《ᠬᠥᠬᠡ ᠰᠤᠳᠤᠷ》 ᠤᠨ ᠨᠥᠬᠥᠪᠦᠷᠢ ᠲᠡᠪᠲᠡᠷ - ᠢᠨᠵᠠᠨᠨᠠᠰᠢ <ᠵᠢᠷᠠ ᠶᠢᠰᠦᠳᠦᠭᠡᠷ ᠪᠦᠯᠦᠭ> "Хөх судар" он нөхвөр дэвтэр - Инжинаш <Жар есдүгээр бүлэг>
294《ᠬᠥᠬᠡ ᠰᠤᠳᠤᠷ》 ᠤᠨ ᠨᠥᠬᠥᠪᠦᠷᠢ ᠲᠡᠪᠲᠡᠷ - ᠵᠢᠷᠠ ᠶᠢᠰᠦᠳᠦᠭᠡᠷ ᠪᠦᠯᠦᠭ
ᠵᠢᠷᠠᠨ ᠶᠢᠰᠦᠳᠦᠭᠡᠷ ᠪᠦᠯᠦᠭ
ᠵᠡᠪᠡ ᠪᠠᠭᠠᠲᠤᠷ ᠨᠢᠭᠡᠬᠡᠨ ᠰᠢᠳᠠᠮ ᠢ᠋ᠶ᠋ᠠᠷ ᠬᠣᠶᠠᠷ ᠬᠠᠭᠠᠨ ᠢ᠋ ᠬᠠᠮᠲᠤᠪᠠᠷ ᠳᠡᠯᠡᠳᠴᠦ ᠠᠮᠢᠳᠤ ᠪᠠᠷᠢᠪᠠ
ᠶ᠋ᠢᠨ ᠭᠦᠩᠵᠦ ᠪᠢᠴᠢᠬᠠᠨ ᠠᠷᠭᠠ ᠪᠠᠷ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠬᠠᠮᠤᠭ ᠪᠦᠭᠦᠳᠡᠭᠡᠷ ᠢ᠋ ᠠᠶᠤᠯᠭᠠᠨ ᠰᠦᠷᠲᠡᠭᠡᠪᠡ
ᠥᠷᠥᠰᠢᠶᠡᠯᠲᠦ ᠪᠣᠭᠳᠠ ᠶ᠋ᠢᠨ ᠦᠨᠡᠨ ᠬᠡᠰᠢᠭ ᠦᠬᠦᠭᠰᠡᠨ ᠶᠠᠰᠤ ᠳ᠋ᠤᠷ ᠴᠤ᠌ ᠭᠥᠷᠳᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ
ᠦᠶᠡ ᠦᠶᠡ ᠥᠨᠳᠥᠷ ᠡᠷᠬᠢᠮ ᠨᠠᠷ ᠳᠣᠯᠣᠭᠠᠨ ᠵᠠᠭᠤᠨ ᠬᠣᠷᠢᠨ ᠣᠨ ᠭᠠᠷᠪᠠ᠃
ᠦᠨᠡᠩᠬᠦ ᠡᠷᠳᠡᠮ ᠢ᠋ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠴᠣᠭᠴᠠᠯᠠᠨ ᠡᠰᠡ ᠲᠠᠷᠢᠵᠤ ᠲᠠᠯᠪᠢᠭᠰᠠᠨ ᠪᠥᠭᠡᠰᠦ
ᠥᠪᠥᠷ ᠴᠢᠭᠤᠯᠭᠠᠨ ᠠᠷᠤ ᠠᠢᠮᠠᠭ ᠤ᠋ᠳ ᠤ᠋ᠨ ᠸᠠᠩ ᠵᠠᠰᠠᠭ ᠶᠠᠭᠤᠨ ᠳ᠋ᠤᠷ ᠢᠲᠡᠭᠡᠮᠵᠢᠯᠡᠬᠦ ᠠᠵᠠᠢ ?
ᠲᠡᠨᠳᠡᠴᠡ ᠡᠨᠡ ᠬᠦ᠌ ᠰᠢᠷᠠᠭᠴᠢᠨ ᠮᠣᠭᠠᠢ ᠵᠢᠯ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠥᠷᠪᠡᠳᠦᠭᠡᠷ ᠣᠨ ᠤ᠋ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ᠂ ᠭᠤᠷᠪᠠᠨ ᠥᠲᠡᠭᠦᠰ᠂ ᠲᠠᠪᠤᠨ ᠲᠠᠢᠰᠢ ᠨᠠᠷ ᠲᠡᠷᠢᠭᠦᠯᠡᠨ ᠣᠯᠠᠨ ᠲᠠᠢᠹᠦ᠋ ᠰᠡᠴᠡᠳ ᠨᠠᠷ ᠳᠥᠷᠪᠡᠨ ᠪᠡᠯᠭᠡ ᠴᠤᠭᠯᠠᠷᠠᠨ᠂ ᠣᠭ᠌ᠶᠤ ᠶ᠋ᠢᠨ ᠪᠣᠯᠳᠣᠭ ᠣᠷᠭᠢᠯ ᠠ᠋ᠴᠠ ᠴᠠᠭᠠᠨ᠂ ᠤᠯᠠᠭᠠᠨ᠂ ᠬᠥᠬᠡ᠂ ᠰᠢᠷᠠ ᠳᠥᠷᠪᠡᠨ ᠥᠩᠭᠡ ᠶ᠋ᠢᠨ ᠭᠡᠷᠡᠯ ᠭᠤᠷᠪᠠᠨ ᠰᠥᠨᠢ ᠰᠠᠴᠤᠷᠠᠨ ᠭᠡᠢᠭᠦᠯᠪᠡ᠃ ᠰᠢᠭᠦᠷ ᠲᠦᠰᠢᠮᠡᠯ᠂ ᠮᠡᠩᠭᠡᠯᠢᠭ ᠰᠠᠢᠳ ᠮᠡᠳᠡᠭᠦᠯᠦᠨ ᠢᠷᠡᠭᠰᠡᠨ ᠢ᠋ ᠪᠣᠳᠣᠵᠤ ᠰᠢᠨᠵᠢᠪᠡᠰᠦ᠂ ᠲᠡᠮᠦᠷ ᠦ᠋ᠨ ᠡᠲᠡᠭᠡᠳ ᠦ᠋ᠨ ᠥᠷᠥᠨᠡ ᠲᠢᠪ – ᠪᠠᠯᠠᠩᠵᠤᠳ ᠳᠡᠯᠡᠬᠡᠢ ᠡᠴᠡ ᠳᠥᠷᠪᠡᠨ ᠶᠡᠬᠡ ᠤᠯᠤᠰ ᠤ᠋ᠨ ᠬᠠᠳ ᠡᠵᠡᠳ ᠬᠤᠷᠢᠶᠠᠭᠳᠠᠨ ᠬᠠᠮᠲᠤᠳᠬᠤ ᠶ᠋ᠢᠨ ᠪᠡᠯᠭᠡ ᠪᠣᠯᠵᠤᠬᠤᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠤ᠋ ᠭᠡᠭᠡᠨ ᠢ᠋ᠶ᠋ᠡᠷ ᠥᠪᠡᠷᠦᠨ ᠬᠣᠨᠢᠨ ᠤ᠋ ᠳᠠᠯᠤ ᠶ᠋ᠢᠨ ᠲᠥᠯᠭᠡ ᠪᠡᠷ ᠲᠥᠯᠭᠡᠳᠡᠨ ᠠᠢᠯᠠᠳᠴᠤ ᠬᠠᠷᠢᠭᠤ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠠᠨᠤ:
《ᠤᠯᠤᠰ ᠤ᠋ᠨ ᠥᠲᠡᠭᠦᠰ ᠵᠠᠢᠰᠠᠩ ᠰᠠᠢᠳ ᠤ᠋ᠳ ᠤ᠋ᠨ ᠦᠵᠡᠵᠦ ᠲᠦᠰᠥᠭᠯᠡᠭᠰᠡᠨ ᠢᠨᠤ ᠲᠢᠭ ᠲᠥᠯᠥᠪ ᠲᠣᠷ ᠮᠠᠰᠢ ᠨᠡᠢᠴᠡᠵᠦ᠂ ᠡᠨᠡ ᠵᠢᠯ ᠶᠡᠬᠡ ᠪᠠᠭᠠ ᠪᠠ ᠮᠠᠭᠤ ᠰᠠᠢᠨ ᠪᠣᠯᠪᠠᠴᠤ ᠳᠥᠷᠪᠡᠨ ᠤᠯᠤᠰ ᠤ᠋ᠨ ᠠᠮᠢᠰᠬᠤᠯ ᠢ᠋ ᠬᠤᠷᠢᠶᠠᠮᠵᠢᠯᠠᠬᠤ ᠪᠡᠯᠭᠡ ᠪᠣᠢ ᠶ᠋ᠢᠨ ᠲᠤᠯᠠ᠂ ᠤᠯᠤᠰ ᠲᠥᠷᠥ ᠳ᠋ᠦ᠍ᠷ ᠯᠠᠪ ᠬᠡᠷᠡᠭ ᠣᠯᠠᠨ᠂ ᠶᠠᠪᠤᠳᠠᠯ ᠦᠯᠡᠮᠵᠢ ᠶ᠋ᠢᠨ ᠣᠴᠢᠷᠠ᠂ ᠰᠡᠴᠡᠳ ᠪᠠᠭᠠᠲᠤᠷ ᠤ᠋ᠳ ᠴᠥᠮ ᠵᠢᠨᠦᠩ ᠲᠠᠢᠪᠤᠤ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠲᠤᠬᠠᠢᠲᠤ ᠭᠠᠵᠠᠷᠠ ᠴᠤᠭᠯᠠᠯᠳᠤᠨ ᠵᠥᠪᠳᠡᠯᠴᠡᠵᠦ ᠤᠯᠤᠰ ᠢ᠋ ᠰᠠᠬᠢᠬᠤ᠂ ᠬᠢᠵᠠᠭᠠᠷ ᠢ᠋ ᠴᠠᠭᠳᠠᠬᠤ᠂ ᠠᠯᠤᠰ ᠢ᠋ ᠲᠤᠯᠵᠤ ᠬᠣᠯᠠ ᠶ᠋ᠢ ᠬᠤᠷᠢᠶᠠᠮᠵᠢᠯᠠᠬᠤ ᠶ᠋ᠢ ᠲᠤᠰ ᠲᠤᠰ ᠲᠤᠷ ᠬᠤᠪᠢᠶᠠᠨ ᠭᠠᠷᠭᠠᠵᠤ᠂ ᠲᠤᠬᠠᠢ ᠲᠤᠬᠠᠢ ᠳ᠋ᠤᠷ ᠲᠤᠰᠢᠶᠠᠨ ᠪᠡᠯᠡᠳᠬᠡᠭᠦᠯ᠂ ᠥᠪᠡᠷᠡ ᠵᠦᠢᠯ ᠢ᠋ ᠡᠰᠡ ᠮᠡᠳᠡᠪᠡᠴᠦ ᠣᠢᠷᠠ ᠠ᠋ᠴᠠ ᠴᠢᠦᠢ ᠴᠦ ᠯᠢᠦᠢ ᠶ᠋ᠢᠨ ᠪᠡᠶᠡ ᠲᠠᠩᠭᠤᠳ ᠤᠯᠤᠰ ᠲᠤᠷ ᠳᠠᠷᠤᠭᠳᠠᠵᠤᠬᠤᠢ᠃ ᠯᠠᠪ ᠪᠠᠰᠠ ᠭᠠᠵᠢᠭᠤ ᠡᠪᠳᠡᠷᠡᠯ ᠳᠡᠭᠳᠡᠮᠦᠢ᠃ ᠬᠣᠯᠠ ᠠ᠋ᠴᠠ ᠪᠠᠷᠠᠭᠤᠨ ᠤᠢᠭᠤᠷ ᠤ᠋ᠨ ᠶᠡᠬᠡ ᠤᠯᠤᠰ ᠤ᠋ᠨ ᠦᠷᠭᠦᠩᠭᠡ ᠬᠠᠭᠠᠨ ᠯᠤᠭᠠ ᠰᠢᠩᠰᠠ ᠳᠠᠯᠠᠢ ᠶ᠋ᠢᠨ ᠠᠰᠢᠭ ᠢ᠋ ᠲᠡᠮᠡᠴᠡᠯᠳᠦᠪᠡ᠃ ᠯᠠᠪ ᠪᠠᠰᠠ ᠡᠴᠢᠵᠦ ᠢᠷᠡᠬᠦ ᠶ᠋ᠢᠨ ᠤᠶᠠᠭᠠ ᠥᠷᠲᠡᠭᠡ ᠪᠡᠯᠡᠳᠬᠡᠬᠦ ᠬᠡᠷᠡᠭᠲᠡᠢ ᠪᠣᠯᠪᠠ ᠃ ᠴᠡᠷᠢᠭ ᠦ᠋ᠨ ᠲᠤᠬᠠᠢ ᠵᠠᠭᠤᠨ ᠰᠠᠢᠳ ᠤ᠋ᠳ ᠵᠣᠬᠢᠰ ᠲᠤᠷ ᠵᠣᠬᠢᠴᠠᠭᠤᠯᠤᠨ᠂ ᠵᠢᠷᠤᠮ ᠢ᠋ᠶ᠋ᠠᠷ ᠵᠦᠢᠴᠢᠯᠡᠵᠦ᠂ ᠵᠥᠪᠳᠡᠨ ᠲᠣᠭᠲᠠᠭᠠᠵᠤ ᠲᠣᠳᠣᠷᠬᠠᠢᠯᠠᠨ ᠠᠢᠯᠠᠳᠬᠠᠭᠲᠤᠨ 》ᠬᠡᠮᠡᠵᠦᠬᠦᠢ᠃ ᠵᠠᠭᠤᠨ ᠨᠣᠶᠠᠳ ᠮᠢᠩᠭᠠᠨ ᠰᠠᠢᠳ ᠤ᠋ᠳ ᠲᠦᠮᠡᠨ ᠨᠠᠰᠤᠲᠤ᠂ ᠲᠦᠭ ᠲᠦᠮᠡᠨ ᠨᠠᠰᠤᠲᠤ ᠭᠡᠮᠡᠨ ᠮᠥᠷᠭᠥᠵᠦ᠂ ᠡᠨᠡ ᠵᠢᠯ ᠦ᠋ᠨ ᠰᠢᠨᠡ ᠶ᠋ᠢᠨ ᠵᠣᠯᠭᠠᠯᠲᠠ ᠶ᠋ᠢᠨ ᠪᠡᠯᠭᠡ ᠶ᠋ᠢᠨ ᠡᠯᠴᠢ ᠨᠠᠷ ᠠ᠋ᠴᠠ ᠭᠠᠭᠴᠠ ᠤᠢᠭᠤᠷ ᠤᠯᠤᠰ ᠤ᠋ᠨ ᠡᠯᠴᠢ ᠢᠷᠡᠭᠰᠡᠨ ᠦᠭᠡᠢ ᠲᠤᠯᠠ᠂ ᠲᠡᠷᠡ ᠭᠠᠵᠠᠷ ᠶᠡᠬᠡ ᠲᠡᠮᠡᠴᠡᠯᠳᠦᠭᠡᠨ ᠳᠡᠭᠳᠡᠭᠰᠡᠨ ᠢᠨᠤ ᠯᠠᠪ ᠪᠣᠯᠪᠠ᠃ ᠲᠡᠢᠨ ᠬᠦ᠌ ᠲᠡᠷᠡ ᠬᠢᠵᠠᠭᠠᠷ ᠤ᠋ᠨ ᠮᠡᠳᠡᠭᠡᠴᠢ ᠲᠤᠷᠰᠢᠭᠤᠯ ᠤ᠋ᠨ ᠤᠶᠠᠭᠠ ᠥᠷᠲᠡᠭᠡ ᠪᠡᠯᠡᠳᠬᠡᠬᠦ ᠶ᠋ᠢ ᠬᠡᠯᠡᠯᠴᠡᠨ ᠲᠣᠭᠲᠠᠭᠠᠵᠤ᠂ ᠪᠠᠷᠠᠭᠤᠨ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠤᠮᠠᠷᠠ ᠬᠢᠵᠠᠭᠠᠷ᠂ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠡᠮᠦᠨᠡ ᠵᠠᠬᠠ᠂ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠳᠤᠮᠳᠠᠭᠤᠷ᠂ ᠦᠷᠦᠮᠴᠢ ᠠᠢᠮᠠᠭ ᠤ᠋ᠨ ᠡᠮᠦᠨᠡᠭᠦᠷ᠂ ᠪᠠᠷᠰ ᠬᠣᠲᠠ ᠶ᠋ᠢᠨ ᠬᠣᠢᠭᠤᠷ᠂ ᠢᠯᠳᠡᠰᠢ ᠮᠥᠷᠡᠨ ᠦ᠌ ᠶᠡᠬᠡ ᠳᠣᠭᠤᠤᠷ᠂ ᠲᠣᠷᠭᠤᠳ ᠠᠢᠮᠠᠭ ᠤ᠋ᠨ ᠳᠣᠲᠣᠭᠤᠷ᠂ ᠲᠥᠪᠡᠳ ᠤᠯᠤᠰ ᠤ᠋ᠨ ᠳᠥᠭᠥᠮ᠂ ᠲᠡᠭᠷᠢ ᠡᠯᠡᠰᠦᠨ ᠦ᠌ ᠳᠠᠪᠴᠢ ᠪᠠᠷ ᠶᠢᠰᠦᠨ ᠬᠡᠯᠡᠨᠡ ᠮᠡᠷᠭᠡᠰᠢᠭᠰᠡᠨ ᠶᠡᠬᠡ ᠤᠷᠤᠭ ᠰᠠᠢᠳ ᠬᠦᠩ ᠵᠠᠯᠮᠠ ᠳ᠋ᠤᠷ ᠵᠡᠪᠡ ᠵᠠᠩᠵᠤᠨ ᠢ ᠬᠠᠪᠰᠤᠷᠭᠠᠨ ᠥᠭᠴᠦ᠂ ᠶᠡᠬᠡ ᠪᠠᠭᠤᠳᠠᠯ ᠭᠡᠷ ᠨᠡᠭᠦᠳᠡᠯ ᠦ᠋ᠨ ᠵᠢᠭᠰᠠᠭᠠᠯ ᠥᠭᠴᠦ᠂ ᠣᠷᠣᠨ ᠣᠷᠣᠨ ᠳ᠋ᠤᠷ ᠵᠠᠷᠯᠢᠭ ᠤ᠋ᠨ ᠵᠠᠷᠯᠠᠯ᠂ ᠵᠠᠰᠠᠭᠯᠠᠯ ᠤ᠋ᠨ ᠵᠠᠬᠢᠶᠠ ᠶ᠋ᠢ ᠵᠠᠷᠯᠠᠨ ᠲᠣᠭᠲᠠᠭᠠᠷᠠ ᠰᠠᠢᠨ ᠡᠳᠦᠷ ᠰᠣᠩᠭᠣᠨ ᠮᠣᠷᠳᠠᠭᠤᠯᠤᠨ ᠬᠥᠳᠡᠯᠭᠡᠪᠡ᠃ ᠡᠨᠡ ᠤᠢᠭᠤᠷ ᠤᠯᠤᠰ ᠤ᠋ᠨ ᠪᠢᠴᠢᠭ ᠦᠰᠦᠭ ᠣᠯᠠᠨ ᠠᠢᠮᠠᠭ ᠲᠤᠷ ᠤᠯᠠᠷᠢᠨ ᠳᠡᠯᠭᠡᠷᠡᠭᠰᠡᠨ ᠢᠨᠤ ᠶᠠᠭᠤᠨ ᠤ᠋ ᠤᠴᠢᠷ᠂ ᠲᠡᠭᠦᠨ ᠦ᠌ ᠦᠰᠦᠭ ᠢ᠋ ᠬᠡᠷᠡᠭᠯᠡᠬᠦ ᠢᠨᠤ ᠡᠭᠡᠨᠡᠭᠲᠡ ᠶᠠᠭᠤᠨ ᠤ᠋ ᠰᠢᠯᠲᠠᠭᠠᠨ ? ᠬᠡᠮᠡᠪᠡᠰᠦ ᠄ ᠣᠨ ᠵᠢᠯ ᠮᠠᠰᠢ ᠤᠳᠠᠵᠤ᠂ ᠤᠭ ᠠ᠋ᠴᠠ ᠨᠣᠮ ᠪᠢᠴᠢᠭ ᠲᠣᠷ ᠶᠡᠬᠡ ᠦᠨᠳᠦᠰᠦᠲᠦ ᠤᠯᠤᠰ ᠤ᠋ᠨ ᠤᠴᠢᠷ ᠢ᠋ ᠨᠠᠷᠢᠪᠴᠢᠯᠠᠨ ᠡᠰᠡ ᠲᠣᠭᠠᠴᠢᠪᠠᠰᠤ ᠣᠯᠠᠨ ᠪᠢᠴᠢᠭ ᠠᠢᠯᠠᠳᠬᠤ ᠮᠡᠷᠭᠡᠳ ᠢ᠋ᠶ᠋ᠡᠷ ᠤᠢᠭᠤᠷ ᠤᠯᠤᠰ ᠬᠡᠮᠡᠬᠦ ᠬᠣᠶᠠᠷ ᠦᠰᠦᠭ ᠢ᠋ ᠦᠵᠡᠮᠡᠭᠴᠡ ᠣᠢ ᠤᠨᠠᠭᠠᠨ ᠳ᠋ᠤᠷ ᠦᠯᠦ ᠣᠷᠣᠨ᠂ ᠣᠶᠤᠨ ᠳ᠋ᠤᠷ ᠦᠯᠦ ᠲᠥᠷᠥᠭᠳᠡᠨ᠂ ᠤᠬᠠᠭᠠᠨ ᠢ᠋ ᠦᠯᠦ ᠤᠬᠠᠨ᠂ ᠤᠴᠢᠷ ᠢ ᠦᠯᠦ ᠮᠡᠳᠡᠮᠦᠢ᠃ ᠤᠢᠭᠤᠷ ᠤᠯᠤᠰ ᠬᠡᠮᠡᠭᠴᠢ ᠪᠡᠷ ᠡᠷᠲᠡᠨ ᠦ᠌ ᠡᠨᠡᠳᠬᠡᠭ ᠲᠢᠪ ᠦ᠋ᠨ ᠤᠯᠤᠰ ᠤ᠋ᠨ ᠡᠩ ᠲᠡᠷᠢᠭᠦᠨ ᠦ᠌ ᠮᠠᡁᠠᠰᠠᠮᠠᠨᠳᠢ ᠬᠠᠭᠠᠨ ᠠ᠋ᠴᠠ ᠣᠯᠠᠨ ᠦᠶᠡ ᠰᠤᠨᠵᠤ᠂ ᠲᠥᠷᠥᠯᠬᠢ ᠣᠶᠤᠨ ᠮᠠᠲᠠᠯ ᠰᠢᠳᠦ ᠠᠷᠠᠭᠠᠲᠤ ᠲᠦᠭᠡᠯ ᠡᠵᠡᠨ ᠢ᠋ ᠲᠥᠷᠥᠵᠦ᠂ ᠡᠨᠡᠳᠬᠡᠭ ᠦ᠋ᠨ ᠭᠠᠩᠭᠠ ᠮᠦᠷᠡᠨᠡ ᠬᠠᠭᠤᠷᠴᠢᠭᠯᠠᠨ ᠲᠠᠶᠠᠭᠳᠠᠭᠰᠠᠨ ᠢ ᠲᠥᠪᠡᠳ ᠤᠯᠤᠰ ᠤ᠋ᠨ ᠢᠦᠢ ᠴᠦ᠂ ᠰᠠᠩ ᠴᠦ ᠮᠥᠷᠡᠨ ᠦ᠌ ᠰᠠᠯᠪᠤᠷᠢ ᠪᠠᠷ ᠥᠭᠡᠳᠡ ᠤᠷᠤᠰᠤᠨ ᠢᠷᠡᠵᠦ᠂ ᠲᠥᠪᠡᠳ ᠨᠠᠷ ᠣᠯᠵᠤ ᠲᠡᠵᠢᠭᠡᠨ ᠬᠣᠢᠨᠠ ᠬᠦᠵᠦᠭᠦᠨ ᠰᠠᠨᠳᠠᠯᠢᠲᠤ ᠬᠠᠭᠠᠨ ᠭᠡᠮᠡᠨ ᠰᠠᠭᠤᠭᠰᠠᠨ ᠲᠥᠭᠡᠯ ᠡᠵᠡᠨ ᠬᠡᠮᠡᠭᠴᠢ ᠶ᠋ᠢᠨ ᠣᠢᠷᠠ ᠦᠷᠡ ᠬᠡᠮᠡᠭᠴᠢ ᠳᠠᠯᠠᠢ ᠰᠤᠪᠢᠨ᠂ ᠠᠯᠲᠠᠨ ᠰᠢᠷᠡᠭᠡᠲᠦ ᠬᠠᠭᠠᠨ ᠤ᠋ ᠠᠬᠠ ᠪᠣᠯᠤᠮᠤᠢ᠃ ᠣᠢᠷᠠ ᠦᠶᠡ ᠪᠡᠷ ᠡᠴᠢᠭᠡ ᠡᠴᠡᠭᠡᠨ ᠬᠣᠵᠢᠮ ᠬᠣᠯᠠ ᠠᠭᠯᠠᠭ ᠬᠣᠢᠲᠤ ᠵᠦᠭ ᠦ᠋ᠨ ᠲᠡᠭᠷᠢ ᠡᠯᠡᠰᠦᠨ ᠢ᠋ ᠬᠥᠳᠡᠭᠡᠰᠴᠦ ᠯᠣᠪᠤ ᠨᠠᠭᠤᠷ ᠢ᠋ ᠭᠡᠲᠦᠯᠵᠦ᠂ ᠲᠢᠶᠠᠨ ᠱᠠᠨ ᠬᠡᠮᠡᠬᠦ ᠲᠩᠷᠢ ᠠᠭᠤᠯᠠᠨ ᠤ᠋ ᠥᠪᠥᠷ ᠪᠡᠶᠡ ᠶ᠋ᠢᠨ ᠡᠳᠦᠭᠡᠬᠢ ᠬᠠᠮᠢ ᠬᠡᠮᠡᠬᠦ᠂ ᠲᠦᠷᠹᠠᠨ ᠬᠡᠮᠡᠬᠦ᠂ ᠠᠯᠠᠭ ᠰᠢᠷᠠ ᠬᠡᠮᠡᠬᠦ᠂ ᠪᠠᠰᠠ ᠪᠠᠷᠠᠭᠤᠨᠰᠢ ᠺᠦᠴᠠ ᠬᠡᠮᠡᠬᠦ᠂ ᠠᠬᠠᠰᠤ ᠬᠡᠮᠡᠬᠦ ᠵᠡᠷᠭᠡ ᠶ᠋ᠢᠨ ᠭᠠᠵᠠᠷ ᠪᠠᠰᠠ ᠪᠠᠷᠠᠭᠤᠨᠰᠢ ᠪᠠᠯᠴᠢᠭ ᠬᠡᠮᠡᠬᠦ᠂ ᠢᠩᠵᠢᠰᠢᠷ ᠬᠡᠮᠡᠬᠦ᠂ ᠵᠠᠢᠷ ᠨᠠᠭᠤᠷ᠂ ᠪᠣᠷᠤᠢᠳ ᠲᠤᠯᠲᠠᠯᠠ ᠬᠠᠷᠠᠲᠤ ᠪᠡᠶᠡ᠂ ᠶᠦᠩ ᠯᠢᠩ ᠬᠡᠮᠡᠭᠰᠡᠨ ᠴᠠᠰᠤ ᠳᠠᠪᠠᠭᠠ᠂ ᠬᠥᠷ ᠬᠠᠷᠠ ᠤᠰᠤ᠂ ᠦᠷᠦᠮᠴᠢ ᠶ᠋ᠢᠨ ᠴᠢᠬᠡ ᠡᠮᠦᠨᠡ ᠵᠠᠬᠠ᠂ ᠬᠦ ᠴᠧᠩ ᠬᠡᠮᠡᠭᠰᠡᠨ ᠬᠠᠭᠤᠴᠢᠨ ᠬᠣᠲᠠ ᠪᠠᠷᠠᠬᠦᠯ ᠬᠡᠮᠡᠬᠦ ᠵᠡᠷᠭᠡ ᠶ᠋ᠢᠨ ᠭᠠᠵᠠᠷ᠂ ᠵᠡᠭᠦᠨ ᠪᠠᠷᠠᠭᠤᠨ ᠭᠤᠷᠪᠠᠨ ᠮᠢᠩᠭᠠᠨ ᠭᠠᠵᠠᠷ᠂ ᠡᠮᠦᠨᠡ ᠤᠮᠠᠷᠠ ᠮᠢᠩᠭᠠᠨ ᠢᠯᠡᠭᠦᠦ ᠭᠠᠵᠠᠷ᠂ ᠡᠨᠡ ᠭᠠᠵᠠᠷ ᠪᠠᠷᠠᠭᠤᠨ ᠵᠣᠣ – ᠷᠠᠰᠢᠯᠾᠥ᠋ᠮᠪᠦ ᠡᠴᠡ ᠵᠡᠭᠦᠨ ᠬᠣᠢᠲᠤ᠂ ᠴᠢᠬᠡ ᠬᠣᠢᠲᠤ᠂ ᠪᠠᠷᠠᠭᠤᠨ ᠬᠣᠢᠲᠤ᠂ ᠮᠢᠩᠭᠠᠨ ᠭᠠᠵᠠᠷ ᠢᠯᠡᠭᠦᠦ ᠬᠣᠯᠠ ᠪᠣᠢ ᠠᠮᠤᠢ᠃ ᠡᠨᠡ ᠬᠦ᠌ ᠣᠢᠷᠠ ᠦᠷᠡ ᠳᠠᠷᠤᠢ ᠲᠡᠷᠡ ᠣᠷᠣᠨ ᠤ᠋ ᠠᠬᠠᠰᠤ ᠶ᠋ᠢᠨ ᠭᠠᠵᠠᠷ ᠬᠦᠷᠴᠦ ᠲᠥᠪᠡᠳ ᠦ᠋ᠨ ᠲᠦᠭᠡᠯ ᠡᠵᠡᠨ᠂ ᠬᠦᠵᠦᠭᠦᠨ ᠰᠠᠨᠳᠠᠯᠢᠲᠤ ᠬᠠᠭᠠᠨ ᠤ᠋ ᠦᠷᠡᠰ ᠢ᠋ᠶ᠋ᠡᠨ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠠᠭᠠᠨ ᠠᠨᠤ ᠪᠠᠬᠠᠷᠬᠠᠨ ᠲᠡᠵᠢᠭᠡᠵᠦ᠂ ᠦᠷᠡ ᠪᠡᠨ ᠪᠣᠯᠭᠠᠨ ᠬᠣᠢᠨᠠ ᠬᠠᠭᠠᠨ ᠰᠠᠭᠤᠵᠤ᠂ ᠣᠢᠷᠠ ᠶ᠋ᠢᠨ ᠦᠷᠡ ᠬᠡᠮᠡᠭᠰᠡᠭᠡᠷ ᠤᠢᠭᠤᠷ ᠤᠯᠤᠰ ᠬᠡᠮᠡᠵᠦᠬᠦᠢ᠃ ᠡᠭᠦᠨᠴᠡ ᠪᠠᠰᠠ ᠬᠡᠳᠦᠢᠴᠢᠨᠡᠭᠡᠨ ᠦᠶᠡ ᠪᠣᠯᠵᠤ᠂ ᠴᠠᠩ ᠠᠨ ᠪᠠᠯᠭᠠᠰᠤᠨᠠ ᠰᠠᠭᠤᠭᠰᠠᠨ ᠳᠠᠩ ᠤᠯᠤᠰ ᠤ᠋ᠨ ᠲᠠᠢᠽᠥ᠋ᠩ ᠬᠠᠭᠠᠨ ᠯᠢ ᠱᠢ ᠮᠢᠨ ᠦ᠌ ᠦᠶᠡ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠡᠳ᠂ ᠲᠡᠷᠡ ᠣᠷᠣᠨ ᠤ᠋ ᠠᠭᠤᠯᠠ ᠬᠡᠲᠦᠷᠬᠡᠢ ᠥᠨᠳᠥᠷ᠂ ᠮᠥᠷᠡᠨ ᠮᠠᠰᠢ ᠤᠷᠲᠤ ᠲᠤᠯᠠ ᠥᠨᠳᠥᠷ ᠠᠭᠤᠳᠠᠮ ᠤᠯᠤᠰ ᠭᠡᠵᠦ ᠢᠷᠭᠡᠨ ᠦᠭᠡᠰ ᠢ᠋ᠶ᠋ᠡᠷ ᠭᠣᠣ ᠴᠠᠩ ᠤᠯᠤᠰ ᠭᠡᠮᠡᠨ ᠨᠡᠷᠡᠯᠡᠵᠦᠬᠦᠢ᠃ ᠳᠠᠩ ᠲᠠᠢᠽᠥ᠋ᠩ ᠦ᠋ᠨ ᠵᠸᠨ ᠭᠤᠸᠠᠨ ᠬᠡᠮᠡᠬᠦ ᠶ᠋ᠢᠨ ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠰᠢᠷᠠᠭᠴᠢᠨ ᠭᠠᠬᠠᠢ ᠵᠢᠯ ᠳ᠋ᠦ᠍ᠷ ᠤᠢᠭᠤᠷ ᠤ᠋ᠨ ᠭᠣᠣ ᠴᠠᠩ ᠤ᠋ᠨ ᠸᠠᠩ ᠡᠵᠡᠨ ᠽᠧᠦ ᠸᠸᠨ ᠲᠡᠢ ᠬᠡᠮᠡᠭᠴᠢ ᠨᠡᠷᠡᠲᠦ ᠬᠠᠨ ᠠᠨᠤ᠂ ᠪᠠᠷᠠᠭᠤᠨ ᠪᠡᠶᠡ ᠶ᠋ᠢᠨ ᠬᠠᠰᠠᠭ᠂ ᠪᠤᠷᠤᠢᠳ᠂ ᠬᠠᠰᠢᠬᠡᠷ᠂ ᠮᠠᠩᠭᠢᠰᠠᠷ ᠤ᠋ᠨ ᠵᠡᠷᠭᠡ ᠶ᠋ᠢᠨ ᠣᠯᠠᠨ ᠬᠣᠲᠣᠩᠭᠣᠳ ᠤ᠋ᠨ ᠰᠢ ᠢᠦᠢ ᠤᠯᠤᠰ ᠤ᠋ᠨ ᠳᠠᠩ ᠭᠦᠷᠦᠨ ᠳ᠋ᠦ᠍ᠷ ᠲᠠᠯᠠ ᠪᠡᠯᠡᠭ ᠬᠦᠷᠭᠡᠵᠦ ᠢᠷᠡᠬᠦ ᠬᠦᠨᠳᠦ ᠶᠡᠬᠡ ᠡᠳ᠋ ᠠᠭᠤᠷᠠᠰᠤᠨ ᠤ᠋ ᠡᠯᠴᠢ ᠶ᠋ᠢ ᠢᠨᠤ ᠵᠠᠮ ᠲᠣᠰᠴᠤ ᠪᠠᠷᠠᠲᠠᠯᠠ ᠪᠤᠯᠢᠶᠠᠨ ᠲᠠᠪᠴᠢᠯᠠᠭᠰᠠᠨ ᠪᠠ ᠪᠠᠰᠠ ᠳᠠᠩ ᠤᠯᠤᠰ ᠤ᠋ᠨ ᠪᠠᠷᠠᠭᠤᠨ ᠰᠢ ᠢᠦᠢ ᠶ᠋ᠢᠨ ᠣᠯᠠᠨ ᠤᠯᠤᠰ ᠲᠤᠷ ᠡᠴᠢᠬᠦ ᠡᠯᠴᠢ ᠶ᠋ᠢ ᠪᠠᠰᠠ ᠪᠠᠷᠢᠵᠤ ᠬᠣᠷᠢᠭᠰᠠᠨ᠂ ᠡᠳᠡᠭᠡᠷ ᠬᠡᠷᠡᠭ ᠦ᠋ᠳ ᠲᠣᠷ ᠲᠠᠢᠽᠥ᠋ᠩ ᠬᠠᠭᠠᠨ ᠤᠷᠢᠳᠠ ᠤᠬᠠᠭᠤᠯᠤᠨ ᠰᠤᠷᠭᠠᠬᠤ ᠡᠯᠴᠢ ᠢᠯᠡᠬᠡᠨ ᠡᠯᠰᠡᠨ ᠳᠠᠭᠠᠭᠤᠯᠰᠤᠭᠠᠢ ᠬᠡᠮᠡᠪᠡᠰᠦ᠂ ᠳᠠᠭᠠᠬᠤ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠮ᠂ ᠭᠡᠳᠡᠷᠭᠦ ᠬᠠᠷᠢᠨ ᠵᠡᠷᠭᠡᠯᠡᠳᠡᠭᠡ ᠪᠠᠢᠬᠤ ᠲᠦᠷᠺ ᠠᠢᠮᠠᠭ᠂ ᠲᠣᠷᠭᠤᠳ ᠤᠯᠤᠰ ᠨᠠᠷ ᠯᠤᠭᠠ ᠨᠡᠢᠯᠡᠵᠦ ᠳᠠᠩ ᠤᠯᠤᠰ ᠤ᠋ᠨ ᠵᠠᠬᠠ ᠨᠡᠢᠯᠡᠬᠦ ᠶᠠᠨ ᠴᠢ ᠬᠡᠮᠡᠬᠦ ᠤᠯᠤᠰ ᠤ᠋ᠨ ᠭᠠᠵᠠᠷ ᠢ᠋ ᠲᠠᠪᠴᠢᠯᠠᠨ ᠡᠵᠡᠷᠬᠡᠭᠰᠡᠨ ᠳ᠋ᠦ᠍ᠷ ᠶᠠᠨ ᠴᠢ ᠤᠯᠤᠰ ᠤ᠋ᠨ ᠡᠵᠡᠨ ᠡᠯᠴᠢ ᠵᠠᠷᠤᠨ᠂ ᠳᠠᠩ ᠲᠠᠢᠽᠥ᠋ᠩ ᠬᠠᠭᠠᠨ ᠳ᠋ᠤᠷ ᠵᠠᠭᠠᠯᠳᠤᠵᠤ᠂ ᠬᠠᠭᠠᠨ ᠤ᠋ ᠡᠮᠦᠨᠡ ᠡᠴᠡ ᠪᠠᠰᠠ ᠡᠯᠴᠢ ᠢᠯᠡᠭᠡᠵᠦ᠂ ᠪᠤᠰᠤᠳ ᠤ᠋ᠨ ᠭᠠᠵᠠᠷ ᠣᠷᠣᠨ ᠢ᠋ ᠡᠵᠡᠷᠬᠡᠭᠰᠡᠨ ᠢ ᠠᠰᠠᠭᠤᠯᠭᠠᠪᠠᠰᠤ᠂ ᠣᠭᠲᠣᠬᠠᠨ ᠠᠵᠢᠭ ᠦᠭᠡᠢ ᠪᠡᠷ ᠬᠠᠷᠢᠭᠤ ᠬᠠᠷᠢᠶᠠᠨ ᠳᠠᠭᠠᠷᠢᠵᠤ ᠪᠢᠴᠢᠭ ᠢᠯᠡᠭᠡᠵᠦᠬᠦᠢ᠃ ᠲᠡᠷᠡ ᠪᠢᠴᠢᠭ ᠦ᠋ᠨ ᠲᠣᠪᠴᠢᠶᠠ ᠦᠭᠡᠰ ᠢᠨᠤ:
