ᠡᠵᠡᠨᠡ ᠪᠠ ᠡᠯᠡᠰᠦᠨ ᠰᠢᠭᠤᠷᠭᠠ- ᠭ· ᠴᠢᠩᠪᠠᠭᠠᠲᠤᠷЭзэнэ ба элсэн шуурга-Г·Чинбаатар
552 ᠭ· ᠴᠢᠩᠪᠠᠭᠠᠲᠤᠷ
—《ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠭᠠᠯ ᠠᠶᠠᠨ》 ᠬᠡᠮᠡᠬᠦ ᠰᠤᠷᠪᠤᠯᠵᠢᠯᠠᠨ ᠮᠡᠳᠡᠭᠡᠯᠡᠬᠦ ᠠᠵᠢᠯᠯᠠᠭᠠ ᠶ᠋ᠢᠨ ᠰᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠶ᠋ᠢ ᠬᠥᠲᠥᠯᠦᠭᠰᠡᠨ ᠰᠢᠭᠦᠷᠭᠡᠢ ᠰᠡᠳᠬᠢᠭᠳᠡᠯ (ᠬᠣᠶᠠᠷ)
ᠮᠠᠨ ᠤ᠋ ᠰᠤᠷᠪᠤᠯᠵᠢᠯᠠᠭᠴᠢᠳ2006 ᠣᠨ ᠤ᠋6 ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌ ᠠᠯᠠᠱᠠ ᠠᠢᠮᠠᠭ ᠤ᠋ᠨ ᠡᠵᠡᠨᠡ ᠬᠤᠰᠢᠭᠤᠨ ᠠ᠋ᠴᠠ ᠨᠡᠭᠦᠳᠡᠯ ᠰᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠬᠢᠭᠰᠡᠨ ᠪᠢᠯᠡ! ᠨᠡᠪᠲᠡᠷᠡᠭᠦᠯᠭᠡ ᠶ᠋ᠢᠨ ᠳᠠᠷᠠᠭᠠ ᠭᠣᠮᠣᠳᠠᠬᠤ᠂ ᠬᠠᠷᠠᠭᠤᠰᠠᠬᠤ᠂ ᠦᠷᠦ ᠡᠪᠡᠳᠬᠦ᠂ ᠠᠭᠤᠷᠯᠠᠬᠤ᠂ ᠪᠤᠬᠢᠨᠢᠳᠤᠬᠤ᠁ ᠶᠠᠩᠵᠤ ᠶ᠋ᠢᠨ ᠰᠡᠳᠬᠢᠯᠭᠡ ᠨᠠᠮᠠᠶ᠋ᠢ ᠨᠠᠷᠮᠠᠵᠤ᠂ ᠣᠯᠠᠨ ᠶᠠᠭᠤᠮᠠ ᠪᠣᠳᠣᠭᠳᠠᠭᠤᠯᠤᠭᠰᠠᠨ ᠰᠠᠨ᠁
᠁
ᠰᠠᠷᠠ ᠨᠠᠷᠠᠨ ᠤ᠋ ᠳᠤᠮᠳᠠ
ᠰᠡᠭᠦᠳᠡᠷ ᠨᠢ ᠪᠦᠲᠦᠨ ᠲᠣᠣᠷᠠᠢ ᠮᠢᠨᠢ
ᠡᠵᠡᠨᠡ ᠭᠣᠪᠢ ᠶ᠋ᠢᠨ
ᠡᠯᠢᠭᠡᠨ ᠳ᠋ᠦ᠍ ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠲᠣᠷᠭᠤᠳ ᠮᠢᠨᠢ
᠁
ᠠᠯᠠᠱᠠ ᠠᠢᠮᠠᠭ ᠤ᠋ᠨ ᠬᠠᠮᠤᠭ ᠤ᠋ᠨ ᠪᠠᠷᠠᠭᠤᠨ ᠵᠠᠬᠠ ᠳ᠋ᠤ᠌ ᠪᠠᠢᠭᠠ ᠡᠵᠡᠨᠡ ᠬᠣᠰᠢᠭᠤ ᠪᠣᠯ11᠂4 ᠲᠦᠮᠡᠨ ᠬᠠᠪᠲᠠᠭᠠᠢ ᠳᠥᠷᠪᠡᠯᠵᠢᠨ ᠺᠢᠯᠣᠮᠧᠲ᠋ᠷ ᠲᠠᠯᠠᠪᠠᠢ ᠲᠠᠢ ᠪᠠᠷ ᠢ᠋ᠶ᠋ᠠᠨ ᠮᠠᠨ ᠤ᠋ ᠣᠷᠣᠨ ᠤ᠋ ᠬᠠᠮᠤᠭ ᠤ᠋ᠨ
ᠠᠭᠤᠳᠠᠮ ᠨᠤᠲᠤᠭ ᠲᠠᠢ ᠬᠣᠰᠢᠭᠤ ᠶᠤᠮ᠃3500 ᠵᠢᠯ ᠦ᠋ᠨ ᠡᠮᠦᠨᠡ ᠰᠢᠨᠡ ᠬᠠᠭᠤᠴᠢᠨ ᠴᠢᠯᠠᠭᠤᠨ ᠵᠡᠪᠰᠡᠭ ᠦ᠋ᠨ ᠠᠭᠤᠯᠵᠠᠪᠤᠷᠢ ᠣᠷᠣᠨ ᠪᠠᠢᠭᠰᠠᠨ ᠡᠵᠡᠨᠡ ᠣᠷᠣᠨ ᠨᠢ ᠰᠢᠶᠠ᠂ ᠱᠠᠩ᠂ ᠵᠧᠦ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠦᠰᠥ᠋ᠨ ᠳ᠋ᠦ᠍ ᠵᠠᠬᠢᠷᠤᠭᠳᠠᠵᠤ᠂ ᠴᠢᠨ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠤ᠌ ᠳᠠ ᠶᠤᠸᠠᠢ ᠱᠢ ᠶ᠋ᠢᠨ ᠵᠠᠬᠢᠷᠭᠠᠨ ᠳ᠋ᠤ᠌ ᠪᠠᠢᠵᠤ᠂ ᠪᠠᠷᠠᠭᠤᠨ ᠬᠠᠨ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠾᠦᠩᠨᠦ ᠶ᠋ᠢᠨ ᠪᠡᠯᠴᠢᠭᠡᠷ ᠪᠠᠢᠪᠠ᠃ ᠣᠨ ᠲᠣᠭᠠᠯᠠᠯ ᠤ᠋ᠨ1004—1008 ᠣᠨ ᠳ᠋ᠤ᠌ ᠪᠠᠷᠠᠭᠤᠨ ᠰᠢᠶᠠ ᠤᠯᠤᠰ ᠲᠤ ᠵᠠᠬᠢᠷᠤᠭᠳᠠᠨ ᠮᠠᠰᠢ ᠬᠥᠭᠵᠢᠯ ᠲᠡᠢ ᠣᠷᠣᠨ ᠪᠣᠯᠵᠠᠢ᠃ ᠶᠤᠸᠠᠨ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠡᠵᠡᠨᠡ ᠶ᠋ᠢᠨ ᠵᠢᠦᠢ ᠶᠠᠨ ᠣᠷᠣᠨ ᠨᠢ ᠭᠠᠵᠠᠷ ᠵᠦᠢ᠂ ᠴᠡᠷᠢᠭ ᠦ᠋ᠨ ᠶᠠᠪᠤᠳᠠᠯ ᠤ᠋ᠨ ᠴᠢᠬᠤᠯᠠ ᠣᠷᠣᠨ ᠪᠠᠢᠵᠤ᠂ ᠤᠯᠤᠰ ᠲᠥᠷᠥ᠂ ᠠᠵᠤ ᠠᠬᠤᠢ᠂ ᠰᠣᠶᠣᠯ ᠤ᠋ᠨ ᠲᠠᠯᠠ ᠪᠠᠷ ᠰᠢᠨᠡ ᠬᠥᠭᠵᠢᠯ ᠲᠡᠢ ᠪᠣᠯᠵᠠᠢ᠃ ᠶᠡᠷᠦ ᠨᠢ ᠵᠢᠦᠢ ᠶᠠᠨ ᠢ᠋ ᠠᠯᠢ ᠴᠤ ᠲᠥᠷᠥ ᠶ᠋ᠢᠨ ᠦᠶᠡ ᠳ᠋ᠦ᠍ ᠴᠢᠬᠤᠯᠠᠴᠢᠯᠠᠨ ᠦᠵᠡᠵᠦ ᠪᠠᠢᠵᠠᠢ᠃ ᠡᠭᠦᠨ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠠᠯᠳᠠᠷᠲᠠᠢ ᠨᠢ ᠱᠦᠢ ᠶ᠋ᠢᠨ ᠭᠤᠸᠠᠨ᠂ ᠬᠠᠷᠠ ᠬᠣᠲᠠ᠂ ᠤᠯᠠᠭᠠᠨ ᠬᠣᠲᠠ᠂ ᠨᠣᠭᠣᠭᠠᠨ ᠬᠣᠲᠠ ᠶᠤᠮ᠃ ᠣᠨ ᠲᠣᠭᠠᠯᠠᠯ ᠤ᠋ᠨ1753 ᠣᠨ ᠳ᠋ᠤ᠌ ᠴᠢᠩ ᠤᠯᠤᠰ《ᠡᠵᠡᠨᠡ ᠶ᠋ᠢᠨ ᠬᠠᠭᠤᠴᠢᠨ ᠲᠣᠷᠭᠤᠳ ᠤ᠋ᠨ ᠣᠨᠴᠠᠭᠠᠢ ᠬᠣᠰᠢᠭᠤ》 ᠶ᠋ᠢ ᠪᠠᠢᠭᠤᠯᠵᠤ᠂ ᠵᠠᠰᠠᠭ ᠲᠠᠮᠠᠭᠠ ᠬᠠᠢᠷᠠᠯᠠᠵᠠᠢ᠃1949 ᠣᠨ ᠤ᠋9 ᠰᠠᠷᠠ ᠶ᠋ᠢᠨ27 ᠳ᠋ᠤ᠌ ᠵᠠᠰᠠᠭ ᠵᠢᠶᠦ᠋ᠨ ᠸᠠᠩ ᠲᠠᠸᠠᠩᠵᠠᠪ ᠡᠪ ᠬᠠᠮᠲᠤ ᠨᠠᠮ ᠢ᠋ ᠳᠠᠭᠠᠬᠤ ᠪᠠᠨ ᠢᠯᠡᠷᠬᠡᠢᠯᠡᠵᠡᠢ᠃ ᠡᠢᠨ ᠬᠦ᠌1951 ᠣᠨ ᠤ᠋1 ᠰᠠᠷᠠ ᠳ᠋ᠤ᠌ ᠡᠵᠡᠨᠡ ᠬᠤᠰᠢᠭᠤᠨ ᠤ᠋ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠪᠠᠢᠭᠤᠯᠤᠭᠳᠠᠵᠤ᠂1979 ᠣᠨ ᠤ᠋7 ᠰᠠᠷᠠ ᠶ᠋ᠢᠨ1 ᠳ᠋ᠦ᠍ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ᠋ ᠬᠠᠷᠢᠶᠠᠨ ᠳ᠋ᠤ᠌ ᠣᠷᠣᠵᠤ᠂1980 ᠣᠨ ᠳ᠋ᠤ᠌ ᠠᠯᠠᠱᠠ ᠠᠢᠮᠠᠭ ᠤ᠋ᠨ ᠵᠠᠬᠢᠷᠭᠠᠨ ᠳ᠋ᠤ᠌ ᠣᠷᠣᠵᠠᠢ᠃ ᠣᠳᠣ ᠡᠨᠳᠡ ᠲᠣᠷᠭᠤᠳ᠂ ᠬᠠᠯᠬᠠᠴᠤᠳ ᠢ᠋ᠶ᠋ᠠᠷ ᠭᠣᠣᠯᠯᠠᠭᠰᠠᠨ ᠮᠣᠩᠭᠣᠯᠴᠤᠳ ᠰᠠᠭᠤᠷᠢᠰᠢᠵᠤ ᠪᠣᠢ᠃ ᠡᠵᠡᠨᠡ ᠲᠣᠷᠭᠤᠳ ᠢ᠋ ᠰᠢᠨᠡ᠂ ᠬᠠᠭᠤᠴᠢᠨ ᠲᠣᠷᠭᠤᠳ ᠭᠡᠵᠦ ᠬᠤᠪᠢᠶᠠᠵᠤ ᠨᠡᠷᠡᠯᠡᠳᠡᠭ᠃ ᠴᠢᠩ ᠤᠯᠤᠰ ᠤ᠋ᠨ ᠨᠠᠢᠷᠠᠯᠲᠤ ᠲᠥᠪ ᠦ᠋ᠨ9 ᠳ᠋ᠦ᠍ᠭᠡᠷ ᠣᠨ᠂1731 ᠣᠨ ᠳ᠋ᠤ᠌ ᠬᠣᠱᠣᠢ ᠪᠠᠢᠰᠠ ᠳᠠᠨᠵᠥ᠋ᠩ ᠬᠠᠷᠢᠶᠠᠲᠤ ᠢᠷᠡᠭᠡᠳ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠡᠵᠡᠨᠡ ᠭᠣᠣᠯ ᠤ᠋ᠨ ᠰᠠᠪᠠ ᠳᠠᠭᠠᠤ ᠨᠤᠲᠤᠭᠯᠠᠭᠰᠠᠨ ᠪᠠ ᠲᠩᠷᠢ ᠲᠡᠳᠬᠦᠭᠴᠢ ᠶ᠋ᠢᠨ36 ᠣᠨ᠂1771 ᠣᠨ ᠳ᠋ᠤ᠌ ᠣᠷᠣᠰ ᠤ᠋ᠨ ᠢᠵᠢᠯ ᠮᠥᠷᠡᠨ ᠡᠴᠡ ᠰᠢᠨᠵᠢᠶᠠᠩ ᠳ᠋ᠤ᠌ ᠢᠷᠡᠭᠰᠡᠨ ᠲᠣᠷᠭᠤᠳ ᠤ᠋ᠳ ᠤ᠋ᠨ ᠨᠢᠭᠡ ᠬᠡᠰᠡᠭ—29 ᠡᠷᠦᠬᠡ1821 ᠣᠨ ᠤ᠋ ᠦᠶᠡ ᠳ᠋ᠦ᠍ ᠡᠵᠡᠨᠡ ᠳ᠋ᠦ᠍ ᠢᠷᠡᠵᠦ ᠨᠤᠲᠤᠭᠯᠠᠭᠰᠠᠨ ᠨᠢ ᠳᠠᠷᠤᠢ ᠬᠠᠭᠤᠴᠢᠨ ᠲᠣᠷᠭᠤᠳ᠃ ᠰᠢᠨᠵᠢᠶᠠᠩ ᠤ᠋ᠨ ᠪᠤᠯᠠᠭᠠᠨ ᠭᠣᠣᠯ ᠠ᠋ᠴᠠ1908—1934 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠳᠥᠷᠪᠡᠨ ᠡᠷᠦᠬᠡ ᠲᠣᠷᠭᠤᠳ ᠢᠷᠡᠵᠦ ᠨᠤᠲᠤᠭᠯᠠᠭᠰᠠᠨ ᠨᠢ ᠰᠢᠨᠡ ᠲᠣᠷᠭᠤᠳ ᠪᠢᠯᠡ! ᠡᠭᠦᠨ ᠡᠴᠡ ᠭᠠᠳᠠᠨᠠ1920—1940 ᠣᠨ ᠤ᠋ ᠬᠣᠭᠣᠷᠣᠨᠳᠣ ᠮᠣᠩᠭᠣᠯ ᠤᠯᠤᠰ ᠠ᠋ᠴᠠ70—80 ᠡᠷᠦᠬᠡ ᠬᠠᠯᠬᠠᠴᠤᠳ ᠨᠡᠭᠦᠳᠡᠯᠯᠡᠨ ᠢᠷᠡᠵᠦ ᠨᠤᠲᠤᠭᠯᠠᠭᠠᠳ ᠥᠨᠥ ᠪᠣᠯᠵᠠᠢ᠃
ᠴᠠᠭ ᠤ᠋ᠨ ᠬᠦᠷᠳᠦ ᠡᠷᠭᠢᠭᠰᠡᠭᠡᠷ21 ᠳ᠋ᠦ᠍ᠭᠡᠷ ᠵᠠᠭᠤᠨ ᠤ᠋ ᠪᠣᠱᠣᠭᠠ ᠶ᠋ᠢ ᠳᠠᠪᠠᠯᠠ᠃ ᠭᠡᠪᠡᠴᠦ ᠥᠩ ᠲᠡᠢ ᠰᠠᠢᠬᠠᠨ ᠮᠣᠩᠭᠣᠯ ᠤ᠋ᠨ ᠥᠨᠳᠥᠷᠯᠢᠭ ᠦ᠋ᠨ ᠠᠮᠢ ᠠᠬᠤᠢ ᠰᠡᠭᠦᠯ ᠦ᠋ᠨ ᠵᠢᠯ ᠦ᠋ᠳ ᠲᠦ᠍ ᠡᠪᠳᠡᠭᠳᠡᠵᠦ᠂ ᠤᠯᠠᠮᠵᠢᠯᠠᠯᠲᠤ ᠦᠢᠯᠡᠳᠪᠦᠷᠢᠯᠡᠯ ᠦ᠋ᠨ ᠠᠷᠭᠠ ᠴᠤ ᠲᠣᠭᠲᠠᠯᠴᠠᠭᠠ ᠪᠠᠨ ᠠᠯᠳᠠᠭᠰᠠᠨ ᠢ᠋ᠶ᠋ᠠᠷ《ᠰᠣᠶᠣᠯ ᠢ᠋ᠶ᠋ᠠᠨ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠳᠡᠭ ᠬᠥᠨᠳᠡᠭᠦᠷ ᠲᠡᠢ ᠠᠰᠠᠭᠤᠳᠠᠯ ᠪᠢᠳᠡᠨ ᠲᠡᠢ ᠨᠢᠭᠤᠷᠯᠠᠭᠰᠠᠨ ᠪᠢᠯᠡ! ᠦᠨᠡᠬᠡᠷ ᠪᠢᠳᠡ ᠰᠣᠶᠣᠯ ᠤᠯᠠᠮᠵᠢᠯᠠᠯ ᠢ᠋ᠶ᠋ᠠᠨ ᠶᠠᠭᠠᠬᠢᠬᠤ ᠪᠣᠢ? ᠨᠤᠷᠠ ᠡᠯᠡᠰᠦᠨ ᠳ᠋ᠦ᠍ ᠳᠠᠷᠤᠭᠳᠠᠮᠠᠷ ᠪᠠᠢᠭᠠ ᠬᠠᠷᠠ ᠬᠣᠲᠠ ᠶ᠋ᠢᠨ ᠪᠠᠭᠤᠷᠢ ᠰᠢᠭ᠋᠂ ᠰᠢᠷᠭᠢᠨ ᠬᠠᠲᠠᠭᠰᠠᠨ ᠵᠢᠦᠢ ᠶᠠᠨ ᠳᠠᠯᠠᠢ ᠰᠢᠭ᠂ ᠥᠭᠢᠷᠡᠨ ᠦᠬᠦᠵᠦ ᠪᠣᠢ ᠲᠣᠣᠷᠠᠢ ᠤᠯᠢᠶᠠᠰᠤ ᠰᠢᠭ᠋᠂ ᠤᠷᠤᠰᠬᠠᠯ ᠲᠠᠰᠤᠷᠠᠭᠰᠠᠨ ᠬᠠᠷᠠ ᠭᠣᠣᠯ ᠰᠢᠭ᠋᠁ ᠲᠡᠦᠬᠡ ᠶ᠋ᠢᠨ ᠬᠠᠭᠤᠳᠠᠰᠤᠨ ᠠ᠋ᠴᠠ ᠠᠷᠴᠢᠭᠳᠠᠨ ᠪᠠᠯᠠᠷᠠᠵᠤ᠂ ᠳᠣᠮᠣᠭ ᠪᠣᠯᠤᠨ ᠡᠯᠡᠷᠡᠵᠦ᠂ ᠳᠠᠭᠤᠤ ᠪᠣᠯᠤᠨ ᠮᠡᠭᠰᠢᠬᠦ ᠶᠦᠮ ᠭᠡᠵᠦ ᠤᠤ? ᠬᠥᠳᠡᠭᠡ ᠮᠢᠨᠢ ᠡᠵᠡᠭᠦᠢ ᠬᠣᠴᠣᠷᠴᠤ᠂ ᠪᠢᠳᠡ ᠬᠣᠲᠠ ᠬᠡᠮᠡᠬᠦ ᠰᠠᠭᠤᠷᠢᠰᠢᠯ ᠰᠣᠶᠣᠯ ᠤ᠋ᠨ ᠳᠠᠯᠠᠢ ᠳ᠋ᠤ᠌ ᠰᠢᠪᠡᠷ ᠦᠬᠡᠷ ᠰᠢᠭ ᠠᠭᠤᠰᠤᠨ ᠵᠢᠪᠴᠦ᠂ ᠮᠠᠯ ᠰᠦᠷᠦᠭ ᠮᠢᠨᠢ ᠡᠨᠡ ᠨᠤᠲᠤᠭ ᠤ᠋ᠨ ᠠᠮᠢᠲᠠᠨ ᠭᠥᠷᠥᠭᠡᠰᠦ ᠰᠢᠭ ᠬᠣᠪᠣᠷᠳᠠᠨ ᠴᠥᠭᠡᠷᠡᠵᠦ᠂ ᠦᠷᠡ ᠬᠣᠢᠴᠢᠰ ᠮᠢᠨᠢ ᠥᠭᠡᠷᠡ ᠰᠣᠶᠣᠯ ᠤ᠋ᠨ ᠰᠢᠬᠢᠷ ᠢ᠋ ᠬᠦᠯᠬᠦᠭᠰᠡᠭᠡᠷ ᠥᠰᠬᠦ ᠶᠦᠮ ᠭᠡᠵᠦ ᠤᠤ? ᠲᠡᠦᠬᠡ ᠪᠡᠨ ᠪᠢᠳᠡ ᠶᠠᠭᠠᠬᠢᠵᠤ ᠦᠷᠭᠦᠯᠵᠢᠯᠡᠭᠦᠯᠦᠨ ᠪᠢᠴᠢᠬᠦ ᠶᠦᠮ ᠪᠣᠢ? ᠪᠢ ᠰᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠪᠡᠨ ᠪᠠᠷᠠᠭᠠᠳ ᠬᠡᠨ ᠨᠢᠭᠡᠨ ᠬᠥᠮᠦᠨ ᠡᠴᠡ ᠢᠩᠭᠢᠵᠦ ᠬᠠᠰᠬᠢᠴᠢᠨ ᠠᠰᠠᠭᠤᠮᠠᠷ ᠰᠠᠨᠠᠭᠳᠠᠭᠰᠠᠨ᠁᠃《ᠤᠰᠤ ᠤᠰᠤᠨ ᠠ᠋ᠴᠠ ᠲᠤᠩᠭᠠᠯᠠᠭ᠂ ᠡᠵᠡᠨᠡ ᠲᠤᠤᠯᠠ ᠶ᠋ᠢᠨ ᠤᠰᠤᠨ᠂ ᠡᠪᠡᠰᠦ ᠡᠪᠡᠰᠦᠨ ᠡᠴᠡ ᠦᠯᠡᠮᠵᠢ᠂ ᠶᠣᠩᠬᠣᠷ ᠨᠡᠷᠡ ᠲᠡᠢ ᠡᠪᠡᠰᠦᠨ᠂ ᠥᠩ ᠲᠡᠢ ᠵᠤᠨ ᠲᠠᠢ ᠨᠤᠲᠤᠭ ᠲᠤ᠂ ᠦᠶᠡ ᠦᠶᠡ ᠳ᠋ᠡᠭᠡᠨ ᠲᠣᠭᠲᠠᠶᠠ᠂ ᠦᠢᠯᠡ ᠪᠡᠨ ᠰᠠᠢᠬᠠᠨ ᠪᠦᠲᠦᠭᠡᠭᠡᠳ᠂ ᠦᠷᠭᠦᠯᠵᠢᠳᠡ ᠬᠠᠮᠲᠤ ᠳ᠋ᠠᠭᠠᠨ ᠵᠢᠷᠭᠠᠶᠠ》 ᠭᠡᠰᠡᠨ ᠡᠵᠡᠨᠡ ᠠᠷᠠᠳ ᠤ᠋ᠨ ᠳᠠᠭᠤᠤ ᠪᠣᠢ᠃ ᠲᠡᠢᠮᠦ ᠠ᠋! ᠡᠵᠡᠨᠡ ᠪᠤᠮᠪᠠ ᠶ᠋ᠢᠨ ᠣᠷᠣᠨ ᠰᠢᠭ᠋ ᠨᠤᠲᠤᠭ ᠪᠠᠢᠭᠰᠠᠨ ᠨᠢ ᠦᠨᠡᠨ ᠭᠡᠳᠡᠭ ᠢ᠋ ᠲᠡᠦᠬᠡᠨ ᠲᠡᠮᠳᠡᠭᠯᠡᠯ ᠪᠤᠶᠤ ᠨᠠᠰᠤᠲᠠᠢᠴᠤᠳ ᠤ᠋ᠨ ᠶᠠᠷᠢᠶᠠ ᠭᠡᠷᠡᠴᠢᠯᠡᠵᠦ ᠪᠠᠢᠨᠠ᠃ ᠭᠡᠪᠡᠴᠦ ᠲᠡᠦᠬᠡ ᠪᠣᠯᠤᠨ ᠣᠳᠣ ᠶ᠋ᠢᠨ ᠬᠠᠷᠢᠴᠠᠭᠤᠯᠤᠯ ᠳᠤᠮᠳᠠ ᠠ᠋ᠴᠠ ᠪᠢᠳᠡ ᠠᠰᠤᠷᠤ ᠶᠡᠬᠡ ᠭᠤᠨᠢᠭ ᠢ᠋ ᠯᠡ ᠰᠡᠳᠬᠢᠯ ᠳ᠋ᠡᠭᠡᠨ ᠠᠪᠴᠤ ᠦᠯᠡᠳᠡᠬᠦ ᠪᠣᠯᠤᠨᠠ᠃
