷᠤᠭ ᠣᠢᠷᠠᠯᠴᠠᠭᠠ 》 ᠭᠡᠯᠡ᠃ ᠪᠢ ᠲᠡᠭᠦᠨ ᠳ᠋ᠦ᠍ ᠰᠠᠳᠤᠨ ᠲᠥᠷᠥᠯ ᠨᠢ ᠪᠠᠢᠬᠠ ᠭᠡᠵᠦ ᠶᠠᠷᠢᠬᠤ ᠪᠠᠷ ᠲᠡᠷᠡ :《ᠶᠠᠭ ᠮᠥᠨ᠂ ᠨᠢᠭᠡ ᠰᠠᠳᠤᠨ ᠪᠣᠯᠬᠤ ᠪᠥᠭᠡᠳ ᠣᠳᠣ ᠪᠠᠨᠳᠢᠩ ᠲᠠᠢ ᠬᠤᠷᠢᠮᠯᠠᠬᠤ ᠪᠣᠯᠵᠠᠢ᠃ ᠪᠠᠨᠳᠢᠩ ᠰᠢᠨᠡ ᠭᠡᠷ ᠪᠡᠯᠡᠳᠴᠦ᠂ ᠠᠯᠲᠠᠨᠴᠡᠴᠡᠭ ᠥᠴᠥᠭᠡᠳᠦᠷ ᠬᠠᠮᠤᠭ ᠤ᠋ᠨ ᠰᠡᠭᠦᠯ ᠦ᠋ᠨ ᠨᠢᠭᠡ ᠬᠡᠰᠡᠭ ᠢ ᠣᠶᠣᠵᠤ ᠳᠠᠭᠤᠰᠬᠠᠭᠰᠠᠨ ᠶᠤᠮ》ᠭᠡᠯᠡ᠃ ᠷᠠᠰᠢ ᠲᠡᠳᠡᠨ ᠤ ᠰᠢᠨᠡ ᠭᠡᠷ ᠢ ᠨᠠᠳᠠ ᠳ᠋ᠤ᠌ ᠥᠭᠬᠦ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠣᠳᠣ ᠲᠡᠳᠡᠨ ᠤ ᠬᠤᠷᠢᠮ ᠢ ᠬᠣᠢᠰᠢᠯᠠᠭᠤᠯᠬᠤ ᠬᠡᠷᠡᠭᠲᠡᠢ ᠪᠣᠯᠵᠠᠢ᠃
ᠦᠳᠡᠰᠢ ᠨᠡᠯᠢᠶᠡᠳ ᠣᠷᠣᠢ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ ᠲᠡᠷᠡ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠭᠡᠷ ᠲᠡᠭᠡᠨ ᠪᠤᠴᠠᠪᠠ᠃ ᠮᠠᠷᠭᠠᠰᠢ ᠨᠢ ᠬᠣᠶᠠᠷ ᠦᠬᠡᠷ ᠲᠡᠷᠭᠡ ᠪᠡᠷ ᠨᠠᠳᠠ ᠳ᠋ᠤ᠌《ᠰᠢᠯᠵᠢᠭᠦᠯᠵᠦ ᠪᠣᠯᠳᠠᠭ ᠪᠠᠢᠰᠢᠩ 》 ᠪᠣᠯᠤᠨ ᠵᠢᠴᠢ ᠠᠮᠢᠳᠤᠷᠠᠯ ᠳ᠋ᠤ᠌ ᠬᠡᠷᠡᠭᠴᠡᠭᠡ ᠲᠡᠢ ᠴᠢᠬᠤᠯᠠ ᠵᠦᠢᠯᠡᠰ ᠢ ᠠᠪᠴᠢᠷᠠᠵᠠᠢ᠃ ᠪᠢ ᠲᠡᠷᠡ ᠳᠣᠣᠷᠠ ᠪᠠᠨ ᠬᠠᠮᠤᠭ ᠠ᠋ᠴᠠ ᠲᠣᠭᠣᠭᠰᠠᠨ ᠨᠣᠭᠣᠭᠠᠨ ᠲᠠᠯᠠ ᠶ᠋ᠢᠨ ᠳᠤᠮᠳᠠᠬᠢ ᠭᠠᠵᠠᠷ ᠢ ᠰᠣᠩᠭᠣᠨ ᠬᠠᠨᠠ ᠣᠨᠢ ᠨᠤᠭᠤᠳ ᠢ ᠬᠣᠯᠪᠣᠵᠤ ᠡᠬᠢᠯᠡᠪᠡ᠃ ᠳᠠᠷᠠᠭᠠ ᠨᠢ ᠴᠠᠰᠤ ᠴᠠᠭᠠᠨ ᠢᠰᠡᠭᠡᠢ ᠪᠡᠷ ᠪᠦᠲᠡᠭᠡᠵᠦ᠂ ᠨᠢᠭᠡ ᠴᠠᠭ ᠰᠢᠬᠠᠮ ᠤ᠋ᠨ ᠳᠣᠲᠣᠷᠠ ᠮᠢᠨᠦ ᠭᠡᠷ ᠣᠷᠣᠵᠤ ᠰᠠᠭᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠣᠯᠪᠠ᠃
