ᠰᠡᠷᠢᠭᠦᠬᠡᠨ ᠲᠠᠯᠠ ᠨᠤᠲᠤᠭ – <ᠰᠸᠢᠰ> ᠸᠠᠯᠲ᠋ᠸᠷ ᠪᠣᠰᠬᠠᠷᠳ᠋ - ᠳᠥᠷᠪᠡᠳᠦᠭᠡᠷ ᠪᠦᠯᠦᠭ᠂ ᠨᠠᠢ᠍ᠮᠠ ᠶᠢᠨ ᠠᠭᠤᠯᠠᠨ ᠳᠤ ᠁ (ᠬᠣᠶᠠᠷ) Сэрүүхэн тал нутаг–<свис> Вальтер Босгард (Walter Bosshard)- Дөрөвдүгээр бөлөг 2
392ᠬᠣᠶᠠᠷ ᠂ ᠨᠠᠷᠠᠨ ᠤᠯᠤᠰ ᠤ᠋ᠨ ᠰᠦᠯᠵᠢᠶᠡ ᠪᠠ ᠴᠠᠭᠠᠨ ᠪᠡᠭᠡᠯᠡᠢ
ᠪᠢᠳᠡ ᠲᠥᠯᠥᠪᠯᠡᠵᠦ ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ ᠬᠣᠵᠢᠮᠳᠠᠵᠤ ᠬᠥᠳᠡᠯᠪᠡ᠃ ᠤᠴᠢᠷ ᠨᠢ ᠨᠠᠮᠤᠭᠤᠬᠠᠨ ᠵᠠᠩ ᠲᠠᠢ ᠮᠥᠷᠲᠡᠭᠡᠨ ᠴᠢᠩ ᠦᠨᠡᠨᠴᠢ ᠾᠷᠢᠰᠲ᠋ᠣᠰ ᠤ᠋ᠨ ᠰᠦᠵᠢᠭᠲᠡᠨ ᠯᠠᠷᠰᠤᠨ ᠠᠪᠠᠭᠠᠢ ᠬᠣᠲᠠ ᠳ᠋ᠠᠬᠢ ᠭᠡᠷ ᠢ᠋ᠶ᠋ᠡᠨ ᠣᠨᠢᠰᠤᠯᠠᠬᠤ ᠠ᠋ᠴᠠ ᠡᠮᠦᠨᠡ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠶ᠋ᠢᠨ ᠬᠡᠦᠬᠡᠳ᠂ ᠨᠣᠬᠠᠳ ᠪᠠ ᠮᠣᠷᠢᠳ ᠲᠠᠢ ᠰᠠᠯᠬᠤ ᠶᠣᠰᠣ ᠭᠦᠢᠴᠡᠳᠬᠡᠭᠰᠡᠨ ᠶᠤᠮ᠃ ᠪᠢᠳᠡᠨ ᠢ᠋ ᠵᠢᠷᠭᠤᠭᠠᠨ ᠴᠠᠭ ᠲᠤ᠌ ᠮᠣᠷᠳᠠᠨ ᠭᠠᠷᠬᠤ ᠳ᠋ᠤ᠌ ᠯᠠᠷᠰᠤᠨ ᠠᠪᠤᠭᠠᠢ ᠠᠮᠠᠷᠠᠯᠲᠠ ᠪᠣᠯᠵᠤ ᠬᠥᠳᠡᠭᠡ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠶᠠᠭ ᠯᠠ ᠬᠡᠦᠬᠡᠳ ᠰᠢᠭ ᠬᠥᠭᠡᠷᠦᠨ ᠪᠠᠶᠠᠷᠯᠠᠵᠤ ᠪᠠᠢᠪᠠ᠃ ᠪᠣᠭᠣᠮᠲᠠ ᠳᠡᠭᠡᠷᠡ ᠮᠠᠰᠢᠨ ᠲᠡᠷᠭᠡᠨ ᠳ᠋ᠡᠭᠡᠨ ᠨᠢᠭᠡ ᠦᠨᠡᠮᠯᠡᠬᠦ ᠬᠢᠯᠭᠡᠵᠦ ᠠᠪᠤᠭᠠᠳ᠂ ᠫᠠᠰᠫᠣᠷᠲ ᠰᠢᠯᠭᠠᠭᠴᠢ ᠵᠣᠭᠰᠣᠵᠤ ᠪᠠᠢᠭᠠ ᠬᠣᠢᠲᠤ ᠡᠭᠦᠳᠡᠨ ᠵᠦᠭ ᠳᠠᠪᠬᠢᠭᠤᠯᠪᠠ᠃
ᠪᠢᠳᠡᠨ ᠳ᠋ᠦ᠍ ᠥᠭᠭᠦᠭᠰᠡᠨ ᠬᠡᠷᠡᠯᠳᠦᠵᠦ ᠦᠵᠡᠭᠳᠡᠮᠡᠷ ᠨᠢᠮᠭᠡᠬᠡᠨ ᠴᠠᠭᠠᠰᠤ ᠪᠠᠷ ᠬᠢᠭᠰᠡᠨ ᠦᠨᠡᠮᠯᠡᠬᠦ ᠪᠣᠯ ᠦᠨᠡᠨ ᠳ᠋ᠡᠭᠡᠨ ᠶᠣᠰᠣᠨ ᠲᠡᠳᠦᠢ ᠯᠡ ᠵᠦᠢᠯᠡᠰ ᠶᠦᠮ᠃ ᠬᠡᠨ ᠬᠡᠷᠪᠡ ᠡᠨᠡ ᠦᠨᠡᠮᠯᠡᠬᠦ ᠪᠠᠢᠬᠤ ᠦᠭᠡᠢ ᠪᠣᠯ ᠮᠥᠨ ᠡᠨᠡ ᠣᠢᠷᠠ ᠣᠷᠴᠢᠮ ᠤ᠋ᠨ ᠬᠥᠲᠥᠯ ᠲᠤᠯᠤᠭᠠᠳ ᠠ᠋ᠴᠠ ᠴᠠᠭᠠᠰᠢ ᠰᠡᠯᠡᠭᠦᠴᠡᠨ ᠲᠣᠭᠣᠷᠢᠵᠤ ᠪᠣᠯᠬᠤ ᠦᠭᠡᠢ ᠪᠥᠭᠡᠳ ᠬᠣᠲᠠ ᠶ᠋ᠢᠨ ᠭᠠᠳᠠᠨᠠ ᠠ᠋ᠴᠠ ᠠᠶᠠᠯᠠᠵᠤ ᠢᠷᠡᠪᠡᠯ ᠵᠠᠪᠠᠯ ᠬᠣᠲᠠ ᠶ᠋ᠢᠨ ᠭᠠᠳᠠᠨᠠ ᠮᠠᠰᠢᠨ ᠠ᠋ᠴᠠ ᠪᠠᠨ ᠪᠠᠭᠤᠬᠤ ᠬᠡᠷᠡᠭᠲᠡᠢ ᠶᠦᠮ᠃
ᠭᠡᠬᠦ ᠳ᠋ᠦ᠍ ᠬᠢᠲᠠᠳ ᠤ᠋ᠳ ᠡᠨᠡ ᠬᠦ᠌ ᠶᠣᠰᠣᠨ ᠲᠡᠳᠦᠢ ᠭᠠᠷ ᠭᠦᠢᠴᠡᠳᠬᠡᠯ ᠳ᠋ᠦ᠍ ᠶᠡᠬᠡ ᠳᠤᠷᠠᠲᠠᠢ ᠪᠠᠢᠳᠠᠭ᠃ ᠤᠴᠢᠷ ᠨᠢ ᠡᠨᠡ ᠨᠢ ᠲᠡᠳᠡᠨ ᠳ᠋ᠦ᠍ ᠨᠡᠷᠡ ᠨᠢᠭᠤᠷ ᠪᠣᠯᠤᠨ ᠣᠯᠵᠠ ᠣᠯᠭᠣᠵᠤ ᠥᠭᠳᠡᠭ ᠮᠥᠷᠲᠡᠭᠡᠨ ᠮᠥᠨ ᠡᠨᠡ ᠬᠣᠶᠠᠷ ᠵᠦᠢᠯ ᠪᠣᠯ ᠡᠨᠡ ᠤᠯᠤᠰ ᠲᠤ᠌ ᠳᠤᠲᠠᠭᠳᠠᠵᠤ ᠪᠣᠯᠣᠰᠢ ᠦᠭᠡᠢ ᠵᠦᠢᠯ ᠪᠢᠯᠡ᠃
ᠪᠢᠳᠡ ᠬᠣᠶᠠᠷ ᠮᠠᠰᠢᠨ ᠳ᠋ᠤ᠌ ᠬᠤᠪᠢᠶᠠᠭᠳᠠᠨ ᠰᠠᠭᠤᠪᠠ᠃ ᠨᠢᠭᠡ ᠮᠠᠰᠢᠨ ᠳ᠋ᠤ᠌ ᠯᠠᠷᠰᠤᠨ ᠬᠦᠩ ᠨᠥᠬᠥᠷ ᠭᠡᠷᠭᠡᠢ ᠬᠣᠶᠠᠭᠤᠯᠠ᠂ ᠴᠢᠯᠠᠭᠤᠨ ᠵᠢᠴᠢ ᠠᠴᠢᠶᠠ ᠪᠠᠢᠪᠠ᠃ ᠴᠢᠯᠠᠭᠤᠨ ᠭᠡᠳᠡᠭ ᠨᠢ ᠮᠣᠩᠭᠣᠯ ᠤ᠋ᠨ ᠨᠢᠭᠡᠨ ᠸᠠᠩ ᠤ᠋ᠨ ᠬᠥᠪᠡᠭᠦᠨ ᠪᠥᠭᠡᠳ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠤᠷᠳᠠᠭ᠂ ᠡᠳᠦᠭᠡ ᠲᠡᠷᠡ ᠵᠤᠨ ᠤ᠋ ᠴᠢᠯᠥᠭᠡ ᠪᠡᠷ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠪᠠᠢᠭᠠ ᠶᠤᠮ᠃ ᠲᠡᠷᠡ ᠵᠠᠯᠠᠭᠤ ᠵᠣᠪᠠᠭᠤᠷᠢᠲᠠᠢᠬᠠᠨ ᠬᠠᠷᠠᠴᠠ ᠲᠠᠢ ᠪᠠᠢᠭᠰᠠᠨ ᠪᠥᠭᠡᠳ ᠠᠩᠬᠠᠨ ᠤ᠋ ᠮᠣᠩᠭᠣᠯ ᠭᠡᠷ ᠵᠢᠴᠢ ᠪᠡᠯᠴᠢᠵᠦ ᠶᠠᠪᠤᠭᠠ ᠠᠳᠤᠭᠤᠨ ᠰᠦᠷᠦᠭ ᠢ᠋ ᠬᠠᠷᠠᠬᠤ ᠶ᠋ᠢᠨ ᠵᠡᠷᠭᠡ ᠨᠢᠳᠦ ᠨᠢ ᠳᠣᠣᠷᠠ ᠪᠠᠨ ᠬᠡᠷᠡᠯᠳᠦᠵᠦ᠂ ᠢᠨᠢᠶᠡᠨ ᠪᠠᠶᠠᠰᠤᠭᠠᠳ ᠪᠠᠷᠤᠭ ᠯᠠ ᠰᠡᠬᠡᠭᠦᠨ ᠵᠠᠩ ᠲᠠᠢ ᠭᠡᠵᠦ ᠬᠡᠯᠡᠵᠦ ᠴᠦ᠍ ᠪᠣᠯᠤᠮᠠᠷ ᠪᠣᠯᠤᠯᠠ᠃ ᠬᠥᠳᠡᠭᠡ ᠲᠠᠯᠠ ᠨᠢᠳᠦᠨ ᠡᠮᠦᠨᠡ ᠨᠢ ᠲᠣᠳᠣᠷᠠᠬᠤ ᠶ᠋ᠢᠨ ᠵᠡᠷᠭᠡ ᠲᠡᠭᠦᠨ ᠦ᠌ ᠭᠡᠷ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠬᠤ ᠰᠡᠳᠬᠢᠯ ᠢ᠋ ᠨᠢ ᠮᠠᠷᠲᠠᠭᠤᠯᠤᠭᠰᠠᠨ ᠶᠤᠮ ᠪᠠᠢᠨᠠ᠃
ᠰᠸᠷᠠᠤᠲᠤ ᠡᠨᠡ ᠮᠠᠰᠢᠨ ᠢ᠋ ᠵᠢᠯᠣᠭᠣᠳᠴᠤ ᠪᠠᠢᠭᠠ᠃ ᠲᠡᠷᠡ ᠴᠦ᠍ ᠮᠥᠨ ᠡᠬᠡ ᠨᠤᠲᠤᠭ ᠢ᠋ᠶ᠋ᠠᠨ ᠬᠠᠷᠠᠨᠠ ᠭᠡᠳ ᠰᠡᠳᠬᠢᠯ ᠳᠦᠭᠦᠷᠡᠩ ᠪᠠᠢᠯᠠ᠃ ᠲᠡᠷᠡ ᠪᠣᠯ ᠬᠣᠯᠠ ᠶᠠᠪᠤᠵᠤ᠂ ᠣᠯᠠᠨ ᠢ᠋ ᠦᠵᠡᠭᠰᠡᠨ ᠮᠣᠩᠭᠣᠯ ᠶᠤᠮ᠃ ᠰᠡᠸᠸᠨ ᠾᠸᠳᠢᠨ ᠲᠡᠢ ᠳᠤᠮᠳᠠᠳᠤ ᠠᠽᠢᠶᠠ ᠳ᠋ᠤ᠌ ᠬᠦᠷᠴᠦ ᠪᠠᠢᠭᠰᠠᠨ ᠪᠥᠭᠡᠳ ᠰᠡᠭᠦᠯᠡᠷ ᠨᠢ ᠪᠠᠰᠠ ᠠᠩᠭ᠌ᠯᠢ ᠶ᠋ᠢᠨ ᠡᠯᠴᠢᠨ ᠡᠷᠢᠺ ᠲᠸᠢᠢᠰᠢᠮᠠᠨ ᠠᠪᠤᠭᠠᠢ ᠲᠠᠢ ᠴᠣᠭ ᠺᠠᠱᠭᠠᠷ ᠬᠦᠷᠴᠦ᠂ ᠮᠥᠨ ᠲᠡᠨᠳᠡ ᠡᠴᠡ ᠾᠢᠮᠠᠯᠠᠶᠠ ᠠᠭᠤᠯᠠ ᠶ᠋ᠢ ᠳᠠᠪᠠᠨ ᠡᠨᠡᠳᠬᠡᠭ ᠢ᠋ᠶ᠋ᠡᠷ ᠳᠠᠮᠵᠢᠨ ᠳᠤᠮᠳᠠᠳᠤ ᠤᠯᠤᠰ ᠲᠤ᠌ ᠣᠩᠭᠣᠴᠠ ᠪᠠᠷ ᠢᠷᠡᠭᠰᠡᠨ ᠶᠦᠮ᠃ ᠬᠡᠷᠪᠡ ᠲᠡᠭᠦᠨ ᠡᠴᠡ ᠡᠨᠡᠳᠬᠡᠭ ᠡᠴᠡ ᠳᠤᠮᠳᠠᠳᠤ ᠤᠷᠤᠭᠤ ᠢᠷᠡᠭᠰᠡᠨ ᠳᠠᠯᠠᠢ ᠶ᠋ᠢᠨ ᠠᠶᠠᠯᠠᠯ ᠤ᠋ᠨ ᠲᠤᠬᠠᠢ ᠠᠰᠠᠭᠤᠪᠠᠯ ᠲᠡᠷᠡ ᠳᠣᠣᠷᠠ ᠪᠠᠨ ᠶᠠᠷᠢᠶᠠᠨ ᠠ᠋ᠴᠠ ᠬᠠᠯᠠᠰᠢᠷᠠᠨ ᠳᠤᠲᠠᠭᠠᠳᠠᠭ ᠪᠥᠭᠡᠳ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠭᠰᠠᠨ ᠳᠡᠭᠡᠷᠡ ᠪᠡᠨ ᠰᠠᠵᠢᠵᠤ 《ᠳᠠᠬᠢᠵᠤ ᠯᠠ ᠲᠡᠢᠮᠦ ᠶᠠᠭᠤᠮᠠᠨ ᠳ᠋ᠤ᠌ ᠰᠠᠭᠤᠬᠤ ᠦᠭᠡᠢ ! ᠲᠠᠯᠠ ᠨᠤᠲᠤᠭ ᠳᠡᠭᠡᠷᠡ ᠪᠡᠨ ᠭᠤᠷᠪᠠᠨ ᠰᠠᠷᠠ ᠡᠳᠦᠷ ᠰᠥᠨᠢ ᠦᠭᠡᠢ ᠮᠣᠷᠢᠨ ᠠ᠋ᠴᠠ ᠪᠠᠭᠤᠯ ᠦᠭᠡᠢ ᠳᠣᠪᠲᠣᠯᠤᠭᠰᠠᠨ ᠴᠤ᠌ ᠳᠠᠬᠢᠵᠤ ᠯᠠ ᠲᠡᠢᠮᠦ ᠲᠠᠢᠪᠠᠯᠵᠠᠭᠰᠠᠨ ᠣᠩᠭᠣᠴᠠᠨ ᠳᠡᠭᠡᠷᠡ ᠭᠠᠷᠴᠤ ᠠᠮᠢ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠲᠣᠭᠯᠠᠬᠤ ᠦᠭᠡᠢ 》ᠭᠡᠳᠡᠭ ᠪᠢᠯᠡ᠃
ᠡᠸᠷᠢᠺᠰᠦᠨ ᠨᠥᠭᠦᠭᠡ ᠮᠠᠰᠢᠨ ᠢ᠋ ᠨᠢ ᠵᠢᠯᠣᠭᠣᠳᠴᠤ᠂ ᠨᠠᠳᠠ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ ᠲᠡᠭᠦᠨ ᠦ᠌ ᠭᠡᠷ ᠪᠦᠯᠢ ᠶ᠋ᠢᠨ ᠬᠢᠨ ᠵᠢᠴᠢ ᠣᠯᠠᠨ ᠠᠷᠪᠢᠨ ᠴᠦᠩᠬᠦ ᠤᠭᠤᠲᠠ ᠪᠠᠷ ᠳᠦᠭᠦᠷᠭᠡᠵᠡᠢ᠃ ᠵᠠᠩᠪᠸᠢ ᠰᠢᠶᠠᠨ ᠳ᠋ᠤ᠌ ᠪᠢᠳᠡ ᠺᠠᠨᠠᠳᠠ ᠶ᠋ᠢᠨ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠶ᠋ᠢᠨ ᠥᠷᠲᠡᠭᠡᠨ ᠦ᠌ ᠬᠦᠷᠢᠶᠡᠨ ᠳ᠋ᠦ᠍ ᠳᠠᠪᠬᠢᠨ ᠣᠷᠣᠯᠠ᠃ ᠪᠢ ᠮᠠᠰᠢᠨ ᠠ᠋ᠴᠠ ᠪᠠᠭᠤᠵᠤ ᠬᠠᠮᠤᠭ ᠤ᠋ᠨ ᠤᠷᠢᠳ ᠵᠢᠵᠢᠭᠬᠡᠨ ᠵᠣᠴᠢᠨ ᠤ᠋ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠪᠠ᠃ ᠬᠠᠷᠠ ᠥᠩᠭᠡ ᠪᠡᠷ ᠬᠤᠪᠴᠠᠯᠠᠭᠰᠠᠨ ᠠᠪᠠᠭᠠᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠡᠩᠭᠡᠷ ᠦ᠋ᠨ ᠡᠮᠦᠨᠡ ᠪᠡᠨ ᠵᠥᠷᠢᠭᠦᠯᠦᠨ ᠭᠠᠷᠴᠤ ᠢᠷᠡᠭᠡᠳ ᠨᠠᠮᠠᠶ᠋ᠢ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠨ ᠰᠣᠴᠢᠭᠰᠠᠨ ᠮᠡᠲᠦ ᠬᠠᠷᠠᠪᠠ᠃
– ᠲᠠ ᠨᠠᠳᠠ ᠳ᠋ᠤ᠌ ᠵᠦᠭᠡᠷ ᠶᠠᠷᠢᠭᠠᠴᠢ ᠳᠠ! ᠪᠢ ᠲᠣᠭᠲᠠᠭᠤᠬᠠᠨ ᠪᠠᠢᠨᠠ ᠭᠡᠵᠦ ᠮᠡᠨᠳᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠡᠯᠡᠪᠡ᠃ ᠮᠢᠨᠦ ᠡᠮᠦᠨᠡ ᠠᠷᠠᠢ ᠨᠢᠭᠡ ᠮᠡᠳᠡᠷᠡᠯ ᠦ᠋ᠨ ᠡᠪᠡᠳᠴᠢᠨ ᠲᠡᠢ ᠬᠥᠮᠦᠨ ᠪᠠᠢᠭᠠ ᠪᠢᠰᠢ ᠪᠢᠵᠡ ᠭᠡᠬᠦ ᠪᠣᠳᠣᠯ ᠲᠠᠷᠢᠬᠢᠨ ᠳ᠋ᠤ᠌ ᠬᠢᠯᠠᠰᠬᠢᠪᠡ᠃ ᠲᠡᠭᠦᠨ ᠦ᠌ ᠶᠠᠷᠢᠶᠠ ᠶ᠋ᠢ ᠠᠩᠵᠠᠭᠠᠷᠠᠭᠰᠠᠨ ᠦᠭᠡᠢ ᠮᠡᠲᠦ ᠪᠡᠷ ᠪᠢ :
– ᠡᠷᠡ ᠨᠥᠬᠥᠷ ᠴᠢᠨᠢ ᠴᠦ᠍ ᠤᠳᠠᠯ ᠦᠭᠡᠢ ᠬᠦᠷᠴᠦ ᠢᠷᠡᠨᠡ᠂ ᠪᠢᠳᠡ ᠵᠠᠮ ᠳ᠋ᠠᠭᠠᠨ ᠠᠶᠠᠨᠴᠢᠳ ᠤ᠋ᠨ ᠮᠠᠰᠢᠨ ᠢ᠋ ᠳᠠᠭᠠᠷᠢᠨ ᠭᠠᠷᠤᠭᠰᠠᠨ ᠶᠤᠮ ᠭᠡᠯᠡ᠃
– ᠲᠡᠷᠡ ᠠᠮᠢᠳᠤ ᠪᠠᠢᠨᠠ ᠤᠤ ? ᠭᠡᠵᠦ ᠠᠪᠠᠭᠠᠢ ᠭᠠᠢᠬᠠᠨ ᠠᠰᠠᠭᠤᠪᠠ᠃
– ᠶᠠᠷᠢᠶᠠᠨ ᠦᠭᠡᠢ ᠠᠮᠢᠳᠤ ᠪᠠᠢᠭᠠ ᠰᠢᠲᠠ! ᠭᠡᠵᠦ ᠪᠢ ᠶᠠᠷᠢᠭᠠᠳ ᠡᠨᠡ ᠬᠦ᠌ ᠪᠠᠴᠢᠮ ᠪᠠᠢᠳᠠᠯ ᠢ᠋ ᠨᠠᠮᠳᠠᠭᠤᠯᠪᠠ᠃ ᠠᠪᠠᠭᠠᠢ ᠳᠣᠷᠣᠭᠰᠢ ᠪᠠᠨ ᠰᠠᠭᠤᠵᠤ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠤᠬᠢᠯᠠᠨ ᠢᠨᠢᠶᠡᠨ ᠶᠠᠷᠢᠯᠠ :
– ᠪᠢ ᠲᠡᠭᠦᠨ ᠦ᠌ ᠲᠥᠯᠥᠭᠡ ᠶᠣᠰᠣᠲᠠᠢ ᠶᠡᠬᠡ ᠠᠶᠤᠵᠤ ᠵᠣᠪᠠᠭᠰᠠᠨ᠃ ᠰᠥᠨᠢ ᠲᠤᠷᠰᠢ ᠪᠢ ᠤᠨᠲᠠᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ᠃ ᠲᠡᠭᠦᠨ ᠢ᠋ ᠬᠣᠶᠠᠷ ᠡᠳᠦᠷ ᠦ᠋ᠨ ᠡᠮᠦᠨᠡ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠶᠠᠪᠤᠭᠰᠠᠨ ᠤ᠋ ᠬᠣᠢᠨᠠ ᠶᠠᠫᠣᠨᠴᠤᠳ ᠬᠦᠷᠴᠦ ᠢᠷᠡᠭᠡᠳ ᠮᠠᠨ ᠤ᠋ ᠪᠦᠬᠦ ᠭᠡᠷ – ᠲᠣᠭᠣᠭᠠᠨ ᠭᠡᠷ᠂ ᠤᠨᠲᠠᠯᠭᠠ ᠶ᠋ᠢᠨ ᠥᠷᠥᠭᠡ ᠵᠢᠴᠢ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠲᠠᠯᠪᠢᠳᠠᠭ ᠥᠷᠥᠭᠡ ᠪᠠᠢᠰᠢᠩ ᠤ᠋ᠳ ᠢ᠋ ᠨᠡᠩᠵᠢᠨ ᠪᠠᠢᠴᠠᠭᠠᠪᠠ᠃ ᠲᠡᠳᠡ ᠴᠣᠬᠣᠮ ᠮᠠᠨ ᠠ᠋ᠴᠠ ᠶᠠᠭᠤ ᠠᠪᠤᠨᠠ ᠭᠡᠵᠦ ᠪᠠᠢᠬᠤ ᠶ᠋ᠢ ᠪᠢ ᠮᠡᠳᠡᠬᠦ ᠦᠭᠡᠢ ᠳᠡ᠃ ᠲᠡᠳᠡᠨ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠰᠡᠳᠬᠢᠯ ᠮᠢᠨᠢ ᠶᠡᠷᠦ ᠡᠴᠡ ᠲᠣᠭᠲᠠᠭᠤᠨ ᠪᠠᠢᠵᠤ ᠦᠵᠡᠭᠡ ᠦᠭᠡᠢ᠃
ᠡᠨᠡ ᠬᠣᠭᠣᠷᠣᠨᠳᠣ ᠮᠠᠨ ᠤ᠋ ᠬᠠᠮᠲᠤ ᠠᠶᠠᠯᠠᠭᠰᠠᠳ ᠴᠤ᠌ ᠣᠷᠣᠵᠤ ᠢᠷᠡᠵᠡᠭᠡᠪᠡ᠃
– ᠲᠡᠭᠦᠨ ᠳ᠋ᠦ᠍ ᠦᠨᠡᠬᠡᠷ ᠶᠠᠮᠠᠷ ᠨᠢᠭᠡᠨ ᠤᠴᠢᠷ ᠲᠣᠬᠢᠶᠠᠯᠳᠤᠭᠠ ᠦᠭᠡᠢ ᠪᠢᠵᠡ ᠭᠡᠵᠦ ᠲᠡᠷᠡ ᠠᠪᠠᠭᠠᠢ ᠠᠬᠢᠨ ᠨᠢᠭᠡ ᠤᠳᠠᠭᠠ ᠯᠠᠪᠯᠠᠵᠤ ᠠᠰᠠᠭᠤᠭᠰᠠᠨ ᠪᠥᠭᠡᠳ ᠨᠠᠮᠠᠶ᠋ᠢ ᠲᠡᠭᠦᠨ ᠳ᠋ᠦ᠍ ᠮᠠᠭᠤ ᠴᠢᠮᠡᠭᠡ ᠬᠦᠷᠭᠡᠬᠦ ᠪᠡᠷ ᠢᠷᠡᠭᠰᠡᠨ ᠡᠯᠴᠢᠨ ᠰᠠᠢᠳ ᠤ᠋ᠨ ᠶᠠᠮᠤᠨ ᠤ᠋ ᠠᠵᠢᠯᠲᠠᠨ ᠭᠡᠵᠦ ᠢᠲᠡᠭᠡᠵᠦ ᠪᠠᠢᠭᠰᠠᠨ ᠪᠣᠯᠤᠯᠲᠠᠢ᠃
ᠬᠠᠭᠠᠰ ᠴᠠᠭ ᠤ᠋ᠨ ᠳᠠᠷᠠᠭᠠ ᠲᠡᠭᠦᠨ ᠦ᠌ ᠡᠷᠡ ᠨᠥᠬᠥᠷ ᠨᠢ ᠡᠷᠡᠭᠦᠯ ᠰᠠᠷᠠᠭᠤᠯ ᠬᠠᠷᠢᠵᠤ ᠢᠷᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠠᠪᠠᠭᠠᠢ ᠪᠠᠶᠠᠷ ᠪᠠᠶᠠᠰᠬᠤᠯᠠᠩᠲᠠᠢ ᠪᠣᠯᠪᠠ᠃ ᠲᠡᠷᠡ ᠺᠠᠨᠠᠳᠠ ᠡᠷᠡ ᠶᠠᠫᠣᠨᠴᠤᠳ ᠤ᠋ᠨ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠨᠡᠯᠢᠶᠡᠳ ᠵᠣᠪᠠᠵᠤ᠂ ᠳᠠᠭᠤ ᠦᠭᠡᠢ ᠪᠣᠳᠣᠯᠭᠠᠰᠢᠷᠠᠨ ᠥᠷᠥᠭᠡᠨ ᠦ᠌ ᠪᠤᠯᠤᠩ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠠᠳᠠ ᠤᠷᠤᠭᠤ ᠬᠠᠨᠳᠤᠨ :
– ᠲᠠ ᠠᠶᠤᠯ ᠲᠠᠢ ᠪᠠᠢᠨᠠ ᠰᠢᠦ! ᠵᠢᠯ ᠦ᠋ᠨ ᠡᠮᠦᠨᠡ ᠬᠣᠣᠷᠯᠠᠭᠳᠠᠭᠰᠠᠨ ᠭᠠᠷᠷᠸᠲ ᠵᠤᠨ᠋ᠸᠰ ᠢ᠋ ᠪᠣᠳᠣᠭᠠᠴᠢ ᠳᠠ᠃ ᠮᠣᠩᠭᠣᠯᠴᠤᠳ ᠴᠢᠨᠦ ᠠᠮᠠᠷᠠᠯᠲᠠ ᠪᠠᠷ ᠢᠷᠡᠭᠰᠡᠨ ᠡᠨᠡ ᠤᠴᠢᠷ ᠢ᠋ ᠴᠢᠨᠢ ᠭᠠᠵᠠᠷ ᠪᠣᠯᠭᠠᠨ ᠳ᠋ᠤ᠌ ᠮᠡᠳᠡᠭᠡᠯᠡᠵᠦ ᠣᠷᠬᠢᠨᠠ ᠰᠢᠦ! ᠭᠡᠵᠦ ᠬᠡᠯᠡᠯᠡ᠃
ᠫᠠᠪᠯᠣ᠋ ᠪᠣᠯᠤᠨ ᠫᠢᠸᠦ᠋ᠯ ᠺᠸᠯᠯᠸᠷ ᠲᠡᠢ ᠲᠣᠭᠲᠠᠭᠤᠨ ᠪᠤᠰᠤ ᠨᠢᠭᠡ ᠰᠥᠨᠢ ᠶ᠋ᠢ ᠥᠩᠭᠡᠷᠡᠭᠦᠯᠵᠦ ᠪᠠᠢᠭᠰᠠᠨ ᠵᠢᠵᠢᠭᠬᠡᠨ ᠬᠣᠲᠠ ᠵᠠᠪᠰᠠᠷ ᠢ᠋ ᠠᠬᠢᠨ ᠲᠠᠨᠢᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠪᠣᠯᠵᠠᠢ᠃ ᠵᠢᠯ ᠬᠠᠭᠠᠰ ᠤ᠋ᠨ ᠬᠣᠭᠣᠷᠣᠨᠳᠣ ᠲᠡᠷᠡ ᠨᠢ ᠬᠢᠯᠢ ᠬᠢᠵᠠᠭᠠᠷ ᠨᠢ ᠲᠡᠢᠮᠦ ᠰᠠᠢᠨ ᠲᠣᠳᠣᠷᠬᠠᠢ ᠪᠢᠰᠢ ᠨᠢᠭᠡᠨ ᠤᠯᠤᠰ ᠤ᠋ᠨ ᠲᠦᠷ ᠴᠠᠭ ᠤ᠋ᠨ ᠨᠡᠢᠰᠯᠡᠯ ᠪᠣᠯᠵᠠᠢ᠃ ᠣᠳᠣ ᠨᠢᠭᠡᠨ ᠥᠷᠭᠡᠨ ᠳᠠᠷᠳᠠᠩ ᠵᠠᠮ ᠡᠨᠡ ᠬᠦ᠌ ᠬᠣᠲᠠ ᠶ᠋ᠢ ᠳᠠᠭᠠᠷᠢᠨ ᠭᠠᠷᠬᠤ ᠪᠣᠯᠵᠠᠢ᠃ ᠵᠠᠮ ᠤ᠋ᠨ ᠬᠣᠶᠠᠷ ᠬᠠᠵᠠᠭᠤ ᠪᠠᠷ ᠵᠠᠰᠠᠵᠤ ᠴᠢᠮᠡᠭᠯᠡᠭᠰᠡᠨ ᠨᠢᠭᠤᠷ ᠲᠠᠢ᠂ ᠠᠷᠤ ᠲᠠᠯᠠ ᠶ᠋ᠢ ᠨᠢ ᠬᠠᠭᠠᠰ ᠳᠤᠲᠠᠭᠤ ᠳᠥᠩᠭᠡᠵᠦ ᠪᠠᠷᠢᠭᠰᠠᠨ ᠬᠢᠲᠠᠳ ᠪᠠᠢᠰᠢᠩ ᠤ᠋ᠳ ᠦᠷᠭᠦᠯᠵᠢᠯᠡᠨᠡ᠃
ᠯᠠᠷᠰᠤᠨ ᠬᠦᠩ ᠨᠠᠢᠵᠠᠯᠠᠭᠰᠠᠨ ᠨᠢᠭᠡ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠪᠠᠢᠰᠢᠩ ᠤ᠋ᠨ ᠡᠮᠦᠨᠡ ᠮᠠᠰᠢᠨ ᠢ᠋ᠶ᠋ᠠᠨ ᠵᠣᠭᠰᠣᠭᠠᠪᠠ᠃ ᠨᠢᠭᠡ ᠪᠦᠯᠦᠭ ᠠᠯᠪᠠᠲᠠᠨ ᠪᠣᠯᠤᠨ ᠴᠠᠭᠳᠠᠭᠠ ᠶᠠᠭ ᠯᠠ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠳᠡᠭᠡᠷᠡᠬᠢ ᠬᠣᠪᠳᠣᠭ ᠰᠢᠨᠤᠬᠠᠢ ᠵᠣᠯᠢᠭ ᠤ᠋ᠳ ᠮᠡᠲᠦ ᠪᠢᠳᠡᠨ ᠦ᠌ ᠵᠦᠭ ᠠᠪᠠᠭᠠᠷᠠᠯᠳᠤᠨ ᠢᠷᠡᠯᠡ᠃ ᠠᠩᠬᠠᠨ ᠤ᠋ ᠬᠠᠷᠠᠴᠠᠨ ᠳ᠋ᠤ᠌ ᠲᠡᠳᠡᠭᠡᠷ ᠬᠥᠮᠦᠰ ᠦ᠋ᠨ ᠬᠤᠪᠴᠠᠰᠤ ᠵᠠᠰᠠᠯ ᠨᠢ ᠢᠯᠡᠬᠡᠨ ᠬᠠᠷᠠᠭᠳᠠᠵᠤ᠂ ᠵᠡᠭᠦᠭᠰᠡᠨ ᠰᠡᠯᠡᠮᠡ ᠪᠠ ᠴᠡᠷᠢᠭ ᠦ᠋ᠨ ᠮᠠᠯᠠᠭᠠᠢ ᠨᠢ ᠶᠠᠫᠣᠨ ᠤ᠋ ᠵᠢᠵᠢᠭᠬᠡᠨ ᠭᠠᠷᠠᠮ ᠤ᠋ᠳ ᠢ᠋ ᠰᠠᠨᠠᠭᠳᠠᠭᠤᠯᠬᠤ ᠠᠵᠢ᠃ ᠶᠠᠫᠣᠨ ᠳ᠋ᠤ᠌ ᠴᠤ᠌ ᠡᠳᠡᠭᠡᠷ ᠵᠡᠪᠰᠡᠭ ᠨᠢ ᠶᠡᠬᠡ ᠢᠨᠢᠶᠡᠳᠦᠮᠲᠡᠢ ᠰᠠᠨᠠᠭᠳᠠᠵᠤ ᠪᠠᠢᠭᠰᠠᠨ ᠪᠣᠯ ᠡᠨᠡ ᠬᠦ᠌ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠵᠠᠮ ᠳᠡᠭᠡᠷᠡᠬᠢ ᠲᠣᠭᠣᠰᠣ ᠰᠢᠷᠣᠢ ᠲᠠᠢ ᠵᠡᠭᠡᠯᠢ ᠳᠡᠭᠡᠷᠡ ᠬᠡᠳᠦᠨ ᠬᠥᠭᠡᠷᠦᠬᠦᠢ ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠳᠤᠮᠳᠠ ᠲᠡᠳᠡᠭᠡᠷ ᠤᠷᠲᠤ ᠰᠡᠯᠡᠮᠡ ᠨᠢ ᠨᠡᠩ ᠬᠥᠭᠡᠷᠦᠬᠦᠢᠯᠡᠯᠲᠡᠢ ᠬᠠᠷᠠᠭᠳᠠᠨᠠ ᠠᠵᠢ᠃ ᠭᠡᠬᠦ ᠳ᠋ᠦ᠍ ᠵᠡᠭᠦᠭᠰᠡᠨ ᠡᠵᠡᠨ ᠨᠢ ᠡᠳᠡᠭᠡᠷ ᠡᠷᠬᠡ ᠰᠦᠷ ᠦ᠋ᠨ ᠪᠡᠯᠭᠡ ᠲᠡᠮᠳᠡᠭ ᠪᠣᠯᠤᠭᠰᠠᠨ ᠰᠡᠯᠡᠮᠡ ᠳ᠋ᠡᠭᠡᠨ ᠣᠮᠣᠭᠰᠢᠯᠲᠠᠢ ᠪᠠᠢᠭᠠ ᠨᠢ ᠢᠯᠡᠬᠡᠨ ᠮᠡᠳᠡᠭᠳᠡᠵᠦ ᠪᠠᠢᠯᠠ᠃