ᠳᠡᠯᠡᠬᠡᠢ ᠶ᠋ᠢᠨ ᠭᠤᠷᠪᠠᠨ ᠶᠡᠬᠡ ᠲᠣᠣᠷᠠᠢ ᠶ᠋ᠢᠨ ᠣᠢ ᠶ᠋ᠢᠨ ᠨᠢᠭᠡ ᠪᠣᠯᠤᠭᠰᠠᠨ ᠡᠵᠡᠨᠡ ᠲᠣᠣᠷᠠᠢ ᠣᠢ ᠨᠢ20 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠲᠠᠪᠢᠭᠠᠳ ᠣᠨ ᠳ᠋ᠤ᠌75 ᠲᠦᠮᠡᠨ ᠮᠦ᠍ ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ30 ᠲᠦᠮᠡᠨ ᠮᠦ᠍ ᠪᠣᠯᠤᠨ ᠪᠠᠭᠠᠰᠤᠭᠰᠠᠨ; ᠤᠯᠠᠭᠠᠨ ᠰᠤᠬᠠᠢ ᠶ᠋ᠢᠨ ᠣᠢ225 ᠲᠦᠮᠡᠨ ᠮᠦ᠍ ᠪᠠᠢᠭᠰᠠᠨ ᠢ᠋ᠶ᠋ᠠᠨ150 ᠲᠦᠮᠡᠨ ᠮᠦ᠍ ᠪᠣᠯᠤᠭᠰᠠᠨ; ᠬᠡᠭᠡᠷᠡ ᠶ᠋ᠢᠨ ᠠᠮᠢᠲᠠᠨ ᠦᠨᠡᠭᠡ᠂ ᠴᠢᠨᠣᠠ᠂ ᠵᠡᠭᠡᠷᠡ᠂ᠠᠷᠭᠠᠯᠢ᠂ ᠶᠠᠩᠭᠢᠷ᠂ ᠬᠤᠯᠠᠨ᠂ ᠬᠠᠪᠲᠠᠭᠠᠢ᠂ ᠵᠣᠷᠬᠣᠨ᠂ ᠰᠢᠯᠦᠭᠦᠰᠦ᠂ ᠲᠠᠤᠯᠠᠢ᠂ ᠭᠤᠷᠭᠤᠤᠯ᠁ ᠵᠡᠷᠭᠡ180 ᠭᠠᠷᠤᠢ ᠲᠥᠷᠥᠯ ᠪᠠᠢᠭᠰᠠᠨ ᠪᠣᠯ ᠣᠳᠣ ᠣᠯᠠᠩᠬᠢ ᠨᠢ ᠦᠨᠳᠦᠰᠦ ᠲᠠᠰᠤᠷᠠᠭᠰᠠᠨ; ᠡᠵᠡᠨᠡ ᠶ᠋ᠢᠨ ᠨᠣᠭᠣᠭᠠᠨ ᠪᠦᠷᠢᠳᠦ3.2 ᠲᠦᠮᠡᠨ ᠬᠠᠪᠲᠠᠭᠠᠢ ᠳᠥᠷᠪᠡᠯᠵᠢᠨ ᠺᠢᠯᠣᠮᠧᠲ᠋ᠷ ᠪᠠᠢᠭᠰᠠᠨ 2001 ᠪᠣᠯᠬᠤ ᠳ᠋ᠤ᠌ ᠰᠠᠶᠢ0.332 ᠲᠦᠮᠡᠨ ᠬᠠᠪᠲᠠᠭᠠᠢ ᠳᠥᠷᠪᠡᠯᠵᠢᠨ ᠺᠢᠯᠣᠮᠧᠲ᠋ᠷ ᠦᠯᠡᠳᠡᠭᠰᠡᠨ;130 ᠭᠤᠴᠢ ᠭᠠᠷᠤᠢ ᠲᠥᠷᠥᠯ ᠦ᠋ᠨ ᠡᠪᠡᠰᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠳᠣ 30 ᠭᠠᠷᠤᠢᠬᠠᠨ ᠲᠥᠷᠥᠯ ᠪᠣᠯᠤᠭᠰᠠᠨ᠃ ᠵᠢᠷᠠᠭᠠᠳ ᠣᠨ ᠤ᠋ ᠠᠯᠠᠱᠠ ᠠᠭᠤᠯᠠ ᠶ᠋ᠢᠨ 36 ᠲᠦᠮᠡᠨ ᠮᠦ᠍ ᠪᠠᠢᠭᠠᠯᠢ ᠶ᠋ᠢᠨ ᠣᠢᠲᠤ ᠣᠷᠣᠨ ᠳ᠋ᠤ᠌ 248 ᠭᠣᠣᠯ ᠭᠣᠷᠣᠬᠠ ᠲᠠᠢ ᠪᠠᠢᠭᠰᠠᠨ ᠢ᠋ ᠨᠤᠲᠤᠭ ᠤ᠋ᠨ ᠪᠤᠭᠤᠷᠤᠯᠴᠤᠳ ᠳᠤᠷᠠᠰᠴᠤ ᠪᠣᠢ᠃ ᠭᠡᠪᠡᠴᠦ ᠣᠳᠣ ᠳᠥᠩᠭᠡᠵᠦ 13 ᠯᠡ ᠦᠯᠡᠳᠡᠭᠡᠳ ᠪᠣᠢ᠃ ᠲᠦᠷᠦᠭᠦᠦ ᠬᠡᠳᠦᠨ ᠵᠢᠯ ᠡᠵᠡᠨᠡ ᠶ᠋ᠢᠨ ᠲᠡᠮᠡᠭᠡ ᠪᠦᠳᠦᠷᠢᠵᠦ ᠤᠨᠠᠪᠠᠯ ᠬᠥᠯ ᠨᠢ ᠬᠤᠭᠤᠷᠠᠳᠠᠭ ᠪᠣᠯᠤᠭᠰᠠᠨ᠂ ᠭᠠᠩ ᠭᠠᠴᠢᠭ ᠬᠡᠴᠡᠭᠦᠦ ᠦᠶᠡ ᠳ᠋ᠦ᠍ ᠠᠲᠠᠨ ᠲᠡᠮᠡᠭᠡ ᠶ᠋ᠢ50 ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠠᠪᠬᠤ ᠬᠥᠮᠦᠨ ᠦᠭᠡᠢ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠦᠭᠰᠡᠨ᠃2002.5.10 ᠤ᠋《ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠡᠳᠦᠷ ᠦ᠋ᠨ ᠰᠣᠨᠢᠨ 》 ᠢ᠋ ᠦᠨᠳᠦᠰᠦᠯᠡᠪᠡᠯ᠂ ᠢᠳᠡᠬᠦ ᠡᠪᠡᠰᠦ ᠦᠭᠡᠢ ᠪᠣᠯᠤᠭᠰᠠᠨ ᠢᠮᠠᠭᠠ ᠪᠡᠶᠡ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠣᠯᠤᠤᠷ ᠢ᠋ ᠵᠤᠯᠭᠠᠭᠠᠨ ᠢᠳᠡᠬᠦ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠠᠯᠠᠱᠠ ᠶ᠋ᠢᠨ ᠮᠠᠯᠴᠢᠳ ᠠᠷᠭᠠ ᠪᠤᠰᠤ ᠬᠤᠪᠴᠠᠰᠤ ᠣᠶᠣᠵᠤ ᠡᠮᠦᠰᠬᠡᠳᠡᠭ ᠪᠣᠯᠵᠠᠢ᠃ ᠵᠠᠷᠢᠮ ᠮᠠᠯᠴᠢᠳ80 ᠲᠡᠮᠡᠭᠡ ᠪᠡᠨ3 ᠲᠦᠮᠡᠨ ᠲᠥᠭᠥᠷᠢᠭ ᠢ᠋ᠶ᠋ᠡᠷ ᠬᠤᠳᠠᠯᠳᠤᠵᠤ ᠪᠠᠢᠭᠰᠠᠨ ᠲᠡᠦᠬᠡ ᠲᠡᠢ᠃ ᠡᠢᠨ ᠬᠦ᠌ ᠬᠠᠷᠠ ᠭᠣᠣᠯ ᠤ᠋ᠨ ᠳᠣᠣᠷᠠᠲᠤ ᠤᠷᠤᠰᠬᠠᠯ ᠳᠠᠭᠠᠤ ᠮᠠᠯ ᠴᠥᠭᠡᠷᠡᠵᠦ᠂ ᠮᠠᠯᠴᠢᠳ ᠠᠮᠢᠳᠤᠷᠠᠬᠤ ᠠᠷᠭᠠ ᠪᠠᠨ ᠣᠯᠵᠤ ᠶᠠᠳᠠᠨ ᠭᠠᠰᠠᠯᠵᠤ ᠪᠠᠢᠬᠤ ᠳ᠋ᠤ᠌ ᠬᠠᠷᠠ ᠭᠣᠣᠯ ᠤ᠋ᠨ ᠳᠤᠮᠳᠠ ᠤᠷᠤᠰᠬᠠᠯ ᠳᠠᠭᠠᠤ ᠳ᠋ᠠᠬᠢ ᠭᠠᠨᠰᠦ ᠮᠣᠵᠢ ᠶ᠋ᠢᠨ ᠵᠠᠩ ᠶᠧ᠂ ᠵᠢᠦ ᠴᠢᠤᠸᠠᠨ ᠤ᠋ ᠲᠠᠷᠢᠶᠠ157 ᠲᠦᠮᠡᠨ ᠮᠦ᠍ ᠪᠠᠢᠭᠰᠠᠨ ᠢ᠋ᠶ᠋ᠠᠨ 380 ᠲᠦᠮᠡᠨ ᠮᠦ᠍ ᠪᠣᠯᠤᠨ ᠨᠡᠮᠡᠭᠳᠡᠭᠰᠡᠨ᠃ ᠰᠣᠪ ᠨᠠᠭᠤᠷ ᠪᠣᠯᠤᠨ ᠭᠠᠰᠢᠭᠤᠨ ᠨᠠᠭᠤᠷ ᠢ᠋ ᠪᠠᠭᠲᠠᠭᠠᠳᠠᠭ ᠵᠢᠦᠢ ᠶᠠᠨ ᠨᠠᠭᠤᠷ2600 ᠬᠠᠪᠲᠠᠭᠠᠢ ᠳᠥᠷᠪᠡᠯᠵᠢᠨ ᠺᠢᠯᠣᠮᠧᠲ᠋ᠷ ᠲᠠᠯᠠᠪᠠᠢ ᠲᠠᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠪᠠᠷᠠᠭᠤᠨ ᠬᠣᠢᠲᠤ ᠬᠡᠰᠡᠭ ᠦ᠋ᠨ ᠬᠠᠮᠤᠭ ᠤ᠋ᠨ ᠲᠣᠮᠣ ᠨᠠᠭᠤᠷ ᠶᠤᠮ᠃ ᠭᠡᠪᠡᠴᠦ ᠰᠣᠪ ᠨᠠᠭᠤᠷ1992 ᠣᠨ ᠳ᠋ᠤ᠌᠂ ᠭᠠᠰᠢᠭᠤᠨ ᠨᠠᠭᠤᠷ1961 ᠣᠨ ᠳ᠋ᠤ᠌ ᠰᠢᠷᠭᠢᠭᠰᠡᠨ ᠪᠠᠢᠨᠠ᠃ ᠡᠵᠡᠨᠡ ᠭᠣᠣᠯ ᠤ᠋ᠨ ᠤᠰᠤ ᠵᠢᠯ ᠪᠦᠷᠢ7.3 ᠳ᠋ᠦᠩᠰᠢᠭᠤᠷ ᠪᠣᠰᠤᠭᠠ ᠳᠥᠷᠪᠡᠯᠵᠢᠨ ᠮᠧᠲ᠋ᠷ ᠪᠠᠢᠪᠠᠯ ᠰᠠᠶᠢ ᠬᠡᠷᠡᠭᠴᠡᠭᠡ ᠶ᠋ᠢ ᠬᠠᠩᠭᠠᠵᠤ ᠴᠢᠳᠠᠨᠠ ᠭᠡᠵᠦ ᠲᠤᠰᠬᠠᠢ ᠮᠡᠷᠭᠡᠵᠢᠯᠲᠡᠨ ᠦ᠌ ᠵᠢᠱ᠌ᠢᠯᠲᠡ ᠪᠣᠢ ᠪᠣᠯᠪᠠᠴᠤ ᠵᠢᠯ ᠪᠦᠷᠢ10 ᠳ᠋ᠦᠩᠰᠢᠭᠤᠷ ᠪᠣᠰᠤᠭᠠ ᠳᠥᠷᠪᠡᠯᠵᠢᠨ ᠮᠧᠲ᠋ᠷ ᠦ᠋ᠨ ᠬᠠᠩᠭᠠᠯᠲᠠ ᠨᠢ ᠡᠷᠡᠰ ᠢ᠋ᠶ᠋ᠡᠷ ᠪᠠᠭᠤᠷᠠᠨ 2001 ᠣᠨ ᠳ᠋ᠤ᠌ 3 ᠳ᠋ᠦᠩᠰᠢᠭᠤᠷ ᠪᠣᠰᠤᠭᠠ ᠳᠥᠷᠪᠡᠯᠵᠢᠨ ᠮᠧᠲ᠋ᠷ ᠯᠡ ᠪᠣᠯᠤᠭᠰᠠᠨ ᠭᠡᠵᠦ ᠪᠣᠳᠣᠭᠠᠴᠢ ᠳᠠ᠃ ᠬᠠᠷᠠ ᠭᠣᠣᠯ ᠨᠢ ᠲᠣᠣᠷᠠᠢ ᠶ᠋ᠢᠨ ᠣᠢ ᠳᠤᠮᠳᠠᠭᠤᠷ 19 ᠰᠠᠯᠪᠤᠷᠢ ᠪᠣᠯᠤᠨ ᠤᠷᠤᠰᠴᠤ᠂ ᠡᠵᠡᠨᠡ ᠶ᠋ᠢᠨ ᠠᠮᠢ ᠠᠬᠤᠢ ᠶ᠋ᠢᠨ ᠨᠣᠭᠣᠭᠠᠨ ᠪᠦᠷᠢᠳᠦ ᠪᠣᠯᠤᠭᠰᠠᠨ ᠲᠣᠣᠷᠠᠢ ᠶ᠋ᠢᠨ ᠣᠢ ᠶ᠋ᠢ ᠤᠮᠳᠠᠯᠠᠳᠠᠭ ᠪᠠᠢᠯᠠ᠃ ᠭᠡᠪᠡᠴᠦ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠬᠠᠷᠠ ᠭᠣᠣᠯ ᠤ᠋ᠨ ᠤᠷᠤᠰᠬᠠᠯ ᠲᠠᠰᠤᠷᠠᠭᠰᠠᠨ ᠠ᠋ᠴᠠ ᠲᠣᠣᠷᠠᠢ ᠴᠤ ᠶᠡᠬᠡᠪᠡᠷ ᠬᠠᠲᠠᠵᠤ ᠦᠬᠦᠭᠰᠡᠨ ᠪᠠ ᠥᠨᠥ ᠬᠡᠳᠦᠢᠪᠡᠷ ᠤᠰᠤ ᠲᠠᠢ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠼᠧᠮᠸᠨ᠋ᠲ ᠢ᠋ᠶ᠋ᠡᠷ ᠰᠤᠪᠠᠭ ᠲᠡᠳᠡᠨ ᠰᠢᠭᠤᠳ ᠰᠣᠪ ᠨᠠᠭᠤᠷ ᠲᠤ ᠤᠰᠤ ᠶ᠋ᠢ ᠨᠢ ᠵᠠᠯᠠᠨ ᠣᠷᠣᠭᠤᠯᠵᠤ ᠪᠠᠢᠭᠠ ᠪᠣᠯᠬᠣᠷ ᠲᠣᠣᠷᠠᠢ ᠶ᠋ᠢ ᠤᠰᠤᠯᠠᠬᠤ ᠪᠣᠯᠤᠮᠵᠢ ᠦᠭᠡᠢ ᠪᠠᠢᠭᠠ ᠶᠤᠮ᠃ ᠰᠣᠪ ᠨᠠᠭᠤᠷ ᠲᠤ ᠦᠭᠭᠦᠭᠰᠡᠨ ᠨᠢ ᠴᠦ᠍ ᠰᠤᠷᠪᠤᠯᠵᠢᠯᠠᠭᠴᠢ ᠪᠤᠶᠤ ᠪᠠᠢᠴᠠᠭᠠᠬᠤ ᠪᠠᠷ ᠢᠷᠡᠭᠰᠡᠳ ᠢ᠋ ᠠᠷᠭᠠᠴᠠᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠠᠵᠢ᠃ ᠪᠠᠷᠠᠭᠤᠨ ᠬᠠᠨ ᠤᠯᠤᠰ ᠤ᠋ᠨ ᠦᠶᠡ ᠡᠴᠡ ᠲᠡᠦᠬᠡ ᠲᠡᠮᠳᠡᠭᠯᠡᠯ ᠲᠡᠢ ᠵᠢᠦᠢ ᠶᠠᠨ ᠨᠠᠭᠤᠷ ᠤ᠋ᠨ ᠴᠢᠳᠬᠤᠯᠠᠩ ᠲᠠᠰᠤᠯᠤᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠠᠷᠪᠠᠨ ᠵᠢᠯ ᠪᠣᠯᠤᠭᠠ ᠥᠬᠡᠢ ᠰᠢᠷᠭᠢᠵᠡᠢ᠃《ᠬᠠᠷᠠ ᠭᠣᠣᠯ ᠪᠣᠯ ᠳᠣᠲᠣᠭᠠᠳᠤ ᠤᠷᠤᠰᠬᠠᠯᠲᠤ ᠭᠣᠣᠯ᠂ ᠭᠠᠨᠰᠦ ᠪᠣᠯᠤᠨ ᠬᠥᠬᠡᠨᠠᠭᠤᠷ ᠮᠣᠵᠢ ᠶ᠋ᠢᠨ ᠵᠠᠭᠠᠭ ᠳᠠᠬᠢ4400 ᠮᠧᠲ᠋ᠷ ᠥᠨᠳᠥᠷ ᠴᠢ ᠯᠢᠶᠠᠨ ᠱᠠᠨ ᠠᠭᠤᠯᠠ᠂ ᠳᠠᠷᠤᠢ ᠲᠩᠷᠢ ᠳᠠᠪᠠᠭᠠᠨ ᠠ᠋ᠴᠠ ᠡᠬᠢ ᠠᠪᠴᠤ ᠬᠣᠶᠠᠷ ᠮᠣᠵᠢ᠂ ᠨᠢᠭᠡ ᠣᠷᠣᠨ ᠢ᠋ ᠳᠠᠮᠵᠢᠨ ᠵᠢᠦᠢ ᠶᠠᠨ ᠨᠠᠭᠤᠷ ᠲᠤ᠌ ᠴᠢᠳᠬᠤᠵᠤ ᠪᠠᠢᠳᠠᠭ᠃ ᠬᠠᠷᠠ ᠭᠣᠣᠯ ᠪᠣᠯ ᠾᠸᠰᠢ( ᠬᠠᠰᠢᠨ ᠤ᠋ ᠬᠣᠩᠭᠢᠯ) ᠶ᠋ᠢᠨ ᠬᠣᠩᠭᠢᠯ ᠤ᠋ᠨ ᠬᠠᠮᠤᠭ ᠤ᠋ᠨ ᠲᠣᠮᠣ ᠳᠣᠲᠣᠭᠠᠳᠤ ᠤᠷᠤᠰᠬᠠᠯᠲᠤ ᠭᠣᠣᠯ ᠶᠤᠮ᠃ ᠭᠡᠪᠡᠴᠦ ᠬᠠᠷᠠ ᠭᠣᠣᠯ ᠤ᠋ᠨ ᠳᠡᠭᠡᠳᠦ᠂ ᠳᠤᠮᠳᠠᠳᠤ ᠤᠷᠤᠰᠬᠠᠯ ᠳᠠᠭᠠᠤ ᠠᠵᠤ ᠠᠬᠤᠢ ᠶ᠋ᠢᠨ ᠬᠡᠷᠡᠭᠴᠡᠭᠡᠨ ᠡᠴᠡ ᠪᠣᠯᠵᠤ᠂ ᠤᠰᠤ ᠬᠠᠰᠢᠵᠤ ᠬᠡᠷᠡᠭᠯᠡᠭᠰᠡᠨ ᠡᠴᠡ ᠳᠣᠣᠷᠠᠲᠤ ᠤᠷᠤᠰᠬᠠᠯ ᠳᠠᠭᠠᠤ ᠣᠷᠣᠨ ᠳ᠋ᠤ᠌ ᠤᠰᠤ ᠳᠤᠲᠠᠭᠳᠠᠨ᠂1992 ᠣᠨ ᠳ᠋ᠤ᠌ ᠰᠢᠷᠭᠢᠭᠡᠳ᠂ ᠡᠯᠡᠰᠦᠨ ᠰᠢᠭᠤᠷᠭᠠᠨ ᠤ᠋ ᠡᠬᠢ ᠪᠣᠯᠤᠭᠰᠠᠨ ᠪᠢᠯᠡ 》 ᠭᠡᠵᠦ ᠬᠢᠲᠠᠳ ᠬᠡᠯᠡᠨ ᠦ᠌《ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠠᠮᠢᠳᠤᠷᠠᠯ》 ᠰᠡᠳᠬᠦᠯ ᠦ᠋ᠨ2003 ᠣᠨ ᠤ᠋7 ᠳ᠋ᠤᠭᠠᠷ ᠰᠠᠷᠠ ᠶ᠋ᠢᠨ ᠬᠡᠪᠯᠡᠯ ᠳ᠋ᠦ᠍ ᠪᠢᠴᠢᠭᠰᠡᠨ ᠪᠠᠢᠳᠠᠭ᠃ ᠢᠩᠭᠢᠭᠡᠳ ᠯᠡ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠠᠯᠠᠱᠠ ᠠᠢᠮᠠᠭ ᠤ᠋ᠨ ᠡᠵᠡᠨᠡ ᠬᠣᠰᠢᠭᠤ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠡᠯᠡᠰᠦᠨ ᠰᠢᠭᠤᠷᠭᠠ ᠶ᠋ᠢᠨ ᠡᠬᠢ ᠭᠡᠭᠳᠡᠬᠦ ᠪᠣᠯᠤᠭᠰᠠᠨ ᠶᠤᠮ᠃ ᠲᠩᠷᠢ ᠮᠢᠨᠢ! ᠮᠣᠩᠭᠣᠯ ᠬᠥᠮᠦᠨ᠂ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠲᠠᠢ ᠪᠠᠨ ᠬᠠᠮᠰᠠᠵᠤ ᠠᠮᠢ ᠠᠬᠤᠢ ᠶ᠋ᠢ ᠡᠪᠳᠡᠴᠢᠬᠡᠭᠡᠳ᠂ ᠣᠷᠣᠨ ᠳ᠋ᠤᠨᠢ ᠡᠯᠡᠰᠦ ᠲᠠᠷᠢᠴᠢᠬᠠᠭᠰᠠᠨ ᠮᠡᠲᠦ ᠪᠡᠷ ᠣᠢᠯᠠᠭᠠᠭᠳᠠᠵᠤ ᠪᠠᠢᠨᠠ᠃ ᠰᠣᠶᠣᠯ ᠢ᠋ᠶ᠋ᠠᠨ ᠣᠢᠯᠠᠭᠠᠳᠠᠭ ᠦᠭᠡᠢ ᠵᠠᠷᠢᠮ ᠮᠣᠩᠭᠣᠯ ᠰᠡᠭᠡᠭᠡᠲᠡᠳ ᠬᠦᠷᠲᠡᠯᠡ ᠡᠭᠦᠨ ᠢ᠋ ᠴᠤᠤᠷᠢᠶᠠᠲᠤᠨ ᠤᠤᠬᠠᠢ ᠶ᠋ᠢᠨ ᠲᠠᠰᠤ ᠪᠤᠯᠵᠠᠭᠠᠬᠤ ᠶ᠋ᠢ ᠬᠠᠷᠠᠭᠠᠳ ᠬᠠᠳᠠ ᠮᠥᠷᠭᠥᠴᠢᠬᠡᠮᠡᠷ ᠰᠠᠨᠠᠭᠳᠠᠨᠠ᠁᠃ ᠨᠤᠲᠤᠭ ᠤᠰᠤ ᠶ᠋ᠢ ᠮᠢᠨᠢ ᠬᠡᠨ ᠡᠪᠳᠡᠭᠡ ᠪᠣᠢ? ᠪᠢᠳᠡ ᠥᠪᠡᠷ ᠢ᠋ᠶ᠋ᠡᠨ ᠦᠦ? ᠪᠢᠰᠢ! ᠠᠯᠠᠱᠠ ᠶ᠋ᠢᠨ ᠲᠡᠦᠬᠡᠨ ᠳᠠᠩᠰᠠ ᠡᠪᠬᠡᠮᠡᠯ ᠢ᠋ ᠰᠡᠬᠦᠪᠡᠯ᠂ ᠴᠢᠯᠥᠭᠡᠯᠡᠭᠳᠡᠬᠦ ᠡᠴᠡ ᠡᠮᠦᠨᠡ ᠨᠠᠭᠤᠷ ᠪᠤᠯᠠᠭ᠂ ᠣᠢ ᠮᠣᠳᠣ ᠬᠦᠷᠲᠡᠯᠡ ᠳᠠᠷᠤᠭᠠ ᠳᠠᠭᠠᠭᠠᠮᠠᠯ ᠲᠠᠢ ᠪᠠᠢᠵᠤ ᠴᠢᠩᠭᠠ ᠬᠣᠷᠢᠭᠠ ᠴᠡᠭᠡᠷ ᠲᠡᠢ᠂ ᠬᠠᠮᠠᠭᠠᠯᠠᠯᠲᠠ ᠰᠠᠢᠲᠠᠢ ᠪᠠᠢᠭᠰᠠᠨ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠵᠦ ᠪᠣᠯᠤᠨᠠ᠃ ᠮᠣᠩᠭᠣᠯᠴᠤᠳ ᠪᠠᠢᠭᠠᠯᠢ ᠠᠬᠤᠢ ᠪᠠᠨ ᠶᠠᠭᠠᠬᠢᠵᠤ ᠬᠠᠮᠠᠭᠠᠯᠠᠵᠤ ᠪᠠᠢᠭᠰᠠᠨ ᠤ᠋ ᠨᠢᠭᠡᠨ ᠵᠢᠱ᠌ᠢᠶᠡ ᠡᠨᠡ!
