ᠡᠯᠡᠰᠦ ᠥᠭᠡᠷᠡᠴᠢᠯᠡᠭᠴᠢ ᠶ᠋ᠢᠨ ᠥᠴᠢᠯ - ᠵᠢᠷᠭᠠᠯᠲᠤЭлс өөрчлөгчийн өчил-Жаргалт
554
ᠵᠢᠷᠭᠠᠯᠲᠤ
ᠨᠠᠶᠠᠭᠠᠳ ᠣᠨ ᠤ᠋ ᠰᠠᠯᠬᠢ ᠰᠢᠭᠤᠷᠭᠠ
ᠡᠳᠦᠷ ᠰᠥᠨᠢ ᠦᠭᠡᠢ ᠬᠤᠢᠯᠠᠷᠠᠵᠤ
ᠨᠠᠪᠲᠠᠭᠠᠷ ᠮᠠᠢᠵᠢᠭᠢ ᠭᠡᠷ ᠦ᠋ᠳ ᠨᠢ
ᠡᠯᠡᠰᠦ ᠮᠠᠩᠬᠠᠨ ᠳ᠋ᠤ᠌ ᠳᠠᠷᠤᠭᠳᠠᠵᠤ
ᠨᠠᠰᠤ ᠪᠠᠭᠠ ᠶ᠋ᠢᠨ ᠬᠡᠦᠬᠡᠳ ᠪᠢᠳᠡ
ᠳᠣᠷᠣᠰᠬᠠᠨ ᠳᠡᠪᠡᠯ ᠢ᠋ᠶ᠋ᠡᠷ ᠳᠤᠯᠠᠭᠠᠴᠠᠵᠤ
ᠨᠠᠰᠤᠲᠠᠨ ᠪᠤᠭᠤᠷᠤᠯ ᠠᠪᠤ ᠡᠵᠢ ᠨᠠᠷ ᠮᠢᠨᠢ
ᠡᠬᠡᠭᠦᠨ ᠴᠠᠢ ᠪᠠᠷ ᠥᠯ ᠢ᠋ᠶ᠋ᠡᠨ ᠳᠠᠷᠤᠵᠤ
ᠡᠪᠦᠯ ᠦ᠋ᠨ ᠨᠢᠭᠡᠨ ᠦᠭᠦᠴᠡᠨ ᠮᠠᠯ ᠢ᠋ᠶ᠋ᠠᠷ
ᠪᠦᠲᠦᠨ ᠵᠢᠯ ᠱᠥᠯᠥ ᠪᠡᠨ ᠬᠢᠵᠦ
ᠡᠪᠳᠡᠷᠬᠡᠢ ᠮᠠᠢᠵᠢᠭᠢ ᠥᠪᠥᠩ ᠭᠡᠷ ᠢ᠋ᠶ᠋ᠡᠨ
ᠬᠣᠨᠢᠨ ᠬᠣᠷᠭᠣᠯ ᠢ᠋ᠶ᠋ᠠᠷ ᠳᠤᠯᠠᠭᠠᠴᠠᠭᠤᠯᠵᠤ
ᠢᠳᠡᠬᠦ ᠬᠦᠨᠡᠰᠦ ᠨᠢ ᠪᠦᠲᠦᠨ ᠵᠢᠯ ᠢ᠋ᠶ᠋ᠡᠷ
ᠡᠷᠳᠡᠨᠢ ᠰᠢᠰᠢ ᠨᠣᠶᠠᠨ ᠰᠢᠰᠢ ᠶ᠋ᠢᠨ ᠭᠤᠯᠢᠷ
ᠡᠯᠵᠢᠭᠡ ᠯᠠᠭᠤᠰᠠ ᠮᠣᠷᠢᠨ ᠬᠠᠰᠠᠭ ᠢ᠋ᠶ᠋ᠠᠷ
ᠲᠡᠭᠡᠭᠡᠪᠦᠷᠢ ᠶ᠋ᠢᠨ ᠪᠠᠭᠠᠵᠢ ᠪᠣᠯᠭᠠᠵᠤ ᠪᠠᠢᠭᠰᠠᠨ
ᠨᠠᠰᠤᠨ ᠳ᠋ᠠᠭᠠᠨ ᠮᠠᠷᠲᠠᠬᠤ ᠦᠭᠡᠢ ᠴᠠᠭ ᠮᠥᠴᠡ
ᠨᠠᠶᠠᠭᠠᠳ ᠣᠨ ᠳ᠋ᠤ᠌ ᠯᠠ ᠪᠠᠢᠭᠰᠠᠨ
ᠨᠠᠷᠠ ᠭᠠᠷᠤᠭᠰᠠᠭᠠᠷ ᠯᠠ ᠰᠢᠭᠤᠷᠭᠠ ᠰᠢᠭᠤᠷᠠᠭᠠᠳ