ᠬᠠᠨᠠ ᠳᠠᠭᠠᠭᠤᠯᠤᠨ ᠰᠤᠪᠤᠷᠠᠭᠤᠯᠤᠨ ᠲᠠᠯᠪᠢᠭᠰᠠᠨ ᠬᠡᠳᠦᠨ ᠪᠣᠭᠣᠨᠢᠬᠠᠨ ᠠᠪᠳᠠᠷᠠ ᠶ᠋ᠢ ᠴᠢ ᠪᠠᠢᠭᠰᠠᠨ ᠪᠣᠯ ᠯᠠᠪ ᠰᠣᠯᠢᠬᠤ ᠪᠠᠢᠬᠠ ᠳᠠ᠃ ᠨᠢᠭᠡ ᠬᠢᠲᠠᠳ ᠵᠢᠷᠤᠭᠠᠴᠢ ᠵᠢᠷᠤᠵᠤ ᠪᠤᠳᠤᠭᠯᠠᠵᠠᠢ᠃ ᠲᠡᠷᠡ ᠵᠢᠷᠤᠭᠠᠴᠢ ᠮᠠᠨᠢ ᠪᠠᠢᠳᠠᠭ ᠮᠠᠭᠤᠬᠠᠢ ᠥᠩᠭᠡ ᠪᠡᠷ ᠡᠷᠦᠢ ᠬᠤᠷᠤᠢ ᠦᠭᠡᠢ ᠪᠢᠯᠳᠠᠭᠰᠠᠨ ᠪᠥᠭᠡᠳ ᠬᠠᠴᠢᠨ ᠰᠣᠨᠢᠨ ᠠᠮᠢᠲᠠᠨ ᠤ᠋ ᠵᠢᠷᠤᠭ ᠵᠢᠷᠤᠵᠠᠢ᠃ ᠣᠳᠣ ᠪᠢ ᠴᠦ᠍ ᠭᠡᠰᠡᠨ ᠠᠭᠠᠵᠢᠮ ᠳ᠋ᠠᠭᠠᠨ ᠲᠡᠷᠡ ᠥᠩᠭᠡ ᠵᠢᠷᠤᠭ ᠲᠤ᠌ ᠲᠡᠰᠴᠦ᠂ ᠰᠠᠢᠬᠠᠨ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠣᠢᠷᠠᠳᠴᠤ ᠪᠣᠢ᠃ ᠲᠠᠪᠢᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠭᠡᠬᠦ ᠳ᠋ᠦ᠍ ᠤᠲᠤᠭᠠ ᠲᠣᠭᠣᠰᠣᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠡᠨᠡ ᠠᠪᠳᠠᠷᠠ ᠬᠣᠷᠭᠣ ᠨᠤᠭᠤᠳ ᠦᠨᠡᠲᠡᠢ ᠭᠣᠶᠣ ᠡᠳ᠋ᠯᠡᠯ ᠪᠣᠯᠬᠤ ᠪᠣᠯᠤᠨᠠ᠂ ᠭᠡᠬᠦ ᠳ᠋ᠡᠭᠡᠨ ᠲᠡᠳᠡ ᠨᠠᠷᠠ ᠰᠠᠯᠬᠢᠨ ᠤ᠋ ᠳᠤᠮᠳᠠ ᠲᠠᠯᠠ ᠨᠤᠲᠤᠭ ᠳᠡᠭᠡᠷᠡ ᠬᠡᠳᠦᠨ ᠵᠠᠭᠤᠨ ᠤᠳᠠᠭᠠ ᠯᠠᠪᠲᠠᠢ ᠨᠠᠭᠠᠰᠢ ᠴᠠᠭᠠᠰᠢ ᠵᠥᠭᠡᠭᠡᠪᠦᠷᠢᠯᠡᠭᠳᠡᠬᠦ ᠪᠣᠯᠤᠨᠠ ᠳᠠ᠃
ᠬᠥᠰᠡᠷ ᠲᠡᠭᠡᠨ ᠨᠢᠮᠭᠡᠬᠡᠨ ᠢᠰᠡᠭᠡᠢ ᠳᠡᠪᠢᠰᠴᠦ᠂ ᠭᠡᠷ ᠦ᠋ᠨ ᠭᠣᠣᠯ ᠳ᠋ᠤ᠌ ᠠᠷᠭᠠᠯ ᠤ᠋ᠨ ᠭᠠᠯ ᠳᠦᠷᠡᠯᠵᠡᠵᠦ ᠪᠣᠢ᠃ ᠬᠡᠯᠡᠯᠭᠡᠨ ᠦᠭᠡᠢ ᠴᠢᠨᠦ ᠠᠶᠤᠳᠠᠭ ᠠᠷᠭᠠᠯ ᠬᠣᠷᠭᠣᠯ ᠤ᠋ᠨ ᠲᠦᠯᠡᠰᠢ ᠪᠣᠯᠤᠨᠠ᠃ ᠡᠬᠢᠨ ᠳ᠋ᠡᠭᠡᠨ ᠭᠡᠷ ᠲᠦ᠍ ᠬᠥᠬᠡ ᠤᠲᠤᠭᠠ ᠲᠤᠨᠤᠷᠠᠳᠠᠭ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠷᠠᠰᠢ ᠨᠠᠳᠠ ᠳ᠋ᠤ᠌ ᠶᠠᠭᠠᠬᠢᠵᠤ ᠤᠲᠤᠭᠠ ᠶ᠋ᠢ ᠲᠣᠭᠣᠨᠣ (ᠵᠢᠷᠤᠭ 71 ) ᠪᠡᠷ ᠭᠠᠷᠭᠠᠬᠤ ᠶ᠋ᠢ ᠵᠢᠭᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠤᠲᠤᠭᠠ ᠪᠠᠨ ᠭᠠᠷᠭᠠᠵᠤ ᠴᠢᠳᠠᠬᠤ ᠪᠣᠯᠪᠠ᠃ ᠰᠠᠯᠬᠢᠨ ᠲᠠᠯᠠ ᠶ᠋ᠢᠨ ᠬᠠᠶᠠᠭᠠ ᠶ᠋ᠢ ᠪᠠᠭᠠᠬᠠᠨ ᠰᠢᠭᠤᠬᠤ ᠳ᠋ᠤ᠌ ᠭᠡᠷ ᠳᠣᠲᠣᠷᠠ ᠳᠣᠣᠷᠠ ᠪᠠᠨ ᠴᠡᠪᠡᠷ ᠲᠤᠩᠭᠠᠯᠠᠭ ᠪᠣᠯᠵᠤ᠂ ᠭᠠᠯ ᠮᠠᠨᠢ ᠬᠠᠮᠤᠭ ᠤ᠋ᠨ ᠦᠨᠡᠲᠡᠢ ᠭᠠᠰ ᠤ᠋ᠨ ᠵᠤᠤᠬᠠ ᠠ᠋ᠴᠠ ᠴᠤ᠌ ᠰᠠᠢᠨ ᠳᠦᠷᠡᠯᠵᠡᠨ ᠨᠣᠴᠣᠵᠤ ᠪᠠᠢᠨᠠ᠃ ᠲᠡᠭᠡᠭᠡᠳ ᠷᠠᠰᠢ ᠪᠢᠳᠡ ᠬᠣᠶᠠᠷ ᠵᠥᠭᠡᠯᠡᠨ ᠣᠯᠪᠣᠭ ᠳᠡᠭᠡᠷᠡ ᠰᠠᠭᠤᠵᠠᠭᠠᠪᠠ᠃ ᠣᠯᠪᠣᠭ ᠨᠢ ᠳᠥᠷᠪᠡᠯᠵᠢᠨ ᠬᠡᠯᠪᠡᠷᠢ ᠲᠡᠢ᠂ ᠤᠳᠠᠯ ᠦᠭᠡᠢ ᠰᠢᠨᠡ ᠬᠦᠷᠭᠡᠨ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠮᠢᠨᠦ ᠲᠠᠨᠢᠬᠤ ᠦᠭᠡᠢ ᠪᠠᠨᠳᠢᠩ ᠲᠠᠩᠭᠤᠳ ᠯᠠᠮᠠ ᠠ᠋ᠴᠠ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠭᠡᠨᠡ᠃ ᠠᠯᠲᠠᠨᠴᠡᠴᠡᠭ ᠲᠡᠭᠦᠨ ᠦ᠌ ᠳᠣᠣᠷᠠ ᠨᠢ ᠬᠥᠪᠥᠩ ᠲᠠᠯᠪᠢᠭᠰᠠᠨ ᠬᠥᠬᠡ ᠪᠥᠰ ᠭᠠᠳᠠᠷᠲᠠᠢ ᠵᠥᠭᠡᠯᠡᠨ ᠳᠡᠪᠢᠰᠬᠡᠷ ᠣᠶᠤᠨ ᠲᠠᠯᠪᠢᠵᠠᠢ᠃