ᠡᠳᠡᠭᠡᠷ ᠰᠢᠨᠡ ᠪᠡᠷ ᠪᠣᠯᠪᠠᠰᠤᠷᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠴᠠᠭᠳᠠᠭᠠ ᠨᠠᠷ ᠲᠤ᠌ ᠪᠢ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠪᠠᠨ ᠭᠠᠷᠳᠠᠭᠤᠯᠬᠤ ᠶ᠋ᠢᠨ ᠵᠡᠷᠭᠡ ᠨᠡᠷᠡ᠂ ᠠᠵᠢᠯ᠂ ᠬᠠᠮᠢᠭᠠ ᠠ᠋ᠴᠠ ᠢᠷᠡᠵᠦ ᠶᠠᠪᠤᠭᠠ ᠵᠢᠴᠢ ᠬᠠᠮᠢᠭᠠ ᠣᠴᠢᠬᠤ ᠭᠡᠵᠦ ᠪᠠᠢᠭᠠ ᠭᠡᠬᠦ ᠮᠡᠲᠦ ᠪᠡᠷ ᠲᠡᠳᠡᠨ ᠦ᠌ ᠠᠰᠠᠭᠤᠭᠰᠠᠨ ᠢ᠋ ᠬᠠᠷᠢᠭᠤᠯᠵᠤ ᠪᠠᠢᠪᠠ᠃ ᠢᠩᠭᠢᠭᠡᠳ ᠲᠡᠳᠡ ᠠᠩᠬᠠ ᠠᠯᠬᠤᠮ ᠰᠡᠳᠬᠢᠯ ᠬᠠᠨᠤᠮᠵᠢᠲᠠᠢ ᠪᠣᠯᠬᠤ ᠦᠶᠡ ᠳ᠋ᠦ᠍ ᠲᠣᠭᠠᠯᠠᠰᠢ ᠦᠭᠡᠢ ᠣᠯᠠᠨ ᠨᠢᠴᠦᠭᠦᠨ ᠱᠠᠯᠳᠠᠩ ᠬᠠᠯᠲᠠᠷ ᠬᠡᠦᠬᠡᠳ᠂ ᠮᠣᠩᠭᠣᠯᠴᠤᠳ ᠪᠠ ᠬᠢᠲᠠᠳ ᠤ᠋ᠳ ᠴᠤᠭᠯᠠᠷᠠᠨ ᠢᠷᠡᠵᠦ ᠮᠠᠰᠢᠨ ᠢ᠋ ᠲᠣᠭᠣᠷᠢᠨ ᠵᠣᠭᠰᠣᠵᠠᠭᠠᠪᠠ᠃
ᠪᠢᠳᠡᠨ ᠢ᠋ ᠥᠨᠳᠡᠭᠡ ᠬᠤᠳᠠᠯᠳᠤᠨ ᠠᠪᠴᠤ ᠪᠠᠢᠬᠤ ᠵᠠᠭᠤᠷᠠ ᠲᠣᠰᠬᠣᠨ ᠤ᠋ ᠨᠥᠭᠦᠭᠡ ᠲᠠᠯᠠ ᠠ᠋ᠴᠠ ᠨᠠᠢ᠍ᠮᠠᠨ ᠮᠠᠰᠢᠨ ᠲᠡᠷᠭᠡ ᠰᠢᠯ ᠢ᠋ᠶ᠋ᠡᠨ ᠭᠢᠯᠠᠯᠵᠠᠭᠤᠯᠤᠨ ᠭᠠᠷᠴᠤ ᠢᠷᠡᠪᠡ᠃ ᠡᠬᠢᠨ ᠦ᠌ ᠬᠣᠶᠠᠷ ᠮᠠᠰᠢᠨ ᠳ᠋ᠤ᠌ ᠶᠠᠫᠣᠨ ᠣᠹᠢᠼᠧᠷ ᠦ᠋ᠳ ᠰᠠᠭᠤᠵᠤ᠂ ᠭᠤᠷᠪᠠᠳᠠᠬᠢ ᠮᠠᠰᠢᠨ ᠳᠡᠭᠡᠷᠡ ᠨᠢ ᠤᠯᠠᠭᠠᠨ ᠰᠢᠷᠠ ᠴᠠᠭᠠᠨ ᠵᠢᠷᠤᠭᠠᠰᠤ ᠲᠠᠢ ᠵᠢᠵᠢᠭᠬᠡᠨ ᠬᠥᠬᠡ ᠳᠠᠯᠪᠠᠭᠠ ᠳᠡᠷᠪᠡᠯᠵᠡᠵᠦ᠂ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠭᠢᠰᠬᠢᠭᠦᠷ ᠳᠡᠭᠡᠷᠡ ᠨᠢ ᠲᠤᠰ ᠪᠦᠷᠢ ᠭᠠᠷ ᠫᠤᠤ ᠠᠳᠬᠤᠭᠰᠠᠨ ᠴᠡᠷᠢᠭ ᠵᠣᠭᠰᠣᠵᠠᠢ᠃ ᠮᠠᠰᠢᠨ ᠳᠣᠲᠣᠷᠠ ᠨᠢ ᠰᠥᠨᠢᠳ ᠸᠠᠩ ᠲᠡᠷᠡ ᠪᠡᠶᠡ ᠪᠡᠷ ᠪᠠᠢᠭᠠ ᠨᠢ ᠲᠠᠨᠢᠭᠳᠠᠵᠤ᠂ ᠲᠡᠷᠡ ᠴᠦ᠍ ᠮᠥᠨ ᠨᠠᠮᠠᠶ᠋ᠢ ᠣᠯᠵᠤ ᠬᠠᠷᠠᠭᠰᠠᠨ ᠪᠥᠭᠡᠳ ᠥᠩᠭᠡᠷᠡᠵᠦ ᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠠᠬᠢᠨ ᠨᠢᠭᠡ ᠤᠳᠠᠭᠠ ᠡᠷᠭᠢᠨ ᠬᠠᠷᠠᠯᠠ᠃ ᠬᠥᠮᠦᠰ ᠦ᠋ᠨ ᠶᠠᠷᠢᠬᠤ ᠪᠠᠷ ᠨᠢᠰᠬᠡᠯ ᠦ᠋ᠨ ᠪᠠᠭᠤᠳᠠᠯ ᠳ᠋ᠤ᠌ ᠬᠦᠷᠴᠦ᠂ ᠶᠠᠫᠣᠨ ᠤ᠋ ᠨᠢᠭᠡ ᠲᠣᠮᠣ ᠨᠣᠶᠠᠨ ᠢ᠋ ᠤᠭᠲᠤᠬᠤ ᠶᠤᠮ ᠭᠡᠨᠡ᠃ ᠯᠠᠷᠰᠤᠨ ᠬᠦᠩ ᠦ᠋ᠨ ᠶᠠᠷᠢᠯᠴᠠᠭᠠ ᠪᠠᠷᠠᠬᠤ ᠶ᠋ᠢ ᠬᠦᠯᠢᠶᠡᠨ᠂ ᠪᠢᠳᠡ ᠬᠢᠳᠡᠯ ᠦᠭᠡᠢ ᠡᠢᠰᠢ ᠲᠡᠢᠰᠢ ᠡᠷᠭᠢᠴᠡᠨ ᠪᠠᠢᠲᠠᠯᠠ ᠵᠡᠪᠰᠡᠭᠯᠡᠭᠰᠡᠨ ᠭᠤᠷᠪᠠᠨ ᠬᠢᠲᠠᠳ ᠴᠡᠷᠢᠭ ᠲᠡᠢ ᠳᠠᠭᠠᠷᠢᠯᠳᠤᠵᠤ᠂ ᠪᠠᠰᠠ ᠯᠠ ᠠᠰᠠᠭᠤᠵᠤ ᠡᠬᠢᠯᠡᠯᠡ᠃ ᠪᠢ ᠲᠡᠳᠡᠨ ᠳ᠋ᠦ᠍ ᠮᠥᠨ ᠨᠡᠷᠡ ᠶ᠋ᠢᠨ ᠬᠠᠭᠤᠳᠠᠰᠤ ᠪᠠᠨ ᠥᠭᠭᠦᠭᠡᠳ ᠯᠠᠷᠰᠤᠨ ᠬᠦᠩ ᠦ᠋ᠨ ᠪᠠᠢᠭᠠ ᠪᠠᠢᠰᠢᠩ ᠤᠷᠤᠭᠤ ᠢᠯᠡᠭᠡᠪᠡ᠃ ᠨᠡᠯᠢᠶᠡᠳ ᠤᠳᠠᠭᠠᠳ ᠲᠡᠳᠡ ᠭᠠᠷᠴᠤ ᠢᠷᠡᠭᠰᠡᠨ ᠯᠠᠷᠰᠤᠨ ᠬᠦᠩ ᠢ᠋ ᠳᠤᠮᠳᠠ ᠪᠠᠨ ᠠᠪᠤᠨ ᠶᠠᠭ ᠯᠠ ᠶᠠᠯᠠᠲᠠᠨ ᠢ᠋ ᠬᠦᠷᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠴᠠᠭᠳᠠᠭᠠᠨ ᠤ᠋ ᠭᠠᠵᠠᠷ ᠵᠦᠭ ᠶᠠᠪᠤᠯᠠ᠃
ᠵᠣᠯ ᠢ᠋ᠶ᠋ᠠᠷ ᠯᠠᠷᠰᠤᠨ ᠬᠦᠩ ᠪᠣᠯᠤᠨ ᠶᠠᠫᠣᠨ ᠴᠠᠭᠳᠠᠭᠠᠨ ᠳᠠᠷᠤᠬᠠ ᠶ᠋ᠢᠨ ᠶᠠᠷᠢᠯᠴᠠᠭᠠ ᠨᠢ ᠲᠡᠢᠮᠦ ᠤᠷᠲᠤ ᠦᠷᠭᠦᠯᠵᠢᠯᠡᠭᠡ ᠦᠭᠡᠢ᠃ ᠲᠡᠷᠡ ᠴᠠᠭᠳᠠᠭᠠᠨ ᠳᠠᠷᠤᠭᠠ ᠶ᠋ᠢᠨ ᠳᠣᠷᠴᠤ ᠲᠡᠭᠡᠭᠯᠡᠭᠰᠡᠨ ᠬᠢᠲᠠᠳ ᠬᠡᠯᠡ ᠪᠡᠷ ᠯᠠᠷᠰᠤᠨ ᠬᠦᠩ ᠳ᠋ᠦ᠍ ᠡᠬᠢᠯᠡᠨ ᠶᠠᠷᠢᠬᠤ ᠳ᠋ᠤ᠌ ᠬᠠᠷᠢᠭᠤ ᠳ᠋ᠤᠨᠢ ᠯᠠᠷᠰᠤᠨ :
– ᠲᠠ ᠨᠠᠷ ᠨᠠᠳᠠ ᠲᠠᠢ ᠡᠨᠳᠡᠬᠢ ᠤᠯᠤᠰ ᠤ᠋ᠨ ᠬᠡᠯᠡ ᠪᠡᠷ ᠶᠠᠷᠢᠬᠤ ᠦᠭᠡᠢ ᠤᠤ ? ᠪᠢ ᠮᠣᠩᠭᠣᠯ ᠳ᠋ᠤ᠌ ᠪᠠᠢᠬᠤ ᠳ᠋ᠠᠭᠠᠨ ᠬᠢᠲᠠᠳ ᠦᠭᠡ ᠶᠠᠷᠢᠳᠠᠭ ᠦᠭᠡᠢ ᠰᠢᠦ ᠭᠡᠯᠡ᠃ ᠶᠠᠫᠣᠨ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠢ᠋ᠶ᠋ᠠᠨ ᠴᠠᠭᠠᠰᠢ ᠪᠠᠨ ᠣᠷᠴᠢᠭᠤᠯᠤᠭᠴᠢ ᠲᠠᠭᠤᠲᠠᠯᠠ᠃
– ᠲᠠ ᠬᠠᠮᠢᠭᠠ ᠠ᠋ᠴᠠ ᠢᠷᠡᠵᠦ ᠪᠠᠢᠨᠠ ?
– ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠠ᠋ᠴᠠ᠃
– ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠨᠠ ᠭᠡᠵᠦ ᠪᠠᠢᠨᠠ ?
– ᠭᠡᠷ ᠲᠡᠭᠡᠨ ᠬᠠᠷᠢᠨᠠ᠃
– ᠭᠡᠷ ᠲᠡᠭᠡᠨ ᠬᠠᠷᠢᠨᠠ ? ᠶᠠᠭᠤ ᠭᠡᠵᠦ ᠭᠡᠷ ᠲᠡᠭᠡᠨ ᠬᠠᠷᠢᠨᠠ ᠭᠡᠳᠡᠭ ᠪᠣᠢ ?
– ᠪᠢ ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ ᠳ᠋ᠦ᠍ ᠠᠮᠢᠳᠤᠷᠠᠳᠠᠭ᠃ ᠲᠠ ᠬᠠᠮᠢᠭᠠ ᠪᠠᠢᠭᠠ ᠶ᠋ᠢ ᠨᠢ ᠮᠡᠳᠡᠵᠦ ᠪᠠᠢᠭᠠ ᠪᠢᠵᠡ ᠳᠡ?
– ᠲᠡᠢᠮᠦ᠂ ᠲᠡᠭᠡᠭᠡᠳ ᠲᠠᠨ ᠤ᠋ ᠠᠯᠳᠠᠷ ?
– ᠪᠢ ᠯᠠᠷᠰᠤᠨ ᠭᠡᠳᠡᠭ᠃
– ᠯᠠᠷᠰᠤᠨ ᠬᠦᠩ ᠤᠤ ? ᠭᠡᠳ ᠲᠡᠷᠡ ᠬᠦᠨᠳᠦᠳᠬᠡᠭᠰᠡᠨ ᠮᠡᠲᠦ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠥᠨᠳᠡᠢᠨ ᠪᠣᠰᠪᠠ᠃
– ᠪᠢ ᠮᠥᠨ ᠪᠠᠢᠨᠠ᠃ ᠲᠡᠭᠡᠭᠡᠳ ᠣᠳᠣ ᠲᠠᠨ ᠢ᠋ ᠬᠡᠨ ᠭᠡᠳᠡᠭ ᠢ᠋ ᠠᠰᠠᠭᠤᠵᠤ ᠪᠣᠯᠬᠤ ᠤᠤ ?
ᠲᠡᠷᠡ ᠶᠠᠫᠣᠨ ᠢᠩᠭᠢᠵᠦ ᠠᠰᠠᠭᠤᠭᠰᠠᠨ ᠳ᠋ᠤᠨᠢ ᠶᠡᠬᠡᠳᠡ ᠰᠣᠴᠢᠨ᠂ ᠡᠨᠡ ᠰᠦᠷᠡᠬᠡᠢ ᠦᠯᠢᠭᠡᠷ ᠳᠣᠮᠣᠭ ᠲᠠᠢ ᠬᠥᠮᠦᠨ ᠡᠮᠦᠨᠡ ᠨᠢ ᠵᠣᠭᠰᠣᠵᠤ ᠪᠠᠢᠬᠤ ᠪᠠᠨ ᠮᠡᠳᠡᠵᠦ᠂ ᠠᠭᠤᠴᠢᠯᠠᠯ ᠬᠦᠰᠡᠭᠰᠡᠨ ᠠᠶᠠᠰ ᠲᠠᠢ ᠪᠠᠷ᠄
– ᠡᠨᠡ ᠴᠢᠨᠢ ᠡᠨᠳᠡᠭᠦᠦ ᠣᠢᠯᠠᠭᠠᠭᠰᠠᠨ ᠠ᠋ᠴᠠ ᠪᠣᠯᠵᠠᠢ᠂ ᠠᠭᠤᠴᠢᠯᠠᠭᠠᠷᠠᠢ ! ᠭᠡᠮᠡᠨ ᠪᠥᠬᠥᠢᠯᠡ᠃ ᠲᠡᠷᠡ ᠶᠡᠬᠡ ᠰᠠᠨᠳᠤᠷᠤᠭᠰᠠᠨ ᠠ᠋ᠴᠠ ᠪᠣᠯᠵᠤ᠂ ᠣᠨᠳᠣᠣ ᠠᠶᠠᠨᠴᠢᠳ ᠢᠯᠠᠩᠭᠤᠶᠠ ᠨᠠᠮᠠᠶ᠋ᠢ ᠠᠰᠠᠭᠤᠨ ᠰᠢᠯᠭᠠᠬᠤ ᠪᠠᠨ ᠴᠤ᠌ ᠮᠠᠷᠲᠠᠵᠠᠢ᠃ ᠮᠥᠨ ᠢᠩᠭᠢᠭᠡᠳ ᠪᠢ ᠶᠠᠫᠣᠨᠴᠤᠳ ᠤ᠋ᠨ ᠨᠡᠬᠡᠭᠰᠡᠨ ᠬᠢᠨᠠᠯᠲᠠ ᠶ᠋ᠢᠨ ᠨᠠᠷᠢᠨ ᠰᠦᠯᠵᠢᠶᠡ ᠲᠣᠣᠷ ᠠ᠋ᠴᠠ ᠮᠤᠯᠲᠤᠷᠠᠨ ᠭᠠᠷᠴᠤ᠂ 1936 ᠣᠨ ᠳ᠋ᠤ᠌ ᠴᠣᠷ ᠤ᠋ᠨ ᠭᠠᠭᠴᠠ ᠧᠦ᠋ᠷᠣᠫᠠ ᠬᠥᠮᠦᠨ ᠦ᠌ ᠬᠤᠪᠢ ᠪᠠᠷ 《ᠡᠮᠦᠨᠡ ᠹᠷᠣᠨᠲ》 ᠤ᠋ᠨ ᠴᠠᠭᠠᠳᠤ ᠲᠠᠯᠠ ᠳ᠋ᠤ᠌ ᠭᠠᠷᠴᠤ᠂ ᠶᠠᠫᠣᠨ ᠵᠥᠪᠯᠡᠭᠴᠢᠳ ᠦ᠋ᠨ ᠰᠥᠨᠢᠳ ᠸᠠᠩ ᠢ᠋ ᠰᠢᠬᠠᠮᠳᠠᠭᠤᠯᠤᠨ ᠬᠢᠵᠦ ᠪᠠᠢᠭᠠ ᠨᠠᠷᠢᠨ ᠪᠡᠯᠡᠳᠬᠡᠯ ᠦ᠋ᠳ ᠢ᠋ ᠠᠵᠢᠭᠯᠠᠵᠤ ᠳᠡᠢᠯᠦᠭᠰᠡᠨ ᠶᠤᠮᠰᠠᠨ᠃
ᠯᠠᠷᠰᠤᠨ ᠬᠦᠩ ᠰᠥᠨᠢᠳ ᠸᠠᠩ ᠲᠠᠢ ᠲᠦᠷᠭᠡᠬᠡᠨ ᠰᠢᠭ ᠠᠭᠤᠯᠵᠠᠭᠠᠳ ᠭᠠᠷᠬᠤ ᠭᠡᠮᠡᠨ ᠪᠢᠴᠢᠬᠠᠨ ᠬᠥᠲᠥᠯ ᠳᠡᠭᠡᠷᠡ ᠪᠠᠢᠷᠢᠯᠠᠬᠤ ᠵᠠᠰᠠᠭ ᠤ᠋ᠨ ᠣᠷᠳᠣᠨ ᠤ᠋ ᠪᠠᠢᠰᠢᠩ ᠳ᠋ᠤ᠌ ᠬᠦᠷᠬᠦ ᠪᠡᠷ ᠳᠠᠪᠬᠢᠭᠤᠯᠬᠤ ᠳ᠋ᠤ᠌ ᠪᠢᠳᠡᠨ ᠦ᠌ ᠮᠠᠰᠢᠨ ᠴᠤ᠌ ᠳ᠋ᠠᠭᠠᠨ ᠳᠠᠪᠬᠢᠪᠠ᠃ ᠯᠠᠷᠰᠤᠨ ᠢ᠋ ᠡᠭᠦᠳᠡᠨ ᠬᠠᠷᠠᠭᠤᠯ ᠤ᠋ᠨ ᠬᠠᠵᠠᠭᠤ ᠪᠠᠷ ᠬᠠᠨᠴᠤᠢ ᠰᠠᠵᠢᠯᠠᠨ ᠳᠣᠲᠣᠭᠰᠢ ᠪᠠᠨ ᠣᠷᠣᠬᠤ ᠳ᠋ᠤ᠌ ᠪᠢ ᠨᠠᠭᠠᠰᠢ ᠴᠠᠭᠠᠰᠢ ᠣᠷᠣᠵᠤ ᠭᠠᠷᠬᠤ ᠬᠥᠮᠦᠰ ᠢ᠋ ᠠᠵᠢᠭᠯᠠᠵᠤ ᠰᠠᠭᠤᠪᠠ᠃ ᠤᠳᠠᠯ ᠦᠭᠡᠢ ᠶᠠᠫᠣᠨ ᠤ᠋ ᠡᠭᠡᠯ ᠠᠷᠠᠳ᠂ ᠠᠬᠢᠭᠠᠳ ᠪᠠᠰᠠ ᠴᠡᠷᠢᠭ ᠬᠤᠪᠴᠠᠰᠤ ᠲᠠᠢ ᠶᠠᠫᠣᠨ ᠣᠹᠢᠼᠧᠷ ᠵᠢᠯᠣᠭᠣᠴᠢ ᠲᠠᠢ ᠪᠠᠨ ᠣᠷᠣᠵᠤ ᠭᠠᠷᠤᠨᠠ᠃ ᠪᠢᠳᠡᠨ ᠦ᠌ ᠮᠠᠰᠢᠨ ᠢ᠋ ᠰᠡᠵᠢᠭᠲᠡᠢ ᠨᠢᠳᠦ ᠪᠡᠷ ᠰᠢᠷᠳᠡᠵᠦ ᠲᠣᠭᠣᠷᠢᠨ ᠵᠣᠭᠰᠣᠭᠠᠳ ᠢᠨᠢᠶᠡᠯᠴᠡᠨ ᠶᠠᠷᠢᠯᠴᠠᠬᠤ ᠳ᠋ᠤᠨᠢ ᠶᠠᠭᠤ ᠬᠡᠯᠡᠵᠦ ᠪᠠᠢᠬᠤ ᠶ᠋ᠢ ᠨᠢ ᠪᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃
ᠶᠠᠭᠤ ᠪᠣᠯᠤᠭᠰᠠᠨ ᠴᠤ᠌ ᠯᠠᠷᠰᠤᠨ ᠪᠤᠴᠠᠵᠤ ᠢᠷᠡᠯᠡ᠂ ᠭᠡᠬᠦ ᠳ᠋ᠦ᠍ ᠰᠥᠨᠢᠳ ᠸᠠᠩ ᠲᠠᠢ ᠠᠭᠤᠯᠵᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠰᠥᠨᠢᠳ ᠸᠠᠩ ᠰᠠᠶᠢᠬᠠᠨ ᠲᠣᠰᠴᠤ ᠠᠪᠤᠭᠰᠠᠨ ᠶᠠᠫᠣᠨ ᠲᠠᠢ ᠴᠢᠬᠤᠯᠠ ᠶᠠᠷᠢᠯᠴᠠᠭᠠ ᠪᠣᠯᠵᠤ ᠪᠠᠢᠬᠤ ᠲᠤᠯᠠ ᠡᠨᠡ ᠤᠳᠠᠭᠠ ᠲᠡᠭᠦᠨ ᠳ᠋ᠦ᠍ ᠬᠠᠭᠤᠴᠢᠨ ᠨᠠᠢᠵᠠ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠴᠠᠭ ᠦᠭᠡᠢ ᠠᠵᠢ᠃
ᠪᠢᠳᠡᠨ ᠢ᠋ ᠠᠬᠢᠭᠠᠳ ᠨᠢᠭᠡ ᠪᠦᠯᠦᠭ ᠪᠠᠷᠠᠭᠠ ᠬᠤᠳᠠᠯᠳᠤᠨ ᠠᠪᠴᠤ ᠪᠠᠢᠬᠤ ᠳ᠋ᠤ᠌ ᠨᠢᠭᠡ ᠠᠩᠭᠢ ᠴᠠᠭᠠᠨ ᠪᠡᠭᠡᠯᠡᠢ ᠲᠡᠢ ᠴᠡᠷᠢᠭ ᠪᠣᠯᠪᠠᠰᠤᠷᠠᠯ ᠤ᠋ᠨ ᠲᠠᠯᠠᠪᠠᠢ ᠳ᠋ᠤ᠌ ᠵᠢᠭᠰᠠᠨ ᠬᠦᠷᠴᠦ ᠢᠷᠡᠪᠡ᠃
– ᠴᠠᠭᠠᠨ ᠪᠡᠭᠡᠯᠡᠢ ? ᠭᠡᠵᠦ ᠪᠢ ᠭᠠᠢᠬᠠᠵᠤ ᠠᠪᠬᠤ ᠳ᠋ᠤ᠌ ᠬᠠᠵᠠᠭᠤ ᠳ᠋ᠤ᠌ ᠪᠠᠢᠭᠰᠠᠨ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠨ ᠭᠡᠳᠡᠭᠡᠨᠡᠨ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ ᠨᠠᠮᠠᠶ᠋ᠢ ᠠᠷᠤ ᠶ᠋ᠢᠨ ᠥᠷᠥᠭᠡᠨ ᠳ᠋ᠡᠭᠡᠨ ᠲᠡᠳᠡᠨ ᠠᠪᠠᠴᠢᠵᠤ᠂ ᠴᠠᠢ ᠴᠢᠢᠯᠡᠭᠡᠳ ᠤᠴᠢᠷ ᠢ᠋ ᠨᠢ ᠶᠠᠷᠢᠵᠤ ᠥᠭᠪᠡ᠄
– ᠨᠢᠭᠡ ᠶᠠᠫᠣᠨ ᠬᠤᠳᠠᠯᠳᠤᠭᠠᠴᠢᠨ ᠨᠢᠭᠡᠨ ᠡᠳᠦᠷ ᠠᠳᠠ ᠬᠦᠷᠴᠦ ᠢᠷᠡᠭᠡᠳ ᠮᠣᠩᠭᠣᠯᠴᠤᠳ ᠲᠤ᠌ ᠨᠡᠬᠡᠭᠰᠡᠨ ᠴᠠᠭᠠᠨ ᠬᠥᠪᠥᠩ ᠪᠡᠭᠡᠯᠡᠢ ᠬᠤᠳᠠᠯᠳᠤᠨᠠ ᠭᠡᠪᠡ᠃ ᠴᠠᠭᠠᠨ ᠪᠡᠭᠡᠯᠡᠢ ᠶ᠋ᠢ ᠮᠣᠩᠭᠣᠯᠴᠤᠳ ᠲᠤ᠌ ᠬᠤᠳᠠᠯᠳᠤᠨᠠ ᠭᠡᠨᠡ ? ᠬᠡᠯᠡᠯᠭᠡᠨ ᠦᠭᠡᠢ ᠲᠡᠨᠳᠡ ᠪᠡᠨ ᠳᠠᠷᠤᠭᠳᠠᠵᠤ ᠯᠠ ᠪᠠᠢᠬᠤ ᠪᠣᠯᠤᠨᠠ᠂ ᠤᠴᠢᠷ ᠨᠢ ᠠᠯᠢ ᠮᠣᠩᠭᠣᠯ ᠨᠢ ᠴᠠᠭᠠᠨ ᠪᠡᠭᠡᠯᠡᠢ ᠵᠡᠭᠦᠵᠦ ᠪᠠᠢᠨᠠ ᠳᠠ? ᠥᠪᠡᠷ ᠦ᠋ᠨ ᠵᠣᠷᠢᠯᠬᠠ ᠳ᠋ᠠᠭᠠᠨ ᠬᠦᠷᠬᠦ ᠶ᠋ᠢᠨ ᠲᠥᠯᠥᠭᠡ ᠲᠡᠷᠡ ᠠᠳᠡᠬᠢ ᠶ᠋ᠢᠨ ᠨᠢᠭᠡ ᠶᠠᠫᠣᠨ ᠵᠥᠪᠯᠡᠭᠴᠢ ᠳ᠋ᠦ᠍ ᠬᠦᠨᠳᠦ ᠪᠡᠯᠡᠭ ᠪᠠᠷᠢᠭᠰᠠᠨ ᠳ᠋ᠤ᠌ ᠪᠡᠭᠡᠯᠡᠢ ᠶ᠋ᠢ ᠴᠡᠷᠢᠭ ᠠᠩᠭᠢ ᠳ᠋ᠠᠭᠠᠨ ᠬᠤᠳᠠᠯᠳᠤᠨ ᠠᠪᠴᠤ᠂ ᠴᠡᠷᠢᠭ ᠦ᠋ᠳ ᠨᠢ ᠣᠷᠣᠢ ᠪᠣᠯᠭᠠᠨ ᠤᠬᠢᠶᠠᠬᠤ ᠬᠡᠷᠡᠭ ᠲᠡᠢ ᠪᠣᠯᠪᠠ ᠭᠡᠵᠦ ᠢᠨᠢᠶᠡᠨ ᠬᠡᠯᠡᠪᠡ᠃
– ᠲᠡᠭᠡᠭᠡᠳ ᠮᠥᠩᠭᠥ ᠶ᠋ᠢ ᠨᠢ ᠬᠡᠨ ᠳᠥᠯᠥᠪᠡ ?