ᠡᠳᠦᠷ ᠬᠣᠨᠣᠭ ᠤᠷᠲᠤ ᠠ᠋ᠴᠠ ᠤᠷᠲᠤ
ᠨᠠᠰᠤ ᠪᠠᠭᠠ ᠴᠢᠰᠤ ᠰᠢᠩᠭᠡᠨ
ᠵᠣᠷᠢᠭ ᠰᠥᠰᠥ ᠠᠨᠠᠢ ᠤᠴᠢᠷ ᠠ᠋ᠴᠠ ᠨᠡᠢᠳᠡᠮ ᠡᠩᠨᠡᠷᠡᠬᠦ ᠡᠯᠡᠰᠦ ᠶ᠋ᠢ ᠬᠠᠷᠠᠭᠠᠳ
ᠠᠢᠳᠠᠰ ᠲᠥᠷᠥᠨ ᠮᠡᠯᠡᠷᠡᠳᠡᠭ ᠯᠡ ᠪᠠᠢᠭᠰᠠᠨ
ᠦᠶᠡ ᠵᠡᠷᠭᠡᠯᠡᠭᠰᠡᠨ ᠥᠨᠳᠥᠷ ᠮᠠᠩᠬᠠ ᠨᠤᠭᠤᠳ
ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠵᠢᠭᠰᠠᠵᠤ
ᠥᠩᠰᠢᠭ ᠲᠠᠷᠭᠤᠨ ᠨᠤᠲᠤᠭ ᠤᠰᠤ ᠶ᠋ᠢ ᠮᠢᠨᠢ
ᠨᠢᠳᠦ ᠢᠷᠮᠡᠬᠦ ᠵᠠᠭᠤᠷᠠ ᠵᠠᠯᠭᠢᠮᠠᠷ ᠪᠣᠯᠬᠤ ᠳ᠋ᠤ᠌
ᠦᠶᠡᠰ ᠦᠶᠡᠰ ᠪᠣᠳᠣᠬᠤ ᠳ᠋ᠤ᠌
ᠵᠢᠷᠦᠬᠡᠨ ᠴᠣᠬᠢᠯᠭᠠ ᠲᠦᠷᠭᠡᠰᠴᠦ ᠥᠭᠡᠷᠡᠴᠢᠯᠡᠨᠡ ᠭᠡᠰᠡᠨ ᠦᠵᠡᠯ ᠪᠣᠳᠣᠯ
ᠥᠷᠥᠴᠡ ᠴᠡᠭᠡᠵᠢᠨ ᠳ᠋ᠦ᠍ ᠰᠣᠶᠣᠭᠠᠯᠠᠪᠠ
ᠰᠠᠯᠬᠢ ᠢᠰᠬᠡᠷᠴᠦ ᠰᠢᠷᠣᠢ ᠬᠤᠢᠯᠠᠷᠠᠭᠰᠠᠨ
ᠶᠡᠷᠡᠭᠡᠳ ᠣᠨ ᠤ᠋ ᠦᠶᠡᠰ ᠲᠦ᠍
ᠰᠠᠨᠠᠭᠠ ᠪᠠᠢᠭᠠᠳ ᠤᠨᠤᠭᠠ ᠬᠦᠷᠬᠦ ᠦᠭᠡᠢ
ᠰᠠᠨᠳᠤᠷᠭᠠᠵᠤ ᠯᠠ ᠪᠠᠢᠭᠰᠠᠨ ᠰᠢᠦ
ᠰᠠᠭᠤᠭᠰᠠᠨ ᠭᠡᠷ ᠡᠯᠡᠰᠦᠨ ᠳ᠋ᠦ᠍ ᠳᠠᠷᠤᠭᠳᠠᠭᠰᠠᠨ ᠢ᠋
ᠬᠠᠷᠠᠨ ᠬᠠᠷᠠᠨ ᠰᠠᠭᠤᠬᠤ ᠳ᠋ᠤ᠌
ᠰᠠᠨᠴᠢᠭ ᠤ᠋ᠨ ᠦᠰᠦᠨ ᠦ᠌ ᠬᠠᠵᠠᠭᠤ ᠪᠠᠷ
ᠨᠢᠯᠪᠤᠰᠤᠨ ᠵᠠᠮ ᠨᠡᠭᠡᠭᠡᠯᠲᠡᠲᠡᠢ
ᠪᠤᠳᠠᠩ ᠮᠠᠨᠠᠨ ᠲᠠᠲᠠᠭᠰᠠᠨ ᠠᠳᠠᠯᠢ