ᠣᠳᠣ ᠡᠵᠡᠨᠡ ᠶ᠋ᠢᠨ ᠲᠠᠪᠤᠨ ᠤ᠋ ᠳᠥᠷᠪᠡ ᠶ᠋ᠢᠨ ᠮᠠᠯᠴᠢᠳ ᠬᠣᠲᠠ ᠪᠠᠯᠭᠠᠰᠤ ᠪᠤᠶᠤ ᠨᠡᠭᠦᠳᠡᠯ ᠠᠷᠠᠳ ᠤ᠋ᠨ ᠲᠣᠭᠣᠷᠢᠭ ᠲᠤ᠌ ᠨᠥᠬᠥᠪᠥᠷᠢ ᠶ᠋ᠢᠨ ᠮᠥᠩᠭᠥ ᠴᠢᠷᠠᠢᠳᠠᠨ ᠠᠮᠢᠳᠤᠷᠠᠭᠠ ᠭᠡᠨᠡ᠃ ᠠᠮᠢ ᠠᠬᠤᠢ ᠶ᠋ᠢ ᠬᠠᠮᠠᠭᠠᠯᠠᠨᠠ ᠭᠡᠳᠡᠭ ᠱᠠᠭᠠᠷᠳᠠᠯᠭᠠ ᠪᠠᠷ ᠡᠢᠨ ᠬᠦ᠌ ᠮᠠᠯᠴᠢᠳ ᠢ᠋ ᠨᠡᠭᠦᠯᠭᠡᠵᠦ᠂ ᠦᠨᠳᠦᠰᠦᠨ ᠠᠮᠢᠵᠢᠷᠠᠭᠠ ᠠ᠋ᠴᠠ ᠨᠢ ᠰᠠᠯᠭᠠᠭᠰᠠᠨ ᠬᠣᠢᠨᠠ ᠮᠠᠯᠵᠢᠯ ᠳ᠋ᠤ᠌ ᠰᠠᠭᠤᠷᠢᠯᠠᠭᠰᠠᠨ ᠰᠣᠶᠣᠯ ᠤᠯᠠᠮᠵᠢᠯᠠᠯ ᠢ᠋ ᠨᠢ ᠶᠠᠭᠠᠬᠢᠵᠤ ᠬᠠᠮᠠᠭᠠᠯᠠᠬᠤ ᠶᠤᠮ ᠪᠣᠢ? ᠡᠨᠡ ᠲᠤᠬᠠᠢ ᠶᠠᠮᠠᠷ ᠠᠷᠭᠠ ᠪᠣᠳᠣᠯᠭᠠ ᠭᠠᠷᠭᠠᠭᠰᠠᠨ ᠶᠤᠮ ᠪᠣᠢ? ᠬᠡᠴᠢᠨᠡᠨ ᠬᠡᠴᠢᠨᠡᠨ ᠮᠥᠩᠭᠥᠨ ᠦ᠌ ᠳᠡᠮᠵᠢᠯᠭᠡ ᠥᠭᠴᠦ ᠠᠮᠢ ᠠᠬᠤᠢ ᠶ᠋ᠢᠨ ᠪᠦᠲᠦᠭᠡᠨ ᠪᠠᠢᠭᠤᠯᠤᠯᠲᠠ ᠳ᠋ᠤ᠌ ᠵᠣᠷᠢᠭᠤᠯᠤᠭᠰᠠᠨ ᠭᠡᠬᠦ ᠶᠦᠮ᠃ ᠭᠡᠪᠡᠴᠦ ᠠᠮᠢ ᠠᠬᠤᠢ ᠶ᠋ᠢᠨ ᠡᠪᠳᠡᠭᠳᠡᠯ ᠢ᠋ ᠳᠠᠭᠠᠯᠳᠤᠨ ᠪᠣᠢ ᠪᠣᠯᠤᠭᠰᠠᠨ ᠰᠣᠶᠣᠯ ᠤ᠋ᠨ ᠡᠪᠳᠡᠭᠳᠡᠯ ᠢ᠋ ᠬᠡᠳᠦᠢ ᠵᠣᠭᠣᠰ ᠢ᠋ᠶ᠋ᠠᠷ ᠴᠤ ᠨᠥᠬᠥᠵᠦ ᠳᠡᠢᠯᠬᠦ ᠦᠭᠡᠢ᠃ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠣᠯᠠᠨ ᠶᠠᠩᠵᠤᠲᠤ ᠰᠣᠶᠣᠯ ᠤ᠋ᠨ ᠨᠢᠭᠡᠨ ᠪᠦᠷᠢᠯᠳᠦᠬᠦᠨ ᠡᠨᠳᠡ᠂ ᠡᠵᠡᠨᠡ ᠳ᠋ᠦ᠍ ᠠᠯᠳᠠᠭᠳᠠᠵᠤ ᠪᠠᠢᠨᠠ᠃ ᠬᠡᠨ ᠬᠠᠮᠠᠭᠠᠯᠠᠬᠤ ᠪᠣᠢ? ᠡᠭᠦᠨ ᠦ᠌ ᠲᠥᠯᠥᠭᠡ ᠬᠡᠨ ᠬᠠᠷᠠᠮᠰᠠᠨ ᠭᠠᠰᠢᠭᠤᠳᠠᠵᠤ᠂ ᠡᠨᠡᠯᠦᠨ ᠵᠣᠪᠠᠬᠤ ᠪᠣᠢ? ᠵᠠᠭᠤᠭᠠᠳ ᠵᠢᠯ ᠦ᠋ᠨ ᠡᠮᠦᠨᠡ ᠡᠴᠡ ᠡᠵᠡᠨᠡ ᠶ᠋ᠢᠨ ᠮᠠᠯ ᠰᠦᠷᠦᠭ ᠦ᠋ᠨ ᠪᠦᠲᠦᠴᠡ ᠳ᠋ᠦ᠍ ᠬᠤᠪᠢᠷᠠᠯᠲᠠ ᠭᠠᠷᠴᠤ ᠪᠠᠢᠵᠠᠢ᠃ ᠤᠤᠯ ᠨᠢ ᠡᠵᠡᠨᠡ ᠳ᠋ᠦ᠍ ᠠᠳᠤᠭᠤ᠂ ᠦᠬᠡᠷ᠂ ᠬᠣᠨᠢ᠂ ᠢᠮᠠᠭᠠ ᠭᠣᠣᠯᠯᠠᠵᠤ᠂ ᠲᠡᠮᠡᠭᠡ ᠴᠥᠭᠡᠨ ᠪᠠᠢᠭᠰᠠᠨ ᠪᠣᠯᠪᠠᠴᠤ1900 ᠣᠨ ᠠ᠋ᠴᠠ ᠡᠬᠢᠯᠡᠨ ᠲᠡᠮᠡᠭᠡ᠂ ᠢᠮᠠᠭᠠ ᠥᠰᠴᠦ ᠪᠤᠰᠤᠳ ᠮᠠᠯ ᠴᠥᠭᠡᠷᠡᠭᠰᠡᠨ ᠪᠠᠢᠨᠠ᠃ ᠡᠨᠡ ᠨᠢ ᠵᠠᠢᠯᠠᠰᠢ ᠦᠭᠡᠢ ᠰᠣᠶᠣᠯ ᠤ᠋ᠨ ᠦᠨᠳᠦᠰᠦᠨ ᠰᠠᠭᠤᠷᠢ ᠳ᠋ᠠᠬᠢ ᠬᠤᠪᠢᠷᠠᠯᠲᠠ ᠪᠠᠢᠭᠰᠠᠨ ᠶᠤᠮ᠃
ᠭᠡᠪᠡᠴᠦ ᠣᠳᠣ ᠣᠯᠠᠩᠬᠢ ᠪᠡᠯᠴᠢᠭᠡᠷ ᠨᠤᠲᠤᠭ ᠲᠤ ᠬᠥᠮᠦᠨ ᠮᠠᠯ ᠦᠭᠡᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠲᠡᠷᠡ ᠭᠠᠵᠠᠷ ᠣᠷᠣᠨ ᠳ᠋ᠤ᠌ ᠰᠣᠶᠣᠯ ᠭᠡᠵᠦ ᠨᠡᠩ ᠶᠠᠭᠤ ᠦᠯᠡᠳᠡᠬᠦ ᠶᠦᠮ ᠪᠣᠢ? ᠴᠠᠭᠠᠰᠤᠨ ᠳ᠋ᠤ᠌ ᠲᠡᠮᠳᠡᠭᠯᠡᠭᠰᠡᠨ ᠬᠡᠳᠦᠨ ᠶᠠᠭᠤᠮᠠ ᠴᠢᠨᠢ ᠰᠣᠶᠣᠯ ᠪᠢᠰᠢ᠂ ᠲᠡᠮᠳᠡᠭᠯᠡᠯ ᠶᠦᠮ᠃ ᠲᠡᠷᠡ ᠶ᠋ᠢ ᠴᠢᠨᠢ ᠠᠪᠤᠷᠠᠯᠠ ᠭᠡᠳᠡᠭ ᠦᠭᠡᠢ ᠲᠡᠮᠳᠡᠭᠯᠡᠯᠡ ᠭᠡᠳᠡᠭ ᠶᠦᠮ᠃ ᠠᠮᠢ ᠠᠬᠤᠢ ᠶ᠋ᠢᠨ ᠡᠪᠳᠡᠭᠳᠡᠯ ᠲᠠᠴᠢᠷᠳᠠᠯ ᠤ᠋ᠨ ᠬᠠᠮᠲᠤ ᠰᠣᠶᠣᠯ ᠤ᠋ᠨ ᠡᠪᠳᠡᠭᠳᠡᠯ ᠲᠠᠴᠢᠷᠳᠠᠯ ᠴᠤ ᠪᠣᠢ ᠪᠣᠯᠤᠯᠠ᠃ ᠡᠨᠳᠡᠬᠢ ᠶ᠋ᠢᠨ ᠪᠠᠢᠭᠠᠯᠢ ᠶ᠋ᠢ ᠬᠠᠮᠠᠭᠠᠯᠠᠬᠤ ᠴᠢᠬᠤᠯᠠᠲᠠᠢ᠃ ᠭᠡᠪᠡᠴᠦ ᠤᠯᠠᠮᠵᠢᠯᠠᠯᠲᠤ ᠰᠣᠶᠣᠯ ᠢ᠋ ᠬᠠᠮᠠᠭᠠᠯᠠᠬᠤ ᠨᠢ ᠨᠡᠩ ᠴᠢᠬᠤᠯᠠ᠃ ᠰᠣᠶᠣᠯ ᠤ᠋ᠨ ᠲᠣᠭᠲᠠᠯᠴᠠᠭᠠ ᠶ᠋ᠢ ᠨᠢ ᠬᠠᠮᠠᠭᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠶᠦᠮ ᠪᠣᠯ ᠠᠮᠢ ᠠᠬᠤᠢ ᠶ᠋ᠢ ᠨᠢ ᠬᠠᠮᠠᠭᠠᠯᠠᠨᠠ ᠭᠡᠳᠡᠭ ᠴᠦ᠍ ᠭᠤᠨᠵᠢ ᠶ᠋ᠢᠨ ᠵᠣᠭᠣᠭ᠃ ᠬᠥᠮᠦᠨ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢᠨ ᠲᠥᠯᠥᠭᠡ ᠢᠳᠡᠬᠦ᠂ ᠡᠮᠦᠰᠬᠦ᠂ ᠬᠡᠷᠡᠭᠯᠡᠬᠦ ᠡᠴᠡ ᠭᠠᠳᠠᠨᠠ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠶ᠋ᠢᠨ ᠤᠳᠬᠠ ᠠᠭᠤᠯᠭᠠ ᠭᠡᠵᠦ ᠪᠠᠢᠳᠠᠭ᠃ ᠲᠡᠷᠡ ᠤᠳᠬᠠ ᠠᠭᠤᠯᠭᠠ ᠨᠢ ᠰᠣᠶᠣᠯ ᠤ᠋ᠨ ᠣᠷᠣᠰᠢᠨ ᠲᠣᠭᠲᠠᠨᠢᠯ ᠢ᠋ᠶ᠋ᠠᠷ ᠣᠴᠢᠵᠤ ᠪᠡᠶᠡᠯᠡᠳᠡᠭ᠃ ᠬᠡᠷᠪᠡ ᠰᠣᠶᠣᠯ ᠤ᠋ᠨ ᠣᠷᠣᠰᠢᠨ ᠲᠣᠭᠲᠠᠨᠢᠯ ᠢ᠋ᠶ᠋ᠠᠨ ᠠᠯᠳᠠᠴᠢᠬᠠᠪᠠᠯ ᠡᠨᠡ ᠦᠨᠳᠦᠰᠦᠨ ᠳ᠋ᠦ᠍ ᠥᠭᠡᠷᠡ ᠶᠠᠭᠤ ᠦᠯᠡᠳᠡᠬᠦ ᠶᠦᠮ ᠪᠣᠢ? ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠶ᠋ᠢᠨ ᠤᠳᠬᠠ ᠠᠭᠤᠯᠭᠠ ᠨᠢ ᠶᠠᠭᠤ ᠪᠠᠢᠬᠤ ᠪᠣᠢ? ᠢᠷᠭᠡᠳ ᠨᠢ ᠢᠳᠡᠭᠡᠳ ᠡᠮᠦᠰᠦᠭᠡᠳ᠂ ᠤᠯᠤᠰ ᠤ᠋ᠨ ᠨᠥᠬᠥᠪᠥᠷᠢ ᠪᠡᠷ ᠲᠡᠵᠢᠭᠡᠯᠭᠡᠵᠦ ᠠᠮᠢᠳᠤ ᠶᠠᠪᠤᠭᠠᠳ ᠯᠠ᠁ ᠪᠣᠯᠤᠭᠠᠳ ᠯᠠ ᠪᠠᠢᠳᠠᠭ ᠭᠡᠵᠦ ᠤᠤ? ᠦᠭᠡᠢ ᠲᠡᠭᠡᠵᠦ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠶ᠋ᠢᠨ ᠤᠳᠬᠠ ᠪᠠᠨ ᠠᠯᠳᠠᠭᠰᠠᠨ ᠠ᠋ᠴᠠ ᠦᠬᠦᠭᠰᠡᠨ ᠮᠠᠨᠢ ᠳᠡᠭᠡᠷᠡ!
ᠳᠣᠮᠣᠭ ᠪᠣᠯᠤᠭᠰᠠᠨ ᠬᠠᠷᠠ ᠬᠣᠲᠠ ᠡᠵᠡᠨᠡ ᠶ᠋ᠢᠨ ᠭᠠᠩᠳᠠᠵᠤ ᠬᠠᠲᠠᠭᠰᠠᠨ ᠡᠯᠢᠭᠡᠨ ᠳᠡᠭᠡᠷᠡ ᠡᠷᠲᠡᠨ ᠦ᠌ ᠲᠡᠦᠬᠡ ᠶ᠋ᠢᠨ ᠭᠢᠯᠠᠯᠵᠠᠭᠰᠠᠨ ᠬᠠᠭᠤᠳᠠᠰᠤ ᠶ᠋ᠢ ᠳᠤᠷᠠᠰᠬᠤ ᠮᠡᠲᠦ᠂ ᠲᠡᠷᠡ ᠯᠠ ᠴᠠᠭ ᠤ᠋ᠨ ᠰᠣᠶᠣᠯ ᠪᠣᠯᠪᠠᠰᠤᠨ ᠤ᠋ ᠲᠠᠯᠬᠢᠭᠳᠠᠯ ᠤ᠋ᠨ ᠲᠥᠯᠥᠭᠡ ᠭᠠᠰᠢᠭᠤᠳᠠᠬᠤ ᠮᠡᠲᠦ ᠲᠣᠷᠣᠢᠨᠠ᠃ ᠬᠠᠷᠠ ᠪᠠᠭᠠᠲᠤᠷ ᠤ᠋ᠨ ᠠᠷᠢᠭᠤᠨ ᠰᠦᠨᠡᠰᠦ ᠥᠨᠥ ᠲᠩᠷᠢ ᠶ᠋ᠢᠨ ᠣᠷᠣᠨ ᠠ᠋ᠴᠠ ᠡᠨᠡ ᠪᠦᠬᠦᠨ ᠢ᠋ ᠭᠠᠰᠢᠭᠤᠳᠠᠨ ᠰᠢᠷᠳᠡᠵᠦ ᠪᠠᠢᠭᠠ ᠳᠠ᠁ ᠬᠠᠷᠠ ᠬᠣᠲᠠ ᠶ᠋ᠢᠨ ᠤᠷᠤᠰᠬᠠᠯ ᠢ᠋ ᠲᠠᠰᠤᠯᠤᠭᠰᠠᠨ ᠤ᠋ ᠤᠴᠢᠷ ᠢ᠋ᠶ᠋ᠠᠷ ᠬᠠᠷᠠ ᠬᠣᠲᠠ ᠶ᠋ᠢᠨ ᠰᠣᠶᠣᠯ ᠪᠣᠯᠪᠠᠰᠤᠨ ᠰᠥᠨᠥᠵᠦ᠂ ᠡᠨᠡ ᠣᠷᠣᠨ ᠢ᠋ ᠨᠤᠷᠠ ᠡᠯᠡᠰᠦ ᠪᠤᠯᠠᠭᠰᠠᠨ ᠶᠤᠮ᠃ ᠡᠵᠡᠨᠡ ᠳ᠋ᠦ᠍ ᠬᠠᠷᠠ ᠭᠣᠣᠯ ᠤ᠋ᠨ ᠤᠰᠤ ᠶᠠᠭᠤᠲᠠᠢ ᠴᠢᠬᠤᠯᠠ ᠭᠡᠳᠡᠭ ᠢ᠋ ᠲᠡᠦᠬᠡ ᠴᠢᠰᠤᠲᠤ ᠰᠤᠷᠭᠠᠮᠵᠢ ᠪᠠᠷ ᠢ᠋ᠶ᠋ᠠᠨ ᠨᠢᠭᠡᠨᠲᠡ ᠭᠡᠷᠡᠴᠢᠯᠡᠭᠰᠡᠨ ᠰᠢᠦ ᠳᠡ᠃ ᠭᠡᠪᠡᠴᠦ ᠡᠵᠡᠨᠡ ᠶ᠋ᠢᠨ ᠪᠦᠬᠦ ᠲᠣᠣᠷᠠᠢ᠂ ᠵᠠᠭ ᠥᠭᠢᠷᠡᠵᠦ ᠳᠠᠭᠤᠰᠤᠭᠠᠳ᠂ ᠪᠦᠬᠦ ᠮᠠᠯ ᠤ᠋ᠨ ᠮᠥᠷ ᠠᠷᠢᠯᠬᠤ ᠠ᠋ᠴᠠ ᠨᠠᠭᠠᠰᠢ ᠵᠣᠭᠰᠣᠬᠤ ᠦᠭᠡᠢ ᠨᠡᠬᠡᠯ ᠬᠠᠲᠠᠭᠤ ᠬᠣᠷᠸᠠ ᠶᠤᠮ ᠭᠡᠵᠦ ᠤᠤ? ᠬᠠᠷᠠ ᠬᠣᠲᠠ ᠶ᠋ᠢᠨ ᠪᠣᠯᠪᠠᠰᠤᠨ ᠠ᠋ᠴᠠ ᠥᠨᠥᠳᠥᠷ ᠦ᠋ᠨ ᠪᠢᠳᠡᠨ ᠳ᠋ᠦ᠍ ᠰᠢᠷᠣᠢ ᠶ᠋ᠢᠨ ᠰᠤᠪᠤᠷᠭᠠ᠂ ᠡᠪᠳᠡᠷᠬᠡᠢ ᠬᠡᠷᠡᠮ᠂ ᠭᠠᠰᠢᠭᠤᠨ ᠰᠤᠷᠭᠠᠮᠵᠢ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠦᠯᠡᠳᠡᠭᠰᠡᠨ ᠶᠦᠮ ᠪᠣᠢ?20 ᠳ᠋ᠤᠭᠠᠷ ᠵᠠᠭᠤᠨ ᠤ᠋ ᠡᠬᠢ ᠪᠡᠷ ᠡᠨᠳᠡᠬᠢ ᠶ᠋ᠢᠨ ᠲᠡᠦᠬᠡᠨ ᠳᠤᠷᠠᠰᠬᠠᠯᠲᠤ ᠵᠦᠢᠯ ᠶᠡᠬᠡ ᠪᠡᠷ ᠲᠣᠨᠣᠭᠳᠠᠵᠤ ᠪᠠᠢᠭᠰᠠᠨ ᠢ᠋ ᠠᠩᠭ᠌ᠯᠢ ᠶ᠋ᠢᠨ ᠡᠷᠳᠡᠮᠲᠡᠨ ᠫᠢᠲᠧᠷ ᠾᠤ᠌ᠢᠫᠸᠺ《ᠲᠣᠷᠭᠠᠨ ᠵᠠᠮ ᠤ᠋ᠨ ᠭᠣᠳᠣᠰ ᠳᠠᠬᠢ ᠬᠠᠷᠢ ᠶ᠋ᠢᠨ ᠴᠢᠳᠬᠥᠷ ᠦ᠋ᠳ》 ᠬᠡᠮᠡᠬᠦ ᠨᠣᠮ ᠳ᠋ᠠᠭᠠᠨ ᠨᠠᠷᠢᠨ ᠪᠢᠴᠢᠭᠰᠡᠨ ᠪᠠᠢᠳᠠᠭ᠃ ᠺᠧᠽᠢᠷᠤᠸᠧᠹᠧ ᠬᠠᠷᠠ ᠬᠣᠲᠠ ᠠ᠋ᠴᠠ ᠪᠠᠷᠠᠭᠤᠨ ᠰᠢᠶᠠ ᠤᠯᠤᠰ ᠤ᠋ᠨ ᠳᠠᠷᠤᠮᠠᠯ ᠪᠠ ᠪᠢᠴᠢᠮᠡᠯ ᠨᠣᠮ ᠵᠢᠴᠢ ᠪᠤᠷᠬᠠᠨ ᠤ᠋ ᠰᠤᠳᠤᠷ ᠢ᠋ ᠬᠡᠳᠦᠨ ᠮᠢᠩᠭᠠᠨ ᠳᠡᠪᠲᠡᠷ ᠠᠪᠠᠴᠢᠵᠠᠢ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠬᠢᠲᠠᠳ᠂ ᠲᠥᠪᠡᠳ᠂ ᠤᠢᠭᠤᠷ᠂ ᠲᠦᠷᠺ᠂ ᠵᠦᠷᠴᠢᠨ᠂ ᠮᠣᠩᠭᠣᠯ᠂ ᠰᠢᠷᠢᠶᠡ ᠵᠡᠷᠭᠡ ᠬᠡᠯᠡ ᠪᠡᠷ ᠪᠢᠴᠢᠭᠰᠡᠨ ᠨᠣᠮ ᠰᠤᠳᠤᠷ ᠣᠯᠠᠨ ᠲᠣᠭᠠ ᠪᠠᠷ ᠴᠥᠯᠪᠡᠭᠳᠡᠵᠦ᠂ ᠵᠥᠪᠬᠡᠨ ᠣᠷᠣᠰ ᠦ᠋ᠨ ᠰᠠᠨᠲ ᠫᠧᠲ᠋ᠷᠪᠥ᠋ᠷᠡᠭ ᠦ᠋ᠨ ᠡᠷᠮᠢᠳ᠋ᠧᠱ ᠮᠦᠽᠧᠢ ᠳ᠋ᠦ᠍ ᠬᠦᠷᠴᠦ ᠬᠠᠷᠠ ᠬᠣᠲᠠ ᠠ᠋ᠴᠠ ᠠᠪᠠᠴᠢᠭᠰᠠᠨ ᠪᠤᠷᠬᠠᠨ ᠤ᠋ ᠬᠥᠷᠥᠭ ᠬᠣᠶᠠᠷ ᠵᠠᠭᠤ ᠭᠠᠷᠤᠢ᠂ ᠮᠣᠳᠣᠨ ᠢ᠋ᠶ᠋ᠠᠷ ᠤ᠋ᠨ ᠵᠢᠷᠤᠭ ᠠᠷᠪᠠ᠂ ᠱᠤᠭᠤᠮᠠᠯ ᠲᠠᠪᠢᠨ ᠬᠡᠰᠡᠭ ᠪᠠᠢᠳᠠᠭ᠃ ᠡᠭᠦᠨ ᠳ᠋ᠦ᠍ ᠵᠠᠷᠢᠮ ᠪᠤᠷᠬᠠᠨ ᠤ᠋ ᠬᠥᠷᠥᠭ ᠨᠢ ᠳ᠋ᠥ᠋ᠨᠬᠤᠸᠠᠩ ᠤ᠋ᠨ ᠬᠠᠨᠠᠨ ᠵᠢᠷᠤᠭ ᠲᠠᠢ ᠮᠥᠴᠡᠭᠡᠷᠬᠡᠮᠡᠷ ᠭᠣᠢᠳᠠ ᠪᠠᠢᠳᠠᠭ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠣᠷᠣᠰ ᠤ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠬᠦᠷᠢᠶᠡᠯᠡᠩ ᠦ᠋ᠨ ᠳᠣᠷᠣᠨᠠᠳᠠᠬᠢᠨ ᠢ᠋ ᠰᠤᠳᠤᠯᠬᠤ ᠭᠠᠵᠠᠷ ᠦ᠋ᠨ ᠰᠠᠨᠲ ᠫᠧᠲ᠋ᠷᠪᠥ᠋ᠷᠡᠭ ᠳᠠᠬᠢ ᠰᠠᠯᠪᠤᠷᠢ ᠭᠠᠵᠠᠷ᠂ ᠠᠩᠭ᠌ᠯᠢ ᠶ᠋ᠢᠨ ᠯᠣᠨᠳᠣᠨ᠂ ᠡᠨᠡᠳᠬᠡᠭ ᠦ᠋ᠨ ᠰᠢᠨᠡ ᠳ᠋ᠧᠯᠢ᠂ ᠶᠠᠫᠣᠨ ᠤ᠋ ᠲᠣᠣᠺᠢᠣ᠋᠂ ᠰᠸᠧᠳᠧᠨ᠂ ᠹᠷᠠᠨᠼᠢ ᠶ᠋ᠢᠨ ᠫᠠᠷᠢᠰ ᠵᠡᠷᠭᠡ ᠭᠠᠵᠠᠷ ᠤ᠋ᠳ ᠲᠤ᠌ ᠬᠠᠷᠠ ᠬᠣᠲᠠ ᠠ᠋ᠴᠠ ᠣᠯᠳᠠᠭᠰᠠᠨ ᠦᠨᠡᠲᠦ ᠬᠣᠪᠣᠷ ᠲᠡᠦᠬᠡ ᠶ᠋ᠢᠨ ᠣᠯᠳᠠᠪᠤᠷᠢ ᠨᠤᠭᠤᠳ ᠢ᠋ ᠬᠠᠳᠠᠭᠠᠯᠠᠵᠤ ᠪᠠᠢᠳᠠᠭ ᠠᠵᠢ᠃