ᠴᠠᠢ ᠪᠤᠴᠠᠯᠬᠤ ᠳ᠋ᠤ᠌ ᠷᠠᠰᠢ ᠶᠠᠷᠢᠵᠤ ᠡᠬᠢᠯᠡᠯᠡ᠃ ᠰᠡᠭᠦᠯᠴᠢ ᠶ᠋ᠢᠨ ᠤᠳᠠᠭᠠ ᠰᠠᠯᠤᠭᠰᠠᠨ ᠠ᠋ᠴᠠ ᠨᠠᠭᠠᠰᠢ ᠲᠡᠷᠡ ᠮᠠᠨᠢ ᠣᠯᠠᠨ ᠵᠦᠢᠯ ᠢ ᠥᠩᠭᠡᠷᠡᠭᠡᠭᠰᠡᠨ ᠠᠵᠢ᠃ ᠠᠩᠬᠠᠨ ᠳ᠋ᠠᠭᠠᠨ ᠲᠡᠷᠡ ᠠᠯᠢ ᠨᠢ ᠴᠢᠬᠤᠯᠠ ᠭᠡᠰᠡᠨ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠡᠷᠦᠢ ᠬᠤᠷᠤᠢ ᠦᠭᠡᠢ ᠰᠣᠯᠪᠢᠴᠠᠭᠤᠯᠤᠨ ᠶᠠᠷᠢᠵᠤ ᠪᠠᠢᠪᠠ᠃ ᠰᠣᠷᠭᠣᠭ ᠰᠠᠢᠬᠠᠨ ᠪᠡᠯᠴᠢᠭᠡᠷ ᠨᠢ ᠮᠠᠯ ᠰᠦᠷᠦᠭ ᠢ ᠶᠡᠬᠡ ᠬᠤᠷᠳᠤᠨ ᠬᠦᠴᠦ ᠲᠠᠷᠭᠤ ᠠᠪᠤᠭᠤᠯᠤᠭᠰᠠᠨ ᠪᠤᠶᠤ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠲᠥᠷᠥᠭᠰᠡᠨ ᠬᠦᠦ ᠨᠢ ᠨᠢᠭᠡᠨᠲᠡ ᠭᠠᠷ ᠬᠥᠯ ᠢ᠋ᠶ᠋ᠡᠨ ᠬᠥᠳᠡᠯᠭᠡᠵᠦ᠂ ᠬᠠᠰᠬᠢᠴᠢᠵᠤ ᠴᠢᠳᠠᠬᠤ ᠪᠣᠯᠤᠭᠰᠠᠨ ᠭᠡᠬᠦ ᠮᠡᠲᠦ᠃ ᠷᠠᠰᠢ ᠮᠥᠨ ᠯᠡ ᠠᠮᠢᠳᠤᠷᠠᠯ ᠤ᠋ᠨ ᠢᠲᠡᠭᠡᠯ ᠢ᠋ᠶ᠋ᠡᠷ ᠪᠢᠯᠬᠠᠮᠠ ᠪᠠᠢᠵᠤ᠂ ᠶᠡᠬᠡ ᠣᠯᠠᠨ ᠲᠥᠯᠥᠪᠯᠡᠭᠡ ᠵᠣᠬᠢᠶᠠᠨ᠂ ᠪᠠᠶᠠᠨ ᠡᠷᠬᠢᠮᠲᠡᠨ ᠦ᠌ ᠡᠩᠨᠡᠭᠡᠨ ᠳ᠋ᠦ᠍ ᠣᠷᠣᠬᠤ ᠪᠠᠷ ᠴᠢᠷᠮᠠᠢᠵᠤ᠂ ᠥᠪᠡᠷ ᠦ᠋ᠨ ᠮᠣᠷᠢ ᠪᠠᠷ ᠢ᠋ᠶ᠋ᠠᠨ ᠨᠠᠭᠠᠳᠤᠮ ᠳ᠋ᠤ᠌ ᠮᠠᠩᠯᠠᠢᠯᠠᠬᠤ ᠬᠦᠰᠡᠯᠲᠡᠢ ᠭᠡᠨᠡ᠃
— ᠪᠦᠦ ᠯᠡ ᠥᠨᠳᠥᠷ ᠲᠦ᠍ ᠨᠢᠰᠦᠭᠡᠳ ᠪᠠᠢᠭᠠᠷᠠᠢ ! ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡ ᠴᠢ ᠨᠠᠳᠠ ᠳ᠋ᠤ᠌ ᠶᠡᠬᠡ ᠶᠠᠭᠤᠮᠠ ᠪᠣᠯᠤᠮᠠᠷ ᠶᠠᠷᠢᠵᠤ ᠪᠠᠢᠭᠰᠠᠨ ᠰᠢᠲᠠ ᠭᠡᠵᠦ ᠪᠢ ᠶᠠᠷᠢᠪᠠ᠃ ᠭᠡᠬᠦ ᠳ᠋ᠦ᠍ ᠲᠡᠷᠡ ᠮᠠᠨᠢ ᠲᠡᠷᠡ ᠲᠤᠬᠠᠢ ᠥᠨᠥᠳᠥᠷ ᠶᠠᠷᠢᠬᠤ ᠰᠣᠨᠢᠷᠬᠠᠯ ᠦᠭᠡᠢ ᠪᠠᠢᠪᠠ᠃
ᠦᠳᠡᠰᠢ ᠪᠣᠯᠵᠤ ᠤᠨᠲᠠᠬᠤ ᠪᠠᠷ ᠪᠣᠯᠪᠠ᠃ ᠲᠡᠷᠡ ᠣᠢᠷᠠ ᠣᠷᠴᠢᠮ ᠤ᠋ᠨ ᠨᠠᠢᠵᠠ ᠲᠠᠨᠢᠯ ᠤ᠋ᠨ ᠬᠢᠨ ᠳ᠋ᠦ᠍ ᠬᠦᠷᠬᠦ ᠪᠡᠷ ᠭᠠᠷᠤᠭᠠᠳ᠂ ᠨᠣᠣᠰᠣ᠂ ᠡᠪᠡᠰᠦ᠂ ᠴᠡᠴᠡᠭ ᠪᠠ ᠠᠷᠭᠠᠯ ᠦᠨᠦᠷᠲᠦᠭᠰᠡᠨ ᠭᠡᠷ ᠲᠦ᠍ ᠨᠠᠮᠠᠶ᠋ᠢ ᠭᠠᠭᠴᠠᠭᠠᠷ ᠢ ᠣᠷᠬᠢᠪᠠ᠃
