ᠬᠥᠬᠡ ᠲᠣᠷᠭᠠᠨ ᠲᠡᠷᠯᠢᠭ- ᠰᠢᠯᠦᠭ-ᠨᠠ‍ · ᠰᠠᠢᠨᠴᠣᠭᠲᠣ-ᠰ᠂ ᠨᠠᠷᠭᠢᠯ ᠤᠩᠰᠢᠪᠠХөх торгон тэрлэг-шүлэг-н·сайнцогт ᠰᠢᠯᠦᠭ ᠢᠷᠠᠭᠤ ᠨᠠᠢᠷᠠᠭ

　　ᠨᠠ‍ · ᠰᠠᠢᠨᠴᠣᠭᠲᠣ

ᠰᠢᠯᠢ ᠎ᠶ᠋ᠢᠨ ᠨᠣᠭᠣᠭᠠᠨ ᠳᠡᠨᠵᠢᠨ ᠳᠡᠭᠡᠷ᠎ᠡ

ᠰᠢᠨᠡᠬᠡᠨ ᠴᠠᠭᠠᠨ ᠭᠡᠷ ᠲᠡᠬᠢ

ᠰᠡᠷᠭᠦᠯᠡᠩ ᠵᠠᠩ ᠎ᠲᠠᠢ ᠬᠡᠦᠬᠡᠨ ‍ᠦ

ᠰᠡᠳᠬᠢᠯ ‍ᠢ ᠨᠢ ᠶᠡᠷᠦ ᠮᠡᠳᠡᠭᠰᠡᠨ ᠦᠭᠡᠢ ᠃

ᠬᠥᠬᠡ ᠲᠣᠷᠭᠠᠨ ᠲᠡᠷᠯᠢᠭ ‍ᠢᠶ᠋ᠡᠨ

ᠬᠦᠳᠡᠷ ᠰᠠᠢᠬᠠᠨ ᠣᠶᠣᠵᠤ ᠪᠠᠢᠨ᠎ᠠ ᠃

ᠬᠥᠭᠡᠷᠦᠬᠦᠨ ᠲᠥᠷᠥᠭᠰᠡᠨ ᠬᠡᠦᠬᠡᠨ ᠭᠤᠸᠠᠢ

ᠬᠡᠨ ᠎ᠳ᠋ᠦ᠍ ᠴᠦ᠍ ᠣᠶᠣᠵᠤ ᠠᠬᠤ ᠎ᠶ᠋ᠢ ᠪᠤᠤ ᠮᠡᠳᠡ ᠃

ᠤᠯᠠᠭᠠᠨ ᠪᠣᠨᠲᠣᠭᠣᠷ ᠬᠠᠴᠠᠷ ᠎ᠲᠠᠢ

ᠤᠳᠠ ᠎ᠶ᠋ᠢᠨ ᠨᠠᠪᠴᠢᠨ ᠬᠥᠮᠥᠰᠬᠡ ᠎ᠲᠡᠢ

ᠤᠯᠢᠶᠠᠷᠠᠭ ᠵᠠᠩ ᠎ᠲᠠᠢ ᠬᠡᠦᠬᠡᠨ ‍ᠦ

ᠤᠷᠠᠨ ᠴᠤ᠌ ᠭᠡᠳᠡᠭ ᠨᠢ ᠶᠠᠷᠢᠶᠠᠨ ᠦᠭᠡᠢ

ᠲᠣᠷᠭ᠎ᠠ ᠴᠤ᠌ ᠭᠡᠵᠦ ᠲᠣᠷᠭ᠎ᠠ ‍ᠤᠤ ᠳ᠋ᠠ

ᠲᠣᠳᠣᠬᠠᠨ ᠬᠤᠷᠴᠠ ᠥᠩᠭᠡᠲᠡᠢ ᠳ᠋ᠡ

ᠲᠣᠷᠮᠣᠭᠣᠷ ᠨᠢᠳᠦ ᠎ᠲᠡᠢ ᠬᠡᠦᠬᠡᠨ ‍ᠦ

ᠲᠣᠭᠣᠵᠤ ᠠᠪᠤᠭᠰᠠᠨ ᠲᠣᠷᠭ᠎ᠠ ᠶᠤᠮ ᠪᠠᠢᠨ᠎ᠠ ᠃

ᠤᠷᠠᠨ ᠵᠥᠭᠡᠯᠡᠨ ᠭᠠᠷ ‍ᠤᠨ ᠬᠢᠨᠢ

ᠬᠥᠳᠡᠯᠵᠦ ᠪᠠᠢᠬᠤ ᠨᠢ ᠲᠦᠷᠭᠡᠨ ᠭᠡᠵᠦ ᠡ !