᠁
ᠰᠠᠷᠠᠨ ᠨᠠᠷᠠᠨ ᠤ᠋ ᠬᠣᠭᠣᠷᠣᠨᠳᠣ
ᠰᠡᠭᠦᠳᠡᠷ ᠨᠢ ᠪᠦᠲᠦᠨ ᠲᠣᠣᠷᠠᠢ ᠮᠢᠨᠢ
ᠡᠵᠡᠨᠡ ᠭᠣᠪᠢ ᠶ᠋ᠢᠨ ᠡᠯᠢᠭᠡᠨ ᠳ᠋ᠦ᠍
ᠢᠰᠡᠭᠡᠢ ᠲᠤᠭᠤᠷᠭᠠᠲᠠᠨ ᠲᠣᠷᠭᠤᠳ ᠮᠢᠨᠢ
᠁
ᠡᠨᠡ ᠳᠡᠯᠡᠬᠡᠢ ᠰᠢᠭᠦᠷᠭᠡᠢ ᠰᠡᠳᠬᠢᠭᠳᠡᠯ ᠢ᠋ᠶ᠋ᠡᠨ ᠪᠢᠴᠢᠵᠦ ᠪᠠᠷᠠᠮᠠᠷ ᠪᠠᠢᠬᠤ ᠦᠶᠡ ᠳ᠋ᠦ᠍《ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠡᠳᠦᠷ ᠦ᠋ᠨ ᠰᠣᠨᠢᠨ》 ᠤ᠋2006.6.30 ᠤ᠋ ᠡᠳᠦᠷ ᠦ᠋ᠨ ᠬᠡᠪᠯᠡᠯ ᠡᠴᠡ《198 ᠮᠣᠩᠭᠣᠯ ᠬᠡᠦᠬᠡᠳ ᠬᠢᠲᠠᠳ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠭᠰᠠᠨ ᠠ᠋ᠴᠠ ᠡᠵᠡᠨᠡ ᠬᠤᠰᠢᠭᠤᠨ ᠤ᠋ ᠴᠣᠷ ᠤ᠋ᠨ ᠭᠠᠭᠴᠠ ᠮᠣᠩᠭᠣᠯ ᠰᠤᠷᠭᠠᠭᠤᠯᠢ ᠶ᠋ᠢᠨ ᠰᠤᠷᠤᠭᠴᠢ ᠴᠥᠭᠡᠷᠡᠪᠡ》ᠭᠡᠰᠡᠨ ᠮᠡᠳᠡᠭᠡᠯᠡᠯ ᠢ᠋ ᠰᠣᠨᠣᠰᠤᠭᠠᠳ ᠰᠡᠳᠬᠢᠯ ᠨᠡᠩ ᠬᠦᠨᠳᠦᠷᠡᠯᠡ᠃ ᠡᠵᠡᠨᠡ ᠬᠤᠰᠢᠭᠤᠨ ᠤ᠋ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠴᠣᠮᠣᠷᠯᠢᠭ ᠰᠤᠷᠭᠠᠭᠤᠯᠢ ᠪᠣᠯ ᠡᠨᠳᠡᠬᠢ ᠶ᠋ᠢᠨ ᠮᠣᠩᠭᠣᠯ ᠢ᠋ᠶ᠋ᠠᠷ ᠬᠢᠴᠢᠶᠡᠯᠯᠡᠵᠦ ᠪᠠᠢᠭᠠ ᠴᠣᠷ ᠤ᠋ᠨ ᠭᠠᠭᠴᠠ ᠰᠤᠷᠭᠠᠭᠤᠯᠢ ᠪᠠᠢᠵᠤ᠂ ᠣᠳᠣ 242 ᠰᠤᠷᠤᠭᠴᠢ ᠲᠠᠢ ᠪᠠᠢᠭᠠ ᠨᠢ ᠳᠡᠭᠡᠷᠡ ᠵᠠᠭᠤᠨ ᠤ᠋ ᠶᠡᠷᠡᠭᠡᠳ ᠣᠨ ᠤ᠋ ᠳᠥᠷᠪᠡᠨ ᠦ᠌ ᠨᠢᠭᠡ ᠶ᠋ᠢᠨ ᠯᠡ ᠲᠣᠭᠠ ᠠᠵᠢ᠃ ᠡᠨᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭᠰᠢ ᠨᠠᠷ ᠬᠦᠷᠲᠡᠯᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠢᠲᠠᠳ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠤᠷᠤᠯᠴᠠᠭᠤᠯᠵᠤ ᠪᠠᠢᠭᠠ ᠨᠢ ᠨᠡᠩ ᠴᠤ ᠨᠠᠵᠠᠭᠠᠢ ᠳᠠᠭᠤᠷᠢᠶᠠᠯ ᠪᠣᠯᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠢ᠃ ᠴᠣᠮᠣᠷᠯᠢᠭ ᠰᠤᠷᠭᠠᠭᠤᠯᠢ ᠭᠡᠰᠡᠨ ᠡᠨᠡ ᠪᠡᠯᠭᠡᠳᠡᠯᠲᠦ ᠨᠡᠷᠡ ᠠᠷᠠᠢ ᠪᠠᠢᠭᠠᠯᠢ ᠶ᠋ᠢᠨ ᠭᠠᠩ ᠳ᠋ᠤ᠌ ᠥᠭᠢᠷᠡᠨ ᠬᠠᠲᠠᠭᠰᠠᠨ ᠡᠵᠡᠨᠡ ᠲᠣᠣᠷᠠᠢ ᠰᠢᠭ᠋ ᠰᠣᠶᠣᠯ ᠤ᠋ᠨ《ᠭᠠᠩᠳᠠᠯ》ᠳᠤᠮᠳᠠ ᠬᠣᠷᠪᠣᠢᠴᠢᠬᠠᠬᠤ ᠦᠭᠡᠢ ᠪᠢᠵᠡ ᠭᠡᠰᠡᠨ ᠠᠢᠳᠠᠰ ᠢ᠋ ᠡᠷᠬᠡ ᠦᠭᠡᠢ ᠲᠥᠷᠥᠭᠦᠯᠦᠨᠡ᠃ ᠶᠠᠭᠠᠬᠢᠭᠠᠳ᠁ ᠶᠠᠭᠠᠬᠢᠭᠠᠳ ᠰᠣᠶᠣᠯ ᠤᠯᠠᠮᠵᠢᠯᠠᠯ ᠨᠢ ᠮᠠᠷᠲᠠᠭᠳᠠᠨ ᠭᠡᠭᠡᠭᠳᠡᠬᠦ ᠬᠢᠮᠤᠷᠠᠯ ᠲᠠᠢ ᠦᠶᠡ ᠳ᠋ᠦ᠍ ᠪᠢᠳᠡ ᠥᠪᠡᠷ ᠦ᠋ᠨ ᠠᠮᠢᠨ ᠴᠢᠬᠤᠯᠠ ᠶᠠᠭᠤᠮᠠᠨ ᠠ᠋ᠴᠠ ᠪᠠᠨ ᠢᠩᠭᠢᠲᠡᠯᠡ ᠪᠡᠨ ᠵᠠᠢᠯᠠᠨ ᠴᠡᠷᠪᠡᠳᠡᠭ ᠶᠦᠮ ᠪᠣᠢ? ᠪᠢᠳᠡᠨ ᠳ᠋ᠦ᠍ ᠡᠢᠮᠦ ᠰᠡᠳᠬᠢᠯ ᠦ᠋ᠨ
ᠲᠡᠩᠬᠡᠭᠡ᠂ ᠵᠢᠷᠦᠬᠡᠨ ᠦ᠌ ᠲᠠᠮᠢᠷ ᠦᠭᠡᠢ ᠶᠦᠮ ᠭᠡᠵᠦ ᠤᠤ?《ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠢᠷᠡᠭᠡᠳᠦᠢ ᠶ᠋ᠢᠨ ᠲᠥᠯᠥᠭᠡ!》