ᠠᠳᠤᠭᠤᠴᠢᠨ ᠫᠧᠷᠯᠠᠢ ᠶᠢᠨ ᠭᠠᠢᠬᠠᠮᠰᠢᠭᠲᠤ ᠦᠯᠢᠭᠡᠷ-ᠮᠠᠨᠳᠤᠯᠠАдуучин пэрлэйн гайхамшигт үлгэр-Мандлаа
1155
ᠮᠠᠨᠳᠤᠯᠠ
ᠠᠷᠤ ᠬᠣᠷᠴᠢᠨ ᠬᠤᠰᠢᠭᠤᠨ ᠤ᠋ ᠣᠳᠣ ᠶ᠋ᠢᠨ ᠪᠠᠶᠠᠠᠠᠦ᠋ᠨᠳᠦᠷ ᠰᠤᠮᠤ ᠪᠠᠷ ᠭᠣᠣᠯ ᠪᠣᠯᠭᠠᠭᠰᠠᠨ ᠨᠢᠭᠡ ᠬᠡᠰᠡᠭ ᠭᠠᠵᠠᠷ ᠢ᠋ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠠᠷᠪᠠᠨ ᠰᠤᠮᠤ ᠭᠤᠷᠪᠠᠨ ᠭᠣᠣᠯ ᠭᠡᠵᠦ ᠳᠠᠭᠤᠳᠠᠵᠤ ᠪᠠᠢᠭᠰᠠᠨ ᠶᠤᠮ᠃ ᠡᠨᠡᠬᠦ ᠠᠷᠪᠠᠨ ᠰᠤᠮᠤ ᠭᠤᠷᠪᠠᠨ ᠭᠣᠣᠯ ᠪᠣᠯ ᠪᠠᠶᠠᠨᠵᠢᠷᠦᠬᠡ᠂ ᠭᠥᠯᠢᠭᠡᠷ᠂ ᠭᠣᠭᠣᠰᠤᠲᠠᠢ ᠭᠤᠷᠪᠠᠨ ᠶᠡᠬᠡ ᠬᠠᠨ ᠠᠭᠤᠯᠠ ᠶ᠋ᠢ ᠲᠦᠰᠢᠵᠦ᠂ ᠬᠣᠭᠣᠯᠠᠲᠤ᠂ ᠬᠠᠬᠢᠷ᠂ ᠰᠦᠵᠢ ᠶ᠋ᠢᠨ ᠭᠤᠷᠪᠠᠨ ᠭᠣᠣᠯ ᠢ᠋ ᠳ᠋ᠡᠭᠡᠨ ᠨᠡᠭᠦᠳᠡᠯᠯᠡᠨ ᠮᠠᠯᠵᠢᠵᠤ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠨᠢᠭᠡ ᠪᠦᠯᠦᠭ ᠬᠥᠮᠦᠰ ᠢ᠋ ᠬᠡᠯᠡᠳᠡᠭ᠃ ᠡᠨᠡ ᠨᠤᠲᠤᠭ ᠲᠤ᠌ ᠢᠷᠡᠭᠡᠳ ᠭᠤᠷᠪᠠᠨ ᠵᠠᠭᠤ ᠢᠯᠡᠭᠦᠦ ᠵᠢᠯ ᠪᠣᠯᠵᠤ ᠪᠠᠢᠨᠠ᠃ ᠣᠨ ᠤ᠋ ᠲᠡᠦᠬᠡ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠡᠨᠡ ᠨᠤᠲᠤᠭ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠳᠤᠮᠳᠠ ᠦᠨᠡᠨ ᠤᠴᠢᠷ ᠢ᠋ᠶ᠋ᠠᠷ ᠰᠡᠳᠦᠪᠯᠡᠭᠰᠡᠨ ᠦᠯᠢᠭᠡᠷ ᠣᠯᠠᠨ ᠪᠠᠢᠳᠠᠭ᠃ ᠳᠠᠷᠠᠭᠠᠬᠢ ᠪᠣᠯ ᠳᠡᠭᠡᠷᠡ ᠵᠠᠭᠤᠨ ᠤ᠋ ᠵᠢᠷᠠᠭᠠᠳ ᠣᠨ ᠤ᠋ ᠦᠶᠡ ᠳ᠋ᠦ᠍ ᠭᠠᠷᠤᠭᠰᠠᠨ ᠦᠯᠢᠭᠡᠷ ᠶᠦᠮ᠃
ᠵᠠᠷᠤᠳ ᠤᠷᠢᠶᠠᠩᠬᠠᠢ ᠠᠢᠮᠠᠭ ᠤ᠋ᠨ ᠫᠧᠷᠯᠡᠢ (1942.12.28 -2014.5.21) ᠪᠣᠯ ᠠᠷᠤ ᠬᠣᠷᠴᠢᠨ ᠬᠤᠰᠢᠭᠤᠨ ᠤ᠋ ᠪᠠᠶᠠᠠᠠᠦ᠋ᠨᠳᠦᠷ ᠰᠤᠮᠤ ᠶ᠋ᠢᠨ ᠰᠢᠪᠠᠷᠲᠠᠢ ᠭᠠᠴᠠᠭᠠ ᠶ᠋ᠢᠨ ᠴᠠᠭᠠᠡᠡᠷᠬᠢ ᠳᠤᠭᠤᠢᠯᠠᠩ ᠤ᠋ᠨ ᠬᠥᠮᠦᠨ᠃ ᠬᠣᠷᠢᠨ ᠨᠢᠭᠡᠲᠡᠢ ᠡᠴᠡ ᠪᠡᠨ ᠡᠬᠢᠯᠡᠵᠦ ᠪᠠᠷᠢᠭᠠᠳᠠ ᠶ᠋ᠢᠨ ᠠᠳᠤᠭᠤ ᠶ᠋ᠢ ᠬᠠᠷᠢᠭᠤᠯᠵᠤ᠂ ᠠᠷᠪᠠᠨ ᠵᠢᠯ ᠦᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠨᠢᠭᠡ ᠵᠠᠭᠤ ᠢᠯᠡᠭᠦᠦ ᠪᠠᠢᠭᠰᠠᠨ ᠠ᠋ᠴᠠ ᠳᠥᠷᠪᠡᠨ ᠵᠠᠭᠤ ᠢᠯᠡᠭᠦᠦ ᠪᠣᠯᠭᠠᠵᠤ ᠥᠰᠬᠡᠪᠡ᠃ ᠠᠳᠤᠭᠤᠴᠢᠨ ᠡᠴᠡ ᠪᠡᠨ ᠵᠠᠯᠠᠭᠤ ᠠᠳᠤᠭᠤᠨ ᠬᠡᠭᠡᠯᠲᠦᠯᠭᠡ ᠶ᠋ᠢᠨ ᠮᠡᠷᠭᠡᠵᠢᠯᠲᠡᠨ ᠪᠣᠯᠵᠤ᠂ ᠴᠠᠪ ᠤ᠋ᠨ ᠬᠣᠩᠰᠢᠶᠠᠷ ᠤ᠋ᠨ ᠬᠡᠭᠡᠯᠲᠦᠯᠭᠡ ᠳ᠋ᠦ᠍ ᠳᠠᠷᠤᠭᠠ᠂ ᠮᠡᠷᠭᠡᠵᠢᠯᠲᠡᠨ ᠢ᠋ᠶ᠋ᠡᠷ ᠠᠵᠢᠯᠯᠠᠵᠤ᠂ ᠪᠠᠶᠠᠠᠠᠦ᠋ᠨᠳᠦᠷ ᠭᠦᠩᠱᠧ ᠶ᠋ᠢᠨ ᠵᠡᠭᠦᠨ ᠭᠣᠣᠯ ᠤ᠋ᠨ ᠲᠠᠪᠤᠨ ᠶᠡᠬᠡ ᠪᠠᠷᠢᠭᠠᠳᠠ ᠶ᠋ᠢᠨ ᠠᠳᠤᠭᠤ ᠶ᠋ᠢ ᠲᠥᠪᠯᠡᠷᠡᠭᠦᠯᠵᠦ ᠬᠡᠭᠡᠯᠲᠦᠯᠭᠡ ᠬᠢᠵᠦ ᠪᠠᠢᠪᠠ᠃ ᠠᠳᠤᠭᠤᠨ ᠬᠡᠭᠡᠯᠲᠦᠯᠭᠡ ᠶ᠋ᠢᠨ ᠬᠡᠭᠡᠯ ᠲᠣᠭᠲᠠᠭᠰᠠᠨ ᠨᠣᠷᠮᠠ ᠨᠢ 90% ᠠ᠋ᠴᠠ ᠳᠡᠭᠡᠭᠰᠢ ᠪᠣᠯᠵᠤ᠂ ᠲᠤᠬᠠᠢ ᠶ᠋ᠢᠨ ᠦᠭᠡ ᠶ᠋ᠢᠨ ᠯᠢᠶᠣᠤᠨᠢᠩ ᠮᠣᠵᠢ ᠳ᠋ᠤ᠌ ᠲᠤᠷᠰᠢᠯᠭᠠ ᠶ᠋ᠢ ᠨᠢ ᠲᠠᠨᠢᠯᠴᠠᠭᠤᠯᠵᠤ᠂ ᠵᠣᠣ ᠤᠳᠠ ᠶ᠋ᠢᠨ ᠰᠣᠨᠢᠨ ᠳᠡᠭᠡᠷᠡ《ᠰᠦᠵᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠳᠡᠨᠵᠢᠨ ᠳ᠋ᠡᠬᠢ ᠰᠠᠢᠨ ᠡᠭᠦᠯᠳᠡᠷ ᠦ᠋ᠨ ᠠᠳᠤᠭᠤᠨ ᠰᠦᠷᠦᠭ》ᠭᠡᠰᠡᠨ ᠲᠤᠰᠬᠠᠢ ᠮᠡᠳᠡᠭᠡᠯᠡᠯ ᠭᠠᠷᠴᠤ ᠪᠠᠢᠭᠰᠠᠨ ᠶᠤᠮ᠃
1974ᠣᠨ ᠳ᠋ᠤ᠌ ᠪᠠᠶᠠᠠᠠᠦ᠋ᠨᠳᠦᠷ ᠭᠦᠩᠱᠧ ᠶ᠋ᠢᠨ ᠮᠠᠯ ᠡᠮᠨᠡᠯᠭᠡ ᠶ᠋ᠢᠨ ᠥᠷᠲᠡᠭᠡᠨ ᠳ᠋ᠦ᠍ ᠢᠷᠡᠵᠦ ᠠᠵᠢᠯᠯᠠᠵᠠᠢ᠃ ᠲᠡᠷᠡ ᠪᠣᠯ ᠬᠡᠭᠡᠯᠲᠦᠯᠭᠡ ᠶ᠋ᠢᠨ ᠰᠠᠢᠨ ᠮᠡᠷᠭᠡᠵᠢᠯᠲᠡᠨ᠂ ᠮᠠᠯ ᠤ᠋ᠨ ᠰᠠᠢᠨ ᠡᠮᠴᠢ ᠪᠡᠷ ᠪᠠᠷᠠᠬᠤ ᠦᠭᠡᠢ ᠵᠢᠷᠣᠭᠠ ᠮᠣᠷᠢ ᠰᠠᠢᠨ ᠤᠨᠤᠳᠠᠭ ᠨᠡᠷᠡᠲᠡᠢ ᠤᠶᠠᠭᠠᠴᠢ ᠶᠤᠮ᠃