ᠡᠳᠦᠷ ᠰᠥᠨᠢ ᠦᠭᠡᠢ ᠰᠠᠯᠬᠢᠯᠠᠵᠤ
ᠪᠤᠭᠤᠷᠤᠯ ᠳᠡᠭᠡᠳᠦ ᠡᠴᠡ ᠥᠪᠯᠡᠭᠰᠡᠨ ᠨᠤᠲᠤᠭ
ᠨᠡᠯᠦᠭᠡᠷ ᠡᠯᠡᠰᠦᠨ ᠳ᠋ᠦ᠍ ᠳᠠᠷᠤᠭᠳᠠᠵᠤ
ᠪᠤᠲᠠ ᠪᠤᠷᠭᠠᠰᠤ ᠲᠠᠷᠢᠶᠠ ᠭᠡᠬᠦ ᠳ᠋ᠦ᠍
ᠰᠣᠶᠣᠭᠠ ᠮᠣᠳᠣ ᠴᠤ᠌ ᠣᠯᠳᠠᠬᠤ ᠦᠭᠡᠢ
ᠪᠣᠳᠣᠨ ᠪᠣᠳᠣᠨ ᠰᠠᠭᠤᠬᠤ ᠳ᠋ᠤ᠌
ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ ᠱᠠᠷᠬᠢᠷᠠᠵᠤ
ᠬᠥᠯᠥᠰᠥ ᠤᠷᠤᠰᠬᠠᠨ ᠬᠦᠷᠵᠡ ᠡᠷᠭᠢᠭᠦᠯᠵᠦ
ᠨᠤᠲᠤᠭ ᠤᠰᠤ ᠪᠠᠨ ᠥᠭᠡᠷᠡᠴᠢᠯᠡᠶᠡ ᠭᠡᠬᠦ ᠳ᠋ᠦ᠍
ᠬᠦᠷᠮᠡ ᠨᠢ ᠬᠦᠷᠲᠡᠯᠡ ᠨᠥᠬᠦᠭᠡᠰᠦᠲᠡᠢ
ᠶᠠᠳᠠᠭᠤ ᠬᠣᠭᠣᠰᠣᠨ ᠯᠠ ᠪᠠᠢᠭᠰᠠᠨ
ᠬᠦᠯᠦᠭ ᠦ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠤᠷᠭᠠ ᠠᠳᠬᠤᠭᠰᠠᠨ
ᠮᠠᠯᠴᠢᠨ ᠬᠥᠮᠦᠨ ᠪᠣᠯᠤᠶᠠ ᠭᠡᠬᠦ ᠳ᠋ᠦ᠍
ᠬᠥᠷᠥᠰᠥ ᠨᠢ ᠨᠢᠴᠦᠭᠦᠨ ᠡᠯᠡᠰᠦ ᠡᠴᠡ ᠥᠭᠡᠷᠡ
ᠶᠠᠭᠤ ᠴᠤ᠌ ᠪᠠᠢᠭᠠ ᠦᠭᠡᠢ ᠶᠦᠮ
ᠠᠷᠠᠯᠵᠢᠶᠠ ᠬᠢᠵᠦ ᠠᠮᠢ ᠭᠣᠣᠯ ᠢ᠋ᠶ᠋ᠠᠨ
ᠠᠷᠭᠠᠴᠠᠭᠠᠶᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌
ᠠᠷᠠᠳ ᠤ᠋ᠨ ᠮᠥᠩᠭᠥ ᠬᠠᠷᠮᠠᠨ ᠳᠣᠲᠣᠷᠠ ᠬᠣᠭᠣᠰᠣᠨ
ᠠᠵᠢᠯ ᠬᠥᠳᠡᠯᠮᠦᠷᠢ ᠪᠡᠷ ᠭᠣᠣᠯ ᠪᠣᠯᠭᠠᠵᠤ