《ᠤᠮᠠᠷᠠᠲᠤ ᠣᠭᠲᠠᠷᠭᠤᠢ ᠶ᠋ᠢᠨ ᠰᠢᠪᠠᠭᠤᠳ ᠪᠣᠯᠪᠠᠰᠤ ᠠᠭᠠᠷ ᠲᠤᠷ ᠨᠢᠰᠴᠦ ᠠᠮᠢᠲᠠᠨ ᠢ᠋ ᠢᠳᠡᠵᠦ ᠠᠮᠢᠳᠤᠷᠠᠮᠤᠢ᠂ ᠡᠮᠦᠨᠡᠲᠦ ᠬᠢᠲᠠᠳ ᠤ᠋ᠨ ᠬᠢᠷᠭᠤᠤᠯ ᠪᠥᠭᠡᠰᠦ ᠰᠢᠷᠠᠯᠵᠢ ᠳ᠋ᠤᠷ ᠰᠢᠷᠭᠤᠯᠠᠵᠤ ᠰᠢᠮᠠᠭᠤᠯ ᠲᠡᠭᠦᠵᠦ ᠤᠨᠳᠤᠷᠤᠮᠤᠢ᠃ ᠠᠢᠯ ᠪᠠᠢᠰᠢᠩ ᠤ᠋ᠨ ᠮᠢᠭᠤᠢ ᠪᠣᠯᠪᠠᠰᠤ ᠭᠡᠷ ᠲᠦ᠍ᠷ ᠲᠡᠵᠢᠭᠡᠭᠳᠡᠨ ᠪᠡᠯᠡᠨ ᠢᠳᠡᠰᠢ ᠪᠡᠷ ᠠᠮᠢᠳᠤᠷᠠᠮᠤᠢ᠃ ᠲᠠᠯᠠ ᠬᠡᠭᠡᠷᠡ ᠶ᠋ᠢᠨ ᠵᠤᠷᠠᠮᠠ ᠪᠥᠭᠡᠰᠦ ᠨᠦᠬᠡ ᠳ᠋ᠦ᠍ᠷ ᠨᠢᠭᠤᠵᠤ ᠴᠢᠭᠢᠭ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠤᠨᠳᠤᠷᠤᠮᠤᠢ᠃ ᠣᠷᠴᠢᠯᠠᠩ ᠤ᠋ᠨ ᠳᠡᠭᠡᠷᠡᠬᠢ ᠠᠮᠢᠲᠠᠨ ᠪᠦᠬᠦᠨᠡ ᠴᠥᠮ ᠢ᠋ᠶ᠋ᠡᠷ ᠥᠪᠡᠷ ᠥᠪᠡᠷᠦᠨ ᠬᠠᠮᠢᠶᠠᠲᠤ ᠠᠮᠢᠳᠤᠷᠠᠯ ᠪᠣᠢ ᠪᠥᠭᠡᠲᠡᠯᠡ᠂ ᠣᠯᠠᠨ ᠣᠪᠣᠭᠲᠤ ᠬᠢᠲᠠᠳ ᠪᠦᠬᠦᠨ ᠢ᠋ ᠨᠡᠢᠭᠡᠮᠯᠡᠨ ᠵᠠᠬᠢᠷᠤᠭᠰᠠᠨ ᠶᠡᠬᠡ ᠬᠠᠭᠠᠨ ᠬᠡᠮᠡᠭᠳᠡᠭᠡᠳ ᠶᠠᠭᠤᠨᠲᠤ ᠡᠳᠦᠢᠬᠡᠨ ᠵᠦᠢ ᠶ᠋ᠢ ᠦᠯᠦ ᠤᠬᠠᠮᠵᠢᠯᠠᠨ ᠤᠢᠭᠤᠷ ᠤᠯᠤᠰ ᠢ᠋ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠦᠮᠦᠢ᠃ ᠣᠯᠣᠭᠠᠢ ᠶᠠᠭᠤᠲᠠᠢ ᠤᠪ ᠦᠭᠡᠢ ᠪᠡᠷ ᠣᠢᠷᠠ ᠬᠣᠯᠠ ᠶ᠋ᠢ ᠤᠴᠢᠷ ᠦᠭᠡᠢ ᠬᠠᠮᠢᠶᠠᠷᠤᠶᠠ ᠬᠡᠮᠡᠮᠦᠢ 》ᠭᠡᠮᠡᠨ ᠳᠣᠭᠣᠭᠢᠯᠠᠨ ᠢᠯᠡᠭᠡᠭᠰᠡᠨ ᠳ᠋ᠦ᠍ᠷ᠂ ᠳᠠᠩ ᠲᠠᠢᠽᠥ᠋ᠩ ᠪᠡᠶᠡ ᠪᠡᠨ ᠬᠢᠷᠭᠤᠤᠯ᠂ ᠵᠤᠷᠠᠮᠠ ᠭᠡᠮᠡᠨ ᠳᠠᠭᠠᠷᠢᠨ ᠬᠠᠷᠢᠶᠠᠪᠠ ᠭᠡᠮᠡᠨ ᠶᠡᠬᠡᠯᠡ ᠬᠢᠯᠢᠩᠯᠡᠨ ᠮᠥᠨ ᠵᠢᠯ ᠦ᠋ᠨ ᠠᠷᠪᠠᠨ ᠬᠣᠶᠠᠷ ᠰᠡᠷᠡᠳᠡ᠂ ᠶᠡᠬᠡ ᠵᠠᠩᠵᠤᠨ ᠬᠤ᠌ ᠵᠢᠶᠦ᠋ᠨ ᠵᠢᠢ ᠬᠡᠮᠡᠭᠴᠢ ᠳ᠋ᠦ᠍ᠷ ᠭᠣᠣ ᠴᠠᠩ ᠸᠠᠩ ᠢ᠋ ᠳᠠᠢᠯᠠᠬᠤ ᠶᠤᠸᠠᠨᠱᠤᠸᠠᠢ ᠶ᠋ᠢᠨ ᠲᠠᠮᠠᠭᠠ ᠬᠦᠵᠦᠭᠦᠪᠴᠢᠯᠡᠭᠦᠯᠦᠨ ᠪᠠᠷᠠᠭᠤᠨ ᠬᠣᠢᠲᠤ᠂ ᠵᠢᠶᠣᠤ ᠭᠧ ᠬᠡᠮᠡᠬᠦ ᠬᠣᠲᠠ ᠳ᠋ᠤᠷ ᠶᠡᠬᠡ ᠽᠦᠩ ᠭᠤᠸᠠᠨ ᠲᠦᠰᠢᠮᠡᠯ ᠪᠣᠯᠭᠠᠨ ᠶᠡᠬᠡ ᠴᠡᠷᠢᠭ ᠢ᠋ ᠰᠢᠯᠭᠠᠭᠤᠯᠤᠨ ᠲᠡᠭᠰᠢᠯᠡᠬᠦᠢ ᠶ᠋ᠢ ᠲᠦᠷᠺ ᠠᠢᠮᠠᠭ ᠤ᠋ᠨ ᠡᠵᠡᠨ᠂ ᠰᠢᠦᠸᠠᠢ ᠶᠠᠨ ᠲᠦᠸᠧ ᠭᠧ ᠬᠡᠮᠡᠭᠴᠢ ᠤᠷᠢᠳᠠ ᠤᠢᠭᠤᠷ ᠯᠤᠭᠠ ᠬᠣᠷᠰᠢᠶᠠᠯᠠᠭᠰᠠᠨ ᠰᠢᠷᠬᠠ ᠶ᠋ᠢᠨ ᠲᠤᠭ ᠠ᠋ᠴᠠ ᠰᠣᠨᠣᠰᠴᠤ ᠶᠡᠬᠡᠯᠡ ᠠᠶᠤᠨ ᠨᠢᠭᠤᠵᠤ᠂ ᠡᠯᠴᠢ ᠢᠯᠡᠬᠡᠨ 《ᠬᠠᠭᠠᠨ ᠬᠡᠷᠪᠡ ᠭᠣᠣ ᠴᠠᠩ ᠢ᠋ ᠳᠠᠢᠯᠠᠪᠠᠰᠤ ᠪᠢ ᠤᠷᠢᠳᠠ ᠡᠮᠦᠨᠡ ᠪᠣᠯᠤᠨ ᠳᠠᠢᠯᠠᠨ ᠣᠷᠣᠰᠤᠭᠠᠢ 》ᠬᠡᠮᠡᠭᠰᠡᠨᠡ ᠳᠠᠩ ᠲᠠᠢᠽᠥ᠋ᠩ ᠪᠠᠰᠠ ᠡᠯᠰᠡᠨ ᠡᠷᠭᠦᠮᠵᠢᠯᠡᠬᠦ ᠬᠠᠰ ᠲᠠᠮᠠᠭᠠ ᠳᠠᠷᠤᠭᠰᠠᠨ ᠵᠣᠣ ᠪᠢᠴᠢᠭ ᠪᠠᠭᠤᠯᠭᠠᠨ ᠡᠶᠡ ᠪᠡᠷ ᠡᠯᠰᠡᠨ ᠳᠠᠭᠠᠭᠤᠯᠬᠤ ᠡᠯᠴᠢ ᠢᠯᠡᠭᠡᠪᠡᠰᠦ᠂ ᠽᠧᠦ ᠸᠸᠨ ᠲᠡᠢ ᠡᠪᠡᠳᠴᠢᠨᠲᠡᠢ ᠭᠡᠮᠡᠨ ᠰᠢᠯᠲᠠᠭᠯᠠᠵᠤ ᠢᠷᠡᠬᠦ ᠦᠭᠡᠢ ᠳ᠋ᠦ᠍ᠷ ᠳᠠᠩ ᠲᠠᠢᠽᠥ᠋ᠩ ᠰᠠᠶᠢ ᠶᠡᠬᠡᠳᠡ ᠬᠢᠯᠢᠩᠯᠡᠨ᠂ ᠬᠤ᠌ ᠵᠢᠶᠦ᠋ᠨ ᠵᠢᠢ ᠳ᠋ᠦ᠍ᠷ ᠰᠢᠦᠸᠠᠢ ᠸᠠᠨ ᠵᠢᠶᠦ᠋ᠨ ᠢ᠋ ᠬᠠᠪᠰᠤᠷᠭᠠᠨ ᠥᠭᠴᠦ᠂ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠭᠣᠣ ᠴᠠᠩ ᠢ᠋ ᠳᠠᠢᠯᠠᠷᠠ ᠮᠣᠷᠳᠠᠭᠤᠯᠪᠠ᠃ ᠳᠠᠩ ᠲᠠᠢᠽᠥ᠋ᠩ ᠦ᠋ᠨ ᠵᠸᠨ ᠭᠤᠸᠠᠨ ᠬᠡᠮᠡᠬᠦ ᠶ᠋ᠢᠨ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠣᠨ ᠴᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ ᠦ᠋ᠨ ᠭᠤᠷᠪᠠᠨ ᠰᠠᠷᠠ ᠳ᠋ᠤᠷ ᠪᠥᠯᠥᠭᠡ᠃ ᠲᠡᠭᠦᠨᠴᠡ᠂ ᠭᠣᠣ ᠴᠠᠩ ᠤ᠋ᠨ ᠸᠠᠩ ᠽᠧᠦ ᠸᠸᠨ ᠲᠡᠢ᠂ ᠳᠠᠩ ᠤᠯᠤᠰ ᠤ᠋ᠨ ᠴᠡᠷᠢᠭ ᠳᠠᠢᠯᠠᠷᠠ ᠢᠷᠡᠮᠦᠢ ᠬᠡᠮᠡᠬᠦ ᠶ᠋ᠢ ᠰᠣᠨᠣᠰᠴᠤ᠂ ᠤᠯᠤᠰ ᠤ᠋ᠨ ᠰᠠᠢᠳ ᠲᠦᠰᠢᠮᠡᠳ ᠦ᠋ᠨ ᠵᠦᠭ 《ᠳᠠᠩ ᠤᠯᠤᠰ ᠮᠠᠨ ᠤ᠋ ᠤᠯᠤᠰ ᠢ᠋ ᠳᠠᠢᠯᠠᠬᠤᠢ ᠳ᠋ᠤᠷ ᠳᠣᠯᠣᠭᠠᠨ ᠮᠢᠩᠭᠠᠨ ᠢᠯᠡᠭᠦᠦ ᠭᠠᠵᠠᠷ ᠬᠣᠯᠠ᠂ ᠨᠡᠩ ᠪᠠᠰᠠ ᠤᠰᠤ ᠦᠭᠡᠢ ᠬᠠᠭᠰᠠᠮᠠ ᠬᠠᠭᠤᠷᠠᠢ ᠲᠡᠭᠷᠢ ᠶᠡᠬᠡ ᠡᠯᠡᠰᠦ ᠶ᠋ᠢ ᠬᠥᠳᠡᠭᠡᠰᠦᠨ ᠭᠠᠷᠴᠤ ᠢᠷᠡᠬᠦᠢ ᠳ᠋ᠦ᠍ᠷ ᠬᠣᠶᠠᠷ ᠮᠢᠩᠭᠠᠨ ᠭᠠᠵᠠᠷ ᠪᠣᠢ᠃ ᠮᠢᠨᠦ ᠡᠨᠡ ᠭᠠᠵᠠᠷ ᠲᠤᠷ ᠦᠷᠡᠰ ᠲᠠᠷᠢᠶᠠ ᠦᠯᠦ ᠪᠣᠯᠪᠠᠰᠤᠷᠠᠨ᠂ ᠡᠪᠦᠯ ᠪᠣᠯᠪᠠᠰᠤ ᠬᠢᠲᠤᠭᠠ ᠮᠡᠲᠦ ᠬᠦᠢᠲᠡᠨ᠂ ᠵᠤᠨ ᠪᠣᠯᠪᠠᠰᠤ ᠬᠤᠢᠬᠠᠯᠠᠬᠤ ᠠᠳᠠᠯᠢ ᠬᠤᠷᠴᠠ ᠬᠠᠯᠠᠭᠤᠨ᠃ ᠬᠢᠲᠠᠳ ᠤ᠋ᠨ ᠣᠷᠣᠨ ᠤ᠋ ᠬᠡᠪᠡᠷᠡᠭ ᠪᠤᠯᠪᠠᠷᠠᠢ ᠠᠮᠢᠲᠠᠳ ᠬᠡᠷᠬᠢᠨ ᠬᠦᠷᠴᠦ ᠢᠷᠡᠨ ᠴᠢᠳᠠᠬᠤ ᠠᠵᠠᠢ !》ᠭᠡᠮᠡᠨ ᠬᠠᠷᠠᠬᠠᠨ ᠣᠮᠣᠷᠬᠠᠭᠯᠠᠨ ᠪᠠᠷᠳᠠᠩᠨᠠᠵᠤ ᠬᠤᠷᠢᠮᠯᠠᠨ ᠰᠠᠭᠤᠬᠤᠶᠠ᠂ ᠣᠢᠷᠠᠬᠢ ᠲᠤᠷᠰᠢᠭᠤᠯ ᠨᠢᠰᠬᠦ ᠳᠣᠪᠲᠣᠯᠭᠠ ᠪᠠᠷ ᠢᠷᠡᠵᠦ 《ᠳᠠᠩ ᠤᠯᠤᠰ ᠤ᠋ᠨ ᠠᠷᠪᠠᠨ ᠲᠦᠮᠡᠨ ᠦ᠌ ᠶᠡᠬᠡ ᠴᠡᠷᠢᠭ ᠮᠢᠩᠭᠠᠨ ᠲᠡᠮᠡᠭᠡᠨ ᠢ᠋ᠶ᠋ᠡᠷ ᠤᠰᠤ ᠠᠴᠢᠵᠤ᠂ ᠲᠡᠭᠷᠢ ᠡᠯᠡᠰᠦ ᠶ᠋ᠢ ᠬᠥᠳᠡᠭᠡᠰᠦᠨ ᠭᠠᠷᠴᠤ ᠢᠷᠡᠨ ᠠᠢᠰᠤᠢ 》ᠬᠡᠮᠡᠭᠰᠡᠨ ᠨᠢᠭᠡᠬᠡᠨ ᠦᠭᠡᠰ ᠲᠣᠷ ᠠᠶᠤᠨ ᠰᠣᠴᠢᠵᠤ᠂ ᠠᠷᠠᠵᠠ ᠪᠣᠷᠣᠵᠠ ᠠᠮᠠᠨ ᠠ᠋ᠴᠠ ᠴᠠᠯᠭᠢᠨ ᠦᠰᠦᠷᠦᠨ ᠭᠠᠷᠴᠤ ᠢᠷᠡᠭᠡᠳ᠂ ᠢᠳᠡᠭᠡᠨ ᠳᠡᠪᠡᠯᠬᠢᠯᠡᠨ᠌ ᠣᠭᠰᠢᠭᠤᠯᠵᠤ ᠤᠳᠠᠭᠰᠠᠨ ᠦᠭᠡᠢ ᠦᠬᠦᠭᠰᠡᠨ ᠳ᠋ᠦ᠍ᠷ ᠳᠡᠭᠦᠨᠦ ᠬᠥᠪᠡᠭᠦᠨ ᠦ᠌ ᠨᠡᠷᠡ ᠵᠠᠢᠰᠠᠩ ᠬᠡᠮᠡᠭᠴᠢ ᠪᠡᠷ ᠸᠠᠩ ᠤ᠋ᠨ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠨ᠂ ᠡᠳᠦᠷ ᠰᠣᠩᠭᠣᠵᠤ ᠡᠴᠢᠭᠡ ᠬᠠᠭᠠᠨ ᠤ᠋ ᠪᠠᠨ ᠴᠢᠨᠳᠠᠷ ᠢ᠋ ᠰᠢᠳᠬᠡᠨ ᠣᠷᠣᠰᠢᠭᠤᠯᠰᠤᠭᠠᠢ ᠭᠡᠮᠡᠨ ᠦᠢᠮᠡᠯᠳᠦᠵᠦ ᠪᠠᠢᠲᠠᠯᠠ᠂ ᠳᠠᠩ ᠤᠯᠤᠰ ᠤ᠋ᠨ ᠶᠡᠬᠡ ᠴᠡᠷᠢᠭ ᠬᠣᠲᠠ ᠳ᠋ᠤᠷ ᠲᠤᠯᠤᠨ ᠬᠦᠷᠴᠦ᠂ ᠳᠠᠩ ᠤ᠋ᠨ ᠣᠯᠠᠨ ᠵᠠᠩᠵᠤᠨ ᠨᠠᠷ ᠳᠠᠷᠤᠢ ᠡᠨᠡ ᠲᠠᠰᠢᠷᠠᠮ ᠢ᠋ᠶ᠋ᠠᠷ ᠪᠠᠢᠯᠳᠤᠨ ᠡᠪᠳᠡᠰᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠶᠤᠸᠠᠨᠱᠤᠸᠠᠢ ᠬᠤ᠌ ᠵᠢᠶᠦ᠋ᠨ ᠵᠢᠢ ᠥᠭᠦᠯᠡᠷᠦᠨ :
《ᠮᠠᠨ ᠤ᠋ ᠬᠠᠭᠠᠨ ᠡᠵᠡᠨ᠂ ᠭᠣᠣ ᠴᠠᠩ ᠤᠯᠤᠰ ᠢ᠋ ᠶᠣᠰᠣᠨ ᠦᠭᠡᠢ ᠭᠡᠮᠡᠨ ᠲᠠᠢᠯᠠᠭᠤᠯᠬᠤ ᠠᠲᠠᠯᠠ᠂ ᠪᠢᠳᠡ ᠥᠪᠡᠷ ᠢ᠋ᠶ᠋ᠡᠨ ᠶᠣᠰᠣᠨ ᠦᠭᠡᠢ ᠪᠡᠷ ᠪᠤᠰᠤᠳ ᠤ᠋ᠨ ᠡᠵᠡᠨ ᠡᠴᠢᠭᠡ ᠶ᠋ᠢᠨ ᠴᠢᠨᠳᠠᠷ ᠢ᠋ ᠣᠷᠣᠰᠢᠭᠤᠯᠬᠤ ᠬᠦᠨᠳᠦ ᠭᠠᠰᠠᠯᠠᠩ ᠳ᠋ᠤ᠌ ᠣᠷᠣᠵᠤ ᠪᠠᠢᠯᠳᠤᠪᠠᠰᠤ ᠶᠠᠭᠠᠬᠢᠨ ᠶᠠᠯᠠ ᠠᠰᠠᠭᠤᠬᠤ ᠶᠣᠰᠣᠲᠤ ᠶᠡᠬᠡ ᠴᠡᠷᠢᠭ ᠬᠡᠮᠡᠪᠡᠰᠦ ᠪᠣᠯᠤᠮᠤᠢ ?》ᠬᠡᠮᠡᠵᠦ᠂ ᠴᠡᠷᠢᠭ ᠢ᠋ᠶ᠋ᠡᠨ ᠲᠡᠳᠡᠨ ᠡᠭᠡᠭᠦᠯᠵᠦ᠂ ᠴᠢᠯᠥᠭᠡ ᠥᠭᠴᠦ᠂ ᠬᠡᠭᠦᠷ ᠢ᠋ ᠢᠨᠦ ᠭᠠᠷᠭᠠᠯᠭᠠᠨ ᠣᠷᠣᠰᠢᠭᠤᠯᠤᠭᠤᠯᠵᠤ᠂ ᠵᠢᠴᠢ ᠡᠳᠦᠷ ᠰᠠᠶᠢ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠤᠢᠭᠤᠷ ᠤ᠋ᠨ ᠬᠠᠳᠠᠨ ᠰᠢᠷᠣᠢ ᠶ᠋ᠢ ᠳᠡᠯᠡᠳᠴᠦ ᠳᠠᠭᠲᠠᠷᠰᠢᠭᠤᠯᠤᠭᠰᠠᠨ ᠬᠣᠲᠠ ᠶ᠋ᠢ ᠬᠠᠭᠠᠵᠤ ᠪᠠᠢᠯᠳᠤᠨ ᠮᠥᠨ ᠡᠳᠦᠷ ᠦ᠋ᠨ ᠦᠳᠡ ᠪᠣᠯᠲᠠᠯᠠ ᠬᠣᠲᠠ ᠶ᠋ᠢᠨ ᠳᠥᠷᠪᠡᠨ ᠡᠲᠡᠭᠡᠳ ᠢ᠋ ᠬᠠᠮᠲᠤᠪᠠᠷ ᠪᠠᠢᠯᠳᠤᠨ ᠳᠠᠷᠤᠭᠠᠳ ᠬᠣᠲᠠ ᠳ᠋ᠤᠷ ᠭᠠᠷᠴᠤ ᠬᠠᠭᠠᠯᠭᠠ ᠪᠦᠷᠢ ᠶ᠋ᠢ ᠪᠤᠯᠢᠶᠠᠨ ᠡᠵᠡᠯᠡᠭᠰᠡᠨ ᠳ᠋ᠦ᠍ᠷ ᠵᠠᠢᠰᠠᠩ ᠠᠷᠭᠠ ᠦᠭᠡᠶᠡ ᠥᠪᠡᠷᠦᠨ ᠪᠡᠶᠡ ᠪᠡᠷ ᠤᠭᠲᠤᠨ ᠭᠠᠷᠴᠤ ᠮᠥᠷᠭᠥᠵᠦ ᠳᠠᠭᠠᠪᠠ᠃ ᠡᠨᠡ ᠦᠨᠡᠬᠡᠷ ᠴᠢᠪ ᠴᠢᠬᠡ ᠶᠡᠷᠦ ᠶ᠋ᠢᠨ ᠦᠭᠡᠰ ᠦ᠋ᠨ 《ᠰᠢᠷᠠ ᠮᠦᠷᠡᠨᠡ ᠡᠰᠡ ᠲᠤᠯᠤᠨ ᠬᠦᠷᠴᠦ ᠦᠵᠡᠪᠡᠰᠦ ᠰᠢᠨᠲᠠᠷᠠᠬᠤ ᠰᠡᠳᠬᠢᠯ ᠬᠡᠷᠬᠢᠪᠡᠴᠦ ᠲᠥᠷᠥᠬᠦ ᠦᠭᠡᠢ 》ᠬᠡᠮᠡᠭᠴᠢ ᠢᠨᠤ ᠪᠣᠯᠠᠢ᠃ ᠲᠡᠭᠦᠨᠴᠡ ᠬᠤ᠌ ᠵᠢᠶᠦ᠋ᠨ ᠵᠢᠢ ᠴᠡᠷᠢᠭ ᠬᠤᠪᠢᠶᠠᠨ ᠭᠠᠷᠭᠠᠵᠤ᠂ ᠬᠣᠲᠠ ᠬᠣᠷᠣᠭᠠ ᠬᠣᠷᠢᠨ ᠬᠣᠶᠠᠷ ᠤ᠋ᠨ ᠳᠣᠲᠣᠷᠠ ᠣᠨᠳᠣᠷᠣᠯᠳᠤ ᠶᠡᠬᠡ ᠡᠷᠦᠬᠡ ᠨᠠᠢ᠍ᠮᠠᠨ ᠮᠢᠩᠭᠠᠨ ᠪᠥᠭᠡᠳ ᠳᠥᠴᠢᠨ ᠵᠢᠷᠭᠤᠭᠠ ᠶ᠋ᠢ ᠪᠠᠢᠴᠠᠭᠠᠨ ᠪᠢᠴᠢᠭᠯᠡᠭᠡᠳ ᠳᠠᠩ ᠲᠠᠢᠽᠥ᠋ᠩ ᠳ᠋ᠦ᠍ᠷ ᠠᠢᠯᠠᠳᠬᠠᠨ᠂ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠰᠡᠭᠦᠯ ᠢ᠋ᠶ᠋ᠡᠷ ᠴᠠᠩ ᠠᠨ ᠳ᠋ᠤᠷ ᠬᠦᠷᠴᠦ ᠢᠷᠡᠪᠡ᠃ ᠳᠠᠩ ᠲᠠᠢᠽᠥ᠋ᠩ ᠡᠨᠡ ᠬᠦ᠌ ᠭᠣᠣ ᠴᠠᠩ ᠤ᠋ᠨ ᠭᠠᠵᠠᠷᠠ ᠹᠦ᠂ ᠵᠧᠦ᠂ ᠰᠢᠶᠠᠨ ᠢ ᠪᠠᠢᠭᠤᠯᠤᠨ ᠵᠠᠬᠢᠷᠤᠭᠤᠯᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠶᠡᠬᠡ ᠰᠠᠢᠳ ᠸᠧᠢ ᠵᠧᠩ ᠬᠣᠷᠢᠭᠯᠠᠵᠤ᠂ ᠤᠴᠢᠷ ᠢ᠋ ᠲᠠᠢᠯᠤᠨ ᠭᠠᠷᠭᠠᠵᠤ ᠠᠢᠯᠠᠳᠬᠠᠭᠰᠠᠨ ᠠᠨᠤ᠄
《ᠭᠣᠣ ᠴᠠᠩ ᠤ᠋ᠨ ᠽᠧᠦ ᠸᠸᠨ ᠲᠡᠢ ᠶ᠋ᠢᠨ ᠶᠠᠯᠠ ᠳ᠋ᠤᠷ ᠠᠨᠤ ᠳᠠᠢᠯᠠᠷᠠ ᠢᠯᠡᠭᠡᠵᠦ᠂ ᠳᠡᠭᠦᠨᠦ ᠬᠥᠪᠡᠭᠦᠨ ᠬᠦᠨᠳᠦ ᠭᠠᠰᠠᠯᠠᠩ ᠢ᠋ ᠡᠭᠦᠷᠦᠨ ᠪᠠᠢᠵᠤ᠂ ᠪᠢᠳᠡᠨ ᠦ᠌ ᠤᠯᠤᠰ ᠲᠤᠷ ᠣᠷᠣᠵᠤ ᠳᠠᠭᠠᠵᠤᠬᠤᠢ᠃ ᠲᠡᠢᠮᠦ ᠶ᠋ᠢᠨ ᠲᠤᠯᠠᠳᠠ ᠲᠡᠳᠡᠨ ᠦ᠌ ᠠᠷᠠᠳ ᠢᠷᠭᠡᠳ ᠢ᠋ ᠢᠨᠤ ᠡᠨᠡᠷᠢᠨ ᠨᠢᠭᠦᠯᠡᠰᠴᠦ᠂ ᠵᠠᠭᠤᠨ ᠣᠪᠣᠭᠲᠠᠨ ᠢ᠋ ᠠᠨᠤ ᠠᠮᠤᠷ ᠠᠮᠢᠳᠤᠷᠠᠭᠤᠯᠤᠨ᠂ ᠲᠡᠭᠦᠨᠦ ᠡᠵᠡᠨ ᠦ᠌ ᠲᠠᠬᠢᠯ ᠳᠡᠪᠢᠭ ᠢ᠋ ᠠᠨᠤ ᠵᠠᠯᠭᠠᠮᠵᠢᠯᠠᠭᠤᠯᠤᠨ᠂ ᠲᠡᠳᠡᠨ ᠦ᠌ ᠬᠥᠪᠡᠭᠦᠨ ᠢ᠋ ᠢᠨᠤ ᠪᠠᠬᠠᠨ ᠪᠠᠶᠠᠵᠢᠭᠤᠯᠤᠨ ᠨᠣᠶᠠᠵᠢᠭᠤᠯᠪᠠᠰᠤ ᠲᠡᠷᠡ ᠠᠢᠮᠠᠭ ᠦᠶᠡ ᠤᠯᠠᠷᠢᠨ ᠪᠡᠶᠡᠰᠦᠨ ᠳᠠᠭᠠᠵᠤ᠂ ᠬᠠᠭᠠᠨ ᠡᠵᠡᠨ ᠦ᠌ ᠡᠷᠳᠡᠮᠲᠦ ᠨᠡᠷᠡ ᠠᠯᠳᠠᠷ ᠳᠥᠷᠪᠡᠨ ᠬᠢᠵᠠᠭᠠᠷ ᠲᠤᠷ ᠬᠥᠩᠭᠢᠷᠡᠰᠦᠨ ᠳᠠᠭᠤᠷᠢᠰᠴᠤ ᠭᠠᠳᠠᠭᠠᠳᠤ ᠠᠢᠮᠠᠭ ᠤ᠋ᠳ ᠴᠥᠮ ᠢ᠋ᠶ᠋ᠡᠷ ᠥᠪᠡᠷ ᠢ᠋ᠶ᠋ᠡᠨ ᠡᠷᠢᠨ ᠢᠷᠡᠵᠦ ᠳᠠᠭᠠᠭᠠᠳ ᠠᠯᠪᠠ ᠪᠠᠷᠢᠬᠤ ᠪᠣᠯᠠᠢ᠃ ᠬᠡᠷᠪᠡ ᠵᠧᠦ᠂ ᠰᠢᠶᠠᠨ ᠪᠠᠢᠭᠤᠯᠪᠠᠰᠤ ᠣᠳᠣ ᠪᠠᠰᠠ ᠲᠦᠰᠢᠮᠡᠯ ᠲᠤᠰᠢᠶᠠᠯᠲᠠᠨ ᠴᠡᠷᠢᠭ ᠬᠤᠶᠠᠭ ᠢᠯᠡᠭᠡᠵᠦ ᠬᠠᠮᠠᠭᠠᠯᠠᠨ ᠰᠠᠬᠢᠬᠤ ᠬᠡᠷᠡᠭᠲᠡᠢ ᠪᠣᠯᠵᠤ᠂ ᠡᠭᠦᠨᠦ ᠬᠣᠢᠨᠠ ᠠ᠋ᠴᠠ ᠣᠷᠣᠬᠤᠢ ᠳ᠋ᠤᠷ ᠣᠳᠣ ᠬᠥᠮᠦᠨ ᠮᠣᠷᠢ ᠵᠣᠪᠠᠵᠤ ᠵᠦᠳᠡᠨ ᠹᠦᠩᠯᠦ ᠴᠠᠯᠢᠩ ᠤ᠋ᠨ ᠰᠦᠢᠳᠬᠡᠯ ᠨᠡᠮᠡᠭᠳᠡᠵᠦ᠂ ᠬᠠᠭᠠᠨ ᠲᠥᠷᠥ ᠳ᠋ᠦ᠍ᠷ ᠣᠷᠣᠵᠠ ᠦᠭᠡᠢ ᠪᠥᠭᠡᠳ ᠬᠠᠷᠠᠭᠤᠯ ᠤ᠋ᠨ ᠵᠠᠩᠵᠤᠨ ᠴᠡᠷᠢᠭ ᠲᠦ᠍ᠷ ᠴᠦ᠍ ᠤᠰᠤ ᠰᠢᠷᠣᠢ ᠦᠯᠦ ᠵᠣᠬᠢᠯᠳᠤᠨ᠂ ᠪᠠᠰᠠ ᠬᠠᠷᠢᠨ ᠬᠥᠮᠦᠨ ᠠᠮᠢᠲᠠᠨ ᠳ᠋ᠤᠷ ᠡᠪᠡᠳᠴᠢᠨ ᠲᠠᠬᠤᠯ᠂ ᠦᠬᠦᠯ ᠵᠣᠪᠠᠯᠠᠩ ᠪᠣᠯᠬᠤ ᠪᠠᠷ ᠦᠯᠦ ᠪᠠᠷᠠᠮ᠂ ᠲᠡᠳᠡᠭᠡᠷ ᠤᠯᠤᠰ ᠠᠢᠮᠠᠭ ᠤ᠋ᠨ ᠭᠠᠵᠠᠷ ᠣᠷᠣᠨ ᠠ᠋ᠴᠠ ᠮᠠᠨ ᠤ᠋ ᠳᠤᠮᠳᠠᠳᠤ ᠶ᠋ᠢᠨ ᠤᠯᠤᠰ ᠲᠤᠷ ᠨᠢᠭᠡᠬᠡᠨ ᠴᠢᠮᠬᠢ ᠠᠮᠤ ᠦᠷᠡᠰ᠂ ᠨᠢᠭᠡᠬᠡᠨ ᠰᠢᠷᠬᠡᠭ ᠦ᠋ᠨ ᠪᠥᠰ ᠲᠣᠷᠭᠠᠮᠰᠤᠭ ᠤ᠋ᠨ ᠲᠡᠳᠦᠢᠬᠡᠨ ᠴᠦ᠍ ᠲᠤᠰᠠ ᠪᠣᠯᠬᠤ ᠵᠦᠢᠯ ᠦᠭᠡᠢ ᠪᠣᠯᠠᠢ᠃ ᠨᠡᠩᠳᠡ ᠪᠠᠰᠠ ᠮᠠᠰᠢ ᠠᠰᠢᠭ ᠦᠭᠡᠢ ᠨᠢᠭᠡᠨ ᠵᠦᠢᠯ ᠦ᠋ᠨ ᠬᠣᠷᠣᠮᠵᠢ ᠪᠣᠯᠬᠤ ᠶᠠᠪᠤᠳᠠᠯ ᠠᠨᠤ᠂ ᠮᠠᠨ ᠤ᠋ ᠮᠠᠰᠢᠳᠠ ᠬᠡᠷᠡᠭᠲᠡᠢ ᠴᠢᠬᠤᠯᠠ ᠬᠡᠷᠡᠭᠯᠡᠯ ᠦ᠋ᠨ ᠮᠥᠩᠭᠥ ᠵᠣᠭᠣᠰ᠂ ᠡᠳ᠋ ᠠᠠᠭᠤᠷᠠᠰᠤᠨ ᠢ᠋ᠶ᠋ᠠᠨ ᠪᠠᠬᠠᠨ ᠴᠤ᠌ ᠬᠡᠷᠡᠭ ᠲᠤᠰᠠ ᠦᠭᠡᠢ ᠬᠣᠪᠣᠷ ᠴᠢᠪᠬᠢᠭᠦᠨ᠂ ᠬᠠᠭᠤᠷᠠᠢ ᠡᠯᠡᠰᠦ ᠮᠠᠩᠬᠠᠨ ᠤ᠋ ᠭᠠᠵᠠᠷ ᠣᠷᠣᠨᠠ ᠪᠦᠷᠢᠯᠭᠡᠨ ᠰᠦᠢᠳᠬᠡᠬᠦ ᠢᠨᠤ ᠦᠨᠡᠬᠡᠷ ᠬᠠᠢᠷᠠᠬᠠᠨ 》ᠬᠡᠮᠡᠪᠡᠢ᠃