1975ᠣᠨ ᠤ᠋ ᠬᠤᠰᠢᠭᠤᠨ ᠨᠠᠢᠷ ᠲᠤ᠌ ᠭᠦᠩᠱᠧ ᠶ᠋ᠢᠨ ᠨᠤᠯᠭᠠᠷ ᠡᠷᠬᠢᠯᠡᠭᠴᠢ ᠶ᠋ᠢᠨ ᠪᠣᠷᠣ ᠠᠯᠠᠭ ᠮᠣᠷᠢ ᠶ᠋ᠢ ᠤᠶᠠᠵᠤ ᠤᠨᠤᠭᠠᠳ ᠲᠡᠷᠢᠭᠦᠯᠡᠪᠡ᠃ ᠲᠡᠭᠦᠨ ᠦ᠌ ᠦᠵᠡᠵᠦ ᠲᠠᠨᠢᠭᠠᠳ ᠠᠪᠴᠤ ᠤᠨᠤᠵᠤ ᠪᠠᠢᠭᠰᠠᠨ ᠰᠡᠷᠡᠩ ᠦᠨ ᠬᠡᠭᠡᠷ᠂ ᠪᠣᠷᠣ ᠬᠣᠩᠰᠢᠶᠠᠷ ᠤ᠋ᠨ ᠪᠤᠭᠤᠷᠤᠯ᠂ ᠴᠠᠭᠠᠨ ᠡᠷᠭᠢ ᠶᠢᠨ ᠰᠠᠭᠠᠷᠠᠯ ᠮᠣᠷᠢ ᠪᠣᠯ ᠪᠦᠷ ᠬᠣᠰᠢᠭᠤ ᠰᠤᠮᠤᠨ ᠤ᠋ ᠨᠠᠢᠷ ᠲᠤ᠌ ᠱᠠᠩ ᠢᠳᠡᠵᠦ ᠪᠠᠢᠭᠰᠠᠨ ᠰᠠᠢᠨ ᠵᠢᠷᠣᠭᠠ ᠮᠣᠷᠢ ᠪᠣᠯᠤᠭᠰᠠᠨ ᠶᠤᠮ᠃
1982ᠣᠨ ᠳ᠋ᠤ᠌ ᠠᠵᠢᠯ ᠠ᠋ᠴᠠ ᠪᠠᠨ ᠤᠷᠢᠳᠴᠢᠯᠠᠨ ᠠᠮᠠᠷᠠᠵᠤ᠂ ᠨᠤᠲᠤᠭ ᠲᠠᠭᠠᠨ ᠦᠳᠡᠯᠦᠭᠡ ᠨᠠᠰᠤ ᠪᠠᠨ ᠥᠩᠭᠡᠷᠡᠭᠦᠯᠦᠭᠰᠡᠨ ᠪᠠᠢᠨᠠ᠃
ᠨᠢᠭᠡ᠂ ᠤᠷᠭᠠᠨ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠤᠷᠠᠨ ᠠᠷᠭᠠ ᠬᠡᠷᠡᠭᠯᠡᠵᠦ ᠣᠷᠣᠭᠠ ᠮᠣᠷᠢ ᠪᠠᠷᠢᠭᠰᠠᠨ ᠨᠢ
ᠳᠡᠭᠡᠷᠡ ᠵᠠᠭᠤᠨ ᠤ᠋ ᠵᠢᠷᠠᠭᠠᠳ ᠣᠨ ᠳ᠋ᠤ᠌ ᠪᠠᠶᠠᠠᠠᠦ᠋ᠨᠳᠦᠷ ᠭᠦᠩᠱᠧ ᠶ᠋ᠢᠨ ᠰᠢᠪᠠᠷᠲᠠᠢ ᠪᠠᠷᠢᠭᠠᠳᠠ ᠨᠢ ᠰᠢᠨᠠ᠂ ᠴᠠᠭᠠᠡᠡᠷᠬᠢ᠂ ᠰᠢᠪᠠᠷᠲᠠᠢ ᠭᠤᠷᠪᠠᠨ ᠪᠠᠭᠠ ᠪᠠᠷᠢᠭᠠᠳᠠ ᠲᠠᠢ ᠪᠠᠢᠪᠠ᠃ ᠰᠢᠨᠡ ᠪᠠᠷᠢᠭᠠᠳᠠ ᠶ᠋ᠢᠨ ᠠᠳᠤᠭᠤ ᠶ᠋ᠢ ᠨᠤᠷᠪᠤᠸᠠᠩᠵᠢᠯ（ᠬᠡᠷᠡᠢᠳ ᠠᠢᠮᠠᠭ ᠤ᠋ᠨ ᠬᠠᠰᠢᠷ ᠠᠳᠤᠭᠤᠴᠢᠨ᠂ ᠠᠢᠯ ᠭᠣᠣᠯ ᠤ᠋ᠨ ᠬᠢᠨᠢ ᠬᠦᠨᠳᠦᠳᠬᠡᠭᠡᠳ ᠸᠠᠩ ᠠᠪᠤ ᠯᠠ ᠭᠡᠳᠡᠭ）᠂ ᠴᠠᠭᠠᠡᠡᠷᠬᠢ ᠪᠠᠷᠢᠭᠠᠳᠠ ᠶ᠋ᠢᠨ ᠠᠳᠤᠭᠤ ᠶ᠋ᠢ ᠫᠧᠷᠯᠡᠢ᠂ ᠰᠢᠪᠠᠷᠲᠠᠢ ᠪᠠᠷᠢᠭᠠᠳᠠ ᠶ᠋ᠢᠨ ᠠᠳᠤᠭᠤ ᠶ᠋ᠢ ᠰᠠᠮᠪᠠᠯ（ᠵᠤᠭᠠᠴᠢᠨ ᠠᠢᠮᠠᠭ ᠤ᠋ᠨ ᠨᠡᠷᠡᠲᠡᠢ ᠠᠳᠤᠭᠤᠴᠢᠨ᠂ ᠰᠠᠢᠨ ᠤᠶᠠᠭᠠᠴᠢ᠂ ᠪᠠᠭᠠ ᠳ᠋ᠠᠭᠠᠨ ᠰᠦᠮᠡ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠠ ᠰᠢᠪᠠᠷᠲᠠᠢ ᠶᠡᠬᠡ ᠪᠠᠷᠢᠭᠠᠳᠠ ᠳ᠋ᠤ᠌ ᠰᠠᠮᠪᠠᠯ ᠭᠡᠰᠡᠨ ᠨᠡᠷᠡᠲᠡᠢ ᠬᠥᠮᠦᠨ ᠠᠷᠪᠢᠨ ᠪᠠᠢᠭᠰᠠᠨ ᠲᠤᠯᠠ ᠠᠢᠯ ᠭᠣᠣᠯ ᠤ᠋ᠨ ᠬᠢᠨᠢ ᠰᠠᠮᠪᠠᠯ ᠮᠠᠮᠠ ᠭᠡᠵᠦ ᠬᠦᠨᠳᠦᠳᠬᠡᠨ ᠳᠠᠭᠤᠳᠠᠳᠠᠭ） ᠲᠤᠰ ᠲᠤᠰ ᠬᠠᠷᠢᠭᠤᠯᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠡᠭᠦᠯᠡᠷ ᠨᠢ ᠨᠡᠢᠯᠡᠭᠦᠯᠵᠦ ᠬᠠᠮᠲᠤ ᠳ᠋ᠤᠨᠢ ᠬᠠᠷᠢᠭᠤᠯᠵᠤ ᠪᠠᠢᠵᠠᠢ᠃
1963 ᠣᠨ ᠤ᠋ ᠡᠪᠦᠯ ᠦᠨ ᠰᠡᠭᠦᠯ ᠰᠠᠷᠠ ᠳ᠋ᠤ᠌ ᠰᠢᠪᠠᠷᠲᠠᠢ ᠪᠠᠷᠢᠭᠠᠳᠠ ᠶ᠋ᠢᠨ ᠨᠢᠭᠲᠠᠯᠠᠨ ᠪᠣᠳᠣᠭᠴᠢ ᠣᠮᠨᠠᠷ ᠤ᠋ᠨ ᠷᠠᠰᠢᠰᠠᠩᠪᠤᠤ ᠬᠡᠭᠡᠷ ᠮᠣᠷᠢ ᠪᠠᠨ ᠪᠠᠷᠢᠭᠤᠯᠬᠤ ᠪᠠᠷ ᠰᠠᠮᠪᠠᠯ᠂ ᠨᠤᠷᠪᠤᠸᠠᠩᠵᠢᠯ ᠬᠣᠶᠠᠷ ᠠᠬᠠᠮᠠᠳ ᠠᠳᠤᠭᠤᠴᠢᠨ ᠢ᠋ ᠭᠤᠶᠤᠭᠰᠠᠨ ᠳ᠋ᠤ᠌ ᠬᠣᠶᠠᠷ ᠡᠪᠦᠭᠡᠨ ᠬᠡᠳᠦᠨ ᠡᠳᠦᠷ ᠠᠳᠤᠭᠤ ᠪᠥᠭᠡᠮᠨᠡᠵᠦ ᠪᠠᠷᠢᠬᠤ ᠭᠡᠳ ᠶᠠᠭ ᠳᠡᠢᠯᠦᠭᠰᠡᠨ ᠦᠭᠡᠢ᠃ ᠤᠴᠢᠷ ᠨᠢ ᠡᠨᠡ ᠬᠡᠭᠡᠷ ᠮᠣᠷᠢ ᠪᠣᠯ ᠶᠡᠬᠡ ᠣᠷᠣᠭᠠ᠂ ᠠᠳᠤᠭᠤ ᠬᠤᠷᠢᠶᠠᠵᠤ ᠡᠬᠢᠯᠡᠭᠰᠡᠭᠡᠷ ᠯᠡ ᠰᠡᠪ ᠠᠪᠴᠤ ᠰᠦᠷᠦᠭ ᠡᠴᠡ ᠪᠡᠨ ᠳᠤᠲᠠᠭᠠᠴᠢᠬᠠᠨᠠ᠃ ᠢᠩᠭᠢᠭᠡᠳ ᠪᠢᠲᠡᠭᠦᠨ ᠪᠣᠯᠲᠠᠯᠠ ᠬᠥᠭᠡᠭᠡᠴᠡᠯᠳᠦᠭᠡᠳ ᠪᠠᠷᠢᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ ᠠᠷᠭᠠ ᠠᠯᠳᠠᠷᠠᠵᠤ ᠨᠥᠭᠦᠭᠡ ᠨᠢᠭᠡ ᠠᠳᠤᠭᠤᠴᠢᠨ ᠫᠧᠷᠯᠡᠢ ᠶ᠋ᠢ ᠡᠷᠢᠵᠦ ᠣᠴᠢᠵᠤ ᠭᠡᠨᠡ᠃ ᠫᠧᠷᠯᠡᠢ᠄《ᠴᠢ ᠡᠷᠲᠡ ᠨᠠᠳᠠ ᠳ᠋ᠤ᠌ ᠬᠡᠯᠡᠭᠰᠡᠨ ᠪᠣᠯ ᠪᠢ ᠪᠠᠷᠢᠭᠠᠳ ᠥᠭᠴᠢᠬᠡᠬᠦ ᠦᠭᠡᠢ ᠤᠤ ᠳᠠ》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ᠨᠢ ᠷᠠᠰᠢᠰᠠᠩᠪᠤᠤ ᠬᠠᠷᠢᠭᠤ ᠳ᠋ᠤᠨᠢ᠄《ᠰᠠᠮᠪᠠᠯ ᠮᠠᠮᠠ ᠪᠠᠢᠲᠠᠯᠠ ᠪᠢ ᠶᠠᠭᠠᠬᠢᠵᠤ ᠤᠷᠢᠳᠠᠪᠡᠷ ᠴᠢᠮᠠ ᠶ᠋ᠢ ᠡᠷᠢᠨᠡ ᠳ᠋ᠠ》ᠭᠡᠳ ᠳᠠᠬᠢᠨ ᠮᠣᠷᠢ ᠪᠠᠨ ᠪᠠᠷᠢᠭᠤᠯᠬᠤ ᠪᠠᠷ ᠭᠤᠶᠤᠭᠰᠠᠨ ᠳ᠋ᠤ᠌᠄《ᠵᠠ᠂ ᠲᠡᠭᠡᠪᠡᠯ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠲᠤ᠌ ᠮᠣᠷᠢ ᠶ᠋ᠢ ᠴᠢᠨᠢ ᠠᠪᠴᠢᠷᠠᠵᠤ ᠥᠭᠭᠦᠶᠡ》ᠭᠡᠵᠦ ᠪᠠᠲᠤᠯᠠᠭᠠ ᠲᠠᠢ ᠬᠡᠯᠡᠵᠦ ᠪᠤᠴᠠᠭᠠᠵᠠᠢ᠃
ᠫᠧᠷᠯᠡᠢ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠤ᠋ᠨ ᠰᠠᠢᠨ ᠡᠳᠦᠷ ᠰᠢᠨᠡ ᠨᠢᠭᠡ ᠵᠢᠯ ᠦᠨ ᠠᠵᠢᠯ ᠢ᠋ᠶ᠋ᠠᠨ ᠡᠭᠦᠰᠬᠡᠬᠦ ᠶ᠋ᠢᠨ ᠵᠡᠷᠭᠡᠪᠡᠷ ᠣᠷᠣᠭᠠ ᠬᠡᠭᠡᠷ ᠮᠣᠷᠢ ᠶ᠋ᠢ ᠪᠠᠷᠢᠬᠤ ᠪᠠᠷ ᠵᠢᠭᠠᠬᠠᠨ ᠬᠣᠯᠠ ᠮᠣᠷᠢ ᠪᠠᠨ ᠤᠨᠤᠵᠤ ᠡᠷᠲᠡᠯᠡᠨ ᠠᠳᠤᠭᠤᠨ ᠳ᠋ᠠᠭᠠᠨ ᠭᠠᠷᠴᠠᠢ᠃ ᠪᠢᠲᠡᠭᠦᠨ ᠦ᠌ ᠡᠳᠦᠷ ᠦᠨ ᠵᠠᠯᠠᠭᠰᠠᠨ ᠠᠳᠤᠭᠤ ᠰᠢᠪᠠᠷᠲᠠᠢ ᠶ᠋ᠢᠨ ᠬᠥᠨᠳᠡᠢ ᠶ᠋ᠢᠨ ᠡᠬᠢ᠂ ᠨᠠᠷᠢᠨ ᠵᠢᠯᠠᠭᠠ᠂ ᠬᠠᠢᠯᠠᠰᠤᠲᠠᠢ ᠶᠢᠨ ᠳᠠᠪᠠᠭᠠ ᠣᠷᠴᠢᠮ ᠪᠡᠯᠴᠢᠭᠡᠷ ᠲᠡᠭᠡᠨ ᠪᠠᠢᠪᠠ᠃ ᠫᠧᠷᠯᠡᠢ ᠠᠳᠤᠭᠤ ᠪᠠᠨ ᠬᠤᠷᠢᠶᠠᠵᠤ ᠢᠩ ᠦᠨ ᠰᠤᠭᠤ ᠶ᠋ᠢᠨ ᠬᠠᠷᠠᠵᠠᠨ ᠳ᠋ᠤ᠌ ᠤᠰᠤᠯᠠᠬᠤ ᠪᠠᠷ ᠪᠠᠷᠠᠭᠤᠨᠰᠢ ᠬᠠᠢᠯᠠᠰᠤᠲᠠᠢ ᠬᠥᠨᠳᠡᠢ ᠤᠷᠤᠭᠤ ᠴᠤᠪᠤᠭᠤᠯᠪᠠ᠃ ᠠᠳᠤᠭᠤ ᠠᠵᠢᠷᠭᠠ ᠠᠵᠢᠷᠭᠠ ᠪᠠᠷ ᠠᠷᠤ ᠠᠷᠤ ᠠ᠋ᠴᠠ ᠪᠠᠨ ᠶᠠᠪᠤᠭᠰᠠᠭᠠᠷ ᠨᠢᠭᠡ ᠤᠷᠲᠤ ᠮᠥᠷ ᠪᠣᠯᠵᠤ ᠬᠥᠨᠳᠡᠢ ᠤᠷᠤᠭᠤ ᠠᠭᠠᠵᠢᠮ ᠢ᠋ᠶ᠋ᠠᠷ ᠴᠤᠪᠤᠪᠠ᠃ ᠫᠧᠷᠯᠡᠢ ᠠᠳᠤᠭᠤᠨ ᠤ᠋ ᠬᠠᠵᠠᠭᠤ ᠪᠠᠷ ᠮᠣᠷᠢᠨ ᠤ᠋ ᠴᠣᠬᠢᠭᠠ ᠪᠠᠷ ᠠᠵᠢᠭᠯᠠᠨ ᠶᠠᠪᠤᠪᠠ᠃ ᠬᠥᠨᠳᠡᠢ ᠶ᠋ᠢᠨ ᠠᠮᠠ ᠣᠢᠷᠠᠳᠬᠤ ᠳ᠋ᠤ᠌ ᠣᠷᠣᠭᠠ ᠬᠡᠭᠡᠷ ᠮᠣᠷᠢᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠵᠡᠷᠭᠡᠴᠡᠨ ᠬᠦᠷᠬᠦᠯᠡᠷ ᠶᠠᠭ ᠰᠠᠢᠬᠠᠨ ᠡᠮᠦᠨᠡ ᠨᠢ ᠬᠡᠳᠦᠨ ᠭᠡᠭᠦᠦ ᠲᠠᠭᠯᠠᠵᠤ ᠶᠠᠪᠤᠵᠤ ᠪᠠᠢᠭᠰᠠᠨ ᠲᠤᠯᠠ ᠤᠷᠭᠠ ᠪᠠᠨ ᠰᠤᠭᠤᠨ ᠳ᠋ᠠᠭᠠᠨ ᠣᠷᠣᠭᠤᠯᠵᠤ ᠠᠳᠬᠤᠭᠠᠳ ᠮᠣᠷᠢᠨ ᠵᠢᠯᠣᠭᠣ ᠪᠠᠨ ᠪᠤᠷᠤᠭᠤ ᠲᠡᠢᠰᠢ ᠳᠠᠷᠤᠵᠤ ᠳᠥᠷᠥᠭᠡ ᠬᠠᠪᠢᠷᠤᠨ ᠳᠠᠪ ᠬᠢᠲᠡᠯᠡ ᠬᠥᠳᠡᠯᠦᠮᠡᠭᠴᠡ ᠤᠷᠭᠠᠨ ᠬᠣᠯᠠ᠂ ᠣᠷᠣᠭᠠ ᠬᠡᠭᠡᠷ ᠢ᠋ ᠲᠣᠯᠣᠭᠠᠢ ᠨᠢ ᠥᠨᠳᠡᠢᠬᠦ ᠵᠠᠪ ᠦᠭᠡᠢ ᠪᠠᠬᠢᠨ ᠬᠦᠷᠦᠭᠡᠳ ᠯᠠᠪ ᠯᠠᠪᠳᠣᠭᠣᠨ ᠤᠷᠭᠠᠯᠠᠵᠤ ᠵᠠᠪᠳᠤᠯᠠ᠃ ᠮᠣᠷᠢ ᠰᠣᠴᠢᠭᠰᠠᠨ ᠢᠳᠡᠨ ᠳ᠋ᠡᠭᠡᠨ ᠭᠣᠰ ᠬᠢᠲᠡᠯᠡ ᠵᠢᠳᠬᠦᠭᠰᠡᠨ ᠪᠣᠯᠪᠠᠴᠤ ᠵᠠᠯᠠᠭᠤ ᠠᠳᠤᠭᠤᠴᠢᠨ᠂ ᠵᠢᠭᠠᠬᠠᠨ ᠬᠣᠯᠠ ᠬᠣᠶᠠᠷ ᠠ᠋ᠴᠠ ᠮᠤᠯᠲᠤᠷᠠᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ᠃ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠥᠪᠡᠷ ᠦᠨ ᠤᠨᠤᠵᠤ ᠪᠠᠢᠭᠰᠠᠨ ᠮᠣᠷᠢᠨ ᠨᠣᠭᠲᠣ ᠪᠠᠨ ᠠᠪᠴᠤ ᠬᠡᠭᠡᠷ ᠮᠣᠷᠢ ᠶ᠋ᠢ ᠨᠣᠭᠲᠣᠯᠠᠭᠠᠳ᠂ ᠠᠳᠤᠭᠤ ᠪᠠᠨ ᠤᠰᠤᠯᠠᠵᠤ ᠭᠠᠷᠭᠠᠭᠠᠳ ᠷᠠᠰᠢᠰᠠᠩᠪᠤᠤ ᠶ᠋ᠢᠨ ᠭᠡᠷ ᠲᠦ᠍ ᠨᠢ ᠠᠪᠠᠴᠢᠵᠤ ᠥᠭᠭᠦᠭᠰᠡᠨ ᠳ᠋ᠦ᠍᠄《ᠸᠠ᠂ ᠲᠠ ᠶᠠᠭ ᠨᠠᠳᠠᠳᠤ ᠪᠣᠰᠤᠭᠠ ᠮᠣᠷᠢᠨ ᠤ᠋ ᠪᠡᠯᠡᠭ ᠲᠡᠢ ᠢᠷᠡᠭᠰᠡᠨ ᠰᠢᠭ ᠪᠣᠯᠤᠯᠠ ᠳᠠ᠂ ᠪᠢ ᠡᠨᠡ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠲᠣᠭᠣᠷᠢᠯᠲᠠ ᠳ᠋ᠠᠭᠠᠨ ᠮᠣᠷᠢ ᠦᠭᠡᠢ ᠭᠡᠮᠡᠨ ᠭᠠᠴᠢᠭᠳᠠᠵᠤ ᠪᠠᠢᠭᠰᠠᠨ ᠰᠢᠦ》 ᠭᠡᠵᠦ ᠲᠠᠯᠠᠷᠬᠠᠵᠤ ᠪᠠᠶᠠᠷᠯᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠢᠯᠡᠳᠬᠡᠵᠦ ᠭᠡᠨᠡ᠃
ᠬᠣᠶᠠᠷ᠂ ᠵᠡᠷᠯᠢᠭ ᠪᠤᠭᠤ ᠤᠷᠭᠠᠯᠠᠭᠠᠳ ᠳᠥᠴᠢᠨ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠲᠣᠷᠭᠠᠭᠳᠠᠭᠰᠠᠨ ᠨᠢ