ᠥᠷᠯᠥᠭᠡ ᠨᠢ ᠨᠠᠮᠠᠶ᠋ᠢ ᠡᠷᠲᠡ ᠭᠡᠭᠴᠢ ᠪᠣᠰᠬᠤ ᠳ᠋ᠤ᠌ ᠤᠷᠢᠳ ᠡᠮᠦᠨᠡ ᠬᠠᠷᠠᠭᠠ ᠦᠭᠡᠢ ᠰᠠᠢᠬᠠᠨ ᠦᠵᠡᠮᠵᠢ ᠨᠢᠳᠦᠨᠡ ᠲᠣᠳᠣᠷᠠᠳᠠᠭ᠃ ᠬᠣᠨᠢᠨ ᠰᠦᠷᠦᠭ ᠪᠡᠯᠴᠢᠭᠡᠷ ᠤᠷᠤᠭᠤ ᠪᠠᠨ ᠪᠡᠯᠴᠢᠬᠦ ( ᠵᠢᠷᠤᠭ 72 ) ᠪᠥᠭᠡᠳ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠷᠠᠰᠢ ᠶ᠋ᠢᠨ ᠵᠢᠩᠷᠤᠪ ᠭᠡᠵᠦ ᠨᠡᠷᠡᠯᠡᠳᠡᠭ ᠪᠢᠴᠢᠬᠠᠨ ᠬᠦᠦ ᠳᠠᠭᠠᠵᠤ ᠬᠣᠨᠢ ᠪᠠᠨ ᠰᠠᠯᠬᠢ ᠡᠰᠡᠷᠭᠦᠯᠡ᠊ᠨ ᠬᠠᠷᠢᠭᠤᠯᠤᠭᠰᠠᠭᠠᠷ ᠠᠭᠤᠯᠠ ᠶ᠋ᠢᠨ ᠪᠠᠯ ᠳ᠋ᠤ᠌ ᠥᠭᠡᠳᠡᠯᠡᠨ ᠬᠦᠷᠴᠦ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠢᠳᠡᠰᠢᠯᠡᠭᠦᠯᠦᠨ ᠣᠷᠬᠢᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠲᠣᠮᠣ ᠴᠢᠯᠠᠭᠤᠳ ᠢ ᠮᠠᠴᠤᠨ ᠲᠣᠭᠯᠠᠳᠠᠭ᠃ ᠪᠠᠭᠠ ᠤᠳᠠᠭᠠᠳ ᠵᠡᠷᠭᠡᠯᠡᠳᠡᠭᠡ ᠠᠢᠯ ᠤ᠋ᠨ ᠦᠨᠢᠶᠡᠳ ᠴᠦ᠍ ᠨᠠᠭᠠᠰᠢ ᠪᠠᠨ ᠣᠢᠷᠠᠳᠴᠤ ᠢᠷᠡᠬᠦ ᠦᠶᠡ ᠳ᠋ᠦ᠍ ᠪᠢ ᠣᠯᠠᠩᠬᠢ ᠳ᠋ᠠᠭᠠᠨ ᠪᠣᠰᠴᠢᠬᠠᠭᠰᠠᠨ ᠪᠠᠢᠳᠠᠭ ᠪᠥᠭᠡᠳ ᠨᠢᠭᠡ ᠴᠣᠮᠣ ᠥᠷᠯᠥᠭᠡᠬᠡᠨ ᠰᠠᠭᠠᠭᠰᠠᠨ ᠰᠢᠨᠡ ᠰᠦ ᠡᠮᠦᠨᠡ ᠪᠡᠨ ᠲᠠᠯᠪᠢᠭᠰᠠᠨ ᠪᠠᠢᠳᠠᠭ᠃ ᠬᠥᠭᠡᠷᠦᠬᠦᠨ ᠤᠨᠠᠭᠠ ᠨᠤᠭᠤᠳ ᠲᠩᠵᠢᠨ ᠴᠣᠭᠲᠠᠢ ᠦᠰᠦᠷᠦᠨ ᠲᠣᠩᠭᠣᠷᠠᠵᠤ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠡᠭᠡᠴᠦᠦᠯ ᠨᠢ ᠰᠠᠨᠠᠭᠠ ᠪᠣᠯᠵᠤ ᠳᠠᠭᠠᠯᠳᠤᠨᠠ (ᠵᠢᠷᠤᠭ 