ᠪᠠᠷᠢᠭᠳᠠᠵᠤ ᠪᠠᠢᠭᠠ ᠬᠡᠷᠡᠮ- ᠭ· ᠴᠢᠩᠪᠠᠭᠠᠲᠤᠷБаригдаж байгаа хэрэм-Г· чанбаатар
429 ᠭ· ᠴᠢᠩᠪᠠᠭᠠᠲᠤᠷ
ᠨᠡᠭᠦᠳᠡᠯ ᠦ᠋ᠨ ᠰᠣᠶᠣᠯ ᠪᠠ ᠲᠠᠷᠢᠶᠠᠯᠠᠩ ᠤ᠋ᠨ ᠰᠣᠶᠣᠯ ᠤ᠋ᠨ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠮᠥᠷᠭᠥᠯᠳᠦᠭᠡᠨ ᠦ᠌ ᠪᠦᠲᠦᠭᠡᠯ ᠪᠣᠯᠤᠭᠰᠠᠨ ᠤᠷᠲᠤ ᠴᠠᠭᠠᠨ ᠬᠡᠷᠡᠮ ᠢ᠋ ᠨᠡᠭᠦᠳᠡᠯᠴᠢᠳ ᠪᠠᠷᠢᠭᠤᠯᠤᠭᠰᠠᠨ ᠶᠤᠮ᠃ ᠳᠡᠯᠡᠬᠡᠢ ᠶ᠋ᠢᠨ ᠠᠯᠳᠠᠷᠲᠤ ᠪᠠᠷᠢᠯᠭᠠ ᠭᠡᠭᠳᠡᠵᠦ ᠪᠠᠢᠭᠠ ᠲᠡᠷᠡ ᠬᠡᠷᠡᠮ ᠢ᠋ ᠲᠤᠬᠠᠢ ᠶ᠋ᠢᠨ ᠨᠣᠶᠠᠷᠬᠠᠭᠴᠢᠳ ᠨᠢ ᠭᠠᠢᠬᠠᠮᠰᠢᠭ ᠡᠭᠦᠳᠬᠦ ᠭᠡᠵᠦ ᠪᠠᠷᠢᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠤᠮᠠᠷᠠᠲᠤ ᠶ᠋ᠢᠨ ᠨᠡᠭᠦᠳᠡᠯᠴᠢᠨ ᠤᠳᠤᠮ ᠤ᠋ᠨ ᠮᠣᠷᠢᠲᠤ ᠳᠠᠢᠴᠢᠳ ᠢ᠋ ᠬᠣᠷᠢᠬᠤ ᠯᠠ ᠭᠡᠵᠦ ᠠᠷᠠᠳ ᠲᠦᠮᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠷᠢᠭᠤᠯᠤᠭᠰᠠᠨ ᠠᠵᠢ᠃ ᠭᠡᠪᠡᠴᠦ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠰᠦᠷ ᠰᠦᠯᠳᠡ ᠳ᠋ᠦ᠍ ᠰᠦᠵᠢᠭᠯᠡᠨ《ᠠᠶᠤᠲᠤᠭᠠᠢ᠂ ᠪᠢᠰᠢᠷᠡᠲᠦᠭᠡᠢ!》 ᠭᠡᠮᠡᠨ ᠤᠤᠬᠠᠢ ᠬᠠᠰᠬᠢᠷᠤᠭᠰᠠᠨ ᠣᠮᠣᠭᠲᠤ ᠮᠣᠷᠢᠲᠡᠳ ᠢ᠋ ᠠᠭᠤᠯᠠ ᠶ᠋ᠢᠨ ᠬᠢᠷᠠ ᠡᠮᠵᠢᠭᠰᠡᠨ ᠲᠡᠷᠡ ᠬᠡᠷᠡᠮ ᠬᠠᠰᠢᠵᠤ ᠳᠡᠢᠯᠬᠦ ᠦᠭᠡᠢ ᠭᠡᠳᠡᠭ ᠢ᠋ ᠰᠠᠭᠤᠭᠠᠯᠢ ᠢᠷᠭᠡᠳ ᠮᠡᠳᠡᠭᠡ ᠦᠭᠡᠢ ᠤᠴᠢᠷ ᠠ᠋ᠴᠠ ᠲᠡᠳᠡᠨ ᠢ᠋《ᠲᠩᠷᠢ ᠶ᠋ᠢᠨ ᠴᠡᠷᠢᠭ》 ᠭᠡᠮᠡᠨ ᠡᠮᠢᠶᠡᠨ ᠣᠢᠯᠠᠭᠠᠵᠤ ᠴᠤ᠌ ᠪᠠᠢᠭᠰᠠᠨ ᠪᠠᠢᠨᠠ᠃ ᠲᠥᠪ ᠠᠽᠢᠶᠠ ᠶ᠋ᠢᠨ ᠥᠨᠳᠥᠷᠯᠢᠭ ᠡᠴᠡ ᠡᠬᠢ ᠠᠪᠤᠭᠰᠠᠨ ᠨᠡᠭᠦᠳᠡᠯᠴᠢᠳ ᠦ᠋ᠨ ᠲᠣᠭᠰᠢᠨ ᠦᠶᠡᠷ ᠡᠢᠨ ᠬᠦ᠌ ᠠᠮᠠᠭᠠᠢ ᠵᠢᠯᠣᠭᠣ ᠦᠭᠡᠢ ᠳᠣᠪᠲᠣᠯᠤᠨ ᠭᠤᠷᠪᠠᠨ ᠲᠢᠪ ᠦ᠋ᠨ ᠠᠭᠤᠳᠠᠮ ᠵᠠᠢ ᠪᠠᠷ ᠲᠡᠯᠡᠷᠡᠨ ᠲᠡᠯᠡᠷᠡᠭᠰᠡᠭᠡᠷ ᠳᠠᠶᠠᠭᠠᠷᠴᠢᠯᠠᠯ ᠤ᠋ᠨ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠵᠦ᠂ ᠰᠡᠭᠦᠯᠡᠷ ᠨᠢ ᠨᠠᠭᠤᠷ ᠪᠦᠷᠢᠳᠦ ᠪᠣᠯᠤᠨ ᠴᠡᠯᠡᠯᠵᠡᠨ ᠲᠣᠭᠲᠠᠵᠠᠢ᠃ ᠲᠡᠦᠬᠡ ᠶ᠋ᠢᠨ ᠬᠦᠷᠳᠦ ᠵᠣᠭᠰᠣᠭᠠ ᠦᠭᠡᠢ ᠡᠷᠭᠢᠭᠰᠡᠭᠡᠷ᠁ ᠨᠡᠭᠦᠳᠡᠯᠴᠢᠳ ᠦ᠋ᠨ ᠨᠢᠭᠡ ᠬᠡᠰᠡᠭ ᠨᠢ ᠳᠡᠯᠡᠬᠡᠢ ᠶ᠋ᠢᠨ ᠥᠨᠴᠥᠭ ᠪᠤᠯᠤᠩ ᠪᠦᠬᠦᠨ ᠳ᠋ᠦ᠍ ᠠᠭᠤᠰᠤᠨ ᠰᠢᠩᠭᠡᠵᠦ᠂ ᠢᠵᠢᠯᠢᠰᠢᠨ ᠬᠣᠯᠢᠮᠠᠭᠵᠢᠵᠤ; ᠨᠥᠭᠦᠭᠡ ᠬᠡᠰᠡᠭ ᠨᠢ ᠤᠤᠭᠠᠯ ᠨᠤᠲᠤᠭ ᠮᠣᠩᠭᠣᠯ ᠤ᠋ᠨ ᠥᠨᠳᠥᠷᠯᠢᠭ ᠲᠡᠭᠡᠨ ᠬᠠᠷᠢᠵᠤ ᠬᠣᠷᠸᠠ ᠶ᠋ᠢᠨ ᠴᠢᠬᠢ ᠰᠣᠨᠣᠷ ᠠ᠋ᠴᠠ ᠬᠣᠯᠠ ᠵᠠᠢᠳᠠᠭᠤ《ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠦ᠂ ᠪᠡᠯᠡᠨ ᠢ᠋ᠶ᠋ᠡᠨ ᠢᠳᠡᠵᠦ》 ᠠᠮᠢᠳᠤᠷᠠᠭᠰᠠᠭᠠᠷ ᠥᠨᠥ ᠳ᠋ᠦ᠍ ᠬᠦᠷᠴᠡᠢ᠃ ᠭᠡᠪᠡᠴᠦ᠂ ᠴᠠᠭᠠᠨ ᠬᠡᠷᠡᠮ ᠡᠷᠲᠡ ᠨᠢᠭᠡᠨ ᠴᠠᠭ ᠲᠠᠬᠢ ᠣᠮᠣᠭᠲᠤ ᠨᠡᠭᠦᠳᠡᠯᠴᠢᠳ ᠦ᠋ᠨ ᠲᠣᠭᠰᠢᠨ ᠲᠡᠦᠬᠡ ᠪᠣᠯᠤᠨ ᠬᠤᠯᠴᠢᠭᠠᠷ ᠰᠠᠭᠤᠭᠠᠯᠢᠴᠢᠳ ᠤ᠋ᠨ ᠲᠦᠭᠰᠢᠭᠦᠷᠢᠲᠦ ᠦᠶᠡ ᠶ᠋ᠢ ᠪᠠᠲᠤ ᠭᠡᠷᠡᠴᠢᠯᠡᠨ ᠰᠡᠬᠦᠢᠭᠰᠡᠭᠡᠷ ᠪᠥᠯᠥᠭᠡ! ᠡᠨᠡ ᠬᠡᠷᠡᠮ ᠨᠢ ᠪᠠᠰᠠ ᠴᠤ᠌ ᠲᠠᠷᠢᠶᠠᠯᠠᠩ ᠤ᠋ᠨ ᠪᠣᠯᠤᠨ ᠮᠠᠯᠵᠢᠯ ᠤ᠋ᠨ ᠰᠣᠶᠣᠯ ᠤ᠋ᠨ ᠭᠠᠵᠠᠷ ᠵᠦᠢ᠂ ᠴᠠᠭ ᠠᠭᠠᠷ ᠤ᠋ᠨ ᠲᠣᠭᠲᠠᠯᠴᠠᠭᠠ ᠲᠠᠢ ᠤᠶᠠᠯᠳᠤᠭᠰᠠᠨ ᠵᠠᠭᠠᠭ ᠪᠠᠢᠭᠰᠠᠨ ᠶᠤᠮ᠃
《ᠰᠠᠯᠬᠢ ᠨᠡᠪᠲᠡᠷᠡᠬᠦ ᠦᠭᠡᠢ ᠬᠡᠷᠡᠮ ᠭᠡᠵᠦ ᠦᠭᠡᠢ》 ᠭᠡᠳᠡᠭ ᠶ᠋ᠢᠡᠷ ᠴᠠᠭᠠᠨ ᠬᠡᠷᠡᠮ ᠦᠨᠡᠬᠡᠷ ᠲᠡᠦᠬᠡ ᠶ᠋ᠢᠨ ᠰᠠᠯᠬᠢ ᠶ᠋ᠢ ᠬᠠᠭᠠᠵᠤ ᠴᠢᠳᠠᠭᠠ ᠦᠭᠡᠢ᠂ ᠴᠢᠳᠠᠬᠤ ᠴᠤ᠌ ᠦᠭᠡᠢ ᠭᠡᠳᠡᠭ ᠊ᠢ ᠲᠡᠦᠬᠡ ᠭᠡᠷᠡᠴᠢᠯᠡᠵᠡᠢ᠃ ᠬᠦᠢᠲᠡᠨ ᠵᠡᠪᠰᠡᠭ ᠦ᠋ᠨ ᠴᠠᠭ ᠦᠶᠡ ᠥᠩᠭᠡᠷᠡᠵᠦ᠂ ᠭᠠᠯᠲᠤ ᠵᠡᠪᠰᠡᠭ ᠦ᠋ᠨ ᠡᠷᠢᠨ ᠪᠣᠯᠬᠤ ᠳᠤ ᠨᠡᠩ ᠴᠦ᠍ ᠪᠠᠷᠢᠮᠠᠯ ᠬᠡᠷᠡᠮ ᠬᠡᠷᠡᠭ ᠡᠴᠡ ᠪᠡᠨ ᠭᠠᠷᠴᠤ᠂ ᠬᠦᠴᠦᠷᠬᠡᠭᠯᠡᠯ ᠪᠤᠶᠤ ᠺᠣᠯᠣᠨᠢᠴᠢᠯᠠᠯ ᠨᠢ ᠥᠭᠡᠷᠡ ᠨᠢᠭᠡ《ᠵᠡᠪᠰᠡᠭ》 ᠶ᠋ᠢᠡᠷ ᠭᠦᠢᠴᠡᠳᠬᠡᠭᠳᠡᠬᠦ ᠪᠣᠯᠵᠠᠢ᠃ ᠳᠡᠯᠡᠬᠡᠢ ᠶ᠋ᠢᠨ ᠬᠣᠶᠠᠳᠤᠭᠠᠷ ᠳᠠᠶ᠋ᠢᠨ ᠤ ᠳᠠᠷᠠᠭᠠ ᠶᠠᠯᠲ᠋ᠠ ᠶ᠋ᠢᠨ ᠬᠤᠷᠠᠯᠳᠤᠭᠠᠨ ᠶ᠋ᠢᠠᠷ ᠳᠠᠮᠵᠢᠨ ᠬᠦᠴᠦᠨ ᠬᠦᠷᠢᠶᠡ ᠬᠤᠪᠢᠶᠠᠯᠴᠠᠭᠰᠠᠨ᠂ ᠭᠧᠷᠮᠠᠨ ᠪᠣᠯᠤᠨ ᠰᠣᠯᠣᠩᠭᠣᠰ ᠊ᠢ ᠠᠳᠠᠯᠢ ᠦᠭᠡᠢ ᠪᠠᠶ᠋ᠢᠭᠤᠯᠤᠮᠵᠢ ᠶ᠋ᠢᠨ ᠬᠡᠷᠡᠮ ᠶ᠋ᠢᠡᠷ ᠬᠣᠶᠠᠷ ᠬᠤᠪᠢᠶᠠᠭᠰᠠᠨ᠁ ᠵᠡᠷᠭᠡ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠲᠡᠦᠬᠡᠨ ᠳᠡᠭᠡᠷᠡᠬᠢ《ᠬᠡᠷᠡᠮ ᠦ᠋ᠨ ᠲᠡᠦᠬᠡ》 ᠠᠳᠠᠯᠢ ᠪᠤᠰᠤ ᠴᠠᠭ ᠦᠶᠡ ᠳᠤ᠂ ᠠᠳᠠᠯᠢ ᠪᠤᠰᠤ ᠭᠠᠵᠠᠷ ᠣᠷᠣᠨ ᠳᠤ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠶ᠋ᠢᠯᠠ᠃ ᠪᠠᠬᠠᠷᠠᠯ ᠲᠠᠢ ᠨᠢ ᠭᠡᠪᠡᠯ᠂ ᠭᠧᠷᠮᠠᠨᠴᠤᠳ ᠪᠧᠷᠯᠢᠨ ᠬᠡᠷᠡᠮ ᠊ᠢ ᠨᠤᠷᠠᠭᠠᠵᠤ ᠨᠢᠭᠡᠳᠦᠭᠰᠡᠨ ᠭᠧᠷᠮᠠᠨ ᠤᠯᠤᠰ ᠪᠣᠯᠤᠭᠰᠠᠨ ᠶ᠋ᠢᠠᠷ ᠳᠡᠯᠡᠬᠡᠢ ᠶ᠋ᠢᠨ ᠲᠦᠪᠰᠢᠨ ᠦ ᠥᠨᠳᠥᠷ ᠬᠥᠭᠵᠢᠯᠲᠡ ᠲᠡᠢ ᠪᠣᠯᠵᠤ ᠴᠢᠳᠠᠭᠰᠠᠨ ᠰᠠᠨ᠃ ᠡᠨᠡ ᠲᠤᠬᠠᠢ ᠮᠣᠩᠭᠣᠯ ᠤᠯᠤᠰ ᠦ᠋ᠨ ᠭᠠᠪᠢᠶᠠᠲᠤ ᠳᠠᠭᠤᠴᠢᠨ᠂《ᠴᠢᠩᠭᠢᠰ ᠬᠠᠭᠠᠨ ᠬᠠᠮᠲᠤᠯᠢᠭ》 ᠦ᠋ᠨ ᠠᠬᠠᠯᠠᠭᠴᠢ ᠵᠢᠷᠭᠠᠯᠰᠠᠶ᠋ᠢᠬᠠᠨ ᠲᠥᠪ ᠷᠠᠳᠢᠣ᠋ ᠶ᠋ᠢᠨ ᠰᠤᠷᠪᠤᠯᠵᠢᠯᠠᠭᠠ ᠪᠠᠷ᠄《ᠪᠧᠷᠯᠢᠨ ᠬᠡᠷᠡᠮ ᠊ᠢ ᠨᠤᠷᠠᠭᠠᠭᠰᠠᠨ ᠤ ᠳᠠᠷᠠᠭᠠ ᠭᠧᠷᠮᠠᠨ ᠤ ᠪᠦᠬᠦ ᠷᠣᠺᠴᠤᠳ ᠠᠭᠤᠳᠠᠮ ᠲᠠᠯᠠᠪᠠᠢ ᠳᠤ ᠬᠠᠷᠠᠮᠵᠢ ᠦᠭᠡᠢ ᠲᠣᠭᠯᠠᠯᠲᠠ ᠬᠢᠵᠦ ᠪᠡᠯᠭᠡᠯᠡᠭᠰᠡᠨ᠁ ᠲᠡᠭᠡᠬᠦ ᠦᠭᠡᠢ ᠴᠦ᠍ ᠶᠠᠭᠠᠬᠢᠬᠤ ᠪᠤᠢ᠁》 ᠭᠡᠵᠦ ᠶᠠᠷᠢᠵᠤ ᠪᠠᠶ᠋ᠢᠬᠰᠠᠨ ᠪᠢᠯᠡ! ᠬᠠᠷᠢᠨ ᠥᠨᠥᠳᠥᠷ ᠪᠣᠯ ᠠᠵᠤ ᠠᠬᠤᠢ ᠨᠢᠭᠡ ᠡᠰᠢᠵᠢᠵᠦ᠂ ᠰᠣᠶᠣᠯ ᠣᠯᠠᠨ ᠡᠰᠢᠵᠢᠵᠦ ᠪᠠᠶ᠋ᠢᠭᠠ ᠡᠷᠢᠨ᠃ ᠳᠠᠶᠠᠭᠠᠷᠴᠢᠯᠠᠯ ᠦ᠋ᠨ ᠡᠨᠡ ᠴᠠᠭ ᠦᠶᠡ ᠳᠤ ᠬᠥᠭᠵᠢᠭᠰᠡᠨ ᠤᠯᠤᠰ ᠦᠨᠳᠦᠰᠦᠲᠡᠨ ᠪᠠᠭᠠ ᠪᠠᠭᠤᠷᠠᠢ ᠤᠯᠤᠰ ᠦᠨᠳᠦᠰᠦᠲᠡᠨ ᠊ᠢ ᠠᠵᠤ ᠠᠬᠤᠢ᠂ ᠰᠣᠶᠣᠯ ᠦ᠋ᠨ ᠲᠠᠯᠠ ᠪᠠᠷ ᠰᠢᠬᠠᠨ ᠳᠡᠭᠡᠷᠡᠯᠬᠡᠬᠦ ᠨᠢ ᠬᠦᠴᠦᠷᠬᠡᠭᠯᠡᠯ ᠦ᠋ᠨ ᠳᠠᠶ᠋ᠢᠨ ᠠ᠋ᠴᠠ ᠬᠣᠯᠠ ᠢᠯᠡᠭᠦᠦ ᠲᠦᠷᠢᠯᠲᠡ ᠭᠡᠯᠮᠡᠭᠳᠡᠯ ᠊ᠢ ᠠᠪᠴᠢᠷᠠᠭᠰᠠᠨ ᠶᠤᠮ᠃ ᠡᠭᠦᠨ ᠊ᠢ ᠶᠠᠮᠠᠷ ᠬᠡᠷᠡᠮ ᠶ᠋ᠢᠡᠷ ᠬᠠᠰᠢᠬᠤ ᠪᠢᠯᠡ? ᠭᠡᠪᠡᠯ ᠭᠠᠭᠴᠠᠬᠠᠨ ᠪᠣᠯᠤᠮᠵᠢ ᠪᠤᠢ᠃ ᠳᠠᠷᠤᠢ ᠥᠪᠡᠷ ᠦ᠋ᠨ《ᠦᠨᠳᠦᠰᠦᠲᠡᠨ ᠦ ᠰᠣᠶᠣᠯ ᠦ᠋ᠨ ᠬᠡᠷᠡᠮ》— ᠨᠡᠶ᠋ᠢᠲᠡ ᠶ᠋ᠢᠨ ᠰᠣᠶᠣᠯ ᠰᠡᠳᠬᠢᠯᠭᠡᠨ ᠦ ᠣᠨᠴᠠᠯᠢᠭ ᠶ᠋ᠢᠠᠨ ᠪᠠᠲᠤ ᠬᠠᠳᠠᠭᠠᠯᠠᠬᠤ ᠯᠡ ᠴᠢᠬᠤᠯᠠ᠃ ᠬᠡᠷᠪᠡ ᠡᠨᠡ ᠬᠡᠷᠡᠮ ᠨᠤᠷᠠᠵᠤ ᠰᠦᠢᠳᠪᠡᠰᠦ ᠠᠶᠤᠯ ᠪᠣᠯᠤᠨᠠ ᠭᠡᠳᠡᠭ ᠊ᠢ᠂《ᠦᠵᠡᠭᠳᠡᠬᠦ ᠦᠭᠡᠢ ᠬᠡᠷᠡᠮ ᠦ᠋ᠨ ᠶᠡᠭᠦᠷᠡᠬᠦ ᠨᠢ ᠦᠵᠡᠭᠳᠡᠨᠡ᠂ ᠦᠯᠡᠳᠡᠭᠰᠡᠨ ᠨᠢ ᠰᠢᠳᠦ ᠯᠡ ᠪᠣᠯᠤᠭᠠᠰᠠᠢ》 ᠭᠡᠰᠡᠨ ᠨᠢᠭᠡᠨ ᠰᠢᠯᠦᠭ ᠲᠤ ᠤᠴᠢᠷᠯᠠᠭᠰᠠᠨ ᠪᠠᠶ᠋ᠢᠳᠠᠭ ᠪᠢᠯᠡ᠃ ᠬᠠᠷᠢᠨ ᠥᠨᠥᠳᠥᠷ ᠦ᠋ᠨ ᠡᠨᠡ ᠬᠡᠷᠡᠮ ᠡᠪᠳᠡᠭᠳᠡᠵᠦ᠂ ᠬᠠᠯᠠᠭᠤᠨ ᠵᠠᠭᠤᠷᠠ ᠮᠢᠨᠢ ᠲᠤᠰᠠᠭᠠᠷᠯᠠᠭᠰᠠᠨ ᠥᠭᠡᠷᠡ ᠬᠡᠷᠡᠮ ᠰᠠᠮ ᠪᠠᠷᠢᠬᠳᠠᠭᠰᠠᠭᠠᠷ ᠪᠠᠶ᠋ᠢᠭᠠ ᠰᠠᠨ᠁
᠁ ᠮᠣᠩᠭᠣᠯ ᠤᠯᠤᠰ ᠦ᠋ᠨ ᠬᠤᠪᠢ ᠲᠧᠯᠸᠢᠰ ᠦ᠋ᠨ ᠨᠢᠭᠡᠨ ᠤᠳᠤᠷᠢᠳᠤᠭᠠᠴᠢ ᠨᠠᠳᠠ᠄《ᠮᠣᠩᠭᠣᠯᠴᠤᠳ ᠰᠣᠶᠣᠯ ᠦ᠋ᠨ ᠬᠤᠪᠢ ᠳᠤ ᠮᠠᠰᠢ ᠵᠥᠷᠢᠶᠡ ᠲᠡᠢ ᠪᠣᠯᠤᠭᠠᠳ ᠪᠠᠢᠭᠠ᠃ ᠵᠢᠱ᠌ᠢᠶᠡᠯᠡᠬᠦ ᠳ᠋ᠦ᠍ ᠤᠯᠠᠭᠠᠨᠪᠠᠭᠠᠲᠤᠷ ᠤ᠋ᠨ ᠮᠣᠩᠭᠣᠯᠴᠤᠳ ᠪᠣᠯᠤᠨ ᠬᠥᠳᠡᠭᠡ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠪᠠᠢᠭᠠ ᠮᠣᠩᠭᠣᠯᠴᠤᠳ ᠱᠠᠯ ᠥᠭᠡᠷᠡ ᠰᠣᠶᠣᠯ ᠰᠡᠳᠬᠢᠯᠭᠡᠨ ᠲᠡᠢ ᠪᠣᠯᠤᠭᠠᠳ ᠪᠠᠢᠭᠠ ᠰᠢᠦ ᠳᠡ᠃ ᠬᠠᠷᠢᠨ ᠲᠠᠨ ᠤ᠋ ᠬᠢᠨ ᠦ᠌ ᠰᠣᠶᠣᠯ ᠤ᠋ᠨ ᠵᠥᠷᠢᠶᠡ ᠨᠡᠩ ᠢᠯᠡᠭᠦᠦ ᠴᠦ᠍ ᠶᠦᠮ ᠤᠤ ᠳᠠ!》 ᠭᠡᠰᠡᠨ ᠨᠢ ᠰᠠᠨᠠᠭᠠᠨ ᠠ᠋ᠴᠠ ᠭᠠᠷᠳᠠᠭ ᠦᠭᠡᠢ᠂ ᠬᠠᠶᠠ ᠪᠣᠳᠣᠬᠤ ᠪᠦᠷᠢ ᠬᠡᠳᠦᠨ ᠭ᠌ᠷᠠᠮ ᠳᠤᠲᠠᠴᠢᠬᠠᠭᠠᠳ ᠠᠭᠰᠤᠮ ᠲᠠᠯᠪᠢᠮᠠᠷ ᠪᠣᠯᠬᠤ ᠶᠤᠮ᠃ ᠭᠡᠪᠡᠴᠦ ᠡᠨᠡ ᠨᠢ ᠠᠭᠰᠤᠮ ᠲᠠᠯᠪᠢᠬᠤ᠂ ᠡᠰᠡᠬᠦᠯᠡ ᠭᠣᠮᠣᠳᠠᠨ ᠭᠤᠲᠤᠷᠠᠬᠤ᠂ ᠤᠬᠢᠯᠠᠨ ᠬᠠᠢᠯᠠᠬᠤ ᠲᠡᠳᠦᠢᠬᠡᠨ ᠢ᠋ᠶ᠋ᠡᠷ ᠰᠢᠢᠳᠪᠦᠷᠢᠯᠡᠭᠳᠡᠬᠦ ᠠᠰᠠᠭᠤᠳᠠᠯ ᠪᠢᠰᠢ᠃ ᠲᠡᠷᠡ ᠨᠢ ᠣᠯᠠᠨ ᠵᠢᠯ ᠦ᠋ᠨ ᠲᠤᠷᠰᠢᠬᠢ ᠬᠠᠷᠢ ᠦᠨᠳᠦᠰᠦᠲᠡᠨ ᠦ᠌ ᠰᠣᠶᠣᠯ ᠤ᠋ᠨ ᠲᠦᠷᠢᠯᠲᠡ᠂ ᠮᠣᠩᠭᠣᠯᠴᠤᠳ ᠤ᠋ᠨ ᠦᠢᠯᠡᠳᠪᠦᠷᠢᠯᠡᠯ ᠠᠮᠢᠳᠤᠷᠠᠯ ᠤ᠋ᠨ ᠬᠡᠯᠪᠡᠷᠢ ᠳ᠋ᠦ᠍ ᠬᠢᠭᠰᠡᠨ ᠠᠯᠪᠠᠳᠠᠯᠭᠠ ᠶ᠋ᠢᠨ ᠥᠭᠡᠷᠡᠴᠢᠯᠡᠯᠲᠡ᠁ ᠵᠡᠷᠭᠡ ᠲᠡᠦᠬᠡ ᠶ᠋ᠢᠨ ᠡᠭᠡᠵᠢᠭ ᠶᠡᠬᠡᠲᠡᠢ ᠬᠤᠪᠢᠰᠤᠯᠲᠠ ᠠ᠋ᠴᠠ ᠰᠢᠯᠲᠠᠭᠠᠯᠠᠭᠰᠠᠨ ᠪᠢᠯᠡ᠃
ᠴᠢᠩ ᠭᠦᠷᠦᠨ ᠴᠢᠯᠠᠭᠤ ᠲᠣᠭᠣᠰᠬᠠ ᠪᠠᠷ ᠬᠡᠷᠡᠮ ᠪᠠᠷᠢᠵᠤ ᠮᠣᠩᠭᠣᠯᠴᠤᠳ ᠢ᠋ ᠬᠣᠷᠢᠬᠤ ᠪᠠᠷ ᠣᠷᠣᠯᠳᠣᠭᠰᠠᠨ ᠦᠭᠡᠢ᠂ ᠨᠡᠭᠦᠳᠡᠯᠴᠢᠳ ᠢ᠋ ᠲᠡᠢᠮᠦ ᠬᠡᠷᠡᠮ ᠬᠡᠵᠢᠶᠡ ᠴᠦ᠍ ᠬᠣᠷᠢᠵᠤ ᠳᠡᠢᠯᠬᠦ ᠦᠭᠡᠢ ᠭᠡᠳᠡᠭ ᠢ᠋ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠴᠦ᠍ ᠨᠡᠭᠦᠳᠡᠯᠴᠢᠨ ᠪᠠᠢᠭᠰᠠᠨ ᠲᠡᠳᠡ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃ ᠬᠠᠷᠢᠨ ᠮᠣᠩᠭᠣᠯᠴᠤᠳ ᠢ᠋ ᠬᠣᠰᠢᠭᠤ ᠠᠢᠮᠠᠭ ᠬᠤᠪᠢᠶᠠᠵᠤ ᠣᠷᠣᠨ ᠨᠤᠲᠤᠭ ᠤ᠋ᠨ ᠵᠠᠭᠠᠭ ᠲᠣᠭᠲᠠᠭᠠᠵᠤ᠂ ᠬᠣᠭᠣᠷᠣᠨᠳᠣ ᠨᠢ ᠲᠤᠰᠠᠭᠠᠷᠯᠠᠭᠰᠠᠨ《ᠬᠡᠷᠡᠮ》 ᠲᠡᠢ ᠪᠣᠯᠭᠠᠬᠤ ᠨᠢ ᠳᠡᠭᠡᠳᠦ ᠠᠷᠭᠠ ᠭᠡᠰᠡᠨ ᠢ᠋ ᠮᠠᠰᠢ ᠬᠤᠢᠬᠤᠷ ᠤᠬᠠᠭᠠᠨ ᠢ᠋ᠶ᠋ᠠᠷ ᠰᠤᠪᠢᠵᠤ ᠣᠯᠤᠭᠰᠠᠨ ᠴᠢᠩ ᠭᠦᠷᠦᠨ ᠦ᠌ ᠪᠣᠳᠣᠯᠭᠠ ᠦᠨᠡᠬᠡᠷ ᠦᠷᠡ ᠳ᠋ᠦᠩ ᠲᠡᠢ ᠪᠣᠯᠵᠤ᠂ ᠥᠪᠡᠷ ᠥᠪᠡᠷ ᠦ᠋ᠨ ᠬᠠᠷᠢᠶᠠ ᠨᠤᠲᠤᠭ ᠲᠠᠭᠠᠨ ᠣᠲᠤᠭ᠍ᠠ᠋ ᠵᠡᠭᠦᠨ ᠳᠤᠩᠬᠤᠯᠵᠠᠭᠰᠠᠨ ᠮᠣᠩᠭᠣᠯᠴᠤᠳ《ᠮᠠᠨ ᠤ᠋᠂ ᠲᠠᠨ ᠤ᠋》 ᠭᠡᠯᠴᠡᠨ ᠭᠡᠳᠡᠰᠦᠨ ᠳ᠋ᠡᠭᠡᠨ ᠬᠥᠯ ᠢ᠋ᠶ᠋ᠡᠨ ᠬᠢᠯᠴᠡᠬᠦ ᠪᠣᠯᠤᠭᠰᠠᠨ ᠶᠤᠮ᠃ ᠭᠠᠭᠴᠠ ᠵᠢᠱ᠌ᠢᠶᠡ ᠲᠠᠲᠠᠬᠤ ᠳ᠋ᠤ᠌᠂ ᠦᠨᠳᠦᠰᠦᠲᠡᠨ ᠦ᠌ ᠪᠥᠬᠡ ᠪᠡᠨ ᠪᠠᠷᠢᠯᠳᠤᠭᠤᠯᠬᠤ ᠳ᠋ᠤ᠌ ᠬᠦᠷᠲᠡᠯᠡ《ᠰᠡᠳᠬᠢᠯ ᠦ᠋ᠨ ᠬᠡᠷᠡᠮ》 ᠲᠡᠢ ᠪᠠᠢᠭᠠ ᠪᠠᠨ ᠰᠠᠨᠠᠵᠠᠭᠠᠭᠲᠤᠨ! ᠪᠥᠬᠡ ᠶ᠋ᠢᠨ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠠᠯᠳᠠᠪᠠᠯ ᠪᠥᠬᠡ ᠶ᠋ᠢᠨ ᠬᠡᠢᠮᠣᠷᠢ ᠬᠡᠪᠲᠡᠨᠡ ᠭᠡᠵᠦ《ᠥᠰᠢᠯ ᠥᠰᠢᠨ᠂ ᠬᠢᠰᠠᠯ ᠬᠢᠰᠠᠬᠤ》 ᠨᠢ ᠢᠪᠴᠤᠤ ᠰᠠᠨᠠᠭᠠᠨ ᠤ᠋ ᠭᠠᠢ᠃ ᠨᠠᠭᠠᠳᠤᠬᠢ ᠴᠢᠨᠢ ᠦᠨᠳᠦᠰᠦᠲᠡᠨ ᠦ᠌ ᠪᠥᠬᠡ — ᠨᠡᠢᠲᠡ ᠠᠷᠠᠳ ᠤ᠋ᠨ ᠪᠡᠶᠡ ᠶ᠋ᠢᠨ ᠲᠠᠮᠢᠷ ᠤ᠋ᠨ ᠨᠢᠭᠡᠨ ᠲᠥᠷᠥᠯ ᠰᠢᠦ ᠳᠡ᠂ ᠶᠠᠭᠠᠬᠢᠬᠤ ᠭᠡᠵᠦ ᠬᠡᠷᠡᠮ ᠪᠤᠰᠬᠠᠭᠠᠳ ᠪᠠᠢᠨᠠ ᠠ᠋? ᠡᠢᠨ ᠬᠦ᠌ ᠬᠥᠭᠵᠢᠯᠲᠡ ᠶ᠋ᠢᠨ ᠬᠥᠯ ᠢ᠋ᠶ᠋ᠡᠨ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠲᠤᠰᠢᠭᠰᠠᠨ ᠵᠢᠱ᠌ᠢᠶᠡ ᠪᠥᠬᠡ ᠪᠠᠷ ᠯᠠ ᠵᠣᠭᠰᠣᠬᠤ ᠪᠢᠰᠢ᠃ ᠴᠢᠩ ᠭᠦᠷᠦᠨ ᠰᠠᠭᠤᠷᠢ ᠶ᠋ᠢ ᠨᠢ ᠲᠠᠯᠪᠢᠵᠤ ᠦᠭᠭᠦᠭᠰᠡᠨ ᠡᠨᠡ ᠬᠡᠷᠡᠮ ᠤᠯᠠᠮ ᠠᠬᠢᠴᠠᠲᠠᠢ ᠪᠠᠷᠢᠭᠳᠠᠭᠰᠠᠭᠠᠷ ᠪᠠᠢᠵᠤ᠂ ᠬᠣᠰᠢᠭᠤ᠂ ᠰᠤᠮᠤ᠂ ᠭᠠᠴᠠᠭᠠ ᠪᠠᠷ ᠨᠢᠭᠡᠴᠢᠯᠡᠬᠦ ᠪᠣᠯᠵᠤ᠂ ᠪᠦᠷ ᠰᠡᠭᠦᠯ ᠳ᠋ᠦ᠍ᠨᠢ ᠠᠢᠯ ᠠᠢᠯ ᠢ᠋ᠶ᠋ᠠᠷ ᠨᠢᠭᠡᠴᠢᠯᠡᠭᠰᠡᠨ ᠲᠡᠮᠦᠷ ᠤᠲᠠᠰᠤᠨ ᠲᠣᠣᠷ ᠪᠣᠯᠲᠠᠯᠠ《ᠬᠥᠭᠵᠢᠯᠡ》 ᠢᠩᠭᠢᠭᠡᠳ ᠪᠠᠷᠤᠭ ᠶᠠᠮᠠᠷ ᠴᠤ᠌ ᠬᠡᠷᠡᠮ ᠳ᠋ᠤ᠌ ᠬᠠᠰᠢᠭᠳᠠᠭᠠ ᠦᠭᠡᠢ ᠶᠠᠪᠤᠭᠰᠠᠨ ᠮᠣᠷᠢᠲᠤ ᠳᠠᠢᠴᠢᠳ ᠬᠡᠪᠡᠷᠡᠭ ᠨᠢ ᠠᠷᠭᠠ ᠦᠭᠡᠢ ᠲᠡᠮᠦᠷ ᠤᠲᠠᠰᠤᠨ ᠲᠣᠣᠷ ᠤ᠋ᠨ ᠳᠣᠲᠣᠷᠠ ᠪᠡᠯᠴᠢᠭᠡᠷ ᠦ᠋ᠨ ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠢ᠋ᠶ᠋ᠠᠨ ᠪᠣᠷᠳᠣᠭᠠ ᠬᠡᠮᠡᠯᠢᠭᠰᠡᠨ ᠬᠡᠳᠦᠨ ᠲᠡᠵᠢᠭᠡᠪᠦᠷᠢ ᠪᠣᠯᠭᠠᠵᠤ ᠮᠠᠨ ᠤ᠋ ᠬᠢ᠂ ᠲᠠᠨ ᠤ᠋ ᠬᠢ ᠭᠡᠯᠴᠡᠨ ᠰᠢᠳᠦ ᠵᠠᠭᠤᠯᠴᠠᠵᠤ ᠰᠠᠭᠤᠬᠤ ᠪᠣᠯᠵᠤ᠂ ᠠᠬᠠ ᠳᠡᠭᠦᠦ ᠬᠣᠭᠣᠷᠣᠨᠳᠣ ᠪᠠᠨ ᠠᠯᠠᠭᠠᠨ ᠬᠢᠷᠢ ᠭᠠᠵᠠᠷ ᠤ᠋ᠨ ᠲᠥᠯᠥᠭᠡ ᠨᠢᠭᠤᠷ ᠤᠯᠠᠢᠯᠴᠠᠬᠤ ᠭᠤᠨᠢᠭᠲᠤ ᠵᠦᠴᠦᠭᠡ ᠴᠦ᠍ ᠲᠡᠷᠡ ᠲᠡᠮᠦᠷ ᠤᠲᠠᠰᠤᠨ《ᠬᠡᠷᠡᠮ》 ᠦ᠋ᠨ ᠳᠣᠣᠷᠠ ᠲᠣᠭᠯᠠᠭᠳᠠᠬᠤ ᠪᠣᠯᠤᠨᠠ᠃
ᠮᠠᠯᠵᠢᠬᠤ᠂ ᠬᠠᠭᠠᠰ ᠲᠠᠷᠢᠶᠠᠯᠠᠬᠤ ᠬᠠᠭᠠᠰ ᠮᠠᠯᠵᠢᠬᠤ᠂ ᠲᠠᠷᠢᠶᠠᠯᠠᠬᠤ ᠵᠢᠴᠢ ᠬᠣᠲᠠᠵᠢᠬᠤ ᠠᠮᠢᠳᠤᠷᠠᠯ ᠤ᠋ᠨ ᠤᠳᠠᠭᠠᠨ ᠣᠨ ᠤ᠋ ᠬᠤᠪᠢᠷᠠᠯᠲᠠ ᠪᠠᠷ ᠮᠣᠩᠭᠣᠯᠴᠤᠳ ᠰᠣᠶᠣᠯ ᠰᠡᠳᠬᠢᠯᠭᠡᠨ ᠦ᠌ ᠲᠠᠯᠠ ᠪᠠᠷ ᠬᠦᠨᠳᠦ ᠰᠠᠯᠪᠤᠷᠢᠯᠠᠯ ᠭᠠᠷᠴᠤ᠂ ᠥᠷᠲᠡᠭ ᠦ᠋ᠨ ᠦᠵᠡᠯᠲᠡ᠂ ᠭᠤᠸᠠ ᠰᠠᠢᠬᠠᠨ ᠤ᠋ ᠦᠵᠡᠯᠲᠡ᠂ ᠶᠣᠰᠣ ᠪᠡᠯᠭᠡᠳᠡᠯ᠂ ᠵᠠᠩ ᠦᠢᠯᠡ ᠶ᠋ᠢᠨ ᠣᠨᠴᠠᠯᠢᠭ᠁ ᠨᠢ ᠥᠭᠡᠷᠡ ᠥᠭᠡᠷᠡ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠠᠰᠤᠷᠤ ᠲᠣᠮᠣ《ᠰᠣᠶᠣᠯ ᠤ᠋ᠨ ᠵᠥᠷᠢᠭᠳᠡᠯ ᠬᠥᠨᠳᠡᠢ》 ᠪᠣᠢ ᠪᠣᠯᠵᠠᠢ᠃ ᠦᠨᠳᠦᠰᠦᠲᠡᠨ ᠨᠦ᠍ᠭᠦᠳ ᠦ᠋ᠨ ᠬᠣᠭᠣᠷᠣᠨᠳᠣ ᠰᠣᠶᠣᠯ ᠤ᠋ᠨ ᠵᠥᠷᠢᠶᠡ ᠲᠡᠢ ᠪᠠᠢᠬᠤ ᠨᠢ ᠰᠣᠨᠢᠨ ᠪᠢᠰᠢ᠂ ᠪᠠᠢᠬᠤ ᠴᠤ᠌ ᠶᠣᠰᠣᠲᠠᠢ᠂ ᠬᠠᠷᠢᠨ ᠨᠢᠭᠡ ᠦᠨᠳᠦᠰᠦᠲᠡᠨ ᠳᠣᠲᠣᠷᠠ ᠪᠠᠨ ᠰᠣᠶᠣᠯ ᠤ᠋ᠨ ᠵᠥᠷᠢᠶᠡ ᠲᠡᠢ ᠪᠣᠯᠵᠤ ᠪᠠᠢᠨᠠ ᠭᠡᠳᠡᠭ ᠠᠶᠤᠮᠰᠢᠭᠲᠠᠢ ᠶᠤᠮ᠃ ᠰᠣᠶᠣᠯ ᠤ᠋ᠨ ᠵᠥᠷᠢᠶᠡ ᠨᠢ ᠣᠷᠣᠨ ᠨᠤᠲᠤᠭ ᠢᠯᠭᠠᠬᠤ ᠢᠪᠴᠤᠤ ᠦᠵᠡᠯ ᠤᠯᠠᠮ ᠬᠠᠭᠠᠷᠠᠯ ᠶᠡᠬᠡ ᠲᠡᠢ ᠪᠣᠯᠭᠠᠵᠤ ᠥᠭᠭᠦᠨᠡ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠠᠮᠢᠳᠤᠷᠠᠯ ᠦᠢᠯᠡᠳᠪᠦᠷᠢᠯᠡᠯ᠂ ᠰᠣᠶᠣᠯ ᠰᠡᠳᠬᠢᠯᠭᠡᠨ ᠦ᠌ ᠢᠯᠡᠷᠬᠡᠢ ᠵᠥᠷᠢᠶᠡ ᠨᠢ ᠬᠥᠮᠦᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠣᠢᠯᠠᠭᠠᠯᠴᠠᠭᠠ᠂ ᠰᠠᠨᠠᠯ ᠨᠢᠭᠡᠲᠡᠢ ᠦᠵᠡᠯᠲᠡ᠂ ᠭᠤᠸᠠ ᠲᠠᠭᠠᠰᠢᠶᠠᠯ ᠤ᠋ᠨ ᠲᠠᠨᠢᠯᠲᠠ᠂ ᠥᠷᠲᠡᠭ ᠦ᠋ᠨ ᠦᠨᠡᠯᠡᠭᠡ ᠵᠢᠴᠢ ᠵᠠᠩ ᠦᠢᠯᠡ᠂ ᠪᠡᠯᠭᠡᠳᠡᠯ ᠶᠣᠰᠣ᠁ ᠵᠡᠷᠭᠡ ᠣᠯᠠᠨ ᠲᠠᠯᠠ ᠶ᠋ᠢᠨ ᠵᠥᠷᠢᠶᠡ ᠶ᠋ᠢ ᠤᠯᠠᠮ ᠬᠣᠯᠠᠳᠤᠭᠤᠯᠳᠠᠭ᠃ ᠡᠨᠡ ᠪᠣᠯ ᠥᠨᠥᠳᠥᠷ ᠦ᠋ᠨ ᠮᠣᠩᠭᠣᠯᠴᠤᠳ ᠤ᠋ᠨ ᠡᠮᠦᠨᠡ ᠬᠥᠨᠳᠡᠯᠢᠰᠦᠭᠰᠡᠨ ᠬᠡᠷᠡᠮ ᠪᠠᠢᠭᠠ ᠶᠤᠮ᠃ ᠭᠡᠪᠡᠴᠦ ᠡᠨᠡ ᠬᠡᠷᠡᠮ ᠨᠢ ᠴᠠᠭᠠᠨ ᠬᠡᠷᠡᠮ ᠰᠢᠭ ᠥᠭᠡᠷᠡ ᠪᠤᠰᠤᠳ ᠤᠯᠤᠰ ᠦᠨᠳᠦᠰᠦᠲᠡᠨ ᠲᠡᠢ ᠬᠠᠷᠢᠯᠴᠠᠭᠠ ᠲᠠᠢ ᠪᠠᠢᠬᠤ ᠶ᠋ᠢ ᠬᠠᠭᠠᠭᠰᠠᠨ ᠬᠡᠷᠡᠮ ᠪᠢᠰᠢ! ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠳᠠᠭᠤᠤ ᠳ᠋ᠤ᠌《ᠶᠠᠰᠤ ᠶ᠋ᠢ ᠮᠢᠨᠢ ᠦᠵᠡᠶᠡ ᠭᠡᠪᠡᠯ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠢᠷᠣᠭᠠᠷ ᠲᠤ᠌᠂ ᠴᠢᠰᠤ ᠶ᠋ᠢ ᠮᠢᠨᠢ ᠦᠵᠡᠶᠡ ᠭᠡᠪᠡᠯ ᠬᠠᠷᠠ ᠬᠣᠲᠠ ᠶ᠋ᠢᠨ ᠠᠮᠠᠨ ᠳ᠋ᠤ᠌》 ᠭᠡᠳᠡᠭᠴᠢᠯᠡᠨ ᠦᠨᠡᠬᠡᠷ ᠴᠦ᠍ ᠮᠣᠩᠭᠣᠯᠴᠤᠳ ᠮᠠᠨᠢ ᠡᠢᠨ ᠬᠦ᠌ ᠬᠡᠵᠢᠶᠡᠳᠡ ᠬᠡᠷᠡᠮ ᠦ᠋ᠨ ᠢᠷᠣᠭᠠᠷ ᠲᠤ᠌ ᠲᠠᠭᠠᠷᠠᠬᠤ᠂ ᠡᠰᠡᠬᠦᠯᠡ ᠬᠡᠷᠡᠮ ᠦ᠋ᠨ ᠢᠷᠣᠭᠠᠷ ᠲᠤ᠌ ᠡᠷᠡᠰᠳᠡᠬᠦ ᠬᠠᠲᠠᠭᠤ ᠲᠠᠪᠢᠯᠠᠩ ᠲᠠᠢ ᠶᠤᠮ ᠭᠡᠵᠦ ᠤᠤ? ᠪᠢᠰᠢ ᠯᠡ ᠪᠠᠢᠭᠠᠰᠠᠢ!
ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠡᠮᠦᠨᠡ ᠪᠠᠷᠢᠬᠳᠠᠭᠰᠠᠨ ᠴᠠᠭᠠᠨ ᠬᠡᠷᠡᠮ ᠮᠥᠨ ᠴᠦ᠍ ᠣᠯᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠤᠷᠰᠢ ᠠᠳᠠᠯᠢ ᠪᠤᠰᠤ ᠬᠣᠶᠠᠷ ᠰᠣᠶᠣᠯ ᠢᠷᠭᠡᠨᠰᠢᠯ ᠦ᠋ᠨ ᠪᠠᠶ᠋ᠢᠭᠠᠯᠢᠯᠢᠬ ᠵᠠᠭᠠᠭ ᠦ᠋ᠨ ᠬᠥᠰᠢᠶᠡ ᠪᠣᠯᠤᠭᠰᠠᠭᠠᠷ ᠢᠷᠡᠯᠡ᠃ ᠬᠠᠷᠢᠨ ᠥᠨᠥᠳᠥᠷ ᠡᠨᠡ ᠤᠳᠬᠠ ᠨᠢ ᠪᠠᠯᠠᠷᠬᠠᠶ᠋ᠢᠰᠢᠵᠤ ᠣᠮᠣᠭᠰᠢᠯ ᠪᠤᠶᠤ ᠭᠠᠶ᠋ᠢᠬᠠᠮᠰᠢᠭ ᠪᠣᠯᠤᠨ ᠶᠠᠷᠢᠬᠳᠠᠬᠤ ᠪᠣᠯᠵᠠᠢ᠃ ᠡᠨᠡ ᠬᠡᠷᠡᠮ ᠊ᠢ ᠪᠠᠷᠢᠭᠤᠯᠤᠭᠰᠠᠨ ᠨᠡᠭᠦᠳᠡᠯᠴᠢᠳ ᠦ᠋ᠨ ᠬᠣᠶ᠋ᠢᠴᠢᠰ ᠴᠤ᠌ ᠳᠡᠭᠡᠳᠦᠰ ᠦ᠋ᠨ ᠲᠡᠦᠬᠡ ᠪᠡᠨ ᠮᠠᠷᠲᠠᠬᠤ ᠳ᠋ᠠᠭᠠᠨ ᠳᠥᠭᠥᠵᠡᠢ᠃ ᠭᠡᠪᠡᠴᠦ ᠡᠭᠦᠨ ᠦ ᠳᠠᠯᠢᠮ ᠶ᠋ᠢᠠᠷ ᠰᠣᠶᠣᠯ ᠦ᠋ᠨ ᠵᠥᠷᠢᠶᠡ ᠬᠡᠮᠡᠬᠦ ᠠᠰᠤᠷᠤ ᠲᠣᠮᠣ ᠰᠠᠭᠤᠷᠢ ᠳᠡᠭᠡᠷᠡ ᠨᠢᠭᠡ ᠡᠴᠢᠭᠡ ᠶ᠋ᠢᠨ ᠬᠡᠦᠬᠡᠳ ᠦ᠋ᠳ《ᠲᠠᠨ ᠤ ᠬᠢ᠂ ᠮᠠᠨ ᠤ ᠬᠢ》 ᠬᠡᠯᠴᠡᠡ ᠬᠡᠷᠡᠮ ᠪᠣᠰᠬᠠᠵᠤ᠂ ᠬᠠᠰᠢᠶᠠᠨ ᠳ᠋ᠠᠭᠠᠨ《ᠠᠰᠠᠷᠠᠭᠰᠠᠨ》 ᠬᠡᠳᠦᠨ ᠬᠠᠷᠠᠭᠴᠢ ᠦᠨᠢᠶᠡ ᠪᠡᠨ ᠰᠢᠪᠲᠤᠷᠴᠤ᠂《ᠮᠣᠩᠭᠣᠯ ᠬᠥᠮᠦᠨ ᠴᠠᠭᠠᠨ ᠢᠳᠡᠭᠡ ᠡᠴᠡ ᠪᠡᠨ ᠰᠠᠯᠵᠤ ᠪᠣᠯᠬᠤ ᠦᠭᠡᠢ ᠰᠢᠦ!》 ᠭᠡᠴᠢᠬᠡᠭᠰᠡᠨ《ᠠᠮᠤᠷ ᠰᠠᠶ᠋ᠢᠨ ᠳ᠋ᠠᠭᠠᠨ ᠵᠢᠷᠭᠠᠬᠤ》 ᠪᠣᠯᠵᠠᠢ᠁ ᠶᠠᠭᠤᠲᠠᠢ ᠭᠤᠨᠢᠭ! ᠴᠠᠭᠠᠨ ᠬᠡᠷᠡᠮ ᠨᠡᠭᠦᠳᠡᠯᠴᠢᠳ ᠦ᠋ᠨ ᠳᠣᠪᠲᠣᠯᠤᠯᠲᠠ ᠶ᠋ᠢ ᠬᠣᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠮᠥᠨ ᠴᠦ᠍ ᠨᠡᠭᠦᠳᠡᠯᠴᠢᠳ ᠦ᠋ᠨ ᠨᠤᠲᠤᠭ ᠲᠤ ᠢᠷᠡᠵᠦ ᠡᠯᠡᠰᠦ ᠲᠠᠷᠢᠬᠰᠠᠨ ᠴᠠᠭᠠᠴᠢᠳ ᠦ᠋ᠨ ᠬᠥᠯ ᠊ᠢ ᠴᠦ᠍ ᠬᠣᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠠᠷᠠᠨᠲᠤᠶᠠᠭᠠ᠂ ᠪᠠᠶᠠᠨᠴᠡᠴᠡᠭ᠂ ᠡᠷᠳᠡᠨᠢᠭᠣᠤᠠ᠂ ᠢᠳᠰᠢᠩᠬᠣᠷᠯᠣ
ᠬᠢᠨᠠᠭᠴᠢ ᠪᠠᠭᠰᠢ᠄ ᠰᠡᠬᠡᠭᠡᠷᠡᠯ᠂ ᠣᠳᠬᠠᠨᠰᠣᠠ