ᠳᠠᠩ ᠲᠠᠢᠽᠥ᠋ᠩ ᠥᠪᠡᠷᠡ ᠠᠢᠯᠠᠳᠬᠠᠯ ᠢ᠋ ᠠᠪᠤᠭᠰᠠᠨ ᠪᠣᠯᠪᠠᠴᠤ ᠵᠧᠦ᠂ ᠰᠢᠶᠠᠨ ᠪᠠᠢᠭᠤᠯᠬᠤ ᠶ᠋ᠢ ᠡᠭᠡᠨᠡᠭᠲᠡ ᠪᠠᠢᠭᠰᠠᠨ ᠦᠭᠡᠢ᠃ ᠭᠣᠣ ᠴᠠᠩ ᠤ᠋ᠨ ᠵᠡᠷᠭᠡ ᠭᠠᠵᠠᠷ ᠢ ᠰᠢ ᠵᠧᠦ ᠶ᠋ᠢᠨ ᠭᠠᠵᠠᠷ ᠭᠡᠮᠡᠨ ᠨᠡᠷᠡᠯᠡᠵᠦ᠂ ᠠᠨ ᠰᠢ ᠬᠡᠮᠡᠬᠦ ᠭᠠᠵᠠᠷ ᠲᠤᠷ ᠳᠦ ᠬᠤ᠌ ᠹᠦ – ᠪᠦᠭᠦᠳᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠶᠠᠮᠤᠨ ᠭᠡᠮᠡᠨ ᠪᠠᠢᠭᠤᠯᠵᠤ᠂ ᠳᠣᠲᠣᠷᠠ ᠠᠨᠤ ᠳᠦ ᠳᠦ ᠹᠦ – ᠶᠡᠬᠡ ᠳᠠᠷᠤᠩᠭᠤᠢ ᠲᠦᠰᠢᠮᠡᠯ ᠰᠠᠭᠤᠯᠭᠠᠵᠤ᠂ ᠳᠠᠷᠤᠩᠭᠤᠢᠯᠠᠨ ᠵᠠᠬᠢᠷᠪᠠ᠃ ᠡᠭᠦᠨᠦ ᠠᠩᠬᠠ ᠣᠨ ᠰᠢᠷᠠᠭᠴᠢᠨ ᠭᠠᠬᠠᠢ ᠵᠢᠯ᠂ ᠳᠠᠩ ᠤᠯᠤᠰ ᠤ᠋ᠨ ᠳᠥᠷᠪᠡᠨ ᠬᠢᠵᠠᠭᠠᠷ ᠤ᠋ᠨ ᠳᠣᠲᠣᠷᠠᠬᠢ ᠡᠯᠡ ᠡᠵᠡᠯᠡᠬᠦ ᠭᠠᠵᠠᠷ ᠣᠷᠣᠨ ᠢ᠋ ᠨᠡᠢᠭᠡᠮᠯᠡᠨ ᠪᠠᠢᠴᠠᠭᠠᠵᠤ ᠨᠡᠢᠯᠡᠭᠦᠯᠦᠨ ᠪᠢᠴᠢᠭᠯᠡᠵᠦ ᠢᠯᠡᠷᠬᠡᠢᠯᠡᠨ ᠠᠢᠯᠠᠳᠬᠠᠭᠰᠠᠨ ᠪᠦᠭᠦᠳᠡ ᠲᠣᠭᠠ ᠠᠨᠤ᠄ ᠹᠦ ᠬᠢᠭᠡᠳ ᠵᠧᠦ ᠢᠨᠤ ᠭᠤᠷᠪᠠᠨ ᠵᠠᠭᠤᠨ ᠲᠠᠪᠢᠨ ᠨᠠᠢ᠍ᠮᠠ᠂ ᠭᠠᠭᠴᠠ ᠰᠢᠶᠠᠨ ᠠᠨᠤ ᠨᠡᠢᠲᠡ ᠨᠢᠭᠡᠨ ᠮᠢᠩᠭᠠᠨ ᠲᠠᠪᠤᠨ ᠵᠠᠭᠤᠨ ᠠᠷᠪᠠ ᠪᠥᠯᠥᠭᠡ᠃ ᠡᠳᠦᠭᠡ᠂ ᠭᠣᠣ ᠴᠠᠩ ᠤ᠋ᠨ ᠵᠠᠬᠠ ᠬᠦᠷᠲᠡᠯᠡ᠂ ᠪᠠᠷᠠᠭᠤᠨ ᠬᠣᠢᠲᠤ ᠪᠡᠶᠡ ᠶ᠋ᠢ ᠴᠥᠮ ᠨᠡᠮᠡᠵᠦ ᠡᠵᠡᠯᠡᠭᠰᠡᠨ ᠲᠡᠢ ᠳᠠᠬᠢᠨ ᠪᠣᠳᠣᠵᠤ ᠦᠵᠡᠪᠡᠰᠦ᠂ ᠵᠡᠭᠦᠨ ᠬᠢᠵᠠᠭᠠᠷ ᠠᠨᠤ ᠵᠡᠭᠦᠨ ᠳᠠᠯᠠᠢ ᠶ᠋ᠢᠨ ᠡᠷᠭᠢ᠂ ᠪᠠᠷᠠᠭᠤᠨ ᠵᠠᠬᠠ ᠠᠨᠤ ᠶᠠᠨ ᠴᠢ ᠭᠠᠵᠠᠷ ᠲᠤᠯᠵᠤᠬᠤᠢ᠃ ᠡᠮᠦᠨᠡ ᠪᠡᠶᠡ ᠶ᠋ᠢᠨ ᠵᠢᠢ ᠭᠠᠵᠠᠷ ᠲᠤᠷ ᠬᠦᠷᠴᠦ᠂ ᠬᠣᠢᠲᠤ ᠬᠡᠴᠡ ᠬᠠᠭᠤᠷᠠᠢ ᠬᠠᠭᠰᠠᠮᠠ ᠲᠡᠭᠷᠢ ᠡᠯᠡᠰᠦᠨ ᠳ᠋ᠦ᠍ᠷ ᠲᠤᠯᠵᠤᠬᠤᠢ᠃ ᠲᠡᠭᠦᠨᠴᠡ ᠤᠷᠲᠤ ᠴᠠᠭᠠᠨ ᠬᠡᠷᠡᠮ ᠡᠴᠡ ᠭᠠᠳᠠᠨᠠ ᠪᠠᠰᠠ ᠴᠥᠮ ᠵᠧᠦ᠂ ᠰᠢᠶᠠᠨ ᠪᠠᠢᠭᠤᠯᠤᠨ ᠣᠷᠣᠰᠢᠭᠤᠯᠵᠤ᠂ ᠳᠠᠷᠤᠭᠤᠯᠤᠨ ᠵᠠᠬᠢᠷᠤᠭᠤᠯᠪᠠ᠃ ᠭᠠᠭᠴᠠ ᠯᠢᠶᠣᠣ ᠳ᠋ᠦᠩ᠂ ᠯᠢᠶᠣᠣ ᠰᠢ ᠶ᠋ᠢᠨ ᠵᠡᠷᠭᠡ ᠭᠠᠵᠠᠷ ᠬᠦᠷᠦᠭᠰᠡᠨ ᠦᠭᠡᠢ᠃ ᠲᠡᠷᠡ ᠲᠤᠬᠠᠢ ᠶ᠋ᠢᠨ ᠳᠠᠩ ᠤᠯᠤᠰ ᠤ᠋ᠨ ᠲᠢᠪ ᠳᠡᠯᠡᠬᠡᠢ ᠶ᠋ᠢᠨ ᠠᠭᠤᠳᠠᠮ ᠶᠡᠬᠡ ᠶ᠋ᠢ ᠬᠡᠮᠵᠢᠶᠡᠯᠡᠨ ᠶᠠᠪᠤᠵᠤ ᠠᠢᠯᠠᠳᠬᠠᠭᠰᠠᠨ ᠠᠨᠤ᠄ ᠵᠡᠭᠦᠨ ᠡᠴᠡ ᠪᠠᠷᠠᠭᠤᠨᠰᠢ ᠣᠭᠲᠣᠯᠵᠤ ᠭᠠᠷᠬᠤᠢ ᠳ᠋ᠤᠷ ᠶᠢᠰᠦᠨ ᠮᠢᠩᠭᠠᠨ ᠲᠠᠪᠤᠨ ᠵᠠᠭᠤᠨ ᠠᠷᠪᠠᠨ ᠭᠠᠵᠠᠷ᠃ ᠡᠮᠦᠨᠡ ᠤᠮᠠᠷᠠ ᠪᠠᠷ ᠬᠠᠷᠢᠯᠴᠠᠨ ᠠᠯᠤᠰᠯᠠᠭᠰᠠᠨ ᠠᠨᠤ ᠨᠢᠭᠡᠨ ᠲᠦᠮᠡᠨ ᠦ᠌ ᠭᠠᠳᠠᠨᠠ ᠶᠢᠰᠦᠨ ᠮᠢᠩᠭᠠᠨ ᠪᠥᠭᠡᠳ ᠠᠷᠪᠠᠨ ᠨᠠᠢ᠍ᠮᠠᠨ ᠭᠠᠵᠠᠷ ᠬᠡᠮᠡᠵᠦᠬᠦᠢ᠃ ᠬᠣᠵᠢᠮ ᠤ᠋ᠨ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠡᠵᠡᠯᠡᠭᠰᠡᠨ ᠲᠢᠪ ᠳᠡᠯᠡᠬᠡᠢ ᠶ᠋ᠢᠨ ᠳᠥᠷᠪᠡᠨ ᠬᠤᠪᠢ ᠶ᠋ᠢᠨ ᠨᠢᠭᠡᠨ ᠬᠤᠪᠢ ᠶ᠋ᠢ ᠡᠵᠡᠯᠡᠭᠰᠡᠨ ᠪᠥᠯᠥᠭᠡ᠃ ᠳ᠋ᠠᠢ ᠮᠢᠩ ᠤᠯᠤᠰ ᠭᠠᠭᠴᠠ ᠡᠳᠦᠭᠡᠬᠢ ᠳᠠᠢᠴᠢᠩ ᠤᠯᠤᠰ᠂ ᠶᠤᠸᠠᠨ ᠤᠯᠤᠰ ᠤ᠋ᠨ ᠪᠠᠭᠠ ᠬᠠᠭᠠᠰ – ᠠᠷᠪᠠᠨ ᠭᠤᠷᠪᠠᠬᠠᠨ ᠮᠣᠵᠢ ᠶ᠋ᠢ ᠡᠵᠡᠯᠡᠵᠦᠬᠦᠢ᠃ ᠠᠯᠢᠪᠠ 《ᠭᠤᠷᠪᠠᠨ ᠦᠰᠦᠭ ᠦ᠋ᠨ ᠨᠣᠮ 》 ᠤ᠋ᠨ ᠲᠣᠪᠴᠢᠶᠠ᠂ 《ᠳᠥᠷᠪᠡᠨ ᠦᠭᠡᠰ ᠦ᠋ᠨ ᠬᠤᠷᠢᠶᠠᠩᠭᠤᠢ ᠲᠣᠯᠲᠣ 》 ᠶ᠋ᠢᠨ ᠢᠷᠭᠡᠨ ᠪᠢᠴᠢᠭ ᠦ᠋ᠳ ᠪᠦᠬᠦᠨᠡ ᠴᠥᠮ ᠡᠩ ᠡᠷᠲᠡᠨ ᠡᠴᠡ ᠵᠢᠷᠭᠤᠭᠠᠨ ᠮᠢᠩᠭᠠᠨ ᠰᠢᠬᠠᠮ ᠣᠨ ᠵᠢᠯ ᠦ᠋ᠨ ᠳᠣᠲᠣᠷᠠᠬᠢ ᠶ᠋ᠢᠨ ᠦᠶᠡ ᠡᠴᠡ ᠡᠳᠦᠭᠡ ᠳ᠋ᠦ᠍ᠷ ᠭᠦᠷᠦᠨ ᠬᠦᠷᠲᠡᠯᠡ᠂ ᠲᠢᠪ ᠳᠡᠯᠡᠬᠡᠢ ᠶ᠋ᠢ ᠠᠭᠤᠳᠠᠮ ᠡᠵᠡᠯᠡᠭᠰᠡᠨ ᠪᠠ ᠤᠯᠤᠰ ᠭᠦᠷᠦᠨ ᠢ᠋ ᠣᠯᠠᠨ ᠬᠤᠷᠢᠶᠠᠮᠵᠢᠯᠠᠭᠰᠠᠨ ᠢ᠋ᠶ᠋ᠠᠷ ᠳ᠋ᠠᠢ ᠶᠤᠸᠠᠨ ᠤᠯᠤᠰ ᠲᠤᠷ ᠭᠦᠷᠦᠭᠴᠢᠳ ᠨᠢᠭᠡᠬᠡᠨ ᠴᠦ᠍ ᠪᠡᠷ ᠦᠭᠡᠢ ᠭᠡᠮᠡᠨ ᠳᠣᠳᠤᠷᠬᠠᠶᠠ ᠲᠣᠭᠠᠴᠢᠨ ᠭᠠᠷᠭᠠᠵᠤ ᠪᠣᠢ ᠠᠮᠤᠢ ᠃ ᠲᠡᠷᠡ ᠪᠢᠴᠢᠭ ᠬᠡᠮᠡᠭᠴᠢ ᠢᠷᠭᠡᠨ ᠪᠢᠴᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠠ ᠬᠥᠪᠡᠭᠦᠳ ᠦ᠋ᠨ ᠤᠩᠰᠢᠬᠤ ᠲᠠᠢᠯᠪᠤᠷᠢᠲᠤ《ᠰᠠᠨ ᠽᠢ ᠵᠢᠩ 》᠂ 《ᠰᠧ ᠱᠢ ᠵᠢᠶᠠᠨ ᠯᠢᠦᠸᠠᠢ 》ᠬᠡᠮᠡᠬᠦ ᠪᠢᠴᠢᠭ ᠦ᠋ᠳ ᠪᠣᠯᠠᠢ᠃ ᠬᠡᠳᠦᠬᠡᠨ ᠵᠠᠭᠤᠨ ᠦᠰᠦᠭ ᠦ᠋ᠨ ᠲᠠᠢᠯᠪᠤᠷᠢᠲᠤ ᠬᠡᠦᠬᠡᠳ ᠦ᠋ᠨ ᠰᠤᠷᠭᠠᠯ ᠪᠤᠶᠤ᠃ ᠬᠣᠢᠴᠢᠬᠢ ᠶ᠋ᠢᠨ ᠮᠡᠷᠭᠡᠳ ᠢ᠋ᠶ᠋ᠡᠷ ᠮᠡᠳᠡᠪᠡᠰᠦ ᠵᠣᠬᠢᠮᠤᠢ᠃ ᠵᠢᠴᠢ ᠪᠠᠰᠠ ᠡᠨᠡ ᠬᠦ᠌ ᠳᠠᠩ ᠲᠠᠢᠽᠥ᠋ᠩ ᠬᠠᠭᠠᠨ ᠤ᠋ ᠰᠠᠭᠤᠭᠰᠠᠨ ᠴᠠᠩ ᠠᠨ ᠪᠠᠯᠭᠠᠰᠤᠨᠠ ᠮᠠᠨ ᠤ᠋ ᠡᠳᠦᠭᠡᠬᠢ ᠴᠠᠭ ᠤ᠋ᠨ ᠳᠠᠢᠴᠢᠩ ᠭᠦᠷᠦᠨ ᠦ᠌ ᠬᠠᠭᠠᠨ ᠡᠵᠡᠨ ᠪᠣᠯᠤᠭᠴᠢᠳ ᠲᠡᠷᠡ ᠬᠦ᠌ ᠭᠠᠵᠠᠷᠠ ᠪᠠᠰᠠ ᠬᠦ᠌ ᠨᠢᠭᠡᠨ ᠦᠶᠡ ᠬᠥᠭᠵᠢᠨ ᠮᠠᠨᠳᠤᠬᠤ᠂ ᠭᠤᠴᠢᠨ ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠪᠠᠳᠠᠷᠠᠯ ᠤ᠋ᠨ ᠪᠠᠶᠠᠷ ᠪᠣᠢ ᠪᠣᠯᠠᠢ᠃ ᠠᠯᠢ ᠣᠨ ᠤ᠋ ᠶᠠᠮᠪᠠᠷ ᠵᠢᠯ ᠪᠣᠢ ᠬᠡᠮᠡᠪᠡᠰᠦ᠄ ᠴᠢᠩ ᠲᠠᠢᠽᠦ ᠥᠨᠳᠥᠷ ᠪᠣᠭᠳᠠ ᠶ᠋ᠢᠨ ᠪᠡᠶᠡ ᠡᠴᠡ ᠳᠣᠷᠣᠭᠰᠢ ᠲᠣᠭᠠᠯᠠᠨ᠂ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠬᠠᠭᠠᠨ ᠡᠵᠡᠨ ᠪᠠᠳᠠᠷᠠᠭᠤᠯᠲᠤ ᠲᠥᠷᠥ ᠶ᠋ᠢᠨ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠣᠨ ᠤ᠋ ᠴᠠᠭᠠᠭᠴᠢᠨ ᠲᠠᠤᠯᠠᠢ ᠵᠢᠯ ᠡᠴᠡ ᠡᠬᠢᠯᠡᠨ ᠳᠣᠷᠣᠭᠰᠢ ᠲᠣᠭᠠᠯᠠᠵᠤ᠂ ᠮᠤᠬᠤᠷ ᠠᠷᠪᠠᠨ ᠵᠢᠯ ᠳᠡᠭᠡᠷᠡ ᠢᠨᠤ ᠂ ᠢᠯᠡᠭᠦᠦ ᠨᠠᠢ᠍ᠮᠠᠨ ᠰᠠᠷᠠᠲᠤ ᠴᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ ᠲᠣᠬᠢᠶᠠᠯᠳᠤᠮᠤᠢ᠃ ᠡᠨᠡ ᠬᠦ᠌ ᠴᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ ᠡᠴᠡ ᠡᠬᠢᠯᠡᠨ ᠳᠣᠷᠣᠭᠰᠢ ᠲᠣᠭᠠᠯᠠᠵᠤ ᠭᠤᠴᠢᠨ ᠵᠢᠷᠭᠤᠭᠠᠨ ᠵᠢᠯ ᠴᠠᠩ ᠠᠨ ᠪᠠᠯᠭᠠᠰᠤᠨᠠ ᠪᠠᠶᠠᠷ ᠪᠠᠳᠠᠷᠠᠨ ᠪᠡᠶᠡᠰᠦᠨ ᠵᠢᠷᠭᠠᠬᠤ ᠶ᠋ᠢ ᠬᠡᠯᠡᠵᠦ ᠪᠦᠷᠢᠳᠬᠡᠪᠡᠢ᠃ ᠡᠨᠡ ᠭᠤᠴᠢᠨ ᠵᠢᠷᠭᠤᠭᠠᠨ ᠣᠨ ᠳ᠋ᠤᠷ ᠤᠯᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ ᠲᠣᠬᠢᠶᠠᠯᠳᠤᠮᠤᠢ᠃ ᠡᠨᠡ ᠤᠯᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ ᠡᠴᠡ ᠡᠬᠢᠯᠡᠨ ᠳᠣᠷᠣᠭᠰᠢ ᠪᠠᠰᠠ ᠵᠢᠷᠭᠤᠭᠠᠨ ᠵᠢᠯ ᠲᠣᠭᠠᠯᠠᠪᠠᠰᠤ᠂ ᠴᠠᠭᠠᠭᠴᠢᠨ ᠮᠣᠭᠠᠢ ᠵᠢᠯ ᠪᠣᠯᠤᠮᠤᠢ᠃ ᠡᠨᠡ ᠴᠠᠭᠠᠭᠴᠢᠨ ᠮᠣᠭᠠᠢ ᠵᠢᠯ ᠦ᠋ᠨ ᠵᠢᠷᠭᠠᠯᠠᠩ ᠤ᠋ᠨ ᠠᠶᠠᠰ ᠠᠭᠠᠷ ᠲᠤᠷ ᠲᠤᠯᠭᠠᠯᠴᠠᠵᠤ᠂ ᠵᠠᠶᠠᠭᠠᠨ ᠤ᠋ ᠨᠠᠷᠠᠨ ᠵᠡᠭᠦᠨ ᠣᠭᠲᠠᠷᠭᠤᠢ ᠳ᠋ᠤᠷ ᠵᠢᠭᠠᠭᠰᠠᠭᠠᠷ ᠮᠠᠨᠳᠤᠵᠤ᠂ ᠬᠥᠮᠦᠨ ᠪᠦᠷᠢ ᠬᠥᠬᠡ ᠮᠥᠩᠬᠡ ᠣᠭᠲᠠᠷᠭᠤᠢ ᠶ᠋ᠢᠨ ᠰᠠᠯᠬᠢᠨ ᠢ᠋ ᠬᠦᠩᠭᠢᠨᠡᠲᠡᠯᠡ ᠳᠠᠭᠤᠯᠠᠯᠴᠠᠬᠤᠢ ᠲᠡᠷᠡ ᠬᠦ᠌ ᠴᠠᠭ ᠲᠤᠷ ᠬᠥᠭᠰᠢᠨ ᠪᠠᠭᠰᠢ ᠶ᠋ᠢ ᠮᠢᠨᠦ ᠪᠢᠰᠢᠷᠡᠮᠦᠢ᠃ ᠬᠥᠮᠦᠨ ᠵᠢᠷᠭᠠᠬᠤᠢ ᠶ᠋ᠢᠨ ᠬᠥᠷᠥᠭ ᠲᠣᠭᠠ ᠶ᠋ᠢ ᠬᠦᠨᠳᠦᠳᠬᠡᠨ ᠬᠢᠴᠢᠶᠡᠵᠦ ᠬᠢᠨᠠᠨ ᠰᠢᠨᠵᠢᠵᠦ ᠦᠵᠡᠭᠳᠡᠬᠦᠢ᠃
ᠬᠣᠢᠴᠢᠬᠢ ᠦᠶᠡ ᠶ᠋ᠢᠨ ᠪᠢᠴᠢᠭ ᠬᠠᠭᠤᠯᠤᠭᠴᠢᠳ ᠡᠨᠡ ᠬᠥᠷᠥᠭ ᠲᠣᠭᠠ ᠳ᠋ᠤᠷ ᠬᠦᠷᠪᠡᠰᠦ ᠡᠷᠬᠡᠪᠰᠢ ᠠᠷᠪᠠᠨ ᠬᠤᠪᠢ ᠬᠢᠴᠢᠶᠡᠨ ᠨᠠᠷᠢᠪᠴᠢᠯᠠᠨ ᠳᠠᠬᠢᠨ ᠳᠠᠪᠲᠠᠨ ᠬᠢᠨᠠᠨ ᠲᠠᠭᠠᠴᠠᠭᠤᠯᠬᠤ ᠪᠣᠯᠪᠠᠤ᠂ ᠬᠡᠳᠦᠢᠪᠡᠷ ᠡᠨᠡ ᠬᠦ᠌ ᠵᠢᠷᠠᠨ ᠵᠢᠯ ᠥᠩᠭᠡᠷᠡᠪᠡᠴᠦ ᠮᠥᠨ ᠥᠩᠭᠡᠷᠡᠭᠰᠡᠨ ᠢ᠋ ᠮᠡᠳᠡᠬᠦ ᠲᠤᠰᠠ ᠪᠣᠢ᠃ ᠪᠢᠷ ᠦ᠋ᠨ ᠮᠡᠷᠭᠡᠳ ᠪᠡᠷ ᠬᠢᠴᠢᠶᠡᠭᠳᠡᠬᠦᠢ᠃ ᠬᠣᠯᠠ ᠣᠢᠷᠠ ᠶ᠋ᠢᠨ ᠬᠤᠷᠢᠮ ᠤ᠋ᠨ ᠪᠡᠯᠡᠭᠯᠡᠯ ᠳ᠋ᠦ᠍ᠷ ᠬᠣᠴᠢᠯᠠᠯ ᠪᠤᠷᠤᠭᠤᠰᠢᠶᠠᠯ ᠭᠡᠮᠡᠨ ᠦᠭᠡᠢ ᠪᠤᠶᠤ᠃ ᠬᠤᠪᠢᠯᠠᠭᠤᠨ ᠬᠤᠲᠤᠭᠲᠤ ᠶ᠋ᠢᠨ ᠬᠣᠵᠢᠮ ᠢ᠋ ᠲᠥᠯᠥᠭᠡᠯᠡᠬᠦᠢ ᠳ᠋ᠦ᠍ᠷ ᠬᠤᠪᠢᠷᠠᠯ ᠰᠤᠨᠵᠢᠭᠤᠷᠢ ᠭᠡᠮᠡᠨ ᠪᠠᠢᠬᠤ ᠠᠮᠤᠢ᠂ ᠬᠣᠬᠣᠢ ᠬᠠᠯᠠᠬᠠᠢ ! ᠬᠣᠢᠴᠢᠬᠢ ᠶ᠋ᠢᠨ ᠮᠡᠷᠭᠡᠳ ᠬᠣᠭᠣᠰᠣᠨ ᠭᠡᠮᠡᠨ ᠪᠢᠲᠡᠭᠡᠢ ᠪᠠᠰᠤᠮᠵᠢᠯᠠᠨ ᠦᠵᠡᠵᠦ ᠥᠩᠭᠡᠷᠡᠭᠦᠯ᠃ ᠬᠣᠣᠰᠯᠠᠯ ᠬᠤᠪᠢᠯᠤᠯ᠂ ᠬᠣᠷᠣᠭᠳᠠᠯ ᠨᠡᠮᠡᠭᠳᠡᠯ ᠢ᠋ ᠬᠣᠳᠣᠭᠣᠳᠣ ᠴᠡᠭᠡᠵᠢᠨᠡ ᠬᠣᠯᠪᠣᠨ ᠰᠢᠨᠵᠢᠪᠡᠰᠦ ᠳᠠᠷᠤᠢ ᠣᠨᠣᠶᠤ᠃
ᠤᠢᠭᠤᠷ ᠤᠯᠤᠰ ᠤ᠋ᠨ ᠤᠭ ᠤᠴᠢᠷ ᠢ᠋ ᠤᠬᠤᠴᠢᠯᠠᠨ ᠳᠠᠢᠯᠠᠬᠤᠶᠠ ᠤᠬᠠᠮᠰᠠᠷ ᠦᠭᠡᠢ ᠳᠠᠩ ᠤᠯᠤᠰ ᠤ᠋ᠨ ᠲᠠᠢᠽᠥ᠋ᠩ ᠬᠠᠭᠠᠨ ᠤ᠋ ᠬᠡᠷᠡᠭ ᠭᠠᠷᠴᠤ ᠢᠷᠡᠭᠡᠳ᠂ ᠳᠠᠩ ᠤ᠋ᠨ ᠨᠡᠢᠰᠯᠡᠭᠰᠡᠨ ᠴᠠᠩ ᠠᠨ ᠪᠠᠯᠭᠠᠰᠤᠨ ᠤ᠋ ᠴᠠᠭ ᠤᠯᠠᠷᠢᠯ ᠤ᠋ᠨ ᠳᠠᠬᠢᠨ ᠡᠷᠭᠢᠨ ᠤᠯᠠᠷᠢᠬᠤ ᠪᠠᠶᠠᠷ ᠤ᠋ᠨ ᠪᠡᠯᠭᠡ ᠭᠠᠷᠴᠤ ᠢᠷᠡᠵᠦᠬᠦᠢ᠃ ᠡᠷᠲᠡᠨ ᠦ᠌ ᠡᠷᠲᠡ᠂ ᠬᠤᠸᠠᠩ ᠱᠢ ᠬᠦᠩ – ᠰᠢᠷᠠ ᠴᠢᠯᠠᠭᠤᠨ ᠢ᠋ᠶ᠋ᠠᠷ ᠪᠠᠭᠰᠢ ᠪᠠᠷᠢᠭᠴᠢᠳ ᠭᠠᠷᠪᠠ ᠬᠡᠮᠡᠬᠦᠯᠡ᠂ ᠡᠳᠦᠭᠡ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠡᠳ ᠱᠠᠰᠢᠨ ᠢ᠋ ᠪᠠᠳᠠᠷᠠᠭᠤᠯᠤᠭᠴᠢ ᠰᠠᠢᠳ ᠲᠣᠢᠨ ᠤ᠋ ᠰᠢᠪᠰᠢᠨ ᠦᠯᠡᠳᠡᠭᠡᠭᠰᠡᠨ ᠲᠣᠯᠢ ᠳ᠋ᠤᠷ ᠬᠤᠰᠤᠯᠳᠤᠵᠤᠬᠤᠢ᠃ ᠴᠠᠩ ᠠᠨ ᠪᠠᠯᠭᠠᠰᠤᠨ ᠤ᠋ ᠬᠡᠷᠡᠭ ᠢ᠋ ᠬᠤᠷᠢᠶᠠᠵᠤ᠂ ᠴᠠᠭ ᠤᠯᠠᠷᠢᠯ ᠤ᠋ᠨ ᠰᠤᠳᠤᠷ ᠢ᠋ ᠥᠭᠦᠯᠡᠬᠦ ᠢᠨᠤ :
ᠤᠢᠭᠤᠷ ᠤᠯᠤᠰ ᠲᠡᠷᠡ ᠦᠶᠡ ᠡᠴᠡ ᠳᠣᠲᠣᠭᠠᠳᠤ ᠭᠠᠵᠠᠷ ᠯᠤᠭᠠ ᠬᠣᠯᠪᠣᠨ ᠶᠠᠪᠤᠭᠰᠠᠨ ᠤ᠋ ᠣᠴᠢᠷᠠ᠂ ᠠᠷᠤ ᠡᠯᠡᠰᠦᠨ ᠦ᠌ ᠠᠯᠢ ᠠᠯᠢ ᠤᠯᠤᠰ ᠠ᠋ᠴᠠ ᠤᠷᠢᠳᠠ ᠤᠢᠭᠤᠷ ᠤᠯᠤᠰ ᠲᠤᠷ ᠲᠡᠳᠡᠨ ᠦ᠌ ᠬᠠᠷᠢᠶᠠᠲᠤ ᠬᠥᠨᠳᠡᠯᠡᠨ ᠮᠥᠷ ᠦ᠋ᠨ ᠤᠢᠭᠤᠷ ᠤ᠋ᠨ ᠰᠢᠷᠠ ᠪᠢᠴᠢᠭ ᠭᠠᠷᠴᠤ᠂ ᠲᠡᠭᠦᠨ ᠤ ᠦᠰᠦᠭ ᠢ᠋ᠶ᠋ᠡᠷ ᠠᠷᠤ ᠡᠯᠡᠰᠦ᠂ ᠤᠮᠠᠷᠠ ᠤᠯᠤᠰ ᠤ᠋ᠨ ᠦᠭᠡᠰ ᠠᠶᠠᠰ ᠢ᠋ ᠪᠦᠷᠢᠳᠬᠡᠨ ᠪᠢᠴᠢᠵᠦ ᠴᠢᠳᠠᠬᠤᠢ ᠶ᠋ᠢᠨ ᠲᠤᠯᠠ ᠣᠯᠠᠨ ᠤᠮᠠᠷᠠᠲᠤ ᠶ᠋ᠢᠨ ᠠᠢᠮᠠᠭ ᠤ᠋ᠳ ᠪᠦᠬᠦᠨ ᠴᠥᠮ ᠤᠢᠭᠤᠷ ᠪᠢᠴᠢᠭ ᠢ᠋ ᠤᠩᠰᠢᠨ᠂ ᠤᠢᠭᠤᠷ ᠦᠰᠦᠭ ᠬᠡᠷᠡᠭᠯᠡᠬᠦ ᠢᠨᠦ ᠡᠢᠮᠦ ᠶ᠋ᠢᠨ ᠤᠴᠢᠷ ᠲᠤᠷ ᠪᠣᠯᠠᠢ᠃ ᠵᠢᠴᠢ ᠪᠠᠰᠠ ᠤᠢᠭᠤᠷ ᠤᠯᠤᠰ᠂ ᠯᠣᠪᠤ ᠨᠠᠭᠤᠷ᠂ ᠰᠢᠩᠰᠡ ᠳᠠᠯᠠᠢ ᠶ᠋ᠢ ᠪᠠᠷᠠᠭᠤᠨ ᠲᠠᠩᠭᠤᠳ ᠤᠯᠤᠰ ᠯᠤᠭᠠ ᠲᠡᠮᠡᠴᠡᠯᠳᠦᠨ ᠪᠤᠯᠢᠶᠠᠯᠳᠤᠬᠤ ᠶ᠋ᠢᠨ ᠤᠭ ᠤᠴᠢᠷ ᠠᠨᠤ᠂ ᠡᠨᠡ ᠰᠢᠩᠰᠨ ᠳᠠᠯᠠᠢ ᠬᠡᠮᠡᠭᠴᠢ ᠲᠡᠳᠡᠨ ᠤ ᠤᠢᠭᠤᠷ ᠦᠭᠡᠰ ᠦ᠋ᠨ ᠨᠡᠷᠡ ᠮᠥᠨ᠃ ᠢᠷᠭᠡᠨ ᠦᠭᠡᠰ ᠢ᠋ᠶ᠋ᠡᠷ ᠰᠢᠩ ᠰᠢᠦᠢ ᠬᠠᠢ ᠬᠡᠮᠡᠮᠦᠢ᠃ ᠮᠣᠩᠭᠣᠯ ᠢ᠋ᠶ᠋ᠠᠷ ᠯᠣᠪᠤ ᠨᠠᠭᠤᠷ ᠬᠡᠮᠡᠵᠦᠬᠦᠢ ① ᠃ ᠣᠭᠲᠣ ᠳᠠᠯᠠᠢ ᠪᠤᠰᠤ ᠪᠥᠭᠡᠲᠡᠯᠡ᠂ ᠳᠠᠯᠠᠢ ᠭᠡᠮᠡᠨ ᠨᠡᠷᠡᠯᠡᠭᠰᠡᠨ ᠢᠨᠦ ᠳᠡᠭᠦᠨᠦ ᠤᠷᠤᠰᠬᠠᠯ ᠭᠡᠮᠡᠨ ᠬᠠᠮᠢᠭᠠᠰᠢ ᠵᠦᠭ ᠴᠦ᠍ ᠤᠷᠤᠰᠬᠤ ᠦᠭᠡᠢ᠂ ᠪᠠᠷᠠᠭᠤᠨ ᠬᠡᠳᠦᠨ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠪᠤᠷᠤᠢᠳ ᠤᠯᠤᠰ ᠤ᠋ᠨ ᠵᠠᠬᠠ᠂ ᠰᠣᠩᠭᠢᠨᠠ ᠶ᠋ᠢᠨ ᠮᠥᠰᠥᠲᠦ ᠳᠠᠪᠠᠭᠠᠨ ᠤ᠋ ᠤᠮᠠᠷᠠ ᠢᠩᠵᠢᠰᠡᠷ ᠦ᠋ᠨ ᠪᠠᠷᠠᠭᠤᠨ᠂ ᠬᠠᠰᠢᠬᠡᠷ ᠦ᠋ᠨ ᠡᠮᠦᠨᠡ ᠪᠦᠬᠦᠢ᠂ ᠵᠠᠢᠷ ᠬᠥᠷ ᠤᠰᠤ ᠯᠤᠭᠠ ᠨᠠᠷᠢᠨ ᠰᠤᠳᠠᠯ ᠢ᠋ᠶ᠋ᠠᠷ ᠵᠠᠯᠭᠠᠯᠳᠤᠨ ᠲᠤᠨᠵᠤ᠂ ᠳᠥᠷᠪᠡᠨ ᠵᠦᠭ ᠨᠡᠪᠲᠡᠷᠡᠨ ᠤᠷᠤᠰᠬᠤ ᠦᠭᠡᠢ ᠲᠤᠯᠠ ᠳᠠᠯᠠᠢ ᠬᠡᠮᠡᠭᠰᠡᠨ ᠪᠣᠢ ᠶᠠ᠃ ᠴᠣᠬᠣᠮ ᠶᠡᠬᠡ ᠳᠠᠯᠠᠢ ᠳ᠋ᠤᠷ ᠪᠠᠬᠠᠨ ᠴᠤ᠌ ᠬᠠᠷᠢᠶᠠ ᠦᠭᠡᠢ᠃ ᠠᠷᠤ ᠡᠯᠡᠰᠦᠨ ᠦ᠌ ᠳᠣᠲᠣᠷᠠ ᠬᠡᠳᠦᠨ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠲᠡᠭᠰᠢᠷᠡᠭᠰᠡᠨ ᠳᠡᠯᠭᠡᠷ ᠲᠣᠷ ᠲᠣᠨᠣᠭᠰᠠᠨ ᠨᠠᠭᠤᠷ ᠪᠢᠯᠬᠠᠮᠠᠯ ᠪᠣᠯᠠᠢ᠃ ᠡᠨᠡ ᠪᠢᠯᠬᠠᠮᠠᠯ ᠨᠠᠭᠤᠷᠠ ᠣᠷᠣᠬᠤ ᠤᠰᠤᠨ ᠤ᠋ ᠭᠠᠵᠠᠷ ᠣᠷᠣᠨ ᠢ᠋ ᠲᠣᠭᠠᠴᠢᠪᠠᠰᠤ᠂ ᠵᠡᠭᠦᠨ ᠵᠠᠬᠠ ᠠᠯᠠᠭᠰᠢᠷᠠ ᠶ᠋ᠢᠨ ᠤᠰᠤ᠂ ᠬᠣᠢᠲᠤ ᠪᠡᠶᠡ ᠬᠥᠷ ᠬᠠᠷᠠ ᠶ᠋ᠢᠨ ᠤᠰᠤ᠂ ᠪᠠᠷᠠᠭᠤᠨ ᠪᠡᠶᠡ ᠵᠠᠬᠠᠰ ᠤ᠋ᠨ ᠤᠰᠤ᠂ ᠪᠠᠰᠠ ᠪᠠᠷᠠᠭᠤᠨ ᠬᠣᠢᠲᠤ ᠥᠰᠢᠨ ᠦ᠌ ᠤᠰᠤ᠂ ᠴᠢᠬᠡ ᠪᠠᠷᠠᠭᠤᠨ ᠪᠠᠷᠴᠤᠭ ᠤ᠋ᠨ ᠤᠰᠤ᠃ ᠪᠠᠷᠠᠭᠤᠨ ᠡᠮᠦᠨᠡ ᠶᠠᠷᠠ ᠭᠣᠣᠯ ᠤ᠋ᠨ ᠤᠰᠤ᠂ ᠪᠠᠰᠠ ᠪᠠᠷᠠᠭᠤᠨ ᠢᠩᠵᠢᠰᠡᠷ ᠦ᠋ᠨ ᠤᠰᠤ᠂ ᠴᠢᠬᠡ ᠡᠮᠦᠨᠡ ᠭᠡᠳᠡᠩ ᠦ᠋ᠨ ᠤᠰᠤ᠂ ᠵᠡᠭᠦᠨ ᠡᠮᠦᠨᠡ ᠳᠠᠷᠤᠢ ᠲᠡᠭᠷᠢ ᠡᠯᠡᠰᠦ᠂ ᠡᠳᠡᠭᠡᠷ ᠬᠡᠳᠦᠨ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠠᠭᠤᠳᠠᠮ ᠶᠡᠬᠡ ᠲᠢᠪ ᠳᠡᠯᠡᠬᠡᠢ ᠶ᠋ᠢᠨ ᠤᠰᠤ ᠴᠥᠮ ᠡᠨᠡ ᠰᠢᠩᠰᠠ ᠳᠠᠯᠠᠢ ᠬᠢᠭᠡᠳ ᠵᠠᠢᠷ ᠬᠥᠷ ᠣᠰᠤᠨᠠ ᠴᠢᠭᠤᠯᠵᠤ ᠲᠣᠨᠣᠮᠤᠢ᠃ ᠮᠠᠰᠢ ᠥᠨᠳᠥᠷ ᠦ᠋ᠨ ᠲᠡᠭᠰᠢᠷᠡᠭᠰᠡᠨ ᠲᠢᠪ ᠲᠣᠷ ᠲᠣᠨᠣᠭᠰᠠᠨ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠠᠭᠤᠳᠠᠮ ᠨᠠᠭᠤᠷ ᠲᠤᠯᠠ ᠳᠥᠷᠪᠡᠨ ᠡᠲᠡᠭᠡᠳ ᠮᠢᠩᠭᠠᠭᠠᠳ ᠭᠠᠵᠠᠷ ᠠ᠋ᠴᠠ ᠴᠥᠮ ᠦᠵᠡᠭᠳᠡᠵᠦ᠂ ᠨᠠᠷᠠᠨ ᠪᠠᠬᠠᠨ ᠪᠠᠷᠠᠭᠤᠨᠰᠢ ᠲᠠᠰᠢᠮᠠᠭᠴᠠ ᠡᠨᠡ ᠨᠠᠭᠤᠷ ᠲᠤᠷ ᠲᠣᠰᠴᠤ᠂ ᠵᠡᠭᠦᠨ ᠡᠮᠦᠨᠡ ᠡᠴᠡ ᠬᠡᠳᠦᠨ ᠵᠠᠭᠤᠨ ᠭᠠᠵᠠᠷ ᠤ᠋ᠨ ᠬᠣᠯᠠ ᠠ᠋ᠴᠠ ᠲᠠᠯᠠ ᠶ᠋ᠢᠨ ᠴᠠᠭᠠᠨᠠ ᠭᠢᠯᠪᠡᠯᠵᠡᠨ ᠦᠵᠡᠭᠳᠡᠵᠦ᠂ ᠨᠠᠷᠠᠨ ᠨᠡᠩ ᠳᠣᠷᠣᠭᠰᠢ ᠣᠷᠣᠪᠠᠰᠤ ᠳᠡᠭᠦᠨᠦ ᠭᠢᠯᠪᠠᠯᠵᠠᠯ ᠤᠯᠠᠮ ᠬᠣᠯᠠ ᠦᠵᠡᠭᠳᠡᠬᠦ ᠲᠤᠯᠠ ᠡᠳᠦᠷ ᠦ᠋ᠨ ᠨᠠᠷᠠᠨ ᠳ᠋ᠤᠷ ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠣᠳᠣᠨ ᠮᠡᠲᠦ ᠦᠵᠡᠭᠳᠡᠬᠦᠢ ᠶ᠋ᠢᠨ ᠣᠴᠢᠷᠠ᠂ ᠲᠡᠷᠡ ᠣᠷᠣᠨ ᠢ᠋ ᠣᠳᠣᠨ ᠲᠠᠯᠠ ᠭᠡᠮᠡᠨ ᠨᠡᠷᠡᠯᠡᠵᠦᠬᠦᠢ᠃ ᠠᠯᠢᠪᠠ ᠪᠠᠷᠠᠭᠤᠨ ᠬᠣᠢᠲᠤ ᠪᠡᠶᠡ ᠶ᠋ᠢᠨ ᠨᠠᠭᠤᠷ ᠲᠤᠨᠤᠮᠠᠯ ᠪᠦᠬᠦᠨ᠂ ᠨᠠᠷᠠᠨ ᠲᠠᠰᠢᠪᠠᠰᠤ ᠴᠥᠮ ᠲᠡᠢᠨ ᠦᠵᠡᠭᠳᠡᠪᠡᠴᠦ᠂ ᠡᠨᠡ ᠰᠢᠩᠰᠠ ᠨᠡᠷᠡᠲᠦ ᠯᠣᠪᠣ ᠨᠠᠭᠤᠷ ᠤ᠋ᠨ ᠡᠨᠡ ᠰᠠᠶᠢ ᠴᠣᠬᠣᠮ ᠣᠳᠣᠨ ᠲᠠᠯᠠ ᠶ᠋ᠢᠨ ᠭᠠᠵᠠᠷ ᠮᠥᠨ᠃ ᠲᠡᠭᠦᠨᠴᠡ ᠨᠠᠭᠠᠨᠠ ᠪᠠᠢᠬᠤ ᠴᠢᠩ ᠬᠠᠢ ᠬᠡᠮᠡᠬᠦ ᠬᠥᠬᠡ ᠨᠠᠭᠤᠷ ᠢ᠋ ᠬᠡᠯᠡᠭᠰᠡᠨ ᠪᠤᠰᠤ ᠪᠣᠯᠠᠢ᠂ ᠡᠨᠡ ᠰᠢᠩᠰᠠ ᠳᠠᠯᠠᠢ ᠠ᠋ᠴᠠ ᠡᠯᠳᠡᠪ ᠵᠦᠢᠯ ᠦ᠋ᠨ ᠥᠩᠭᠡᠲᠦ ᠳᠠᠪᠤᠰᠤ ᠭᠠᠷᠴᠤ᠂ ᠳᠥᠷᠪᠡᠨ ᠲᠢᠪ ᠦ᠋ᠨ ᠡᠮ ᠳ᠋ᠦ᠍ᠷ ᠣᠷᠣᠵᠤ᠂ ᠮᠠᠰᠢ ᠶᠡᠬᠡ ᠠᠰᠢᠭ ᠣᠯᠳᠠᠪᠤᠷᠢ ᠲᠠᠢ᠃ ᠤᠭ ᠲᠠᠭᠠᠨ ᠦᠨᠡᠨ ᠳ᠋ᠦ᠍ᠷ ᠤᠢᠭᠤᠷ ᠤᠯᠤᠰ ᠤ᠋ᠨ ᠬᠠᠷᠢᠶᠠᠲᠤ ᠭᠠᠵᠠᠷ ᠪᠥᠯᠥᠭᠡ᠃ ᠳᠠᠩ ᠤᠯᠤᠰ ᠤ᠋ᠨ ᠱ᠌ᠢᠽᠥ᠋ᠩ ᠬᠠᠭᠠᠨ ᠤ᠋ ᠦᠶᠡ ᠳ᠋ᠦ᠍ᠷ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠳᠡᠭᠡᠳᠦ ᠦᠶᠡ᠂ ᠬᠤᠸᠠᠩ ᠴᠤᠤ ᠬᠤᠯᠠᠭᠠᠢ ᠶ᠋ᠢ ᠳᠠᠢᠯᠠᠨ ᠲᠦᠪᠰᠢᠳᠬᠡᠭᠰᠡᠨ ᠶᠡᠬᠡ ᠭᠠᠪᠢᠶᠠ ᠳ᠋ᠤᠷ – ᠲᠦᠪᠡ ᠰᠧ ᠵᠢᠩ ᠦ᠋ᠨ ᠦᠶᠡ ᠳ᠋ᠦ᠍ᠷ ᠶᠡᠬᠡ ᠲᠢᠩ ᠨᠠᠨ ᠵᠢᠶᠧ ᠳᠦ ᠱᠢ ᠭᠡᠮᠡᠨ ᠡᠷᠭᠦᠵᠦ᠂ ᠪᠠᠰᠠ ᠳᠣᠲᠣᠭᠠᠳᠤ ᠲᠠᠪᠤᠨ ᠵᠧᠦ ᠶ᠋ᠢ ᠥᠭᠴᠦ ᠫᠢᠩ ᠰᠢᠶᠠ ᠪᠦ ᠭᠡᠮᠡᠨ ᠡᠷᠭᠦᠮᠵᠢᠯᠡᠨ᠂ ᠪᠠᠷᠠᠭᠤᠨ ᠬᠣᠢᠲᠤ ᠪᠡᠶᠡ ᠶ᠋ᠢᠨ ᠣᠯᠠᠨ ᠵᠦᠢᠯ ᠦ᠋ᠨ ᠴᠢᠶᠠᠩ ᠬᠤ᠌᠂ ᠴᠢᠦᠸᠠᠨ ᠿᠦᠩ᠂ ᠰᠢᠶᠦ᠋ᠩᠨᠦ᠂ ᠴᠠᠨ ᠢᠦᠢ᠂ ᠰᠢ ᠴᠢᠶᠠᠩ ᠤ᠋ᠨ ᠵᠡᠷᠭᠡ ᠶ᠋ᠢᠨ ᠣᠯᠠᠨ ᠤᠮᠠᠷᠠᠲᠤ ᠠᠢᠮᠠᠭ ᠤ᠋ᠳ ᠤ᠋ᠨ ᠪᠦᠭᠦᠳᠡ ᠶ᠋ᠢ ᠲᠡᠷᠢᠭᠦᠯᠡᠨ ᠳᠠᠷᠤᠨ ᠤᠬᠠᠭᠤᠯᠬᠤ ᠲᠤᠰᠢᠶᠠᠯ ᠡᠷᠬᠡ ᠶ᠋ᠢ ᠪᠠᠷᠢᠭᠤᠯᠤᠭᠰᠠᠨ ᠤ᠋ ᠳᠡᠭᠡᠷᠡ᠂ ᠠᠷᠪᠠᠭᠠᠳ ᠦᠶᠡ ᠪᠠᠷᠠᠭᠤᠨ ᠬᠣᠢᠲᠤ᠂ ᠰᠢ ᠵᠧᠦ ᠶ᠋ᠢᠨ ᠣᠯᠠᠨ ᠠᠢᠮᠠᠭ ᠤ᠋ᠳ ᠢ᠋ ᠡᠵᠡᠷᠬᠡᠨ ᠶᠠᠪᠤᠭᠰᠠᠨ ᠤ᠋ ᠤᠴᠢᠷ ᠲᠤᠷ ᠲᠠᠩᠭᠤᠳ ᠤ᠋ᠨ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠡᠵᠡᠨ ᠯᠢ ᠶᠤᠸᠠᠨ ᠬᠣᠣ᠂ ᠰᠢᠭᠤᠳ ᠬᠠᠭᠠᠨ ᠰᠠᠭᠤᠵᠤ ᠡᠦ ᠯᠢᠶᠧ ᠬᠤᠸᠠᠩᠳᠢ ᠬᠡᠮᠡᠭᠰᠡᠨ ᠡᠴᠡ ᠥᠪᠡᠷᠦᠨ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠢ᠋ᠶ᠋ᠡᠷ ᠡᠨᠡ ᠣᠳᠣᠨ ᠲᠠᠯᠠ ᠶ᠋ᠢᠨ ᠰᠢᠩᠰᠠ ᠳᠠᠯᠠᠢ ᠶ᠋ᠢᠨ ᠬᠡᠳᠦ ᠬᠡᠳᠦᠨ ᠪᠠᠭᠠ ᠠᠢᠮᠠᠭ ᠤ᠋ᠳ ᠢ᠋ ᠳᠠᠢᠯᠠᠨ ᠲᠦᠪᠰᠢᠳᠬᠡᠵᠦ᠂ ᠯᠣᠪᠣ ᠨᠠᠭᠤᠷ ᠤ᠋ᠨ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠰᠠᠢᠨ ᠳᠠᠪᠤᠰᠤᠨ ᠤ᠋ ᠪᠦᠬᠦ ᠠᠰᠢᠭ ᠢ᠋ ᠪᠦᠷᠢᠨᠡ ᠪᠡᠷ ᠬᠣᠷᠢᠶᠠᠨ ᠡᠵᠡᠯᠡᠵᠦ ᠢᠳᠡᠭᠰᠡᠭᠡᠷ ᠵᠠᠭᠤᠨ ᠢᠯᠡᠭᠦᠦ ᠣᠨ ᠪᠣᠯᠵᠤ᠂ ᠲᠠᠪᠤᠳᠤᠭᠠᠷ ᠬᠠᠭᠠᠨ ᠪᠠᠭᠤᠷᠠᠢ ᠯᠢ ᠼᠦᠨ ᠢᠤ᠌ ᠶ᠋ᠢᠨ ᠦᠶᠡ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠡᠳ᠂ ᠤᠢᠭᠤᠷ ᠤᠯᠤᠰ ᠤ᠋ᠨ ᠦᠷᠭᠦᠩᠭᠡ᠂ ᠯᠢ ᠼᠦᠨ ᠢᠦ ᠶ᠋ᠢᠨ ᠥᠩᠭᠡ ᠳ᠋ᠦ᠍ᠷ ᠤᠨᠠᠭᠰᠠᠨ ᠳ᠋ᠤᠷ ᠠᠨᠤ ᠳᠠᠷᠤᠯᠠᠨ ᠰᠢᠩᠰᠠ ᠳᠠᠯᠠᠢ ᠶ᠋ᠢᠨ ᠪᠦᠬᠦ ᠠᠰᠢᠭ ᠢ᠋ ᠡᠵᠡᠷᠬᠡᠨ ᠪᠤᠯᠢᠶᠠᠵᠤ ᠡᠵᠡᠯᠡᠭᠰᠡᠨᠡ ᠯᠢ ᠠᠨ ᠴᠢᠥᠸᠠᠨ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠨ ᠰᠠᠭᠤᠭᠠᠳ ᠡᠳ᠋ ᠬᠡᠷᠡᠭᠯᠡᠯ᠂ ᠮᠠᠰᠢ ᠶᠡᠬᠡ ᠣᠷᠣᠬᠤᠢ ᠳ᠋ᠤᠷ ᠡᠨᠡ ᠨᠢᠭᠡᠨ ᠠᠩᠭᠢ ᠶ᠋ᠢᠨ ᠶᠡᠬᠡ ᠣᠷᠣᠵᠠ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠨᠡᠬᠡᠮᠵᠢᠯᠡᠨ ᠲᠡᠮᠡᠴᠡᠯᠳᠦᠬᠦ ᠴᠢᠨᠡᠭᠡ ᠦᠭᠡᠢ ᠳ᠋ᠦ᠍ᠷ ᠥᠬᠢᠨ ᠢᠨᠣ ᠶ᠋ᠢᠨ ᠭᠦᠩᠵᠦ ᠬᠦᠯᠢᠶᠡᠬᠦ ᠦᠭᠡᠢ᠂ ᠳᠡᠭᠦᠦ ᠯᠢ ᠼᠦᠨ ᠰᠢᠦᠢ ᠵᠥᠭᠡᠯᠡᠨ ᠪᠠᠭᠤᠷᠠᠢ ᠴᠢᠳᠠᠪᠤᠷᠢ ᠦᠭᠡᠢ ᠲᠤᠯᠠ᠂ ᠠᠩᠬᠠ ᠤᠳᠠᠭᠠ ᠥᠪᠡᠷᠦᠨ ᠪᠡᠶᠡ ᠪᠡᠷ ᠴᠡᠷᠢᠭ ᠠᠪᠤᠨ ᠳᠡᠭᠦᠦ ᠪᠡᠨ ᠳᠠᠭᠠᠭᠤᠯᠤᠨ ᠡᠴᠢᠵᠦ ᠨᠢᠭᠡᠨᠲᠡ ᠪᠠᠢᠯᠳᠤᠵᠤ ᠡᠭᠡᠭᠦᠯᠦᠨ ᠣᠯᠵᠤ ᠵᠢᠯ ᠢᠯᠡᠭᠦᠦ ᠰᠠᠬᠢᠨ ᠰᠠᠭᠤᠵᠤ᠂ ᠮᠠᠰᠢ ᠨᠠᠮ ᠵᠢᠮ ᠪᠣᠯᠭᠠᠵᠤ ᠨᠢᠳᠤᠨᠤᠨ ᠨᠠᠮᠤᠷ ᠬᠠᠷᠢᠵᠤ ᠢᠷᠡᠨ ᠥᠪᠡᠷᠦᠨ ᠪᠡᠶᠡ ᠶ᠋ᠢᠨ ᠶᠡᠬᠡ ᠦᠢᠯᠡ ᠪᠡᠨ ᠪᠦᠲᠦᠭᠡᠰᠦᠭᠡᠢ ᠬᠡᠮᠡᠵᠦ ᠪᠠᠢᠲᠠᠯᠠ ᠲᠡᠭᠦᠨ ᠢ᠋ ᠬᠠᠷᠢᠵᠤ ᠢᠷᠡᠨ ᠰᠠᠷᠠ ᠰᠢᠬᠠᠮ ᠪᠣᠯᠣᠮᠠᠭᠴᠠ ᠤᠢᠭᠤᠷ ᠤᠯᠤᠰ ᠪᠠᠰᠠ ᠴᠡᠷᠢᠭ ᠠᠪᠤᠨ ᠳᠠᠬᠢᠨ ᠪᠤᠯᠢᠶᠠᠨ ᠡᠵᠡᠯᠡᠭᠰᠡᠨᠡ᠂ ᠨᠢᠳᠤᠨᠤᠨ ᠡᠪᠦᠯ ᠪᠠᠰᠠ ᠴᠡᠷᠢᠭ ᠠᠪᠤᠨ ᠡᠴᠢᠬᠦᠶᠡ᠂ ᠳᠡᠭᠦᠦ ᠯᠢ ᠼᠦᠨ ᠰᠢᠦᠢ ᠶ᠋ᠢ ᠮᠥᠨ ᠳᠠᠭᠠᠭᠤᠯᠤᠭᠰᠠᠨ ᠴᠤ᠌ ᠦᠭᠡᠢ᠂ ᠭᠠᠵᠠᠷ ᠤ᠋ᠨ ᠵᠠᠩ ᠳ᠋ᠤᠷ ᠮᠡᠷᠭᠡᠰᠢᠭᠰᠡᠨ ᠳ᠋ᠡᠭᠡᠨ ᠡᠷᠡᠮᠰᠢᠨ᠂ ᠰᠢᠭᠤᠳ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠴᠤ ᠡᠴᠢᠬᠦ ᠪᠥᠭᠡᠳ ᠨᠢᠭᠡᠨ ᠳᠡᠭᠡᠭᠦᠷ ᠬᠠᠳᠠᠮ ᠤ᠋ᠨ ᠲᠠᠢᠹᠦ᠋ ᠲᠦᠰᠢᠮᠡᠯ ᠥᠳᠥ ᠵᠠᠩᠵᠤᠨ ᠢ ᠬᠠᠳᠠᠮ ᠬᠠᠷᠢ ᠶ᠋ᠢᠨ ᠶᠡᠬᠡ ᠵᠢᠨᠦᠩ ᠮᠤᠬᠤᠯᠢ ᠠᠨᠳᠠ ᠳ᠋ᠤᠷ ᠭᠤᠶᠤᠴᠢᠯᠠᠨ ᠢᠯᠡᠭᠡᠭᠰᠡᠨᠡ ᠵᠢᠨᠦᠩ ᠮᠤᠬᠤᠯᠢ ᠴᠤ᠌ ᠤᠭ ᠠ᠋ᠴᠠ ᠡᠨᠡ ᠶ᠋ᠢᠨ ᠭᠦᠩᠵᠦ ᠬᠠᠳᠠᠮ ᠬᠠᠷᠢ ᠶ᠋ᠢᠨ ᠤᠯᠤᠰ ᠲᠠᠭᠠᠨ ᠬᠠᠯᠠᠮᠵᠢ ᠵᠢᠳᠬᠦᠯᠳᠦ᠂ ᠭᠦᠩᠵᠦ ᠬᠠᠲᠤᠨ ᠭᠡᠮᠡᠨ ᠮᠠᠰᠢ ᠪᠡᠶᠡᠰᠦᠨ ᠰᠠᠢᠰᠢᠶᠠᠳᠠᠭ ᠲᠤᠯᠠ᠂ ᠡᠨᠡ ᠤᠳᠠᠭᠠ ᠳ᠋ᠤᠷ ᠬᠠᠭᠠᠨ ᠡᠵᠡᠨ ᠳ᠋ᠦ᠍ᠷ ᠬᠤᠪᠢ ᠶ᠋ᠢᠨ ᠭᠠᠳᠠᠨᠠ ᠨᠠᠷᠢᠪᠴᠢᠯᠠᠨ ᠠᠢᠯᠠᠳᠬᠠᠨ ᠭᠤᠶᠤᠴᠢᠯᠠᠵᠤ᠂ ᠲᠤᠬᠠᠢᠯᠠᠨ ᠳᠡᠳ᠋ ᠲᠠᠢᠽᠢ᠂ ᠴᠠᠭᠠᠲᠠᠢ ᠴᠢᠨ ᠸᠠᠩ ᠳ᠋ᠤᠷ ᠠᠷᠪᠠᠨ ᠵᠢᠷᠭᠤᠭᠠᠨ ᠵᠠᠩᠵᠤᠨ ᠬᠣᠶᠠᠷ ᠲᠦᠮᠡᠨ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠷ ᠣᠢᠷᠠ ᠪᠠᠷ ᠢᠨᠣ ᠮᠣᠷᠳᠠᠭᠤᠯᠤᠨ ᠢᠯᠡᠭᠡᠭᠰᠡᠨ ᠠᠵᠤᠭᠤ᠃ ᠵᠢᠴᠢ ᠤᠢᠭᠤᠷ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠬᠢᠲᠠᠳ ᠬᠡᠯᠡᠲᠦ ᠮᠡᠷᠭᠡᠳ ᠣᠯᠠᠨ ᠭᠠᠷᠬᠤ ᠠᠨᠤ᠂ ᠡᠷᠲᠡ ᠳᠠᠩ ᠲᠠᠢᠽᠦᠢ᠍ᠩ ᠦ᠋ᠨ ᠦᠶᠡ ᠳ᠋ᠦ᠍ᠷ ᠵᠧᠦ᠂ ᠰᠢᠶᠠᠨ ᠪᠠᠢᠭᠤᠯᠵᠤ ᠰᠠᠭᠤᠯᠭᠠᠭᠰᠠᠨᠠ᠂ ᠵᠠᠷᠢᠮ ᠡᠨᠡ ᠭᠠᠵᠠᠷ ᠤ᠋ᠨ ᠣᠯᠠᠨ ᠤ᠋ ᠬᠦᠨᠳᠦᠯᠡᠯ ᠡᠮᠦᠨᠡ ᠤᠯᠤᠰ ᠠ᠋ᠴᠠ ᠠᠷᠪᠠᠨ ᠬᠤᠪᠢ ᠳᠡᠭᠡᠷᠡ ᠲᠤᠯᠠ ᠲᠡᠷᠡ ᠪᠠᠶᠠᠨ ᠡᠷᠬᠢᠮ ᠳ᠋ᠦ᠍ᠷ ᠢᠨᠦ᠂ ᠬᠣᠷᠭᠣᠳᠠᠵᠤ ᠬᠣᠴᠣᠷᠤᠨ ᠦᠯᠡᠳᠡᠭᠰᠡᠳ ᠣᠯᠠᠨᠲᠠ ᠭᠠᠷᠤᠭᠰᠠᠨ ᠢ᠋ᠶ᠋ᠠᠷ ᠵᠢᠯ ᠣᠨ ᠮᠠᠰᠢ ᠤᠳᠠᠵᠤ᠂ ᠵᠠᠯᠭᠠᠮᠵᠢᠯᠠᠨ ᠲᠥᠷᠥᠭᠰᠡᠨ ᠬᠡᠦᠬᠡᠳ ᠠᠴᠢᠨᠠᠷ ᠠᠨᠤ ᠥᠪᠡᠷᠦᠨ ᠤᠭ ᠦᠨᠳᠦᠰᠦᠨ ᠦ᠌ ᠪᠢᠴᠢᠭ ᠦ᠋ᠨ ᠰᠤᠷᠭᠠᠭᠤᠯᠢ ᠪᠠᠨ ᠦᠯᠦ ᠲᠠᠶᠠᠭᠳᠠᠬᠤ ᠶ᠋ᠢᠨ ᠳᠡᠭᠡᠷᠡ ᠪᠠᠰᠠ ᠡᠨᠡ ᠤᠢᠭᠤᠷ ᠤᠯᠤᠰ ᠤ᠋ᠨ ᠨᠣᠮ ᠪᠢᠴᠢᠭ ᠪᠠ ᠵᠠᠩ ᠠᠪᠢᠶᠠᠰ ᠢ᠋ ᠠᠨᠤ ᠠᠪᠴᠤ ᠬᠣᠶᠠᠷ ᠵᠦᠢᠯ ᠦ᠋ᠨ ᠡᠷᠳᠡᠮ ᠰᠤᠷᠲᠠᠯ ᠪᠦᠷᠢᠳᠳᠡᠭ ᠲᠤᠯᠠᠳᠠ ᠳ᠋ᠠᠲᠠᠲᠤᠩᠭᠠ᠂ ᠲᠤᠷᠪᠢ ᠮᠡᠷᠭᠡᠨ ᠦ᠌ ᠵᠡᠷᠭᠡ ᠶ᠋ᠢᠨ ᠮᠡᠷᠭᠡᠳ ᠪᠠᠭᠰᠢ ᠨᠠᠷ ᠭᠠᠷᠴᠤ᠂ ᠤᠯᠤᠰ ᠤᠯᠤᠰ ᠲᠤᠷ ᠤᠷᠢᠭᠳᠠᠨ ᠵᠠᠯᠠᠭᠳᠠᠵᠤ᠂ ᠡᠷᠭᠦᠨ ᠬᠦᠨᠳᠦᠯᠡᠭᠳᠡᠬᠦ ᠢᠨᠦ ᠡᠢᠮᠦ ᠤᠴᠢᠷ ᠲᠤᠷ ᠪᠣᠯᠠᠢ᠃ ᠴᠢᠦ ᠴᠦ ᠵᠢᠢ ᠬᠤᠪᠢᠯᠭᠠᠨ᠂ ᠴᠢᠦ ᠰᠢᠶᠠᠨ ᠬᠦ ᠰᠢᠳᠢᠲᠡᠨ ᠴᠥᠮ ᠡᠨᠡ ᠤᠢᠭᠤᠷ ᠤ᠋ᠨ ᠣᠷᠴᠢᠮ ᠤ᠋ᠨ ᠬᠥᠮᠦᠰ ᠪᠤᠶᠤ᠃ ᠲᠡᠷᠡ ᠭᠠᠵᠠᠷ ᠤ᠋ᠨ ᠲᠡᠭᠷᠢ ᠠᠭᠤᠯᠠ ᠶ᠋ᠢ ᠬᠢᠲᠠᠳ ᠢ᠋ᠶ᠋ᠠᠷ ᠲᠢᠶᠠᠨ ᠱᠠᠨ ᠬᠡᠮᠡᠮᠦᠢ᠃ ᠨᠢᠭᠡᠨ ᠨᠡᠷᠡ ᠢᠨᠤ ᠭᠢᠯᠢᠶᠡᠨ ᠬᠡᠮᠡᠮᠦᠢ᠃ ᠣᠷᠣᠨ ᠥᠨᠳᠥᠷ ᠪᠥᠭᠡᠳ ᠠᠭᠤᠯᠠ ᠪᠠᠰᠠ ᠨᠡᠩ ᠥᠨᠳᠥᠷ᠂ ᠲᠡᠢᠨ ᠬᠦ᠌ ᠲᠡᠭᠷᠢ ᠲᠤᠯᠤᠮᠠ ᠲᠡᠭᠷᠢ ᠠᠭᠤᠯᠠ ᠬᠡᠮᠡᠵᠦᠬᠦᠢ᠃ ᠲᠡᠷᠡ ᠠᠭᠤᠯᠠᠨ ᠤ᠋ ᠬᠡᠳᠦᠨ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠤᠷᠲᠤ ᠮᠤᠷᠤᠢ ᠰᠠᠷᠤᠢ ᠭᠦᠨ ᠳᠠᠯᠳᠠ ᠭᠣᠣᠯ ᠵᠡᠪᠡ ᠳ᠋ᠦ᠍ᠷ ᠡᠳᠦᠭᠡ ᠳᠠᠢᠴᠢᠩ ᠤᠯᠤᠰ ᠤ᠋ᠨ ᠴᠠᠭ ᠣᠨ ᠳ᠋ᠤᠷ ᠬᠦᠷᠲᠡᠯᠡ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠮᠥᠷ ᠰᠡᠭᠦᠳᠡᠷ ᠬᠦᠷᠦᠭᠡᠳᠦᠢ ᠭᠠᠵᠠᠷ ᠣᠯᠠᠨᠲᠠ ᠪᠣᠢ ᠬᠡᠮᠡᠵᠦᠬᠦᠢ᠃ ᠪᠦᠬᠦᠯᠢ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢᠨ ᠶᠡᠬᠡ ᠲᠣᠪᠴᠢ ᠳ᠋ᠤᠷ ᠭᠠᠷᠤᠭᠰᠠᠨ ᠢ᠋ ᠴᠦ᠍ ᠪᠠᠢᠲᠤᠭᠠᠢ᠂ ᠬᠣᠢᠲᠤ ᠣᠷᠣᠰ ᠤᠯᠤᠰ ᠤ᠋ᠨ ᠡᠮᠦᠨᠡ ᠬᠢᠵᠠᠭᠠᠷ ᠤ᠋ᠨ ᠬᠠᠰᠠᠭ ᠤᠯᠤᠰ᠂ ᠪᠤᠷᠤᠢᠳ ᠤᠯᠤᠰ ᠤ᠋ᠨ ᠭᠠᠵᠠᠷ ᠤ᠋ᠨ ᠵᠢᠷᠤᠭ ᠲᠤᠷ ᠲᠣᠳᠣᠷᠬᠠᠢᠯᠠᠨ ᠨᠠᠷᠢᠪᠴᠢᠯᠠᠨ ᠭᠠᠷᠴᠤ ᠪᠣᠢ ᠠᠮᠤᠢ᠃ ᠳᠠᠢᠴᠢᠩ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ᠷ ᠨᠡᠢᠲᠡ ᠪᠡᠷ ᠢᠯᠢ ᠵᠠᠩᠵᠤᠨ ᠳ᠋ᠤᠷ ᠵᠠᠬᠢᠷᠤᠭᠳᠠᠵᠤᠬᠤᠢ᠃ ᠰᠤᠯᠠ ᠤᠴᠢᠷ ᠢ᠋ ᠬᠤᠷᠢᠶᠠᠭᠠᠳ ᠰᠤᠳᠤᠷ ᠤ᠋ᠨ ᠭᠣᠣᠯ ᠲᠣᠪᠴᠢᠶᠠ ᠶ᠋ᠢ ᠥᠭᠦᠯᠡᠬᠦ ᠢᠨᠤ :
ᠲᠡᠭᠦᠨᠴᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠵᠡᠯᠮᠡ᠂ ᠵᠡᠪᠡ ᠬᠣᠶᠠᠷ ᠶᠡᠬᠡ ᠨᠣᠶᠠᠨ᠂ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ᠂ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠭᠠᠨᠠ ᠮᠣᠷᠳᠠᠨ ᠭᠠᠷᠴᠤ᠂ ᠵᠠᠮ ᠤ᠋ᠨ ᠭᠣᠳᠣᠰ ᠲᠤᠷ ᠬᠠᠷᠢᠶᠠ ᠬᠠᠷᠢᠶᠠᠲᠤ ᠭᠠᠵᠠᠷ ᠣᠷᠣᠨ ᠪᠦᠬᠦᠨᠡ ᠴᠥᠮ ᠪᠠᠭᠤᠳᠠᠯ ᠪᠠᠭᠤᠯᠭᠠᠨ ᠥᠷᠲᠡᠭᠡ ᠥᠷᠲᠡᠭᠡᠭᠦᠯᠵᠦ᠂ ᠤᠶᠠᠭᠠ ᠮᠣᠷᠢ ᠤᠶᠠᠭᠤᠯᠤᠨ ᠮᠡᠳᠡᠭᠡᠨ ᠦ᠌ ᠴᠡᠷᠢᠭ ᠦ᠋ᠳ ᠢ᠋ ᠠᠮᠠᠯᠠᠨ ᠰᠠᠭᠤᠯᠭᠠᠵᠤ ᠶᠠᠪᠤᠭᠰᠠᠭᠠᠷ ᠬᠣᠶᠠᠷ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠣᠶᠠᠷᠠ ᠰᠠᠶᠢ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠪᠠᠷᠠᠭᠤᠨ ᠵᠠᠬᠠ ᠶ᠋ᠢ ᠭᠠᠷᠲᠠᠯᠠ᠂ ᠲᠡᠭᠷᠢ ᠠᠭᠤᠯᠠᠨ ᠤ᠋ ᠵᠡᠭᠦᠨ ᠬᠣᠢᠲᠤ᠂ ᠪᠠᠷᠠ ᠬᠥᠯ ᠬᠡᠮᠡᠬᠦ ᠭᠠᠵᠠᠷ ᠤ᠋ᠨ ᠵᠡᠭᠦᠨ ᠬᠣᠢᠲᠤ ᠬᠢᠵᠠᠭᠠᠷ ᠪᠠᠰᠠ ᠬᠠᠮᠢ ᠤᠯᠤᠰ ᠤ᠋ᠨ ᠭᠤᠷᠪᠠᠯᠵᠢᠨ ᠵᠠᠭᠠᠭ ᠤ᠋ᠨ ᠥᠨᠳᠥᠷ ᠳᠡᠪᠰᠡᠭ ᠲᠣᠷ ᠤᠨᠢᠶᠠᠷ ᠮᠠᠨᠠᠨ ᠲᠠᠲᠠᠵᠤ ᠠᠯᠠᠬᠤ ᠠᠭᠤᠷ ᠲᠩᠷᠢ ᠳ᠋ᠦ᠍ᠷ ᠲᠤᠯᠵᠤ᠂ ᠴᠡᠷᠢᠭ ᠮᠣᠷᠢᠨ ᠳᠥᠭᠥᠮ ᠢ᠋ ᠪᠦᠷᠬᠦᠭᠡᠳ᠂ ᠫᠤᠤ ᠶ᠋ᠢᠨ ᠳᠠᠭᠤᠨ ᠬᠣᠯᠠ ᠬᠦᠩᠭᠢᠨᠡᠨ᠂ ᠴᠡᠷᠢᠭ ᠦ᠋ᠨ ᠦᠢᠮᠡᠭᠡᠨ ᠠᠨᠢᠷᠯᠠᠨ ᠰᠣᠨᠣᠰᠳᠠᠵᠤ᠂ ᠮᠠᠰᠢᠳᠠ ᠬᠦᠷᠴᠢᠭᠢᠨᠡᠵᠦ ᠭᠠᠯ ᠲᠤᠶᠠᠭᠠᠯᠠᠨ ᠬᠤᠷᠴᠠ ᠪᠠᠢᠯᠳᠤᠬᠤ ᠦᠶᠡ ᠵᠡᠯᠮᠡ᠂ ᠵᠡᠪᠡ ᠬᠣᠶᠠᠷ ᠨᠣᠶᠠᠨ ᠪᠠᠢᠯᠳᠤᠭᠠᠨ ᠤ᠋ ᠳᠣᠬᠢᠶᠠ ᠲᠠᠯᠪᠢᠨ ᠣᠷᠣᠭᠰᠢ ᠣᠷᠣᠵᠤ ᠬᠡᠳᠦᠬᠡᠨ ᠭᠠᠵᠠᠷ ᠤ᠋ᠨ ᠣᠢᠷᠠ ᠬᠦᠷᠦᠭᠡᠳ ᠳᠠᠬᠢᠨ ᠨᠢᠭᠡᠨᠲᠡ ᠬᠡᠩᠭᠡᠷᠭᠡ ᠳᠡᠯᠡᠳᠴᠦ ᠪᠠᠢᠯᠳᠤᠨ ᠣᠷᠣᠪᠠᠰᠤ᠂ ᠲᠡᠷᠡ ᠶᠡᠬᠡ ᠪᠣᠷᠬᠢᠷᠠᠯ ᠤ᠋ᠨ ᠪᠠᠢᠯᠳᠤᠭᠠᠨ ᠤ᠋ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡᠨ ᠨᠠᠰᠤᠨ ᠵᠠᠯᠠᠭᠤ ᠪᠠᠭᠠᠲᠤᠷ ᠰᠦᠷᠲᠦ ᠵᠠᠩᠵᠤᠨ ᠭᠡᠨᠡᠳᠲᠡ ᠨᠢᠭᠡᠨ ᠵᠠᠯᠠᠭᠤ ᠵᠥᠭᠡᠯᠡᠨ ᠵᠠᠩᠵᠤᠨ ᠢ ᠠᠮᠢᠳᠤ ᠪᠠᠷ ᠪᠠᠷᠢᠭᠠᠳ᠂ ᠮᠣᠷᠢᠨ ᠤ᠋ ᠳᠡᠭᠡᠷᠡ ᠰᠤᠢᠪᠳᠠᠨ ᠰᠤᠨᠳᠠᠯᠠᠵᠤ ᠡᠮᠦᠨᠡ ᠵᠦᠭ ᠭᠦᠶᠦᠯᠭᠡᠨ ᠵᠡᠪᠡ᠂ ᠵᠡᠯᠮᠡ ᠲᠠᠨ ᠤ᠋ ᠴᠡᠷᠢᠭ ᠦ᠋ᠨ ᠡᠮᠦᠨᠡᠭᠦᠷ ᠬᠥᠳᠡᠭᠡᠰᠦᠨ ᠭᠠᠷᠬᠤᠢ ᠳ᠋ᠤᠷ ᠵᠡᠪᠡ ᠬᠠᠵᠠᠭᠤ ᠡᠲᠡᠭᠡᠳ ᠡᠴᠡ ᠲᠠᠰᠢᠭᠤ ᠪᠠᠷ ᠨᠡᠬᠡᠨ ᠣᠷᠣᠵᠤ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ᠂ ᠲᠡᠷᠡ ᠪᠠᠭᠠ ᠪᠠᠭᠠᠲᠤᠷ ᠵᠠᠩᠵᠤᠨ ᠵᠠᠩᠳᠠᠨ ᠥᠭᠦᠯᠡᠷᠦᠨ:
《ᠬᠠᠷᠢᠶᠠ ᠬᠠᠢᠳᠠᠭ ᠦᠭᠡᠢ ᠵᠠᠮ ᠤ᠋ᠨ ᠵᠤᠯᠪᠢᠨ ᠶᠠᠭᠤᠨ ᠢ᠋ ᠠᠰᠠᠭᠤᠮᠤᠢ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠡᠪᠡ ᠨᠣᠶᠠᠨ ᠶᠡᠬᠡᠯᠡ ᠬᠢᠯᠢᠭᠯᠡᠵᠦ :
《ᠵᠠᠮ ᠬᠥᠨᠳᠡᠯᠡᠨ ᠵᠤᠯᠵᠠᠭᠠ ᠬᠥᠪᠡᠭᠦᠨ᠂ ᠵᠢᠭᠠᠬᠠᠨ ᠲᠡᠳᠦᠢ ᠶᠣᠰᠣᠨ ᠦᠭᠡᠢ ! 》ᠭᠡᠮᠡᠨ ᠂ ᠤᠷᠲᠤ ᠡᠰᠢᠲᠦ ᠴᠢᠨᠣᠠ ᠶ᠋ᠢᠨ ᠰᠢᠳᠦᠲᠦ ᠪᠢᠯᠠᠭᠤ ᠪᠠᠨ ᠡᠷᠭᠢᠭᠦᠯᠦᠨ ᠨᠡᠬᠡᠵᠦ ᠭᠦᠢᠴᠡᠭᠡᠳ ᠂ ᠪᠢᠯᠠᠭᠤᠨ ᠤ᠋ ᠡᠰᠢ ᠪᠡᠷ ᠨᠢᠭᠡᠨᠲᠡ ᠳᠡᠯᠡᠳᠴᠦ᠂ ᠬᠣᠶᠠᠷ ᠵᠠᠩᠵᠤᠨ ᠢ᠋ ᠬᠠᠮᠲᠤᠪᠠᠷ ᠮᠣᠷᠢᠨ ᠠ᠋ᠴᠠ ᠥᠮᠬᠥᠷᠢᠳᠥᠭᠥᠯᠥᠨ ᠤᠨᠠᠭᠠᠲᠠᠯᠠ ᠴᠡᠷᠢᠭ ᠦ᠋ᠨ ᠠᠷᠠᠳ ᠬᠣᠶᠠᠭᠤᠯᠠ ᠶ᠋ᠢ ᠴᠥᠮ ᠳᠠᠷᠤᠨ ᠪᠠᠷᠢᠵᠤ ᠬᠦᠯᠢᠪᠡ᠃
ᠲᠡᠳᠦᠢ ᠰᠠᠶᠢ ᠵᠠᠯᠮᠠ ᠤᠴᠢᠷ ᠢ᠋ ᠠᠰᠠᠭᠤᠰᠤᠭᠠᠢ ᠬᠡᠮᠡᠲᠡᠯᠡ ᠡᠳᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠬᠣᠣᠰ ᠵᠠᠩᠵᠤᠨ ᠴᠠᠬᠢᠯᠭᠠᠨ ᠮᠡᠲᠦ ᠪᠠᠭᠠᠲᠤᠷ ᠴᠡᠷᠢᠭ ᠢ᠋ᠶ᠋ᠡᠨ ᠨᠢᠰᠬᠡᠨ ᠲᠠᠯᠪᠢᠵᠤ ᠨᠡᠬᠡᠵᠦ ᠢᠷᠡᠬᠦ ᠢᠨᠣ ᠦᠨᠡᠬᠡᠷ ᠡᠷᠡ ᠪᠠᠷᠰ ᠭᠥᠷᠦᠭᠡᠰᠦᠨ ᠳ᠋ᠦ᠍ᠷ ᠳᠣᠪᠲᠣᠯᠬᠤ ᠮᠡᠲᠦ ᠰᠦᠷᠲᠡᠢ᠂ ᠨᠢᠭᠡᠨ ᠵᠤᠷᠪᠤᠰ ᠲᠣᠭᠣᠰᠣᠨ ᠲᠡᠭᠷᠢ ᠳ᠋ᠦ᠍ᠷ ᠲᠤᠯᠵᠤ᠂ ᠲᠤᠭ ᠬᠢᠭᠢᠷᠢ ᠳᠡᠷᠪᠡᠯᠵᠡᠨ ᠬᠡᠢᠰᠴᠦ ᠲᠣᠳᠣᠷᠬᠠᠢ ᠲᠠᠨᠢᠭᠳᠠᠬᠤ ᠦᠭᠡᠢ ᠵᠡᠪᠡ ᠂ ᠵᠡᠯᠮᠡ ᠬᠣᠶᠠᠷ ᠨᠣᠶᠠᠨ ᠶᠠᠭᠠᠷᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠲᠡᠭᠰᠢᠯᠡᠨ ᠡᠨᠡ ᠯᠠᠪ ᠪᠠᠢᠯᠳᠤᠷᠠ ᠢᠷᠡᠭᠰᠡᠨ ᠳᠡᠭᠡᠷᠡᠮ ᠦ᠋ᠨ ᠵᠠᠩᠵᠤᠨ ᠬᠡᠮᠡᠵᠦ᠂ ᠲᠤᠯᠤᠨ ᠪᠠᠢᠯᠳᠤᠷᠠ ᠤᠭᠲᠤᠨ ᠭᠠᠷᠤᠭᠰᠠᠨ ᠳ᠋ᠤᠷ ᠲᠡᠷᠡ ᠬᠣᠶᠠᠷ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠬᠠᠷᠪᠤᠭᠰᠠᠨ ᠰᠤᠮᠤ ᠨᠢᠰᠬᠦ ᠣᠴᠢ ᠮᠡᠲᠦ ᠲᠣᠭᠣᠰᠣᠨ ᠤ᠋ ᠳᠣᠲᠣᠷᠠ ᠠ᠋ᠴᠠ ᠵᠣᠭᠵᠢᠨ ᠭᠠᠷᠴᠤ ᠢᠷᠡᠭᠡᠳ ᠲᠦᠳᠡᠭᠡᠯᠵᠡᠯ ᠦᠭᠡᠶᠡ ᠣᠢᠷᠠ ᠬᠦᠷᠴᠦ᠂ ᠠᠷᠠᠢᠬᠠᠨ ᠨᠢᠭᠡᠨ ᠬᠠᠷᠪᠤᠯᠭᠠ ᠶ᠋ᠢᠨ ᠭᠠᠵᠠᠷᠠ ᠬᠣᠶᠠᠷ ᠵᠠᠩᠵᠤᠨ ᠮᠣᠷᠢᠨ ᠠ᠋ᠴᠠᠭᠠᠨ ᠬᠠᠷᠠᠢᠨ ᠪᠠᠭᠤᠵᠤ ᠲᠦᠰᠬᠢᠲᠡᠯᠡ ᠰᠥᠭᠥᠳᠴᠦ ᠠᠮᠤᠷ ᠡᠷᠢᠨ : 《ᠬᠣᠶᠠᠷ ᠨᠣᠶᠠᠳ ᠮᠡᠨᠳᠦ ᠤᠤ? 》 ᠬᠡᠮᠡᠮᠦᠢ᠃ ᠵᠡᠪᠡ᠂ ᠵᠡᠯᠮᠡ ᠰᠣᠴᠢᠵᠤ ᠬᠢᠨᠠᠨ ᠦᠵᠡᠪᠡᠰᠦ ᠬᠠᠷᠢᠨ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠳᠠᠢᠪᠠᠩ ᠮᠡᠩᠬᠡᠯᠢᠭ ᠦ᠋ᠨ ᠬᠣᠶᠠᠷ ᠬᠥᠪᠡᠭᠦᠨ ᠠᠯᠤᠬᠠ᠂ ᠰᠦᠬᠡ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠠᠵᠤᠭᠤ᠃ ᠡᠭᠦᠨ ᠳ᠋ᠦ᠍ᠷ ᠳᠥᠷᠪᠡᠨ ᠬᠥᠮᠦᠨ ᠬᠠᠮᠲᠤᠪᠠᠷ ᠶᠡᠬᠡᠯᠡ ᠢᠨᠢᠶᠡᠯᠴᠡᠵᠦ᠂ ᠵᠡᠪᠡ ᠵᠡᠯᠮᠡ ᠬᠣᠶᠠᠷ ᠨᠣᠶᠠᠨ ᠴᠤ᠌ ᠶᠠᠭᠠᠷᠠᠨ ᠮᠣᠷᠢᠨ ᠠ᠋ᠴᠠᠭᠠᠨ ᠪᠠᠭᠤᠵᠤ ᠲᠦᠷᠭᠡᠨ ᠠᠯᠬᠤᠨ ᠡᠴᠢᠵᠦ ᠠᠯᠤᠬᠠ᠂ ᠰᠦᠬᠡ ᠠᠬᠠ ᠳᠡᠭᠦᠦ ᠶ᠋ᠢᠨ ᠭᠠᠷ ᠠ᠋ᠴᠠ ᠬᠥᠲᠥᠯᠵᠦ ᠪᠠᠶᠠᠷᠯᠠᠨ ᠢᠨᠢᠶᠡᠯᠴᠡᠵᠦ᠂ ᠠᠯᠤᠬᠠ ᠰᠦᠬᠡ ᠬᠣᠶᠠᠷ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄
《ᠪᠢᠳᠡ ᠬᠣᠶᠠᠷ ᠠᠪᠤᠭᠠᠢ ᠨᠣᠶᠠᠨ ᠤ᠋ ᠲᠤᠭ ᠢ᠋ ᠲᠣᠳᠣᠷᠬᠠᠢ ᠦᠵᠡᠵᠦ ᠲᠠᠨᠢᠭᠠᠳ᠂ ᠴᠡᠭᠡᠵᠢ ᠪᠡᠨ ᠳᠡᠯᠪᠡᠷᠡᠲᠡᠯᠡ ᠪᠠᠶᠠᠷᠯᠠᠪᠠ᠃ ᠲᠣᠭᠣᠰᠣᠨ ᠤ᠋ ᠳᠣᠲᠣᠷᠠ ᠲᠤᠯᠠᠳᠠ ᠬᠣᠶᠠᠷ ᠨᠣᠶᠠᠨ ᠠᠪᠤᠭᠠᠢ ᠪᠢᠳᠡᠨ ᠢ᠋ ᠯᠠᠪ ᠡᠰᠡ ᠲᠠᠨᠢᠪᠠᠢ ᠶᠠ 》ᠭᠡᠮᠡᠨ ᠢᠨᠢᠶᠡᠨ ᠬᠡᠯᠡᠬᠦ ᠪᠥᠭᠡᠳ ᠨᠢᠭᠡᠨ ᠳᠡᠭᠡᠭᠦᠷ ᠲᠡᠷᠡ ᠬᠥᠮᠦᠨ ᠳ᠋ᠦ᠍ᠷ ᠪᠠᠷᠢᠭᠳᠠᠭᠰᠠᠨ ᠵᠠᠯᠠᠭᠤ ᠵᠥᠭᠡᠯᠡᠨ ᠵᠠᠩᠵᠤᠨ ᠢ᠋ ᠲᠡᠳᠬᠦᠨ ᠢᠷᠡᠭᠦᠯᠵᠦ ᠬᠥᠯᠢᠶᠡᠰᠦᠨ ᠢ᠋ ᠲᠠᠢᠯᠤᠨ :
《ᠡᠨᠡ ᠪᠥᠭᠡᠰᠦ ᠤᠢᠭᠤᠷ ᠤᠯᠤᠰ ᠤ᠋ᠨ ᠡᠵᠡᠨ ᠦᠷᠭᠦᠩᠭᠡ ᠬᠠᠭᠠᠨ ᠮᠥᠨ᠃ ᠮᠠᠨ ᠤ᠋ ᠬᠣᠶᠠᠳᠤᠭᠠᠷ ᠲᠠᠢᠽᠢ ᠴᠢᠶᠠᠨ ᠰᠦᠢ ᠳ᠋ᠦ᠍ᠷ ᠪᠠᠢᠯᠳᠤᠨ ᠪᠠᠷᠢᠭᠳᠠᠵᠤ᠂ ᠪᠢᠰᠢᠷᠡᠨ ᠰᠢᠲᠦᠵᠦ ᠬᠦᠰᠡᠨ ᠳᠠᠭᠠᠭᠠᠳ ᠮᠠᠨ ᠤ᠋ ᠬᠠᠭᠠᠨ ᠡᠵᠡᠨ ᠬᠤᠸᠠᠩᠳᠢ ᠳ᠋ᠤᠷ ᠨᠢᠭᠤᠷ ᠵᠣᠯᠭᠠᠨ ᠮᠥᠷᠭᠥᠨ ᠳᠠᠭᠠᠷᠠ ᠤᠯᠤᠰ ᠲᠤᠷ ᠡᠴᠢᠬᠦᠶᠡ ᠵᠠᠮ ᠤ᠋ᠨ ᠭᠣᠳᠣᠰ ᠲᠤᠷ ᠤᠷᠢᠳᠠ ᠮᠣᠷᠢᠯᠠᠨ ᠶᠠᠪᠤᠭᠰᠠᠭᠠᠷ ᠠᠳᠠ ᠬᠦᠷᠴᠦ᠂ ᠵᠠᠮ ᠤ᠋ᠨ ᠳᠡᠭᠡᠷᠡᠮ ᠳ᠋ᠦ᠍ᠷ ᠪᠠᠷᠢᠭᠳᠠᠵᠤᠬᠤᠢ᠃ ᠪᠢᠳᠡᠨ ᠦ᠌ ᠠᠯᠪᠠᠨ ᠬᠡᠷᠡᠭ ᠢ᠋ ᠠᠷᠠᠢ ᠡᠰᠡ ᠶᠡᠬᠡᠳᠡ ᠰᠠᠭᠠᠲᠠᠯ ᠭᠠᠷᠭᠠᠪᠠ 》ᠭᠡᠮᠡᠨ ᠰᠦᠬᠡ ᠵᠠᠩᠵᠤᠨ ᠦᠨᠡᠬᠡᠷ ᠠᠭᠤᠯᠠ ᠶ᠋ᠢ ᠨᠡᠭᠡᠭᠡᠬᠦ ᠤᠷᠲᠤ ᠡᠰᠢᠲᠦ ᠲᠠᠪᠢᠨ ᠵᠢᠩ ᠦ᠋ᠨ ᠰᠠᠷᠠᠨ ᠰᠦᠬᠡ ᠪᠡᠨ ᠳᠠᠯᠠᠢᠨ᠂ ᠲᠡᠷᠡ ᠳᠡᠭᠡᠷᠡᠮ ᠢ᠋ ᠴᠠᠪᠴᠢᠷᠠ ᠡᠴᠢᠬᠦᠢ ᠳ᠋ᠦ᠍ᠷ ᠵᠡᠯᠮᠡ ᠨᠣᠶᠠᠨ ᠶᠡᠬᠡᠯᠡ ᠶᠠᠭᠠᠷᠠᠨ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ᠄
《ᠬᠦᠢ ! ᠰᠦᠬᠡ ᠪᠠᠭᠠᠲᠤᠷ ᠠ᠋᠂ ᠰᠠᠷᠠᠨ ᠰᠦᠬᠡᠨ ᠳᠣᠣᠷᠠ ᠪᠠᠨ ᠬᠥᠮᠦᠨ ᠢ᠋ ᠦᠯᠡᠳᠡᠭᠡ᠂ ᠲᠡᠷᠡ ᠬᠥᠮᠦᠨ ᠦ᠌ ᠰᠦᠷ ᠵᠢᠪᠬᠤᠯᠠᠩ ᠥᠲᠡᠯᠡ ᠪᠤᠰᠤ ᠪᠠᠢᠨᠠᠮ᠃ ᠠᠯᠭᠤᠷ ᠠᠰᠠᠭᠤᠵᠤ ᠪᠠᠢᠨ ᠮᠡᠳᠡᠶᠡ᠂ ᠠᠯᠲᠠᠨ ᠶᠡᠬᠡ ᠲᠥᠷᠥ ᠳ᠋ᠦ᠍ᠷ ᠠᠷᠤᠤᠬᠠᠨ ᠪᠠᠭᠠᠲᠤᠷ ᠤ᠋ᠳ ᠮᠠᠰᠢ ᠬᠡᠷᠡᠭ ᠲᠡᠢ ᠪᠠᠢᠨᠠᠮ ᠪᠢᠰᠢᠦ ? ᠪᠢᠲᠡᠭᠡᠢ ᠠᠯᠠ᠂ ᠪᠢᠲᠡᠭᠡᠢ ᠠᠯᠠ ! 》ᠭᠡᠮᠡᠨ ᠳᠠᠭᠤᠳᠠᠨ ᠵᠣᠭᠰᠣᠭᠠᠲᠠᠯᠠ ᠲᠡᠷᠡ ᠳᠡᠭᠡᠷᠡᠮ ᠵᠠᠩᠵᠤᠨ ᠤ᠋ ᠴᠡᠷᠢᠭ ᠦ᠋ᠳ ᠮᠥᠨ ᠴᠥᠮ ᠭᠦᠢᠴᠡᠨ ᠬᠦᠷᠦᠯᠴᠡᠨ ᠢᠷᠡᠭᠡᠳ᠂ ᠡᠵᠡᠨ ᠢᠨᠤ ᠪᠠᠷᠢᠭᠳᠠᠵᠤ ᠬᠦᠯᠢᠭᠳᠡᠭᠡᠳ ᠲᠡᠨᠳᠡ ᠲᠠᠪᠤᠨ ᠶᠡᠬᠡ ᠵᠠᠩᠵᠤᠨ ᠴᠤᠭᠯᠠᠭᠰᠠᠨ ᠢ᠋ ᠦᠵᠡᠭᠡᠳ᠂ ᠠᠶᠤᠮᠰᠢᠭ ᠦᠭᠡᠢ ᠣᠷᠣᠭᠰᠢ ᠣᠷᠣᠬᠤ ᠦᠭᠡᠢ᠂ ᠴᠥᠮ ᠬᠠᠭᠠᠰ ᠭᠠᠵᠠᠷ ᠤ᠋ᠨ ᠬᠣᠯᠠ ᠮᠣᠷᠢᠨ ᠠ᠋ᠴᠠᠭᠠᠨ ᠪᠠᠭᠤᠯᠴᠠᠵᠤ ᠢᠷᠠᠢᠲᠠᠯᠠ ᠵᠢᠭᠰᠠᠨ ᠵᠣᠭᠰᠣᠵᠤᠬᠤᠢ᠃ ᠲᠡᠳᠡᠨᠡᠷ ᠴᠥᠮ ᠢ᠋ᠶ᠋ᠡᠷ ᠪᠠᠷᠰ ᠤ᠋ᠨ ᠠᠷᠠᠰᠤᠨ ᠤ᠋ ᠮᠠᠯᠠᠭᠠ ᠬᠦᠷᠮᠡ ᠡᠮᠦᠰᠦᠯᠴᠡᠵᠦ ᠮᠠᠰᠢᠳᠠ ᠰᠦᠷ ᠵᠢᠪᠬᠤᠯᠠᠩ ᠲᠠᠢ᠂ ᠮᠢᠩᠭᠠᠨ ᠪᠠᠷᠰ ᠤ᠋ᠨ ᠰᠦᠷᠦᠭ ᠠᠳᠠᠯᠢ ᠦᠵᠡᠮᠵᠢ ᠲᠡᠢ ᠰᠠᠢᠬᠠᠨ ᠠᠵᠤᠭᠤ᠃
ᠲᠡᠳᠦᠢ ᠵᠠᠯᠮᠠ᠂ ᠵᠡᠪᠡ ᠬᠣᠶᠠᠭᠤᠯᠠ ᠮᠥᠨ ᠴᠡᠷᠢᠭ ᠢ᠋ᠶ᠋ᠡᠨ ᠲᠡᠭᠰᠢᠯᠡᠨ ᠵᠢᠭᠰᠠᠭᠠᠵᠤ ᠪᠠᠢᠯᠳᠤᠬᠤ ᠪᠠᠷ ᠪᠠᠢᠷᠢᠯᠠᠭᠠᠳ ᠵᠠᠩᠵᠤᠨ ᠨᠠᠷ ᠢ᠋ ᠲᠡᠭᠰᠢᠯᠡᠬᠦᠶᠡ ᠲᠡᠷᠡ ᠬᠦᠯᠢᠭᠳᠡᠭᠰᠡᠨ ᠵᠠᠯᠠᠭᠤ ᠳᠡᠭᠡᠷᠡᠮ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠨ ᠥᠭᠦᠯᠡᠷᠦᠨ :
《ᠪᠢ ᠣᠳᠣ ᠰᠠᠶᠢ ᠮᠡᠳᠡᠪᠡ᠃ ᠲᠠᠨ ᠤ᠋ ᠡᠨᠡ ᠪᠠᠭᠠᠲᠤᠷ ᠤ᠋ᠳ ᠯᠠᠪ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠲᠩᠷᠢᠯᠢᠭ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠠᠩᠵᠤᠨ ᠲᠦᠰᠢᠮᠡᠳ ᠪᠣᠢ ᠊ᠶᠠ᠃ ᠪᠢ ᠬᠡᠮᠡᠭᠴᠢ ᠬᠠᠮᠢ ᠤᠯᠤᠰ ᠤ᠋ᠨ ᠡᠵᠡᠨ ᠲᠠᠢᠨᠴᠢᠩ ᠪᠣᠯᠠᠢ ᠃ ᠵᠠᠮ ᠠᠶᠠᠨ ᠤ᠋ ᠳᠡᠭᠡᠷᠡᠮᠴᠢ ᠬᠤᠯᠠᠭᠠᠢ ᠪᠤᠰᠤ᠃ ᠥᠨᠥᠬᠡᠨ ᠲᠠᠨ ᠤ᠋ ᠤᠯᠤᠰ ᠤ᠋ᠨ ᠡᠯ ᠴᠢᠶᠠᠨ ᠰᠦᠢ ᠴᠠᠭᠠᠲᠠᠢ ᠴᠢᠨ ᠸᠠᠩ ᠬᠡᠮᠡᠭᠴᠢ ᠪᠡᠷ ᠤᠢᠭᠤᠷ ᠤᠯᠤᠰ ᠤ᠋ᠨ ᠡᠵᠡᠨ ᠢ᠋ ᠪᠠᠢᠯᠳᠤᠨ ᠪᠠᠷᠢᠵᠤ᠂ ᠬᠡᠴᠡᠭᠦᠦ ᠪᠠᠭᠠᠲᠤᠷ᠂ ᠴᠠᠭᠠᠨ ᠴᠢᠷᠠᠢᠲᠤ 《ᠪᠠᠢ ᠪᠠ ᠸᠠᠩ 》 ᠭᠡᠮᠡᠨ ᠰᠣᠨᠣᠰᠴᠤ᠂ ᠪᠠᠭᠰᠢ ᠪᠠᠷᠠᠪᠤᠩ ᠠᡁᠥ᠋ᠩ ᠦ᠋ᠨ ᠡᠷᠲᠡ ᠶ᠋ᠢᠨ ᠵᠠᠷᠯᠢᠭ ᠢ᠋ ᠮᠣᠩᠭᠣᠯ ᠤ᠋ᠨ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤᠷ ᠨᠠᠢᠷᠠᠯᠳᠤᠨ᠂ ᠤᠮᠠᠷᠠ ᠡᠲᠡᠭᠡᠳ ᠢ᠋ ᠠᠮᠤᠭᠤᠯᠤᠶᠠ ᠭᠡᠮᠡᠨ 《ᠪᠠᠢ ᠪᠠ ᠸᠠᠩ 》ᠲᠠᠢᠽᠢ ᠡᠯ ᠴᠢᠶᠠᠨ ᠰᠦᠢ ᠶ᠋ᠢ ᠡᠷᠢᠨ ᠵᠣᠯᠭᠠᠵᠤ ᠨᠠᠢᠷᠠᠯᠳᠤᠷᠠ ᠤᠢᠭᠤᠷ ᠤ᠋ᠨ ᠵᠦᠭ ᠡᠴᠢᠬᠦᠶᠡ᠂ ᠡᠨᠡ ᠵᠠᠩᠵᠤᠨ ᠳ᠋ᠤᠷ ᠤᠴᠠᠷᠠᠵᠤ᠂ ᠤᠴᠢᠷ ᠲᠤᠬᠠᠢ ᠶ᠋ᠢ ᠤᠬᠤᠴᠢᠯᠠᠨ ᠠᠰᠠᠭᠤᠶᠠ ᠭᠡᠮᠡᠨ ᠡᠰᠡᠷᠭᠦ ᠢᠨᠤ ᠡᠴᠢᠪᠡᠰᠦ᠂ ᠡᠨᠡ ᠵᠠᠩᠵᠤᠨ ᠡᠷᠬᠢᠮ ᠳᠣᠣᠷᠠᠲᠤ ᠶ᠋ᠢ ᠢᠯᠭᠠᠬᠤ ᠦᠭᠡᠢ ᠨᠠᠮᠠᠶ᠋ᠢ ᠡᠭᠡᠷᠡᠮᠡ ᠲᠠᠯᠠ ᠶ᠋ᠢᠨ ᠳᠡᠭᠡᠷᠡᠮᠴᠢ ᠲᠤᠨᠤᠭᠠᠴᠢ ᠪᠣᠯᠭᠠᠨ ᠰᠢᠭᠤᠳ ᠪᠠᠢᠯᠳᠤᠨ ᠣᠷᠣᠭᠰᠠᠨ ᠳ᠋ᠤᠷ ᠦᠭᠡ ᠨᠡᠪᠲᠡᠷᠡᠬᠦ ᠵᠠᠪ ᠭᠠᠷᠭᠠᠯ ᠦᠭᠡᠢ ᠪᠠᠢᠯᠳᠤᠯᠴᠠᠵᠤ ᠡᠢᠮᠦ ᠪᠣᠯᠵᠤᠬᠤᠢ᠃ ᠡᠭᠦᠪᠡᠷ ᠦᠵᠡᠬᠦᠯᠡ ᠡᠨᠡ ᠵᠠᠩᠵᠤᠨ ᠴᠤ᠌ ᠤᠢᠭᠤᠷ ᠤ᠋ᠨ ᠡᠵᠡᠨ ᠦᠷᠭᠦᠩᠭᠡ ᠬᠠᠭᠠᠨ ᠠᠵᠤᠭᠤ 》ᠬᠡᠮᠡᠯᠳᠦᠬᠦᠢ ᠳ᠋ᠦ᠍ᠷ ᠵᠠᠯᠮᠠ ᠶᠡᠬᠡᠳᠡ ᠪᠠᠶᠠᠷᠯᠠᠨ ᠥᠪᠡᠷᠦᠨ ᠭᠠᠷ ᠢ᠋ᠶ᠋ᠠᠷ ᠬᠦᠯᠢᠶᠡᠰᠦᠨ ᠢ ᠲᠠᠢᠯᠤᠨ᠂ ᠦᠷᠭᠦᠩᠭᠡ ᠬᠢᠭᠡᠳ ᠵᠡᠪᠡ ᠶ᠋ᠢᠨ ᠲᠥᠯᠥᠭᠡ ᠰᠠᠢᠬᠠᠨ ᠦᠭᠡ ᠬᠡᠯᠡᠵᠦ᠂ ᠳᠣᠬᠢᠶᠠ ᠲᠠᠯᠪᠢᠨ ᠬᠠᠮᠲᠤᠪᠠᠷ ᠬᠥᠳᠡᠯᠵᠦ ᠤᠢᠭᠤᠷ ᠤ᠋ᠨ ᠡᠵᠡᠨ ᠦ᠌ ᠶᠡᠬᠡ ᠪᠠᠭᠤᠳᠠᠯ ᠳ᠋ᠤᠷ ᠢᠷᠡᠵᠦ᠂ ᠭᠤᠷᠪᠠᠨ ᠪᠠᠭᠤᠳᠠᠯ ᠢ᠋ ᠨᠢᠬᠡᠨᠡ ᠨᠡᠢᠯᠡᠭᠦᠯᠦᠨ᠂ ᠶᠡᠬᠡ ᠪᠠᠭᠤᠳᠠᠯ ᠪᠠᠭᠤᠯᠴᠠᠭᠠᠳ᠂ ᠮᠠᠯ ᠭᠠᠷᠭᠠᠯᠭᠠᠨ ᠶᠡᠬᠡ ᠬᠤᠷᠢᠮ ᠬᠤᠷᠢᠮᠯᠠᠨ᠂ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠪᠠᠶᠠᠷ ᠢ᠋ᠶ᠋ᠠᠷ ᠬᠠᠮᠲᠤᠳᠠᠭᠰᠠᠨ ᠶᠡᠬᠡ ᠪᠠᠶᠠᠰᠬᠤᠯᠠᠩ ᠤ᠋ᠨ ᠶᠣᠰᠣᠭᠠᠷ ᠬᠠᠭᠠᠨ ᠴᠢᠩᠭᠢᠰ ᠦ᠋ᠨ ᠵᠦᠭ ᠬᠠᠨᠳᠤᠵᠤ᠂ ᠦᠬᠡᠷ ᠫᠤᠤ ᠭᠤᠷᠪᠠᠨᠲᠠ ᠳᠠᠭᠤᠷᠢᠰᠬᠠᠨ ᠮᠥᠷᠭᠥᠵᠦ᠂ ᠲᠡᠭᠷᠢ ᠭᠠᠵᠠᠷ ᠢ᠋ ᠳᠠᠬᠢᠵᠤ ᠬᠥᠭᠵᠢᠮ ᠱᠠᠪᠠᠩ ᠡᠭᠦᠰᠬᠡᠯᠭᠡᠨ᠂ ᠴᠢᠰᠤ ᠰᠠᠴᠤᠨ ᠲᠠᠩᠭᠠᠷᠢᠭ ᠨᠡᠢᠯᠡᠨ᠂ ᠣᠷᠣᠯᠳᠣᠭᠠ ᠪᠠᠷᠢᠯᠳᠤᠭᠠ ᠲᠠᠯᠪᠢᠯᠴᠠᠨ᠂ ᠭᠤᠷᠪᠠᠨ ᠡᠳᠦᠷ ᠶᠡᠬᠡᠯᠡ ᠨᠠᠢᠷᠯᠠᠨ ᠬᠠᠷᠢᠯᠴᠠᠨ ᠱᠠᠩ ᠬᠤᠷᠢᠮ ᠲᠠᠯᠪᠢᠯᠴᠠᠨ ᠵᠢᠷᠭᠠᠯᠳᠤᠮᠤᠢ᠃ ᠡᠨᠡ ᠲᠦᠭᠰᠢᠯ ᠬᠠᠷᠢᠨ ᠲᠦᠭᠡᠮᠡᠯ ᠪᠣᠯᠤᠭᠰᠠᠨ ᠲᠤᠯᠠᠳᠠ᠂ ᠲᠦᠮᠡᠨ ᠴᠡᠷᠢᠭ ᠢ᠋ ᠬᠣᠶᠠᠷ ᠵᠠᠮ ᠢ᠋ᠶ᠋ᠠᠷ ᠰᠠᠯᠭᠠᠨ ᠲᠡᠭᠰᠢᠯᠡᠨ ᠲᠦᠭᠦᠬᠡᠢ ᠳᠠᠢᠰᠤᠨ ᠤ᠋ ᠤᠢᠭᠤᠷ ᠤᠯᠤᠰ ᠲᠤᠷ ᠣᠷᠣᠭᠰᠠᠨ ᠲᠦᠭᠰᠢᠬᠦ ᠰᠡᠳᠬᠢᠯᠲᠦ 《ᠪᠠᠢ ᠪᠠ ᠸᠠᠩ 》– ᠡᠯ ᠴᠢᠶᠠᠨ ᠰᠦᠢ ᠴᠠᠭᠠᠲᠠᠢ ᠲᠠᠢᠽᠢ ᠶ᠋ᠢᠨ ᠬᠡᠷᠬᠢᠨ ᠬᠡᠷᠬᠢᠵᠦ᠂ ᠤᠢᠭᠤᠷ ᠲᠤᠷ ᠣᠷᠣᠵᠤ ᠤᠯᠤᠰ ᠢ᠋ ᠠᠨᠤ ᠠᠪᠴᠤ ᠡᠵᠡᠨ ᠢ᠋ ᠢᠨᠤ ᠪᠠᠷᠢᠭᠰᠠᠨ ᠢ᠋ ᠮᠥᠨ ᠪᠠᠬᠠᠨ ᠲᠣᠪᠴᠢᠶᠠᠯᠠᠨ ᠭᠠᠷᠭᠠᠬᠤ ᠬᠡᠷᠡᠭᠲᠡᠢ ᠲᠤᠯᠠ ᠲᠣᠪᠬᠢᠨ ᠮᠡᠳᠡᠭᠦᠯᠬᠦ ᠢᠨᠤ᠄
ᠲᠡᠭᠦᠨᠴᠡ ᠮᠣᠩᠭᠣᠯ ᠤ᠋ᠨ ᠴᠠᠭᠠᠲᠠᠢ ᠲᠠᠢᠽᠢ᠂ ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠳᠣᠣᠷᠠ ᠵᠠᠮ ᠤ᠋ᠨ ᠭᠣᠳᠣᠰ ᠲᠤᠷ ᠬᠠᠷᠢᠨ ᠢᠷᠬᠠᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠲᠣᠳᠢ ᠳ᠋ᠤᠷ ᠠᠭᠤᠯᠵᠠᠵᠤ ᠬᠦᠨᠳᠦᠳᠡ ᠨᠠᠢᠷᠯᠠᠨ ᠥᠨᠵᠢᠭᠰᠡᠨ ᠳ᠋ᠦ᠍ᠷ ᠲᠣᠳᠢ ᠪᠠᠷ ᠲᠣᠳᠣᠷᠬᠠᠢ ᠠᠷᠭᠠ ᠶ᠋ᠢ ᠡᠷᠭᠦᠵᠦ ᠥᠭᠦᠯᠡᠷᠦᠨ :
《ᠤᠢᠭᠤᠷ ᠤᠯᠤᠰ᠂ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠤᠷᠢᠳᠠ ᠶ᠋ᠢᠨ ᠡᠵᠡᠨ ᠯᠢ ᠼᠦᠨ ᠢᠤ᠌ ᠶ᠋ᠢᠨ ᠥᠬᠡᠨᠴᠡ ᠪᠠᠭᠤᠷᠠᠢ ᠳ᠋ᠤᠷ ᠵᠠᠪᠰᠢᠵᠤ᠂ ᠰᠢᠩᠰᠡ ᠳᠠᠯᠠᠢ ᠶ᠋ᠢᠨ ᠠᠰᠢᠭ ᠢ ᠡᠵᠡᠷᠬᠡᠨ ᠪᠤᠯᠢᠶᠠᠭᠠᠳ ᠬᠡᠳᠦᠨ ᠵᠢᠯ ᠮᠠᠰᠢ ᠪᠠᠶᠠᠨ ᠡᠯᠪᠡᠭ ᠪᠣᠯᠵᠤ᠂ ᠬᠠᠷᠠᠬᠠᠨ ᠣᠮᠣᠷᠬᠠᠨ ᠠᠬᠤᠶᠠ᠂ ᠰᠠᠨᠠᠮᠰᠠᠷ ᠦᠭᠡᠢ ᠯᠢ ᠠᠨ ᠴᠢᠦᠸᠠᠨ ᠬᠠᠭᠠᠨ ᠰᠠᠭᠤᠭᠠᠳ ᠥᠬᠢᠨ ᠢᠨᠤ ᠬᠤᠪᠢᠯᠭᠠᠨ ᠭᠠᠳᠠᠰᠤᠲᠤ ᠶ᠋ᠢᠨ ᠭᠦᠩᠵᠦ ᠮᠠᠰᠢᠳᠠ ᠬᠡᠴᠡᠭᠦᠦ᠂ ᠠᠷᠪᠠᠨ ᠬᠡᠳᠦᠬᠡᠨ ᠨᠠᠰᠤᠲᠠᠢ ᠪᠥᠭᠡᠳ ᠴᠡᠷᠢᠭ ᠬᠡᠷᠡᠭᠯᠡᠬᠦ ᠢᠨᠤ ᠰᠠᠬᠢᠭᠤᠯᠰᠤᠨ ᠮᠡᠲᠦ᠂ ᠤᠢᠭᠤᠷ ᠤ᠋ᠨ ᠴᠡᠷᠢᠭ ᠢ᠋ ᠳᠠᠷᠠᠭᠠ ᠪᠠᠷ ᠲᠠᠪᠤᠨ ᠵᠡᠷᠭᠡ ᠳᠠᠷᠤᠵᠤ᠂ ᠤᠢᠭᠤᠷ ᠡᠵᠡᠨ ᠦᠷᠭᠦᠩᠭᠡ ᠬᠡᠳᠦᠨ ᠦᠬᠦᠯ ᠡᠴᠡ ᠮᠡᠩᠳᠡᠭᠦᠦ ᠮᠤᠯᠲᠤᠷᠠᠨ ᠨᠢᠭᠡᠮᠦᠰᠦᠨ ᠨᠢᠭᠤᠵᠤ ᠪᠠᠢᠭᠰᠠᠨ ᠪᠥᠯᠥᠭᠡ᠃ ᠡᠨᠡ ᠨᠠᠮᠤᠷᠬᠠᠨ ᠲᠠᠩᠭᠤᠳ ᠤ᠋ᠨ ᠬᠡᠴᠡᠭᠦᠦ ᠭᠠᠳᠠᠰᠤᠲᠤ ᠭᠦᠩᠵᠦ ᠢᠨᠤ ᠡᠭᠡᠮᠡᠭᠴᠢ ᠲᠡᠷᠡ ᠬᠣᠷᠣᠰᠤᠯ ᠢ᠋ ᠨᠡᠬᠡᠵᠦ᠂ ᠡᠳᠦᠭᠡ ᠪᠠᠰᠠ ᠴᠡᠷᠢᠭ ᠢ᠋ ᠡᠳᠦᠭᠦᠯᠪᠡ᠃ ᠡᠨᠡ ᠤᠳᠠᠭᠠ ᠲᠡᠷᠡ ᠯᠠᠪ ᠤ᠋ᠨ ᠭᠦᠩᠵᠦ ᠶ᠋ᠢᠨ ᠨᠢᠭᠡᠬᠡᠨ ᠵᠦᠭ ᠬᠢᠴᠢᠶᠡᠮᠦᠢ᠃ ᠤᠯᠤᠰ ᠮᠥᠨ ᠬᠣᠪ ᠬᠣᠭᠣᠰᠣᠨ᠃ ᠲᠠᠢᠽᠢ ᠴᠢ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠠᠪᠴᠤ᠂ ᠦᠷᠭᠦᠩᠭᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠥᠷᠯᠥᠭᠡ ᠶ᠋ᠢᠨ ᠬᠠᠷᠠᠩᠭᠤᠢ ᠪᠠᠷ ᠴᠥᠯᠳᠦᠮᠭᠡᠨ ᠣᠷᠣᠵᠤ ᠦᠷᠭᠦᠩᠭᠡ ᠶ᠋ᠢ ᠪᠡᠷᠢ᠃ ᠥᠪᠡᠷᠡ ᠪᠠᠭᠠᠲᠤᠷ ᠵᠠᠩᠵᠤᠨ ᠢ᠋ ᠰᠣᠩᠭᠣᠨ ᠲᠦᠮᠡᠨ ᠢᠯᠡᠭᠦᠦ ᠴᠡᠷᠢᠭ ᠠᠪᠤᠭᠤᠯᠤᠨ ᠤᠢᠭᠤᠷ ᠤ᠋ᠨ ᠬᠣᠲᠠ ᠶ᠋ᠢ ᠪᠠᠢᠯᠳᠤᠨ ᠠᠪᠤᠪᠠᠰᠤ᠂ ᠡᠨᠡ ᠨᠢᠭᠡᠬᠡᠨ ᠤᠳᠠᠭᠠ ᠳ᠋ᠤᠷ ᠤᠢᠭᠤᠷ ᠤᠯᠤᠰ ᠢ᠋ ᠯᠠᠪ ᠣᠷᠣᠭᠤᠯᠤᠨ ᠠᠪᠴᠤ ᠴᠢᠳᠠᠮᠤᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠢ ᠴᠠᠭᠠᠲᠠᠢ ᠶᠡᠬᠡᠳᠡ ᠲᠠᠯᠠᠰᠢᠶᠠᠨ ᠪᠠᠶᠠᠷᠯᠠᠵᠤ᠂ ᠥᠪᠡᠷᠦᠨ ᠪᠡᠶᠡ ᠪᠡᠷ ᠸᠴᠢᠷ ᠭᠠᠳᠠᠰᠤ᠂ ᠠᠯᠮᠠᠰ ᠭᠠᠳᠠᠰᠤ᠂ ᠭᠠᠯ ᠭᠠᠷᠤᠵᠠ᠂ ᠪᠣᠷᠣ ᠪᠦᠷᠭᠦᠳ ᠳᠥᠷᠪᠡᠨ ᠵᠠᠩᠵᠤᠨ ᠢ᠋ ᠳᠥᠷᠪᠡᠨ ᠮᠢᠩᠭᠠᠨ ᠴᠡᠷᠢᠭ ᠦ᠋ᠨ ᠨᠢᠰᠭᠡ ᠪᠠᠭᠤᠳᠠᠯ ᠢ᠋ᠶ᠋ᠠᠷ ᠰᠠᠯᠭᠠᠵᠤ ᠠᠪᠤᠭᠠᠳ ᠵᠢᠴᠢ ᠠᠯᠤᠬᠠ᠂ ᠰᠦᠬᠡ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠳ᠋ᠤᠷ ᠠᠷᠪᠠᠨ ᠪᠠᠭᠠ ᠵᠠᠩᠵᠤᠨ᠂ ᠬᠣᠶᠠᠷ ᠲᠦᠮᠡᠨ ᠴᠡᠷᠢᠭ ᠲᠡᠢ ᠥᠭᠴᠦ᠂ ᠠᠷᠪᠠᠨ ᠵᠠᠯᠠᠭᠤᠰ ᠪᠠᠭᠠᠲᠤᠷ ᠵᠠᠩᠵᠤᠨ ᠨᠠᠷ ᠰᠤᠯᠠ ᠬᠥᠮᠦᠨ ᠦ᠌ ᠶᠠᠩᠵᠤ ᠪᠠᠷ ᠴᠢᠮᠡᠭᠯᠡᠨ ᠪᠡᠶᠡ ᠳ᠋ᠦ᠍ᠷ ᠣᠬᠣᠷ ᠬᠤᠷᠴᠠ ᠵᠡᠪᠰᠡᠭ ᠦ᠋ᠳ ᠢ᠋ ᠨᠢᠭᠤᠨ ᠠᠪᠴᠤ᠂ ᠶᠡᠬᠡ ᠴᠡᠷᠢᠭ ᠡᠴᠡ ᠨᠢᠭᠡᠨ ᠡᠳᠦᠷ ᠤᠷᠤᠭᠰᠢᠯᠠᠨ ᠠᠬᠠᠯᠠᠨ ᠭᠠᠷᠴᠤ᠂ ᠬᠣᠲᠠ ᠶ᠋ᠢᠨ ᠣᠢᠷᠠᠯᠴᠠᠭᠠ ᠬᠦᠷᠴᠦ ᠮᠣᠷᠢᠳ ᠢ᠋ ᠴᠡᠷᠢᠭ ᠲᠦ᠍ᠷ ᠥᠭᠴᠦ ᠶᠡᠬᠡ ᠴᠡᠷᠢᠭ ᠢ᠋ ᠣᠭᠲᠣᠯᠤᠨ ᠂ ᠴᠥᠮ ᠶᠠᠪᠠᠭᠠᠯᠠᠨ ᠤᠷᠢᠳᠠ ᠬᠣᠲᠠ ᠳ᠋ᠤᠷ ᠣᠷᠣᠵᠤ ᠲᠠᠷᠬᠠᠯᠴᠠᠨ ᠪᠠᠭᠤᠭᠠᠳ᠂ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠷᠴᠦ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠨ ᠪᠥᠬᠥᠶᠡ᠂ ᠠᠯᠤᠬᠠ ᠰᠦᠬᠡ ᠬᠣᠶᠠᠭᠤᠯᠠ ᠶ᠋ᠢᠨ ᠴᠡᠷᠢᠭ ᠤᠢᠭᠤᠷ ᠬᠣᠲᠠ ᠶ᠋ᠢᠨ ᠣᠢᠷᠠ ᠠᠷᠪᠠᠭᠠᠳ ᠭᠠᠵᠠᠷ ᠬᠦᠷᠦᠮᠡᠭᠴᠡ᠂ ᠨᠢᠭᠡᠨᠲᠡ ᠶᠡᠬᠡᠯᠡ ᠬᠠᠰᠬᠢᠷᠤᠨ ᠬᠡᠩᠭᠡᠷᠭᠡ ᠶ᠋ᠢ ᠳᠡᠯᠪᠡᠷᠡᠲᠡᠯᠡ ᠳᠡᠯᠡᠳᠦᠯᠴᠡᠨ᠂ ᠬᠣᠷᠢᠨ ᠬᠣᠶᠠᠷ ᠵᠠᠮ ᠢ᠋ᠶ᠋ᠠᠷ ᠳᠣᠪᠲᠣᠯᠤᠯᠴᠠᠨ ᠣᠷᠣᠯᠴᠠᠵᠤ ᠬᠣᠲᠠ ᠶ᠋ᠢᠨ ᠳᠣᠣᠷᠠ ᠬᠦᠷᠬᠦᠶᠡ ᠤᠢᠭᠤᠷ ᠤ᠋ᠨ ᠬᠣᠲᠠ ᠶ᠋ᠢᠨ ᠴᠡᠷᠢᠭ ᠠᠷᠠᠢ ᠬᠠᠭᠠᠯᠭᠠ ᠪᠠᠨ ᠬᠠᠭᠠᠲᠠᠯᠠ᠂ ᠠᠷᠪᠠᠨ ᠵᠠᠩᠵᠤᠨ ᠵᠡᠷᠭᠡ ᠪᠡᠷ ᠭᠠᠷ ᠬᠥᠳᠡᠯᠦᠨ ᠤᠷᠢᠳᠠ ᠵᠡᠭᠦᠨ ᠬᠠᠭᠠᠯᠭᠠ ᠶ᠋ᠢ ᠪᠦᠯᠢᠶᠡᠨ ᠠᠪᠴᠤ ᠴᠡᠯᠳᠡᠢᠲᠡᠯᠡ ᠨᠡᠭᠡᠭᠡᠵᠦ᠂ ᠴᠡᠷᠢᠭ ᠢ᠋ᠶ᠋ᠡᠨ ᠲᠠᠯᠪᠢᠨ ᠣᠷᠣᠭᠤᠯᠵᠤ ᠴᠠᠭ ᠭᠱᠠᠨᠠ ᠳᠥᠷᠪᠡᠨ ᠬᠠᠭᠠᠯᠭᠠ ᠶ᠋ᠢ ᠴᠥᠮ ᠠᠪᠴᠤ ᠨᠡᠭᠡᠭᠡᠵᠦ᠂ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠪᠦᠷᠢᠨᠡ ᠣᠷᠣᠵᠤ᠂ ᠠᠯᠤᠬᠠ ᠤᠷᠢᠳᠠ ᠤᠢᠭᠤᠷ ᠤ᠋ᠨ ᠡᠵᠡᠨ ᠦ᠌ ᠤᠷᠲᠤ ᠬᠠᠷᠰᠢ ᠶ᠋ᠢᠨ ᠡᠭᠦᠳᠡ ᠪᠦᠷᠢ ᠶ᠋ᠢ ᠳᠣᠲᠣᠷᠠ ᠠ᠋ᠴᠠ ᠳᠠᠷᠤᠭᠤᠯᠤᠨ᠂ ᠰᠦᠬᠡ ᠣᠯᠠᠨ ᠴᠡᠷᠢᠭ ᠢ᠋ ᠲᠡᠳᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠ ᠪᠠᠭᠤᠳᠠᠯ ᠳ᠋ᠤᠷ ᠪᠠᠭᠤᠯᠭᠠᠨ᠂ ᠳᠠᠷᠤᠩᠭᠤᠢᠯᠠᠨ ᠵᠠᠬᠢᠷᠴᠤ᠂ ᠤᠢᠭᠤᠷ ᠤ᠋ᠨ ᠵᠠᠭᠤᠨ ᠰᠠᠢᠳ ᠢ᠋ ᠴᠤᠭᠯᠠᠭᠤᠯᠤᠨ ᠵᠠᠬᠢᠶᠠ ᠥᠭᠴᠦ ᠄ 《ᠲᠠᠨ ᠤ᠋ ᠡᠵᠡᠨ ᠢ᠋ ᠮᠠᠨ ᠤ᠋ ᠡᠯ ᠴᠢᠶᠠᠨ ᠰᠦᠢ ᠬᠡᠳᠦᠢᠨ ᠠᠮᠢᠳᠤ ᠪᠠᠷᠢᠪᠠ᠂ ᠤᠳᠠᠯ ᠦᠭᠡᠢ ᠬᠦᠷᠴᠦ ᠢᠷᠡᠮᠦᠢ᠃ ᠪᠢᠳᠡ ᠬᠡᠮᠡᠭᠴᠢ ᠤᠯᠤᠰ ᠤᠯᠤᠰ ᠢ᠋ ᠪᠦᠬᠦᠯᠢ ᠪᠡᠷ ᠣᠷᠣᠭᠤᠯᠵᠤ ᠠᠪᠬᠤ ᠦᠨᠡᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠤ ᠶᠣᠰᠣᠲᠤ ᠶᠡᠬᠡ ᠴᠡᠷᠢᠭ ᠪᠣᠢ ᠶᠠ᠂ ᠪᠤᠯᠢᠶᠠᠨ ᠳᠡᠭᠡᠷᠡᠮᠯᠡᠭᠴᠢ ᠥᠴᠦᠬᠡᠨ ᠠᠢᠮᠠᠭ ᠤ᠋ᠳ ᠪᠤᠰᠤ᠂ ᠬᠣᠲᠠ ᠶ᠋ᠢᠨ ᠳᠣᠲᠣᠷᠠ ᠦᠰᠦ ᠬᠢᠯᠭᠠᠰᠤᠨ ᠤ᠋ ᠲᠡᠳᠦᠢ ᠶ᠋ᠢ ᠴᠦ᠍ ᠦᠯᠦ ᠬᠥᠨᠳᠡᠭᠦᠯᠦᠮᠦᠢ᠃ ᠡᠭᠦᠳᠡ ᠪᠦᠷᠢ ᠪᠡᠨ ᠳᠠᠷᠤᠵᠤ ᠤᠭ ᠶᠣᠰᠣᠭᠠᠷ ᠠᠮᠢᠳᠤᠷᠠ᠂ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠠᠢᠯ ᠤ᠋ᠨ ᠭᠡᠷ ᠲᠦ᠍ᠷ ᠳᠤᠷᠠ ᠪᠠᠷ ᠣᠷᠣᠪᠠᠰᠤ᠂ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠᠭᠠᠨ ᠪᠠᠷᠬᠢᠷᠠᠨ ᠵᠠᠭᠠᠯᠳᠤ᠂ ᠭᠤᠯᠳᠤᠩ ᠵᠡᠭᠡᠯᠢ ᠶ᠋ᠢ ᠴᠠᠭᠳᠠᠨ ᠪᠠᠢᠴᠠᠭᠠᠭᠴᠢ ᠨᠢᠭᠡᠨ ᠵᠠᠭᠤᠨ ᠢᠲᠡᠭᠡᠯᠲᠦ ᠴᠡᠷᠢᠭ ᠦ᠋ᠳ ᠡᠷᠭᠢᠨ ᠲᠣᠭᠣᠷᠢᠵᠤ ᠠᠮᠤᠢ 》ᠭᠡᠮᠡᠨ ᠪᠠᠰᠠ ᠤᠢᠭᠤᠷ ᠤ᠋ᠨ ᠳᠣᠲᠣᠭᠠᠳᠤ ᠣᠷᠳᠣᠨ ᠤ᠋ ᠲᠡᠷᠢᠭᠦᠯᠡᠭᠰᠡᠨ ᠲᠠᠢᠭᠠᠨ ᠲᠦᠰᠢᠮᠡᠯ ᠳ᠋ᠦ᠍ᠷ ᠠᠯᠤᠬᠠ ᠶᠤᠸᠠᠨᠱᠤᠸᠠᠢ ᠰᠢᠷᠠ ᠯᠤᠤ ᠣᠶᠣᠭᠰᠠᠨ ᠶᠡᠬᠡ ᠳᠠᠯᠪᠠᠭᠠ᠂ ᠥᠪᠡᠷᠦᠨ ᠵᠡᠭᠦᠭᠰᠡᠨ ᠰᠢᠷᠠ ᠬᠤᠢ ᠲᠠᠢ ᠢᠯᠳᠦ᠂ ᠲᠡᠮᠳᠡᠭᠲᠦ ᠰᠢᠷᠠ ᠣᠯᠪᠣᠭ ᠨᠢᠭᠡ ᠲᠡᠢ ᠥᠭᠴᠦ᠄
《ᠮᠠᠨ ᠤ᠋ ᠴᠡᠷᠢᠭ ᠵᠣᠷᠢᠭ ᠢ᠋ᠶ᠋ᠠᠷ ᠲᠠᠨ ᠤ᠋ ᠳᠣᠲᠣᠭᠠᠳᠤ ᠳ᠋ᠤᠷ ᠣᠷᠣᠵᠤ ᠰᠠᠮᠠᠭᠤᠷᠠᠨ ᠳᠠᠷᠤᠯᠠᠭᠴᠢᠳ ᠪᠣᠢ ᠠᠪᠠᠰᠤ᠂ ᠡᠨᠡ ᠳᠠᠯᠪᠠᠭᠠ ᠶ᠋ᠢ ᠪᠠᠷᠢᠵᠤ᠂ ᠡᠨᠡ ᠣᠯᠪᠣᠭ ᠤ᠋ᠨ ᠡᠮᠦᠨᠡ ᠡᠨᠡ ᠢᠯᠳᠦ ᠪᠡᠷ ᠴᠠᠪᠴᠢᠨ ᠠᠯᠠᠭᠲᠤᠨ᠂ ᠶᠠᠯᠠ ᠦᠭᠡᠢ 》ᠬᠡᠮᠡᠵᠦ ᠂ ᠡᠭᠦᠳᠡ ᠪᠦᠷᠢ ᠳ᠋ᠦ᠍ᠷ ᠰᠢᠷᠠ ᠬᠢᠭᠢᠷᠢ ᠬᠠᠳᠬᠤᠭᠤᠯᠤᠨ᠂ ᠰᠠᠢᠨ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠷ ᠬᠠᠮᠠᠭᠠᠯᠠᠭᠤᠯᠤᠨ ᠰᠠᠬᠢᠵᠤ ᠬᠠᠳᠠᠭᠠᠯᠠᠭᠤᠯᠪᠠᠢ᠃ ᠡᠭᠦᠨ ᠳ᠋ᠦ᠍ᠷ ᠤᠢᠭᠤᠷ ᠤ᠋ᠨ ᠳᠣᠲᠣᠷᠠ ᠭᠠᠳᠠᠨᠠ ᠡᠵᠡᠨ ᠪᠠ ᠢᠷᠭᠡᠳ ᠬᠠᠲᠤᠳ ᠭᠦᠩᠵᠦ᠂ ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠳ᠋ᠤᠷ ᠬᠦᠷᠲᠡᠯᠡ ᠦᠬᠦᠲᠡᠯᠡ ᠰᠢᠲᠦᠯᠴᠡᠨ ᠪᠢᠰᠢᠷᠡᠯᠴᠡᠭᠡᠳ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠨᠡᠰᠦ ᠪᠡᠯᠡᠳᠬᠡᠯ ᠬᠤᠷᠢᠮ ᠲᠣᠢ ᠶ᠋ᠢ ᠪᠡᠯᠡᠳᠬᠡᠯᠴᠡᠭᠰᠡᠨ ᠢᠨᠣ ᠲᠡᠳᠡᠨ ᠤ ᠤᠯᠤᠰ ᠤ᠋ᠨ ᠠᠯᠪᠠᠨ ᠤ᠋ ᠪᠡᠯᠡᠳᠬᠡᠯ ᠡᠴᠡ ᠠᠷᠪᠠᠨ ᠬᠤᠪᠢ ᠳᠠᠪᠠᠵᠤᠬᠤᠢ᠃ ᠠᠯᠤᠬᠠ᠂ ᠰᠦᠬᠡ ᠳᠡᠭᠦᠦ ᠬᠣᠶᠠᠭᠤᠯᠠ ᠠᠷᠪᠠᠨ ᠵᠠᠩᠵᠤᠨ ᠢ᠋ ᠬᠤᠪᠢᠶᠠᠨ᠂ ᠬᠣᠶᠠᠷ ᠵᠢᠰᠢᠶᠠᠯᠠᠨ ᠬᠣᠲᠠ ᠶ᠋ᠢ ᠵᠢᠷᠭᠤᠭᠠᠨ ᠵᠡᠷᠭᠡ ᠡᠷᠭᠢᠨ ᠪᠠᠢᠴᠠᠭᠠᠪᠠ᠃ ᠤᠢᠭᠤᠷ ᠤᠯᠤᠰ ᠤ᠋ᠨ ᠬᠣᠲᠠ ᠬᠣᠷᠣᠭᠠ ᠨᠠᠮ ᠵᠢᠮ ᠢ᠋ᠶ᠋ᠡᠷ ᠲᠣᠭᠲᠠᠨ ᠲᠡᠭᠰᠢᠷᠡᠭᠰᠡᠨ ᠲᠤᠯᠠ ᠣᠳᠣ ᠤᠢᠭᠤᠷ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠡᠷᠡᠭ ᠢ᠋ ᠬᠡᠯᠡᠬᠦ ᠢᠨᠣ᠄
ᠲᠡᠭᠦᠨᠴᠡ ᠮᠣᠩᠭᠣᠯ ᠤ᠋ᠨ ᠴᠠᠭᠠᠲᠠᠢ ᠴᠢᠨ ᠸᠠᠩ᠂ ᠠᠯᠤᠬᠠ ᠰᠦᠬᠡ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠢ᠋ ᠮᠣᠷᠳᠠᠭᠤᠯᠤᠭᠠᠳ ᠥᠪᠡᠷᠦᠨ ᠬᠥᠩᠭᠡᠨ ᠬᠥᠰᠬᠡ᠂ ᠨᠢᠰᠭᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ᠂ ᠰᠥᠨᠢ ᠪᠡᠷ ᠳᠣᠪᠲᠣᠯᠤᠨ ᠣᠷᠣᠵᠤ ᠰᠠᠶᠢ ᠭᠡᠭᠡᠷᠡᠮᠡᠭᠴᠡ᠂ ᠤᠢᠭᠤᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠠᠷᠤ ᠶ᠋ᠢᠨ ᠬᠣᠢᠭᠤᠷ᠂ ᠳᠥᠷᠪᠡᠨ ᠵᠠᠩᠵᠤᠨ ᠨᠢᠭᠡᠬᠡᠨ ᠵᠠᠭᠤᠨ ᠱᠠᠯᠠᠮᠠᠭᠠᠢ ᠬᠥᠩᠭᠡᠨ ᠬᠤᠶᠠᠭᠲᠤ ᠪᠠᠭᠠᠲᠤᠷ ᠴᠡᠷᠢᠭ ᠢ᠋ ᠠᠪᠴᠤ ᠤᠷᠤᠭᠰᠢ ᠴᠣᠬᠢᠨ ᠨᠡᠪᠲᠡᠯᠦᠨ᠂ ᠬᠦᠷᠢᠶᠡ ᠶ᠋ᠢ ᠭᠢᠰᠬᠢᠯᠡᠨ ᠣᠷᠣᠵᠤ ᠡᠴᠢᠭᠡᠳ ᠲᠠᠢᠽᠢ ᠴᠠᠭᠠᠲᠠᠢ ᠪᠡᠶᠡ ᠪᠡᠷ ᠤᠷᠤᠭᠰᠢᠯᠠᠨ ᠥᠷᠭᠥᠭᠡ ᠳ᠋ᠦ᠍ᠷ ᠣᠷᠣᠵᠤ᠂ ᠤᠢᠭᠤᠷ ᠤ᠋ᠨ ᠡᠵᠡᠨ ᠦᠷᠭᠦᠩᠭᠡ ᠶ᠋ᠢ ᠬᠡᠪᠲᠡᠭᠡ ᠪᠡᠷ ᠳᠥᠷᠪᠡᠨ ᠵᠠᠩᠵᠤᠨ ᠢ᠋ᠶ᠋ᠠᠷ ᠬᠦᠯᠢᠭᠦᠯᠦᠭᠡᠳ ᠣᠷᠣᠨ ᠳᠡᠪᠰᠢᠯ ᠦᠭᠡᠢ ᠲᠤᠩ ᠪᠦᠷᠢᠶᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠳᠣᠬᠢᠶᠠ ᠪᠠᠨ ᠲᠠᠯᠪᠢᠨ᠂ ᠳᠥᠷᠪᠡᠨ ᠮᠢᠩᠭᠠᠨ ᠴᠡᠷᠢᠭ ᠴᠤᠭᠭᠠᠷ ᠣᠷᠣᠵᠤ ᠮᠥᠨ ᠬᠦᠷᠢᠶᠡ ᠶ᠋ᠢ ᠪᠤᠯᠢᠶᠠᠨ ᠡᠵᠡᠯᠡᠭᠡᠳ ᠤᠢᠭᠤᠷ ᠤ᠋ᠨ ᠣᠯᠠᠨ ᠬᠦᠷᠢᠶᠡᠨ ᠦ᠌ ᠵᠠᠩᠵᠤᠨ ᠴᠡᠷᠢᠭ ᠦ᠋ᠳ ᠮᠡᠳᠡᠲᠡᠯᠡ ᠳᠡᠭᠦᠨᠦ ᠡᠵᠡᠨ ᠢ᠋ ᠬᠡᠳᠦᠢᠨ ᠪᠠᠷᠢᠭᠠᠳ ᠥᠨᠳᠥᠷ ᠰᠢᠷᠤᠭ ᠲᠤᠷ ᠠᠯᠳᠠᠯᠠᠨ ᠤᠶᠠᠵᠤ ᠥᠨᠳᠥᠷ ᠪᠤᠰᠬᠠᠵᠤ᠂ ᠲᠡᠭᠦᠨᠦ ᠠᠮᠠ ᠪᠠᠷ ᠵᠠᠷᠯᠠᠭᠤᠯᠤᠨ᠂《ᠲᠦᠷᠭᠡᠨᠡ ᠬᠤᠶᠠᠭ ᠲᠠᠢᠯᠤᠨ ᠵᠡᠪᠰᠡᠭ ᠢ᠋ ᠲᠤᠰᠢᠶᠠᠨ᠂ ᠴᠡᠷᠢᠭ ᠦ᠋ᠨ ᠲᠣᠭᠠ ᠳᠠᠩᠰᠠ ᠶ᠋ᠢ ᠲᠤᠰᠢᠶᠠᠨ᠂ ᠮᠣᠩᠭᠣᠯ ᠤ᠋ᠨ ᠵᠠᠩᠵᠤᠨ ᠨᠠᠷ ᠢ᠋ᠶ᠋ᠠᠷ ᠪᠠᠢᠴᠠᠭᠠᠯᠭᠠᠨ ᠳᠠᠭᠠᠵᠤ᠂ ᠮᠢᠨᠦ ᠠᠮᠢᠨ ᠢ᠋ ᠬᠡᠯᠲᠦᠷᠢᠭᠦᠯᠦᠨ ᠭᠠᠷᠭᠠ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠤᠢᠭᠤᠷ ᠤ᠋ᠨ ᠣᠯᠠᠨ ᠴᠡᠷᠢᠭ ᠦ᠋ᠳ ᠰᠥᠰᠥ ᠬᠡᠮᠬᠡᠷᠡᠨ ᠵᠢᠷᠦᠬᠡ ᠳᠡᠯᠪᠡᠷᠡᠨ᠂ ᠬᠤᠶᠠᠭ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠴᠠᠨ᠂ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠡᠮᠦᠨᠡ ᠠᠭᠤᠯᠠ ᠮᠡᠲᠦ ᠣᠪᠣᠭᠠᠯᠠᠵᠤᠬᠤᠢ᠃ ᠬᠠᠷᠠᠬᠠᠨ ᠦᠢᠮᠡᠯᠳᠦᠬᠦᠶᠡ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠬᠤᠪᠢᠯᠭᠠᠨ ᠭᠦᠩᠵᠦ ᠶ᠋ᠢᠨ ᠨᠡᠬᠡᠬᠦ ᠴᠡᠷᠢᠭ ᠪᠠᠰᠠ ᠬᠦᠷᠴᠦ ᠢᠷᠡᠭᠡᠳ᠂ ᠵᠢᠭᠰᠠᠭᠠᠯ ᠵᠢᠭᠰᠠᠭᠠᠬᠤᠢ ᠶ᠋ᠢᠨ ᠤᠷᠢᠳ᠂ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠦ᠋ᠳ ᠪᠠᠰᠠ ᠬᠦ᠌ ᠤᠢᠭᠤᠷ ᠤ᠋ᠨ ᠡᠵᠡᠨ ᠦ᠌ ᠰᠢᠷᠤᠭ ᠢ᠋ ᠪᠣᠰᠬᠠᠵᠤ ᠦᠵᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠬᠤᠪᠢᠯᠭᠠᠨ ᠭᠦᠩᠵᠦ ᠬᠣᠭᠣᠯᠠᠢ ᠪᠠᠨ ᠬᠠᠳᠠᠲᠠᠯᠠ ᠰᠣᠴᠢᠨ ᠪᠠᠶᠠᠷᠯᠠᠵᠤ᠂ ᠶᠠᠭᠠᠷᠠᠨ ᠯᠤᠤ ᠶ᠋ᠢᠨ ᠴᠠᠭᠠᠨ ᠮᠣᠷᠢᠨ ᠠ᠋ᠴᠠᠭᠠᠨ ᠬᠠᠷᠠᠢᠨ ᠪᠠᠭᠤᠵᠤ᠂ ᠪᠣᠷᠣ ᠪᠤᠯᠠᠭᠠ ᠶ᠋ᠢᠨ ᠣᠯᠪᠣᠭ ᠢ᠋ᠶ᠋ᠠᠨ ᠳᠡᠪᠢᠰᠦᠭᠦᠯᠦᠨ᠂ ᠬᠣᠯᠠ ᠠ᠋ᠴᠠ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠵᠦᠭᠴᠢᠯᠡᠨ ᠬᠠᠨᠳᠤᠵᠤ ᠭᠤᠷᠪᠠᠨᠲᠠ ᠰᠥᠭᠥᠳᠦᠨ᠂ ᠶᠢᠰᠦᠨᠲᠡ ᠮᠥᠷᠭᠥᠨ᠂ ᠪᠣᠭᠳᠠ ᠶ᠋ᠢᠨ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠨ ᠡᠷᠢᠭᠡᠳ ᠰᠠᠶᠢ ᠲᠠᠢᠽᠢ ᠶ᠋ᠢᠨ ᠵᠣᠪᠠᠭᠰᠠᠨ ᠢ᠋ ᠲᠣᠬᠣᠷᠤᠭᠤᠯᠤᠨ ᠶᠣᠰᠣᠯᠠᠵᠤ ᠪᠠᠷᠠᠲᠠᠯᠠ᠂ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠭᠦᠩᠵᠦ ᠶ᠋ᠢᠨ ᠮᠣᠷᠢᠨ ᠳᠡᠭᠡᠷᠡᠬᠢ ᠣᠷᠣᠰ ᠲᠡᠮᠦᠷ ᠦ᠋ᠨ ᠲᠤᠯᠭᠠᠭᠤᠷᠢᠲᠤ ᠠᠯᠲᠠᠨ ᠮᠠᠩᠨᠤᠭ ᠤ᠋ᠨ ᠯᠤᠤ ᠶ᠋ᠢᠨ ᠴᠠᠴᠠᠷ ᠢ᠋ ᠰᠢᠭᠦᠷ ᠳᠣᠸᠠᠽᠠ ᠲᠤᠯᠤᠨ ᠳᠡᠯᠭᠡᠬᠦ ᠮᠡᠲᠦ ᠴᠠᠭ ᠭᠱᠠᠨᠠ ᠪᠤᠰᠬᠠᠵᠤ ᠪᠦᠷᠬᠦᠭᠡᠳ᠂ ᠲᠠᠪᠤᠨ ᠵᠠᠭᠤᠨ ᠮᠠᠩᠨᠤᠭ ᠬᠤᠶᠠᠭᠲᠤ ᠥᠬᠢᠨ ᠴᠡᠷᠢᠭ ᠦ᠋ᠳ ᠰᠣᠯᠣᠩᠭᠠ ᠶ᠋ᠢᠨ ᠭᠡᠷᠡᠯ ᠨᠠᠷᠠᠨ ᠤ᠋ ᠬᠦᠷᠢᠶᠡ ᠮᠡᠲᠦ ᠲᠥᠭᠥᠷᠢᠭᠯᠡᠨ ᠵᠢᠭᠰᠠᠲᠠᠯᠠ᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠮᠣᠳᠣᠷ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠱᠣᠰᠢᠭᠠ ᠪᠢᠴᠢᠭ ᠴᠠᠴᠠᠷ ᠤ᠋ᠨ ᠣᠷᠣᠢ ᠳ᠋ᠤᠷ ᠭᠠᠷᠴᠤ ᠢᠷᠡᠭᠡᠳ᠂ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠲᠠᠢᠽᠢ ᠮᠥᠨ ᠥᠷᠭᠥᠭᠡ ᠡᠴᠡᠭᠡᠨ ᠮᠥᠷᠭᠥᠭᠡᠳ᠂ ᠪᠤᠰᠤ ᠵᠠᠩᠵᠤᠨ ᠴᠡᠷᠢᠭ ᠦ᠋ᠳ ᠴᠥᠮ ᠢ᠋ᠶ᠋ᠡᠷ ᠬᠤᠷᠠᠯᠳᠤᠨ ᠢᠷᠡᠵᠦ᠂ ᠲᠠᠢᠽᠦ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠱᠣᠰᠢᠭᠠ ᠳ᠋ᠤᠷ ᠮᠥᠷᠭᠥᠵᠦ᠂ ᠪᠠᠰᠠ ᠵᠠᠷᠯᠢᠭ ᠰᠣᠶᠣᠷᠬᠠᠯᠳᠤ ᠬᠠᠲᠤᠨ ᠡᠵᠡᠨ ᠦ᠌ ᠠᠮᠤᠭᠤᠯᠠᠩ ᠢ᠋ ᠡᠷᠢᠨ ᠰᠥᠭᠦᠳᠦᠯᠴᠡᠭᠰᠡᠨ ᠳ᠋ᠦ᠍ᠷ ᠤᠢᠭᠤᠷ ᠤᠯᠤᠰ ᠤ᠋ᠨ ᠣᠯᠠᠨ ᠪᠦᠭᠦᠳᠡᠭᠡᠷ ᠶᠡᠬᠡᠯᠡ ᠭᠠᠢᠬᠠᠯᠳᠤᠨ᠂ ᠡᠨᠡ ᠭᠦᠩᠵᠦ ᠦᠨᠡᠬᠡᠷ ᠲᠡᠭᠷᠢ ᠶ᠋ᠢᠨ ᠷᠠᠬᠢᠨᠢ ᠴᠤ᠌ ᠪᠣᠯᠪᠠᠤ᠂ ᠮᠣᠩᠭᠣᠯ ᠤ᠋ᠨ ᠵᠠᠩᠵᠤᠨ ᠴᠡᠷᠢᠭ ᠦ᠋ᠳ ᠶᠠᠭᠤᠨᠲᠤ ᠲᠡᠷᠡ ᠮᠡᠲᠦ ᠠᠶᠤᠯᠳᠤᠮᠤᠢ ᠭᠡᠮᠡᠨ ᠤᠯᠠᠮ ᠢᠯᠡᠭᠦᠦ ᠠᠶᠤᠨ ᠡᠮᠢᠶᠡᠯᠳᠦᠪᠡᠢ᠃ ᠲᠡᠭᠦᠨ ᠢ᠋ ᠴᠠᠭᠠᠲᠠᠢ ᠲᠠᠢᠽᠢ ᠶ᠋ᠢᠨ ᠰᠢᠷᠡᠭᠡᠨ ᠦ᠌ ᠶᠡᠬᠡ ᠬᠠᠲᠤᠨ ᠪᠣᠯᠭᠠᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠲᠣᠭᠲᠠᠭᠠᠭᠰᠠᠨ ᠢ᠋ ᠣᠯᠠᠩᠬᠢᠨ ᠢ᠋ᠶ᠋ᠠᠷ ᠦᠯᠦ ᠮᠡᠳᠡᠬᠦᠢ ᠶ᠋ᠢᠨ ᠲᠤᠯᠠ᠂ ᠰᠠᠶᠢ ᠲᠠᠩᠭᠤᠳ ᠤᠯᠤᠰ ᠤ᠋ᠨ ᠬᠠᠷᠢᠶᠠᠲᠤ ᠨᠠᠭᠤᠷ ᠳᠠᠯᠠᠢ ᠶ᠋ᠢ ᠪᠤᠯᠢᠶᠠᠯᠳᠤᠨ ᠬᠡᠷᠡᠭ ᠢ᠋ ᠳᠡᠭᠳᠡᠭᠡᠭᠰᠡᠨ ᠠᠵᠤᠭᠤ᠃
ᠲᠡᠳᠦᠢ ᠶ᠋ᠢᠨ ᠭᠦᠩᠵᠦ᠂ ᠰᠢᠳᠠᠷ ᠲᠠᠢᠭᠠᠨ ᠲᠦᠰᠢᠮᠡᠳ ᠪᠠ ᠲᠡᠷᠢᠭᠦᠯᠡᠭᠰᠡᠨ ᠵᠠᠩᠵᠤᠨ ᠨᠠᠷ ᠯᠤᠭᠠ ᠲᠠᠢᠽᠢ ᠳ᠋ᠤᠷ ᠮᠥᠷᠭᠥᠨ ᠵᠣᠯᠭᠠᠵᠤ᠂《ᠤᠢᠭᠤᠷ ᠤ᠋ᠨ ᠡᠵᠡᠨ ᠢ᠋ ᠨᠢᠭᠡᠬᠡᠨ ᠭᠱᠠᠨ ᠴᠤ᠌ ᠪᠣᠯᠪᠠ᠂ ᠭᠦᠩᠵᠦ ᠮᠢᠨᠦ ᠴᠠᠴᠠᠷ ᠤ᠋ᠨ ᠳᠣᠣᠷᠠ ᠰᠥᠭᠥᠳᠬᠡᠵᠦ᠂ ᠭᠤᠷᠪᠠᠨ ᠵᠢᠯ ᠵᠣᠪᠠᠭᠠᠭᠰᠠᠨ ᠬᠠᠷᠢᠭᠤ ᠶ᠋ᠢ ᠪᠠᠬᠠᠨ ᠲᠡᠳᠦᠢ ᠠᠪᠤᠭᠤᠯᠤᠮᠤ 》ᠭᠡᠮᠡᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠴᠠᠭᠠᠲᠠᠢ ᠪᠣᠳᠣᠪᠠᠰᠤ ᠡᠴᠦᠰ ᠲᠦ᠍ᠷ ᠮᠥᠨ ᠨᠢᠭᠤᠷ ᠤ᠊ᠴᠠᠷᠠᠭᠤᠯᠤᠯ ᠦᠭᠡᠢ ᠦᠯᠦ ᠪᠣᠯᠬᠤᠢ ᠶ᠋ᠢᠨ ᠲᠤᠯᠠ ᠳᠠᠷᠤᠢ ᠳᠠᠷᠤᠭᠤᠯᠤᠨ ᠢᠯᠡᠭᠡᠰᠦᠭᠡᠢ ᠭᠡᠮᠡᠨ ᠡᠭᠡᠭᠦᠯᠦᠭᠡᠳ᠂ ᠰᠢᠳᠠᠷ ᠵᠠᠩᠵᠤᠨ ᠭᠠᠯ ᠭᠠᠷᠤᠵᠠ᠂ ᠪᠣᠷᠣ ᠪᠦᠷᠭᠦᠳ ᠬᠣᠶᠠᠭᠤᠯᠠ ᠶ᠋ᠢ ᠣᠢᠷᠠ ᠪᠠᠨ ᠳᠠᠭᠤᠳᠠᠨ ᠴᠢᠬᠢ ᠳ᠋ᠦ᠍ᠷ ᠬᠡᠳᠦᠨ ᠦᠭᠡ ᠰᠤᠷᠭᠠᠵᠤ᠂ ᠤᠢᠭᠤᠷ ᠤ᠋ᠨ ᠡᠵᠡᠨ ᠦᠷᠭᠦᠩᠭᠡ ᠬᠠᠭᠠᠨ ᠢ᠋ ᠡᠭᠦᠷᠦᠭᠦᠯᠦᠨ ᠠᠪᠠᠴᠢᠵᠤ᠂ ᠶ᠋ᠢᠨ ᠭᠦᠩᠵᠦ ᠶ᠋ᠢᠨ ᠴᠠᠴᠠᠷ ᠤ᠋ᠨ ᠳᠣᠣᠷᠠ ᠲᠠᠯᠪᠢᠨ ᠰᠥᠭᠥᠳᠬᠡᠵᠦ᠂ ᠮᠥᠷᠭᠥᠭᠦᠯᠦᠨ ᠪᠤᠷᠤᠭᠤ ᠮᠡᠳᠡᠨ ᠶᠠᠯᠠ ᠬᠦᠯᠢᠶᠡᠯᠭᠡᠰᠦᠭᠡᠢ ᠬᠡᠮᠡᠲᠡᠯᠡ᠂ ᠶ᠋ᠢᠨ ᠭᠦᠩᠵᠦ ᠶ᠋ᠢᠨ ᠮᠠᠩᠨᠤᠭ ᠴᠠᠴᠠᠷ ᠤ᠋ᠨ ᠳᠣᠲᠣᠷᠠ ᠨᠢᠭᠡᠨᠲᠡ ᠨᠢᠭᠡᠨ ᠶᠡᠬᠡ ᠠᠶᠤᠩᠭᠠ ᠳᠡᠯᠪᠡᠷᠡᠨ᠂ ᠭᠠᠯ ᠭᠢᠯᠪᠠᠰᠤᠨ《ᠴᠡᠪᠴᠢᠯᠬᠢᠯᠡᠨ ᠲᠠᠯᠠᠭᠳᠠ 》ᠭᠡᠬᠦ ᠨᠠᠷᠢᠨ ᠳᠠᠭᠤᠨ ᠭᠠᠷᠤᠮᠠᠭᠴᠠ᠂ ᠬᠡᠳᠦᠢᠨ ᠠᠷᠭᠠ ᠪᠡᠯᠡᠳᠬᠡᠭᠰᠡᠨ ᠲᠦᠮᠡᠨ ᠮᠢᠩᠭᠠᠨ ᠤ᠋ ᠬᠤᠷᠴᠠ ᠵᠠᠷ ᠵᠡᠪᠰᠡᠭ ᠬᠠᠮᠲᠤ ᠴᠤᠭᠭᠠᠷ ᠴᠡᠪᠴᠢᠯᠬᠢᠯᠡᠨ ᠪᠠᠭᠤᠵᠤ ᠢᠷᠡᠪᠡ᠃ ᠦᠷᠭᠦᠩᠭᠡ ᠬᠠᠭᠠᠨ ᠤ᠋ ᠠᠮᠢᠨ ᠵᠠᠶᠠᠭᠠ ᠶ᠋ᠢ ᠳᠣᠣᠷᠠᠲᠤ ᠳᠡᠪᠲᠡᠷ ᠲᠣᠷ ᠦᠵᠡᠭᠳᠡᠬᠦᠢ᠃
ᠭᠠᠵᠠᠷ ᠳᠡᠯᠡᠬᠡᠢ ᠤᠷᠲᠤᠳᠠ ᠬᠥᠳᠡᠯᠪᠡᠰᠦ
ᠭᠠᠢᠬᠠᠯᠳᠤ ᠡᠬᠡᠨᠡᠷ ᠦ᠋ᠳ ᠥᠷᠨᠢᠮᠦᠢ ᠬᠡᠮᠡᠯᠦᠭᠡ᠃
ᠭᠠᠳᠠᠰᠤ ᠭᠤᠷᠪᠠᠯᠵᠢᠲᠤ ᠡᠨᠡ ᠬᠦ᠌ ᠭᠦᠩᠵᠦ ᠶ᠋ᠢ
ᠭᠠᠵᠠᠷ ᠬᠥᠳᠡᠯᠵᠦ ᠲᠥᠷᠥᠭᠰᠡᠨ ᠴᠦ᠍ ᠪᠣᠯᠪᠠᠤ?