76) ᠃ ᠬᠣᠯᠠ ᠶ᠋ᠢ ᠪᠠᠷᠠᠯᠠᠬᠤ ᠳ᠋ᠤ᠌ ᠶᠡᠬᠡ ᠬᠠᠯᠠᠭᠤᠨ ᠡᠳᠦᠷ ᠪᠣᠯᠬᠤ ᠪᠣᠯᠤᠯᠲᠠᠢ᠃ ᠠᠳᠤᠭᠤᠳ ᠪᠦᠲᠦᠨ ᠦᠳᠡ ᠶ᠋ᠢᠨ ᠡᠮᠦᠨᠡ ᠲᠣᠯᠣᠭᠠᠢ ᠪᠠᠨ ᠳᠣᠲᠣᠭᠰᠢ ᠬᠠᠨᠳᠤᠭᠤᠯᠤᠨ ᠨᠢᠭᠡ ᠨᠢᠭᠡᠨ ᠳ᠋ᠡᠭᠡᠨ ᠤᠪ ᠣᠢᠷᠠᠬᠠᠨ ᠲᠣᠭᠣᠷᠢᠭᠯᠠᠨ ᠵᠣᠭᠰᠣᠵᠠᠭᠠᠵᠤ᠂ ᠰᠡᠭᠦᠯ ᠢ᠋ᠶ᠋ᠡᠨ ᠲᠠᠰᠤᠷᠠᠯ ᠦᠭᠡᠢ ᠰᠢᠷᠪᠠᠨ ᠢᠯᠠᠭᠠ ᠪᠠᠲᠠᠭᠠᠨᠠ ᠬᠥᠭᠡᠭᠡᠨᠡ᠃ ᠦᠳᠡ ᠡᠴᠡ ᠬᠣᠢᠰᠢ ᠰᠡᠷᠢᠭᠦᠨ ᠤᠨᠠᠭᠰᠠᠨ ᠬᠣᠢᠨᠠ ᠰᠠᠶᠢ ᠰᠠᠯᠵᠤ ᠢᠳᠡᠰᠢᠯᠡᠨᠡ ( ᠵᠢᠷᠤᠭ 73 ) ᠃
ᠠᠳᠠ ᠤᠳᠠᠭᠠᠨ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠰᠢᠭ ᠮᠢᠨᠦ ᠪᠦᠬᠦ ᠶᠠᠭᠤᠮᠠ ᠰᠠᠢᠨ ᠰᠠᠢᠬᠠᠨ ᠤᠷᠤᠭᠰᠢᠲᠠᠢ ᠪᠠᠢᠨᠠ᠃ ᠷᠠᠰᠢ ᠨᠠᠳᠠ ᠳ᠋ᠤ᠌ ᠨᠢᠭᠡ ᠰᠠᠢᠨ ᠮᠣᠷᠢ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ( ᠵᠢᠷᠤᠭ 75 ) ᠪᠥᠭᠡᠳ ᠰᠠᠷᠠ ᠪᠦᠷᠢ ᠶ᠋ᠢᠨ ᠲᠠᠪᠤᠨ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠨᠠᠳᠠ ᠳ᠋ᠤ᠌ ᠰᠦ ᠤᠤᠭᠤᠬᠤ ᠪᠠᠷ ᠨᠢᠭᠡ ᠦᠨᠢᠶᠡ ᠬᠥᠯᠥᠰᠥᠯᠡᠵᠦ ᠥᠭᠪᠡ᠃ ᠣᠳᠣᠬᠠᠨ ᠳ᠋ᠤ᠌ ᠲᠡᠢᠮᠦ ᠠᠷᠪᠢᠨ ᠰᠦ ᠰᠠᠭᠠᠵᠤ ᠦᠭᠡᠢ ᠴᠦ᠍ ᠪᠣᠷᠣᠭᠠᠨ ᠣᠷᠣᠵᠤ ᠪᠡᠯᠴᠢᠭᠡᠷ ᠡᠪᠡᠰᠦ ᠰᠠᠢᠬᠠᠨ ᠰᠤᠷ ᠲᠠᠢ ᠪᠣᠯᠪᠠᠯ ᠶᠡᠬᠡ ᠰᠦ ᠲᠡᠢ ᠪᠣᠯᠤᠨᠠ ᠭᠡᠨᠡ᠃ ᠮᠢᠨᠦ ᠠᠳᠠ ᠢᠷᠡᠭᠰᠡᠨ ᠴᠢᠮᠡᠭᠡ ᠴᠦ᠍ ᠣᠢᠷᠠ ᠣᠷᠴᠢᠮ ᠳ᠋ᠤ᠌ ᠲᠠᠷᠬᠠᠵᠤ᠂ ᠵᠥᠩᠳᠡᠭᠡᠨ ᠣᠯᠠᠨ ᠮᠣᠩᠭᠣᠯ ᠬᠥᠮᠦᠨ ᠮᠠᠨ ᠤ᠋ ᠳ᠋ᠤ᠌ ᠠᠢᠯᠴᠢᠯᠠᠨ ᠢᠷᠡᠵᠦ ᠠᠪᠴᠢᠷᠠᠭᠰᠠᠨ ᠬᠡᠳᠦᠨ ᠶᠠᠭᠤᠮᠠᠰ ᠢ᠋ ᠮᠢᠨᠢ ᠰᠣᠨᠢᠷᠬᠠᠨ ᠦᠵᠡᠬᠦ ᠶᠦᠮ᠃ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠬᠠᠮᠤᠭ ᠠ᠋ᠴᠠ ᠪᠠᠬᠠᠷᠠᠭᠳᠠᠭ ᠨᠢ ᠳᠠᠭᠤᠤ ᠬᠥᠭᠵᠢᠮ ᠦ᠋ᠨ ᠮᠠᠰᠢᠨ ( ᠵᠢᠷᠤᠭ 78 ) ᠪᠣᠯᠤᠨᠠ᠃ ᠷᠠᠰᠢ ᠪᠤᠰᠤᠳ ᠠ᠋ᠴᠠ ᠢᠯᠡᠭᠦᠦ ᠶᠠᠭᠤᠮᠠ ᠮᠡᠳᠡᠳᠡᠭ ᠰᠢᠭ ᠪᠡᠶᠡ ᠪᠡᠨ ᠪᠣᠳᠣᠵᠤ ᠠᠯᠢ ᠨᠢᠭᠡᠨ ᠳᠠᠭᠤᠤ ᠶ᠋ᠢᠨ ᠬᠠᠪᠲᠠᠰᠤ ᠶ᠋ᠢ ᠲᠠᠯᠪᠢᠬᠤ ᠶ᠋ᠢ ᠨᠠᠳᠠ ᠠ᠋ᠴᠠ ᠠᠰᠠᠭᠤᠵᠤ ᠭᠠᠷᠤᠨᠠ᠃ ᠲᠡᠷᠡ ᠮᠠᠨᠢ ᠡᠷᠬᠢᠮ ᠢᠵᠠᠭᠤᠷᠲᠠᠨ ᠤ᠋ ᠰᠣᠷᠲᠣᠭᠣ ᠲᠠᠢ ᠪᠣᠯᠵᠤ᠂ ᠵᠣᠴᠢᠨ ᠪᠣᠢ ᠴᠠᠭ ᠲᠤ᠌ ᠨᠠᠳᠠ ᠳ᠋ᠤ᠌ ᠶᠠᠭ ᠯᠠ ᠡᠵᠡᠨ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠦᠷᠡ ᠬᠣᠢᠴᠢ ᠳ᠋ᠤ᠌ ᠬᠠᠨᠳᠤᠵᠤ ᠪᠠᠢᠭᠠ ᠮᠡᠲᠦ ᠬᠠᠨᠳᠤᠨᠠ᠃ ᠬᠡᠷᠪᠡ ᠪᠢᠳᠡ ᠬᠣᠶᠠᠭᠤᠯᠠᠬᠠᠨ ᠪᠠᠢᠭᠠ ᠪᠣᠯ ᠨᠠᠮᠠᠶ᠋ᠢ ᠬᠦᠨᠳᠦᠯᠡᠬᠦ ᠬᠡᠮᠵᠢᠶᠡ ᠨᠢ ᠳᠣᠷᠣᠭᠰᠢᠯᠠᠵᠤ᠂ ᠨᠠᠳᠠ ᠳ᠋ᠤ᠌ ᠣᠯᠠᠨ ᠵᠦᠢᠯᠡᠰ ᠢ᠋ ᠪᠦᠷ ᠰᠤᠷᠬᠤ ᠬᠡᠷᠡᠭᠲᠡᠢ ᠭᠡᠮᠡᠨ ᠣᠢᠯᠠᠭᠠᠭᠤᠯᠤᠨᠠ᠃ ᠡᠢᠮᠦ ᠳ᠋ᠡᠭᠡᠨ ᠪᠢ ᠲᠡᠭᠦᠨ ᠢ᠋ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠵᠢᠭᠠᠳᠠᠭ ᠪᠠ ᠰᠦᠨᠡᠰᠦ ᠶ᠋ᠢ ᠮᠢᠨᠢ ᠳᠠᠭᠤᠳᠠᠳᠠᠭ 《ᠬᠦᠷᠦ》( ᠪᠠᠭᠰᠢ ) ᠭᠡᠮᠡᠨ ᠳᠠᠭᠤᠳᠠᠭᠰᠠᠨ ᠪᠥᠭᠡᠳ ᠲᠡᠷᠡ ᠴᠦ᠍ ᠪᠠᠭᠰᠢ ᠪᠣᠯᠤᠭᠰᠠᠨ ᠪᠠᠶᠠᠷ ᠢ᠋ᠶ᠋ᠠᠨ ᠮᠢᠨᠦ ᠪᠣᠭᠴᠣᠨ ᠠ᠋ᠴᠠ ᠣᠯᠤᠭᠰᠠᠨ ᠺᠤᠠᠨᠨᠠᠺ ᠠᠷᠢᠬᠢ ᠪᠠᠷ ᠪᠠᠶᠠᠷᠯᠠᠨ ᠲᠡᠮᠳᠡᠭᠯᠡᠭᠰᠡᠨ ᠪᠢᠯᠡ᠃
ᠪᠠᠰᠠ ᠶᠠᠮᠠᠷ ᠶᠠᠭᠤᠮᠠ ᠪᠢᠴᠢᠨᠡ ᠳᠡ᠂ ᠮᠢᠨᠦ ᠬᠠᠢᠷᠠᠲᠤ ᠵᠢᠵᠢᠭᠬᠡᠨ ᠽᠧᠦ ᠽᠧᠦ ᠮᠢᠨᠢ᠃ ᠮᠢᠨᠦ ᠮᠣᠩᠭᠣᠯ ᠳ᠋ᠤ᠌ ᠪᠠᠢᠭᠠ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠣᠭᠠᠯᠠᠰᠢ ᠦᠭᠡᠢ ᠣᠯᠠᠨ ᠰᠣᠨᠢᠨ ᠰᠠᠢᠬᠠᠨ ᠬᠡᠷᠡᠭ ᠤᠴᠢᠷ ᠲᠣᠬᠢᠶᠠᠯᠳᠤᠭᠰᠠᠭᠠᠷ ᠯᠠ ᠪᠠᠢᠨᠠ᠂ ᠭᠡᠬᠦ ᠳ᠋ᠦ᠍ ᠥᠨᠥᠳᠥᠷ ᠵᠠᠪᠠᠯ ᠠᠳᠠ ᠬᠦᠷᠦᠭᠡᠳ ᠳᠠᠭᠤᠰᠬᠠᠬᠤ ᠬᠡᠷᠡᠭᠲᠡᠢ ᠪᠣᠯᠤᠯᠠ᠃ ᠭᠠᠳᠠᠨᠠ ᠨᠢᠭᠡ ᠤᠯᠠᠭᠠᠴᠢ ᠵᠠᠬᠢᠶᠠ ᠶ᠋ᠢ ᠮᠢᠨᠢ ᠵᠠᠭᠤᠨ ᠭᠠᠵᠠᠷ ᠬᠣᠯᠠ ᠪᠠᠢᠭᠠ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠶ᠋ᠢᠨ ᠥᠷᠲᠡᠭᠡᠨ ᠳ᠋ᠦ᠍ ᠬᠦᠷᠭᠡᠨᠡ ᠭᠡᠮᠡᠨ ᠬᠦᠯᠢᠶᠡᠵᠦ ᠪᠠᠢᠨᠠ᠃ ᠲᠡᠨᠳᠡ ᠡᠴᠡ ᠠᠯᠢ ᠨᠢᠭᠡᠨ ᠡᠳᠦᠷ ᠰᠢᠤᠳᠠᠨ ᠳ᠋ᠤ᠌ ᠬᠦᠷᠭᠡᠨ ᠥᠭᠬᠦ ᠪᠣᠯᠤᠨᠠ᠃ ᠧᠦ᠋ᠷᠣᠫᠠ ᠶ᠋ᠢᠨ ᠪᠣᠯᠪᠠᠰᠤᠨ ᠠ᠋ᠴᠠ ᠡᠢᠮᠦ ᠬᠣᠯᠠ ᠪᠠᠢᠵᠤ ᠣᠯᠠᠨ ᠶᠠᠭᠤᠮᠠ ᠮᠡᠳᠡᠨ ᠰᠣᠨᠣᠰᠴᠤ ᠶᠠᠪᠤᠬᠤ ᠳ᠋ᠤ᠌ ᠰᠡᠳᠬᠢᠯ ᠳ᠋ᠦ᠍ ᠮᠢᠨᠢ ᠦᠨᠡᠬᠡᠷ ᠪᠠᠶᠠᠷ ᠪᠠᠬᠠᠳᠤᠯ ᠳᠦᠭᠦᠷᠡᠩ ᠪᠠᠢᠨᠠ ! ᠨᠡᠩ ᠨᠠᠮᠠᠶ᠋ᠢ ᠪᠠᠶᠠᠷᠯᠠᠭᠤᠯᠳᠠᠭ ᠨᠢ ᠠᠳᠠ ᠤᠲᠠᠰᠤ᠂ ᠴᠠᠬᠢᠯᠭᠠᠨ ᠭᠡᠵᠦ ᠨᠠᠮᠠᠶ᠋ᠢ ᠨᠥᠯᠥᠭᠡᠯᠡᠬᠦ ᠤᠴᠢᠷ ᠭᠡᠵᠦ ᠶᠡᠷᠦᠳᠡᠭᠡᠨ ᠠᠯᠠᠭᠠ᠃ ᠮᠢᠨᠦ ᠡᠮᠦᠨᠡ ᠡᠴᠡ ᠯᠧᠦ ᠯᠧᠦ ᠪᠣᠯᠤᠨ ᠶᠠᠨᠠ ᠳ᠋ᠤ᠌ ᠮᠡᠨᠳᠦ ᠳᠠᠮᠵᠢᠭᠤᠯᠤᠭᠠᠷᠠᠢ ! ᠪᠠᠰᠠ ᠨᠠᠮᠠᠶ᠋ᠢ ᠬᠦᠷᠬᠦ ᠪᠣᠯᠲᠠᠯᠠ ᠮᠣᠳᠣᠨ ᠫᠠᠢ ᠨᠠᠭᠠᠳᠬᠤ ᠳᠦᠷᠢᠮ ᠢ᠋ᠶ᠋ᠡᠨ ᠪᠤᠤ ᠮᠠᠷᠲᠠᠴᠢᠬᠠᠭᠠᠷᠠᠢ !
ᠴᠢᠮᠠ ᠳ᠋ᠤ᠌ ᠬᠠᠢᠷᠠᠲᠠᠢ ᠮᠣᠩᠭᠣᠯ ᠲᠡᠨᠡᠭ ᠡᠴᠡ ᠴᠢᠨᠢ