ᠡᠯᠡᠰᠦ ᠮᠠᠩᠬᠠ ᠪᠠᠨ ᠥᠭᠡᠷᠡᠴᠢᠯᠡᠶᠡ ᠭᠡᠬᠦ ᠳ᠋ᠦ᠍
ᠠᠷᠪᠠᠨ ᠬᠤᠷᠤᠭᠤ ᠬᠣᠶᠠᠷ ᠨᠢᠳᠤᠷᠭᠠ ᠠ᠋ᠴᠠ ᠥᠭᠡᠷᠡ
ᠶᠠᠭᠤ ᠴᠤ᠌ ᠦᠭᠡᠢ ᠬᠣᠭᠣᠰᠣᠨ
ᠬᠠᠶᠠᠭᠠᠳ ᠶᠠᠪᠤᠶᠠ ᠭᠡᠬᠦᠯᠡᠷ
ᠰᠠᠭᠤᠭᠰᠠᠨ ᠨᠤᠲᠤᠭ ᠰᠠᠢᠬᠠᠨ ᠬᠠᠷᠠᠭᠳᠠᠨᠠ
ᠬᠠᠷᠠᠭᠠᠨ ᠳ᠋ᠤ᠌ ᠲᠣᠳᠣᠷᠠᠬᠤ ᠡᠯᠡᠰᠦ ᠨᠢ
ᠳᠠᠯᠠᠯᠵᠤ ᠴᠤ᠌ ᠪᠠᠢᠮᠠᠷ ᠬᠠᠷᠠᠭᠳᠠᠨᠠ
ᠭᠠᠵᠠᠷ ᠤ᠋ᠨ ᠬᠣᠯᠠ ᠠ᠋ᠴᠠ ᠠᠪᠴᠢᠷᠠᠭᠰᠠᠨ ᠪᠤᠷᠭᠠᠰᠤ ᠨᠢ
ᠬᠠᠮᠲᠤ ᠪᠠᠢᠶᠠ ᠭᠡᠰᠡᠨ ᠰᠢᠭ ᠲᠣᠯᠣᠭᠠᠢ ᠨᠠᠢᠭᠤᠯᠵᠠᠨᠠ
ᠬᠣᠷᠢᠳᠤᠭᠠᠷ ᠵᠠᠭᠤᠨ ᠤ᠋ ᠰᠡᠭᠦᠯᠴᠢ ᠪᠡᠷ
ᠡᠷᠴᠢ ᠵᠣᠷᠢᠭ ᠬᠥᠪᠴᠢᠯᠡᠭᠳᠡᠨ ᠬᠣᠯᠪᠣᠵᠤ ᠢᠷᠡᠭᠰᠡᠨ ᠡᠯᠡᠰᠦ ᠶ᠋ᠢ
ᠲᠦᠷᠦᠭᠦᠦ ᠶ᠋ᠢ ᠨᠢ ᠰᠠᠯᠭᠠᠵᠤ ᠨᠣᠭᠲᠣᠯᠠᠪᠠ
ᠬᠣᠨᠣᠭ ᠤ᠋ᠨ ᠰᠢᠪᠠᠭᠤ ᠨᠥᠮᠥᠷᠢᠳᠡᠴᠢᠬᠡᠮᠡᠷ
ᠬᠣᠶᠠᠷ ᠮᠠᠩᠬᠠ ᠨᠢ ᠲᠣᠭᠲᠠᠪᠤᠷᠢᠵᠢᠪᠠ
ᠬᠣᠩᠭᠣᠷ ᠵᠢᠷᠦᠬᠡᠨ ᠳ᠋ᠦ᠍ ᠮᠢᠨᠢ
ᠬᠣᠣᠰ ᠦᠭᠡᠢ ᠪᠠᠶᠠᠷ ᠪᠣᠯᠤᠯᠠ
ᠪᠣᠳᠣᠨ ᠪᠣᠳᠣᠨ ᠰᠠᠭᠤᠬᠤ ᠳ᠋ᠤ᠌
ᠨᠤᠲᠤᠭ ᠮᠢᠨᠢ ᠰᠠᠢᠬᠠᠨ ᠬᠠᠷᠠᠭᠳᠠᠨᠠ
ᠪᠣᠷᠣ ᠵᠢᠷᠦᠬᠡᠨ ᠳ᠋ᠡᠭᠡᠨ ᠲᠤᠩᠭᠠᠵᠤ
ᠪᠦᠲᠦᠭᠡᠨ ᠪᠠᠢᠭᠤᠯᠬᠤ ᠪᠣᠳᠣᠯ ᠲᠥᠷᠥᠭᠳᠡᠪᠡ
ᠪᠤᠷᠭᠠᠰᠤ ᠮᠣᠳᠣ ᠲᠠᠷᠢᠬᠤ ᠪᠠᠷ
ᠪᠣᠳᠣᠯ ᠶᠤᠭᠠᠨ ᠴᠢᠩᠭᠠᠯᠠᠵᠤ