ᠭᠠᠷ ᠤ᠋ᠨ ᠠᠶᠤᠩᠭᠠ ᠠᠶᠤᠯᠲᠠᠢ ᠶ᠋ᠢᠨ ᠲᠡᠳᠦᠢ ᠴᠦ᠍ ᠪᠤᠰᠤ᠃
ᠭᠠᠷᠭᠠᠬᠤ ᠠᠷᠭᠠ ᠴᠤ᠌ ᠮᠠᠰᠢᠳᠠ ᠰᠣᠴᠢᠯᠲᠠᠢ᠃
ᠭᠠᠩᠭᠠ ᠮᠥᠷᠡᠨᠠ ᠲᠤᠯᠲᠠᠯᠠ ᠡᠵᠡᠯᠡᠬᠦ
ᠭᠠᠯᠪᠠ ᠪᠤᠤᠨ ᠳ᠋ᠤᠷ ᠦᠭᠡᠢ ᠪᠠᠷᠠᠭᠤᠨ ᠲᠢᠪ ᠦ᠋ᠨ ᠬᠠᠲᠤᠨ ᠪᠠᠢᠨᠠᠮ᠃
ᠳᠣᠯᠣᠭᠠᠨ ᠵᠠᠭᠤᠨ ᠣᠨ ᠵᠢᠯ ᠦ᠋ᠨ ᠳᠠᠭᠤᠨ ᠦᠭᠡᠢ ᠴᠡᠳᠢᠭ ᠲᠡᠦᠬᠡ ᠶ᠋ᠢ ᠬᠤᠷᠢᠶᠠᠭᠰᠠᠭᠠᠷ
ᠳᠤᠯᠠᠭᠠᠨ ᠪᠦᠷᠭᠡ ᠰᠡᠷᠢᠭᠦᠨ ᠲᠠᠩᠬᠢᠮ ᠤ᠋ᠨ ᠰᠢᠷᠡᠭᠡᠨ ᠰᠠᠨᠳᠠᠯᠢ ᠪᠦᠬᠦᠨᠡ ᠣᠪᠣᠭᠠᠯᠠᠵᠤᠬᠤᠢ᠃
ᠳᠤᠷᠠᠲᠠᠢ ᠪᠢᠴᠢᠭ᠌ᠴᠢᠨ ᠪᠢ ᠪᠡᠷ ᠤᠷᠢᠳᠤ ᠲᠥᠷᠥᠯ ᠳ᠋ᠦ᠍ᠷ ᠶᠤᠸᠠᠨ ᠤ᠋ ᠰᠤᠳᠤᠷᠠ ᠬᠤᠪᠢᠲᠠᠢ ᠴᠤ᠌ ᠪᠣᠯᠪᠠᠤ
ᠳᠤᠭᠲᠤᠢᠲᠤ ᠰᠤᠳᠤᠷ ᠬᠣᠯᠭᠣᠭᠳᠠᠨ ᠡᠯᠳᠡᠭᠳᠡᠪᠡᠴᠦ᠂ ᠳᠠᠷᠤᠮᠠᠯ ᠱᠠᠰᠲᠢᠷ ᠠᠨᠤ ᠲᠣᠬᠢᠶᠠᠯᠳᠤᠨ ᠣᠯᠳᠠᠭᠤᠳᠠᠮᠤᠢ᠃
ᠵᠢᠴᠢ ᠡᠨᠡ ᠳᠡᠪᠲᠡᠷ ᠦ᠋ᠨ ᠡᠮᠦᠨᠡ ᠬᠣᠢᠨᠠ ᠳᠠᠪᠬᠤᠷᠯᠢᠭ ᠬᠠᠯᠢᠰᠤ ᠳ᠋ᠤᠷ ᠠᠨᠤ᠂ ᠡᠷᠳᠡᠮᠲᠡᠨᠡ ᠡᠰᠡᠷᠭᠦᠴᠡᠨ ᠴᠢᠳᠠᠯᠳᠠᠨᠠ ᠠᠳᠬᠠᠭᠯᠠᠬᠤ ᠵᠠᠩᠲᠤ ᠬᠥᠮᠦᠨ ᠢ᠋ ᠭᠦᠨᠡ ᠤᠬᠤᠴᠢᠯᠠᠨ ᠰᠢᠭᠦᠮᠵᠢᠯᠡᠭᠰᠡᠨ ᠢᠨᠤ : ᠡᠨᠡ ᠳᠡᠪᠲᠡᠷ ᠦ᠋ᠨ ᠳᠤᠮᠳᠠᠳᠤ ᠪᠦᠯᠦᠭ ᠲᠣᠷ ᠲᠣᠳᠣ ᠬᠡᠮᠡᠬᠦ ᠨᠢᠭᠡᠨ ᠵᠤᠯᠪᠢᠨ ᠠᠮᠢᠲᠠᠨ ᠤ᠋ ᠬᠠᠷᠠᠩᠭᠤᠢ ᠪᠤᠷᠤᠩᠬᠤᠢ ᠶ᠋ᠢᠨ ᠠᠳᠬᠠᠭ ᠲᠡᠮᠡᠴᠡᠯ ᠦ᠋ᠨ ᠠᠷᠵᠢᠯ ᠨᠢᠰᠸᠠᠨᠢᠰ ᠢᠨᠤ᠂ ᠲᠡᠭᠦᠨ ᠤ ᠲᠡᠷᠢᠭᠦᠨ ᠦ᠌ ᠭᠡᠭᠡᠨ ᠲᠩᠷᠢ ᠥᠭᠡᠳᠡ ᠦᠰᠦᠷᠦᠨ ᠦᠰᠦᠷᠲᠡᠯᠡ ᠦᠯᠦ ᠠᠯᠳᠠᠷᠠᠨ ᠲᠠᠯᠢᠷᠠᠬᠤ ᠶ᠋ᠢ ᠠᠨᠤ ᠭᠠᠢᠬᠠᠵᠤ ᠰᠠᠨᠠᠭᠰᠠᠭᠠᠷ᠂ ᠣᠷᠴᠢᠯᠠᠩ ᠤ᠋ᠨ ᠬᠣᠭᠣᠷᠣᠨᠳᠣ ᠡᠢᠮᠦ ᠬᠥᠮᠦᠨ ᠠᠳᠠᠪᠠᠰᠢ ᠬᠡᠳᠦᠢ ᠪᠣᠢ ᠠᠮᠤᠢ ? ᠭᠡᠮᠡᠨ ᠤᠬᠤᠴᠢᠯᠠᠵᠤ ᠪᠣᠳᠣᠭᠰᠠᠭᠠᠷ ᠰᠠᠶᠢ ᠡᠳᠡᠭᠡᠷ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠣᠯᠠᠨᠲᠠ ᠲᠡᠩᠰᠡᠵᠦ ᠮᠡᠳᠡᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠭᠠᠯᠵᠠᠵᠤ᠂ ᠳᠠᠷᠤᠢ ᠪᠢᠴᠢᠵᠦ ᠭᠠᠷᠭᠠᠪᠠ᠃ ᠡᠨᠡ ᠲᠣᠳᠣ ᠬᠡᠮᠡᠭᠴᠢ ᠶ᠋ᠢ ᠴᠢᠦᠢ ᠴᠦ ᠯᠢᠦᠢ ᠳ᠋ᠦ᠍ᠷ ᠦᠯᠢᠳᠬᠡᠵᠦ ᠦᠯᠦ ᠪᠣᠯᠤᠮᠤᠢ᠃ ᠴᠢᠦᠢ ᠴᠦ ᠯᠢᠦᠢ ᠶ᠋ᠢᠨ ᠰᠡᠳᠬᠢᠯ ᠦᠯᠦ ᠡᠷᠭᠢᠬᠦ ᠢᠨᠤ ᠲᠥᠷᠥᠭᠰᠡᠨ ᠠᠪᠠᠭᠠ ᠪᠠᠨ ᠠᠯᠠᠭᠰᠠᠨ ᠶᠠᠯᠠ ᠠ᠋ᠴᠠᠭᠠᠨ ᠠᠶᠤᠬᠤᠢ ᠶ᠋ᠢᠨ ᠤᠴᠢᠷ ᠲᠤᠷ ᠪᠣᠯᠠᠢ᠃ ᠲᠣᠳᠣ ᠬᠡᠮᠡᠭᠴᠢ ᠶᠡᠷᠦ ᠶ᠋ᠢᠨ ᠠᠢᠮᠠᠭ ᠶᠠᠮᠪᠠᠷ ᠶᠡᠬᠡ ᠦᠰ ᠦᠭᠡᠢ ᠪᠥᠭᠡᠲᠡᠯᠡ᠂ ᠡᠭᠦᠷᠢᠳᠡ ᠠᠲᠠᠭᠠᠷᠬᠠᠨ ᠲᠡᠮᠡᠴᠡᠯᠳᠦᠬᠦ ᠢᠨᠤ ᠰᠣᠨᠢᠨ᠂ ᠯᠠᠪ ᠲᠥᠷᠥᠯᠬᠢ ᠵᠠᠩ ᠠᠨᠤ ᠲᠡᠢᠮᠦ ᠪᠣᠯᠠᠢ᠃ ᠡᠷᠳᠡᠮᠲᠡᠨ ᠢ᠋ ᠵᠠᠨᠤᠵᠤ᠂ ᠴᠢᠳᠠᠯᠲᠠᠨ ᠢ᠋ ᠬᠠᠷᠠᠳᠠᠬᠤ ᠶ᠋ᠢ ᠢᠷᠭᠡᠨ ᠦᠭᠡᠰ ᠢ᠋ᠶ᠋ᠡᠷ《ᠳᠦ ᠰᠢᠶᠠᠨ ᠵᠢᠢ ᠨᠧᠩ 》ᠬᠡᠮᠡᠮᠦᠢ᠂ ᠪᠠᠭᠠ ᠶ᠋ᠢᠨ ᠴᠠᠭᠳᠠ ᠪᠢᠴᠢᠭ ᠱᠠᠰᠲᠢᠷᠠ ᠣᠯᠠᠨᠲᠠ ᠦᠵᠡᠪᠡᠴᠦ᠂ ᠵᠦᠭᠡᠷ ᠨᠢᠭᠡᠨ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠲᠡᠮᠡᠴᠡᠯᠳᠦᠬᠦ᠂ ᠵᠠᠯᠢᠬᠠᠢ ᠬᠠᠷᠭᠢᠰ ᠬᠠᠷᠠᠩᠭᠤᠢ ᠪᠤᠷᠲᠠᠭ ᠰᠠᠢᠳ ᠨᠠᠷ ᠢ᠋ ᠬᠡᠯᠡᠮᠦᠢ ᠊ᠶᠠ᠂ ᠲᠡᠷᠡ ᠴᠦ᠍ ᠮᠥᠨ ᠮᠠᠭᠤ ᠬᠥᠮᠦᠨ ᠦ᠌ ᠲᠣᠭᠲᠠᠭᠰᠠᠨ ᠵᠠᠩ ᠪᠣᠯᠠᠢ ᠭᠡᠮᠡᠨ ᠬᠠᠷᠢᠨᠴᠤ ᠳᠡᠮᠡᠢ ᠶᠡᠬᠡ ᠭᠦᠨᠡ ᠬᠢᠨᠠᠭᠰᠠᠨ ᠦᠭᠡᠢ ᠪᠥᠯᠥᠭᠡ ᠃ ᠬᠣᠢᠨᠠ ᠬᠣᠯᠠ ᠣᠢᠷᠠᠬᠢ ᠤᠬᠠᠭᠠᠨ ᠮᠡᠳᠡᠯᠲᠡᠢᠭᠡᠨ ᠬᠥᠮᠦᠨᠡ ᠤᠷᠲᠤᠳᠠ ᠠᠭᠤᠯᠵᠠᠵᠤ᠂ ᠡᠳᠦᠷ ᠦ᠋ᠨ ᠤᠳᠠᠭᠠᠨᠠ ᠦᠵᠡᠭᠰᠡᠭᠡᠷ ᠲᠡᠢᠮᠦ ᠠᠳᠬᠠᠭ ᠲᠡᠮᠡᠴᠡᠯ ᠦ᠋ᠨ ᠠᠮᠢᠰᠬᠤᠯ ᠳ᠋ᠤᠷ ᠲᠥᠷᠥᠭᠰᠡᠨ ᠬᠥᠮᠦᠨ ᠪᠣᠯᠪᠠᠰᠤ᠂ ᠣᠨᠴᠠ ᠲᠡᠭᠦᠨ ᠦ᠌ ᠬᠡᠷᠡᠭ ᠦᠢᠯᠡ ᠳ᠋ᠦ᠍ᠷ ᠰᠢᠯᠲᠠᠭᠠᠨ ᠪᠠᠷᠢᠯᠳᠤᠵᠤ᠂ ᠰᠠᠢᠨ ᠮᠠᠭᠤ ᠪᠣᠯᠤᠯᠴᠠᠨ ᠲᠡᠢᠮᠦ ᠪᠣᠯᠬᠤ ᠠᠨᠤ ᠪᠤᠰᠤ ᠠᠵᠤᠭᠤ ᠃ ᠠᠯᠢᠪᠠ 《ᠳᠦ ᠰᠢᠶᠠᠨ ᠵᠢᠢ ᠨᠧᠩ 》ᠵᠠᠩ ᠲᠠᠢ ᠲᠦᠷᠦᠭᠴᠢᠳ ᠪᠦᠬᠦᠨ ᠦ᠌ ᠲᠥᠷᠥᠯᠬᠢ ᠴᠢᠨᠠᠷ ᠳᠤᠰᠤᠯ ᠤ᠋ᠨ ᠡᠯᠢᠭᠡ ᠠᠭᠤᠰᠬᠢ ᠵᠢᠷᠦᠬᠡ ᠰᠥᠰᠥ ᠡᠴᠡᠭᠡᠨ ᠪᠤᠰᠤᠳ ᠤ᠋ᠨ ᠮᠠᠭᠤ ᠶ᠋ᠢ ᠰᠣᠨᠣᠰᠪᠠᠰᠤ ᠪᠠᠶᠠᠰᠤᠭᠠᠳ ᠬᠥᠮᠦᠨ ᠦ᠌ ᠰᠠᠢᠨ ᠢ᠋ ᠦᠵᠡᠪᠡᠰᠦ ᠠᠲᠠᠭᠠᠷᠬᠠᠨ ᠬᠠᠷᠠᠳᠠᠬᠤ ᠰᠡᠳᠬᠢᠯ ᠬᠣᠪᠢᠨ ᠳ᠋ᠠᠭᠠᠨ ᠲᠥᠷᠥᠭᠡᠳ ᠤᠷᠭᠤᠨ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠦᠯᠢᠭᠡᠷᠯᠡᠪᠡᠰᠦ ᠬᠥᠮᠦᠨ ᠪᠠᠶᠠᠨ ᠡᠯᠪᠡᠭ ᠠᠷᠢᠭᠤᠨ ᠴᠡᠪᠡᠷ ᠥᠩᠭᠡ ᠭᠡᠷᠡᠯ ᠲᠡᠢ ᠶ᠋ᠢ ᠪᠤᠷᠬᠠᠨ ᠰᠠᠬᠢᠭᠤᠯᠰᠤᠨ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦᠵᠡᠪᠡᠰᠦ ᠴᠥᠮ ᠪᠡᠶᠡᠰᠦᠨ ᠳᠠᠭᠠᠯᠠᠬᠤ ᠠᠲᠠᠯᠠ᠂ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠪᠠ ᠡᠳ᠋ ᠦ᠋ᠨ ᠬᠣᠣᠷᠯᠠᠯ ᠤ᠋ᠨ ᠠᠳᠠᠰ ᠦᠵᠡᠪᠡᠰᠦ᠂ ᠬᠣᠣᠷᠯᠠᠯ ᠬᠥᠨᠥᠭᠡᠯ ᠦ᠋ᠨ ᠰᠡᠳᠬᠢᠯ ᠲᠥᠷᠥᠬᠦᠢ ᠳ᠋ᠦ᠍ᠷ ᠠᠳᠠᠯᠢ ᠠᠨᠤ ᠪᠣᠯᠠᠢ᠃
– – – –
① ᠡᠨᠡ ᠦᠭᠡ ᠲᠠᠰᠢᠶᠠᠷᠠᠪᠠ ᠂ ᠰᠢᠩ ᠰᠢᠦᠢ ᠬᠠᠢ ᠬᠥᠬᠡ ᠨᠠᠭᠤᠷ ᠲᠤ᠌ ᠪᠣᠢ᠂ ᠯᠣᠪᠤ ᠨᠠᠭᠤᠷ ᠰᠢᠨᠵᠢᠶᠠᠩ ᠳ᠋ᠤ᠌ ᠪᠣᠢ᠂ ᠵᠣᠬᠢᠶᠠᠭᠴᠢ ᠡᠨᠳᠡᠭᠦᠷᠡᠭᠰᠡᠨ ᠠᠵᠤᠭᠤ᠃ (ᠵᠠᠰᠠᠨ ᠡᠮᠬᠢᠯᠡᠭᠴᠢ ᠡᠴᠡ)
ᠰᠤᠯᠠ ᠥᠭᠦᠯᠡᠯ
ᠪᠤᠷᠤᠭᠤ ᠶ᠋ᠢᠨ ᠳᠣᠲᠣᠷᠠᠬᠢ ᠪᠤᠷᠤᠭᠤ ᠶ᠋ᠢ ᠪᠣᠳᠣᠵᠤ ᠣᠯᠪᠠᠰᠤ ᠬᠠᠯᠠᠵᠤ ᠪᠣᠯᠤᠮᠤᠢ᠃ ᠵᠥᠪ ᠦ᠋ᠨ ᠳᠣᠲᠣᠷᠠᠬᠢ ᠪᠤᠷᠤᠭᠤ ᠶ᠋ᠢ ᠪᠣᠳᠣᠵᠤ ᠮᠡᠳᠡᠪᠡᠰᠦ ᠬᠠᠯᠠᠵᠤ ᠦᠯᠦ ᠪᠣᠯᠬᠤ ᠠᠨᠤ ᠴᠤᠬᠤᠮᠬᠠᠨ ᠭᠤᠨᠢᠶᠠᠯᠲᠠᠢ ᠠᠨᠤ ᠪᠤᠶᠤ᠃ ᠵᠥᠪ ᠰᠤᠷᠭᠠᠯ ᠤ᠋ᠨ ᠪᠤᠷᠬᠠᠨ ᠤ᠋ ᠨᠣᠮ ᠤ᠋ᠨ ᠱᠠᠪᠢᠨᠠᠷ ᠨᠣᠮ ᠠ᠋ᠴᠠᠭᠠᠨ ᠥᠪᠡᠷᠡ ᠶ᠋ᠢ ᠨᠢᠭᠡᠮᠦᠰᠦᠨ ᠪᠠᠷᠢᠵᠤ ᠦᠯᠦ ᠪᠣᠯᠬᠤ ᠠᠨᠤ ᠮᠠᠰᠢᠳᠠ ᠵᠥᠪ ᠡᠴᠡ ᠴᠦ᠍ ᠵᠥᠪ᠂ ᠮᠥᠨ ᠡᠴᠡ ᠴᠦ᠍ ᠮᠥᠨ ᠪᠥᠭᠡᠲᠡᠯᠡ᠂ ᠡᠨᠡ ᠵᠥᠪ ᠦ᠋ᠨ ᠳᠣᠲᠣᠷᠠ ᠪᠠᠰᠠ ᠨᠢᠭᠡᠨ ᠪᠤᠷᠤᠭᠤ ᠦᠵᠡᠯ ᠲᠥᠷᠥᠭᠳᠡᠨ ᠭᠠᠷᠴᠤ ᠢᠷᠡᠭᠰᠡᠨ ᠢᠨᠤ᠂ ᠣᠭᠲᠣᠬᠠᠨ ᠴᠤ᠌ ᠨᠣᠮ ᠦᠭᠡᠢ ᠬᠤᠸᠠᠷᠠᠭ ᠪᠥᠭᠡᠲᠡᠯᠡ᠂ ᠡᠷᠬᠡᠪᠰᠢ ᠨᠣᠮ ᠮᠡᠳᠡᠬᠦ ᠪᠯᠠᠮᠠ ᠶ᠋ᠢᠨ ᠳᠦᠷᠢᠮ ᠢ᠋ᠶ᠋ᠡᠷ ᠬᠠᠭᠤᠷᠮᠠᠭᠯᠠᠨ ᠠᠪᠤᠷᠢᠯᠠᠵᠤ᠂ ᠡᠮᠦᠨᠡ ᠪᠡᠨ ᠠᠭᠤᠯᠠ ᠶ᠋ᠢᠨ ᠲᠡᠳᠦᠢ ᠨᠣᠮ ᠢ᠋ ᠣᠪᠣᠭᠠᠯᠠᠵᠤ ᠲᠠᠯᠪᠢᠭᠠᠳ᠂ ᠪᠢᠴᠢᠭ ᠦᠵᠡᠬᠦ ᠱᠠᠪᠢᠨᠠᠷ ᠢ᠋ ᠵᠠᠩᠳᠠᠨ ᠴᠡᠭᠡᠷᠯᠡᠭᠦᠯᠬᠦ ᠬᠡᠷᠡᠭᠲᠡᠢ ᠪᠣᠯᠤᠭᠰᠠᠨ᠂ ᠡᠨᠡ ᠨᠢᠭᠡᠨ ᠠᠯᠳᠠᠰᠢ ᠶ᠋ᠢᠨ ᠭᠡᠮ ᠡᠪᠡᠳᠴᠢᠨ ᠮᠠᠰᠢᠳᠠ ᠭᠦᠨ᠂ ᠮᠠᠰᠢᠳᠠ ᠬᠦᠨᠳᠦ ᠪᠣᠯᠠᠢ᠃ ᠮᠥᠯᠬᠥᠭᠡᠳᠦᠢ ᠬᠡᠦᠬᠡᠳ ᠢ᠋ ᠨᠢᠰᠦᠨ ᠳᠡᠭᠳᠡᠭᠰᠡᠨ ᠠᠪᠤᠷᠢ ᠶ᠋ᠢ ᠭᠠᠷᠭᠠᠯᠭᠠᠬᠤ ᠠᠨᠤ᠂ ᠰᠤᠷᠴᠤ ᠮᠡᠳᠡᠬᠦᠢ ᠶ᠋ᠢᠨ ᠵᠠᠮ ᠢ᠋ ᠲᠠᠰᠤᠷ ᠬᠠᠭᠠᠭᠰᠠᠨ ᠠᠨᠤ ᠲᠤᠢᠯ ᠤ᠋ᠨ ᠪᠤᠷᠤᠭᠤ ᠪᠣᠯᠠᠢ᠃ ᠮᠣᠩᠭᠣᠯ ᠬᠡᠯᠡᠲᠡᠨ᠂ ᠲᠥᠪᠡᠳ ᠦ᠋ᠨ ᠰᠤᠳᠤᠷ ᠢ᠋ᠶ᠋ᠠᠷ ᠣᠨᠣᠯ ᠤᠬᠠᠭᠠᠨ ᠢ ᠤᠬᠠᠮᠤᠢ ᠬᠡᠮᠡᠭᠴᠢ ᠡᠳᠦᠷ ᠦ᠋ᠨ ᠣᠳᠣᠨ ᠰᠥᠨᠢ ᠶ᠋ᠢᠨ ᠰᠣᠯᠣᠩᠭᠠ ᠮᠡᠲᠦ ᠴᠥᠭᠡᠨ ᠳ᠋ᠦ᠍ᠷ ᠪᠠᠰᠠ ᠪᠢᠴᠢᠭ ᠦᠵᠡᠬᠦ ᠶ᠋ᠢ ᠡᠯᠡᠭᠯᠡᠬᠦ ᠂ ᠬᠠᠭᠤᠷᠮᠠᠭ ᠯᠠᠷᠵᠢᠶᠠ ᠳᠡᠯᠭᠡᠷᠡᠭᠰᠡᠨᠡ ᠨᠣᠮ ᠤ᠋ᠨ ᠭᠠᠳᠠᠭᠠᠳᠤ ᠳᠦᠷᠰᠦ ᠪᠠᠢᠪᠠᠴᠤ᠂ ᠨᠣᠮ ᠤ᠋ᠨ ᠳᠣᠲᠣᠭᠠᠳᠤ ᠣᠨᠣᠯ ᠪᠦᠬᠦᠢ ᠶ᠋ᠢ ᠢᠨᠤ ᠲᠤᠩ ᠴᠤ᠌ ᠣᠯᠵᠤ ᠡᠰᠡ ᠵᠣᠯᠭᠠᠨ ᠨᠣᠮ ᠤ᠋ᠨ ᠪᠤᠷᠬᠠᠨ ᠤ᠋ ᠨᠡᠷᠡ ᠶ᠋ᠢᠨ ᠲᠣᠭᠠ ᠶ᠋ᠢ ᠣᠯᠵᠤ ᠰᠣᠨᠣᠰᠴᠤ ᠴᠢᠳᠠᠭᠠᠳᠤᠢ ᠃ ᠠᠶᠠ ᠪᠢᠴᠢᠭ ᠦᠯᠦ ᠦᠵᠡᠭᠦᠯᠬᠦ ᠮᠠᠰᠢᠳᠠ ᠵᠥᠪ᠂ ᠭᠠᠭᠴᠠ ᠥᠪᠡᠷᠦᠨ ᠨᠣᠮ ᠤ᠋ᠨ ᠪᠤᠷᠬᠠᠨ ᠤ᠋ ᠨᠡᠷᠡ ᠲᠣᠭᠠ ᠪᠠᠨ ᠴᠤ᠌ ᠦᠯᠦ ᠮᠡᠳᠡᠬᠦ ᠢᠨᠤ ᠠᠪᠠᠢ ᠬᠠᠢᠷᠠᠬᠠᠨ ! ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠨᠢᠭᠡᠨ ᠨᠠᠰᠤᠨ ᠤ᠋ ᠮᠡᠳᠡᠷᠡᠯ ᠢ᠋ ᠰᠠᠭᠠᠲᠠᠭᠤᠯᠬᠤ ᠦᠭᠡᠢ ᠬᠡᠮᠡᠮᠦᠢ ᠤᠤ ? ᠡᠷᠲᠡ ᠰᠧ ᠴᠤᠸᠠᠨ ᠤ᠋ ᠧ ᠮᠧᠢ ᠱᠠᠨ ᠠᠭᠤᠯᠠᠨ ᠤ᠋ ᠨᠢᠭᠡᠨ ᠶᠡᠬᠡ ᠪᠠᠶᠠᠯᠢᠭ ᠵᠢᠶᠠ ᠬᠤᠤᠱᠠᠩ ᠬᠡᠮᠡᠭᠴᠢ ᠮᠥᠨ ᠧ ᠮᠧᠢ ᠠᠭᠤᠯᠠᠨ ᠤ᠋ ᠰᠢᠳᠢᠲᠦ ᠵᠡᠪᠡ ᠳ᠋ᠦ᠍ᠷ ᠵᠣᠭᠣᠭ ᠬᠢᠭᠰᠡᠭᠡᠷ ᠨᠢᠭᠡᠨ ᠶᠡᠬᠡ ᠬᠠᠳᠠ ᠶ᠋ᠢᠨ ᠳ᠋ᠦᠩ ᠠᠭᠤᠢ ᠳ᠋ᠤᠷ ᠣᠷᠣᠪᠠᠰᠤ ᠂ ᠠᠭᠤᠢ ᠶ᠋ᠢᠨ ᠳᠣᠲᠣᠷᠠ ᠲᠣᠭᠣᠷᠢᠵᠤ ᠲᠦᠮᠡᠨ ᠪᠣᠳᠢ ᠨᠣᠮ ᠢ᠋ᠶ᠋ᠠᠷ ᠳᠦᠭᠦᠷᠭᠡᠵᠦ ᠂ ᠳᠤᠮᠳᠠ ᠨᠢᠭᠡᠨ ᠤᠷᠲᠤ ᠬᠥᠮᠥᠰᠬᠡ ᠂ ᠬᠡᠦᠬᠡᠳ ᠦ᠋ᠨ ᠵᠢᠰᠦᠲᠦ ᠡᠷᠳᠡᠮᠲᠦ ᠠᠷᠰᠢ ᠴᠠᠨ ᠱᠢ ᠰᠠᠭᠤᠵᠤ ᠪᠣᠢ ᠲᠤᠯᠠ ᠂ ᠯᠠᠪ ᠶᠡᠬᠡ ᠡᠷᠳᠡᠮᠲᠦ ᠬᠤᠤᠱᠠᠩ ᠪᠣᠢ ᠢᠡ ᠭᠡᠮᠡᠨ ᠬᠡᠳᠦᠨ ᠤᠳᠬᠠᠰᠳᠣ ᠦᠭᠡᠰ ᠢ᠋ ᠭᠤᠶᠤᠨ ᠡᠰᠢᠯᠡᠪᠡᠰᠦ ᠂ ᠲᠡᠷᠡ ᠬᠤᠤᠱᠠᠩ ᠭᠠᠷ ᠢ᠋ᠶ᠋ᠠᠨ ᠨᠠᠮᠠᠨᠴᠢᠯᠠᠨ ᠥᠭᠦᠯᠡᠷᠦᠨ :
《ᠬᠠᠨ ᠵᠢᠩᠳᠢ ᠬᠠᠭᠠᠨ ᠤ᠋ ᠣᠨ ᠳ᠋ᠤᠷ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠢᠷᠡᠭᠰᠡᠨ ᠡᠴᠡ ᠢᠨᠠᠷᠤ᠂ ᠶᠢᠷᠲᠢᠨᠴᠦ ᠶ᠋ᠢᠨ ᠨᠠᠢ᠍ᠮᠠᠨ ᠨᠣᠮ ᠢ᠋ ᠲᠡᠪᠴᠢᠭᠰᠡᠨ ᠢ᠋ᠶ᠋ᠡᠷ ᠣᠷᠴᠢᠯᠠᠩ ᠤ᠋ᠨ ᠪᠢᠴᠢᠭ ᠱᠠᠰᠲᠢᠷ ᠤ᠋ᠨ ᠴᠠᠯᠴᠢᠶᠠ ᠦᠭᠡᠰ ᠢ᠋ ᠴᠡᠭᠡᠷᠯᠡᠭᠰᠡᠨ ᠲᠤᠯᠠ ᠬᠠᠷᠢᠭᠤ ᠨᠡᠢᠯᠡᠭᠦᠯᠬᠦᠶᠡ ᠪᠡᠷᠬᠡ 》ᠬᠡᠮᠡᠭᠡᠳ ᠨᠢᠳᠦᠨ ᠢ᠋ᠶ᠋ᠡᠨ ᠠᠨᠢᠵᠤ ᠲᠤᠭᠲᠠᠮ ᠳ᠋ᠤᠷ ᠣᠷᠣᠪᠠ᠃ ᠵᠢᠶᠠ ᠬᠤᠤᠱᠠᠩ ᠶᠡᠬᠡᠯᠡ ᠢᠴᠢᠩᠭᠦᠷᠡᠨ ᠰᠦᠮᠡ ᠳ᠋ᠡᠭᠡᠨ ᠡᠭᠡᠵᠦ᠂ ᠨᠣᠮ ᠤ᠋ᠨ ᠬᠥᠮᠦᠨ ᠡᠴᠡ ᠪᠢᠴᠢᠭ ᠠᠰᠠᠭᠤᠭᠰᠠᠨ ᠠᠨᠤ ᠮᠢᠨᠦ ᠡᠨᠳᠡᠭᠦᠦ ᠭᠡᠮᠡᠨ ᠨᠢᠭᠡᠨ ᠳᠠᠰᠢ ᠣᠷᠬᠢᠪᠠ᠃ ᠭᠡᠨᠡᠳᠲᠡ ᠨᠢᠭᠡᠨ ᠵᠤᠨ ᠳᠡᠭᠦᠨᠦ ᠵᠣᠴᠢᠨ ᠳᠠᠢᠯᠠᠬᠤ ᠶᠡᠬᠡ ᠳᠡᠷᠡᠰᠦᠨ ᠤ ᠭᠡᠷ ᠲᠦ᠍ᠷ ᠴᠢᠮᠡᠭᠡ ᠭᠠᠷᠴᠤ᠂ ᠣᠷᠣᠵᠤ ᠦᠵᠡᠪᠡᠰᠦ ᠲᠠᠭᠥᠨᠣ ᠱᠠᠪᠢᠨᠠᠷ ᠤ᠋ᠨ ᠨᠠᠭᠠᠳᠴᠤ ᠲᠠᠯᠪᠢᠭᠰᠠᠨ ᠨᠢᠭᠡᠨ ᠮᠣᠳᠣᠨ ᠤ᠋ ᠬᠠᠪᠬᠠ ᠳ᠋ᠤᠷ ᠨᠢᠭᠡᠨ ᠶᠢᠰᠦᠨ ᠰᠡᠭᠦᠯᠲᠦ ᠦᠨᠡᠭᠡ ᠶ᠋ᠢᠨ ᠰᠡᠭᠦᠯ ᠢᠨᠣ ᠬᠠᠪᠴᠢᠭᠳᠠᠭᠰᠠᠨ ᠳ᠋ᠤᠷ ᠦᠨᠡᠭᠡ ᠲᠡᠰᠳᠡᠰᠢ ᠦᠭᠡᠢ ᠡᠪᠡᠷᠰᠢᠶᠡᠨ ᠴᠢᠬᠤᠯᠳᠠᠵᠤ ᠬᠥᠮᠦᠨ ᠦ᠌ ᠦᠭᠡ ᠪᠡᠷ :
《 ᠪᠠᠭᠰᠢ ᠠᠮᠢᠨ ᠢ᠋ ᠠᠪᠤᠷᠠ ! 》ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠢᠶᠠ ᠬᠤᠤᠱᠠᠩ ᠶᠡᠬᠡᠯᠡ ᠢᠨᠢᠶᠡᠳᠦᠨ ᠬᠦᠷᠴᠦ ᠲᠦᠷ ᠠᠰᠠᠭᠤᠷᠤᠨ :
《 ᠴᠢ ᠪᠢᠳᠡ ᠬᠣᠶᠠᠭᠤᠯᠠ ᠣᠭᠲᠣ ᠨᠠᠢᠷ ᠦᠭᠡᠢ ᠶ᠋ᠢᠨ ᠳᠡᠭᠡᠷᠡ᠂ ᠴᠢ ᠪᠠᠰᠠ ᠬᠠᠷᠢᠨ ᠨᠠᠮᠠᠶ᠋ᠢ ᠬᠤᠯᠠᠭᠤᠷᠠ ᠢᠷᠡᠵᠦᠬᠦᠢ ᠃ ᠪᠢ ᠶᠠᠭᠠᠬᠢᠨ ᠠᠪᠤᠷᠠᠮᠤᠢ ? 》ᠬᠡᠮᠡᠬᠦᠢ ᠳ᠋ᠦ᠍ᠷ ᠦᠨᠡᠭᠡ ᠡᠪᠡᠷᠰᠢᠶᠡᠨ ᠲᠡᠰᠬᠦ ᠦᠭᠡᠢ ᠴᠢᠬᠤᠯᠳᠠᠨ ᠥᠭᠦᠯᠡᠷᠦᠨ :
《ᠪᠠᠭᠰᠢ ᠪᠢᠳᠡ ᠬᠣᠶᠠᠭᠤᠯᠠ ᠮᠠᠰᠢ ᠬᠠᠭᠤᠴᠢᠨ ᠲᠠᠨᠢᠯ ᠪᠣᠯᠠᠢ ᠃ ᠲᠡᠷᠡ ᠵᠢᠯ ᠦ᠋ᠨ ᠲᠡᠷᠡ ᠰᠠᠷᠠ᠂ ᠲᠡᠢᠮᠦ ᠲᠡᠢᠮᠦ ᠡᠳᠦᠷ ᠴᠠᠭ ᠲᠤᠷ ᠪᠠᠭᠰᠢ ᠮᠢᠨᠦ ᠮᠠᠭᠤ ᠠᠭᠤᠢ ᠳ᠋ᠤᠷ ᠵᠠᠯᠠᠷᠠᠨ ᠪᠠᠭᠤᠵᠤ ᠨᠠᠳᠠ ᠯᠤᠭᠠ ᠦᠭᠡ ᠬᠡᠯᠡᠯᠴᠡᠭᠰᠡᠨ ᠨᠠᠢᠷ ᠪᠣᠢ ᠪᠥᠯᠥᠭᠡ᠃ ᠲᠡᠷᠡ ᠨᠣᠮ ᠣᠪᠣᠭᠠᠯᠠᠭᠰᠠᠨ ᠬᠤᠤᠱᠠᠩ ᠳᠠᠷᠤᠢ ᠪᠢ ᠪᠥᠯᠥᠭᠡ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠢᠶᠠ ᠬᠤᠤᠱᠠᠩ ᠨᠡᠩᠳᠡ ᠶᠡᠬᠡᠯᠡ ᠢᠨᠢᠶᠡᠳᠦᠮ ᠲᠥᠷᠥᠵᠦ ᠠᠰᠠᠭᠤᠷᠤᠨ :
《 ᠴᠠᠯᠴᠢᠶᠠ ᠦᠭᠡᠰ ᠢ᠋ ᠴᠡᠭᠡᠷᠯᠡᠭᠰᠡᠨ ᠪᠥᠭᠡᠳ ᠴᠢᠯᠢᠯᠲᠤ ᠳᠡᠷᠡᠰᠦᠨᠡ ᠶᠠᠭᠤᠨᠲᠤ ᠳᠤᠷᠠᠯᠠᠵᠤ ᠪᠠᠷᠢᠭᠳᠠᠪᠠ ? ᠴᠢ ᠲᠦᠷ ᠮᠢᠨᠦ ᠠᠰᠠᠭᠤᠭᠰᠠᠨ ᠴᠠᠯᠴᠢᠶᠠ ᠦᠭᠡᠰ ᠦ᠋ᠨ ᠬᠠᠷᠢᠭᠤ ᠶ᠋ᠢ ᠥᠴᠢᠭᠰᠡᠨᠡ᠂ ᠪᠢ ᠬᠠᠪᠬᠠ ᠶ᠋ᠢᠨ ᠣᠨᠢᠰᠣ ᠶ᠋ᠢ ᠠᠪᠰᠤᠭᠠᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠦᠨᠡᠭᠡ ᠶᠡᠬᠡᠯᠡ ᠡᠪᠡᠷᠰᠢᠶᠡᠨ ᠤᠬᠢᠯᠠᠨ ᠥᠭᠦᠯᠡᠷᠦᠨ᠄