ᠤᠯᠠᠪᠤᠷ ᠰᠢᠷ᠎ᠠ ᠡᠮᠵᠢᠶᠡᠷᠢ ᠎ᠶ᠋ᠢ

ᠳᠠᠷᠤᠭᠤᠯᠵᠤ ᠪᠠᠢᠬᠤ ᠨᠢ ᠰᠠᠢᠬᠠᠨ ᠭᠡᠵᠦ ᠡ !
ᠶᠠᠭᠠᠷᠠᠤ  ᠮᠠᠶᠢᠭ᠍ᠲᠠᠢ ᠣᠶᠣᠵᠤ ᠠᠲᠠᠯ᠎ᠠ ᠎ᠪᠠᠨ
ᠶᠠᠭᠠᠬᠢᠬᠰᠠᠨ ᠨᠢᠮᠪᠠᠢ ᠣᠶᠣᠬᠤ ᠨᠢ ᠪᠤᠢ ?
ᠶᠠᠮᠠᠷ ᠬᠥᠮᠦᠨ ᠎ᠳ᠋ᠦ᠍ ᠵᠣᠷᠢᠭᠤᠯᠤᠭᠰᠠᠨ ‍ᠢ ᠨᠢ
ᠶᠠᠷᠢᠯᠴᠠᠵᠤ ᠮᠡᠳᠡᠶ᠎ᠡ ᠭᠡᠵᠦ ᠪᠣᠳᠣᠭᠳᠠᠯ᠎ᠠ ᠃

《 ᠲᠠᠭᠠᠲᠠᠢ ᠭᠣᠶᠣᠬᠠᠨ ᠲᠡᠷᠯᠢᠭ ᠪᠠᠢᠨ᠎ᠠ ᠃
ᠲᠠ ᠪᠡᠶ᠎ᠡ ᠎ᠳ᠋ᠦ᠍ ᠎ᠪᠡᠨ ᠣᠶᠣᠵᠤ ᠪᠠᠢᠨ᠎ᠠ ‍ᠤᠤ ? 》 ᠭᠡᠵᠦ
ᠲᠠᠩᠬᠢᠯ ᠵᠠᠯᠠᠭᠤᠬᠠᠨ ᠬᠡᠦᠬᠡᠨ ᠎ᠡᠴᠡ
ᠲᠠᠭᠠᠮᠠᠭᠯᠠᠵᠤ ᠪᠢ ᠠᠰᠠᠭᠤᠯ᠎ᠠ ᠃

《 ᠦᠭᠡᠢ ! ᠡᠨᠡ ᠮᠢᠨᠦᠬᠢ ᠪᠢᠰᠢ ᠃
ᠥᠪᠡᠷ ‍ᠢᠶ᠋ᠡᠨ ᠪᠢ ᠡᠮᠦᠰᠬᠦ ᠶᠤᠮ ᠪᠣᠯ
ᠨᠣᠭᠣᠭᠠᠨ ᠥᠩᠭᠡ ᠎ᠶ᠋ᠢᠨ ᠲᠡᠷᠯᠢᠭ ᠲᠦ ᠎ᠪᠡᠨ
ᠤᠯᠠᠭᠠᠨ ᠡᠮᠵᠢᠶᠡᠷᠢ ᠳᠠᠷᠤᠭᠤᠯᠤᠨ᠎ᠠ ᠰᠢᠦ 》 ᠭᠡᠯ᠎ᠡ ᠃

《 ᠤᠷᠤᠭᠯᠠᠵᠤ ᠪᠠᠷᠢᠯᠳᠤᠭᠰᠠᠨ ᠨᠥᠬᠥᠷ ᠎ᠲᠦ᠍ ᠎ᠪᠡᠨ
ᠤᠷᠠᠯᠠᠨ ᠣᠶᠣᠵᠤ ᠪᠠᠢᠭ᠎ᠠ ᠶᠤᠮ ‍ᠤᠤ ? 》 ᠭᠡᠵᠦ
ᠤᠬᠠᠭᠠᠨ ᠰᠡᠷᠭᠦᠯᠡᠩ ᠬᠡᠦᠬᠡᠨ ᠎ᠡᠴᠡ
ᠤᠬᠤᠴᠢᠯᠠᠵᠤ ᠪᠠᠰᠠ ᠠᠰᠠᠭᠤᠯ᠎ᠠ ᠃

《 ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ ᠪᠢ
ᠠᠢᠯ ‍ᠤᠨ ᠭᠠᠵᠠᠷ ᠮᠣᠷᠳᠠᠭ᠎ᠠ ᠦᠭᠡᠢ 》 ᠭᠡᠳ
ᠠᠭᠠᠵᠢᠭᠤᠬᠠᠨ ᠰᠢᠭ᠋ ‍ᠢᠶ᠋ᠡᠷ ᠬᠠᠷᠢᠭᠤᠯᠤᠭᠠᠳ
ᠠᠯᠠᠭ ᠨᠢᠳᠦ ᠨᠢ ᠢᠨᠢᠶᠡᠮᠰᠦᠭᠯᠡᠯ᠎ᠡ ᠃
 《 ᠠ ᠂ ᠲᠡᠭᠡᠪᠡᠯ ᠲᠠ ᠡᠭᠦᠨ ‍ᠢ
ᠠᠬ᠎ᠠ ᠎ᠳ᠋ᠤ᠌ ᠎ᠪᠠᠨ ᠣᠶᠣᠵᠤ ᠪᠠᠢᠨ᠎ᠠ ᠰᠢᠳᠡ ᠡ ! 》 ᠭᠡᠵᠦ
ᠠᠭᠠᠰᠢ ᠢᠴᠢᠮᠡᠲᠡᠭᠡᠢ ᠬᠡᠦᠬᠡᠨ ᠎ᠡᠴᠡ
ᠠᠬᠢᠭᠠᠳ ᠪᠠᠰᠠ ᠠᠰᠠᠭᠤᠯ᠎ᠠ ᠃