ᠪᠣᠯᠵᠣᠮᠣᠷ ᠰᠢᠪᠠᠭᠤ ᠵᠢᠷᠭᠢᠬᠦ ᠪᠡᠷ
ᠪᠣᠰᠴᠤ ᠵᠡᠷᠭᠡᠴᠡᠨ ᠠᠵᠢᠯᠯᠠᠭᠠᠳ
ᠵᠠᠪᠠᠯ ᠴᠢᠮᠠᠶ᠋ᠢ ᠳᠡᠢᠯᠦᠨᠡ ᠭᠡᠵᠦ
ᠲᠩᠷᠢ ᠳ᠋ᠦ᠍ ᠲᠠᠩᠭᠠᠷᠢᠭ ᠲᠠᠯᠪᠢᠵᠤ
ᠵᠠᠵᠢᠨ ᠦᠰᠦ ᠮᠢᠨᠢ ᠴᠠᠢᠭᠰᠠᠨ ᠴᠤ᠌
ᠬᠣᠶᠠᠷ ᠨᠢᠳᠤᠷᠭᠠ ᠪᠠᠨ ᠵᠠᠩᠭᠢᠳᠤᠭᠰᠠᠨ
ᠭᠡᠮ ᠦᠭᠡᠢ ᠨᠡᠯᠦᠭᠡᠷ ᠡᠯᠡᠰᠦᠨ ᠳ᠋ᠦ᠍
ᠨᠢᠯᠬᠠ ᠴᠢᠬᠢ ᠶ᠋ᠢ ᠪᠣᠢᠵᠢᠭᠤᠯᠵᠤ
ᠠᠮᠢᠨ ᠤ᠋ ᠬᠡᠦᠬᠡᠳ ᠠᠳᠠᠯᠢ
ᠠᠰᠠᠷᠠᠨ ᠬᠠᠮᠠᠭᠠᠯᠠᠵᠤ ᠢᠷᠡᠪᠡ
ᠨᠤᠷᠠ ᠡᠯᠡᠰᠦ ᠨᠣᠮᠣᠬᠠᠷᠠᠵᠤ
ᠨᠣᠮᠢᠨ ᠳᠠᠪᠠᠯᠭᠠᠨ ᠬᠠᠶᠠᠯᠠᠨ
ᠨᠤᠲᠤᠭ ᠤᠰᠤ ᠪᠠᠨ ᠪᠠᠷᠠᠯᠠᠬᠤ ᠳ᠋ᠤ᠌
ᠵᠢᠷᠭᠠᠯ ᠤ᠋ᠨ ᠳᠠᠭᠤᠨ ᠬᠠᠩᠭᠢᠨᠠᠨᠠ
ᠳᠥᠴᠢᠨ ᠵᠢᠯ ᠢ᠋ᠶ᠋ᠡᠨ ᠡᠷᠭᠢᠴᠡᠭᠦᠯᠬᠦ ᠳ᠋ᠦ᠍
ᠭᠤᠨᠢᠭ ᠪᠠᠶᠠᠰᠤᠯ ᠬᠣᠣᠰᠯᠠᠨᠠ
ᠭᠣᠪᠢ ᠶ᠋ᠢᠨ ᠳᠤᠮᠳᠠᠬᠢ ᠮᠠᠯᠴᠢᠨ ᠠᠢᠯ ᠤ᠋ᠳ
ᠠᠮᠢᠳᠤᠷᠠᠯ ᠤ᠋ᠨ ᠰᠠᠢᠬᠠᠨ ᠳ᠋ᠤ᠌ ᠱᠤᠩᠪᠠᠨᠠ
ᠥᠩᠭᠡᠷᠡᠵᠦ ᠣᠳᠤᠭᠰᠠᠨ ᠳᠥᠴᠢᠨ ᠵᠢᠯ
ᠲᠡᠦᠬᠡ ᠪᠣᠯᠵᠤ ᠬᠣᠴᠣᠷᠪᠠᠢ
ᠦᠯᠢᠭᠡᠷ ᠳᠣᠮᠣᠭ ᠰᠢᠭ᠋ ᠳᠠᠯᠠᠭᠠᠳ ᠣᠨ ᠢ᠋ᠶ᠋ᠠᠨ
ᠪᠤᠤ ᠯᠠ ᠮᠠᠷᠲᠠ ᠨᠠᠨᠳᠢᠩᠨᠠᠵᠤ ᠶᠠᠪᠤᠶᠠ
ᠥᠭᠡᠷᠡᠴᠢᠯᠡᠯᠲᠡ ᠨᠡᠭᠡᠭᠡᠯᠲᠡ ᠶ᠋ᠢᠨ ᠳᠥᠴᠢᠨ ᠵᠢᠯ
ᠠᠮᠵᠢᠯᠲᠠ ᠢᠯᠠᠯᠲᠠ ᠪᠢᠯᠬᠠᠷᠠᠵᠤ