《 ᠠᠶᠠ ᠪᠠᠭᠰᠢ ᠠ᠋ ᠂ ᠪᠢ ᠤᠭ ᠠ᠋ᠴᠠ ᠨᠣᠮ ᠮᠡᠳᠡᠬᠦ ᠶ᠋ᠢ ᠪᠠᠢᠲᠤᠭᠠᠢ᠂ ᠪᠢᠴᠢᠭ ᠮᠥᠨ ᠮᠡᠳᠡᠬᠦ ᠦᠭᠡᠢ᠂ ᠡᠷᠬᠡ ᠲᠠᠩᠬᠠᠢ ᠡᠮᠡ ᠦᠨᠡᠭᠡ ᠪᠥᠯᠥᠭᠡ ᠃ ᠪᠠᠭᠰᠢ ᠶ᠋ᠢᠨ ᠠᠰᠠᠭᠤᠭᠰᠠᠨ ᠢ᠋ ᠦᠯᠦ ᠤᠬᠠᠬᠤᠢ ᠳ᠋ᠠᠭᠠᠨ ᠪᠤᠷᠬᠠᠨ ᠤ᠋ ᠨᠣᠮ ᠤ᠋ᠨ ᠦᠵᠦᠭᠦᠷ ᠬᠢᠵᠠᠭᠠᠷ ᠦᠭᠡᠢ ᠬᠡᠮᠡᠭᠰᠡᠨ ᠦᠭᠡᠰ ᠢ᠋ᠶ᠋ᠡᠷ ᠬᠠᠯᠬᠠᠯᠠᠨ ᠬᠡᠯᠡᠵᠦ ᠥᠩᠭᠡᠷᠡᠭᠰᠡᠨ ᠪᠥᠯᠥᠭᠡ᠃ ᠪᠠᠭᠰᠢ ᠮᠢᠨᠦ ᠬᠠᠪᠬᠠ ᠶ᠋ᠢ ᠲᠦᠷᠭᠡᠬᠡᠨ ᠠᠪ ᠂ ᠣᠳᠣ ᠪᠠᠬᠠᠨ ᠤᠳᠠᠪᠠᠰᠤ ᠨᠢᠭᠡᠨ ᠡᠷᠬᠡᠲᠡᠨ ᠡᠪᠳᠡᠷᠡᠭᠡᠳ ᠵᠡᠮᠳᠡᠭ ᠪᠣᠯᠤᠮᠤᠢ 》 ᠵᠢᠶᠠ ᠬᠤᠤᠱᠠᠩ ᠪᠠᠰᠠ ᠠᠰᠠᠭᠤᠷᠤᠨ :
《ᠴᠢ ᠨᠣᠮ ᠪᠢᠴᠢᠭ ᠢ᠋ ᠴᠥᠮ ᠮᠡᠳᠡᠬᠦ ᠦᠭᠡᠢ ᠪᠥᠭᠡᠳ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠢ᠋ ᠬᠡᠷᠬᠢᠨ ᠮᠡᠳᠡᠪᠡ? 》ᠦᠨᠡᠭᠡ ᠤᠬᠢᠯᠠᠨ ᠥᠴᠢᠷᠦᠨ᠄
《ᠴᠥᠮ ᠢ᠋ᠶ᠋ᠡᠷ ᠳᠠᠭᠠᠨ ᠳᠠᠭᠤᠷᠢᠶᠠᠨ ᠰᠤᠷᠴᠤ ᠬᠡᠯᠡᠭᠰᠡᠨ ᠪᠣᠯᠠᠢ᠃ ᠪᠢᠴᠢᠭ ᠦ᠋ᠨ ᠤᠬᠠᠭᠠᠨ ᠢ᠋ ᠴᠦ᠍ ᠦᠯᠦ ᠲᠦᠰᠥᠭᠯᠡᠬᠦ ᠪᠢ᠂ ᠶᠠᠭᠠᠬᠢᠨ ᠨᠣᠮ ᠤ᠋ᠨ ᠣᠨᠣᠯ ᠤ᠋ᠨ ᠬᠣᠭᠣᠰᠣᠨ ᠴᠢᠨᠠᠷ ᠢ᠋ ᠤᠬᠠᠬᠤ ᠠᠵᠠᠢ ? ᠨᠣᠮ ᠮᠡᠳᠡᠬᠦ ᠦᠭᠡᠢ ᠪᠥᠭᠡᠳ ᠪᠢᠴᠢᠭ ᠢ᠋ ᠪᠤᠷᠤᠭᠤᠰᠢᠶᠠᠭᠰᠠᠨ ᠶᠠᠯᠠ ᠶ᠋ᠢ ᠭᠡᠯᠳᠦᠷᠢᠭᠦᠯ 》ᠬᠡᠮᠡᠭᠰᠡᠨᠡ ᠰᠠᠶᠢ ᠬᠠᠪᠬᠠ ᠶ᠋ᠢᠨ ᠣᠨᠢᠰᠣᠨ ᠢ ᠰᠤᠯᠠᠳᠬᠠᠵᠤ ᠮᠥᠨ ᠰᠡᠭᠦᠯ ᠡᠴᠡ ᠴᠢᠩᠳᠠ ᠠᠳᠬᠤᠨ ᠥᠭᠦᠯᠡᠷᠦᠨ :
《ᠴᠢ ᠮᠢᠨᠦ ᠭᠠᠷ ᠢ᠋ ᠬᠠᠵᠠᠪᠠᠰᠤ᠂ ᠪᠢ ᠴᠢᠨᠦ ᠭᠠᠪᠠᠯᠠ ᠶ᠋ᠢ ᠡᠨᠡ ᠬᠠᠪᠬᠠ ᠪᠠᠷ ᠪᠢᠯᠴᠠᠯᠤᠮᠤᠢ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠦᠨᠡᠭᠡ ᠲᠠᠩᠭᠠᠷᠢᠭ ᠥᠭᠴᠦ ᠭᠠᠷ ᠢ᠋ ᠲᠠᠯᠪᠢᠭᠤᠯᠤᠨ᠂ ᠤᠭ ᠤ᠋ᠨ ᠠᠷᠰᠢ ᠬᠤᠤᠱᠠᠩ ᠪᠣᠯᠤᠨ ᠬᠤᠪᠢᠯᠵᠤ᠂ ᠳᠦᠷᠰᠦ ᠶ᠋ᠢ ᠵᠠᠰᠠᠨ ᠲᠡᠭᠰᠢᠯᠡᠨ ᠰᠠᠭᠤᠯᠴᠠᠵᠤ᠂ ᠵᠢᠶᠠ ᠬᠤᠤᠱᠠᠩ ᠠᠷᠢᠬᠢ ᠬᠤᠷᠢᠮ ᠪᠠᠷᠢᠵᠤ ᠠᠰᠠᠭᠤᠷᠤᠨ:
《ᠡᠷᠭᠢᠨ ᠴᠢ ᠨᠣᠮ ᠮᠡᠳᠡᠬᠦ ᠦᠭᠡᠢ ᠪᠥᠭᠡᠳ ᠲᠡᠳᠦᠢᠴᠢᠨᠡᠭᠡᠨ ᠲᠦᠮᠡᠨ ᠪᠣᠳᠢ ᠰᠤᠳᠤᠷ ᠢ᠋ᠶ᠋ᠠᠷ ᠶᠠᠭᠤᠨ ᠬᠢᠬᠦ ᠠᠵᠠᠢ ?》ᠦᠨᠡᠭᠡ ᠢᠨᠢᠶᠡᠨ ᠥᠴᠢᠷᠦᠨ:
《ᠲᠡᠳᠡᠭᠡᠷ ᠴᠥᠮ ᠮᠣᠳᠣᠨ ᠤ᠋ ᠨᠠᠪᠴᠢ᠂ ᠬᠤᠯᠤᠰᠤ ᠡᠪᠡᠰᠦ ᠪᠣᠯᠠᠢ ᠂ ᠣᠭᠲᠣ ᠨᠣᠮ ᠪᠤᠰᠤ ᠂ ᠵᠦᠭᠡᠷ ᠨᠢᠭᠡᠨ ᠨᠢᠳᠦᠨ ᠦ᠌ ᠦᠵᠡᠯᠲᠡ ᠪᠣᠯᠭᠠᠨ ᠬᠤᠪᠢᠯᠭᠠᠭᠰᠠᠨ ᠠᠨᠤ ᠪᠤᠶᠤ᠃ 》ᠪᠠᠰᠠ ᠠᠰᠠᠭᠤᠷᠤᠨ᠄
《 ᠲᠡᠢᠨ ᠬᠦ᠌ ᠬᠤᠪᠢᠯᠭᠠᠵᠤ ᠶᠠᠭᠠᠬᠢᠮᠤᠢ ? 》ᠦᠨᠡᠭᠡ ᠥᠴᠢᠷᠦᠨ᠄
《 ᠬᠥᠮᠦᠨ ᠦ᠌ ᠨᠢᠳᠦ ᠶ᠋ᠢ ᠮᠡᠬᠡᠯᠡᠨ ᠰᠡᠳᠬᠢᠯ ᠢ᠋ ᠪᠢᠰᠢᠷᠡᠭᠦᠯᠬᠦᠢ ᠶ᠋ᠢᠨ ᠤᠴᠢᠷ ᠪᠣᠢ ᠊ᠶᠠ᠃》ᠪᠠᠰᠠ ᠠᠰᠠᠭᠤᠷᠤᠨ᠄
《 ᠪᠢᠴᠢᠭ ᠪᠣᠯᠭᠠᠵᠤ ᠪᠣᠯᠬᠤ ᠦᠭᠡᠢ ᠤᠤ? 》ᠦᠨᠡᠭᠡ ᠥᠴᠢᠷᠦᠨ :
《ᠪᠢᠴᠢᠭ ᠪᠣᠯᠪᠠᠰᠤ ᠦᠨᠡᠨ ᠭᠡᠷᠡᠴᠢ ᠪᠠᠷᠢᠮᠲᠠ ᠲᠠᠢ ᠬᠡᠷᠡᠭ ᠪᠠᠢᠬᠤ ᠬᠡᠷᠡᠭᠲᠡᠢ ᠶ᠋ᠢᠨ ᠲᠤᠯᠠᠳᠠ᠂ ᠬᠤᠴᠢᠵᠤ ᠬᠠᠯᠬᠠᠯᠠᠨ᠂ ᠪᠣᠯᠢᠮᠰᠣᠨ ᠪᠢᠯᠳᠤᠭᠤᠯᠬᠤᠶᠠ ᠮᠠᠰᠢ ᠪᠡᠷᠬᠡᠲᠡᠢ᠃ ᠨᠣᠮ ᠪᠥᠭᠡᠰᠦ ᠦᠵᠦᠭᠦᠷ ᠬᠢᠵᠠᠭᠠᠷ ᠦᠭᠡᠢ ᠬᠣᠭᠣᠰᠣᠨ ᠴᠢᠨᠠᠷ᠂ ᠰᠡᠳᠬᠢᠯ ᠦ᠋ᠨ ᠡᠭᠦᠳᠡ ᠬᠡᠮᠡᠪᠡᠰᠦ᠂ ᠶᠢᠯᠸᠢᠰ ᠬᠤᠪᠢᠯᠭᠠᠨ ᠪᠡᠯᠭᠡ ᠪᠢᠯᠢᠭ ᠬᠡᠮᠡᠪᠡᠰᠦ ᠪᠤᠰᠤᠳ ᠤ᠋ᠨ ᠮᠣᠬᠣᠭᠠᠨ ᠠᠰᠠᠭᠤᠬᠤ ᠵᠠᠮ ᠢ᠋ ᠲᠠᠰᠤᠯᠤᠨ ᠠᠮᠠᠨ ᠢ᠋ ᠪᠥᠭᠯᠡᠬᠦᠢ ᠳ᠋ᠦ᠍ᠷ ᠬᠢᠯᠪᠠᠷ ᠪᠥᠭᠡᠳ ᠣᠷᠴᠢᠯᠠᠩ ᠤ᠋ᠨ ᠳᠡᠭᠡᠷᠡ ᠨᠣᠮ ᠮᠡᠳᠡᠭᠴᠢᠳ ᠮᠠᠰᠢ ᠴᠥᠭᠡᠨ ᠲᠤᠯᠠ᠂ ᠬᠠᠭᠤᠷᠮᠠᠭᠯᠠᠨ ᠠᠪᠤᠷᠢᠯᠠᠬᠤᠢ ᠳ᠋ᠤᠷ ᠶᠡᠬᠡᠳᠡ ᠳᠥᠭᠥᠮ᠃ ᠲᠡᠢᠨ ᠬᠦ᠌ ᠠᠭᠠᠷ ᠤ᠋ᠨ ᠠᠭᠤᠳᠠᠮ ᠳ᠋ᠤᠷ ᠬᠠᠨ ᠺᠠᠷᠣᠳᠢ ᠵᠣᠷᠢᠭ ᠢ᠋ᠶ᠋ᠠᠷ ᠴᠠᠷᠪᠢᠵᠤ᠂ ᠳᠠᠯᠠᠢ ᠶ᠋ᠢᠨ ᠠᠭᠤᠳᠠᠮ ᠳ᠋ᠤᠷ ᠬᠦᠮᠪᠢᠷᠡ ᠮᠠᠲᠠᠷ ᠲᠠᠪᠠ ᠪᠠᠷ ᠴᠣᠯᠬᠢᠯᠴᠠᠬᠤ ᠮᠡᠲᠦ ᠬᠢᠯᠪᠠᠷ ᠪᠤᠶᠤ᠃ ᠲᠣᠪᠴᠢᠯᠠᠪᠠᠰᠤ ᠪᠢ ᠨᠣᠮ ᠮᠡᠳᠡᠬᠦ ᠲᠤᠯᠠ ᠪᠢᠴᠢᠭ ᠢ᠋ ᠬᠡᠷᠡᠭᠰᠡᠬᠦ ᠦᠭᠡᠢ ᠭᠡᠮᠡᠨ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠨᠣᠮᠴᠢ ᠭᠡᠮᠡᠨ ᠠᠪᠤᠷᠢᠯᠠᠭᠰᠠᠨ ᠦᠢᠯᠡ ᠪᠣᠯᠠᠢ ! 》ᠭᠡᠮᠡᠨ ᠶᠡᠬᠡᠯᠡ ᠢᠨᠢᠶᠡᠯᠴᠡᠨ ᠲᠠᠷᠬᠠᠯᠴᠠᠪᠠᠢ᠃ ᠡᠨᠡ ᠦᠯᠢᠭᠡᠷ ᠴᠢᠪ ᠴᠢᠬᠡ ᠴᠢᠯᠠᠭᠤᠨ ᠳᠡᠷᠡ ᠶ᠋ᠢᠨ ᠰᠢᠭᠦᠮᠵᠢᠯᠡᠯ ᠯᠤᠬᠡ ᠠᠪ ᠠᠳᠠᠯᠢ ᠬᠡᠷᠡᠭ ᠪᠣᠯᠪᠠᠢ᠃
ᠴᠢᠯᠠᠭᠤᠨ ᠳᠡᠷᠡ ᠶ᠋ᠢᠨ ᠰᠡᠳᠦᠪ ᠰᠢᠭᠦᠮᠵᠢᠯᠡᠯ
ᠲᠦᠮᠡᠳ ᠬᠤᠰᠢᠭᠤᠨ ᠤ᠋ ᠵᠦᠩ ᠰᠢᠨ ᠹᠦ ᠶ᠋ᠢᠨ ᠡᠵᠡᠨ᠂ ᠲᠠᠢᠵᠢ ᠿᠦᠨ ᠲᠢᠩ ᠮᠢᠨᠦ ᠨᠢᠭᠡᠨ ᠱᠠᠰᠢᠨ ᠤ᠋ ᠳᠣᠲᠣᠷᠠᠬᠢ ᠲᠤᠩᠭᠠᠯᠠᠭ ᠨᠥᠬᠥᠷ ᠨᠣᠮ ᠤ᠋ᠨ ᠴᠣᠷᠵᠢ ᠳᠠᠮᠷᠢᠨᠵᠠᠪ ᠬᠡᠮᠡᠭᠴᠢ ᠵᠢᠷᠠᠨ ᠨᠠᠰᠤ ᠭᠠᠷᠴᠤ᠂ ᠬᠦᠰᠡᠯ ᠠᠷᠢᠯᠤᠨ ᠬᠥᠮᠦᠨ ᠡᠴᠡ ᠴᠣᠯᠭᠣᠷᠠᠨ᠂ ᠡᠨᠡ ᠪᠡᠶᠡ ᠪᠡᠷ ᠶᠡᠬᠡ ᠭᠦᠯᠭᠡᠨ ᠢ᠋ ᠪᠢᠰᠢᠯᠭᠠᠨ ᠪᠤᠷᠬᠠᠨ ᠪᠣᠯᠬᠤ ᠶ᠋ᠢ ᠬᠦᠰᠡᠬᠦ ᠦᠭᠡᠢ᠃ ᠬᠦᠯᠢᠴᠡᠯ ᠪᠣᠯᠪᠠᠰᠤᠷᠠᠯ ᠤ᠋ᠨ ᠸᠢᠨᠠᠢ ᠶ᠋ᠢᠨ ᠶᠣᠰᠣᠨ ᠢ᠋ᠶ᠋ᠠᠷ ᠲᠥᠷᠥᠯ ᠳᠣᠳᠣᠮ ᠲᠡᠪᠰᠢᠭᠰᠡᠭᠡᠷ ᠠᠮᠢᠲᠠᠨ ᠪᠦᠬᠦᠨ ᠪᠤᠷᠬᠠᠨ ᠪᠤᠯᠬᠤᠢ ᠶ᠋ᠢᠨ ᠮᠥᠨ ᠴᠢᠨᠠᠷ ᠤ᠋ᠨ ᠮᠥᠷ ᠢ᠋ ᠳᠠᠭᠠᠵᠤ ᠬᠦᠯᠢᠶᠡᠨ ᠬᠢᠯᠢᠨᠴᠡ ᠦᠭᠡᠢ ᠨᠢᠭᠡᠨ ᠲᠥᠷᠥᠯ ᠢ᠋ ᠥᠩᠭᠡᠷᠡᠬᠦ ᠶ᠋ᠢ ᠬᠦᠯᠢᠶᠡᠬᠦᠢ ᠳ᠋ᠦ᠍ᠷ ᠡᠨᠡ ᠦᠯᠦ ᠦᠬᠦᠬᠦᠢ ᠶ᠋ᠢᠨ ᠢᠨᠠᠷᠤ᠂ ᠠᠷᠢᠭᠤᠨ ᠴᠡᠭᠡᠷ ᠭᠡᠭᠡᠬᠡᠨ ᠲᠤᠩᠭᠠᠯᠠᠭ ᠤ᠋ᠨ ᠵᠠᠩ ᠠᠪᠤᠴᠠ ᠪᠠᠷ ᠣᠷᠴᠢᠯᠠᠩ ᠤ᠋ᠨ ᠳᠣᠲᠣᠷᠠᠬᠢ᠂ ᠦᠨᠡᠨ ᠮᠠᠭᠠᠳ ᠵᠦᠢ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ᠂ ᠸᠢᠨᠠᠢ ᠶ᠋ᠢᠨ ᠲᠠᠪᠴᠠᠩ ᠢ᠋ ᠲᠣᠭᠣᠷᠢᠨ᠂ ᠳᠥᠷᠪᠡᠨ ᠴᠠᠭ ᠤ᠋ᠨ ᠴᠡᠴᠡᠭ ᠡᠪᠡᠰᠦ ᠲᠡᠰᠦᠷᠡᠰᠢ ᠦᠭᠡᠢ᠂ ᠶᠡᠬᠡ ᠪᠤᠶᠠᠨ ᠴᠢᠭᠤᠯᠭᠠᠨ ᠤ᠋ ᠵᠠᠭᠤᠨ ᠲᠠᠬᠢᠯ – ᠳ᠋ᠤᠩᠴᠤᠳ ᠤ᠋ᠨ ᠬᠤᠷᠠᠯ ᠳ᠋ᠤᠷ ᠡᠪᠦᠯ ᠪᠣᠯᠪᠠᠴᠤ ᠡᠷᠬᠡᠪᠰᠢ ᠠᠮᠢᠳᠤ ᠴᠡᠴᠡᠭ ᠲᠠᠬᠢᠬᠤ ᠶ᠋ᠢ ᠵᠣᠷᠢᠳᠠᠭ ᠪᠥᠯᠥᠭᠡ᠃ ᠡᠭᠦᠨ ᠢ᠋ ᠦᠵᠡᠪᠡᠰᠦ ᠲᠡᠷᠡ ᠬᠥᠮᠦᠨ ᠦ᠌ ᠡᠯᠢᠭᠡ ᠠᠭᠤᠰᠬᠢ ᠶ᠋ᠢᠨ ᠠᠩᠬᠢᠯᠤᠮᠠᠯ ᠲᠤᠩᠭᠠᠯᠠᠭ ᠢ᠋ ᠨᠡᠢᠲᠡ ᠪᠡᠷ ᠮᠡᠳᠡᠪᠡᠰᠦ ᠪᠣᠯᠬᠤ ᠪᠣᠯᠠᠢ᠃ ᠡᠨᠡ ᠬᠥᠮᠦᠨ ᠴᠠᠭ ᠢ᠋ᠶ᠋ᠠᠨ ᠳᠠᠭᠠᠵᠤ ᠨᠣᠮ ᠤ᠋ᠨ ᠠᠭᠠᠷ ᠲᠠᠭᠠᠨ ᠲᠡᠪᠰᠢᠭᠰᠡᠨ ᠬᠣᠢᠨᠠ᠂ ᠲᠡᠭᠦᠨᠦ ᠵᠤᠨ ᠤ᠋ ᠴᠠᠭᠳᠠ ᠰᠡᠷᠢᠭᠦᠨ ᠢ᠋ ᠡᠷᠢᠭᠰᠡᠨ ᠴᠢᠯᠠᠭᠤᠨ ᠳᠡᠷᠡ᠂ ᠪᠤᠰᠤᠳ ᠤ᠋ᠨ ᠭᠠᠷ ᠲᠤᠷ ᠣᠷᠣᠵᠤ ᠡᠭᠦᠳᠦᠭᠰᠡᠨ ᠢᠨᠤ ᠤᠷᠠᠨ ᠨᠠᠷᠢᠨ ᠴᠢᠯᠠᠭᠤ ᠪᠥᠭᠡᠲᠡᠯᠡ ᠬᠥᠨᠳᠡᠢ ᠰᠡᠢᠯᠪᠦᠷᠢ ᠲᠡᠢ᠂ ᠥᠭᠡᠳᠡ ᠤᠷᠤᠭᠤ ᠵᠥᠭᠡᠭᠡᠬᠦᠢ ᠳ᠋ᠦ᠍ᠷ ᠪᠠᠷᠢᠬᠤ ᠪᠠᠷᠢᠭᠤᠯ ᠲᠠᠢ ᠪᠥᠭᠡᠳ ᠪᠠᠰᠠᠴᠤ ᠪᠠᠬᠠᠨ ᠬᠥᠩᠭᠡᠨ ᠰᠢᠭ᠃ ᠲᠡᠷᠡ ᠴᠦ᠍ ᠬᠡᠷᠡᠭᠯᠡᠯ ᠡᠳ᠋ᠯᠡᠪᠦᠷᠢ ᠦᠢᠯᠡᠳᠬᠦᠢ ᠶ᠋ᠢᠨ ᠡᠩ ᠦ᠋ᠨ ᠦᠢᠯᠡ ᠪᠥᠭᠡᠲᠡᠯᠡ᠂ ᠡᠭᠦᠨ ᠢ᠋ ᠣᠯᠵᠤ ᠠᠪᠤᠭᠠᠳ᠂ ᠳᠡᠭᠦᠨᠦ ᠰᠠᠢᠨ ᠢ᠋ ᠣᠯᠵᠤ ᠡᠳ᠋ᠯᠡᠨ᠂ ᠳᠡᠭᠦᠨᠦ ᠤᠷᠠᠨ ᠢ ᠠᠨᠤ ᠪᠠᠬᠠᠷᠬᠠᠨ ᠭᠠᠢᠬᠠᠬᠤ ᠪᠥᠭᠡᠳ ᠲᠡᠭᠦᠨᠦ ᠰᠠᠢᠨ ᠪᠠ ᠤᠷᠠᠨ ᠢ ᠠᠨᠤ ᠣᠭᠲᠣ ᠰᠠᠨᠠᠬᠤ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠮ᠂ ᠭᠡᠳᠡᠷᠭᠦ ᠣᠨᠴᠠ ᠲᠡᠭᠦᠨᠦ ᠰᠠᠢᠨ ᠪᠠ ᠤᠷᠠᠨ ᠤ᠋ ᠳᠣᠲᠣᠷᠠ ᠠ᠋ᠴᠠ ᠮᠠᠭᠤ ᠶ᠋ᠢ ᠠᠨᠤ ᠤᠬᠤᠴᠢᠯᠠᠨ ᠭᠠᠷᠭᠠᠵᠤ᠂ ᠲᠥᠭᠡ ᠢᠮᠠᠬᠤ ᠶ᠋ᠢᠨ ᠮᠣᠳᠣ ᠶ᠋ᠢ ᠠᠷᠪᠠᠨ ᠠᠯᠲᠠ ᠶ᠋ᠢᠨ ᠠᠰᠠᠷ ᠳᠡᠭᠡᠷᠡ ᠠᠪᠠᠴᠢᠵᠤ ᠣᠷᠣᠢ ᠳᠡᠭᠡᠷᠡ ᠪᠣᠰᠬᠠᠭᠠᠳ᠂ ᠮᠣᠳᠣ ᠥᠨᠳᠥᠷ ᠤᠤ᠂ ᠠᠰᠠᠷ ᠥᠨᠳᠥᠷ ᠤᠤ ? ᠬᠡᠮᠡᠬᠦ ᠪᠠ ᠰᠤᠪᠤᠷᠭᠠᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠬᠠᠮᠬᠤᠤᠯ ᠡᠪᠡᠰᠦ ᠶ᠋ᠢ ᠰᠤᠪᠤᠷᠭᠠ ᠠ᠋ᠴᠠ ᠥᠨᠳᠥᠷ ᠪᠣᠯᠭᠠᠨ ᠥᠭᠦᠯᠡᠭᠰᠡᠨ ᠢᠨᠣ ᠡᠨᠡ ᠬᠦ᠌ ᠴᠢᠯᠠᠭᠤᠨ ᠳᠡᠷᠡ ᠶ᠋ᠢ ᠤᠷᠠᠯᠠᠭᠰᠠᠨ ᠡᠨᠡ ᠰᠡᠴᠡᠨ ᠭᠡᠭᠡᠬᠡᠨ ᠣᠶᠤᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠬᠡᠷᠪᠡ ᠤᠷᠲᠤᠳᠠ ᠠᠮᠤᠭᠤᠯᠠᠩ ᠬᠣᠭᠣᠰᠣᠨ ᠴᠢᠨᠠᠷ ᠢ᠋ ᠪᠢᠰᠢᠯᠭᠠᠭᠰᠠᠨ ᠪᠥᠭᠡᠰᠦ ᠶᠠᠮᠪᠠᠷ ᠬᠢᠷᠢ ᠲᠡᠢ ᠪᠣᠢ ? ᠬᠡᠮᠡᠪᠡ᠃ ᠠᠪᠠᠢ ᠬᠠᠯᠠᠬᠠᠢ ! ᠣᠷᠴᠢᠯᠠᠩ ᠳᠦᠭᠦᠷᠡᠩ ᠮᠡᠷᠭᠡᠳ ᠣᠶᠤᠲᠠᠨ ᠡᠨᠡ ᠨᠢᠭᠡᠨ ᠦᠭᠡᠰ ᠦ᠋ᠨ ᠣᠨᠣᠯ ᠲᠤᠰᠤᠯᠲᠠ ᠶ᠋ᠢ ᠨᠠᠷᠢᠪᠴᠢᠯᠠᠨ ᠬᠢᠨᠠᠵᠤ ᠦᠵᠡᠭᠳᠡᠬᠦᠢ᠃ ᠠᠶᠠ ᠬᠣᠬᠣᠢ ! ᠰᠠᠭᠤᠯᠠᠭᠠ ᠳᠦᠭᠦᠷᠡᠩ ᠴᠠᠭᠠᠨ ᠰᠦᠨ ᠳ᠋ᠦ᠍ᠷ ᠬᠣᠣᠷᠠᠲᠤ ᠮᠣᠭᠠᠢ ᠶ᠋ᠢᠨ ᠬᠡᠯᠡ ᠶ᠋ᠢᠨ ᠦᠵᠦᠭᠦᠷ ᠥᠴᠦᠬᠡᠨ ᠲᠡᠳᠦᠢ ᠣᠷᠣᠮᠠᠭᠴᠠ ᠂ ᠰᠠᠭᠤᠯᠠᠭᠠ ᠳᠦᠭᠦᠷᠡᠩ ᠴᠠᠭᠠᠨ ᠰᠦᠨ ᠨᠡᠢᠲᠡ ᠪᠡᠷ ᠴᠥᠮ ᠴᠠᠭ ᠤ᠋ᠨ ᠬᠣᠣᠷᠠ ᠬᠤᠪᠢᠯᠤᠮᠤᠢ ᠬᠡᠮᠡᠭᠴᠢ ᠴᠢᠪ ᠭᠡᠮᠡᠨ ᠡᠭᠦᠨ ᠢ᠋ ᠬᠡᠯᠡᠭᠰᠡᠨ ᠢᠨᠣ ᠪᠤᠶᠤ ᠃ ᠡᠨᠡ ᠦᠭᠡᠰ ᠢ᠋ ᠬᠡᠯᠡᠭᠰᠡᠨ ᠬᠥᠮᠦᠨ ᠦ᠌ ᠲᠤᠬᠠᠢ ᠪᠡᠶᠡ ᠴᠦ᠍ ᠬᠣᠭᠣᠰᠣᠨ ᠴᠢᠨᠠᠷ ᠢ᠋ ᠣᠯᠤᠭᠠᠳᠤᠢ ᠶ᠋ᠢ ᠮᠥᠨ ᠦᠭᠡᠰ ᠢ᠋ᠶ᠋ᠡᠷ ᠢᠨᠣ ᠨᠡᠪᠲᠡ ᠣᠯᠵᠤ ᠮᠡᠳᠡᠪᠡᠢ ᠃ ᠠᠯᠢ ᠦᠭᠡᠰ ᠲᠣᠷ ᠭᠠᠷᠪᠠ ? ᠬᠡᠮᠡᠪᠡᠰᠦ ᠄ ᠬᠣᠭᠣᠰᠣᠨ ᠴᠢᠨᠠᠷ ᠬᠡᠮᠡᠭᠰᠡᠨ ᠦᠭᠡᠰ ᠲᠣᠷ ᠳᠡᠭᠦᠨᠦ ᠪᠡᠶᠡ ᠣᠯᠤᠭᠠᠳᠤᠢ ᠲᠤᠯᠠ ᠪᠤᠰᠤᠳ ᠤ᠋ᠨ ᠣᠯᠤᠭᠠᠳᠤᠢ ᠶ᠋ᠢ ᠠᠨᠤ ᠬᠠᠢᠷᠠᠯᠠᠭᠰᠠᠨ ᠢ᠋ᠶ᠋ᠠᠷ ᠠᠨᠤ ᠳᠠᠷᠤᠢ ᠣᠯᠵᠤ ᠮᠡᠳᠡᠪᠡᠢ ᠃ ᠡᠪᠡᠦ ! ᠦᠨᠡᠬᠡᠷ ᠶᠠᠭᠤᠲᠠᠢ ᠭᠦᠨ ᠪᠣᠢ ! ᠦᠨᠡᠬᠡᠷ ᠶᠠᠭᠤᠲᠠᠢ ᠴᠤ᠌ ᠬᠣᠯᠠ ᠠᠵᠠᠢ ? ᠡᠭᠦᠨ ᠳ᠋ᠦ᠍ᠷ ᠴᠢᠪ ᠴᠢᠬᠡ ᠨᠢᠭᠡᠨ ᠢᠨᠢᠶᠡᠳᠦᠮ ᠦᠯᠢᠭᠡᠷ ᠰᠠᠨᠠᠭᠠᠯᠵᠠᠪᠠᠢ᠃ ᠡᠷᠲᠡ ᠵᠡᠷᠭᠡᠴᠡᠭᠡ ᠬᠣᠶᠠᠷ ᠭᠡᠷᠦᠨ ᠡᠵᠡᠨ ᠴᠥᠮ ᠡᠮᠡ ᠡᠴᠡᠭᠡᠨ ᠠᠶᠤᠮᠤᠢ᠃ ᠨᠢᠭᠡᠨ ᠡᠳᠦᠷ ᠵᠡᠭᠦᠨ ᠭᠡᠷ ᠦ᠋ᠨ ᠡᠵᠡᠨ ᠢᠨᠣ ᠡᠮᠡ ᠶ᠋ᠢᠨ ᠰᠢᠭᠡᠰᠦ ᠶ᠋ᠢ ᠣᠷᠣᠢ ᠭᠡᠭᠡᠵᠦ ᠵᠠᠨᠴᠢᠭᠳᠠᠭᠠᠳ ᠡᠭᠦᠳᠡᠨ ᠦ᠌ ᠭᠠᠳᠠᠨᠠ ᠪᠠᠨ ᠤᠬᠢᠯᠠᠵᠤ ᠰᠠᠭᠤᠬᠤᠶᠠ᠂ ᠪᠠᠷᠠᠭᠤᠨ ᠭᠡᠷᠦᠨ ᠡᠵᠡᠨ ᠦᠵᠡᠭᠡᠳ ᠤᠴᠢᠷ ᠢ᠋ ᠠᠰᠠᠭᠤᠭᠰᠠᠨᠠ ᠵᠡᠭᠦᠨ ᠭᠡᠷ ᠡᠵᠡᠨ ᠪᠡᠷ ᠶᠡᠬᠡᠳᠡ ᠡᠮᠭᠡᠨᠢᠨ ᠥᠴᠦᠬᠡᠨ ᠣᠰᠣᠯᠳᠠᠭᠰᠠᠨ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠪᠠᠷᠠᠭᠤᠨ ᠭᠡᠷ ᠦ᠋ᠨ ᠡᠵᠡᠨ ᠶᠡᠬᠡᠳᠡ ᠬᠢᠯᠢᠩᠯᠡᠨ᠄《ᠠᠶᠠ ᠪᠢ ᠴᠦ᠍ ᠪᠣᠯᠣᠰᠠ ᠠ᠋ ᠁ 》ᠬᠡᠮᠡᠬᠦ ᠦᠭᠡ ᠰᠠᠶᠢ ᠳᠠᠭᠤᠰᠲᠠᠯᠠ᠂ ᠳᠡᠭᠦᠨᠦ ᠡᠮᠡ ᠢᠨᠤ ᠰᠢᠯᠡᠭᠡᠪᠦᠷ ᠪᠠᠷᠢᠨ ᠭᠠᠷᠴᠤ ᠢᠷᠡᠭᠡᠳ ᠳᠠᠷᠤᠢ ᠵᠠᠩᠳᠠᠨ ᠠᠰᠠᠭᠤᠷᠤᠨ᠄
《 ᠴᠢ ᠪᠣᠯᠪᠠᠰᠤ ᠬᠡᠷᠬᠢᠮ ? 》ᠬᠡᠮᠡᠭᠰᠡᠨ ᠳ᠋ᠤᠷ ᠲᠡᠷᠡ ᠡᠷᠡ ᠡᠷᠭᠢᠵᠦ ᠦᠵᠡᠭᠡᠳ᠂ ᠰᠦᠨᠡᠰᠦᠨ ᠵᠠᠪᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠦᠯᠦ ᠮᠡᠳᠡᠭᠳᠡᠨ ᠶᠡᠬᠡ ᠪᠠᠢᠷᠢ ᠭᠠᠷᠭᠠᠨ᠂ ᠨᠢᠷᠤᠭᠤ ᠪᠠᠨ ᠡᠭᠦᠷᠦᠨ ᠶᠡᠬᠡᠯᠡ ᠪᠠᠭᠠᠲᠤᠷᠯᠠᠨ ᠴᠢᠨᠠᠭᠰᠢ ᠬᠠᠨᠳᠤᠭᠰᠠᠭᠠᠷ ᠮᠠᠰᠢ ᠢᠨᠴᠢᠷᠠᠭ᠋ ᠲᠠᠢ ᠳᠠᠭᠤᠨ ᠢ᠋ᠶ᠋ᠠᠷ ᠲᠣᠰᠴᠤ ᠬᠠᠷᠢᠭᠤ ᠥᠭᠦᠯᠡᠷᠦᠨ :
《 ᠪᠢ ᠤᠤ ? ᠪᠢ ᠪᠣᠯᠪᠠᠰᠤ ᠲᠡᠷᠡ ᠰᠢᠭᠡᠰᠦ ᠶ᠋ᠢ ᠬᠡᠳᠦᠢᠨᠡᠢ ᠠᠪᠠᠴᠢᠵᠤ ᠭᠡᠭᠡᠭᠰᠡᠨ ᠪᠣᠯᠠᠢ 》ᠬᠡᠮᠡᠪᠡ᠃ ᠦᠯᠢᠭᠡᠷ ᠲᠡᠭᠦᠨᠴᠢᠯᠡᠨ ᠬᠦ᠌ ᠡᠨᠡ ᠬᠦ᠌ ᠪᠤᠰᠤᠳ ᠤ᠋ᠨ ᠰᠡᠴᠡᠨ ᠭᠡᠭᠡᠬᠡᠨ ᠢ᠋ ᠬᠠᠢᠷᠠᠯᠠᠨ᠂ ᠬᠣᠭᠣᠰᠣᠨ ᠴᠢᠨᠠᠷᠠ ᠪᠠᠬᠠᠷᠬᠠᠭᠰᠠᠨ ᠡᠷᠳᠡᠮᠲᠦ ᠴᠣᠷᠵᠢ ᠪᠠᠭᠰᠢ ᠬᠢᠭᠡᠳ ᠲᠡᠷᠡ ᠬᠦ᠌ ᠪᠠᠷᠠᠭᠤᠨ ᠭᠡᠷ ᠦ᠋ᠨ ᠡᠵᠡᠨ ᠪᠠᠭᠠᠲᠤᠷ ᠡᠷᠡ ᠬᠣᠶᠠᠭᠤᠯᠠ ᠶ᠋ᠢᠨ ᠡᠷᠳᠡᠮ ᠪᠢᠯᠢᠭ ᠦ᠋ᠨ ᠬᠤᠷᠳᠤᠨ ᠬᠤᠷᠴᠠ ᠠᠨᠤ ᠠᠷᠤ ᠥᠪᠥᠷ ᠪᠠ ᠵᠥᠪ ᠪᠤᠷᠤᠭᠤ ᠪᠠᠷ ᠶᠠᠭᠤᠲᠠᠢ ᠴᠤ᠌ ᠠᠳᠠᠯᠢᠰᠢᠭ ᠠᠵᠠᠢ ? ᠡᠢᠮᠦ ᠵᠠᠩᠲᠤ ᠮᠡᠷᠭᠡᠳ ᠡᠷᠳᠡᠮᠲᠡᠨ ᠢ ᠰᠤᠳᠤᠷᠴᠢ ᠪᠢ ᠲᠠᠪᠢᠨ ᠨᠠᠰᠤᠯᠠᠲᠠᠯᠠ ᠲᠣᠭᠠ ᠦᠭᠡᠢ ᠣᠯᠠᠨ ᠦᠵᠡᠵᠦ ᠭᠠᠢᠬᠠᠭᠰᠠᠨ ᠠᠨᠤ ᠬᠢᠵᠠᠭᠠᠯᠠᠰᠢ ᠦᠭᠡᠢ᠃