1964ᠣᠨ ᠤ᠋ ᠡᠪᠦᠯ ᠦᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠡᠳᠦᠷ ᠫᠧᠷᠯᠡᠢ ᠪᠢᠴᠢᠬᠠᠨ ᠬᠡᠭᠡᠷ ᠮᠣᠷᠢ ᠪᠠᠨ ᠤᠨᠤᠵᠤ᠂ ᠰᠠᠮᠪᠠᠯ ᠮᠠᠮᠠ ᠲᠠᠢ ᠬᠣᠶᠠᠭᠤᠯᠠ ᠪᠤᠷᠭᠠᠰᠤᠲᠠᠢ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍ ᠠᠳᠤᠭᠤᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠲᠠᠯᠠ ᠴᠠᠭᠠᠨ ᠱᠣᠷᠣᠩ ᠤ᠋ᠨ ᠡᠩᠭᠡᠷ ᠨᠢᠭᠡ ᠰᠤᠭᠤ ᠬᠡᠪᠲᠡᠵᠦ ᠪᠠᠢᠬᠤ ᠶ᠋ᠢ ᠣᠯᠵᠤ ᠦᠵᠡᠪᠡ᠃
ᠫᠧᠷᠯᠡᠢ ᠳᠣᠲᠣᠷᠠ ᠪᠠᠨ ᠡᠨᠡ ᠬᠤᠷᠳᠤᠨ ᠭᠦᠶᠦᠳᠡᠯ ᠲᠡᠢ ᠬᠡᠭᠡᠷᠡ ᠶ᠋ᠢᠨ ᠠᠷᠢᠶᠠᠲᠠᠨ ᠢ᠋ ᠲᠠᠭᠤᠵᠤ ᠦᠵᠡᠪᠡᠯ ᠶᠠᠭᠠᠬᠢᠳᠠᠭ ᠪᠣᠯ ᠭᠡᠰᠡᠨ ᠪᠣᠳᠣᠯ ᠣᠷᠣᠵᠤ ᠰᠠᠮᠪᠠᠯ ᠮᠠᠮᠠ ᠠ᠋ᠴᠠ ᠪᠠᠨ ᠡᠨᠡ ᠰᠤᠭᠤ ᠶ᠋ᠢ ᠬᠥᠭᠡᠭᠡᠵᠦ ᠦᠵᠡᠨᠡ ᠤᠤ? ᠭᠡᠵᠦ ᠵᠢᠭᠠᠪᠤᠷᠢ ᠮᠠᠶ᠋ᠢᠭ ᠲᠠᠢ ᠠᠰᠠᠭᠤᠬᠤ ᠳ᠋ᠤ᠌ ᠬᠥᠭᠡᠭᠡᠪᠡᠯ ᠬᠥᠭᠡᠭᠡᠵᠦ ᠦᠵᠡᠶᠡ ᠳᠡ᠃ ᠬᠣᠶᠠᠭᠤᠯᠠ ᠡᠭᠡᠯᠵᠢᠯᠡᠨ ᠬᠥᠭᠡᠭᠡᠶᠡ᠂ ᠴᠢ ᠤᠷᠢᠳᠠᠪᠡᠷ ᠬᠥᠭᠡᠭᠡᠳ ᠡᠷᠭᠢᠭᠦᠯᠦᠭᠡᠳ ᠢᠷᠡᠪᠡᠯ ᠪᠢ ᠲᠣᠰᠴᠤ ᠬᠥᠭᠡᠭᠡᠶᠡ ᠭᠡᠰᠡᠨ ᠳ᠋ᠦ᠍ ᠫᠧᠷᠯᠡᠢ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠥᠨᠳᠡᠢᠵᠦ᠂ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠨᠢ ᠬᠦᠷᠦᠭᠡᠳ ᠣᠴᠢᠬᠤ ᠳ᠋ᠤ᠌ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠰᠤᠭᠤ ᠣᠷᠣᠨ ᠠ᠋ᠴᠠ ᠪᠠᠨ ᠭᠣᠰ ᠦᠰᠦᠷᠦᠨ ᠪᠣᠰᠴᠤ ᠵᠡᠭᠦᠨᠰᠢ ᠬᠥᠨᠳᠡᠢ ᠤᠷᠤᠭᠤ ᠬᠡᠳᠦᠨ ᠵᠠᠩ ᠢ᠋ᠶ᠋ᠠᠷ ᠬᠠᠷᠠᠢᠨ ᠣᠷᠣᠪᠠ᠃ ᠫᠧᠷᠯᠡᠢ ᠬᠡᠭᠡᠷ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠪᠠᠶᠠᠨᠴᠠᠭᠠᠨ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠭᠠᠬᠤ ᠦᠭᠡᠢ ᠭᠡᠵᠦ ᠤᠷᠢᠳᠤ ᠲᠠᠯᠠ ᠪᠠᠷ ᠨᠢ ᠳᠣᠪᠲᠣᠯᠵᠤ ᠡᠷᠭᠢᠭᠦᠯᠦᠭᠡᠳ ᠴᠠᠭᠠᠨ ᠱᠣᠷᠣᠩ ᠥᠭᠡᠳᠡ ᠬᠥᠭᠡᠭᠡᠭᠡᠳ ᠢᠷᠡᠬᠦ ᠳ᠋ᠦ᠍ ᠰᠠᠮᠪᠠᠯ ᠮᠠᠮᠠ ᠲᠣᠰᠣᠨ ᠣᠷᠣᠵᠤ ᠪᠠᠷᠠᠭᠤᠨ ᠬᠣᠢᠰᠢ ᠦᠨᠡᠭᠡᠲᠦ ᠶ᠋ᠢᠨ ᠬᠥᠨᠳᠡᠢ ᠤᠷᠤᠭᠤ ᠠᠪᠤᠭᠠᠳ ᠣᠷᠣᠯᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠫᠧᠷᠯᠡᠢ ᠮᠣᠷᠢ ᠪᠠᠨ ᠲᠠᠲᠠᠵᠤ ᠠᠮᠢᠰᠬᠤᠭᠠ ᠶ᠋ᠢ ᠨᠢ ᠳᠠᠷᠤᠭᠠᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠣᠯᠣᠩ ᠢ᠋ᠶ᠋ᠠᠨ ᠴᠢᠩᠭᠠᠯᠠᠵᠤ ᠠᠮᠵᠢᠲᠠᠯᠠ ᠴᠠᠭᠠᠨ ᠱᠣᠷᠣᠩ ᠤ᠋ᠨ ᠠᠷᠤ ᠪᠠᠷ ᠡᠪᠦᠭᠡᠨ ᠠᠳᠠᠭᠤᠴᠢᠨ ᠰᠠᠮᠪᠠᠯ ᠰᠤᠭᠤ ᠶ᠋ᠢ ᠲᠠᠯᠪᠢᠯ ᠦᠭᠡᠢ ᠨᠡᠬᠡᠭᠰᠡᠭᠡᠷ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠭᠠᠷᠤᠭᠠᠳ ᠢᠷᠡᠪᠡ᠃ ᠫᠧᠷᠯᠡᠢ ᠵᠢᠯᠣᠭᠣ ᠰᠢᠭᠦᠷᠦᠨ ᠤᠷᠭᠠ ᠲᠤᠯᠵᠤ ᠮᠣᠷᠳᠠᠮᠠᠭᠴᠠ ᠲᠣᠰᠣᠨ ᠣᠷᠣᠬᠤ ᠳ᠋ᠤ᠌ ᠳᠡᠮᠡᠢ ᠬᠣᠯᠠ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ ᠭᠦᠢᠴᠡᠨ ᠬᠦᠷᠴᠦ ᠰᠤᠭᠤ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠤᠷᠭᠠ ᠴᠣᠬᠢᠨ ᠣᠷᠣᠭᠤᠯᠲᠠᠯᠠ ᠵᠡᠷᠯᠢᠭ ᠠᠮᠢᠲᠠᠨ ᠤ᠋ ᠵᠠᠩ ᠢ᠋ᠶ᠋ᠠᠨ ᠭᠠᠷᠭᠠᠵᠤ᠂ ᠰᠤᠭᠤ ᠤᠷᠤᠭᠰᠢ ᠨᠢᠭᠡᠯᠡ ᠦᠰᠦᠷᠴᠦ ᠵᠢᠳᠬᠦᠭᠰᠡᠨ ᠳ᠋ᠦ᠍ ᠫᠧᠷᠯᠡᠢ ᠤᠷᠢᠳᠤ ᠪᠦᠭᠦᠷᠭᠡᠨ ᠦ᠌ ᠪᠡᠨ ᠡᠮᠦᠨᠡ ᠨᠢ ᠭᠠᠷᠲᠠᠯᠠ ᠲᠠᠲᠠᠭᠳᠠᠵᠤ ᠥᠨᠳᠥᠷ ᠮᠣᠢᠯ ᠤ᠋ᠨ ᠤᠷᠭᠠᠨ ᠤ᠋ ᠪᠠᠨ ᠰᠠᠢᠨ ᠢ᠋ᠶ᠋ᠠᠷ ᠠᠷᠠᠢ ᠯᠠ ᠤᠷᠭᠠ ᠠᠯᠳᠠᠭᠰᠠᠨ ᠦᠭᠡᠢ᠂ ᠮᠣᠷᠢ ᠨᠢ ᠴᠢᠷᠮᠠᠢᠨ ᠲᠠᠪᠰᠢᠬᠤ ᠶ᠋ᠢᠨ ᠳᠡᠯᠢᠮ ᠳ᠋ᠦ᠍ ᠳᠠᠬᠢᠨ ᠡᠮᠡᠭᠡᠯ ᠦ᠋ᠨ ᠠᠷᠤ ᠳ᠋ᠤ᠌ ᠵᠠᠪᠳᠤᠨ ᠭᠠᠷᠴᠤ᠂ ᠳᠥᠷᠥᠭᠡ ᠢᠰᠬᠦᠯᠦᠨ ᠨᠢᠭᠡᠯᠡ ᠰᠠᠭᠤᠯᠭᠠᠭᠰᠠᠨ ᠴᠢᠨᠢ ᠰᠤᠭᠤ ᠵᠢᠳᠬᠦᠵᠦ ᠳᠡᠢᠯᠬᠦ ᠦᠭᠡᠢ ᠪᠣᠯᠪᠠ ᠭᠡᠨᠡ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠰᠠᠮᠪᠠᠯ ᠮᠠᠮᠠ ᠭᠦᠢᠴᠡᠨ ᠢᠷᠡᠵᠦ ᠮᠣᠷᠢᠨ ᠨᠣᠭᠲᠣ ᠪᠠᠨ ᠮᠤᠯᠲᠤᠯᠤᠨ ᠠᠪᠴᠤ᠂ ᠤᠷᠭᠠᠨ ᠪᠥᠭᠰᠡᠨ ᠳ᠋ᠡᠭᠡᠨ ᠡᠯᠭᠦᠵᠦ ᠪᠠᠢᠭᠠᠳ ᠰᠤᠭᠤ ᠶ᠋ᠢ ᠨᠣᠭᠲᠣᠯᠠᠨ ᠠᠪᠤᠭᠠᠳ᠂ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠨᠢᠭᠡ ᠨᠢ ᠴᠢᠩᠭᠠᠭᠠᠵᠤ ᠨᠥᠭᠦᠭᠡ ᠨᠢ ᠦᠷᠭᠦᠭᠡᠭᠰᠡᠭᠡᠷ ᠶᠠᠪᠤᠵᠠᠢ᠃ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠬᠥᠲᠥᠯᠦᠭᠡ ᠪᠡᠨ ᠮᠡᠳᠡᠵᠦ ᠠᠮᠠᠷᠬᠠᠨ ᠶᠠᠪᠤᠬᠤ ᠪᠣᠯᠴᠢᠬᠠᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠬᠣᠶᠠᠭᠤᠯᠠ ᠪᠠᠨ ᠣᠳᠣ ᠡᠭᠦᠨ ᠢ᠋ ᠶᠠᠭᠠᠬᠢᠨᠠ ᠭᠡᠵᠦ ᠵᠥᠪᠯᠡᠭᠡᠳ ᠪᠠᠶᠠᠠᠠᠦ᠋ᠨᠳᠦᠷ ᠭᠦᠩᠱᠧ ᠶ᠋ᠢᠨ ᠪᠤᠭᠤ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠠᠪᠠᠴᠢᠵᠤ ᠥᠭᠬᠦ ᠪᠡᠷ ᠪᠣᠯᠵᠤ᠂ ᠬᠣᠷᠢᠭᠠᠳ ᠭᠠᠵᠠᠷ ᠬᠣᠯᠠ ᠪᠠᠢᠬᠤ ᠪᠤᠭᠤ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠠᠪᠤᠭᠠᠳ ᠬᠦᠷᠬᠦ ᠳ᠋ᠦ᠍ ᠲᠠᠯᠠᠪᠠᠢ ᠶ᠋ᠢᠨ ᠬᠢᠨ ᠭᠦᠩᠱᠧ ᠶ᠋ᠢᠨ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠤ᠋ ᠸᠠᠩ ᠢ ᠮᠢᠩ ᠡᠮᠴᠢ ᠶ᠋ᠢ ᠵᠠᠯᠠᠵᠤ ᠢᠷᠡᠭᠡᠳ ᠰᠤᠭᠤ ᠶ᠋ᠢ ᠪᠠᠢᠴᠠᠭᠠᠯᠭᠠᠵᠤ᠂ ᠡᠷᠡᠭᠦᠯ ᠭᠡᠰᠡᠨ ᠢ᠋ ᠲᠣᠳᠣᠯᠠᠭᠠᠳ ᠬᠡᠷᠡᠮ ᠦ᠋ᠨ ᠳᠣᠲᠣᠷᠠ ᠪᠠᠨ ᠲᠠᠯᠪᠢᠵᠤ ᠣᠷᠣᠭᠤᠯᠵᠠᠢ᠃
ᠭᠡᠷ ᠲᠦ᠍ ᠨᠢ ᠣᠷᠣᠵᠤ ᠵᠢᠭᠠᠬᠠᠨ ᠠᠮᠤᠰᠬᠢᠨ ᠭᠠᠷᠴᠤ ᠢᠷᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠮᠣᠷᠢᠨ ᠤ᠋ ᠨᠣᠭᠲᠣ ᠪᠠᠨ ᠠᠪᠬᠤ ᠪᠠᠷ ᠪᠤᠭᠤ ᠶ᠋ᠢᠨ ᠬᠡᠷᠡᠮ ᠳᠣᠲᠣᠷᠠ ᠣᠷᠣᠵᠤ᠂ ᠰᠤᠭᠤ ᠶ᠋ᠢᠨ ᠴᠢᠷᠴᠦ ᠪᠠᠢᠭᠰᠠᠨ ᠨᠣᠭᠲᠣᠨ ᠴᠤᠯᠪᠤᠭᠤᠷ ᠠ᠋ᠴᠠ ᠪᠠᠨ ᠠᠳᠬᠤᠨ ᠠᠪᠬᠤ ᠳ᠋ᠤ᠌ ᠰᠤᠭᠤ ᠨᠠᠳᠬᠤᠵᠤ ᠬᠡᠷᠡᠮ ᠦ᠋ᠨ ᠰᠢᠷᠣᠢ ᠠᠪᠤᠭᠰᠠᠨ ᠭᠦᠨ ᠨᠦᠬᠡᠨ ᠦ᠌ ᠴᠠᠭᠠᠭᠤᠷ ᠭᠦᠶᠦᠭᠡᠳ ᠣᠷᠣᠴᠢᠬᠠᠪᠠ᠂ ᠫᠧᠷᠯᠡᠢ ᠨᠠᠭᠠᠨᠠ ᠠ᠋ᠴᠠ ᠨᠢ ᠲᠠᠲᠠᠭᠰᠠᠨ ᠳ᠋ᠤ᠌ ᠰᠤᠭᠤ ᠲᠠᠲᠠᠭᠳᠠᠭᠰᠠᠨ ᠬᠦᠴᠦᠨ ᠳ᠋ᠡᠭᠡᠨ ᠭᠦᠨ ᠨᠦᠬᠡᠨ ᠳᠣᠲᠣᠷᠠ ᠳᠤᠬᠤ ᠪᠠᠷ ᠢ᠋ᠶ᠋ᠠᠨ ᠰᠠᠪᠠᠵᠤ ᠤᠨᠤᠭᠠᠳ ᠲᠣᠯᠣᠭᠠᠢ ᠨᠢ ᠬᠠᠭᠠᠷᠠᠵᠤ ᠦᠬᠦᠵᠡᠢ᠃
ᠡᠨᠡ ᠶᠠᠪᠤᠳᠠᠯ ᠢ᠋ ᠪᠤᠭᠤ ᠶ᠋ᠢᠨ ᠲᠠᠯᠠᠪᠠᠢ ᠶ᠋ᠢᠨ ᠬᠢᠨ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠭᠰᠡᠨ ᠦᠭᠡᠢ ᠮᠢᠬᠠ ᠶ᠋ᠢ ᠨᠢ ᠢᠳᠡᠴᠢᠬᠡᠵᠦ ᠭᠡᠨᠡ᠃ ᠬᠡᠳᠦᠨ ᠡᠳᠦᠷ ᠦ᠋ᠨ ᠬᠣᠢᠨᠠ ᠭᠦᠩᠱᠧ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠪᠠᠢᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠨᠠᠮ ᠤ᠋ᠨ ᠬᠣᠷᠢᠶᠠᠨ ᠤ᠋ ᠳᠡᠳ᠋ ᠱᠦᠵᠢ ᠪᠠᠢᠭᠰᠠᠨ ᠪᠠᠭᠠᠲᠤᠷ ᠰᠢᠪᠠᠷᠲᠠᠢ ᠶᠡᠬᠡ ᠪᠠᠷᠢᠭᠠᠳᠠ ᠳᠡᠭᠡᠷᠡ ᠢᠷᠡᠵᠦ᠂ ᠣᠷᠣᠢ ᠳ᠋ᠤᠨᠢ ᠰᠠᠮᠪᠠᠯ᠂ ᠫᠧᠷᠯᠡᠢ ᠬᠣᠶᠠᠷ ᠢ᠋ ᠳᠠᠭᠤᠳᠠᠵᠤ ᠨᠢᠭᠡᠨ ᠵᠡᠷᠭᠡ ᠰᠢᠭᠦᠮᠵᠢᠯᠡᠭᠡᠳ《ᠲᠠᠨ ᠤ᠋ ᠴᠠᠭᠠᠡᠡᠷᠬᠢ ᠪᠠᠷᠢᠭᠠᠳᠠ ᠰᠤᠭᠤ ᠪᠠᠷᠢᠭᠠᠳ ᠨᠢᠭᠡᠳᠦᠯ ᠳ᠋ᠦ᠍ ᠬᠡᠯᠡᠬᠦ ᠦᠭᠡᠢ᠂ ᠨᠠᠢᠷ ᠲᠤ᠌ ᠲᠠᠯᠪᠢᠬᠤ ᠬᠤᠷᠳᠤᠨ ᠮᠣᠷᠢ ᠦᠭᠡᠢ ᠭᠡᠵᠦ ᠪᠠᠢᠭᠠᠳ ᠰᠤᠭᠤ ᠤᠷᠭᠠᠯᠠᠬᠤ ᠳ᠋ᠤ᠌ ᠶᠠᠭᠠᠬᠢᠭᠠᠳ ᠰᠠᠢᠨ ᠮᠣᠷᠢ ᠭᠠᠷᠤᠭᠠᠳ ᠢᠷᠡᠴᠢᠬᠡᠭᠰᠡᠨ ᠶᠦᠮ᠃ ᠰᠠᠮᠪᠠᠯ ᠴᠢ ᠬᠡᠷᠰᠡᠦ ᠬᠥᠮᠦᠨ ᠪᠠᠢᠭᠠᠳ ᠵᠠᠯᠠᠭᠤ ᠬᠥᠮᠦᠰ ᠢ᠋ ᠥᠳᠥᠭᠡᠵᠦ ᠰᠤᠭᠤ ᠬᠥᠭᠡᠭᠡᠵᠦ ᠤᠷᠭᠠᠯᠠᠭᠠᠳ ᠤᠯᠤᠰ ᠤ᠋ᠨ ᠴᠠᠭᠠᠵᠠ ᠲᠠᠢ ᠠᠮᠢᠲᠠᠨ ᠢ᠋ ᠠᠯᠠᠭᠰᠠᠨ ᠲᠤᠯᠠ ᠲᠠ ᠬᠣᠶᠠᠷ ᠢ᠋ ᠳᠥᠴᠢ ᠳᠥᠴᠢᠨ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠲᠣᠷᠭᠠᠨᠠ᠂ ᠵᠣᠭᠣᠰ ᠢ᠋ᠶ᠋ᠠᠨ ᠪᠡᠯᠡᠳᠭᠡ》ᠭᠡᠵᠦ ᠬᠡᠯᠡᠭᠡᠳ ᠶᠠᠪᠤᠵᠤ ᠭᠡᠨᠡ᠃
ᠭᠤᠷᠪᠠ᠂ ᠴᠢᠨᠣᠠ ᠲᠠᠭᠤᠵᠤ ᠠᠯᠠᠭᠠᠳ ᠬᠠᠮᠲᠤ ᠶ᠋ᠢᠨ ᠰᠦᠷᠦᠭ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠭᠰᠠᠨ ᠨᠢ
ᠰᠤᠭᠤ ᠤᠷᠭᠠᠯᠠᠭᠰᠠᠨ ᠬᠡᠷᠡᠭ ᠢ᠋ᠶ᠋ᠡᠷ ᠨᠢᠭᠡᠳᠦᠯ ᠦᠨ ᠪᠠᠭᠠᠲᠤᠷ ᠱᠦᠵᠢ ᠳ᠋ᠦ᠍ ᠰᠢᠳᠬᠡᠭᠳᠡᠭᠰᠡᠨ ᠦ᠌ ᠭᠤᠷᠪᠠᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠨᠢ ᠫᠧᠷᠯᠡᠢ ᠪᠤᠭᠤᠷᠤᠯ ᠮᠣᠷᠢ ᠪᠠᠨ ᠤᠨᠤᠵᠤ（ᠪᠠᠯᠵᠤᠤᠷ ᠤ᠋ᠨ ᠪᠤᠭᠤᠷᠤᠯ ᠭᠡᠳᠡᠭ） ᠰᠠᠮᠪᠠᠯ ᠮᠠᠮᠠ ᠬᠣᠯᠠ ᠠᠯᠠᠭ ᠮᠣᠷᠢ ᠪᠠᠨ ᠤᠨᠤᠵᠤ（ᠳ᠋ᠸᠪᠡ ᠶ᠋ᠢᠨ ᠬᠣᠯᠠ ᠠᠯᠠᠭ ᠭᠡᠳᠡᠭ） ᠰᠠᠮᠠᠢ ᠶ᠋ᠢᠨ ᠬᠥᠨᠳᠡᠢ ᠳ᠋ᠦ᠍ ᠪᠠᠢᠬᠤ ᠠᠳᠤᠭᠤᠨ ᠳ᠋ᠠᠭᠠᠨ ᠶᠠᠪᠤᠬᠤ ᠠᠳᠤᠭᠤ ᠪᠠᠨ ᠪᠦᠷᠢᠳᠬᠡᠵᠦ ᠬᠤᠷᠢᠶᠠᠵᠤ ᠲᠠᠯᠪᠢᠭᠠᠳ᠂ ᠴᠠᠭᠠᠨ ᠵᠢᠷᠦᠬᠡ ᠶ᠋ᠢᠨ ᠬᠣᠩᠰᠢᠶᠠᠷ ᠤ᠋ᠨ ᠬᠡᠳᠦᠨ ᠬᠠᠢᠯᠠᠰᠤᠨ ᠮᠣᠳᠣᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠬᠣᠶᠠᠭᠤᠯᠠ ᠰᠠᠭᠤᠵᠤ ᠲᠠᠮᠠᠬᠢ ᠲᠠᠲᠠᠵᠤ ᠪᠠᠢᠲᠠᠯᠠ ᠵᠡᠭᠦᠨ ᠬᠣᠢᠨᠠ ᠬᠠᠷᠠ ᠭᠣᠣ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠪᠡᠯᠴᠢᠵᠦ ᠪᠠᠢᠭᠰᠠᠨ ᠬᠣᠨᠢᠨ ᠰᠦᠷᠦᠭ ᠲᠦ᠍ ᠴᠢᠨᠣᠠ ᠣᠷᠣᠭᠠᠳ ᠨᠢᠭᠡ ᠬᠣᠨᠢ ᠶ᠋ᠢ ᠪᠠᠭᠠᠯᠵᠤᠤᠷ ᠠ᠋ᠴᠠ ᠨᠢ ᠡᠮᠬᠦᠵᠦ ᠭᠢᠯᠪᠠᠰ ᠬᠢᠲᠡᠯᠡ ᠵᠣ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠬᠠᠶᠠᠴᠢᠬᠠᠭᠠᠳ ᠪᠠᠷᠠᠭᠤᠨ ᠬᠣᠢᠰᠢ ᠳᠤᠲᠠᠭᠠᠴᠢᠬᠠᠪᠠ ᠭᠡᠨᠡ᠃
ᠫᠧᠷᠯᠡᠢ ᠰᠠᠮᠪᠠᠯ ᠮᠠᠮᠠ ᠳ᠋ᠠᠭᠠᠨ ᠬᠣᠶᠠᠭᠤᠯᠠ ᠲᠡᠷᠡ ᠭᠠᠢᠬᠠᠯ（ᠴᠢᠨᠣᠠ ᠶ᠋ᠢ ᠵᠢᠭᠠᠵᠤ ᠪᠣᠢ） ᠶ᠋ᠢ ᠲᠠᠭᠤᠬᠤ ᠤᠤ? ᠭᠡᠵᠦ ᠬᠡᠯᠡᠲᠡᠯᠡ ᠡᠪᠦᠭᠡᠨ ᠠᠳᠤᠭᠤᠴᠢᠨ ᠴᠢ ᠲᠡᠭᠦᠨ ᠢ᠋ ᠵᠡᠭᠦᠨᠰᠢ ᠭᠠᠷᠭᠠᠬᠤ ᠦᠭᠡᠢ ᠡᠷᠭᠢᠭᠦᠯᠦᠭᠡᠳ ᠬᠦᠴᠦᠷᠡᠪᠡᠯ ᠪᠢ ᠪᠠᠷᠠᠭᠤᠨᠰᠢ ᠠᠯᠲᠠᠨ ᠡᠮᠡᠭᠡᠯ ᠦᠨ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠭᠠᠬᠤ ᠦᠭᠡᠢ ᠳ᠋ᠠ ᠭᠡᠪᠡ᠃ ᠲᠡᠭᠡᠭᠡᠳ ᠫᠧᠷᠯᠡᠢ ᠪᠤᠭᠤᠷᠤᠯ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ᠂ ᠬᠣᠯᠠ ᠠᠷᠤ ᠪᠠᠷ ᠲᠣᠭᠣᠷᠢᠵᠤ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠭᠠᠷᠤᠭᠠᠳ᠂ ᠠᠭᠤᠯᠠ ᠬᠢᠷᠠ ᠪᠠᠷ ᠡᠮᠦᠨᠡᠰᠢ ᠳᠣᠪᠲᠣᠯᠬᠤ ᠳ᠋ᠤ᠌ ᠥᠨᠥᠬᠢ ᠴᠢᠨᠣᠠ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠳ᠋ᠦ᠍ ᠳᠠᠷᠤᠭᠳᠠᠵᠤ᠂ ᠵᠡᠭᠦᠨᠰᠢ ᠳᠤᠲᠠᠭᠠᠵᠤ ᠳᠡᠢᠯᠦᠭᠰᠡᠨ ᠦᠭᠡᠢ ᠪᠠᠷᠠᠭᠤᠨᠰᠢ ᠡᠷᠭᠢᠵᠦ ,ᠰᠠᠮᠢ ᠶ᠋ᠢᠨ ᠬᠥᠨᠳᠡᠢ ᠤᠷᠤᠭᠤ ᠳᠤᠲᠠᠭᠠᠬᠤ ᠳ᠋ᠤ᠌ ᠬᠥᠨᠳᠡᠢ ᠳ᠋ᠦ᠍ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠰᠠᠮᠪᠠᠯ ᠡᠪᠦᠭᠡᠨ ᠲᠣᠰᠣᠨ ᠣᠷᠣᠵᠤ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠨᠢ ᠬᠠᠰᠢᠨ ᠳᠣᠪᠲᠣᠯᠬᠤ ᠳ᠋ᠤ᠌ ᠴᠢᠨᠣᠠ ᠠᠷᠭᠠ ᠪᠤᠰᠤ ᠡᠷᠭᠢᠭᠡᠳ ᠵᠡᠭᠦᠨ ᠡᠮᠦᠨᠡᠰᠢ ᠬᠣᠶᠠᠷ ᠳᠡᠭᠡᠭ ᠤ᠋ᠨ ᠳᠤᠮᠳᠠᠭᠤᠷ ᠲᠠᠯᠠ ᠤᠷᠤᠭᠤ ᠣᠷᠣᠵᠤ᠂ ᠳᠠᠬᠢᠨ ᠡᠮᠦᠨᠡᠰᠢ ᠳᠤᠲᠠᠭᠠᠪᠠ᠃ ᠬᠣᠯᠠ ᠠᠯᠠᠭ ᠮᠣᠷᠢ ᠪᠣᠯ ᠬᠤᠰᠢᠭᠤᠨ ᠨᠠᠢᠷ ᠲᠤ᠌ ᠭᠤᠷᠪᠠ ᠤᠳᠠᠭᠠ ᠤᠷᠤᠯᠳᠤᠵᠤ ᠪᠦᠷ ᠳᠥᠷᠪᠡ ᠡᠴᠡ ᠪᠠᠭᠤᠭᠰᠠᠨ ᠦᠭᠡᠢ ᠬᠣᠯᠠ ᠭᠦᠶᠦᠳᠡᠭ ᠬᠤᠷᠳᠤᠨ ᠮᠣᠷᠢ ᠶᠤᠮ᠃ ᠰᠠᠮᠪᠠᠯ ᠡᠪᠦᠭᠡᠨ ᠳᠤᠲᠠᠭᠠᠵᠤ ᠪᠠᠢᠬᠤ ᠴᠢᠨᠣᠠ ᠶ᠋ᠢ ᠨᠡᠬᠡᠮᠵᠢᠯᠡᠨ ᠲᠠᠭᠤᠭᠰᠠᠭᠠᠷ ᠤᠷᠲᠤ ᠭᠣᠣ ᠶ᠋ᠢᠨ ᠠᠮᠠ ᠬᠦᠷᠬᠦ ᠦᠶᠡ ᠳ᠋ᠦ᠍ ᠴᠢᠨᠣᠠ ᠶ᠋ᠢ ᠭᠦᠢᠴᠡᠵᠦ ᠤᠷᠭᠠᠯᠠᠭᠠᠳ ᠴᠠᠪᠢ ᠪᠠᠷ ᠨᠢ ᠬᠤᠢᠪᠢ ᠪᠠᠨ ᠲᠣᠭᠲᠠᠭᠠᠵᠤ ᠣᠷᠢᠶᠠᠵᠤ ᠠᠪᠤᠩᠭᠤᠲᠠ ᠮᠣᠷᠢ ᠪᠠᠨ ᠡᠷᠭᠢᠭᠦᠯᠦᠨ ᠴᠢᠷᠴᠦ ᠭᠦᠶᠦᠯᠭᠡᠭᠰᠡᠭᠡᠷ ᠫᠧᠷᠯᠡᠢ ᠶ᠋ᠢᠨ ᠥᠭᠡᠳᠡ ᠡᠴᠡ ᠢᠷᠡᠬᠦ ᠳ᠋ᠦ᠍ ᠫᠧᠷᠯᠡᠢ ᠲᠣᠰᠣᠨ ᠠᠪᠴᠤ ᠪᠠᠰᠠ ᠨᠢᠭᠡ ᠡᠷᠭᠢᠭᠦᠯᠵᠦ ᠢᠷᠡᠭᠡᠳ ᠦᠵᠡᠬᠦ ᠳ᠋ᠦ᠍ ᠴᠢᠨᠣᠠ ᠨᠢᠭᠡᠨᠲᠡ ᠮᠠᠨᠠᠷᠠᠭᠰᠠᠨ ᠪᠠᠢᠨᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠫᠧᠷᠯᠡᠢ ᠮᠣᠷᠢᠨ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ᠂ ᠵᠥᠪ ᠲᠠᠯᠠ ᠶ᠋ᠢᠨ ᠳᠥᠷᠥᠭᠡ ᠪᠡᠨ ᠰᠤᠭᠤᠯᠤᠨ ᠠᠪᠤᠭᠠᠳ ᠴᠢᠨᠣᠠ ᠶ᠋ᠢᠨ ᠬᠠᠷᠠ ᠬᠠᠮᠠᠷ ᠤᠷᠤᠭᠤ ᠨᠢᠭᠡᠯᠡ ᠲᠠᠯᠪᠢᠵᠤ ᠴᠢᠨᠣᠠ ᠶ᠋ᠢ ᠠᠯᠠᠭᠰᠠᠨ ᠪᠠᠢᠪᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠮᠠᠯᠵᠢᠬᠤ ᠣᠷᠣᠨ ᠳ᠋ᠤ᠌ ᠴᠢᠨᠣᠠ ᠠᠯᠠᠬᠤ ᠶ᠋ᠢ ᠤᠷᠢᠶᠠᠯᠠᠵᠤ ᠪᠠᠢᠭᠰᠠᠨ ᠲᠤᠯᠠ ᠪᠠᠭᠠ ᠪᠠᠷᠢᠭᠠᠳᠠ᠂ ᠶᠡᠬᠡ ᠪᠠᠷᠢᠭᠠᠳᠠ ᠳᠠᠮ ᠳᠠᠮ ᠢ᠋ᠶ᠋ᠠᠷ ᠭᠦᠩᠱᠧ ᠳ᠋ᠦ᠍ ᠴᠢᠨᠣᠠ ᠠᠯᠠᠭᠰᠠᠨ ᠢ᠋ ᠨᠢ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ ᠨᠢᠭᠡ ᠡᠳᠦᠷ ᠪᠠᠭᠠᠲᠤᠷ ᠱᠦᠵᠢ ᠰᠠᠢᠬᠠᠨ ᠴᠠᠪᠢᠳᠠᠷ ᠮᠣᠷᠢ ᠤᠨᠤᠵᠤ ᠶᠡᠬᠡ ᠪᠠᠷᠢᠭᠠᠳᠠ ᠳᠡᠭᠡᠷᠡ ᠢᠷᠡᠭᠡᠳ᠂ ᠶᠡᠬᠡ ᠪᠠᠷᠢᠭᠠᠳᠠ ᠶ᠋ᠢᠨ ᠳᠠᠷᠤᠭᠠ ᠰᠠᠩᠪᠤ ᠲᠠᠢ ᠬᠣᠶᠠᠭᠤᠯᠠ ᠰᠠᠮᠪᠠᠯ᠂ ᠫᠧᠷᠯᠡᠢ ᠬᠣᠶᠠᠷ ᠢ᠋ ᠳᠠᠭᠤᠳᠠᠭᠠᠳ ᠴᠢᠨᠣᠠ ᠤᠷᠭᠠᠯᠠᠭᠰᠠᠨ ᠶᠠᠪᠤᠳᠠᠯ ᠢ᠋ ᠰᠠᠢᠰᠢᠶᠠᠵᠤ᠂ ᠲᠦᠷᠦᠭᠦᠦ ᠬᠡᠳᠦᠨ ᠡᠳᠦᠷ ᠤ᠋ᠨ ᠰᠤᠭᠤ ᠠᠯᠠᠭᠠᠳ ᠲᠣᠷᠭᠠᠭᠰᠠᠨ ᠲᠣᠷᠭᠠᠭᠤᠯᠢ ᠶ᠋ᠢ ᠨᠢ ᠬᠡᠯᠲᠦᠷᠢᠭᠦᠯᠦᠭᠰᠡᠨ ᠪᠥᠭᠡᠳ ᠪᠠᠰᠠ ᠬᠥᠮᠦᠨ ᠪᠦᠷᠢ ᠶ᠋ᠢ ᠲᠠᠪᠤᠨ ᠲᠥᠭᠥᠷᠢᠭ ᠠᠷᠠᠳ ᠤ᠋ᠨ ᠵᠣᠭᠣᠰ ᠢ᠋ᠶ᠋ᠠᠷ ᠱᠠᠩᠨᠠᠵᠤ ᠭᠡᠨᠡ᠃ ᠲᠡᠷᠡ ᠦᠶᠡ ᠶ᠋ᠢᠨ ᠠᠷᠠᠳ ᠤ᠋ᠨ ᠵᠣᠭᠣᠰ ᠬᠠᠮᠤᠭ ᠶᠡᠬᠡ ᠨᠢ ᠲᠠᠪᠤᠨ ᠲᠥᠭᠥᠷᠢᠭ ᠤ᠋ᠨ ᠬᠡᠪᠯᠡᠯ ᠲᠤᠯᠠ ᠲᠡᠳᠡ ᠮᠠᠰᠢ ᠶᠡᠬᠡ ᠪᠠᠶᠠᠷᠯᠠᠭᠰᠠᠨ ᠪᠠᠢᠵᠠᠢ᠃
ᠳᠥᠷᠪᠡ᠂ ᠤᠷᠭᠠ ᠴᠢᠷᠴᠦ ᠢᠷᠡᠭᠰᠡᠨ ᠳᠠᠭᠠ ᠶ᠋ᠢ ᠤᠷᠭᠠᠯᠠᠭᠠᠳ ᠤᠷᠰᠢᠭ ᠲᠠᠲᠠᠭᠰᠠᠨ ᠨᠢ
ᠲᠡᠷᠡ ᠦᠶᠡ ᠳ᠋ᠦ᠍ ᠬᠠᠪᠤᠷ ᠪᠣᠯᠤᠭᠰᠠᠭᠠᠷ ᠬᠠᠮᠲᠤ ᠶ᠋ᠢᠨ ᠠᠳᠤᠭᠤ ᠶ᠋ᠢ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠨᠢ ᠲᠠᠯᠠ ᠳ᠋ᠤ᠌ ᠬᠤᠷᠢᠶᠠᠵᠤ᠂ ᠲᠠᠯᠠ ᠤᠷᠭᠠᠯᠠᠵᠤ ᠡᠮᠨᠢᠭ ᠰᠤᠷᠭᠠᠬᠤ ᠠᠳᠤᠭᠤᠨ ᠨᠠᠭᠠᠳᠤᠮ ᠶᠡᠬᠡ ᠬᠥᠷ ᠬᠥᠭᠵᠢᠭᠡᠨ ᠲᠡᠢ ᠶᠠᠪᠤᠭᠳᠠᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠨᠢᠭᠡᠳᠦᠯ ᠭᠦᠩᠱᠧ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠡᠯᠡ ᠪᠠᠷᠢᠭᠠᠳᠠ ᠶ᠋ᠢᠨ ᠠᠳᠤᠭᠤᠨ ᠨᠠᠭᠠᠳᠤᠮ ᠳ᠋ᠤ᠌ ᠬᠦᠷᠴᠦ᠂ ᠮᠠᠯᠴᠢᠨ ᠲᠠᠢ ᠴᠣᠭ ᠠᠳᠤᠭᠤ ᠤᠷᠭᠠᠯᠠᠬᠤ ᠶ᠋ᠢ ᠦᠵᠡᠳᠡᠭ ᠪᠠᠢᠭᠰᠠᠨ ᠶᠤᠮ᠃