ᠣᠷᠣᠭᠰᠢ ᠲᠠᠪᠰᠢᠬᠤ ᠢᠷᠡᠭᠡᠳᠦᠢ ᠶ᠋ᠢᠨ ᠵᠠᠮ
ᠨᠡᠩ ᠰᠠᠷᠠᠭᠤᠯ ᠳᠠᠷᠳᠠᠩ ᠪᠣᠯᠬᠤ ᠶᠤᠮ
ᠦᠭᠡᠢᠭᠦᠦ ᠬᠣᠭᠣᠰᠣᠨ ᠳᠠᠯᠠᠭᠠᠳ ᠣᠨ ᠳ᠋ᠤ᠌
ᠡᠪᠯᠡᠭᠦᠯᠵᠦ ᠶᠠᠪᠤᠭᠰᠠᠨ ᠠᠷᠪᠠᠨ ᠵᠢᠯ
ᠢᠯᠠᠯᠲᠠ ᠢᠯᠠᠭᠳᠠᠯ ᠤ᠋ᠨ ᠳᠤᠮᠳᠠ
ᠲᠡᠮᠡᠦᠯᠵᠦ ᠶᠠᠪᠤᠭᠰᠠᠨ ᠠᠷᠪᠠᠨ ᠵᠢᠯ
ᠠᠮᠵᠢᠯᠲᠠ ᠣᠯᠤᠯᠲᠠ ᠶ᠋ᠢᠨ ᠡᠬᠢᠨ ᠳ᠋ᠦ᠍
ᠪᠠᠶᠠᠷᠲᠠᠢ ᠶᠠᠪᠤᠭᠰᠠᠨ ᠠᠷᠪᠠᠨ ᠵᠢᠯ
ᠠᠯᠲᠠᠨ ᠰᠢᠷᠭᠠᠯ ᠡᠯᠡᠰᠦ ᠮᠠᠩᠬᠠ ᠶ᠋ᠢ
ᠡᠵᠡᠮᠳᠡᠵᠦ ᠠᠪᠤᠭᠰᠠᠨ ᠠᠷᠪᠠᠨ ᠵᠢᠯ
ᠨᠤᠲᠤᠭ ᠮᠢᠨᠢ ᠬᠤᠪᠢᠷᠠᠵᠠᠢ
ᠭᠠᠯᠠᠭᠤ ᠨᠤᠭᠤᠰᠤ
ᠰᠠᠭᠤᠬᠤ ᠠ᠋ᠴᠠ ᠨᠠᠭᠤᠷ ᠲᠠᠢ
ᠨᠤᠲᠤᠭ ᠮᠢᠨᠢ ᠬᠤᠪᠢᠷᠠᠵᠠᠢ
ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ
ᠮᠠᠯᠵᠢᠬᠤ ᠠ᠋ᠴᠠ ᠡᠪᠡᠰᠦ ᠪᠡᠯᠴᠢᠭᠡᠷ ᠲᠡᠢ
ᠨᠤᠲᠤᠭ ᠮᠢᠨᠢ ᠬᠤᠪᠢᠷᠠᠵᠠᠢ
ᠠᠶᠠᠨ ᠳ᠋ᠤ᠌
ᠶᠠᠪᠤᠬᠤ ᠠ᠋ᠴᠠ ᠵᠠᠮ ᠲᠠᠢ
ᠨᠤᠲᠤᠭ ᠮᠢᠨᠢ ᠬᠤᠪᠢᠷᠠᠵᠠᠢ
ᠰᠢᠷᠠ ᠡᠯᠡᠰᠦ
ᠨᠣᠮᠢᠨ ᠨᠣᠭᠣᠭᠠᠨ ᠪᠦᠷᠢᠳᠦ ᠪᠣᠯᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠤᠳᠤᠯᠲᠤ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