《 ᠡᠵᠢ ᠠᠪᠤ ᠎ᠠ᠋ᠴᠠ ᠲᠥᠷᠥᠬᠦ ᠎ᠳ᠋ᠦ᠍ ᠎ᠪᠡᠨ ᠪᠢ
ᠡᠭᠡᠴᠢ ᠳᠡᠭᠦᠦ ᠬᠣᠶᠠᠭᠤᠯᠠ ᠪᠢᠯᠡ ᠃
ᠡᠩᠬᠦᠷᠡᠢ ᠬᠠᠢᠷᠠᠲᠠᠢ ᠳᠡᠭᠦᠦ ᠮᠢᠨᠢ
ᠡᠳᠦᠭᠡ ᠰᠤᠷᠭᠠᠭᠤᠯᠢ ᠎ᠳ᠋ᠤ᠌ ᠰᠠᠭᠤᠵᠤ ᠪᠠᠢᠨ᠎ᠠ 》 ᠭᠡᠯ᠎ᠡ ᠃
《 ᠢᠩᠭᠢᠪᠡᠯ ᠬᠡᠨ ‍ᠦ ᠬᠢ ᠪᠣᠯᠴᠢᠬᠠᠪᠠ 》 ᠭᠡᠬᠦ ᠎ᠳ᠋ᠦ᠍
ᠢᠯᠡᠬᠡᠨ ᠬᠠᠷᠢᠭᠤᠯᠵᠤ ᠥᠭᠭᠥᠭᠰᠡᠨ ᠦᠭᠡᠢ
ᠢᠴᠢᠵᠦ ᠳᠣᠭᠣᠭᠰᠢ ᠎ᠪᠠᠨ ᠬᠠᠷᠠᠭᠠᠳ
ᠢᠨᠢᠶᠡᠮᠰᠦᠭᠯᠡᠵᠦ ᠴᠢᠷᠠᠢ ᠨᠢ ᠤᠯᠠᠢᠯ᠎ᠠ ᠃
ᠠᠭᠠᠭᠢᠮ᠎ᠠ ᠵᠠᠯᠠᠭᠤᠬᠠᠨ ᠨᠠᠰᠤᠲᠠᠢ
ᠠᠢᠯ ‍ᠤᠨ ᠲᠠᠨᠢᠬᠤ ᠦᠭᠡᠢ ᠬᠡᠦᠬᠡᠨ ᠎ᠡᠴᠡ
ᠠᠷᠠᠢ ᠲᠣᠮᠣᠭ᠎ᠠ ᠦᠭᠡᠢ ᠠᠰᠠᠭᠤᠭᠰᠠᠨ ᠎ᠳ᠋ᠤ᠌ ᠎ᠪᠠᠨ
ᠠᠷᠭ᠎ᠠ ᠮᠢᠨᠢ ᠵᠢᠭᠠᠬᠠᠨ ᠪᠠᠷᠠᠭᠳᠠᠯ᠎ᠠ ᠃
ᠬᠠᠯᠠᠭᠤᠨ ᠴᠠᠢ ᠎ᠪᠠᠨ ᠰᠦᠯᠡᠭᠰᠡᠭᠡᠷ
ᠬᠠᠷᠠᠵᠤ ᠪᠠᠢᠬᠰᠠᠨ ᠡᠮᠡᠭᠡᠨ ᠭᠤᠸᠠᠢ
ᠬᠠᠪᠤ ᠦᠭᠡᠢ ᠰᠢᠭ᠌ ᠪᠣᠯᠤᠭᠰᠠᠨ ‍ᠢ ᠦᠵᠡᠭᠡᠳ
ᠬᠠᠵᠠᠭᠤ ᠎ᠠ᠋ᠴᠠ ᠶᠠᠷᠢᠵᠤ ᠡᠬᠢᠯᠡᠯ᠎ᠡ ᠄
《 ᠡᠨᠡ ᠴᠠᠭ ‍ᠤᠨ ᠬᠡᠦᠬᠡᠳ ‍ᠦᠳ
ᠡᠷᠬᠡ ᠴᠢᠯᠥᠭᠡᠲᠡᠢ ᠰᠠᠢᠬᠠᠨ ᠪᠠᠢᠨ᠎ᠠ ᠃
ᠳᠤᠷᠠᠯᠠᠭᠰᠠᠨ ᠵᠦᠢᠯ ᠪᠦᠬᠦᠨ ‍ᠢᠶ᠋ᠡᠨ
ᠳᠤᠷ᠎ᠠ ᠎ᠪᠠᠷ ‍ᠢᠶ᠋ᠠᠨ ᠦᠢᠯᠡᠳᠬᠦ ᠬᠤᠪᠢ ᠎ᠲᠠᠢ ᠃
ᠬᠠᠷᠠᠩᠭᠤᠢ ᠲᠡᠷᠡ ᠨᠡᠢᠭᠡᠮ ᠳᠡᠭᠡᠷ᠎ᠡ
ᠬᠠᠯᠠ ᠎ᠶ᠋ᠢ ᠦᠵᠡᠭᠰᠡᠨ ᠪᠢᠳᠡ ᠬᠣᠶᠠᠭᠤᠯᠠ
ᠬᠠᠢᠷᠠᠲᠤ ᠬᠡᠦᠬᠡᠳ ‍ᠦᠨ ᠶᠠᠪᠤᠳᠠᠯ ‍ᠢ
ᠬᠠᠮᠢᠶᠠᠷᠴᠤ ᠶᠡᠷᠦ ᠬᠣᠷᠢᠳᠠᠭ ᠦᠭᠡᠢ ᠰᠢᠦ ᠃

ᠠᠵᠠ ᠎ᠲᠠᠢ ᠲᠥᠷᠥᠭᠰᠡᠨ ᠬᠡᠦᠬᠡᠨ ᠮᠢᠨᠢ
ᠠᠵᠢᠯ ᠎ᠳ᠋ᠤ᠌ ᠶᠡᠬᠡ ᠰᠠᠢᠨ ᠰᠢᠦ
ᠠᠢᠯ ‍ᠤᠨ ᠣᠯᠠᠨ ᠪᠦᠭᠦᠳᠡᠭᠡᠷ ‍ᠢᠶ᠋ᠡᠨ ᠴᠦ᠍
ᠠᠶᠠᠲᠠᠢ ᠬᠡᠦᠬᠡᠨ ᠭᠡᠵᠦ ᠮᠠᠭᠲᠠᠳᠠᠭ ᠰᠢᠦ 》 ᠭᠡᠯ᠎ᠡ ᠃
ᠬᠥᠬᠡ ᠴᠡᠩᠬᠡᠷ ᠠᠯᠴᠢᠭᠤᠷ ‍ᠢᠶ᠋ᠠᠨ
ᠬᠦᠵᠦᠭᠦᠨ ᠳᠡᠭᠡᠷ᠎ᠡ ᠎ᠪᠡᠨ ᠪᠠᠭᠤᠯᠭᠠᠭᠰᠠᠨ
ᠬᠦᠷᠡᠩ ᠤᠯᠠᠭᠠᠨ ᠴᠢᠷᠠᠢ ᠎ᠲᠠᠢ
ᠬᠡᠦᠬᠡᠨ ᠨᠢ ᠳᠤᠭᠤᠢ ᠯᠠ ᠢᠨᠢᠶᠡᠵᠦ ᠪᠠᠢᠨ᠎ᠠ ᠃
《 ᠴᠢᠨᠠᠳᠤᠬᠢ ᠣᠶᠣᠳᠠᠯ ‍ᠢᠶ᠋ᠠᠨ ᠲᠠᠯᠪᠢ ᠳ᠋ᠠ
ᠴᠠᠢ ᠎ᠪᠠᠨ ᠬᠠᠯᠠᠭᠤᠨ ᠎ᠳ᠋ᠤ᠌ ᠨᠢ ᠤᠤᠭᠤ ᠳ᠋ᠠ 》 ᠭᠡᠵᠦ
ᠴᠠᠭᠯᠠᠰᠢ ᠦᠭᠡᠢ ᠬᠠᠢᠷᠠᠲᠠᠢ ᠡᠵᠢ ᠨᠢ
ᠴᠠᠭᠠᠰᠢ ᠎ᠪᠠᠨ ᠬᠡᠦᠬᠡᠨ ᠎ᠳ᠋ᠦ᠍ ᠎ᠪᠡᠨ ᠬᠡᠯᠡᠯ᠎ᠡ ᠃
《 ᠠᠢᠮᠠᠭ ‍ᠤᠨ ᠨᠠᠭᠠᠳᠤᠮ ᠠᠴᠠ ᠤᠷᠢᠲᠠᠵᠤ ᠪᠢ
ᠠᠮᠵᠢᠵᠤ ᠣᠶᠣᠶ᠎ᠠ ᠭᠡᠰᠡᠨ ᠶᠤᠮ ᠡᠵᠢ ᠡ ! 》 ᠭᠡᠳ
ᠠᠮᠠ ᠠᠯᠳᠠᠵᠤ ᠭᠠᠷᠭᠠᠭᠰᠠᠨ ᠎ᠳ᠋ᠤ᠌ ᠎ᠪᠠᠨ
ᠠᠷᠭ᠎ᠠ ᠪᠠᠷᠠᠭᠰᠠᠨ ᠰᠢᠭ᠋ ᠪᠣᠯᠴᠢᠬᠠᠯ᠎ᠠ ᠃
ᠬᠥᠭᠡᠷᠦᠬᠦᠨ ᠲᠥᠷᠥᠭᠰᠡᠨ ᠬᠡᠦᠬᠡᠨ ‍ᠦ ᠎ᠪᠡᠨ
ᠬᠥ᠋ ᠬᠠᠷᠠᠬᠠᠨ ᠭᠡᠵᠢᠭᠡ ᠎ᠶ᠋ᠢ ᠨᠢ
ᠥᠬᠥᠭᠡᠷᠳᠡᠨ ᠲᠠᠭᠠᠯᠠᠨ ᠢᠯᠪᠢᠭᠰᠡᠭᠡᠷ
ᠬᠥᠭᠰᠢᠨ ᠢᠩᠭᠢᠵᠦ ᠬᠡᠯᠡᠯ᠎ᠡ ᠄
《 ᠥᠨᠢᠷ ‍ᠦᠨ ᠬᠥᠪᠡᠭᠦᠨ ᠵᠢᠷᠭᠠᠯᠰᠠᠢᠨ
ᠦᠨᠡᠨᠴᠢ ᠰᠢᠳᠤᠷᠭᠤ ᠬᠦᠦ ᠶᠤᠮ ᠃