– ᠮᠣᠩᠭᠣᠯᠴᠤᠳ ᠤᠤ ? ᠶᠠᠫᠣᠨᠴᠤᠳ ᠤᠤ ? ᠪᠢ ᠮᠡᠳᠡᠭᠰᠡᠨ ᠦᠭᠡᠢ᠃ ᠬᠡᠷᠪᠡ ᠡᠢᠮᠦ ᠰᠠᠢᠨ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠭᠰᠠᠨ ᠶᠤᠮ ᠪᠣᠯ ᠪᠢ ᠪᠠᠰᠠ ᠬᠠᠭᠤᠴᠢᠨ ᠳᠡᠯᠭᠡᠭᠦᠷ ᠢ᠋ᠶ᠋ᠡᠨ ᠬᠤᠳᠠᠯᠳᠤᠨ ᠭᠠᠷᠭᠠᠵᠤ ᠪᠣᠯᠤᠨᠠ ᠳᠠ ᠭᠡᠵᠦ ᠬᠢᠲᠠᠳ ᠬᠤᠳᠠᠯᠳᠤᠭᠠᠴᠢᠨ ᠰᠠᠨᠠᠭᠠ ᠠᠯᠲᠠᠨ ᠬᠡᠯᠡᠪᠡ᠃
ᠡᠴᠦᠰ ᠲᠡᠭᠡᠨ ᠪᠢᠳᠡ ᠵᠠᠮ ᠳ᠋ᠠᠭᠠᠨ ᠣᠷᠣᠵᠤ᠂ ᠨᠢᠭᠡ ᠴᠠᠭ ᠤ᠋ᠨ ᠳᠠᠷᠠᠭᠠ ᠭᠡᠬᠦ ᠳ᠋ᠦ᠍ ᠴᠠᠭᠠᠨ ᠬᠦᠷᠢᠶᠡᠨ ᠦ᠌ ᠰᠦᠮᠡ ᠶ᠋ᠢᠨ ᠴᠠᠭᠠᠨ ᠬᠦᠷᠢᠶᠡ ᠠᠯᠤᠰ ᠠ᠋ᠴᠠ ᠬᠠᠷᠠᠭᠳᠠᠵᠤ᠂ ᠨᠣᠮᠢᠨ ᠨᠣᠭᠣᠭᠠᠨ ᠲᠠᠯᠠ ᠪᠢᠳᠡᠨ ᠢ᠋ ᠨᠥᠬᠥᠷᠰᠡᠭ ᠢ᠋ᠶ᠋ᠡᠷ ᠤᠭᠲᠤᠨ ᠪᠠᠢᠯᠠ᠃ ᠠᠳᠠ ᠠ᠋ᠴᠠ ᠣᠢᠷᠠᠬᠠᠨ ᠪᠠᠢᠭᠠ ᠡᠸᠷᠢᠺᠰᠦᠨ ᠦ᠌ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠶ᠋ᠢᠨ ᠥᠷᠲᠡᠭᠡᠨ ᠦ᠌ ᠲᠡᠨᠳᠡ ᠨᠢᠭᠡ ᠪᠦᠯᠦᠭ ᠭᠡᠷ ᠪᠠᠷᠢᠭᠳᠠᠭᠰᠠᠨ ᠪᠠᠢᠪᠠ᠃
– ᠵᠠ ᠲᠡᠨᠳᠡ ᠪᠠᠰᠠ ᠠᠵᠢᠯ ᠭᠠᠷᠴᠤ ᠪᠠᠢᠭᠠ ᠭᠡᠵᠦ ᠱᠠᠰᠢᠨ ᠰᠤᠷᠲᠠᠯᠴᠢᠯᠠᠭᠴᠢ ᠡᠮᠴᠢ ᠬᠡᠯᠡᠪᠡ᠃
ᠲᠣᠭᠠᠯᠠᠰᠢ ᠦᠭᠡᠢ ᠣᠯᠠᠨ ᠶᠠᠫᠣᠨ ᠡᠮᠴᠢ ᠦᠨᠡ ᠮᠥᠩᠭᠥ ᠦᠭᠡᠢ ᠡᠪᠡᠳᠴᠢᠨ ᠦᠵᠡᠵᠦ ᠥᠭᠭᠦᠨᠡ ᠭᠡᠵᠦ ᠠᠮᠠᠯᠠᠵᠤ ᠪᠠᠢᠭᠠ ᠪᠣᠯᠪᠠᠴᠤ᠂ ᠡᠨᠡ ᠰᠸᠧᠳᠧᠨ ᠦ᠌ ᠳ᠋ᠦ᠍ ᠢᠷᠡᠵᠦ ᠡᠮᠨᠡᠭᠦᠯᠬᠦ ᠬᠥᠮᠦᠨ ᠦ᠌ ᠲᠣᠭᠠ ᠨᠢ ᠴᠥᠭᠡᠷᠡᠬᠦ ᠦᠭᠡᠢ ᠪᠠᠢᠬᠤ ᠨᠢ ᠰᠣᠨᠢᠷᠬᠠᠯᠲᠠᠢ ᠠᠵᠢ᠃
ᠠᠬᠢᠭᠠᠳ ᠠᠷᠪᠠᠨ ᠮᠢᠨᠦ᠋ᠲ ᠭᠡᠬᠦ ᠳ᠋ᠦ᠍ ᠮᠠᠰᠢᠨ ᠮᠠᠨᠢ ᠬᠦᠩ ᠦ᠋ᠨ ᠣᠷᠳᠣᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠴᠦ ᠵᠣᠭᠰᠣᠪᠠ᠃ ᠲᠡᠨᠳᠡ ᠮᠢᠨᠦ ᠵᠠᠷᠤᠴᠠ ᠪᠦᠬᠦ ᠠᠴᠢᠶᠠ ᠲᠠᠢ ᠨᠠᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠲᠡᠷᠡ ᠮᠠᠨᠢ ᠲᠡᠷᠡ ᠣᠯᠠᠨ ᠦᠨᠡᠮᠯᠡᠬᠦ ᠰᠢᠯᠭᠠᠬᠤ ᠵᠢᠴᠢ ᠴᠠᠭᠳᠠᠭᠠᠨ ᠤ᠋ ᠪᠠᠢᠴᠠᠭᠠᠯᠲᠠ ᠶ᠋ᠢ ᠠᠮᠤᠷ ᠮᠡᠨᠳᠦ ᠲᠤᠭᠤᠯᠤᠨ ᠬᠦᠷᠴᠦ ᠢᠷᠡᠭᠰᠡᠨ ᠪᠠᠢᠯᠠ᠃
ᠲᠡᠭᠡᠭᠡᠳ ᠣᠳᠣ ᠪᠦᠬᠦ ᠶᠠᠭᠤᠮᠠ ᠪᠦᠷᠢᠳᠴᠦ᠂ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠡᠸᠷᠢᠺᠰᠦᠨ ᠨᠠᠮᠠᠶ᠋ᠢ ᠠᠮᠠᠷᠠᠯᠲᠠ ᠬᠢᠨᠡ ᠭᠡᠵᠦ ᠪᠠᠢᠭᠰᠠᠨ ᠨᠠᠢ᠍ᠮᠠ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠭᠡᠨ ᠥᠭᠬᠦ ᠪᠣᠯᠤᠨᠠ᠃ ᠮᠢᠨᠦ ᠬᠠᠭᠤᠴᠢᠨ ᠮᠣᠩᠭᠣᠯ ᠨᠠᠢᠵᠠ ᠪᠣᠯᠤᠨ ᠠᠶᠠᠨ ᠤ᠋ ᠬᠠᠨᠢᠳᠠᠨ ᠷᠠᠰᠢ ᠮᠥᠨ ᠡᠨᠡ ᠣᠢᠷᠠ ᠬᠠᠪᠢ ᠮᠠᠯᠵᠢᠵᠤ ᠪᠣᠢ ᠭᠡᠵᠦ ᠯᠠᠷᠰᠤᠨ ᠤ᠋ ᠵᠠᠷᠤᠴᠠ ᠵᠢᠨᠵᠢᠮᠠ ᠨᠠᠳᠠ ᠳ᠋ᠤ᠌ ᠬᠡᠯᠡᠵᠦ ᠪᠠᠢᠯᠠ ᠃ ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡᠬᠢ ᠪᠣᠯᠤᠨ ᠠᠷᠭᠠᠯ ᠤ᠋ᠨ ᠭᠠᠯ ᠤ᠋ᠨ ᠳᠡᠷᠭᠡᠳᠡᠬᠢ ᠡᠳᠦᠷ ᠬᠣᠨᠣᠭ ᠤ᠋ᠳ ᠮᠢᠨᠢ ᠡᠬᠢᠯᠡᠬᠦ ᠪᠣᠯᠤᠯᠠ᠃