ᠮᠣᠩᠭᠣᠯ ᠭᠡᠷ- ᠲᠣᠭᠲᠠᠬᠤМонгол гэр-Тогтох
736 ᠲᠣᠭᠲᠠᠬᠤ
ᠡᠷᠲᠡ ᠳᠡᠭᠡᠳᠦ ᠶ᠋ᠢᠨ ᠦᠶᠡ ᠡᠴᠡ
ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠮᠣᠩᠭᠣᠯ ᠭᠡᠷ
ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ᠋
ᠡᠵᠡᠯᠡᠵᠦ ᠰᠠᠭᠤᠭᠰᠠᠨ ᠣᠷᠳᠣᠨ ᠭᠡᠷ
ᠤᠷᠠᠨ ᠰᠠᠨᠠᠭᠠ ᠲᠠᠢ ᠮᠣᠩᠭᠣᠯ ᠬᠥᠮᠦᠨ ᠦ᠌
ᠤᠷᠠᠯᠠᠵᠤ ᠪᠦᠲᠦᠭᠡᠭᠰᠡᠨ ᠮᠣᠩᠭᠣᠯ ᠭᠡᠷ
ᠤᠭᠰᠠᠷᠠᠵᠤ ᠪᠠᠷᠢᠵᠤ ᠪᠣᠰᠬᠠᠬᠤ ᠳ᠋ᠤ᠌
ᠤᠴᠢᠷ ᠶᠣᠰᠣᠲᠠᠢ ᠮᠣᠩᠭᠣᠯ ᠭᠡᠷ
ᠬᠠᠲᠠᠪᠴᠢ ᠡᠨᠢᠭᠡ ᠦ᠋ᠨ ᠳᠤᠮᠳᠠ ᠪᠠᠨ
ᠬᠠᠳᠬᠠᠮᠠᠯ ᠬᠣᠶᠠᠷ ᠬᠠᠭᠠᠯᠭᠠ ᠲᠠᠢ
ᠡᠨᠢᠭᠡ ᠶ᠋ᠢᠨ ᠳᠡᠭᠡᠷᠡ ᠲᠠᠯᠠ ᠳ᠋ᠠᠭᠠᠨ
ᠡᠵᠡᠨ ᠵᠢᠷᠭᠤᠭᠠᠨ ᠪᠤᠷᠬᠠᠨ ᠲᠠᠢ
ᠡᠪᠬᠡᠵᠦ ᠳᠡᠯᠭᠡᠵᠦ ᠴᠢᠳᠠᠳᠠᠭ
ᠥᠯᠵᠡᠢ ᠵᠠᠩᠭᠢᠶᠠ ᠬᠠᠨᠠ ᠲᠠᠢ
ᠠᠭᠤᠵᠢᠮ ᠲᠣᠭᠣᠷᠢᠭ ᠮᠠᠲᠠᠭᠠᠰᠤ ᠲᠠᠢ
ᠳᠣᠲᠣᠷᠠ ᠮᠣᠳᠣᠨ ᠪᠦᠰᠡᠯᠡᠭᠦᠷ ᠲᠡᠢ
ᠬᠣᠷᠯᠣ ᠡᠷᠳᠡᠨᠢ ᠶ᠋ᠢᠨ ᠲᠣᠭᠣᠨᠣ ᠨᠢ
ᠬᠤᠮᠢᠵᠤ ᠳᠡᠯᠭᠡᠬᠦ ᠴᠢᠳᠠᠮᠵᠢ ᠲᠠᠢ
ᠬᠣᠶᠠᠷ ᠲᠠᠢᠰᠢ ᠪᠠᠨ ᠰᠠᠯᠵᠤ ᠪᠣᠯᠳᠠᠭ
ᠬᠣᠯᠪᠣᠵᠤ ᠨᠡᠢᠯᠡᠭᠦᠯᠦᠭᠰᠡᠨ ᠭᠣᠣᠯ ᠮᠣᠳᠣ ᠲᠠᠢ
ᠬᠣᠯᠬᠢᠵᠤ ᠰᠠᠯᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠭᠰᠡᠨ
ᠬᠢᠯᠭᠠᠰᠤᠨ ᠳᠡᠭᠡᠰᠦᠨ ᠬᠦᠯᠢᠶᠡᠷᠢ ᠲᠡᠢ
ᠬᠣᠢᠨᠠ ᠡᠮᠦᠨᠡ ᠶ᠋ᠢ ᠵᠢᠭᠠᠭᠰᠠᠨ
ᠬᠣᠶᠠᠷ ᠥᠨᠳᠥᠷ ᠳᠠᠭᠠ ᠲᠠᠢ
ᠬᠣᠭᠣᠷᠣᠨᠳᠣ ᠨᠢ ᠵᠡᠷᠭᠡᠴᠡᠵᠦ ᠣᠷᠣᠰᠢᠭᠰᠠᠨ
ᠣᠬᠣᠷ ᠳᠥᠷᠪᠡᠨ ᠳᠠᠭᠠ ᠲᠠᠢ
ᠲᠣᠭᠣᠷᠢᠭᠯᠠᠵᠤ ᠮᠡᠳᠡᠵᠦ ᠤᠷᠠᠯᠠᠭᠰᠠᠨ
ᠳᠥᠷᠪᠡᠨ ᠳᠠᠪᠬᠤᠷ ᠬᠦᠷᠢᠶᠡ ᠲᠡᠢ
ᠳᠠᠷᠠᠭᠠ ᠳᠢᠭᠲᠡᠢ ᠲᠠᠭᠠᠷᠠᠭᠤᠯᠤᠭᠰᠠᠨ
ᠳᠠᠯᠠᠨ ᠬᠣᠶᠠᠷ ᠰᠢᠷᠤᠭ ᠲᠠᠢ
ᠰᠢᠷᠤᠭ ᠤ᠋ᠨ ᠵᠠᠪᠰᠠᠷ ᠲᠠᠭᠠᠨ ᠬᠡᠯᠬᠢᠭᠰᠡᠨ
ᠰᠢᠯᠤᠭᠤᠨ ᠨᠠᠶᠠᠨ ᠣᠨᠢ ᠲᠠᠢ
ᠢᠰᠡᠭᠡᠢ ᠴᠠᠭᠠᠨ ᠪᠦᠷᠢᠶᠡᠰᠦ ᠲᠡᠢ
ᠡᠪᠯᠢᠭ ᠲᠣᠬᠢᠲᠠᠢ ᠥᠷᠥᠭᠡ ᠭᠡᠷ
ᠡᠷᠳᠡᠨᠢ ᠯᠤᠤ ᠭᠦᠷᠪᠡᠯᠵᠡᠭᠰᠡᠨ ᠰᠢᠭ᠌
ᠭᠠᠳᠠᠷ ᠬᠣᠶᠠᠷ ᠪᠦᠰᠡᠯᠡᠭᠦᠷ ᠲᠡᠢ
ᠨᠠᠢ᠍ᠮᠠᠨ ᠭᠦᠯᠳᠡᠢ ᠬᠥᠯᠲᠦ ᠡᠷᠦᠬᠡ (ᠬᠥᠯᠲᠥᠷᠭᠡ) ᠨᠢ
ᠨᠠᠷᠢᠨ ᠬᠢᠯᠭᠠᠰᠤᠨ ᠵᠡᠬᠡᠭ ᠲᠡᠢ