ᠬᠥᠳᠡᠯᠮᠦᠷᠢ ᠶᠢᠨ ᠵᠢᠱ᠌ᠢᠶᠡᠴᠢ ᠪᠣᠯᠤᠯ᠎ᠠ ᠭᠡᠳ
ᠬᠥᠮᠦᠨ ᠪᠦᠬᠦᠨ ᠬᠠᠢᠷᠠᠯᠠᠳᠠᠭ ᠶᠤᠮ ᠃
ᠵᠢᠷᠭᠠᠯᠲᠠᠢ ᠴᠠᠭ ‍ᠤᠨ ᠬᠡᠦᠬᠡᠳ ᠪᠠᠢᠨ᠎ᠠ
ᠵᠠᠶᠠᠭᠠᠲᠠᠢ ᠲᠥᠷᠥᠭᠰᠡᠨ ᠪᠠᠭᠠᠴᠤᠳ ᠪᠠᠢᠨ᠎ᠠ ᠃
ᠵᠠᠩ ᠵᠠᠩ ‍ᠢᠶ᠋ᠠᠨ ᠮᠡᠳᠡᠯᠴᠡᠪᠡᠯ
ᠵᠠ ᠶᠠᠭᠠᠬᠢᠬᠤ ᠪᠤᠢ ᠂ ᠳᠤᠷ᠎ᠠ ᠎ᠪᠠᠷ ‍ᠢᠶ᠋ᠠᠨ ᠪᠣᠯᠤᠭ 》 ᠭᠡᠯ᠎ᠡ ᠃
《 ᠡᠷᠦᠢ ᠬᠤᠷᠤᠢ ᠦᠭᠡᠢ ᠶᠠᠷᠢᠭᠠᠳ ᠯᠠ
ᠡᠵᠢ ᠳᠡᠩᠳᠡ ᠰᠣᠯᠢᠶᠠᠷᠠᠬᠤ ᠶᠤᠮ ᠃
ᠬᠥᠮᠦᠨ ‍ᠦ ᠬᠦᠦ ᠰᠠᠢᠨ ᠴᠤ᠌ ᠪᠠᠢᠬ
ᠨᠠᠳᠠ ᠎ᠳ᠋ᠤ᠌ ᠶᠠᠭᠤᠨ ‍ᠤ ᠬᠠᠮᠢᠶ᠎ᠠ ᠶᠤᠮ 》 ᠭᠡᠵᠦ
ᠤᠲᠠᠰᠤ ᠵᠡᠭᠦᠦ ᠎ᠪᠡᠨ ᠲᠠᠲᠠᠯᠠᠭᠠᠳ
ᠠᠭᠤᠷᠯᠠᠭᠰᠠᠨ ᠮᠠᠶᠢᠭ᠋ ᠭᠠᠷᠭᠠᠭᠰᠠᠨ ᠴᠤ᠌
《 ᠤᠤᠬᠠᠢ ᠦᠨᠡᠬᠡᠷ ᠲᠡᠢᠮᠦ 》 ᠭᠡᠰᠡᠨ ᠰᠢᠭ᠌
ᠤᠯᠠᠢᠬᠰᠠᠨ ᠴᠢᠷᠠᠢ ᠨᠢ ᠪᠠᠶᠠᠷᠲᠠᠢ ᠯᠠ ᠪᠠᠢᠨ᠎ᠠ ᠃
ᠰᠢᠯᠢ ᠎ᠶ᠋ᠢᠨ ᠨᠣᠭᠣᠭᠠᠨ ᠳᠡᠨᠵᠢᠨ ᠳᠡᠭᠡᠷ᠎ᠡ
ᠰᠢᠨᠡᠬᠡᠨ ᠴᠠᠭᠠᠨ ᠭᠡᠷ ᠎ᠲᠡᠬᠢ
ᠰᠡᠷᠭᠦᠯᠡᠩ ᠵᠠᠩ ᠎ᠲᠠᠢ ᠬᠡᠦᠬᠡᠨ ‍ᠦ
ᠰᠡᠳᠬᠢᠯ ‍ᠢ ᠨᠢ ᠶᠡᠷᠦ ᠮᠡᠳᠡᠭᠰᠡᠨ ᠦᠭᠡᠢ
ᠬᠥᠬᠡ ᠲᠣᠷᠭᠠᠨ ᠲᠡᠷᠯᠢᠭ ‍ᠢᠶ᠋ᠡᠨ
ᠬᠦᠳᠡᠷ ᠰᠠᠢᠬᠠᠨ ᠣᠶᠣᠵᠤ ᠪᠠᠢᠨ᠎ᠠ ᠃
ᠬᠥᠭᠡᠷᠦᠬᠦᠨ ᠲᠥᠷᠥᠭᠰᠡᠨ ᠭᠡᠥᠭᠡᠨ ᠭᠤᠸᠠᠢ
ᠬᠡᠨ ᠎ᠳ᠋ᠦ᠍ ᠴᠦ᠍ ᠣᠶᠣᠵᠤ ᠠᠬᠤ ᠎ᠶ᠋ᠢ ᠪᠤᠤ ᠮᠡᠳᠡ ᠃