ᠭᠡᠰᠡᠨ ᠣᠢᠷᠠᠬᠠᠨ ᠪᠣᠳᠣᠯ ᠤ᠋ᠨ ᠡᠷᠬᠡᠨ ᠳ᠋ᠡᠭᠡᠨ ᠰᠣᠶᠣᠯ ᠤ᠋ᠨ ᠢᠷᠡᠭᠡᠳᠦᠢ᠂ ᠦᠨᠳᠦᠰᠦᠲᠡᠨ ᠦ᠌ ᠢᠷᠡᠭᠡᠳᠦᠢ ᠪᠡᠨ ᠬᠦᠷᠲᠡᠯᠡ ᠶᠢᠰᠦᠨ ᠲᠩᠷᠢ ᠶ᠋ᠢᠨ ᠴᠠᠭᠠᠨᠠ ᠮᠠᠷᠲᠠᠴᠢᠬᠠᠨᠠ ᠭᠡᠳᠡᠭ ᠮᠥᠨ ᠴᠤ ᠠᠶᠤᠮᠰᠢᠭᠲᠠᠢ ᠶᠤᠮ ᠳᠠ! ᠮᠣᠩᠭᠣᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠤᠷᠴᠤ ᠪᠠᠢᠭᠠ242 ᠰᠤᠷᠤᠭᠴᠢ ᠡᠵᠡᠨᠡ ᠣᠷᠣᠨ ᠤ᠋ ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠢᠷᠡᠭᠡᠳᠦᠢ ᠶ᠋ᠢᠨ ᠴᠣᠮᠣᠷᠯᠢᠭ ᠤ᠋ᠳ ᠶᠤᠮ᠃ ᠡᠳᠡᠭᠡᠷ ᠴᠣᠮᠣᠷᠯᠢᠭ ᠤ᠋ᠨ ᠢᠷᠡᠭᠡᠳᠦᠢ ᠶ᠋ᠢᠨ ᠲᠥᠯᠥᠭᠡ᠂ ᠡᠨᠳᠡᠬᠢ ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠢᠷᠡᠭᠡᠳᠦᠢ ᠶ᠋ᠢᠨ ᠲᠥᠯᠥᠭᠡ ᠰᠤᠷᠭᠠᠭᠤᠯᠢ ᠨᠢ ᠲᠤᠰᠬᠠᠢᠯᠠᠨ ᠵᠠᠩ ᠦᠢᠯᠡ᠂ ᠲᠡᠦᠬᠡ ᠰᠣᠶᠣᠯ ᠤ᠋ᠨ ᠬᠢᠴᠢᠶᠡᠯ ᠨᠡᠭᠡᠭᠡᠭᠰᠡᠨ ᠨᠢ ᠯᠡ ᠶᠠᠭᠤᠨ ᠠ᠋ᠴᠠ ᠴᠤ ᠨᠠᠨᠳᠢᠨ ᠰᠠᠨᠠᠭᠳᠠᠯᠠ᠃
ᠲᠣᠣᠷᠠᠢ᠂ ᠰᠣᠪ ᠨᠠᠭᠤᠷ᠂ ᠬᠠᠷᠠ ᠬᠣᠲᠠ— ᠡᠵᠡᠨᠡ ᠶ᠋ᠢᠨ ᠭᠤᠷᠪᠠᠨ ᠪᠡᠯᠭᠡ ᠲᠡᠮᠳᠡᠭ᠃ ᠲᠣᠣᠷᠠᠢ ᠭᠡᠬᠦ ᠨᠣᠭᠣᠭᠠᠨ ᠪᠦᠰᠡ᠂ ᠰᠣᠪ ᠨᠠᠭᠤᠷ ᠬᠡᠮᠡᠬᠦ ᠤᠰᠤᠨ ᠰᠤᠷᠪᠤᠯᠵᠢ ᠶ᠋ᠢᠨ ᠨᠥᠬᠥᠴᠡᠯ ᠳ᠋ᠦ᠍ ᠬᠠᠷᠠ ᠬᠣᠲᠠ ᠰᠢᠭ᠋ ᠪᠣᠯᠪᠠᠰᠤᠨ ᠬᠥᠯᠵᠢᠨ ᠬᠥᠭᠵᠢᠳᠡᠭ ᠪᠣᠯ ᠠᠮᠢ ᠠᠬᠤᠢ ᠶ᠋ᠢᠨ ᠲᠦᠰᠢᠭ ᠦᠭᠡᠢ ᠪᠣᠯ ᠰᠣᠶᠣᠯ ᠪᠣᠯᠪᠠᠰᠤᠨ ᠣᠷᠣᠰᠢᠨ ᠲᠣᠭᠲᠠᠬᠤ ᠪᠦᠬᠦ ᠪᠣᠯᠤᠮᠵᠢ ᠪᠠᠨ ᠠᠯᠳᠠᠨᠠ ᠭᠡᠳᠡᠭ ᠢ᠋ ᠪᠣᠳᠠᠲᠤ ᠵᠢᠱ᠌ᠢᠶᠡ ᠭᠡᠷᠡᠴᠢᠯᠡᠵᠦ ᠪᠣᠢ᠃ ᠲᠡᠢᠮᠦ ᠪᠣᠯᠬᠣᠷ ᠠᠮᠢ ᠠᠬᠤᠢ ᠶ᠋ᠢᠨ ᠠᠰᠠᠭᠤᠳᠠᠯ ᠨᠢ ᠵᠥᠪᠬᠡᠨ ᠠᠮᠢ ᠠᠬᠤᠢ ᠶ᠋ᠢᠨ ᠠᠰᠠᠭᠤᠳᠠᠯ ᠯᠠ ᠪᠢᠰᠢ᠂ ᠬᠠᠷᠢᠨ ᠰᠣᠶᠣᠯ ᠤ᠋ᠨ ᠠᠰᠠᠭᠤᠳᠠᠯ᠂ ᠦᠨᠳᠦᠰᠦᠲᠡᠨ ᠦ᠌ ᠠᠰᠠᠭᠤᠳᠠᠯ᠂ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢᠨ ᠠᠰᠠᠭᠤᠳᠠᠯ ᠶᠤᠮ᠃ ᠮᠠᠨ ᠤ᠋ ᠰᠤᠷᠪᠤᠯᠵᠢᠯᠠᠭᠴᠢᠳ ᠤ᠋ᠨ ᠰᠤᠷᠪᠤᠯᠵᠢᠯᠠᠭᠠ ᠶ᠋ᠢ ᠦᠨᠳᠦᠰᠦᠯᠡᠪᠡᠯ᠂ ᠡᠳᠦᠭᠡ ᠬᠠᠷᠠ ᠬᠣᠲᠠ ᠶ᠋ᠢ ᠭᠤᠷᠪᠠᠨ ᠮᠣᠩᠭᠣᠯ ᠭᠡᠷ ᠲᠡᠢ ᠨᠢᠭᠡ ᠨᠠᠰᠤᠲᠠᠨ᠂ ᠣᠩᠭᠣᠨ ᠲᠣᠣᠷᠠᠢ ᠶ᠋ᠢ ᠭᠠᠭᠴᠠ ᠨᠣᠬᠠᠢ ᠲᠠᠢ ᠨᠢᠭᠡ ᠮᠠᠯᠴᠢᠨ ᠡᠵᠢ᠂ ᠰᠣᠪ ᠨᠠᠭᠤᠷ ᠢ᠋ ᠥᠨᠥᠴᠢᠨ ᠪᠣᠲᠣᠭᠣ᠂ ᠥᠨᠥᠴᠢᠨ ᠢᠰᠢᠭᠡ ᠲᠡᠢ ᠨᠢᠭᠡ ᠮᠠᠯᠴᠢᠨ ᠵᠠᠯᠠᠭᠤ ᠰᠠᠬᠢᠨ ᠰᠠᠭᠤᠵᠤ ᠪᠠᠢᠭᠠ ᠭᠡᠨᠡ᠃ ᠲᠡᠳᠡ ᠪᠣᠯ ᠨᠤᠲᠤᠭ ᠤᠰᠤᠨ ᠳ᠋ᠠᠭᠠᠨ ᠦᠨᠡᠨᠴᠢ ᠰᠦᠰᠦᠭ ᠢ᠋ᠶ᠋ᠡᠨ ᠭᠦᠢᠴᠡᠳᠬᠡᠵᠦ ᠪᠠᠢᠭᠠ ᠮᠣᠩᠭᠣᠯ ᠬᠥᠮᠦᠨ᠃ ᠲᠡᠳᠡ ᠪᠣᠯ ᠥᠪᠡᠷ ᠦ᠋ᠨ ᠰᠣᠶᠣᠯ ᠤᠯᠠᠮᠵᠢᠯᠠᠯ ᠳ᠋ᠠᠭᠠᠨ ᠡᠭᠡᠨᠡᠭᠰᠢᠨ ᠬᠣᠷᠭᠣᠳᠠᠵᠤ ᠪᠠᠢᠭᠠ ᠮᠣᠩᠭᠣᠯ ᠬᠥᠮᠦᠨ! ᠲᠡᠳᠡ ᠪᠣᠯ ᠰᠣᠶᠣᠯ ᠪᠣᠯᠪᠠᠰᠤᠨ ᠤ᠋ ᠮᠠᠨᠢ ᠴᠢᠩ ᠵᠣᠷᠢᠭᠲᠤ ᠬᠠᠷᠠᠭᠤᠯ! ᠥᠭᠡᠷᠡ ᠬᠡᠨ ᠴᠦ᠍ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠦ᠋ᠨ ᠭᠦᠨ ᠳ᠋ᠡᠬᠢ ᠡᠢᠮᠦᠷᠬᠦᠦ ᠦᠨᠡᠨ ᠰᠦᠵᠢᠭ ᠢ᠋ ᠣᠢᠯᠠᠭᠠᠬᠤ ᠦᠭᠡᠢ᠃ ᠡᠢᠮᠦ ᠦᠨᠡᠨᠴᠢ ᠰᠦᠵᠢᠭ ᠲᠡᠢ ᠪᠡᠨ ᠪᠠᠢᠪᠠᠯ ᠨᠤᠲᠤᠭ ᠤᠰᠤ᠂ ᠰᠣᠶᠣᠯ ᠤᠯᠠᠮᠵᠢᠯᠠᠯ ᠮᠠᠨᠢ ᠬᠡᠵᠢᠶᠡ ᠴᠦ᠍ ᠠᠯᠵᠠᠬᠤ ᠦᠭᠡᠢ᠃
ᠡᠵᠡᠨᠡ— ᠡᠯᠡᠰᠦᠨ ᠰᠢᠭᠤᠷᠭᠠᠨ ᠤ᠋ ᠡᠬᠢ ᠪᠣᠯᠤᠭᠰᠠᠨ ᠨᠢ ᠣᠯᠠᠨ ᠰᠢᠯᠲᠠᠭᠠᠨ ᠲᠠᠢ᠃ ᠲᠡᠷᠡ ᠰᠢᠯᠲᠠᠭᠠᠨ ᠨᠤᠭᠤᠳ ᠢ᠋ ᠬᠣᠵᠢᠮ ᠤ᠋ᠨ ᠲᠡᠦᠬᠡ ᠭᠣᠣᠯᠴᠢ ᠪᠠᠷ ᠲᠣᠳᠣᠷᠬᠠᠢᠯᠠᠨ ᠪᠢᠴᠢᠬᠦ ᠪᠣᠢ ᠊ᠢᠠ᠃ ᠬᠠᠷᠢᠨ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠡᠯᠡᠰᠦᠨ ᠰᠢᠭᠤᠷᠭᠠᠨ ᠤ᠋ ᠡᠬᠢ ᠭᠡᠭᠳᠡᠭᠰᠡᠨ ᠡᠵᠡᠨᠡ ᠮᠢᠨᠢ ᠪᠢᠲᠡᠭᠡᠢ ᠯᠡ ᠮᠣᠩᠭᠣᠯ ᠰᠣᠶᠣᠯ ᠤ᠋ᠨ ᠳᠠᠴᠢᠷᠳᠠᠯ᠂ ᠡᠪᠳᠡᠭᠳᠡᠯ ᠦ᠋ᠨ ᠡᠬᠢ ᠪᠣᠯᠴᠢᠬᠠᠭᠠᠰᠠᠢ ᠭᠡᠵᠦ ᠮᠥᠩᠬᠡ ᠬᠥᠬᠡ ᠲᠩᠷᠢ ᠳ᠋ᠡᠭᠡᠨ ᠳᠠᠭᠠᠳᠬᠠᠨᠠᠮ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠯ ᠂ ᠱᠠᠭᠰᠠᠯ᠂ ᠠᠯᠲᠠᠨᠱᠠ᠂ ᠨᠡᠭᠦᠳᠡᠯ᠂ ᠨᠠᠷᠠᠨᠲᠤᠶᠠᠭᠠ᠂ ᠪᠠᠶᠠᠨᠴᠡᠴᠡᠭ ᠂ᠡᠷᠳᠡᠨᠢᠭᠣᠤᠠ᠂ ᠸᠠᠩ᠂ ᠪᠠᠳᠮᠠ
ᠬᠢᠨᠠᠭᠴᠢ ᠪᠠᠭᠰᠢ᠄ ᠰᠡᠬᠡᠭᠡᠷᠡᠯ᠂ ᠠᠯᠲᠠᠨᠱᠠ᠂ ᠭᠠᠷᠮᠠ᠂ ᠣᠳᠬᠠᠨᠰᠣᠠ