ᠨᠠᠪᠴᠢᠨ ᠬᠡ ᠲᠡᠢ ᠡᠭᠦᠯᠡ ᠶ᠋ᠢ
ᠨᠠᠷᠢᠯᠢᠭ ᠰᠠᠢᠬᠠᠨ ᠤᠷᠠᠯᠠᠵᠠᠢ
ᠠᠮᠠ ᠳᠥᠷᠪᠡᠯᠵᠢᠨ ᠲᠠᠭᠯᠠᠭᠠ (ᠪᠦᠷᠬᠦᠭᠡ)
ᠡᠷᠦᠬᠡ ᠶ᠋ᠢ ᠨᠢ
ᠠᠷᠤᠨᠰᠢ ᠪᠠᠨ ᠲᠠᠲᠠᠭᠠᠳ ᠨᠡᠭᠡᠭᠡᠪᠡᠯ (ᠰᠡᠬᠦᠪᠡᠯ)
ᠠᠭᠠᠷ ᠤ᠋ᠨ ᠨᠠᠷᠠᠨ ᠤ᠋ ᠰᠢᠯᠵᠢᠯᠲᠡ ᠶ᠋ᠢ
ᠠᠰᠤᠷᠤ ᠣᠨᠣᠪᠴᠢᠲᠠᠢ ᠮᠡᠳᠡᠴᠢᠬᠡᠳᠡᠭ
ᠡᠭᠦᠳᠡᠨ ᠦ᠌ ᠪᠡᠨ ᠡᠨᠢᠭᠡ ᠳ᠋ᠤᠨᠢ
ᠥᠷᠭᠡᠨ ᠰᠠᠢᠬᠠᠨ ᠲᠣᠲᠣᠭᠣ ᠲᠠᠢ
ᠥᠯᠵᠡᠢ ᠵᠠᠩᠭᠢᠶᠠ ᠤᠭᠠᠯᠵᠠ ᠶ᠋ᠢ
ᠡᠮᠵᠢᠶᠡᠷᠢ ᠪᠣᠯᠭᠠᠨ ᠤᠷᠠᠯᠠᠵᠠᠢ
ᠥᠯᠵᠡᠢ ᠬᠤᠲᠤᠭ ᠪᠠᠲᠤ ᠣᠷᠣᠰᠢᠭᠰᠠᠨ
ᠥᠨᠳᠥᠷ ᠪᠣᠰᠤᠭᠠ ᠥᠷᠥᠭᠡ ᠭᠡᠷ
ᠥᠨᠢᠷ ᠪᠠᠶᠠᠨ ᠮᠣᠩᠭᠣᠯᠴᠤᠳ ᠤ᠋ᠨ
ᠥᠭᠡᠳᠡᠯᠡᠨ ᠬᠥᠭᠵᠢᠭᠰᠡᠨ ᠢᠰᠡᠭᠡᠢ ᠭᠡᠷ
ᠰᠡᠴᠡ ᠶ᠋ᠢᠨ ᠬᠡᠪ ᠲᠡᠢ ᠮᠣᠩᠭᠣᠯ ᠭᠡᠷ
ᠰᠠᠷᠠᠭᠤᠯ ᠲᠠᠯᠠ ᠶ᠋ᠢᠨ ᠡᠵᠡᠨ ᠨᠢ ᠶᠤᠮ
ᠰᠤᠭᠤᠨᠠᠭᠯᠠᠵᠤ ᠭᠠᠷᠤᠭᠰᠠᠨ ᠤᠲᠤᠭᠠ ᠨᠢ
ᠴᠡᠩᠬᠡᠷ ᠠᠭᠠᠷ ᠲᠠᠭᠠᠨ ᠬᠠᠳᠠᠭ ᠶᠤᠮ
ᠪᠣᠰᠤᠭᠠ ᠬᠡᠪ ᠲᠡᠢ ᠮᠣᠩᠭᠣᠯ ᠭᠡᠷ
ᠪᠣᠯᠪᠠᠰᠤᠨ ᠰᠣᠶᠣᠯ ᠤ᠋ᠨ ᠥᠯᠥᠭᠡᠢ ᠶᠤᠮ
ᠪᠤᠷᠭᠢᠯᠵᠤ ᠭᠠᠷᠤᠭᠰᠠᠨ ᠤᠲᠤᠭᠠ ᠨᠢ
ᠪᠤᠵᠠᠷ ᠮᠠᠭᠤ ᠶ᠋ᠢᠨ ᠳᠠᠷᠤᠯᠭᠠ ᠶᠤᠮ
ᠲᠠᠨᠠ ᠶ᠋ᠢᠨ ᠴᠠᠭᠠᠨ ᠥᠷᠥᠭᠡ ᠨᠢ
ᠲᠠᠯᠠ ᠨᠤᠲᠤᠭ ᠲᠠᠭᠠᠨ ᠴᠢᠮᠡᠭ ᠶᠤᠮ
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠰᠦᠷᠦᠭ ᠨᠢ
ᠲᠠᠩᠰᠤᠭ ᠠᠮᠢᠳᠤᠷᠠᠯ ᠤ᠋ᠨ ᠲᠦᠰᠢᠭ ᠶᠤᠮ
ᠲᠠᠷᠠᠭ᠂ ᠠᠢᠷᠠᠭ᠂ ᠴᠡᠭᠡ᠂ ᠵᠥᠭᠡᠬᠡᠢ ᠨᠢ
ᠲᠠᠬᠤᠯ ᠡᠪᠡᠳᠴᠢᠨ ᠳ᠋ᠦ᠍ ᠲᠤᠰᠠᠲᠠᠢ ᠶᠤᠮ
ᠲᠠᠷᠭᠤᠨ ᠬᠣᠨᠢᠨ ᠤ᠋ ᠮᠢᠬᠠ ᠨᠢ
ᠲᠠᠮᠢᠷ ᠢ᠋ ᠨᠥᠬᠥᠪᠥᠷᠢᠯᠡᠳᠡᠭ ᠰᠢᠮᠡ ᠶᠦᠮ
ᠬᠤᠷᠤᠳ᠂ ᠲᠣᠰᠣ᠂ ᠥᠷᠥᠮᠡ᠂ ᠰᠦ᠋ ᠨᠢ
ᠬᠣᠪᠣᠷ ᠴᠤᠬᠠᠭ ᠲᠡᠵᠢᠭᠡᠯ ᠶᠤᠮ
ᠬᠣᠯᠠ ᠶ᠋ᠢᠨ ᠨᠠᠢᠵᠠ ᠪᠠᠨ ᠵᠣᠴᠢᠯᠠᠬᠤ ᠳ᠋ᠤ᠌
ᠬᠣᠴᠣᠷᠴᠤ ᠪᠣᠯᠳᠠᠭ ᠦᠭᠡᠢ ᠢᠳᠡᠭᠡᠨ ᠶᠦᠮ
ᠳᠠᠶᠠᠭᠠᠷ ᠣᠯᠠᠨ ᠮᠣᠩᠭᠣᠯᠴᠤᠳ ᠤ᠋ᠨ
ᠲᠠᠪᠰᠢᠭᠰᠠᠨ ᠰᠠᠢᠬᠠᠨ ᠰᠣᠶᠣᠯ ᠶᠤᠮ
ᠳᠠᠢᠴᠢᠨ ᠮᠣᠷᠢᠲᠠᠨ ᠤᠭᠰᠠᠭᠠᠲᠠᠨ ᠤ᠋
ᠳᠠᠶᠠᠩ ᠳ᠋ᠤ᠌ ᠳᠠᠭᠤᠷᠢᠰᠤᠭᠰᠠᠨ ᠠᠯᠳᠠᠷ ᠶᠤᠮ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠡᠭᠦᠳᠡᠯ
ᠬᠢᠨᠠᠭᠴᠢ ᠪᠠᠭᠰᠢ᠄ ᠠᠯᠲᠠᠨᠱᠠ ᠣᠳᠬᠠᠨᠰᠣᠠ