1965 ᠣᠨ ᠤ᠋ ᠬᠠᠪᠤᠷ ᠴᠠᠭᠠᠡᠡᠷᠬᠢ ᠶ᠋ᠢᠨ ᠳᠡᠯ ᠤ᠋ᠨ ᠰᠤᠭᠤ ᠶ᠋ᠢᠨ ᠬᠣᠶᠠᠷ ᠭᠣᠣᠯ ᠤ᠋ᠨ ᠬᠣᠭᠣᠷᠣᠨᠳᠣᠬᠢ ᠲᠡᠭᠰᠢ ᠲᠠᠯᠠ ᠳ᠋ᠤ᠌ ᠠᠳᠤᠭᠤ ᠬᠤᠷᠢᠶᠠᠵᠠᠢ᠃ ᠭᠦᠩᠱᠧ ᠶ᠋ᠢᠨ ᠳᠡᠳ᠋ ᠱᠦᠵᠢ ᠪᠠᠭᠠᠲᠤᠷ ᠤᠷᠭᠠᠨ ᠬᠡᠭᠡᠷ ᠮᠣᠷᠢ ᠤᠨᠤᠵᠤ᠂ ᠪᠠᠷᠠᠭᠤᠨ ᠭᠣᠣᠯ ᠤ᠋ᠨ ᠲᠠᠪᠠᠬᠠᠢ ᠠᠳᠠᠭᠣᠴᠢᠨ ᠲᠠᠢ ᠬᠣᠶᠠᠭᠤᠯᠠ ᠢᠷᠡᠪᠡ᠃ ᠲᠠᠪᠠᠬᠠᠢ ᠨᠢ ᠤᠷᠭᠠᠨ ᠤᠯᠠᠭᠠᠨ ᠮᠣᠷᠢ ᠤᠨᠤᠵᠤ ᠢᠷᠡᠭᠡᠳ ᠣᠯᠠᠨ ᠲᠠᠢ ᠬᠠᠮᠲᠤ ᠠᠳᠤᠭᠤ ᠤᠷᠭᠠᠯᠠᠨ ᠨᠠᠭᠠᠳᠴᠠᠭᠠᠵᠠᠢ᠃
ᠡᠨᠡ ᠣᠷᠣᠢ ᠫᠧᠷᠯᠡᠢ ᠴᠦ᠍ ᠭᠡᠰᠡᠨ ᠪᠠᠭᠠ ᠬᠣᠯᠠ ᠮᠣᠷᠢ ᠪᠠᠨ ᠤᠨᠤᠵᠤ᠂ ᠭᠠᠩᠬᠤᠭᠰᠠᠨ ᠥᠨᠳᠥᠷ ᠮᠣᠢᠯ ᠤ᠋ᠨ ᠤᠷᠭᠠ ᠪᠠᠷᠢᠵᠤ ᠭᠠᠷ ᠤ᠋ᠨ ᠡᠷᠳᠡᠮ᠂ ᠮᠣᠷᠢᠨ ᠤ᠋ ᠤᠷᠠᠯᠢᠭ ᠢ᠋ ᠣᠯᠠᠨᠠ ᠭᠠᠢᠬᠠᠭᠤᠯᠤᠨ ᠨᠢᠭᠡᠨ ᠵᠡᠷᠭᠡ ᠮᠣᠷᠢ ᠤᠷᠭᠠᠯᠠᠪᠠ᠃ ᠨᠠᠭᠠᠳᠤᠮ ᠨᠡᠯᠢᠶᠡᠳ ᠬᠥᠭᠵᠢᠭᠡᠨ ᠲᠡᠢ ᠪᠠᠢᠭᠰᠠᠨ ᠦᠶᠡ ᠳ᠋ᠦ᠍ ᠬᠡᠨ ᠨᠢ ᠤᠷᠭᠠ ᠪᠠᠨ ᠠᠯᠳᠠᠭᠰᠠᠨ ᠢ᠋ ᠪᠦᠦ ᠮᠡᠳᠡ᠂ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠶ᠋ᠢ ᠳᠠᠭᠠᠵᠤ ᠨᠢᠭᠡ ᠬᠡᠭᠡᠷ ᠳᠠᠭᠠ ᠤᠷᠭᠠ ᠴᠢᠷᠦᠭᠡᠳ ᠢᠷᠡᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠫᠧᠷᠯᠡᠢ ᠲᠣᠰᠣᠨ ᠣᠷᠣᠵᠤ᠂ ᠬᠣᠩᠰᠢᠶᠠᠷ ᠢ᠋ᠶ᠋ᠠᠷ ᠨᠢ ᠤᠷᠭᠠᠯᠠᠵᠤ ᠨᠢᠭᠡᠯᠡ ᠲᠠᠲᠠᠭᠰᠠᠨ ᠴᠢᠨᠢ ᠳᠠᠭᠠ ᠴᠢᠨᠠᠭᠰᠢ ᠲᠣᠯᠣᠭᠠᠢ ᠪᠠᠨ ᠬᠦᠴᠦᠲᠡᠢ ᠰᠠᠪᠠᠵᠤ ᠤᠨᠠᠭᠠᠳ ᠦᠬᠦᠴᠢᠬᠡᠵᠦ ᠭᠡᠨᠡ᠃
ᠠᠳᠤᠭᠤᠨ ᠨᠠᠭᠠᠳᠤᠮ ᠲᠠᠷᠬᠠᠬᠤ ᠳ᠋ᠤ᠌ ᠫᠧᠷᠯᠡᠢ ᠠᠳᠤᠭᠤ ᠪᠠᠨ ᠬᠥᠨᠳᠡᠢ ᠥᠭᠡᠳᠡ ᠵᠠᠯᠠᠵᠤ ᠲᠠᠯᠪᠢᠭᠠᠳ ᠭᠡᠷ ᠲᠡᠭᠡᠨ ᠢᠷᠡᠵᠦ᠂ ᠪᠠᠰᠠᠯᠠ ᠲᠥᠯᠥᠪᠦᠷᠢ ᠳ᠋ᠦ᠍ ᠣᠷᠣᠯᠠ ᠳ᠋ᠠ ᠭᠡᠵᠦ ᠰᠡᠳᠬᠢᠯ ᠵᠣᠪᠠᠵᠤ ᠬᠣᠨᠣᠪᠠ᠃ ᠵᠣᠯ ᠢ᠋ᠶ᠋ᠠᠷ ᠨᠢᠭᠡᠳᠦᠯ ᠦᠨ ᠪᠠᠭᠠᠲᠤᠷ ᠱᠦᠵᠢ ᠶᠠᠪᠤᠬᠤ ᠦᠶᠡ ᠳ᠋ᠡᠭᠡᠨ ᠪᠠᠷᠢᠭᠠᠳᠠ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠲᠤ᠌ ᠳᠠᠭᠠ ᠦᠬᠦᠭᠰᠡᠨ ᠶᠠᠪᠤᠳᠠᠯ ᠪᠣᠯ ᠣᠯᠠᠨ ᠤ᠋ ᠨᠠᠭᠠᠳᠤᠮ ᠤ᠋ᠨ ᠳᠤᠮᠳᠠ ᠭᠠᠷᠤᠭᠰᠠᠨ ᠰᠠᠨᠠᠮᠰᠠᠷ ᠦᠭᠡᠢ ᠤᠴᠢᠷ᠂ ᠫᠧᠷᠯᠡᠢ ᠪᠣᠯ ᠵᠠᠯᠠᠭᠤ ᠬᠥᠮᠦᠨ᠂ ᠰᠠᠢᠨ ᠠᠳᠤᠭᠤᠴᠢᠨ᠂ ᠡᠨᠡ ᠶᠠᠪᠤᠳᠠᠯ ᠢ᠋ ᠬᠤᠪᠢ ᠬᠥᠮᠦᠨ ᠡᠴᠡ ᠬᠠᠷᠢᠭᠤᠴᠠᠯᠭᠠ ᠨᠡᠬᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠬᠡᠯᠡᠭᠡᠳ ᠶᠠᠪᠤᠵᠤ ᠭᠡᠨᠡ᠃
ᠬᠣᠵᠢᠮ ᠨᠢ ᠡᠭᠦᠨ ᠢ᠋ ᠪᠠᠷᠢᠭᠠᠳᠠ ᠠ᠋ᠴᠠ ᠨᠢ ᠶᠠᠮᠠᠷᠴᠤ ᠶᠠᠪᠤᠳᠠᠯ ᠪᠣᠯᠭᠠᠭᠰᠠᠨ ᠦᠭᠡᠢ ᠥᠩᠭᠡᠷᠡᠭᠡᠭᠰᠡᠨ ᠪᠠᠢᠵᠠᠢ᠃ ᠣᠯᠠᠨ ᠵᠢᠯ ᠠᠳᠤᠭᠤ ᠬᠠᠷᠢᠭᠤᠯᠤᠭᠰᠠᠨ ᠠᠳᠠᠭᠣᠴᠢᠨ ᠫᠧᠷᠯᠡᠢ ᠶ᠋ᠢᠨ ᠠᠯᠳᠠᠷ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠠᠷᠤ ᠬᠣᠷᠴᠢᠨ ᠤ᠋ ᠠᠷᠤ ᠥᠪᠥᠷ ᠢ᠋ᠶ᠋ᠡᠷ ᠨᠡᠢᠳᠡᠮ ᠲᠠᠷᠬᠠᠵᠤ ᠬᠣᠰᠢᠭᠤ ᠳᠠᠶᠠᠭᠠᠷ ᠲᠤ᠌ ᠰᠤᠷᠤᠯᠴᠠᠬᠤ ᠳᠠᠭᠤᠷᠢᠶᠠᠯ ᠪᠣᠯᠵᠤ ᠪᠠᠢᠭᠰᠠᠨ ᠢ᠋ ᠣᠳᠣ ᠶᠠᠷᠢᠬᠤ ᠳ᠋ᠤ᠌ ᠴᠤ᠌ ᠫᠧᠷᠯᠡᠢ ᠡᠪᠦᠭᠡᠨ ᠦ᠌ ᠨᠤᠲᠤᠭ ᠤᠰᠤᠨ ᠤ᠋ ᠬᠢᠨᠢ ᠪᠢᠰᠢᠷᠡᠬᠦ ᠦᠭᠡᠢ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠃
ᠤᠯᠠᠭᠠᠨᠬᠠᠳᠠ ᠬᠣᠲᠠ ᠶ᠋ᠢᠨ ᠡᠳᠦᠷ ᠦ᠋ᠨ ᠰᠣᠨᠢᠨ ᠤ᠋2014 ᠣᠨ ᠤ᠋ ᠮᠣᠩᠭᠣᠯ ᠬᠡᠪᠯᠡᠯ ᠡᠴᠡ ᠬᠠᠭᠤᠯᠪᠠ᠃ 2024 ᠣᠨ ᠤ᠋7 ᠰᠠᠷᠠ ᠳ᠋ᠤ᠌
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠡᠪᠤᠯᠴᠡᠴᠡᠭ
ᠦᠰᠦᠭ ᠬᠢᠨᠠᠭᠴᠢ᠄ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠳᠠ